رواية جراح قلبي الفصل الثالث بقلم جوهرة
اللهم لك الحمد كما ينبغي لجلال وجهك وعظيم سلطانك
ـــــــــــــــــــــــــ
رانيا / مو المفروض تاخذنا تونسنا رايح للصيد الجهال يردون يطلعون ، وانت حاير بروحك تتونس وهسة تريد اجهزلك للطلعة !!!!
معتصم / ترى صدعتي راسي من البارحه ارجعي انخمدي ماريد منج شي اني اخدم روحي
مدت أيدها بالكاب جره ولبسه ثبته براسه .. كعدتي صهيب يريد يجي ويانة
رانيا معجبها / الولد نايم ساعة تلاثة ونص الفجر وين تريد بي
خزرها ونتر / ولي كعدي ابنج لا تعصبيني
طلعت لغرفة ولدها كعدت صهيب رأسا فز لأن على باله الطلعه راح توضى حتى يصلي الفجر
ورانيا رجعت لغرفتها ادردم معترضة على روحتهم لأن ايام عيد رادت يطلعون يتونسون هي والجهال
كعدت عالجرباية وعينها على معتصم جان يلبس حذائه
رانيا / والله بطرانين شيكول صعب تايدونه رجال عزابي لا مرة ولا جهال
انتم وراكم عوائل يعني خلص العيد وما طلعتنا
التفت عليها / انتي هذا اليهمج اهم شي تطلعين
رانيا / لعد غير اونس روحي ترى مليت والله
معتصم / من شنو مليتي بلة باقية بدون مصرف لو قصرت وياج بشئ لو مامهتم بيج احجي ليش سكتي شو انتي مدللة
هاي بدل متسمعيني كلمة حلوة من الصبح كاعدة تلغين
عافها وطلع وأخذ سلاحه وياه كسرية صيد وصهيب نزل وياه / يابة امي هواي تتشكى لا تضوج منها
حظن ابنه وباس راسه / ما ضوج منها ابني تعودت على سوالفها
نزلت وراهم عينها عليهم صعدوا بالسيارة وطلعوا راحت سدت باب الحوش ورجعت قفلت باب المطبخ لأن كلها نايمه صعدت لغرفتها تنهدت وهي ضايجه لأن جانت مخططه يطلعون لبغداد
جانت طلعة الشباب على جهة (العظيم) مناطق حلوة ودوم يتصيدون بيها بس ماراح يبعدون لأن منتشرين جيش وموجودة عمليات عسكرية
وية الشروق الشمس بدى صيدهم وجمعوا خوش طيور دراج بمساعدة كلاب صيد اثنين لصديق صعب اجى وياهم
صاح عليه صعب / ارشددد تعال يمعود لاتروح بعيد
ارشد / اجيت شبيك بس والله خوش صيد بهاي الكسرية
صعب / اي والله تستاهل الدفعته بيها .. أكلك صارت الساعة تسعة خل نرجع الجو حار
ارشد / اي احسن هو غير انت خبصتني نطلع نتصيد اني مأجلهن عالشتا حتى نشعل نار ندفى ونشوي دراج هههه
صعب / ابو كرش همك على بطنك
اشرلهم حذيفة جان كاعد عالحصير وترمز الجاي وحافظه بيها لفات كدامه وحافظة تمر
كعدو كلهم واياد وزعلهم لفات وجاي تريكو وانسدحوو بفي الأشجار والسيارات
شرب صعب كوب الجاي وأشر لأياد .. صبلي بعد
ارشد / والله ابو ملاك معدل خوش مرتب الريوك
التفت حذيفة على أرشد الي كاعد ياكل لفة / والله يخوي عاشت ايد الحضرت ورتبت اني بس شلتهم ذبيتهن بصندوك السيارة
ارشد / اريد هيج وحدة ام بيت معدلة
معتصم بفخر / اخيتي ام ملاك والنعم منها والله دومها تبيض وجه بعدين شعندك تجمع نسوان شو متزوج وجهال اثنين عندك
ارشد بضحكة / كمت اغار من حذيفة ومرته
معتصم عينه على صعب من حجى وتذكر رانيا ولغوتها الفجر حتى مافكرت تحضرلهم شي ياكلونه
عكد حاجبه وصعب لاحظ هالشي وتوقع ضاج لأن حجى بطاري علا كدام أرشد
كام راح لسيارته وصاح معتصم
تمشوا مسافه حتى ميسمعوهم التفت صعب شافهم بعدهم ملتهين بالاكل / معتصم ترى أرشد صاحبي من زمان وانت تعرفه وتعرف أخلاقه مايقصد شي وحذيفة يدري بي متشوفه مامهتم
معتصم / صعب الرجال ماحجى شي يزعل بس اني ضوجتني رانيا يعني كعدنا الفجر تلغي عالروحه تريدني اطلعها اونسها ليش اني مقصر منها بشي بس هي ميعجبها العجب لاتزعل عليها بس فعلا مرات تخليني عصبي
صعب / تعلمني بيها من جانت عدنا هاي تصرفاتها مترضى على شي ولا يعجبها العجب
معتصم / صعب اني احبها واحترمها بس الصراحه مو مثل قبل علاقتنا لأن أحسها مرات باردة ، يعني قبل جانت تعترض بس قليل هسة لا بكولشي معترضة وتتحجج
صعب / انت سبع وتكدر عليها لاتنطيها عين خلك دوم ضابها
معتصم / هههه كون تسمعك شيخلصك منها .. تدري صعب رانيا مجانت هيج بس هاي الثلاث سنين تغيرت بعدما سوت عملية وفقدت الطفل وبعد مالها فرصة تحبل هذا يأثر على نفسيتها
