رواية بنت الكهوجي الفصل الثالث والعشرون بقلم احمد
اجى تميم وانتبه ان اكو ورقة صغيرة بالگاع اخذها وماعرف شنو جان مكتوب بيها شو عصرها بايدو وبلحظة وحدة ضرب ولد جان قريب علينا
اني مجرد شفت الموقف من ضربو احس رجليني ماعن من الخوف وسحبني البنات لداخل المحل وتجمعو الزلم على تميم والولد
من الخوف صرت ابجي وكاتلني الخوف واني مو مفتهمة شنو الي صاير وليش تميم ضرب الولد وشنو هاي الورقة الي بالگاع
فجأة سمعنا صوت طلقة وانتبهنا ان الولد جان بايدو مسدس والمسدس متوجه باتجاه تميم واية صرخت بكل صوتها تميييييييم
اني مجرد شفت المسدس اريد اتحرك من الخوف ماگدر واية جانت تريد تركض لتميم بس النسوان الي بباب المحل منعنها
فجأة واحد من الشباب الي موجودين بدون ما بنتبه الشاب ركض عليه ورفع ايدو وتميم ضربو بوكس بوجهو كل قوتو
بهالاثناء اجو الامن مال المول وقبضو عليهم ثنينهم وماعرف شنو حجى تميم وياهم واجى علينا گال لياسمين خابري زيد خلي يجي ياخذكم
ياسمين عالسريع خابرت زيد وانطتو خبر وتميم رجع عالامن وواحد منهم مسكو من كوعو وباوع عليه تميم باستهزاء
اشرلو بحاجبو شو هذا فورا عاف ايدو وكمل طريقو تميم بس من يمشي عليه هيبة مو طبيعية والطلقة الي بالبداية ضربها الولد عالسقف
لان تجمعو ناس بينهم فضرب طلقة فوگ علمود يبعدون عن تميم وماعرف جانت عندو جرأة انو يضرب تميم لو لا
اني مثل التمثال بس اباوع وابجي من الخوف خلال ربع ساعة تقريبا طبو اخوان تميم وابوه وجدو كلهم للمول
اجى زياد باتجاهنا والبقية راحو على ادارة المول علمود يعرفون شنو الي صاير واحنا فورا رحنا ويا زيد علمود يرجعنا للبيت
ركبت بالسيارة وخايفة انو تميم يتورط ويا هالولد ولحد الان مو فاهمة شي
زيد : شنو الي صار ياسمين
- ماعرف يا زيد فجأة ياقوت صرخت وتميم ضرب الولد وانخبصت الدنيا
- ليش صرختي ياقوت
- ماعرف جانت يمكن حشرة على ايدي وخفت منها
- لخاطر الله احجن شي مفهوم
اية : جنا بالمحل دا نختار احذية وفجأة صرخت ياقوت وجانت هي بباب المحل وراح باتجاها تميم وشال ورقة من الگاع ورجع ضرب الولد
- دنزلن انزلن خلي اروح اشوف شكو اذا بقيت وياكن راح اتخبل
اية : تمام عود طمنا عن تميم
- تمام
ياقوت : نزلنا ودخلنا للبيت جانن النسوان كلهن بانتظارنا بالحوش اني دخلت فورا وعفت اية وياسمين يشرحن الهن الي صار
بقيت بالصالة لحد ما دخلن اية وياسمين والحجية الحجية گالت تعالي يمة ياقوت اريد احجي وياج ومن گالت هيج توترت
- نعم
- احجيلي كلشي صار وياج
- والله ما سويت كلشي بس حسيت حشرة على ايدي
- زين الولد ما شفتي وين جان
- لا لان الولد جان يمشي وراي واني جنت اباوع للبنات
- زين الورقة ما شفتي شنو بيها
- لا لان تميم قراها وفورا عصرها بايدو وضرب الولد
- تمام
- اني جنت سبب المشكلة مو
- لا بنيتي منين جبتي هالحجي
- ماعرف
- لا انتي ما دخلج وتميم رجال ويعرف شلون يتصرف وشوية وتلگيه يدخل علينا
- إن شاء الله بس هو تعارك ويا الولد
- شوفي لو واحد من اخوان تميم جان ما اضمنلج شيصير بس ماطول تميم فإن شاء الله ما يصير الا كل خير
- إن شاء الله
سكتت واني شايلة هم بگد الجبل بس الغريب ان اهل تميم مو شايلين هم مثلي وكأنهم واثقين ان تميم راح يرجع باقرب وقت ممكن
