رواية جراح قلبي الفصل الواحد والعشرون بقلم جوهرة
نرجس /
گلبي كام يضرب بضلوعي واني اتخيل الراح يسوي بية خرب حظي كله صوجي اني استفزيته شمدريني هيج خبالات طلع عضيت شفتي بقوة واني احاول ادور على حل ماحس الا طبك السيارة بالباب ونزل افتر على جهة الباب فتحه وسحبني من ذراعي بقوة ردت الطخ بالكاع دخلني البيت يسحب بية فتح الباب بعدما أخذ المفاتيح بقوة ، وأيده مسيطرة على ذراعي دخلنا ومباشرة للغرفة شمرني عالجرباية ورفع أصبعه وعيونه فاكهن بعصبية / انتي متفهمين إلا بالقوة و هذا الراح اسوي
عطت واني أشوفه ينزع السترة وشمرها وبدى يفتح دكم القميص تخبلت كمزت زمخ بية وهو يتقرب ويدفعني بصدري / ووويييين
الخوف سيطر علية وأحس رجفة صعدت لأعصابي مو بس جسمي و هوو يصير فوكاية نفسي بصدري يصعد وينزل وفاكه عيني بقوة واني احاول ادفعه نزل على وجهي لثم خدي وعضة وسحب شفايفة بخدي وطبكها على شفايفي
اني اتخبلت احرك براسي اريد ابتعد سحب شالي بقوة ونزعه ومد أيده لسحاب النفنوف فتحة ونزل لرقبتي وصدري وملمس شفايفة ولحيته على بشرتي خبلني بجيت بحركة واني اتوسله يبعد عني والخوف شلني عطت ودموعي تنزل / حراااام عليك عوووفني اني معذورة ولك دورررة
نتر بية وايديه تعصر بجسمي / جذاااابة هسة أتأكد من هالشي
راح يكشفني لأن الصبح جنت متنظفة منها وسبحت توسلت بي واني أشوفه يرفع طرف نفنوفي ..
نرجس بهلع / حلفتك بالله تعوفني والله ما احجي ابد ينكص لساني إذا احجي فدووة صعب
خربت بجي كمت اشهك بالبجي بصوت عالي واني أتوسل بي خبلني الحقير سوالي رعب
ماصدكت من سحب ثوبي وغطى فخذي الجان بارز رفع جسمه وكعد بسدي وهو يلهث بقيت على وضعيتي نايمه على ظهري ونفسي يصعد وينزل بصدري عيشني لحظات رعب واني احاول امنعه ،ة جان مصمم على هالشي بس اخر لحظة تراجع
سحبت جسمي ونزلت رجلية من الجرباية
انتبهت عليه مسح وجهه بقوة ورفع راسة للسكف جر حسرة وذبها وهو يكول / راح اطلع للسيارة رتبي روحج والحكيني
كمت وكفت عالمراية وشالي بيدي وجهي طكع حمرا وشفتي الجوة اثر بوساته واضحه نزلت دموعي واني احس بضعف يسيطر علية طلعت للمغاسل غسلت وجهي بقوة ونشفته عدلت نفنوفي ولبست شالي وطلعت
،،،،
طول الوكت يسوق وكأنو مالي وجود ومن صرنا قريب للبيت كال / متحجين اي شي مفهوم
هزيت راسي واني مستوعبة الدرس الي انطانياه
بالبيت استقبلونا فرحانين بينا اني كعدت شوية وياهم واشرت لوحدة من الجناين اجت والله حتى اسمها نسيته / عفية اريد اروح للغرفة
/ اي حقج حبيبتي اكيد تعبانة يلة كومي
طلعنا وعين صعب تراقبني دخلت غرفتي بعدما جابت المفتاح عافتني وطلعت واني رحت طلعت قفطان لون زيتوني ولبسته شسوي لعد العين علية عروس وكذا لازم اتكشخ .. دخل صعب وقفل الباب اجى تقرب علية خفت ودنكت راسي ..
صعب / ارفعي راسج وانتبهي تتصرفين مثل أي عروس جديدة ومن نكعد تجين تكعدين بسدي وصوتج ماريده ينسمع
نرجس بصوت يادوب ينسمع / ان شاء الله
فات للكنتور طلع دشداشة شتوي لونها حني نزع ملابسة اني صديت على جهة كملت ترتيب وهو لبس واجى وكف وراية جسمه يطخ بجسمي سحب مشط من ميز تواليت ومشط شعرة ولحيته ورجع تعطر وطلع بقى واكف بالباب واشرلي / يلة نطلع نكعد يمهم شوية
طلعنا ومن دخلنا الهول خالة كامت تصلي عالنبي مبين فرحانة لزواج ابنها
حضرو الغدا وكعدنا كلنا اني كعدت بصف صعب مدنكه راسي الحجي ابو صعب يرحب ويهلي وهو يحجي وية صعب يدير بالة علية
ورى الغدا انسحبت للغرفة نزعت لبست كلابية وأخذت سجادة مديتها حتى اصلي الظهر
كملت وصفطت السجادة ورحت كعدت عالجرباية بقيت اتصفن ماعندي شي اسوي واستحي اطلع يمهم
انفتحت الباب ودخل صعب وياه ولد اثنين صغار مبين عليهم الخجل عرفتهم ولد اخوته واحد منهم يصيحه بابا اني عكدت حاجبي من سمعته بس ماحجيت
اجو كعدو بسدي شكد حلوين اني عرفتهم بس نسيت أسمائهم تذكرته من صاحهم صعب انطاهم فلوس وطلعوا