والله ماجاي احسسها بشي ولا على بالي اضايقها هي الماجاي تنسى
صعب / الله يهديها إن شاء الله
ارشد / شبااااب وين رحتو شنو بيناتكم اسرار ومندري
رفع صعب أيده الهم ورجعو هو ومعتصم
سحب معتصم حافظه التمر وكعد ياكل وانطى صهيب / هاك بابا اكل
صهيب / شبعت ماريد
صعب / يلة خل نتوكل أرشد ترجع السلك( كلاب صيد) بسيارتك
ارشد / ولك صعب ماتبطل سوالفك تخليني اجيبهن وياي واستفاد منهن وترجع تحجي علية
صعب / ولك ثبرتني بيهم
رد حذيفة / والله زين سويت شفتهن شلون يرحن مطزعات من يوكع طير بالدغل والحلفا مايتيهن ابد
صعب / ديلة ارفع ارفع معنوياته هو غير راح يكرع راسي
رجعو بعدما قسمو الصيد بيناتهم وجانت رجعتهم قريب الساعة 12 الظهر
ــــــــــــــــــــــ
بيت العمة ايمان/
صفا / اليوم عزمت نفسي اتعشى يمكم
شلونج عمتي حبيبتي
ايمان / هلة صفوة شلونج بنيتي
صفا / الحمدلله اكول عمة شو ماكو لينا
ايمان / بغرفتها فوك جانت تحضر ملابسها لباجر
صفا / بابا كال رهمت عقد محكمه هم والاثنين يعقدون
ايمان / الله يسهل ويبارك يوم الي نفرح بيج
صفا / ان شاء الله يارب ويتحقق الي على بالي
ايمان مبتسمة / وشنو على بالج ولج بس لا تحبين وماندري بيج
صفا / هههه يووو عمة تعرفيني ماعندي هاي السوالف
ايمان / ممم كولشي بوكته حلو بنيتي وقسمتج الله يعلم وين راح تصير
دك موبايل ام سما فتحت خط / هلة عمة هلة بيك صدك تحجي اشكال اسويلك هههه يلة انتظرك لعد
سدته وصفا سألتها / منو راح يجي
ايمان / صعب يكول مشتهي كبة راح يجي يتعشى هنا
صفا / خل اساعدج لعد بالكبة
ايمان / مشكورة حبيبتي عندي بالمجمدة دوم أسويها ادري بالولد يحبونها هو راح يجيب ويا مشاوي وصلاح يجي هم
صفا / هاا خوش لمة راح تصير بقت سما
ايمان / اي والله خل اخابر صلاح يجيبها
صفا بداخلها فرحت لأن راح تشوف صعب تريد تاخذ راحتها بالحجي وياه بس لو صلاح مموجود جان احسن لان ميقبل تكعد يمهم من يتجمعون شباب بيناتهم
انتبهت على عمتها سدت موبايلها خابرت سما
ايمان / تكول حتى صلاح ميكدر يجي لأن عنده شغل بالمستشفى على غير مرة يجون
سكتت ماحجيت وبداخلي فرحانه لأن راح اشوف صعب .....
نزعت حجابي الشال وذبيته عالقنفه بالهول وعباتي الإسلامية نزعتها بقيت بدشداشتي ماروني نص ردن كولش حلوة علية
صفا / عمة اني صاعدة يم لينا
ايمان / براحتج بنيتي
لينا لاكيتها عالدرج نازلة سلمت علية / هلو صفا شلونج
صفا / هلو لينا شخبارج باجر ترحون تحللون دم
جرت حسرة وذبتها / صفا فدوة لاتحجين بهاي السالفة
جربتها من أيدها ورحنا بالهول كعدنا / شبيج المفروض تفرحين اصلا ايهم شاب يجنن حلو وكشخة ااخ على حظي هسة مو زين راح تتزوجون
لينا / صفا ايهم ميريدني ممفكر بية شلون اقبلها على روحي وهو اي كلام مايطيق يحجي وياي
صفا / والله ولد عمي مخابيل بنات عمهم جمال ودلال وهمة مدري وين بالهم عيونهم عميانة من عدنا
المهم انتي صيري سباعية وتكدرين تخلينه يتعلق بيج
صاحتنا عمة ايمان رحنا للمطبخ سوت حشوة وكاعده تلف سمبوسة
كعدنا نساعدها إذن المغرب خلصنا وضمينا صواني بالمجمدة وبقت صينية سمبوسة للعشا
ايمان / يلة اروح اصلي وراها نحضر العشا
ورى شوية واكفه اكلي كبة وسمبوسة وعمة ايمان بالهول ولينا كاعدة تثرم زلاطه دخل صعب بيده علاكه سلم علينا وذبها عالميز ودخل جوا
صاحت عمتي / بنات جيبن مي بارد هنا
اني رأسا نصيت جوا الطاوة ورحت فتحت الثلاجه طلعت بطل مي وكلاص
كاعد يسولف وية عمتي انطيته مي بالكلاص أخذه مني وعينه بعيني اني مانزلت عيني اويلي عليج صفا لو بس يحن شوية شنو هالثكل هذا
ابتسمت تك خد هو شرب ورجعه طلعت واني احس روحي طايرة رحت كملت العشا وية لينا
وأخذنا السفرة مديناها بالهول
لينا / اكلج صفا مو تحسين عيب هيج لابسة كدام صعب
صفا / لينا حبي عوفي هاي السالفة ترى صعب مو شاب ملطلط تراه هيبة وثكل
تعشينا سوية وكعدتي تعمدت قريبة عليه ادري ممهتم نهائى بس شسوي گلبي هاوي
ورى العشا من كملنا غسل المواعين
رحت يمهم ..
