 |
رواية الابواب الخمس الجزء الثاني الفصل الخامس والثلاثون بقلم ريام الهادي
آنـه الـحسرة الچبيـرة البـين الگـلوب
آنـه المـآيدري بيـش ولـيش متعـوب
يونس : واهلك وين وابوك
عبدالرحمن: اجيتك بطرك روحي وشاري اختك لدرجه اتخيرت بيني وبينهم واختاريتها
يونس : بس لحظة خلي افهم يعني انت جاي وحدك بدون رضاتهم
عبدالرحمن: مو مهم رضاتهم المهم اني رايدها واجيتك من الباب ومستعد لكلشي تأمر بيه
يونس : لحظه هسه اجيك كمت من مكان اريد اشرب مي واستوعب الصار طلعت من الهول صارت بوجهي شرهب سوينه جاي او عصير اي شى عندج ومن تكملين اياج يطلع صوتج دكي مسكول واني اجي اخذه وياج مي
شرهب : عليمن رايح هو ببسي بكلاصين وكلاص مي وفضت ثواني دخلت ركض للمطبخ حضرت الصينيه وهو شرب مي وحطيت كلاص مي ثاني وانطيته ليونس
يونس : شايف خيالج مااريد المحه ادخلي للغرفه
شرهب : شرايد عبد
يونس : احجي هندي
شرهب : مااشي بس لتعيط راح اروح اكمل اكل مرتضى
يونس : روحي
شرهب : هو طب للهول واني بأطراف اصابعي امشي اذا مااعرف المن جاي غير اطك واموت
يونس : تفضل
عبدالرحمن: مشكور بس المي
يونس : اشرب بارد وخلي افهم منك
عبدالرحمن: الشغله ميرادلها روحه للقاضي اني اجيت اخطب شرهب
يونس : واهلك مقابلين شون بعد تخطب
عبدالرحمن: اني الراح اتزوج مو همه
يونس :صلي على النبي
عبدالرحمن: عليه الصلاة والسلام
يونس : مااحجي وياك بلمثاليات واحط رجل على رجل وهاي السوالف التعبانه اني رجال ادور ستر لاختي وراحه ورجال يصونها وهذا اهم شى وانت ماعليك زود وكفاتك حلوة واخو خيتك وسبع بس لو انت بمكاني تزوج لاختج بهيج طريقه هسه لو ماعندك اهل يتيم مثل حالتي قسماً بالله بيدي اجهزها وازوجها الك طبعاً بعد موافقتها بس انت اهلك وعزوتك تسد الشمس شون تقبل ازوجها واهلك رافضيها شون اقلل من كرامتها واخلي بنص ناس حتى مكلفو نفسهم يدكون بابها ويخطبوها لابنهم الاصول مايختلف عليها اثنين وجيتك تخطبها اني اقدرك عليها بس اعذرني اذا مايجون اهلك وبلذات ابوك يخطبها ماعندي مره للزواج
عبدالرحمن: يونس اني من جيتك اعرف راح تفهمني اعمارنا متقاربه وتعرف من تريد انسانه تعيش وياها والكل رافض شكد صعبه وشكد مستعد تسوي المستحيل حتى تكمل حياتك وياها ورب الكعبه جايه من عركه شكبرها كله حتى تصير اليه الصار وياك لطلعه بيه
يونس : مو اني الاسوي هيج واني مارفضت اني كتلك يجون اهلك وهذا اقل شى تكدر تسوي الها اختي مناقصها شى حتى تنحرم من ابسط حق وهو يكعدون زلم الهم مكانتهم يكطعون حقها
زين ليش اهلك رافضين اريد افهم علمود شغلتي القديمه وياهم
عبدالرحمن: لا الشغله غير ومااكدر احجي ياريت متسألني
يونس : مراح اسألك وبنفس الوكت ماعندي غير حجي يجون اهلك وابوك بلذات وبذاك الوكت يصير غير حجي وارجع واكول الك اني مرافض بس مقابل على الطريقه
عبدالرحمن: اهلي ميجون والامر منتهي عدهم
يونس : ومنتهي عندي اعتذر خويه ماعندي مره وكلشي قسمه ونصيب
عبدالرحمن: فگر وردلي خبر لتسدها بوجهي وشوف صاحبه الشأن يجوز توافق جايك لتردني واحسبها فضل بعمري ماانساه
يونس : ماردت شى منك غير اهلك والي يريد شى يسوي ياخويه
عبدالرحمن: ارجعلك فد يومين
يونس : هله بيك
شرهب : مشيت سريع وگلبي يدك بحلكي لك هذا المخبل اجه يخطب دخلت للغرفه يم مرتضى تزحلكت وفركت رجلي وعلى ظهري وكعت
مرتضى : وثول وعمه شبيج تركضين غير تنتبهين
شرهب : اااااخ يمه والله من وراك
مرتضى : اني شعليه حتى ايدي مربطه اني قابل دفعتج وين وليتي صحتج وانتي ماكو
شرهب : خلي اكووم اوكف اااخ ياعصعوص ظهري
مرتضى : حتى تشوفين شكد متأذي
شرهب : انت رحت تحارب اني شكوو
دخل يونس
يونس : هااا شبيج
مرتضى : مبين جانت تتصنط عليك وعلى خطارك واجت تركض وكعت الثوله
شرهب : جذاب ولك بعد الله شيسوي بيك ملفلف من كل مكان جنك مومياء مصر
متغزر بيك الشوربه اله اموتك جوع
مرتضى : اموت جوع ولا اكل بعد شوربتج خاست بطني منها
يونس : تعااي اكعدي اريد احجي وياج وهذا ابن عمج مو غريب ومثل اخوج
شرهب : بلعت ريگي وشلت شعري وكعدت يمهم
يونس : سمعتي كلام عبد ولتكولين مسمعت وكعتج مبين سامعه كلشي
شرهب : اي سمعت
يونس : شنو رأيج
مرتضى : غير افهم منو عبد وعلى شنو جاي
يونس : عبدالرحمن ابن خال مهدي تعرفه اجه يخطب شرهب
مرتضى : طكو العربان بس اشاف منج وخطبج
يونس : شنو رأيج
شرهب : مموافقه
