رواية بنت الكهوجي الفصل السابع والعشرون بقلم احمد
هجمو علي الشباب وعيب علي اسلم نفسي بسهولة ضربت الاول بوكس والثاني حاول يضربني ومسكت ايدو ودفعتو على الي وراه ووگعو مع بعض
بقينا اني وابن الشيخ وجه بوجه وهو بايدو سلاح موجهو علي ومن شاف البقية وگعو بالگاع بينت عليه نظرة الخوف
تقدمت اول خطوة وگال ابقى مكانك وما اهتميتلو وويا ما مشيت الخطوة الثانية ضربني طلقة وباوعت لدشداشتي الجوزية وهي تنصبغ باللون الاحمر
من قوة الطلقة اندفعت ورا وانسند جسمي عالحايط والبقية جانو كلهم مصدومين لان ما توقعو توصل لهاي الدرجة
الطلقة اجت بين الكلية اليسار والقفص الصدري بصعوبة سحبت شماغي من راسي وحطيتو على مكان الجرح علمود اخفف من النزيف
بلشت قوتي تضعف وبدا الوجع يزيد علي وجان وجع ما ينوصف ونفسي بدا يصعب شوية شوية لان من الوجع ماگدر اتنفس زين
بهالاثناء وصلو اهلي اخير شي اتذكرو من اجى زيد يركض وضرب الي صوبني دفرة بوجهو لزگو بالحايط وبعدها فقدت الوعي
ياقوت : بعد ما اجانا تميم تعشى فهمنا الموضوع كلو وگال بس يتحسن الولد نحاول نحل الموضوع ونرجعو للبيت بدون مشاكل
بس بوقتها ما حجالنا انو يريد يروح لذاك الشيخ ماعرف اذا نسى او علمود امو ما تگولو لا تروح ومن خلص عشى راح
مرت تقريبا نص ساعة لو اقل وسمعنا اصوات جاية من جهة المضيف وباوعنا من الشباك جانت العشيرة دا تتجمع يم المضيف
وانتبهنا ان زياد اجى يركض من بيت اهلو شايل اسلحة ومن طلع ركبو بالسيارات ومانعرف وين رايحين بس كل الي اجى بتفكيري ان احد رايح للولد الي بالمستشفى
الحجية اتصلت على تميم تيلفونو جان مشغول لان جان الاتصال مفتوح ويا ابوه وكل ما تتصل يطلع مشغول واتصلت عالحجي هم مشغول
هنا بدا القلق اتصلت على زيد ما يجاوب زياد نفس الحالة وتعرفون انتو الشعور بهيج موقف لا نعرف شصاير ولا نگدر نتحمل
اخير شي اتصلت على رشيد گاللها اكو مشكلة صايرة ورايحين نفضها قبل ما تكبر گالتلو على تميم وابوه ان تيلفوناتهم مشغولة
گاللها دا يخابرون اهل المشكلة وهسا لازم اسكر ماگدر ابقى احجي گالت تمام وسكرتو وشوية ارتاحينا بس بقى الخوف لا واحد منهم يتأذى
مر الوقت وماكو اي خبر منهم الساعة صارت 11 واجن النسوان لان ينامن يمنا واستقبلناهن ورحبنا بيهن وجانن كلش تعبانات لان من اختفى ابنهم مو نايمات الليل
اخذناهن لفراشهن وصارت الساعة 12 بالليل ولحد الان ما رجعو وخابرت الحجية على تميم ورد عليها الحجي بدال تميم
الحجية : ها تميم
الحجي : هلا هالة
- هلا ابو تميم لعد تميم وينو
- شوية مشغول ليش اكو شي
- لا بس نريد نعرف ايمتى ترجعون
- ماعرف والله بس إن شاء الله ما نتأخر
- تمام بيها الخير ومن يفضى تميم خليه يخابرني
- تمام
اية : مو مرتاحة للموضوع
الحجية : شبيدنا بنيتي لازم ننتظر والله كريم
ياسمين : اي والله ما بيدنا شي
الحجية : باستغراب .. هاي رشى تتصل
اية : جاوبيها شوفي شكو
الحجية : هلا رشى
رشى : هلا ماما شلونج
- شبيه صوتج ماما
- غير گلبي راح يوگف على تميم
- بخوف .. شبيه تميم
- ها ... عبالها نعرف
- احجي رشى شبيه ابني شبيه تميم
- تصوب بطلقة بمضيف الشيخ
- شنوووووووو
اية : بخوف .. ماما شكو شبيه تميم
الحجية : عافت اية واتصلت عالحجي
الحجي : هلا هالة
- ابني يتصوب يا ابو تميم واني اخر من يعلم شلون گلبك ينطيك تضم علي هالسالفة هاي
- والله حقج يا بوية بس.......
