رواية جراح قلبي الفصل الرابع 4 بقلم جوهرة

شهد / الريوك خليته بالباب عمتي كالت خل يتريكون فوك

تركني ايهم وكمت بهدوء فتحت الباب شهد بوجهي ابتسمت لي صبحت علية وباركتلي ونزلت ، اخذت الصينية ودخلتها خليتها عالطبلة

أيهم راح للحمام واني رتبت الفراش وعطرت الغرفة وكعدت عالكرسي انتظره 

بينما صلى وكمل صبيتله جاي وكعد كبالي تفصل الصينية بيناتنا ابوك النظرات بوك واني أشوفه ياكل بدون ما يلتفت الي مديت أيدي قسمت خبزة وأخذت قطعه صغيرة من الجبن اكلتها وشربت جاي كوة بلعتها رغم جان الريوك خيرات الله كولش مستحية من ايهم و خايفة منه لأن عرفته حاقد علية

كمل وراح بدل بدشداشة بيضة وتعطر ونزل يم الباب التفت علية لاتبقين خاتلة بالغرفة انزلي

شكد لئيم حتى ماسألني شلوني بعد السواه بية البارحه يتصرف ولا كأنو مسوي شي

مرت ايام واسابيع على زواجنا وأيهم خلالها مرتين فقط تقربلي يتصرف من نكون وحدنا بالغرفة بكل برود واني هم مجنبته ما اتقربله

اشوف احتياجاته واخدمه والكلام بيناتنا كولش قليل مرات أحسه يراقبني بدون ما يحسسني ما اعرف شنو الناوي عليه

بدا الدوام قبل اسبوع وجان الوضع مايبشر بخير لأن ايهم ماقبل اداوم وعمو حجى عليه ماقبل وبالغرفة من صعدت على أساس ثاني يوم اداوم هددني / اسمعي ولج مدرسة مترحين قابل شنو راح تصيرين زواج تزوجتي انجبي واكعدي

لينا / ايهم ميصير تحرمني من المدرسة

نتر بية / اششش لا تناقشين

اني تخبلت كله ولا دوامي ومدرستي ناوي يحطم حياتي هذا هم الزواج الي انحسب علية

لينا / والله اداوم وماعوف المدرسة اني سنة أخيرة شلون تريد تحرمني

خطوتين سوا المسافة بيني وبينه تقرب وتلني من ذراعي وزمخ بية / ادبسزز هاي عليمن عليتي صوتج

عينه بعيني وأيده تحفر بذراعي ياربي شكد حاقد علية لعد شنو هالقسوة العنده

ايهم زمخ بقوة / اندمج والله سويها وداومي وشوفي اليصير

تليت ذراعي واني احس بوجع خفيف وركضت اريد انزل احجي وية عمو عبدالله

نزلت الدرج بسرعة واني اسمع خطواته تتراكض وراية يريد يمنعني من صرخ بية اوكف بس اني ماسمعتله لأن جنت حيل مقهورة وردت أحد ينصفني 

وفعلا عمو وحذيفة وصعب وكفو وياي نصفوني وماقبلو على كلامه بس هالشي دفعت ثمنه مضاعف بعدين !!!!!!!!

أيهم من رزله عمو والولد ،، باوعلي بنظرة شرسة مليانه تهديد ورفع أيده فوك ..

ايهم / خلص خلص يابة انت واكف وياها وماحاطلي اعتبار واني زوجها خلها تسوي البراسها واني اسوي الاريده

عافنا وطلع من البيت ولليل يلة رجع 

جنت بالغرفة أرتب الكنتور دخل وعاط بية لأن واكفه يم صفحته مالت الملابس جر جنطه من الكنتور وكام يحط ملابسه واني فاكه عيني مستغربة هذا وين يريد بلعت ريك وسألته / شتسوي 

بدون مايدحك علية كمل وقفل جنطته وسحبها خلاها بصف الباب تقرب علية ورفع إصبعه يهدد ..

ايهم / مستقوية بالحجي والولد مو خلج لعد 

اني مسافر للأردن اشتغل وية عمي طيارتي بعد تلث ساعات بس راح اكلج جم كلمه خلهم جوة دماغج هذا ، اسمع مجرد حجاية عليج ادفنج وانتي عدلة

لينا / انت شبيك ترى اني مترباية احسن تربية وعيب عليك هيج تحاجيني

تقرب حيل ودنك راسه الي لأن طويل واني يادوب اوصل لجتافه تلاكت عيونا دقائق احساسي بي غير شكل هالفترة المضت تعودت عليه بس هو لا دوم معصب وما يطيقني بس اني گلبي سكط اووف

تنهد ..

ايهم / لينا لاتخليني اتصرف بقسوة وياج اني ماريد ااذيج

ابتعدت عنه خايفة من قربه وكلامه شيريد يوصلي بالكلام هذا

سالته واني أشوفه يطلع ملابس يحضرهن حتى ماطلب احضرله بدل وتعطر واني واكفة صافنة ومن أخذ مستمسكات من ضمنهم جواز السفر وفلوس تقربت وأحس روحي فرفحت ..

