رواية اغفري لي الفصل الثالث بقلم أوتار حزينة
قائد
دحكت لاخويه من رد هالرد كمل
«،،،،اكص ايدي منا اذا ماطلع مقداد مسحور
ومشربي شي
«،،،،سامعه شي ولك
«،،،لاااا بس انت تعرف مرة خالك وسوالفها واكيد
سوتله شي ولصم حلكه
مرة خالي جنا نسمع عليها كلام هي ام سحور
بس معقوله سوت لاخويه وشلون ومنو خلاه اله
امي اجت بالي بس رفضت هالفكرة
وكلت مستحيل تسوي
بابنها هالشي
ثاني يوم طلعت للمصطر من وكت حتى مااشوفهم واسمع نفس الكلام ماجان اكو شغل كعدت وي
حسين الجان يشتغل بكافتريا جاب
جاي ولفه فلافل كال
«،،،هاك اتريك وجهك وجه النفسه
«،،،انجب واكرمني بسكوتك
«،،،ها ولك شبيك عبالك متعارك وي الاهل
«،،،وهل يخفى القمر
«،،،سوده عليه اليكول مو ابنهم يتيم ولاكي
باب الجامع
«،،يول روح منا لا اهفك بهل القندره
«،،،ههه تره انت دايس كاعي يعني مو راهمه
تطردني
ذبيت حسرة وجاوبته
«،،،ولك شوكت نهج منا والله تعبت ولعبت نفسي
«،،،جمعت فلوس
«،،،اي بس مو جثير
«،،،ولا اني ولك ماجاي اعرف وين يروحن
«،،،،بله اني عندي اهل وياخذون مني انت شبيك
لا ام ولا اب ولا داده وين جاي
توديهن
«،،،مو تعرف كاعد بيت اختي وانطيها مصرف
هي ماتقبل ولا رجلها بس اني
مااقبل اعيش عاله عليهم
«،،،شلون حسين نظل هيج والله تعبت واريد بس
عاد افلت منا
«،،،،اصبر هو هم الوضع ماادري شلونه هناك يكلون
بعد محد يطلع على البحر لان هوايه ناس
غركانه بي
سكتت ماحجيت شي هو التهى بشغله
جهازي دك جان رقم غريب جاوبت
«،،،،الو
«،،،شلونك قائد
جانت خالتي ندى
«،،،،هلا خاله الحمد لله بخير
«،،،دومك بخير واسفه اذا ازعجتك بس
جنت رايده منك كم شغله
«،،،لا خاله ماكو اي ازعاج كولي شنو الشغله
«،،،انت بالشغل
«،،،لا ماعندي اليوم
«،،،ها عبالي تجي تساعد عمك بكم شغله هو
ماقبل اخابر احد منكم بس كلت اخابرك
لان اعرفه مايكدر وحده وردتك انت لو احمد
تجون تساعدو اذا ماتكدر عادي اخبر
اخوك
«،،،لا اني قريب عليكم راح اجي هسه
«،،،اي والله ياماما علواه تجي لان عمك تعب
من الشيله ويراد واحد ويا حتى يكمل شغل البيت
«،،،جاي اني وادللي خاله
«،،تسلم بعد خالتك يله تعال راح اسويلك
ذاك الريوك الحلو والمرتب
باوعت لفه الفلافل الجدامي وكلت
«،،،تسلمين خاله ماتقصرين
«،،،يله مع السلامه
«،،،الله وياج
سديت الخط اشرت لحسين اروح اجه
وكال
«،،،ولك مااكلت اللفه
«،،،خليها الك
صعدت ماطوري شغلت وطلعت لبيتهم
وصلت نزلت دكيت الجرس وانتضرت
الباب انفتح طلعت خالتي فرحت من شافتني
وكالت
«،،،هلا قائد كل الهلا
«،،،هلا خاله
اجت عليه حظتني وباستني كلت
«،،،،مو هنا خاله احنا بالشارع
«،،،،اانجب ولك قابل بايسه صاحبي
ابتسمت كملت
«،،،فوت عمك كام يحجي عليه ويكول شكو
كلفتي الولد
«،،،لا احنا اهل ماكو اي تكلفه بينا
ذبت حسره بس ماحجت شي
«،،،هلا يابه كل الهلا
عم فاروق طلع نفس الترحيب مال خالتي
«،،،هاي خالتك صايره تشتغل من ورايه وخابرتك
واني ماادري كتلها ليش خابرتي
خاف الولد عنده شغل
ومشغول بيه
ابتسمت اله وجاوبته
«،،،اعوفه واجيك عم الشغل مو اهم منك انت
وخالتي
وجهه فرح هو وياها ورد
«،،،بارك الله بيك والله يوفقك بحياتك
«،،،امين
خالتي ردت هو كمل
«،،،يله لعد امشي خلي نسوي كم شغله بالكهرباء
انت شلونك بيها اني توب بس اريد
واحد وياي مضبوط
«،،،خليني على يمناك كلشي اعرف بيهن
«،،،هاهي لعد اليوم الا اضوي البيت من فوك
لجوه بس قبل كلشي خلي نتريك
كاهي وگيمر
جنا نحجي بالمطبخ اشرلي وكمل
«،،،اكعد يابه ليش واكف
كعدت خالتي تفتر يمنا وتشتغل صاحت
«،،ليلو وينج
جااايه
عم فاروق كال
«،،،نسيت الصمون بالسياره اروح اجيبه
من طلع هي طبت شافتني الملامح تغيرت