قفل الباب واجى كعد وجسمه طخ جسمي اني ابتعد وانتجيت على تك ايد واحاول اسيطر على خوفي موقف الصار مجاي يروح من بالي
صعب /
جنت احاول اكون مسيطر على روحي وياها ماردت ااذيها باي تصرف بس كلامها وياي وعنادها استفزوني رغم محذرها من هالشي بس حيل تمادت شلون تريد تحجي واني كل الجاي اسوي في سبيل تبقى صورة معتصم حلوة بعين زوجته وولده وحتى أهله صح هذا حقه وما سوى شي حرام بس اعرفهم مراح يتقبلون هالشي
مجان بيدي الا اضغط عليها واخوفها جانت تستحق هالدرس وأكثر خل تعرف اذا تندك بية شيصير اعترف اني عصبي وانسان جدي اغلب الوقت هذا طبعي بس مو طبعي احب الاذية اني ماردت ااذيها كل الردته اخليها اتوب حتى مرة ثانية متحجي
الخوف بعيونها وبجيها وتوسلها واني اتقربلها خلاني أتراجع بأخر لحظه
ابتعدت عنها بلحظة جان احساسي بملمس بشرتها وطعم شفايفها بدى يسيطر علية اول مرة اتقرب على بنت بهاي الطريقة لأن علاقتي وية النسوان ززززفت جنت أبعد اي فكرة عنهن حتى بالحالات أو فترات تمر علية احتاج ارتاح اتجه لصلاتي و لشغلي وطلعاتي وية جماعتي الشباب ماكو وحدة تستحق اشغل نفسي بيها هالشي صار تعويد عندي سنين واني على هالحال وبالي مرتاح بس الصار اليوم هيج حواسي الجانت متيقضة لكل لمسة من جسم نرجس وكدرت ابتعد عنها
التفتت عليها حيل جميلة شعرها الناعم نازله خصل منه على وجها والباقي مفتوح يغطي متونها بقيت عيني عليها واني افكر بعلاقتنا ومصيرها
من شافتني صافن بيها وكفت تتهرب مني مددت عالفراش وسحبت الغطا جانت فرشة بيضا فارشين / طلعي بطانية من الكنتور وغطيني
جابتلي وحدة وذبتها علية واني اريدها أدلك راسي
صعب / تعاي اكعدي ودلكي راسي يوجعني
كعدت بصفي ومدت ايد وحده تحركها بخفة على شعري
صعب / كلت افركي مو دغدغي
بدون ماتحجي مسدت على كصتي والجوانب بهدوء اني غمضت وشبكت أيدي على صدري مرتاح لهذا الشي
نرجس /
العصر البيت جان مليان نسوان سلمت عليهن وكعدت مدنكه راسي بس اسمعهن يتبسبسن بيناتهن جنت لابسة قفطان كريمي مشغول بخيوط ذهبية وكرستالات ورتبت وجهي بمكياج هادىء بس حاولت اخفي العضة قريبة على اذني ولو جان الشال مغطي عليها
رفعت راسي من حجت وياي ام صهيب الي كعدت بسدي عالقنفة
رانيا / عيني عروسة اخوية الغالي ارفعي راسج فدوة شلون جمال
نرجس / اشكرج
التفتت على مرية كاعدة بصفها وكالت / ها عمة شفتي صعب شلون نصيبه حلو
/ اي بالخير والمبارك وان شاء الله تشيل من جوا
اني بقيت صافنه على حجايتها ما فهمت شنو قصدها بس اسمع رانيا تكول أن شاء الله يارب
حظنتني رونق وهي تبوس خدي / خالو صعب يحبني واني احبج
حظنتها وبستها / فدوة حبيبتي شكد حلوة ونازكة واني اموت عليج
رانيا / هههه نرجسة عيني ترى رونق حبيبة صعب خوما تغارين من بنتي
نرجس / لا ليش اغار تستاهل وردة الله يحفظها
رانيا / تسلمين عيوني
صفا / ها رانيا اشوفج لزكتي يم العروس انطينا مجال ترى مراح ناكلها
رانيا / منو لازمج عيني تعاي سلمي
صفا بكل برود / مبروك
بوستني بدون ميطخ خدها بخدي وكعدت كبالي هي نفسها الي حجت على صعب بالحنة وعندي شك نفس الصوت الي اتصل يحذرني من صعب بس ممتأكدة
كعدت خالة ايمان / محتاجه شي حبيبتي
نرجس / شكرا خالة ممحتاجه شي
ايمان / صيري سباعية ولا تكولين وحدي كلنا اهلج
ابتسمتلها واني الغصة بصدري
بالليل دخلت الغرفة واني راسي صاير طبل من الهوسة اخذت ملابس ومنشفة طلعت للحمام قريب عالغرفة
البيت صار صنطه لأن العرفته كلهم يرحون يسهرون بالمضيف حتى الجهال وياهم
سبحت وطلعت الجو بارد كمت اكزبر تلفتت بالغرفة ماكو صوبة بس تدفئة سبلت والوطنية طافية سرحت شعري عالسريع ولفيته بمنشفة لأن إذا اشغل شسوار تطفى
صليت العشاء وانحشكت بالفراش جوا اللحاف والبطانية اويلي شلون برد
راح فكري يم بيتي وام عقيل والبنات وحتى عقيل ما اعرف شلون راح اعيش هنا
ـــــــــــــــ
لينا /
يلة حبيبي نام
يوسف / ما نام الا انتي يمي
لينا / شوف عصومي خطية يرضع راح ينام
يوسف / معلية اريد اروح يم بابا لعد
