رواية الابواب الخمس الجزء الثاني الفصل الثامن والثلاثون بقلم ريام الهادي
لاتحچي الصدك هسه الصدك مكروه
جامل حتى تنحب هيج دنيانه
ناس اتريد واحد عنده سبع وجوه
خلصها نفاق وهيه خلصانه..........
جامل حتى تنحب هيج دنيانه...........
تره اليحجي الصدك طاكيته خربانه
وداد :بت اخوج سكط ومريضه اني شلي دخل موزين من ابني ملفيها ومشامرها بلشارع ومتحمل مرضها وهي والميته سوه
خوله :خلي يصير بيها شى لا ادفنج بمكانج
شرهب : منشوف اله مهدي يطب شكوو شبيكم تفاجأ من شاف عمه خوله شصاير هنا ليش تتعاركون
خوله : الله جابك تعال احجيلك عن بطولات امك وشسوت قبل بعمتك ومو بعيد مرتك وكعتها من وراها
وداد : امشي طلعي بره بيتي طلعها مهدي هاي جايه تحركك عليه نسيت شسوت گبل وهي سبب موتت ابوك
مهدي : رجعنا لنفس المواضيع شرهب اخذي عمتج واصعدو فوك وكافي هوسه منا الجيران شتكول علينا اني بلباب واسمع صوتكم
خوله : ادري بيك مراح تصدك بيه لان هيه امك بس لازم ابرد گلبي اني جيت طايره وعابره قارات لخاطر بت اخويه الي هيه مرتك الصار بيها وكعتها هاي سوالف دجل وسحوره وامك بيوم من الايام ساعدت نسوان اخويه الميخافن من الله وأذن عمتك مو بعيد عادت الكره حتى تبعد ناي عنك غير امك تشوف دم سنونها ولا تشوف ناي
مهدي : عمتي شعليها هاي شتحجون
وداد : جذابه تذب بلاها وبله اهلها القذرين عليه
خوله : لا بالله كولي غيرها عيني وداد شوف صدكت وان ماصدكت متهمني بس لازم تعرف امك مو خيره ولا طيبه ولا انسانه تستحرم مثل مامبين عليها هااي الواكفه كدامك بيوم مرت اخويه الله ياخذها انطتها سحر وكالت رشي لذكرى جانت المرحومه زعلانه وعلى وجهه طلاك وتخلص من صمد وابوك وكف وياها الله يرحمه جان رجال والنعم منه
وداد : جذابه لك مهدي طلعها
خوله : عود شوفني شون مسكينه وهادين عليها لو الزمج هسه اكلج بأسنوني
مهدي : خلي تكمل اريد افتهم وبله عياط
وداد : شتكمل هاي وحده جذابه وحياله متشوف اسلوبها كل من وراك هااك هاي الشكول اطب بيتي
مهدي : مااسمع صوت احجي بله امي شمسويه
خوله : حتى تخلص من ذكرى وتاخذ ابوك وتروح لديالى رشت السحر ورجعت ذكرى مثل المخبله تريد صمد بعد ماجانت ناويه على الطلاك ومن وراها ابوك حلف مايحجي ويه اخته وامك سحلت ابوك واخذته لديالى وضلت المكروده تعاني بيت عيالها عدا حرموها اهلها من دخول البيت والكل نكرها
وماشافها اله بيوم المستشفى وتعالج ماضلت ساعات وماتت لو بيومها امك رفضت واتقت الله بيها ونبهتهم جان هسه ذكرى عايشه وابوك هم عايش تره امك شايله دم عمتك وابوك واني من حجيت وكتله لان احب ذكرى ومردت دمها يروح ولتنسى المات جان اخويه بس من كثر ما المرحومه مظلومه حتى اخويه كرهته وتمنيت موته وهاي الدنيا افترت وحظ اليتيمه وكعها بأمك ومو بعيد وكعت مرتك من وراها الي تعيش ومايأنبها ضميرها وتبقى بهاي الحقاره مو بعيد هلمره مو بس ترش بيدها تسوي
مهدي : اني مااصدك بهاي السوالف كلها سحر ورش هاي سوالف مال جهله ويجوز الي كلج امي مسويه هيج همه نفسهم أذو المرحومه
خوله : مامنتظره منك تصدك ولا يهمني رأيك اني جيتي لهنا لعيون ناي وهاي كدامك احجي اذا امك طلعت اله ايد بلسالفه مرض ناي اگلب البيت على راسها واريد اشوف منو يوكف بوجهي
يله امشي شرهب مااريد اشوف هاي الشكول نصيحه مني افتح عينك وحامي مرتك ولتنسى محبتها الك وهي برگبة رجال مويوفر اكل وشرب وبس واجبك حمايتها قبل كل شى تره عدوك مو غريب عدوك امك لان الي تأذي ابنها وادمر بيته هاي عدوو مو ام
وانتي وداد كدام مهدي اذا ناي ماصحت قسماً بالله اطلع السنين الفاتت كلها من خشمج وتعرفين بيه كد كلمتي وعود خلي تفيدج سوالف اللواكه والحنينه والفقاريه الي مقشمره بيها ابنج
شرهب : امشي عمه يله فدووة دفرت الباب برجلها وطلعنا
يونس :بربج من المطار للعركه مباشرة صدك جذب ياعمه
خوله : اليحجي ويايه اركع راسه بلحايط الدم صاعد لراسي وهذا الاغبر رجل اختكم مااصدك بلسحوره والرش مال جهله والله ماكو غيرك وغير امك جهله متكولولي اختكم شون حبتة
شرهب : الحب اعمى
خوله : من عمه العماها خلي اشوفها اله اطيح حظها
شرهب : شوفيها واحكمي
يونس : صعدت الجنط فوك واني رايح ورايه مسواك تأخرت على مرتضى بليل نمر عليكم
خوله : روح الله يرزقك مو متجي
يونس : شون مااجي بليل اني يمج مو تنزلين تتعاركين بعد
خوله : خلي اشوف اختك ونشوف وضعها ويصير خير روح لدربك
صعدنا ليفوك جانت ناي نايمه هي شافتها عمه كعدت يم راسها تبجي
شرهب : هااا شو ماطيحتي حظها
خوله : هاي شصاير بحاله سوده عليه منتهيه
شرهب : ليش كتلج وضعها موزين
خوله : يمه ناي تسمعيني
شرهب : متسمع ومرات متعرف احد عمه وضعها يخوف شون عفيه حضنتها عمه وتبجي وتبوس بيدها
خوله : مااخليج تصيرين مثلي والله مااخليج
شرهب : مفهمت شنو معنى كلام عمه بس مبين متأذيه حيل
شرهب : كومي ارتاحي وغسلي
خوله : ياراحه واختج هذا حالها
شرهب : مراح يتغير شى صار بلشهرين هذا وضعها عمه وانتي صار ساعات طايره بلجو وتعبانه نامي حتى تكدرين تقاومين
خوله : ليش مناخذها لبيت يونس هنا اني ممرتاحه
شرهب : مهدي ميقبل اكثر من مره حجه وياه يونس وهو يرفض يكول اريدها گبال عيني طلبنه منه يجي يمنا هم مقبل على هذا بيتها وميصير وهيه تعبانه تطلع منه
خوله : اني مهدي مااتحمله واخاف اطاخخ وياه واتعارك
شرهب : لخاطر ناي تحملي والله صار شهر عايفه البيت وباقيه يمها وحتى دراستي عفتها وتره مهدي حباب والله ورجال ادمي بس هو هيج طبعه
خوله : اتخبل من واحد يغم عينه من الديصير يعني مبين البنيه مسوالها شى وداها اكثر من طبيب وتحاليلها سليمه غير معناها بيها شى ثاني