بس سلمت من كفه خشمها
«،،شلونك
«،،،هلا
رديت بنفس النبره
امها ماانتبهت كالت
«،،،خلي الاكواب والشكر
التهيت بجهازي مرت من يم الميز وراحت للملحق
من فتحته فجأ فلت من الحايط ووكع من صفحه تلكته بايدها وعاطت
فزيت من مكاني مااعرف شلون صرت يمها
لزمته ورفعته منها صحت
«،،،ووخري منه بسرعه
جان ثكيل كلش لان متروس غراض هي انحصرت
بيني وبين الكاونتر الارضي خالتي اجت
علينا مذهوله حاولت تشيله
وياي ماكدرت ،،،،،كلشي بي
وكع عليه وعليها صحت
«،،،ااطعلي عااد راح تتأذين
«،،،بس وخر شويه حتى اطلع
ملت ليوره امها جرتها من طلعت ردت اكعده على الكاونتر فلت من ايدي وجرح ايدي عم فاروق طب
شاف الوضع صاح
«،،،هااي شكوو
اجه بسرعه علي نزل الملحق وياي وخلينا
على الكاونتر رجعت ليوره ولزمت ايدي سال
«،،،،هاااي شلون وكع
ليلى جاوبته بخوف
«،،،بابا فتحت الملحق ووكع عليه وقائد لزمه
«،،،يمه صخام بوجهي ولك ايدك كاعده تنزف
«،،،مابيه شي خاله جرح خفيف
«،،،ياخفيف يابه ايدك تاذت امشي خلي اوديك للمستشفى
عم فاروق وخالتي تخبلو من شافوني انجرحت
جاوبت
«،،،مايحتاج بس انطيني شي اشد بي الجرح
وهم معقم حتى اعقمه
كلت هالكلام لح
«،،،ولك كوم خلي اوديك يشوفون ايدك خافت تأذت
«،،والله مابيها شي عم شوف شلون اكدر
احركها
حركت ايدي جدامهم وكملت مبتسم
«،،تره اني متعلم على الجروح وهذا بسيط بالنسبه
اليه
«،،،ليلى جيبله شاش ومعقم بسرعه بنتي
خاله حجت وياها هي جاوبت مذهوله
«،،،هاا اي هسه
طلعت من يمنا كمت غسلت الجرح عم فاروق يمي
القلق بوجهه يردد
«،،يابه قائد خلي اوديك حتى اطمن عليك
«،،والله مايحتاج شوفه حتى الدم گطع
«،،،فاروق شوف شلون شالع البسمار من
الحايط
«،،شغل مو تمام والا اخابرهم ارزلهم ذيج الرزاله
واطيح حظهم على هالشغل السگط
رجعت كعدت ليلى اجت خلت صندوق طلعت
معقم وشاش امها اخذته منها وضمدته
اليه سالتها بقلق
«،،وج خما تاذيتي
«،،،لا ماما ماشفتي شلون اجه بسرعه عليه وخلصني منه
«،،،والله لو ما انت جان بنتي تاذت كلش لان الملحق متروس غراض،،،
«،،كتلج ياندى لاتخلين بي هوايه هاج شوفي وكع
واذه الولد وراد يأذي بنتج
«،،اسكت فاروق والله ماادري شصار بيه حيلي
راح ورجلي كامت ترجف
خالتي كعدت بصفي عم فاروق كال
«،،ليلى جيبي مي لامج ولقائد
«،،اي بابا
جابت الي ولامها كلاصات مي
هو راح يفحص الملحق خالتي راحت
ليمه كالت
«،،شوف شلون مشلوع من الحايط اكيد مامسوي
زين
جانت قريبه مني رفعت راسي الها صافنه على
جرحي
«،،،يله يابه سووو الريوك حتى اخابر ذوله يجون
يشوفون شغلهم التحفه
خالتي وهي خلن الريوك تريكنا يحجون بالصار
بس لاول مره احس،،،،بالراحه بالاكل
ومااحس اني مجبور اكعد
وي ناس ماطايق
اكعد وياهم
«،،هاك يابه اكل هاي اللفه
اخذت لفه بيض من ايده،،،، خالتي
كالت مبتسمه
«،،،اليوم الدلال لقائد مو ليلى
«،،،لاتسوين فتنة ندواي خلي الحديده بارده
ابتسمت من سمعت رده كمل
«،،،اكل ابني انت تاعوب وتجد بالشغل
«،،،هذا اكلي عم مااحب اثكل بالاكل
«،،،بس تره انت ضعيف كلش اسمن اشويه
تره يلوك الك السمن
خالتي حجت مبتسمه هو جاوبها
«،،،شغله مايخلي يلم لحم بس يربي عضل مو هيج
ابو الشباب
هزيت راسي باي خالتي كملت بقهر
«،،بله مهندس وشكبر اسمه وتعبان على روحه سنين يشتغل عماله بمصطر والله قهر
«،،،مايظل الحال هيج يجي يوم ويتغير
هو رد عليها وكمل وياي
«،،،كتلك راح اشوفلك جماعتي بلكي يكدرون
يوظفوك بمكان
«،،،لاتعب روحك عم اني تره ماناوي اظل هنا
صفن عليه ورد
«،،،تريد تهاجر موو
هزيت راسي باي كمل
«،،،ليش ابني تريد تهاجر تره الغربه صعبه
«،،الجاي اشوفه هنا اصعب
جاوبت هالجواب وتندمت لان شفت نظراته
