رواية جراح قلبي الفصل السادس والعشرون بقلم جوهرة
صعب / عمة صدك تحجين البيت مشبوه وانوب ساعة تسعة بالليل
ايمان / سوق ولا تحجي خليني اني اتصرف اريد اوكع على لبتها ما انام الليل إذا ما اعرف الصار لا عبالك ما مهتمة لا والله گلبي صاير عطاب
السيارة طبكتها بمسافة عن البيت ماريد أحد يلمحنا لأن المنطقة يعرفوني بحكم شغلي عندي مكاتب عقارات
نزلنا اني وعمتي الي جانت متلفلة بعبايتها عباية راس ، دكيت الجرس واني أتلفت بالشارع
انفتحت الباب وعمتي بدون استأذان دخلت واني بعدني برا
المرة / شكو جفتي علية لا سلام لا كلام
ايمان بصوت ناصي ماريد الجيران يسمعون .. من الاخير البنت الصبح صارت وياها مشكلة شنو مصلحتج شوهتي سمعتها
المرة / يابنت عيني كولشي ما اعرف اني،، اكلج شكلج مو غريب انتي مو موظفة بالمصرف
ايمان بدون نفس / اي جنت ،،،يلة احجي منو كالج هيج تسوين شكد دفعولج ترى ادفع أكثر
ابتسمت المرية وعضت شفتها ومن شافت صعب دخل رجعت خطوة ورى ..
/ انتم شتردون بالضبط يلة اطلعوا منا لا اتصل بالشرطة
صعب / اتصلي تردين اني اتصل الضابط صاحبي ترى
المرة / اطلعوا من بيتي مابية حيل مشاكل
ايمان / اني مستعدة انطيج أكثر شكد دفعولج ادري بيج علمود الفلوس لأن البنية انتي متعرفينها احجي الصدك
التفتت على صعب واشرتله / طلع الفلوس
اخذت شده وكلبتها بيدي وعيني عليها / راح تحصلين خوش فلوس شكلتي
المرة / شكد قابل تدفعين مليون
التفتت على صعب الي عيونه تريد تاكلها و كوة مسيطر / شكد تدفع للمرة
صعب نتر بيها / كولي شكد تردين
رفعت تك حاجب اني دفعولي ربع (250)الف
وكالت راح تدفعلي بعد بس اتصلت عليها رقمها مغلق يعني مراح احصل أكثر منها جيبو 500
سحبت الفلوس والباقي رجعتهم لصعب / يلة هاي الفلوس احجي
حجتلهم الصار كله بس اسم البنت متعرفه انطتهم مواصفاتها رأسا عرفوها
طلع صعب وعمته وراه تمشي تريد تلحك بي
بالسيارة شخطها بسرعة وأيده تعصر بالستيرن
ساكت ميحجي ضاغط على شفته بقوة
ايمان من شافته اتجه لبيت ابو معتصم .. فدوة عمة لا تسوي فضيحه بهالليل والله عمك يذبحها
رد بعصبية ..