شرهب : لتحرگين بأعصابج ميفيد الحجي
خوله : لا عيني يفيد واذا مفاد العب جوله اني مااجيت مناك لهنا حتى احط ايدي جوه خدي واظل اتفرج على طوله وطول امه واختج تسكط وتاليها يشمرها ويتزوج غيرها اجيت اشوفلي حل لحالتها
شرهب : صدك عمه شون اجيتي وشون خلاج عمو نجم
خوله : اوووف من نجم
شرهب : شبيهه
نرجع للسويد قبل اياام ::
خوله : منووو جنت ارتب بلجنط وسمعت صوت الباب انفتح
نجم : اكو غيري شكعد تسوين
خوله : حجزت رايحه لبغداد
نجم : يابغداد تخبلتي
خوله : ناي مريضة وضعها كله متخربط واتوقع سالفه سحر هاي عمتها الادبسسز مبين معايفتها بحالها
نجم : هناك يمها يونس وشرهب وزوجها تدرين اذا رحتي لبغداد وعرف جوحي شراح يسوي بيج
خوله : يطبه طوب شيريد يسوي قابل
نجم : مو بعيد يگتلج خلاص نسيتي سوايتج بيه
خوله : منسيت والشغله صارلها اكثر من ٦ سنوات يجوز نسه وحتى اذا مانسه شيريد يعيط يتعارك طز بيه ميهمني
نجم : مترحين وين جوازج جيبي
خوله : ركضت وضميت جوازي وره ظهري ايااك تسوي مثل كل مره وتمنعني
نجم : اني لمصلحتج بابا هذا شراني ومراح يعوفج
خوله : واني مااعوف ناي المفروض من تسمع بمرضها انت بنفسك تحجز اليه وتروح ويايه نسيت هاي بت منو شتريد اعوفها تموت وتسكن بصف امها شوو وخر خلي اكمل مابيه حيل اتناقش وياك
نجم : وروحتج شراح تسوي
خوله : تسوي هواي شغلات كافي احس روحي ماعفتها بعز حاجتها اليه وكفت وياها شكد صارت شغلات بيها وبأخوتها وماحجزت وصبرت بس هلمره غير لان هلمره اشوف حالها مثل حالي قبل سنين واذا ضلت هيج راح تروح من ايدينا رضيت ابتعد عنهم من ظروفي التعبانه وحالتي وانت ادرى بيها بس يبقى گلبي وياهم شتريد ترجع النسخه الثانيه من خوله نسيت الصار بيه قبل من وره سحوره نسوان اخوتك نسيت من ذبيتوني لرجال بكد ابويه ودرتو وجهكم ورحتو ومحد وكف ويايه تريد ادير وجهي الها مثلكم تدري يوم مارجعت لبيت اهلي الكل خاف مني ومحد تقرب وكعد وسولف وكال شبيج شصار اله ذكرى اجت وبطنها واصله لخشمها لهسه اتذكر وماانسى منظرها ومنظر عيونها شون تدمع عليه واني اسولف الها حالي وتعاطفت ويايه تريد بتها من توكع ادير وجهي عنها اني مو نجم الي يعوف احبابه يحيرون بنفسهم
نجم : بديتي تخربطين بلحجي
خوله : مو خربطه هذا واقع دومك هيج تمد راسك وتشوف الي تحبهم يتأذون متسوي شى تضل بس تتفرج هاي امي صار جم سنه كلفت نفسك تحجز وتنزل تشوفها تخابرك تشهك من الشوق عليك وانت ولا يمك لا حنيت على ام ولا على اخ ولا على ولد اخ حتى ولد الي المفروض تحبها وفي لذكراها شمرتهم وره ظهرك لتجي هسه تكول خايف عليج
نجم : يعني اني مااخاف عليج ولا اهتم لعد ليش اخذتج ويايه ليش ضليت سنين اشتغل مثل المطي حتى الم نفسي واسفرج ويايه مجان عفتج الهم ياكلوج هاي تاليها نكرتي كلشي وطلعت مو خوش اخ وياج
خوله : اووووف شمرت الجواز ودفعت الجنطه وكفت كباله اعرف بيك طيب ويايه وماقصرت وهواي وكفتلي بس اكو شغلات تخليني افقد اعصابي عليك المفروض تساعدني من تسمع واحد بيهم صاير بيه شى مو توكف ضدي جنت دوم تكول ذوله امانه ذكرى ياامانه وانت من تسمع واحد واكع بيهم ادير وجهك وشعره متهزك اذا وضعك ونفسيتك متتقبل تساعدهم على الاقل عوفني اني اقوم بواجبهم لتصير انت والزمن عليهم
نجم : هذا هو خوله اني ردت مصلحتج من خوفي عليج مااريد اسمع خبر موزين عليج
خوله : واذا مرحت اني راح اسمع خبر موزين على ناي وبذاك الوكت يمكن اموت اتخيل حالتي واني بعيده عنها وضاله بوحدها شون انام وهيه متعذبه ومحد يعرف علتها خلي اروح واحاول اساعد بلكي الله اكدر اسوي شى لتعرضلي وخليني اتوكل على الله
شرهب : وتالي قبل
خوله : وحتى لو مقابل اني اجي
شرهب :ولا توقعت اشوفج بعد صار شكد مجايه للعراق
خوله : يمكن ٦ سنين ونص هو اخر مره اجيت بنهايه ٢٠٠٩ وانتي احسبي
شرهب : حضنتها المهم شفناج بخير
خوله : اكلج انتي صايره حلوة وكبرانه
شرهب : قابل الواحد يصغر ياعمه فتحت عيونها ناي اثنينا طفرنا
نوايه شوفي منو اجاج
بقت تباوع بعيونها وبجت
ناي : عمه انتي هنا
خوله : يايمه لج عرفتني اي ياروح عمتج يمج اني ومااعوفج حضنتها وابوس بيها روحي فرفحت من شفت حالتها
شونج نايه شتحسين امي
ناي : كلشي يوجعني عمه
خوله : عساهم بحضهم وبختهم كلمن أذاج تكومين تكعدين
ناي : لا
خوله : سويلها اكل خلي اوكلها
ناي : مااريد
شرهب : متقبل البارحه حطينا مغذي الها لان ضلت بليه اكل
ناي : اريد انام
خوله : نامي احبيبة اني يمج
خلي تنام وترتاح واني راح اغسل واريد انام لان راسي راح ينفجر وره مااكعد اتفرغ لسالفه ناي
شرهب : منا الحمام وبهاي الغرفه راح افرشلج اني وياج وسيف انام بيها
خوله : فرشيلي
شرهب : سبحت عمه وماقبلت تاكل وطبت تنام واني وكلت سيف وكاعده يمه دخلت مهدي
مهدي : عمتج وين
شرهب : طبت تنام ابو سيف خلي ناخذ ناي ويانه صرنا هوايه منا عمه ومنا اني وانت مكعد تاخذ راحتك بيتك
مهدي : متطلع ناي منا واذا على راحتي اني راحتي من اشوفها كدام عيني وانتم هذا بيتكم بلعكس اني اشكركم عايفين كلشي وجايين هنا حتى اداروها
شرهب : غير اختنا وبلنسبه لعمه تعتبرها بتها
مهدي : اريد شى منج
شرهب : شنو
مهدي : عمتج لتنزل على امي ولتسوي مشاكل اني البيه كافيني حيلي رايح على ناي ومامستعد افض مشاكل احد
شرهب : تره عمه محروك گلبها على بت اخوها والحجي الكالته مال ماما ذكرى كلنا نعرفه حتى اني حجتلي بيبي يجوز انت متصدك لان امك بس هذا واقع واذا طلعت امك وره وكعت ناي وانت تقبلت الوضع طبيعي ومهتميت اعذرني اكلك انت متستاهلها ولا تستاهل ناي تباوع بوجهك
مهدي : وتكوليها بوجهي