وفعلا ماكو تقريبا نص ساعة ودخلو تميم وابوه وجدو وزيد وزياد اما بقية اخوانو فراحو لبيت ابوه علمود يطمنون العائلة
الحجية : ها يمة الحمدلله عالسلامة
تميم : الله يسلمج حجية
- ليش تعاركت ويا الولد
الحجي : ابنج صاير ما يتفاهم بالعقل
تميم : يابة دخل الله يا عقل دا اگلك رقمها وهي وياي رقمها واني واگف بعد مترين عنها شنو تريدني انتظر لحد ما يحجي وياها يلا اتحرك
وهاي گدامك احجيها ان انعادت هاي السالفة قسم بالله لطبگ الارض عليه وعلى عشيرتو وشكو عشيرة تطلع ورا هيج نواقيص
الحجية : يعني رقمها
تميم : اي
- وين شافها وهي طلعت منا لابسة نقاب ورجعت لابسة نقاب
- يمة قابل ما تعرفين الشباب لو يشوف جلبة بالشارع يرقمها
- ما يفكر بعرضو ما يفكر بخواتو
- لو عندو عرض ما سوا الي سواه
ياقوت : جنت واگفة بطارف الصالة لان استحيت من تميم وابوه وجدو وبنفس الوقت الفضول خلاني ابقى بالصالة علمود اعرف شصار
بس ما جنت اعرف شصاير عرفت رقمها بس شنو رقمها ومنو المقصودة ماعرف بس من گالت الحجية منقبة عرفتهم يقصدوني
تخيلو وحدة مثلي عاشت حياتها داخل البيت اكيد ما افهم الموضوع اجت اية سحبتني من ايدي واخذتني للمطبخ
اية : فهميني وين شافج
- بخوف .. والله ماعرف امانة گليلهم والله ما دخلني وما سويت كلشي
- اهدي قابل راح ياكلوج اصلا محد راح يحجي وياج بس فهميني وين شافج
- والله ماعرف
ياسمين : اعتقد من شربت ماي لان رفعت الخمار
اية : يخرب بيتو شنو عيونو رادار بسرعة شافها وانتبه لجمالها
ياسمين : والله يا اية رغم الي سواه عيب وحرام بس ما الومو غير هي تخبل
اية : هههههه شو مكيفة لازم هم رقمتي اخوي من قبل
ياسمين : هههههههههه اي لعد شعبالج
ياقوت : اني واگفة وگلبي يوجعني من الخوف وهن يضحكن
اية : وهم گالج ماما ما تقبل مو ههههههههه
تميم : شبيها ماما
ياقوت : كتمن ضحكتهن ثنينهن واني ما جنت منتبهة لوجودو من سمعت صوتو فزيت وابتعدت عنو وخايفة لا يلومني عالي صار
تميم : اي ست اية جنج جبتي سيرتي
اية : عوف اية وشوف هالمسكينة خايفة منك
تميم : باوع لياقوت متعجب .. ليش خايفة
ياقوت : بقيت ساكتة ماعرف شجاوب
سحب كراسي ثنين من كراسي المطبخ گعد عالاول وحط الثاني مقابيلو بمسافة اقل من متر وگال تعالي بوية گعدي خليني احجي وياج
ياقوت : رغم خوفي بس نفذت امرو وگعدت عالكرسي
تميم : ياقوت انتي حاليا مو غريبة عني حمايتج مسؤوليتي شرفج هو شرفي وعرضج هو عرضي والي يصير الج يصير الي هم
واخذيها قاعدة حتى لو حاربت الدنيا كلها مستحيل اذيج انتي لان انتي امانة المرحوم وراح ابقى محافظ عالامانة طول عمري
ابوج لو جان عندو ذرة شك بي جان ما بقاج يمي فديري بالج بفد يوم تخافين مني لو تتوقعين اني اوگف ضدج حتى لو جنتي انتي على خطأ
اي حتى لو انتي على خطأ راح انصحج وافهمج واوگف وياج لحد ما تتعلمين من خطأج وما تكرريه مرة ثانية
ياقوت : جان كلامو كلش مؤثر وما جان عندي جواب غير دموعي الي بلشت تنزل واني احس انو اجاني سند بعد بابا الله يرحمو
تميم : ها ليش تبجين
اية : كافي يا روحي لا تبجين المفروض تفرحين بهالكلام مو تبجين