/ اني اليوم اذبحها عالسالفة هاي
عاف السيارة تشتغل وعمته بعدها منازلة هو نزل بسرعة ودفع الباب بقوة ودخل بوجهه للبيت وصاح بصوت قوي / صفاااا
رانيا صارت بوجهه / خير صعب شبيك
زمخ بيها / صيحي صفا
طلعوا عمه وصلاح / صعب عمي شبيك شتريد من صفا
رفع إصبعه وأشر / بنتك هسة تجي هنا وراح تعرف شاريد منها
صلاح عكد حاجبه وسال عمته الي دخلت ورى صعب / شكوو ياستار
ايمان تنهدت بتعب وأشارت لرانيا / خل صفا تجي وتعرفون
صعب / ام صهيب صيحيها اكيد سمعت الصياح
راحت لغرفتها صايرة مقابيلهم بالصالة دكت الباب وفتحته اشرتلها هي جانت متحضرة لأن سمعت
رانيا / شسويتي عزا بعينج
صفا / ماسويت شي شعنده اخوج صوته عالي
طلعت رانيا وصفا وراها
اول ما وكعت عينه عليها تقرب عليها وجرها من شعرها ضربها سطرة عاطت وايدها على خدها
ام معتصم نترت بي / انت شلون تمد ايدك عليها
رجع ضربها على رأسها وصاح / أمد أيدي واذبحها هالادبسزز هاي
صلاح صار بوجهه يريد يدفعه / غير نفتهم شسوت شبيك صعب تخبلت
دفع صلاح ورجع ضربها دفرة وكعها بالكاع بقت تصرخ بعرامة كلبته للبيت
امها حظنتها وكامت تغلط على صعب لأن اذاها لبنتها
اشر لعمه / قسم بالله إذا ما تتصرفون ذبحها على أيدي
ابو معتصم / ولك شنو السالفة اكلتنا حاصل فاصل احجي عاد راح تجلطني
ردت ايمان / اكيد تنجلط إذا سمعت صخام الوجه السوته بنتك
كلهم عينهم على ايمان الي حجتلهم بلاوي صفا
الحجي ابو معتصم خله أيده على راسه مصدوم وأشر لصلاح / اذبحها وما اكلك شسويت
اصلا صلاح ما انتظر أبوه شيكول هجم عليها موتها دفرات وراشديات وسحلها من شعرها وامه تعيط عليه لأن حيل اذاها
خنست بعدما طلعت صوت اخذها سحل لغرفتها وقفل الباب عليها
ام معتصم /
دكت ظهرها بالحايط وكعدت تضرب على وجهها .. سووودة بوجهج صفا شنكول وعرسج اسبوع الجاي والله من يسمع رجلج يطلكج
باوعت لعمي كعد عالقنفة مدنك راسه وصلاح كعد بصفه / عمي لهنا وخلص قسم بالله إذا شفتها اطوطي أبيت اهلي لو بيت عمتي ايمان طلقة براسها واخلص منها كافي تحملتها هواية زوجوها عاد خل زوجها يتكفل بيها واذا براسة خير يطيح حظها من اول يوم
رفع راسه ونظرته مقهورة / عمي صعب سد السالفة بروح الاعزاز وعقابها علينا اني اعرف شلون اعاقبها كسرة وجهي الله لا يوفقها
طلعت من بيتهم وعمتي بقت رجعت لبيتي دخلت الغرفة ذبيت روحي عالفراش جريت حسرة وذبيتها واني اتذكر كل الصار اليوم اعصابي تعبت واني افكر طول اليوم بخيانة نرجس وبالاخير طلعت بريئة مثلما جان احساسي يكلي بس اني اذيتها استباحيت جسمها بقوة جنت اريد اعاقبها لأن مانعة نفسها مني وتروح ادور راحة بغير مكان. اووف شكد غبي اني
عضيت شفتي بقهر والله صفا جنت ناوي اكسرها الحقيرة تستاهل لا وعرسها اسبوع بعد ااخ لوما عمي الا اخلي يطلكها
جريت موبايلي اريد اتصل عليها قافلته هي عدها صفحة عالفيس دزيتلها عالماسنجر رسالة وانتظرت ترد ظهر عندي غير نشط يعني مفاتحة ذبيت موبايلي وكمت أبدل ملابسي واريد اتوضى اصلي