لينا / ايهم تريد تعوفني اني ارجع وحيدة ، ايهم ليش هيج تسوي بية

عضيت شفتي الجوة من شفت لهفتها والخوف بعيونها البنت ماشفت منها شي غلط دومها خادمتني خلال هالشهر وكل طلباتي تتنفذ بس ما اكدر ابقى وياها انفرضت علية فرض زواجي منها خلاني احس ماعندي اي رأيي ولا شخصية ومو ايهم الي ينفرض عليه شي مامقتنع بي اعرف السويته راح يخلي أبوية ينجن بس راح يهدى بعدين لأن بداخلة متندم من جبرني اتزوج لينا

ايهم / عمرج ماجنتي وحيدة كلها اداري خاطرج لاتكلبينها مناحه

عفتها ورحت سحبت جنطتي التفتت عليها من كامت تبجي وتتوسل بية ابقى لحظات حسيت گلبي راح يخضع واني اشوف دموعها واسمع صوتها المختنك بعبرته ..

ايهم / ديري بالج على روحج فيمالله

نزلت البيت سنطه كلمن بغرفته الساعه جانت 11 التفتت وراية شفتها كعدت عالدرج ودموعها غركن خدودها عضيت شفتي بقوة وطلعت التكسي ينتظرني برا

ما ادري شلون نمت كعدت عيوني مورمة من البجي وراسي يوجعني كمت اتوضى اصلي كملت ورجعت حسيت بدوخة ردت اوكع يادوب تناوشت الجرباية رجعت انسدحت عليها يربي وراي دوام ساعه سبعه مراح الحك بقيت دقائق بالفراش حسيت نفسي احسن صليت وبدلت صدرية ولبست الحجاب شلت جنطتي ونزلت اتريك اسمع صوت وصياح بالبيت دخلت المطبخ صبحت عليهم جاي يتريكون لأن عدهم دوام حذيفة وبنته ملاك 

والولد واكفين وعمو يحجي بعصبية ويصفك بيده توقعته علمود ايهم من شاف عيوني وارمة من البجي عصب أكثر وبقى يغلط على ايهم 

الدريت بي بعدين من رجعت من المدرسة حجتلي علا عمو سامي متصل وخبرهم بوصول ايهم 

مرت ايام ومحد جاب للسالفة ذكر حتى عمة ايمان من حجت على ايهم رجعت سكتت لأن الكلام مايفيد بعد 

من تكررت حالات لعبان النفس والدوخه سالت علا الي ضحكت وهي تكول .. فدوة راح تصيرين ماما 

بالبداية تخربطت أحوالي ممتهيئة لهذا الخبر وانقهرت لأن وحيدة ايهم مو وياي ولا راح يكون ولا راح يهتم وفعلا من اتصل على عمتي يسلم عليها حجتله وباركتله ومبين من كلام عمتي مافرحان لأن سدته وهي كالبة وجهها 

وبمرور الوقت كمت أعيش حالة اني حامل وبداخلي روح صغيرة تنبض بالحياة صرت اتونس بالليل من أكمل قراية ابقى اسولف وياه ونخطط شنسوي تمنيت ولد يكون سند الي وتمنيت يكونون توم اربيهم واحبهم وما احرمهم من كولشي رغم ادري عمي والولد مراح يقصرون ، شكد جنت انقهر لأن ايهم عافني وراه بلا رحمة ولا فكر عنده زوجة بعدها عروس ، اني گلبي رجيج جنت افكر بي وهو ولا على باله ، بعدها كمت احقد عليه بسبب قسوته واهماله 

مرت اشهر وأيهم غايب وكبرت بطني ودخلت شهري وقربت امتحانات نهاية السنة وقررت اجازف واروح للامتحان ما اخذ اجازة رغم شكلي راح أولد بأي وقت 

الكل كانو وياي يساندوني بس اني جنت بعيدة وأحاول ابقى بعيده عنهم بعد السواه ايهم بية وخلاني تحت رحمه وشفقة الناس صرت اكره نفسي من اسمع وحدة تكول خطية ليش عايفها وكاعد بالغربة وووو 

هواي كلام هالشي خلاني اتغير واتوعد ايهم

عمة ايمان جانت دوم تشجعني التفت لنفسي ودراستي ومرات اروح عدها بالبيت بس عمو جان مايقبل ابقى فترة طويلة يكول بيت رجلج أولى بيج ههه على أساس رجلي مفكر بية والله يا الله ،

دوم يتصل وية أهله وأخوته ولا يوم اتصل علية جنت اسمع عمة توصلي سلامه واني متأكدة جذب حتى علا من ولدت وجابت ولد اتصل يباركلهم جنت انقهر والألم والحسرة تأكل بروحي لعد اني وابنك مو اولى تسأل وتطمن علينا متكول زوجتي حامل اطمن عليها ، مافكرت بموقف اهلك واني منبوذة منك لا تسال لا تهتم ، ضكت المرار واني بعدني توني بسم الله بداية حياتي ااخ مرار 

هواي وكثرن لجماتك ايهم ولينا ماعادت ذيج لينا ......