يونس : ليش
شرهب : مااريد اتزوج
مرتضى : متأكده شو مكدرت ابلعها الحجايه حتى لو سفن وراها هم متنبلع
شرهب : اهووو حجه
يونس : راح اسألج سؤال وتجاوبين بصراحه
شرهب : تعرف بيه مااجذب
مرتضى : كلش ياعيني راح اطك الدمعه من عيني على الصدق والايمان
شرهب : اذا ماسكتت اكسرلك ايدك الثانيه وعود خلصها تون يم راسي
يونس : شون بيكم مااحجي تخلصوها هيج
شرهب : هوو اني شعليه
مرتضى : احجي شنو سؤالك
يونس : عندج شى ويااه
شرهب : شون يعني
يونس : واحد يجي يكول تعاركت ويه اهلي وتخيرت بينهم واختاريتها معناها اكو شى علاقه او تواصل لان مستحيل واحد يستقتل على وحده هيج اذا ماكو شى بينهم
شرهب : والله ماعندي شى ويااه وروح ماما ذكرى ماعندي شى ولا علاقه ولا تواصل
مرتضى : هاي الخبله تحجي الصحيح لان اعرفها من تكذب
شرهب : اني مااسوي هيج مااكسر عيونك وخاصه وياهم تره اني مناسيه سوايتهم بيك
واذا الولد خطب لان منطيته عين
مرتضى : معناها متحارش بيج
شرهب : لا مو حرشه بس يجوز حاول ومنتبهت شمدريني اهم شى ماعندي لا علاقه ولا تواصل بيش بعد احلفلك وانت اسكت لتهيجه عليه وضربته على ايده ماادري وعاااط
مرتضى : ااااااخ اشتعلتي
يونس : اذا اجاني اكول اله البنيه مموافقه
اني مرفضته بس طلبت اهله
شرهب : عود ليش يمه اهله ميجون على رجلهم نقش الحنه
مرتضى : انتي مو متردين تتزوجين المن جايين
شرهب : هااااا اقصد ليش رافضيني اني ارفض عادي من حقي بس همه ليش ميردوني لابنهم
يونس : الله اعلم
شرهب : يجوز مثل هاي ام نور الجانت صديقتي المره اجت ذاك اللسان الناعم الحلوو تكول كناري بس كتلها مطلگه انكلبت حيه لسانها ينكط سم يجوز امه ماقبلت لان مطلكه وهو اعزب بعد عيني على اساس من حوره
مرتضى :اذا اجوي اهله تقبلين
شرهب : صفنت واني افكر مجرد عرفت بيه خطبني فرحني ليش انكر بس حاولت ابين العكس والكسر فرحتي جيته وحده
مرتضى : الصفنه مو الج لابو القاط الرصاصي
شرهب : اكوم اغسل مواعين ولا هاي الدوخه
يونس : راح اسد الموضوع
شرهب : اي سده مااتزوج
طلعت منهم واني اجر النفس جان يدك تلفوني نااي
جاوبتها هسه ردت اخابرج
ناي : عبدالرحمن يمكم
شرهب : شمدريج
ناي : يعني اجه
شرهب : وخطبني ويونس كال اله اهلك يله اوافق
ناي : وانتي
شرهب : مموافقه بس شبيج جنج وحده راكضه
ناي : جنت كاعده ارتب بلبيت ودك تلفون مهدي مدري منو خابره وطلع يركض افتهمت عركه بيت خاله ويه منو مااعرف
شرهب : عبد واهله علمودي يمه من فدوة للحمش
ناي : شوو جنج مكيفه
شرهب : وليش مااكيف واحد ويتعارك علمودي وين لاكيتها
ناي : وراح توافقين
شرهب : نعيد الحجي مرتين مو كتلج لا
ناي : هااي السالفه مو مال تلفون اجيكم باجر ونتفاهم
شرهب : هله بيج
ناي : مهدي صار اعصاب لان الشغله كبرت
جنت كاعده من اجاه التلفون وطلع وره ساعه ونص رجع وضعه مخربط بس كال خابري اخوج شوفيلي عبد راح يمه دكيت على يونس مجاوب انداريت عليه
شصاير وعبد شجابه يم يونس
مهدي : اوووف ميجوز من مصايبه
ناي : وكعت گلبي شكوو
مهدي : خابرتني ام صلاح كالت تعال يمه علكت بين خالك وعبد رحت هناك
ناي : اييي ويونس شعليه
مهدي : عبد داك رجل اله يخطب شرهب
ناي : اختي
مهدي : ايي وكله من ورايه
ناي : انت شعليك
مهدي : البارحه من جنتي بيت اخوج اجه وكتله رايح اجيب ناي وبقينا نسولف كتله ابن عمهم مريض وسوو عمليه اله واعتقد راح يعيش يمهم هو يعرف مرتضى بعدني احجي وهذا تخبل شون يعوف بنيه شابه وياه كتله بت عمه ومتربين سوه واخوها موجود وحتى لو ما موجود عادي متعلمين على مرتضى حاله حال يونس وبقيت احاول اهدي ومافاد
متوقعت هذا التصرف منه اليوم
واني حذرته بدل المره الف جوز من شرهب ولتوصل يمها
ناي : هو شاريد من اختي
مهدي : اني اعرف عبد مال يحبها لا يجوز عجبته لان صدته نوع جديد من النسوان حب يجربه
ناي : احد كله بنات الناس لعبه بله هذا من كل عقله
مهدي : خابري شرهب شوفي صدك نفذ تهديده وراح خطبها لان متعارك ويه خالي من وراها
المكان بغداد / البيت القديم
عبدالرحمن: يابه رايدك بموضوع
عمران : خير ويامن متعارك
عبدالرحمن: يعني اني مااجيك اله بلعركات
عمران : فضني عبد شرايد
عبدالرحمن: اريد اخطب
عمران : ايي ياالله واخيراً تعاي ام عبد امنيتج راح تتحقق
ام عبدالرحمن: خير
عمران : ابنج يريد يخطب
ام عبدالرحمن: يوم عيد واشوفك عريس مااصدك لك يمه اروحلك فدوة خوما كعد تتشاقه