شرهب : هاي اني مااعرف الون الكلام الي بگلبي على لساني امك على عيني وراسي بس هاي مرتك ام ابنك ومن حقها تعيش بمكان تحس بأمان بيه عيشتيش واحد يخلصها خايف لا يأذوه وانت كعدت قبل كم سنه وكلت كدامنا كل وحده بمكان وبأن ناي مراح تتأذه بعد من امك وين وعدك الها
مهدي : منو يكول امي انتي وعمتج شاكين بشى مصاير
شرهب : مال تقنعني انت مصدك امك فقيره ومتسوي سالفه تأذي بيها اختي معناها تجذب على نفسك لو تجذب علينا تعرف كلش زين امك اليوم قبل باجر تتمنى تعوف ناي وتزوجك وتدفع عمرها كله في سبيل تخلص منها اكثر شخص اتكره امك هيه اختي
بعد لتفر بسالفه وتضيع وكتك وكتنا مااكول الك روح تعارك وياها واطردها لان هذا الشى مراح يصير بس على الاقل كون حيادي وشوف حال المسكينه الجوه شنو ذنبها توصل لهذا الحال وهو كل ذنبها رجعت الك ولبيتها اني من اجت عمه ارتاحيت وكلت اختي طابت
مهدي : شمعنه ليش
شرهب : لان عمه من احنا وصغار من تنسد بوجهنا شغله هي تحلها النا وجودها يحسسنا بالامان لتتعارك وياها وتذكر عبرت القارات حتى تجي وترجع ناي الك والنا على الاقل تقبل منا الحجي وشتريد تسوي عوفها اكثر شخص بلدنيا يحبها ويريد مصلحتها بعدنا هي عمه
مهدي : تعرفين اني وياها منتفق
شرهب : بس هلمره لمصلحة ناي اعصر على نفسك ليمونه وتحمل
مهدي : الله كريم اني راح ادخل يمها اشوفها وراها اطلع اي شى تحتاجي خابري واذا احتاجيتي فلوس حاط بلمجر شكد متردين اخذي ودزي
شرهب : مشكور متقصر بس راح اكتبلك ورقه صغيره كم حاجه نقص بلبيت جيبهم
مهدي : اكتبي التردي
شرهب : انظف بلبيت واكمل الاكل واكعد ادير بالي على سيف حرك ويراد واحد ميغفل عنه وهذا امانه اختي مابيه حيل يصير بيه شى واضل اعظ بأصبعي
جاب مهدي الغراض وطلع ولليل اجوي مرتضى ويونس
مرتضى : شنو الاخبار
شرهب : على حطتها
يونس : عمه وين
شرهب : نايمه خلي ترتاح مبين تعبانه حيل
مرتضى : اريد اسلم عليها
شرهب : تعالو باجر خليها تنام
مرتضى : من شوكت نايمه
شرهب : من الظهر
مرتضى : خلي تكعد كافي صار هواي نايمه
شرهب : اكعد راحه لتعلي صوتك وتكعدها
يونس : اريد ادخل اشوف ناي
شرهب : طب قبل شويه شربتها سوب والحمدلله شوي شربت وعفتها ترتاح
يونس : طبيت عليها جنت كل ماادخل واشوف حالتها گلبي يتكطع اريد اخذها بحضني واضمها من الدنيا كلها هذا حال بت امي وابويه هذا حال صديقتي وامي اكعد يم راسها حاير شسوي شون اطيبها لو ابيع روحي مستعد بس كون تكوم وترجع تضحك وتسولف واطيب لخاطرها رجعت احجي ويه مهدي حتى بس اكدر ادخل بيتها واشوفها
ناي : يونس
يونس : ياعيون يونس هااا يلحنينه
ناي : مخنوكه وتعبانه
يونس : بيه ولا بيج كلشي تحملت بس مااتحمل اشوف هيج حالج كعد تهدين حيلي كومي لخاطر اخوج الدنيا وكفت بعيني يوم ماوكعتي هاي الوكعه وضال مجتف ومابيدي شى اسوي قوي لروحج لخاطري ولخاطر ابنج وولخاطرنا كلنا
خوله : هاا اجيت
يونس : كعدتي عمه مسحت عيوني الجانت ادمع قهر عليها
خوله : ماطول اجيت اريد باجر تروح ادورلي على واحد لو تعرف تگلب بغداد كلها لحد متلكاه اني اعرف عنوان بيتهم القديم بلكي الله موجود بعده واذا ماكو ادك باب باب لحد وتسأل لحد متلكاه
يونس : منو هذا
خوله : السيد احمد متأمله يكون عايش ويكدر يساعد ناي
يونس : السيد احمد منو
خوله : هذا ابن السيد الي تزوجته قبل متنولد انت وهو الي صحاني وكدرت بفضل الله وبفضله اعيش لهذا اليوم
يونس : تتوقعي عايش
خوله : هو مو جبير لو بعمري لو اكبر مني سنه سنتين كتلك مااعرف بس متأمله خير اخاف اوديها لاي احد ويطلع دجال ويدور فلوس ويأذوها ومنعرف احد بهاي السوالف غيره بلكي موجود او احد من اهله
يونس : انطيني ونشوف ولو اني مأيس مال تلكي عايش
خوله : لتظلمها بوجهي واذا ما لكيناه انروح لكربلا نخلي بدعه تفتر على جيرانهم لازم اكو سيد يفهم بهاي الشغلات كل متتأخر سالفه ناي اكثر تنتهي اسرع وتشوف حالها وضعها
يونس : اكتبي العنوان وباجر الصبح اطلع افتر واخذ مرتضى ويايه حتى كل واحد يدور بجهه ونسأل
شرهب : فرشنا بلكاع بلغرفه يمها وكعدنا ناكل حتى تحس بوجودنا وحاولنا نوكلها بس مااكلت تباوع وتبتسم والعيون كوه تفتحها وضعها خله الضحكه تهجرنا والكل داخل انذار بسبب صحتها حتى الاكل مابيه طعم من وراها
ناي : جنت اشوفهم داير مدايري بس مابيه حيل احجي اريد اكلهم فرحانه لان انتم يمي بس متطلع مني جيت عمه خوله خلت گلبي يرتاح رغم كل الاحسه بس جيتها خلت السكون والهدوء تدخل روحي يمكن بلحظتها اذا اموت عادي لان كلهم داير مدايري
محاسه بروحي الدنيا فراغ كلشي هدوء حتى الهوا من يلامسني مااحسه مثل الواحد بلفضاء طاير وميعرف شون يرجع لمكانه
جنت احس بمهدي شون يحضني ويبجي افرح بداخلي رغم تعبي هذا ابو خشم اليابس يبجي عليه ويتوسل ارجعله مجنت اجاوبه بس احس بمشاعره وحبه وهذا الشى جان هواي مهون عليه بلبدايه من وكعت ويغسلي استحي كلش وابجي قهر على نفسي لوين وصلت بس هو جان يسويها شغله عاديه ويضحك بوجهي ويبوس بيه لان من تعابير وجهي ودمعات عيوني مبين الخجل شكد مايكول الواحد اني احب فلان وروحه بيه هذا كله يترجم وكت مايتمرض الشخص بلشده والمرض يبين الواحد اذا يحب صدك لو مخلصها كلام بلاش ومهدي ثبت اليه حبة من خلال مداراته اليه جنت خايفه لايدير وجهه ويروح ويتعب مني ويمل لو امه تزوجه وتستغل فرصه مرضي وخاصه سامعه هواي رياجيل اذا مرته توكع اول واحد هو يدير وجهه وميعتني بيها هاي اذا ماشمرها على اهلها وهو عايش حياته ونكر كل تعبها وحبها
والحمدلله مهدي مطلع هيج ثبتلي بلدليل مو معناها جامد وميتغزل طول الوكت احبج واموت عليج معناها ميحب ثبتلي حبه بالافعال وبشدتي ومرضي وجان خير زوج اليه
