رواية الابواب الخمس الجزء الثاني الفصل التاسع والثلاثون بقلم ريام الهادي
افرح واماشي الناس حگ دنيتي تريد
بس مايزيح الضيم سبعين الف عيد
كلشي توقعنا واجه على بالنا اله شى واحد جان مستحيل نتوقعه
هروب ساهره واخذها كل فلوس جوحي مستغله فرصه دخوله السجن
قبل ٥ ايام :
كاعده الوب وعقلي وكف من التفكير خايفه لا يأذون عمه خوله وحتى يونس خايفه عليه لا يتصادم ويه عبيد صار يومين من لزمو جوحي وحطوه بلسجن
خابرت عمه فدوة ارجعي لبغداد شبقاج بكربلا
خوله : شون ارجع وبهاي الهوسه تردين ننفضح كدام مهدي وامه خليني هنا بين متفض
شرهب : شيفضها وانتي مشتكيه على جوحي ولزموه اكيد عبيد من يدري مراح يسكت
خوله : وليسكت حتى انومه بصف اخوه
شرهب : بيبي شكالت
خوله : بيبيتج تنوح تعرفين بيها رغم كلشي تحبهم وتريد اتنازل واطلعه واني لو اموت مااطلعه لو شايفه حالي جسمي مزورك راسي مخيط صار يومين على المسكنات عايشه اون من الالم اخذت تقرير من المستشفى لا اخلي يعفن ويگتله الجرب بلسجن هو هذا مكانه
شرهب : ياعمه خايفه حيل عليج
خوله : لتخافين اني اريدج ويه اختج ديري بالج تغلطين شى من علاجها تره يضيع تعبنه كله
شرهب : شون اغلط حتى الحافظته ارجع اقراه اخاف اكو خلل من ناحيه ناي ليضل بالج ماشية حسب كلامج وكلام السيد
خوله : اخاف هذا رجلها يسوي ملعوبه واني ماكو
شرهب : بلعكس مرات يصيحني يأكد عليه سويت كذا شغله بهيج توقيت يمكن راسه مفتر ومصدك بلسيد
خوله : عساه لا صدك اني كل الهامني اختج توعه وتكوم هو اخر همي
شرهب : ان شاء الله خير الولد وين
خوله : مرتضى راح لابوه للمركز ويونس وياه
شرهب : ديري بالج على نفسج وحاولي بس تفض ترجعين لهنا
خوله : وين اولي لعد خلي اخلص واطيح حظ جوحي وارجع
شرهب : سلميلي عليهم الله وياج
سديته وحطيت ايدي على خدي والله گلبي خلص من المشاكل احنا بيا حال وطلعت هاي الشغله صفح النا اووووف كمت اكمل الشغل وبالي وفكري يمهم
بان : راح يبقى عمو مسجون
خوله : اي واله اخلي ينحكم ومااتنازل
بان : بيبي متقبل لا تاكل ولا تشرب وبس تبجي وراها علاج اخاف توكع علينه ومنتلاحك الها من البارحه مماكله
خوله : شوو تعاي خلي اشوف شبيها
دخلنا لغرفه بيبي جانت شاده راسها بلفوطه وتنعي
خوله : هااا مات وتنعين عليه
عمشه : اشتعلت اصفاح اهلج چاهيج يخوله اطيحين بخيج وينام بلحبوس
خوله : واذا بيها اعدام اجيبله على ايدي
عمشه : عدمج العافيه يلعوبه هيج تشلعين افادي
خوله : يوم اسكتي لا اشك هدومي مشفتي شسوه بيه خله دمي بطولي ترضين يضربني ويشهركم بلمنطقه عادي بس اشتكي عليه شلعت افادج
عمشه : يايمه انتم خوان هيج مالج محنه عليهم غلط ومايعيدها
خوله : على اساس المحنه مال ولدج اشيلها بكواني من كثرها لو اموت كدامهم يوزعون جگليت بله متسكتين وليش عيني متاكلين
عمشه : مااحطن الزاد عبن ولدي بلحبوس طلعي يخوله وعملي لاخرتج يايمه وصيري انتي الخوش وانه احاجي مايجيسج
خوله: لا اني مو خوش ادميه ومااطلعه واله اخلي ابنج يصيح التوبه
عمشه : هيج مالي خاطر عندج احلفنج بأبيج
خوله : لا تحلفين بأي احد لو تحطين ايمنات الدنيا كلها عليه مااتنازل سوايته بيه وضربه بحقد وراد يموتني ماافوتها اله وسوالف مالتج مال مااكل ومااشرب بطليها راح يطكج الجوع والعطش ومتحصلين شى مني وتاليها توكعين وخلي بذاك الوكت يفيدج ابنج ابوالكرم الحنين
عمشه : انه لو اعرفن عليش كورج وكور خوانج جبتي العمر تناطحين معاهم
خوله : احبهم مو بيدي وهمه هم يموتون عليه لدرجه ضيعو كلشي حلو بحياتي يمه بطلي ادافعين الهم ريحتهم فاحت وماضل ركعه تركعيها حتى تقنعين نفسج ولدج خيرين تعرفين كلش زين واحدهم ناقص والدونيه تمشي بدمهم لا حنو على اخت ولا على ام كل واحد منهم صاح ياروحي وفوكاها داسو علينه وعلى ولد اخوهم اليتامه انطيني حسنه وحده الهم وهسه اركض للمركز واطلع ابنج ماراضية السلطان جوحي ينام بلحبوس بس ترضين اغرك بدمي واني جايه من سفر وتعبانه وصار سنين مجايه هاي عسل على كلبج مووو
عمشه : عبن تحارشتي بيه وگليتي من الفچ للفچ لون نسيتي يوم ماخذيتي فليساته وتفرفح رويحته عليهن وطلكت مريته ومارضيتي ترديهن
