رواية بنت الكهوجي الفصل الخامس والعشرون 25 بقلم احمد

ياقوت : نزلت وتفاجأن الحجية وياسمين واية بي وانصدمن من گلتلهن قررت اتركو وبنفس الوقت فرحن لان راح اخذ راحتي اكثر بالبيت 

تميم بوقتها ما جان موجود ماعرف وين رايح حطت الغدا اية وگعدنا نتغدا اني وياها وفجأة دخلو علينا تميم وزيد وزياد 

تميم : اندار بصفحة هو واخوانو .. العفو ياقوت ماندري بيج هنا 

الحجية : تفضلو يمة ياقوت مو غريبة 

زيد : يعني نفهم ان اختنا ياقوت ما تحتاج نقاب 

الحجية : اي يمة 

زيد : لك عاش تعال زياد تغدا 

زياد : اي والله خوش خبر ويستاهل نتغدا علمودو 

ياقوت : گعدو زياد وزيد يتغدون ويانا بس الغريب ان زيد باوعلي بدون ما يبعد نظرو وجان كلش مركز بي حتى اهلو انتبهو 

تميم : شبيك زيد 

زيد : ياقوت ما بيها شبه لابوها اكيد طالعة على امها 

- البنية راح تحرم تطلع من الغرفة على نظرتك هاي على شوية تاكلها 

- هههههههههه تعرفني احب اعرف اذا الشخص الجديد يشبه احد اعرفو لو لا 

ياقوت : وطلعت اشبه منو 

- جدتي خروعة 

اني مثل الي انصدمت من گال هيج لان گالها ببرود بس زياد جان يعرفو يتشاقى وياي ومن گال هيج زياد وگع بالگاع من الضحك 

الحجية : عوفو بنيتي ولكم ترا اگوملكم 

اية : ها يمة لعد اني شنو 

زيد : انتي بنت البطة السودة 

اية : عابتلك 

زيد : ياقوت بما انج قررتي هالقرار فاريد اسألج سؤال وجاوبيني بصراحة 

ياقوت : شنو سؤالك 

- تضوجين من نتشاقى وياج 

- اذا بحدود لا 

- وشنو هاي الحدود 

- اولا مو تفشلوني گدام غريب ولا تلمسوني حتى ايدي لان هالشي حرام 

- هاي هي اتفقنا 

تميم : لا تنطينهم عين ترا ياكلوج 

ياقوت : يمكن هيج النهاية 

زيد : يعني هيج ما يصير مو 

ياقوت : كمل كلامو وسحب اية وخلال ثانيتين شالها فوگ كتفو وهي انفجرت بالضحك واخذها عالمغسلة وفتح الماي البارد على رجليها 

هي من النوع الي بسرعة تبرد اطرافها فتخيلو ان الرجلين لحالهن يبردن بالشتاء وهو فتح الماي البارد عليهن واية جانت لابسة جواريب 

اية : لااااااا زيد فدوة فدوة لا والله باررددددد 

زيد : لا تنحركين ترا من تتحركين يوصل الماي لملابسج 

اية : فدوة فدوة والله بارد ههههههههه ولك زياااااد انقذني 

زياد : امركِ مولاتي الاميرة 

جان لاف شماغ على راسو نزلو ولفو سواه مثل الحبل وطبگو طبگتين وراح ركض وضرب زيد بكل قوتو على (مؤخرتو) 

زيد نزل اية وركض ورا زياد بس زياد طلع خارج البيت واية نزعت الجواريب واجت ركض تدفي رجلينها وجانن حمر من البرد 

زيد : السلام عليكم 

تميم : ها شو رجعت 

- انهزم هالجريذي تگول بيب بيب ما ينلحگ 

- وايمتى ناويين تعقلون 

- من انت تعقل 

- شنو شايفني مخبل 

- ما يناقش المخبل غير المخبل 

- ههههههههه بهاي صدگت 

- اگلج هالة شو تكبرين وتحلوين لازم دا تسوين عمليات تجميل 

الحجية : ليش شنو ناقصني 

- ترا خايفين على ابونا خاف تخطفينو 

- ابوك زوجي قبل ما انت تجي للدنيا 

- ترا ابونا هم گلبو رهيف من يشوفج يبيعنا ويجيج 

- هههههههههه هذا الحجي قبل مو هسا واحنا بهالعمر 

- لك عاش يعني جان مستعد يبيعنا هههههههههه 

- لا مو لهالدرجة 

ياسمين : بمزح .. كافي زيد شگد تحجي 

- عاش من سمع هالصوت نص نصيص صار ساعة ساكتة اخير شي سالفتج ما منها فايدة 

- ترا اني اكبر منك 

- العمر مجرد رقم المهم الحجم 

- انت بالحجم مثل الوحش 

- صحيح وهو المطلوب علمود من اعصب اسحل زوجج 

ياقوت : گال الجملة هاي ومن گام تميم انهزم منو واية اخذت المواعين للمطبخ واندگ باب الصالة وسمعنا صوت زياد گال يمة اجتكم الدكتورة 