صفا / عمة اريد احد يوصلني لبيتنا
سحبت عباتي وشالي جانو بصف صعب ولبستهم وعيني عليه مسوي روحه يباوع للتلفزيون
ايمان / يمة صعب ماتوصل بنت عمك
صعب / يلة خل تتحضر
كام وأخذ سويجه وموبايله / مشكورة عمة الكبة والبورك حيل طيبين يلة فيمالله
ايمان / الف عافية عيوني
صعدت بصفه ليكدام ماحجى تعمدت أمد أيدي افتح اغاني طلعت اغنية جذابة انتي للأسف هيثم يوسف يمكن يحبها ليش مخليها مدري
صفا / الله حلوة هاي الأغنية
مد أيده وسده / صفا اثكلي ترى اعرف شتردين
تنهدت / صعب ممسوية شي انت ابن عمي واحترمك واا...
سكتت ماريد اعترف بحبي خفت يفشلني
صعب / على راسي بنت عمي واختي غير هذا لا تتخطينه
فكيت عيني اراقبه يسوق ممنتبه علية شكد احبه يربي شخصية ورزانة وهيبة ومن يعكد حاجبه يطلع شكله يجنن
هاي احسن فرصة حتى يعرف مشاعري ترددت احجي اخر شي ماتحملت ..
صفا / صعب انطيني فرصة ليش هيج صعب وياي ليش تعاملني بخشونة
التفت خزرني ورجع عينه عالشارع وبصوت خشن ..
صعب / جنج ماتفهمين كلامي يا بنت من الاخير اكولها لا تفكرين اتزوجج لأن ممفكر اتزوج ولا راح أسويها نسوان خاينات ماكو
وحدة تستاهل اربط اسمي باسمها
ضجت من كلامه / هاي شبيك ترى عيب تكول نسوان خاينات لان مو كل أصابعك سوى
اكو الزين واكو الشين
التفتت على جهة ثانية زعلانة من كلامه وهو هم ماحجى بعد وصلني للبيت نزلت بسرعة ولطخت باب السيارة بقوة ودخلت البيت
صعب /
عصبتني الحقيرة شلون سدته للباب على أساس ضايجه من كلامي خلها تفهم زين اني مراح اتزوج شلون جريئة ماتوقعتها هيج تحجي وياي
ــــــــــــــــــــ
لينا /
كاعدة افرك بيدي ننتظر ندخل عالقاضي يعقدلنا لأن عمري يسمح دخلت السن القانوني
وياي عمة ايمان وعمو عبدالله ولده حذيفة وصعب مارفعت راسي من اجى ايهم وكف كدامي عيني بالكاع اسمعه يحجي وية عمة ايمان ..
ايهم / ليش هيج لابسة شنو رجليها طالعات
اسمع عمة ردت .. ايهم لا تبقى تتحجج مابي شي لبسها نفنفوف ومحتشم
ايهم / دشوفي المحتشم نص رجليها طالعة بيض يلهثن ليش مالبست جبة !!!؟
ايمان / خرب حظي انت لو انطحه لو اكسر مخه ترى هاي مناسبة لازم البنت تكشخ اكول انت ليش متروح تستعجل القاضي صار ساعة كاعدين
ايهم / وشعدنة اول تالي متصخمين هي براسي قابل راح اخلص
ايمان / استغفر الله شأحجي هسة خل اسكت
محد حجى بعد بس شنو اني داخلي بركان يريد ينفجر بس استحي من عمامي وولدهم يعني يحسسني هالأيهم هذا اني مفروضة عليه ويعاملني مثل المرض الي يحاول يبعد عنه شكد خبيث الا يسمعني كلام يغثني
صاحو اسمائنا ودخلنا وية الشهود الي كانو حذيفة وصعب جنت اتمنى خالو موجود لأن حيل ارتاحلة قبل يومين خابرته وحجيتلة الصار بس ماكلتله غصبوني على ابنهم ماردت يأخذ نظرة مو حلوة على عمامي بالبداية اعترض وكال راح احجي وية ابو حذيفة ونصحني ما استعجل حتى لا اتندم وبالفعل طلع متصل على عمو عبدالله ومقنعه الزواج لمصلحتي
عقدنا ورجعنا لبيت عمو عبدالله الغدا يمهم الكل باركولنا والهلاهل والجوكليت رغم عمة ايمان ماقصرت بالمحكمة هلاهل واطش جوكليت
الاتفاق جان يشترولي ذهب ثاني يوم والكعدة مالت المهر والعقد بعد يومين بس ايهم اعترض على كولشي ماقبل على كعدة بس يشتري ذهب وبيوم الحنة يلبسني بس عمة ايمان ماقبلت الا تسويلي كعدة
،،،،،
العمة ايمان /
فدوة للوجه الحلو هذا اجننين طالعة ولج سمااا ربى وين صرتن يلة جيبي المبخرة
سما / هاج ماما ترى والله ميحتاج انوب اطيح شرارة على البدلة
ايمان / جيبي لاتبقين فاهية
بخرتني وهي تقرأ المعوذات علية واني ساكتة مقهورة لأن كولشي مو على هواي واقع انفرض علية وانا لا حول لي لو بعقل هسة جان مصار الي صار وجان بعدني حرة نفسي
الحمدلله على كل حال
كعدة المهر جانت بس العمام وكم وحدة صديقات عمة ايمان وجيرانة اجى ايهم لبسني الذهب الي البارحه اشترينا صح كلها تعجبت بي وعجبهم بس اني مجان مالي عيني اي شي والسبب ايهم يعاملني بحقد ويتعمد يحرجني بأي شي
لبسني الذهب بسرعة وكام يريد يطلع عمتي ام حذيفة حجت وياه يبقى شوية ماقبل حتى ماباوع بوجهي جنت كولش محرجة يحاولون يواسوني مشغلين اغاني ويركصن البنات
بالليل بفراشي شبعت بجي كلما اتذكر شلون احرجني وما قبل يبقى يعني كل هالجمال والاناقه الجنت بيها ماعاجبه حتى ماسمعني كلمة حلوة عضيت شفتي وعيني على موبايلي رقمه مخزنته بموبايلي اتصلت بي جانت الساعة 11 ردت أفرغ قهري بالاتصال لأن ما اكدر احجي وياه ماعندي جرأة وجه لوجه
دك كم مرة يلة فتح خط وبصوت هادىء .. الو
ارتبكت ما كدرت ارد
ايهم /؛منو وياي الووو
لينا / هاي اني ... حجيت بصوت ناصي
ايهم / منووو
/ لينا
ايهم / لينا شعندج متصلة اكو شي بيج شي ؟!!!
