رواية أرض الخناجر الفصل السادس والثلاثون بقلم ايلول
شمسوي حتى بطيف ما ترضى أحاچيك
مو بأيدي ساعة نوم وتحلمت بيك
══━━━━✥◈✥━━━━══
جــويريه :: درت عليه بصدمة هستوني اريد احجي فر راسه ومشه ركضت بسرعة اصيح وراه
-بس خلي احاچيك.
لزمت باب المطبخ الخارجي فاتحته على كيف اصيح وراه وهو يمشي يريد يطلع من الحوش والتفت شافني بالباب خزرني واجاني بعصبية رجعت ليوره وهوه وصل يمي لزم الباب ونتر
صــيهد:: بالحسين لو عدتيها ومديتي راسج الا افصم ظهرج.
رفعت أيدي أأشر بأصابعي
-بس ردّت احاچيك.
ما اهتم جر الباب سداه وراح، ضربت رجلي بحرگه أغلط عليه
وكل ما يحترك كلبي منه كبل اگول عليه "شعلان".
صعدت فوگ ضميت الفلوس ونزلت للهول ندى عيونها يردن ينفجرن ابنها يبجي تسكت بيه والنسوان يحجن عليها يباوعلها ويتهامسن، وكفت يمها بحيره ما اعرف بشنو أواسيها، أخذت رضا ودخلت الغرفتها، والنسوان شويه شويه بدت تروح بس اخوات خالة ايمان بعدهن.
رغد::تعبـــت من الركضه بين النسوان وبين المطبخ كل ما اگول خلصت يصيحولي، آخر شي بقن خالاتي ودخلن يم امي للغرفه وماسه وياهن، رادن چاي طبيت للمطبخ واجن يمي جوري وندى يعزلن المطبخ درت الندى اسألها
-رضا نام؟
هزت راسها اي مختنگه وتريد تبجي سكتت اغسل بالاستكاين واحضرهن درت على باب المطبخ مفتوح على كيف نسمع صوت الولد وضحكهم بالحوش وولد خالاتي هم موجودين، صار وهـــب بالباب مبتسم وبساع گال
وهـــب :: تعاي رغد.
عدلت شالي ورحتله وكفت يم الباب وهوه مغطيني بس اشوفهم صــيهد دار علينه ماعاجبه ويأشر وخري. عفته وعاينت الوهب اركز وياه
وهـــب :: من يرحن خالاتي مــيثم يريد يطب يسلم على امي ويحاچي مرررته بعدنا ما گلنا بسم الله وضل يتشرط ابن الروسية.
ضحكت وهوه يحجيها بأبتسامه
-حچي يفيدكم عقدوا وخلص يحاچيها يتغزل بيها تسكتون مالكم غرض.
-غير ادفنه.
ضحكت شال راسه عاين الندى واكفه يم السنگ تغسل مواعين تحسر ساكت وسمع صوت رضا يبجي ندى ذبت الجلافه من أيدها ودنگت على السنك بجزع تردد بصوت مخنوك
ندى:: الصبر يا ربي الصبر.
وجوري بساع راحت جابته الها يبچي بصريخ ومايرضى بجوري چلب برگبة ندى وهي تكله
ندى:: لك ماما شبيك والله موتتني.
وهوه شابگها يبچي ويطك بيها على صدرها وعلى وجها تريده بس يسكت ماكو ملخها يجر بحجابها وبس تكض ايده يزيد ماينقص من تريد تنزله للگاع يجلب بيها بأثنين اديه.
طب وهـــب بساع وراحلها وكف كدامها ومد اديه اخذه منها وهوه متسودن يشمر روحه على ندى ومن وهـــب ضل كاضه غصب عنه شال ايده يريد يطك وهـــب وهوه كض اديه اثنينهن خازره وصاح بوجهه
وهـــب:: ووولك.
وندى بساع مدت أديها اله وگالتله بخوف
ندى:: انطيناه اني اني هسه اسكته.
وهـــب :: وخررري.
حجه خازرها واخذ رضا طلع من البيت وندى كعدت بالگاع غطت وجها تبجي وتحجي
ندى :: والله اذا ضربه اموووت.
ضليت اعاين وراه اخذه وطلع من الحوش
-ما يطكه يجوز راح يفره بالسياره بلكن يسكت.
مشيت صبيت چاي وديته الخالاتي ورديت للمطبخ يم ندى وجوري، اساعدهن بس بالي يم وهـــب خاف رضا يضوجه ويعصب، شويه ومشيت يم الباب عاينت الولد على صفحة واكفين ما يشوفوني ولمحته هوه طب للحوش ورضا بأيده ساكت مشتريله حلويات عاينلي وأشر بأيده يريد چاي، بساع درت على ندى ومشيت للطباخ
-ندى هذا وهـــب رضا عده ماخذه مشتريله وساكت.
هزت راسها خوش وتمسح بدموعها، صبيت چاي الوهب ومشيت يم الباب اريد أأشرله يجي ياخذه ووگفت بهتانه بس فاتحة عيني وانه اشوف سلطان واكف يضحك وي الولد إبنه بأيده يتشاقون ويضحكون، التفت وصارت عينه بعيني تلاشت ضحكته شويه شويه، احس عيوني انترسن دموع وگلبي دگته تخربطت شلت راسي من حسيت صار بيني وبينه حاجز بلعت ريك وانه اشوف صــيهد واگف گدامي وخازرني دنگت بساع ومديتله ايدي اللي بيها الاستكان ترجف همست بصوت مخنوك
-الوهب.
-بعد ما اريدن اشوفج يم الباب.
عاينت لوجهه يحجي بغضب واخذ الاستكان من ايدي جر الباب وسداه من بره وانه احس گـــلبي نار غسلت وجهي وما ادري على شنو كل هالقهر شعليه بيه ليش شوفته تدمرني مو گلتي نسيت رغد گلتي نسيته وطلعته من گـــلبي.
ماگدرت اضل يم البنات ماگدرت اكض دموعي مشيت للحمام بس سديت الباب جرن دموعي ونار احس تسعر بگلبي.
مسحت عيوني من سمعت صوت مــاسه تدور عليَّ دكّت الباب غسلت وجهي وفتحته الها
مــاسه:: عاينت الوجها مستغربه عيونها حمر مدري عليمن باچيه گتلها
-خالاتي يسألن عليج يردن يرحن تعاي اكعدي يمهن شويه.
هزت راسها اي ورجعنه للغرفة يمهن كعدت بصف خالتي عبير حجيت همس بيني وبينها
-خاله باجر اوديلج التلفون بأيد وهـــب .
طكتني على ايدي وهي تگلي
-غير ازعل منج والله ابد ما تودينه هديه من عدي هذا.
سكتت واسمعهن يحجن وي رغد يردن يزوجنها يدورلها رجل خالتي الچبيره گالتلها
-جوارينه همه الحايط على الحايط من ماتت مرته ضلت اخته تعاونه بجهاله هيه واخوات مرته هم يجن دوم يمهم وهسه اخته تريد تتزوج ويريدله مره خيبه وموظف وبيت وحدج وجهاله مو وكحين وألله زينين اشوفنهم نوبات العصر يطلعون بألباب فقيرين.
عبير:: اي خاله رغد چا المن ضاله؟
ورغد مدنكه وتهز راسها لا وامي تعايلنها ساكته وخالاتي يلحن عليها ومن كلش لحن گالتلهن
رغد:: لا خاله ما اريدنه اربع جهال وكلهم صغار غير يطيحون حظي وخالاتهم يلعبن بيه طوبه عوفني فـــدوه.
عبير::جا ابن حماي مطلك وماعده جهال ترضين بيه؟
ايمان:: خيه عوفنها شجاچن.
حجتها بضحك وهنه كلهن يحجن وكاللها
-مانريدها تضل النوب يطونها الياهو الچان.
ايمان:: لا لا مو ياهو الچان، سلطان يريدها وان شاءالله ما تصير الغيره.
ورغد فتحت عينها خازره امي وخالاتي سون فلك كلمن تجر بصفحة
عبير:: ياا وتاخذين على شرچ؟ شني ايمان چا ما اخذها من الاول تردين هسه تطينها اله؟
وخالتي الثانية تأيدها وتگلها
-رغد خاله مالج غرض بأمج انتِ شنو التردينه صدك راضيه بأبن عمج؟
ورغد تعاين الامي بقهر ودارت الخالاتي گالتلهن
رغد:: لا خاله ما راضيه ولا ارضى بيه، خل امي تصير زينه وتتحسن وانه اكلج ليمن تدوريلي رجل كون بعيد عن سلفنه.
وهنه ضحكن ويتشاقن لان شافن امي ضاجت شويه وگامن يردن يرحن مشينه وراهن للصاله سلمنه عليهن وطلعن درت ومشيت بساع اريدن أشيل الوردات من الميز چانن عباره عن
"وردتين كبار واربع وردات بحجم اصغر منهن شويه
وعشرين ورده صغار كلش بعدهم ما مفتحات"
كاضتهن بأثنين اديه فرحانه بيهن جايبلي الحديقة كلها وانه
أحرك بيهن حسيت لمحت بنصهن ورقه صغيرة طلعتها وعفت الوردات على الميز واعاين للورقة والضحكة شاگه حلگي كاتب
"سنتان وأربعة أشهر وعشرون يوماً منذ اول مره حتى ألأخيرة.
اقرأ واضحك وما احس الا بــدور خمشت الوردات وركضت الغرفة امي ركضت وراها وانه شايله الفستان بأيدي وسعاد تغلط علينه وبدور تصيح
بــدور:: نص الج ونص اللي.
-لاااا لا تفتحينهن يممممه صيحي عليهاا.
وافتر مناه ومناه داير ماداير امي بس اريد اكضها وهي تشرد ما الحك بيها تضحك وتريد تفتح الشريط
-يمممه حاچيها يمممه.
ايمان:: خاب وين صــيهد ويجي يطيح حظجن
ووي حجايتها انفتح الباب وطب صــيهد بــدور بساع شمرت الوردات بحضن امي وانه عقجت الورقة بأيدي ولو اگدر چا بلعتها عاينلنه مضيك عينه وامي گالتله
-صــيهد بــدور تبچيلها على كتله.
