رواية بنت الكهوجي الفصل الواحد والعشرون بقلم احمد
- وشلون نتغلب على مخاوفنا
- ماعرف
- نتغلب عليهن بانو نواجههن مرة وثنين وثلاثة الى ان تصير عادية عندنا وما نخاف بعد منهن
- بس......... وماعرف شنو احجي
- بس شنو
- ماعرف
- يلا تشجعي واحجيلي علمود تتغلبين على هالخوف
- هوووووووف سحبت نفس بقوة كأني اريد اغطس بماي وبلشت احجيلها من قبل لا تتوفى ماما بيوم وبهالاثناء جابت العصير ياسمين
تشكرناها ومن طلعت شربت العصير وحسيتو اجى بوقتو لان انطاني شوية وقت استجمع بيه قوتي مرة ثانية وبعدها كملت كلامي
جنت احجي وكالعادة ما گدرت ابقى قوية ورجعت دموعي تجري بغزارة وخصوصا من اتذكر نومة باسم يوميا بفراش ماما من شوقو الها
بقيت احجي وكالعادة هي ساكتة الى ان وصلت لجيتنا اني وبابا للانبار وسكتت لان فعليا حسيت روحي تعبت من كثر البجي
حسيت الدكتورة جانت عدها هواي اسئلة خصوصا اخفاء بابا الي لان حبيت احجي الاسباب من احجي عن وفاة بابا مثل ما صار بالضبط
الدكتورة : تعبتي
- اي
- لعد هاي هي رغم عندي هواي اسئلة
- راح تعرفيهن بعدين
- تمام لعد ماراح اسأل علمود اتشوق لتكملة قصتج
- تمام
- گالولي تريدين تزورين اهلج
- اي صحيح طلبت من الحجية هالشي
- زين تسمعين نصيحة صديقتج
- اي اكيد
- لا تزوريهم هسا
- ليش
- بالوقت الحالي انتي دا تطلعين من حالة الانهيار شوية شوية وروحتج هناك راح تضرج هواي
- بس مشتاقتلهم
- اعرف حبيبتي اعرف بس تحملي هالفترة هاي ومن يصير الوقت مناسب اني اگلج وتروحين
- بحزن .. تمام
- اعرف صعبة عليج تتحملين بس هالشي لمصلحتج انتي
- ماشي
حجينا شوية وبعدها راحت الدكتورة ورجعت اية يمي بس الحلو باية ما تسألني شنو حجيتي ويا الدكتورة نهائيا ولا كأنو جانت موجودة الدكتورة
بذاك اليوم بقيت مخنوگة بسبب ذكرياتي الى ان نمت بالليل وثاني يوم انعاد نفس الروتين بس اتبعت نصيحة الدكتورة واجلت زيارة اهلي
ولان الدكتورات يوم يجن ويوم لا فبذاك اليوم ما اجن وهم من الصبح للضهر ويا ياسمين بقيت ومن الضهر لليل ويا اية
صحيح اية ملتهية بدراستها بس ما جان عندي مكان اروحلو غير الغرفة بوجود تميم واخوانو وبنفس الوقت باوقات استراحة اية تحجي وياي
باليوم الي بعدو هم اجت الدكتورة الاولى فحصتني وگالت صحتي دا تتحسن بشكل ممتاز والعصر اجت الدكتورة النفسية
بهذا اليوم بالتحديد انهاريت الى ابعد الحدود واني احجي اتذكر من حضنت راس بابا بعد ما توفى واحس نفسي هسا حاضنتو
حتى الدكتورة صارت تبجي وياي للمرة الاولى ومن وصلت لاستشهاد بابا (نطق الشهادة) صرت گوة اسحب النفس حتى الدكتورة خافت علي
اخير شي جسمي ما تحمل كل هالضغط النفسي هذا والاختناق وفقدت الوعي وممكن هذا افضل شي صار وياي لان ما جنت گادرة اتحمل
گعدت الساعة 10 بالليل وجنت احس راسي صاير طبل ويوجعني وجع مو طبيعي من گلت اخ انتبهتلي اية واجت ركض علي
اية : ها ياقوت شلون صرتي فدوة احجيلي بيج شي
- راسي يوجعني
- هسا هسا اجيبلج علاج
- تمام
راحت ركض جابتلي بندول اخذت الحبة ورفعت جسمي على طرف السرير علمود شوية يتحرك جسمي لان حسيتو متشنج
اية : احجيلي يوجعج شي غير راسج
- اشرتلها براسي بمعنى لا
- والله وگفتي گلوبنا اليوم
- شصار بالضبط
- الدكتورة تگول دا تحجين وانهاريتي كلش وبالاخير فقدتي الوعي
- تمام
الحجية : دخلت للغرفة .. ها بنيتي شلون صرتي
- زينة
- الحمدلله على سلامتج
- الله يسلمج
ياسمين : الحمدلله عالسلامة ياقوتة شلون صرتي
- الله يسلمج الحمدلله
- يلا گومي تعشي علمود تاخذين علاجج
- مو مشتهية
الحجية : ماكو مو مشتهية گومي يلا غسلي وتعشي
- بس........