لخالتي حسيت بيها تعرف كلشي
يصير بينا بس ماحجت شي
كلت اكيد اسمع اخابرنا من خالتي رباب هو هم
ماسال بس كال
«،،،فكر زين بهل القرار لان هوايه مثلك هاجروا
وماكدرو يكملون هناك
«،،،اني اكدر عم
جاوبته مختصر هو ما لح عليه بالحجي كمت
وكلت
«،،الله يديم النعمه
«،،،الف عافيه ابني
رحت غسلت ورجعت للمطبخ كال
«،،،عوف الشغل اليوم ايدك تاذت
«،،،،مابي شي لايظل بالك وخلينا نكمل شغل
الكهرباء
ابتسمت وكملت
«،،،انت مو كلت الا انور البيت اليوم لو رجعت بكلامك
«،،،،ههه لا يابه ماتراجعت بس خايف عليك
«،،،لاتخاف تره الكدامك زلمه خشن
باوع عليه باعجاب ورد
«،،،واني اشهد انت زلمه معدله وابن اصول
التهيت ويا بشغل بيته والوكت اخذنا جماعه الكاونتر اجوي وعرفت واحد منهم جان صديقي
بالكليه وكفت وياهم اسمع عم فاروق
يحجي بزعل وياهم من ورة شغلهم
تعذرو منه وشدو الملحق مره
اللخ
خالتي وكفت ترتب بي هي وليلى واحنا صعدنا
لفوك نكمل شغل
«،،،،تعال قائد ماظلت بس غرفه ليلو
طبيت وراه وكفت وصفنت باعجاب على غرفتها
الاثاث كله ابيض والستائر تور كشكش
من جوه
«،،،الديكور يخبل واكو لمسات بي تخلي الواحد
يصفن عليها حجه
«،،،شوف لازم نخلي بالسقف اربع لدات ،،، اروح
اجيبهن واجي
طلع من يمي خليت الدرج بالنص اباوع
على كلشي بيها رحت للشباج وخرت البرده جان
اكو باب يطل على بلكونه
سمعت حركه ورايه كلت من انداريت
«،،،ها عم جبتهن
سكتت من شفتها هي شايله صينيه صغيره
بيها عصير ونساتل كالت بخجل
«،،،هاي ماما دزتهن الك
اجت خلتهن على الميز شفتها تباوع
لايدي بعدين كالت
«،،،شكرا لو ما انت جان تأذيت
كملت
«،،،هي هسه شلونها زينه مو
«،،،اي تره الجرح مو جبير شفتي من عقمته
خالتي مجرد خدش بسيط
«،،،ماما ادكول خلي يشرب العصير وياكل شي
«،،،تمام بس تره شبعان خلي مشوار
«،،،بكيفك المهم تشربه
جاوبتني ومشت من يمي مااعرف شلون
كلت
«،،،ليلى
وكفت واندارت عليه حجيت بدون تفكير
«،،،اني اسف ماجنت اريد صوتي يطلع عليج
بس لازم تعرفين هنا مو مثل بغداد
«،،،اعرف بابا حجالي كلشي وعرفت قصدك شنو
بس مرة الثانيه احجي وياي بصوت ناصي وفهمني بهدؤ
«،،،ماراح تزعلين
ابتسمت وردت
«،،،لا لان انت مثل اخويه واعرفك تخاف عليه
حجت هيج وطلعت من يمي بذاك الوكت ماضجت
من هالكلمه لان جنت احسها اختي الصغيره
وجنت اشوف نفسي مسؤول عنها
لان ماعدها اخ او اخت
عم فاروق جلب بيه على العشه لان تاخرت يمهم
تعشيت بجو كلش،،،،،حلو ليلى فكت من
يمي وكامت تحجي وياي عادي
من رجعت جانت سهام راجعه سمعت امي وابويه
رايحين معتذرين من خالي وراجعه وياهم
رغم مقداد ماراح عليها وهم رجعت
المشاكل بينهم جنت اتمنى
يطلكها يفك روحه منها
بس اعرف اخويه ماراح يسويها من ورة امي
وابويه ومن وره عيب الناس الي
راح ادكول اخذها كم شهر
وطلگها
الايام الي اجتي قربتني من بيت عم فاروق كلش من كامت خالتي تعتمد عليه بكل شي جنت مااضوج بالعكس
احب اروح يمهم لان حبيت جو العائله
والحنيه من عدهم تجاهي
اخر الشهر عم فاروق عزم اهلي وخالاتي وخالي
على عزيمه ذبح الها طلي ماكدرو يرفضون
لان هم تاخرو عليهم بالروحه
كلش وماعدهم بعد اعذار
رادني ويا بالعزيمه اني واخوتي طلعنا
من الصبح علي رحنا اشترينا طلي وجان
المسواك ماخذي قبل يوم رجعنا
كال من ربطنا الطلي
بالحديقه
«،،،بله جبنا الطلي بس منو يذبحه
«،،،قائد يذبحه
احمد جاوبه وكمل
«،،،اسطه بهل الشي
«،،،ها صدك
اي هسه اذبحه الك واكصصه
«،،،تمام عجل خلي اروح اجيبلك سجين حاد
«،،،تمام
مقداد راح يكسر ثلج للقواطي
والميخالتي رباب جانت بايته يمهم سالت
من طلعت من باب المطبخ
«،،،ماشفتو رهوفه
«،،،هسه طبت من الاستقبال