مشه يم امي وبدور صارت مثل الصنم واكفه بصف الحايط وماتنطق وگف يمها وهيه ضاعت صارت هلگدوتها القزمه جنها امي مد ايده كض اذانها جرراها وهي ماتنطق
صــيهد::شمالچ ولچ مستخفه؟؟
وهي ساكته حتى ماترمش عتاها ينتر
-مو احاچيچ؟
وانه اعاينلها عرفتها تريد تسوي روحها متخربطه شمرت روحها تريد تطيح بالگاع كضها حيل من اذنها وايدها
صــيهد:: گومي گومي مايعبرن
ومن شافت خطتهل انكشفت چلبت بأيد صــيهد تكله
بــدور:: تدري اخذت ميع ميه كامله
-بيمن بالجذب؟ حيوانه ليش صايره ماتنردين؟
-انرد والله انرد اذني صــيهد واح تنكطم حبااب يممه يمه احجي.
ايمان:: عوفها صــيهد بعد ما تعيدها.
-شمسويه هيه؟
بــدور::كلشي ما مسويه ردتلي ورده من هذن الجابهن الها مــيثم وتسودنت عليَّ
عاف اذنها وهي ماصدگت بساع شردت دنك عينه الحضن امي الوردات مشمورات على رجليها وشال راسه عاينلي هز ايده ودنك باس راس امي گالها
-استلمي نسيبج ابن الروسيه مال احط هالورد على گبره.
وگعد بصف امي يبوس اديها وخدودها طكته وهي تگله
ايمان:: احسن منك صارلك چم شهر خاطب بت عمتك اشايفه منك البنت؟ ورده، حچايه حلوه هديه تلفون ما جايبلها شمالك؟ كلشي ماكو اطيك صياح وعركات شاطر بيهن، هم حظها الهالبت فوگ ما الدنيا جايبتها تكفخ طاحت برجل چنه چان عايش بكهف كلشي مايعارف.
فاتح عينه مصدوم بأمي ودار علي خازرني لان اعاينلهم انه شعليه بله حك وره اذنه منحرج ومدنك لان امي رزلته يمي، دار على فتحة باب الغرفة رغد شافته وگالتله مرتبكه
رغد:: مــيثم يريد يجي يسلم على امي ويشوف مرته.
هز ايده ووگف توه يريد يحجي وامي گالته
ايمان:: اطرده اطرده ما أوصيك.
دار عليَّّ گال
-شيلي ورداتج وامشي فوگ.
دنكت بساع اريد اشيل الوردات واطفر كضتني امي من أيدي وگالتله
ايمان:: شني غير عقّد عليها يكعد يمها ويشوفها ويحاجيها ويتفاهمون.
وهوه معصب يگلها
صــيهد:: شني السالفة غير توهم عقدوا عود بعدين يسولفون.
-مالك غرض جا مو هالتاخذ جوري يمك للمشتمل وانتَ بس عاقد عليها.
حجتها وغمزتله وهوه مايخزر امي يخزرني لان سمعت جا شسوي اسد اذاني مثلاً گال
صــيهد:: رايح انا وانتِ هيو مــاسه شويه وگومي الچذابه مسويه روحها ضايجة وهيه مكيفه.
طلع من الغرفة ورغد طبت بساع جرتني تسحل بيه لغرفة ندى
رغد:: بسااع بدلي بساع.
وندى وجوري يدورلي فستان،
-ليش جا شبيه فستاني.
رغد:: وولج هوه بدل واجاج جا انتِ شني لزكتي بهذا؟
-مو ردت اروح الرنه.
ندى:: بعدين عود ارجعي البسيه.
وطلعلي فستان ماروني وبيه ستراس بالصدر وبالردن ومثل القيطان ينزل من الصدر لنهاية الفستان من الجهتين لبسته ومسحت المكياج وهنه ماراضيات يحجن عليَّ بس انه اريد يشوفني بالحقيقة بدون غش على اساس ما شايفني گبل، ارتبكت من سمعت صوته هو ووهب طبوا للبيت عاينت للمراية الفستان مخصر على جسمي والصدر دلع تلفتت ادور حجابي وهنه وحده تحطلي عطر وحده تحطلي حمره
-بس عوفني، حجابي وين حجابي.
واحس برغد طكتني تنتر
رغد:: كااافي حجابي وحجابي موتتينه
وكضتني من وجهي حيل شلون الام من تريد تمشط شعر ابنها وحطت المشط بشعري نزلتلي كذله وندى بساع شالت الشكاله من شعري فتحته وخلته ينزل على طوله.
-والعباس ما اطلع هيج استحي انه استحي شبيجن.
جــويريه:: صدك تستحي رغد خطيه.
-انتِ مثلها تدافعليها اسكتي لا اكضج واطلعج الصيهد مصلخة.
وخرت جوري مبتعده حاضنه روحها وتعاين الرغد بخوف وهي مشطت شعري وحطتلي طوك تريدني اطلع هيج والله لو اموتن
-ما اطلع هيج لو تعضيني من گـــلبي .
احجي مطنگره وهيه عاينتلي بقهر، ندى راحت للكنتور طلعتلي شال واجت يمي حطته على راسي خلته مفتوح وشمرت اطرافه مناه ومناه.كتلها
-لا سترني ولا دفاني.
حجيتها ورغد عضت ايدها تريد تلطم ومشت للمطبخ تكمل الچاي، بس طلعت اخذت المشط لميت شعري ورجعت الشكاله وشلت الكذله ضميتها وندى ماخلتني ألفّ الشال عدل
-عوفيه هيج مفتوح شبيج مــاسه راح اكتلج.
سكتت مرتبكه اجت رغد بأيدها صينية الچاي شافتني وهزت راسها متحلفه بيه اخذت الصينية منها ومشيت رجليَّه يرجفن وكفت يم باب الغرفة ودرت عليهن
-استحي.
سعاد:: نهجم بيتج تستحي مفلفه عمي.
درت عليها وهيه تمشي الغرفتها وتدردم ورغد خازرتني تريد اطب عليهم وانه ادك رجلي بالگاع واحجي بلا صوت بس احرك بشفايفي
-ماا ماا استحي.
درت على الباب من انفتح صار بوجهي وهـــب يضحك ومن شافني راحت ضحكته دنكت وخر من الباب طلع وگال
-طبي.
مشيت خطوه گـــلبي يدك حيل ومدنكه كل حيلي ووهب من طلع سد الباب وراه واسمع امي گالت
-تعاي يمه تعاي.
مشيت وحتى ما ادري بيه وين گاعد الصينيه بأيدي والچاي يتلطلط بالاستكاين ترس الصحونه واسمع صوته گال
مــيثم :: خل اگومن مناه صاير بجد الباب.
شلت راسي اعاينله گام من مچانه لابس دشداشة بيضه مدري منو كاويها بحيث مابيها اي كسره، السبحة بأيده يلف بيها على اصابعه خله مخده بالركن الثاني مال الغرفة بعيد عن الباب وكعد دنگت بساع حطيت الصينية يم امي گالت
-لا يمه ما اريدن روحـــي ودي الميثم واكعدي.
وكفت مرتبكه والصينيه بأيدي مشيت يمه مدنكه حطيت الصينيه گدامه همس
-رحم الله والديج.
كعدت على جهه اعاين الامي وهي تخزر وتأشر تدني يمه والله ولا أتدنى ساكتين كلنه بس صوت الخاشوكه من خاط استكان الچاي ومن شال الاستكان ومسح نهايته بطرف الصحن اعاين بس الايده الحلقة الفضه والايد الثانية محبس شذرته سوده بلون خرز السبحة.
درت عيني الامي تعاين علينا واحنا بس ساكتين وامي بأيد وحده نزلت روحها للفراش غطت راسها وگالت
ايمان:: انه رأح انامن.
سكتت اعاينلها احس مــيثم يسمع صوت دگات گـــلبي ومنحرجة الوكت احسه واگف ما يمشي واحجي على روحـــي مو ذاك اليوم تعاركت وياه جا هسه ليش مستحيه منه عبالك اول مره اشوفنه، سويت روحـــي اعاين للباب وبطرف عيني عاينتله شفته مدنك عاينتله عدل كون مايرفع عينه خل اعاين زين، كاض الاستكان شارب نصه، وجهه أصفى من وجهي لحيته شگره ورموشه طوال، واحجي بگلبي عزه بعينج مــاسه هذا يلمع.
ماخلاني اعاين براحتي بساع شال راسه يعاينلي صارت عينه بعيني دنگت منحرجه گال بصوت هادئ
مــيثم:: جيبي هذيج العلاگه.
درت عيني يم امي علاگه مال هديه وگفت مرتبكه اخذتها ورجعت يمه من مديتها اله كضاها هي وايدي فتحت عيني حيل يجر بيه وانه اجر بأيدي أشر على مكان بصفه يريدني اكعد بيه بلا مايحجي احس بروحي صخنت دكات گـــلبي وصلن الصيهد سحبني من ايدي كعدت بصفه ابلعم، وهو عاف ايدي
ووخر الصينية مال الچاي على جهه وفتح العلاكه مدنكه وعيني بس وي أيده طلع منها علبه لونها ماروني عافها بيني وبينه وطلع كارتون تلفون دار علي يسأل
-تلفونج رجعتيه؟
عاينتله وهو مركز بعيوني أشرت لا وهمست
-خاله ماقبلت گالت هديه مني الج.
ضل يعاين بعيوني ساكت دنكت مستحيه وجهي احسه صخن گال
مــيثم :: ميخالف حاولي ترجعينه واذا ماقبلت تاخذه عوفيه يم امج واستخدمي هذا.
هزيت راسي اي وانه مدنكه عافه بصفي وجر العلبه الثانية فتحها عاينتله من صار صوت خرز طلع منها خلخال لف طرفه على اصبعه وعاينلي مبتسم دنكت مستحيه من نظرته تحرجني
خلاه على العلبه وقربها يمي وهوه مدنك همس بصوت ناصي مايريد امي تسمع منحرج وگوه طلعت منه الكلمة
مــيثم :: بس عاينيلي شويه حتى أروحن
والله بعد ما اعاين ضليت مدنكه وطبول تدكّ بگلبي الجو ثلج وانه احس بروحي عرگت زفر نفس بحسره
مــيثم :: مــاسه.