عبدالرحمن: لا والله مو شقه اريد اخطب وياريت باجر نروح
عمران : لو نتوسل بيك حتى تتزوج لو يوم وليله تاخذنا غير نسأل عن البنيه اهلها سمعتهم هيج ركض بركض
عبدالرحمن: ميحتاج تعرفوها
ام عبدالرحمن: من كرابتنا هيج بيه بخت وتطلع من بنات خالتك هسه اروح اكبع الي اتريدها واجيبها
عبدالرحمن: لا بنات خالتي ولا من كرابتنا اني اريد اخطب شرهب اخت ناي ويونس
ام عبدالرحمن: صخم الله وجهك مالكيت غير هاي المطلكه
عبدالرحمن: واذا مطلكه قابل موزينه لوما على ايدكم تعرفون كل ظروفها وشون تزوجت شلج بهذا الحجي يوم
ام عبدالرحمن: ابني انت ولد مامتزوج ليش اول بختك يصير وحده مطلكه شناقصتك حتى تاخذ هيج قسمه
عبدالرحمن: البنيه عجبتني وعندي تسوه الف وحده مامتزوجه وتعرفين بيه ما أمن بمره وهاي الوحيده الي احس روحي أمن تشيل اسمي وتصير ام جهالي
ام عبدالرحمن: يعني ياربي احفه العمر كله واتوسل بيك حتى تتزوج وين ماتكول يازواج تاخذلي هذا النسب الطايح حظه ومطلقه ليش تموتني ناقصه عمر شسويتلك حتى تضيع فرحه عمري لك انت الجبير ردت اوكف هيج واتباهه بمرت ابني وتالي تاخذلي هاي الاخذه
عبدالرحمن: شو ساكت يابه
عمران : حجه امك كله ميهمني مطلكه بنيه ميهمني انت يلصرت رجال وتريد تفتح بيت وتكول الوحيده الي أمن بيها شون تأمن بيها وهي امها جليله اذا ناسي اذكرك
عبدالرحمن: امها ذكرى والي تكول عليها مالها دخل بيها
عمران : لك تقشمر روحك لو تقشمرني تعرف كلش زين امها جليله والعرك دساس اني يوم مااجن على بيتي ورحت سألت على امها شعر راسي وكف وحده كحبه رسمي تنزل من سياره وتصعد سياره ولك لطلعني من طوري وتخليني احمل ذنبها سمعتها بلحظيظ ليش ازوج ابني وحده امها سمعتها على كل لسان وخلفتك بيبيتهم جليله
عبدالرحمن: كتلك مالها دخل بجليله هي امها ذكرى وحقك في حال لو تربت يمها او عايشه وياها او حتى تتواصل وياها من هيه وبلكماط شمرتها امها وعمة مهدي الله يرحمها تكفلت بيها والبنيه العيبه مطلعت منها بلعكس اخت رجال وشاطره وصار مده طويله اراقبها بلشارع مثل الشرطي تمشي والي يندك بيها اطيح حظه بنيه تربت بيئه تعبانه بس تربت احسن تربيه
عمران : لتوجع راسي خطبه ماكو لو اخر وحده بلدنيا مااخطبها الك وسد الموضوع
عبدالرحمن: مااسده واريدها يابه خلي الله بين عيونك تعرف بشرهب ذهب صافي ومستحيل تطلع مثل امها
عمران : بس تبقى امها جليله ومااريد تالي وكت من يسألوني المن ناسبت وزوجة ابنك الجبير من ياعشيره اكلهم والله ابوها صمد العتاك وامها جليله بت السماجه
عبدالرحمن: تعرف بيه من زمان اكره هاي الشگليات ومتهمني
عمران : لك ابني تبقى هيج شالع گلبي مايوم سمعت الكلام راسك كوي وكله عناد هذا مو اخوك مو ابن عمك وابن عمتك ولا واحد منهم مثلك دومك مخالف جبتها وانت جاي عناد ومشاكل وكل سالفه ولا الثانيه لعبت روحي اركض وراك بله گبل اكول جاهل صغير يگبر ويعقل تالي كبرت وتخبلت بلزايد وهلمره جاي بسالفه اكبر من راسك تريد تتزوج وحده لا مستوى لا عشيره لا اصل وتريد ادخلها لبيتي هلمره اوكف بوجهك واطيح حظك لان طلعتها من ماعونها زواج من هاي البنيه ماكو لك خلصت النسوان تارسات البيوت تجي على هاي هسه مو البنيه احبها ليش تكرهني بيها كوه
ام عبدالرحمن: يمه فدوة اسمع كلام ابوك شوفه شون يتراجف على ساعه يوكف گلبه ليش هيج تأذينا كول اي وحده غير هاي اني دكت بگلبي لان مطلكه وهلمره نسيت سالفه امها يعني زاد الطين بله ليش تتصادم ويه ابوك من وراها خلصن البنات معارفنا شكد كرابتنا جيرانه كل بنيه تسوه راس شرهب
عبدالرحمن: تتذكر يابه من اجيت ودكيت صدرك جبتلك بت الحسب والنسب والمال والجااه شوف شون بنيه صديقك المحامي وامها دكتوره واخوها معيد بلجامعه سويتها تنكط شرف ومن عرفتها طلعت صاحبتي القديمه ولاعب شاطي باطي وياها شوو بوكتها سكتت من كتلك مااريدها
عمران : قابل بنات الناس كلهن موزينات طلعت صدفه
عبدالرحمن: ماكلت كلهن بس مو معناها الي اهلها واصلين وعدها جاهه وسمعتهم طيبه هي بنيه شريفه والي اهلها على كد الحاال هي موزينه البيوت اسرار والبنات هم اسرار هذا القياس ظلم وانياله بهذا الوكت التعبان يوكع بوحده شريفه وتخاف الله بغض النظر شعدهم وهمه شنو واني وكعت بشرهب ومااخطب غيرها لو تجيبلي بت مدري منو عندي شرهب تسواهن حتى وان جانت امها جليله انت تاكل بگلبك لان مستواهم ضعيف هاي سالفه امها احجيها لغيري
