 |
رواية الابواب الخمس الجزء الثاني الفصل السابع والثلاثون بقلم ريام الهادي
كبرنه أحنه ،
وصغر كلشي ...
الدرب ، والشوگ والدنيا وضمير الناس!🖤
ناي : الحكي عمي فلاح ماااااات
شرهب : يايمه عطت من الهبطه وسديت المي شموته
ناي : واكع من بيت على حدايد وملخه بطنه ولج مو بس هيج
شرهب : شكوو بعد كمت ارجف ماوراج بس المصايب
ناي : طلع متزوج على عمه بديعه من ٨ سنوات ومحد يعرف ومرته مخلف منها اثنين ولد
شرهب : لطمت على صدري صخام الصخم وجهه
ناي : يلغبره الرجال ميت حرام
شرهب : اوكفي خلي استوعب خلي اكمل واطلع من الحمام مي الدوش مبين أثر على راسي
ناي : وبدلي بدربج شويه واجيج نروح لكربلا باجر التشييع مالته لازم نكوم موجودات اني خابرت يونس راح يجي للبيت ياخذ شغلات كال وفلوس ويروح هو ومرتضى عبريه كتله اني اخذ شرهب ويايه لان مهدي يودينا بسيارته لهذا استعجلي ورانه طريق
شرهب : طياره سديت التلفون اريد اركز زين ٨ سنوات وماحست عمه بيك وحده من اثنين ياعمتي مطفيه وطابكه على السره ياهو لوتي وكدر يضم عليها بله هسه نترحم عليك نحجي ونقسم والله هاي العائله اتجيب الحجي لروحها كوه
غسلت وطلعت اركض جنت مقسومه نصين نص ميته قهر عليه ونص ادردم بروحي لان عمه متستاهل تالي العمر هيج يجازيها
يونس : شرهب وينج
شرهب : هياتني
يونس : خابرتج ناي
شرهب : اي البقاء لله
يونس : حضريلي بلوزي الاسود والبنطرون بين مااسبح على السريع
شرهب : ومرتضى وين
يونس : جاي وراي
الولد سبحو وبدلو وطلعو ركض واني بقيت حاطه ايدي على خدي انتظر ناي لحد ماسمعت الهورن طفيت كلشي عدا الثلاجه وقفلت الباب واخذت تلفوني ونزلت
سلمت وكعدت
مهدي : البقيه بحياتج
شرهب : رحمه الله والديك بست سيف وبقينا طول الطريق ساكتين الجو بارد واني شعري منكع احس راسي ثلج
وصلنا وره اكثر من ساعه ونص جان ليل فوك ساعه ٩ طبينا للبيت جانت هوسه بلباب
نسمع عياط ونواحي بيبي عمشه
دخلنا ودموعنا نزلت مباشره من شفنا حال بان تعيط وتبجي وبيبي مكابلتها وجيران وهوسه
ناي : شكل بان يموت قهر وتعيط صرت يتيمه ناي خلتني اشهك عليها
حضنتها الله يساعد گلبج حبيبتي
بان : منو اليه بعد منو يحميني راح احزام ظهري وعامود بيتنا
ناي :الله يرحمه حاولت اهديها وميفيد حقها ابوها ادور على عمه بديعه وينها
بديعه : واكفه اباوع على ابو عدنان هذا شديكول ياام علي يازوجته الثانيه انت شتكول ناصب عليه
ابو عدنان : حقج بويه عاذرج بس لازم تعرفين وضع فلاح موزين تمنيت هو بنفسه يكول الج دوم يكول اريد احجيلها واتردد اخاف تنقهر
بديعه : رجعت ليوره عثرت ردت اوكع الدنيا افترت بيه كعدت بلكاع حتى مو على الكرسي من كد ما متحمله الخبر
مديحه : مو وكتها ابو عدنان لو محاجي
ابو عدنان : شون مو وكتها صار ٨ سنين ننتظر يحجي بعد شوكت والرجال جوه بين الحيه والموت
بديعه : عطت لكم ارحموني ضربه فوك ضربه يا ٨ سنين تحجون عليها
ابو عدنان : فلاح تزوج مديحه من ٨ سنين ومخلف ولد اثنين منها علي عمره ٧ سنوات ومؤمل عمره ٥ سنوات
بديعه : لطمت على وجهي واني وين جنت وانت شلون ترضى تزوج اختك بلختله وانتي شون رضيتي تتزوجين رجال متزوج وبدون علم مرته لكم متخافون الله انتم هيج لحمكم رخيص بحيث ذبيتو وبدون محد يدري وعلى شنو اخذتي شفتي منه من جماله لو ماله رجال على كد حاله كاتله القهر والفگر اشفتي منه واخذتي
ابو عدنان : على كيفج ام بان صوتج منا العالم
بديعه : وهيج تستحون من العالم لو تستحون متخلي اختج تتزوج سكتاوي وضاله ٨ سنين بلختله
مديحه : اني تزوجته بعلم اهلي وناسي وجيراني بس انتم جنتو متدرون مضامه واني قدرت وضعه رجال راد خلفه ومن حقه تردي يبقى على بتج
بديعه : انجبي ترحين فدوة لبنتي وفوكاها بكل عين صلفه تحجين اي طلعي لسانج لتسوين روحج فقيره الي مثلج حيه تلدغ وتضم راسها
ابو عدنان : عيب مديحه اسكتي وروحي اكعدي وانتي ام بان تعوذي من الشيطان
بديعه : ياشيطان اتعوذ منه واني عايشه وياه رجعت راسي على الحايط واضرب بيه ااااااخ يافلاح هاي تاليها هيج اتجازه
ردت اكوم اطلع واعوفه المن باقيه كاعده اطحن بروحي والطم وابجي عليه
ابو عدنان : لترحين لاي مكان الرجال وضعه خطر عوفي كلشي هسه ومن يكعد التردي احجي ويااه احلفج بالله واهل البيت اكعدي
بديعه : رجعت كعدت واني كاعده على تنور گابه ناره بقيت استرجع كلشي بينا الليل كله اباوع عليها بشنو احسن مني شافت ضيم بكدي وياك وتحملت لو عاشت بيت كله سحوره وكيد واهانه من اخوتك ونسوانهم وسكتت لو نامت الليل جوعانه وتفكر بمصرف باجر شون تسد لكمت رجلها وبتها ومتخليهم جوعانين لك فتحت عيني عليك واني طفله اتزوجتك وكلت هو كل حياتي
شفت كلشي منك ومايوم شگيت ولا شيلتك الهم اشيله فوك راسي واكول هو هم خطيه تعبان يطلع من الفجر وظهره مكسور اجي ادوخه بمشاكل البيت والنسوان خلي اتحمل لخاطره تحملت العيال والجوع وقلة الحال وخدامه صرت اكرب ليل نهار حتى من اتعب واتمرض مااروح طبيب حتى لااصرف فلوس علاج واثكل عليه وابقى اتحمل وجع المرض واكول كافي هو بخير وخيمه على راسي وراس بتي شفتك الاهل الي شمروني وماسألو عني
