رواية جراح قلبي الفصل التاسع عشر 19 بقلم جوهرة

نرجس/

كوة مسيطرة على نفسي بالكعدة ماصدكت خالة كالت يلة نروح للبيت ترتاحين 

رجعنا صعب وما ادري بي نزل اول ماطبيت كلت لخالة ..

نرجس / ما ابقى بعد فدوة خالة والله على اعصابي كولشي يذكرني بمعتصم يخليني ابجي الولد ابنهم اسمه عليه وبنته بنته من بوستها اشم بيها ريحه معتصم 

كمت ابجي واشهك حظنتني خالة /ميخالف ماما هاي كل بداية بيها صعوبة صيري قوية

فزيت واني بحظنها من سمعت صوته ..

صعب / عمة ممكن تعوفينا وحدنا

ابتعدت عني واني بقيت مدنكه امسح بدموعي بقينا واكفين بمدخل الهول اشرلي ندخل الهول 

كعد واني رحت كعدت بعيد عنه بس نفس القنفه صوته هادىء حيل من كال

صعب / اكيد هذا مو هين عليج واعترف ما انطيتج فرصة أكثر حتى يبرى جرحج بس صدكيني السويته لمصلحتج ويجي يوم تشكريني كل الاطلبه منج تتصرفين بعقل واحترام وية الكل انتي هسة زوجتي محسوبة علية اي تصرف خطا راح يمسنا اثنينا وخل يكون بعلمج اني موتي ولا اشوف البنت الخفيفة تتصرف بلا عقل لأن ساعتها حسابج غير شكل ومثلما كلت قبل ممنوع تحجين اي شي عن حياتج وية معتصم لأن ماريد اي مشكله تصير 

أما بالنسبة لرجعتج لبغداد تنسيها هسة لأن الزواج هالاسبوع 

فكيت عيني بصدمة لأن ماعندي خبر بهالشي 

فعلا ضوجني ..

نرجس / ماكو زواج شنو اني ماعندي رأي

صعب / صار عندج خبر وحظري نفسج أما بخصوص ام عقيل اني اتصلت بيها اليوم وفهمتها حتى عزمتها وراح ادزلهم سيارة اجيبهم الاربعاء حتى غراضج راح اجيبها ميحتاج ترحين 

هنا عمتي ايمان هي تتكفل بكلشي يخصج ميحتاج ادوخين وتحتارين ترى كله مجرد شكليات لا اكثر يعني لا تعتقدين بيناتنا راح تكون علاقة 

عافني وكام واني لساني انربط من الصدمة يربي صدوك يحجي يعني ام عقيل تدري وما اتصلت علية 

من شفته طلع كمزت وراه وصحت ..

نرجس / مووو بكيفك تحدد واني شنووو موقعي ليش مالي راي ولا قيمة بنظرك 

رجع التفت وخزرني / صوتج هالمرة علة مرة ثانية اخرسه الج وبطريقتي واكيد مراح تحبيها غمزلي بعينه وطلع 

عكدت حاجبي شنو قصده شكد مكروه

دخلت خالة ايمان / تعاي اكعدي ماما خل احجي وياج

رجعت كعدت واني مخروعه من فكرة زواجي الخميس

ــــــــــــــــ

نرجس/ 

مر الاسبوع واني صعب بعد ما شفته بس بناتهم يجون دوم ويبقون وياي حتى رادوني اروح سوك واشتري بعد شغلات ماقبلت بس خالة ايمان طلعت مرة للسوك راحت اشترتلي فساتين وعطور ومكياج وشغلات تكول تحتاجينها بس هذا كله مو بعيني وضغطت علية حتى اروح صالون وكوة قبلت رحت اني وياها بالصالون حجت وية البنية شاورتها وبعدها كالت شوفي شغلج 

واستلمني ورى اربع ساعات طلعت من الصالون واني ما اعرف روحي كد ما متغيرة بترتيب حواجبي وشعري درجته على طوله

