 |
رواية حور الفصل الرابع والعشرون بقلم يارا البرعي
```مر ثلاثة ايام علي الجميع دون حدوث اي شيئ جديد .```
```فكانت حور دائما في المنزل لا تخرج منه وكذلك عمر ولكن حاولوا ان يتخطوا ما حدث يوم حضور مروان اليهم ، يتعاملون معاً بطريقة عادية ويحاول عمر بكل الطرق ان يجعل حور تنجذب اليه لتحبه ولكن حور كان عقلها في مكان اخر ، كان مع مُعلمها مروان وما فعله ذلك اليوم ، ولا تجد اي تفسير لما فعله معها ومع عمر ،حتي انها لم تحكي لأحد عما حدث .```
```اما عمر فقد كان تأكد من مشاعر مروان منذ مجيئه عندهم ذلك اليوم ولكن لم يفتح ذلك الموضوع مرة اخري مع حور حتي لا تحدث مشكلة بينهم وظل يحاول كيف يجعلها تشعر به وتحبه كما هو يحبها .```
```اصبحت حالة مروان اسوأ منذ ذلك اليوم ، يذهب إلي عمله كالعادة وأصبح ينفعل من اقل شيئ وعصبي جداً حتي مع اقرب رفيق إلية (علاء) ، كان علاء يعذره فيما يمر به ولم يضغط عليه ويتركه كما يريد .```
```اما عند اسرة حور ، لم يتغير الوضع كثيراً ، يومهم يمر بطريقة أكثر من عادية ، ولكن دائما قلقون علي حور وعمر والذي كان يذيد قلقهم اختفاء (محمد) والد حور من بعد عقد قرانهم .```
*" " " "*
*في صباح اليوم الرابع ، استيقظت حور الساعة الحادية عشر وكالعادة تجد عمر نائما علي الاريكة وغارق في نومه ، خرجت من الغرفة ودلفت الي المرحاض لتقوم ب روتينها اليومي كالعادة ، ثم جلست تتصفح هاتفها ليقاطعها اتصال من رفيقتها نرمين*
*اجابت حور عليها فوراً فهي اشتاقت اليها كثيراً .*
- الجزمة اللي مش بتسأل عليا .
نرمين /انا برضة يا معفنة ! دة انا كل ما ارن عليكي يديني غير متاح! انا قلقت عليكي والله .
حور / لا يحبيبي متقلقيش ، انا بخير ، المهم انتي عاملة اية وحشتيني اويي .
نرمين/ والله وانتي اكترر ، بقيت كويسة لما سمعت صوتك .
حور /بقولك اي كلام التلفون دة مش هينفع انتي لازم تعدي عليا انهاردة عشان في حاجات كتير عاوزة احكيهالك .
نرمين / اعدي عليكي! ينفع اصلا يا حور طب م تيجي نتقابل ف اي حتة احسن !
حور / هو اي اللي ينفع اصلا يا حور! انتي هبلة يبنتي ، تعالي انتي بس وملكيش دعوه وكمان انا مليش مزاج انزل ولا اشوف حد بصراحة .
نرمين بتفكير/خلاص ماشي هشوف ماما وهعدي عليكي انهاردة .
حور /خلاص ماشي ، يالا سلام دلوقتي عشان هروح اجهز الفطار عشان عمر هيصحي.
نرمين بضحك/ماشي .. يالا سلام .
*اغلقت حور معها الخط واتجهت الي المطبخ لكي تجهز الإفطار وبالفعل استيقظ عمر بعدها بدقائق .*
عمر بابتسامة / صباح الخير.
حور /صباح النور ، يالا عشان الفطار جاهز .
عمر /حاضر هخش الحمام وجاي .
حور / تمام .
*دلف عمر الي المرحاض ليفعل روتينه اليومي كالعادة وتوضأ ليصلي الصبح ثم خرج لتناول الإفطار مع حور التي كانت تنتظره .*
حور /نرمين هتعدي عليا انهاردة عشان بقالنا كتير متقابلناش .
عمر /مفيش مشكلة تنور ف اي وقت ، وزياد كمان كلمني امبارح وهيعدي عليا انهاردة لو كدة نتغدي سوا .
حور /تمام مفيش مشكلة .
*فتحوا معاً عدة مواضيع ولكن عادية للغاية .*
" " " " " " "
*قبل ذلك بثلاث ساعات كان مروان قد استعد للذهاب إلي العمل كالعادة ، خرج من غرفته ليجد رفيقه علاء يجلس بإنتظاره .*
علاء/ تعالي يبني افطر .
