رواية المجنون العاقل الفصل الثالث بقلم جمانه السعيدي
بكر دخلت للبيت ابو حسين راح جابلي دشداشه من دشاديشه اني طويل وهو اكصر مني شويه
شهد...بابا الحمام جاهز خليت صابونه جديده واكو زاهي
وشامبو
ابو حسين ...اريد كونيه بتيته أليف جسمه بيها
شهد...بابا خاف بي جرب ويعديك
ابو حسين...كولي يالله لا تكطعين سبيل المعروف مسكين
هذا
بكر دخلني ابو حسين للحمام جابلي مكينه زين شعري
وزين شواربي ولحيتي وزين اباطي
بقيت بس بلشورت
اول غسل شعري مرتين والنوب ليف جسمي بكوني البتيته
شكد ارتاحيت ياربي ولله النظافه حلوه
ابو حسين....اني راح اطلع البس هذا الشورت والدشداشه واطلع
تعرف موووو غسل اول زين والبس واطلع
بكر...اشرت براسي اي
هو طلع واني نضفت جسمي زين من الشعر ورجعت غسلت
بلماي مره ثانيه لبست الشورت والدشداشه وطلعت
ودي مااطلع من الحمام
ابو حسين...هااا كملت اذا كملت اطلع
بكر.. فتحت الباب وطلعت
ابو حسين...اي هسه طلع شكلك عفيه عفيه جمعه
من طلعت اجت شهد على صوت كلامنا
لابسه دشداشه حمره ردن وطويله وضافره شعرها كصيبه نازله على ضدرها
تكول مهره بريه مو مره
شهد...اي ولله طلع شكله هو شسمه
ابو حسين...جمعه
شهد....جمعه طلعت حلو
بكر...كلت بكلبي انتي الحلوه وماكو احلى منج
شهد...راح اشمر الملابس الي نزعهن بلزباله
بكر...رحنا كعدنا بلهول اني وابو حسين شويه اجو ولده
حسين وعلي
حسين...هذا منو
ابو حسين...هذا واحد مجنون خطيه جبته سبحته وراح يتغدا ويانا
حسين...ولله يابه انت مااعرف شلون تفكر
شنو جايب واحد مخبل للبيت
ابو حسين..خطيه يابه مسكين الدنيا حاره وهو يفتر بلشوارع ترا اساس الدين الرحمه
رب العالمين يكول ارحمو من في الأرض يرحمكم من في السماء جمانه السعيدي
علي...شنو بسلا يبقى هنا
ابو حسين...لا مايبقى هنا هو من بيت اهله شارد تريده يبقى عدنا
بكر...جابو الاكل فاصوليا وتمن وخضره وخيار وركيه
من شفت الاكل جعت بلزايد
كعدو كلهم على الاكل واني خلولي اكل وحدي بصينيه
كعدت بصفهم
كعدنا ناكل ابو حسين شغل راديو عنده زغير
طلع محاضرة الشيخ الوائلي
جانت هاي المحاضره تنبث من قناة ايرانيه الساعه بلوحده الضهر كل يوم
هاي اول نقطه تنحسب ضدهم لان هاي المحاضرات ممنوعه بوقتها الي يسمع هيج اشياء كبل ياخذونه
حسين...البارحه الحزبيين ماخذين صباح
علي...ليش
حسين...حاجي نكته على صدام
ابو حسين...هلكنا صدام هلاك الله يلعنه ماكافا الشباب الي راحت بلحرب وياا ايران
وهسه اي واحد يفتح حلكه تنتهي حياته
علي...شلون بينا هم نخلص ونشوف وجها الله
البارحه عدي بلقاء يكول يروح صدام يجون ولده يرحون ولده يجون احفاده
الي يكول العراق ملكهم
ابو حسين...طبعا ملكهم ليش اكو واحد يكدر يفتح حلكه بكلمه
السجون خايسه بلشباب أسهل شي عدهم القتل
حسين...ذوله بلاء
ام حسين. خلي يولون اكلو
بكر...التفت عليه شهد
شهد...جمعه بعد تريد اكل
بكر...طبعا طعم الاكل خرافي شكد طيب
انطيتها الماعون وكتلها اي بعد
علي...هذا مفجوع
ابو حسين.. ليش عينك على اللكمه الي ياكلها عوفه بحاله
هذا هم من الشباب الي دمرو بسبب صدام
صديقه طايحه على قاذفه وكاتلته كدامه ومتخبل
ياربي هاي الشباب مالها حوبه الله يعلم هسه كلب امه
ممرود علي
جمانه السعيدي
بكر...اذكرت امي اكيد هسه متخبله شلون كل هذا الوقت
وما تعرف عني اي شي
ولله كلبي طك عليها
شهد ترست المواعين وانطتني اكلت الحد مابطني كامت توجعني من الاكل
ماغسلت كبل تمددت على ضهري ونمت
المبرده تشتغل والمكان بارد
واني ترست بطني تمن ومرك وركي وخيار
شهد...يااا نام بدون ما يغسل
ابو حسين...عوفي من يكعد يغسل
جمانه السعيدي
بكر....رحت بسابع نومه
ماحسيت غير ابو حسن يكعدني الساعه بلاربعه يريد يطلع وياخذني وياااا
كعدت على حيلي ابو حسين...روح غسل برا وتعال اشرب جاي حتى نطلع