ماقبلت إصبعه هو لونه اسود يجنن وشغلات ثانية للجسم طلعت المع حواجبي كالت البنية سوي تاتو اني مقبلت ماحبه عييع 

فبقيت عليهن شمرة حاجبي حلوة ميحتاجله

الصراحه بداخلي حبيت هالشي لأن من زمان ممدللة روحي من ايام معتصم الله يرحمه 

من رجعنا فتت للحمام اسبح وارتاح 

والعصر نزلت يم خالة من شافتني بقت تصلي عالنبي جنت لابسة كلبية تفصال بسيط كولش

خالة باجر الحنه وعندي طلب

ايمان / كولي بنيتي

نرجس / اريد اروح ازور قبر معتصم

تنهدت وصفنت شوية وراحت اخذت التليفون اتصلت بصعب 

سدته واجت / حظري روحج راح يوصل

وفعلا رحنا وهناك بقيت حاظنه القبر وابجي 

وخالة كاعدة بسدي مدنكة 

صعب ابتعد وعافنا من قرا فاتحه خلاني براحتي وراها رجعنا تقريبا المغرب 

اني صعدت فوك مابقيت حتى من صاحتني اتعشى كتلها ما اشتهي

ــــــــــــــــ

وصلت ام عقيل هي وبناتها عقيل ما اجى وياهم رايح لبيت خالته جايبة جنطتي بيها غراضي والذهب والفلوس لأن من أجيت امنتهن عدها 

جان وجودهم وياي ينطيني ثقه بنفسي حسيت عندي أهل مو غريبة بنص عالم ما اعرفهم رغم ترحيبهم بية بس اني غريبة عنهم 

واحتمال إذا يعرفون حقيقتي راح يتغيرون علية ومعاملتهم راح تختلف شمدريني اني بگلوب الناس الله اعلم بيهم 

بقوا يسألون على ام عقيل ويسولفن وياها وهي ماشاء الله تعرف شلون تحجي حتى بناتها موصيتهن لأن ماحجن وطول الوكت يمي ماعافني

الحنه أبيت خالة ايمان النسوان بس اقربائهم والجيران اسمع خالة ايمان تحجي وية سما وربى على أساس صعب ماقبل ميريد هوسة 

حتى العرس بس عزيمة عالغدا ويفضوها لأن كايللهم حاجز فندق

بيوم الحنة راحت وياي سما وعلا للصالون جانت البدله حاجزيها مرتبة لون فيروزي طلعت شي من دخلت للبيت ونزعوني الكاب اسمع البسبسة بين النسوان اني ما اهتميت كثر همي شلون راح اخلص حياتي وية رجال ماريده ولا مفكره بي واني جرحي ماطاب 

كاعدة واجت رونق كعدت بصفي تضحك فدوة شكد حلوة طالعة لابسة بدله ماروني رغم عمرها 12سنة بس ناعمه مبينه اصغر 

بلعت غصة عورته لگلبي واني ذكرى معتصم هاجمتني وبقوة دمعت عيني وازداد توتري من صوت الهلاهل بدخلة صعب 

سلم واجى كعد بصفي عالقنفه زادت رجفتي من طخ ذراعه بزندي وملمس سترتة على بشرتي جلدي كزبر سحبت جسمي مبتعده

لبسني الذهب والبنات يصورن بينا 

اجت رونق والجهال يمنا يردون ياخذون صور ويانة رانيا بيدها الموبايل وتصور بينا اني روحي طلعت بس اريد اخلص اريد ارجع لبيتي بعدما اتحمل رجعت كعدت وصعب واكف وياهم كل شوية وحدة تلزك بصفه تأخذ صورة أشرت لخالة ام عقيل اجت يمي 