ماشلت راسي ضليت اعصر بأصابعي واطكطك بيهن أريد اشرد ووگف النفس ببلعومي من مد أيده بتردد خلاها على ايدي
لمها بين اصابعه وجراها بحضنه بلعت ريك ارجف حط اصابعه بين اصابعي وايده الثانية يمسح بيها ظهر ايدي ويتلمس الحلقة بأصبعي، اصابعه دافيه ولمسته الايدي تقشعر البدن فر الحلقة بأصبعي ويتحسر رجع گال
مــيثم :: عاينيلي بعد ما اگدر اشوفنج.
وانه احس روحـــي مصخنة وجسمي كله احتر اريد بس ارفع راسي واحط عيني بعينه ما اگدر وهوه يعصر أيدي بين أديه شلّت راسي مرتبكه صارت عيني بعينه، يرمش بثگل ومثبت عيونه بعيوني احس بنظراته نزلهن من عيوني لشفايفي ورأساً صارت عيوني على تفاحة ادم تصعد وتنزل رجعت ركزت بعيونه وين جاي يعاين عصر أصابعي بأيده وعيونه على رگبتي وصدري، الفستان دلع هواي ورغم مخليه الشال حسيت روحـــي عريانه، مديت ايدي بساع لميت الشال على رگبتي زفر نفس بحسره ورد عاين لعيوني دنگت مرتبكه .
كال بصوت يرجف
مــيثم :: راح اروحن انا.
هزيت راسي اي اعاينله شال ايدي لوجهه دك گـــلبي حيل وحتى ضيعت النفس شلون اسحبه، من فتح ايدي وخلاها على شفايفه وحسيت بشعر شواربه ولحيته دغدغن باطن ايدي باس اصبعي فوگ الحلقة مغمض عينه، روحـــي راحت، تحمحم وعاف ايدي مرتبك يمسح بوجهه ابتعدت عرگانه وخجلانه ميته بدمي گال.
-بس شوفي وهـــب وين، اريدن اطلع.
هزيت راسي اي ومشيت بخطوات ترجف فتحت باب الغرفة وطلعت صار بوجهي وهـــب بالمطبخ گتله مرتبكه
-الولد يريد يطلع.
حجيتها وهو خزرني بغضب ورغد من وراه تعض بأيدها وتأشر وخري وانه مافاهمه شي مشه من يمي وهـــب ودفعني أشرتلي رغد اصعدي بساع، ركضت فوگ وكلشي ما فاهمه. طبيت للغرفة يم جوري وبدور خايفه وهنه يگللي شبيج افتر كدامهم آكل بأظافري صعدت رغد والأغراض بأيدها گالت
-عزه بعينج ولج مــاسه.
-شكوو والله خوفتيني شصاير؟
تعاينلي بصدمه حطت ايدها على حلكها وتسأل بهمس
رغد:: وولج بايسج؟
فتحت عيني بصدمة
-لاااا شسالفه.
-وجهج احمر مطكع.
عاينت للمرايه مرتبكه خدودي حمر وصدك وجهي مطكع درت الرغد اريد ابجي
-والله ما جايسني بس انه مستحيه ووجهي صار هيج ولان بارده وهاي والله رغد.
-فشله من وهـــب بساع خزرج عباله غير شي وحتى من طلع وي مــيثم اسمعه ينتر بيه.
-شكد عيب شلون هسه اكل الوهب احلفله بالقرآن مابايسني.
رغد:: لا غلسي انجبي.
ضليت اكل بروحي حيل مستحيه من وهـــب، ندلت رغد جوه والبنات يحجن ويهونن حتى ما اضوجن، لكيت رساله من رنـــه كاتبه
-بچيت وماخلوني اجي.
قريت رسالتها ومتت من القهر بساع خابرت على صــيهد رد عليَّ بنتر ومن ضليت ساكته حجه بهدوء
صــيهد:: ها جبار.
-عاين صــيهد!
-ها اخوي احجي اسمعك؟
-عاين ماخلوا رنـــه تجي ولا ريـــمه واثنينهم صاحباتي والله بجيت انقهرت جا ماخلوني افرح.
سكت وانه من فشلتي گدام وهـــب ومن رسالة رنـــه خنگتني العبره ضليت كوه احجي، احس بيه يمشي وحاجني بصوت ناصي
صــيهد:: شتردين اسوي اجيبهن الج هسه؟ اعيدلج العقد واخليهن يجن كليلي شني التردينه وتدللين!
-لا بس ميخالف اروحن انه؟
-لاااا ما تطبين بيت شاكر.
-لا البيت عمي شامل ونودي على ريـــمه هاه شگلت؟
-خل اجي واشوفن.
حجاها وسد التلفون بوجهي نزلت الغرفة ندى بساع رجعت حطيت مكياج حفيف ولبست فستاني وحجابي حتى نصور سوه، سمعت صوت صــيهد بالمطبخ يگلهن
-جبار وين؟
رغد:: يا جبار؟
طلعت مديت راسي مبتسمه
مــاسه :: انه جبار.
ضحكن هيه وندى گال
-ألبسي عباية
جريت عبايتي من الدرج لبستها ووگفت گدامه تلفوني بأيدي ضل يعاينلي ساكت ارتبكت حسيت لان الحمره قوية دار على رغد جر الشال مالها حطاه على وجهي مغشيني جرته رغد ما راضيه گالتله
رغد:: شني السآلفة ياهو يشوفها.
سكت مشه وانه وراه لحكته مشينه البيت عمي شامل دفر باب الحوش وطب جان طــروادة كاعد يم الحوض وفاتح الحنفية يغسل رجليَّه فز من دفر الباب ووگف عدل
طــروادة :: ياهلاا.
وصيهد همس بصوت ناصي لاول مره يگلي
-سلمي.
-السلام عليكم.
طــروادة:: وعليكم السلام، اهلاً وسهلاً.
ودار للبيت يصيح
-عفررره رنـــه تعاالن.
مشيت للبيت تلاكت وياي عفراء سلمت عليها واجت رنـــه تركض عيونها مورمه صدك باجيه شبگتني كل حيلها
-اجيتج ماخليج تبجين.
رنـــه :: هههههه غير تجيبين ابن الروسيه وياج اشوفنكم سوه واضحك عليكم.
طكيتها على أيدها اضــحك ودرنه عل صوت صــيهد وطرواده يتعاركون صــيهد يعاتب شلون طــروادة ماخله البنات يجن ولا هوه اجه يم الولد تقدمت عفراء وكفت يم باب الهول گالتله
عــفراء:: خويه ماله غرض هوه احنا مانرضى نجي وألله فرحانين الماسه وهاي شفناها وتباركنالها مو اله نجي.
وصيهد مدنك ويحاجيها
صــيهد:: لا خويه شني مو الا تجن جا لا انتن لا بت شاكر غير صاحباتها ويجن يمها هسه الغريبات ملتمات وبنات عمها مو يمها شنّي السالفة.
طــروادة :: ميخالف يلتمن هناه يسولها حفله ويفرحن بس بيتكم مايطبنه.
سكت صــيهد يهز ايده وطبيت وي رنـــه للغرفة نضحك ونسولف من تروح من يمنه عفراء احجي كلشي الرنه ومن تجي عفراء اضل بس اضــحك استحي منها.
""""
ريـــمه :: واكفه بالمطبخ وي فرح اسوي العشا وطب سلطان گال
-البسيلج عبايه وتعاي.
صاحت عليه امي
-وين ماخذهاا؟
مارد عليها ضلت تصيح وتغلط واجه ابوي على صوتها حاجه سلطان گاله
سلطان:: بنات اعمامي ملتمات يم بيت عمي شامل ويردنها يمهن.
ميلاد:: ما ترروح مايجن يمها هنه يا يوم وحده منهن گالت اروحن يم ريـــمه شو بس هيه تروحلهن.
شاكر:: ماالج غرض خليها تروح، روحـــي بويه يم بنات عمج.
أشرلي سلطان بساع وامي تحجي ماراضيه صعدت فوك بدلت ولبست عبايتي حاجيت هاجر هزت راسها لا ماتريد تجي من علمتها تقرأ ضلت تحاول تقرأ قرآن ومخلصه وكتها لو ترسم لو تقرأ، نزلت وبساع بدون ما اسمع امي مشيت السلطان واكفلي يم الحوش گال
سلطان:: مالج غرض بأمي ضلي يمهن شگد ما تردين اذا يباتن سوه بس ودي عليَّ حسين خل يگلي وضلي يمهن.
-صدك ترضى؟
عاينلي مبتسم حط ايده على جتفي ومشينه سوه وكفنه يم باب الحوش مال بيت عمي شامل وگبل لا يدك الباب گال
-جا ليش ما رحتي للخطبه؟
-أمي مارضت.
-والله زحمه بالحسين امج ماتفكر؟
سكتت مدنكه التفتنا على صوت ســليم
ســليم:: ها وين؟
واجه وكف بصفنا گاله سلطان
-البنات يردنها يمهن.
ســليم :: هاه؟ جا مو تبطين.
سلطان:: لا خل تبطي ليمت ما يطشن تجي شني السالفة؟
عاينله ســليم متفاجئ گاله بضحك
ســليم:: شنّي السالفة شگتلها هسه انا؟
-خنگتوها وألله خنگتوها.
سكت ســليم وسلطان دك باب الحوش طلعلهم طــروادة سلموا عليه وبساع صار على صفحة من لمحني وياهم طبيت واسمعه يگلهم
-وين رايحين؟
ســليم :: يم مــيثم شني ما تجي؟
طــروادة:: تانوني بس اجيبلي لفة جوعان وهذول ما يسوولنه عشه.
وانه طبيت للبيت عفراء جانت بالمطبخ تسوي بالعشا سلمت عليها بباب المطبخ بعدني واكفه احجي وياها واسمعه صاح عليها من الشباج
-عفره سويلي لفة خل اروحن وي الولد.
راحت هيه تسويله لفة وانه مشيت يم البنات سلمت عليهن وتباركت ألماسه اعاتبها
-شكد جذابه مو ذاك اليوم تحجين على مــيثم ؟
ضحكت مدنكه
مــاسه:: بعد صارت.
