رواية جراح قلبي الفصل الثاني والعشرون بقلم جوهرة
اخيك من وصاك بيها جان يريد رجال يحافظ عليها اني ابني وأعرفه الله يرحمه برحمته
ــــــــــــــــــــ
نرجس /
ماقبلوا أهله يطلع من البيت بقينا اسبوع اني قليل اطلع من غرفتي اخاف واستحي من الصار رغم البنات علا ولينا حيل زينات وياي عمتي وجها ثكيل علية بس متحجي يمكن لخاطر صعب لأن كولش تحبه متريده يزعل
وبالليل اني جنت انتظره يرجع اريد احجي وياه موبايلي عنده مارجعه واني خفت اساله
دخل نزع الفروة وبقى بدشداشة قفل الباب واجى كعد عالجرباية اني استعدلت بكعدتي
وعيني عليه فرك شعره بيده ويستغفر يمكن ضايج
نرجس / صعب موبايلي عندك أريده
التفت علية / اي نسيت ارجعه بس حذفت الصور
نرجس / لاااا عفية ليش
صعب بغضب / وجعااااا مرة متزوجة انتي وعلى ذمة رجال شنو مو بعينج باقية عايشة عالاطلال تنوحين كافي ترى لعبت نفسي ومحمد
لويت شفايفي ضايجه من كلامه شنو حضرته تزوجني وهو يدري اني احب زوجي الله يرحمه وماقبلت الا كوة حتى شروطي مانفذها
نرجس / اريد ارجع لبغداد موكافي صار فوك الشهر اني هنا والجنت خايف منه انكشف بعد على شنو ابقى اني مجاي اخذ راحتي بالبيت اخاف عاپشه برعب والله
نتر بية وعيونه اطك شرار / بغداد تنسيها افتهمتي ولعلمج خابرت ام عقيل كاتلها تشوف مشتري تبيعله غراض البيت بس ملابسج تخليهن بجنطه واني اروح اجيبهن
خبلني من حجى عليت صوتي / مووو بكيفك انت كذبت علية مو هذا اتفاقنا
صعب / وجع صوتج من تحاجيني بأدب لا اكوم اعلمج الأدب شلون
نرجس / معلية اروح لبغداد اكعد ابيتي ما ابقى هنا
صعب / تردين بغداد مو عبالج راح اكلج روحي تحلمين والله اسمعي ولج ترى متحمل فوك طاقتي لا تخليني اتخبل عليج
نرجس / مدري شلون صدكت بيك عبالي رجال كد كلمتك
عطت وأيدي على حلكي انترس دم جانت ضربته قوية لدرجة حلكي بقى خدران وشفة الفوك ورمت دموعي نزلن من الالم والقهر
كمت اخذت كلينس وسديت حلكي انطيته ظهري ماريد اشوفه كرهته لأن جاي يأذيني
عافني ما اهتم الصار وياي رفع الغطا ونام وصاح بنترة / طفي الضوة أريد انام
طلعت اغسل عالمغسلة وروحي مسحونه قهر وظلم لاكتني علا طلعت من المطبخ / شبيج نرجس خوما مريضه
شافتني ابجي مسحت دموعي
اشرتلها بيدي بمعنى لا عافتني وراحت لغرفتها
غسلت والدم انكطع رجعت للغرفة اباوع عليه نايم بكل هدوء بس حاجبه معكود مدري شوكت يفتحه شكد عصبي طفيت الضوة ونمت بصفه انطيته ظهري واني ابجي بسكتة
صعب /
واعي لحركتها اجت نامت بصفي وتبجي كولش انقهرت عليها مجنت اريد أمد أيدي بس عصبتني متعرف شلون تذب حجايتها معبالي ضربتي تشوه شفتها بقيت ساكت سويت روحي نايم
ادري بيها على اعصابها باقية هنا وكوة متحملة ولهذا السبب دورت بيت اكدر اشتري وعندي إمكانية بس مو هسة خلها بعدين حاليا لكيت بيت أجرته نفس شارعنا صح صغير بس بناء حديث وسعره زين اتفقت وية صاحبه عالاجار بعد هاي شغلتي افهم بيها وضمن عملي محد يعرف بس أبوية وعمتي ايمان اليوم جنت عدها وخبرتها بالبداية ضاجت لأن تريدني اكعد ابيتها فهمتها ما اكدر ماريد مشاكل لأن اكيد راح يلتقون وتصير مشاكل خليني ابعدها لنرجس بيت وحد
أبوية ماكال شي لان جنت مصمم على قراري
اقلها احافظ على علاقتي باختي ، رانيا مكسورة والصار كسرها أكثر ماريد ازيد قهرها اعرفها داخلها طيبة
كعدت الفجر عالصلاة موقت المنبه توضيت وصليت نرجس نايمة تقربت عليها لمست شفتها وارمة حست علية فتحت عينها ذبلانة من البجي والله گلبي وجعني واني أشوفها بهالحالة رجعت مددت بفراشي وجسمي طخ جسمها هي رأسا ابتعدت مسحت وجهي استغفر وخليت راسي عالمخدة
ـــــــــــــــ
نرجس /
كاعدين يتغدون اني ساعدتهن بالمطبخ وطلعت ما اكعد وياهم من صارت الهوسة واني عازلة روحي لا اتقرب عليهم وحتى كلامي قليل الكل منتبه بس محد يحجي طلعت من الهول وديتلهم دولكة اللبن صاحني عمو / يابة نرجس تعاي اكعدي تغدي ويانة ليش عازلة روحج
نرجس /بالعافية عمو ما أشتهي
طلعت للمطبخ صبيت بماعون تمن وذبيت عليه شوية مركة مسوين سبيناغ على لحم اني موهلكد باللحم اكلت كم لكمة وغسلت ماعوني خدرت قوري جاي وهدرت جواه وفتت لغرفتي طلعت موبايلي اتصلت على خالة ام عقيل متدري الصار وياي ماريد ازيد همها سلمت عليها وبقينا نسولف وانوب سولفت وية البنات
دخل صعب وقفل الباب مدري ليش من يدخل الا يقفل الباب تقرب سالني / ويامن تحجين
نرجس / منوو اكو غيرها خالة ام عقيل
صعب / ليش ماتكعدين ويانة من نتغدى
نرجس / ماريد نفسكم تنسد
صعب / لا بلة
نرجس / اي والله اني غريبة هنا ومحد يتقبلني خليني وحدي
صعب / ومن شوكت هاي بأسبوع هيج تغيرتي مو جنت اشوفج وية الكل ترى ماتغير شي ارجعي لطبعج اهلي نفسهم ماتغيروا
نرجس / لا نظراتهم الي تغيرت وخاصة عمتي صح ماتسمعني كلام يغثني بس اني احس ممتقبلتني
صعب / وهاي بدل متكسبينها تبتعدين عنها
نرجس / صعب شتريد والله مابية حيل لاي شي
صعب / حظري روحج راح نطلع بيت وحد نهاية