شاورتها .. طلعت روحي بعد ما اتحمل

ام عقيل / اششش عيب النسوان عينهن عليج انتظري بس يطلع الولد اصعدج للغرفة 

رجع كعد وجسمه كله التف علية اني متت بدمي حيل قريب صرت اتنفس عطره .. باجر البدلة مستورة ماريد جسمج طالع 

بعدت راسي وعيني بعينه .. خيرر ترى بدلتي مابيها شي 

نزلت عينه على صدري واني تقوقعت على روحي عزا بعينه بدون ميحجي بس نظرته بألف كلمة 

وكف وترخص وهو يتشكر من عماته وأخواته والبنات

تالي الليل بغرفتي كاعدين نسولف اني وخالة ام عقيل والبنات جانت خالة ايمان ويانة بس راحت نامت

ام عقيل / مثلما كلت لاتبقين خايفة الرجال والنعم منه ، وشفتي أهله شلون ناس طيبين

نرجس / الله كريم بعد مدري رب العالمين شنو ظاملي

سمرة / اكلج نرجوسة مبين شايف روحه كلامه بالمثاقيل

انكفخت سمرة على راسها .. ايي يممماااه شبيج

ام عقيل / وغمة أنه كاعدة اقنع البت وانتي داشة صفح عوبة

نرجس / خالة شبيج والله سمرة تفتهم

ام عقيل / اكول نامي وراح يوم طويل يلة انزلن من الفراش ونامن بفراشجن

كامت ام عقيل طفت الضوة ونامن لأن فارشات بغرفة نرجس الي خصصتها ام سما الها

ــــــــــــــــــ

صعب / 

اول مرة ينفرض علية شي وتقريبا مضايج منه اعترف باحساس قوي بلحظة كعدت وطخيت بجسمها تولد عندي شعور البنت هاي نصيبي فعلا ومستحيل اتخلى عنها 

يمكن لان انكتبت باسمي بس هالشعور هذا لحظات اختفى ماحبيت افسره واتعمق كل الاعرفه عجبتني اول ما عيني وكعت عليها وانوب شلون بدلة لابسة بنت الاوادم صدرها نصه ظاهر شكيت بسوالف عمتي ايمان بس غلست ومن اريد اطلع كلتلها باجر تستر جسمها ماريد العين عليها يكفي اليوم النسوان مانزلت عيونهن منها

الاتفاق جان ورى الغدا تصير الزفه قريب العصر اخذها من بيت عمة ايمان نطلع لبغداد لأن حجزت بالفندق

وفعلا كولشي تمام الغدا جان مرتب وجماعتنا والمحبين الله يكثرهم 

اتصلت على عمتي اريد اتاكد خلصوا حتى اروح ارجعهم من الصالون كالت بعد شوي وراح تتصل عليهن لأن هي مارايحه وياها ربى وشهد وياها 

سديته ودحكت بساعتي ساعة ثنتين ونص ممعقولة هيج تاخير قابل شراح تسويلها تلبخها شو البنت حلوة متحتاج صالون

مصطفى / ها عريسنا شو صافن خير

صعب / هلة مصطفى ها السيارات جاهزة

مصطفى / اي وسيارتك رتبناها مثلما ردت شي بسيط وحلو زيناها

صعب / مشكور ظلع اروح اسبح واتحضر

مصطفى / اي يمعود انزع هالدشداشة والبس القاط خل نشوفك عريس

صعب / هههه ديلة رايح

توني دخلت للغرفة انشف بشعري دك موبايلي

صعب / هلة عمة

ايمان / عيني خل واحد من الولد يروح يجيب العروس لو انت تروح بعد بكيفك

صعب / توني طلعت من الحمام بعدني ممتحضر راح اتصل على اياد لو ايهم يلة باي

اتصلت بايهم وكال هسة طالع اجيبهن سديته ورجعت اكمل لبس بهدوء وعيني راحت على جهة ملابس نرجس البارحه عمتي ايمان هي وام عقيل رتبن الغرفة والملابس وحاجاتها وعمتي وصتني اقفل الغرفة من اكمل اخذت العطر رشيته ولبست ساعتي والحلقة مشطت شعري وبعين كلها رضا عن روحي تنفست بهدوء وطلعت سويجي وموبايلي بيدي قفلت الغرفة والمفتاح ضميته بجيب السترة

