رواية الابواب الخمس الجزء الثاني الفصل الواحد والأربعون بقلم ريام الهادي
حلاتك يا ملح ما تنعبر ضوك
شما اكثرك عليهم تفتهمني
انة الملت البيبان مني.
انة غركانهم ما كتلة هدني
يم حيطانهم خلصت السنين
مو سادة اعرفكم وانة احني
زغيرون وكمت من ذني كبران
ومواليدي حجت ياهو النهبني
خوله : هههههههه واني وياااج صدك فاتتني لازم صالحه تبات بلشارع كاافي اجه يومها
يونس : يمعودات اوكفن مو مال مشاكل
ناي : الصراحه يونس تستاهل نسيت عبيد وصالحه شسوو بينا وبما ان البيت جزء منه بأسمي شوشه العبي والهوا بظهرج
شرهب : طفرت من مكاني وكمت اصفك هله وجانه الخير جانه والفگر خلانه
ناي : حيييل شذكرج بيها
شرهب : وكتها هذا لان طردت صالحه كل الخير وراها لا اسوي بيها الماتسوه اريد اشوف وجهه من اكول الها البيت بأسم اخوتي يااااعيني ولكم شيوصلني لبغداد
كون اطير هسه واوكع بحضن صالحه
يونس : اوكفي خلي افهم بيبي ليش هيج سويتي وليش سجلتي البيت بأسمي واسم ناي
عمشه : چا انه انشلع افادي واكولن مالكم حصه لون متت
يونس : منريد ولا هاي المشاكل الراح اتصير اذا عرفو مسجلته بأسمنا
عمشه : شنهي ماتريد چا احطنه بحلگ الجايف لبنات غنيه ويسرحن ويمرحن بيه وانه طحت من وراهن شنهي انطيهن هديه طيحتي ويورثني
يونس : اني مااريد لا ورث ولا بيت
عمشه : وانه ماخذيت رايك الشور شوري انه وگلها تسمع چلمتي ترد لبغداد تبيع البيت وتشتري واحد ثاني وبصفه مشتمل لهاي المكموعه ولمرتضى يعرسون بيه وانت تعرس جاري عبن اريدن مريتك بيتي
يونس : يامره رحمه لامي احنا خلي نخلص من الطلابه الجديده الحطيتيها فوك راسنا
خوله : وانت ليش خايف منهم يطبهم طوب
يونس : مخايف منهم خايف عليكم عبالكم راح يسكتون وخاصه عبيد بليه بيت وجوحي فلوسه راحت يعني اذا قبل بيها مجال يبلعون السالفه لان عدهم ومامحتاجين ويسكتون هسه مستحيل
خوله : ذاك حايط ويركعون راسهم بيه ماعدهم شى يمنا البيت بيت امي وهي حره بيه وبحياتها وكدام عينها حبت تبيع البيت وراح تشتري ثاني مالهم شى عدنا
يونس : لتنسين نص البيت جان ورثكم من ابوكم فلوس الكاع البعتوها
خوله : وامي كفت وفت وياهم ربتهم وكبرتهم ولو تربيه سكط بس ماشمرتهم بلشارع يمدون ايدهم وسوت الهم بيت وكعدتهم سنين بيه همه وجهالهم وصرفت عليهم لمن ملت وانكسرت ولا واحد عنده غيره منهم وعالجها واحد عنده ملاييين متنعد والثاني عنده بيت شكبره وربك لان مانصفو امهم وعافوها تون من الالم وجان ماتت وعزو فلوسهم عليها شوف حالهم واحد ضيع البيت والثاني مرته غدرت بيه واخذت فلوسه لتضل تفكر بيهم واتذكر حالك وحال خواتك وحالي وحال بيبيتك من وراهم
يونس : الشغله يراد الها تفكير مو مال هوسه وعركه مااريد احد يتأذه وخاصه جوحي متحلف الج
