رواية قتل عروس الفصل الثالث بقلم جمانه السعيدي
اريد أوضح شي
هاي الأحكام الصارمه على العلويات جانت قبل
قبل سقوط النضام
بحيث احنا بمنطقتنا جانن اكو هواي مامزوجات
لان الاهل مايقبلون اله سيد
اما بعد السقوط الناس عقليتها اختلفت وصارو يزوجون العلويه الاي شخص يتقدملها عادي
الحمد لله خلصت ذيج الاحكام القاسيه
تكدرون تسئلون الناس الجبيره بلعمر عن هاي الشغله
وخاصه بلمناطق الجنوبيه اما غير اماكن اني مااعرف
اني احجي على المنطقه الي صارت بيها القصه
نرجع القصتنا
ليلى بيوم كعدت الصبح اصرخ من راسي يوجعني حيل
بيومها حميد جان طالع للريف
حتى يتفقد حلالنا هناك
ليلى...كعدت وكمت ابجي راسي ذبحني
ماعدنا علاج بلبيت
امي تخاف اطلعني للمستشفى تخاف من حميد
اذا سمع اني طالعه يكلب آلدنيآ علينا
للتسعه كمت مااكدر من الوجع
ليلى.. يمه فدوه الحكي عليه بعد مااكدر راسي يوجعني
امي...شلون خاف حميد يرجع
ليلى...يعني اله اموت يله ترتاحين بعد مااكدر
امي ...كانت محتاره بين خوفها عليه وخوفها من حميد
بس من شافتني كمت ابجي
استسلمت
امي...يله كومي بدلي اخذج للمستشفى الله يستر وحميد ما يسويلنا مشكله
طبعا المستشفى قريب علينا تقريبا عشر دقايق مشي
مستوصف مو مستشفى جبير
هاي بسنة ٩٧ وبعدنا لابسين اسود على ابوي الكل لابس اسود
لبست عباتي وحجابي والبوشيه وجواريب اسود ثخان
وطلعنا بس اني شنو كوه امشي من الالم
احس من اخلي رجلي بلكاع
عبالك ادوس على راسي كل حركه اتحركها
الالم يزيد اكثر اكثر
وصلنا للمستوصف اريد اوكف مااكدر
امي قطعت باص
اجينا للدكتوره عليها ازدحام وسره شطوله
اني وين اكدر اتحمل اوكف هيج
هواي ناس واكفه بس اني ماركزت لان الالم تمكن مني
زلم ونسوان واطفال هوسه صايره
ماحست غير اتخربطت ووكعت بس مافقدت الوعي
اكو واحد كان واكف وراي
طويل لابس دشداشه بيضه وعكال وعبايه
اني ماشفت وجها اني بيا حال بعد شويه واتخبل من الوجع
امي كامت تعيط هاا يمه بنتي اسمعه يكول حجيه
شيلي البوشيه البنيه راح تموت
امي خافت عليه ونست كلشي كل الاحكام والتقاليد
تريد بس ترجعني الوعي
شالت عني اليوشيه وفتحت الحجاب
هذا الولد واكف فوك راسي ويصيح دخلوها للدكتوره
ماتشوفون وضعها شلون
صاح على نسوان ثنيبن واكفات تعالن ساعدن امها
تعالن شيلنها وياها
التمن عليه شالني بس اني شنو صرت خلقه
العبايه انفتحت والحجاب وكع من راسي والبوشيه
ماعرف وين صارت
امي تحاول اتلملم العبايه عليه
دخلت على الدكتوره وبدت تفحصني قاست الضغط
طبعا اني دموعي اربعه اربعه من البجي
من كد الوجع احس راسي راح ينفجر
الدكتوره كالت هاي شقيقه لازم تاخذ حبوب
بس ماعدنا بلمستشفى حبوب قويه
لازم اجيبوهن من برا
جمانه السعيدي
عدلت حجابي بس البوشيه لازمتها بايدي طلعنا اني ابجي
لان شبه يأست ماكو علاج والوجع ذبحني
هذا الولد بس شافنا طلعنا كال هااا حجيه
امي...يايمه الدكتوره تكول علاجها من برا واخوها اليوم ماكو
رد عليها اني اجيبه سجلت اسمه الدكتوره
امي...لا اخوها من يرجع يجيبه