مروان / لا مليش مزاج .
علاء/ ملكش مزاج اية يا مروان ! انت بقالك ٣ ايام ع الحال دة ولا بتاكل كويس ولا مهتم بنفسك خالص ! وعمال تروح الشغل و تكثف حصص وكل دة غلط عليك.
مروان بغضب/ وانت مالك يا اخي ما تخليك ف نفسك يا علاء بقي! انا مش فاهم انت مضايق لية! انا مرتاح كدة .
علاء بغضب/ مرتاح كدة! انت بتضحك عليا ولا بتضحك علي نفسك! كل دة عشان البت دي ! ما كفاية بقي يا اخي ، دور ع نفسك ع وحياتك شوية ، وطلع البت دي من دماغك خالص ، ولا انت ناوي تفضل كدة لحد ما تضيع نفسك!.
نفخ مروان بغضب/ انا نازل يا علاء عشان بجد انا مش عاوز اتخانق معاك ع الصبح خالص .
*خرج مروان من المنزل واغلق الباب خلفه بقوة كبيرة تكاد ان تكسره ، وركب سيارته واتجه الي السنتر لكي يبدأ عمله .*
*اما علاء فغضب كثيراً من صديقه ليس للطريقة التي تحدث بها معه ولكن بسبب حياته الذي سيضيعها لأجل لاشيئ ، ظل يفكر ماذا يفعل لكي يخرجه من تلك الحالة ولكن لم يتسطيع الوصول الي حل بتلك السرعة .*
*" " "*
*كان يقود سيارته بكل غضب ، فصديقه معه حق فيما قاله ولكن ليس بإرادته كل ما يحدث ! ف هو لا يستطيع استيعاب ما يفعل ! ولا يستطيع ان يدرك لما احبها بهذة السرعة ، قطع حبل افكاره اتصال من أسيل التي لم تتصل به منذ ثلاث أيام ولكن لم يهتم مروان كثيراً بذلك الأمر فهو حقاً لا يحبها او يراها الشخص المناسب لتشاركه حياته .*
*اجاب عليها بعد تردد ..*
- الو !..
اسيل/ قولت اكلمك انا مادام انت مش بتسأل!
مروان بتماسك حتي لا ينفجر غضباً فيها/ معلش يا اسيل كنت مشغول شوية ف الشغل .
اسيل/ ماشي يا مروان ، كالعادة طبعا نفس الحجة ، علي العموم اتصلت عشان في موضوع مهم انا لازم اتكلم معاك فيه .
مروان بعدم اهتمام/ قولي .
اسيل بتوتر / لا مش هينفع بالتيليفون لازم اشوفك .
مروان / تمام انا هخلص شغل الساعة ٣ ، نتقابل ٣ ونص كدة وهبعتلك اللوكيشن لما اقفل معاكي .
أسيل/ تمام ماشي ، مع السلامة .
*اغلق مروان الخط بغضب.*
مروان بضيق/ اما نشوف عاوزه اية دي كمان .
*ارسل مروان اليها عنوان الكافية الذي سيقابلها فيه ثم تابع القيادة الي مكان عمله .*
*' ' ' ' ' ' '*
اسيل لنفسها/ معرفش اللي هعمله دة صح ولا غلط ، بس انا قررت خلاص واللي يحصل يحصل .
*' ' ' ' ' ' '*
- بعد مرور ساعات ، اتت نرمين الي منزل حور ورحبت حور بها كثيراً وعانقوا بعض عناقاً طويل وكأنهم لم يلتقوا لأعوام ، دلفت حور مع نرمين الي الغرفة لكي يتحدثوا اما عمر فكان مشغولاً في الحديث مع رفيقه ' زياد ' علي الهاتف حتي يأتي اليه .
نرمين بابتسامة/ مش هتصدقي كنتي واحشاني قد اية بجد .
حور / والله وانتي كمان يا نرمين معرفش ازاي قعدنا الايام دي كلها منتكلمش ، دة احنا كنا مقضينا رغي ليل نهار .
نرمين بضحك/ اه والله ، المهم قوليلي انتي عاملة اية واية اللي حصل معاكي في الكام يوم دول ؟.
حور / اقولك اية ولا اية! والله يبنتي علاقتي انا وعمر عادية جداً مش بيحصل اي حاجة غير اننا بنعدي لبعض لحد ما الشهرين يعدوا !.