- يلا گومي ماكو بس وما بس
- تمام
سندت نفسي اريد اگوم واجت اية سندتني گلتلها ما يحتاج مابي شي گالت محد طلب رايج يلا امشي لا اضربج جلاق (اضربج برجلي)
رغم الوضع الي جنت بيه بس كلامها خلاني ابتسم غصب عني ورحت وياها للحمام غسلت وجهي وايديني ورجعنا للغرفة
جانت ياسمين مسوية معلاگ وماعرف اذا علمودي ولا هم مشتهينو من بلشنا عشى اني واية نزلن الحجية وياسمين يتعشن ويا تميم
جان المعلاگ كلش طيب مثل باقي طبخ ياسمين ولان اكلي قليل هالفترة جنت كلش جوعانة وبسبب ضوجتي حطيت حرگتي كلها بالاكل
يمكن بحياتي كلها مو ماكلة هالكمية ولان اية من النوع الي تكون هادئة وقت الاكل فما حسيت بنفسي الا اني منتفخة من گد ما اكلت
من خلصت انتبهت لنفسي وكلش افتشلت گلت هسا يگولون ما تريد وهيج لعد لو تريد تاكل جان اكلت العائلة مع العشى
بس اية ما حسستني باي شي من خلصت عشى بكل هدوء اخذت الصينية وراحت نزلتها تحت وبين ما رجعت اني توضيت علمود اصلي
جان مأذن العشاء قبل ما اگعد فصليت المغرب والعشاء ورجعت احجي ويا اية بمواضيع مختلفة وجنت متعمدة احجي وياها
ما جنت اريد ابقى ساكتة اريد شوية التهي وماكو طريقة افضل من انو احجي ويا شخص وخصوصا شخص محبوب مثل اية
بقيت احجي وياها الى ان نعست بسبب العلاجات وتمددت بفراشي وغمضت عيوني كل قوتي علمود ما ينزلن دموعي بس كالعادة اكيد نزلن
بقن عيوني مسكرات بس رغم هالشي دموعي ينزلن الى ان نمت وخدودي مبللات بالدموع وما گعدت لثاني يوم الصبح
رغم ثاني يوم الدكتورة مو موعدها بس اجت علمود تطمن علي وما خلتني احجي علمود اخذ وقت اكبر وترتاح نفسيتي اكثر بعدين اكمللها
وما بقت هواي شوية وراحت ومر اليوم طبيعي بس طول النهار احس نفسي مثل المخنوگة وكأنو اكو فدشي كاتم على نفسي
ثاني يوم الدكتورة الي تفحصني اجت ومن شافتني متحسنة گالت راح اصير اجي كل اسبوع واذا صار شي خابروني واتفقت ويا الحجية على هالموضوع
والعصر اجت الدكتورة النفسية وبدون ما هي تشجعني بلشت احجيلها لان تذكرت كلامها من تگول اذا نريد نتغلب على مخاوفنا لازم نواجهها
وهالمرة ختمتلها قصتي الى ان اجت هي علي وبلشت تسألني اسئلة عن اهلي عن احساسي من فقدت كل واحد منهم
رغم جنت ابجي واحجيلها بس جانت تتعامل وياي طبيعي ولا كأني دا ابجي واستمرت على هالحالة لحد ما خلصت اسألتها
وقتها كلش فرحت هي انو گدرت اكمللها قصتي واسألتي بس گالت بعد ما انتهى الموضوع وراح تكمل وياي الى ان هي تقرر ايمتى نتوقف
تسريعا للاحداث
مرت الايام صعبة كلش علي اني رغم اهتمام اهل تميم بس انتظر قرار الدكتورة على نار علمود ازور اهلي بس ما حبيت افتح الموضوع الا هي تقرر
