رواية جراح قلبي الفصل الخامس والعشرون 25 بقلم جوهرة

نرجس مستغربة / صفا هاي وين رايحين

صفا / يلة وصلنا راح ننزل هنا

نزلنا من التكسي بعد ما دفعتلة الأجرة 

وبقينا نمشي بالشارع ودخلنا شارع فرعي اني المنطقه ما اعرف شي بيها تلفتت بالشارع وسألتها .. وين عيادة الطبيبة أكثر شي محلات وبيوت

صفا / هي عيادتها بيت ماجرته

نرجس / احتمال معزلة عيادتها لأن أكثر الأطباء عياداتهم يفتحوها العصر

صفا / انتظري خل اتصل

وكفت على جهة وبقت تكلب بجهازها بعدين اتصلت اني بقيت انتظرها اجت مبتسمة / يلة عيني انوب اخرتج خل ندخل

نرجس / وين ندخل ؟!!!

أشرت على بيت ورحنا نمشي الباب جان مفتوح دخلنا التفتت على صفا مستغربة لأن هاي مو عيادة

نرجس / صفا ش.... فكيت عيني متفاجئة هاي وين راحت

طلعت مرية من البيت وجرتني من أيدي وهي تضحك واطك بعلجها / تعاي حبي مبين عليج غشيمة

عطت بيها واني خايفة / عوووفيني

دفعتها اريد اطلع ما خلتني كرهت شكلها استغفر الله ابد مو راحة وملابسها كلها اغراء وهي جسمها مليان وصابغة شعرها كركمي 

دخلتني للبيت اجر بية وراحت قفلت الباب اني متت والرعب شل جسمي يا الله اني وين وكعت وصفا صفا شلون امنت بيها اكيد هاي خطة لأن المرية متقبل اطلع قفلت الباب مر علية رعب بحياتي ما عايشته واني احاول استوعب المصيبة الوكعت بيها بقيت مصدومة من الصار وياية ، شلون أنهزم منا ، اريد اطلع البيت بابه انقفل بقيت أصيح عالمرة مدري وين اختفت

فزيت على دكة الباب بقوة طلعت المرة فتحته واني كمزت من شفت صعب دخل وعيونه اطك شرار رحت عليه وگلبي مفرفح لأن اجى يخلصني الحمدلله يارب

صحته بلهفة / صعب

سحبني من جتفي وضربني سطرة فر راسي 

نتر بية / شجابج ولج انتي شلون تجين هنا 

رديت واني ابجي بحركة / مو اني هاي

قاطعتني المرية وصوتها يلعلع / وانت شكو عوف البنت جاية تتونس والرجال على وصول انت شعليك بيها 

عاط صعب بيها بقوة حتى دمارات رگبته تقلصت كثر العصبية / رجاال شنوووو احجي

أشرت المرية علية / البنت تريد رجال اووي تخبصون روحكم بعدين تبيعون اخلاق براسي

ضربها صعب سطرة ودفعها وتقرب علية تلني من أيدي وهو يعصر بيها عطت واني مفرفحة من البجي / والله جذابة والله صفا جابتني وانهزمت

رجع لطمني على حلكي وطلعنا للشارع دفعني عالسيارة صعدت ورجع صعد وحرك عالسريع 

حسيت روحي بكابوس

زمخ بية وهو يكفخني على راسي / كلبة شلون تدخلين لهذا البيت المشبوه 

عطت واني اضرب على وجهي / والله صفا اخذتني والله مو اني

صعب بغضب اعمى لأن شافها أبيت سمعته أهله زبالة وسمع الكلام اللي كالته المرة عليها / انجبي حيوااااانة صفا شلها دخل تردين ادخلينها بوصاختج

الطريق للبيت سواه خمس دقايق طبك السيارة بالباب ونزل اجى لجهتي فتح الباب وسحلني لداخل البيت 

دفعني بالمطبخ وقفل الباب اني من شفته وجهه يخوف من العصبية شردت للغرفة اريد اقفل الباب حيل خفت منه 