نرمين/ انتوا لسة مصممين علي حكاية الشهرين دي!
حور /طبعا يا نرمين ، انتي عاوزاني افضل متجوزاه ولا اي ، صحيح عمر اقرب واحد ليا بعديكي بس برضة دة ميمنعش اني عمري ما شوفتوا جوزي ولا هشوفوا كدة ف يوم من الايام ! ، صحيح في اخبار عن ب.. عن بابا!.
نرمين / لا ، دة من يوم كتب الكتاب اختفي ومحدش عارف راح فين ولا ناوي علي اية .
حور / والله ما بقيت عارفة اقلق عليه وافرح عشان بعد عني اخيراً !
نرمين / يستي ان شاء الله كل حاجة هتعدي وهتبقي زي الفل والله .. المهم انتي شكلك في حاجة عاوزة تقوليها ، مالك في اية .
حور بتوتر / بصي في حاجة حصلت من ٣ ايام كدة ومش عارفة الاقيلها تفسير ولا عارفة اتصرف ازاي .
نرمين بإستغراب/ حاجة اية!
حور /مستر مروان جه هنا .
نرمين بصدمة/ ايية ! .. ءء ازاي يعني.
حور / هحكيلك.
*قصت عليها حور كل شيئ حدث في ذلك اليوم وكل كلمة قالها مروان من وقت ان اتي اليهم حتي ذهب .*
حور/ ساكتة لية يا نرمين ما تقولي حاجة!
نرمين بصدمة/ اقول اية بعد اللي قولتيه!
حور /معرفش! انا من يومها وانا دماغي هتتشل من التفكير يا نرمين ، انا كنت اتلهيت ف اللي حصل ف حياتي وطلعت فكره الاعجاب بيه دي خالص من دماغي ، لحد ما جه هنا وحصل اللي حصل وانا مش قادرة ابطل تفكير فيه وف اللي حصل ومش قادرة احدد عمل كدة لية!.
نرمين/والله اللي حصل دة ملوش غير معني واحد بس صعب يدخل دماغ حد ، انه...
حور بمقاطعه/ابوس ايدك متقوليش زي عمر انه بيحبني وغيران والهبل دة عشان مينفعش .
نرمين/ هو انتي شايفالها تفسير تاني ! والله انا مش شايفة غير كدة وانه فعلا بيحبك ! سيبك من حوار عرف العنوان منين والهبل دة ، الفكرة كلها فيه هو و ف الكلام اللي قاله .. انتي بتقولي حصل من امتي الكلام دة !
حور بتذكر / من تلت اربع ايام تقريباً .
نرمين / تقريبا مستر مروان بقاله كام يوم اصلا بيجي السنتر و حالته متغيره تماماَ ، بقي عصبي اكتر من الأول و ماشي يتخانق مع دبان وشه وغير كدة اتخانق مع كريم السكرتير بتاعه ومشاه من الشغل قدامنا ! كل دة تفتكري صدفة او شيئ عادي ! الراجل تقريبا بقي ف حالة اكتئاب!
حور بعدم اقتناع/ انا برضة مش مقتنعة يا نرمين ، اصلها صدفة غريبة يعني لما الشخص اللي اعجب بيه يطلع هو كمان معجب بيا لأ وكمان يكون المستر بتاعي وفرق السن بينا كبير كدة!.
نرمين /والله بقي انتي حرة تقتنعي او لأ دي حاجة ترجعلك بس اللي حصل دة ملوش اي تفسير تاني يا حور .
حور بضيق/ يووه خلاص بقي فكك من السيرة دي ، قوليلي الدنيا ف السنتر ماشية ازاي !.
نرمين /والله تقدري تقولي كل حاجة بقت غريبة ، زي م قولتلك عن طريقة مستر مروان وكمان السكرتارية بقوا يخنقوا اكتر من الأول ، و اه صحيح ملك شكلها اتخانقت مع داليا و الاء .
حور / مستغربتش نهائي علي فكرة ، اللي زي دول لازم تتوقعي نهاية علاقتهم ف اي وقت ، لانهم صحاب ع المصلحة وبس غير كدة مش بيعبروا بعض .
