رواية الابواب الخمس الجزء الثاني الفصل السادس والثلاثون بقلم ريام الهادي
يا طوير الحب يگلبي..!
هاي چم مره عله نياتك طرت..
أشگد على الشباج المزنجر متت..!!
وتالي شنهي الفايده..؟
والله مامش فايده منهم يگلبي
أنت بعيونك شفت ..!
جليله : منوو انتي
شرهب : اني المارضيتي حتى تشربيني قطره حليب من صدرج وشمرتيتي واني لحمه حمره بلشارع صفنت بوجهي تريد تركز
جليله : ياااا بت صمد لج كبرانه صايره مره
شرهب : مبين ناسيه اسمي وتصيحيلي بت صمد لو ذابه غيري وهواي وتيهتي وتصيحيلنا بأسم الاب
جليله : شرايده شرهب من نبرتج جايه هداده
شرهب : نعمة من الله تتذكرين اسمي
جليله : شرايده فضيني
شرهب : تعنيت الج اليوم بس ردت ابرد نار گلبي دوم جنت قبل ماانام اكول المن خلفتني اذا هيه نيتها تذبني بلشارع ليش من اول ماعرفتي بروحج متصخمه وحبله مانزلتيني من بطنج شكلتي لروحج من تكبرين طفل بطنج ٩ اشهر وراها تذبي
جليله : مامجبوره اجاوبج
شرهب : لا مجبوره وغصبن عليج تجاوبين انتن الي تخلفن وتذبن بلشوارع شون تنامن الليل شون تغمض عيونجن اني طفل ٦ اشهر مات بطني وماشفته ولا شميت ريحته ولهذا اليوم من اتذكر اموت قهر انتن من ياطينه مخلوقات شنو الگلوب الشايلاتها الي تذبه بلشارع والي بلحمام والي بلزبل والي على باب الجامع المن تحبلن اذا دربجن اعوج احنا شنو ذنبنا نتحمل عارجن من الاول انجب ومااحبل انتن هم تعرفن الله هم تكعدن من النوم وتكولن ياالله ماكو بگلوبجن ذره خووف منه هيج بايعات نفسجن
جليله : روحي ولي منا المن جايتني وره هاي السنين كلها مالي حجايه وياج
شرهب : طبت وتسد الباب دفعته حييل وطبيت بلكراج وصرت وجهه بوجهه وياها وكتلها واني أشر بأصبعي عليها وارجف لو بيدي الزمها اكطعها
اني بكلشي رضيت اتعير بكلشي واضحك ومااهتم واضرب عرض الحايط بس مال اتعير بيج والله كفر هاي اكبر جريمه اتعير بوحده قطره حليب مارضعتني وحده ماهمها بتها الطلعت من رحمها وماحنت عليها ولوما ضرتها جان هسه اني بلشوارع يااجدي لو لاعبين بشرفي او ذابحيني وماخذين اعضائي انت متستاهلين حتى يذكرون اسمج كدامي واشيل قذارتج العمر كله واتسمى بت جليله شون انظف اسمي منج واني على اقل حجايه اتعاير بيج
جليله : وشتردين هسه اتسميتي وفضينا
شرهب : اذا انتي هيج دربج من الاول وبدمج يمشي السقوط المن تزوجتي واحد مثل صمد وهجمتي بيته وأذيتي مرته من الاول خلصيها بحضن هذا وذاك ولتخلفين وجفينا شرج لو هجمان البيوت بدمجن يمشي متكدرن اذا متأذن المن خلفتينييييي ريحيني وكوليلي لشنو خلفتيني للعذاب للعياره للتعب للقهر
جليله : انت المدري شصير منها اخذها واطلعو بره بيتي لهسه ساكتتلج لان مبين محروك گلبج من شغله وجايه تبرديها بيه
شرهب : لا ماشاء شفت مرتضى طلعت تحس بتها طلع عدها احساس لو هذا الشى من الخبره اكتسبتي كمت تقرين المقابيلج
جليله : اهوووو شدوختينا زواج وتزوجت الله لايرحمه ابوج جنت صغيره وماافهم مصلحتي ومن حبلت عبالي ولد واخذه من مرته واطلكه طلعتي بنيه وشفت الفكر وياه كلت المن اتحمل مصاريفج كمت وشمرتج عليهم غير انتي بتهم وكلمن راح لحال سبيله
شرهب : ومن اجيتي وره سنين واخذتيني لو نسيتي
جليله : سمعت عمامج صار عدهم فلوس كلت استفاد براسهم عبالي بيهم حظ هلفكور ذوله وكلشي ماحصلت واجه اخوج واخذج وذاك يوم وهذا اليوم لا اجيت ولا كربت صوبج المن جايتني وتعيطين قابل بت حرام انتي
شرهب : شنو فرقي عن بت الحرام هـلورقة الكاتبتها عند القاضي شو اني وبت الحرام اثنينا انذبينا بلشارع اثنينا نتعير بأمهاتنا اثنينا شلنا ذنب مو ذنبنا اثنينا مغضوب علينا لا نتزوج مثل الناس ولا نعيش مثل الناس ودوم عيونه مكسوره ومانكدر نكول امي فلانه لج الناس تبوس ايد امهاتهم لان تعبو وكبرو وسهرو والي ماتت من امهاتهم يبجون العمر كله عليهن ويسون ثواب اني حتى هاي انحرمت منها لا اكدر ابوس ايدج واشكرج لان ربيتي وتعبتي وسهرتي لان كل هذا مصار ولا من تموتين ابجي عليج واثوب الي حصلته منج شئ واحد انتي بت جليله واخاف تاليتج اطلعين عليها كحبه من حضن لحضن
رفعت ايدها تريد تضربني لزمت ايدها اياااج تمديها اكسرها والخلقج اكسرها دفعتها جان ادنك وتنزع نعالها تريد تضربني بيه
جليله : اذا محد رباج اني اربيج من جديد حقيره جايه هداده عليه لتشوفين نفسج سكتت واسمع الخريط مالتج ردت اشوف شنو تاليت هذا لسانج الزفر جايتني وره ماكبرتي تحاسبين وتغلطين وتعيطين اذا عبالج الكدامج گليله شر غلطانه امدج هنا وماابقي ضلع صاحي منج مو شفتي روحج كبرتي وتتجاوزين براحتج اعرفج تربيه سكط وبيدي هاي اعيد تربيتج
شرهب : تدرين بشى واحد اني محظوظه بأني تربيت ويه جهال ضرتج الي انت وعشيرتج متوصلون للتراب النامت بيه واذا على التربيه انتي اخر وحده تحجي واتمنى من الله ياجليله بيوم اشوفج ذليله مشموره بلشارع محد بحالج ويجي هذا اليوم مدوم تره لو دامت مجان وصلت الج شايفه روحج كلها سنتين تلاثه محد يباوع بوجهج تصيرين مره عجوز قذره فايح منها ريحه الوصاخه والزنا وتنشمرين مثل ماانشمرت بس الفرق اني الله يحبني ذبني ويه اخوه يحبوني ومداريني وبقيت نظيفه اما انتي كلاص المي مراح تلكين احد ينطيج وتموتين موتت الجلاب محد بحالج
