رواية المجنون العاقل الفصل الثاني بقلم جمانه السعيدي
بكر...طلعنا من المعسكر نقلتنا السيارات كل واحد للمحافظه الي راح يخلص مهمته بيها
اني نزولني الساعه ٣ بليل بقضاء
اول مره بحياتي ادخل الهاي المحافظة واعرف اسم هذا القضاء
نزلت الدنيا ليل والشوارع فارغه
قبل ماكو مثل هسه الناس كاعده للصبح
هو بس التلفزيزن ويعزل الساعه ١٢ بليل
وكل البرامج سياسيه بحيث تلعب نفسك وتنام من وكت
ولأن حصار الناس كلها تشتغل اي شغل تشتغل
في سبيل توفر لكمة العيش
اكو ناس باعت اثاث بيتها وحتى ألمواعين نباعت
بس كون الناس تعيش
المهم نزلت وبديت امشي شفت مكان محل مقفول
واكو كلوب مشتعل باب المحل
كعدت قبل دوريات الحزبين تفتر بلشارع
واذا لزموني لازم اكل كتل يومين اتلاثه الحد ما تبين هويتي الحقيقيه
خفت ابقى افتر واطيح بمصيبه
اكيد محد يعرف اني طالع بمهمه سريه
واذا كل الحزبين بهاي المنطقه عرفو راح انكشف
وتخرب المهمه
تمددت ونمت باب المحل
غفيت هلكد ما تعبان مااحس اله واحد يكعدني
فتحت عيوني
....ليش نايم هنا كوم منا اريد افتح المحل
بقيت اباوع علي شويه يله استذكرت اني مجنون مو عاقل
كعدت على حيلي
سالم...مو جاي اكلك كوم انت ما تفتهم
اكو محل بصفه طلع من عنده واحد رجال جبير
ابو حسين....شبيك ويااا ما تشوفه مسكين مبين عقله مو تمام
سالم...اي هو هذا حظي اني عايز بس المخابيل بعد
بكر...بقيت كاعد شويه
راسا سالم دفرني برجله كال كوووم
ابو حسين...على كيفك ويااا
تقدم عليه ابو حسين وكال تعال تعال
بكر..كمت على حيلي وكمت احك بجلدي واسوي حركات مخابيل
ابو حسين...انت منيين اني ماشايفك هنا
بكر...بعيد بعيد اني اذيت( اجيت) بعيد هناك بيتنا
ابو حسين...انت شسمك
بكر...اني اسمي اسمي دمعه ( جمعه )
ابو حسين...دمعه شلون اسمك دمعه
سالم...خاف جمعه انت قصدك جمعه
بكر...اي دمعه اني دمعه
راسا اجاهذا الي مسؤل عني وعن تعريف الناس بيه
... صباح الخير
ابو حسين....هلو ابو اركان
ابو اركان...هذا خطيه
ابو حسين...تعرفه
ابو اركان....اي هذا مخبل اني اعرف اقاربه
مسكين هذا عسكري وعنده صديق مقرب كلش وكعت على قاذفه يكلك صار وذر يعني مالكو منه غير كم قطعة لحم
وهذا انجن بسببه
ابو حسين...وين اهله ليش عايفينه هذا حاله
ابو اركان....ملو منه كلما ياخذونه للبيت ويسبحو وينطونه ملابس يشرد منهم بعد هو مجنون
ابو حسين.. منو اهله شو اني اول مره اشوفه هنا
ابو اركان...من القريه الفلانيه
اكو قريه صايره فوك القضاء ابو اركان كال اسمها
جمانه السعيدي
ابو حسين.. اذا تعرف اهله انطيك كروه وترجعه الاهله
ابو اركان...اكلك اهله ملو منه مايقبل يكعد بلبيت
مالك شغل بي
بكر... راسا ابو اركان ضربني على ضهري وكال
روح منا يله الناس تريد تسترزق وانت وكافلهم هنا من الصبح
بكر... ردت فعل واحد مجنون اني هم ضربته
رجع ضربني بقوه على ضهري وضربني جلاق
ابو حسين...ليش ليش خطيه لا اضربه ما مسوي شي
تعال هنا اني راح اجيبلك ريوك
سحبني من ايدي ودخلني للمحل جابلي جاي وقشطه وخبزه
الصراحه اني جنت جوعان
كمت اكل بطريقه مخربطه بحيث شواربي ولحيتي صارن بيض من القشطه
ابو حسين...اكل على كيفك اذا تريد بعد اجيبلك
اركان...اكلتهن كلهن والجاي اشفطه شفط اطلع صوت
من اشرب
من خلصت وكفت على حيلي
بكر....شكرا عمو عمو شكر مسحت حلكي ومسحت ايدي بملابسي
طلعت من المحل اريد استكشف بعد اماكن
اريد اتعرف على الناس
ابو اركان بهذا اليوم ماعافني
لان هو هاي مهمته يعرف الناس عليه حتى محد يشك
بيه
اكثر من محل اوكف كدامهم وهو يجي يحجي نفس هاي القصه عني
ويحاول يضربني لو يغلط عليه كدامهم
حتى اكسب تعاطف الناس وياي
للضهر جعت رحت شفت واحد بكال وكفت كدامه
بكر...عمو دوعان اني دوعان شويه اريد شويه
البكال...جوعان اني ماشايفك هنا
بكر...اني دمعه اني بعيد بيتنا بعيد عمو يطكني
وكمت اضرب راسي
البكال... يطكك ليش تعال هو اني اليوم كلشي مابعت تعال هاك هاي خياره وطماطه