خوله : غلطت عمري رجعتهن لو مسويه مثل قبل من اخذتهن وزعتهن للفقره جان أجر اليه
عمشه : ادورين اجر يلمدهربه بفليسات اخيج
خوله : ماحصلت شى عدل منهم من يوم مافتحت عيني عليهم اقلها احصل هسه يله خلي يصيف بلسجن وخلي تفيده فلوسه
عمشه : يبووو على راسج الگوي
خوله : هذا راسي شوفي شسوه بيه ودنجت وشوفتها الخياط
عمشه : يايمه دهر صابه كون تچسر عظامه
خوله : مو هستوج تعيطين وتردي يطلع والله حيرتيني
عمشه : انه ادعي واغالط عبنه امه لجن التكول امين انعل شيب اهلها
خوله : امين يله انعلي وفضيني وطلعه مااطلعه
عمشه : احتركت طوايفج چا ماترتاحين اله يسكنون وليداتي گلها الكبور يخوله
خوله : هم فلاح مات من ورايه شون طلابه هاي باان صبيلي اكل خلي اتزقنب واروح ورايه شغلات اني اذا ابقى يم امي انجلط وانتي ضلي شون سمج سوت بان شوي وياه بصل وطماطه الي يحبة گلبج وتمن احمر
عمشه : انه جيعانه
خوله : هو احد لازمج انتي تردين تجوعين اذا صبيتي لامي يابان العب بيج طوبه
عمشه : عوينت ابو الجابچ تردين تموتيني من الجوع
بان : طلعنا من الغرفه واني اضحك
خوله : صبيلها خلي تاكل بعد متتحمل ادري بيها
بان : والله ياعمه لساني وكف واني اتوسل بيها تاكل شون خليتيها هي تطلب بنفسها
خوله : امي واعرف دماراتها وعلاجها مو تنسي مااريدها تتخربط
بان : صار
خوله : امج وين
بان : فوك بغرفتها
خوله : هاي الثانيه هم ضغطها يعله كله من وره ابوج بعدها تطحن وتفكر شون اتزوج عليها
بان : حقها مو هينه ياعمه
خوله : هي مو خلصت العده
بان : اي خلصت قبل كم يوم
خوله : خلي تطلع تزور تغير جو لا تتأذه وتنجلط من التفكير وتاليها احطها بصف امي واجدي بيهن بلكاظم
بان : لا اسم الله عليها خلي تخلص شغلتج ونروح كلنا للزياره اكيد انتي هم حابه تزورين
خوله : حييل حابه ازور صار سنين مجايه هنا
صبي خلي اكل واطلع
بان : وين رايحه عمه
خوله : للسوك اصرف ورق احوله عراقي
بان : لو تنتظرين الولد اخاف عليج
خوله : طفله وتخافين يله حبيبتي استعجلي حتى اروح وارجع ما اتأخر
بان : تغديت اني وعمه وصحت امي مقبلت تاكل اما بيبي صبيت الها وحدها بلغرفه لان اذا كعدت ويانه راح تسوي روحها زعلانه ومتاكل
غسلت المواعين وفتحت التلفزيون اتفرج هيج اگلب بدون تعيين دخل مرتضى ويونس
سلموً
مرتضى : عمه وين
بان : طلعت للسوك متتأخر
مرتضى : عمو عبيد جاي ومااريد تتعارك وياه
بان : اهووو شجابه
مرتضى : على سالفه ابويه
يونس : اني تعبان راح ادخل شويه اتمدد بلكي انام
بان : متتغدون
يونس : اكلت بره بس مرتضى مقبل ياكل
بان : راح اصبلك لازم تاكل
مرتضى : مالي خلك للملابس الي لابسها مو عاد للاكل مشكوره مااريد
بان : طب يونس يم بيبي واني حميت الاكل وصبيت وجبت الصينيه حطيتها گباله
مرتضى : مو كتلج مااريد
بان : الله عليك اكل انت طلعت بليه ريوك وصار العصر وانت مماكل
مرتضى : لو عمه ترضى تتنازل ونخلص هاي الدوامه اتعبني
بان : ابوك حيل أذاها
مرتضى : وكعت بينهم ومااعرف شسوي
بان : اكل هسه وربك يحلها يله مرتضى اكل انت تحب هاي الاكله
مرتضى : شمدريج
بان : ارتبكت وكتله نسيت احنا عايشين بيت واحد جنا واعرف الاكل الي تحبه
مرتضى : اي والله كلش احبها تعاي ويايه على الواهس
بان : سبقتك بلعافيه
مرتضى : اكعدي يمي على الاقل احس اكو ونس ويايه
بان : هاي كاعده گبالك اباوع تلفزيون بدا ياكل بشهيه
مرتضى : عاشت ايدج دوم اكلج يخبل نفس اكل عمه بديعه اله شرهب موتتني يوم اكل طيب ويوم ماينبلع ولازم ناكل ونكول يخبل حتى لتعيط وتحرمنا ثاني يوم
بان : موزين تعرف تطبخ
مرتضى : لو ترحمنا ومتطبخ هواي اشرف مسويتنا فار تجارب شكو اكله ممسويتها بحياتها تجربها بينا وياويل الكال مطيبه
بان : ابتسم على سوالفه واباوع على كل تقاسيم وجهه وتعابيره اصعب شى بلحياه من تحب من طرف واحد ومتكدر تحجي ويحكمك الخجل والكرامه والكبرياء وتضل بمعارك يوميه الگلب والعقل اثنينهم ميرحمون بيك عقلي يگلي الى متى تبقين تحبي وهو محاس بيج وانتي اخر شى ممكن يجي على باله وگلبي يكول مستحيل شخص ثاني يسكن بيه غيره تعبوني ومحد منهم يرفع رايه الاستسلام ويخلصني
كمت سويت جاي اله نزلت امي باوعت عليه وجهه انگلب اني بهدوء كمت وصعدت للغرفه هي منا مريضة ومهمومه مااريد ازيد همها