جليله : امشي اطلعي بره لا اسحلج وامسح بيج المنطقه كلها بت الگلب جايه تهوسين وتغلطين ولسانج عشر مترات وتحاسبيني انتي منو وتحاسبيني بنعالي ادوسج بعدج متعرفيني اخاف ماسمعتي عني اشوفج بعينج منو جليله
شرهب : ولا اريد اعرفج ولا اتشرف بيج امشي مرتضى الريحه هنا مطيبه مااريد ابقى اخاف اتوصخ هيج مكان مو مكاني اجيت حتى ابرد گلبي بيج ومابرد بلعكس شكد جنت اكرهج هسه زاد كرهي الج
الله ياخذج وياخذ كل وحده تذب جهالها مثلج كون متشوفن الراحه لا دنيا ولا اخره
مرتضى : امشي شرهب كاافي
جليله : منو اهلج نفس الصلافه والاخلاق التلف شترجى منج همزين ماتعبت بيج عليمن اربي واكبر وتاليتج مثل عمتج خوله لو ابوج واصرف لحلكج الجايف الي بتالي ادعين عليه تستاهلين اشمرج بلزباله زين سويت ولو ينعاد الوكت بيه هم ارجع اذبج
شرهب : سحبني من ايدي مرتضى وجليله تدفع بينا دفعها حييل مرتضى وعااط بيها
مرتضى : وجع كاافي عياط طالعين صدك عايقه وماتستحين امشي انتي الثانيه
شرهب : طلعت ويااه وركعت الباب امشي بصف مرتضى وساكته بس داخلي كوم خشب جان صامد قوي شامخ واحترك ومابقى منه بس الرماد من اطخه اشوف ايدي سوده
مرتضى : شوشه
شرهب : باوعت عليه بدون ماارد
مرتضى : بيج شى
شرهب : هزيت راسي ساكته
مرتضى : نفتر شويه نغير جو
شرهب : هزيت راسي ب لا
مرتضى : سمعيني صوتج قبل شويه جان يلعلع
شرهب : وديني للبيت
مرتضى : ليش منروح نفتر واوكلج موطا وشوفي الناس مو انتي تحبين الفر والطلعات وتكولين محد يطلعني هااج اني عازمج وعندي فلوس لتخافين مااخذ منج
شرهب : فدوة مرتضى وديني للبيت
مرتضى : يله امشي اهم شى متوكعين لان وجهج صار اصفر وحالج كله تغير
شرهب : اخذنا تكسي ورجعنا اباوع على الناس الرايح والجاي وفاصله من الرئيسي ميرن بأذني غير كلمتها من كالت لو ينعاد الوكت بيه هم ارجع اذبج
مرتضى : يله انزلي وصلنا
شرهب : هاااا جنت ممركزه ودايخه نزلت من التكسي وصعدت للبيت اتجه على محجر الدرج كوه اصعد
مرتضى : الزمج واصعدج لتوكعين
شرهب : ميحتاج مابيه شى طبيت للبيت نزعت حذائي وطبيت للغرفه بهدومي شمرت نفسي على الجربايه وحطيت ايدي فوك عيوني اريد اغمض مااريد افكر ليش صوتها لهسه يرن براسي
ناي : اركض وره سيف الي كل ماتفوت الايام يتوكح اكثر حيل متعبني لك ماما تعال اگل مو نشفت ريگي
ماااا مااكل
سيف صار عمره ٤ سنوات ونص وبشهر ال١١ يطب بلخمس سنين السنوات تركض بسرعه بينا وهذا كل من عمرنا اباوع عليه رغم وكاحته ولسانه وطلباته المتخلص بس فرحانه بيه وروحي من الدنيا واخاف عليه من الهوا مرات ينزل يم بيبيته واضل اطكطك واوصي مهدي ميعوفه انكرصت والي شفته خلاني ما أمن اعوف ابني وياها
دك تلفوني وادور عليه ولك وين وديته كل شويه شامره دنك جوه القنفه مبين هو شامره وطلعه
هااج ماما
عضيته من ايده اااااخ منك وهو يضحك
باوعت مرتضى جاوبته هلوو مرتضى شلونك
مرتضى : هلو نايه انتي شونج
ناي : بخير والحمدلله
مرتضى : تكدرين تجين للبيت
ناي : خير اكو شى
مرتضى : شويه شرهب تعبانه
ناي : شبيها البارحه جنت احجي وياها كلشي مابيها
مرتضى : راحت لجليله وقبل شويه رجعنا وضعها ابد معاجبني واني اريد اطلع واخاف اعوفها وتتخربط
ناي : عزه شذكرها بيها تخبلت شوداها
مرتضى : بعد راحت نبقى نكول ليش وليش اذا تكدرين تعالي
ناي : راح اخابر مهدي بلكي يكدر يجيبني عفيه ابقى يمها لحد مااجي
سديته منه وخابرت مهدي كال بشغل بعيد واتاخر
شون لعد
مهدي : خلي اخابر صلاح بلكي قريب منج ياخذج
ناي : اي عفيه بس بسرعه
مهدي : شبيها شرهب
ناي : مكدرت اكول اله راحت لجليله صعبه لهسه مااعرف شوصلها وشذكرها بيها كتله مريضة ومصخنه
مهدي : سلامتها راح اخابر واشوف منو من الولد موجود يجيج
ناي : اي فدوة لعينك كمت بدلت لبست عباتي الاسلاميه والشال وبدلت لسيف وبقيت انتظر نص ساعه واندك هورن مديت راسي باوعت صلاح نزلت وقفلت الباب ورايه جان اشوف عمتي مدت راسها من الباب
وداد : هااا خير وين موليه رجلج يدري بيج طالعه من البيت اتخمين والله اعلم وين رايحه
صلاح : شونج عمه
وداد : هله حبيبي شونها امك
صلاح : بخير
ناي : يدري عمه مااطلع بدون مااكول اله
صلاح : لو ميدري مهدي شون اجي واخذها وثاني شى ماعدنا نسوان اتخم اني اجيت اخذ ام سيف لبيت اهلها واني مثل اخوها من مهدي ماكو اني موجود لو عندج اعتراض لان اني ماخذها
وداد : لا حبيبي بس لان شفتها نازله ركض
صلاح : ماطول شفتيني المفروض ياعمتي الحجي الكلتي متكولي يله ام سيف اصعدي اوصلج ورايه شغل
ناي : ضلت تبلعم عمتي وگلبت وجهه صعدت وكتله رحمه الله والديك مابيه حيل اجاوبها
صلاح : الافضل متجاوبين حتى متعبين نفسج ولا تغثيها وهذا طبع عمتي ميتغير اذا كرهت احد متحبه لو يشغل العشره شمع الها واذا حبت تتخبل عليه وتريده الها اعتبريها مثل امج ولخاطر مهدي فوتي حتى ليضيع بينج وبينها
ناي : والله لخاطره ساكته
صلاح : الله يسعدكم
ناي : كعد صلاح سيف بحضنه وهو يسوق وكل شويه يدك هورن وسيف مكيف
لحد ماوصلنا لبيت اهلي ونزلت وتشكرت منه
صلاح : تردين ارجعج اذا متتأخرين
ناي : تسلم انتظر مهدي راح ابقى لليل
صلاح : براحتج
ناي : شكراً تعبتك ويايه
صلاح : ماكو تعب وسلامتها لاختج
ناي : الله يسلمك صعدت ركض لكيت مرتضى كاعد باب الهول
وين صرتي يمعوده
ناي : غير بين مااجوني وصلوني