جنت حتى الكلمة الحلوة ماتطلع منك اله كل وين وين واكول هذا طبعه فقير هادئ وتاليها يلفقير الحال والطبع تتزوج عليه ومن ٨ سنين عايش ومخلف منها من امداني لاحويت الرجال وطلع خاين مثل اخوته ولا اهلي بيهم خير واكول اروح الهم اشكي حالي ويجيبولي حقي
ساعات الليل مرت عليه واني مكابله ضرتي اشوف مره ثانيه تبجي على رجلي واتخيل شون جان نايم يمها وشون يحضنها ويبوسها ويمكن حتى يغازلها وشون خلفت وهو شال ابنه منها صافنه وبعيوني هم الدنيا كلها شون كدر ينام يمي وهو ضام هيج سر عليه شون ياكل ويشرب ويسولف وهو جان بحضن مره ثانيه غيري مافكر من اعرف شسوي مافكر اذا واجهته شنو العذر الراح ينطي اليه ولو هو حقه لو يعرف عندي اهل وعزوه ورايه مجان داسني برجليه وتزوج وحتى ماكلف نفسه ينطيني خبر
لساني وكف مااكدر ادعيله يطيب گلبي الي مايوم عرف الحقد شال بسرعه منه كمت احسب الدقايق والساعات شوكت يفتح عينه واكول اله خلف الله عليك خوش جازيتني تالي عمري
صبح الصبح وهواي من جماعته اجوي وهي كاعده ولا جنها مسويه شى بلعكس اقوى مني ومسيطره وثوب المستحه الي بلبدايه لبسته كدامي نزعته وكامت عيني بعينها تباوع ولا مهتمه وجنها تكول بعلو صوتها اني مرته حالي من حالج
مي ماحطيت قطره وشربت جنت بس صافنه واتذكر سنيني المضن والراحن بليه قيمه افكر واعيد شسوي اذا كعد راح اتحمل اشوفه كل شويه براي حتى الي يجي ويزور ويسلم مااجاوبه وابو عدنان يبرر الهم تعبانه ومقهوره على رجلها لا والله مقهوره منه وكاسرني كسرت العمر
بان : اجيت الصبح على امي للمستشفى حتى اشوف شصار لكيت الوجهه اصفر والشفه بيضه والوجهه تعبان ماشفت امي هيج غير وكت موتت امها بست راسها يمه شونج بشريني ابويه صحه متحجي وساكته دخيلك ياربي يوم شبيج صاير شى
ابو عدنان : عوفي امج تعبانه بنتي
بان : وضعها مو طبيعي متسكت هيج اله صاير شى جبير ابويه بي شى
ابو عدنان : بعده على وضعه
بان : ماما احجي شبيج
بديعه : رفعت راسي وباوعت عليها واشرت تشوفين ذيج المره الكاعده
بان : درت وجهي وباوعت عليها هاي نفسها لمحتها البارحه شبيهه
بديعه : مرت ابوج
بان : عزه يامرت ابويه
بديعه : ابوج المتزوج عليه من ٨ سنين فرحي مو جنتي دوم تكولين ماعندي اخوه ولا اخت صارو عندج اثنين اخوه كرت عينج يمه
بان : كعدت بصفها دمي نشف ومكدرت كلشي اكول شحجي هلمره گلبي خاف على امي حسيتها شويه وتوكع جانت فاقده تباوع بلوجوه وجنهه مو يمنا انمردت روحي عليها ليش هيج سوه بيها والله امي اطيب ام وماكو مثلها حاولت على الاقل احجي وياها اشربها مي مقبلت حاطها ايدها على راسها وصافنه
باوعت تلفوني يدك قريت الاسم نايه
كمت على صفحة وجاوبتها
ناي : هااا يمعوده هاي وينكم شفتي جم مكالمه دكيت وعمه من البارحه اخابر عليها وماكو حتى ضل بالي
بان : بجيت متحملت ناي ابويه بلمستشفى
ناي : ياستار شبيهه عمو فلاح
بان : وكع من بيت طالع عماله بيه ومتأذي حيييل
ناي : على كيفج گلبي كولي ياالله ان شاء الله مابيه غير العافيه ويكوم بلسلامه منو يمج وانتي وين
بان : اني بلمستشفى وامي موجوده وخايفه حيل عليها حتى اكثر من ابويه
ناي : ياعيني ياعمه هيه شكد تحبه وتريد خاطره اكيد ميته قهر
بان : تحبه اعرف بس تريد خاطره بعد السمعته مااعتقد
ناي : ليش شصاير
بان : ابويه طلع متزوج على امي من ٨ سنين ومخلف اثنين ولد منها
ناي : بابا انتي صاحيه لو وكعت ابوج اثرت بيج
بان : والله شبيج قابل اجذب وهاي مرت ابويه بعد جم متر عنها وامي من عرفت لهسه وضعها يخوف مصدومه
ناي : يساعد گلبها الله ولج اني انتهيت من سمعت معقوله عمو فلاح الفقير الي لايهش ولا ينش طلع متزوج عفيه خاف غلطانه مكعد اصدك
بان : خلي اروح مدري شصار شو يتراكضون
ناي : طمنيني عوود سدته واني بحاله من الذهول عمو فلاح تطلع منه هيج سالفه معقوله
الاطباء تتراكض ومنعرف شصار دقايق وكالو البقيه بحياتكم
اعيط والطم ابويه راح حضنت امي الجانت خانسه ومتحجي حتى مابجت
بديعه : اني رايحه للبيت يله امشي
بان : وين نروح شون نعوف ابويه
بديعه : مرته موجوده واهلها همه يقومون بلواجب
بان : يووم صدك تحجين مااعوف ابويه مدارتلي بال وعافتني وطلعت من المستشفى حتى مشافته ولا ودعته بقيت بلنص جهه ابويه ميت وجهه امي داخلها مات واني الضعت على منو ابجي
رفعت التلفون وخابرت نااي واصرخ اريد احد ويايه ذوله مااعرفهم
ناي : اجاني صوت بان عرفت مات عمو فلاح حباب وانسان مسالم ماأذانه رغم مادافع عنه بيوم بس على الاقل مشفنه اذيه منه خابرت يونس وبلغته وخابرت شرهب
ناي : كاعده گبال بان واحاول اطيب خاطرها مرات الكلام يوكف عاجز وميطيب جرح عيوني ادور على عمه
عمه بديعه وينها
بان : بغرفه بيبي مقبلت حتى تطلع ومتمدده وضعه موزين هسه جنت يمها وطلعت لان الناس بدت تجي زحمه لا اني ولا امي شيكولون
شرهب : بيبي فدوة على كيفج
عمشه : يمه يلحنين حرگت افادي يايمه چاانه مگتوب عليه ادفن وليداتي انه ردتهم ذخر اليه يشيلون جنازتي تالي انه انعي عليهم
شرهب : هذا عمره شنسوي الله يرحمه انتي مريضة ليصير بيج شى
عمشه : عساني لافتحت ولا شفت هذا اليوم
ييييمه يفلاح يايمه انهجم بيتك يايمه چاانه معلعله دومي ردولي وليداتي ماتعبت وطحت وضاعت العافيه وليداتي يرحون ويه هبت الريح
شرهب : الله يرحمهم فدوة بيبي على كيفج ابجي وانعي بس لاهيج كطعتي روحج لزمت ايدها تريد تشك دشداشتها لا حرام عفيه