رنـــه :: تعاي شوفي صورهم يموتن.
كعدت بصفها نعاين للصور ونضحك من شفناها فرحانه ومتونسه فرحنالها شويه وصاحت علينه عفراء گمنه يمها بالمطبخ نحضر وياها العشا ونسولف گتلهن.
-لو البنات يجن ونضل سوه.
عــفراء:: نودي عليهن، وضلن اليله سوه مادام باجر عطله!
مــاسه :: لا صــيهد ما يرضى.
رنـــه :: ترى محد يجي لبيتنا، عبود وي سجاد هسه اخابره اكله نام يم سجاد لا تجي، وطرواده يروح للگيعان مايرد للصبح شمالجن ؟
ريـــمه :: خابري صــيهد وشوفيه بلكن يرضى.
سكتت مــاسه محتاره، حطينه العشا وكعدنا حاولت انسى كلشي واضحك واسولف وي البنات.
جــويريه :: شكد قهرني، لا اگدر اغلط عليه گدام اخواته ولا گدامه عفت البنات بالمطبخ وصعدت للغرفة طلعت الدفتر كتيت عليه جرايد جرايد هيج يله يبرد گـــلبي منه، نزّلت مقهوره ابو الحلوات يقرر من كيفه، فكرت بيني وبين نفسي اروح احجي وياه وافهم من عده واحجي العندي.
سويت العشا وياهن محتاره وخايفه هوه يحب بس خاف حتى من يتزوج اليحبها ما يعوفني، واني احلامي بعيد عن صــيهد بهواي مثل آي بنيه راسمه شكّل وشخصية للشخص اللي اتمناه وماكو اي صفه من الاريدها موجوده بصيهد لا شكل ولا صفات
بكل يوم اتخيل نفسي اكبر واتخرج وتصير عندي وظيفة وقتها اگدر اشتري بيت واعيش بفلوسي بعيد عنهم وره ما صيهد يطلگني .
وهناك اصادف الشخص اللي راسمته بمخيلتي
شخص فخم لبسه عبارة عن بناطير وستر باللوان غامقة شعره عالي ويكون فيلسوف او شخص عالم او مختص بعلم يخص الكتب.
ونلتقي صدفة بجو ممطر وتحت اضاءة الشارع الصفره ولقائنا مايدوم غير ثواني بس لا اني انساه ولا هو ينساني ونرجع نلتقي اكثر من مره.
كل هذا جنت ارسمله بعقلي واتخيل يجي يوم واعيشه وبعدني متأمله وراسمه الهاليوم اللي اخلص بيه من القرية وابتعد عن الكل اعيش بعيد ووحدي، حلم ويوم عن يوم يكبر بداخلي واخططله واحس يتحقق بعد ما انجح واخذ معدل زين يوصلني للي اريده
بس احلامي كل ما تكبر يعدمها الواقع.
فزيت من خيالي على صوت رغد وهي تگلي
-مو تردين تحاجين صــيهد وديله عشاه واحجي وياه.
سكتت اعاين للصينيه وهي اخذت الصينيه. الچبيرة وراحت توديها الاهلها بالهول، لفيت شالي عدل وشلت صينية العشا ومشيت للمشتمل افكر شلون احجي وياه، دخلت وجان باب الغرفة مفتوح وهوه بأيده سلاح يريد يضمه بين الكنتور والحايط دنكت ومشيت خليت الصينية بالگاع ووگفت اباوعله ضم السلاح ووگف ينكث بأديه يباوعلي
-خل اغسل ايدي واجي لا ترحين.
هزيت راسي خوش، وصل لباب الغرفه والتفت عليَّ باوع لوجهي گال
-انا مو گتلج لا تمسحين الحمره.
-غير صارت صلاة.
-امشي جيبيها وتعاي حطي هناه كتلج أنا امسحها ليش تلعبين بكيفج.
استندت على الميز مدنكه اهز راسي لا ما اجيبها عافني وراح غسل اديه ورجع للغرفة جان لابس قمصله فوگ التشيرت الاسود نزعها عافها على الچرباية التشيرت نص ردن وحواف الردن ضابات على زنده مبين شويه من وشم الصقر اللي بأيده شلت راسي اباوعله من وكف گدامي عاكد حاجبه ومضيك عيونه.
صــيهد:: أنا شگلت.
دنكت ساكته اغلط عليه بگلبي مد ايده رفع وجهي
-تعانديني؟
هزيت راسي لا
-ما اعاندك بس لان اريد احجي وياك ومن اروح تلزمني جده.
سكت ما مصدكني يباوع بوجهي راح كعد يم الصينية وگال بهدوء
-تعاي تعشي بعدين نسولف.
كعدت مقابيله مخليه اديه بحضني وهو ياكل، واني افكر منين ابدي وشلون احجي واذا سولفتله من هسه على خطتي خاف يلزمني ويذبحني، فززني من گال
-اكلي.
باوعت لوجهه والايده مادلي لفة صغيره مالّ حميسة لحم اخذتها من ايده أكلتها مرتبكه وبردانه، بقى مره يسوي لفة ياكلها ومره يمدها الي وحتى من شبعت خفت آكله كافي حتى لا يگلي لاا مو بكيفج، گام غسل وبس دخل للحمام اخذت الصينية وطفرت شارده حتى ما اريد احجي وياه بعد.
خليت الصينية على الكاونتر سعاد واكفه تصب چاي الهم غلطت عليَّ عفتها ومشيت لغرفة خاله ايمان بعدهن يتعشن هستوني كعدت ودكّ تلفونها بس ردت باوعتلي وگالتله
-اي يمه هسه تجيك.
سدت التلفون وگالت
ايمان:: گومي جــويريه يمه اخذي چاي الصيهد.
سكتت اعاين بالوجهه ومن نظرتي بــدور عرفتني اريدها هيه تگوم گبل ضحكت وگالت
-لو تموتين.
عفتها وگمت للمطبخ خفت هسه شيخلصني منه، اجذب عليه اگله رحت خليت الحمره، وصعدت بسرعة للغرفة خليت حمره ونزلت، صبيتله كلاص ورحت دعيت قبل لا ادخل للمشتمل بعدني بباب الغرفة وطكت ريحة الجكاير بخشمي فتحت الباب ومديت راسي بخوف شفته كاعد على طرف الچرباية يدخن عاينلي بطرف عينه تقربت متوتره مديتله الچاي ما آخذه، شال ايده لزم الجكاره من شفايفه بين اصابعه ومد أيّده الأيدي كضاها منّ المعصم وبأيده الثانية اخذ الكلاص من عندي عافه على صفحة وباوعلي
صــيهد:: تلعبين وياي؟
بلعت ريك اهز راسي لا وتركيزي وي ايده اللازم بيها معصم ايدي احس الجكاره تفلت من بين اصابعه وتچويني، يحجي بنتر
-شني تگليلي اريدن احجي وياك والنوب تشردين؟
-لا ما شردت، رحت اجيب.. چاي.
نسيت حتى الحمره من شفته اعصاب
عاف ايدي دفعها علي بنتر مسح وجهه وجر اخر نفس من الجكاره طفاها واخذ الكلاص يشرب ، فزيت على صوت الرعيد البرده چانت مرفوعه من الشباك ومن رعدت وصار برق بالسما بين بالغرفة، درّت عيوني رجع ليوره على الچرباية وحجه بهدوء
-تعاي اكعدي وسولفي.
مشيت يمه متردده كعدت گدامه وسحبت رجلي تربعت على الچرباية رجع ليوره اكثر سند ظهره على تاك الچرباية يشرب چاي ويباوعلي واني ساعة اباوعله ساعة أدنك گال
-سولفي شتردين.
دنگت ساكته سمعته من خله الكلاص على الميز رفعت راسي اله عدل كعدته يباوعلي
-سولفي اسمعج.
-ما اعرف منين ابدي!
حجيتها مختنگه لان فعلاً ما ادري منين ابدي وشلون احجي وياه گال
صــيهد:: أبدي منين ما تردين وخربطي بحچيچ عادي بكل الحالات أنا افهمج.
سكتت عينيّ بعينه وگلبي جوه صدري يقاتل مو يدك مسحت وجهي اتحمحم واجر بالردن على اديه
-باوع مو انتَ گتلي اول يوم عطله تسوي عرس
-اممم.
-يعني شلون؟
صــيهد:: انا اكلج شلون، مو امتحنتي أخر امتحان وثاني يوم تردين تخلصينه نوم ترتاحين؟ مايخلونج يكعدونج الصبح ياخذونج للصالون يلبسونج چفن ابيض ويجيبونج يدفنونج يمي سهله ليش شايله هم؟
اباوع لوجهه بخوف وهوه يحجي عبالك ما يتشاقي همست
-لا اني يعني احجي صدك.
صــيهد:: انا هم احجي صدك.
-تدفني؟
-اي.
بلعت ريك ومسحت وجهي خايفه وگلبي يدك حييل مركزه بوجهه اريد اشوف ابتسامه شي يثيت هو جاي يتشاقى كلشي ماكو مابيه اي ضحكه گال
-بعد عدج سؤال؟
هزيت راسي اي وهو يباوعلي منتظر احجي واني لان خفت چلبت بحلكي حچايه وحده والجمله ماتقبل تكمل
-من ... من ..من..
-من شني كملي الوراها حفظتها هاي؟
-من.. تسوي عرّس اني غير ابقى انام يم البنات.
شال حاجبه بصدمة ومد اديه لباكيت الجكاير جراه بغضب دخن ساكت، رعدت الدنيا من جديد ومطرت مطر قوي ورأها بثواني طفت الكهرباء ضل بالغرفة بس ضوه جمرة الجكارة ، ومن ترعد ويصير برق بالسما اشوف ملامحه گدامي ثانية وتروح.
طول بسكوته وبس صوت المطر بالغرفة والظلام زيد دكات گـــلبي اباوع لجمرة الجكاره من يخليها بين شفايفه ومن ياخذها بين اصابعه، شفتها من بين اصابعه ونمدت بأتجاه ايدي، بلعت ريك من لزم ايدي بين اصابعه سحبها عليه واسمعه من يزفر الدخان لزم ايدي وايده الثاني اخذ الجكاره رجعها الحلگه جر منها نفس صارت الجمره مالتها حمره حييل تلمع رجع قربها يم ايدي وحجه بغضب
-بس تعيدي هالحچايه اچويچ.