لحكني ودفع الباب بقوة

صعب / 

عقلي راح يوكف من وصلتني رسالة كلام مو زين على نرجس وراها بساعة دزولي العنوان وحجي ابد مو حلو بحق نرجس بالبداية رحت واني ممصدك ومن دخلت للبيت الي اول مرة ادخله بس اعرف صاحبته سامع بيها وحدة استغفر الله وشفت نرجس اتخبلت عقلي انجن بودي اشرب من دمها وانوب المرة تاكد عليها جاية تونس نفسها وتنتظر الرجال دين ماظل براسي

جريتها من شالها ونكتتها بقوة / منين تندلين بيت هاي الساقطه احجي لا اذبحج

نرجس / 

شهكت بقوة وأيدي على ايد صعب اريد أبعده لأن ضاغط على راسي / والله صفا اخذتني كالت تعاي وياي للدكتورة

زمخ بقوة وسحب شالي وشمره / الله ياخذج على هالجذب هذا ولج صفا تكرهج كره العمى شلون تطلعين وياها شوكت صارت صديقتج انتي تردين تبررين صخام وجهج

خليت أيدي على وجهي واني أشوفه رفع أيده ولطمني على وجهي عطت متوجعه أذاني بضربته حيل

صعب بعنف يصرخ / ولج اداري مشاعرج وما اضغط عليج اكول ميخالف ممتعودة خل اصبر عليها بعدها حزينة لفراك زوجها طلعتي وحدة خايسة ،، تردين رجااال احجي كلبة

دفعتها بصدرها وكعت بالكاع فاكه عيونها الوسيعه بخوف وصدرها يصعد وينزل تتنفس بقوة

نرجس وصوت بجيها ارتفع ردت / الله ياخذك يا حقير يا نذل انت وكل واحد ظلمني 

غلطها علية ونبرة صوتها الحاقدة خلتني اهجم عليها صرت فوكاها عصرت أيدها الي مدتها تريد تضربني / رايحه تتونسين مو ؟!!!!!!! هاي جنتي تطلعين من وراية جم مرة سويتيها وطلعتي ادبسززز ؟!!!!!

نرجس بهلع عاطت / ولك حرام عليك والله ظلمتني والله ما اعرف احد

صعب / 

سحبت العباية و ثوبها ومزقته وكشفت صدرها صرخت بقوة من سحبتها جواية .....

وعيت لروحي واني اتنفس بقوة عيني عليها صريخها المبحوح ودموعها ومنظر جسمها خلاني ما اطيق ابقى ثانية وحدة بالغرفة تلفتت بالغرفة وسحبت منشفة وطلعت للحمام 

بقيت جوا الدوش دقايق ومنظرها مجاي يروح من بالي اعترف اذيتها حيل وعاملتها بقسوة بس هذا قليل من الجنت ناوي اعاقبها عليه عقلي مجاي يستوعب كل هاي البراءة هيج يطلع منها تكلي صفا اخذتني ليش من شوكت صفا صادقتها لازم أتأكد من صفا ،،، الجاي يخبلني وين عرفت هذا البيت وهي ماتندل شي بالناحية وانوب كلام المرة خبلني ياربي مجاي استوعب هالشي

نرجس / 

سحبت جسمي واني ارجف والملم بروحي سندت ظهري عالكنتور وكرفصت وصوت البجي كوة يطلع صوتي انبح كثر ما صرخت عليه يعوفني الله لا يوفقه موتني الحقير وحيل أذاني شهكت ودموعي تجري واني ادعي على صفا الله لا يوفقها الله ينتقم منها وتطلع حوبتي بيها مدري وين عقلي من صدكت بيها كلت خل اصفي النية ونبدي صفحة جديدة واني وحيدة ماعندي أحد ماريد ابني عداوات اثاريها حافرة جواية حسبي الله عليها يارب بين حوبتي بيها يارب يتيمة ومظلومة وجاروا علية 