عمشه : يبوووووو على حظج ياعمشه جبتيها وانتي جايه ضيم وضلايم عبن هلوحيد زين ويدخل عليج خذاه الموت
ناي : كمت اشوف عمه فتحت الباب شفتها صافنه على السكف
كعدت يم راسها عمه بديعه تسمعيني مجاوبت رجعت عدت وكلت تسمعيني عمه
بديعه : اني ماعندي شى بهاي الدنيا غير اسمع واسكت
ناي : ليصير بيج شى بان حجتلي على سالفه عمو فلاح بعد هو مات مابيدج شى تغيري
بديعه : مات قبل مااكول اله ليش بشنو قصرت وهيج تجازيني اتصوري بخل عليه حتى بلعتاب ومات بدون مااعاتبه واخذ حقي منه لو اشفي گلبي واحجي كلشي بداخلي واطلع السنين الضاعت من وراه
ناي : تعاي عمه اطلعي يم النسوان كلها تسأل عنج كالت الهم بان متخربطه اطلعي ميصير تبقين هيج
بديعه : المن اطلع وعلى شنو عنده مره ثانيه هيه تشيل عزاه
ناي : ميصير الناس متعرف بيه متزوج ليش تخلين الناس تحجي بيكم كومي فدوة اروحلج مو حتى گلبي كام يوجعني من وراج خايفه ليصير بيج شى منو النا ومنو لبان شوفي حالها يبجي الصخر اول تالي عمه بديعه هيج تصير
بديعه : عمتج كل خير مابيها
ناي : لا حشاج هو انتي الخير والبركه
بديعه : ٨ سنين شايفه مره متعرف برجلها متزوج لمده ٨ سنين لا يوم ولا يومين ولا سنه ولا سنتين خلص هاي السنين كلها الزك بلعيشه تلزك حتى بس اشيل الحمل منه واثاري هو فاتح بيت ثاني
ناي : شون ماحسيتي حركه منه طلعاته المره تحس برجلها اذا حركه صغيره بدرت منه يجوز ماتلكفه اول مره بس بمرور المرات لازم تحس بيه
بديعه : جنت اشوف فلاح افقر اخوته يخاف من المشاكل يتجنب الهوسه يطلع من الفجر على رزقه ويرجع مهدود حيله حتى بلعتيك مااشتغل ويه اخوته حتى ليطاخخ وياهم وخلصها بلبناء من عامل صغير لحد مصار خلفه ومايوم شفته ركز بمره او مدح وحده بجمالها حتى عيونه مايرفعها اذا فاتت مره من يمه جنت احمدالله لان ماعنده سوالف نسوان اكول فقير رجال حاير برزقه
واخر جم سنه كام يطلع ويرجع يكول ماكو شغل مرات يشتغل يجرله اسبوع اسبوعين وراها يكول ماكو رغم يوميه يطلع وخاصه من تعينت بان وخوله كامت ادز النا مصرف شال ايده من مصرف البيت ومن اسأله يكول ماكو شغل السوك تعبان وبناء قليل كوه ادبر الايجار والكهرباء وجنت اكول نعمه المهم يشيل الايجار والكهرباء واللكمه سهله اتصوري بليل ادخل ايدي بجيبه بملابسه وهو نايم اشوف الالفين وال٣ الالاف اموت قهر عليه اشيل من مصرف البيت واحط بجيبه ال١٠ وال٢٠ الف اكول اخاف يحتاج شى ويستحي يكول انطيني من المصرف لان من راتب بان ومن فلوس خوله ونفسه عزيزه طلع ميلحك لان فاتح بيتين وعنده اثنين ولد واكيد يحتاج الهم مصرف
اني ممروده روحي مو بس على حالتي على هاي البنيه الخلصت شبابها بلعازه حتى راتبها مامتهنايه بيه كل مايبدي الدوام تشتري سيتين ملابس ابو القطعه ب١٠ لو ١٥ الف وتخلص السنه كلها لابستهم تغسل واحد وتلبس الثاني ومايوم شالت فلس واشترت بيه حاجه عجبتها لنفسها تشيل الراتب كله وتحطه بيدي وتكول خلي ابويه يكعد تعب اني اصرف على البيت متدري ابوها ماتعبان الها تعبان لولده
ناي : عمه رحمه لامج كافي مو عيونج انتهت
بديعه : عبالج ابجي عليه لا وحق العباس ابو فاضل اني ابجي على حالي على ثولي من ماحسيت عليه ولو شون احس وهو معلمني يطلع من الفجر مايرجع اله وره المغرب بحجه البناء واذا بات بره يكول عدنا صب واحسن مااكعد واخلصها ركض ابات بلبيت الي نبني اني وابو عدنان لو طالعين لبغداد اندور شغل وخلصها هيج عليه غلطتي جنت مصدكته وماشكيت بيوم بيه امنت لدرجه كلت هيج رجال حاير بعيشته مايدور نسوان هو بيا حال حتى عيب عليه اشك وتالي السكوتي والفقير واليركض على عيشته ٨ سنين متزوج ومخلف واني الغبره ماادري
ناي : حشاج اوووف ياعمه والله لساني انعكد حتى مااعرف شون اخفف عنج
بديعه : رجعلي عمري الضاع وجروحي وتعبي كله يخف
ناي : كومي عفيه شوو كومي لازم اطلعين بره منريد احد ينتبهه وراها شتريد تسوين براحتج حاولت اكومها صحت شرهب تساعدني شربتها مي وغسلت وجهه مبينه حيل دايخه ولبستها دشداشه سوده وطلعناها تكعد بان شافتها ضلت حاضنتها وتبجي وعمه تبجي وياها
شرهب : اكلج اني انقهرت حيل على عمو فلاح بس بنفس الوقت ضايجه منه ولو عايش اله اخنكه
ناي : اشش مو وكتج
شرهب : اذا مااحجي اطك هي وين مرته الثانيه
ناي : شمدريني مامعقوله تجي لهنا
شرهب : جم مره كتلج ولا عم براسه حظ ماصدكتي
ناي : اذكرو محاسن موتاكم
شرهب : واذا الميت يجيب المسبه كوه لروحه شوون
ناي : يمعوده حطي لسانج بحلكج احنا بيا حال
شرهب : سكتت ولا تريحون الگلب
ناي : الليل كله نقرا قران وبس خلصت صلاة الفجر جابو الجنازه بان كطعت روحها وتعيط
كومها يونس ومرتضى كوة من التابوت اما عمه بقت واكفه بعيد تباوع عليه وتبجي ولا تقربت اعرف بيها متأذيه لدرجه حتى وهو ميت كدامها مكعد تكدر تجتاز الصار صدمتين بنفس الوقت تأذي والله يساعدها شون متحمله
شالو التابوت باوعت عبيد وجوحي موجودين همزين عرفو عدهم اخ ولو الميت يصير عزيز وكلها تجي ومن عايش محد يذكره
شالو الجنازه عبيد وجوحي ويونس ومرتضى والجيران والاصدقاء وطلعو للنجف بان رادت تروح وياهم محد قبل كالو مناخذ نسوان