خوله : خلي يولي كل شويه مهدد هو بيه حيل يشيل ايده مبين يريد يرجع للسجن قابل اني اخذت فلوسه وانهزمت
عمشه : يمه انه اريدن نرد لبغداد
بديعه : ليش منرجع لنفس البيت بس صالحه تطلع منه
عمشه : ماتطلع وتسويها دم للرچاب وانه مااريدن ارد لذاك المچان عبن كله مصايب وكل حيطانه بلاوي وسحوره ذني اريد بيت نظيف ماجاسنه
شرهب : ماطول بيبي تريد تبيع البيت نروح نطردها وراها نبيعه
يونس : شنطرد بابا هو لعب جهال اكو واحد تروح لبيته وتكول اله اطلع بره يله ويسكت
شرهب : شيريد يسوي يعيط يضرب عادي المهم ينذلون
يونس : مترهم لازم نكعد وياهم ونفهمهم على سالفه البيت وحتى البيت الجديد يتسجل بأسم بيبي حتى يبقى ورثه واذا على الورث مااريد شى الله الرزاق
شرهب : وهيج نعبر السوه بينه
يونس : الله موجود ياخذ حقنا مو كلشي عياط وهوسه خلي ابلغهم بيبي تبيع البيت ونشتري جديد واذا مرهمت ومقتنعو اعرض عليهم ياخذون حصتهم والباقي نشتري بيه ونكعد اني مااريد ادخل وياهم مره ثانيه بمشاكل
شرهب : هااي منو يحجي على المشاكل اله خلصها علينه طلابه وره الثانيه
ناي : شرهب شبيج اسكتي
شرهب : شسكت مسمعين كلامه يريد ينطيهم حصه بعد روح توسل بيهم يرضون علينا
يونس : صوتج نصي لا افرك حلكج كتلج مااريد مشاكل وياهم صالحه متكعد راحه وعبيد وجوحي واحد انكس من الثاني ليش ندخل وياهم بمتاهات مشبعتو أذيه
شرهب : واكفه واعيط بنصهم محد شبع اذيه بكدي اني
يونس : كلنا تأذينا بس مو معناها انرد الاساءه بالاساءه اكو هواي طرق ناخذ حقنا
شرهب : ردلي حقي يله رده يوم ماعافتني وحدي واني بت ال١٣ سنه بسلمان باك بمنطقه اذا اغتصبوني وذبحوني محد يطلع ويكول هاي منو تعرف شنو شعوري واني وحدي والرايح والجاي يباوع عليه واغطي بيدي وبرجلي وكاتلني البرد والخوف لكم الله اكبر ١٣ سنه مشموره بلشارع يعني تكول للرايح والجاي تعالو انهشو بيها لوما ستر الله دزلي ناس خيره رجعوني جان هسه حتى جثه متلكون اليه
وماكفاها زوجتني واحد كلمة حقير قليله بحقه واحد بخييل شبعني ضيم
ناي : على كيفج ليش ترجفين
شرهب : كمت اضرب على صدري واعيط فقدت اتهسترت لكم جنت انربط بلحبال حتى ينام ويايه سواني حيوانه يستمتع بيها شوكت ميحب واذا يريد يعاقبني يكطع الاكل عني ياما ايام انام وكاتلني الجوع ادور الخبزه اليابسه اكلها شفت الذل والضرب والاهانه واشكال الاستحقار منه ومن وره منو من صالحه تقصدت تزوجني واحد يكعدني بكتله وينومني بكتله
خوله : يمه شرهب على كيفج حبيبتي گلبج راح يوكف
شرهب : مستمره اعيط وجان تنزل دموعي
