 |
رواية الابواب الخمس الجزء الثاني الفصل الاربعون بقلم ريام الهادي
يل شابع لعب داعيك شابع ضيم
من لم القواطي وعيشتي الگشره
مو شغلت حسد لا والمشت للشام
بس اتحجي الاخرس عيشت الفقره.
مهدي : يونس اني مردت ادخل بهذا الموضوع بس علاقتي ويه عبد واعتبره اخويه وضلعي جبرني ادخل
يونس : خير
مهدي : عبد اليوم جاييب ناس وكباريه اهله حتى يخطبون شرهب حلف بيوم النتيجه مالتها يخطبها حاولت ادخل امنع هاي السالفه مفاد العصر الناس بيتك
شرهب : فتحت عيني خربت والله
قبل ٣ اشهر :
خوله : كلشي مابيك شاب مثل الورد انت شوف شغلك وضعه واستقر وازوجك ست العرايس وحده ينحلف براسها وميحتاج تعرف اصلك وفصلك وانت هم تعرفها
مرتضى : منووو
شرهب : ابتسمت وكلت قبل متكول عمه
باااان
مرتضى : انت صدك تحجون لو تتشاقون
شرهب : ليش عيني شبيهه بان تخبل واحلى منك
مرتضى : اني حجيت شى وكمزتي اني اقصد بان مثل اختي
شرهب : مو اختك ابوك جوحي وابوها فلاح امك سهوره وامها بديعه شون بعد اخوه بلاسلكي اخوه
خوله : انطينا صبر
شرهب : انطيت تربعت كعدت بلكاع كبالهم
خوله : سالفه مثل اختك عوفها غير شى عندك ملاحظة على بان
مرتضى : عمه البنيه من زينة البنات ادب واخلاق وثكل ومعدله هذا شى منختلف عليه بس اني اشوفها بت عمي ومثل اختي ومايوم تخيلتها مرتي
شرهب : نام وتخيلها هسه قابل صعبه
مرتضى : انتي بلذات اسكتي خلي افهم من عمه شون فكرت بان اليه
خوله : لان تناسبك وراح تريحك وتعيشك احسن عيشه انت بلسانك تكول معدله يعني تنطيها اسمك وبيتك وانت مغمض كافي تعرف كلشي عنك وعايشين سوه ولا تكول الك منو امك وليش هيج ابوك ولا ادور وراك هي كتاب مفتوح كدامك وانت هم بان حرامات تروح لواحد غريب اني مااجبرك مو من حقي هذا زواج بس فگر بيها اذا تريد تأسس حياة مرتاحه ويه وحده طيبه وتشيل همك وتسند ظهرك وتوكف وياك مالك غير بت عمك
مرتضى : ومنو يكول تقبل بيه
شرهب : اي صحيح منو يكول هيه هواي اجوها خطاب احسن منك ويجوز تنخطب
مرتضى : زوجيها بعد وخلي عدها جهال شنو السالفه
شرهب : شوف هيه البنيه بالها مو يمك ومثل ماانت تكول مثل اختي يجوز هيه هم تكول مثل اخويه وترفضك
مرتضى : بعد عليمن هاي المحاظره اذا بان نفسها تشوفني اخوها
شرهب : مو احنا نحطها بالك ونلزمها ونحطك بالها بلكي تنسون سالفه الاخوه بالاسلام
مرتضى : وانتي وعمه تزوجونا
شرهب : مو احنا نريد نكسب اجر بيكم ونلزك راسين بلحلال
خوله : هااا مرتضى شكلت يمه
مرتضى : شكوو عمه حسيت محظره بان وره الباب بدله العرس وتردين اروح اخذها
خوله : شوف بليه شلاع الگلب والجر والعر فكر بت عمك وحاول تتقرب منها شوفها بغير نظرة الاخوه وهاي الكلاوات وحاول تحسسها بأهتمامك واحسبها من كل اتجاه تبقى هي انسب وحده الك وانيالك اذا اخذت هيج جماره ادب واخلاق وشهاده وام بيت اذا الك نفس بيها وشفت الوضع يناسبك لتفوت الفرصه وخليها تفكر بيك وتميل الك اذا شفت الشغله تناسبك مو تقرب البنيه وهناك تفلت
شرهب : وداعتج عمتوو بس التراب والحصو وراه
مرتضى : انتن والله فايخات اني حاير بأبويه الي على ساعه يوكع ويموت وبأمي الماادري بيها وين وتردني افكر بان خلي احل هاي العويصه والفضيحه الوكعت بيها وبعدين اتصخم وافكر بلزواج
شرهب : اني ماافكر غير بشى واحد
مرتضى : شنو عبقرينو زمانج
شرهب : بال ٥٠٠ مليووون لك كل مااتذكر يصير عندي خفقان واطرافي تثلج بله لو بايكه ابوك اني وياك مو اشرفنا من هاي العيشه الكشره مكابلتك وكاعده واحدنا كوه ال٥ الالاف بجيبه وتالي سهوره تطفر بيهن جان هسه طكيتلي سياره عاليه واسافر ماابقي دوله مااروح الها واحير شنو اشتري واذا بقى فلوس عود اشتري بيت
مرتضى : هاي صخنت وكامت تهذري اكوم اروح اشوف شنو ورايه اجيت افرغ همي يمجن طلعت بهم جديد
شرهب : لك تعاال وين رايح
مرتضى : اروح ليونس اكو جماعه جايين رايدين كهربائي تأسيس بيت وهو مرشحني الهم كرابتهم قبل مده سويت بيتهم وحبو شغلي
شرهب : موو تنتل وتموت وراك زواج
مرتضى : ورايه صخام بوجهج ام الكمل شوو وخري
شرهب : دفرني برجله وطلع شفتي عمه مو صوجه صوجي اني الصايرتله ام ستوري الخطابه واريد المه واسوي آدمي
خوله : هو انتي انطيتينا مجال نحجي
شرهب : ميحتاج تحجين خشت بان براسه برجلها اليمنى وكالت ياالله وراح يفكر بيها مرتضى واعرفه اخذيها مني جم شهر وهو يجي بنفسه ويكول الج زوجيني بان راح اموت
خوله : وانتي
شرهب : شبيهه
خوله : شوفي حالج
شرهب : اخبل جني قنفذ يفتر بين اغصان الورد ياهو اليشوفه يفلت منه يخاف ينجك اكو احلى من الكل تحسبلي حساب وتخاف من لساني
خوله : اذا عندج هذا اللسان لطلعي عليه وتفرين الموضوع
شرهب : ياموضوع عمه
خوله : دراستج ليش مكعد تقرين