ثاني يوم على أساس اطلع لبغداد تأجلت روحتي عندي شغل مهم كلت اكمله واطلع مابقى وكت حيل تأخرت
ــــــــــــــــــــ
رانيا حجتلهن الصار / وهذا كل الصار والله عقلي مجاي يستوعب يطلع هالخبث منها
لينا / عزا بعينها تستاهل خل يكتلونها يممه والقرآن جسمي يكزبر من تحجين اووف والله خطية نرجس مظلومة لا تزعلين ام صهيب ترى البنت ماشفنا منها إلا الخير
رانيا / لينا مو قضية ازعل اني صح كرهتها لأن زواجها من معتصم صدمني وجاي احاول اتغاضى صح ضربتها واذيتها واني سبب طلعة صعب بيت وحد لأن جنت مقهورة والله بس الحق مينزعل منه والسوته صفا ابد مو لايق بعائلتنا
ام حذيفه / وعمج شلون صار كالو ضغطه مرتفع
التفتت على امها /؛ الحمدلله شوية احسن بس ميقبل يشوف صفا ودز خبر لاهل العريس يستعجلون بالزواج
ام حذيفه / والله مدري ادعي عليها مدري اسكت الله هم يطلع حلو اليتيم ونرجس يتيمة
لينا / عمة صعب راح لبغداد
ام حذيفه / لا عنده شغل اووف الله يساعده مشلوع گلبه كلت وليدي ارتاح بهالزواج طلع بلاوي وراه
دخلت علا وكعدت على جهة بالهول وجهها مدلغم
ام حذيفه / علا شبيج لاتاخذين على نفسج انتي تختلفين يمة
علا / عمة والله استحي اباوع بوجهكم من ورى سوالف صفا
ام حذيفه / ولج انتي ياهو مالتج اسكتي لاتحجين خل تولي السالفة لاتحجن بيها فشلة
دخل ايهم يصيح لينا شايل عصومي / هاج ماصدكتي واحد يأخذه
لينا / فدووة حبيبي شلون خانس بحظنك
ايهم / بالمضيف شايلة وهو يفر بعيونه عالزلم
لينا / هههه اي خل يتعلم ابني من هسة
صدوك لعد يوسف وين مو جان وياك
ايهم / راح وية نذير يشتريلة
ردت رانيا / ياه شوكت اجى نذير عنده امتحان باجر وبقى يقرا اني أعلمه
ايهم / يابة عوفي الولد يشم هوا توى اجى ويوسف لزك الا يشتري عاد أخذه
رانيا / فدوة ايهم احجي وياه لأن نذير عكس صهيب شوية لا أبالي
ايهم / لا تخافين عليهم ترى ولدج سباع الله يحفظهم
رانيا / الحمدلله بس لازم اخاف عليهم
ايهم / اي حقج والله بس لا تضغطين عليه
التفت على لينا .. ولج أخذي ابنج شكد فاهية
لينا / هههه جيبه لا تحجي
ام حذيفه / يمة ايهم اخيك مارجع
ايهم / لا بعده طالع للخالص واحتمال يتأخر
ام حذيفه / شو اتصل عليه گلبي نغزني صار المغرب وهو ماكو
ايهم / يمة قبل ساعة اتصلت والله وكال أتأخر يلة راح اخابره
اتصلت على صعب يدك موبايله وميرد شنو السالفة بقيت اتصل عدة مرات اخيرا فتح خط ......
بلعت ريك وعيني على امي والله گلب والده عدها احساس اكو شي طلعت من الهول رحت بالصالة وسالت الرجال .. اني اخوه شنو الصار
غمضت عيني بقوة ورجعت فتحتها واني اسمعه سديته ودنكت راسي وأيدي على گلبي وجعني حيل ماكدرت ارجع لامي طلعت اركض للمضيف كلهم موجودين
ايهم / يابة صعب مسوي حادث وناقلينة للمستشفى العام وحالته الله اعلم بيها
مسحت وجهي وعيوني مليانه دمع ماريد افكر بسوء ماريد افكر اصلا
فزو الولد وابوية يسالون بية واني ماعندي جواب
حذيفة نتر بأبنه يجيب سويج سيارته حتى نطلع للمستشفى