لكم لهاي اللحظه انام واحلم عدي يغتصبني لهاي اللحظه احلم بيه شون يشد ايدي ورجلي ويستلذ بتعذيبي واذا مرتاحه ونايمه ومااريد افكر اشوف نفسي بت ال ١٣ مشموره بلجول وحدي وافتر واعيط تعالو اخذوني واتخيل جلاب وحيوانات تركض و رايه واكعد مخترعه متريد مشاكل يايونس بعد شيسون اكثر كلكم رضيتو وسكتو على زواجي اله ناي انهزمت بليله ظلمه حتى تحميني وتالي اتزوجت گبال عينكم ومحد ادخل اني اكثر وحده ادمرت وانداست وفوكاها خلصت طفولتي اتعير بجليله منهن صالحه واختها يعني مابقى شى موزين ماشفته من عدهم
واذا انت شفت مشاكل فمن ايدك محد كلك حب بتهم واكتل روحك عليها وخلي ايدك بأيد خالهم الله لايرحمه واوكع بلسجن اذا نسيت اني اذكرك وليش نروح بعيد هاي عمتي هياتها كدامك طلعنها مثل المخبله بلشارع تكطع ملابسها وزوجنها رجال اتعس من عدي ويوم ماشافنها فرحانه وراح تتزوج شخص زين يحبها وتحبه خربن عرسها قبل بيوم وهاي عمتك لليوم تعاني من وراهن
لو اذكرك بامي ذكرى ماخلن على حالها حال مرتاحن اله دفننها لو بيبي الي كسرن حوضها وجان ماتت شذكرك بوحده اثنين عدى سحورتهن واذا تريد تكعد واطيب گلوبهم وتراضيهم روح انت وحدك اني لا اتراضه بيوم ولا اطيب خاطر ويوم ماصالحه او ساهره او واحد من عمامك يموت نذر عليه اهلهل بنص الشارع
وهااا حط بالك يوم مافتحت جبهه ويه صالحه ونوت ويايه على شر جان بسببك احترك گلبي عليك لان دخلت السجن شمر وانشمرنا سحر وسحرن النه طعن وانطعن بشرفنا وضكنا المر بأثنين ادينا وهسه جاي تكول منريد مشاكل صير حقاني انطيني حقي قبل حق عمامك ونسوانهم ورجعلي عمري الضاع وانداس جوه رجلهم
عفتهم وطبيت للغرفه كعدت على جربايه بيبي وكمت اشهك من البجي صوت شهكاتي مسمعه الكل ابجي واتذكر كلشي صار بيه
ناي : خلي اكوم وراها احترك دمها حرك فدوة بان كوميني
خوله : متتحمل طالعه عليه اباوع شون تهد وتحجي وتضرب بصدرها بحركت گلب دمنا حامي منتحمل كومي روحي عليها طيبي خاطرها گسرت گلبي من تحجي
يونس : غير اخاف عليها وعليكم
خوله : يابو دكت على راس طبول ماضلت على هذا الطبل ياابني الواحد من يتأذه من شخص يضل العمر كله ينتظر تطلع حوبته بيه واحنا انتظرنا هوايه كلش هوايه اذا عليه صار اكثر من ٣٠ سنه انتظر واذا على اختك من فتحت عينها وعت على نسوان عمامها وهي تعاني منهن ماصرنا هيج وهذا مو طبعنا احنا منحب المشاكل ولا نشتريها تغيرنا وصرنا وكحات ولسان من الاذيه الشفناها لو اني او شرهب عشنا مرتاحات ومتنعمات بيت هادئ اهله طيبين مسالمين ماعدهم حقد وحقاره وناس تحب ناس جان هسه حالنا غير حال وطبعنا غير طبع وربك جان انعم وافقر منه متلكه الدك على الحديد يلين كومو راضو اختكم
طبت ناي تتجه على الباب وكعدت وحضنتني
ناي : شبيج ياامي وابويه انت ليش هذا الرجف والعياط اول تالي تعلين صوتج على يونس
شرهب : حرگ گلبي نايه
جان تنفتح الباب
يونس : ماعاش الي يحرق گلبج واني عايش واذا اني الحرگته شيرضيج واني اطفي
شرهب : اريد دموعي توكف ماكو معودت نزلت