شرهب : كارهه الدنيا وكلشي طافي بعيني ناي مريضة بس اني مريضة اكثر منها اني داخلي يعالج وينفض انفاسه الاخيره ناي اذا مكعدت وصارت زينه حتى المستقبل مااريده شسوي بشهاده مااشوف فرحه اختي بيها واول الناس تبوسني وتباركلي من اتذكر راحت سنه منها وجان المفروض تجهز لحفله التخرج مالتها اموت قهر
خوله : واذا صارت زينه وشافتج عايفه دراستج راح تتأذه اكثر راح تنقهر لان سنه راحت منها بس راح تموت من القهر من تشوفج عفتي الامتحانات خلي أذاها من طرف واحد لا طرفين وشنو ذنب يونس يحسبلج ساعه ساعه تخلصين وتنجحين ليش هو مو غالي عليج مثل ناي
شرهب : وداعتج ياعمه واحد البطين الايمن من الگلب والثاني البطين الايسر همه اهلي وفرحتي وراحتي وسندي شعندي غيرهم
جان تكفخني على راسي
خوله : واني ولج
شرهب : انتي الاضلاع الي تحمي هذا الگلب من اي ضربه بلياج هذا الگلب يتأذه
خوله : دلاله ماينكدرلج
شرهب : تربيتج خوخه اني راح اكوم اشوف ناي بلكي كعدت حتى اغسل الها وابدي اقرالها القران
خوله : شرهب كملي البيدج وراها تكعدين تقرين اذا بقيتي بهذا الوضع راح اخلي يونس ياخذج للبيت واني هنا يم ناي
شرهب : لا عفيه شون اعوفها
خوله : اختج اكثر الوكت نايمه واني يمها ليش تخليني احطج بعقلي وادزلج ومتشوفيها اله وره الامتحانات
شرهب : هذا هو راح اكعد اقرا
خوله : مو هيج مال قشامر دراسه مال سادس مال وحده تريد معدل الطلاب هيج وكت تذبح روحها حتى تنجح واطلع معدل لتضيعين تعبج وتعب يونس
شرهب : هذا هو راح اقرا واشد حيلي لحد مينكطع
طبيت لناي لكيتها كاعده شربتها سوب دجاج شويه وراها عصير طبيعي الْحٍمَدٍ للـّہ تشرب بس قليل اهون من قبل
وتهز براسها من واحد يحجي وياها
نوايه اسبحج
هزت راسها اي
يله راح اجلفج جلفه اطلع وصخ العمر كله منج تكول سبحت العيد
ناي : ابتسمت على كلامها
شرهب : يله يحلوة ساعديني شوو تعالي كومتها على كيفي تترنح بلمشي اليوم اخلي مهدي يكمز لان ميقبل اسبحج اله هو خلي اسبقه جنت محظره كرسي بلحمام حطيته جوه الدوش كعدتها وبدلت الها اباوع على جسمها غاديه عظام سوده عليه اشاقيها حتى متضوج سبحتها كلش زين ولبستها واخذتها عمه مني دخلتها للغرفه واني تنكعت ودخلت سبحت طبيت عليها مشطت شعري واباوع عمه تضفر شعرها حتى ليبقى مفتوح ويضوجها شويه عمه من رخصتج
خوله : هااا ولج
شرهب : راح احضن اختي وانام واخلي مهدي ينام بره
خوله : عيب ولج الرجال يريد ينام يم مرته
شرهب : واني انام يم اختي هيه اختي گبل لتصير مرته اني اولى بيها
خوله : شرهب بطلي هااي السوالف وكومي
ناي : اشرت بيدي عوفيها
خوله : وين الله ويجي مهدي يطلعج بدفرات
شرهب : رجال وخلي يسويها انزل اشبع كتل امه وانومها بالانعاش لان مااكدر اضربه اذب حرگتي بدوده وداد
حضنت ناي وغمضت عيوني
ناي : رفعت ايدي وبادلتها الحضن وغمضت وياها ردت احس بالامان مثل ماهي تريد اعرف بشرهب تعبانه حيل ومتحجي الي بداخلها وتحاول دون تحسس الكل وضعه زين وكلشي مابيها بينما هي مدمره
خوله : عفتهن وطلعت وحده حاضنه الثانيه مثل الجهال ونايمات اخذت سيف ونومته لان بس اعوفه يكمز ويحط ايده بلكهرباء شلع گلبي يله نام ولا بيه حيل وطاقه للجهال
طلعت وكعدت بلهول لازمه السبحه صليت وكملت وكعدت افكر بحال كل واحد بيهم وشون تالي حياتهم
عدا المغرب والعشا وذني بعدهن نايمات
لحد مااجه مهدي
مهدي : السلام عليكم
خوله : وعليكم السلام شرهب نايمه يم اختها اذا تريد اني اسويلك عشا
مهدي : لا مشكوره تعشيت بره محتاجين شى اجيبه من بره
خوله : سلامتك تريد افرشلك تنام هنا
مهدي : ميحتاج انام على القنفه
خوله : دخل سبح وبدل وكعد كبال التلفزيون اني وياه بمكان واحد فوك الساعه ونص واحدنا ميحجي ويه الثاني لحد ما هو كال
مهدي : اني اعرف بيج مطيقيني ويجوز تشوفيني مو كفو لناي
خوله : ليش تحجي هيج
مهدي : من عيونج ونبرة كلامج انتي فاهمتني غلط
خوله : مااريد شى غير ناي تصير زينه وترتاح بحياتها لا عبالك اني اكرهك او شايله بگلبي عليك كل مابلموضوع اي واحد يأذي ناي او يونس او شرهب اتخبل منه وامك تضوج من ناي وتريد اليوم قبل باجر تأذيها شوف مهدي اني من كلام بت اخويه عليك عرفت بيك كرجال ويعتمد عليك قبل سنين جانت ذكرى الله يرحمها تمدح بأبوك وحنيته وطيبته وشفت ضحه بروحه علمود اخته هلكد ميحبها واعرفك مثله صحيح وداد امك ولازم تباريها وتخاف الله بيها بس ناي هم مرتك تعرف بأذيه امك وسكتت وهذا القهرني منك
مهدي : حلفت الف يمين مو هيه انتي كوني بمكاني حتى لو جانت هيه اني وين اوديها اذبها بلشارع منو الها حتى حرام عليه امي ماقصرت ويانه وربتنا وتعبت علينا ورفضت حتى تتزوج وره ابويه حتى لا تجيب رجال يتحكم بينه واني السوته واكف بعيني مااكدر اصير عاق تالي عمري الها واشمرها بلشارع لو اتجاوز عليها كل الي سويته ابتعدت عنها وادي واجبتها ومااقصر وياها وبنفس الوقت احسسها بغلطها هاي اذا جانت هيه