جفلت من دخل صعب واني على حالتي هاي 

دنكت من فات للكنتور طلع ملابس ولبس

بلعت ريك واني خايفة لا يأذيني ويضربني عافني وطلع 

كمت انتجيت عالكنتور واني احس بألم بكل جسمي اخذت ملابس ومنشفة اريد اسبح اريد اشيل وابعد اثاره وريحته النختمت بجسمي 

ورى فترة طلعت من الحمام ورحت بفراشي تغطيت وجسمي يرجف واني قررت ما ابقى هنا لو يكطعني ما ابقى عنده بعد 

صعب / الو ام صهيب انتي بالبيت

رانيا / هلة صعب اي بالبيت

صعب / راح اجي اريد تصيحيلي صفا بس بدون محد يعرف راح انتظر برى

رانيا / ليش صعب خوما اكو شي شبيها صفا

صعب يحاول يسيطر على غضبه / ماكو شي

،،،،،،

ساكته وعينها على صعب الي عيونه حمرا من كد ماعصبي ودمار بكصته نافر ضرب الحائط بيدة وصرخ / شلووون كوليلي 

صفا / 

بخوف واضح عليها لأن تعرفه ميتفاهم ويمكن ورطت روحها وبعد ميفيدها تتراجع /

والله اني معلية اصلا هي تتبلى شلي دخل انت معقولة تصدك بيها

صرخ بيها واشرلها بأصبعه / قسم بالله إذا طلع الكلام چذب ذبحج على أيدي

عافهن وطلع لسيارته التفتت رانيا على صفا وسحبتها من الباب البرا للكراج / ولج صفا شنو هالحجي هذا اتقي الله ترى داين ومديون

صفا بانزعاج / اووي على أساس انتي متكرهينها ترى ادري بيج حاقدة عليها

رانيا / انجبي لو حتى اكرهها بس ما اتجرأ وهيج اسوي اني عندي بنية وعندي مخافة الله ، لا عبالج اكرهها يعني راح ااذيها لا انتي متوهمة مو ام صهيب اللي هيج تتصرف

صفا / وهسة اني شعلية مرته خاينة اني شكو

عافتها رانيا ودخلت البيت وبقت صفا تتمشى بالكراج مبتسمة لأن خطتها نجحت ابتسمت أكثر وهي توصي شوشو تمثل زين وانطتها فلوس على هالشي لا احد يشوف ولا يعرف الصار بيناتهن سامعه بيها وشايفتها عدة مرات بس محاجية وياها وتعرف بسمعتها الزبالة بالمنطقه فاتفقت وياها وبعدها ابتعدت متريد سمعتها تتشوه

تنهدت وهي متأكدة خلصت من نرجس 

لأن مستحيل صعب راح يخليها على ذمته بعد الصار

ـــــــــــــــــــ

صعب / 

مالي نفس ارجع البيت ماريد أشوفها بعد الصار لأن ما اضمن نفسي راح ااذيها اكيد ،،

رحت لبيت عمتي ايمان ساعة جانت 3العصر 

ايمان / هلة يمة صعب خير وجهك مكلوب

كعدت عالقنفة بالهول .. هلة عمة

ايمان / خل اسويلك جاي

صعب / لااا مالي نفس اصلا مامتغدي

ايمان / ديلة لعد احضرلك صينية

صعب / اكعدي عمة لا تخبصين روحج نفسي مسدودة

ايمان / عمة صعب شبيك مريض اسم الله

صعب جر حسرة وذبها / ياريت جنت مريض واموت وارتاح

ايمان / اسم الله يمة الله يحفظك ليش هيج تحجي

صعب / شتردين اكول عمة واني عقلي راح يوكف من التفكير

ايمان بخوف / ولك احجي ترى خوفتني والله

حجيت لعمتي كولشي شو هاي تخبلت علية 

خلتني فاتح حلكي مصدوم 

ايمان / شلون تصدك ليش هية شمعرفها بالمنطقة البنت ماطالعة من يوم الاجت لديالى حتى ماتعرف أحد