انصدمت والله من سمعته هيج حجى بكل برود
زين اني ليش سلبية ليش ما احجي / ايهم إذا متريدني عوفني
ايهم / ههه صدك تحجين بعد وكت طلع لسانج هسة ليش مارفضتي من البداية بقيتي ساكته
سكتت مارديت لأن كلامه صحيح اني الي ساكته من البداية وسمعتلهم من جانو يقنعوني
رغم ادري بي مايحبني بس اني قبلت داخلي جان قابل عليه
ايهم / ماتحجين ؟؟!!! لو متصلة حتى ترفعين ضغطي
سديته بدون ما ارد وادري راح يعصب أكثر وفعلا رجع اتصل قفلت موبايلي بسرعة
،،،،،
جهاز العرس كمل خلال أسبوع عمتي ايمان وياية ورانيا بنت عمو عبدالله ، ايهم ولامرة اجى جان صلاح يوصلنا لو اياد وهالشي جان يسببلي احراج وخاصة من اشوف عرسان يلاكونه بالمحلات شلون يجهزون وفرحانين واني حتى هالشي ماحاسته الفرحة بعيدة عني
گلبي بعدما يتحمل هيج مذلة قررت ما اروح وياهم عمتي حجت علية كلتلها خلاص انتم بكيفكم هو من البداية بكيفكم
اااخ من اتذكر شكد جنت سلبية اكره روحي ، جنت غشيمة وما اعرف اتصرف
ــــــــــــــــــــ
رانيا اتصلت على زوجها / باجر العرس ومحلوة ماتحضره أخذ إجازة وانزل
معتصم / رانيا هسة انتي متصلة تطمنين علية لو تردين تكشخين بالسيارة وكت الزفة
رانيا بعصبية / صاير متنجرع بس تحب تفشلني وشكو بيها اذا كشخت وية رجلي حبيبي
معتصم / ايباه لا مابيها شي تخربين عالمظاهر
رانيا / يووو معتصم عليك الله انزل اليوم
معتصم / ههههه لج بابا نزلت هسة اني بمدخل المحافظه
رانيا بفرحة / فدوة صدوك تحجي يعني نص ساعة انت هنا
معتصم / اي حضريلي غدا طيب ترى ميت جوع
رانيا / تدلل حبيبي شلون بامية على لحم اطيب شي
معتصم / يلة عود من اجي كثريلي من هاي الرومانسية مال حبيبي
رانيا / ههههه ما ادري حسب الموقف
معتصم / لا قيم الركاع
سديته من معتصم وذبيته عالميز ونزلت جوا احضرله الغدا ساعة ثنتين واكيد جوعان
اليوم بالليل حنة ايهم راح يسووها أبيت اهلي
كولشي جاهز وقبل يومين غرفة الاخشاب وصلت ونصبوها بالغرفة ورتبناها وطلعت اتخبل
وصل معتصم الحمدلله وحضرتله الحمام سبح وصلى وكعد يتغدى بالهول ادحك على الولد محاوطينه كولش متعلقين بي خاصة رونق
ابو معتصم / اكول يابة عمك سامي ماكال شوكت يجي
معتصم / ما ادري بس كال متحضر اجي للعراق بعدين ماصارله جم شهر من اجى ما اعتقد هالفترة ينزل
ابو معتصم / والله هذا مدري شلون متحمل الغربة
معتصم / يابة متعود بعدين هواي عراقيين هناك شنو رأيك ايهم يريد يروح يشتغل وياه
ابو معتصم / له صدك تحجي ويعوف شغله هو وصعب
معتصم /؛والله هذا الإدري بي صعب حجالي
رانيا / اي عمو صدوك وابوية بالبداية ماقبل بس من شافه راغبها الشغلة قبل وخاصة جان ضاغط على ايهم بالزواج فماحب يكسر خاطره
ابو معتصم / هذا ايهم مايفيد بي دوم داك عناد كله من ابوج دللة زايد
معتصم / كومي رانيا جيبي بعد مرك شوفي ولدج ميتين جوع هههه
رانيا / هههه والله تغدو بس يحبون يأكلون وياك
معتصم / خلهم بالعافية شعندي غير وليداتي
ام معتصم / يمة لا تبقى تحضن بيهم كل واحد شكبره صاير
معتصم / هههههه ها حجية هسة رونق تزعل عليج
رونق بنعومة / لا احب بيبي ما ازعل
ام معتصم / فدوة لحبيبتي هاي درة وحبوبة محد يداريني غيرها دوم تتفكدني
رجعت رانيا بكاسة جبيرة مرك باميا وكرصة خبز ثردتلهم بالماعون الجبير وضافت المركة
كملت الغدا ورحت اغسل أيدي من رجعت دك موبايلي صعب يتصل جاوبته جان عصبي لأن ايهم ميقبل يسوون حنة ومتعاركين ورايد يضربة لوما حذيفة واياد يتدخلون
رديتله راح اجي للبيت سديته وطلعت لحكتني رانيا بكوب الجاي
رانيا / وين ..الجاي انت تحبه رأسا ورى الغدا
معتصم مستعجل / مو وكته والله خل اطلع
رانيا / معتصم توك وصلت وين تريد
معتصم / يعني الا تعرفين خل اطلع لا تأخريني
رانيا / شغلتك مو خالية وين تريد ؟!!!
