رواية حين تبكي الجدران الفصل الثاني
جاسر : ليه يامه ؟!!
الام " نجوي " : من غير ليه ، هو كده .
جاسر : طيب اعملوا حسابكم انا هتجوز شروق يعني هتجوزها ، وافقوا ولا مش وافقتوا هتجوزها بمزاجكم ولا غ.صب عنكم هتجوزها .
تركها جاسر ودخل غرفته غا.ضبا ، وجلست نجوي يبدو عليها الهم والحزن !!
جلست تتذكر حين كانت في شبابها تربطها علاقة حب بجارها رجب الذي كان حينها فقيرا .....
** فلاش باااااااك **
في احدي الحدائق ...
رجب " بحزن " : ابوكي رفضني تاني يا نجوي !! انا مش عارف اعمل ايه ؟؟
نجوي : متزعلش يا رجب ، انا مش ممكن اكون لغيرك ابدا .
رجب : انا حاولت اقنع ابوكي بأي وسيلة اني في بداية طريقي وان جوازنا هيكون دافع ليا علشان احقق نفسي واعيشك عيشة مرتاحة ، لكن مفيش فايدة !! اللي فهمته ان ابوكي عايز يجوزك واحد غني من البداية .
نجوي : انا اتكلمت مع امي علشان تقنعه يوافق لكن ....
رجب : لكن ايه ؟؟ ايه اللي حصل اتكلمي .
نجوي : مش عايزة اقولك علشان متزعلش اكتر ما انت زعلان .
رجب " بعصبية " : اتكلمي يا نجوي ايه اللي حصل ؟؟
نجوي : امي قالتلي ان دياب اتقدم لابويا علشان يخطبني وابويا وافق .
رجب : بتقولي اييييه !! ابوكي وافق ؟؟
نجوي : ايوه لكن انا قولت لأمي اني مش هتجوز غيرك حتي لو اخر يوم في عمري .
رجب : ولو ابوكي صمم يجوزهولك هنعمل ايه ؟؟
نجوي : بردو هرفض ومش هوافق غير بيك يا حبيبي .
رجب : اوعديني يا نوجا انك عمرك ما تسبيني ابدا ولا تكوني لحد غيري .
نجوي : اوعدك يا حبيبي .
مشهد اخر بعد عدة شهور ...
ترتدي نجوي فستان الزفاف في حفل زفاف شعبي وسط الجيران والاقارب بينما تحبس دموعها كان دياب تملأ وجهه الفرحه و الضحك والسرور ويتراقص مع اصدقاؤه في سعادة !!
بعد ايام ...
دياب : انتي هتفضلي لويا بوزك كده علطول ؟؟
نجوي : عايزني اعمل ايه ؟؟
دياب : افردي وشك زي الناس ، احنا اللي يشوفنا مش ممكن يصدق اننا لسه عرسان جداد !!!
نجوي : هي دي طبيعتي ومعرفش اغيرها .
دياب : اوعي يا بت تكوني لسه بتفكري في الواد رجب .
نجوي : ايييه !!! ايه اللي انت بتقوله ده ؟؟ عيب كده !!
دياب : زي ما سمعتي ، لو حسيت في يوم انك لسه بتفكري في الواد ده هيكون اخر يوم في عمرك .
نجوي : انا بنت ناس ومسمحلكش تقولي كده .
دياب : ماشي يا بنت الناس ، بكره نشوف .
بعد شهور قليلة ...
في منزل اسرة نجوي
نجوي : حرام عليكوا يامه انتي وابويا تجوزوني واحد مبحبوش ودلوقتي بقيت حامل منه !!!
الام : مع العشرة هتحبيه ، خصوصا لما تخلفي وابنكم تشوفيه بعينيكي وتشيليه في حضنك هتحبيه .
نجوي : احنا متجوزين من فترة اهو يامه ولسه مش طايقاه !!!
الام : علشان لسه المنيل علي عينه رجب في دماغك .