شرهب : كاعدين على نار ننتظر يونس ومرتضى يسألون على السيد عمه تروح وتجي حتى كعده متكعد من القلق طلعو من الصبح وصارت صلاة العصر ولهسه مااجوي
خوله : لو اعرف وين راحو هلمره ادك ومحد يجاوب بيهم
شرهب : غير اگلتي گلبهم تلكين سوو اجهزتهم صامت حتى يخلصون من النك مالتج
خوله : اني انك ولج
شرهب : لا يابوي بس ١٠ مرات خابرتيهم لو منهم اسويلج بلوك
خوله : تسكتين لااطلع حرگتي بيج
شرهب : لك سيف اكعد راحه الله يساعدها شكد يتحرك ويبحوش ولا يكعد
خوله : صوت سياره
شرهب : اخاف مهدي
خوله : فتحي الباب خلي نشوف منو
شرهب : نزلت فتحت الباب همزين يمعودين وين صرتو عمه صايره نار
مرتضى : انشك حلكنا يله لكينا العنوان عمتج دازتنا ندور على ابره بكومت تبن
دخلنا للبيت وعمه استلمتهم
مرتضى : جيبيلي مي كتلني العطش
شرهب : مجان اشتريت بطل من الشارع شنو انعديت من ابوك وكمت متصرف جاي تلهث من العطش
مرتضى : سخيفه جيبي مي غير ٥ بطاله مشتري وشارب وهم اعطش اذا عمتج ودتنا للمهمه المستحيله
خوله : فضوني لكيتو الرجال
يونس : عايش بس شايل من المنطقه ومن بغداد كلها وكل شويه واحد يدزنه على واحد ويكول هو يعرف عنوانه رجلينا سافت من الفر لحد مالكيت بيت خالتهم بنفس المنطقه القديمه بس بنهايتها وانطوني العنوان السيد احمد عايش بلكوفه
خوله : امشونا نروح
مرتضى : لو يحضر فرج من كبره مااروح
خوله : انت ضل هنا يله يونس امشي
يونس : عمه منلحك صارت عصريه واذا نوصل لليل وين ننطي وجهنا وعيب الناس نروح الهم بليل باجر من الصبح نطلع بوجهنا للكوفه هلكنا واحنا نفتر
خوله : ارتاح وباجر من الصبح نطلع
يونس : جوعان حيل اكو اكل لو اروح اكل بره
شرهب : اي مسويه راح اصب الك ولمرتضى
يونس :فد شويه اطلع اتسوك للبيت
شرهب : كلشي عدنا
يونس : ممجبور الرجال يصرف على عمتي وعليج ومرات اكل هنا مااحب يحس نستغل مرض ناي وكاعدين ماكلين شاربين بيته
شرهب : هو انت شوكت اكلت هاي ثاني مره تاكل من ٣ اشهر
يونس : ميخالف مااحب احس اهلي ثقل وحمل عليه اني حتى بقائكم هنا على اعصابي وجم مره حجيت وياه وهو قافل
خوله : اتسوك حبيبي واني انطيك
يونس : عندي عمه خير من الله
شرهب : اكوم احمي الاكل واصب حتى تاكلون
وره المغرب يونس ترس البيت مسواك ولحم ومهدي من شاف العلاليك تخبل وضل يحجي
مهدي : شنو يدفع اخوج حك لكمتج ولكمة عمتج مو عيب هاي السوالف صغار كدامه
شرهب : ماكو فرق انت تتسوك او هو
مهدي : لا اكو فرق اني ابو البيت وانتم خطاري مااعرف اوجب خطاري واخوج احسن مني
خوله : ماله داعي هاي الاعصاب انت ابو البيت صحيح بس انت ممجبور تتحمل واجبنا والشغله مو يوم ويومين حتى نكول حقك الشغله مطوله وياريت تفكر تقبل ناخذ ناي لبيت يونس افضل الك والنا حتى نتجنب كلنا هاي الاحراجات
مهدي : متطلع منا والي يريد يجي يمها هذا بيتها وتبقى بيه
خوله : تخاف ناخذها منك ومنرجعها
مهدي : محد يكدر يسوي هيج بيه هاي مرتي وماله حق احد ياخذها وميرجعها
خوله : خلي تطلع امك وره هاي السالفه وانت متسويلها حل وشوف منو يبقيها يمك اله اخليك تحلم تسمع صوتها مو عاد تشوفها
شرهب : عمه تعاي عندي سالفه ويااج امشي فدوة راح يتعاركون جنهم ديوجه هراتيه واحد واكف بوجهه الثاني
مهدي : مااردج بس حطي بالج لا انتي ولا عشره مثلج يكدر يمنعني منها وسالفه امي اني احلها هاي اذا طلعت هيه رغم لهسه مااعرف شتردين تسوين وشون راح تعالجين ناي
خوله : يجيك الصافي انت مو ركضت بيها للاطباء ومالكو حل لوضعها خليني اتبع طريق الجهله على كولتك ونشوف شيصير
مهدي : متاخذيها لهاي السوالف
خوله : اخذها واريد اشوف منو يمنعني
باجر رايحه لسيد بلكوفه خلي الكاه واخذ الموافقه بعلاجها منه غصب عن اكبر واحد اخذها واروح
مهدي : تردين تخبليها انتي جايه تقضين عليها هاي السوالف سامع اشكال منها دجل وشعوذه وضرب مامجبور اخلي مرتي بيد رجال غريب متطلع والله احرك البيت ومتطلع وياج
شرهب : علكت عياط بينهم واندكت الباب ماادري ابقى واكفه بنصهم لو اركض افتح الباب تالي كلت بلكت واحد من الولد ويفض هاي العركه ركضت فتحت الباب صار بوجهي عبدالرحمن انصدم وضل يباوع يمنه يسره
عبدالرحمن: اخاف غلطان بلعنوان انتي هنا ممصدك شكد مشتاقلج
شرهب : مو وكت صفناتك واشواقك تعال فك ويايه الهوسه الفوك علكت راح تصير من الروس
عبدالرحمن: شكوو
شرهب : اسمع العياط عمه خوله ومهدي بسرعه طب ركضنا اثنينا ليفوك وبعدهم واحد يعيط بوجه الثاني ومهدي ضرب الطبله الكدامه برجله وهي جام تكسرت وعمتي تخبلت
خوله : انت واحد متستحي تعلي صوتك على الاكبر منك مع الاسف توقعتك مثل ابوك
مهدي : يعني اودي مرتي للدجله ويحيرون شيلعبون بيها حتى اريح حظرت جنابج واصير مثل ابويه
عبدالرحمن: لك مهدي شجاك كافي عيب
مهدي : متشوف لسانها واكفه وتهدد وتريد بكيفها اطلع مرتي ومدري وين تاخذها حتى يخبلوها ويسكطوها بلزايد دروب السحارات هاي متمشي عندي
خوله : ادخل شوف حالها شباقي بيها وانت تعاند ولو منو امك اكيد تطلع عليها هاي اذا مو مكيف بمرضها حتى تخلص منها
عبدالرحمن: خاله رحمه لاهلج كافي انتي وين تردين تاخذيها
خوله : لسيد رجال خير ويخاف الله ويداويها بلقران هذا لهسه عباله سالفه ناي طبيب مو وديتها لجم طبيب شحصلت
مهدي : واخذها بعد وبعد حتى لو اسفرها ولا اعوفها بيدج تلعبين بحالها