اخذتها منه وكعدت بلكاع كمت اكل
الكاع حاره بس صبرت نفسي
البكال...كوم الكاع حاره عليك تعال هاي كارتون اكعد عليها
بكر ...جابلي كارتون وخلا جواي
صاحبه يكله هو مخبل مايحس باي شي حتلو الكاع حاره مايحس بيها
البكال...خطيه الله اعلم شنو المصيبه الي صارت ويااا
وليش اتخبل هيج جمانه السعيدي
اشويه وبين ابو اركان
ابو اركان..... هم انت اليوم وين ماروح انت كدامي
بيش اصابحت اليوم ياربي
البكال...تعرفه
وبدا اركان يحجي قصتي للبكال
ابو اركان...كوم كوم منا منيين اجيتنا احنا عايزين مخابيل
هي الناس وحدها مخبل من هاي الوضعيه
بكر...شلت خيار من العربانه وضربته بي
راسا ركض وراي وضربني
كمت اتفل علي واسوي حركات فشار علي
اجاني يضربني راسا انهزمت
خلص هذا النهار على خير بس اني ما تعمقت بلولايه
حيل باجر اريد ادخل للسوك
واحاول اكعد باب القهوه حتى اسمع حديث الناس شنو
رحت النفس المكان الي نمت بي البارحه
بس نمت باب محل ابو حسين مو سالم
خليت كارتونه ونمت طبعا الدنيا حاره واني صاريومين ماسابح بيه ريحه تلعب النفس
كوه نمت مااحس الصبح ابو حسين كعدني
ابو حسين....جمعه جمعه شلون نمت هنا حاره عليك
اكعد اني راح اجيبلك ريوك
بكر...كعدت احس ضهري مطبوخ طبخ من الحر
فتح المحل وجابلي ريوك مثل امس اكلت ولعوست الدنيا
وجهي صار كله قشطه
ابو حسين...تروح وياي للبيت تتغدا واسبحك وترجع العصر
بكر...كلت بكلبي اي ولله لو اسبح واتغده بس مو اليوم
بعدها الناس ماتعرفني زين
اذا سبحت كلشي راح يخرب
بكر...لا مااا مااا
ابو حسين ...ما تسبح ليش مو تصير حلو وتأكل وتنام
على المبرده
بكر...لا ما ما اسبح مااااسبح
عفته ونهزمت رحت افتر بلسوك كل الي اوصل يمه
اطلب منه شي
ابو المخضر اطلب منه طماطه خياره
ابو الروبه اطلب روبه واكو ناس اطلب منهم فلوس
اطلب ربع الفلوس كبل طباعه وصارت مالها قيمه
بقيت اسبوع على هذا الحال لمن الناس كامت تعرفني
وكلها تصيحلي دمعه ويضحكون عليه
بليل انام باب محل ابو حسين
والصبح اروح اكعد باب الكهوه اسمع حديث الناس
اغلب الحديث كان على الغلا والجوع والحنطه الي كلها
رمل وما تنوكل
لو الجاي الي يتوزع بلحصه بي نشارة حديد
والطحين ما ينخبز
جمانه السعيدي
محد يحجي بلسياسه بلكهوه الناس تخاف
كمت مااكدر اتحمل جسمي فعلا كام يحكني من قلة السبح
بعد مااتحمل اكثر
واكلي كل النهار شغلات خفيفه مااكل اكل مشبع
قررت اليوم اروح وياا ابو حسين
اريد اسبح واكل بعد مااكدر اتحمل اكثر
بعد ما نجحت بااول مهمه
والناس تعرفت عليه كلها تعرفني
اكو ناس تطردني وتضربني واكو ناس اتساعدني
كلما اشوف شكلي و هذا الوصخ اكول لو بس امي هسه تشوفني بهذا وضعي حان اشسوت
ارجع اصبر نفسي واكول كلشي يهون اكيد راح يخلص هذا
الوضع وارجع البيت اهلي
نمت اباب ابو حسين الصبح اجا وريكني كعدت كبال محله
وكمت احك
بس هلمره احك من صدك لان الوصخ اكلني
وريحتي الجايفه واصله الراس الشارع
كعدت وكمت احك احك براسي وبجسمي
ابو حسين.. اليوم اخذك وياي تسبح واجيبلك دشداشه جديده وتنام على المبرده وتتغده لحد ما تشبع
بكر...كلت اي هذا الشي الي اني اريده
بقيت كاعد للضهر
قفل المحل ابو حسين وكال تجي وياي
بكر...دوعان اني دوعان
ابو حسين....مو تدلل يله تعال وياي
اخذني ابو حسين ويااا للبيت بيتهم حلو وجبير
دك الباب
طلعت وحده فتحت الباب بس شنو تخبل
تخبل حقيقي ماشايف هيج جمال
البياض العيون الشعر
بس شافتني رجعت ورا
ابو حسين...لا تخافين بابا هذا مسكين عقله مو تمام
شهد...يمه يخوف ليش جايبه وياك للبيت
ابو حسين...اريده يسبح وياكل مسكين ياباب
تعال جمعه ادخل تعال
شهد...خاف بي جرب هذا وصخ حيل ويحك
ابو حسين...لا بابا مابي شي
روحي جهزي الحمام اني اسبحه شطابخين غده
شهد...فاصوليا وتمن
بكر...اني واكف واحك بس عيوني عليها مو بنيه فص الماز
دخلني ابو حسين وطبك الباب
شكرا لزيارتكم عالم روايات سكيرهوم