صعب / ما ادري راح اتخبل زين ما ذبحتها ، واني اشوفها أبيت هذه الزبالة 

ايمان / كوم امشي خل اروح عالبنية الله يعلم الصار بيها هسة

ـــــــــــــــــــــ

نرجس / 

تحاملت على نفسي واني اتحرك بدون روح بدلت ملابسي بنطرون وفوكاه لبست كوت طويل اسود لميت شعري بدون ما امشطه ولفيت الشال اخذت فلوسي بالكنتور ضامتهم لأن مصارفه شي باقيات على حطتهن اخذت بس الاحتاجه وذهبي من حياة معتصم الله يرحمه ذبيتهن بالجنطه وعفت الباقي من الفلوس هنة والذهب مامديت أيدي عليه كولشي ماريد بس اطلع منا لأن اعرفه مراح يسكت راح يذلني واني مو حمل مذلة بعد ماعندي طاقة 

اخذت جنطتي وكم قطعه لبس حطيتهم بعلاكه وطلعت بسرعة 

انصدمت بالباب مقفول لا يربي قافل الباب علية اكيد يريد يعاقبني بعد ، تلفتت بالبيت ورحت لباب الكليدور نفس الشي مقفول بجيت واني اضرب بالباب أريده ينفتح بجيت واني مقهورة لأن وحيدة بالدنيا وماعندي سند يحاميني من يعيلون علية ، مسحت دموعي اللي ما بطلت تنزل ، فكرت منين اطلع تذكرت الباب الخارجي يارب يكون ناسي يقفله لأن الصبح نشرت الملابس بالترك البرا وضربته سركي 

رحت أتأكد واني فاقده الامل الحمدلله يارب فتحته وطلعت من البيت افتريت عالكراج وطلعت بالشارع تلفتت ناس قليلة وجهال يلعبون بالشارع اريد سيارة اريد اطلع منا واني كولشي ما اندل بالمنطقه مشيت بسرعة رغم كولش موجوعه جسمي أحسه مكسر بسبب ضربه واعتدائه علية التفتت اريد ابتعد من لمحت سيارة صعب يم بيت خالة ايمان فاتت سيارة أجرة اشرتله وكف

نرجس / فدوة تروح لبغداد

/ اختي اني اطلع بس لبعقوبة اصعدي اذبج بالكراج

يحجي وعينه علية مبين مستغرب لأن وجهي صفحة من خدي حمرا وشفتي اثر جرح واضح جريت الشال على وجهي 

ماجان عندي غير حل صعدت بسرعه وحرك السيارة دنكت راسي من فتنا بيت عمو ابو صعب خفت أحد يلمحني 

ذبني السايق بالكراج برا توسلت بي يشوفلي سيارة تطلع لبغداد لأن مستعجلة الرجال ماقصر دقايق واجى اشرلي على سيارة كال هاي طالعه ومحتاجين نفر

صعدت والغصه خانكتني خنك بس اريد اوصل لبيت خالة ام عقيل ما عندي غيرها 

دك موبايلي صعب يتصل قفلته بخوف وضميته بجنطتي 

طول الطريق دموعي تجري من وصلنا للكراج دفعت الأجرة ونزلت اخذت تكسي لبيت ام عقيل

ساندة راسها عالجامة ودموعها تصب وايدها حتى لا يطلع صوت ونينها وبجيها

وذكرى الصار مجاي تروح من دماغها 

انتبهت لصوت السايق وهو يكللها ..

/ اختي وصلنا

جانت الدنيا ظلمة من وصلت بعد المغرب

دكيت الباب واني كل طاقتي أحسها خلصت 

واول ما عقيل فتح الباب اشرتله واني كوة احجي / صيحلي خالة

انتجيت عالباب ونفسي يصعد وينزل 

دخل للبيت يصيح عليهن خطية أجن يتراكضن حظنتني ام عقيل ودخلتني للبيت

ام عقيل / يايمة يابنيتي هاي شنهي الصاير بيج عابت روحي عليج يمة نرجوسة

من سمعت نبرة الحنية بصوتها شهكت وبجيت بقوة

ام عقيل / اسم الله يمة احجيلي شجابج وحدج رجلج وين شلون يعوفج تطلعين ؟!!!