عبدالرحمن: اثنينكم تخافون عليها انت مهدي حرت لجم طبيب اخذتها وماكو نتيجه انطي مجال لعمتها يجوز كلامها صحيح والرجال زين مو دجال وسحار وانت اذا معاجبك ومامقتنع وتخاف عليها روح وياهم بيدك اخذها وشوف بعينك اذا معجبك الوضع ومرتاحيت اخذها واطلع وبذاك الوكت محد يكدر يفتح حلكه وياك والعليك سويته مشيت وياهم للاخير مراح يضرك شى اذا جربت يجوز الشفاء بيد الله والسيد سبب بعلاجها متريدها توكف على رجلها وترجع مثل قبل لازم تحاول بكل الطرق حتى لو بطرق انت نفسك مامقتنع بيها
شرهب : يمه فدوة لهذا الحجي المعدل اباوع عليه فاكه حلكي جان تندار عمه خوله عليه وتقربت مني
خوله : هذا منو
شرهب : عبودي عبدالرحمن
خوله : المطيرجي ولا عرفته متغير
شرهب : يخبل مو
خوله : انجبي
عبدالرحمن: هاا شگلت فضها يمعود ام سيف تعبانه اني لو يمك ومرتي اسم الله عليها تعبانه ومريضه لو يكلولي وديها بنص عبدت البقر واطيب هم اوديها
شرهب : وشسوي مرتك يم عبدت البقر تسوي كيمر لو تمشط للبقره كذلتها
عبدالرحمن: كلت لوو قابل اني متزوج غير اكو ناس بلا ذمه وضمير ميرضون اتزوج
شرهب : درت وجهي ولا جن الحجي ويايه
مهدي : امشي نطلع
عبدالرحمن: وسالفه السيد
مهدي : امشي عبد
طلع مهدي اعصاب ومكال اي شى وراه عبد جان يكول لعمتي
عبدالرحمن: عمه ولا يهمج اخذي ام سيف والهوا بظهرج وشحده يحجي
خوله : واني ماانتظر موافقته وكول اله ماخذتها لو تطلع نخله براسي
عبدالرحمن: والله محد طلع نخله براسه بكدي
شرهب : غزرته بعيني يعني اسكت ابتسم وطلع جان عمه تجرني من شعري
ااااخ اني شعليه تتعاركين ويه مهدي تذبين حركتج بيه
خوله : اياج تجذبين عليه عندج شى ويه هذا عبد عيونه تتلامز عليج يريد ياكلج
شرهب : مو تدرين بكلشي ياعمه شنو زهايمر نسيتي
خوله : اخاف سويتي علاقه وياه
شرهب : هذا شگل وحده عدها علاقه هذا شگل وحده مضروبه بوري خاينيها ذابحين رجلها عزه ركضت على المرايه يمه هاي شنو
خوله : شبيج
شرهب : ياعمه ماشفتي شگلي بربج اغمزي اكفخي كولي ادخلي جوه هذا شگل وحده تشوف واحد وره اشهر اذا جان رايدني بشوفته اليه هسه راح يبوس ايده وجهه وكفه لان متزوجني يمه الكفشه واصله لباب الشرجي والدشداشه مال نبوخذنصر اثريه باع الوجهه ياربي طاوه محروكه وفاركيها بلسيم نص طلع ونص تليص صخام وين ادفن نفسي مو جان ابو لهب يدفنا المن خليتو يغير رأيه
خوله :اذا اجه وطلعتي اكسر عظامج
شرهب : بعد وكت مو طلعت وانصدم يجوز من شافني حتى الخلفه كطعها ياعيني عليك جان خوش شاب
خوله : فهميني انتي عينج عليه
شرهب : لا يابوي خشمي عليه والله انت قديمه ياعمه واطلعين تراب
خوله : احجي عدل لا افرك حلكج
شرهب : لا عيني ولا خشمي ارتاحي هيج مجرد كريزما وشگل عاجبني اني من هوات الحلوين ياسبحان الله يجذبون عيوني مو بيدي وهذا لان اتزوجت قبل زينه الشباب تعرفين عدي جان يخبل ويهبل وياهو الي تشوفه تخرب وتوكع من طولها فصارت طبيعه بيه
خوله : اريد حجايه عدله منج ماحصلت
شرهب : خصم الموضوع ماكو شى بينا لتخافين وحيري بناي اني بلسليم بعدني صامده رغم الجفاف وقلة المأونه
خوله : الله يستر منج
شرهب : عوفيني بهمي وشكلي الي يخرع وشافه العينتين ياعمه حتى ابو لهب دفن هسه مايرضه يدفني على هذا حالي
خوله : شيلي المسواك واني رايحه اشوف ناي
شرهب : يااا نسيت هيه العركه على المسواك يله نسه مهدي وحار بسالفه السيد خلي اشيل جام الطلبه الي تكسر ليجي سيف ويلعب بيه ويسوينا قدر
كمت لميت الكزاز وحطيت المسواك بلثلاجه ورتبت كلشي وسويت عشا الولد مااجوي خابرو وكالو منجي ويونس يجي من الصبح باجر على عمه ياخذها ومهدي اجه تالي الليل طب للغرفه يم ناي وسد الباب استحيت بعد ادخل واشوفها
نمت بصف عمه وبصفي الجهه الثانيه سيف
فزيت على حركة باوعت الساعه بلسبعه الصبح شفت عمه بدلت واخذت جنطتها مبين راح تروح
يونس : اجيت الصبح واخذت عمه بتكسي وطلعنا للكوفه جان الطريق تعب وصلنه وره ٣ ساعات بسبب السيطرات نسأل عن المنطقه لحد ماوصلنا ودلونه على بيت السيد دكينا الباب طلعت مره بكد عمه
تفضلو عيني
خوله : السلام عليكم السيد احمد موجود
منو انتي
خوله : اني وحده معرفه قديمه واجيته من بغداد متعنيه اليه ياريت اذا موجود اشوفه
هله بيج بس هو مريض
خوله : ما أخره سالفه صغيره
طبت المره شويه واجه شاب اصغر من يونس دخلنا جان البيت بسيط ومرتب كعدنا ننتظر انفتح الباب وطب السيد احمد كبران والشعر ابيض وبيده عوجيه يتكز عليها كعد گبالنا
هله بيكم وبأهل بغداد زارتنا البركه
يونس : هله بيك سيد
خوله : شونك سيد
السيد احمد : لا صغراً بيج بس مااعرف انتي منو
خوله : اني خوله بت عمشه اذا تتذكرني جنت مرت ابوك من ٢٩ سنه اذا تتذكرني ومانسيت
السيد احمد : خوله شون انساج اني تيهتج حكم العمر يغير بس مال نسيت اكيد ماانسى
اخر مره عاشت ويه ابويه ومات وهو يمها اذا مو على ايدها
خوله : كتلك بيوم ماطلعت من بيتكم اني مالي ذنب هو مات موت الله
السيد احمد : الله يرحمه عوفج من هذا الموضوع شذكرج بينا وشون حالج وضعج وين بالدنيا وشون جانت وياج
خوله : لعبت بحالي الْحٍمَدٍ للـّہ على كل حال اني جايتك اليوم واكعه دخيل جدك ودخيل بختك ماعندي غير الله وانت
خليت ابن اخويه يدور عليك دواره وتعب يله لكاك
السيد احمد : خيرج
خوله : سولفت اله وضع ناي
السيد احمد :لو اكدر اساعدج ما اتأخر بس كدامج الحال اني بطلت سالفه القرايه وفك هاي الامور العمر اخذ مني صحتي وكدامج مابيه صحه تكدر تعزم وتقرا وهيج امور يراد الها حيل واني كل حيل مابيه والحمدلله
خوله : عفيه سيد شتأمر اني حاظره
السيد احمد: تعرفين بيه اخذ هو اني بوكت الخير وبعز شبابي ومامديت ايدي واخذت اجي هسه واني رجلي والموت على ساعه اقابل وجهه الكريم اخذ