بقيت حدود ساعه كامله وسمعت صوت عمه اجتي ونزلت لكيت الكل كاعد بلهول
خوله : شبيك وجهك مگلوب
مرتضى : لخاطري عمه تنازلي وخلي يروح للبيت
خوله : اسمع لك اني احبك ومعزتك جبيره بگلبي وناسيه انت ابن منوو لتذكرني حتى لا احطك وياهم بنفس الخانه
مرتضى : ويبقى هيج
خوله : ماارتاح اله اجيبله حكم واذا حاول يطلع او ينطي رشاوي اشتكي عليه واستخدم الجنسيه السويديه واخليهم يضموه وره الشمس
بان : ليش اخذتيها عمه
خوله : اي قبل كم شهر ولهسه مااستفاديت منها وجني راح استفاد منها واضيع ابو الجوح
عمشه : انه مره وجعانه وهاي البت شلت گلبي انه گلت ردت وتضل وياي ونس تالي حركت الاخضر واليابس چامتكدرين اله تشعليها وتدفين على نارها
خوله : اذا حجيتي بعد اخلي واروح لبغداد
عمشه : يمااااي يبت بطني اشتعل ابيه الطلعتي عليه ساهره ماتعيفج اطكج بسحر تخليج ماتعرفين ترحين لون تردين
خوله : متسوي شى ريحتها من رجلها جم يوم مو بعيد تجي تشكرني
يونس : الباب تندك يمكن هذا عبيد طلع يونس يفتح الباب
خوله : اجه ابنج الجبير يمه افرحي وطكيها بهلهوله
عبيد : السلام عليكم
عمشه : هله يمه شون كيفك
عبيد : بخير باس راسها وكعد باوع على خوله
خوله : هااا خيرك انت الثاني اجيت تكمل السبحه وادوخني لو تضرب مثل اخوك
عبيد : طلعي خوله وجفي الشر
خوله : لا بالله غير ثقه عندك
عبيد : شتردين ويطلع
خوله : اريد افتح شباج شقتي بلسويد على الهوا العذيبي والاشجار والخضار الي يرد الروح وبيدي كلاص الجاي اسلطن عليه واتذكر جوحي محكوم بلسجن وكاتله الوصخ ياعيني احلى حياة
عبيد : اتنازلي واني اخلي يبوس راسج ويعتذر
خوله : شكراً مااريد
عبيد : انتي من اخر مره اجيتي سويتيلج مشكله شكبرها ورحتي ردتي تأذينا مثل الواحد عنده عداوه وجاي على ثاره وتالي سويتي التردي وطفرتي صار سنين شرجعج
خوله : مجيت عليكم هاي اول حلقه حطها بأذنك والحلقه الثانيه لتسوي روحك فقير ومن اهل الله وبعيطه تبجي انت بلذات جنت مصادق اشواق وردت تتزوج ورحت خطبت الك فوك زينيتي واخوك لعبت وياه شويه ورجعت فلوسه وكلمن راح لحاله مكان مجاي تلومني وتحاسبني روح لاخوك الشفيه الي مستحه وتهجم عليه وأذاني ولوما الجيران جان هسه اني بلنجف لا كل واحد منكم يفتي براسي واذا جاي من بغداد لكربلا حتى اطلع اخوك اكول اله لتعب نفسك مااطلعه وتريد تتعارك حاضره حتى اخليك وياه اقلها واحد يخفف عن الثاني وتگضوها بلسلامه
عبيد : تسمعين بتج
عمشه : سامعه يايمه مايفيد انه جبدي انبط منها وهي تكول حجاره مايهزها الهزيز
عبيد : راح اعوفج جم يوم وراها تتنازلين واله ياخوله تشوفين مني الي تكولين لو ضاله على جوحي اشرفلي
خوله : ذاك الوكت راح ويه الراحو هسه الرجال منكم يطخ ثوبي لو شعره مني اخلي يحلم يطلع يشوف شمس الله استر على نفسك لا تنشمر بصفه
بان : حاولو بكل الطرق يقنعون عمتي ومفاد الكل يحجي مرتضى وعبيد وبيبي بس يردون تغير رأيها وهي ولا يمها ياجبل ميهزج ريح ساعتين وبالاخير جوابها مااتنازل لحد ما مل عبيد وقرر يرجع لبغداد على امل يجي غير يوم ويقنعها مكدر يتعارك وياها توقعت راح يعلكها بس مبين خايف منها لتسوي بيه مثل جوحي
عبيد : اني راجع لبغداد مااكدر ابات يومين واجي صدك مرتضى لازم تجي ويايه
مرتضى : خير
عبيد : امك اندك عليها ماكو من البارحه مختفيه وصالحه راحت الها للبيت كسرت الباب تكسر ومحد طلع اخاف صار عليها شى وكعت او شى لان هيه متختفي هيج خفيه
خوله : كون ميته حتى الفرحه تصير اثنين
عبيد : انتي اسكتي صبرت عليج هواي ودكاتج كثرت ولازم اعصابي لهاي اللحظه لان مااريد مشاكل واريد اطلع جوحي
خلي لسانج بحلكج ولتحجين
خوله : صاير تخوف واني رجلي كامت اطك وحده بلثانيه من الخوف على كيفك ابو مهند ليطك عرك عندك وتسكط
عبيد : شون تخليني اخنكها يله مرتضى امشينا نفهم سالفه امك الطلعت صفح
مرتضى : خابرتو عليها
عبيد : اكله من البارحه التلفون ماوكع من ايد صالحه وهاي خبلتني اختي يااختي امشي كدامي مو عندك مفاتيح البيت افتحه نشوف شكوو خاف صار قدر
مرتضى : يله جااي اجيب غراضي
عمشه : وابيك يمه تعيفه
مرتضى : اروح اشوف امي شصار بيها وارجع بلكت باجر العصر