بيبي تخربطت بس دخلو للبيت وصلت للموت وبقينا حايرين بيها حاله من الحزن خيمت على البيت مو هين يبقى هو ابو البيت وعاموده
يومين الفاتحه رحت اشتريت اسود النا كلنا وخاصه بان وعمه وبيبي اخذت الهن اكثر من قطعه نشتغل وقايمين بلفاتحه جانت بسيطه لان المعزيين قليلين ورغم هذا الولد ماقصرو وخاصه يونس ومرتضى تحسهم ولده مو ولد اخوه يركضون هنا وهنا عدا وجبات الاكل والثواب والقارئ يمكن عمو جان خايف ماكو ولد يحمل جنازته او يوكف بعزاه ويونس ومرتضى أدو هذا الواجب
بلفاتحه استغربت من سمعت خالو عمران جاي يأدي واجب وياخذ من خاطرنا وخاصه هو بنفسه كطع هذا الوصل
بلغني يونس
يونس : واكف باب الجادر واشوف سيارات طبكن سيارتين وحده نزل منها صلاح وخال عمران والثانيه عبد ومهدي اخذو من خاطري وكعدو قرو الفاتحه
مهدي : محتاج شى
يونس : رحمه الله والديك مامحتاج جيتكم كافيه
اباوع عبد وابوه واحد ميباوع بوجهه الثاني لعد اشون انجمعو سوه
عفتهم وحرت بلفاتحه
مبقو اقل الساعه وانطو واجب وطلعو
ناي : ومحجو شى منا منا
يونس : كلشي ماكو
ناي : تعبت موو
يونس : رجلي ملختني كوه واكف عليها
ناي : سوده عليه تعال طب افركها الك
يونس : لا خلي اروح اساعد مرتضى هذا هم هلك حتى ايده هاج الالم بيها
ناي : الله ينطيكم العافيه والله ماقصرتو
يونس : بيبي شون صارت
ناي : انطيناها علاجها ونايمه
يونس : وعمه بديعه
ناي : ساكته المكروده
يونس : دكت عليه عمه خوله ومكدرت اجاوبها
ناي : عرفت بوفاة عمو وخطيه شكد بجت رادت تجي للعراق وعمو نجم ماقبل تعرف جوحي وعبيد متحلفين الها وخاصه جوحي كلنا الها المن جايه الفاتحه وخلصت
يونس :اني بالي سالفه كعدتهم مترهم ميبقون بعد وحدهم
ناي : اي صحيح اني هم دخت بهاي السالفه
يونس : خلي نخلص منا للسابع وراها اكعد ويه بيبي وعمه وافتهم منهم
ناي : ان شاء الله خير
صار الليل وفضت الهوسه وكلمن راح لبيته
دخلو الولد تعبانين كل واحد منهم شمر نفسه بلفراش ونام
صارلنا ٧ ايام هنا كاعدين بهدوء بيبي وبان مابطلو بجي اما عمه ماعدها غير السكوت كامت توكع وتتخربط ضغطها يشكل مره صاعد مفول ومره هبوط وصحتها بلنازل وتذبل
هاي الايام مهدي يخابرني ويريدني ارجع واني اتوسل ابقى لان مااكدر اعوفهم
اليوم السابع ماسوينا شى بس ثواب وزعناه مو حمل هوسه
اندكت الباب توقعنا احد من الجيران فتحت الباب
مرحبه الحجيه موجوده
اي تفضلي منو انتي
اني مديحه مرت فلاح الله يرحمه
ناي : صفنت بوجهه من الصدمه هلمره جايه لهنا
اريد اشوف الحجيه
اباوع بيدها ولد اثنين واحد بكد سيوفي والثاني اكبر
مكدرت اكول الها تفضلي يجوز عمه بديعه متقبل طبيت اريد احجي مااعرف شكوول
شرهب : منوو بلباب شبيج
ناي : باوعت على عمه بدعه الي بيدها السبحه ومدنكه هاي تكول اني مرت عمو فلاح
رفعت راسها والكل يباوع عليها
بديعه : دخليها
ناي : خلي اكول الها تروح
بديعه : دخليها ناي
ناي : رحت صحتها وهي طبت
مديحه : السلام عليكم
الكل صافن ومترقب شراح يصير
مديحه : اعرف بيه مامرحب بيه هنا بس اجيت للحجيه حتى تشوف ولد فلاح لان دوم جان يكول اتمنى امي تعرف عندي ولد يشيلون اسمي
شرهب : والله عياره تلكاه ولا حاجي هيج شى هذا فلم منها حتى تجي وتثبت روحها اخاف يطلع ورث لفلاح تضمن حق ولدها
ناي : صوتج يمعوده
شرهب : هو الحق ينزعل منه
عمشه : تعاالو ليه يمه احبنكم
مديحه : روحو ماما لبيبي بوسوها
بان : عين على امي الي حاسه تتكطع من هذا المنظر وعين على ذوله الجهال الدم يحن الواحد مو بيده
عمشه : افيييش يمه ريحه ولدي بيكم
مديحه : كل متردين اجيبهم الج لازم يعرفون اهل ابوهم ومنو اختهم وعمامهم
شرهب : خاصه عمامهم من خيره العمام اي لتباوعين هيج عندج عمو عبيد يماي ينحط على الجرح يطيب اما عمو جوحي هذا العشق فد واحد سخي وكريم وايده مو اله انيال ولدج عليهم نسيت اعرفج بنفسي ابن بت عم جهالج شرهب كولي شوشه للسهوله
ناي : وجع شبيج انفكيتي
شرهب : غير اعرف مرت عمي على عمامي وعلى العائله الملكيه
مديحه : هله شرهب حبيبتي وانتي بان شكد المرحوم جان يسولف بيج ويحبج ذوله علي ومؤمل اخوتج
بان : مكدرت اتحرك حسيت اذا اكوم واخذهم بحضني خنت امي مردت ازيد المها كافي الخيانه الشافتها من ابويه
مديحه : عمه الولد ولدكم واني مرت ابنج واكيد مااحرمج منهم وشوكت متردين بس دكيلي راح اخلي الرقم يم البنات ساعه واني يمج حتى اذا تردين يباتون يمج عادي
عمشه : ينطيج العافيه يمه ماقصرتي عبن شفت وليدات المرحوم گبل مااموت
انه لون شفتهم رويحتي طارت لجن ماتحطين رچلج عتبت هذا البيت گبل ماتاخذين راي صاحبته
مديحه : صاحبته غير انتي
عمشه : انه والمرحوم وكل ذوله جدامج خطار عند بدعه هيه راعيه البيت وهيه صاحبته وانه ماارضى تخشين دارها بليه رضاتها
وان مارضت لااتعبين رويحتج وتخطين هلمره دخلتي مره ثانيه ماتدخلين
مديحه : شنو اطرديني عمه
عمشه : چاانه احجي مگلوبي اكلها موش انه راعيه البيت افتحلج بابه بيا اساس
انه شوكت مااريدن اشوف الوليدات اجيج لبيتج لا كل شوي السلام عليكم وهازه طولج وبسچ مناهد انه وجعانه ومالي حيل اخذ وانطي وياج
بديعه : كل الصار أذاني بس هبت بلحظه نسمه بارده على گلبي المجمر من شفت عمتي منطت بيه ورفعت قدري كدامها
العفو عمه البيت بيتج