نجوي : علشان بحبه يامه وهو بيحبني ، حرام عليكوا تفرقوا بينا .
الام : انتي خايبة يا بت يا نجوي ، حب ايه اللي بتتكلمي عنه !! الحب ده بييجي بعد الجواز ، واهو رجب اللي بتقولي بيحبك راح اتجوز وعاش حياته ونسيكي خلاص ، عيشي حياتك انتي كمان وانسيه ومتبقيش خايبة .
نجوي : مين اللي اتجوز ؟ رجب !!!
الام : ايوه يا خايبه .
نجوي : اتجوز مين يامه ؟؟
الام : اتجوز البت شمس .
نجوي : شمس !!! وازاي انا معرفتش لحد دلوقتي ؟!!
الام : علشان قاعدة حزينة في البيت و مش بتخرجي من البيت زي الاول .
** بااااااااااااك **
تستفيق نجوي علي صوت جاسر : اسمعي يامه انتي لازم تفهمي ابويا ان مكنش يوافق يجوزني شروق انا هسيب البيت وامشي .
الام " نجوي " : يا جاسر يا ابني انت بتقول كده علشان لسه في شبابك وطايش انما لما تكبر و تعقل هتعرف ان كل ده بيتنسي واللي هتفضل فاكره هو بيتك واولادك والانسانة اللي مكتوبالك .
جاسر : انا لو متجوزتش يامه شروق مش هتجوز خالص .
الام : كتير يا ابني قالوا كده قبلك و كانوا فاكرين ان الدنيا هتقف لما يفترقوا عن اللي بيحبوهم ، لكن الدنيا مشيت واتجوزوا وخلفوا وعاشوا حياتهم ونسيوا كل اللي فات .
جاسر : انا عايز اعرف ايه سر الكره والعد.اء بين ابويا والمعلم رجب ؟؟
الام : خلافات قديمة يا جاسر وبمرور الزمن كبرت ، ابوك يكون عايز يشتري بيت ، اول لما المعلم رجب يعرف يجري يشتريه قبله ، والعكس لو ابوك عرف ان رجب عايز يشتري محل يجري يشتريه قبله ، لدرجة ان ابوك فكر يعمل فرن عيش علشان ينافس رجب في اكل عيشه !!! ورجب لو قدر يمشي ابوك من المنطقة والحي كله مش هيتردد لحظة واحدة .
جاسر : يبقي الحل الوحيد اني ابعد عن ابويا علشان اتجوز شروق .
الام " نجوي " : تبقي خايب !! ابوك اللي باقيلك يا خايب .
في اليوم التالي
في السادسة صباحا
شريف مازال مستيقظا يتحدث مع شروق عبر الهاتف واذ به يسمع صوت والده " ربيع " !!!
شريف : بقولك ايه يا شوشو .
شروق : نعم يا عيون شوشو .
شريف : انا هقفل علشان سامع صوت ابويا !! مش عارف صحي بدري ليه ؟!!
شروق : طيب يا حبيبي انا كمان ابويا ده ميعاد صحيانه .
شريف : سلام يا قلبي ، هتوحشيني اوي .
شروق : وانت كمان يا حبيبي .
يغلق شريف هاتفهه ويخرج فيجد والده يستعد للخروج .
شريف : صباح الخير يا بابا .
ربيع : صباح النور يا شريف يا ابني ، ايه اللي مصحيك دلوقتي ؟؟
شريف : انا كنت نايم وصحيت علي صوتك ، خير رايح فين بدري كده ؟!!
ربيع : رايح الفرن .
شريف : ليه كده ؟؟ ما هو عم رجب هو اللي بيفتح الصبح بدري و انت علطول بتنزل الفرن علي الساعة تسعة !!!
ربيع : مش هخبي عليك يا شريف يا ابني احوال الفرن مش عجباني ولازم اكون موجود بنفسي طول الوقت .
شريف : عايزني اجي معاك ؟؟
ربيع : لأ ، خليك انت بعيد عن الفرن ووجع الدماغ .
