رواية بنت الكهوجي الفصل السادس والعشرون بقلم احمد
ياقوت : بين ما خلصنا المواعين اجى زيد مغسل ومبدل ملابسو ومتعطر اول ما دخل للصالة باوع لزياد وزياد گال مياو ورجعو انفجرو بالضحك
وبقو يحششون ويضحكون ذيج الليلة لحد ما من صدگ صارت بطونا توجعنا اني احس صار بي مغص واريد اسكت ماگدر
الساعة صارت تقريبا 11 سمعنا صوت شخطة سيارة گدام البيت واندگ الباب بقوة ووراه صوت طلق وطلعو الولد ركض
الغريب ان الطلق مو هواي مجرد 3 او 4 طلقات وتوقف دگ الباب والحجية صاحت عالولد علمود يرجعون بس لازم يطلعون يشوفون شكو
اول ما طلعو زياد سحب الباب وگال لا تطلعن وتسولنا كارثة وطلعو وياهم ابوهم واخوانهم وجدهم وصارت خبصة عند الباب من خارج
سمعنا تميم گال اخذوه للمستشفى بسرعة وعشنا حالة خوف مو طبيعية لا نعرف شصاير ولا واحد بيهم رجع علمود يطمنا
بعد تقريبا نص ساعة اجى زيد بس راح اول شي لبيت ابوه خمس دقايق واجى علينا وراح فورا للحجية عالصالة
الحجية : ها زيد شكو
زيد : يمة اكو ولد جان مضروب طلق عند بابنا لا نعرف هو منو ولا نعرف منو ضربو
- يا ربي سترك وهسا
- زياد والولد اخذوه للمستشفى وحاليا هو بالعملية لگينا سيارتو هنا بس ما لگينا اي اثبات او شي علمود نعرف اسمو ولازم ننتظرو يگعد
تميم : السلام عليكم
الحجية : هلا يمة شراح تسوي هسا
- مانگدر نسوي شي قبل ما يگعد الولد ويحجيلنا
- الله يگومو بخير وسلامة
- آمين .. انتو نامو ما يحتاج تبقون گاعدين
- وانت
- اني بس تخلص عملية الولد واتطمن عليه انام
- يلا بناتي كل وحدة لغرفتها وانت زيد خلي اية تفرشلك هنا بالصالة
زيد : تمام يمة اروح اجيبلي دشداشة نوم وارجع
- يلا اية افرشي لاخوج هنا
اية : تمام يمة
ياقوت : صحيح تطمنا ان ماكو احد من عائلة تميم بيه شي بس بقينا متوترين وخايفين عالولد لان تصوب يم بابنا فاكيد اجى علينا متعمد
جبنا فراش زيد اني واية فرشناه الو ورجعنا لغرفتنا تمددنا وبقينا نحجي اني واية لان بسبب التوتر ما اجانا نوم بالبداية
تقريبا صارت الساعة 1 يلا نمنا وگعدت ويا اذان الفجر گمت طلعت من الغرفة البيت بيه هدوء غريب وانتبهت لنفسي طالعة بدون شال
رجعت ركض للغرفة قبل ما يشوفني احد وجددت وضوء وصليت ورجعت نمت وما گعدت اية للصلاة لان بعد شوية تگعد للمدرسة
من نمت ما گعدت لل 8 جانت اية دا تاخذ جنطتها علمود تروح صبحت عليها ومن راحت گمت عدلت فراشي وغسلت وجهي ولبست شالي ونزلت
جانت الحجية گاعدة بالصالة واني رحت للمطبخ ساعدت ياسمين بالريوك ولاول مرة نگعد بهالوقت لان مشغول بالنا بسبب الولد ومن خلصنا الريوگ اخذناه للصالة
ياسمين : يمة الولد ايمتى يگعد
الحجية : والله ماعرف يا يمة بس الدكتور يگول حالتو زينة
ياقوت : يعني نجحت العملية
الحجية : اي الحمدلله
- عندو العافية
- الله يعافيج
- اذا عرفتو منو صوبو شنو راح تسوون
- لازم نعرف ليش صوبوه بالبداية لان مو معقولة يجينا ويتصوب بدون سبب
- اي والله صحيح
- بس انتي لا تخافين ولا تهتمين للموضوع
- يا ما اخاف غير لحد الان خايفة من صوت الطلق
- ياااااا ياقوت قابل مو عايشة بالعراق انتي
- بلى بس البارحة حسيت الطلقة انضرب علينا لذلك خفت
- احنا العراقيين تعلمنا عالطلق والانفجارات