عمشه : چا هيه كوه نتعازم بيت ياهو هذا موش بيتي انه بيتي بغداد وانت جزاج الله خير ملفيتني ومراعيتني وحاسبتني امج چا چسب انه اسولفها جدام الگل مايخش البيت هذا اله برضات بديعه والمايجي على مزاجها ويضيج خلكها منه يطلع ويفاركنه مااريدن تكدر عبنهه بنيتي واليصيبها يصيب افادي
بديعه : باوعت على مديحه الي وجهه انگلب ومبين عليه ملامح العصبيه والضوجه
انتي اخذتي رجلي ٨ سنين وعشتي وياه وخلفتي والله يحفظهم الج بس الي اتزوجتي مات الله يرحمه ومالج مكان هنا اعتقد كافي أذيه لاتشوفيني طولج وتذكريني بخيانته خليني اترحم اله من عرفت بسوايته لهاي اللحظه حتى الله يرحمه كوه اكولها ولدج يبقون اخوه بتي وانتي بان تكدرين تشوفين اخوتج وماامنعج ابد منهم يبقون اخوتج وكلكم نفس الدم وحرام عليه اكطع صله الرحم ولتتوقعين ازعل بس بعيد عني لا اريد اشوف مرت ابوج ولا ولدها وهذا اقل حق اليه حتى ماانجرح روحي الهم للبيت او اي مكان تحبين تشوفيهم بس كدامي مامسموح الج وياريت اذا عمتي تريد تشوفهم اخذيها وياج لان من اليوم هذا البيت ميطبون اله
كافي اخذت رجلي مامستعده انطيها صحتي شوفتها وشوفت ولدها راح تموتني ناقصه عمر وماضل بلعمر هوايه حتى اضيعه
ابوج اخذ هوايه وبقالي القليل مااجي واشمر صحتي وعمري بحضن مرت ابوج ولدها وكل مااشوفها اتذكر الرجال الوحيد الي حبيته شسوه بيه وشون جازه تعبي
مديحه : اني مااجيت حتى اغثج اجيت اسوي الواجب
شرهب : ياعيني وانتي صاحبه واجب كلش ماتفوتج فوته
بديعه : وأديتي الواجب ياريت مااشوفج بعد
مديحه : يله ماما علاوي امولي امشونه صوجي اجيت هاي تاليها انطرد من بيت رجلي
شرهب : يارجال يمه ذاك عمي بلنجف بوادي السلام روحيله هذا بيت عمتي والمره تكول الج لتجين شنو هاي كاطعين الحساسات مالتج ومتحسين غيرج وحده تستحي تحط عيونها بعين المره الاخذت رجلها
ناي : كرصتها من ايدها حتى تسكت
شرهب : ااااخ خليني ذني طكن مرارتي يحجن برود
عمشه : ام شعفه گضي لسانج وابلعي لااكومن احش رجولج حش لاتدخلين
شرهب : كضيته
بديعه :كومي بان وصلي مرت عمج اخاف متندل
شرهب : اني اوصلها
بديعه : اكعدي انتي كومي بان
بان : اعرف امي تقصدت تكومني لان شافت بعيني الحنيه على اخوتي كمت وراهم وصلت لباب الشارع انداريت ماكو احد حضنتهم وبستهم
مديحه : رضيتي بكلام امج
بان : امي عاقله وطيبه غيرها مره اطردج منا على سوايتج بيها بلعكس المفروض تحترمين مشاعرها ومتوصلين ابد اذا احتاجيتي شى هذا رقمي انطيني رقمج اخذته منها ديري بالج عليهم راحت ورجعت دخلت للبيت
شرهب : هاااا احجي هسه لو هم راح تركعني على حلكي
عمشه : اشتعلت اصفاح اهلج كمزت من صوتج عبنه عالي مهوشه هاي مو اخيتج هاديه وحس ماسمعت ليها شبيج تناطحين ويه خيالج
شرهب : هاي لو اني ومرت رجلي تجي هيج والله لا اطلعها شايليها بسديه مال مستشفى وتك عين وايد ورجل مكسرات واحرك حتى شعرها مثل ميحركون الباجه وينظفوها
عمشه : چا گليل العملتي بلزلمه عدي اذكرنج
شرهب : شسويت هنه ٢٥ مليون وطرده وفضيحه يطبه طوب احد گله يصير شاذ ايييع بيبي بشنو ذكرتينا
بديعه : صاعده ارتاح
بان : يوم بيج شى
بديعه : مابيه
ناي : صعدت عمه وعيوني عليها حاسه بنارها موهين الجاي تعيشه
لليل اجوي الولد والكل كعد وصحنه عمه
يونس : مترهم بعد تكعدون وحدكم لازم ترجعون لبغداد شلكم هنا
بديعه : دوام بان شون
بان : مااكدر انقل اله وره نص السنه ماكو نقل هسه واني كوه حصلت الواسطه وتعينت
مرتضى : مدرستج اهلي لو حكومي
بان : جنت اهلي ومصار كم شهر من تعينت حكومي ولوما المديره تحبني واخوها بلتربيه وتوسطت اله لو بعد ٢٠ سنه مااتعين مو كدامك التعينات ماكو بفلوس وماكو
مرتضى : عبالي بعدج اهلي جان شفنه مدرسه الج بغداد
بان : لو اهلي جان من هسه نرجع
يونس : اذا هيج وره عطله نص السنه انقلج
بان : مو هين النقل لازم تشوف مدرسه تقبلني
يونس : انشوف من هسه اسأل وادور
مرتضى : اني عندي ولد صديقي ابوه مدير مدرسه واكيد عنده معارف
بان : اذا مدير مدرسه ليش ماهو يقبلني
مرتضى : اعداديه ولد
بان : شكوو بيها اني مدرسه بكلوريوس
مرتضى : شنو شكوو بيها غير ولد ومراهقين وانتي صغيره يكوم الرايح والجاي من الطلاب يذبله حجايه ويتحارش لازم يوميه متعاركين اندورلج مدرسه مال بنات واكعدي واسكتي
بان : ياصغيره عمري ٢٩ سنه
يونس : ممبين عليج الي يشوفج يكول ٢٢ معانيج صغيره وشكلج ناعم وكلام مرتضى صحيح مترهم دوامج بأعداديه ولد
بان : براحتكم انتم ادرى
بديعه : ليضل بالكم توكلو على شغلكم والبنات على بيتهن صارلكم اسبوع عايفين حياتكم واشغالكم
يونس : ومنو يبات يمكم
عمشه : يمه چا احنه احديثات غير نسوان معتبرات انه خلصت ايامي بلشوارع وبلسواكه وبين الزلم چا مااعرفن احمي رويحتي وذني وياي
مرتضى : واني كل خميس اجي ابات والسبت ارجع
بديعه : ميحتاج مشكور تعبانكم ويانه
يونس : تحجين عبالك ويه غربه شبيج عمه
بديعه : ياابني گلشي مابيه اني هم ماارضى الكم الاذيه عايفين بيوتكم وحالكم الدنيا متوكف وره واحد ولازم نعين نفسنا ومنا لحد عطله نص السنه يحلها ربك
يونس : حضرو نفسكم من باجر راجعين
تعاي عمه رايدج بشغله
اخذت عمه ودخلنا لغرفه بيبي
هااج
بديعه : شنو هااي