ياسمين : لج اية تعرفيها بهيج مواقف تبجي لان ماتعرف شتحجي
زيد : خلص زياد لا تبجي حبيبي
زياد : ببجية مصطنعة .. گالتلي اني سندك وشحدها وحدة تحجي وياك لو تزحفلك
اية : استغفر الله ياربي اجو المخابيل
ياقوت : انگلب بجيي لضحك بسببهم
زيد : خلص رايح رايح
تميم : لا تروحون وصيت على غدا وحسبت حسابكم
زياد : لك فديت ربك اني هو هذا الكلام الينسمع
زيد : بمزح .. اني اروح ما ابقى
تميم : براحتك
زيد : راح ورا باب المطبخ ورجع .. ترا رايح ها
تميم : خوش سكر الباب وراك
اية : هههههههههه تعال تغدا
زيد : ما اريد
اية : ول خالي ما تروح الا تتغدا
زيد : يا خالي....... وقاطعتو
اية : ول خالي والله ما تروح الا تتغدا
زيد : هاي هي خالي صار
اية : ول خالي ما تروح الا تتعشى
تميم : عود ادفعي حساب عشاه
اية : ول خالي ممنوع تتغدى
من گالت هيج كل الموجودين صارو يضحكون حتى تميم بعدها گام من مكانو تميم گال مثل ما گلتلج ياقوت ما اريدج تبجين مرة ثانية
هزيتلو راسي بمعنى اي وراح واخذ اخوانو وياه وبلشت اية تشرحلي انو مو حشرة على ايدي جانت ورقة من الشاب بيها رقمو علمود اخابرو
ومن تميم شافها عرف انو حاول يرقمني لهذا ضربو واكيد شايفني من جنت اشرب ماي رغم جنت حريصة انو محد يشوفني بس ماعرف شلون شافني
واية حاطة احتمال انو رقمني بدون ما يشوفني لان بعض الشباب كل الي يهمهم انثى تحجي وياهم مو مهم شكلها حلو او لا
وبعد ما الامن اخذو تميم والولد اجو اهل تميم واهل الولد وحلوها بالتفاهم لان تميم اخذ حقو من الولد بالضرب واهل الولد ما يگدرون يطلبون شي لان ابنهم غلطان
يعني السالفة انولدت وماتت بالمول والحمدلله انها عدت سلامات ولهذا جانت الحجية مطمأنة لان تعرف ان تميم يگدر يخلص السالفة بهالسهولة
بقو تميم واخوانو عند الحجية يحجون وياها واني بقيت ويا البنات وابو تميم وجدو راحو لبيتهم قبل ما يجي تميم عالمطبخ
ويا ااذان الضهر تقريبا وصل الغدا وراح زياد دخلو وجابو للمطبخ وحطيناه بصحون واية عزلت حصتنا وياسمين اخذت حصتهم للصالة
وگفت محتارة جنت اريد اگوللها نروح نتغدا وياهم بس ما عندي جرأة من جهة اگول هم اعتبروني مثل بنتهم ويستاهلون اعتبرهم اهلي
ومن جهة متوترة لان تعرفون بهيج حالة شگد صعب عالبنت تتخذ الخطوة الاولى اخير شي استجمعت شجاعتي وگلتلها خلي نروح
اية : وين نروح
- اااا لاااا اي
- شبيج ياقوت احجي شكو
- بس ما تحجين لاحد انو اني گلتلج
- اي احجي شكو
- نروح نتغدا وياهم
- بفرح .. صدگ والله
- بتوتر .. اي
- يلاااااا
اخذت الغدا وراحت تركض حطتو وياهم ورجعت سحبتني ركض وهي طايرة من الفرح كأنها اول مرة راح تاكل وياهم وگالت شوفو منو جبتلكم
من شافوني اجيت اريد اكل وياهم ما اوصفلكم الفرحة الي فرحوها والبسمة الي انرسمت على وجوههم من صدگ هيج ناس ماكو منهم
عالسريع سوولي مكان وياهم وصارت الحجية يميني واية يساري وبلشنا نتغدا بس جان صعب علي بسبب الخمار
جنت اخذ اللگمة وارفع الخمار شوية بايدي اليسار واكل بايدي اليمين وبگلبي اگول شورطج وحجيتي جان تغديتي هناك براحتج
زيد وزياد كعادتهم ما بقو ساكتين بس ما جانو يصنفون علي علمود لا يخجلوني جان يحجون عن اشياء مختلفة بس كل حجيهم تصنيف وضحك