التفتت عليها / صدك تحجين شنو مو خالية بابا كبري دماغج لا تضوجيني وحتى يكون عندج علم اخوتج متعاركين ايهم ميقبل يسوي حنة
رانيا / صخام بس لاسوالهم هوسة
معتصم / مدري خل اروح لا تأخريني
أبيت عمي عبدالله بالمضيف صياح ايهم مغطي على أصواتهم عصبي نار لأن صعب متعارك وياه مرزلة وهو يحترم صعب ومايكدر يرده كام يصيح وصار عصبي
ورى ماسلمت عليهم التفتت على ايهم / هسة انت شتريد
نتر بعصبية / ابو صهيب خل يعوفوني لا يتدخلون وياي ترى طاكة روحي مجاي اتحمل كلمة
غمزت للولد / خلاص التريده يصير وانت هم على كيفك اهلك يردون يفرحون بيك
ايهم / حنة ماكو وإذا سووها ما أحضرها
معتصم / هاي هي يسووها ولا تحضرها ايهم العالم شيكولون علينا بعدين انت ما ينطيك گلبك تكسر بخاطر اهلك هسة اني نزلت علمودك شنو مالي اعتبار
ايهم / على راسي ابو صهيب غالي والله العظيم
معتصم / لعد اني اريد حنة اريد العب جوبي من زمان مالاعبينة
ايهم خزره / اكول ترى قبل شهرين عرس صلاح وشبعت جوبي
معتصم / ههههه ديلة وانت شكو !!! بكيفي
بالاخير كدرت اهديهم وبقيت للمغرب بعدها رجعت البيت لكيت عمتي أميرة ام غزوان مسيرة علينا وبقيناها عالعشا واستمرت سهرتنا لنص الليل بعدها راحت اجى غزوان اخذها
ساعة 12 ونص اتصل صعب / باجر اريدك وية ايهم هذا راح يفشلنا
معتصم / عوفه علية ماعليك بي وانت هم رأسا تصير عصبي يمعود عامله بحيلة لما يخلص العرس
صعب / والله معتصم مالي خلك اداري خواطر بزعان من كولشي
معتصم / ها بزعت مو اني حجيتها قبل فترة وانت كلبت خلقتك
صعب / لا تفتحلي موضوع دخيلك يلة راح اسدة تصبح على خير
سدينه وصعدت لغرفتي انام ادري ينهزم من افتح موضوع الزواج وياه
مدري لشوكت يبقى هيج والله مرات انقهر عليه اعرفه داخله قهر جبير
مرت حفلة الحنة بسلامة ماصار بيها حدث لأن معتصم كدر بكل هدوء يهدي ايهم حتى سحبه وياه بالجوبي بس ماقبل يدخل يم النسوان يحني العروس رغم حجي عماتهم الي ضاجن من تصرف ايهم وعمتهم ام غزوان كعدت تقصف بي مارد عليها طلع من البيت برا بالحديقة يم الشباب
وبيوم العرس جانو مسوين عشا وعازمين هواي عالم وجايبين طباخ يطبخ العشا
زفو العرسان بسيارة معتصم رانيا بالصدر كاعدة بعد اخت العريس وكاشخه وية رجلها
صفا جانت تريد فرصة حتى تصعد بسيارة صعب التفتت من طلعت السيارات بعدما اجو اخذو العروس من بيت عمتهم ايمان الي قفلت البيت وصعدت بسيارة صلاح زوج بنتها،،
صفا
لمحت صعب كاشخ بقاط اسود وقميص سماكي واكف يريد يفتح باب سيارته يصعد راحت تمشي مستعجلة والكعب العالي كوة مسيطرة بمشيتها ..
صفا / شنو راحو محد انتظرني
التفتت عليها صعب وخزرها لأن لبسها جان ضيك ومخصر جسمها ميدري شلون اخوتها ماشافوها ..