مرتضى : اني مدخلت عليها بعد بس بالي حيل يمها ادخلي شوفيها واني طالع بشغله ومناك امر ليونس
ناي : احجي بسرعه شوداها لجليله
مرتض : بلمختصر اجت شايشه ودوني الها واني اتبرعت وديتها وحارت شكالت لامها وذيج هم مقصرت واني واكف بنصهن اسمع ناي : هسه افهم منها اخذ راحتك الله وياك
فتحت باب الغرفه باوعت عليها نومتها بهاي الطريقه معناها اختي مكسوره وحييل متأذيه دنكت بستها من خدها رفعت عينها عليه وكالت بحه الم وخذلان
شرهب : اني مو بتها ولا اريد اتعير بيها واشيل ذنبها كوليلي شسوي واصير بت امج
اريد يكولون هاي بت ذكرى مو بت جليله
ناي : رفعتها من مكانها وحضنتها حيييل
شبيج ياگلب اختج ومنو كال انتي مو بت ذكرى انتي بتها ونص واليحجي غير هذا الشى اطيح حظه
شرهب : كالوها وبعلو صوتهم
ناي : وخرت شعرها من وجهه فهميني الصار وليش هيج هذا الوجهه الحلوو الميعرف غير الضحك مغيم منو وياج
شرهب : الدنيا ويايه دومها ظالمتني دومها ترفعني شويه وتخليني اضحك وتاليها ادوس عليه وتخليني اندم على الساعه الضحكت بيها تعبت افهمها واتوسل بيها بأن شويه تفك مني وتخليني اشتهم هوا مترضى شاده ويايه وماترتاح اله تشوفني مدمره
ناي : اسم الله ليش هذا التشائم هاي عود اكول انتي قويه وسباعيه ومينخاف عليج وتاخذين حقج من اكبر واحد لعد اني الفاهيه شكوول اذا اني اريد اتسبع اجي عليج تالي انتي تحجين هيج
شرهب : اني ضايعه مالي مكان حاولت وحفرت بيدي حتى اسويلي كيان واغير من قدري الاسود ردت انسي الكل اني بت منو وابقى بعيونهم شرهب صاحبه الضحكه الحلوة الي وكت المصايب توكف اول وحده وكت الحق تنطق ومتخاف وتاخذه لو على كص رگبتها وكت الطيبه تنطي كلشي بدون مقابل وكت التضحيه اتضحي بدون حتى متندار وتطلب ثمن تضحيتها وماتعض الايد الي تنمد الها حاولت اغير الصوره البشعه الي انحكمت بيها من اني وصغيره من جنت على اقل شى نسوان عمامج كالن اي مو بت جليله
عافرت وكعت وكمت وقاتلت حتى اسوي اليه شخصيه واسم بعيد عنها تماماً وتالي بأول فرصه كله انسه وانذكر اني بت منو وذاك كله انمسح ورجعت لنقطة الصفر هاي بت جليله شون تتزوجها وتأمنها بيتك
ناي :قصدج عبد فهميني على منو تقصدين احجيلي مو شب گلبي نار شصاير
وبدت تسولفلي كلشي حتى روحتها لبيت جليله
ناي : وطبهم مرض على شنو مقهوره يروح واحد يجي عشره يرحولج فدوة لاخلاقج وشرفج ضاله اطحنين بروحج وعلى ساعه گلبج يوكف والله شنو عمران ماقبل وليقبل بعد احسن شلج بضيمهم
شرهب : اني مو على عبد او ابوه افهميني اني على الوضع بشكل عاام اي واحد غيره من راح يجي يريد يخطبني راح يسأل هاي منو وبت منو وماكو واحد يرضى يزوج ابنه من وحده امها هيج دربها ليش نغالط روحنا واذا عدي تزوجني لان واحد بخيل شافها زواجه رخيصه متكلفه وحده يتيمه محد راح يطلع وراها اذا موتها جوع او أذاها تبقى خدامه اله ولاهله وبلاش لهذا رضه بيه بس اذا واحد ابن اوادم وزين حتى اذا رضا بيه مطلگه مراح يرضى بيه من يعرف منو امي لو اسكط واحد راح يبيع شرفيات براسي
ناي : عيونج صارن دم بس لا ضغطج صعد ليش ترجفين عفيه ليصير بيج شى انعل ابو الزواج
شرهب : متفهميني ولا راح احد يفهمني
كومي ناي عوفيني وحدي
ناي : حضنتها وبستها فاهمتج كلش زين واعرف احساسج بس انتي ناسيه اهم شى
شرهب : شنو
ناي : اني ويونس نحبج ونعتبرج اختنا من امنا وابونا وميهمنا كل الي حجيتي واذا تردين تعيشين مرتاحه عيشي لنفسج ولتفكرين بأي احد الي يريدج لازم يرضى بعيوبج قبل حسناتج ادرسي واخذي الشهاده واذا اكو وظيفه توظفي وسوي اساس وشخصيه وكيان من تعبج والي يحجي دوسي برجلج واعبري كلام الناس مايخلص ومحد راضي على احد كلها بهذا الوكت تنهش بلحم الكل لو انتي كامله من كلشي والكمال لله هم يلكون عيب ويحجون بيج هاي صارت متعت البشر ناس تسب ناس وناس تحجي بأعراض ناس وصار مع الاسف العرض سهل ينحجي بيه وماله حرمه وبقى الناس القله الي تخاف الله ومحتفظين بألاخلاق ويمكن لعيونهم لهاي اللحظه مامگلوبه بينا
تردين تعيشين مرتاحه البسي الكل وفرغي راسج من كلشي يضوجج ولتحملين نفسج اكثر من طاقتها محد يستاهل تنهارين علموده واذا على جليله اعتبريها هي والماكو سوه لان هي صدك مو بحياتج واذا همه ينسون كلشي تسوي طز خلي ينسون المهم انتي متنسين وتبقين دائما على ثقه برب العالمين بأن ميكتب الج شى موزين حتى الموزين الي بحياتنا اله سبب يوم ماصارت العركه من فضحني مهند كلت حياتي انتهت وراح انتهي ومن ابني مات قريت السلام على حياتي قابل شنو الراح يجي وره فضيحه وطعن بشرفي وموت ابني مستحيل وراه خير لحد ماشفت بعيني شكد رب العالمين رحيم اخذ مني وانطاني خير اضعاف المي
رزقني بطفل ثاني صحيح ابني لحد مااموت ماانساه ويبقى جمرة تحرك بيه بس الْحٍمَدٍ للـّہ رزقني بطفل ثاني ضحكته وسوالفه تسوه الدنيا وبسبب الفضيحه كدرت اثبت جدارتي وادرس واطب كليه ومبقى شى واصير خريجه واحقق حلم عمري وكاافي مهدي عرفت قيمتي وحبني واجاني متوسل حتى ارضه بيه وارجعله ورجعت معززه مكرمه وحسب شروطي لو مصارت ذيج المصايب جان لهاي اللحظه عايشه خدامه لوداد وبلا شهاده ومستقبل مجهول ورجال بارد محاس بقيمتي عسى ان تكرهو شيئاً وهو خيراً لكم
شرهب : صايره متكلمه ابوالطيب المتنبي
ناي : ههههههه متكدرين وربي البيج ميخليج