اني واكع بنارين مرتي الاحبها ام ابني ومنا امي اكثر من هيج مابيدي شى
خوله : بيدك تهدد امك وتكول الها اذا صار شى على ناي اخذها واروح بعيد عنج وبعد مالج ابن
مهدي : ليش تتوقعين ماكلت هيج مو كلشي ينحجي اني اريده منج شغله امي عوفيها
خوله : ليش اني جايه صوبها
مهدي : سمعتج سابقتج متعوفين ثارج
خوله : هو اني اخذت المضبوط من السيد وطلعت امك واعوفها اااخ ماقبل يكول
مهدي : كل الي يهمني ناي تكوم بلسلامه
خوله : وتحافظ عليها الي سوه مره يسوي مرتين وتلاثه لتأمن واكرص امك كرصه زينه حتى متعيدها
مهدي : متعيدها يمي عوفي الشغله
خوله : اكوم انام
مهدي : عندي شغله ثانيه
خوله : شنو
مهدي : عبدالرحمن ابن خالي
خوله : المطيرچي شبيهه
مهدي : ركضنا تركض راسه يابس ومعاند لو شرهب لو ميتزوج
خوله : ويونس وشرهب رافضين وخاصه خالك ميقبل بشوشه
مهدي : لحد البارحه ثالث عركه ويه ابوه كل كم شهر يفتح الموضوع وتعلك واني احاول اهدي الوضع
خوله : خلي ابن خالك يشوفله غير مره على مرام ابوه
مهدي : الحجي بيني وبينج هو ناوي يخطبها ويجيب كباريه اهله عمام ابوه وخوالهم بس ماحدد شوكت
خوله : شجاه قابل ماكو نسوان بس شرهب
مهدي : دوخني جنت بالاول اكول اعناد بأبوه لان ميريدها وهو معروف عنه شكوو شغله يكرها خالي يتقصد يسويها عبد من احنا وجهال تكول عبالك مو ابوه رويسيه همه مايكعدون بمكان وانفتح نقاش اله متگب عركه بالاخير بس بمرور الايام اكتشفت يحبها ويريدها وخالي من عرف بيه رايح لعمامه وطالب منهم يخطبوله متخبل شون يجتازني ويكسر كلامي ويخطبها البارحه هوسه شكبرها بلبيت فضيتها بمعجزه
خوله : والمطلوب مني
مهدي : تخلين يونس يرفض اذا قبل وزوجه شرهب راح تگبر حيل بين عبد وابوه ويجوز توصل للقطيعه للموت واني مااريد تالي عمر خالي يتبرا من ابنه الجبير مو بعيد حتى يفصله من العشيره خالي ويسويها
خوله : خالك حيل مكبرها ومنطي الشغله اكبر من حجمها ومتعب نفسه وابنه عمران انسان خلوق ورجال صاحب شهامه بس عنده طلعات متتسولف هو المفروض يگسب ابنه ويقبل خالك يدور مظاهر والي يدور هيج امور يتعب وبكل الاحوال مااعتقد يونس يقبل شرطه بالاول والاخير عمران يتواجد وهاي القسمه من اولها عوجه ومشاكل تاليها شنو اني مراح افتح الموضوع ويه شرهب لان على ابواب امتحانات واحاول احجي ويه يونس واشوف شيكول واذا يونس قبل ينطي شرهب اعذرنا خالك اخر همنا بالاول والاخير سعادة شرهب وحياتها اهم من الكل مانضل كل العمر نضحي لخاطر هذا يرضى وذاك ينام مرتاح
مهدي : توقعت تساعديني
خوله : مااساعدك على احساب مصلحه بت اخويه اذا قبل اخوها وهي قبلت حضر نفسك وراك عرس وكول لخالك سوي شئ لاخرتك ولا تحرك گلب ابنك من رخصتك اروح انام نعست
شرهب : كعدت الصبح على ايد ناي الله شون نومه تلكين رجلج يسب بيه ويرجع ليوره
ناي : فتحت حلكي ونطقت اسمها بس بصعوبه شرهب
شرهب : كمزت من مكاني ممصدكه شنوو عيدي والقران سمعت اسمي
ناي : بلعت ريك ورجعت گلت شرهب وابتسمت
شرهب : لج عمممممه اكعدي وركضت عليها
فتحت الباب وجيتت
اكعدي
خوله : شكوو شكوو
شرهب : ناي صاحت اسمي
خوله : صخونه الصخنتج يلرعنه عبالي صار شى
شرهب : اكلها ناي صاحت بأسمي
خوله : اختج واعيه وتفهمنا واكيد راح تبدي تحجي السيد كال بمرور الايام ترجع تحجي وتسولف بس مترجع مثل الاول اله بمرور الايام وتاخذ وقت
شرهب : يعني هسه افرح لو الطم لو شنوو
خوله : ههههه افرحي ومره ثانيه لتعيطين هيج مال وحده احتركت خرعتيني والولد هم فز عباله خالته تخبلت من خفت هلكفشه ولي سوينا ريوك متعشيت البارحه من وراج عفتيني ونمتي جوعانه
شرهب : واحلى ريوك اسوي لعمتي خوله يااا ناي نسيتها وركضت عليها
جنت فرحانه بشكل لان نطقت اسمي اي شى من ناي يخليني افكر بدت اطيب يريحني
اياام صعبه دا اعيشها مريت بهواي تجارب مثل هاي التجربه جذب
احساس فضيع من تكدر تشوف وتسمع كلشي ومتكدر تحجي وجسمك كل قطعه بيك يوجعك كل عظمه مكسوره ومشموره بجسمك حتى دموعك من تنزل على الخد تجوي الكوابيس اختفت بعد مابدو يقرون القران يمكن هذا اول شى ارتاحيت بيه كدرت انام صحيح مرات اتأذه من يقرون ايات معينه ويشربوني مي مقري عليه بس بعد الالم والعذاب اشعر براحه واغفى
جنت اصرخ ومحد يسمعني واكول ربي هونها عليه تعبت كلش مرات ادعي اموت ولا هذا العذاب وارجع اشوف ابني يكمز يم راسي وشرهب وعمتي ويونس ومهدي اتراجع واكول طيبني لخاطرهم تعبو حيل ويايه مااريدهم يملوني