- لا بس ولا شي ا ااا ..... وفقدت الوعي
اية : ماماااااااا
ياقوت : من جهة صدمة تميم ومن جهة صدمة الحجية من صدگ مانعرف شنسوي رحت ركض اجيب ماي علمود نصحيها
اية اخذت التيلفون وگالت بابا فدوة الحگلي ماما ماعرف شبيها ورجعت انطيت الماي لياسمين الي حالتها لا تقل عن حالة الحجية
بللت ايدها ومسحت وجه الحجية وبلشت تصحى الحجية وراحت ركض جابت عبايتها وعباية الحجية بين ما يجون ياخذوها
الحجية گعدت وصارت تبجي وتتحسر على ابنها وخايفة يصير عليه شي لا قدر الله وتقريبا نص ساعة مرت بالف يا ويلاه واجى زيد
اول ما دخل جانت دشداشتو كلها دم مجرد شفتها انقبض گلبي اخذ امو ويريد يرجع ياسمين گالت وربي فلا ارجع وزوجي هناك ماعرف شحالتو
اخذهن زيد وبقت اية تبجي على تميم واني احاول اواسيها وينفس الوقت خايفة عليه لان ما يستاهل الا كل خير هو واهلو
وجنت خايفة ان لا قدر الله اخسر شخص ثاني لان من صدگ خسرت هواي اشخاص ومو گادرة اتحمل خسارة احد ثاني
بعد ما وصلو المستشفى اتصل زيد وگال خلصت العملية وهسا هو كلش زين لا تخافون عليه ونامو لان عندكم ضيوف
من سمعنا هيج كلش فرحنا اية حضنتني وصارت تبجي من الفرح اخذتها للغرفة ونمنا بصعوبة لان اكيد بهيج وضع مو سهلة ننام
گعدنا ثاني يوم الصبح على صوت صفية (زوجة ابوهم) گعدتنا اني واية علمود نگعد نسوي ريوگ للضيوف وهي اجت بدال الحجية
گعدت عالسريع صليت الفجر ونزلت تحت بلشت بالريوگ والساعة 8 گعدن النسوان وحطينا الريوگ وبيومها ماراحت اية للمدرسة
اولا ماگدر ابقى وحدي ثانيا يوم خميس فيكون نص دوام وثالثا ماكو احد يوديها اخوانها الي نايم والي باقي بالمستشفى
تريگن النسوان والساعة 10 اتصلت صفية على زياد وصتو يجيب لوازم الغدا ومن جابهن بلشنا بيه اني واية وهي بقت يم النسوان
بين ما كملنا الغدا اجن الحجية وياسمين طمننا على تميم انو تحسن كلش واليوم بالليل يطلعوه لان ما يقبل يبقى بالمستشفى
حطينا الغدا وتغدينا والنسوان تخبلن من سمعن ان تميم تصوب بسبب الي صار ويا ابنهم وكلش خجلن من الحجية بسبب الي صار
الحجية وياسمين من خلصن غدا ترخصن علمود ينامن واني واية بلشنا بالمواعين وتنظيف المطبخ وما خلصناهن للعصر
العصر اجى زياد اخذ النسوان علمود يزورن ابنهم ويتطمنن عليه واني واية اخذنالنا قيلولة ارتاحينا شوية بعد هاليوم المتعب
گعدت ويا اذان المغرب صليت ونزلت لگيت ياسمين گاعدة دا تسوي العشى والنسوان راجعات من المستشفى وگاعدات ويا الحجية
من كمل العشى تعشينا وتساعدنا اني واية وياسمين بالمواعين وجانت اية كلش متشوقة لرجعة تميم للبيت لان كلش متعلقة بيه
وبعدها حطينا فراش لتميم بالاستقبال ورتبنا الاستقبال رغم هو من الاساس مرتب لان اكيد راح يجون عليه ضيوف
بعد اذان العشاء بخمس دقايق تقريبا گالو اجى تميم واخذوه فورا للاستقبال وراحن امو وياسمين واية علمود يتطمنن عليه
اني ما گدرت اروح اسلم عليه لان عائلة ابوه كلهم موجودين فگلت من يروحون اروح اسلم عليه ولان تعبان ما تأخرو عندو علمود ينام ويرتاح
من راحو رحنا اني وام الولد اول شي سلمت عليه ام الولد وتحمدتلو بالسلامة واعتذرت منو لان تعتبر الي صار بسبب ابنها
تميم گاللها هذا قضاء وقدر والحمدلله انها اجت خفيفة وبعدها طلعت المرة وطبيت اني جانت اية گاعدة وحاطة راس تميم بحضنها