صعب / هسة اخابر مصطفى يرجعلج
صفا / شنو ؟!! وانت ليش متاخذني بسيارتك
صعب / اكول انتي ما استحيتي تطلعين بهذا اللبس
صفا / ترى لبسي مابي شي
صعب خازرها / اي لازم عاجبج
صفا مبتسمة / كولش والدليل لفت انتباهك
صعب رفع حاجبه / وانتي هذا التردينة يلفت انتباهي لعد خل يكون بعلمج احتقر هذا اللبس
صعب /
فتحت موبايلي اتصلت / تعال ارجع ناسين صفا مصاعده
صعب / لا بشرفك لعد تكول عافوني يلة فيمالله
خزرها ونتر / ارجعي للبيت ذاك مو بعيد مئة متر
صعدت بسيارتي وعفتها بالشارع عوبة تكول عايفيني وهي مفهمة اخوتها متريد تروح بالزفه طلعت بسيارتي عالشارع وانتبهت بالمراية راحت تمشي لبيتنا ودخلت لأن قريب على بيت عمتي ايمان
مسوية هالفلم حتى تصعد وياي بالسيارة اعرف غايتها تريد تفهم العالم عندي شي وياها
صفا /
فشلني الحقير شكد جنت متأملة اصعد وياه بالسيارة اوووف شكد صعب مجاي اكدر عليه
وصلت لبيت عمو عبدالله دخلت يم النسوان والزفه بعدهم احتمال ياخذون صور يلة يرجعون
صار المغرب وصلو العرسان ودخلو للأستقبال ايهم بيده لينا الجانت آية من الجمال لطافه واناقه بس مبينه حزينة اووف مدري ليش ماعدنا حظ ليش ماعدنا حظ مدري ياربي
لينا /
عافني ايهم الي من اخذني وطلعنا ماحجى وياي كلمة بس وية معتصم ورانيا جان يسولف ومن اخذنا صور بالاستوديو جان ساكت بس احسه يريد ياكلني بنظراته الحمدلله بدلتي محتشمة جان طلع قهره بية
عافني بالاستقبال وطلع بعدما أمه وعماتي باركولنه
اني فكري مو يمهم افكر بكلام رانيا البارحه من دخلت لغرفتي وبقت تنصح بية وتعلمني شلون اتصرف من يدخل ايهم علية اووف لو عايفتني بدون فهم احسن خفت أكثر ودكات گلبي تضرب بصدري
وكت العشا صعدتني رانيا وعلا للغرفة وجابولي عشا ماكدرت اكل بس لكمتين لأن الخوف ذبحني ورى ما نزلت علا الصينية صعدت عماتي وعمة ام حذيفة كالو راح يزفون ايهم اني رأسا بطني مغصتني وجهي
حذيفة /
سحب ايهم على جهة حتى يحجي وياه وبصوت ناصي ..
/ ايهم الزواج وصار وتم على خير اريدك تثبت رجولتك ترى ادري بيك عليش ناوي بعدين هاي تنحسب عليك ياخوي خوما اني أعلمك انت تعرف الراح يصير
ايهم / حذيفة شي صار غصب ما اطيقة مو اني الاقبل بهيج زواج
حذيفة / ميخالف والبنت هم خطية شنو ذنبها راعي الله بيها هسة راح نزفك وسوي المطلوب
غمزله حذيفة بعينه مارد عليه ايهم يفتهم قصده يريده يدخل عليها وهو جان مقرر ما يطخها مقرر يكفخها جم سطرة يوو أشكال جان مخطط يريد يطلع قهره بيها لأن يحس روحه ماعنده شخصية من فرضوها عليه حس بندم جبير بهاي اللحظة لو طالع للأردن بوكتها جان مصار الي صار
جر حسرة وذبها وبداخلة قرار لا يمكن يتنازل عنه
لينا /
الرجفة هزت جسمها من عافوها عماتها بدخلة ايهم الي زفوه عليها ، مدنكه راسها بس تسمع الهلاهل وشلون يوصنه بيها كمزت من سمعت طبكت الباب وصوت القفل تقرب ايهم عليها ورأسا سحبها من جتفها صارت بحظنه بدون ما يحظنها بقت جامدة كدام صدره عينها على رباط بدلته نفسها حبستها من كض فكها بيده ورفع راسها وبصوت ثكيل وهو يكز سنونه..
ايهم / شسوي بيج هسة ولج اني ماريد هذا الزواج انتي ليش مارفضتي ليش ماعندج كرامة شنو الشفتي مني حتى تقبلين هااا !!!
يحجي وعينه تحوم على ملامح وجها الحلوة
الي تفتن اي رجال بس ايهم جان بحالة متسمحلة ينغري بجمالها
لينا /
من حجى وياي وأيده تعصر بفكي بجيت مقهورة وبصوت كوة طلعته / عوفني اذيتني
ايهم بغضب / هو انتي شفتي شي من اذيتي والله لا اخليج تندمين على هالزواج هذا
خفت حيل من نظراته الي كلها حقد وملامة
عطت من تلمس سحاب البدلة وفتحة بقوة ونزع بدلتي بسرعة مامتخيلتها غطيت صدري بخجل ودموعي تجري على خدي دفعني بقوة عالفراش وكعت صفحة أيدي صارت جواية وجعتني ، حاولت اسيطر على روحي اريد اكوم ما أحسه الا صار فوكاية وأيده خنكت رگبتي أنفاسه قريبه تضرب وجهي وبصوت كله تهديد ..