شرهب : روحي لابنج خبص البيت ومترحين اله تنظفي مو خدامه الج ولابنج
ناي : صاار تدللين وارقى عشى اسويلج
شرهب : بتيته وبيذنجان اكو غيرهم
ناي : وداعتج العشه التردي ادزه الج سفري شتردين بعد وعلى حسابي
شرهب : اريد بيتزا الحجم العائلي وحدي
ناي : صار وبعد
شرهب : اذا اشتهيت شى عود ابلغج عوفيني ارتاح تكول مصلحه اجتماعيه
ناي : ههههه شتحجين مسموح الج بستها من راسها كومي بدلي وتمددي
شرهب : هسه اكوم
اعرف بناي تريد تخفف عني ومقهوره عليه بس متعرف لو تحجي العمر كله مراح اطفي ناري الي بيه ميداوه بلحجي ولا بلحكم ولابلمواعظ المرتبه الموزونه الي بيه جرح لو اضمده بيدي لو اضل ادوس بيه وينزف واني لازم الي اختار شنو الاريده وبيا طريقه اجتاز الصار
كمت بدلت ورجعت تمددت اريد هيج اهدأ افكر استجمع شتات نفسي الي طشرت يوم ماعرفت تأثير جليله شكد بحياتي ومستقبلي
ناي : خابرت يونس وطلب منه يجيب بيتزا وياه عشا الها والنه وشرطت عليه الفلوس مني
بقين الملم هوسه سيف للساعه ٩ اجه يونس ومرتضى
يونس : شون صارت
ناي : عفتها ترتاح
يونس : خلي ادخل عليها واصيحها تتعشه
شرهب : الغرفه ظلمه وعيوني سادتهم انفتح الباب وانفتح الضوا توقعت ناي حسيت احد كعد يم راسي
يونس : ابو خابصها هادئ اليوم
شرهب : رفعت راسي شفته يونس هاا حبيبي الله يساعدك
يونس : جبتلج بيتزا بعمرج مماكله منها وبعدها حاره يله
شرهب : ناي مو كالت على حسابها لو جذبت عليه
يونس : لج اخذ فلوس العشا منها وهي خطارنا
شرهب : ياخطار يوميه رايحه جايه خليها تصرف اذا متاخذ فلوس منها مااتعشى
يونس : اخذ يمعوده بس كومي اكلي
شرهب : معاجبني اكل
يونس : تعوذي من الشيطان وكومي والصار اليوم كله انسي انتي اختي وبتي ومحد اله بيج شعره واليحجي وياج ويندك بيج انعل شيب اهله جم ابو خابصها عدنا بدونج حتى الضحكه مااعرفها انتي اهلي كلهم ومن تتأذين تاخذين حيلي كله اتخبل من اشوف ايدي مجتفه ومااكدر ازيح همج اني افتخر عندي اخت مثلج قويه وتحارب ويايه وايدها بيدي ومايوم عافتني لج مرات احسج اخويه مو اختي من سوالفج مااحب اشوفج هيج تعبانه وخانسه وعيونج ذبلانه وروح امي اتأذه ترضين يويو يتأذه ولو لهاي اللحظه مااعرف شذكرج بجليله وكلتي من اروح الها احجيلك
شرهب : البيتزا بلخضار لو كص
يونس : خوش تغيرين الموضوع
شرهب : مااريد احجي عفيه اختنك وداعتك
يونس : هذا هو عوفي كلشي المهم متغثين نفسج كومي ناكل برد الاكل
شرهب : وحده اليه وحدي
يونس : وحدج بس كومي اكلي لان مرتضى الطريق كله يلوب يريد ياكل من البيتزا مالتج
شرهب : ياكل سم لك مرتضى اذا مديت ايدك ارجع اكسرها واخليك العمر كله بتك ايد كمت ركض للهول حافيه
مرتضى : اجت لا هله هستوني كلت اكل واعوف الها قطعه وحده
شرهب : موو هيه بكيفك وينها البيتزا مالتي
ناي : هاااج وحدج واحنا كلنا بهاي
شرهب : كافي عليكم وزياده لتصير عيونكم ضيگه اني امرأه متضرره ويرادلي طاقه وحيل راعو شعوري
ناي : مراعين عيني بس اكلي
بقينا ناكل ومرتضى وشرهب يتعاركون على الاكل رغم ضحكتها بس اعرف اختي بداخلها منتهيه ومجروحه حيل دومها هيج لو الدنيا فوك راسها تحاول تبين كلشي مابيها
وهيه شايل الهم من اول منولد
خابرت مهدي وطلبت منه ابات مردت اعوفها وحدها وهو معترض
شرهب : متنامين على الجربايه بلكاع
ناي : صار بس لتهوسين
شرهب : تمددت على الجربايه اقشمر نفسي اريد انام ساعه ١٠ ونص نوميش هيج وكت بس لان عندي صداع كلت بلكي انام جان يدك تلفوني عرفته عبد لان نفس رقم البارحه كمت سديت الباب وجاوبت
الووو
عبدالرحمن: سمعت بيج مريضة وكلت اخابر اطمن عليج
شرهب : كلشي مابيه مثل الصل صحتي احسن من صحتك
عبدالرحمن: ليش تعيطين دومج هجوميه
شرهب : لان انت تحسسني اني غبيه وماافتهم واني اتخبل من واحد يصغر من عقلي شرايد عبد تره زهكانه والدنيا طالعه من عيني وتعال گلي انت شمدريك اني مريضة
عبدالرحمن: مهدي جان يمي وخابرت ام سيف وكالت راح تبات وعرفت انتي مريضة منطاني گلبي كلت على الاقل اطمن عليج
شرهب : مشكور صاحب واجب واديت واجبك يله باي
عبدالرحمن: اوكفي شبيج احد راكض وراج اريد احجي وياج
شرهب : ماكو حجي بينا
عبدالرحمن: لا اكو وهوايه هم اني باجر راح اروح ليونس احجي وياه مره ثانيه واخطبج منه
شرهب : اوووووف اسمعني زين عبد وياريت تركز بكلامي الي سويته اكيد يفرح اي بنيه شاب مثلك عاند اهله وفضلها عليهم ويريدها بحلال وتقدم الها كلش حلو جو افلام فاتن حمامه وعمر الشريف بس هنا بلعراق متمشي هاي السوالف هنا اكو شى اسمه اهلي واهلك واصلي واصلك وعادات وتقاليد ومستويات يعني متكدر تغير شى عمره الالاف السنين واذا كسرت القاعده راح تتونس سنه سنتين وراها تتندم وتكول ياريت سمعت كلام ابويه وخاصه من تشوف روحك وحدك ومحتاجهم
اني بنيه اروح تجي غيري بس ابوك وامك اذا راحو مراح تكدر تجيب مثلهم ارجع لبيت اهلك وانسه هاي الاشهر كلها واني اعرف ابوك طيب ويحبك وراح يرضى عنك وبلنسبه اليه اني مااتزوج لا انت ولا غيرك
لتعب نفسك وتروح تخطب لان راح ارفضك اني مااناسبك وانت هم متناسبني كل واحد بينا يختلف عن الثاني ومامستعده ادخل بهوسه ومشاكل في غنى عنها ورايه دراسه ومستقبل اهم منك ومن الزواج وياريت بعد متخابر من وراك حتى الرقم راح اغيره وخلي اخسر بلشغل موتتني احظرك وتخابر من غير رقم مخلصن السيم كارتات مالاتك الشركه مفتحه بس الك