عمشه : سودة بوجهـي مشلوع افادك يايمه بينهم وماحصلت منهم گلشي حتى علاجك بخلو بيه عليك
خوله : وتلومني ليش اذبه بلسجن
عمشه : بسچ ام سته وستين لسان لا گل چلمه تراددين عليها
يونس : اجي وياك لازم ارجع للمحل وهم اشوف ناي وشرهب صار يومين عايفهم
خوله : دير بالكم من الطريق الي وياكم مايتأمن
يونس : محتاجه شى
خوله : ردتك سالم حبيبي
يونس : مراح اجي ويه مرتضى اكمل شغلي واجي وره يومين واذا صار اي شى خابريني
خوله : متقصر عينك على خواتك
يونس : الله كريم
بان : طلعو الولد وعبيد وياهم وعمتي رغم تبين مابيها شى بس جوحي أذاها حييل الليل كله كوه تنامه من الالم وخاصه راسها
وصلنا بغداد وره ٣ ساعات متنا ازدحام وسيطرات وهويتك وهويتك موتونه مدري شبيهم اليوم طبينا ساعه ١٠ بليل رحت ويه مرتضى لبيتهم عبيد نزل وراح للبيت وعافنه كوه جرعته بلطريق فتحنا الباب وطبينا جان البيت اضائته خفيفه فتحنا الاضويه
مرتضى : صار شكد مجاي هنااا
يونس : خلي نشوف امك وراها عود نسولف
بقينا نفتر بلبيت ومرتضى يدور
مرتضى : وين راحت محد بلبيت
يونس : دورت زين
مرتضى : شبيك يونس قابل البيت الف متر هو صغير حتى للسطح صعدت اخاف واكعه شى كلشي ماكو ومقفل البيبان والوضع على حطته هاي وين راحت
يونس : خابر صالحه بلكت عرفت شى
مرتضى : هااا خاله شونج حصلتي امي لا
صالحه : گلبي نار عليها ساهره متختفي هيج دورت بلبيت زين
مرتضى : نگته نكت ماكو
صالحه : يايمه اخيتي وين راحت اخاف صار عليها شى كله من وره عمتك الكحبه الساقطه حبست جوحي وخلت امك تموت قهر
مرتضى : شوكت اخر مره شفتيها
صالحه :اجتني تتراكض على عبيد مخابرها ابوك وكايل الها ضربت خوله واشتكت عليه واني ذبوني بلتوقيف دزيلي عبيد لان رقمه محافظه واجت ادور على عمك وضلت اليوم كله يمي وتالي كالت رايحه للبيت جلبت بيها تبات يمي ومتبقى وحدها مقبلت ثاني يوم خابرتها الصبح كالت نايمه بعدين نتخابر وللمغرب كلت خلي اخابرها اشوف وينها ادك وماكو اجيت لبيتكم كسرت الباب ومحد صاح منو واعرف ابو مهند بكربلا بلغته ينطيك خبر لان حضرت جنابك مغير رقمك ومنكدر نخابر عليك
مرتضى : ماشي اذا صار شى او خابرتج انطيني علم اني راح اسأل الجيران اخاف عايفه خبر يمهم
صالحه : لتعوفني هيج اذا سمعت اي شى بلغني
يونس : هاااا اكو شى جديد
مرتضى : امي ماكو يونس هاي وين راحت
شرهب : كملت كلشي لناي اباوع هادئه وعيونها تتحرك بنعاس ليش مكعد اطيبين
تمدت يمها والعب بشعرها وصاعده الخنكه بصدري
نايه شدي حيلج عفيه تعبت حييل تعب
كدام الكل اسولف والعب ويه سيف وامشي الامور طبيعيه حتى اقنع روحي انتي مابيج شى تعبت اشوفج نايمه هاي النومه واني امشي على رجلي تعبت ادرس وانتي عايفه مستقبلج وكليتج تعبت افتر بيتج وانوم ابنج وانتي محرومه منه كلشي مر طعمه بحلكي
حتى من انام اكعد ولا عبالك نايمه كثر ماعقلي يشتغل وكاتله القهر على حالتج
نايه انتي مو تحبيني مو تكولين اني بتج واختج وصديقتج كومي ساعديني اني تايهه وحدي كومي ياامي يااحن الدنيا عليه يااغلى من روحي ارجعي رزليني وضحكي على سوالفي وحاسبيني سمعيني صوتج نزلت دمعتي حضنتها وكمت اشهك بصوووت عالي صار مده طويله واني حابسه دموعي بعد مااكدر كومي ابوس ايدج حني عليه اختج منتهيه وماعندي الي اشكيله
بقيت ابجي وراسي على صدرها وايدي بأيدها رفعت راسي لكيت عيونها تصب ادموع مسحتهم وبست راسها راح اطيبين انتي قويه ومؤمنه وراح ننسى هاي الايام وترجعين احسن من قبل اندكت باب الغرفه درت راسي شفته مهدي كمت عدلت كعدتي
مهدي : صحت هوايه بس ماسمعتيني
شرهب : اي مسمعت
مهدي : بيها شى ناي
شرهب : لا جنت اسولف وياها
مهدي : والي يسولف يبجي
شرهب : مسحت عيوني زين وكمت من الفراش تفضل ابو سيف اخذ راحتك
مهدي : حلوة علاقتكم رغم انتم كل وحده من ام
شرهب : غلطان اثنينا نفس الام يجوز جليله متسجله على اسمها بس برابطه الروح اني بت ذكرى وناي ويونس اخوه من امي وابويه
مهدي : ليش ضجتي مو قصدي اضوجج
شرهب : مضجت بس حبيت اوضحلك حتى متغلط مره ثانيه وتكول كله وحده من ام واني بلذات عندي اثنين امهات ذكرى وناي لهذا اني محظوظه ومقتنعه وميهمني رأي اي شخص يشوفني بت جليله الغلط بيه مو بيه