ايهم / قسم برب العالمين إذا طلع صوتج اصلخه لجلدج
شهكتي شكت صدري واني أتوسل بي / فدوة عوفني لا تأذيني فدوة
ماسمعلي جان متحلف بية وفعلا طلع قهره بجسمي خلاني اون بصوت أخرس خايفة من تهديده كام مني وشمر الغطا علية واني مستمرة ابجي بصوت مخنوك عاضة على أيدي بألم
ايهم /
ماتحملت الا طلعت قهري بيها اعترف اذيتها و حسيت بهالشي متأخر من وعيت لروحي واني أشوفها تبجي وتتلوى بخنسة تخاف مني تخاف يطلع صوتها ، غطيتها ورحت طلعت دشداشة ومنشفة طلعت للحمام سبحت ورجعت مشطت وتعطرت عيني عليها بعدها جوة الغطا بس هزة خفيفة بجسمها مبينة تبجي نزلت وعفتها
من شافوني كامن النسوان يهلهلن امي وعماتي ، طلعت يم الزلم برى حذيفة وصعب تلكوني أشرت لحذيفة بيدي بمعنى اوك راح طلع الرشاش وكام يرمي بيها
صعب / شخبارك إن شاء الله مرتاح
دحكت بعيونه واني عاكد حاجبي / ويهمكم هالشي الردتو صار بعد لحد يتدخل
صعب / كلامك مايطمن
ايهم / صعب خليني بحالي اترجاك
سكت ماحجى واني رحت كعدت عالكراسي بالحديقة
يم لينا من صعدن يطمنن عليها جانت كاعدة عالجرباية ومدنكه راسها بوسنها يباركلها وعيون عمتها ايمان محاوطتها شوي وخلتهن ينزلن ..
ايمان / اكول البنت وتطمنتن عليها يلة خل ننزل جوة خلنها ترتاح
طلعن يضحكن ام حذيفة وام غزوان وإيمان عافتهن ورجعت على لينا لأن حست بيها مامرتاحه تعرف طبعها
كعدت مقابيلها / حبيبتي بيج شي ليش هيج خانسة ومارفعتي راسج
عيونها عليها تشوفها حاضنة جسمها ولابسة كلبية مسترة مدت أيدها ورفعت راسها .. ليونة ماما احجي ايهم اذاج
ماتحملت من عمتي حجت واني احس بقلقها علية بجيت وختلت بحظنها وعبرتي بصدري ..
لينا / عمة فدوة اخذيني وياج ماريده اذاني هاي اول يوم وهيج يسوي بية لعد باقي الايام شلون ؟!!!
حظنتها ايمان وبيدها تمسح ظهرها / اشش بنيتي ميخالف هاي كل عروس هيج يصير بيها لعد لو احجيلج على سما والصار وياها هم نفس حجايتج هاي وهسة تموت على صلاح
لينا / عمة يهدد بية لو شوي يذبحني اني خايفة منه
ايمان تهدي بيها / عوفج من هاي السالفة اني راح احجي وياه وهسة فهميني انتي زينة
ابتعدت عن حظن عمتي وهزيت راسي بمعنى لا واني احضن جسمي بذراعاتي
عمتي فكت عينها / ولج ليش ماتحجين كومي كومي للحمام وياي !!!!
راحت طلعتلي منشفة و ملابس وجرتني من أيدي مشيت وياها للحمام واني كاتمة ونيني اخاف واستحي اطلع صوت التفت عمة عالفراش وعلية وعصبت وهي تكف جرجف الجرباية نزعته وجابت واحد جديد فرشته وأخذت ذاك بيدها ..
ايمان / لج ماما ليش هيج مستحية كولي احجي لخاطر الله شنو تبقين تنزفين
بالحمام خلتني جوة الدوش بعدما ساعدتني نزعت وذبتهن بالغسالة كالت عوفي كولشي اني اغسلهن خل احير بيج هسة
كولش استحيت منها واني واكفة المي ينزل على جسمي البي اثار تركها ايهم بكل وحشية
عافتني وطلعت شوية ورجعت بيدها كاسه مليانه كالت هذا ملح تعالي هنا اكعدي ملت طشت ماي وذبت الملح بي ..
ايمان / يلة اكعدي شوية راح ترتاحين بعدين وكلما تدخلين حمام اشطفي بي خوش معقم مراح يسوي التهابات
+
بعدما سويت الكالت عليه كملت سبح وطلعتني بعدما ساعدتني انشف جسمي وشعري لبست دشداشة ناعمة ربع ردن الحمدلله حسيت شوية احسن واكوو فرق بعدما سبحت .... فتت للغرفة وياي عمتي وأشوف ايهم صفط المصلاية وذبها عالكرسي سدت عمتي الباب واني رحت مددت عالفراش اريد ارتاح واني احاول ما اباوعله اسمع عمتي تحجي بصوت ناصي تعاتب بي عالسواه بية
ايمان / وتعرف مالات الله وتصلي لعد ليش هيج سويت بالبنية ايهم خاف الله لا تفرغ قهرك بيها
ايهم / عمة اترجاج لا تدخلين بخصوصياتنه شبسرعه راحت تشكي قابل شنو سويت
ايمان / استغفر الله خلني ساكته ايهم ترى ما قصرت بالبنية
ماسمعت شنو كالت بعدها لأن صوتهم نصى
تقربت عمتي / خل اسرح شعرج اكعدي
رفعت الغطا وعدلت كعدتي وعمة ايمان سرحت شعري وأخذت المنشفة نشرتها عالكرسي وطلعت
خطفت نظرة شفته متربع عالفراش وعينه علية استحيت ورجعت تغطيت حتى انام
وگلبي يدك سريع خفت لا يتقربلي مرة ثانية والله اموت
الحمدلله نام بصفي بدون ما يحجي شي ولا يمد أيده
تذكرت صلاة العشاء ممصليتها كمت اشوف اذا اكدر اصلي نزلت بهدوء ماريده يحس علية لأن مغمض عينه بس ممعقولة نام هسة يادوب ساعه عشرة
الحمدلله ماكو شي يعني اكدر اصلي توضيت وطلعت من الحمام امشي على كيفي اديت صلاتي وبقيت ادعي
رحت مددت بفراشي ايهم منطيني ظهره خليت راسي على المخدة والصار بية قبل ساعتين رجع انعاد قشعر جسمي من تذكرت شلون اخذني جريت حسرة وذبيتها غمضت عيوني بلكن انام
،،،،،
يم ام حذيفة كاعدات بالهول ..