من الشغلات الكسرت خاطري هاي السنه الدراسية ضاعت مني جنت اتمنى انجح وافرح بشهادتي الضليت ايام وليالي احلم بيها
اصعب شى من كمت اجبر نفسي على الاكل والحركه مثل الطفل اول ميتعلم المشي والاكل يخربط ويوكع هذا حالي وحجابه اجر بيها واضوج وحتى ابجي لحد متطلع وشوي شوي لساني بده يفك واكدر احجي بس مو بطلاقه جان المهون عليه ضحك شرهب الي مابطل عبارة عن طاقه ايجابيه بهاي الفتره كمت اردد بداخلي واحمدالله واشكره عندي اخت مثلها يمكن الشى الوحيد السواه ابويه زين بحياته هو خلف اليه هاي الاخت وحتى امي من اخذتها حتى توكف ويايه بهاي حياتي وتصير دواي واحد اسباب شفائي مجانت تبجي اله قليل ودوم تضحك كدامي وتهون عليه تحسسني بيه افلاونزا مو واصله للموت صدك نصف المرض الحاله النفسيه وشرهب وفرت اليه الطاقه الايجابيه
كل واحد بيهم اله دور عمتي الاجت من اخر الدنيا حتى توديني لهذا السيد الخير ومهدي حنانه ودموعه ومداراته وتقديره لوضعي وتمسكه وحبه اليه ويونس وكلماته الترن بأذني كمت اصدك اني امه مو بس اخته
وشوشه كل واحد بيهم اله دور من جانب معين وهذا الشى بفضل الله قبل الكل سارع بشفائي
عرفت كلشي بلفتره الفاتت واكيد الفضل للست شوشه وكعت اذني وهي تسولفلي على كل الصار وعمه وياها وكأني وياهم بلضبط
كاعده على التخم ضجت من كعدت الغرفه اباوع عليها تدرس والقلم براسها وكل شويه تضيعه وتعيط واسوي نفسي زعلانه اذا كامت وعافت الدراسه ردت افرح ولو شويه لان الفرح من زمان هجرني مر شهرين وكدرت اوكف على رجلي بس اتعب مو مده طويله اتحرك اسحل بروحي واتمشى واتعب واكعد الْحٍمَدٍ للـّہ وين جنت وين صرت والاهم كمت بنفسي اقرا القران وهاي تعليمات السيد ماطول وعيت واكدر انطق اني اقرا وضعي نكدر نكول ٦٠ بلميه تشافيت بقى ال٤٠ وهذا بمرور الايام يكفيني اكدر اشوف ابني واتحرك وادخل حمام بدون مساعده شغلات بسيطه بس للي بحالتي يعتبرها عظيمه
شرهب : تعبت خلي اكوم ارتاح شويه
ناي : اقري مضل وكت كلها جم يوم وامتحاناتج تبدي
شرهب : خايفه ماانجح ادرس وارجع ليوره وانسى
ناي : كلنا هيج نكول وتالي بيوم الامتحان نتذكر
شرهب : ادخلين ترتاحين
ناي : لا كاعده يمج حتى لتفلتين
شرهب : شفلت غير تاليها برگبتي
ناي : اقري اروحلج فدوة حتى لااكول اني السبب ضيعت مستقبلها
شرهب : على اساس راح اصير نيوتن يامستقبل يضيع كولي ياالله
ناي : اذا تحبيني ومتردين اتأذه اقري
شرهب : لازم اقرا لخاطرج وحتى الشمات ميفرحون
طب مهدي وشافني ابتسم
مهدي : اليوم هنا
ناي : تعبت من الغرفه كلت اكعد هنا
سحبني من ايدي بهدوء
مهدي : كومي اريد احجي وياج
ناي : كمت على كيفي شوي تمشيت وهو لازمني لان مااكدر امشي مرات وحدي طلعنا من الهول جان يشيلني
ناي : ضحكت وكتله نزلني منا شرهب لتشوفنا
مهدي : متشوف دفع باب الغرفه ودخلني ونومني على الجربايه وهو بصفي
مهدي : ممصدك اشوفج كدامي تمشين وتحجين
ناي : خلصت فتره طويله مني لا احجي براسك ولا اتأمر ولا انك ولا اطلب راسك بارد
مهدي : يابه احجي ونگي ولعبي طوبه ناقص من الرجال يكولج اسكتي بس ارجعي مثل الاول مو حتى الدنيا طلعت من عيني بدونج
ناي : لزمت لحيته وتقربت وبسته خفت عليه
مهدي : اووووف ياخفت كولي اخذت حيلك اخذت كلشي حلو بحياتك ساويت ليلك ويه نهارك متت ناي ماابالغ اذا اكلج ميت بليه روح اجت ايام وداعتج وداعت سيف ماانام اني مابجيت اله بوفاة ابويه وجنت صغير وبجيت بمرضج
ناي : لا عيني بجيت على سدره من تزوجت لو نسيت
مهدي : يايماي مو نسوان طركاعه ولا تنسى مريضة وناسيه كلشي ومانست هاي السالفه
ناي : شعبالك الي منريد ننساه لو يصير زهايمر هم ماننسى
مهدي : ام الزهايمر اكو شى ناسيته
ناي : شنو
مهدي : بوستي وين
ناي : مو بستك
مهدي : احد كلج اني عمتج هاي البوسه مال تنطيها لعمتج ليونس مو الي
ناي : لعد شون ابوسك
مهدي : هيييج
ناي : ههههه اكعد راحه بعدني مره مريضة وحيل مابيه
مهدي : كاعدين قابل شمسوي لو خاطبج هم استفاد اكثر
ناي : باوعت بعيونه وكتله تعبت مني
مهدي : اني تعبتج وأذيتج ومااعرف شون اعوضج
ناي : ابقى حبني وداريني هو هذا التعويض
مهدي : حبج هنا واشر على گلبه وعلى راسه
دوم اكلج انتي تجرين بداخلي ومسيطره على كياني حتى اذا فكرت بغير شغله او عندي موضوع بالي عقلي يجبرني افكر بيج نايه اني روحي معلك بلهوا الي يلامس شعرج كلشي بيج احبه واهيم بيه متعرفين شكد احبج
ناي : لو ادري هيج تحجي من زمان اتمرض
مهدي : طيبي ويوميه اكوم واكعد اتغزل بيج
ناي : والله ولا تسويها ابو طبع ميغير طبعه تتغزل لان فرحان بيه صار مده شويه متحسنه واله انت الغزل يطلع كوه منك وبالاقساط على دفعات
مهدي : لتصيرين ظالمه تعرفين بيه احبج