شوية وعياط امي ترس البيت طلعنا من المضيف بالكراج أشوفها تلطم على وجهها والبنات يبجن ويجرن بيها تدفع بيهن وتصبح على صعب منظرها خلة دموعي تنزل مسحتها بقوة تنهدت بقوة واني اطلع لسيارتي برا
طلعنا سيارتين لبعقوبة ومن وصلنا ورى المغرب سالنا بالمستشفى وكالو داخل عمليات
الشرطة جانت موجودة تعرفو علينا وحجولنا الحادث على طريق الخالص تريلة وسيارة صعب السيارة حيل متأذية حذيفة راح وياهم يكمل الإجراءات واحنا بقينا ننتظر وماعدنا بس الدعاء
امي كاعدة وتدعي وماخلت أمام ولا نبي ماتشفعت بي يم رب العالمين
الانتظار هذا دمرنا ذكرنا بأيام معتصم بالمستشفى جريت حسرة وذبيتها واني ادعي رب العالمين يطلعنا صعب من العمليات سالم
رجع حذيفة الوجه ميتفسر وكف على جهة وانتجى بظهره عالحايط اياد راح عليه وبقى يسولف من شفت اياد خلة أيده على راسه رحت بسرعه .. شكو حذيفة
عينه على أبوية وامي كاعدين عالكراسي جر حسرة وذبها .. السيارة اليشوفها يكول قادر الله اذا صاحبها يعيش
ــــــــــــــــــــــ
ام عقيل /؛بنيتي اكلي لكمة ميصير هيج يلة عيني تعشي وربح يفرجها من فوك سابع سما
بلعت غصة وفوضت امري لرب العالمين مديت أيدي سويت لفة صغيرة واكلتها واني صافنه على وضعي مدري وين راح تصفى بية
أربعة ايام اني أبيت خالة ام عقيل موبايلي قافلته نهائي مفاتحته وذابته بالجنطة خطية البنات يسولفن ويتشاقن وياية بس اني مالي طاقة لأي شي
سالت سمرة عالمشتمل منو كعد بي كالت عائله صغيرة عدهم طفل،، تذكرت ايامي بي من جان معتصم الله يرحمه برحمته شكد جان طيب اصل وياية رغم اشهر قليلة عشتها وياه بس جانت مليانة حنية وحب راح فكري يم صعب بالفترة الاخيرة اني وياه علاقتنا حلوة اااوف بس الصار خلاني اكره نفسي لأن جنت على نيتي درس الي هذا لازم اتعض منه وصعب حيل قسى بية حتى ماخلاني أدافع عن نفسي جان مصدك لأن شاف بعينه يعني كل عقله اريد رجال يربي كرهت روحي واني جاي اشوف كمية الظلم هاي
فتت للمطبخ اريد اشرب مي واسمع خالة تخابر من شافتني بقت صافنة سلمت وسدته
ام عقيل/ تعاي نرجوسة عندي حجي وياج
كعدت عالقنفة وكعدت بصفي ..
/ هاي ام سما خابرت الف الحمدلله رب العالمين ظهر الحقيقة وكشفو صفا تكول صعب موتها كتل وراح تتزوج اسبوع مدري جم يوم
غمضت عيوني ودمعه نزلت على خدي غطيت وجهي بيدي واني احمدالله واشكره يارب فدوة اروحلك يارب من ظهرت برائتي
يمة نرجوسة اكو خبر موزين ..
_ صعب مسوي حادث وحالته خطرة
شهكت واني الطم على صدري / يماااه اسم الله لااا فدوة خالة يعني راح يموت صعب
بجيت وخالة حظنتني .. بيش مفاولة عالرجال أن شاء الله مابي الا العافية ادعيله يمه الله يكومه بالسلامة
بقيت ابجي وخالة هدأتني وراحت جابتلي مي .. اشربي ولا تبقين تقهرين بروحج
شربت شوية ورجعته واني اتخيل شكل صعب مليان دم وتعبان ياربي والله اني ما اكرهه اني مادعيت حتى يموت اني دعيت على صفا فدوة ياربي كومة بالسلامة صح قهرني واذاني بس قبلها جان يعاملني بكل طيب
