رواية بنت الكهوجي الفصل الثاني والعشرون بقلم احمد
دا افكر انو اسوي فعاليات بحساب الانستا مثلا نحجي عن هاي القصة او القصص القادمة او الماضية وهيج اشياء فحبيت اخذ رايكم اذا تحبون هيج موضوع او لا فراح احط استطلاع بحساب الانستا واشوف اذا حابين ابلش بهالشي او لا والي ينقلون القصة ياريت ما تحذفون هاي الاضافة لان مهمة بالنسبة الي
الي يريد حساب الانستا بس يكتب بالبحث @zty.413 وراح انتظر اجابتكم عالموضوع ❤️ )
الحجية : هاي الاشياء بعدين نطبقها بس المهم انو تطمنا عليها
- الله يطمن بالكم دائما وحاليا اني استرخص
- مرخوصة الله وياج بنيتي والله يجزاج الف خير
- يجزاج الجنة مع السلامة
- مع السلامة هلا بيج
الحجية : اتصل على خواتك اعزمهم عالتعليلة
تميم : تمام بس شنو المناسبة
- خلي ياقوت تتعرف عليهن وتگضي وقت وياهن علمود شوية تغير جو
- صار
- وروح جيبلي زيد وزياد
- صار
گمت منها واتصلت على خواتي كلهن گلتلهن التعليلة اليوم يمي بالبيت وماريد اي اعذار والي زوجها يأجلها تنطيني خبر
واعرف ما يمنعوهن بس مجرد حجي ومريت لبيت ابوي اخذت الولد وگلتلهم امي طالبتكم ورجعنا اني وياهم للبيت
زيد : ها هالة شو صايرة ما تتنازلين تجينا بنفسج
الحجية : دنجب وتعال احجي وياك انت واخوك
- بالبداية لازم اعرف ينجب وياي لو لا
زياد : لا حبيبي انجب لحالك اني ما اريد اشارك
الحجية : جنت اريد اگول لا لحالك بس هسا ينجب وياك
زيد : هههههههههه
تميم : انجبو خلوها تحجي
زيد : حجى ناظم ابو الدهن
الحجية : انتبهولي اليوم راح يجن خواتكم يتعللن هنا وراح تكون ياقوت موجودة واريدكم تكونون موجودين
زيد : باستغراب .. تريدينا نكون موجودين لو العكس
- اريدكم تكونون موجودين
- بصفتنا شنو نتواجد
- بصفتكم اخوان ياقوت
- ام تميم باليرحم والديج فهميني وحدة وحدة ترا خربطتي افكاري
- ( حجتلهم كلام الدكتورة ) فاريدكم اليوم تجون تحجون وياها تخلوها شوية تتعود عليكم
- باوع لزياد .. شنو رايك
زياد : شعرفني هالة تريدنا نوگع بموقف محرج ما تعرف شلون
الحجية : شدعوة موقف محرج يعني على اساس انتو ملائكة ما حجيتو ويا بنت من قبل
زيد : لا والله حجينا بس حجينا ويا وحدة غريبة شي ونحجي ويا وحدة كأخت شي ثاني هناك حتى لو نجفص عادي بس هنا كل حرف لازم نفكر بيه الف مرة
الحجية : يعني تجون لو لا
زيد : ماعرف نفكر وبالليل نقرر
الحجية : تمام
ياقوت : بعد ما راحت الدكتورة بساعة تقريبا اجت ياسمين گالت عمتي تگول راح يجن البنات يتعللن يمنا اليوم ولازم نتحظر لجيتهن
فاني واية جهزنا نفسنا اني مجرد اخذتلي دوش ولبست دشداشة سودة وشال اسود بس استغربت من گالت ياسمين البسي عبايتج ممكن يجي احد من اهل تميم
صحيح حقهم يجون لبيت ابنهم بس غريبة انهم يجون وهم يعرفون بي راح اكون بالصالة ويا البنات حتى فكرت انو ما انزل