خوله : العفو سيد بس اني جايتك غركانه وماأمن بغيرك لان اعرفك من اهل الله وجدك رسول الله وسيد تعمل بأحكام القران مو دجال وسوالف فلوس اعرفك عندك ذمه وضمير وهاي يتيمه ومالها احد تكسب بيها اجر وروح ابويه اجيت من السويد لهنا حتى بس اجيبها الك ابوس ايدك عالجها هاي بمثابه بتي واذا صار عليها شى اموت اني من اشوفها اشوف روحي گبل لوما انت عالجتني جان هسه لو ميته لو متخبله
السيد احمد : معالجتج للاخير
خوله : صحيتني وعيت ورجعت للدنيا وبقيت لهذا اليوم امشي على وصاياك لتحرم بنيه يتيمه من ان تعيش طبيعيه وترجع لابنها ورجلها احلفك بجدك رسول الله تقبل
السيد : عليه وعلى اهل بيته الصلاة والسلام
جيبيها واشوف حالتها واذا اكدر مااقصر لخاطر جيتج
خوله : رحمه الله والديك سيد العلويه امك عايشه
السيد احمد : توفت الله يرحمها
خوله : الف رحمه على روحها اجيب ناي باجر
السيد : جيبيها ومن الله الصحه والتساهيل
يله تفضلو وكت صلاة وراها الغدا يكون جاهز
خوله : ابد والله ورانه طريق
يونس : غير مره سيد نجي وناكل هلمره مستعجلين
السيد : مايطب احد بيت السيد احمد ويطلع بليه مياخذ واجبه تفضلو روحي خوله يم المره زوجتي وبناتي واني اخذ اسمك الكريم
يونس : اسمي يونس
السيد : اخذ ابني يونس للصلاه
يونس : بقينا لان مقبل نطلع صلينا الظهر وتغدينا وطلعنا جان صاحب كرم واخلاق عجيبه
رجعنا للبيت وصلت عمه ورحت للمحل شفت شنو النقص واذا مرتضى ومصطفى محتاجين شى ورجعت گبل للبيت نمت من التعب لان ورانه باجر هم روحه وطريق
شرهب : حضرنا ناي ثاني يوم توسلت بعمه اروح وياهم مقبلت
خوله : هو انتي شاخطه من كاعج هلمره اخذج ويايه اخاف يصير بيج مس او شى موزين حتى تكمل
شرهب : قابل شكوو غير اروح اساعدج
خوله : اكعدي هنا يم سيف وعينج عليه اني ويونس ومهدي وياها
شرهب : كتلت روحي ومفاد محد قبل اروح بقيت وحدي بلبيت انتظر شراح يصير
ناي تمشي بس ماتسيطر على مشيتها تترنح مثل الدايخه وصلنا للسيد بعد وقت طويل
وبهاي اللحظه كاعد يباوع عليها
مهدي : شراح تسويلها راح تضربها وهاي سوالف السحارين الي سامعين عليها
خوله : مهدي رجاءاً عوف السيد يشوف شغله
ابتسم السيد وكاال
انت جاي مجبور ومامقتنع
مهدي : الصراحه ما أمن بهاي الامور كلها احسها للناس الجهله والقليله ايمان فئه عدها عقول ذكيه تقشمر على الناس الفقره ومحدوده الذكاء حتى تاخذ فلوس منهم بحجه السحر وهاي الاعمال وعود تيسر امورهم وهي كلها خزعبلات ودجل
السيد احمد: من ناحيه اكو ناس تستغل ناس فقره هذا صحيح كلامك وبكثره بس اوكف وياك بنقطه مهمه سالفه ماكو سحر كلشي مذكور بلقران لايقبل الجدال ولا التحاور لان القران لغه الفصل بالامور وليس الجدال فيها
واكيد حضرتك قارئ قران
مهدي : الْحٍمَدٍ للـّہ وخاتمه اكثر من مره
السيد : وايات هوايه ذاكره السحر
مهدي : وَمَا هُمْ بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ
السيد احمد: اقرا الايه من بدايتها
وَاتَّبَعُوا مَا تَتْلُو الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَكِنَّ الشَّيَاطِينَ كَفَرُوا يُعَلِّمُونَ النَّاسَ السِّحْرَ وَمَا أُنْزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولَا إِنَّمَا نَحْنُ فِتْنَةٌ فَلَا تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُمْ بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ وَيَتَعَلَّمُونَ مَا يَضُرُّهُمْ وَلَا يَنْفَعُهُمْ وَلَقَدْ عَلِمُوا لَمَنِ اشْتَرَاهُ مَا لَهُ فِي الْآخِرَةِ مِنْ خَلَاقٍ وَلَبِئْسَ مَا شَرَوْا بِهِ أَنْفُسَهُمْ لَوْ كَانُوا يَعْلَمُونَ
نزل السحر بلاء من الله إلى الناس ليمتحنهم بتعليمه فمن تعلمه كفر ومن تركه فهو مؤمن «فلا تكفر» يعني لتكفر وتتعلم السحر وتعمل فيه لان طريق الشيطان يتعلمون السحر ويضرهم وماينفعهم كل سحر يعمل بيه هو مضره مو منفعه معناه دلاله على وجوده
مهدي : وبأيه ثانيه قَالَ مُوسَى أَتَقُولُونَ لِلْحَقِّ لَمَّا جَاءَكُمْ أَسِحْرٌ هَذَا وَلَا يُفْلِحُ السَّاحِرُونَ ﴾
لا يفلح الساحرون يعني اي سحر مايفلح شون بعد الشخص ينسحر ويتأذه
السيد : وبنفس السوره الي هيه سوره يونس
فَلَمَّا أَلْقَوْا قَالَ مُوسَى مَا جِئْتُمْ بِهِ السِّحْرُ إِنَّ اللَّهَ سَيُبْطِلُهُ إِنَّ اللَّهَ لَا يُصْلِحُ عَمَلَ الْمُفْسِدِينَ * وَيُحِقُّ اللَّهُ الْحَقَّ بِكَلِمَاتِهِ وَلَوْ كَرِهَ الْمُجْرِمُونَ ﴾
ماجأتم به السحر يعني عملو بيه وعلموه للناس وانوجد لكن الله سيبطله وطريقة الابطال سهله وهي القران كلام الله يبطل اي عمل مهما كان قوي
مثل ماانوجد السحر انوجد معاه العلاج وهو القران مامطلوب من اي شخص غير الالتزام بلصلاة وعدم هجر القران اكثر الناس الي تتأذه من السحر واعماله هو هجر كلام الله ومن ينصاب الشخص يكول مو اني اصلي يابه الصلاة واجبه لكن قرائه القران طب وعلاج روحاني لاي عله مو بس السحر الهم التعب القهر ضيق الحال قله الرزق كل شى ابتلى الله بيه الانسان علاجه موجود في كتابه الكريم لهذا ياابني نزلت
سوره الفلق ولو كان السحر ماموجود مكان الله سبحانه وتعالى امرنا بلعياذ منه
وَمِنْ شَرِّ النَّفَّاثَاتِ فِي الْعُقَدِ } أي: ومن شر الساحرات الي ينفخن من ريقهن بعقد الخيط من يسحرنَ والعياذ بالله منهن
اني مااريد اقنعك لكن الافضل من تقرا القران افهم معنى كل ايه حتى تعرف قيمتها
الدجالين هوايه الميخافون من الله يامكثرهم السحره والمشعوذين بكل صوب لكن بلمقابل اكو ناس مؤمنه وبعدها تحب الخير لغيرها حتى وان كانو قله لتخاف من شخص يعالج بلقران لان هذا يمشي بلطريق الي رب العالمين كتبه لعلاج اي بلاء يوكع بيه
الحمد لله الذي عافاني مما ابتلاه به غيرنا وفضلني على كثير ممن خلق تفضيلا