عبدالرحمن: كملتي
شرهب : اي
عبدالرحمن: شايفه واحد من يقفل على واحد
او يقفل على حاجه ويكول لو هاي لو مااريد ويعاند روحه قبل ميعاند غيره حتى يحصلها
شرهب : اي شايفه مرات اني هيج اذا اريد شى اهوس حتى احصله
عبدالرحمن: اني قافل عليج سمعتي لو اعيد قافل عليج والكليشه الكلتيها اقرب كلاص يمج نكعيها وشربي ميها راح اخليج على راحتج اقري وامتحني ورتبي المستقبل الي بالاخير راح يكون يمي واني هم بين مااكمل شغلاتي حتى يوم مااجي واخطبج غصبن عليج توافقين
شرهب : شنوو تحدي
عبدالرحمن: لا محبه والي يحب وميذبح روحه على حبيبه ويسوي المستحيل وياخذها هذا مو رجال واني رجال ابن رجال وكد گلمتي مراح اضغط عليج بس شوكت مااكمل اموري احسبي حسابج تصيرين الي
من اطير طيور اهم شى لازم الصبر اذا مصبرت على طيرتك وانطيتها مجال تروح وبعد مترجع واني بهيج سوالف شكد صبور فوك متتصورين
شرهب : على كيفك علينا جيمس بوند داخل تحارب لو عندك قفص يمنا عبد لو تموت مااصير الك
عبدالرحمن: ههههههههه بيها الخير روحي نامي وارتاحي وهاااا نسيت انبهج شويه ثكل ويه ابن عمج مااحب الشقه الزايد والميانه
شرهب : ييااااااا باع هذا مصدك
عبدالرحمن: باي حبيبتي
شرهب : سده بوجهي عضيت المخده حيييل اااااااخ كون الزمك اله اركعك بلحايط
ناي : شكووو ويامن جنتي تحجين
شرهب : ويه عبد اذا خابر هلمره ابلغ يونس واخلي يتعارك ويااه
ناي : لتحجين يمعوده لتصير مشكله راح ابلغ مهدي يحجي ويااه خوما كال شى موزين
شرهب : الصراحه يبووو كلامه يذوب يااختي نزلت جم قطره مي على الصحراء الغربيه مالتي ونشفت ارتاحي
ناي : هااااا ياصحراء يامي هاي شبيج
شرهب : سوالفه ترف بلگلب وهدوئه يماااي ولا تكولين هذا نفسه ابو كش عااااع
ناي : يمعوده هيييي اصحي راح توكعين بلكاع لج بس لا وكعتي
شرهب : خسه اني اوكع مو بلحيف بس التصحر بأعلى درجاته ياام سيف ومن تهب جم قطره الكاع مو بيدها لازم تتحرك مو بيها رمال متحركه ماتكعد راحه
ناي : عطت بأذنها حييل
شرهب : ااااخ اذني طرشت شبيج
ناي : شوفي شگلج خدودج وردن والعيون تتحرك فوك وجوه هيج كدر بسرعه يصيدج
شرهب : اصيد وماانصاد اني شوشه على سن ورمح بس ردت اجرب شعور وحده من تفكر بواحد وانتي كطعتي ام افكاري هو اني ادري بروحي كافيه عليه اشوف بطل يحب البطله بمسلسل تركي واحضن المخده واقصى طموحي افرحلهم لو باسها واعترف بحبه تكول اعترف بحبه اليه والضحكه تشك وجهي مثل الخبله اما واحد يتغزل بيه بلحقيقه لازم يصير عوق بمشاعري واطلع جبار البداخلي
ناي : من دخلت عليج شكلج مال واحد معترف بحبه
شرهب : ويعترف شعليه بيه يركض وبعدين يمل ويروح لحال سبيله اني مقتنعه لا هو اليه ولا اني اله بينا جبال وديان واحدنا مايكدر يعبرها واذا فكر تنكسر رگبته واني مامستعده اخسر روحي لخاطر احد نفسي اهم من اي شى
ناي : كون تبقين هيج عاقله الله يقويج نومي سيف حبابه بين مااخابر مهدي
شرهب : اذا تغزلتي بيه كدامي وداعت عمي الغالي اخابر عبد واسويلكم مصيبه راعي الصحراء الي يمج تره الرمل لهسه يتحرك ومصموط ابو ابوه ومتروس عاگول
ناي : هههههههه يله مااتغزل واصلاً مراح احجي كدامج
شرهب : تسوين فضل ناس متستحي يتغزلون كدامي كون كل واحد يتغزل كدامي يتعارك ويصير دمايه واشبع شماته بيه وميتصالح ابد كفار قريش يدخلون الجنه وانتم الحبجيه كون مدخلون
مثل كل وكعه اوكعها اتجي على روحي واكوم واكول تهون وتخلص وتصير سوالف ولازم ارجع اقوى بديت احاول اتناسه الصار وارجع اركز على دراستي بس مرات بليل مو بيدي تهيج عليه المواجع اصفن على ايامي وسنيني الضاعن من وره ناس متسوه واطبطب على جروحي واكول الها ماتعبتي تنزفين شوكت اطيبين
مر شهرين من اخر مره حجيت ويه عبد صار كد كلمته وبعد متقرب مني مرتضى بقه يمنا وصحته كلش زينه التزم بلعلاج الطبيعي والادويه وهذا الشى كلش ساعده يطيب
كام يطلع ويه يونس بلمحل يشتغل ومرات اذ اكو شغلات كهربائيات تأسيس بيت او محل يطلع لان هو شاطر كلش بيهن ومن ياخذ اجرته يشيل ويحطهن بيدي مصرف بيت بلبدايه يونس مقبل وكل واحد يعيط بجهه تالي حلف مايبقى يمنا اذا ماشارك بمصرف البيت بسبب حلفانه وافق يونس لان مراد يطلع وين يروح جانو يطلعون سوه ويرجعون سوه وجنت حاسه مرتضى يتقصد يطلع ويه يونس حتى ابقى وحدي واخذ راحتي بعشرتي ويه مرتضى هلكم شهر عاشهن ويانه اكتشفت هوايه شغلات حلوة بيه اهم صفه يحس ومو انتهازي كمت حتى اشك هذا ابن ساهره وجوحي الي حاولو اكثر من مره يرجعوه وهو رفض ادري بيه انصدم بأهله حقه يعني واحد واصل للموت وراح يسكط ابوه وامه يعزون الفلوس عليه ويعوفوه هيج بلا حول وقوه هسه لو ماعدهم واحد يعذرهم بس مو خير من الله عدهم وميسون العمليه اله كون تصير فلوسهم حطب جهنم الهم
مثل كل اسبوع تجينا ناي نخلص وكت ونسولف ونستلم الناس الي نعرفهم واحد واحد يوم جمعه وهستونا خلصنا الغدا والمواعين وصبيت جاي للولد وكعدنا واحنا نسولف جان تكول
ناي : تدرين منو حامل
شرهب : بس لا انتي
ناي : حوراء
شرهب : صدك شمدريج
ناي : سدره اجتني زياره حسبت ساعه وراحت لان امها اجت على وداد وهي صعدت يمي وبلسوالف كالت حوراء حامل
شرهب : لعد شو مااحبه وانجبرت عليه مو حبلت