ووي حجايته جريت ايدي منه حيل ماعافها نتر
-سمعتييي.
-اااي.
جريتها حيل حضنت ايدي على گـــلبي بخوف
صــيهد:: ادبسز اريد احجي وياج عدل بس تطلعين طلعات مو مال اوادم، شني تضلين يم البنات؟ شوماتعرفين تحجين، شني انا متزوجج في سبيل الله ؟
بقيت ساكته اريد اشرد بس تحركت صار برق وشافني بعدني ماحاطه رجلي بالگاع وزمخ
-اكعدددي.
رجعت كعدت عدل مختنگه الغصه تصعد وتنزل ببلعومي وهو بقى ساكت فترة ورجع يحاول يحجي بهدوء
صــيهد :: غير مرتي يعني شلون تضلين وي البنات چا المن متزوجج خو نضل عاقدين انتِ غاد وانا هنا.
بقيت ساكته مسحت عيوني ما أريد ابجي گال
-جــويريه.
مارديت عليه بس ردت الكهرباء تشتغل اختنكت مد أيده تلمس أيّدي جريتها مبتعدة
صــيهد::جيبيهاا
-مااا.
نترت بصوت مخنوك صاح
-هاي جاي تبچين؟
ووي حجايته شعل تلفونه يضوي على وجّهي مخنزره من ماشاف دموع طفاه وجر ايدي غصب عني خلاها بأيده
-لا تعاندين.
-خلي آروح
-لا خل نسولف سألتي وجاوبتج كملي اسألتج هسه شنو گلتي وين تنامين؟ تنامين هناه بعد شنو عدج؟
لازم ايدي بين اصابعه ويحجي ما اشوف شي من ملامحه، المطر صار خفيف ينزل على أوراق الشجر ويصدر اصوات خفيفه وي صوت الساگيه اللي يروح بيها ماي المطر، بقيت فترة ساكته استمع لاصواتهن وهو يتحسس اصابعي ويرسمهن اصبع أصبع، الحد ما حسيت الغصه راحت من صوتي يله رجعت حجيت وگتله.
-وين انام اذا هنا؟
-هنا
-وين هنا؟
جر ايدي عليه اكثر واني كلشي ما أشوف ثبتها عل شي وايده فوگ ايدي لمن ركزت هاي ايدي على گلبه همس
-هنا تنامين.
جريت ايدي منه حيل مرتبكه واحجي بسرعة
-ليش تحجي هيج؟
كحيت جسمي كله قشعر من كلمته ومن ملمس صدره على ايدي احس بنبض گلبه بعّده بأيدي ودفوا جسمه ما فارگني ،
بقى ساكت فترة وحجه بجدية
صــيهد:: انتِ شني التردينه، صارلج قرن تلمحين احجي بوضوح شترررردين؟؟؟
-ما اريد شي.
-ترردين تردين سولفي شني التردينه حتى انا هم اكلج شني الاريده.
سكتت ارتب الجمل ببالي وهوه بقى ساكت منطيني وقّت آفكر حجيت مرتبكه وصوتي يرجف
- اني ما انام وياك بنفس الغرفة.
حجيتها مرتبكه وهو سكت ماجاوبني احس بروحي ارجف برد وخوف منه مركزه كل حيلي أريد اشوف ملامحه عصب لو لا.
فاتحه عيني حيل اباوع گدامي وصار برق شهكت ورجعت ليوره من حسيت محد كاعد كدامي گـــلبي دك بخوف
-صــيهد!!
ماحاجني مديت ايدي المكانه ارجف واتلمس مالزمت شي درت بساع مرعوبه نزلت من الچرباية سحكت طرف دشداشتي وعثرت طحت بالگاع بين ما وكفت وانه احجي
-صــيهد!
درت عيني للشباك مفتوحه طب الهوه البارد للغرفة وصوت باب الشباك من يحركه الهوه مخيف، فتحت عيني حيل وشهگت برعب من سمعت صوّت بومه عيني على الشباك وركضت بلا ما التفت أريد اشرد نردمت بصدره صيحت خايفه اجر بروحي من ايده وما ادري بروحي شنو احجي
-اششش
چلبت بيه كل حيلي بأثنين اديه لازمته واضم وجهي بصدره اشهك اريد ادخل لضلوعه واضم روحـــي المهم ما اسمع صوتها
حط اديه اثنينهن على ظهري حاضني حيل
-اشش انا يمج، ليش تخافين.
-ررراح يجي.
-ياهوه؟؟؟
واني روحـــي رايحه اضم روحـــي بيه واسد بأذاني ما اريد اسمع صوته واردد بصوت يرجف مختنگه
-ررراح يجي راح يجي.
-اششش.
جان صوتها كفيل يطلعني من بر الامان الوسط الرعب اول مره بكل عمــري اخاف من حيوان لهالدرجة، رغم ماجنت اهتملها وشايفتها بحديقة الحيوانات من بعيد بس ما اخاف من ارتبطت بالقرين صارت بمثابة فيلم مرعب الي، جسمي كله يرجف وحلكي يبس وهي بعدها يم الشباك.
احس راسي بمعدته وساعه افر وجهي مناه ساعه مناه بس اريد صوتها يروح وما اسمعه، رددت بصوت مرعوب وسريع
- وديني.... ود.. وديني ... للبيت
تحرك وانه بين اديه مچلبه حييل ما اتيهه مغمضه عيني بقوه واحاول اسد أذني اذن سادتها مخليتها على صدره وأذن سادتها بأيدي والايد الثانية مچلبه بيه، يمشي وحاضني حيل يردد
-مطر مانگدر نطلع تعاي انا احميج
واني احس لو يموتوني بهاللحظة ما افتح عيني ومدري ليش اجت ببالي اطلع حاضنه القرين مو صــيهد من تذكرت حجي بــدور گالت القرين يحضنج حتى يواسيج حجيت ارجف
-ص.. صــيهد.
وكف بصف الجربايه حسيت بيها من طخت برجلي وبعده حاضني بقوه
-يمج.
-انتَ...گول ولعباس انا صــيهد.
-اشش كافي تعاي لحضني خل احميج راح تطب علينه البومه.
چلبت بيه بأثنين اديه ووي صوت قطرات المطر صوتها شجايها حضي المصخم الملطم لو ما القرين يفتر وراي ماتجيني، لزمته بقوة من هوه رخت ايده يريد يعوفني صيحت ومچلبه بيه
-وووين؟
صــيهد:: تعاي بس خل اتمدد هديني.
-لااااا.
ولزمته كل حيلي والله ما اهدك لو اموت هاي تفتر فوك راسي صدك جذب، حط اديه بخصري رفعني من الگاع يريد يفلت اديه من ملابسه واني اجر بيه ما گدر يبعدني چلبت برگبته باثنين اديه حضنتها حيل خانگته وهو رافعني من الگاع وتمدد على الچربايه وجر الغطا فوگنه، مغطي حتى روسنا ورجع حضني بأثنين اديه
-ص.. صــيهد.
حرك اديه على ظهري يحضني بقوه ويعدلني فوگ صدره همس
-هممم.
-گول والله انا صــيهد.
اهتز صدره يضحك
-أثبتلج انا صــيهد؟
-اي.
مد ايده لوجهي يريد ارفعه من رگبته چلبت بقوه ضحك
-أرفعي راسج
-تجيييني.
-ياهيه راح تسودنيني؟
-بعدها.... بعدها انتَ جاي تسمع.. تسمع صوتها يم الشباك؟
-اي البومه قصدج؟
-اي.
طلع راسه من الغطا باوع ورجع تغطا من جديد گال
-اي هاي جاي تعاين علينا تريد تطب للغرفة.
غمضت حيل وضميت وجهي برگبته بقوه حشگت راسي .
-اااخ عورتيني.
-لا تعوفني
-هسه انا ياهو؟
رخت ايدي بخوف وكلبي مو يدك احس دمام تخيلته بلحظة القرين واني خاتله من عنده بحضنه بسرعه گتله
-صــيهد؟ بس احلف انتَ صــيهد.
-ارفعي راسي واثبتلج انا صــيهد.
شلت راسي من رگبته مغمضه بقوة وچلبت بياخته بأثنين اديه واسمع صوتها ما تسكتتت احسها فوگ رأسي همس
-تردين تتأكدين انا صــيهد مو الوحش؟
-اااي.
حجيتها وحسيت نفسه بوجهي مركزه وياه منتظره يحلف وهو كل شوي نفسه يصير أقرب حسيت وجهه بوجهي گال
-مساع من رحتي للبيت ليش رجعتي يمي حاطه حمره.
-ش.. شردت.. ومن ومن انتَ خابرت حطيت حتى اجذب.. اجذب عليك.
ووي أخر كلمة حسيت شي دافي على شفايفي ما جنت فاهمه گد ما خايفه جنت عبالي اصابعه الحد ما استوعبت وشهگت أرجف بهتانه خله ايده وره راسي مثبتني، ويحرك شفايفه على شفايفي وخرت ايدي من صدره ودفعت ايده من راسي بس بعدت شفايفي من شفايفه ضميت راسي بصدره مختنگه ومحترك گـــلبي اردد
-لاااا،. لاا.
رجع حضني حييل فوگ صدره
صــيهد:: مسحتها.
واني ما مهتمتله گد ما مهتمه لصوت البومه اللي احسه كل شوي يصير أقرب
-صــيهد، صــيهد .
لف اديه على ظهري بقوه أكثر يثبتني على صدره زفر نفس براحة رد
- آمري
-خل تروح فـــدوه.. خل تروح.
-اروحن اسد الشباچ؟
-لاااا، لا تعوفني.