مهدي : ليش حاس وره كلامج شى وقصد ثاني
شرهب : كلشي ماكو اصبلك العشا
مهدي : تعشيت
شرهب : بلعافيه من رخصتك
مهدي : شرهب
شرهب : نعم
مهدي : انتي ليش رفضتي عبد الرحمن
شرهب : لان احب نفسي ومااحب أذيها
مهدي : رغم رافض الموضوع كله بس عبد يحبج
شرهب : والحب مو كافي اكو اعتبارات اهم من الحب اني وياه كل واحد من عدنا بعالم منتراهم ابد والشفته خلاني مامستعده ادخل بحياة كلها تعب ومشاكل اكتشفت محد يستاهل اضيع صحتي علموده
مهدي : وعبد راح يضيع صحتج
شرهب : اي لان راح ادخل بدوامه اني بغنى عنها اهله رافضين وخاصه ابوه وانت تعرف السبب مااتحمل بشر ينضرلي بلعين الصغيره او يعيرني بيوم اذا قبل جنت صغيره ومراهقه وتحملت عدي وحياته الجحيم جنت مجبوره اما بهذا الوكت اني حره الاختيار واذا مااختار صّـْْ(☑)ـْْحّ مااستاهل اعيش مرتاحه
اتجرأ واطلب منك تخلي عبد يشيلني من راسه اني ماافيده ولا هو يفيدني
مهدي : ليش محاولت جزعت منه اني وصلاح ايام وليالي نحجي براسه يكول اي وان شاء الله ويصير خير وثاني يوم نلكاه
شرهب : شبيهه
مهدي : لا هيج ماكو شى
شرهب : غير يكول شبيهه سكت كتله اني العليه بلغته برفضي طلعت من خطيته
اشوف سيف اخاف كعد لان نام من وكت
مهدي : تعبناج ويانه
شرهب : ياريت هاي النومه اليه مو الها انت متعرف ناي شنو بلنسبه اليه وماكو اي تعب هاي روحي وامي وحنان الدنيا بعيني شون مااداريها
من رخصتك
مهدي : اخذي راحتج
شرهب : رجعت للغرفه الخنكه بعدها بيه
حاولت انام وغمضت واني افكر باجر شراح يصير
ثاني يوم الظهر اجه مرتضى ويونس بعيونهم الحيره يدورون على ساهره ماكو
مرتضى : راح اتخبل وين راحت ماضل مكان مادورت بيه حتى للبصره خابرنا جيران بيت بيبي كالو ماشفناها
شرهب : دورت بكنتورها
مرتضى : قابل خاتله بيه شبيج انتي
شرهب : باع هذا افهمني اقصد ملابسها اخاف امك وسكتت
مرتضى : احجي انبلع لسانج
شرهب : انهزمت
مرتضى : وين تنهزم وليش
شرهب : شوف اذا كناتيرها فارغه او على الاقل مأخوذ من ملابسها معناها امك درب الشرده طلع ركض مرتضى ويونس وراه شحجيت فوك ماانبهه هاي وين راحت المكموعه معقوله طفرت
وره ساعه رجع مرتضى يفر براسه ودايخ ماخوذ من ملابسها والمستمسكات ماكو
مرتضى : رايح لكربلا
يونس : شعندك
مرتضى : اروح لابويه افهم منه يجوز يعرف شى
يونس : روح وخابرني لان مااكدر اعوف المحل ورايه طلبيه وتسديد
مرتضى : رايح ونتخابر عود
بان : صار ٥ ايام منعرف ساهره وين بس العرفناه مرتضى جاي ومبلغ ابوه وبنفس اليوم راجع لبغداد شصاير مندري
ساعه ٨ بليل هستوني اگلي وملتهيه واندكت الباب مديت راسي صحت منوو واسمع صوته
مرتضى : اني
بان : ركضت حطيت شال على راسي وطلعت
وجهه مگلوب
شبيك مرتضى
مرتضى : ابويه بلمستشفى انجلط
بان : ياستار تعال طب
مرتضى : صيحيلي عمه بسرعه
بان : اي اي وركضت صحتها وطلعت من غرفه بيبي
خوله: صاير شى
كعد مرتضى وحط ايده على راسه بلحظتها كلت راح يتخربط حاله كلها يخوف معقوله هيج يخاف ويحب ابوه
مرتضى : امي شردت واخذت فلوس ابويه كلها
خوله :لابربك شمدريك
مرتضى : اجيت البارحه لابويه وبلغته امي ماكو اندور عليها مختفيه هو سمع تخبل كام يعيط ويسب وكال ترجع هسه للبيت بوجهك بمخرن مال المطبخ اكو كونيه مال شگر جواها خشبه ترفعها تحرك الكاشيات الي بلكاع فلوسي مدفونه هناك شوفهن
رجعت بتكسي شفت المر لمن وصلت حتى تعبت يابغداد ياكربلا هلكوني ومن وصلت للبيت ركض للمكان الكال عليه لكيت كلشي ماكو ولا فلس
بديعه : اكو واحد يحطهن بهيج مكان
مرتضى : مبين مغير مكانهن اكثر من مره لان دلاني على مكانين جان ضام بيهن وكال اخاف متيهه دور بيهن ودورت وهم ماكو
اجيت اليوم ابلغه متحمل وكااام يعيط ويضرب على راسه تهستر راحت فلوسك يجوحي راحت ال٥٠٠ مليون تعب العمر
بان : لطمت على صدري شكد ٥٠٠ مليون لو اني سمعت غلط
مرتضى : ابويه جان عنده ٥٠٠ مليون ومادفع ٥ ملايين حتى يعالج ايدي ويعيط كلهن ورق اخضر يعني دولار
خوله : حييل يستاهل اخذتهن منه توقعت منها الغدر بس شفتها تأخرت هواي مبين مجانت تندل مكانهم لو ماعدها الفرصه الزينه حتى تاخذهن وتكسر ابوك بيهن
خلي ياكلها