ناي : اييي اعرف واريد تبين اليه ويوميه
مهدي : هههههه صار ياعيني يوميه اكتب ورقه واحطها بجيبي اطب واطلع اقراها الج
ناي : شفت ورقه يعني مو من وحدك
جان يحضني ويبوسني بلهفه حس بيه ذب بيده وتعبت وخرني منه وباس راسي
مهدي : اكوم اطلع واستر على حالج
ناي : وين راح تروح
مهدي : جايني صلاح وعبد نروح نغير جو وبليل ارجع تردين مااروح عادي ابقى
ناي : لا روح وسلملي عليهم
مهدي : الله يسلمج لج شو محلوة صايره عسل
ناي : هنا بده الجذب غير اخوف كوم روح لطلعتك ودير بالك على نفسك
مهدي : مااشي شوكت روحتنا الجايه للسيد
ناي : هااا شو انت كمت تسأل كالت عمتي بالاول عارضت ومقبلت
مهدي : المايعرفك مايثمنك واني جنت خايف عليج وماردت اجازف بيج ولو شعره
ناي : الْحٍمَدٍ للـّہ طلع خوش انسان اخر مره انتبهت عليه مريض انت انتهيت لو اني اتخايل
مهدي : هو مبين من اول يوم شفناه مريض رغم مو جبير بلعمر بس التعب حيل واضح عليه الله ينطي العافيه نشوف شوكت نروح اله اطلعج بره يم شرهب
ناي : اني اطلع اتمشى احرك رجلي شويه
طلع مهدي ورجعت كعدت يم شرهب وطبت عمه جانت طالعه
خوله : هاا يمه شونج اليوم
ناي : الْحٍمَدٍ للـّہ وين جنتي
خوله : رحت صرفت وانطيت فلوس لمرتضى
ناي : ليش محتاج
خوله : ماقبل ياخذ هاي الفتره كلها مخلصها يفتر على امه الطايحه الحظ اني لو افهم وين ولت لج عيني حتى للبصره راح مابقى مكان ماسأل بيه وميته قهر على حاله اباوع بوجهه كسرته الله لايوفقها وكملها الجوحي النكس
شرهب : شسوه
ناي : مو مجلوط وكاعد وساكت بلبيت
خوله : شبيهه صحته احسن مني ومنج كايم يفتر ويسأل عليها ومبين السالفه بدت اطش ماسكت وفضح نفسه ومرتضى يشيل روحه ويركعها الولد راح يموت من القهر
شرهب : الصراحه حقه جوحي غير ٥٠٠ مليون ياعمه قابل ٥٠٠ دينار والله هبره معدله يوميه افكر لو هاي الفلوس عندي شسوي بيهن وداعتجن فريت نص الكره الارضيه بأفكاري واني اتخيل الفلوس اليه
ناي : ومرتضى وين هسه
خوله : اجاه شغل تأسيس محلات اثنين وراح الهن وخبلني يريد يرجع للحشد ويروح للموصل خلاني اكمز
شرهب : خلي يولي مو بكيفه اخاف ذيج المره اجانه شوي نص ستاوو هلمره يجينا باجه مطبوخه خلي يكعد ويسكت عمه لتقبلين يروح
خوله : حجيت وياه هو لو يحط بان باله ويفكر بزواج واستقرار جان هواي تغير وضعه
ناي : مو بيده امه حيل أذته وجابتله العار زين من عنده لازم اعصابه
خوله : هاي شبيج لو يلكفها يمكن يشرب من دمها وجوحي النذل ميريده فوك ميداري مو وجهه نعمه حييل بيه وابو زايد
شرهب : هو عنده فلوس لو هاي هيه راح يجدي
خوله : تمنيت يجدي وافرح بيه بس عنده البيت بأسمه والمحل وعنده بيت كالو مسوي مشتملات ٣ ومأجرهن الفلوس طارت بس عنده املاك
ناي : منيله كل ذني
خوله : الحرام يفور يايمه ويگثر وهو مابقى شغله عوجه مااشتغلها جاي لذاك البيت يدور عليه مبين يريد يتعارك
شرهب : ديري بالج منه
خوله : لا صار ورگه مشككه مابيه خير كل الي يسوي يعيط ويغلط ويهدد بوخه بعد مابيه حيل يشيل ايده ويضرب
اكوم ارتاح هااا صدك من باجر راجعه ويه يونس للبيت
ناي : لا عفيه عمه وين عايفتني ورايحه
خوله : بديتي تتحسنين واختج يمج خلي اروح على ذولاك التايهين لا مره يمهم ولا احد يساعدهم ذاك اليوم لكيتهم واحد يغسل بلبيت والثاني يغسل هدوم تكول جناين معدله
شرهب : لا عمه قصرتي لو ماخذه صوره الهم جان لزمتها عليهم وعيرتهم العمر كله
خوله : اعرف دكاتج لهذا مااخذت باجر اروح يمهم وشيصير خابروني واني امر الكم بين يوم ويوم قابل اعوفكم
شرهب : ديري بالج من جوحي
خوله : خلي يحير بعاره وبفلوسه الضاعن
راحت عمه للولد وهي تقوم بواجبهم كل فتره عمو نجم يخابرها حتى ترجع وهي تكوله مو هسه شغلي مكامل ياشغل مااعرف
امتحنت وجنت اتوقع عبد يجي واشوفه وهو ولا وصل گلت هذا أيس مني يله سوه فضل بس اني ليش افكر بيه ودوم يجي على بالي ليش تقشمرين روحج تعرفين انتي معجبه بيه ويمكن تحبي وتغالطين نفسج ياشرهب وارجع اغم كصتي واكول لنفسي اششش لا تحبي ولا بطيخ انسي
نجحت بمعدل ٧٠ ودكيت على راسي اول واحد اجه بالي عبد وشراح يكول وشون يتشمت لان مجبت معدل اعلى منه واني بنص هاي المعمعه ضربني عبد بكفخه صحاني دخل مهدي وبلغنا جاي وجايب الكباريه وياه يخطبني
فتحت عيني مصدومه
مهدي : لازم تروح للبيت كلها جم ساعه وهمه يمكم
يونس : وخالك
مهدي : مجاي وياهم تعرف رأيه بلموضوع
يونس : جريت نفس وانداريت يله عمه نرجع للبيت عدنا خطار اليوم
خوله : وشرهب لازم ناخذها ويانه
ناي : عفيه اروح وياكم
مهدي : وين رايحه وانتي تعبانه
ناي : شعندي قابل راح اركض هناك هم اكعد
يونس : خلي اخذها وارجعها بليل لتخاف عليها
مهدي : روحي ولتعبين نفسج ابقي كاعده