نرمين/والله معاكي حق بس طريقتهم المرة دي غريبة شوية ، يعني كالعادة هما لما بيتخانقوا بيلقحوا علي بعض او بيتلككوا لبعض علي اي حاجة عشان يبينوا انهم روشين بس المرة دي شكلها حاجة كبيرة ، داليا و الاء بيجوا الاول و ملك بتيجي بعديهم ومش بتبصلهم حتي وبتقعد قدام بعيد عنهم ومن يومين لما راحوا يكلموها بعد الدرس اتهربت منهم ومشت لوحدها .
حور بإستغراب/ غريبة يعني! بس يستي عادي ، الخبر اللي انهاردة بفلوس بكرة ببلاش . مصيرنا نعرف سبب المشكلة كالعادة .
نرمين/علي رأيك .
حور /يالا بقي نطلع عشان زمان زياد جه وكمان عشان احط الغدا .
نرمين بصدمة /زياد ! انتي قصدك صاحب عمر ، و دة جه لية دة! احم اقصد يعني انتي مش قايلالي .
حور /عرفت بعد ما قفلت معاكي اصلا ومكنش في وقت اكلمك وبعدين فيها اية ! هنطلع نتغدي وهو يقعد مع عمر وانا وانتي نكمل قعدتنا .
نرمين / غدا اية يا حور انتي بتهزري يبنتي انا كدة هتاخر وماما هتزعق .
حور بزهق/يستي هبقي اكلم امك انا واقنعها كالعادة اية الجديد يعني ؛ قومي بقي .
*خرجت حور من الغرفة وهي تسحب نرمين خلفها التي صُدِمَت عندما عرفت بحضور زياد ف هي في المرة الأولي عندما رأته تشاجرت معه فكيف ستجلس امامه بالفعل ستكون محرجة جدا ولكن تماسكت وخرجت خلف حور وهي تمثل إنها لا تعرفه .*
حور وهي ترحب بزياد/ ازيك يا زياد عامل اية ، نورتنا .
زياد بإبتسامة ولكن كان موجه نظره علي نرمين/ دة نورك يا حور تسلمي .
حور بإبتسامة/ اعرفك نرمين صاحبتي و دة يا نرمين زياد اقرب صاحب ل عمر و...
تدخل عمر بخبث / تعالي يا حور عشان نجهز السفرة وهما يتعرفوا .
*سحب عمر حور من يدها وهي لا تفهم شيء ولكن ذهبت معه دون ان تنتطق بحرف واحد .*
زياد بخبث/ اهلا بصاحبة حور اللي زي اختها .
نرمين بسخرية/ نينيني ! ما شاء الله ذاكرتك قوية اوي .
زياد بضحك/ نقي بقي علي الواحد .
نرمين/ بقولك اية لو سمحت مش طالبة معايا شغل عيال خالص لو سمحت اسكت .
زياد بغضب / شغل عيال! انتي هبلة يبت انتي ولا اي ؟ بقولك اية مش عشان سكتلك المرة اللي فاتت يوم كتب الكتاب يبقي هسكتلك هنا !.
نرمين بغضب / لا ونبي متسكش ( قالتها وهي تقلد ام صالح فيلم بنك الحظ) ، هتعمل اية يعني وريني كدة !.
زياد بغضب/انا ممك...
حضر عمر بسرعة/ اية دة في اية بس بقي انا سايبكوا تتعرفوا تقوموا تتخانقوا !
نرمين بغضب/ نتعرف! ودي اشكال الواحد يتعرف عليها .
زياد بغضب/ اسم الله علي اللي عاشقينها في الضلمة ! قال نتعرف قال .
عمر بضحك / طب ممكن تبطلوا تفاهه ويالا عشان الغدا جاهز .
*نظروا الاثنان لبعض بتوعد وكان يحاول عمر ان يكتم ضحكاته ، انتبهت حور علي الوضع ولكن لم تسأل علي اي شيئ وجلست في صمت وهي شاردة في شيئ اخر .*
*" " " "*
*بعد ان انتهي مروان من عمله ، اتجة الي الكافيه الذي سيلتقي فيه مع أسيل ، ووجدها جالسة بإنتظاره علي احدي الطاولات .*
مروان / قاعدة من بدري !
اسيل بهدوء/ لا لسة واصلة من دقايق .
مروان / تاكلي اي .
اسيل /انا مش جاية اكل يا مروان انا جيت اقولك واعمل اللي كان لازم يحصل .
مروان بإستغراب/ تقولي اية!.