ياقوت : الحمدلله على سلامتك تميم
- الله يسلمج ويعافيج
- خوما موجوع
- لا بوية وضعي كلش زين
اية : جذاب ترا موجوع
- افه تجذبيني اني يولي
- اي لان ماتگدر تسويلي شي
- اني الج اذا ما خليتج تتندمين
- يلا نام وليدي نام
ضحكت على شقاهم وعفتهم ورجعت وبقن يمو امو وياسمين واية عرفت راح يجون ناس فبلشت بالجاي عالسريع وماكو ربع ساعة واجن خواتو
يعني حتى ما لحگ يغفى وبس سلمن عليه ودخلن داخل لان اجو عمامو وولد عمامو وصارو ناس جاية وناس رايحة زلم ونسوان وبنات وجهال
ذيج الليلة من صدگ ماصار بيدنا مجال انو نگعد من كثر الخطار رغم صرت احب وجود خوات تميم بس هالمرة ما گدرت حتى اخذ راحتي وياهم
اولا جنت مشغولة وثانيا وجود بنات عمامهم شوية قيدني لان ما متعودة عليهن وما اريد انطي ميانة زايدة وياهن احسن
رشى جانت هي توزع جاي للنسوان وماعرف وين راحت لان صبيت الستكانات من اجن نسوان وگالت اية انتي وديه بين ما ترجع رشى
اخذت الصينية ورحت للصالة وكل الانظار توجهت علي لان اني غريبة عن النسوان الموجودات گلت السلام عليكم وبلشت اوزع
- يمة منو انت
الحجية : هاي ياقوت بنت ابو باسم
- اللهم صلي على محمد شگد حلوة
ياقوت : بخجل .. عيونج الحلوة
- صفية بعدج ساكتة انتي
- مو وقتها عيني
ياقوت : جنت اسمعهن بس عبالي مو مقصودة بالكلام اني
- دباعيها شگد حلوة ونازكة وين تلگين مثلها
رشى : اني مثلها عمة شو ما تمدحيني
- هلا وليدي عباس شلونك
من گالت هيج النسوان انفجرن بالضحك ورشى صارت گوة تسحب النفس من الضحك واني گوة كملت توزيع وعلى شوية وينكب الجاي
كملت توزيع ورشى راحت گعدت وياهن لان مبين ميانتها قوية وياهن واسمعها تحجي وياهن وتضحك وهن يضحكن وياها
من صارت الساعة 11 بلشو يروحون النسوان والزلم واني والبنات ما خلصنا تنظيف لل 12 بالليل بس جنت ميتة من التعب بس اريد اوصل الفراش
ياسمين اخذتلها فراش وراحت للاستقبال علمود اذا يحتاجها تميم تكون موجودة واني واية رحنا لغرفتنا كالعادة ومجرد تمددت اخذتني النومة
گعدت ثاني يوم باوعت على اية ما لگيتها گمت صليت ونزلت تحت البيت هدوء توقعتها عند تميم ورحت للاستقبال لگيتها متمددة بين تميم وياسمين
جانو كل واحد حاط فراش الو وهي مندحسة بينهم وتحجي ويا تميم
ياقوت : صباح الخير
تميم وياسمين : صباح النور
اية : بدا الازعاج
- ليش ولج
- هيج من الله انزعج منج
- هيج صارت
- اي هيج صارت روحي روحي ما اريدج
- تمام مع السلامة .. ورجعت للبيت
- ولج ياقووووووت
عفتها ومشيت واني اضحك لان اعرفها تتشاقى اول ما دخلت عالصالة اندفعت بقوة لدرجة وگعت ووگعت فوگي اية
- اااااخ يولي فلشتيني
- تستاهلين منو گلج تعوفيني هناك
ياسمين : هذا الحب الي الله يحرمنا منو لو عايفتها زعلانة احسن
ياقوت : ااااخ لو داعمتني شاحنة ولا داعمتني انتي
اية : ههههههههههه
ياقوت : صارت تحضني وتبوس بي على اساس تراضيني واريدها بس تعوفيني وما تعوفيني وياسمين واگفة بصفحة وتضحك علينا
اخير شي سمعنا صوت زيد يصيح ولك تميم النسونجي وعافتني اية خاف يجي ومو حلوة اكون متمددة گدامو حتى لو يعتبرني اختو
راحت ياسمين تتعارك ويا زيد واني واية بلشنا بالريوگ وگعدت الحجية وهم راحت عند تمام ومن كملنا الريوگ اخذناه للصالة