ناي : اي اكيد
شرهب : ذوله شيحجون لك عبدد شسويت گلبت يوم نجاحي لرعب ملكيت غير هذا اليوم احتاريت افرح لو اخاف شو يونس حتى ما سألني على رأي
رحنا كلنا للبيت وهمزين عمه منظفه البيت ويلمع لان عمه تتعب الولد ميوصخون من جنت اني انظف يسوه مزبله ولا يديرون بال مدري يخافون من عمه لان ترزلهم
صار اشهر ماواصله حتى من احتاج غراض ادز يونس يجيبهم
اباوع على ميل الساعه يمشي تكول عنده سباق خابر يونس على مرتضى وكال تعوف كلشي وتجي وهو ماكذب خبر اجه طلقه
ناي : عمه تتوقعين يونس يقبل
خوله : خلي نشوف الوضع وهي تبين
شرهب : بيتنا صغير جاب مرتضى ويونس كراسي كهوه حتى نسوي وضيافه لزمت اضافيري شكد احبهن واعتني بيهن وطوال لزمت واحد وكسرته بيدي ولزمت الثاني وهم كسرته جان تلزمني عمه
خوله : هااا طبكن
شرهب : المن جااي
خوله : واكعه على وجهه وحبج المصخم ويريدج
شرهب : سمعنا صوت سيارات مديت راسي واشوف ارقى السيارات طبكت بابنه كلها عاليه وموديلات حديثه اااخ لو الزمك ياعبد لا اهلس الجم شعرايه الباقيه براسك واطلع هذا الرجيف كله بيك
نسمع صوت الزلم مله المكان ومعگلين ردت المحه واشوف شلابس الحلوو ولو هو لو يلبس كونيه يخبل
ناي : شو صافنه
شرهب : بوخت متوقعت يسويها
ناي : مهدي دايخ واكع بخاله وبين عبد المثل اخوه
شرهب : رجلج دوم بلنص يابينج وبين امه يابين خاله وابنه راح ينكطم من وراكم
بدا السلام والحجي وقصص اشكال وناس ترفع وناس تكبس فوك ال٤٥ دقيقه انصمطت من الحر والقلق هلمره اكثرها واكفه ماكو مكان شكد عيب المن هلكد جايب
عمي اني عم ابوه وجبير فخذهم اجيتك وجاي هاي الناس الخيره وياي وطالبين كريمتك لابنا وانت ابن اجاويد وان شاء الله ماتردنا
يونس : هله بيكم عمي هذا بيتكم والبنيه بتكم اني بيدي اكبعها وادزها وياكم جيتكم غاليه علينه واتشرفنا بيكم بس ياعمي ترضه ازوج اختي لشخص ابوه ماراضي
اني بمكان ابوه
يونس : والنعم عمي ماعليك زود بس الحق حق ماينزعل منه انت لو بمكاني واجاك وطلب ايد اختك لو بتك وابوه ماكو وماراضي وكالها بعلو صوته هاي البنيه متصير جنتي تنطي مره شون بعد ترضى انطيهم و اختي بعدها مداخله بيتهم وطردوها واني كله ولا كرامتها اني مطالب لا مال ولا جاه ولا كلشي رايد حق اختي وهو تحس بروحها مو اقل من غيرها ابو عبد بمثابه خالي وعزيز عليه واني ماارضى الكطيعه بينه وبين ابنه جيتكم هاي اذا قبلت وانطيتكم اختي راح تصير كطيعه جبيره ويجوز للموت مايتصالحون شون اتحمل وهو صاحب فضل عليه اخلي ابنه الجبير يدير وجهه اله وهو يتبرا منه اريد يوم مااسلمها بيد عبد مأمن الها اهل وعزوه يحموها لو صار عليه شى ويصير بمثابه ابوها مااريد الرايح والجاي يكول هاي الجانت سبب الكطيعه وقطع صله الرحم
العم : يابويه كلامك عين العقل ومحد يكدر يكولك غلطان اجينه متعشمين متردنا والولد احجيها كدامه صار اشهر يركض ورانه احنه هم مراضين لان اجينه بليه ابوه بس كلنا بلكت يوم مايتزوجها يطيح على ابوه ويراضي والگلوب تتصافه
يونس : ماتتصافه اذا اتزوج بلعكس راح تسود
عبدالرحمن: انت بس وافق واني اعرف شون اقنع ابويه يونس لتظلمها هاي ثاني مره اجيك وهلمره مو وحدي اهلي كلهم
يونس : واني كتلك قبل واعيدها اني مارفضت ولا كلت لا بلعكس اتشرف تصير نسيبي بس ابوك يطلبها ثاني يوم ازوجكم وهاي كدام الكل انتم هم اهلي اذا تسمحون اليه
العم : ابنا وحالك من حال ولدنا
يونس : على راسي عمي البنيه لعبد بس بحظور ابوه غيرها تعذروني
شرهب : بدا كل واحد يحجي شى وجان عبد عصبي ومهدي بس يباوع لو يحاول يسكت عبد كلت شويه ويكوم يضرب يونس من الاعصاب كل ذوله يحجون وهو قافل على موقفه جان الموقف كلش صعب ناس كبار والهم عزوتهم ومكانتهم واخويه وحده بنصهم ومرتضى بس يباوع هو والماكو سوه الحاح الناس سبب حيل احراج
تالي عبد كال اخذو راي البنيه يجوز تقبل وتنحل شكد جنت قويه ودوم اواجهه اشكال البلاوي مثل هاي البلوه ماكو اشتعلت عبد هاي دكه ادكها بيه
طلب العم من وره الباب ماادخل لان يونس مقبل وكال بس يسمعون صوتي وكفت وره الباب المسدود
خوله : احجي شبيج
العم : عمي تسمعيني
شرهب : بلعت ريگي وافرك بيدي اي عمو اسمع
العم : ابنا عبد رايدج على سنه الله ورسوله واخوج شرط اله ابوه يحظر واحنا حاظرين بمكانه واخوج ماراضي شتكولين
شرهب : رفعت صوتي مااجه بالي غير شى واحد من يدخل يونس وهو مدمر من فوك ليجوه وايده مجرحه وكله وصاخه وريحه من الزباله حتى بس يلم العتيك ويجيب مصرف النا حتى يوكلنا وندرس ومنبطل
كلت مالي حجايه ورأي بعد اخويه هو ابويه والي امري وشيفصل اني البس
العم : والنعم من تربيتج بنتي اخذي راحتج
شرهب : كعدت بلكاع واشرت لعمه مي رحمه لفرج راح يوكف گلبي من الخفقان