كعدتني عالقنفة بالهول وسمرة جابتلي مي شربت شوية ومسحت دموعي والعبرة تشك گلبي وصوتي مبحوح / خالة ذبولي تهمة اتهموني بشرفي

عاطت ام عقيل / عزااا العزاني عزا العزاني ولج ياهو اللي تهمج احجي لا تبقين فاهية

حجيت الصار كله حتى سوالف صفا وياي وشلون اجت اعتذرت

من كملت خالة ام عقيل تسمع ومدنكة راسها بس اباوع عليها تريد تنفجر

رفعت راسها بعصبية / أنة بنت ابوي هيج يسوون بيج وصعب ياحيف عليه بس انتي غلطانة شلون تصدكين بهاي الحية شلون ترحين وياها وين عقلج تطلعين ورجلج مايدري

نرجس / خالة خدعتني بحجيها كلما تجي علية تبقى تتوددلي واليوم اجت تتوسل متريد احد يعرف تكول استحي

دك الموبايل صعب يتصل على ام عقيل انطته سمرة لأمها ،،،اني بخوف حجيت .. فدووة خالة لا اجاوبين عليه

ام عقيل بغيض وعصبية / چا غير اطلع قهري كله بي اليوم

وبدون ماتنطي مجال انهدت بي واحنا صافنين عليها شكد عصبية

ام عقيل / وحق هو العباس سوايتكم بنرجس ما اسكت عليها چا تتهمونها هالبت اليتيمة بشرفها وفوكاها مصكطها كتل اتصلت بشيخنا وهو اليتصرف وياكم والا ناخذ حكها

سدته وقفلت الموبايل وانطته لسمرة /لحد يرد عليه خلهم

نرجس برعب / خالة شنو حجى

ام عقيل / هو أنة انطيته مجال شفتيني انهديت بي بس اسمعه يكول هي يمج هسة

نرجس / خالة انتي صدوك حتتصلين بشيخكم

ام عقيل / والله أنة فكرت بيها چا ياهو اليوكفلج اذا مو شيخنا والعباس بس اوديله خبر وانخاه يدكهم دكة زينة هسة انتي لاتفكرين بشي تعاي لغرفة البنيات ارتاحي واكلي لكمة شوفي وجهج نومية صاير هاي ماعدا الحمار البي ، كسر بيده إن شاء الله عود جنت ازامط بي واكول والنعم منه

ــــــــــــــــــ

صعب / 

من حجت عمتي بقيت افكر هي فعلا ماتعرف أحد ولا تندل اي مكان بس شلون وصلت لهذا البيت معقولة صفا الها يد بالسالفة بس نكرت من سألتها اااخ مدري راسي راح ينفجر نفس الموقف ينعاد بس بغير طريقة خيااانة استغفر الله يارب شلون وهي ما تفكر بس بمعتصم شهر ونص زواج متخليني اتقربلها 

دخلنا البيت اني وعمتي الي صايرة نار فتحت الباب ودخلت رحت للغرفة اريد أشوفها مموجودة دورت بالغرف ماكو وين راحت واني قافل البيبان صعدت بسرعة للسطح الباب مقفولة 

نزلت وعمتي ادردم / انهزمت مووو ، خلها تنهزم من الضيم شتريدها لعد تبقى تنتظرك تذبحها

فكيت عيني وكلمة تذبحها تردد صداها بدماغي مسحت وجهي واني اطرد هاي الفكرة السودة رحت الباب الخارجي انفتح بيدي ناسي اقفله اكيد انهزمت منه