«،،،والله خلصت گلبي هي واخوها ابد مايكعدون
رجعت للمطبخ ادردم عم فاروق اجه شايل سجنتين كال
«،،،شوف ياهو الزينه واشتغل بيها
اخذتهن اثنينهن شفت الجبيره احسن من
الصغيره كلت
«،،هاي احسن بس جيبو صواني للحم من اكطعه
«،،،هسه اجيبهن الك
«،،،عم تسوي شوي مو
«،اي نص هيج ونص هبيط ههه اليوم الشوي
براسك انت ومقداد
«،،،ادلل عم احنا بالخدمه
اخويه الجبير جاوبه شكره
«،،بارك الله بيكم والله لو ما انت واخوتك
جان ماعرف شاسوي ولا ادبر حالي
«،،،بيك خير وادلل احنا ولدك وحزام ظهرك
شفته تاثر وكال
«،،الله يخليكم لاهلكم ويحفظكم من كل شر
من راح
ربطنا الطلي اني واخويه احمد ،،، حتى اذبحه
سميت اسم الله وذبحته كام
يطفر الدم
طلع من المطبخ يحجي
«،،،عالي يابه وجيبهن هنا
جنت ملتهي بالطلي مااحس غير صينيه
توكع واحد صاح
«،،،الله يابه
انداريت شفتها واكعه بالكاع وفاقده الوعي
ابوها يمها امها طلعت شافتها
صاحت
«،،،يممه شبيها بنتي
اخوتي راحو يركضون عليها
رحت وراهم خالتي رباب جابت مي غسلو
وجهها كعدت الوجه اصفر كركم وتباوع على الطلي
عرفت شبيها صرت جدامها حتى
ماتشوفه
«،،،شطلعج وانتي تخافين من هالشي
امها حجت وياها وكومتها هي وابوها الي كال
«،،،والله عبالي بعده ماذبحه
«،،،،بيج شي نوديج للمستشفى
مقداد سالها هزت راسها وهي مغمضه
اخذوها لجوه احمد كال
«،،،خرب حظج هاي تخاف من الدم
«،،،لا مو الدم هي تخاف من ذبحه الطلي
خاله رباب ردت وراحت وراهم
«،،،بله شايف هيج شي
«،،،،اي اكو هيج بشر عنده فوبيا من هالشي
مقداد رد على احمد الي ضحك واشر
على السجين بايدي وكال
«،،،،والاخ اجاها شايل السجين وتنقط دم شلون
فلم رعب
«،،،اسكت سخيف وامشي خلي نفضه
للمحروس النايم بالكاع
جاوبته ودفعته جدامي راح يضحك
ويقلد عليها
كملنا تقطيع من وكت لان جنت خفيف بالشغل
وراها طبينا حتى نتريك غسلنا ورحنا
للمطبخ خالاتي هناك ندى ورباب
وليلى الي رد لونها احمد
سال بضحك
«،،،ها شلونج يولي بعدج طيبه
ضحكت وردت
«،،،اي لقد نجوت باعجوبه
الكل ضحك اني ابتسمت هو كمل
«،،،كلت خطيه تاذت
«،،،لا مابيه شي
«،،،لا مو انتي الصينيه الوكعت من ايدج
خالتي رباب فحطت من الضحك وكالت
«،،،ولك مو هيج المشاعر راح تنجعص
«،،،،خايف على الصينيه مو عليه استاذ احمد
«،،،هههه لا والله خايف عليج انتي ماشفتي روحج
شلون اتمددتي بالكاع والوجه صار لوميه
لا ومن فتحتي لكيتي بوجهج
الاخ قائد وبايده سجين
تنقط دم
«،،،عفيه اسكت خلي انسى
«،،،اسكت احمد وخليها ساتره علينا
مقداد حجه ويا مبتسم هي باوعت عليه وسالت
«،،انت شلون تذبح يعني ماتخاف
«،،،،لااا
«،،،،گلبك قاسي
ردت هالرد ابوها طب وكال
«،،،يالله يله يابه خلي نتريك ونفك ريگنا
مثل كل مره تكعد يم ابوها تحجي ويا وتضحك
اشوف اهتمامه بيها وحنيته عليها
وهي هم نفس الاهتمام
والحنيه
اكلت شويه وكمت طلعت بره ادخن جكاره
تمشيت للحديقه الجانبيه سندت روحي على الحايط اخذ نفس واذبه
«،،،قاائد
سمعت صوتها جاوبت
«،،،هياني
اجت ليمي وكاالت
«،،،عبالي طلعت
«،،،لا وين اروح واكف ادخن جكاره
«،،،هاك كوب الجاي ماما دزته الك
«،،،تسلمين
اخذته منها كعدت يم نعناع منتشر بالحديقه
وكالت
«،،،خلي اگطع منه واخلي بالغده
هزيت راسي كملت من شالت باقه وكملت
مبتسمه وهي تشم بي
«،،،الله ريحته تخبل
اجت ليمي خلته يم خشمي تردد
«،،،اشتمه مو بله ريحته تجنن
من قربت مني صفنت بلون عيونها درت
وجهي وجاوبت
«،،،اي
اخذت منه كم ورقه وخليتها بالجاي
«،،،بابا هم يسوي هيج بس جان غسلته بالاول مرات اشوف بزون تكعد هنا وخاف تتمرض
من وراها
«،،،مايصير بيه شي لاتخافين عليه
رجعت تحوش نعناع وتجمعه بحظنها صفنت عليها