عمران : لك تبقى مطي اكله امها موزينه ساقطه شجاب المستوى هسه اني مو خطبت ناي لمهدي شو ماحجيت هيج حتى جبرته عليها وقبل مهدي جبرتك انت عليها مو نفس المستوى ولو قابل بوكتها جان هسه ناي مرتك ليش ناي قبلت وشرهب لا لان ناي بت ذكرى اخت فوزي واعرف اصلهم واعرف امها شكد جانت انسانه نظيفه ومتربايه ومتدينه يعني اكيد بتها تطلع عليها اما هاي يجي يوم وتحن لامها واذا ماحنت اكيد بيها صفات منها جيبلي واحد يرضى يدخل جنه لبيته وهيج عرگها
عبدالرحمن: خصم السالفه لانعيد ونفتر بنفس الحلقه هاي البنيه غيرها مااخطب
عمران : لو اشوفك تموت كدامي مااخطبها الك ولا ادخلها لبيتي
عبدالرحمن: اروح اخطبها وحدي
عمران : قسماً بالله وجلالته ياعبد اذا رحت تخطبها لا انت ابني ولا اعرفك ولتخليني اخيرك بينا وبينها
ام عبدالرحمن: استهدى بلرحمن عمران وعلى كيفك
عمران : متسمعين شون واكف بعيني بكل صلافه ويتحداني
عبدالرحمن: ماردت شى جبير منك ولو انت من زمان هذا طبعك ويايه مااختاريت شى اذا ماطلعت بيه الف عيب ويخلص النقاش بعركه وتهديد لوبيدك تشرب من دمي ويه غيري تصير انعم من خيط البريسم
مهدي : خير شصاير
عمران : تعال زين اجيت اسمع ابن خالك الشفيه شجايب النا من بلوه
عبدالرحمن: اذا حجيت حجايه تغثني يامهدي لساني ميطخ لسانك وتعرفني حقير بهاي السوالف
مهدي : غير افهم شكوو صوتكم واصل للشارع
عمران : ابن خالك الجبير الفهيم الي المفروض من اموت يصير بمكاني يراعي اهله ويشيل تعبي ويكبره جايبلي وحده امها موزينه ويريد يتزوجها
مهدي : منو هاي
عبدالرحمن: شرهب اخت ناي لتسكت احجي عيط مثل خالك هو انت عليمن طالع
مهدي : اني مو كتلك ابتعد عنها متفيدك
عبدالرحمن: ليش متفيد هاااا انطيني سبب واقنعني اني حمار ماافهم اقنعني شفت شى عليها موزين
مهدي : امانه الله البنيه اخلاقها كلش زينه ومايوم احد جاب طاريها بلموزين وشاطره وام بيت وعزيزه نفس وتضحك ويه الهوا
عبدالرحمن: هاااك استلم ابن اختك شهد الها مو اني
عمران :ليش اني مااعرفها كلشي اعرف بس تبقى امها جليله ومو اني احفادي تصير بيبيتهم هيج وحده
عبدالرحمن: يبووووو على جليله اكله البنيه مالها دخل شجلبت
مهدي : عوفها عبد ولتسوي مشاكل تعرف ابوك ميريدها سد السالفه كلها واني متأكد انت تريدها تحدي مو محبه بيها لان صدتك تعلمني بيك غير دربك كله نسوان وماتبقى على وحده
عبدالرحمن: تخطبولي لو لا
عمران : لو نخله تطلع براسك ياعبد مااوصل ولا اروح واذا رحت لتشوفني وجهك وعود شوف منو يوكف بعرسك وهنا للبيت ماكو رجعه وانت مهدي اذا سمعت بيك ملفي يمك بلبيت تخرب ويااك
مهدي : ياخالي على كيفك المن هذا العياط ومنو يكول يونس يقبل
عمران : لا يقبل حتى يردلي السويته قبل بيه
مهدي : لا خالي ميقبل وهسه تشوف لك عبد وين رايح
عبدالرحمن: لجهنم الحمره مو اتبريتو مني اني احير بروحي
ناي : اباوع على مهدي الحاير ميعرف شيسوي يخابر على عبد ميجاوبه اني خابرت شرهب وافتهمت منها وبلغت مهدي وهو اخذ السويج والموبايل وطلع يدور على عبد
كمت اكمل شغلي وفكري كله بلصار
لليل طب عبد ومهدي واثنينهم وجوهم ماتتفسر
اصب العشا تاكلون هسه
مهدي : اي صبي
عبدالرحمن: مجوعان مااريد
مهدي : صبي مالج دخل بيه
ناي : رحت حضرت كلشي ورتبته على الميز وصحتهم اجوي كعدو عبد طفه الجكاره وجر المي يشرب تكول جان بلصحراء اني كاعده وياهم وبحضني سيف اوكل بيه واترقب شراح يصير
مهدي : خابرتي اختج بعد
ناي : لا كلت باجر اروح الها
عبدالرحمن: ام سيف خليها توافق
ناي : كلشي قسمه ياعيني وماكو شى جبر
عبدالرحمن: مو شغله جبر قابل ترفضني واكيد عرفت شسويت علمودها
ناي : وليش مترفضك تره شرهب متهمها هاي السوالف
عبدالرحمن: لعد شنو الي يهمها لاختج احرك روحي باب بيتها يله ترتاح
مهدي : هاااي شبيك لتعيط تخبلت
ناي : عاف الاكل وكاام وصاير نار اني اخذت سيف وطبيت للغرفه انومه حاولت اخلي ينام يكمز يريد يلعب عفته بلغرفه وطلعت اسوي جاي الهم حتى اكل مثل الاوادم محد اكل شلته وخليته بلثلاجه سويت الجاي وحطيته كدامهم
عبدالرحمن: اعذريني ام سيف عله صوتي عليج انتي اختي الصغيره لتاخذين على خاطرج مني
ناي : ماكو اخت تزعل من اخوها لتهتم حقك اعصابك تعبانه الله يريح گلبك
عبدالرحمن: خلي اختج تقبل بذاك الوكت مو حتى كلبي يرتاح حتى ركص بلشارع اركص