ناي : قابل بكيفها مو انتي جنتي متحبين عدي وحبلتي منه
شرهب : بس اني مجنت احب غيره
ناي : اني بالي يم يونس اذا عرف
شرهب : لازم يعرف قابل يترجى منها ترجع البنيه سافرت وراح تصير ام خلي يصحح حساباته يونس يونس تعاال
ناي : مخبله شدسوين
شرهب : لازم يعرف اخوج لهسه مرات ادخل عليه الكاه يباوع على صورتها بلموبايل بلكي من يعرف حامل ينساها
ناي : مو هو بكيفه وينسه
يونس : هااا شبيج خابصه البيت
ناي : ماكو شى حبيبي ارجع ارتاح وراك العصر شغل واغمز لشرهب
شرهب : عليش تغمزين عيني يونس حوراء حامل هاي من الاخير
يونس : يدي دمع شوغات جرحي فلا طاب
ويل تنشد عله الروح خانوها الأحباب
لهاي اللحظة اقشمر روحي واكول راح ترجع اليه لو ممتزوجه جنت بحلم ويجي يوم واكعد ومن سمعت بيها حامل نفس شعوري واني اشوف زفتها
مكدرت حتى افتح حلكي واكول الله يساعدها شون يسعدها واني عايش بليه روح من وراها عفتهم وطبيت للغرفه اخذت مفاتيحي والموبايل وطلعت مااكدر حتى اكعد اريد اهج ابقى وحدي محد يفهمني ولا اريد ابين دماري كدامهم
ناي : ارتاحيتي
شرهب : اي ارتاحيت جم يوم يتعب وراها يسلم ميصير يبقى على امل جذاب ينتظر شى مراح يصير لازم يعرف هيه عاشت حياتها وهو لازم يعيش
ناي : منعرف شنو ظروفها
شرهب : ولا نريد نعرف اهم شى اخونا شفتي وجهه شصار بيه من سمع خلي ينصدم حتى يحس على نفسه ويصحى
ناي : متوقعت هيج يحبها كلت بلكي مثل سما ينساها
شرهب : اكيد مو مثلها هاي حبها بگلبه وعقله وجانت اله كلشي مو مثل ذيج تنكط سلابيج وتسوي روحها كيوت وهي الشيطان نفسه عوفج من كلشي البنيه راح تكون عائله ولازم يصحه على روحه ويتلاحك عمرة وياريت انزوجه
ناي : يونس يتزوج مااتوقع
شرهب : لتظلميها ادعي الله يبرد گلبه ويلگه بت الحلال واهم شى امها مو گلبة بت گلب وتشلع افاده لان اخوج يموت على المشاكل ميختار اله وحده وراها طركاعه هوايته المفضله
بديعه : يمه بان وينج
بان : هياتي هااا يمه تردين شى
بديعه : تعاي اكعدي يمي عندي شغله وياج
بان : خير
بديعه : تعرفين منو لزمتني قبل شويه وحجت ويايه
بان : منو
بديعه : ام حيدر رايدتج لابنها حيدر خوش ناس اوادم وابنهم خريج ومتوظف وكالت الطابق الفوك كله الها والولد شايفج وكتل نفسه عليج
بان : مااريد اتزوج
بديعه : هوووو شنو متردين تتزوجين صار عمرج ٢٩ سنه الي بعمرج تزوجت وخلفت وعدها مكان الواحد اربعه موزين لهسه كعد تجيج قسم الي بعمرج بعد محد يدك بابهن
بان : واني مااريد اتزوج يوم عايشه هيج مرتاحه واشتغل واساعدكم
بديعه : منريد مساعده ابوج وعمتج الي دزه يعيشنا اريد يابنتي افرح بيج واشوف جهالج هو بس انتي الطلعت بيها من الدنيا كل فتره يجون جماعه واطلعين عيب واكول خليها براحتها بس هلمره الناس نعرفهم وخوش جيران والولد الكل تحلف بأخلاقه شنو عذرج
بان : ماعندي عذر اني مااريد اتزوج وهذا هو
بديعه : اسمعي الي بالج مايفيدج راح يضيع عمرج وانتي كلشي مامحصله
بان : شنو تقصدين
بديعه : لاعبالج مااعرف بشنو تفكرين كطنه وشيليها من اذنج وترضين على حيدر واله يجي ابوج ويشوفلي جاره وياج تعبت واني اكل بروحي واشوف الاصغر منج تزوجن وخلفن وانتي ضاله
بان : كتلج مااتزوج قابل تجبريني
بديعه : مو بس اجبرج اكسر راسج لان مع الاسف توقعتج عاقله وفاهمه وتعرفين مصلحتج طلعتي كلشي ماكو وضيعني عمرج على شى لو تموتين ميصير الج
بان : ادري بامي تعرف بيه احب مرتضى وهذا الشى اكتشفته اخر فتره دوم تبسمرني متكولها بلخط العريض بس كل ميجي عريس لازم تذب حجايه تخص هاي السالفه
كمت وعفتها مااريد انطي واخذ وياها وتعلك بينا
عمشه : شجرالها امج تصارخ جنهه عتوي حاصري على الشجره
بان : مابيها شى بيبي
عمشه : چاانه طرشه ماترضين تعرسين برتي يلعوبه
بان : خليني بايره مااريد اتزوج عفيه بيبي لتسوين مثل امي كتلكم مااتزوج
عمشه : يطبج عرج چاانه لعرس ضلي بحسره الفرخ ومجبده على گلوبنا
بان : اصعد اكمل شغلي اليوم كلكم ادورون مشاكل
عمشه : تعالي ليه اركدي جاري
بان : افف هاا بيبي شرايده كعدت بصفها واني روحي بخشمي
عمشه : بنت الرعنه شنهي بالج وماتردين تعرسين
بان : بيبي فدوة اروحلج الف مره اعيد
عمشه :منهي خاش براسج ومعصيه بيه
بان : محد يعني المتريد تتزوج معناها تريد واحد والله هاي حلووة
بديعه : خلي يجي ابوج هو يشوفلي صرفه وياج
عمشه : منبوشه الصفحه انه اسولف ويه البت لاتنبصين بلنص
بديعه : تعبت منها عمه كل فتره عدنا هذا المنوال وتصفه تروح القسمه وكدامج عمرها خلص وهي ممتزوجه
عمشه : عنها لاعرست چا حصلتي شوفي حالج تكطعين الرزق لون واحد صبح بوجهج
بديعه : غير من الضيم صرت هيج جنت شحلاتني وحصلت هاي العنوديه وتصيحلي ماما ولوما متزوجه جان هسه منو داراج
عمشه :من خفت هلبراطم عود تسولف تداريني وانتي الممنونه چا موش عمتج وانطيتج ولدي
بديعه : وامي هم وهو ابنج وينه هاي الفتره كلش قليل اشوفه
عمشه : غير يشتغل ويوچل بحلوگجن
بديعه : الله يرزقه يله كومي كملي شغلج وبعدين نحجي
بان : هاي كدام بيبي لااتزوج ولاتفتحين طاري هذا الموضوع عفتهم وصعدت
بديعه : احتاريت بحالها شيبت گلبي واني كل همي اشوفها مرتاحه ومتهنايه وهي مكعد تعرف مصلحتها خابرت خوله ردت اشكيلها وين انطي وجهي من اختنك ويضيق حالي اخابرها يااترزل منها يااطيب خاطري حسب الشغله لزمت التلفون وشكيت الها لان حيل انغثيت من بان