حتى منضيع الوقت خلي نشوف مرتك شبيهه
خوله : ناي بنتي واعيه
السيد احمد : عوفيها براحتها
خوله : بدا يقرا عليها اني اختنكت وتعبت اشرلي اطلع بره طلعت يمكن حدود ال٤٠ دقيقه يقرا ايات بس البجي مال ناي اسمعه جانت تبجي وهو يقرا لحد مكمل وصاحني
هااا سيد بشر
السيد : البيها شى قديم مو جديد مرشوش بعتبتها واكو نفس قويه اذت صحتها
خوله : نفس شون يعني
السيد : حسد
خوله : والحسد هيج يسوي
السيد : وَمِن شَرِّ حَاسِدٍ إِذَا حَسَدَ متعرفون مضار الحسد شكد عظيم يهلك الانسان ويدمره وهيه منفوسه وكاتلها الحسد ناي شغلتها سهله بأذن الله بس يراد الها علاج مستمر والرش مجان النيه بيه أذيت صحتها جان النيه دمار بيتها تفريق شتات ضياع وكع بصحتها
خوله : منو مسوي الها
السيد : الله اعلم الي عليه اعالجها واهم شى من تبدي تصحى انطيها ايات معينه بلقران تقراها يومياً وتلتزم بلصلاه الاكل من ينطبخ ينقري عليه ايه الكرسي والمعوذات المي من ينشرب كذلك ينقري عليه الفاتحه مره والمعوذات كل سوره مره الفلق والناس وايه الكرسي مره مع الصلاه على النبي ٣ مرات يله ينشرب وهذا الشى يستمر لمده اربعين يوم
يومياً تنفتح سوره البقره بعد صلاه العصر واذا بيها حيل الافضل هيه تقراها شفاء عظيم بيها وتردد من ايه ١ الى ٤ من سوره البقره يومياً صبح وليل تحفظ هاي الاربع ايات وترددها صبح وليل مهمه جداً
راح انطيها شغلات تسبحيها بيها فراشها كله يتغير ينحط جديد وملابسها تنغسل ويتسمى عليها ونفس السور الي ذكرتها من تشرب المي نفسهن من تغسلون ملابسها بالايد مو بلغساله كل شى اطلبه تسوه بدون اي خلل او تأخير والصدقه داو مرضاكم بلصدقه يومياً اطلعون صدقه حتى لو شى بسيط ميفوت اليوم اذا متنطون صدقه بنية شفاءها والله يشافيها ويعافيها
خوله : رحمه الله والديك سيد مااعرف شون اشكرك
السيد : الدعاء فقط لاغير جيبوها اليه بعد شهر حتى اشوف وين وصلنا للعلاج واكتبي رقمي شيصير وياها تخابروني حتى لو الفجر لتتصرفون من كيفكم علاجها يطول بس بأذن الله تتشافى
خوله : طول هذا الوكت ومهدي ساكت بس عيونه تتحرك اخذنا ناي ورجعنا وهو مافتح حلكه الكل ساكت تحس حتى التعب بينه مو طبيعي
رجعنا للبيت
شرهب : جنت انتظرهم وكاتلني القهر الساعات كوه تمشي طلعو من الصبح ولليل يله رجعو جان الكل تعبان لفو راسهم ونامو اما ناي ساكته وتعبانه بعدها
بديت اسوي كلشي علمته اليه عمه خوله وهيه ويايه
صار ١٠ ايام على هذا الحال نحاول نلتزم بكلشي لحد هاي اللحظه ماكو تحسن بحالتها بس شغله وحده بطلت تبجي هوايه لان جانت حتى وهي نايمه دموعها تنزل
حاطه ايدي على گلبي اخاف من مهدي وعمه لايتعاركون همزين لحد هاي اللحظه هدوء الامن مستتب
شرهب : شراح تسوين بوداد
خوله : ماكدرت اثبت عليها السالفه السيد ماقبل يكولي منو مسوي السحر ولا حتى ينطيني مواصفات شكلها اي لمحه منها كال الساتره رب العالمين ماافضحه اني توسلت ردت مقبل كال عليه علاجها وتحصينها يمشي ويكولي عوفيها لله هو عقابه شديد كتله مو نسوان اخوتي كدامك صار ٢٩ سنه من سون السحر ولهذا اليوم كلشي مابيهن عايشات خوش عيشه ومناقصهن شى اني الي اكلتها لا زواج ولا طفل انحرمت من ابسط حق اصير زوجه وام وبسببهن وكل شويه يرجع يكرر الهن يوم ربج بلمرصاد
شرهب : هو هم صحيح كلامه كولي احنا شيصبرنا تدرين مهدي صاير ميروح يم امه قليل يمكن صدك هي سبب الاذيه ذاك اليوم جنت اشر البطانيه اسمعها تحجي يمكن بلتلفون مدري ويه منو تكول الها راح يضيع ابني مني بوجهي ميباوع صار ايام يصعد لبيته ومينزل عليه حتى المسواك يذبه بلباب ويروح
خوله : اذا يحب ناي لازم يكرص امه ويتوبها حتى متعيدها اني اعرف الواحد من يكبر يعمل لاخرته يصلي يصوم يزكي يحج بيت الله مو يخرف ويدخل بهذا الدرب عينها ونفسها كلها على ابنها شصار يعني اكو امهات يستاهلن الحرك شنو هاي الانانيه عوفي خلي يعيش حياته خرب غيرتهن
اني طالعه اشتري جم حاجه من السوك لان لهسه مارحت لامي ولبدعه ويوميه يخابرون تعالي
شرهب : همه ليش ميجون
خوله : امي تعبانه وهاي بان عدها دوام ويستحون يجون لهنا خلي اروح الهم يومين وارجع وانتي عينج على اختج
شرهب : شوكت ترحين
خوله : يجوز باجر اذا اشتريت كلشي اليوم
شرهب : تتأخرين
خوله : لا ما اتأخر تعاي قفلي الباب ورايه
شرهب : طلعت عمه واني كملت شغلي اباوع مبقى شى على امتحاناتي ولهسه مقاريه ولا فاتحه كتاب شون الحك ياربي هاي السنه هم تروح مني يمكن اخلي يونس يجيب الملازم والكتب مالتي وكت ماناي نايمه واني ماعندي شغل اكعد اقرا
ثاني يوم عمه راحت لكربلا بقيت وحدي عيني على ناي وابد مااعوفها ومهدي ويايه ميقبل اسبحها اله هو وحتى مرات يمشط شعرها حنين وياها حيل رغم الي يشوفه يكول ولا اكو ذره محنه بگلبه
وره يوم كاعده اباوع تلفزيون وسيف نايم يمي على القنفه اتغدينا اني وياه دك تلفوني باوعت عمه
هااا عمتوو
بان : هااا شرهب عفيه خابري على يونس ومرتضى خلي يجون
شرهب : شكوو شصار
بان : هذا عمو جوحي اجه للبيت شبعها كتل لعمه خوله
شرهب : من عزه العزاه شون يسوي هيج
بان : خابرت على الولد مشغول
شرهب : عمه وين هسه
بان : اخذتها امي للمستشفى
شرهب : كمت اعيط شنو مستشفى شسوالها هذا الحقير
بان : طبت عمه مصدكنا من اجت بيبي صحت من شافتها وحتى امي حسيت ردت الروح بيها بعد مجان اثنينهن مثل الميتات
الها ساعه على جيتها
عمشه : يايمه ردت رويحتي بدخلتج عليه چا انه گلت اموتن ومااشوفن جهرتج عبن رحتي ومارديتي
خوله : اجيت علمود ناي
عمشه : من دهر صابهن مجلوبات نعلعلا ابو الرباهن يامحروك لشتها عملت بلبت هيج