بعدين گلت بگلبي انزل بالعباية والخمار وارفع الخمار ماطول ماكو احد لان بقائي بالغرفة ممكن يخليهم يضوجون مني لان اكون سبب بازعاجهم وسلب راحتهم
بعد العشى نزلنا اني واية جان تميم طالع وگعدت ويا الحجية بالصالة وبعد صلاة العشاء بنص ساعة تقريبا دخلن البنات كلهن سوا
(ماراح اذكر اطفال خوات تميم لان راح يكونون خارج تفاصيل القصة)
سلمنا عليهن وجانت نفسيتهن كلش حلوة والضحكة تارسة وجههن وكأنو ينتظرن لقائنا من زمان وكلش فرحن بوجودي بالصالة
ولان ما التقيت بيهن من قبل فعزني بوفاة بابا وراحن وحدة وحدة سلمن عالحجية وباسنها من راسها وگعدن ويانا بالصالة
جانت رشى سيدة الگعدة تحجي ويا هاي وترزل ذيج وتصنف على ذيج من صدگ الگعدة وياها ماكو منها وانجمعت ويا اية يعني صارت بعد ازود
بنص التعليلة واندگ باب الصالة وفورا نزلت الخمار على وجهي وصاحت الحجية للي عالباب يدخل ودخل تميم وگامن البنات يسلمن عليه
انطى علاگة جانت بايدو لياسمين وسلم عليهن وبوسهن هن واولادهن واني بقيت گاعدة عند الحجية بس استغربت من حجى وياي تميم
تميم : شلونج بوية ياقوت
- بخجل .. الحمدلله
- اذا وحدة من هالخبلات زعلتج بس گليلي علمود اخلي العشيرة تتبرى منها
رشى : ها ها شيخنا شبسرعة بعت العشيرة
- ههههههههه افه عليج ما بعت العشيرة بعتج انتي وخواتج
رشى : اسمعي اسمعي هالة اسمعي ابنج تبرى من خواتو
- والله اني متعجبة شلون تحملج كل هالسنين
ياقوت : رشى فتحت حلگها من الصدمة والبنات كلهم صارن يضحكن عليها وبعدها استرخص تميم وراح ورجعن البنات گعدن
رغم الحجية زوجة ابوهن بس دائما يگوللها يمة بس وقت المزح يسمنها هالة يعني باسمها ويحترمنها احترام ماكو منو
مرت يمكن 10 دقايق واندگ الباب مرة ثانية وهم نزلت الخمار ودخلو هالمرة زيد وزياد وهم گامن سلمن عليهم البنات
زيد : ولج كافي تبوسين ادري حلگ لو رشاش عندج
رشى : عابتلك فوگ ما ابوس جهرتك الزرگة
- طبعا زرگة من گد ما تمطگين بيها ورمت
- هههههههههههه والله من يوم يومك ازرگ
يارا : وين جنتو ما شفناكم ببيت بابا
- اخذنا اخوج عالسوگ جبنالكن حلويات
- اي والله عاشت ايدكم صدگ من طول الغيبات جاب الغنايم
- اگول اسكتي مو شفتي عمرج صار 24 سنة عبالج صرتي فيلسوفة
زياد : شنو فيلسوفة
زيد : ماعرف بس يستخدموها للشياب والعجايز
زياد : يعني هسا هالة فيلفوسة
من گال هيج البنات انفجرن بالضحك وزيد صار ورا الحايط وبس نسمع صوت ضحكتو الي ترست البيت حتى اني صرت اضحك وياهم
بهالاثناء ياسمين جابت الحلويات هي واية بس زيد وزياد اخذو عصير فقط وكملو كلامهم ويا خواتهم وزيد وجه الكلام الي
زيد : شلونج خوية ياقوت
- الحمدلله
- شوفي اعرف تميم والي بالبيت كلهم ما يقصرون وياج بس اذا احتاجيتي اي شي وتميم مو موجود اني اخوج بس انطيني خبر واعتبري تنفذ