بديعه : منين جابهن تعرفون هذا المبلغ شكبره نص مليار خاف غلطان مرتضى
خوله : وليش غلطان اني يوم مادزلي فلوس جانن ٥ دفاتر وتوقعت عنده اكثر لتنسون هو حوسم هوايه دفاتر حلوة وعلس عبيد بفلوسه وهم اخذهن ومن ٢٠٠٣ لحد هسه يعني ١٣ سنه يشتغل ويطب مشاريع وميصرف الفلس عدا شغل الحرام اشتغل بلفايز ذني كلهن زيدن فلوسه جمعهن حتى تاخذهن سهوره وتفلت بيهن بلعافيه خلي ياكلون النايمين للظهر
مرتضى : اجيت عليج عمه حتى تتنازلين ابويه وضعه موزين وانجلط من سمع الخبر اترجاج طلعي
خوله : راح اطلعه ميحتاج يبقى طلعته بهذا الحال اكبر عقوبه اله
باجر الصبح اروح اتنازل وانت على كيفك راح تموت شوف حالك
مرتضى : ياحال واني انفضحت تالي عمري
بديعه : ليش فضيحه ابني
مرتضى : عبالكم ابويه راح يسكت اذا طلع منها اكيد راح يگلب الدنيا عليها زين الناس والجيران شراح يكولون امشي بلشارع شلون والشباب تكول هذا امه الي باكت ابوه وفلتت
شنو منظري كدامهم
خوله : يجوز ترجع امك لتبقى تفكر وتأذي نفسك ذوله اثنين عاريه ماعليهم شى خاف على نفسك
مرتضى : اروح اله لان عفته بلمستشفى
بان : هو طلع باوعت عمه خوله
خوله : لوما حزانه وفلاح ميت لا اهلهل كل هلهوله اخلي المنطقه كلها تسأل منو عرس
بديعه : ٥٠٠ مليون لهسه اريد اصدك الرقم الي سمعته حتى صارت وشه بأذني
خوله : شعبالج اعرف بيه ميت على فلوسه
بديعه : مرتين اخذتي منه وأذيتي بيهن
خوله : بس ختامها مسك الضربه القاضيه جانت من ساهره
بديعه : كله من وراج
خوله : اي هلمره اعرف من ورايه وبعلو صوتي اكول اي من ورايه اني يوم مااخذت فلوسه قبل ٦ سنوات جنت اريد ساهره تأذي شرطت يطلكها حتى تحقد عليه الي مثل جوحي نقطة ضعفه فلوسه لا ولد ولا مره ولا صحة كلها مو مهمه عنده اهم شى عنده الفلوس لهذا جنت دوم من اريد اغثه او أذي بفلوسه نقطة ضعفه الوحيده ومن رجعها انتظرت سنه بسنتها يجيني تلفون ويكولون ساهره حركت البيت او اخذت فلوسه او خربت عليه شغله مهمه يعني تأذي تالي الحيه انتظرت هاي السنين كلها ومبين التأخير لان متندل لان جوحي ميدل مكان الفلوس لو على كص رگبته واكيد راقبته ولكفت المكان ومن سمعت انسجن ماكو احسن من هذا التوقيت تفلت بروحها وبلفلوس واخذت الجمل بما حمل
هاي الفلوس الي عزها على نفسه وعلى امه وعلى يونس وخلاه العمر كله يگزل ومشيته مو مثل الشباب وشمر بنات اخوه وحتى ماكلف نفسه يأويهن بيته واخرها عزها على ابنه وجان ضاع شبابه لهذا يستاهل هيج وكعه اوووف مي بارد نزل على گلبي حتى الكتله مالته نسيتها
بان : وشراح يصير هسه عمه
خوله : اطلع جوحي وهو يحير بروحه وارجع اكمل علاج ناي
بان : تتوقعي يعوفج
خوله : هههههه خلي يداوي جرح البوري الي اكله هاي اذا ماانجلط واشلل من الصدمه
شرهب : من سمعت المبلغ شهكت وربي يمااي ٥٠٠ مليون وحاطهن بلبيت عادي ويطلع هاي لو اني الزم السلاح واكابلهن واكعد
اني مسطوره واتخيل شكل ال٥٠٠ مليون ويونس كال راح اسبح واطلع قبل ميجي مهدي مابيه اروح للبيت اتأخر كتله ادخل بين مااستوعب الصار دك تلفون نايه باوعت حوراء كل فتره تخابر تسأل عن وضع ناي ومرات سدره وام صلاح ومره دكت ام عبد مجاوبتها
هااا حوري شونج
حوراء : هلة شوشه طمنيني شونها ناي
شرهب : ماكو تغير قوي وننتظر ونشوف ادعيلها عفيه
حوراء : والله اكوم واكعد ادعيلها
شرهب : شونها صحتج والحباله
حوراء : متعبتني مبقى شئ واطب بشهري
شرهب : الله يكومج بلسلامه
حوراء : تسلمين حبيبتي افكر ليل نهار بناي وحالها عفيه نهائياً ماكو تغيير
شرهب : شگلج ياحوري لو تشوفين شگلها تبجين دم على حالها سمعت صوت يونس سديته
يونس : ويامن جنتي تحجين
شرهب : هاااا ويه صديقتي
يونس : ياصديقه وليش هيج مرتبكه
شرهب : بله اني اجيب تهمه لروحي عليمن هي حوراء باوعت عليه وكتله حوراء جان ترجع ادك اشرلي افتح المايك حتى يسمع صوتها لا ماافتحه
يونس : لخاطري ومااحجي حرف
شرهب : جاوبت هاا حوري انكطع شبكه ضعيفه
حوراء : عادي اي شخباركم بعد
شرهب : اباوع على عيونه عساه بحظه وبعافيته الي خلاها بنفسك اخويه من سمع صوتها انشعل نار
ماكو شى يونس كعد يسبح شويه ويطلع
حوراء : ليش هو يمكم
شرهب : اي يمنا شويه ويطلع
حوراء : شلوونه
شرهب : منو