- اي والله الله يبعدهن ثنينهن عننا
- آمين يا بنيتي آمين
من خلصنا ريوگ راحت الحجية لبيت الحجي علمود تعرف منهم الاخبار واني وياسمين سوينا حملة تنظيف للبيت كلو
الحجية گالت نظفوه احتمال يجينا احد للبيت من اهل الولد لازم يكون البيت نظيف من يجون واستلمناه اني وياسمين جلف
اول شي بدينا بالطابق الفوگ نظفناه ونزلنا للطابق التحت هم جلفناه بين ما خلصنا صارت الساعة 12 الضهر ولان هو نظيف بالبداية ما تأخرنا بيه
بعدها رحت اخذتلي دوش ورجعت للمطبخ جانت ياسمين دا تگطع بتيتة علمود تحطها ويا الدجاجة بالفرن لان جانت حاطة دجاجة بالخلطة مالت الشوي من الصبح
اية : ولج هلووووووووو
ياسمين : عاااااااااا يخرب بيتج وگفتي گلبي
- ههههههههههه تستاهلين
- تخسين يولي شمسويتلج ماكلة حلال ابوج
- لا بس هيج احب الخباثة
- دروحي روحي بدلي ملابس المدرسة
- عاشت ايدكن وربي ريحة البيت صايرة تخبل
- وانتي عايشة
- ها ياقوت شو ساكتة
- دا انتظركن تسكتن علمود اصرخ لان خفت من صوتج
- ههههههههههههه .. ضحكت الا وجهها صار احمر
- يلا روحي بدلي
- تمام
بين ما بدلت اجت الحجية من بيت الحجي وبين ما كملنا الغدا وصلينا الضهر اجى تميم وحطينا الغدا وتميم اول ما خلص غدا طلع للمستشفى
تميم : جان موضوع الولد محير والشغلة الغريبة ان السيارة مالتو مابيها لا هويتو ولا سنوية ولا شهادة سواقة ولا اي اثبات خاص بيه
من خلصت غدا طلعت بوجهي للمستشفى جان اخوي مالك يم الولد لان ما نگدر نعوفو وحدو يجوز يجون يكملون عليه لا قدر الله
تميم : ها مالك شلونك
مالك : هلا تميم
- ماكو اخبار عن الولد
- من اجيت هنا اجى الدكتور مرة وحدة جيك وضعو ومن سألتو گال صحتو كلش زينة بس بقى انو يگعد
- ما گالك ايمتى يگعد
- لا والله ما بيدنا غير انو ننتظر والله كريم
- اگدر ادخل يمو
- اي عادي ادخل
- تمام
دخلت يمو ودخل وياي مالك باوعت بوجه الولد ما اتذكر شايفو من قبل بس هو اكيد يعرفنا ومن يصحى راح نفهم منو كلشي
بقينا نحجي اني ومالك للساعة 3 وبدا يون الولد من الوجع گلت لمالك جيب الدكتور بسرعة وصحتو گلتلو تسمعني لو لا
مسكني من ردني وعصر ايدو وهو يتوجع وگال امي وخواتي (وگوة انطاني العنوان) واجى الدكتور فحصو وانطاه ابرة مخدر ورجع نام الولد
تميم : ايمتى يگعد دكتور
الدكتور : تقريبا بال 12 بالليل يگعد وبما انو گعد فهاي بشارة خير
- مشكور دكتور
- العفو
- مالك انت ابقى هنا
- تمام بس وين رايح انت
- عندي شغل
- تمام
- اول ما طلعت خابرت زيد
- هلا تميم
- جهز نفسك بين ما اوصلك
- تمام بس وين رايحين
- شوية ونرجع واخذ سويج سيارة ابوي محتاجينها
- تمام
تميم : بين ما وصلت جان زيد جاهز وابوي سأل گلتلو الولد صحى وانطاني عنوان اهلو اريد اروح اجيبهم گال يلا لعد استعجل
اخذنا السيارات اني وزيد ورحت عالعنوان الي گالي عليه وسألت عن بيت ابو حازم (حازم هو الولد) ودلوني عليه
جان بيت صغير ومبين حالتهم على گدهم دگيت الباب وطبگت يمنا سيارة نزلو منها شباب ثلاثة شايلين اسلحتهم وياهم
الشاب : منو انتو وشعندكم هنا
زيد : وانت منو ذبلك عظم
- وجه سلاحو على زيد .. سكر حلگك لا اسكرو الك بطريقتي
تميم : زيد عوفهم .. منو انتم
- احنا سألناكم بالبداية