وصارت بين يوم ويوم تجيني وتخليني احجيلها قصتي من جديد وتحاول تركز على اكثر الاحداث الحزينة بقصتي وتخليني اعيدهن مرارا وتكرارا
جانت هاي الطريقة تخلي شوية تأثري بالمواقف قليل وبين كل مراجعة ومراجعة تتحسن نفسيتي اكثر واكثر ويكون التغيير واضح كلش
وبسبب الفترة الطويلة الي گضيتها ويا اية تعرفت عليها وعلى اهلها بشكل كامل وروحها الطيبة وحركاتها الطفولية كلش ساعدتني
صحيح مو ناسية اهلي ومستحيل انساهم بس صار حزني عليهم اهون بهواي عن قبل ووصلت لدرجة انو انسى نفسي مرات ويا اية واضحك
وبعد ما نخلص كلامنا استغرب انو جنت قبل شوية اضحك واحمد ربي انو دا يساعدني بانو اتخطى الحزن بس بنفس الوقت ماعرف شضاملي المستقبل
الدكتورة الثانية خلال شهرين خلصت مهمتها وبعد ما تجي والدكتورة النفسية بقت وياي 3 شهور وتأكدت 100% اني تغيرت يلا عافتني
رغم ما اهتميت للدكتورة الثانية من عافتني بس هاي الدكتورة زعلت عليها لان من صدگ اعتبرتها صديقتي وجنت كلش افرح بوجودها
واكيد اي احد بمكاني راح يفتقد انسان كضى وياه 3 شهور وخصوصا انو يحجيلو وجعو وهمومو وفرغ كل الي بگلبو بوجودو
اخر مراجعة جانت هي هم حزينة على فراگي بس مو مثلي لان هي متعودة انها تفترق عن المرضى الي تعالجهم
الدكتورة : حانت لحظات الوداع هسا
- ما اريد اودعج تعودت هواي على وجودج
- اني موجودة دائما رقمي يمج ووياه عنوان العيادة مالتي تگدرين تزوريني ايمتى ما تحبين
- إن شاء الله
- وهسا اخر مقابلة راح تكون مثل الاولى اريدج توعديني تبقين ملتزمة بصلاتج وقراءة القران وتذكرين اهلج دائما بالدعاء
- تمام
- وكل ما تحسين نفسج ضايجة او بحاجة لانو تحجين لاحد عن همومج بس اتصلي علي او تعالي للعيادة وراح اكون كلي اذان صاغية
- شكرا الج ما قصرتي نهائيا وياي
- والخبر الحلو انج حاليا تگدرين تزورين اهلج باي وقت تريديه
- صدگ والله
- اي حبيبتي فشوفي الوقت الي يناسبج وروحي
- إن شاء الله
- يلا حبيبتي مع السلامة او الى اللقاء القادم باذن الله
- الله وياج وإن شاء الله تبقين بحفظ الله
- واياج
ياقوت : بعد الوداع طلعت من الغرفة ولان تميم موجود تحت ما طلعت وياها وگلت بس يطلع تميم اگول للحجية علمود زيارة اهلي
تميم : مرت الايام وجان خوفنا على ياقوت هو الشي الوحيد الي شاغل بالنا بس الحمدلله ويا مراجعات الدكتورات بلشت تتحسن
جنت دائما احاول اتواجد قبل ما تروح الدكتورة النفسية علمود اطمئن عليها والحمدلله جانت دائما الاخبار تبشر بخير
مرة وحدة خفنا عليها من فقدت الوعي بس الدكتورة طمنتنا انو هالشي عادي ومن نزلت اية اخذت بندول راحت امي علمود تتطمن عليها