من شافوني الهلاهل بصوت امي الجانت حيل فرحانة دنكت بست راسها وحظنتها .. بعد روحي يمه

ام حذيفه / يمه بالمبارك الله يسعدكم 

كلها باركتلي نسوان وزلم الجانو بالبيت اخوتي وأخواتي وبنات عمي طلعت بالكراج وبدى الرمي فوك راسي ولد عمتي غزوان وعمار 

أبوية باركلي وهو يمسح على جتفي/ شايف الخير وليدي

بوست ايده وخده / الخير يصيبك تاج راسي

حجي عبدالله / الله يرضى عليك وليدي

طلعت الزلم بالمضيف عمي ولد عمامي وكرايبنا سلمت وكعدت انتظر ايهم يرجع

ــــــــــــــ

نرجس / 

دخلت البيت والكاب مغطي عيوني سما لازمة أيدي خاف أعثر وصلنا اخوه ورجع ، كعدتني بالاستقبال وصوت هلاهل خالة ام عقيل عبالك طلقات 

بلعت ريك واني احاول اصبر روحي وإحساسي تورطت بهذا الزواج سيطر علية 

انتبهت لصوت خالة ايمان / تغدي حتى ترتاحين بعدج عالريوك

ربى / اي والله ماما ميته جوع مو على أساس ادزولنا غدا

ايمان / كلها ملتهية بالعرس غداجن جاهز ضميته على صفحه بالفرن شلون طبخ طيب 

ربى / ههههه يعني هبيط ولحم على هالحجي راح يخرب مكياج العروس 

ايمان / هههه والله ربى عندج سوالف تعاي وراي للمطبخ اسويلجن صينية وتغدن قبل ميوصلون اهل الزفة

راحت ايمان وبنتها والنسوان كامن يركصن شغلن ديجي 

اجت ربى / يلة حبيبتي تعاي للغرفه حتى نتغدى

نرجس / لا عفية والله كولشي ما اشتهي

ربى / يمعودة ترحين تتخربطين على صعب ويحير بيج

ام عقيل / كومي يمه نرجوسة اكلي لكمة

نرجس / خالة والله ما أشتهي

ام عقيل / يلة براحتج .. اكلج احنا وياكم نروح خل يوصلونه للبيت

نرجس / ها اي حاجي صعب هو يدبرها

ام عقيل/ اي حجيت وياه البارحه

گلبي وكع من سمعت صوت الهورنات والطلق يمة متت واني اشوف صعب يدخل بكل هيبة هو وأبوه وإخوته دنكت راسي والكاب يغطي نص وجهي الحجي اجى سلم اني وكفت هو وباس راسي باركلي واني دنكت على أيده حتى أبوسها مثلما علمتني ام عقيل سحب أيده ماقبل / استغفر الله بنتي

كلهم باركولي واني ماشفت شي مدنكه طول الوكت انتبهت لصوت صعب / يلة خل نتوكل 

سحبني من ذراعي ولزك جسمي بجسمه اني ارتبكت وخفت وگلبي يرجف بعد ماحسيت بالناس كثر الربكة الصابتني

بالسيارة وحدنا اني وياه قريب لبغداد ورجعوا أهله هو نزل ودعهم ورجع صعد من شغل السيارة تنفس بقوة والتفت علية يحاجيني /! ارفعي راسج يمعودة ركبتج انكسرت ترى

التفتت واني ارفع الكاب شبح ابتسامة بنظراته وهو يباوعلي رجع التفت بالطريق

صعب / أخذي راحتج مبين عليج متوترة 

سكتت مارديت عليه لأن فعلا اني متوترة اصلا راح اتخربط واني افكر شلون راح تجمعنا غرفة وحدة 