يونس : جم فلس جوه ايدج دفعت ايجار هذا الشهر والكهرباء
بديعه : عدنا والله راتب بان وعمتك هم ممقصره
يونس : تاخذين من بان وعمه واني بمثابه ابنج متاخذين منه يصير هيج
بديعه : انت منيلك ياعيني مكافي مصاريف عمليه مرتضى اخذت الوراك والكدامك وكل فتره سالفه طالعتلك
يونس : عندي خير من الله هااج والله ازعل منج وكل شهر ايجار والكهرباء عليه والمصرف على بان وعمه
بديعه : اروحلك فدوة لتدفع شوكت تلم نفسك ضال تدفع ايجارات هنا وهنا
يونس : تتسهل وعيونج بس ادعيلي ومن ربج الرزق اريدج قويه وتوكفين على حيلج اعرف عمي أذاج بس بعد ميفيد الحجي ولا العتاب
بديعه : اوووووف يانار گلبي شوكت تطفين
يونس : تطفه ياغاليه لتخليني اقفل المحل واكابلج واكعد ديري بالج على صحتج لا وروح امي اسويها تدرين بطكاتي
بديعه : الله يرحمها ريتها يمي اشكيلها حالي استغفر الله لا اعتراض على حكمك ربي
روح اكل ابني مسوين عشى لتنام بليه متاكل
يونس : مااكل اله تكعدين وتاكلين ويايه
بديعه : ولك يمه مجوعانه
يونس : والله مااكل
بديعه : هذا هو اكعد امري لله
يونس : هااااج حطيت الفلوس بيدها وبست راسها واخذتها للهول يله كومن صبن العشا جعنا وعمه راح تكعد تاكل ويانه
شرهب : اي عيني نتوسل بيج تواسيل متقبلين يونس بكم حجايه فر راسج وراح تكعدين ويانه تاكلين
بديعه : متكولي هاي شون متحملها
يونس : غضب وكع على راسي مابيه مفر
شرهب : هيج صارت ولا ارجع وياك باقيه هنا وشوف منو يغسلك ملابسك ويسويلك اكلك موتو جوع
مرتضى : اييي واخيراً راح نرتاح منج
شرهب : يويو تقبل يتشمتون بيه الاعداء
يونس : من تبرطم هيج جنهه بزونه مكتوله اضعف كدامها لا مااقبل وشحده الي يندك بيج
شرهب : حيييل على گلبك كاعده
مرتضى : يجي يوم واخلص منج واخذ غرفتج
شرهب : لو تموت متاخذها ولا اطب الها وعقوبه مااسويلك اكل ولا اغسل ملابسك الوصخه ولا العب وياك واخسرك
بان : شقه مرتضى وشرهب خلاني اغار اعرف ماكو شى بينهم بس ضجت حييل ميانه مو طبيعيه وياه اختنكت متحملت وكمت
شرهب : وين
بان : راسي يوجعني اريد انام
خليت وصعدت
شويه وانفتحت الباب جنت مغطيه راسي انجر الغطا
هااا شتردين
شرهب : غرتي مووو
بان : كعدت على حيلي شنو غرت ومن منو
شرهب : اني جنت شاكه بيج وگلبي لاعب منج
بان : شبيج مفهمت
شرهب : تحبين مرتضى الفاهي
بان : شنوو منيلج هذا الحجي عيب شرهب اني بيا حال ابويه مصار ايام من مات
شرهب : هاي كلاواتج مو عليه ولتعلين صوتج راح تفضحين نفسج اذا انتي هيج تحبي يحظي ليش متبينين
بان : شنو الي ابين اله
شرهب : معناه متحبي لمرتضى
بان : لا وكومي اطلعي بره
شرهب : همزين لان اني بديت احبه تعرفين دوم گبال عيني وسوه بنفس البيت مو بيدي حسيت روحي احبه وكلت خاف انتي تحبي وتزعلين مني ماطول گلتي لا حتى اتقرب منه اكثر بلكي فتره وتسمعين بيه خطبني ادعيلي
كمت جان تجرني من ايدي
بان : صدك تحبي
شرهب : انتي شعليج مو متردي
بان : لتلعبين عليه شرهب والنبي گلبي راح يوكف
شرهب : تحبي لو لا فضيني
بان : ايي احبه وكمت ابجي
شرهب : المن البجي قابل مات
بان : اسم الله عليه
شرهب : ياااا خيه انتي واكعه وطامس راسج لا والحظ
بان : ديري بالج تكولين لاحد
شرهب : وعد مااكول بس لمرتضى
بان : لا لا تخبلتي
شرهب : ههههههه شكد حلو من واحد لازم لزمه على واحد يااختي يحس روحه رئيس دوله ويأمر وينهي
بان : شتردين هسه اعترفت وبعدين
شرهب : ضلي هيج حبي من طرف واحد وكطعي روحج لحد ماتجي وحده تاخذه منج
بان : شتردين اذب روحي عليه لو اموت كرامتي اهم شى
شرهب : ماشي ام الكرامه يصير خير كومي ملي عينج من حبيب الگلب باجر رايحين والله واحد لايك للثاني اثنينكم مطفين
ولك ياابن ساهره بيك حظ وبان حبتك
بان : لتحجين لاحد الله عليج
شرهب : سرج بكهوه حياتي
بان : انتي احجي وبعد لا اعرفج ولا تعرفيني
شرهب : هم بيج زود تهددين كومي وره منكمل العشا تغسلين المواعين ولا اضفر ضلن عندي كافي دلال ايام الفاتحه كلها اني اغسل
بان : صار بس ضبي لسانج اسوي التردي
شرهب : يايمه الحياه شكد حلوة من تستغل واحد
ناي : كل هاي الهوسه وايام الفاتحه واني بتعب رغم شرهب شالت اكثر الشغل بس اني مدري شبيهه من انام اون من الالم ولا قطعه بيه متوجعني اما فروه راسي احسها تريد تنشلع من الالم اخذت مسكن وكوه نمت
ثاني يوم ودعناهم
رجعنا كلنا وصلوني للبيت صعدت اسحل بروحي سحل وبيدي سيف فتحت الباب لكيت البيت هوسه يبوو شراح ينظفه اوف منك مهدي عفت كلشي وتمددت اريد انام اعراضي مثل فلاونزا بلعظام
تمددت انام واحس واحد نايم على صدري كوه اكعد واتعوذ من الشيطان واقرا ايات وارجع اتمدد ويرجع الثگل مره ثانيه حسيت على ايد تلعب بشعري اخترعت وفزيت اعيط
مهدي : اسم الله هاي اني
ناي : شفته من الخرعه حضنته وابجي
مهدي : شبيج حبيبتي جنت مشتاق الج ولعبت بشعرج وانتي نايمه لو ادري ولا اتقرب منج
ناي : جنت مخنوكه ومثل الكابوس عبالي صار شى
مهدي : هياتني يمج شعجب نايمه وعايفه سيف وحده اول تالي
ناي : ماادري شبيهه جسمي كله يون علية مكسره وحتى خفقان عندي
مهدي : اوديج طبيب
ناي : لا يجوز من تعب الفاتحه ولان ايام بره بيتي تعبت واركض وره سيف
مهدي : ارجعي نامي راح اخذ سيف واطلع
ناي : احد طب واني ماكو