حوراء : يونس شلون وضعه
شرهب : ليش تسألين
حوراء : مجرد سؤال غير ابن عمتي واطمن عليه
شرهب : زين بأحسن حال
حوراء : الله يوفقه يستاهل كل خير انتبهي عليه
شرهب : وانتي
حوراء : شبيهه
شرهب : شلونج
حوراء : سؤال صعب واجابته اصعب اختصرها الج لوحه سوده بدون الوان
شرهب : شغل جكاره وكام يروح ويجي ويسمع صوتها وصوت انفاسها العالية
حوراء : اروح ونتخابر خير وقت
شرهب : الله وياج سديته انت ليش اتعب روحك وتأذيها
يونس : هي روحي متأذيه من كاعها
شرهب : انساها ياعيني وعيش حياتك هي اتزوجت وراح تخلف وعايشه بلخارج ومشت امورها انت لشوكت تبقى هيج
يونس : تدرين هذا صوتها شسوه بيه هسه
ذب ملح على جرحي
شرهب : ليش لعد ماقبلت تسمعه
يونس : عطشان وارتويت بسؤالها
شرهب : المره متزوجه ميصير ياگلبي
يونس : واني مو نبي لو معصوم اني بشر والحلال والحرام من يوصل للگلب مايعترف بيه هاي البنيه معشعشه براسي وتمشي بدمي ومن اسمع اسمها الغلط والصح يختفون من عيوني لتحاسبين الي مثلي شرهب خلي اروح لشغلي
بان : اتنازلت عمه عن الدعوه وحيل فرحانه ومتشمته بجوحي ومرات تنسى نفسه وتمشي وتغني
هااا عمه متبقين بعد
خوله : المن باقيه لازم ارجع لناي جوحي وفضت سالفته
بان : تجين قبل متسافرين
خوله : اجي اكيد ويني وين السفر اذا مااطمن على ناي مااسافر
بان : ان شاء الله تكوم بلسلامه
ودعنا عمه وراحت لبغداد ومنتظره تخلص الايام حتى انقل ونروح كلنا لبغداد بس ياترى وين راح نعيش معقوله نرجع للبيت القديم البيه صالحه
شرهب : خلص الشهر واجت عمه وهلمره مهدي هو بنفسه حظر كلشي واخذ ناي وعمه وراحو للسيد
مبقى شى على الامتحانات واني قرايتي مو قويه مرات افكر أجل السنه ويونس وعمه ميقبلون مينطيني گلبي امتحن وناي راحت سنه دراسيه منها وهي على ابواب تخرج المفروض تلبس روب التخرج ونفرح بيها تالي لبست روب المرض وكسرها تكسر
رجعت ناي وهم قاريها عليها رغم ماشفت تحسن بس هو يكول تحسن قوي وينه شو ساكته ومرات متاكل ونضطر نشكل الها مغذيات والوجهه عوده الجسم هيكل عظمي من قلة الاكل
اني وعمه التزمنا ناي رغم مرات تتعب عمه وتختنك بس تبقى مصرة على العلاج
شغلي بالاقساط استلمته ام حسن لان ماوصلت بعد وهي تشتغل وتبيع وكله بيدها خلف الله عليها وكتلها بقي الفلوس يمج او اشتغلي بيهن والها نسبه
ناي : اوعى داير مدايري بس مااكدر احجي عيوني تتحرك كمت احاول اسوي ايعازات براسي احركهم مرات من يقرون عليه ويشربوني تيزاب جنه يمشي بمعدتي ومااكدر اكلهم كافي ارحموني من اسمع صوت سيف وشرهب اتمنى اكوم واحضنهم وابجي لحد مااتعب من كثر مااشتاقيت لحياتي اما مهدي حضنه اليه تالي الليل وبوساته بمحبه جانت مهونه عليه رغم ماابادله بس احساسي بالامان وياه حيل ساعدني
خوله : شرهب افتحي الباب شوفي منو
شرهب : اي عمه نزلت ولكيته مرتضى هااا يمعود صار اسبوع مختفي
مرتضى : عمه هنا
شرهب : اي تعال خيرك
صعدنا وسلم على عمه
خوله : شبيك
مرتضى : طلعته لابويه وجبته للبيت وطردني
خوله : من صخم الله وجههه هم بيه بله العار مو مجلوط
مرتضى : حلكه شويه معوج وايده ومشيته ثكيله بس من يحجي تفتهمين عليه ويكدر يسحل بروحه يعين نفسه عادي كتله راح ارجع اعيش يمك واداريك عاط ودفعني وكال مااريدك واذا لكيت امك اذبحها
خوله : ماعرفت شى عن ساهره
مرتضى : فص ملح وذابت
شرهب : شراح تسوي
مرتضى : ارجع ليم يونس اني ردت اوكف وياه بمحنته وغلطت الظاهر عنده الفلوس اعز مني
شرهب : بعد وكت هسه يله دريت والله قديم
مو هجيت من بيتكم من وراه
مرتضى : اخاف يوكع يصير عليه شى
خوله : لو اعرف هاي الحنيه عليمن طلعت لا امك حنينه وابوك ينكط بخل حتى شلونج ميكولها عباله بفلوس
لتخاف عليه ابوك بسبع ارواح مايموت حير بمستقبلك وشوفلك شغله ثابته حتى ازوجك
مرتضى : ومنو هاي الترضى بواحد مثلي امه شارده والله اعلم ويه منو
خوله : مفهمت
مرتضى : سما حطتها بالي ودخت ياعمه
خوله : شحطت بت صويلحه
مرتضى : خالتي متخبله من عرفت بأخذ الفلوس ودكت ولطمت مدري على اختها لو على ال٥٠٠ مليون
شرهب : اكيد على ٥٠٠ قابل ميته عليها
مرتضى : رحت الهم لان دزت عليه ولازم اندور على امك وذاك البجي والعياط جان تكول سما