*اسيل بهدوء وحزن وهي تخلع خاتم خطبتهم من يدها*
- دبلتك اهي يا مروان .. عارفة ان في اسئلة كتير في راسك دلوقتي بس انا هجاوبك علي كل دة ، بس ارجوك بلاش تقاطعني ، انا قبل ما اعرفك بفترة كبيرة ، كنت مرتبطة بواحد اسمه سيف وثقت فيه ثقة عمياء كان كل حياتي بالمعني الحرفي ، بس انا كنت غبية لأن ثقتي فيه خلتني اهين نفسي واهين كرامتي وابعتله صور كتير ليا بلبس مينفعش حد يشوفني بيه *ثم بدأت بالبكاء*.. انا بعد ما عرفت ان انسان قذر كدة سيبتو وهو كمان سافر ومعرفتش عنه حاجة و مجاش ف بالي انه ممكن يعمل حاجة بالصور دي لحد ما .. لحد ما ظهر فحياتي من فترة وبدأ يهددني اني لو منفذتش كلامه هيبعتلك الصور دي عشان يدمرلي حياتي ، انا وقتها خوفي من اني اخسرك خلاني اوافق علي طلبه وهو اني اخليه يشتغل عندكوا فالشركة ، ف الاول والله مكنتش اعرف عاوز كدة لية كنت فاكراه عاوز شغلانة كويسة وخلاص يكسب منها فلوس ، بس مش دة السبب .
مروان بهدوء مُرعِب لم تتوقعه أسيل/ اومال اية السبب !.
أسيل وهي تمسح دموعها / انا من يومين اتصلت بيا واحدة اسمها نور ، طلبت انها تقابلني عشان الموضوع يخص شركة الجارحي ، استغربت الاول بس قولت اقابلها ومش هخسر حاجة ، وروحت قابلتها ف نفس اليوم و...
*Flash back*
اسيل بإستغراب/ انتي تعرفيني منين ولية طلبتي تقابلني !
نور / عرفتي شكلي منين!
اسيل/ من صورة الواتس ، واظن دة مش موضوعنا .
نور بهدوء / معاكي حق ، طب ممكن تقعدي .
*جلست أسيل بإستغراب شديد .*
نور بهدوء/ بصي انا كل مشكلتي اني حبيت واحد ووثقت فيه وسلمتله نفسي وهو للأسف طلع واحد حقير ميستاهلش حبي لية وطبعا انتي عارفاه كويس .
اسيل بصدمة واستغراب /مم.. مين!
نور /سيف يا أسيل ، سيف اللي استغلنا احنا الاتنين .. بس برضة انا مش جاية اقولك غير حاجة واحدة ، سيف مينفعش يدخل يشتغل ف شركات الجارحي نهائي ، سيف كان متفق معايا علي الجواز وطلب مني اني اساعدة لما ندخل الشركة عشان هننقل معلومات لأكبر الشركات المنافسة لشركات الجارحي فوافقت وانا مغمضة لاني كنت وثقة فيه لدرجة نستني كل حاجة ، وبعدها بيوم سمعته بيكلم واحدة ف التلفون وغالبا دي ضحية تالتة ، وبيقولها ان انا مجرد تسلية مش اكتر ومجرد وقت وهيرميني وكلام او** من دة ، استرخصت نفسي اوي ساعتها وملقتش قدامي غير اني اخد رقمك واكلمك عشان تلحقي خطيبك قبل ما يشغله ف الشركة .
أسيل بصدمة/ وانتي عرفتي ازاي كل المعلومات دي عن الموضوع مش المفروض هو طلب منك تشتغلي معاه وبس .
نور بسخرية /سيف علي قد ما هو انسان حقير وقذر بس غبي اوي ، انا بعد ما سمعتوا مبينتلوش حاجة وطلبت اعرف منه معلومات اكتر عنك وهو قالي كل حاجة من اول ما ظهرلك عشان الصور لحد ما كلمتي خطيبك عشانه .. صدقيني يا اسيل خطة سيف مش سهلة ولو سيف دخل الشركة ونقل المعلومات اللي الناس عاوزينها يبقي شركة السيوفي هتعلن افلاسها .
*back .*
اسيل بحزن/ وسبتها ومشيت بعد كدة وانا مش عارفة اعمل اية ! لحد ما قررت اني احكيلك علي كل حاجة حصلت عشان انت تستاهل انسانة احسن مني يا مروان .
*تركت الخاتم علي الطاولة وظلت جالسة تنتظر منه اي رد ولكن كان الصمت هو المسيطر علي ارجاء المكان .*