جانت مثل طفله صغيره تصرفاتها كلها
برائه كامت وكالت بضحك
«،،،ترست حظني نعناع
«،،،صرتي ليلى ام الخضره
«،،،هههه لعد راح ابيعلك الشده بالف شدكول
وياها هي بس جنت ابتسم وارتاح لسوالفها
جاوبت
«،،لا بربع
«،،،اممم قليل
«،،،عجل خمسميه
«،،،اتفقنا جيبها
مدت ايدها اليه تضحك
طلعت خمسميه من المحفظه وانطيتها اخذتها
مني وكالت
«،،،من تطلع انطيك شده نعناع
«،،،تمام بس سويها جبيره مو صغيره
«،،،ادلل من عيوني
مشت من يمي تضحك رجعت سندت روحي على
الحايط مبتسم هالراحه الجنت احسها
يمها جنت اشتريها بعمري
بس ااخ مادام هالشي
وطلع كلشي جذب
بجذب
رجعت للمستقبل من
حسيت بايد لزمتني وخرت سماعتي من اذني حسين سال
«،،،مانمت
جانت دنيا ليل وبعدنا بالجو جاوبته
«،،،لا ماجاني نوم
«،،،شكد بقى ونوصل
دحگت للساعه وجاوبته
«،،،ثلاث ساعات
«،،،تمام اكوم اروح اغسل وجهي واجي
راح من يمي ورجع وره دقائق كعد وكال
«،،،تعبت من الكعده
«،،الطريق طويل والدنيا ليل ارجع نام
«،،،شبعت نوم راح اشوفلي فلم تشوف وياي
«،،،لا مالي خلك اشوف اي شي
جان يعرف البيه وسكت التهى يشوف الفلم
رجعت سماعتي باذني وهم صفنت على الجامه
ورجعت للذكريات
بذاك اليوم اهلي اجوي وخالتي غزوه وبناتها وولد وخالي جاسم وابنه مهند هذا من زمان اني جنت مااطيقه واحد مغرور وشايف روحه فاشل بكلشي
لا فلح بدراسه ولا شغل ومعتمد على
خالي بمصرفه ،، جان مدلل
كلش لان هالواحد وي
خمس بنات
كاعدين وي الزلم بالاستقبال عم فاروق
فرحان بجيتهم وسوه ضيافه فخمه الهم اشوف وجهه خالي مكلوب ،،ويحجي بثگل وعبالك مسوي
فضل علي بجيته ابويه اعرفه كاعد يجامل
من كلامه رجل خالتي غزوه جان بسيط ومن اهل الله يحجي ويا ويضحك مهند كاعد
وملتهي بجهازه
ليلى طبت شايله صينيه مي جانت خجلانه
ابوها كال
«،،تعالي بنتي وسلمي على عمامج
«،،مااشاء الله حجي بنتك كبرانه وصايره مرة
الله يخليها الك
عم كاظم حجه شفت الخجل ترس ملامحها ابوها رد
«،،تسلم ابو جواد والله يخليلك ولدك وبناتك
ويحفظهم من كل شر
«،،،امين يارب
سلمت وبدت تقدم المي انتبهت من وصلت
لمهند ابتسم الها وكال بنظرات
اعرفها كلش زين
«،،بارد مو
«،،ها اي
ردت علي اخذه منها واتبعها بعيونه من طلعت
من يمنا من دار وجهه شافني صافن علي
ابتسم وسال
«،،،بعدك تشتغل عامل مصطر
ابتسمت نفس ابتسامته وجاوبته
«،،اي مو احسن مااظل كاعد ومصرفي على
ابويه
بلع لسانه وسكت ابويه خزرني مادرت بال
خالي جاوبني بضوجه
«،،،خلي يدلل عليه اني شعندي غير هالولد
عم فاروق حس بالجو توتر رد
«،،،الله يخلي الك ويوما تفرح بولده
«،،،امين
من زمان اني ويا مو حزب وياما كاتله من جنا صغار من وره لسانه الزفر وتجاوزه بالكلام ويايه
ووي اخوتي، ،،، جنت اشوفه
واحد تافه وعار بس عنده حظ
يم اهلي ويم خالاتي الي وين ماكعدن يمدحن
بي واولهن امي هم نفس حظ ابوه جان عنده
«،،،حجي هذا البيت بيش اخذته
ابويه سال عم فاروق
«،،،100مليون
واحد صفن للخ سالهم
«،،،يسوه مو
«،،،اي يسوه بالعافيه عليك وتشوف الخير علي
عم كاظم جاوبه بس ابويه وخالي التزمو الصمت
الجو جان مو جوي ولا احب اكعد وي
خالي لان جنت مااحبه ولا اطيقه والنوب ابويه
ويا كمت ترخصت وطلعت من يمهم رحت
للكراج وكفت هناك خالتي
رباب طلعت شايله قوري وكالت
«،،،،قائد خلي على الفحم الجاي يطلع اطيب
اذا تخدر علي
«،،،جيبي
اخذتها منها وخليته،،،وره مشوار
الغده صار تغدينا اطيب اكل لان هم
نفسهم،،،طيبه كلش وماقصرو بشي اشكال
والوان خلوه بالسفرة
شربت جاي بره لان ماردت اكعد وياهم مهند
طلع شافني انگلبت خلقته اجه
ليمي وكال
«،،،كاعد اشوفك ماخذ راحتك بيت عمتي عبالك
مو اول مرة تجي عليهم
احمد اي طلع سمعه جاوبه