جنت اريد اگولج زياد هم ينفذلج طلباتج بس هذا مطي ما منو فايدة
- شكرا
زياد : طلع من المطبخ بايدو حلويات .. شبيه زياد
زيد : دا اگول مطي وما منو فايدة
زياد : اي صحيح لان اخو المطي هم مطي
زيد : ههههههههههه .. المهم خوية ياقوت مثل ما گلتلج امانة الله اي شي تحتاجيه گليلي
ياقوت : مشكور
زيد : يلا كملو تعليلتكم في امان الله
الكل : الله وياكم
ياقوت : سمعنا صوت زياد گال ولك حيوان رجعهن وعرفنا اخذ حلويات زياد وانهزم وضحكنا كلنا على تصرفاتهم وعلاقتهم ويا بعض كلش حلوة
بذيج الليلة ماگدر اشرحلكم فرحتي واني اشوف الكل مهتم بي ويريد رضاي وكأني فد شخص مهم جاي يمهم مو شخص عادي مثلي
وهسا عرفت ليش بابا جان واثق بيهم اكثر من اي شخص ثاني لان عرف اخلاقهم واحترامهم للبقية والحمدلله جان اختيار بابا الهم موفق
كملنا التعليلة ورشى واية من صدگ ما خلن النا گلب من الضحك بحيث حتى بطني صارت توجعني من الضحك لاول مرة اضحك هيج بعد وفاة ماما
الساعة صارت 11:30 وبلشن ينسحبن البنات وحدة وحدة الى ان صارت الساعة 12:00 وراحت ليالي والي هي جانت اخر وحدة
من اجى تميم رحت ويا البنات للمطبخ ساعدتهن بغسل المواعين وياسمين راحت نظفت الصالة واية نظفت المطبخ وسفطت المواعين وبعدها رحنا للغرف
بدلت ملابسي وتمددت بفراشي واني اتذكر تفاصيل التعليلة ومتعجبة من نفسي معقولة اني جنت گاعدة واضحك هالضحك هذا
ماعرف انصدم من نفسي ولا انصدم من النتيجة الي وصلتلها ويا الدكتورة قبل 3 شهور جنت شبه ميتة وهسا تغيرت 180 درجة
اية : شبيج صافنة
- ماكو شي بس متعجبة من نفسي
- ليش شبيها نفسج
- معقولة گدرت اتخطى وفاة اهلي لهالدرجة
- هالشي لصالحج انتي بعدج صغيرة وگدامج عمر تعيشيه بدال ما تدفنين نفسج بهالحياة
- والله ماعرف
- شوفي ياقوت الله يشهد الكلام الي راح احجيه مو لان گدامج او اريد اواسيج بس ترا بعمرو الحزن ما رجع ميت ولا فاد عايش
انتي بعدج صغيرة وحلوة وإن شاء الله عمرج يكون طويل فما يصير تگضيه بالحزن لازم تعيشين حالج حال باقي الناس
موت اهلج صعب وماراح تنسيهم صحيح بس خلي لنفسج وقت تعيشين بيه حياتج مثل ما تحلمين وبنفس الوقت فيدي اهلج بوجودج بالدنيا
- شلون افيدهم
- الرسول ﷺ قال ( إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له)
يعني دعائج الهم يعتبر عمل يفيدهم لان ممكن دعوة تدعينها تكون سبب دخولج ودخولهم الجنة لان ما تعرفين شمكتوبلكم بالغيب
فيا حبيبتي اذكري اهلج بالدعاء علمود تفيديهم وعيشي بقية حياتج بالشكل الي تتمنيه علمود تستفيدين بالحالتين
- نصيحتج كلش حلوة وإن شاء الله راح اطبقها بس ما اگدر اصبر بعد لازم احجيها
- شنو هاي التحجيها
- مو مصدگة عمرج 17 بس مادري انطيج عمر اكبر لو اصغر لان شكلج شكل طفلة وتصرفاتج تصرفات وحدة جبيرة بالعمر
- ههههههههههه هسا افرح لو ازعل