ايمان / مدري شبيكم ولكم تالي وياكم ولد عبدالله الناصر نسوانكم تنهزم وادورون وراهن 

جريت حسرة وذبيتها اعرفها تقصد لينا وهربها من ايهم والله صادكة عمتي يمكن ماعدنا حظ بالنسوان وخاصة اني 

عفتها تحجي ورحت للغرفة أتأكد شاخذت وياها فتحت البيبان ملابسها على وضعهن بالكنتور حتى الذهب والفلوس قفلت الكنتور وطلعت لعمتي كاعدة بالهول

ايمان / اتصل عليها لاتبقى صافن شوف البنت وين راحت

اتصلت شوي وقفلت خطها عمتي كامت تحجي وتلومني لأن استعجلت جان المفروض اسألها وافتهم منها مو هيج اعاملها

شوف عمتي شكد بطرانة هو اني من شفتها هناك دين ماظل عندي ردت اموتها

فكرت اتصل على ام عقيل اكيد راحتلها ماعدها أحد انوب هاي زفتني زفة وتهدد بشيخهم وسدته بوجهي كص بهاللسان أن شاء الله شلون عرامة واني اكول عليها مرة طيبة 

المهم تاكدت نرجس عدها 

هالشي ريحني الصراحة خفت عليها رغم اذيتها ورغم سوايتها بس بداخلي خوف عليها

انتبهت لعمتي / اسمع صعب السالفة لاتحجي بيها خلها بيناتنا

صعب / رانيا وصفا عدهن خبر

ايمان / اي ميخالف بعد لاتحجي اريد اسال صفا وأشوف شراح تحجيلي وراح تبين إذا عدها شي اكيد تريد تعرف نرجس بعدها موجودة لو انهزمت صفا واعرفها تموت الا تعرف

صعب / عمة صفا شنو دخلها

ايمان / ولك عمة البنت ذابحة روحها تريدك تلتفت عليها ولا تكول انخطبت لأن اني حجيت وية صلاح والحجي كتلهم زوجوها تروح تسوي سالفة وصعب يبتلي بيها 

صفنت على عمتي اريد افهم الصار / شوكت هاي

ايمان / عوفك من شوكت وتعال اكعد خل احاجيك 

شوف باجر نروح لبغداد اروح احجي وية نرجس

صعب / ام عقيل تهدد بشيخهم تكول خل يدكم

ايمان / ام عقيل خوش مرية هاي انقهرت من شافت حالة نرجس وحجت فدوة صعب من الصبح نطلع لبغداد ترى گلبي انمرد عالبنية ولك عمة صعب هاي يتيمة وحوبتها تروح تطلع بيك ، اريد أشوفها وافتهم منها حتى يرتاح گلبي

صعب / لخاطر النبي اني بيدي طلعتها من البيت اني من هيج سويت بيها شفتها بعيني خوما اتبلى عليها

ايمان / اووف يمة والله ضغطي ارتفع شلون مصيبة هاي ،،، يله اروح لبيت ابو معتصم اسوي نفسي ما ادري

صعب / براحتج بعد

أبيت الحجي كاعدين بالهول التفتت على سما .. وين وليدج

سما / راح وية أبوه 

شوي ودخلو صلاح وحمودي اجى يركض كعد بحظني

ايمان / ها بيبي وين جنت

صلاح / شلونج عمة ردنا نمر عليج كلت طالعة

ايمان / اجيت عليكم شوية ضايجه كلت اروح لبيت الحجي

ام معتصم / كل الهلا بيج خية يلة يبنيات حضرن العشا

ايمان / لا خلهن بعد وكت اكول شوكت زواج صفوة ام أمير كالت الولد محظر كولشي 

عيني على صفا انتبهت وركزت وياي ما اهتميت بقيت اسولف اني وام معتصم

ام معتصم / والله هم كلت للحجي مو حلوة اطول الخطبة

ايمان / ها صفوة كملتي جهازج

صفا / اي مابقى شي

ايمان / اي الله يسعدج زين بعد محد بقى من الوليدات صعب تزوج وانوب صفا

ردت ام معتصم / الله يسعده يستاهل صعب كل خير ومبينة مريته خوش بنية

ايمان / اي والله والنعم منها اكلج ام معتصم مترحين وياي باجر نزورهم خطية البنت غريبة وحدانية راح تفرح من تشوفنا