خوله : عوفيها لتجبريها
بديعه : وتبقى هيج
خوله : احسن ماتزوجها غصب ومن تموتين تنبش اهل اهلج بلگبر وتتحملين ذنبها ماكو وحده اتزوجت غصب وارتاحت هي متريد تتزوج
بديعه : نجذب على روحنا لوما انتي بنفسج فتحتي عيني على سالفه مرتضى واله اني ولا انتبهت
خوله : غير مطفيه وثوله دومج من اجيت للعراق لكفتها يجي طاري مرتضى بتج تشلش وجنت اتقصد اخابر كبالها واشوفها شون تلوب ومن اجه مره عيونها مثل الحرامي تتلاوه تردين هيج سالفه تعبر عليه وتعالي انتي ليش متزوجين بان لمرتضى
بديعه : لابن ساهره اله تخبلت غير ساهره تجني على بتي اني اريد ازوجها واحد بعيد عن هاي المله بتي مناقصها شى حلوة شكل واخلاق وشهاده
خوله : ومرتضى هم مخلص شهاده وشاب حلو واصلاً لايك عليها
بديعه : لتجلطيني اكلها ابن ساهره وجوحي قابل مااريدها واشمرها هاي الشمره
خوله : الولد عاف اهله وكعد يشتغل وامانه الله وانتي تعرفين كلش زين الولد غير اهله
بديعه : واذا يبقى ابنهم ومرجعه الهم وتعاي كليلي قابل الزم ايده وابوسها واكول اله اتزوج بتي تره بتي ثوله امر مني هي تحبه بس هو حتى ميباوع عليها ليش اني منتبهت
خوله : اني انبهه واخليها باله
بديعه : اياااج بروح ابوج لتسوين هيج سالفه ولساني ميطخ لسانج اذا نبهتي اني مااريد مرتضى اريدها تتزوج غريب وتعيش بعيده عن ساهره وصالحه ومصايبهن مكافي احنا خلصنا عمرنا بسمهن اجي اذهب هلوحده العندي بحضنهن اله تخبلت
خوله : والله اني اشوف مرتضى مناسب الها ابن عمها ويعرف اخلاقها وراح يداريها وبتج فقيره ومو راعية مشاكل يراد واحد مريح مثله يكفي انتي تعرفين اخلاقه وصاحب وكفات حتى امي دوم تكول يذكرني بأبويه فرج هم هيج يركض ويساعد وميرد احد واني احبه لان فطير وماعنده دغش والناس بهذا الوكت متتأمن يبين الشخص زين وتالي تطلع بلاوي جواه نسينا عدي معلم وتالي شطلع
بديعه : حتى لو مااريد مرتضى لبان اتعب واگبر واشمر بحضن ساهره لاعيني اخليها هيج گبالي ولا اشمرها هاي الشمره
خوله : ضلي بعنادج ورايه شغل على كيفج وياها
بديعه : الله كريم سلمينا
خوله : على منوو هو نجم وكوه اشوفه
بديعه : هيج حاير بلشغل
خوله : مصاحب وحده اجنبيه ويريد ياخذ الجنسيه براسها كتل نفسه تكول عبالك راح يطردوه اذا مااخذ الجنسيه
بديعه : خلي يتزوج يمعوده صار سنين بليه زواج
خوله : مو اجنبيه هلعراقيات الضالات
بديعه : منو تقبل بيه غير گبر قابل صغير والله العمر مر يركض ركض ولا توقعت بيوم نجم يحب وحده غير ذكرى
خوله : ميحب ولا راح يحب ولهذا يومج مرات ينوح عليها بس الدنيا تمشي وهو يفكر يستقر تماماً هنا وياخذ الجنسيه وشاف هذا الدرب سهل
بديعه : الله يوفقه اروح اصب غده لا امج تزفني
خوله : الله وياج عينج على بان ولتضوجيها
بديعه : ماشي
ناي : بدت السنه الدراسيه وبديت احظر الها قررت احط سيف روضه هم يتعلم وهم الوقت الي اني مموجوده بيه ميحتار مهدي ومااريد منيه عمتي لان دوم تحجي وادوخني وخلي تبطل وتبطل المن عايفها ابنها سجلنا سيف بروضه اهليه جنت شايله هم لا يخاف لو يبجي ومن رجع للبيت اول يوم الْحٍمَدٍ للـّہ جان فرحان ومكيف
هاي الفتره احس بتعب عجيب روحي مخموشه ومرات جسمي يرجف وايدي توكع الحاجه منها واختنك المغربيه اشغل قران اتزيد الخنكه مرات ومرات يفك صدري عدا رجليه ومفاصلي تون تكول صاعده جبل وشكد ماانام عبالك منايمه هاي الحاله فجأة صارت عندي واحاول الكه سبب الها وماكو حياتي ويه مهدي حياة عاديه بس مرتاحه هو حاير بشغله واني بدراستي قليل الكلام والتعبير عن المشاعر بس اعرف بيه يحبني وهذا يكفيني
عمتي متصعد هاي الفتره كلها ولا شايفتها اسمع اخبارها من مهدي صحتها زينه وقويه ملتزمه بلعلاج والاطباء هي تحب اداري روحها وخلال هاي الاشهر كلش تحسنت حالتها بس اني مدري شبيه شديصير ويايه
ماحجيت ولا شكيت لان كلت شغله سهله المن موجعه راسه واني اضوج من سالفه الاطباء وبديت التهي بدراستي اريد اتخرج واخلص والزم شهادتي بيدي
شرهب :
كاعده اقرا واشمر بلملازم واضرب على راسي واحجي ويه روحي ولج غبيه رگزي محد راح يوكعني غيرك يلنكليزي اخذتك درس خصوصي وبعدني كلشي ماافهم بيك سمعت صوت باب يدك اذا الجهال والله لا اخليهم يحجون فرنسي من وره الكتل الراح ياكلوه مني كمت من الكااع رجلي خدرانه ااااخ اشتعل عمي احرك كوه بيها سحبت العبايه الاسلاميه لان لابسه تراك ضيگ لان وحدي بلبيت مو وكت رجعت الولد وحطيتها على جسمي ونزلت درجه درجه وفتحت الباب جان اشوف ساهره وصالحه
هله هله بسورها ونورها هله بلحارك بيت عمشه من ساسه لراسه هله بنسوان عمي الحبيبات هلة براعيات المشاكل تصدكن اشتاقيت الجن
ساهره : مجاين عليج خابري اخوج خلي يجي مانندل محله جان رحنا عليه
شرهب : وشرايدين من اخويه
صالحه : مالج دخل خابري وخلي يجي وبله لغوه زايده
شرهب : لا اكس كيوزمي لازم اعرف لتنسون هسه انتم بكاعنا بيتنا گبل لقائاتناالجميله على ارضكم وبكيفجن تحجن وتتشرطن هسه اني الي احجي واتشرط بسرعه شتردون من اخويه ورايه مستقبل راح يضيع
ساهره : تكولين لاخوج يرجع مرتضى لبيت ابوه لا وروح امي اعزيكم واصخمكم خوش اخذتو يمكم واستفرتو بيه حتى ميشيل التلفون عليه ولا يجاوبني ولا اله دخل بينا ترجعو لااطين عيشتكم