من رجعت طمنتني انها زينة بس عدها صداع ومن بعدها ما صار شي ممكن انو يشغل بالنا وبالنسبة لزيارة اهلها اني طلبت من الدكتورة تقنعها تأجلها
جنت خايف انو اخذها وهي بذيج الحالة وتنهار ببغداد واحتار وياها والحلو بيها انو ما عارضت او حاولت تقنعنا بالعكس فورا اقتنعت
باخر يوم اجت بيه الدكتورة جنت گاعد كالعادة ويا امي بالصالة التحت وانتظرناها لحد ما خلصت مراجعتها ويا ياقوت واجت يمنا
الحجية : هسا شلون صار وضعها
الدكتورة : الحمدلله حاليا صارت ممتازة بس تعرفون تبقى ذكرياتها ويا اهلها بتفكيرها بس راح تگدر تتحمل وتصبر اكثر من قبل بالف مرة
- يعني ما نخاف عليها منا ورايح
- لا حجية لا تخافون بعد من هالناحية لان الحمدلله تخطت الموضوع وراح تبلش حياتها كأي بنت ثانية بس يبقى عليكم مهمة وحدة
- شنو هي المهمة
- ياقوت عاشت يمكم هاي الفترة صحيح بس الي اعرفو دائما منعزلة بالغرفة واكثر شي متعودة على اية
- اي صحيح بس شنو المطلوب مننا
- لازم تخلوها تنسجم وياكم وتعتبركم عائلتها مو تعتبر نفسها غريبة عنكم وهالشي لازم انتو تنفذوه بدون ما تحسسوها بهالشي
تميم : دكتورة احنا امنيتنا هيج بس اكو هواي اسباب تمنع هالشي هذا
- شنو هي الاسباب
- ابسط سبب هي متعودة ما تگعد او تطلع گدام رجال بدون خمار فطول ما احنا وهي نتجنب شوفتها بدون خمار فراح تبقى تحس نفسها غريبة
- اني طبعا اشجعها على هالشي بس متأكدة ويا الوقت راح تنزع الخمار گدامكم من توثق بيكم ثقة كاملة وتعتبركم عائلتها
- بس ابوها طلب منها تلبس الخمار
- ابوها طلب منها هالشي لان جان خايف عليها حتى لو واثق بيكم يبقى خايف على بنيتو لان راح تبقى وحدها بدون لا سند ولا شي
وهي تعرف هالشي فمن تعرف انو صار لازم تنزع الخمار هي لحالها راح تنزعو بس هالشي يتطلب شوية وقت وإن شاء الله مو هواي
- إن شاء الله بس شنو افضل طريقة بانو نخليها تنسجم ويانا
- مثلا خلوها تنزل ويا البنات حتى اذا انت موجود خلوها تتعرف على اهلك تعرفكم عن نفسها حاولو انت او اخوانك توصوها على اشياء بسيطة
هاي التصرفات ويا الوقت تخليها تحس نفسها وحدة منكم وراح تنزاح كل القيود الي بينكم وبينها
- شنو تريديني اجيب اخواني هنا بوجودها
- شنو مو واثق باخوانك
- اكيد واثق بس يبقى هالشي غلط
- اذا يعتبروها اختهم مو غلط وهي راح تبقى گدامهم بحجابها وملابسها المستورة
الحجية : هاي الاشياء بعدين نطبقها بس المهم انو تطمنا عليها
- الله يطمن بالكم دائما وحاليا اني استرخص
- مرخوصة الله وياج بنيتي والله يجزاج الف خير
- يجزاج الجنة مع السلامة
- مع السلامة هلا بيج