مهدي : ليش
ناي : هيج سؤال
مهدي : لا ماكو بس عبد وصلاح يجون يمي مرتين باتو هنا
ناي : وعمتي
مهدي : ماصعدت ليش
ناي : ماكو شى خلي ارجع انام طفي الضوه وراك ودير بالك على سيف
مرت الايام واني حالتي اسوأ كمت اتعب من الشغل واتعب من الدراسه تراجع مستواي الدراسي وهملت بيتي ودوم انسى عدا الصداع الي مسيطر عليه مهدي يريد يتقرب مني مااتحمله واتهزم منه وادور حجج واعذار بلبدايه جان يعذرني بس بمرور الوقت كام يتذمر ويضوج
دخلنا ٢٠١٦ وراح تجي عطلة نص السنه ملتهيه بالامتحانات الي نصها مجاوبت عليهم
مهدي : وين البلوز النيلي
ناي : هااا وصخ نسيت اغسله
مهدي : وين جنتي من البارحه كتلج اريد البسه باجر اكثر ملابسي وصخه الداخليات صارلهن ايام وصخات البيت كوه تنظفي الاكل لو مالح لو محروك تنسي متكوليلي شجاج شوفي حالج وين نظافتج دلالج
ناي : كعدت ابجي ماادري شبيهه متأذيه مهدي حييل متأذيه
مهدي : استغفر الله
كعد گبالي وخر ايدي من وجهي شبيج حبيبتي صاير شى مااعرفه
ناي : ديصير بيه شغلات بعمري مصارت كارهه نفسي وبيتي ودراستي وكلشي مااحس بطعمه حتى الاكل جسمي طول الوكت يوجعني
مهدي : مو كتلج اوديج دكتور اكثر من مره وماقبلتي
ناي : ايي وديني تعبت
مهدي : باجر اوديج ونجيك كلشي امسحي عيونج واليوم مااطلع راح ابقى يمج
ناي : اي ابقى عفيه لتروح
ثاني يوم طلعنا للدكتور بلبدايه دخنا المن انروح لاي طبيب شنو اختصاصه اذا اني كلشي يوجعني قررنا نروح بلبدايه طبيب قلبيه وصدريه وفحصني وسوالي ايكو وطلبت تحاليل معينه مني كل النتيجه كلشي ماكو
طلعنا منه بعد ساعات حايرين شنو العله الي بيه
بعدها بيومين اخذني لغير طبيب وهم طلب تحاليل كامله صوره الدم والهرمونات وحتى الغدد وبعدها بيوم طلعت النتيجه وهم كلشي مابيه وهذا الشى زاد حيرتي وحيرت مهدي
اكثر من اسبوعين نفتر على الاطباء حتى طبيب جراح دماغ واعصاب رحت سويت رنين وسويت اشكال الفحوصات مابقى مكان بيه مافحصوه حتى المفاصل وكله سليم مابيه شى غير شغلات بسيطه مستحيل اعراضها تأثر عليه
رجعت لبيتي وزاد تعبي وياها زادت المشاكل الي بيني وبين مهدي لان طبياً اني كلشي مابيه وصحتي عال العال والي احسه ماله وجود الهذا كمت اتعصب من اتفهه شى وكل شويه كآبه العيطه بينا شكيت ليونس حالي وطلب مني اجي كم يوم يمهم واني مقبلت مااريد اطلع من البيت اريد بس اناام
كاعده اقرا قدمت على السادس هاي السنه واخيراً سمحولي تركت سنتين وبسبب عمري قبلو بالامتحان اليوم اخر يوم امتحن التمهيدي الجو بارد شهر الثاني شباط
امشي بلشارع واقرا بالاسئله ومندمجه لابسه تنوره وقميص وشعري شايلته ممنوع يبقى مفتوح لهسه اني بليه حجاب اكثر من مره يطلب يونس مني واتهزم وهو مايجبرني رفعت راسي شفت عبد واكف صار شكد مشايفته
لا ارادياً فرحت بداخلي توقعت نساني سويت نفسي ولا يمي
وصلت قريب منه
عبدالرحمن:شرهب
شرهب : وكفت وكتله نعم
عبدالرحمن : شونج بالامتحانات
شرهب : موكفني بنص الشارع حتى تسألني شونج بالامتحانات
عبد الرحمن : وكفتج لان مشتاقلج مكدرت مااجي اشوفج شكد قاومت ذيج الايام وتالي بالاخير استسلمت
شرهب : زينه الْحٍمَدٍ للـّہ من رخصتك
عبدالرحمن: اوكفي
شرهب : خير تره تأخرت
عبدالرحمن: اني رايح لديالى هاي الفتره اخاف يصير شى عليه امانه عليج تذكري اني شكد حبيتج
شرهب : لزمني گلبي من كال هيج شكوو صاير شى
عبدالرحمن: الوضع موزين وعالكه ولازم ارجع لديالى ويه ابويه
شرهب : وانت الي راح تحلها اكعد بمكانك ولتروح وانت مو متحجي وياه
عبدالرحمن: هاي سالفه وسالفتج غير رايح وياه حتى لتكول العشيره عاف ابوه وحده اما يوم مااخطبج اعوف العشيره واجيج اكو شغلات مو بالايد يانظر العين ادعيلي تهدا الامور واطلع منها سالم
شرهب : حاولت بكل مااكدر اسيطر على روحي وابين كدامه عادي واني شعليه بس نظراته ونبرت صوته خلتني اخاف مثل الواحد يودع واحد
تروح وترجع بلسلامه عفته ومشيت اختنكت من كلامه اول مره ادعي اله ميصير عليه شى اكو نغزات اله بگلبي ليش اجذب على نفسي هذا الشخص من دون الناس كلها افكر بيه
واليوم خفت عليه
ناي : الوب اريد هوا والبيت مثل السجن صار عليه متحملت ابجي واعيط حتى سيف خاف مني شلت التلفون المن خابر مشفت روحي غير اخابر عمه خوله وابجي مثل الجاهل يستنجد بأمه
خوله : هلوو نايه وينج صار مده ماكو هيج مهدي ماخذج من عدنا
ناي : فدوة عمه الحكيني
خوله : الرحمن بيج شى ابنج صار عليه شى
ناي : سولفت الها الي احسه واشهك وكاعده بلكاع اريد اكطع شعري من الالم حتى راسي كمت اضربه بلكنتور اريد يهدا شويه
خوله : صخام الصخمني بس لا طكنج بسحر
ناي : ياسحر هو اني شايفه احد واصل احد يمي عمه محد يعرف علتي تعبانه
خوله : اقري قران افتحي سوره البقره بلبيت
ناي : اقرا وانسه ومااركز تعبت والله حاسه ايامي قليله بلدنيا
خوله : اسم الله عليج اسمعيني زين كومي سبحي والزمي القران حتى لو تنسين المهم متركي صيري سباعيه ولا تستسلمين
ناي : بديت امشي على كلام عمه ومافاد وهاي الايام تمشي وتركض واني حالتي بلنزول
لحد ماكمت امشي واوكع وايدي اذا لزمت الحاجه تنكسر
مهدي كام يهج من البيت ميتحمل اهمالي ولا وضعي لحد مايوم كعدت بلحمام ابجي واحك بجسمي لزمت الحجاره مال الرجل واحك برجلي وايدي ملخت جسمي تملخ