صفنت ويا نفسي گلت هسا لو قررت اعوف الخمار هل بابا راح يزعل مني او هل اكسب ذنوب لان يشوفون وجهي تميم واخوانو
وبنفس الوقت اذا بقيت بالخمار هل تميم واهلو راح يكون عندهم عادي الموضوع لو راح يحسون اني اريد ابقى غريبة عنهم
ياربي والله ماعرف شنو لازم اسوي معقولة اگدر استجمع شجاعتي وانزع الخمار بفد يوم من الايام لو راح ابقى هيج باقي عمري
بعدين عفت التفكير بالموضوع وكملت غداي بس لان تميم واخوانو موجودين وبسبب الخمار ما شبعت اكل وما اخذت راحتي بالغدا
رغم انهم جانو جايبين كباب وبيتزا وبرياني يعني كل ما لذ وطاب ومن خلصن غدا البنات بلشت انقل الاكل وياهن للمطبخ وساعدتهن بغسل المواعين
الحجية : خطوة حلوة ان اية جابتها
تميم : مو اية جابتها هي طلبت من اية
- شعرفك
- اية من جابتها غمزتلي وحجت هيج علمود لا تخجلها
- الله يفرحك مثل ما فرحتني
- آمين .. والله يا يمة دائما تفكيري بيها الامانة كلش صعبة وخصوصا اذا كان بشر وفوگها بنت حتى مو ولد
- حطت ايدها على فخذو .. انت سبع وگد الامانة واني واثقة بيك انو راح تصون الامانة
- إن شاء الله يمة إن شاء الله
- ما گلتلي ايمتى تاخذها للمقبرة
- والله يمة ماعرف شنو رايج انتي
- اني رايي تستعجل بالموضوع ما نريد نحسسها انو مستثگلين روحتها
- شنو رايج نروح باجر
- اي خوش فكرة اني راح انطيها خبر
- تمام .. ياسميييييين
ياسمين .. ها تميم
- الغراض بالسيارة روحن اخذنهن
- تمام يلا اية تعالي وياي
اية : اجييييييت
ياقوت : اني بقيت بالمطبخ وهن راحن جابنهن وجانن بس الملابس لان المكياج جبناه ويا زيد بسيارة ابوهم والاحذية ما اخذناهن من الاساس
اية: تعالي ويانا ياقووووت
ياقوت .. اي اجيت .. وبگلبي اگول شگد خبلة هالبنت صوتها ترس البيت
رحت وياهن للغرفة ياسمين عزلت اغراضها بصفحة واية اخذت الي اختارتهن بالبداية وگالت ذني حصتج گلتلها شنو من حصة
اية : ذني الملابس الج
- بس اني ما اخذت كلشي
- انجبي حبيبتي محد طلب رايج
- اية گلتلج ما اخذت شي ولا اريد شي منهن
- تاخذيهن قبل ما اعصب عليج
- ما اخذهن شنو هي گوة .. ماعرف ليش انفعلت
- بسيطة .. وطلعت من الغرفة زعلانة
ياسمين .. حطت ايدها اليمين على وجهها وجسمها يهتز لان دا تضحك
شوية واجت اية والحجية وجانت اية من كل عقلها تبجي وتشهگ ولو مكتولة ما تكون هيج حالتها
الحجية : شبيج ياقوتة ليش ما تريدين الملابس
ياقوت : اني ما اريدهن ومن البداية كلتلهن ما اريدهن
الحجية : اجت گعدت يمي .. احجيلي بنيتي اذا صدگ تعتبريني مثل امج گليلي ليش ما اخذتيهن
- انييييي انييييييي......
- انتي شنو ما عجبنج
- بلى حلوات بس
- تدرين اذا سمع تميم كلامج راح يزعل هواي منج
- ليش
- لان دا ترفضين هدية الشيخ وهو شيخ عشيرة يعني عيب بحقو وحقنا كلنا
- والله مو هيج قصدي
- خلص اخذيهن وحظري نفسج باجر نروح نزور اهلج
- صدگ والله
- اي ياروحي صدگ باجر من الصبح نروح
بدون وعي حضنتها كل قوتي وهي باستني من راسي وعافتنا ونزلت تحت واستسلمت للامر الواقع واخذت الملابس بس اية بقت زعلانة مني
اخير شي اجت ياسمين وشاورتني گالت دغدغيها وهي تضحك وراحت لغرفتها واني شلت الملابس وطگطگت اصابعي وگلت بسم الله وهجمت عليها