خوله : السيد مكال بس متأكده امه وداد
عمشه : من خفت لشعفتها الحمره من شفناها ماشفنا الخير طاحت البت عكب ماردت لولدها چا انه لون بعافيتي وحك الحسين انبش اهلها واحد واحد
خوله : خلي تكوم البنيه على حيلها ويصير خير
بديعه : گلبي نار عليها ونستحي نروح لو بيت يونس جان من باجر اخذ عمتي ونروح الها وصيت شرهب شوكت ميرحون ليم يونس تخابرنا حتى نزورها حظها للمسكينه شويه تنفست وارتاحت وكعت هاي الوكعه
خوله : ان شاء الله اطيب شونج انتي بدعه
بديعه : عايشه
خوله : يمه رحمه لابويه شبيهم ولدج واحدهم مجلوب على النسوان ترديلج واحد منهم خير ويحب مرته وفي الها ماكو وين ذابه صرتهم بحمام نسوان
عمشه : چاانه لون عندي بخت بأخوتج مجان هذا حالي كثره بليه فايده واحدهم ياسكن الكبور ياحاير برويحته والنسوان الزلم كلها تمركض وراهن مامش زلمه تمله عينه مره وحيده ذاك من ذاك عشيرة ابيج گلها تتزوج اثنين
خوله : ماشاء الله خوش وراثه الناس تورث عمارات واخوتي ورثو الزواج وياريت بيهم حظ يعوفون نسوانهم الزينه ويرحون على شكو وحده زايعتها الكاع عندج سوايت صمد من عاف بت الاصل ذكرى وراح ركض على بت ام السمج جليله وختمها الله يرحمه فلاح بمديحه وهذا عود السكوتي والفقير والله ماكو فقير بهاي الدنيا كل الزلم خونه
بديعه : اي والله وميستاهل الواحد يتعب علمودهم
عمشه : تهدن تراجفن على الزلم چا موش تگتل ارواحجن عليهم ومايضل نذر ماتنذرن والما تعرس بيجن تلزم سبوته بلكاظم الحين الزلم مو خوش
خوله : صايره محامي عموشه
عمشه : ماتحجن ضميرجن
خوله : يعني لو ابويه اتزوج عليج ترضين
عمشه : موش كل مره يعرس عليها زلمته الحوك والكويه تعرف شون تكضه وماتخلي يتنفس وعينه تحيص هنا وهنا انعل شيب اهله وادور دواره اخافن يلعب بذيله اكصه گبل مايهزه هاي جدامج مابيها خير ضاله فاجه حلگها ومكابلتني چا زلمه معرس من ٨ سنين وماتحس بيه شنهي صايره دايره
بديعه : مو ثوله ياعمه هو هذا الطيب مايعيش
عمشه : هاي موش طيبه هاي خوثه يلخوثه يلمدهربه ماحسيتي ماگلبج تراجف ماشميتي بيه ريحه مره اضلن وره زلمتي لمن مااكضه واطلعن حليب امه من خشمه
خوله : حرامات حليبج بيهم ولو احبه الفلاح الله يرحمه بس سوايته تقهر
بقينا اليوم كله نسولف ولو عمه بأستمرار ويانه وتعرف كل صغيره وجبيره علينا
ثاني يوم اسوي غدا ماداومت علمودها لان باجر تروح وخفت مااشوفها زين اندكت الباب طلعت فتحه جان اشوف عمو جوحي دفعني ويعيط وينها
بان : منو هيه وطب ركض واني وراه جانت عمه هستوها كاعده من النوم مباشره استلمها دك ضرب وسحل انريد انلزمه ماكو عياطنا سمع المنطقه كلها امي نزلت تركض وبيبي تتوسل وهو ثور وهاج
جوحي : اني تاخذين فلوسي وتذليني اني تلعبين عليه كتلج بس تجين اكتلج خلاص
خوله : عوفني ياعار تمد ايدك عليه وصاير رجال براسي كله علمود فلوسك تفوو عليك وعليهن تموت وعينك على الزباله
جوحي : واموتج گبل مااموت
عمشه : عيف اخيتك راح تموت بيدك
عوينت ابو الجابك عيفها
بديعه : حرام عليك جاي مناك لهنا حتى تضربها مو رجعت فلوسك وصار سنين الله اكبر عليك مسامحت
جوحي : ذلتني وخلتني مثل الجاهل اتوسل بيها وطلكت مرتي من وراها اني تلعبين هيج بيه
خوله : يطبك طوب انت ومرتك وتستاهل وامداني لان رجعت فلوسك لو عايفتك هيج تبوس رجلي وماارجعهن
بان : ضربته حييل عمه ودفعته شال المزهريه الكزاز المحطوطه على البوفيه وكسرها براسها وكام يجري راسها دم ومجاز منها دفرها بلكاع ودك على بطنها حتى امي ضربها واني ادفع بيه وميفيد ركضت على جيرانه رجال جبير وحباب يعرفنا مبين صوتنا خلاه يطلع بلباب شفته ارجف عمه تعال عفيه الحك النا
طب يركض هو ورجال ثاني هم جيرانه لزمو عمو جوحي وهو يفشر خزانه احنا طول هاي السنين صوتنا مطلع والجيران تحترمنا وهذا خلانه بنص هدومنه اخذوه وطلعوه وبعده يتوعد ويحلف يكتلها لعمه
خابرت الولد وبلغت شرهب لان محصلتهم ومو مال اضل اتصل بيهم لان منظر عمه يخوف انترست دم وجهه وملابسها والكاع ركضت اربط الها راسها ميوكف الدم
بديعه : امشي للمستشفى
خوله : امشي وراها اروح للمركز اذا مااخلي يعفن بيه مااتسمى خوله
شرهب : خابرت الولد اني مااكدر اعوف ناي واروح وياهم خطيه انشلع افادهم يارايحين يارادين وهاي كلها فلوس وتعب كلها تنتظر بان تكمل السنه حتى يرجعون لبغداد لان محصلو واسطه حتى يجيبوها وعدوهم على العطله الصيفيه يشوفون الها مكان وينقلوها وهذا سبب بقائهم بكربلا لهذا الوكت
حيل خفت ليصير بيها شى رغم يونس طمني بس مصدكته للمغرب يله حصلت عمه
ماارتاحيت اله من خابرتني فدوة عمه بيج شى
خوله : أذاني بس اني راح اخلي يندم على الساعه المد ايده عليه بيها
شرهب : شمدري بيج جايه وشون عرف انتي بكربلا
خوله : ماادري شون عرف اني بغداد بس هو مخابر امي بحجه يسلم عليها عود حنين وسائل عليه وكايلتله يومين تجي تزورنا ومبين متعب نفسه ومراقب كله في سبيل يضربني شايفتلج هيج واحد فاشل
شرهب : أذاج عمه
خوله : كلش أذاني راسي منتهي وجسمي ملخه من الضرب واني قدمت دعوه بيه مثل الچلب راح يتوسل خلي يلزموه حتى يعرف اني مو خوله القديمه الي انكتل واسكت
شرهب : انلزم جوحي وانحبس ومرتضى ساكت بس يباوع اعرف بحيرته منا ابوه ومنا عمته
عمه من تجي ماادري تشتم المصايب جيتها وتجي تركض عليها لو هيه ساس المصايب اصلاً صار ٢٠ يوم من اجت وماكو طلابه مصارت وهي تحرك بدمها حرك كل شويه متهاوشه ويه واحد
كلشي توقعنا واجه على بالنا اله شى واحد جان مستحيل نتوقعه
هروب ساهره واخذها كل فلوس جوحي مستغله فرصه دخوله السجن
شكرا لزيارتكم عالم روايات سكيرهوم