ناي : من رخصت مهدي اكو شغله ضاله بالي شمعنه شرهب هاي البنات اشكال ومن اهلكم عدكم خير من الله ليش هيه
عبدالرحمن: خشت دماغي هاي البنيه اريدها گلبي ابن گلب وتعلك بيها حتى بهاي تحاسبوني
مهدي : مو هسه كلت مااتعصب شبيك اليوم
عبدالرحمن: اختنكت راح اطلع
مهدي : وين رايح
عبدالرحمن: عوفني مهدي حتى انت مااريد اشوف وجهك وراح ابات بيت صاحبي مروان مااريدلك مشاكل ويه ابويه
مهدي : ميعرف انت عندي وشون اعوفك تبات عند غريب وبيتي موجود زين بات جوه يم امي
عبدالرحمن: اضل بلشوارع ابات بلنهضه جوه الجسر وماابات يم امك خلي تعرف بخطوبتي وشوف شراح تبدع هاي ابويه في اثنين خلي اولي لاابدي اسب العشيره من جبيرها لصغيرها
ناي : طلع عبد وضعه مخربط ومهدي حاير اكثر مني وبنفس الوقت ميريد يفتح ويايه الموضوع لان يمس اختي
شرهب : كاعده العب بخصله شعري الكامزه للمريخ وافكر بعبد شون انسحل واجه يخطب دك الباب يونس تعاال
عدلت كعدتي هاا حبيبي محتاجين شى
يونس : اجيت اكولج هذا الشهر شويه راح اقصر بمصرف البيت لان ماانطيت ايجار البيت ولا المحل تعرفين لميت الفلوس كلها لعمليه مرتضى ولازم الشهر الجاي انطي مال شهرين وحتى المهن شويه راح اقتصد بلمسواك وبلغراض واريدج ويايه بس الضروريات نسوكهن
شرهب : بلكي راس الشهر ينطني النسوان الاقساط واساعدك
يونس : كافي اخذت مليون منج صار شكد اتجمعي
شرهب : يمعود فدوة المهم كام بلسلامه
يونس : اريدج بلبيت لا تلبسين شى كصيف ميحتاج اعلمج صحيح هو مثل اخوج بس يحل عليج لبسي عريض ومن ادنكين انتبهي
اتقيدي مو مثل ماجنتي وحدج
شرهب : اي اعرف والله مكعد تشوف لبسي
يونس : اعرفج معدله يله نامي محتاجه شى
شرهب : سلامتك اني باجر اروح للمعهد ساعتين وارجع
يونس : اقري زين لتضيعين هذا التعب كله
شرهب : لتخاف اجيبلك الخمسين بأذن الله
يونس : كفختها على راسها عبالي تكولين تسعين
شرهب : احب طموحك يحسسني الدنيا بعدها بخير الخمسين وبقرار هاااا
يونس : هههههه حتى اكص شعرج
شرهب : يمه گص رگبتي ولا شعري الجميل
يونس : نامي ام جميل
شرهب : طلع ورجعت تمددت خلي ارجع افكر بعبودي واتخيل شكله من يجي الرفض
عود ردت افكر مثل العشاق عشتتوو دقايق وكمت اشوخر
مرتضى اكعد
مرتضى : شكوو يمعوده
شرهب : رايحه للمعهد رايد شى
مرتضى : روحي وعوفيني انام
شرهب : سويتلك اكل
مرتضى : ابوس ايدج لا شوربه
شرهب : هااي شبيك تريد تبجي مو شوربه سويت الك سوب لحم وبيه لحمه تخبل هيج متفحه من طلي شارب دكسن وسمنان متعوب عليه
مرتضى : اييي واخيراً انفكت الجبسه صبي وجيبي اني اكل
شرهب : خلي اوكلك واروح بعد عندي وكت
مرتضى : اخاف تتأخرين
شرهب : لا مااتأخر بيني وبينك حتى من ارسب اكلهم جنت اوكل مرتضى وهو اخرني عن طلب العلم ورسبت
مرتضى : ماتسوي خير ابد لازم وراها انه
شرهب : صبيت الاكل ذبيت كتبي وكعدت گباله اوكله على كيفي
مرتضى : انتي ليش رفضتي عبد
شرهب : شنو ليش مااريد اتزوج
مرتضى : جذابه عيونج جانت ناطه من الفرح لان خطبج
شرهب : تره انت ابن عمي مو صديقتي حتى اسولف الك بله شون بلوه هااي
مرتضى : لتسولفين بس نصيحه مني اخذتيها تفيدج مااخذتيها يطبج مرض
الي مثل عبد يموت على البنيه الصعبه اني شاب واعرف هاي السوالف ايااج توافقين اله تحسين صدك شاريج ورايدج حب مو عناد وتحدي لروحه
شرهب : وهااي شنو اعرفها اروح لام الخيره واكول الها شوفيلي ابو الطيور يريدني لو حاسبني طيره عند الجيران وحط عينه عليها
مرتضى : تبين من تصرفاته واياج تقللين من نفسج ويرف گلبج وتغلطين بحجه هو خطبني عادي اسوي وياه علاقه هواي صايره شباب يخطبون ويعرفون الاهل مينطون وبحجه اني اجيتج ودكيت بابج ويبدي يتقرب منها ويسوي علاقه وخلي واحد يعرف الثاني منا لحد مااهلج ينطوج او اهلي يقبلون والبنيه فطيره تصدك بيه وتسلم كلشي اله ومتشوفين غير بس التراب وراه تبدي الاعذار اهلي ميقبلون منرهم سوه وهاي الكلاوات انسحاب تكتيكي حصل الراده ليش يدوخ روحه بعد
شرهب : دحست قطعه من اللحم بحلكه لتخاف مو شوشه ينلعب بيها اني عدي ركصته وخليته يندم على اليوم الي تزوجني بيه اجي اوكع هيج وكعه مال مراهقات انت بس طيب واكل وحدك حتى عبد اطرده من الباب
مرتضى : بعد ورايه علاج طبيعي وكورسات علاج
شرهب : اطيب وترجع تضرب بيها بوكسات صدك تلفونك ليش غالقه
مرتضى : مااريد احجي ويه احد