ايمان / عندج علم بالصار فهمي ابنج خل يخاف الله بيها مبين ناوي نية سودة اعرفه زين يسكت وما تحسينه الا صدمج
ام حذيفة / عيني ام سما البنت صارت مرتة وبنية مثل لينا تتحط بنص الگلب هسة تشوفين شلون يحبها يموت عليها
علا / عمة خل يراعيها مو الا يحبها يجي الحب بالعشرة والاهتمام
ام حذيفة / علا انتي لا تدخلين من يسمع حذيفة يتخبل يكول سوالف النسوان مالتجن بطلنها الله يرضى عليج ماريد مشاكل إذا سمعتج لينا تبقى ادك عناد وأيهم مايتفاهم
علا / والله اليحجي الحق بهالوكت ينكره
خل اكوم اروح انام بطني مغصتني
ايمان / اشتغلتي زايد وانتي حامل
علا / عمة ايمان لعد خوما اعووف البيت هوسة
ايمان / الله يرضى عليج
عافتهن علا وراحت لغرفتها لاكاها صعب ..
/ خيتي بدون زحمة عليج عمريلي النركيله لما افوت اسبح واصلي
علا / ادلل هسة أسويها ا ا شو حذيفة ما اجى
صعب / بقى وراي بالحديقة هسة يجي
حذيفة / ها تسألين علية خير
ابتسمت بوجهه / لا عيوني بس شفتك تاخرت
عافتهم وراحت للمطبخ تحضر فحم النركيلة
لحكها حذيفة / هاي المن اكيد صعب راد
عمريلي وياج مشتهي
علا / اووي حذيفة والله الريحه تلزك بملابسك ونفسي تكوم تلعب
حذيفة / خررب تالي وياج دخلتي شهر الرابع وبعدج عالسالفة نفسها
علا / شسوي لعد فدووة حذيفة لا تنركل
حذيفة / هههه والله بنت عمي حاكمتني هي والزعطوط ابطنها لعد موجاي تحضرينها لصعب نفسج مالعبت
علا / ياااه وتريدني افشل صعب من يطلب مني حاجة لو اموت
حك خده وتقرب عليها / لعد بس اني المسكين اويلي علية
علا / يمة فدوة رحتلك انت العين ونظرها ابو ملاك حبيب گلبي
حذيفة / والله هالكلام الحلو خلاني ابطل لابو النركيلة لابو اليتقرب عليها
غمزلها / اكلج تعاي للغرفة لا تتأخرين
ابتسمت ورجعت تكمل البيدها وكاطعه النفس حتى لا تشتم الريحه
من حبلت كامت اتخبل من ريحه المعسل والدخان ومرات صعب يطلب منها تعمرله تستحي تفشله لأن متعودين عليها وبميانة يطلبون حتى ايهم
ـــــــــــــــــــــ
لينا /
الصبح كعدت ساعة سبعه التفتت ايهم نايم نزلت من فراشي احس جسمي متشنج اخذت ملابس وفتت للحمام دورت بالغسالة لكيت عمة ايمان صدوك غاسلة الجرجف وملابسي
لأن مموجودات سبحت وتوضيت وطلعت
كملت ترتيب روحي ورى ما صليت وبعدها تعطرت وخليت مكياج خفيف لأن اصلا ماحب المكياج
بقيت بالغرفة استحي انزل كعدت على طرف الجرباية موبايلي بيدي اكلب بي عندي فيس مشتركة بكروب حلو للبنات مندمجة بمنشور وتعليقات تضحك فزيت من انسحب جهازي من أيدي
أيهم نتر بية / شنو هذا ؟!! لا وكاعدة تتمضحكين
لينا بنعومة / كروب بنات والله ومن زمان اني بي
ايهم / لا وفرحانة هم
بقى يكلب بالموبايل والتطبيقات فلسها تفليس واني اتكرضم هذا كل عقله
اني ماعندي شي حتى ماسنجر ماكو الحمدلله انوب يروح يطلعلي بسالفة شيخلصني
ايهم / هاج بس ياويلج تدخلين كروب مشترك
اخذت موبايلي أيده طخت أيدي بقى موبايلي بيده دنكت مستحبة من عيونه حاوطتني وتتمشى على جسمي سحبني بحظنه ورفع راسي بيده واصابعه مشت على طول خدي ونزلها لرقبتي گلبي دكاته زادت وصراحه خفت يتقربلي واني بعدني اعاني من الصار البارحة
طبطب بيده على خدي / نزلة جوا وشعرج مفتوح ماكو حجابج على راسج
لينا / ان شاء الله
ايهم / انزلي سويلي ريوك بينما اتوضى واصلي
انتبهنا على دكة الباب وصوت شهد زوجة اياد
شكرا لزيارتكم عالم روايات سكيرهوم