«،،،غير احنا الي ساعدنا من اجه وقائد ظل رايح
جاي عليهم حتى يكمل شغل بيتهم
«،،،ها بفلوس مو
صفنت علي من رد هالرد جاوبته
«،،،ليش هم غربه حتى اخذ منهم فلوس
سكت يباوع للبيت ويتفحص بي كال
«،،،البيت جبير وفلوسه مو قليله سمعته مو كال
100 مليون
«،،،اي واحنا شعلينا
رديت بضوجه قرب يمي وكمل بحقد
«،،،هاي فلوس جدنا الي اشترى بيها هذا البيت
ابتسمت باستهزاء باوعت لاخويه الي غمه
من وره كلت
«،،،والله مدري شوكت نخلص من هالسالفه
الي جلبتو بيها واكثر من واحد برئه
منها وجدي بنفسه قبل لايموت
هو وجدتي كالو فاروق صاحب
فضل علينا والمعمل حگه
لان فك الدين عنه
وخلصه من السجن
مهند سكت كملت
«،،،،مو هيج الكلام تره اذكر انت جنت كاعد من صار هالحجي واني وياك واخوتي ومو صغار
حتى مانفتهم لا كبار واعيين يعني
من الاخر هالخير كله
اشرت للبيت وكملت
«،،،من تعب الرجال مو من ورث جدك
«،،،بس ابويه وامك يكلون ماكو هيج حجي
«،،خلي ينكعو بمي بارد كلامهم ويشربو بالف عافيه
جاوبته وذبيت الجكاره من ايدي دستها برجلي
ومشيت من يمه طبيت للمطبخ جانت
بس ليلى بي تمسح الميز سالتني
«،،تريد شي
«،،،جاي اذا اكو
احمد طب ورايه وكال
«،،،اني هم
كعدنا اخويه كال بصوت ناصي
«،،سمعته شحجه
«،،،مو وكته
ذاك طب وكال
«،،،بيتكم كلش حلو
ليلى خجلت منه ماردت كمل
«،،،وانتي كبرانه ومتغيره كلش
لاراديا كمت اهز برجلي هم ماحجت شي
التهت تصب الجاي كمل
«،،،ياصف انتي
«،،،سادس
«،،،علمي
«،،،،اي
جاوبته وخلت الجاي كدامنا كال مبتسم
«،،،واني هم اريد
«،،،،ها اي هسه اصبلك
كعد اگبالي يدحك للمطبخ دار وجهه
عليها هي جانت منطيتنا ظهرها خالتي ندى طبت
شايله صينيه كالت
«،،،مهند امك تريدك
«،،،شتريد
جاوبها بضوجه صفنت علي بعدين علينا
انتبه وكام لحيله غير لهجته وكمل
«،،هسه اشوفها شتريد
طلع من يمنا خالتي اجت وسالتنا
«،،،ياولد خما قصرنا بشي بالعزيمه
«،،،اي خاله اكو ملاحظات عليكم
احمد جاوبها مبتسم سالته
«،،،شنو ولك كول
«،،،هههه الجاي مابي شكر
ليلى ضربت كصتها وكالت
«،،،يااا نسيت اخلي قبل لااصب
«،،،هههه عابتلك عبالي بالاكل قصرنا
«،،،،ذابحين طلي شنريد بعد منكم
جاوبها يضحك وكمل
«،،،بس مرة اللخ نذبح مهند ونخلص منه
خالتي فكت عيونها وسالت مذهوله
«،،،،يا ولك ليش مو خطيه
«،،،خاله غثيث ومااحبه دمه بارد وثكيل
«،،،،لا ماما عيب تحجي على ابن خالك هيج
«،،،خاله لاتصيرين مثل امي وتكعدين تمجدين
بي هو واخوج تره نگلب عليج اني
وقائد
دحكت عليه مبتسمه كالت
«،،،سمعت اخوك شحجه
«،،،راح يكلج نفس كلامي لان هو ويا مو حزب
«،،،ليش
السؤال اجه من ليلى من خلت
شكر اليه ولاخويه رفعت راسي صافنه عليه
تريد جوابي مارديت لان خالتي
رباب اجت كالت
«،،،ندى تعالي راح يرحون خطارج
«،،،،يا بعد وكت ليش يريدون يرحون
«،،،يكلون تعبنا ونريد نروح لبيوتنا
«،،،تمام بس طلعي اللحم حتى ننطي الهم
«،،،،اي
الكل راح بس ظليت اني واحمد نسوي كم شغله
وي عم فاروق رتبنا الحديقه ونظفنا
الكراج كملنا وترخصنا منا ورجعنا
لبيتنا
ظليت ايام اسمع حجي امي وابويه على الشافو
بيته ونفس الربابه تكرر هذا من
خير ابويه
ليلى
جنت امشي وي غاده بالممر مال المستشفى
ورايحين للصيدليه،،،، دكتور
رواد جاي باتجاهنا من شافنا ابتسم
،كالت بصوت ناصي
«،،،هالدكتور ابد مو راحه
«،،،اي الظاهر هيج
قرب من عدنا سلم
«،،،،،صباح الخير
«،،،،،صباح النور دكتور
كملنا مشي كال
«،،،،ست ليلى
وكفت وباوعت علي قرب بس خله مسافه
بينا كمل
«،،،بلا زحمه عليج اريد ادويه للحجيه اكتبهن
الج واصرفيهن اليه
«،،،،عادي دكتور جيبهن شوكت ماتريد واني
اصرفهن الك
الوجه ضحك ورد