الام " نبيلة " : ما تاخد شريف معاك يبقي جنبك .
ربيع : لا ملوش لزوم ، يلا روحوا ناموا انتوا .
الام : مش هتفطر قبل ما تنزل ؟؟
ربيع : لا انا هفطر هناك في الفرن .
ينصرف رببع خارجا من المنزل ، بينما يسألها شريف : فيه ايه يا ماما ؟ ابويا شكله متضايق .
الام : ما انت عارف ابوك بيحب كل حاجة تمشي زي ما هو عايز ، يمكن حصلت حاجة في الفرن وابوك عايز يكون موجود معاهم علطول .
شريف : انا كنت عايز افاتح ابويا في موضوع لكن شكله مش رايق دلوقتي .
الام : موضوع ايه ؟؟
شريف : عايز اخطب شروق بنت عم رجب .
الام : لااا ، مش وقته خالص .
شريف : ليه كده ؟؟
الام : الجو معكر دلوقتي بين ابوك وبين رجب ابوها ، ولو فاتحته في الموضوع ده دلوقتي ممكن يرفض ، وانت عارف ابوك لو قال كلمة مش ممكن يغيرها بعد كده ابدا .
شريف : معاكي حق يا ست الكل ، ربنا يروق الحال علشان اعرف اتكلم معاه .
الام " تضحك " : انت بتحب البت شروق يا شريف ؟؟
للكاتب عادل عبد الله
شريف " يضحك " : اوي اوي يا يت الحبايب ، لكن مش اكتر منك طبعا .
الام " تضحك " : البت حلوة ، بنت حلال لكن امها وابوها يا ساااتر !!!
شريف : انا مالي ومال ابوها وامها !! انا عايز اتجوزها هي .
الام : عموما الكلام سابق لأوانه ، اصبر لما النتيجة تطلع وتاخد شهادتك يكون الجو راق بين ابوك وابوها وساعتها اللي فيه الخير يقدمه ربنا .
في الفرن
يصل ربيع قبل رجب وباقي عمال المخبز ويفتح ابوابه ثم يصل رجب والعمال تباعا .
يبدأ سير العمل في المخبز كالمعتاد ويباشرهم ربيع ، بينما تظهر علي رجب علامات السخط والغضب !!!
ربيع : فطرت ولا لسه يا معلم رجب ؟؟
رجب : لأ انا مبفطرش دلوقتي .
ربيع : ليه ؟ ده احنا شركا شوف من كام سنة ولا عمرنا اكلنا عيش وملح مع بعض !!!
رجب : العيش والملح بالعشرة مش بالأكل يا ربيع .
ربيع : معاك حق ، طيب انا هجيب فطار ، اعمل حسابك معايا ؟؟
رجب : لأ انا لسه بدري علي ما افطر .
بعد قليل ...
يجلس ربيع لبعض الوقت يتناول افطاره ، وبعد ان ينتهي يعود لمتابعة العمل فيلاحظ ما يدعوه للغضب .....
ربيع : فين باقي الدقيق اللي كأن هنا ؟؟
احد العمال " جمعة " : اتعجن واتجبز يا معلم ربيع .
ربيع : لأ ، كان فيه هنا عشر اشولة دقيق اتعجن منهم والمفروض باقي منهم تمانية ، واللي موجودين هنا خمسة بس !!!
جمعة : الدقيق اتعجن واتخبز يا معلم .
ربيع : انت شايفني نايم علي نفسي ومش شايف قدامي !!! اللي بقولك عليه هو الصح .
ينظر جمعة للمعلم رجب في توجس وحيرة !!!
رجب : فيه ايه يا ربيع ؟؟ الدقيق اتعجن واتخبز قدامك .
ربيع : لأ يا معلم رجب انا شايف اللي اتعجن واتخبز كويس ، كده الدقيق ناقص تلات اشولة !!!
رجب : انا بقولك مش ناقص ، انت بتسرقني انا كمان ولا ايه ؟؟؟