...شنو القصه حجيه انتضرن هنا اني عندي سياره
هسه اروح اشتري وارجع
اخذ هذا الولد الوصفه وطلع واني وامي بقينا كاعدين بلمستوصف
مااكدر ابطل بجي من الوجع
شنو ودي اشرد من كد الوجع كلشي مااشوف بعيوني
تقريبا ربع ساعه ورجع جايب ثنيبن اشرطه من هذا العلاج
انطاهن الامي
امي...شكرا خاله شكد فلوسهن
...تحجين صدك حجيه شنو قيمتهن
امي...لا يمه مايصير
ليلى...يمه فدوه خل نرجع للبيت راسي ذبحني
طلعت للحديقه اكو حنفيه بلعت حبايه وأخذت مي بجف ايدي وشربت
( قبل كله نشرب مي من الحنفيه هسه الوضع تغير)
من رفعت راسي لكيته يباوع عليه
طلعت البوشبه ولبسته
...اوصلكم للبيت
امي...لا خاله احنا بيتنا قريب هنا رحمله والديك
ليلى ...رجعنا للبيت بس كلشي ما حجينا كدام زوجة حميد
حميد لويعرف اني نزعت البوشيه غير يتخلل عليه
لو يدري هذا الولد جابلنا العلاج
غير يذبحني بدون تفكير
جمانه السعيدي
اني بعد مااخذت العلاج شويه هدئت
ونمت بيومها حتى مااشتغلت
لليل يله رجع حميد رجع تعبان كبل نام
حتى زوجته ماحجتله رحنا للمستشفى يمكن نست
همزين لان بس يعرف يفتح وياي تحقيق
وبعد مااخلص من اسئلته
طبعا تشخيص الدكتوره غلط بعدين طلع هذا الوجع بسبب
اني ادنك هواي واني اشتغل اذا كان شغل البيت
او من اكصص القماش بسبب فقرات الركبه راسي يوجعني بس هي كانت دكتوره مبتدئه
المهم اني ثاني يوم صرت احسن
تحديدا بعد اربع ايام من هذا الحادث
اجت علينا وحده مره عمرها تقرببا ٥٥ حلوه مرتبه كشخه
دخلت اني وامي كعدنا وياها
زوجت حميد تغسل الجهالها
ام عدنان....انتي عندج بس هاي البنيه بلبيت
امي...اي عندي بنات ثنيبن غيرها مزوجات
ام عدنان....انتي ما تعرفيني اني مرت شيخ علي
، ( طبعا اني غيرت اسم الشيخ لان شيخ كلش معروف )
امي...اهلا وسهلا كل الهله
ام عدنان...اني جايه اخطب بتج
امي...شنو عشيرتكم اني مااعرفكم ولا زغر بيكم
ام عدنان.....احنا من العشيره الفلانيه
جمانه السعيدي
امي...هااا انتم مو ساده
ام عدنان...انشاء الله ماكو فرق
امي...ولله جيتج هاي على عيني وراسي بس احنا
بناتنا ما ننطيهن اله سيد
ام عدنان....شنو هذا الحجي ترا احنا شيوخ ابا عن جد
وسمعتنا مثل الشمس ابني مخلص كليه
ومراح نقصر وياها ابد
امي....ولله مابيكم قصور بس اخوها ما يقبل اله سيد
ام عدنان...انتي بس كولي شيخ فلان بس يسمع باسمنا
هو راح يوافق
امي...ميخالف بس اني اعرفه زين مراح يوافق ابد
ام عدنان....اني بعد يومين ادزلج وحده تاخذ الرد منج
اني اجيت اشوف العروسه
حلوه ماشاء الله عليه وسمعتكم مثل الذهب
ليلى .....طلعت ام عدنان بس اني كان الموضوع عندي جدا عادي
مااهتميت اعرف حميد مراح يوافق ابد
مااتعب نفسي وافكر
من رجع حميد وامي حجتله
حميد... يمه شنو انتي ماتعرفين اي واحد اذا مو سيد
مراح اقبل بي لو مو ابو شيخ
لو ابو صدام حسين اله سيد يله
من ترجع اطرديها كليلها ماعدنا بنات للزواج
سدي الموضوع
للحكايه بقيه
منو ام عدنان ومنو ابنها الي يريد يزوج ليلى
وياترى راح يستسلم ويعوفها لو لا
شكرا لزيارتكم عالم روايات سكيرهوم