خله ايده فوگ راسي، شالي من الحضنات تزحلك بقى على رگبتي وخره بعده عني وشال الشكاله من شعري فتحه ومشط خصلات شعري بين أصابعه يمسح على راسي والبومه تنگ فوگي مدري شتريد من عدي حتى ماباچيه واگول جابته واجت حتى يواسيني، خف المطر وهي بدت شويه تسكت وبس اريد ارفع راسي ترجع تطلع صوت وارجع اضم وجهي برگبته اقوه
بلعت ريك من استوعبت صــيهد باسني بشفايفي ووجهي حالياً برگبته وجسمي فوگ جسمه واني الصار ساعة مچلبه بيه وما اعوفه، لزمت شفايفي بين اصابعي من خف الخوف يله بديت استوعب واريد الطم بعدني ما لاطمه والبومه صار صوتها اقوة وأقرب ووي صوتها سمعت حركه بره چليت حيل وصيحت
-أجه يمه اجه.
لماني على صدره بقوة يمسح على ظهري وعلى شعري
صــيهد:: أشش محد يجيج وانتِ يمي.
ومن الخوف مدري من استيعابي المتأخر لبوسته واصابعه اللي تمسي بخصل شعري غفيت واني على صدره.
ما أحس بروحي الحد ما كعدني هوه بس شلت راسي وشفت روحـــي على صدره فتحت عيوني بصدمة وابتعدت بسرعة لنص الچربايه كاعده على ركبي اتلفت واعاين لروحي الدشداشة مرفوعه لنص رجليَّ وبلا حجاب وهو بس بالفانيله الداخلية بدون تشيرت، فاتحه عيني بصدمة وأمسح بوجهي كعد على حيله يحاجيني
صــيهد:: لا تخافين ما مسويلج شي، جوري عاينــي عليَّ كلشي ما مسويلج والله.
أتنفس بقوة اول ما اكعد ما اتذكر شلون اجيت هنا وشلون نمت شويه شويه استوعبت، درت عيني للشباك سادها ومنزل البرده، باوعتله بعدني مرعوبه كعد عدل الغطا على رجليَّه، حطيت راسي بين اديَّ وحسيت بيه تقرب جر ايدي من وجهي
صــيهد:: شبيج جوري؟
هزيت راسي ماكو شي ومديت ايدي على الچربايه يم المخده شالي وشكالتي اخذت الشكاله لفيت شعري وخليتها وجريت شالي فتحته اريد البسه
-راح اروح للبيت اني.
-محدّ بالبيت
باوعتله ساكته مسح وجهه گال
-رغد وبدور ومرت وهـــب وديتهن يم بيت عمي شامل ملتمات غاد ويردن يباتن سوه.
-ليش عاافني؟
-انا گتلهن نايمه وماردت اكعدج بس ما ادري گلت خافن تضوج لان ماراحت وياهن.
باوعت لوجهه وسألت بتردد
-توديني يمهن؟
هز راسه اي وأشر على الميز باوعت عليه عبايه گال
-جبتها من رغد.
نزلت من الچرباية اخذتها من الميز لبستها وهوه هم لبس التشيرت وقمصلته، جريت كلنس من الباكيت ووگفت گدام المرايه اريد امسح الحمره وصفنت ماعله شفتي اي أثر للحمره لمحته صار وراي مبتسم وكف بظهري يباوعلي بالمرايه وگال
صيهد:: مسحتها انا بطريقة ما تخطر ببالج
بلعت ريك مقشعر بدني وهمست
-من بستني؟ اتذكر.. اتذكر ترى..
هز راسه لا
صــيهد:: هناه مسحت نصها ومن نمتي مسحتها زين.
حطيت ردن العبايه على حلكي مسحته، تغيرت ملامحه للغضب دنكت مشه گدامي ونتر
-امشي.
طعت وراه اسأل
-بيش الساعة؟
-بهدعش ونص.
سكتت امشي وراه لمن وصلنه لحوشهم صوت البنات وضحكهن عالي دگ الباب وطعلنه حسين گاله
حسين:: هلاا بالذيب.
صــيهد:: لا تتلوگ ابو الجكاير حظك أطيحه.
دنك حسين يضحك وهو دار علي گال
-طبي جوه.
عفته ودخلت فتحت باب الغرفة عليهن وكمزت رنـــه من بينهن ركض حضنتها وهنه كلهن يصيحن ويضحكن
-هااا هاا وين جنتي.
بــدور:: نايمه بحضنه هههههههه
دنكت مستحيه وكعدت بين رنـــه وماسه مطلعات البومات صور ويباوعن بيهن بــدور جرت صوه وميته من الضحك
-منو هذن؟
جانن بنات اثنين وصاعدات على ظهر چلب مسوياته حصان
عــفراء:: ريمه ورنه، ريـــمه عمرها ست سنوات ورنه سنتين بس شياطين ماينگدرن جانن
ريـــمه :: هاي مبينات سوالف رنـــه.
ضحكنه نباوع بالصور اني الوحيده اللي ما اعرف ولا واحد منهم بــدور طلعت صوره لوهب وهوه صغير تگل الندى
بــدور :: سبحان الله عاينــي رضا يشبهه وهـــب من چان صغير.
وخلتنه كلنه صافنين شجاب رضا على وهـــب وهي تهز راسها عود متأثرة لزمنها رغد وعفراء كتلنه وعفراء عضتها بقت تصيح
بــدور:: التووووبه ما اعيدنهااا.
عافنها يضحكن، شمس ورضا فارشاتلهم ونايمين على صفحة وزهره بنصنا بس هاجر چانت ما موجوده، درت عيني الهن يتعاركن على الصور يردن ياخذن منهن ورنه تكلهن
رنـــه :: خاب غير ادچها التبوكلها صورة.
مــاسه:: حباابه بس صورة مــيثم.
رنـــه :: صوريها بالتلفون ما اطي صور هاي ذكريات اهلي لازم احافظ عليهن.
وماسه حطت صور مــيثم بالگاع تصور بيهن وتضحك والبنات ناصبات عليها حيل فرحانه ولمتها وي البنات فرحت الكل درت على عفراء من گالت
-هاي هاي الصوره بيها جــويريه.
باوعت وياها للصوره خالي شامل كاعد وگدامه اطفال بيهم كاعدين وبيهم بالگماط ووراه اكو ولد يلعبون تجي اعمارهم بالثمن سنوات او اقل الصورة بالحوش مالهم فارشين حصيرة وكاعدن
-وين اني؟
أشرت على طفله بالگماط گدام خالي شامل ضحكت وهي انتقلت بأيدها تأشر وتشرح
-هاي ريـــمه
ضحكنه ريـــمه جانت شعرها مفتوح مكفش ولازمه بأيدها نعال گالت
-هذا اليمها طــروادة .
بــدور :: شو هاي كل صورها وي طــروادة.
عــفراء:: مو دوم عدنا وي رنـــه وهوه يلعب وياها مثل ما يلعب ويانه.
يحجن واني اباوع بالوجوه ريـــمه دنگت منحرجة وعفراء غيرت الموضوع وأشرت على واحد بأيده عوده وواكف وره خالي شامل يباوعله
-هذا صــيهد هاي العوده اللي بأيده ابوي جان يكتله بيها.
-ليشش خطيه جان طفل.
ضحكن اثنينهن رغد وعفراء
عــفراء:: جان عنده سوالف مو حلوه الحمدلله توبه منهن خلاه يمشي سيده.
سكتت مركزه بيه حتى وهو صغير مطنگر عــفراء دارت على ندى گالتلها
-هذا وهـــب
وهي باوعت بالصور تضحك شويه وشهكت بــدور بأيدها صوره ومخليه ايدها الثانية على حلكها
رغد:: شلت ايدي اهددها
-هسه اطكج على عينيج كلساع صارخه ومخوفتني
غمزتلي ودارت الصوره علي
بــدور:: هاي مصوره وي سلطان.
عاينت للصوره صغيره عمري بالخمس سنوات وهوه اكبر مني واكفه بصفه وحاط ايده على راسي، جريت الصوره من ايدها اركز بيها مبتسمه رغم ابد ما ادري بيها ولا متذكرتها واول مرّه آشوفها گالت مــاسه
مــاسه:: رنـــه ضمي الالبومات خاف هسه تطلعلي صوره وي مــيثم من الصغر انجلط ههههه.
بــدور :: وهاي عاشر صورة ريـــمه بحضن طــروادة شني والله يضحكون.
خزرتها مستحيه من ريـــمه وهي طلعت الصور الجامعتهن ريـــمه وطرواده على فطرتها تضحك وتحجي ماتدري بروحها تحرج المقابل صوره منهن ريـــمه نايمه على المخده وطرواده بايسها براسها اثنينهم جهال، والثانية بالفراش بينه وبين عفراء صايره راسها على ايده، عفراء لمت الصور منحرجه وغيرنه الموضوع كلت الجوري
-تباتين وي البنات؟ انه وندى هسه تصير ب١٢ ونروح .
عــفراء:: جا شعدج رغد ضلن هناه
-لا خيه خاف امي تريد تكعد شي.
هزت راسها خوش ودرنه كلنه على هاجر من اجت شبگت على عفراء وباستها والنوب اجتني باستني وهي تبوسني دك گـــلبي حيل من خلت ايدها على گـــلبي ورسمت اسم سلطان مثل المره الفاتت
ابتعدت وراحت تسلم على البنات كعدت يم ريـــمه وتعاينلي مبتسمه دنگت ساكته رجعن البنات يسولفن وماگدرت اندمج وياهن شغلت بالي هاجر. كل ما تصير عيني بعينها تبتسم وتأشرلي اطلعي واغلس ما اريدن اعرف شموصيها.
عاينت للساعة وندى گالت
-يله رغد نروح.
-اي، مــاسه خابري على وهـــب يجي يشيل رضا لا نتزحلك.
وهاجر بساع كامت اجت يمي جرتني من ايدي كلهن عاينلها وريمه گالت
ريـــمه :: تريدج وحدكم.
گمت وياها طلعنه للحوش فتحت جف أيدي وترسم عليه كلمات
ماعرفتهن كلهن بس كلمة سلطان وكلمة ليش وتعاينلي بزعل حضنت وجها بين اديه
-زعلتي مني؟
هزت راسها اي
-هاجر ما اريد توصليلي رسايل سلطان لا ترضين تجيبهن الي بعد خوش؟
ميلت راسها بزعل وأشرت على گلبها وعلى گـــلبي عود انتم تحبون بعض، وطلعت ورقة صغيرة من ردنها خلّتها بأيدي، عافتني وطبت يمهن ابتعدت كعدت على گن الدجاج وفتحتها گـــلبي بعده يدك بنفس الطريقة كل ما يوصلني حرف منه كاتب
"نمرشه"
اتمنى ان يعاد لنا لقاء
كالمواعيد القديمة بعد منتصف الليل قرب شجرة التين.