لينا / يوو ساعة 11 ترى ضوجتني يلة نااام
نيمت معتصم وخليته بسريره وصحت يوسف اريد انومه حبيبي متعود ينام بحظني ومرات نتعارك اني وأيهم من وراه ايهم يريد ياخذ راحته وياي ويوسف لازم بحظني هههه
باوعت الساعة عدت 11 الجماعة سهرانين بالمضيف يتجمعون كلهم حتى ولد عمو صالح
الحمدلله نام يوسف وديته بفراشه وطلعت اتسحب على كيفي
رجعت لغرفتي ودخل ايهم نزع الفروة وشمرها عالكرسي وتقرب علية / بعدج منايمة
لينا / ولدك مسهريني تعبوني والله
ايهم / اكلج اليوم عليها لو هم ابقى عالشحن
لينا / ههههه نهاية الأسبوع حبي
ايهم / ترى بعد ما عندي صبر راح اتهور والله
لينا / يااه هههه لا عليك الله عمة ايمان كالت الا يطلع الاربعين
ايهم / اااخ دتعاي انطيني بوسة تصبيرة لا ابتلي بيج والله
لينا / اايههم
دفعته بصدره لأن اعرفه ميكعد راحة
ايهم / احتركت عشيرة ايهم
لينا / هههه لا خطية العشيرة شعليها
ايهم / ولج طفرت روحي احجي الصدك ترى اليوم شفتج تصلين
لينا / ههههه اي صارلي اسبوع اصلي
ايهم بغيض / وتردين ما احرك العشيرة انعل بليسج ليش هيج خبيثة
لينا / يلة الصبر حلو
ايهم / دتعاي ، متحلف بيج
ــــــــــــــــــ
نرجس /
فزيت من حسيته نام بصفي وسحب الغطا هوى بارد لفحني حسيت جسمي مكسر مابية اتحرك انطاني ظهره ونام واني بقيت متكومه جوا الغطا وعيني عليه وخزات براسي خلتني صاحية يمكن تمرضت مديت أيدي وسحبت المنشفة حررت شعري جان بي شوية رطوبة
غفيت مدري بروحي للصبح بس جنت كل شوية افز اشكال الاحلام زارتني
صعب /
الليل كله تهذي ماخلتني انام من دخلت الغرفة جنت قافل عالنوم بس اخلي راسي عالمخدة انام جانت محتله الفراش سحبت الغطا ونمت واني ادري بيها كاعدة تراقبني بنص الليل صحيت على صوتها تون شوية وتهذي بكلام ممفهوم هاي شبيها مديت أيدي لكصتها نار
من هذا تهذري مصخنه طلعت لزمت شعرها بعدته عن خدها بي رطوبة صدك جذب نايمة وشعرها رطب
انتجيت على تك ايد اراقبها تنفسها يصعد وينزل وجسمها من طخيته أحسه جمره مديت أيدي من جوة الغطا خليتها على رجلها تلمستها رجعت خليت رجلي فوكاها والله تجوي سمعت الاذان وكمت اتوضى واني ارجع اللحاف عليها
شغلت التدفئة وطلعت توضيت وصليت وكعدت اقرا قرآن صدقت وخليته بالمقرأة ورجعت بفراشي
بس بالي بقى عليها مبينه تمرضت
ورى ساعة كمت جبت مشروب خافض حرارة للاطفال عدنا بالبيت شسوي خل انطيها منه والصباح اشوف ، كعدتها ماحست خليت ذراعي جوا متنها وسحبتها بحظني وأيدي اطبطب بخفة على خدها الجان مجمر واحمر .. نرجسة .. نرجس صحصحي حتى تاخذين علاج
نرجس بلا وعي / حبيبي عوفني انام راسي يوجعني
فكيت عيني واني اسمعها ادري بيها مو بوعيها وماحاسة بكلامها
صعب / افتحي حلكج اني راح انطيج علاج
فتحت العلبه بدون اي شي خليتها بحلكها اخذت جرعه صغيرة ذبيته عالكومدي ورجعت راسها عالمخدة لازم اسويلها كمادات رحت بللت المنشفة جانت بالكاع شامرتها بللت طرفها وعصرته وخليته على كصتها رأسا عقجت وجهها متضايقة من البرودة
عفتها وأخذت لي غفة من كعدت جانت كاعدة بالفراش وايدها على رأسها
تربعت بفراشي وعيني عليها / سلامات بعدج تعبانه الليل كله تونين وتهذرين كوة اخذتي علاج
باوعتلي بعيون نعسانة والتعب مبين عليها
نرجس / اشكرك فعلا جنت تعبانه ما ادري بروحي بس احس وياي واحد مهتم بية عبالي م..
نرجس /
سكتت ماحجيت باسم معتصم لأن جنت حلمانة بي خليت أيدية اثنينهم طوقت راسي
/ سبحت والجو بارد جسمي ثلج ماكو صوبة وأخذت برودة احس جسمي مكسر
صعب / ليش ماكو صوبة هاي نسوا يخلوها بالغرفة راح اوصي ام ملاك يلة كومي اخذج للمستشفى لو اجيبلج علاج من الصيدلية
نرجس / لااا مابية اتحرك
صعب / رايح للصيدلية وراح ادزلج علا لو امي ترى ساعة تسعة هسة
سحبت الفروة جانت بالزاوية معلكه لبستها فوك الدشداشة وطلعت ، صبحت على امي
ام حذيفه/ هلة يمة هلة بهالصباح وين مريتك
صعب / صباحج خير وعافية بعد روحي بست راسها جانت كاعدة عالقنفة بالمطبخ .