ام عقيل / هسة شلون ام سما تكول جان ناوي يجي يرجعج وهي تجي وياه بس صار عنده شغل وهالسواه الحادث واخره ،، ترحين تشوفينه بكيفج تكول حتى ادزلها واحد من الولد يجيبها لأن حيل مشغولين بصعب وباقين وياه بالمستشفى
نرجس / خالة ما ادري اني عقلي مشوش من الصارلي ومن السمعته هسة احس روحي دايخة
ام عقيل / شوفي بنيتي لا تكولين خالة لحت علية انتي بكيفج شتقررين اني وياج
سكتت ماحجيت رحت لغرفة البنات كاعدات يقرن طلعت موبايلي من الجنطه فتحته جان بي شحن قليل وصلتني رسالة عالمسنجر من صعب فتحتها دازها بيوم الصارت المشكلة بالليل متأخر يعني بنفس اليوم صفا انكشفت زين شلون
الرسالة يعتذر مني عالسواه بية ويكول راح يجي يرجعني
خليت موبايلي عالشحن ورحت مددت بفراشي تغطيت اريد انام ماريد افكر بشي تعبانة اني
كعدت الصبح متأخرة البنات وعقيل بالدوام رحت توضيت وصليت سمعت خالة تصيحني
بالاستقبال جانت،، دخلت وتفاجأت بخالة ايمان وأيهم كاعدين رجعت اخذت حجاب الصلاه لبسته ودخلت سلمت عليهم خالة ايمان كامت بوجهي حظنتني وبوستني بس وجها جان تعبان حيل حتى ايهم
بقيت ساكته حتى ما سألتها على صعب مدري شبية لساني انربط
عاتبتني / متسألين على رجلج
رفعت راسي / شلونه هسة
ايمان / موزين هواية متأذي من الدعمة الله دحك على حاله وحالنا وطلعه من حلك الموت
اووف ينرجس هالايام المضت جنا على اعصابنا يومين صعب غيبوبة البارحة ثالث يوم بالليل صحى
نرجس وداخلها مقهور / حمدلله على سلامته
ايمان / انتي عندج علم بالصار واني بعدين احجيلج كولشي بس هسة أجينا ناخذج تشوفين صعب
ــــــــــــــــــ
نرجع لوقت الجانو ينتظرون صعب يطلع من العمليات ......
ساعة 12 طلعوا للعناية المركزة الدكتور شرحلهم حالته اصابه بالرأس والصدر وكسر بالساق والذراع ممنوع الزيارة لأن فات بغيبوبة
رجعوا كلهم بقى بس اياد وصلاح أمه ماقبلت ترجع بس قنعها حذيفة يجيبها باجر
الولد ظلو يتناوبون ماعافو المستشفى باليوم الثالث بالليل صحى وهو يون من الالم طلع الممرض صاح الطبيب الخفر سوى اللازم وخبرهم من سألوه اياد غزوان جانو بايتين بالمستشفى طمنهم
اياد طلب من الطبيب يشوفه سمحله دقائق لا اكثر
دخل اياد و غزوان يطمئنون عليه. تقرب اياد
/ حمدالله على سلامتك الف لا بأس عليك
شاوره غزوان .. ميحس علينا لعد شلون الدكتور يكول صحى
ؤ/ مدري والله
دنك باس رأسه .. صعب اخوية تسمعني
امممم
_ حمدالله على سلامتك
كام يون بصوت ضعيف متوجع
_غزوان صيح الدكتور خل يجي بسرعة
طلع غزوان وبقى اياد يراقب صعب يخاف يمد أيده على جسمه الجان مليان ضمادات وشاش
عضت شفته بقوة وعينه تحومي على جسم صعب
دخل الطبيب .. اخوان اطلعوا رجاءا
ايهم / لخاطر الله افحصه انطي مهدأ متسمع الونين مالته كاعد يتوجع
الدكتور / اخي طبيعي يتوجع لأن بدى يحس من صحى من الغيبوبة وانتم عدكم علم باصاباته
ضربه ابره مهدئه بالمغذي وراقب فعاليات جسمه من خلال الجهاز