ربع ساعه وفضت والكل راح طب يونس شافني كاعده بلكاع دنج باسني
يونس : رفعتي راس اخوج خفت تكولين موافقه
شرهب : شون هيج احجي وكل الي تسوي لخاطري
خوله : الْحٍمَدٍ للـّہ كدرت تصمد
يونس : صار مده طويله اقوي نفسي لهذا اليوم
ناي : ليش جنت تدري راح يجون
خوله : اي رجلج كالي قبل مده وبلغت يونس
يونس : تمنيت الخال يجي حيل انقهرت من عرفت شون مستعد يتبره من ابنه ولا ياخذ شرهب جنه بيته
شرهب : عساه لا قبل عشتوو قابل اخر رجال
مرتضى : هم بيج بله شون صوت يلعلع احجي بخجل بنزاكه استحي كلت راح ادخل الكاج خاتله تستحين من عدنا
شرهب : عليمن هاي اللواكه منين اجيب النزاكه اني رجال مع وقف التنفيذ كوه انزك روحي ماتطلع ياابن عمي الجينات بداخلي زلمه حوك عفت المياعه لاهلها وليش استحي منكم قابل محد يعرف جايين يخطبوني هاي الشكليات قديمه موديلها يله وين هديه النجاح ولا واحد منكم جابلي
خوله : هو انطانه صبر عبد خله ركضنه ماله والي
شرهب : ابتسم واضحك واسوي نفسي كلشي ماكو عادي بس اني ابجي بداخلي اليوم دفرت حلم حلمته بساعه فجر على نسمات الهوا البارده وكعدت ولكيت الواقع غير
عبد حلم يخبل تمنيت اعيشه ومااكعد منه شكد ارفض واصده هاي المره غير شكل لان ثبتلي شكد هو شاريني ومستقتل عليه لحظه ماجاب اهله كلهم واجه تمنيت عمران جاي جان بعلو صوتي كلت موافقه دوم فرحتي ناقصه لو تروح ومترجع هاي اني اليوم تأكدت حظي بلدنيا قليل او نص حظ ولازم اقبل واسكت واتأقلم لان اكيد بعد كعدت اليوم عبد الرحمن انتهيت بلنسبه اله
واني ابتسم واسوي نفسي وياهم ماكو شى دك تلفوني رقم غريب مجاوبت مدري ليش اجاني احساس هذا عبد رتبنا البيت وشلنا الكراسي رجعوها الولد لان ايجار ودخلت لغرفتي اشوف شبيهه مابيهه وعفت عمه وناي يسولفون بلهول رجع دك نفس الرقم اول ماشلته اجاني صوته يعيط
عبدالرحمن: ليش متكوليلي شنو الاسوي بعد وترضين
شرهب : ردت ابوك ماردت شى ثاني
عبدالرحمن: وذوله كل اهلي عفت كلشي وجبتهم واجيت ردت افرحج بلنجاح والخطوبه ردت هذا اليوم نتذكره اني وياج واكولج شوفي شون وفيت وكد كلمتي وشكد احبج حتى ابويه وامي عفتهم لعيونج ليش ميغزر هذا الشى بيج مبين جنت غلطان ومتعشم زايد تحبيني وراح تبيعين الدنيا مثلي وتوكفين بوجهه حتى اخوج ونتزوج ليش طلبتج كلت اكيد راح تكول موافقه
شرهب : لتعيط على كيفك جان صوته يزرف اذني من العياط والاعصاب
عبدالرحمن: يطبني مرض وشون مااعيط لو گبالي ياشرهب لا اشرب من دمج
هيج تفشليني كدام الكل واطلعيني صغير
شرهب : حشاك
عبدالرحمن: فضلتي اخوج كوليلي عندج مشاعر اتجاهي لو اني زمال واحب وحدي فهميني مو عقلي راح يوكف اني اكول تصدني بس عيونها ادور عليه عبالك مامراقبج كل حركه ونفس تسويهم اعرفهم مو جاهل وماافتهم معقوله فسرت غلط واني لعبت بحالي واحب من طرف واحد احجي لتسكتين اذا انتي صدك قويه وسباعيه اعترفي شنو تحسين اتجاهي
شرهب : هدأت وغمضت وگلت اني احبك بس احب اخويه اكثر اني احبك بس احب كرامتي اكثر وماطول ابوك مستعر من عندي ومراضي بيه الافضل تروح تشوفلك وحده تناسبك
سكت واسمع صوت انفاسه العاليه الكلها غضب وكاال
عبدالرحمن: على دكتج مال اليوم اني بعد مااريدج وصدك راح اشوف وحده تناسبني الي يبيعني ابيعه مو اني اضحي بأهلي وانتي حجت الكرامه وكال اخويه ماطول فضلتي اخوج وكرامتج عليه اني هم ارجع لاهلي واتزوج الي تناسبني مثل متكولين
وانتي الله لايسعدج ويه غيري وسد التلفون بوجهي
كعدت ابجي اي ابجي مو بيدي الموقف كله صعب من بدايته لنهايته تأذيت كل الصار أذاني اندفعت الباب لكيت ناي تلزم بلباب كوه تمشي مبين تعبانه
ناي : كومي ياروح اختج لتبجين كلشي قسمه
شرهب : كمت وحضنتها واشهك بحضنها
ناي : لازم الفرحه تتنغص علينا امشي نرجع للبيت وعوفي كلشي وراج كليه ومستقبل والله يوكعج بأبن الحلال الي اهله يقدروج ويجون بنفسهم يخطبوج
شرهب : انقهرت عليه
ناي : والله واني هم مبين كلش يحبج
شرهب : وبلصار كرهني
ناي : سويتي عين العقل لاتتندمين
شرهب : خلي نروح اختنكت مااريد يونس يجي ويشوفني هيج
رجعنا للبيت اني وناي وعمه بقت ويه الولد بذاك البيت
فرحت النجاح اختفت وحماسي للقبول راح كلشي صار عادي جان ملون واختفت الالوان
صار اسبوع على سالفه الخطوبه ومهدي ابد مافتح الموضوع ولا كال اي شى واني اشتغل بسكوت حتى حس كام ميطلع اليه
سمعت صوت ناي تصيح طلعت عليها
ناي : راح نروح لكربلا
شرهب : خير صاير شى
ناي : يونس يكول بيبي تريدنا كلنا واذا بيه حيل اروح لان هي هم رايدتني
شرهب : تتحملين طريق
ناي : مو اروح واجي على السيد بلكوفه وذيج ابعد
شرهب : مهدي يقبل
ناي : اتوسل بيه وسياره راح يجيب يونس من الباب للباب