الدكتورة : السلام عليكم 

الكل : عليكم السلام ورحمة الله 

الدكتورة : انتبهت اني مو لابسة نقاب .. اتمنى اجيتكم بوقت مناسب 

الحجية : هلا بيج ايمتى ما تجين بنيتي 

الدكتورة : مشكورة حجية 

الحجية : يمة ياقوت روحي انتي وخيتج للغرفة علمود تحجن براحتكن 

ياقوت : تمام .. اخذتها للغرفة وجابتلنا اية عصير 

الدكتورة : شلون صرتي 

- الحمدلله كلش زينة 

- ليش تخربطتي ببغداد 

- ماعرف 

- سولفيلي علمود افهم 

- ماعرف شلون اوصفلج الموقف بس من گعدت عند قبر بابا حسيت نفسي انتقلت لليلة الي توفى بيها وماگدرت اتحمل الموقف 

- انتي دا تحملين نفسج اكثر من طاقتج المفروض تقرين الفاتحة الهم اول شي وتحجين الهم اي كلام عدا العتاب او الم الفقدان 

تحجيلهم مثلا طموحاتج او افكارج الي قررتي انو تنفذيها تحجيلهم عن موقف اهل تميم وياج 

- ماعرف من گعدت هناك ماعرف احجي شي غير العتاب .. وبلشت دموعي تنزل 

- احجيلي شنو جنتي تريدين تحجين لابوج 

- جنت اريد اعاتبو انو تركني وحدي اهل تميم كلش زينين وياي بس مدا اگدر اتحمل فقدانو دا اتظاهر بالقوة بس داخلي محطمة 

ما اريد اكون عالة على احد وبنفس الوقت مو گادرة اتحمل فقدانو ودا احس فقدانو مثل السرطان ودا ينهش جسمي من الداخل 

- سحبتني لحظتها لاول مرة .. انتي مو عالة على احد بالعكس انتي هسا منهم وبيهم وتركج للنقاب اكبر اثبات على هالشي 

بس لازم تعيدين حساباتج ويا نفسج علمود تتغيرين ما تبقين هيج حزينة حاولي تلتهين بوقتج تسوين اشياء تحبيها تبنين مستقبلج 

- شنو من مستقبل ابنيه ولمنو ابنيه 

- تبنيه لنفسج انتي شنو مو ناوية تتزوجين وتكونين عائلة ويا زوجج واطفالج وبوجود عائلة وياج راح تتحملين فقدان اهلج 

هسا لازم تفكرين تكملين دراسة من السنة الجاية وتنجحين وبعدها يبدي مستقبلج ينبني گدامج ولا تنسين نجاحج يعتبر فخر لاهلج 

ياقوت : بقت تنصحني وتحجي وياي لحد ما قنعتني انو ما اتمسك بالماضي واحاول ابدي حياة جديدة وقبل المغرب بشوية راحت 

بعد ما راحت كملت العشى ويا ياسمين واية وبعد العشى كملنا شغلنا ورجعت قست الملابس الي جبناهن من السوك وجانن على قياسي بالضبط 

وبهاليومين ما صار مجال اجربهن وجانت اية حاسبة حسابي وياهن بالمكياج بس ما اعرف استخدمو وگلتلها بقيه يمج واذا احتاج انتي تحطيلي 

اية : خلي نگول لتميم ياخذنا وياه علمود نجيب احذية وباقي احتياجاتنا 

ياسمين : اني راح اگلو اليوم 

ياقوت : اني ما اروح وياكن 

اية : ليش عود 

- الي صار ذاك اليوم يكفي 

- بدون تخبيص ياقوت خلي نتونس لا تخربين فرحتنا 

- فدوة اية لا تجبريني وربي ما بقى الي نفس بالروحة نهائيا واذا رحت ماراح اروح يرضاتي 

- المهم تجين مو المهم راضية ولا لا 

ياسمين : عوفيها اية لا تلحين عليها المهم تسوي الي مقتنعة بيه 

- اريد نتونس وياها 

- گلتلج عوفيها براحتها ومنا لباجر اذا غيرت رايها تجي ويانا 

- تمام تمام بس فكري زين ياقوت وحاولي تغيرين رايج 

ياقوت : تمام 

بقينا نحجي الى ان اجى وقت النوم وراحت ياسمين لغرفتها واني واية نمنا لان وراها دوام باجر ولازم تگعد من وقت 