صعب / يمة نرجس مريضة البارحه سبحت ونايمه شعرها رطب والليل كله تهذري ومصخنه
ام حذيفه / خطية البنت اروح اشوفها ادري ييمة انشف شعري عالصوبة ليش هيج ما تهتم
صعب / صدك ، الصوبة خلوها بالغرفة ليش مطلعينها
ام حذيفه / شعجب منو طلعها ذيج كبالك جوة الدرج عبالي انتم مطلعينها
صعب / ديلة ميخالف اروح اني للصيدلية
ام حذيفه / تريك يمه وروح
صعب / لا من ارجع
ام حذيفه / وينج علاااا لينااا وين صرتن
علا/ اجينا عمة شبيج توني كملت الخبز
ام حذيفه / عفية بنيتي حطي هنا عالميز وروحي شوفي العروس مريضة
علا/ ياه شبيها هههه خاف مسوين وكاحة
ام حذيفه / تعاي نشوفها لا تبقين تضحكين وحظرن الريوك هم عمج طلع هو ورجلج بس ايهم بعده فوك مدري ليش مانزل من وكت
لينا / عمة جان يسبح يلة اني هم كملت اروح اسبح قبل ميكعدون جهالي
اكلج روحي شوفي البنت لاتبقين صافنه
علا / رايح عمة
ـــــــــــــــ
علا / سلامات حبيبتي مابيج الا العافية
نرجس بتعب / الله يعافيج
علا / يربي حتى صوتج مبحوح اكعدي شوية بيج يلة اساعدج
نرجس / تسلمين
علا / تجين بالمطبخ دافئ حتى تتريكين انتي وصعب لو مابيج راح اجيب الريوك هنا لعد
نرجس / لا خل اكوم بلكن اتحسن
ذبيت روب فوك ثوبي والشال لفيته على راسي
انتبهت على علا صافنه بوجهي بعدين دنكت
شكد عيب اكيد شافت اثر العضة
طلعت كوة امشي فتت للحمام وغسلت وجهي وفرشت اسناني ودخلت المطبخ سلمت عليهم وكعدت بصف خالة تهلي وترحب بية
دخل صعب بيدة علاكة دوا خلاها عالكاونتر
علا حظرت الريوك وخلته عالميز / يلة تريكو عافيات
صعب / الله يعافيج خيتي
حاجاها صعب عافتنه وطلعت اني ماجنت مشتهية احس الاكل ماله طعم خالة لحت الا اكوم اتريك
كعدت وعين صعب علية يباوعلي باهتمام
من كملت راح جاب العلاج وكعد يشرحلي شاخذ منه
بقيت يومين مريضة ثالث يوم الحمدلله تحسنت
تصرفهم وياي بمرضي خلاني اغير نظرتي عنهم گلوبهم طيبة خلوني اتعود على حنيتهم
كلت وية نفسي لأن بعدني عروس وانوب تمرضت احتمال يتغيرون بعدين الله اعلم
مرت السبعة بدون ميسوون شي مجرد يجون اقربائهم ومعارفهم يباركون من سألتني خالة حتى تسوي ماقبلت لأن منو عندي اني حتى ام عقيل من اتصلت عليها جانت رايحين زيارة
لكربلاء واني على شنو اسوي سبعة ماحبيت هالشي وهمزين صعب ماقبل
بديت أخذ عليهم عمو حيل انسان طيب حتى الولد رغم على كد السلام بيناتنا بس ارتاحيتلهم
الشغل بيناتنا نكمله بدون مشاكل خالة هي المسيطرة عالبيت والبنات مايفوتون حجايتها اني اتابع بسكته حتى اتعلم وأخذ شمرتهم
ومن تغيب عمتي ام ملاك هي ام البيت كلهم يأخذون رأيها ويحترمونها هي حبابة وإنسانة جدا محترمة فعلا اخت معتصم الله يرحمه ،، بس اختها طلعت نفسها الحجت على صعب ماحبيتها اجت مرتين يوم بعد يوم هاي ورى السبعة واحسها تراقبني ومن يدخل صعب تبقى تتلوك عمت عينها على اساس مخطوبة تتلزك برجال متزوج على أساس ابن عمها عشتو
اليوم اجت من الصبح وطلعت ورى البيت بالترك تساعد علا بالخبز
اكثر شي علا ام الخبز ولينا تساعدها اني بعدني جديدة رغم اعرف اخبز خالة ام عقيل علمتني وخبزي حلو بس اني مغلسة هسة من يحجون لو علا تريد اساعدها ماعندي مانع
كملت شغلي نظفت البيت بالمكنسة ومسحت
الاخشاب والفازات ورحت لغرفتي الباب جانت مفتوحة رغم اني اسدها من اطلع لأن صعب ميقبل احتمال الجهال لأن حركة عدهم ماشاء الله جهال اياد واموني ابن حذيفة واكثرهم حركة يوسف فدوة رغم وكاحته بس ينحب
اني ما انتر بيهم بالعكس احب العب وياهم وانطيهم حلويات لو فلوس وصاروا يحبوني
سديت الباب وراية ورحت طلعت من الثلاجة قطعة كاكاو اكلتها احس بانتعاش واني امصها ممممم الطعم رهيب
سحبت موبايلي وكعدت اكلب بي رحت الاستوديو على صور معتصم بقيت اتفرج عليهم سمعت الباب اندكت طفيت موبايلي ورحت فتحت الباب
صفا / ها عروستنا خاتلة بالغرفة
نرجس / تفضلي
ماحبيت نبرتها العمى انتي شكو
صفا / زاد فضلج بس حبيت اشوفج اكعد وياج نسولف شوية غير اتعرف على زوجة ابن عمي
دخلت الغرفة وبقت عينها تحومي الحمدلله الغرفة مرتبة ومعطرة
كعدت عالكرسي وخلت رجل على رجل ..