شرهب : ياريت نغير جوو
ناي : بعد توسلات قبل مهدي وهاي اني كاعده بلسياره ليوره اني وشرهب وعمه
ويونس ليكدام ومرتضى كال باجر اجي وراكم هاي الفتره كلها ماوصل يكول كل مااريد اروح اتذكر سالفه بان واستحي اباوع بوجهه
دخلنا لكربلا
بديعه : يايمه ماصدكه بنيتي تمشي
ناي : حضنتها وابوس بيها وابوس بيبي الي من شافتني طكت بجي
عمشه : بلخير يمه كمتي على حيلج وحك هو علي لون بيه حيل لا ازورنج لدارج
ناي : اعرف بيج بيبي تعبانه ومريضه مااعتب عليكم كافي يوميه تخابرون وتطمنون
بان : الْحٍمَدٍ للـّہ على سلامتج حبيبتي
ناي : الله يسلمج
كعدنا كلنا وصبت عمه الغدا مسويه دولمه ثواب على روح الموته جانت لمتنا حلوة نضحك ونسولف اله بيبي ساكته
كمنا بعد ماخلصنا الاكل وشربنا الجاي كالت بيبي
عمشه : انه اليوم جمعتكم عبن اريدن ارتاح الحمل ضاك على افادي وانتم تطشرتو وكل واحد بديره ولزوم تردون
يونس : خير بيبي بيج شى
عمشه : انه اريدن ارد لبغداد
يونس : اي بالي وكمت ادور على بيت اكبر حتى أجره ونكعد كلنا سوه وبان كملت سالفه النقل هم شبهه كملت كلها شهر ان شاء الله وترجعين
عمشه : چا نكعد ايجار وصالحه متنعمه بلبيت
شرهب : اني مااروح لبييت بيه صالحه لو اضل بلشارع لان هلمره اذبحها هي وبتها على ايدي
عمشه : بسچ اريدن احجيلكم سالوفه
يوم ماطحت وشفت الموت گلت انه عايفه هذا البيت بحلك ساهره وصالحه عليش ذني بنات غنيه يصولن ويجولن ويونس سوده بوچهي نايم بلحبوس وخواته تشردن منو ليهن لون متت وانه اعرفن ماتورثون عبن ابوكم مات گبلي تضلون هيج ايدكم والحايط
خذيت عمران
يونس : خال مهدي
عمشه : چا شعدنا عشره غير هلوحيد خال مهدي وطلبت منه يحولي البيت بأسم يونس واسم ناي حتى اضمن حك الكل وانشعل اهل اهلي لون كملنا المعامله وخلفه الله على الزلمه يركض بيها هنا وهنا وكل شويه ناقص شى ومكمله لحين ماتحول البيت
شرهب : واني بت البطه السوده مادخلت وياهم ولو صدك بت البطه الزركه
عمشه : مزين راسه الياخذج بسچ يمكموعه چا انه ماسجلت بأسمج عبنج متزوجه الفريخ وخفت لا يكضج ويعدمج العافيه وياخذ حكج وتالي انه ماردت صالحه وساهره يربحن ويربح عدي لاوالحظ المجولح
شرهب : يمه فديتها لعمشه تفكير يهود.ي كلشي حاسبه اله احساب
يونس : وتالي بيبي
خوله : تالي البيت بأسمك واسم ناي
يونس : انتي تدرين عمه
عمشه : انه ردت بأسمك واسم اخيتك واسم عمتك وهي مارضت
خوله : كلت المن تسجل بأسمي وتالي اموت وهم يورثوني
ناي : انتي مو جنتي متحجين ويه بيبي
خوله : خابرتني من تلفون عمران وماحجت ويايه خلت الرجال يفهمني كلشي واني كتلها توكلي بالله وسجلي بس بأسمي مااريد
عمشه : وحطيت خبر عنده لون متت البيت ليونس ولناي يبيعوه وينطون حك منه لفلاح عبنه طيب ومرته بت اوادم ودارتني واريدن بيت يلفيهم والباگي ليونس وخياته اثنينهن وماينطي فلس احمر لا لجوحي ولا لعبيد عبنهم مايستاهلون ونجم هو عنده خير من الله مامحتاج
بديعه : وليش ساكته كل هذا الوكت ياعمه شفتي يونس طلع من السجن وتبهذل وراها كعد ايجارات واحنا هم
عمشه : اعرفن لون حجيت چان گلوه وذبوه بهبيه
بديعه : وليش هسه حجيتي
عمشه : عبن ساهره ولت وضلت صالحه وحيدها وماطول خيتها موش وياها صالحه ماتكدر مثل گبل تسوي شى ذني وحدتهن تذب سمها على الثانيه والحين ضعفت قوتهن وتشردن وانه شفت فلاح مات وضلينا بليه والي لويش يونس يأجر بيت وذاك شكبره تلعب بيه صالحه بكيفها
انه اريدن تبيعه وتشتري بيت ومشتمل صغير بصفه
يونس : ليش مشتمل
عمشه : عبن البيت لينا كلنا انه وانت وبدعه وهاي المكموعه المسودنه وناي الله يحفظلها راعي بيتها يضل نصيبها ويانه والمشتمل لمرتضى وهاي الثوله واشرت على بان ازوجهم ويضلون جارنا وجار امها
بديعه : يازواج عمه
عمشه : چلمه ثانيه امدج هنا وانسى گلشي سويتي ليه واطيحن بيج وابرد جبدي
تطلع سنه ابوها وازفها على مرتضى هذا الوليد طيب وماله احد امه هجت الله لا يردها وابوه نكره چا انذبه انكعده جارنا ونزوجه بتنا ومالج دخل بت ابني وانه حره بيها
شرهب : كمت طفرت كومو نرجع لبغداد
خوله : ليش ولج
شرهب : نسيتو اهم شغله
ناي : خير يمعوده
شرهب : البيت بأسمج واسم يونس يعني لازم نطرد صالحه وهاي السالفه محد يسويها غيري اليوم عيدي ولكم راح اطرد صالحه من البيت واسويلها زفه معدله واطلع كلشي سوته بيه من اول ماشمرتني بسلمان باك لحد مازوجتني لعدي
خوله : هههههههه واني وياااج صدك فاتتني لازم صالحه تبات بلشارع كاافي اجه يومها
يونس : يمعودات اوكفن مو مال مشاكل
ناي : الصراحه يونس تستاهل نسيت عبيد وصالحه شسوو بينا وبما ان البيت جزء منه بأسمي شوشه العبي والهوا بظهرج
شكرا لزيارتكم عالم روايات سكيرهوم