ثاني يوم جانت الاحداث طبيعية وبعد الظهر راحو تميم وياسمين واية للسوگ وحاولو تميم والحجية يقنعوني گلتلهم ما اريد اروح 

وبقيت ويا الحجية گاعدة وصرنا نحجي عن ايام زمان واكثر شي حجيتلها عن حياتي ويا بابا بعد وفاة ماما وشلون جان يخفيني عن الناس 

من جنت احجيلها على حياتي احسها بسرعة تتأثر لانها من الناس الكلش طيبة وبسرعة تتأثر باحزان الاخرين فجانت كلش تتعاطف وياي 

زيد : السلام عليكم 

الحجية : هلا وليدي 

- وين البقية لعد 

- راحو للسوگ 

- تمام .. ياقوت گلاص ماي لاخوج اذا ما بيها زحمة 

- تمام .. ورحت جبتلو گلاص ماي 

- اي والله رحم الله والديج 

- ووالديك .. ماعرف ليش حسيت بفرحة انو طلب مني وما اعتبرني غريبة 

- اتصل على تميم .. الو 

تميم : هلا زيد 

- وين انت 

- بالسوگ 

- جيبلنا وياك عشى وانطي خبر لزياد 

- كأنو ميانتك صايرة زفرة 

- هاي من اخلاقك الطيبة حبيبي 

- دنجب وروح جيبلك عشى ما اشتغل عند نصير اني (نصير ابوهم) 

- عادي نشغلك يمو جيب اوراقك اليوم 

- يلا يلا بعدين نحجي 

- انطيني اية 

اية : هلا زيد 

زيد : بروح ابوج اقنعيه يجيب عشى 

- بخباثة .. بابا مو ميت ما دخلني بيك 

- افه ولج مو اني اخوج 

- لعد ليش تحط رجليني بالماي البارد 

- احنا ولد اليوم مو البارحة يلا يلا انتظركم 

- اممممم افكر بالموضوع 

- سكر الاتصال بوجهها .. دطيري لو ادري مشتري عشى بدال الرصيد الي راح 

الحجية : ههههههههه هذا الي يتمنى اية 

- معليج راح يجيبون .. واتصل على زياد 

زياد : هلا زيد 

- وين انت 

- بالمضيف 

- الحگ 

- شكو 

- تميم راح يجيب عشى سفري 

- جايكم 

- دنجب روح جيب حلويات وببسي للعشى والتعليلة 

- ماعندي فلوس .. يجذب ما يريد يدفع من عندو 

- عادي تميم گال انطيه من ارجع للبيت 

- ابوس ربك اني 

- يلا استعجل .. وسكر الاتصال 

الحجية : يخرب بيتك حتى اني راح اصدگ جذبتك 

- ههههههههههه خليهم يتلاصمون من يرجعون 

- بس لا يسحلونك ثنينهم 

- افه عليج لعد هالسبعة هاي شنو مو عاجبتج (ياقوت) 

ياقوت : رفعت ايديني .. اني ثمانية مو سبعة 

بوية من گلت هيج ضحك ضحكة الا وجهو صار احمر وصوتو ترس البيت لان هو من النوع الي يضحك بصوت عالي 

اني والحجية على ضحكتو ضحكنا وبقينا نحجي ونضحك الى ان اجى زياد جايب الحلويات والببسي انطانياهن وگعد بالصالة 

اني اخذت الببسي حطيتو بالفريزر علمود يبرد زين وعلاگة الحلويات حطيتها بالثلاجة من تحت وبين ما رجعت عليهم دخلت اية بايدها العشى 

زيد : حبيبي هواية طولت تعال اشوف مو متت 

لو بعد لحظة تأخرت نفس ما تلگى بي 

زياد : بالحلم شفتك رجعت بستني وبشوگ حظنت من نومي لكن گعدا لگيت البوسة بي 

كملو الاغنية واية من بلشو يغنون هي نزلت الاكل وصارت ترگص مثل البنات الي يرگصن بباب الحارة ودخل تميم گال اللهم ثبت علينا العقل والدين 