تحسرت بقهر والورقة بأيدي ضميتها وگمت من ندك باب الحوش صحت الندى وطلعنه وي وهـــب اخذ رضا منها وانه وياها نمشي وراه ضلت هيه بالمطبخ بين ما هوه حطاه بالغرفة وطلع يله هيه طبّت للغرفة، مشيت يم امي لكيتها تقرأ قرآن تمددت على رجليها استمع الصوتها الحلو خلت القران بصفها تقرأ وتمسح على راسي عيني على الساعة صارت بالوحده، ما اروح وانه الشوگ لعيونه ذابحني ما اروح وانه متمنيه بس ارجع اسمعه يگلي نمرشه، ما اروح رغم بكل يوم اتمنى اسمع صوته.
وخرت من رجلين امي شربتها علاجها وتمددت بفراشها گتلها اشر الهدوم واجي يمج، صعدت للسطح واحجي بداخلي، ما طفيت الاضوية البره عرف ما راح اجي وراح، صعدت وكل ظني ما اشوفنه، وكفت بالسطح وافتريت. اعاين على شجرة التين واشوفنه يتمشى بين شجرة التين والساگيه نزلن دموعي بلا صوت وانه اشوفن عيونه للدرب متأمل اجيه. "يا روحـــي انتَ يا عشگي سلطان گـــلبي "
مسحت دموعي وكعدت اعاينله بحسره واسترجعهم بذاكرتي كلّ لقاءاتنا، گـــلبي تگطع ساعة مرت وانه بس كاعده وهوه يدخن ويفتر بنفس المچان وعيونه على الدرب ماشالهن بعده متاني اجيه، عفته ونزلت اشوفن امي لكيتها نايمه وشفت وهـــب طب للدوانيه ينام، ضليت نص ساعة بفراشي اتگلب وماكدرت انام
رجعت صعدت فوگ شفته بعده مستند على الشجرة ويعاين على بيتنا للساعة ب٣ انه اعاينله من السطح وابجي وهوه عيونه متانيه شوفتي، رجعت الدنيا ترعد وبدت تمطر مطر خفيف، كيفت گلت هسه راح يروح بس ما تحرك من مچانه ضل جوه المطر وضليت انه بمچاني وقطرات المطر البارده تنزل علي وماتطفي شي من ناري.
ضليت ارجف بس ماگدرت انزل دام هوه ضال بمچانه ومارايح لبيتهم ولا اگدر اروحله واخليه يتأمل بيه واخرب بيت غيري، ردته يمل مني ردت يگطع الامل ويلتفت المرته وابنه احنا مايخلونا البعض لو شما نسوي.
ضليت سن يطك بسن وجسمي يهتز مثل السعفه من البرد واعاينله هوه هم يرجف لابس كبوس القمصله وخاتل بسد الشجرة الحد ما وگف المطر هب هوه قوي هز عظامي من البروده ينشف الگاع ويرجفنه، وكل هذا ما استسلم وراح لمن طلع الضوه وي صلاة الصبح وكف عاين لبيتنا بحسرة ومشه حاني ظهره، نزللت جوه اخذتلي هدوم وطبيت للحمام بدلت ورجعت لفراشي ارجف.
""""
ريـــمه :: ضلينه كاعدين ل٣ الفجر متونسات ساعة نسولف ونضحك ساعة نسوي اكل ، الحد ما البنات نعسن فرشن ونامن وانه فراشي بصف رنـــه وهاجر بحضني، درت الرنه اتوسل بيها ماتنام وتعوفني لان انه ما يجيني نوم ببيتهم گالت
رنـــه :: ولا انام
-نشوف.
هزت راسها اي وغمضت عينها وانه اعاينلها شلون نامت وسلمتها، عفراء اخذت بتها وراحت للدوانيه گالت حتى من تبجي ما تكعدجن، ضليت اتگلب بفراشي للخمسه الصبح ولا گدرت انام، طلعت من البيت اعاين للحديقة الهوه بارد ثلج وهستوها ماطره صاير الجو يجمد، هاسكي بس شافني ضل يزير يريد يجيني عاينتله بتركيز شفت سنسلته مشدوده زين أمنت
شفت رنـــه عايفه حشيش على صفحة للصخله شلت منه ووديته الها للشرك مالها ماتاكله مدري شتريد جاي العب وياها وسمعت باب الحوش انفتح مشيت بساع ختلت وره البيت من يم الدوانيه وسمعت صوت عفراء گالتله
-الله يساعدك.
طــروادة:: هلا بيج، ها البنات راحن؟
-لا نايمات يم رنـــه .
-جا زحمه ما اطبن للبيت.
تقربت اعاينله يغسل اديه من الطين بردان ومبلل گالتله
عــفراء:: ياهي مالتك طب الغرفتك.
-لا يابه بس جيبلي هدوم.
رجعت ليوره خاتله وعفراء راحت جابتله هدوم رديت اعاينلهم نزع القميص ونزع الفانيله الداخليه دنكت مرتبكه والوم بروحي لان عاينتله، الحد ما لبس الفانيله والقميص الجابتهم عفراء وطب للحمام مسحت وجهي محتاره شلون اطب للبيت هسه اذا اروحن كدامهم هسه يگولون شوف شعدها من دون البنات بس هيه تفتر
ضليت آكل بأظافري بقهر تندمت حتى لان اجيت، شويه وسمعت صوته گالها
-راح اسوي جمريه هناه بس حطيلي ماي بالقوري.
عــفراء:: عود صدك تحجي؟ ولك بارده ترى البنات يغرفة رنـــه ياهي مالتك بيهن طب الغرفتك.
-لا والله ما اطبن زحمه خليني هناه منا لمن الله يهديهن ويكعدن ههههه.
عــفراء:: ياا ياا، جا روح نام يم صيهد
-لا خيولي متعاركين
-روح نام يم بيت عمي خليل.
طــروادة:: شبيج شمالني مسودن
سكتت عفراء وانه كاعده على حيلي وامد بس عيني اشوفنه طلع حطب وخلاهن بمنقله الگاع بعدها رطبه وحتى الحطب بيهن متبلل گوه اشتعلت شلعن گلبه، فرشله بساط احمر وحطله مخده وعفراء جابتله القوري گالها اريدن ملازمي جابتهن اله حطتهن يمه وطبت تريد تسويله ريوگ گالها.
-جيبي هناه انا اسوي.
ضليت اعاينلهم ظهرهم عليَّ جابتله مواعين وبيض سوه ريوك وهيه كعدت بصفه يسولفون وقوري الچاي على الجمريه وهو يگلها
-اهم شي رنـــه تونست فرحت من اجن يمها؟
-اي مكيفه بيهن، مستغربه انه شلون اعمامي رضوا.
-وليد وشعلان مو هناه وره العشه راحوا البغداد وشاكر خنيث ترى يخاف من سلطان وسليم لا يحطونه يقتلون.
يحجيها بضحك وانه گـــلبي يفرفح من القهر طكته عفراء على ايده ما راضيه وسألته
عــفراء:: مــيثم شلونه فرحان؟
-اوووه كلش مكيف والله فرحتله تدرين صارله سنين يحبها خطيه، النوب ذاك اليوم اجاني يريد يبجي وانا مادري بيش اواسيه كتله نام آلصبح تنسى وهوه تسودن يريد ي
-ههههههه خطيه والله الله يسعده ويهنيه اختار الذهب من هالقريه مــاسه سباعيه.
-الله يسعدهم.
عــفراء:: امم وانتَ ليمت الله يسعدك؟
ضحك وهوه يصب الروحه چاي گالها
-من رنـــه تكضي كليه ويجي نصيبها وراها انا اتزوج حتى الاخذها ما تشد وي رنـــه وتقهرها.
-عوف رنـــه على صفحة وفكر صدك كهلان خل اخطبلك.
-لا يابه شني السالفة متوازي احط مره براسي وانا يجيني شهر حاير بمصرف البيت.
-تعيش حالها حالنه
-لا خويه كفيني شر النسوان رحّمه الابوج
-تضحك وتغمزله
عــفراء:: عدي الك اثنين وحده قريبه ووحده غريبه، الغريبه تگل للگمر غيب انه اليوم اطلع بمچانك، والقريبه ماقاصره. همّ شحلاتها وعلي.
طــروادة:: عمي عوفيني.
-والله ما اعوفنك هالسنة ازوجك ازوجك اضل افتر وراك.
ضحك وگالها
طــروادة:: هم ذاك اليوم شيخ حيدر يگلي اريدن ازوجك وافرح بيك انتَ إبن العزيز.
عــفراء:: خاف يريد يطيك مره منهم.
-لا يابه شني السالفه كل ما احجي ولزكتني بمره صلي على محمد شمالج؟
ضحكت عفراء تدفى على الجمر وتشرب وياه چاي گالها
-شعلان والله يغار من شيخ حيدر يريد بس يحط مشكله بيني وبينه ويحرجني گدام شيخ حيدر ما گدر.
عــفراء:: ولا راح يگدرون دام نيتك صافيه .
وردوا حجوا بالگيعان مرت ساعة اظن رجليَّ تگطعن وبس اريد يكضون سوالف حتى اروحن ماكو. كضوا سوالفهم ورجعوا عليَّ گالتله عفراء
عــفراء:: غير رنـــه الفاهيه طلعت البومات الصور يم البنات.
-لاااا.
-وعلي وشافن صور ريـــمه عدنا وبدور كل ما تلكه صوره تكلها جا ريـــمه صورج كلهن وي طــروادة وشكد الج صور عدهم ضليت اخوزر برنه خفت منها تجفص.
طــروادة:: خل تكعد اذا ما طيحت حظها مو كتلها هذن الصور شيليهن، واهلج شدعوه هلكد مصورينه؟ بالعشرين صورة ضميت عدي.