هم جديد انظاف لهمومي الجبيرة دنكت وعيني راحت على أيده لابس حلقة يمكن اليوم لبسها 

وصلنا الفندق بالليل الجو شتا من نزلت حسيت قشعريرة صابتني وبديت ارجف من جنت بالسيارة ماحسيت لأن تدفئة مشغل 

نزل جنطة وحدة سحبها ومشى كدامي كمل الإجراءات وطلعنا السويت 

قفل الباب واجى يتمشى علية وكف قريب حيل ورفع الكاب .. نفسي يصعد وينزل بقوة واني حذرة من أي خطوة راح يخطيها واي حركة يسويها رجعت خطوة ورى من لنرفع الكاب عيونه تحوم علية كولش خجلت

صعب / ماشاء الله مبروك الزواج ولو حبر على ورق بس حتى تكمل المسرحية 

بقيت صافنه عليه رفع أيده وأشر بأصابعه

صعب / اخذي راحتج ترى مراح اتصرف بشي من الجاي تفكرين بي يلة اروح اتوضى اصلي و

اوصي على عشا

راح طلع ملابس يبدل واني انطيته ظهري كعدت عالجرباية افرك بيدي الحمدلله الجو دافئ هنا سمعته يتصل عالفندق يطلب عشا عفته شعلية عليش اهتم خل افكر بروحي اخذت دشداشة من الجنطه وفتت للحمام نزعت البدلة ولبست توضيت ورى ما نظفت وجهي من المكياج والبدلة طلعتها من الحمام خليتها مصفطه على جهة 

شفته يصلي ورى ماكمل اخذت السجادة وكفت اصلي والحمدلله حسيت براحه شوية وبقيت اسوي تسابيح وادعي كملت ورحت اتمددت عالفراش لأن حيل تعبانه يمكن تعبي النفسي أكثر من الجسدي 

احتاريت هو وين راح ينام يربي هاي شلون سالفة 

بالكنتور جان اكو غطى زايد طلعته وأخذت مخده ذبيتها عالكاربد من جهة السرير الثانية 

وتلفلفت بالغطى وغمضت بس احس روحي ماعت من الجوع كولشي مماكلة على الريوك

ورى فترة غفيت واسمع صوته يصيح باسمي اول مرة اسمع اسمي بلسانه رمشت واني افز بفراشي كعدت وسحبت شعري على جهة وحدة 

واكف على راسي / تعاي تعشي ليش تنامين بدون عشا

نرجس / نعسانه وتعبانه

رجعت غطيت راسي باللحاف جان يسحبه وشمره على جهة ..

صعب / ادري بيج مماكله لاتمثلين علية بعدين الاكل ماعليه حرج جوعانة تأكلين عليش المستحاه

مصيت شفايفي وعدلت كعدتي .. ما أشتهي

ضحك وهو يسمع صوت معدتي خرب شلون فشلة 

عافني وراح كعد عالكرسي والأكل كدامه عالطبله 

جنت حيل مستحية اكعد وياه وحدنا وهدوء ونتعشى سوية 

كاعد وعينه علية ينتظرني استحيت وكمت واني مدنكة وشعري نزل على وجهي سحبته ورى وكعدت مقابيله عالكرسي

صعب / يلة سمي بالله

تعشينا واني كوة ابلع اللكمة تعشى وكام غسل ايديه واني لملمت الاكل الباقي وضميته بالثلاجة هو والعصير 

غسلت ورجعت باوعت على صعب متمدد بالفراش وفاتح موبايله بعدها قفله ونام صاح طفي الضوة من يمج 