صعب صحيت متوجع واسمعهم يحجون مابية ارد الالم فضيع جسمي كله يوجعني بقيت اركز شلون اندعمت تذكرت بوكتها راجع من الخالص وما احس إلا انصدمت بتريلة كسر على سيارتي بعدها ما دريت بروحي الا هسة بصوت ضعيف من تذكرت نرجس نرجس خفت اموت وذنبها بركبتي مراح تسامحني صحت باسمها اريد يجيبوها الي
اياد / صعب شبيك شتريد تكول
اياد يسألني واني بضعف وصوتي بصعوبه يطلع / نرر جس
اياد / تمام راح اجيبها لا تعب روحك
طلعهم الدكتور وراح صاح الممرض انطاه تعليمات
ـــــــــــــــــــــــــ
نرجس /
شي بداخلي يجبرني اروح أشوفه وهذا الصار
واجت خالة ام عقيل كالت عيب رجال اعرفه أكثر من سنة اقلها اتحمدلله بالسلامة وارجع
بالطريق حجت خالة ايمان كل السالفة واني بداخلي احمدالله واشكره لأن اكو ناس طيبين بحياتي ويحبوني مثل خالة ايمان
وصلنا المستشفى جان الوكت قريب الظهر
بالممر جانو الولد موجودين سلمت عليهم واني مدنكة راسي اسمع خالة تسال على صعب ردلها اياد كال اهله بالداخل
طلع حذيفة ومن شافني صاحني .. تعاي خيتي ادخلي
تقربت عليه رأسا سالني / شلونج خيتي
رديت بصوت خفيف / الحمدلله
دخلت وتركيزي صار على صعب جسمه كله ضمادات جان صاحي عينه اجت بعيني جانت مورمة ومحاوطها لون بنفسجي على زراك
تقربت عمتي كامت .. هلة يمة هلة نرجس
نرجس / شلونج عمة حمدالله على سلامته
باستني بخدي وعمو نفس الشي ادحك عليهم مبينين خجلانين من السوته بنتهم
التفتت لصعب وكفت يم راسه وإحساس بالسواه بية رجعلي تحاملت على نفسي .. حمدالله على سلامتك
همس من بين شفايفه .. يسلمج الله
ماكدرت ابقى طلعت بسرعه واني ابجي لاكتني خالة ام عقيل .. خير اسم الله عليش تبجين
سكتت ما حجيت هي عافتني ودخلت تسلم
رحت كعدت عالكراسي بالممر وجنطتي بحظني مرتبكه وخايفه منظر صعب وشكله وجسمه المتاذي صدمني مجنت متوقعه هيج حالته حتى الكلام بصعوبه يطلعه
انتبهت لخالة كعدت بصفي .. انه راجعه لبغداد أخذ تكسي منا وانتي تبقين يم رجلج حالته تعبانه صح انه كلت بكيفج بس هذا شوري أنه تقبلين بي لا يلة حتى نرجع اثنينه إذا ما تبقين هنا
نرجس / خالة احس بخوف بعد الصار وياية
ام عقيل / لا حول ولا قوة الا بالله نرجوسة يمة انتي وكلتي امرج لله ونصفج لا تخافين صيري ذيبة
خالة ايمان /؛ها نرجس تبقين مو
كعدت بصفي صرت بيناتهن خالة ام عقيل سكتت ماحجت رديت عليها واني اهز راسي موافقه ابقى / اي راح ابقى
ايمان / عفية بنيتي الأصيلة المتعوف رجلها بالشدة ، راح تبقين عندي بالبيت لو يم بيت عمج ابو حذيفه بعد غرفتج موجودة
واحتمال اكيد صعب من يطلع يأخذونه للبيت حتى الولد يدارونه متكدرين وحدج انتي لازم رجال
تنهدت واني اسمع كل هذا الحجي بقيت ساكته
ودعتني خالة ام عقيل ورجعت لبغداد واني بقيت كاعدة وية خالة ايمان طلعو أهل صعب وكالو نرجع هسة بس صعب يريد نرجس
رحت واني امشي بخطوات ثكيلة جان وحده بالغرفة بقيت واكفة وعيني على وجهه
حجى بتعب / لا... ترجعين
حجاها وسكت بقى يعاين لوجهي
رديت / باقية
غمض عينه وطلع صوت آآهه وجع تقربت سالته ..
نرجس / أصيح الطبيب وين الألم تحس بي
همس بصوت تعبان ..