شرهب : كول امي وابويه
مرتضى : اذا تعرفين المن تسألين
شرهب : شووو هااك قربت الكاسه وخليت السوب يشربه مثل المي
مرتضى : اختنكت خرب غيرتج مو اكل مذله
شرهب : تأخرت يله باي
طلعت اركض للمعهد خلصت المحاظرات لمحت عبد من بعيد سويت نفسي ولا شفته هلمره وكف ويباوع عليه ويدخن مو مثل كل مره عيوني تحول واني ادور عليه
رجعت للبيت لكيت ناي وسيف يمنا
هله بلجاينه
ناي : هله بيج شونج بوستها وكعدنا احجيلي شصار
شرهب : كلشي مصار
ناي : تعرفين من وراج احترك ذاك البيت مشاكل
شرهب : واني شكوو قابل اني كتلهم تعاركو اني بس اريد افهم ليش خالو عمران مرادني اخاف لان مطلكه
ناي : يجوز متجرأت اسأل مهدي
شرهب : مجان سألتي يحظي المن باقيه بحضنه حتى هاي مدبرتيها
ناي : تدرين قبل مااجي صعدتلي عمتي لج لعبت بحالي لعب
شرهب : شكالت العجوز الشمطاء
ناي : واكفه وتعد
وداد : صايرات حزب وتردن تحطن زلمنا بيدجن اني اريد اخلص منج تجي اختج تاخذ ابن اخويه حلم ابليس بلجنه لو تموت متصير جنه عمران هاي ام الوصخ تصير جنتنا لو تموووت خلي تنجب وتكعد ولترفع راسها ليفوك ليطك
ناي : عيني عمه على كيفج انتي مره مريضة ليصير بيج شى واذا وصلولج الخبر جان المفروض يوصلوه بلصحيح ابنكم دك باب اختي مو العكس ويونس رفضه وحتى شرهب
وداد : هي هاي البقت ترفضون ابن اخويه انتم اشايفين نفسكم تره انتم حشره محد حاسب الكم احساب بلقندره تنداسون مالكم قيمه احنا الي كبرنا راسكم واخويه الي خلاكم قدر وكبر من شأنكم وهاي غلطته وهسه اكلها
ناي : مااجاوبج تدرين ليش لان متربايه ومااريد اضيع ترباتي واجاوبج جواب جبير وانزل نفسي من رخصتج تندلين درب الباب وعفيه سدي وراج ليطب تراب
وداد : اذا وافقت اختج على عبد ثاني يوم اخلي مهدي يطلكج
ناي : هههههههه خلي يطلك يله انتي موتحجين بثقه روحي لابنج وكول اله طلك ناي والله ياعمه صاير دمج خفيف انزلي رحمه لوالديج وديربالج لتوكعين وتنكسر رگبتج
عفتها وطبيت لغرفتي يابويه شون قابليه مال حجي وعياط
شرهب : عمتج يراد الها رجال تزوجوها تكعد وتسكت تحير بيه وتخلصين منها غير هذا الحل ماكو
ناي : ازوجها عمج عبيد حتى تتكافش ويه صالحه عوفج منها الي محيرني ليش رفضتي وشون كدرتي تسحبين عبد حتى يخطبج وعاند اهله علمودج
شرهب : قابل قليله كدامج اني شرهب والاجر على الله
ناي : صدك مكعد اتشاقه وهو صار مده يركض وراج جنت خايفه لتضعفين وتسوين علاقه وخاصه انتي ممجربه ومحابه يعني سهل عواطفج تروح اله وطول الوكت وحدج ومحد يحاسبج وعند موبايل كلشي تكدرين تسوين
شرهب : ادري بيه جفاف بس مو لدرجه انطي مجال اني ماسويت غير صديته ومنطيته عين
ناي : جنتي متقصده
شرهب : مااكولج ممتقصده بس اكو شغلات جنت متحفظه عليهن واكفات بعيني
ناي : مثل شنو
شرهب : جان يوكف بعيني يونس وتعبه ماردت بيوم يندم لان لفاني بيته وكعد يشتغل وتعب حتى ادرس ويصير براسي خير
شكله وهمه كاعدين كدامه وخال عمران يهين بيه لهاي اللحظه مراحت من عيني ماردت يكولون شوف اخته عايفها بلبيت وتلعب بكيفها ونزلت راسه بلطين وتسوي علاقات ردت مثل مجان كاعد كبال مهدي ويدافع الج ويتفاخر بشهادتج واخلاقج ردت يتفاخر بيه اني هم
ناي : يوم بعد يوم تثبتين اليه انتي احسن اخت بلدنيا
شرهب : لعد شعبالج اعجبج اني
ناي : وبعد
شرهب : عبد نسوانجي واحد يوميه ويه وحده شنو فرقي عنهن اذا انطيته مجال محبيت العب بلنار واوكع بحبه وتالي ابقى ابجي على الاطلال اني طلعت من تجربه فاشله فشل مو طبيعي اريد يوم مااتزوج مااندم ولا اخلصها ابجي عندي ابقى العمر كله بليه زواج ولا اخذ واحد يأذيني المؤمن لا يلدغ من جحر مرتين واني مو بس انلدغت انعضيت عضه كفيلج الله لهسه تحفر بروحي خليني اكمل دراسه وادخل كليه اريد اشوف دنيا مااريد ادخل بمعمعه ثانيه ومشاكل اني گلبي خلصان
ناي : يعني ماعندج مشاعر اتجاهه
شرهب : عندي بس مو لدرجه الطم وابجي اذا راح هيج اعجاب بشكله بهيئته بجرأته
واذا راح الله وياه
ناي : شراح يكول يونس اله
شرهب : كتله سد الموضوع اني مااتزوج
ناي : اي افضل ابعد عن الشر وغنيله
شرهب : اااااه ياعين ياليل
ناي : هااا شكوو
شرهب : غير اغني لو ردح احلى
ناي : شوكت تكبرين ماادري
رجع يونس الرد وتوقعت انسد الموضوع وانتهى جان هدوء رهيب عبد اختفى حتى الاتصالات الجانت تجيني انكطعت اني التهيت ادرس ذبيت كل حيلي مرات عيوني لا ارادياً ادور عليه كمت اشتاقله وارجع اكول هااا رعنه شبيج مو ماردتيه