شرهب : اوكفي عمه خلي ادوره اخاف بجيبي حاطته نسيت ماعندي جيب لو اخاف بلجزدان مالتي لو داحسته بين الملابس
صالحه : هو شنو احجي عدل لا افرك حلكج
شرهب : والله انتم الي حجيكم مو عدل مرتضى التحجون عليه ولد شاب طول بعرض عمره ٣٠ سنه مدري ٣١ من يجي اسأله بس كون اتذكر جايات وهازات طولجن تردن نرجعه قابل هو جنطه لو قطعه قماش وتترجع
وثاني شى اخويه ماله دخل ذاك مرتضى بيجن زود ولسان وكد نفختجن هاي رجعنه
مو جايات هدادات وبعقر دارنا
صالحه : اني اعرف عينج عليه وجايه تتلوكين اله حتى ياخذج يلمطلكه لو تموتين منخلي
شرهب : هههههه اخرفيتن تالي عمرجن وشبيهه المطلكه يمه لو نسيتي بتج على الاقل اني طلكت رجلي بزودي لان عار اويلي على غير ناس شبعو طن دفرات وجلاليق واطلكو بفضيحه وفصل مرتب بيت اااخ الله يعينج بيييت
صالحه : لوما بلشارع لا اعرفج قدرج
شرهب : خوفتيني كمت ارجف اوكفي اهز ايدي لو رجلي اخذي اختج ويله كبل وعدل للبيت مبقى شى وتغرب وانت نسوان كبار لتوكعن على وجهجن بنكره وتالي تموتن بيها ومحد يعرف ولو هاي امنيتي بس يله كلشي بوكته حلو
ساهره : اني مجايه اتعارك وياج اني اجيت ليونس حتى يطرد مرتضى بلكي يرجع للبيت
شرهب : مو يونس اليطرد اخوه لتعبين نفسج ام مرتضى هذا بيته احنا نطلع وهو يبقى ويله راح يضيع مستقبلي واني اسولف وقتي ثمين يله گووو منا وسديت الباب بوجهن دكن الباب ولا فتحته وصعدت اغني
بلغت يونس ومرتضى وبقو ساكتين
بان : حاولت اسد موضوع هذا جيرانه وبدت السنه الدراسيه الهي نفسي واخلص الوكت بلدوام واني بلدرس اجاني تلفون من امي انطيتها رفض رجعت دكت جاوبتها هااي يوم عندي درس مااكدر احجي جان تعيط وتبجي
بديعه : ولج الحكي ابوج واكع وناقلي بلمستشفى
بان : ياستار شبيهه هسه اجيتج
اخذت جنطتي وركض للمديره استأذنت منها وطلعت للبيت اخذت تكسي وكفته حتى يودينا للمستشفى
نزلت اركض للبيت
عمشه : يايمه ياولدي كون بعدوينك چا انت الفقير اطيح لا والحظ
يله يووم التكسي بلباب اجت امي تركض وعيونها دم من البجي عمه عينج على بلال فدوة
عمشه : لاتبطين عليه وبردي گلبي على ولدي
بان : يله يووم استعجلي
بديعه : يله اجيت صعدنا بلتكسي واني مفرفحه على فلاح سودة عليه شكالت روحك من وكعت
بان : منو كلج
بديعه : عمج ابو عدنان خابرني كال وكع على حدايد وحده منهن مأذيته خايفه لاابوج يصير بيه شى
بان : على كيفج راح انتي توكعين شوفي حالتج ان شاء الله مابيه شى
بديعه : اذا صار بأبوج شى اموت والله منو اليه بعده
بان : جنت اهون على امي بس اني مرعوبه اكثر منها وخايفه حيل عليه
وصلنا للمستشفى جان الجو بارد بدايه شهر ١٢
سألنا دلونه على الطوارئ لكينا ابو عدنان هو اقرب صديق لبابا من سنين وهمه سوه وابنه وابن اخوه ورجال هم صديق ابويه كلهم واكفين ينتظرون
الي عرفناه جان بيت هيكل يبني وملتويه رجله واكع على شياش حديد وطاب بطنه
وضعه خطر حيلنا راح حتى عيونا تعبت من البجي طلعو من العمليه والدكتور كال الكبد متأذي وحده من الكليات وضعه خطير مرت الساعات وصار الليل
واحنا على وكفه وحده
بديعه : روحي يمه للبيت على بيبيتج واخوج بلال وحدهم
بان : شون تبقين وحدج
بديعه : ماعليه شى راح اخلي ابو عدنان يوديج
بان : باوعت باقي ابو عدنان وابنه
اني اروح وحدي
بديعه : اخاف عليج تاخذين تكسي بهذا الليل
طلبت من ابو عدنان والرجال ماقصر خله ابنه ياخذ بان ويوصلها ومقبلت اعوف فلاح وارجع للبيت گلبي نار عليه
انتبهت قبل ساعتين على مره واكفه بعيد عنا وتباوع وتبجي موتت نفسها من البجي من اجت ابو عدنان سلم عليها اني شايفتها لمرته هاي مو ام عدنان هااي منو جنت منهاره على فلاح وما مركزه واريد بس واحد يطمني عليه ومن مر الوكت والكل راح يله ركزت زين وتذكرت المره الي اجت درت وجهي لكيتها كاعده وحاطه ايدها على راسها
الفضول كتلني اريد اعرف هاي منو دورت على ابو عدنان الراح يشوف وضع فلاح ويه الدكاتره بس اجه كتله اكلك خويه هااي منو
شفت الرجال وجهه گلب الوان وارتبك
ابو عدنان : اختي
بديعه : وشعدها هنا
ابو عدنان : ولو مو وكته بس وضع فلاح موزين والدكاتره كالو صعب يعيش وكله بيد الله اله يوم والنا يوم بس لازم تعرفين
تعاي مديحه
اجت المره جانت اصغر مني تطلع بجم سنه مو هوايه رغم وجهه تعبان من البجي بس شكلها مرتب حسيتها مرتبكه اكثر من اخوها
ابوعدنان : ام بان انتي مره خيرة وبت اوادم ودوم جان فلاح يمدح بيج ويكول وكفت ويايه وحملت الضيم ومايوم شگت وهذا من اصلج الطيب
بديعه : صافنه بوجهه اريد افهم الزبده من الموضوع شنوو
ابو عدنان : هاي مرت فلاح الثانيه ام علي
شرهب : جنت جوه الدوش ومسويه جو الحمام مليان بخار واغني ومنطلقه دك تلفوني اني اخذه ويايه اخاف احد يتصل لو الولد يجون فجأه يخابرون وخاصه مرتضى اخاف ماخذه راحتي بلبيت واني بالاجواء الحماميه الجميلة ومنطلقه باوعت ناي
مديت ايدي مسحت تك ايد بلخاولي وجاوبت وفتحت مايك مااكدر احطه على اذني
داسبح شرايده
ناي : الحكي عمي فلاح ماااااات
شرهب : يايمه عطت من الهبطه وسديت المي شموته
ناي : واكع من بيت على حدايد وملخه بطنه ولج مو بس هيج
شرهب : شكوو بعد كمت ارجف ماوراج بس المصايب
ناي : طلع متزوج على عمه بديعه من ٨ سنوات ومحد يعرف ومرته مخلف منها اثنين ولد
شرهب : لطمت على صدري صخام الصخم وجهه