كمت طلعت برا شهد لازمه الصوره وتغسل بلطرمه
شهد...هااا جوعان اجيبلك اكل
بكر...لا مو دوعان
غسلت ورجعت شربت جاي وطلعنا اني وابو حسين
هو يمشي كدامي واني ورا
الحد مادخلت بفرع ورحت عنه
اكو بيت مطلوب مني اجيب معلومات عنه
رحت كعدت كبال بيتهم لحد طلع ولحد دخل
لليل وماكو شي
رحت بليل المكاني الي متعود انام بي خليت كارتونه ونمت
الصبح اجا ابو حسين
ابو حسين...وين رحت البارحه ضعت مني
اجيبلك ريوك
اجا سالم يفتح محله
سالم.. هاااا اليوم دمعه نظيف ولا بس دشداشه نظيفه ومزين
ابو حسين.. اني اخذته البارحه البيتي ويااا
سبحته وحلقت شعره
سالم...ولله بطران هاي شكول ادخله بيتي
بلكت مريض بي جرب
ابو حسين...شبيكم ماكو بكلبكم رحمه خطيه
سالم...ولله اني لو يملكوني الدنيا ماادخل هذا بيتي
بكر تريكت ورجعت اراقب اهل هذا البيت
طلع ابوهم
كمت رحت علي
بكر.. عمو ابع عمو ابع
طلع من جيبه ربع وانطاني بقيت امشي ورا من بعيد
رجال حبير
راح الشغله عنده محل يبيع بي صوف وغزل
بقيت افتر يمه على المحلات
اني مكلف اشوف اذا عنده نشاطات ضد الدوله والحزب
شفت واحد اجا وكعدو يحجون بصوت ناصي
قربت عليهم مااسمع حجيهم
هذا الرجال معروف عنه يدعم الناس الي تطبخ للحسين
ويساعد المشايه
قبل بوقت النظام السابق اكو مشايه بس يمشون متخفين
بين البساتين والبيوت
بنفس الوقت هذا الشخص عنده علاقات ويا الحزبيين
حتى يضيع عليهم شغله
بس الدوله راصدته بس مالازمين علي شي
مااكدر اسمع كلامهم الرجال الي يحجي وياا طلع من يمه
واني رحت امشي ورا
راح على كذا محل ونفس الشي يكعدون يحجون شويه بصوت ناصي ويروح
لليل رجعت المكاني نمت بي
والصبح كعدت على صوت ابو حسين
تريكت وطلعت اخذتلي فره على كم محل ورحت للكهوه
كلشي ما حصلت الناس بلكهوه كل كلامهم على الوضع
الصعب والجوع
ويدورون وين اكو حنطه تنباع رخيصه
لان طحين الحصه ما ينوكل
بعدها بيومين بلضبط جاي امشي بشارع قريب على بيت ابو حسين شفت شهد طالعه تمشي بلشارع
لا بسه عبايته وحجابها
انتبهت اكو واحد يمشي وراها ويعاكسها
بس هي حيل منزعجه منه
الولد صاعد بايسكل ويمشي وراها ويسمعها كلام
وهي من كد ما تمشي سريع وخايفه منه
رجليه يطكن وحده بوحده
ركضت ورا اريد اوصل يمه ماكدرت الحك بي
بعيد عني شلت طابوكه وضربته من بعيد
اجت براسه كبل وكع من البايسكل من وكع شهد التفتت
راسا شافتني
ابتسمت لان ما متوقعه اني ادافع عنها
اني اشرلتلها روحي
الولد لزم راسه الدم يجري كام يريد يضربني بطابوكه
اني انهزمت همزين مااجت براسي
الولد كام يغلط عليه وتحلفلي
اني ركضت كل قوتي حاف يجي وراي
لليل جمعت الرباعه الي عندي واشتريت لفه اكلتها
ورحت نمت بمكاني
الصبح ابو حسين كعدني
ابو حسين...اكعد يابطل
سالم...ليش عود بطل شسوا
ابو حسين...البارحه شهد رايحه اجيب ملابسها من الخياطه
وواحد ناقص جاي وراها بلبايسكل
وجمعه ضاربه طابوكه
البارحه شهد بس تسولف بي
عود شمفهمه بهاي السالفه شلون عرف شهد خايفه ودافع عنها
سالم...خل يولي هلخبل
ابو حسين...لا تحجي علي هذا رجال والنعم منه
سالم...اذا هذا رجال اني شنو بله
بكر بيومها صمم ابو حسين اروح ويا للبيت حتى يكافئني
اخذني وياا للبيت
بس دخلت وشافتني شهد
شهد.. هله وميت هله بجمعه اني اشتريتلك حلويات
لان انت سبع
ابو حسين....حضري الحمام خل اسبحه
وجيبلي دشداشه من دشاديشي
ام حسين...خلصت دشاديشك علي
ابو حسين...ميخالف يستاهل جمعه
اني كبل جنت اساعده لوجه الله بس هسه عرفت هو رجال ويستاهل واحد.يساعده
بكر...سبحت سبحه معدله وشهد انطتني الحلويات
اتغديت عدهم ونمت
صار اسبوعين اني بهاي المنطقه
باجر مطلوب مني اسلم تقرير بس وين ويمتى مااعرف
لازم انتضر الأوامر منهم
شكرا لزيارتكم عالم روايات سكيرهوم