صفا ردت بسرعه / هاي إذا بقت

التفتت على صفا حجت وسكتت ماكملت وراسا طلعت وهي تكول 

اروح احظر العشا وية رانيا

تاكدت الها ضلع بالسالفة اووف صفا واعرفها متكعد راحه 

بقيت الوب اريد اكضها لصفا وفعلا ورى العشا 

رحت لغرفتها سديت الباب هي جانت تخابر من شافتني ارتبكت

ايمان / كملي ليش خفتي

صفا / ها لا هاي صديقتي بعدين اخابرها

ايمان / صعب عرف انتي ورى الصار لمرته ومتحلف بيج

وجهها انخطف لونه من سمعتني

صفا / اني شكو هي مرته وحدة ساقطه

ايمان / شمدريج بيها البنت متطلع من البيت ومتعرف أحد انتي اخذتيها عفتيها وانهزمتي 

ولعلمج صعب صدك بيها وجذبج عيني مرته ويحبها خوما يأذيها 

تخبلت صفا وهي تسمع عمتها غيرتها صعدت فول / الله ياخذها أن شاء الله واخلص منها فوك ما سودت وجهه يحبها على شنو على صخام الوجه

ايمان / اي البنت عدها حظ خوما مثلج عوبة ماعرفتي تكسبينه رجال مثل صعب تاخذه الغريبة وبنت عمه جمال وشهادة ما كلبها

ادحك عليها تريد تنفجر خلها هذا الاريده استفزها وهي موتها ولا واحد يمدحونه وهي تكرهه

صفا / ان شاء الله لا تتهنى شلون عدها حظ ك..ح. والله جنت ناوية اخلي يطلكها بس هو اغبر

ايمان نترت بيها / سودة بوجهج على هالبلاوي السويتيها والله من يسمع ليصلخه لجلدج ولج انتي ماتوبين رجال متزوج شتسوين بي وهو ما كلبج

صفا / لعد ترديني اعوفه لهاي الساقطة

ايمان / اششش لحد يسمعج تعاي احجيلي شنو سويتي

صفا بضحكة / شنو ؟!!! اصلا ماسويت شي شبيج عمة !!!!!

ايمان / يعني مو انتي وديتي نرجس لذاك البيت

صفا / ههههه اني شكو اسم الله الله يبعدنا

ايمان / هي كالت وحلفت صدك قبل ما انسى صعب راح يحلفج بالقرآن على هالشي وانتي متكدرين تحلفين باطل 

شهكت بخوف / لاااا عمة دخيلج كولشي ولا القرآن احلف بي

ايمان / ها صفا خفتي من القرآن لعد بيوم الحساب شتكولين لرب العالمين

صفا / عمة اكرههاااا ما اطيقها

ايمان / الله يهديج وينور عقلج لأن مع الأسف اشوف وحدة من بناتنا هيج تتصرف هسة مراح تحجين مولازم خلص لاتحجين اني العلية حجيته ابقي لما يجي صعب وكدام اهلج يجرم بيج

عفتها وطلعت عمى بعينها مدري عليمن طالعة صلفة وشرانية والله لا يذبحها صعب على صخام الوجه السوته وانوب متعترف بس مبينة هية

طلعت اريد اروح لبيتنا خابرت صعب / جيب فلوس وتعال اني أبيت عمك صالح

صعب / شتسوين بيهم بهالليل

ايمان / انت جيب مبلغ (.... )ولا تبقى تسأل اذا ماعندك رايحه لبيتي اجيبهن

صعب / لا عمة خير من الله دقايق واني 

شكرا لزيارتكم عالم روايات سكيرهوم