طفيت الضوة ورحت انحشكت بفراشي 

ماحسيت على روحي من نمت الا الصبح صعب يكعدني 

فزيت اريد استوعب وين اني بقيت مفهية بوجه صعب الا طكطك اصابيعه بوجهي يله انتبهت 

صعب / تحظري نرجع يلة اني انتظرج

لينا / شنو وين نروح هسة

صعب / نرجع لديالى بس بالاول نمر مطعم نتريك

فزيت واني اسمعه معقولة يرجعني لديالى والاتفاق والشروط اعيش بالبيت

نرجس / شسوي بديالى اني ارجع لبيتي هنا

رفع تك حاجب / بيتج المكان الي اكون موجود بي فاهمه

دفعت الغطا وكفت صار قريب علية / لااا هاي مهزلة والله مجان هيج اتفاقنا

صعب ،/ انتي كل عقلج ابقى هنا والعالم ينتظرون نرجع

نرجس / ارجع وحدك اني ابقى هنا اروح لبيتي

صعب / لا تعصبيني من الصبح يلة حظري روحج اني راح انزل جوا من تكملين رمشيلي

عافني وطلع واني بقيت اكمز لأن ماريد ارجع لديالى ماريد اكون بين أهله خايفه منهم خايفة يعرفون اني منو ويسوولي مشاكل لأن اكيد مراح يرضون واني جنت ضرة بنتهم

بقيت واكفه افكر واني دايخة بالسمعته بعدها رتبت الفراش وشلت الغطا والمخدة 

وفتت للحمام بيدي منشفة وثوب قطعة عدلة مقفل لون اسود واحمر كملت سبح وحظرت روحي وراها صليت الصبح دك موبايلي هذا رقم صعب فتحت خط وأجاني صوته يغرد

صعب / وينج ساعة صار

نرجس / ترى نص ساعة وبعدها مخلصانة 

صعب / لا بلة فوكاها تتعيقل يلة فضيها اني صاعد الكاج جاهزة

سدة بوجهي واني رحت كملت والبدلة خليتها بالجنطه حشكتها كوة وسديت السحاب 

واكفه البس شالي دخل الغرفة أيده بجيب البنطرون جان لابس متكشخ عالاخر

بقى صافن عليه يمكن ماعجبه لبسي لأن نفنوفي يوصل نص ساق جوا الركبة بس لبست جوارب اسود شفاف 

راح سحب الجنطه وطلع واني لحكته بالسيارة شغلها وطلع وفتح قرآن بقيت استمع ومغمضة عيوني حسيت على طبكت السيارة

صعب / انزلي نتريك

نزلت وياه تريكنا بدون ما نحجي أو نتناقش بالصار بالفندق باوعت على ساعتي هسة بالعشرة رفع تك حاجب من شافني صافنه عليه اني ونزلت راسي جنت ممنتبهة رجع طلب جاي شربه وذبه للأستكان عالميز يله محتاجه شي لو نروح

وكفت وجنطتي بيدي راح دفع الحساب وطلعنا وبالطريق التفتت عليه وأيدي على ذراعه .. صعب عفية وديني لبيتي

منظرها ونعومتها وايدها البيضا الترفه على ذراعي خلتني ما اركز بالطريق واني من البارحه احاول اسيطر على تحكمي بنفسي وجودها وياي وهي على ذمتي وحلالي هز سكوني وراحتي الجنت مسيطر عليها سنين 

بس مو صعب الي ينهزم لااا مستحيل

مديت أيدي ودفعت أيدها وهي استحت لأن خدودها احمرت ..

صعب / ماريد اي نقاش انتي عروس بنظر الكل وراح تتصرفين على هالاساس

مالتفتت بعد جنت مركز بسياقتي وهي بقت ادردم معاجبها كلامي 

نترت بعصبية جنها بعد ما تتحمل / انت كذاب قشمرتني حتى اقبل بيك

لزمت بريك بسيارتي وطبكتها على صفحه والتفتت عليها واني اريد اكفخها على هيج لسان 

شكرا لزيارتكم عالم روايات سكيرهوم