كاعده اقرا وطب يونس ومرتضى جانو عند الطبيب مرتضى اكو مكانات بجسمه من الحرك تشوهت وميصير الها علاج او بالاحرى علاجها غالي وعمليات وهو رفض يسوي عمليه جان الحرك الاكبر بزره الايمن
اتقبل الوضع وشكد حاولنا انقنعه يروح طبيب ثاني مقبل
امه يوميه تخابر وميجاوبها ومرات ادرز رسائل اله اما جوحي خابر مرتين على يونس يطلب منه يطرد مرتضى حتى يرجع الهم وجان جواب يونس سد التلفون بوجهه
اجت بيبي وعمه وبان يشوفوه وبقو يمنا
يومين جنت اقرا وطلبت من بان توكل مرتضى
بان : استحي شون اوكله
شرهب : اعتبري بزونه وكعد توكلي هوو شيراد الها لتصيرين عياره
بان : استحي والله
شرهب : حبابه ورايه امتحان المدرسه راح تمتحنا نص الكتاب وبعدني ممكمله هااج هو تمن ومرك دقايق ويكمل ميتعب اليف وداعتج ميعض
بان : عيب لتحجين عليه
شرهب : اممممم مااحجي عليه هااج ست روحي وكلي
بان : طول عمري هادئه ومو راعيه مشاكل
ابتعد عن المشكله لو بعد الف ميل ماحبيت ولا صادقت ولا انطيت لكلبي فرصه ولو مره
ينبض لغيره لان فتحت عيني واني احبه وهو ولا يشوفني مرات حتى ينسى يسلم عليه
من شلنا طكيت بجي لان بعد مراح اشوفه وفعلاً ماشفته غير مرات معدوده وذني ينحسبن على الاصابع
يوم ماعرفت حب ناي جان عندي عزه حتى بلفراش وكعت وتمرضت واهرب بلنوم حتى لا اتأذه ومعودت انسحب جنت اراقب كل حركاته ومابرد گلبي اله من عرفت ناي صارت اله مجرد بت عم وحبه الها مجرد مراهقه مو اكثر
ومن سمعت بيه التحق بلحشد شهكت لله من خوفي عليه حتى الاكل كمت كوه اكل حتى لحد يحس بيه وبكل صلاه ماادعي لبشر بس اله
اني كبرت وكبر حب مرتضى بگلبي ومتجرأت بيوم احجي لا لصديقه ولا لبنت عم ولا لأي بشر بقيته بيني وبين نفسي ويوم ماامي كالت راح نروح لبغداد حتى نشوفه گلبي گبل رجلي ركضت عليه ومن دخلت وشفته روحي بجت گبل عيني هذا حب الطفوله والمراهقه والشباب حبيته من طرف واحد وهذا اصعب شى من تحب انسان اصلاً محاس بيك ولا يشوفك اصلاً تصرفت وياه عادي مرات حتى اتعامل كدام الكل كأني مامتقبلته بس بلحقيقه روحي بيه
كعدت گباله والماعون يرجف بيدي شون اوكله واني هيج قريبه منه
مرتضى :همزين اجيتي لو باقي انتظر شرهب يكتلني الجوع
بان : تفضل مديت الخاشوكه واوكله واني قطره دم مابيه
مرتضى : بيج شى
بان : شنوو
مرتضى : ترجفين شنو بردانه
بان : اي شويه
مرتضى : يمعوده الجو حاار يابرد انطيني لكمه
بان : اباوع على شفايفه ياربي ساعدني كله منج ياشرهب اني كعده بصفه مااكدر اكعد اجي اوكله بيدي
مرتضى : هههههه وجهج طماطه مستحيه مني
بان : هاااا
مرتضى : شبيج بان اني مثل اخوج المن مستحيه
بان : دنكت غمضت وجريت نفس ورجعت وكلته
مرتضى : هاانت كلها ايام وبلعلاج الطبيعي وابدي اكل ولا منيتج ولا منيه ذيج الخبله
شخبارج
بان : اني
مرتضى : لا الحايط اكو غيرج
بان : زينه
مرتضى : اذا محروجه عوفي تخلص شرهب وتوكلني ذيج تزق بيه زق ولا ترحمني لكمه وره الثانيه
بان : لا اني اكمل الاكل الك وبديت اوكله واحاول اهدي نفسي
صفن بوجهي مدري ليش واني صعدت حتى الحراره بيه وكع شويه على حلكه مكدرت امد ايدي وبقيت متردد هو مد ايده اليسره ومسحها وبقى يباوع عليه جان يكوول
مرتضى : شبعت شكراً تعبتج ويايه
بان : بعدني احجي جان ماما اطب وحسيتها عصبيه اعرف وجهه من ينگلب
بديعه : ليش مصحتيني اني اوكله
بان : مو شرهب كالت
بديعه : كومي اني اكمل
مرتضى : ميحتاج عمه شبعت رحمه الله والديكم تعبتكم ويايه
بان : كمت وطلعت للحمام گبل اغسل بوجهي من الحراره
طلعت صارت بوجهي
بديعه : اياج اطبين بعد يمه وحدكم
بان : قابل شجنت اسوي مو كدامج اوكله
بديعه : اسمعي الكلام وبليه عناد
بان : مااشي
خلصنا اليومين واني المحه من بعيد كافي عيووني تلمحه مجرد وجوده وهو قريب مني جان عندي يسوه الدنيا رجعنا لكربلا واخر شى بالي منظره واني بيني وبينه مسافه بسيطه ونتنفس نفس الهوا سوه
ناي : رجع كلشي طبيعي دراستي وبيتي وحياتي وحتى حياه اخوتي كلشي يمشي بهدوء من يجي عبدو يسلم وياخذ مهدي ويطلع الي عرفته مارجع يم اهله وكاعد بمشتمل صاحبه مأجره منه توقعت بعد الرفض يرجع لبيتهم بس الصار صدم الكل بقى متواصل ويه اهله
اليوم استلمت النتيجه والحمدلله نجحت وخلصت من الدور الاول