زيد : دكافي اية اثگلي شبيج 

اية : عابتلك فوگ ما اونسكم 

زيد : لعد ما شفتي زياد شسوا 

اية : شسوا 

زيد : تبرع بعلاگة حلويات وببسي 

اية : جذذذذذذذذب 

زياد : هوب هوب هوب شنو تبرع ابن الحلوة مو گلتلي تميم گال انطيه 

تميم : اني گلتلك شي 

زياد : لا بس هو گالي 

تميم : محد جبرك تصدگو 

زياد : زيد جيب فلوس الحلويات 

زيد : قسم بالله ربع ما بجيبي تعال فتشني اذا مو مصدگ 

زياد : هالة حليها بيناتنا قبل ما نتخارب 

الحجية : والله زياد مشكلتك تعرف زيد جذاب ليش تصدگو 

زياد : قسم بالله فلا احط لگمة بحلگي من العشى اذا ما تنطوني فلوسي 

تميم : مشكلتك .. يلا ياسمين حطولنا العشى وجيبو من ببسي زياد 

زياد : ماكو الببسي اخذو ارجعو 

- الي يوصل البيت ما يطلع 

ياقوت : خليناهم يتناقشون اني وياسمين ورحنا حطينا العشى واية دخلت الغراض اخذتهن للغرفة وحطينا العشى بالصالة 

گعدنا كلنا مع بعض الا زياد گاعد بصفحة لان حلف انو ما ياكل من العشى الا ينطوه فلوسو ويباوعلهم بقهر خصوصا زيد 

زيد : اكل لگمة من الكباب .. بويييييييية يخبل ووياه ببسي يا عيني 

زياد : بروح ابوك تميم 

تميم : گوة كاتم ضحكتو .. شبيه ابوي 

زياد : بروح ابوك انطيني فلوسي خليني اكل 

ياقوت : من گال هيج زيد الخبيث وگع بالگاع وصار يرافس من الضحك تميم لاول مر يضحك بصوت عالي واحنا ضحكنا على ضحكتهم 

تميم : منو جبرك تحلف 

زياد : صارت بعد ولك باوع الكباب شلون والبرياني ينزل عالجرح 

تميم : تعال تعال واعتبر فلوسك بجيبك 

الحجية : هو حلف ياخذهن 

تميم : تعال اخذ فلوس من جيبي مابي حيل اغسل ايديني 

زياد : ولك ابوس ربك اني 

گام وجان زيد دا يگوم علمود يرجع ياكل وضربو زياد جلاق وگعو بصفحة وانفجر زيد بالضحك مرة ثانية واجى زياد اخذ فلوس من تميم 

واخذ 25 زيادة گال هاي لان شلعتو گلبي انت وهالجلب هذا وراح غسل ايديه ورجع تعشى ويانا وكل شوية زيد يگول بروح ابوك تميم ويضحك 

ما خلصنا عشى الا بطونا صارت توجعنا من الضحك زيد وزياد مشاءالله مسحو الصحون مسح بحيث ما بقو لو لگمة وحدة بيهن 

زيد : مبروك الانتصار زميلي زياد 

زياد : الله يبارك بيك حبيبي وإن شاء الله نلتقي بموسم ثاني 

- الموسم الثاني بالليل 

- شنو مخبل وانسى 

- عبالي نسيت 

اية : ممنوع تجون بالليل 

زيد : ويص ويص ويص 

زياد : مياااااااااو 

اية : اول مرة اعرف ان ابوي خلف حيوانات 

ياقوت : باوعو زيد وزياد لتميم بنفس اللحظة وتميم گال مياو هو گال هيج وزيد طلع يركض من الصالة وزياد وگع بالگاع 

ياسمين ماسكة بطنها وتضحك اية وگعت فوگ زياد والبيت ما تسمع بيه بس صوت الضحك حتى الحجية صار وجهها احمر ممن الضحك 

رغم تميم من النوع الثگيل وما يتشاقى هواي بس حسيتو ما حب يضيع الفرصة وگال مياو على اساس اية شملتو بكلامها 

من. شوية راحت الضحكة مننا اني والبنات اخذنا المواعين للمطبخ وبلشنا نغسلهن علمود نخلصهن بسرعة ونجهز للتعليلة بما انهم جابو حلويات 

طبعا بالنسبة للمواعين من نجيب سفري نحطو بمواعين البيت لان ما نرتاح بالاكل بمواعين السفري لذلك نغيرهن 

بين ما خلصنا المواعين اجى زيد مغسل ومبدل ملابسو ومتعطر اول ما دخل للصالة باوع لزياد وزياد گال مياو ورجعو انفجرو بالضحك 

وبقو يحششون ويضحكون ذيج الليلة لحد ما من صدگ صارت بطونا توجعنا اني احس صار بي مغص واريد اسكت ماگدر 

الساعة صارت تقريبا 11 سمعنا صوت شخطة سيارة گدام البيت واندگ الباب بقوة ووراه صوت طلق وطلعو الولد ركض