سما : مااتوقع خاله وحدها
صالحه : لعد منو وياها
سما : خاله مو من النوع الي تكدر ادبر امورها وحدها يجوز واحد مصادقها ومقشمر عليها وفلتت وياه
مرتضى : انجبي لا اكوم اطيح حظج شنو هذا الحجي
صالحه : رعنه اكو وحده تحجي هيج على خالتها
سما : شبيكم گبيتو عليه هو اني الاخذت الفلوس وانهزمت وفهموني شغله تفر براسي فر فلوس حصتها من بيت بيبي الي باعته وين راحن انتي جم مره سألتيها تكولج مره قشمروني بمشروع وضاعن ومره انطيت منهن دين وكل يوميه فلم ويوم ما مرتضى تصوب مو اجت تبجي تريد فلوس منج وانتي ماانطيتيها لو عدها مجان تريد تداين منج لعد وين ودت الملايين مال البيت معناها اكو واحد يسحب منها ومقشمرها وتالي عرف بفلوس رجلها قرالها الغزاله وهي مشايفه شى بيه حظ من عمي مخلصها يجمع بفلوسه تختخت وكعت بشباجه
مرتضى : اذا ماسكتيها ازوعها دم
سما : انت ضل عيط وافرد عضلاتك عليه اني شكوو كلت احتمال
وبكل الاحوال مراح تلكوها هيج وحده فكرت الف مره قبل متسويها وحاسبه لكلشي
صالحه : خالتج مره جبيره مو مال هيج سوالف واياج تعيديها افرك حلكج
سما : هي المره من تگبر تسلك طريقين لو تتعبد وتعمل لاخرتها وتعقل لو تنحرف وتراهق ومبين خالتي اختارت الطريق الاسهل
مرتضى : اذا بقيت هنا راح اذبح بنتج بيدي
صالحه : روح ابني واني اطيحلك حظها والسمعته مالك دخل بيه اختي واعرفها هذا مو دربها وترجع هسه تشوف
خوله : امك بيها شكوو شغله موزينه مال تتجرأ تصادق وتفلت شويه بعيده منريد نتهمها لان هاي سالفه عرض مو هينه
مرتضى : لهذا كتلج ياعمه يازواج يامستقبل
خوله : عروستك عندي مالك دخل
مرتضى : بهذا حالي وادور عرس ام مصيرها مجهول واب مجلوط واني متشرد وضايع
خوله : كلشي مابيك شاب مثل الورد انت شوف شغلك وضعه واستقر وازوجك ست العرايس وحده ينحلف براسها وميحتاج تعرف اصلك وفصلك وانت هم تعرفها
مرتضى : منووو
شرهب : ابتسمت وكلت قبل متكول عمه
باااان
بعد ٣ اشهر :
بديعه : هااا عمه ردتيني
عمشه : خلصت بنيتج
بديعه : من الدوام
عمشه : ايي
بديعه : اي مبقى شى وتبدي العطله وتعطل
عمشه : اريدن ارد لبيتي
بديعه : هم نرجع لصالحه وطلايبها خلينا هنا
عمشه : دكي على خوله ويونس اريدن يجون انه عندي شى لازم يعرفونه ضال كاتم سنين على افادي والحين لازم افضها حتى انرد
بديعه : شنو هذا الشى
عمشه : دگي ولا تناهدين اجه وكته ولازم گلمن يكعد بمجانه
شرهب ؛ واكفه اهلس بشعري منتظره النتيجه
وناي تبتسم بهدوء فدوة لضحكتج رغم خوفي شوفتها وهي كاعده بنصنا تخليني حتى مااهتم للنتيجه وينك يايونس بله لو مطلعيها من النت مو احسن من هذا الخوف
خوله : الشبكه ضعيفه مو حاولنا ومطلعت
شرهب : اجه اجه ضموني مااريد اعرف
ناي : على كيفج گلبج راح يوكف
خوله : تعاااي خبله خلي افتح الباب
يونس : وينها ام كفشه
شرهب : شكد احجي نشفت دمي
يونس : ٧٠ مبروك ناجحه حبيبتي
شرهب : عزه بسسس
يونس : كلش زين شتردين
شرهب : سمعتو ٧٠ احرك روحي اطم نفسي
ناي : بلعكس كلش زين متوقعت اصلاً تنجحين
شرهب : اريد اعيد
يونس : ميصير بعد نجحتي
شرهب : هااي ال٧٠ وين اروح بيها ولا كليه ترضه بيه
يونس : ليش ادخلج مثل بان تربيه
شرهب : كله ولا اصير مدرسه تعرف عقدتي منهم
يونس : ادخلج مسائي حتى لو قسط ميخالف لعيونج المهم تفرحين وتاخذين الشهاده والله اني كلش فرحان بنجاحج
شرهب : ياشماتج ياشرهب وفوكاها واكفه بكل حيل واتفاخر غميت گصتي
خوله : هههههه اني اساعد يونس بلقسط واندخلج كليه الي ترديها
شرهب : اني اريد معدل بال ٨٠ حتى لو اروح معهد المهم مااريد هذا المعدل
ناي : من ورايه معدلج طلع قليل
شرهب : على اساس بلياج اطلع طبيبه بله متسكتين
انفتحت الباب وطب مهدي سلم وراد يونس يكوم جان يگله اكعد رجعت للبيت لان اعرف بيك هنا باوع عليه وكاال
مهدي : على الخير نجاحج
شرهب : شمدريك
مهدي : غير انخبصنا من الصبح
ناي : اكو شى
مهدي : يونس اني مردت ادخل بهذا الموضوع بس علاقتي ويه عبد واعتبره اخويه وضلعي جبرني ادخل
يونس : خير
مهدي : عبد اليوم جاييب ناس وكباريه اهله حتى يخطبون شرهب حلف بيوم النتيجه مالتها يخطبها حاولت ادخل امنع هاي السالفه مفاد العصر الناس بيتك
شرهب : فتحت عيني خربت والله