«،،،تسلمين راح اتعبج وياي
«،،،،،لا ماكو تعب هذا شغلي
رديت ومشيت من يمه جنت رسميه كلش وي
اي واحد يشتغل وياي وخصوصا الذكور خليت
حد فاصل بينا وماخليتهم يعبرو
طبينا الصيدليه والتهينا بالشغل ورة مشوار غاده راحت يم صديقه النا وعافتني
وحدي مره اجت وياها بنيه وجهها اصفر سلمت
وانطتني الوصفه
صرفته الها وكفت اكتب علي واعلمها
شلون تشربه من كملت سالت
«،،،يعني هذا تشرب قبل الاكل بس مره
باليوم وقبل الغده
«،،،،اي خاله
تنهدت وباوعت لبنتها كملت
«،،،،والله السادس راح يدمرها لبنتي
مارديت صفنت على بنتها كملت
«،،،،امشي ماما خلي نروح للبيت تاكلين
شي وتاخذين الدوه
من راحن من يمي رحت كعدت اجه بالي
شلون كعدنا بعقوبه وشلون
قائد كام يدرسني
ماجنا نريد نروح لهناك بس بابا تهدد من ناس
ورادو منه شدات حتى يعوفو بحاله
رفض هالشي ودزولو تهديد
بأيد ناس نفسهم
نصحو يشيل لغير محافظه حتى يخلص منهم واضطرينا نرجع لبعقوبه
اول يوم من شفت قائد تعارك وياي بس
بعدين تصالحنا وشفته الاخ الي انحرمت منه
جنت اريده سند اليه هو واخوته والبقيه
من ولد خالي وخالاتي
بس الايام ثبتت محد منهم جان سند وجنا
بوسط ذيابه واولهم هو بس اخوته محد منهم
اذانا
جنت بنيه صغيره عمرها 17 سنة همها بس
شلون تطلع من السادس بمعدل تفرح
بي هي واهلها
من استقرينا هناك جانت عطله الصيفيه بس
جان لازم ادرس واحضر للسادس
بابا سال مقداد عن معهد
تقويه زين ادرس
بي
اجه وي بابا واخذنا اله وسجلت بي جان وره بيتنا على الشارع العام وقريب كلش كمت اروح واجي
مرات بابا يوصلني لو ماما
بس هو انشغل بشغله من فتح محلات مال
مواد احتياطيه وماما يوم تروح وياي
ويوم ماتكدر لان عدها انزلاق
بظهرها
رادو اليه خط ماقبلت كتلهم اريد امشي وهو مو بعيد ورانا بس افتر من الفرع واوصله
بصعوبه قبلو ولازم اخابرهم
كل مشوار ومرات الكي
ماما تنتضرني
نرجع اني وياهم للبيت
واجهت مشكله وي ابو الرياضيات ماافتهمت علي
وهالشي حجته ماما لمقداد نصحها بواحد
بس بعدين كال قائد توب بالرياضيات
وطلع معدل عالي بي شوفو اذا
يكدر يجي يدرسني
هي خابرته وكال
عندي مجال اجي ادرسها بليل ورة العشه
وصدك كام يجي يوميا يدرسني هالشي قربني منه
بس ماجان بالي الحب
ولا باله هو،،،، كاعدين بالاستقبال كتبي
كدامي شرح وبعدين
سأل
«،،،،ها افتهمنا وصلت المعلومه
«،،،يس والله انت تشرح احسن من استاذ
خالد
ابتسم ورد
«،،،،الحمد لله من انفكت الجبسه
«،،،ههه عبالك جنت تعاني مني
«،،،،شويه مو جثير
باوعت عليه بزعل كال مبتسم
«،،،،ها اشوفج ادحكين عليه وعبالك زعلتي
«،،،،عرفت بروحي راح اتعبك واضوجك
«،،،ماكو تعب ولا ضوجه بالعكس اني اضوج
اذا مااكدرت اوصلج المعلومه
باوعت علي باعجاب وكتله
«،،،تدري انت نابغه بالرياضيات
ابتسم كملت
«،،،والله شبيك يعني ماكو شي صعب عندك
«،،،،الواحد من يحب ماده يبدع بيها
«،،،ابجي اني مااحب الرياضيات عقدتي بيها
«،،،بس درجاتج زينة بالخامس
«،،،،اي بس اريد ميه مو ثمانين
«،،،اذا هيج تريدين شدي حيلج حتى تشوفيها
للميه
«،،،بس انت خليك وياي حبابه تره اضيع
بدونك
«،،،وياج للوحه
«،،،هههه هاي شنو لوحه يعني صبوره
«،،،،هههههه
ضحك بصوت صفنت علي وهاي اول مره اسمع
ضحكته ابتسمت وكلت
«،،،والله طلعت تعرف تضحك
مسح وجهه بس ظل مبتسم رد
«،،،غبيه لوحه يعني هاي مال الميتين
«،،،،يمه اسم الله بيش طالبني بعدني صغيره
وماشبعت من الدنيا
«،،، هذا مثل
«،،،،،،،هم لادكوله لا عليه ولا عليك يمه اسم
الله عليك بعدك شباب واني صغيرونه
سكت وصفن عليه بعدين دار وجهه سالته
«،،،،،ها شبيك بيش تفكر
«،،،،ماكو شي هسه كملنا ولازم اروح
«،،،لحظه اكل من هاي الكيكه اني سويتها صح