صعب / كل جسمي ،، دعيتي علية نرجس
نرجس / لاااا لاااا والله لااا
بجيت واني اسمعه يحجيها بألم ولوم
صعب / اششش .. لا .. تبجين
مسحت دموعي و طلعت
رجعنا وية اياد وحذيفة وبقى ايهم يم صعب
خالة ايمان كالت نرجس تبقى عندي بس عمتي ماقبلت الا ارجع للبيت وبغرفتي اني الصراحه جنت بحالة ما تسمحلي اناقش بأي شي
مريت لبيتي المفتاح وية حذيفة رحت لملمت كم قطعه ملابس احتجاهم حتى لصعب اخذتله لأن راح يبقى أبيت أهله
رجعت لبيت عيالي والبنات استقبلني فرحانات بية وخطية علا بقت تتعذر خجلانة من سوالف اختها ام المصايب
نمت بغرفتي بعدما رتبت الملابس ولكيتها منظفينها وعلى حطتها مرتبة
أيدي جوا خدي مددة بفراشي وخيال صعب وشكله ميروح من بالي نمت ماحسيت الا الصبح رحت توضيت وصليت جانو كاعدين وراهم دوامات الجهال وعمتي جانت متحظرة كاعدة تلف بفوطتها العرفته من لينا تريد اياد يوصلها حتى يبقى وترجع وية ايهم
دخلت المطبخ سلمت عليهم
صباح الخير ها يمة ماترحين ويانه
رد اياد / وين تروح الزلم رايحين رادين يزورون صعب باجر احتمال يطلع
ام حذيفه / ها مو كلت تروح ويانة مادام رايحين
اياد سال نرجس /؛خيتي تردين ترحين بكيفج
نرجس / لا ماروح
اياد /؛يلة لعد يمه خل نتوكل
اني بقيت بالمطبخ تريكت والبنات راحن على شغل البيت
من كملت ريوك لملمت المطبخ ورتبته ورجعت لغرفتي
ثاني يوم عمو جان موصي على ذبيحه من دخلت السيارة للكراج ذبحو للكبش
دخلو صعب على كرسي متحرك للمضيف لأن الناس يجون يتحمدوله بالسلامه فيبقى هناك سريره مرتب ومرتاح احسن هذا اقتراح عمي جان
اني مارحت بعد عليه المضيف مليان وبالليل من فرغ بقى ايهم وياه يدير باله عليه
بس اول ما دخل رحت سلمت وطلعت اني والبنات
رانيا اجت يوم على يوم بس اني ما اتقرب عليها اعوفها وارجع لغرفتي الصار وياي عبرة اتعض منها
فتحت الباب ودخلت سلمت / شلونج نرجس
وكفت ورديت .. الحمدلله
رانيا / نرجس السويته وياج جان لحظه غيرة وغضب بعد الصار صار وكل واحد وقسمته
ماحجيت بقيت ساكته رجعت كالت / رجاءا من اجي لبيت اهلي تصرفي براحتج لا تتحسسين مني
نرجس / خلص مثلما تحبين اني ماعندي شي وياج
مر اسبوع والعالم خفت رجلها كلها اول يومين اجت
دخل حذيفة يدفع بكرسي صعب وياه ايهم دخلوه للغرفة ساعدوه يمدد عالفراش ايهم عاف الأدوية عالكومدي بعدما علمني عليهن
طلعو واني بقيت وحدي وياه انتبهت عليه مغمض عيونه زين وجهه رجع لوضعه والضماد رافعينه من راسه بس لصقات اثنين بكصته بس أيده ورجله على وضعهن اكيد لأن كسر شهرين ثلاث يلة يجبر
فتحت الباب اريد اطلع صاح وراية / نرجس تعاي هنا
التفتت وأيدي على يده الباب / محتاج شي
همس بضعف / محتاجج
رجعت كعدت بصفه وعيني على أيده المكسورة
تنهد وهو يكول / من صحيت ورى الغيبوبة اجيتي على بالي وطلبت اشوفج
نرجس لا تبقين ساكته احجي اي شي
عيني بعينه/ شيفيد الحجي وانت ظلمتني واذيتني انت حتى ما خليتني أدافع عن نفسي
ــــــــــــــــــ