صفا / شمخلصة دراسة
نرجس / معهد إدارة
صفا / امم ماكو تعيين شوفة عينج البنات كاعدات بس اني الحمدلله طلع وهسة اداوم بمدرسة
نرجس / اي مبروك
صفا / اشكرج .. اكول شلونه صعب وياج
نرجس / عادي شنو قصدج
صفا / تعامله وياج عصبي لو هاي العصبية بس علينا يطلعها
نرجس / الحمدلله كولش حباب وياية
صفا / هو وين شافج مجاي اصدك صعب يتزوج بهاي الطريقة
نرجس / مافهمت شنو قصدج
صفا / يعني يشوفج ويطلب يتزوجج
نرجس / قسمة بعد كلمن ونصيبه
صفا / ايي نصيب يلة اسمحيلي اروح لبيتنا طولت هههه
طلعت وعيني عليها مدري ليش ما ارتاحلها يمكن لان حجت على صعب مدري والله
اخذت ملابس ومنشفة فتت للحمام سبحت وطلعت رتبت نفسي وشسورت شعري عجبني اتمكيج ماحب الطواخات سويته فاتح وجريت الكحلة طلعت اجنن رشيت عطر هادىء دخل صعب مستعجل للغرفة بقى صافن علية ثواني وراح مدري شيفتش بالكنتور طلع علاكه بيدة وراح حتى ما حجى كلمة
عالغدا والكل موجودين بس صعب ماكو خالة كالت / متتصلين على رجلج ليش تأخر
استحيت هي شمدريها مابيناتنا كلام يعني كلام قليل والاتصال خارج الموضوع
موبايلي بغرفتي دخلت اخذته واتصلت عليه طلع يم خالة ايمان جاي يتغدى سديته ورحت كلتلهم
ام حذيفه / كعدي تغدي يمة صعب ميفارك ام سما
ايهم / ههه اي والله أكثر واحد بينا متعلق بيها بس عمتي تستاهل تاج راس
انتبهت على ايهم من حجى وعينه على لينا كل شوية يغمزلها بعينه والنبي اجيت اضحك
خطية هي تستحي كل شويه تنزل راسها
تغدينا واني لميت المواعين والسفرة وكفت عالسنك اغسلهم وعلا خدرت الجاي وبدت تصبلهم شوية وكبت عيطه الجهال تعاركو بيناتهم ولد اياد ركضو لبيتهم وأيمن ويوسف بقوا يتعاركون بيناتهم على لعبة عمو كام عليهم كل واحد انطاه كفخه وراحوا يتعايطون
الحلو بالسالفة ابهاتهم كاعدين يضحكون عالعركة خرب شكد فطيرين اني اندقيت وهمة لا عبالك
كملت المواعين مسحت السنك والطباخ والتفتت على علا من ذبت الصينية عالسنك .. اروح اشوف وليدي خوش اكل سطرة
نرجس / خطية والله عمو اذاهم
لينا / هههه لا تخافين عليهم جنهم قرودة
نزلت لينا شايلة عصومي اخذته من أيدها فدوة حبيبي شكد حلو عمره شهرين تقريبا
ويوسف خاتل وراها وعينه على عمو
صاحه أبوه / تعااال بابا لاتخاف من جدو يحبك
ركض بحظن أبوه الجان منتجي عالقنفه
اخذت عصومي ودخلت لغرفتي خليته عالفراش عجبني اخذله صورة منظره يجنن بالاوفر السماوي
مدنكه احجي وياه وهو مركز وياي من اناغيله
دخل صعب / هذا منو ضايف غرفة عمه هذا شيخ معتصم
بلعت ريك واني اسمعه يصيحه باسمه شاله بحظنه وبقى يبوس بي والولد يحرك براسه ميقبل
بدون وعي حجيت / عفية صعب لحيتك والله بززته بشرته ترفة
عضيت شفتي من رفع عينه بعيني استحيت لأن تذكرت الموقف الصار بينا ما اعتقد تذكره بس الصار بعدين خلاني متأكدة اجى على باله
صعب بهمس / ايي حيل ترف ومال عض حتى يبقى الاثر اسبوع ،،، غمزلي بعينه وأخذ عصومي وطلع من الغرفة
يربي يعني ماناسي وجاي يذكرني رحت وراه من طلع / وين مأخذ الولد خلي شوية عندي
دفعني بجتفه / لا تصيرين طماعة خل اشبع منه شوي
عمتي كاعدة كبالنا هي وعمو صاحت من شافتنا متناحرين عالولد ..
ام حذيفه / هسة مريتك تحبل واجيبلك الولد وعصومي ينشمر منو بحالة
اخذته من صعب هو خلاه بحظني / لا عمة فدوة اصلا عصومي تبقى محبته
صعب عينه علية بس اني ما اهتميت صاح علينا ايهم من المطبخ / يابة ابني اريده ترى وانتم بيت صعب شدو حيلكم وجيبوا مثلة
رفعت راسي لصعب وخدودي احمرت تقرب وهمسلي / والله حجايته بمكانها
فكيت عيني وانهزمت لغرفتي اني وعصومي
ــــــــــــــــ
نرجس /
جنت اغسل بالكراج وجاي انشفه بالماسحه دخلت صفا سلمت وراحت للبيت ما اهتميتلها شوكت ميعجبها تجي اليوم جمعه والولد وعمو راحو لصلاة الجمعه على أساس خالة ايمان تتغدى عدنا بعدها ما اجت كملت ودشداشتي اطرافها تبللت دخلت البيت علا جانت واكفه عالطباخ تراقب الطبخ ، انتبهت صفا مموجودة ما اهتميت رحت لغرفتي الباب هم جان مفتوح واني من طلعت سديته دفعته
وصارت صفا بوجهي وموبايلي بيدها فاتحه الاستوديو وعيونها كل الشراسة انجمعت بيهم
عاطت بية / شسوووي صور معتصم عندج
فكيت عيني مصدومة وو...
نرجس /
حاولت اتماسك نترت بيها / انتي منو سمحلج تدخلين غرفتي وتفتشين موبايلي
مديت أيدي أخذه دفعتني بصدري بكل قوتها رجعت ورى صرت برى الغرفة
عيونها تريد تقتلني صوتها عله / بيني على حقيقتج تتمعشكين مو عيب عليج استحي
هجمت عليها اريد أخذ موبايلي فضحتني هسة يسمعوها والولد على وصول لويت أيدها وخرمشتها باظافيري عاطت الادبسز شكد مبينه تحب الفضايح بذيج اللحظه واني اسمعها تغلط علية لو عندي سجين احطها بنص گلبها ومايبرد گلبي
اجت علا على صياحنا الي اختها مصدره تريدهم يسمعون صاحت بيها اختها / شبيج تخبلتي صفا شنو هالتصرفات
صفا / تعاي خاتون تعاي شوفي موبايلها مليان صور معتصم حتى صور هي وياه متحاظنين
فزيت على صوت عمتي لطمت صدرها ..