- لا افرحي لان وربي شكلج كلش حلو وهالشي كلش حلو بالبنت والتصرفات هاي معناها انو عقلج جبير رغم صغرج
- لو الهوية وياي جان شوفتج مواليدي علمود تتأكدين بس الحمدلله انو ربي انطاني هذا العقل وهذا الشكل
- اي والله يستاهل الحمد
- يلا حبيبتي تصبحين على خير
- وانتي بالف خير
غمضنا عيونا ورحنا ثنينا بالنوم ثاني يوم كالعادة گعدنا من وقت جان يوم جمعة ولاول مرة بيوم الجمعة انزل ويا البنات
الساعة 12 الضهر راح تميم للصلاة واني والبنات بلشنا بالغدا وجان عدهم نظام يوم الجمعة ضروري تكون الاكلة دسمة
لهذا السبب جان تميم جايب معلاگ والي صرت اعشقو من گد ما يطلع طيب من ايد ياسمين مشاءالله طبخها الو لذة مو طبيعية
بين ما اجى تميم صار الغدا جاهز وبلشن ياسمين واية ينقلنو واني جنت اعزل غدا النا اني واية بالمطبخ ومن كملن رجعت اية يمي
رغم حبي للمعلاگ بس بسرعة شبعت وغسلت وگعدت احجي ويا اية وشوية وسمعت تميم صاح اية وصوتو جان دا يقرب للمطبخ
عرفتو علمودي صاحها ونزلت الخمار على وجهي ودخل هو للمطبخ
اية : ها تميم
- شرايج بفكرة حلوة
- شنو هي يا ابو الافكار
- اخذكم للسوگ
- بصوت خشن .. گول والله
- بسم الله شبيج تحولتي
من گال هيج اية غصت بالاكل من الضحك واني صرت اضحك على ردة فعلها
- امانة امانة تحجي صدگ
- شنو شايفتني جاذب عليج من قبل
- نروح هسا
- لا باجر الصبح اليوم جمعة
- تمام ياااااااي راح نروح باجر
من سمعن اية وياسمين طارن من الفرح بس اني ما جنت متحمسة مثلهن لان مو مفكرة اروح هو راح ياخذ اختو وزوجتو وامو اني شعندي رايحة
وبنفس الوقت كلش زحمة انو اروح وياهم للسوگ واخلي تميم يصرف علي مهما كان يبقى الموضوع صعب كلش علي
بعد الغدا بلشن البنات بالتنظيف والغسيل واني اكيد ساعدتهن ومن خلصنا رحنا اني واية للغرفة واية دخلت للحمام فورا اخذت دوش وطلعت
- يلا ولج ياقوت اخذيلج دوش علمود باجر الصبح نكون جاهزات
- اني ما اروح
- باستغراب .. ليش ما تروحين
- مو مشتهية اروح ابقى انتظركم هنا بين ما تجون
- دنجبي وگومي يلا
- والله دا احجي صدگ ما اريد اروح
عافتني وطلعت شوية واجت هي والحجية
الحجية : ها ياقوتة ليش ما تروحين ويا خياتج
- مو مشتهية اروح للسوگ
- اكو سبب لو لا
- الصراحة ماكو ( ماگدر اگوللها على تفكيري علمود لا تزعل )
- لعد گومي جهزي نفسج وروحي وياهن باجر غيري جو شوية شعندج حابسة نفسج بين 4 حياطين راح يصير بيج توحد من الغرفة
- بس
- لا بس ولا شي يلا جهزي نفسج علمود لا تتأخرون
- تمام مثل ما تريدون
- اي يمة الله يرضى عليج
شفت ماكو طريقة اخلص بيها من الروحة وگمت اخذتلي دوش وجهزت ملابس للروحة وگضيت باقي اليوم بروتين طبيعي ما بيه احداث تذكر
ثاني يوم الصبح تريگنا والساعة تقريبا 9 توجهنا للسوگ وبوقتها الحجية ما اجت ويانا