عــفراء:: اكلك ترى عبالهم تضل دوم عدنا وتنحسب اختنه شدراهم اهلها يردون ياخذونها.
طــروادة:: يابه والله اذا شافت الصور العدي تتسودن.
ريـــمه :: مسحت وجهي گـــلبي يدك حيل واعيد حجيهم بعقلي شنو عبالهم اضل عدهم دوم شنو اهلي ردوا اخذوني وطرواده شيحجي على يا صور ليش اكو صور غير اللي انه شفتهن؟ ردت عفراء گالتله
عــفراء:: والله گـــلبي متفلش عليها هالريمه ولا عدها حظ جا امي ليش ماتت وعينها مفتوحة والله على ريـــمه.
وطرواده رد عليها بشك
طــروادة:: عفره هاي السالفه انتِ ضامه نصها امي وريمه بينهن سر اكبر من ظلتها عدّنا سنتين مدري شكد، اكو شي بعد لآن اذكر حتى انا امي چانت توصيني بريمه، ليشش؟ وتذكرين يوم الطردتيها بفاتحة امي هم كليلي ليش طردتيها وامي موصيتج
دنكت عفراء ساكته وانه احس صارت بأذني وشه شنو ضاله عدّهم سنتين شجاي يحجي هذا گالتله
عــفراء:: لا سر ولا هم يحزنون جنت اضوجن منها لان امي تحبها حيل، وحاقده على بيت عمي شاكر چيه بالبدايه ما رادوها وذبوها على امي وهيه ربت وتعلقت بيها وتالي ردوا اخذوها ولوعوا امي.
شهگت فاتحه عيني على وسعها حطيت ايدي على حلكي ورجعت على الحايط بصدمة واحس بنار تنزل من عيوني گمت بعد ما اسمعهم شنو يحجون اشهك وساده حلگي بأيدي صوت عفره يتردد بأذني ما رادوها ذبوها على امي ما رادوها ما رادوها.
مدري شكد مر وكت وانه على نفس الكعده روحـــي حسيتها جاي تطلع اريد اتنفس ما اگدر كحيت مختنگه واجر نفس بشهگه بس اريد اگدر اتنفس ماكو وعلى صوتي حسيتهم اجوا
طــروادة:: رريمه.
كعد گدامي وانه روحـــي فرفحت ملخت رگبتي اريد بس الهوه يوصلني
عــفراء:: يمه ريـــمه ريـــمه .
جرتني من ايدي وطرواده يگلها
- بس خل تتنفس عاينيلي ريـــمه عاينــي على كيفج.
وعفراء متسودنه جرتني بأيدها للمچان الجانو كاعدين بيه غسلت وجهي ترجف عاينت الطرواده اثنينهم خايفين
طــروادة:: عاينــي بس عاينلي اتنفسي ماكو شي شبيج ريـــمه .
جرتني عفراء الصدرها بچيت اشهك واضم روحـــي الحضنها
-تكرهني آمي تكرهني.
-لا لا ماتكرهج محد يكره ضناه.
بجيت بحرگه گـــلبي مفرفح
طــروادة:: كافي ريـــمه مو زين عليج
وخرتني عفراء من صدرها تمسح عيوني وانه احس بروحيّ ذبلانه حييل
عــفراء:: ماعليج بينه جنه نتشاقى انه وكهلان.
طــروادة:: لا نحجي صدك عاينــي ريـــمه چانوا ما يردونج بس لمن صار عمرج سنتين اجوا واخذوج من عدنا لو ما يحبونج جا ما اخذوج، بس همه بالبدايه عافوج عدنا لان امج تمرضت واظن حبلت بسجاد ماكدرت تدير بالها عليج وانتِ تعلقتي بامي، هذا مو معناها اهلج يكرهونج لا ابد بس ظروفهم حكمتهم انه گبل هم ابوي طردني سنتين انا عايش يم بيت عمي خليل وبس اوصل بيتنا يكتلني
هزيت راسي لا ودموعي يجرن
ريـــمه :: محد بيكم اهله طردوه بس انه بس انه .
طــروادة :: والله وروح ابوي اسألي عفراء، وانتِ صغيره طيحتج وانكسر سنج وابوي طردني سنتين انا لا شايف امي ولا شايف اخواتي خلاني ببيت عمي خليل وبس اجي يم بيتنا يكتلني، كلهم اهلنه هيج بس يحبونه، ويردونه
هزيت راسي لا ابجي بحرگه
ريـــمه :: اهلي لا گبل چانوا رايديني ولا هسه.
طــروادة :: احنا نريدج تعاي عدنا.
جرتني عفراء الصدرها تمسح بعيوني وانه نار اشتعلت بگلبي ما تنطفي وهو مكابلنه وكاعد كل ما اغمض عيني وأفتحه تصير بعيونه اخر مره فتحت عيوني ودموعي بعدني يجرن گال
طــروادة:: كافي ريـــمه شني السالفة نكعدلج رنـــه ؟
هزيت راسي لا
عــفراء:: ريـــمه فـــدوه بسج بچي والله متت من القهر شمالني حچيت.
درت عليها كضيت بأيدها احجي ودموعي تجري
-عفره فـــدوه ضامه عليَّ شي بعد؟ احجيلي.
دنكت تهز راسها لا ماكو شي جريت ايدي من ايدها ووگفت مشيت للبيت طبيت للغرفة كعدت هاجر بس فتحت عيونها جريتها من أيدها على كيف وكفت وتأشر تسأل ليش؟
لبستها حجابها ولبست عبايتي طلعنه من البيت عفراء ماترضى نروح
-عفره فـــدوه عوفيني بس خل اروحن انام.
طــروادة :: عوفيها عفره، تعاي.
مشه گدامنه لمن وصل باب حوشنه ووگف دار عليَّ صرت گدامه گال
-ريـــمه.
وكفت وشلت راسي أعاين بوجهه
-لا تقهرين روحج هاي كلها سوالف قديمة يكفي اخوانج يبيعون الدنيا ويشترون ضحكتج..
هزيت راسي اي تحسر
-يله روحن وعفيه لا تبچين امي تزعل
حجاها مبتسم عفته وطبيت للبيت نار بگلبي صعدت لفراشي ضميت وجهي بالمخده اصرخ اصرخ بس اريد النار البگلبي تطفه، وهاجر مكابلتني وتبجي تمسح على راسي الحد ما تعبـــت حطيت راسي على رجلها وغفيت.
"""""
مــاسه :: عدن چم يوم ابد مــيثم ما خابر ولا راسل ولا مره شفته، سألت رغد گالت ، يجوز يستحي، گالوا نعقد محكمه نفس الوكت وي صــيهد وجوري، حجزوا علمود التحاليل وضلينه منتظرين ووهب يگلي بس تكضين امتحانات اخذج للعمليه وادك رجل اصيح ما اسويها احب ايدي وهيه عوجه عوفها.
واركض الكتبي شديت حيلي زين علمود الامتحانات ماضل شي الهن، امتحنا الشهر الثاني اخر ماده وجنت ما مجاوبه زين
كاعده بالرحله بقلق المدرسه توزع الاوراق وانه آكل بأظافري
لحد ماصاحت اسمي كمت اخذتها شفت درجتيّ ستين حمدت ربي وشكرته وگلبت الورقه أعاين لأجوبتي ودرت على فتحة الباب طالبة من الصف الثاني صاحت
-ست ست هاي البنيه كتلوا اختها.
وأشرت عليَّ فتحت عيني بصدمة وطلعت اركض وراها والمدرسه والطالبات كلهن ورانا اركض بكل حيلي وره البنيه والكه بنات غانم كاضات بــدور وره الصفوف يم الحديقة مكطعاتها تگطع يابه روحـــي راحت رغم هيه هم طاكتهن ووحده منهن تصرخ ووجهه متروس دم بس گـــلبي مابرد من شفتها شلون مملخاتها ومشككات هدومها عليها وشعرها مكطعاته هجمت وياها متسودنه اجت المديره والمعاونات فزعنه ويغلطن اخذنه للأدارة أرجف بحرگه وطبت رنـــه للأدارة متسودنه وترجف هاده على بنات غانم
رنـــه :: اذاااا ما نعلت والديجن چلبااات.
والمعلمات كاضاتها والمديره تصيح عليها وتغلط خابروا على اهلنا بت غانم فصلوها وبدور رجعوها لمدرستها المتوسطه، مارضوا تضل ويانه، اجه وهـــب وتسودن من شاف بــدور
بس حاولنه ما ينقلونها ما رضوا كالوله ما يتراهمن بنفس المدرسه اخواتك مسويات عصابه جانن عاقلات ومن اجنهن رنـــه وبدور يوميه يتعاركن.
سكت وهـــب بحيره وضلّ يومين يفتر بين المدرستين وبدور رجعت المدرستها القديمة هيه هم ماتحب مدرستنا، وكل هالعركه الصارت صــيهد ما يدري بيها حلفنه وهـــب ما يسولفنه وعدّت سلامات، كمنه نوصل بــدور لمدرستها بالبداية النوب الحجي يوصلنه المدرستنا وغاد نشوف رنـــه لان ما تجي ويانه بنفس السيارة اخوها ما يرضى
گبل الامتحانات باسبوع جان بــدور عدها امتحان وتراجع وبالسيارة تذكرت ماحاله واجب العربي ضلت تبجي جريت الدفتر منها اكتبلها بساع، مدرستها قريبه على مدرستنا، كملتلها الحل. لمت كتبها وتراجع امتحان مستعجله وصلنه يم مدرستها نزلت ومشينه لمدرستنا تونه نريد ننزل واعاين الفاهيه عايفه دفترها العربي على الكرسي غير متت من القهر
-عمي فـــدوه خل نرجع المدرسة اختي بس اطيها الدفتر.
-بويه مالحك عدي خط.
-بس وصلني المدرستها وانه ارجع مشي.
هز راسه موافق نزلنه جوري ورجعنه المدرسة بــدور، ما گدر يطب للشارع من الازدحام نزلت ومشيت بساع اركض وصلت يم باب المدرسه ووگفت على الصوت السمعته فتحت عيني بصدمة ودرت عيوني للشارع بعيد شهكت مصدومه وانه اشوف....
شكرا لزيارتكم عالم روايات سكيرهوم