/ صخام بوجهج ولج صدك نرجس
بلعت ريك والخوف شلني اريد ابرر بكلمة .. عممة والله ..
عاطت بية صفا وهي تركض تشوفها الصور / انجبي اكبر جذابة كشفت حقيقتج
لزمت گلبي بيدي وانتجيت على محجر الدرج وعيني عليهن نظراتهن كلها حقد واتهام
أيدها على رأسها تضرب بي وتصيح / يايمة ياصعب انت ماعايز قهر وصدمات اويلي عليك يمممه ماعندك حظ بالنسوان
علا / عمة صلي عالنبي خل نفهم من البنية وانتي صفا كافي صياح وهوسة ترى خبصتي البيت
صفا / ها علا اني اخبص البيت وهاي ام الدروب الساقطه متحجين عليها
نترت بيها ورحت أخذ موبايلي / احترمي نفسج اني اشرف منج
هجمت علية ،، لينا صارت بيناتنا بس دفعتها صفا بحيث لينا رادت توكع يمة شكد قوية عزا بعينها سحبتني من شعري وشالي راح بيدها ورجعت خرمشت وجهي
حذيفه زمخ بعصبية / وجععععع شنووو هاي الهوسة صوتجن واصل للشارع
سحبت شالي من أيدها ذبيته على شعري وأحس خدي نار من خرمشته الكلبة ،، وكلها انخرست من دخل ابو ملاك والولد وعمو حتى عمة ايمان وياهم
عيني ادور على صعب ومن شفته بجيت وجسمي كام يرجف خايفة من كولشي اريد احس بالامان
ثواني واني بحظن خالة ايمان الي زمخت بعصبية / عيب عليجن شمسويات بالبنت ليش وجها مخرمش
راحت صفا على صعب انطته الموبايل / شوفو بلاويها صورها هي ومعتصم منين تعرفه طلعت وحدة ساقطه
جر صعب الموبايل من أيدها وضربها سطرة فر راسها فر وزمخ بعصبية / منو سمحلج تفتشين بشي ميخصج اني جم مرة حذرتج ولج الظاهر انتي ماتوبين تعلمتي عالاهانة
حط موبايلي بجيب سترتة جان لابسها على دشداشة ورفعلي تك حاجب وجهه انكلب اني حيل خفت خنست بحظن خالة ايمان ودموعي تجري
الادبسز ماسكتت بقت تغلط علية وتكلهم عدها علاقة بمعتصم
عمتي زادت الطين بلة وهي تضرب على خدها وتكل لصعب / طلكها ولك هاي منين جبتها
عمو حجى عليها / كافي حجي هسة غير نفهم البنت خلها أدافع على نفسها اكلتنها حاصل فاصل التفت علية /احجي يابة الصدك
هزيت راسي محتارة شاكول التفتت لصعب
ياشر لعمته ونتر / عممة اخذيها للغرفة
عيني راحت على علا سحبت اختها على جهة
واني دخلت لغرفتي
كعدت عالجرباية واني ابجي واشهك ،، كعدت بسدي / فهميني الصار لأن صفا اكلتنا اكل
حجيت واني كوة اطلع الكلمة جسمي يرجف من الصار وخفت أكثر من موقف صعب اكيد راح يحط اللوم علية
ايمان / اووف هذا الجنت خايفة منه بس متوقعت بهاي السرعة وزواجكم ماصار شهر
نرجس / خالة والله اني معلية
ايمان / بنتي ادري مالج دخل بس انتي هم غلطانة عايفة الصور بالموبايل عاد اقلها خلي رمز شلون هيج عايفته
نرجس / حظي الاغبر شمدريني لأن اني ما اعوف موبايلي بس بغرفتي واسد الباب بس مرتين أشوفه مفتوح عبالي الجهال طلعت هي ادور وراية
ايمان / ااااخ منها انخطبت وبعدها عينها على صعب
مسحت دموعي / عزااا واني اكول ليش تذبلي حجي كلما تشوفني حتى حذرتني منه واحتمال هي اتصلت قبل فترة تحجي على صعب تكول عنه سمعته زفت وهذا واحد .....
ايمان / صخام بعينها لعد ليش ماحجيتي
نرجس / مجنت متأكدة بس اكيد هي رغم صوتها جان يتنعوص بالاتصال
ايمان / ابقي لا تطلعين اروح اشوفهم الله يستر
دخلت للاستقبال كلهم ملتمين الحجي مدنك راسه وساكت وام حذيفة أيدها على حلكها عاضة عليها وتنود بجسمها مبينه كوة مسيطرة على روحها
الولد ساكتين التفتت على صعب جان واكف متخوصر / صعب حجيتلهم
هز راسة بدون ميحجي رحت كعدت بسد ام حذيفة ..