گعدنا نتريگ وياسمين صارت تاكل وتوكل تميم وياها وزيد مستحيل يشوف هيج شي ويبقى ساكت
زيد : ما تاكل شبيك جاهل وتريد احد يوكلك
تميم : ابقى بغيرتك
- من منو اغار
- مني لان مريتي توكلني
- دق اية .. وكليني وكليني
اية : دروح هو اني اريد احد يوكلني
- وكليني واوكلج
- هاك .. وانطتو لگمة
- ولج اروح فدوة للحلوة مالتي انطيني مطگة (بوسة)
باسها بخدها كل قوتو وهي صارت ترافس ومن عافها صارت تفرك بخدها وتضرب بيها وهو يضحك بكل صوتو
زيد : صدگ ابوي يريد يسوي غدا اليوم
هالة : وما تروح تعاونهم
- شبيج هويلة تطردين ابنج من البيت
- مو اطردك بس المفروض تروح تشوف شيحتاجون منك
- هسا رايح ها اها حتى ريوك ما اريد
مسك البيض بايدو واخذو وياه وطلع واية تحجي عليه لان ما عافلها كملنا ريوگنا عالسريع اني واية ورجعنا للمطبخ بلشنا بالمواعين
من گعدن النسوان اهل الولد سوينا الهن ريوگ لان ما حبينا نزعجهن ونگعدهن ويانا والحجية تريگت وياهن لان عيب ياكلن لحالهن
مر الوقت ومحد اجى لان يوم جمعة بس بال 11 بلشن يجن النسوان والزلم جانو يدخلون يسلمون على تميم ويطلعون فورا للمضيف
لل 12 البيت قبط من النسوان والجهال حتى تميم اخذوه للمضيف من الخبصة الي صارت ومن صارت وقت الصلاة راحو الزلم للجامع
الطبخ وهوسة الزلم كلها صارت بالخارج واني واية وياسمين بالمطبخ والبنات كل وحدة تسويلها شغلة ومن رجعو من الصلاة الزلم بلشو يصبون الغدا
من كملو توزيع بالمضيف جابو للنسوان ولان اول مرة اكون بهيج عزيمة ما جنت اعرف شنو لازم اسوي فبقيت بالمطبخ
صارن يجيبن البنات الصياني للمطبخ ورشى طلعت الجهال عالخارج جانو حاطيلهم اكل بالخارج علمود لا يبهدلون النسوان
اجت الحجية تأكدت من الصياني ان ما بيهن نقص لو شي ووزعنهن البنات للنسوان وعافن كم صينية النا احنا البنات بالمطبخ
اجت ياسمين سحبتني على صينية وگعدنا اني وياها واية ورشى وباقي البنات توزعن على باقي الصياني وبلشنا بالغدا
جنت شوية مستحية من البنات لان اول مرة اكل گدامهن وياسمين انتبهت الي شاورتني گالت اكلي زين معليج بيهن لا تتقيدين
جانت كل صينية حاطين بيها كم رغيف خبز وفوگ الخبز مرگ وتارسيها تمن وفوگ التمن اللحم والاكل جان من صدك لا يعلى عليه
ياسمين كطعتلي من الخبز الي شبعان مرگ وحطتو گدامي گالت اكليه ويا التمن واللحم واخذت قطعة صغيرة وياها تمن ولحم
جان الطعم رهيب ولان البنات ملتهيات ومحد منتبهلي اخذت راحتي بالاكل واكلت لحد ما انتسرت بطني من صدگ
من خلصنا اجو الولد اخذو الصياني وما احجيلكم عن الهوسة الي سووها الجهال بالطارمة صارت من صدگ مردويسة على گولة زياد
جنت دا اغسل المواعين واسمع زيد اجى شاف مكان الجهال وگال ولكم شمسوين الله يزگلبكم هجمتو بيت البيت واهل البيت
ياقوت : شنو يزگلبكم
اية : لا تسأليني لان ماعرف هاي اللغة
رشى : هاي ما موجودة بولا قاموس
ياسمين : ههههههههههه هاي بمعنى الله يگلبكم بس زيد يحب يخترع كلمات
ياقوت : هههههههههههه اخترع لغة كاملة مو كلمة
دا نحجي وصارت هوسة خارج البيت وصار صوت سيارات وارتفع صوت الزلم ومجرد سمعنا صوتهم عرفنا انو صاير شي
رفعت نفسي على اطراف اصابعي شفت سيارات هواي گدام المضيف ومتجمعين ابو تميم والعشيرة گدام باب المضيف
.............