تفلشت بس طعمها طيب
ابتسم ورد
«،،،انتي مكانج مو بالمطبخ
«،،،ليش عيني تره كلشي اعرف بس هاي خربت
لان ست ندى فتحت الفرن عليها
«،،،ها يعني الصوج من خالتي
«،،،اي نعم
شلت الماعون وخليته كدامه توسلت بي
«،،،اكل حباب واجبر خاطري
«،،،،راح اكل بس هاا ماراح اجامل اذا مو طيبه
اكلج شيليها وذبيها بالزبل
خليت لكمه بحلكي وجاوبته
«،،اااي
اكل اباوع علي هز راسه وره لحظه
وكال
«،،،صح هي طاكه روحها بس والله طيبه
«،،،شفت كتلك طيبه
اكل قطعتين وشرب ببسي ماما طبت سالت
«،،،ها كملتو
«،،،اي ماما وافتهمت والله قائد طلع مو شويه
بالرياضيات يفهم احسن من استاذ
غبي
«،،،ولج عيب تحجين هيج
«،،،،خلي،يروح مسوي روحه نابغه يكعد يشرح
الماده ساعه ويترس الصبوره من فوك لجوه واحنا
كلشي مانفتهم علي
«،،،اكو استاذ مايكدر يوصل الماده بصوره صح
للطالب
جاوبني وكام ماما كالت
«،،،هاي وين رايح اكعد تعلل ويانا
«،،،لا خاله اروح لان ورايه كعده من الصبح
بابا طب وكال
«،،،اكعد يابه اريد احجي وياك بموضوع
من كعدو كمل
«،،،شنو رايك تجي تشتغل عندي بالمحلات الي
فتحتهن
سكت مارد بابا كال
«،،،انت تعرف اني مااثق بالغريب وما امن على فلوسي
يمه والمحلات بيهن خير من الله واريد واحد
يوكف وياي بيهن من اروح بشغله امن
مايصير شي من ورايه
«،،،،قائد ماما الشغل الي راح تشتغله وي عمك
احسنلك من شغل العماله
رد
«،،،شوكت تريدني اطلع للشغل
بابا فرح هو وماما جاوبه
«،،،باجر ساعه تسعه تعال للمحلات انت تندلهن
وجاي عليه مره
«،،،،تمام
«،،،وشهريتك راح تكون خير من الله لان انت راح
تلزم الشغل كله وتصير المسؤول
«،،،،تسلم عم اعرفك ماراح تقصر بهل الشي
وهسه اترخص لازم اروح
«،،،،لا والله ماتروح الا تظل تعلل يمنا وتاكل
كنافه بالجبن شلونها طيبه وتموع
بالحلك
بابا حلف علي ظل يمنا كعدنا بالصاله هو يمه
يحجي ويا على الشغل جانت
عيوني تروح اله
اشوفه شاب عادي اسمر ضعيف وطويل
دمارات ايده مبينه من الشغل الصعب الجان يشتغله مو معتني بنفسه يعني
مو مثل مهند اخوه احمد
حتى مو مثل مقداد
ذولاك جانو يجون لابسين بنطلون وقميص
لو تشيرت يعني كشخه ومرتبين
هو جنت اشوفه لابس سروال مال اكراد وقميص
عادي وقديم وهالشي مره كتله بي
بنص الدرس وره ايام
سالت
«،،،قائد
«،،،،ها ليلى
«،،،اسالك سؤال بس اتمنى ماتضوج مني
«،،،،خير شتريدين تسالين
«،،،يعني انت ليش ماترتب روحك مثل مهند وو
سكتت من عكد حواجبه وباوع عليه بتركيز
ماكملت هو كال
«،،،،ليش شبيه اني مو مرتب
«،،،،ها لاا بس يعني كل هدومك قديمه ومو جديده
رجع ليوره وجاوبني بروده
«،،،مهند يجي لهنا
«،،،،مرات ليش تسال
دار وجهه لغير جهه بعدين كال
«،،،لاتنطي وجه من يجي تجنبي ليلى
تفاجأت من كال هالكلام سالت
«،،،،ليش اكو شي اني مااعرفه
خله عيونه بعيوني هالشي وترني كلش جاوب
«،،،بس اسمعي كلامي ومن يجي لاتكعدين ويا
افتهمتي
جنت اسمع كلامه ومااجادله باي شي لان شفته
يخاف عليه ومهتم لامري كمل
«،،،بالنسبه لهدومي اني مااصرف على نفسي
تدرين بيه اريد اهاجر
بذاك اليوم من سمعت منه هالشي حسيت
بحزن لان تعلقت بي جاوبته
«،،،،،يعني ماراح تبطل من هاي السالفه
«،،،لااا
رد مختصر سكتت ماحجيت بعد شي رجع
يشرح اليه وظلينا ايام هيج يشتغل وي بابا من
الصبح للمغرب يروح لاهله ويجي
وره العشه ندرس ثلاث
ساعات
غاده طبت هي وداليا وطارت الذكريات
كملنا 2
الظهر رجعنا نزلنا بشارعنا هي راحت
لبيتهم واني طبيت بيتنا
بابا جان بعده مو جاي
تمشيت بالكراج ،،،،،رحت للمطبخ
ماما ماكو بس سمعت
صوتها بالصاله
مشيت كم خطوه وكفت من سمعتها
كالت
«،،،،هي الكم ماتصير لغيركم
شكرا لزيارتكم عالم روايات سكيرهوم