ايمان / صلو عالنبي اليوم جمعه مباركة لا تخلون الشيطان يوزكم هذا قدر ومقدر كله أمر من رب العالمين
ام حذيفه بعتب / ها ايمان طلعتي تعرفين السالفة وما حجيتي
ايمان / ام حذيفة معتصم الله يرحمه راح يم رب كريم ميفيد الحجي بعد شي راح وانتهى وإذا على ام صهيب جان معيشها احسن عيشه هي والولد اني اكول سدو السالفة
ام حذيفه / ام سما ليش ماحجيتي هسة صعب واعرفه يموت ولا يطلع سره جان حجيتي ليش هيج بقيتي ساكته وطلعتي سالفة بنت صديقتج توفت وصعب شافها ويريد يتزوجها طلع كله جذب واني اكول صعب شلون قبل يتزوج وحدة مايعرفها
صعب / يممه سدي السالفة اني كل هذا لأجل معتصم الله يرحمه
رد حذيفة ومبين ضايج / وشنو ناقصها لرانيا حتى يتزوج عليها
ايمان / عمة حذيفة ليش تخليني احجي كلنا نعرف رانيا ورى ما سوت عملية وفقدت رحمها تغيرت صارت عصبية ماتحمل اي شي ومعتصم جان يكتم مايشكي شيسوي لعد هم يريد يرتاح وماسوى حرام كله بشرع الله
حجي عبدالله / عمامك راح يعرفون عمك صالح اكيد راح تحجيله صفا
صعب / يابة بعد انتم صار عدكم علم واني ممحتاج ابرر تصرفي
حجي عبدالله / لا يابة انت ابو نخوة من يومك ،، لاحول ولاقوة الا بالله
صعب /
ما اسمع الا صوت عياط والباب تنركع بقوة طلعت بسرعة وبالي يم نرجس
لا يربي رانيا فوك نرجس تضرب بيها وتحجي عصبية نار
صحت بعصبية واني ادفعها / رانياااا تخبلتي
رجعت جرتها لنرجس من شعرها
رانيا عصبية نار / حقيرة ام الزلم مكفاج تأخذين معتصم انوب على صعب ، وانت مكيف بيها مكيف مأخذ مرة اخوك وصاحبك ولك والله عيب عليك
عصبيتي سحبتها من ذراعها ونكتتها بقوة وعطت بيها / بسسسس تخبلتي شلون تمدين ايدج عليها وانتي شمدريج
التفتت على صفا جانت واكفة تباوع / انتي حجيتي مو ؟!! فرحانة بهالشي
صفا بشماته / احسن ليش تبقى عمية تضحكون عليها وعلينا
زمخت بيهن واني اجر رانيا طلعتها من غرفتي شمرتها بالصالة اندفعت بحظن ايهم كلهم موجودين يتفرجون رفعت إصبعي عليها
صعب / رجلج ما سوى الحرام واني سكتت حتى لا تنقهرين تجين هسة تحجين علية وانتي ماتعرفين الضغط الي مريت بي والموقف اللي انحطيت بي
كامت تبجي بحركة حظنها ايهم يسكتها بجيها حز بگلبي
رانيا / ليش شنو ناقصني يتزوج علية مافكر بية وبجهالة وهو يدري شكد احبه واغار عليه
كامت تشهك وتبجي اخذها ايهم ودخلو للهول وراحو كلهم يمها ، عمتي ايمان طلعت من غرفتي / روح شوف زوجتك خطية واني رايحه يم رانيا افهمها
دخلت لغرفتي وقفلت الباب كعدت بصفها جانت مدنكه راسها وتبجي بدون ما التفت عليها نترت بيها / شلون تعوفين الصور تارسة الموبايل عجبج هاي الهوسة شنو هالفهاوة الانتي بيها لخاطر محمد ولج اني فوك السنة متكتم عالسالفة ونفذت وصيته وباقي بالع موس وساكت رضيت اتزوجج واتكفل بكولشي يخصج في سبيل اختي ماتعرف وهسة انكشف كولشي شسوي بيج كوليلي شسوووي
نترت بيها هي فزت كمت ممتحمل ابقى كاعد
عيني عليها مدنكه خانسة جسمها يرجف تقربت رفعت راسها بين ايدية وانصدمت بشكلها صفحة من وجهها متخرمشة وآثار دم باقي وخدها الثاني مبين طبع اصابع واضحة
شكد جنت مقهور من الصار بس من شفتها بهاي الوضعية انقهرت عليها هي مالها ذنب ذنبها تزوجت معتصم وهو وعنده زوجة وولد ضعفها يخليني احميها بعيد عن وصية معتصم بيها هذا شي خاص بية لأن هي زوجتي مسؤولة مني احترامها من احترامي ومراح اقبل يقللون من قيمتها ادري هالشي راح يسوي مشاكل بس مو صعب اليتخلى عن حاجة تخصه
جريت حسرة وذبيتها وطلعت اجيب معقم وكطن ورجعت كعدت بصفها / ارفعي راسج خل اعقم الجرح
عقمت جرح خدها بهدوء وعيني بعينها المليانة دموع كملت خليت علبة التعقيم عالكومدي والتفتت عليها حظنت خدها اتلمسه / يأذيج
عضت شفتها وطفرت دمعه على خدها .. كولش يأذيني
صعب / ميخالف يومين يصير زين
ملمس بشرتها الناعم الترف خلاني صافن بيها هي ابتعدت ودنكت راسها
صعب / اسمعي تبتعدين عن صفا هاي وحدة غيورة وحقودة وبالنسبة لام صهيب خلها اي شي تحجي لاتردين عليها حقها مصدومة وگلبها محترك ماريد مشاكل لأن بكل الأحوال هاي اختي عزيزة علية ماريد اقهرها
نرجس / صعب والله معلية بأحد وانت جاي تشوف تصرفاتي والله دوم ساكته ما أتدخل
صعب / ميخالف انتي هس....