واية تگول هي ما تحب السوگ وماطول تميم ويانا فما يحتاج تجي وتگضي وقتها بقراءة القران او تروح لبيت ابوي تگضي وقت
گلت بگلبي قنعتني وهي ما اجت بس يلا مثل ما گالت خلي اغير جو احسن من گعدة الغرفة ما تنلام من تگول راح يصير بيج توحد
اول ما وصلنا السوگ جان ازدحام مو طبيعي ورغم برودة الجو بس السوگ صاير ازدحام مو طبيعي بحيث گوة نمشي بين الناس
ولان سبت وعطلة فالموظفين والموظفات كلهم يطلعون للاسواق بيهم الي يغير جو وبيهم الي يشتري الاشياء الي يحتاجها
بس الي انتبهتلو ان بالسوك قليل نسوان لابسات خمار مثلي واكو نسبة منهن سافرات لا حجاب ولا شال والمكياج حدث ولا حرج
بالنسبة لياسمين واية ما جانن لابسات خمار بس مو حاطات قطرة مكياج هالشي بامر من تميم بس اني كالعادة لابسة خمار
اخذنا تميم لمول يخبل والملابس الي بيه من صدگ تاخذ العقل وبلشت اول وحدة ياسمين اختارت ملابس بيت وفستان
بس الصدمة من گاللها يصيرن 150 الف لان بالنسبة الي اني يعتبرن هواي ال 150 هاي جنا نشتري اني واهلي بيهن ملابس وحلويات عيد ويزيد منهن
صحيح جنا نشتري من البسطات بس جانن الملابس الي تختارهن ماما النا كلش حلوات مابيهن قصور شدعوة هنا اسعارهم هيج
اني بعدها اية هم اخذت كم دشداشة واجت گالت اجى دورج گلتلها ما اريد شي عندي ملابس گالت دنجبي وتعالي اختاري
گلتلها ما اريد وبقيت مصممة على قراري وراحت گالت لياسمين وتميم وجنت شوية بعيدة عنهم وبسبب هوسة السوك ما اسمع كلامهم
بعدها بلشت اية تختار ملابس هي وياسمين گلت همزين ما جبروني بس تعجبت من اية انها اخذت هواي ملابس فوگ الي عدها بالبيت
وطلعن من المحل الاول بالمول دخلن للثاني جان مليان مكياج هنا اية فقدت عقلها لان تموت عالمكياج هي وياسمين
بين ما اختارن المكياج راح تميم اخذ الملابس للسيارة وجابلنا وياه لكل وحدة بطل ماي خاف نعطش وبصراحة اجى بوقتو لان جنت كلش عطشانة
اخذت البطل وصرت بصفحة شربت الماي ورجعت غطيت وجهي ومن كملن المكياج البنات رحنا لمحل الاحذية ودخلو كلهم الا اني
بسبب خجلي ما جنت ادخل للمحل ابقى يم الباب وانتظرهم لحد ما يشترون ويطلعون وامشي وياهم
خلال وگفتي حسيت حشرة تحركت على ايدي وبدون وعي مني صرخت ونفضت ايدي وانتبهولي كل الي سمعو صوتي
اجى تميم وانتبه ان اكو ورقة صغيرة بالگاع اخذها وماعرف شنو جان مكتوب بيها شو عصرها بايدو وبلحظة وحدة ضرب ولد جان قريب علينا
اني مجرد شفت الموقف من ضربو احس رجليني ماعن من الخوف وسحبني البنات لداخل المحل وتجمعو الزلم على تميم والولد
من الخوف صرت ابجي وكاتلني الخوف واني مو مفتهمة شنو الي صاير وليش تميم ضرب الولد وشنو هاي الورقة الي بالگاع
فجأة سمعنا صوت طلقة وانتبهنا ان الولد جان بايدو مسدس والمسدس متوجه باتجاه تميم واية صرخت بكل صوتها تميييييييم
.....
شكرا لزيارتكم عالم روايات سكيرهوم