- اني الشيخ تميم وهذا اخوي زيد
- وشعندكم يم هذا البيت
- شغلة ما تخصكم
- كلشي يخص هذا البيت يخصنا لحد ما ناخذ ثارنا من ابنهم الساقط
- البيت حاليا ما بيه بس نسوان واعتقد تعرف هالشي وابنهم دخيل يمي فمنو انتم علمود اجي لاهلكم واتفاهم وياهم بدون مشاكل
- ما دخلك باهلنا اركب سيارتك وانگلع منا
- ههههههههه روح منا بابا روح لا تتعور
- دا اگلك انگلع منا قبل ما ابتلي بيك
اول ما كمل كلمتو ضربتو بوكس بوجهو ومن قوة الضربة اندفع على الثاني ووگعو ثنينهم والثالث ضربو زيد بوكس وگعو فوگهم
واستلمناهم اني وزيد كتل الا زورگناهم اخير شي مسكتو من ياختو گلتلو لاخر مرة اگولك منو اهلك وانطاني اسم عشيرتهم
اخذت اسلحتهم انطيتها لزيد ورجعت دگيت الباب وفتحت مرة جبيرة بالعمر جان مبين عليها الخوف ومن شافت وضعهم خافت بعد اكثر
المرة : منو انت
تميم : يمة اني الشيخ تميم انطاني عنوانكم ابنج
- وينو ابني ليش ما اجى وياك
- ابنج حاليا بالمستشفى فتحظرو انتي والي وياج راح ناخذكم يمنا بالبيت بين ما يتحسن ابنج ويطلع بخير وسلامة
- حطت ايدها على خدها .. يا يمة فدوة احجيلي شبيه
- تصوب بطلقة البارحة بالليل وقبل شوية گعد وحجيت وياه وانطاني عنوانكم فتحظرو خلينا نوصلكم لبيتنا
صارت دموعها تجري وگالت امري لله ولان مابيدها شي وخايفة من الي ضربناهم انجبرت تقتنع واعتقد سمعتني من جنت احجي وياهم
الولد گامو وهم يهددون ويتوعدون وركبو سيارتهم وانهزمو وزيد مرتجي عالسيارة ويضحك عليهم ويگول ما ياخذون عبرة من الكتلة
شوية وطلعن النسوان جانت المرة الجبيرة ووياها 3 بنات ركبتهن بسيارة ابوي ودزيتهن ويا زيد واني رحت جبتلهم عشى ورجعت للبيت
من وصلت جان زيد مدخلهم لبيت ابوي ودزيت وياه العشى ورحت للمضيف جانو ابوي وجدي گاعدين بالمضيف ووياهم عمامي
ابوي : الولد شلون صحتو
تميم : كلش ممتازة وإن شاء الله اليوم بالليل يصحى
- تمام والي تعاركو وياكم شنو وضعهم
- اليوم اروح لاهلهم افهم منهم شصاير
- لا تروح وحدك عود نروح اني وجدك وعمامك وياك
- ما يحتاج بوية اني رايح افهم منهم الموضوع مو اسوي گعدة عود بالگعدة تكونون حاظرين
- انت متعارك وياهم ومانعرف ردة فعلهم
- ما يسوون كلشي لان كباريتهم راح يكونون موجودين
- تمام بس اذا حسيت انهم ناويين على شر انطينا خبر علمود نجيك
- تمام .. اگلك زيد
- گول
- روح على بيتي انطيهم خبر يحظرون مكان للنسوان ينامن ببيتي واني راح انام يمكم
- عادي خلهم يمنا
- شلون يمكم وانتو وابوي وجدي وين تنامون
- هم صحيح يلا هسا اروح انطيهم خبر
تميم : بقينا نحجي بالمضيف للمغرب ورحت عالبيت تعشيت ورجعت اخذت الاسلحة مالت الولد حطيتهن بالسيارة ورحت على بيتهم
ولان ما اندلهم سألت هواي لحد ما وصلت بيتهم جان گدام البيت مضيف واكو يمو كم سيارة طبگت سيارتي ونزلت منها
اول ما نزلت شافني الي گال انگلع واجى ركض يريد يتعارك وياي واني وگفت انتظرو بكل برود اول ما وصل ضربني بوكس
مسكت ايدو ومسكتو من دشداشتو وگلتلو لا تخليني اهينك بين اهلك وناسك احترم نفسك وخليني محترمك وحاول يضربني بايدو الثانية
مسكت ايدو وبحركة سريعة فلتت ايدو وضربتو راشدي كل قوتي الا وگعتو بالگاع وتجمعو اخوانو وولد عمو صارو محاوطيني من كل الجهات