اندكت الباب وصوت ام يوسف / صعب يردون يحجون وياك تعال
وكفت وحجيت وياها / نرجس ابقي بالغرفة لا تطلعين
طلعت وبالي يمها ماريدها تتأذى لأن رانيا اعرفها مراح تسكت
دخلت كلهم كاعدين ورانيا باوعتلي بنظرة زعل
صعب / خير ليش صحتو علية
رانيا / اني اريد احجي وياك وكدام أهلنا صعب اذا تبقى هاي بالبيت يحرم علية دخلت بيت أبوية إذا تكول اختي وتحبني صدوك تطلع نرجس من البيت ماريد عيني تجي بعينها طلكها يا اخي شنو مسوينها استثمار بينكم انت وصاحبك
صعب بغضب / رانيااااااااا
عطت بقوة بيها واني ادفر الطبله فوكاها فازة صارت طحين / احترمي نفسج ولج لا عبالج اكبر مني بسنتين الج حق تتجاوزين خليني محترمج
وكفت رافعة خشمها / حجيت العندي يأبه اعذرني منا ورايح يحرم علية بيتكم خل الغريبة ام الزلم تسرح وتمرح بي
اجت تريد تطلع خليت أيدي منعتها / ارجعي بيت ابوج هذا بس متصورت هلكد عقلج صغير مع الأسف والله
خل الكل يكون عدكم علم اني طالع من البيت جنت اتمنى تساندوني لأن وكفت لابن عمي وساندته وماقبلت اكسر بي من نخاني
حذيفه /؛شنو هالحجي مستحيل تطلع من البيت بطل هاي السالفة صعب
صعب / لا حذيفة لأن راح تصير مشاكل
حجي عبدالله / اكعدو يابة تعال صعب اكعد خل احجي وياك
صعب / يابة ماكو حجي بعد يله اترخص اني
ايمان / عمة صعب تعال وين تريد
اووف منج رانيا شلون هيج تحجين وية اخوج
رانيا / عمة رجاءا عوفيني ترى گلبي معطب
طلعت ايمان ولحكتها ام حذيفة الي انجنت من سمعته يريد يعوف البيت
دخل الغرفة واجن وراه / يمة صعب صلي عالنبي
صعب / اللهم صل وسلم عليك يا رسول الله
خليني يمة اتصرف بالشي الصح
ام حذيفه / ولك يمة شلون تعوف البيت فدوة رحتلك إذا على حجايتي كلتلك طلكها اسحبها واسد حلكي خلكم هيج بس لا تعوف البيت يمة هاي رانيا خبلة ماتدري شتحجي
كامت تبجي حظنتها بست راسها / بعد روحي يمة دمعتج غالية مراح ابعد ااجر نفس الشارع
ايمان / لا متأجر والله العظيم وهاي اني حلفت بيتي شكبرى تجي تكعد عندي وانت دومك عندي
بقيت صافن على عمتي شكد كلبها جبير وشايلة حنية الدنيا كلها
رحت حظنتها ودنكت ابوس راسها / والله يا عمة دوم وكفاتج جبيرة
ضربتني على صدري / ولك شعندي غيركم الله يحفظكم الي حظروا ملابسكم بالجنط واني اروح للبيت حتى ارتبلكم الغرفة الفوك
ام حذيفه / شلووون وغرفة صعب تطلع من بيتي ميصير هالحجي ام سما لا تشجعين الولد وانت يمة اكعد هسة لا تستعجل اووف مدري منين تجينا المصايب
دخلت علا / رانيا راحت هي وصفا والله مدري شأحجي صعب الله يعينك عالجاي يصير
صعب / ام ملاك احتمال الصار بي مصلحة للكل حتى تكونون على علم ما ادري بعد اني العلية سويته ماتصرفت بشي غلط
علا / حشاك من الغلط اخوية .. ديلة عيني هسة مراح اصبلكم الغدا لو شلون متاكلون
ردت ام سما / وليش محد يأكل يلة فوتي حظري السفرة بنيتي
طلعوا من الغرفة حتى صعب وياهم اني رحت قفلت الباب بعد ما اامن خاف يدخلن علية ويكتلني مثلما صار قبل شوية الله لا يوفقهن شسون بية حقودات وهاي رانيا شكد عرمة اوووف والله خدي يوجعني شكد قوية رغم جسمها ضعيف ممبين عليها كله من الحقيرة صفا ولا عبالك علا اختها حتى من سمعت ما دخلت نفسها ولا اذتني بحجاية
كمت للكنتور طلعت دشداشة بدلت ومشطت شعري كطعنه الحقيرات مددت بفراشي حتى صلاة ماصليت اخاف اطلع اتوضى
استغفرت ربي بقيت أردد استغفارات غفيت مدري بروحي بعد
ــــــــــــــــــ
ورى الغدا الي صار ساعة 3 كاعدين نشرب جاي اندكت الباب وشوي دخل عمي صالح وعمتي ام معتصم والولد سلمو وكعدو
بس الوجوه متفسر
عمتي ام معتصم خزرتني بعينها / بعد وبعد يصعب تضم السالفة فوك السنة وتتزوج البنت ليش تضحك علينا
صافن عليها ومجتف ايدي على صدري ماحجيت مالي مزاج أعيد الحجي يرادلهم گلب ممدشن وتعال اقنعهم
أبوية وعمتي ايمان حجوا كولشي جان عمي يرد / ايابة هذا الصار والله البنيات حجو غير هذا
علا / يابة كلام عمامي صدوك اني موجودة وشفت وسمعت وماشاء الله ام صهيب وصفا ماقصرن وية نرجس ملخنها والله اني استحيت من سوايتهن شنو وين عايشين شنو هالتصرفات ، خطية البنت ما كدرت أدافع عن نفسها
ابو معتصم / يابة صعب انت بمعزة ولدي الله شاهد وسوايتك هاي دليل على كثر معزتك لأخيك الله يرحمه برحمته بعد مانكدر نحجي الصار صار السالفة تنلم لاتطلع اني حذرت البنيات ماريد اي طاري للسالفة
ايمان / خوش حجي هذا بس تقبل ام صهيب تكله طلكها مراح ادخل بيت أبوية وهي هنا شلون يطلكها والمرحوم امنه عليها هاي وصية ميت شلون ماينفذها
ابو معتصم / ام سما هاي هي احنا افتهمنا السالفة وهذا أمر الله وحكمته وانت عمي صعب خليك كد الأمانة وصونها ترى
شكرا لزيارتكم عالم روايات سكيرهوم