اما شرهب تدرس وتشتغل وضعها تمام
شرهب : مرتضى تعدلت صحته وبدا يكدر يتحرك وايده مرجعت مثل الاول بس اهون من قبل كام يطلع ويه يونس بلمحل ميقبل يبقى بلبيت ويحاول يساعده رغم ضعف ايده وحركته كام يحس روحه ثكيل رغم ولا مره حسسنا بهيج شى بلعكس اضحك واتشاقه وياه وهو اريحي وحباب
كيفت خلصت السنه وراح يحقلي اقدم
عبد راح ومااعرف شى عنه واعتبرته صفحه وانطوت لحد مايوم كاعده ارتب بكنتوري الي عبوه مفجوره بيه مگلوب كلاب اريد حاجه ماالكاها اله اگلب الملابس كلها بلكاع قررت بعد معناة وتفكير ارتبه
دك تلفوني رقم غريب باوعت الساعه بال١١ بليل جاوبت
الوووو
عبدالرحمن: لتسدي اريد احجي وياج
شرهب : عبد موو
عبدالرحمن: اي
شرهب : شتريد
عبدالرحمن: ابتعدت عنج صار اشهر وماوصلت ابد ولا حتى حاولت اتصل بيج واسمع صوتج
شرهب : اي والمطلوب
عبدالرحمن: ردت انطي لنفسي فرصه واعيد حساباتي كلت يجوز عجبتني البنيه ومجرد اعجاب مو اكثر
شرهب : وبعدين
عبدالرحمن: من عفتج عرفت بروحي شكد احبج
شرهب : يمااااي تعالو لحكوني كلمن يكول احبج مثلك من اشتعلت امك على هاي الخلفه
عبدالرحمن: شووو ساكته
شرهب : شكوووول
عبدالرحمن: اني احبج شرهب واريدج زوجتي وبايع الدنيا لعيونج
شرهب : اريد اعرف ليش ابوك رفضني
عبدالرحمن: مو مهم ليش ميكفيج اني اريدج
شرهب : لا ميكفي لازم اعرف ليش رفضتي لان مطلكه
عبدالرحمن: لا
شرهب : شنو السبب
عبدالرحمن: ماكو سبب
شرهب : اذا صدك تحبني ورجال كد كلمتك وبايع الدنيا لعيوني وتحديت اهلك لخاطري كولي الحقيقه ليش ابوك معاند ورافض
عبدالرحمن: وراح يفرق عندج
شرهب : كلش صدكني ريحني وكولي السبب بقى ساكت اخر شى كتله راح اسد التلفون وعمرك مراح تسمع صوتي
عبدالرحمن: اوكفي احجيلج بس مو تزعلين عادي ميهمني الموضوع
شرهب : احجي
عبدالرحمن: بسبب امج
شرهب : ياام
عبدالرحمن: جليله لان سمعتها موزينه
شرهب : واني شعليه بيها
عبدالرحمن: ياعيني عوفج من هذا الموضوع خابرتج حتى اكلج راح اخطبج مره ثانيه من يونس
شرهب : عوف الخطبه وفهمني اني شعليه بجليله
عبدالرحمن: يكول لان بتها ويخاف حشاج تتأثرين بيها وسمعتها تلامس اهلي
شرهب : وانتم شمعرفكم بيها
عبدالرحمن: ابويه سأل عنها وسمعتها كلش موزينه
شرهب : ولا اني بتها اكيد راح اسوي مثلها واطلع عليها
عبدالرحمن: حشاج انتي اشرف من كل بنيه عرفتها ومستحيل تطلع منج الزله اني تعلقت بيج لان شفتج شكد ثگيله ومتقبلين على الغلط
شرهب : وابوك عيرك لان امي جليله وماقبل يجي لهذا السبب رغم يعرف اني متربيت عدها ولا اوصل يمها ولا اعرف طريقها اصلاً
عبدالرحمن: اي عرفتي ارتاحيتي
شرهب : سديته بوجهه وطلعت من الغرفه
لغرفه يونس
يونس : شبيج اكو واحد يدخل هيج
شرهب : اتراجف واحجي بلحظتها الدنيا وكعت على راسي اريد عنوان جليله
يونس : شبيج شرهب بهذا الليل
شرهب : احلفك بگبر امك تجيبلي عنوانها
يونس : اول مره تكولين امك شصار وخلاج هيج جنج مذبوحه بسجينه عميه
شرهب : ابوس ايدك يونس مرتضى احجي وياه خلي يجيبلي عنوانها
يونس : غير افهم ليش وشذكرج بيها وليش هيج حالج
شرهب : جيبلي العنووووان اترجاك
مرتضى : اني اندل بيتها هي شالت من القديم وكعدت بغير منطقه صاحبي جان مصادقها
يونس : شبيك يول اسكت
شرهب : باجر تودوني عليها
يونس : لو تموتين مااوديج
شرهب : اذا تريد اختك متموت ناقصه عمر وديني عليها وهذا اخر طلب اطلبه منك
مرتضى : اني اخذج
يونس : شون تاخذها لهيج وحده بابا انتي لا بتها ولا تعترفين بيها شنو الصار وخلاج ادكين اله ترحين الها
شرهب : باجر من ارجع منها اكلك السبب مرتضى اخذني الها الله عليك
مرتضى : اخذج من عيني
يونس : متروحين
مرتضى : اذا مراحت تتأذه اني وياها لتخاف
شرهب : امشي بلشارع وعيني على البيبان ياترى منو منهم بابج ياترى اذا شفتيني تعرفيني لو نسيتي اصلاً عندج بنيه
وصلنا يم بيت
مرتضى : رغم مااعرف السبب الجايين عليه وجبتج على ضمانتي اريد منج تبقين هاديه وبليه مشاكل
شرهب : دكيت الباب ومجاوبت مرتضى دكينا بعد وبعد لحد ماسمعت صوتها
منوووووو
شرهب : اني فتحي الباب
فتحته وصارت بوجهي المكياج طوخ والشعر اسود وتارسه روحها ذهب والعلج سبحان الله الفجور مبين على وجهه
عرفتيني
جليله : منوو انتي
شرهب : اني المارضيتي حتى تشربيني قطره حليب من صدرج وشمرتيتي واني لحمه حمره بلشارع
شكرا لزيارتكم عالم روايات سكيرهوم