فتحت الباب ونزلت الاسلحة وتقدمت لابوه انطيتو الاسلحة وگلتلو غريمكم دخيل يمي تريد نحجي بالموضوع ونحلو لو تريدو يكبر
ابوه : انت ضربت ابننا يم بيت غريمنا وبگاعنا وهاي ما نسكت عنها
- اني ضربت ابنكم لان بالاولى هددني بسلاح واني اعزل ما بيدي شي وفوگها تجاوز علي وما اعتقد اهلنا ربونا انو نتجاوز على شيوخ العشاير
وضربتو بالثانية لان اجى يتهجم علي واني مو خايف او ناقصني شي علمود اعوفو يضربني وما ادافع عن نفسي وانت شفت هالشي گدامك
- تفضل للمضيف حياك الله
- ابقاك الله
اخذ الاسلحة انطاهن لواحد من الولد الموجودين ودخلنا اني وياهم للمضيف وصارو يرحبون وصبولنا گهوة وبلشت اني بالحجي
تميم : شيخنا اگدر افهم شنو الموضوع الي يخليكم تصوبون الولد وتراقبون بيتو
الشيخ : الولد الي تحجي عليه يا شيخ تميم دعم واحد من ولدي وتكسرت ايدو ورجلو وعافو مشمور بالطريق وانهزم والولد لحد الان بالبيت ما يگدر يتحرك
فاخوانو ما تقبلو الموضوع ومن عرفو الولد جانو رايحين ياخذون حقهم منو وبالصدفة هو جان طالع من البيت وانهزم منهم لبيتك وصوبوه يم بيتك
- الولد ماعندو بس امو وخواتو وهو الوحيد الهم حسب الي شفتو واحتمال خاف عليهم وانهزم
- حتى لو خايف عليهم يبقى النا حق عليه ولازم ناخذو
- حاليا الولد مصاب وهو دخيل يمي من يتحسن ننجمع احنا وياكم ونحلها إن شاء الله
- احنا مو رايدين حل احنا ناخذ حقنا منو بطريقتنا
- وشنو طريقتكم
- رايدين دم الولد
- ههههههههه على اي اساس
- حجيتلك ما يحتاج اعيد كلامي
- الولد غلط من عاف ابنكم هاي متفقين عليها بس انتو هم صوبتوه وعفتوه مشمور لولا ستر الله جان مات وما لحگنا عليه
فسالفة تريد دم الولد هاي كلش واگفة وثانيا شيخنا الولد واهلو دخلو يمي ومستعد اني وعشيرتي نموت كلنا قبل ما توصلوه
انتبهت الولد طلعو كم واحد منهم وبدون ما احد ينتبه اتصلت على ابوي ونصيت الصوت وگلبت التيلفون علمود ما يبين وكملت كلامي
فيا شيخ اني اجيتكم طرف خير بالموضوع واريدها تنحل بدون مشاكل
- گلتلك احنا نريد دم الولد والي يوگف ويا عدونا فهو عدو النا
- ارجع واكرر كلامي مرة ثانية الولد ما توصلوه وخشمي يشم الهوا لان مو الشيخ تميم يسلم دخيلو
دخل الولد الي ضربتو وبايدو سلاح وجهو علي وگال شنو رايك اخذ ثاري منك واكومك بگاعك
- تدري اخوي المراهق يفهم اكثر منك وگال ما ياخذ عبرة وطلع كلامو صحيح
- لعد خلي ادز جثتك لاخوك
- ببرود .. اذا انت گدها اطلق علي بس راح انطيك ضمان ما تطلع من هذا المضيف عايش والشيخ تميم شيخ عشيرة البو هذال گدها (اسم العشيرة وهمي)
الشيخ : جتفوه
تميم : للامانة توقعت كلشي من الشباب بس ما توقعت الشيخ يطلع ناقص غيرة لهاي الدرجة وتوصل بيه انو يعتدي على ضيفو
هجمو علي الشباب وعيب علي اسلم نفسي بسهولة ضربت الاول بوكس والثاني حاول يضربني ومسكت ايدو ودفعتو على الي وراه ووگعو مع بعض
بقينا اني وابن الشيخ وجه بوجه وهو بايدو سلاح موجهو علي ومن شاف البقية وگعو بالگاع بينت عليه نظرة الخوف
تقدمت اول خطوة وگال ابقى مكانك وما اهتميتلو وويا ما مشيت الخطوة الثانية ضربني طلقة وباوعت لدشداشتي الجوزية وهي تنصبغ باللون الاحمر
...........
شكرا لزيارتكم عالم روايات سكيرهوم