اندك باب الحمام
مهدي : نااي شوكت اطلعين سيف طك من الجوع
ناي : تهسترت وكمت اعيط طبه مرض لا اريدك ولا اريده روحو مني
ماواعيه للي احجي واحك بجسمي حيييل مستمر والدم كام ينزل من كل جهه دخل مهدي عصبي عليه هو شافني اخترع
مهدي : شسويتي بروحج
ناي : عوفني اريد امووت مااريد اعيش تعبت جرها من ايدي حييل الحجاره وشمرها على صفحه وحضني
مهدي : وتعوفيني اني وسيف ينطيج گلبج
ناي : محد يحبني ومحد يريدني
مهدي : اني روحي بيج مو بس احبج شوو كومي خلي اغسلج
ناي : غسل جسمي وابجي يحرگني ااااخ على كيفك عفيه
مهدي : على كيفي
ناي : بقى يغسل بجسمي ويبوس براسي واني عيوني مابطلت تبجي
لفني بلمنشفه وطلعني ويجر بيدي مثل الجاهل
كعدني على الجربايه ونشف شعري وبدلي وهو هم بدل لان ملابسه تنكعت من المي
مهدي : تعاي بحضني
ناي : مااريد
مهدي : ليش اني حبيبج مهدي
ناي :تعبانه والله ارحموني
مهدي : منو وياج احد مأذيج
ناي : محجيت اي شى سكتت لان اني نفسي مااعرف شبيهه
شرهب : من سمعت بحال ناي تخبلت اخذني يونس ليمها ابقى صار شهر مجايتنا بحجه امتحاناتها وامتحاناتي من دخلت جفلت الوجهه عوده وجوه العين اسود والشعر مهلس وضعفانه وكوه تمشي عبالك وحده عمرها ٩٠ سنه
امشي ناخذج للطبيب
ناي : مبقيت طبيب يعتب عليه
شرهب : تبقين هيج
ناي : المن جايه
شرهب : غير عليج
ناي : عوفوني مااريد احد
شرهب : لا اختي مو صاحيه بقيت اراقبها طول اليومين كامت هلمره متلحك على الحمام تخبلت كمت ادك على راسي اختي راح تضيع من عدنا خابرت يونس واول مره يدخل بيتها وراد ياخذها ومهدي مقبل
مهدي : اني ممقصر يشهد الله مبقيت طبيب مااخذتها عليه وهم سألت على طبيب لاخ راح اوديها وارجع اكرر الفحوصات واذا الامر تعقد حتى لو اخذها واسافر
يونس : اذا صار شى على ناي انت المسؤول
مهدي : اني ممأذيها حتى تكول هيج واكيد بكل الاحوال هي بمسؤوليتي
لو اعرف ابيع كلشي واسفرها واعرف علتها
شرهب : تركنا كلشي وكابلناها وكعدنا حتى الاطباء منقبل مهدي يروح وحده طبينا الشهر الثالث وناي على وضعها بلعكس كاام يسوء
نجحت وتأهلت للامتحانات واني مابعيني شى اريد ناي حتى الشهاده مااريدها صار بيتها وابنها مسؤوليتي ويونس يروح ويجي علينا عمتها ولا مره صعدت وكالت شبيهه يمكن فرحانه وليش يمكن اكيد فرحانه
عمه خوله يوميه تخابر
مهدي ويايه وماعافها يغسل الها ومرات ينومها بحضه يحاول شكد ميكدر يكون وياها بس هي تنفره ومتريده
كاعده يم راسها اقرا قران وباوعت لكيت مدرره على نفسها طكيت بجي متحملت شكلها واني ابجي دك التلفون عمه خوله
بجيت بحركت گلب ناي كعد تضيع عمه اختي منتهيه ومالها علاج
خوله : جايتكم
شرهب : وجوحي وعبيد
خوله : لتخليني اسب ابويه الي خلفهم خلي يندكون بيه واني اعرف شسوي بيهم رايحه احجز اذا ابقى اتخبل هاي اختج علتها مو طبيب علتها عمتها الساقطه شوف شمسويه الها
شرهب : هي مو تكول درب عمتي مو سحوره وهاي السوالف
خوله : الي تسوي مره تحله الشغله بعينها وتسويها الف مره يومين لو ٣ اقرب حجز واني يمكم
شرهب : سديت التلفون من عمه دخل مهدي مسحت عيووني واريد اشيل ناي احركها من فراشها
مهدي : اطلعي بره شرهب اذا مصارت زحمه عليج
شرهب : خلي بس اغسل الها
مهدي : اني موجود
شرهب : خليت وطلعت بس الباب مفتوح اباوع على مهدي باس راسها وشالها وحطها الجهه الثانيه ونزعها ملابسها وشالها وطلع للحمام
شرهب بلا امر عليج فرشيلها بلكاع خلي اشيل الدوشك واشره
شرهب : صاار طب سبحها بقو هوايه بلحمام من طلع لكيت عيون مهدي حمره مبين باجي عليها استغربت ولا توقعت هيج يحبها ولا يبين عليه اصلاً
مددها بلفراش الي فرشته وحطها بحضنه وهي تون ويبوس براسها سديت الباب عليهم وكعدت بلهول مقهوره على حالهم وادعي ميصير شى بأختي
كلها كم يوم واني اروح واجي مبقى شويه واطب سمعت صوت هورن بره مديت راسي يونس ينزل الجنط واخيراً اجت عمه ممصدكه
فتحت الباب وركضت لحضنها ابوس بيها الْحٍمَدٍ للـّہ على سلامتج
خوله : الله يسلمج وينها
شرهب : تعاي فوك
خوله : قبل لا اصعد وين بيت وداد
شرهب : هذا الباب صعدو الجنط انتم واني جايه
شرهب : شراح تسوين عمه
خوله : مالج دخل
ركضت وراها ويونس راد يلزمها مقبلت وحار بينها وبين ابو التكسي اخاف يفلت بلجنط دكت الباب حييل فتحته هاي المره الي عدها تشتغل دفعتها عمه خوله وطبت جانت وداد متمدده وتتفرج تلفزيون ولا يمها متختخه من الراحه
شافت عمه انصدمت وصوت عمه يسمع التايهه
خوله : شسويتي بناي
وداد : جايتني هداده واني شعليه بيها
خوله : قسماً بلي خلقج ياوداد اذا انتي الج طرف بمرض ناي لا اسحلج بلشارع واعزيج واصخمج هاي السوالف مو عليه گلبي خلص منها لو نسيتي سوايتج بذكرى
شرهب : عمه امشي نصعد عوفيها
خوله :اصبري خلي احل سالفتي ويه هاي العكربه
وداد :بت اخوج سكط ومريضه اني شلي دخل موزين من ابني ملفيها ومشامرها بلشارع ومتحمل مرضها وهي والميته سوه
خوله :خلي يصير بيها شى لا ادفنج بمكانج
شرهب : منشوف اله مهدي يطب شكوو شبيكم تفاجأ من شاف عمه خوله شصاير هنا ليش تتعاركون
خوله : الله جابك تعال احجيلك عن بطولات امك وشسوت قبل بعمتك ومو بعيد مرتك وكعتها من وراها