يونس : كل هاي لان تردين اطردين صالحه اشراح تستفادين من تصير عركه بكل الاحوال مراح تطلع واذا طلعت مو بنفس اليوم اكيد تاخذ ايام واشهر يله تطلع من البيت
شرهب : اريد بس اشوفها شون تتخبل من تعرف فلست من البيت وصارت بلشارع
يونس : واذا اخذتج باجر بيدي ترتاحين
شرهب : مبرطمه ودمعاتي تنزل واشرت براسي اي
يونس : تموت على الطلايب هذا هو اخذج بس بشرط بليه عياط وهوسه وصوت عالي يسمع الجيران
شرهب : مسحت دموعي انصي صوتي عوود بس اهم شى اني ابلغها وهااا ناخذ عمه خوله ويايه
يونس : لا كملت كلش صوتجن مراح يطلع هادئات الفقاريه تنكط منجن تنكط
خوله : شبيه ولك تحجي عليه
يونس : لا كل شويه وحده تزعل وتعال راضي اني دايخ بهاي سالفت بيبي وشون تفض
خوله : نروح باجر لبغداد نبلغهم يخلون البيت شهر بلزايد او شهرين وينباع البيت وراها اشتري ولم بيبيتك واختك ومرت عمك بيت واكعد واسكت هم تخلص من الايجار وهم تستقرون كافي خلصتو سنين بلشارع لو بالايجار وذولاك متنعمين ومرتاحين
يونس : اخذجن باجر والله يستر
شرهب : كمت حضنته وبسته من خده العفو لان عليت صوتي عليك لزمني من اذني
يونس : انتي عيديها وشوفي شسوي بيج هلمره سماح مره ثانيه صدك اتوبج
شرهب : لتحرك اعصابي واني اكعد حبابه وهمس متسمع مني
يونس :هاي بالاحلام هو انتي اكعدي ساعه وحده لتحجين تتخبلين تكومين تحجين ويه نفسج ياهمس بعد هذا
شرهب : حضنته شوكت نروح باجر
يونس : اووووف منج اوووف نطلع وره صلاه الظهر
شرهب : وهله بليلعب جوبي وهله برجال الجوبي
يونس : خلي اشوف سالفه مرتضى اليوم عمشه ناويه علينا
طلعنا من الغرفه لكينا عمه وبيبي يتناقشون
بديعه : ياعمه بتي واني ادرى بمصلحتها
عمشه : من عاب هلوجهه المزنجر منهي تعرف چا انتي لوبيج حظ مجان رجلج تزوج سنين وماحاسه بيه
يونس : اليوم ماشاء الله ناس تعير بناس شبيكم
بديعه : اني مااريد ازوج بان لمرتضى ميناسبها
يونس : ليش ياعمه بلعكس مرتضى حباب ورجال وشاغول ويعتمد عليه هو الوكت مانصفه وعوج وياه اله هو زين ومناسب كلش لبان وحتى شهاده عنده وهاي الفتره بدا يطلع يشتغل ويلم نفسه بعد ليش متقبلين
بديعه : نسينا منو امه وابوه
عمشه : امه شردت وماترد عساها واكعه بمنهوله گلها خيس ماتكوم منها اطوف وتندفن بيها
وابيه مجلوط ويفتر جنه مخبل ماخذين عودته منه شنهي بعد العياره الوليد ضال وحيده وبتج بليه عيال چا ماتكيفين وراح تگعد بمشتمل ويصير براسها خير كضيتي عمرج كله بغرفه وهاي بتج تعرس بيت گبل وماراضيه انهجم راسج
بديعه : هاي المله كلها مااريد بتي تتورط وياهم شحصلت اني سنين اخدم واداري واتحمل وتالي اتزوج عليه وبتي راح اتصير نفس الشى قابل مرتضى مايطلع على عمامه تاليته مثلهم اذا فقيرهم تزوج ٨ سنين وماحسيت عليه مرتضى وابوه جوحي شيطلع
خوله : والناس هم متنعرف منو يكول تزوجيها واحد يطلع زين يجوز يطلع شراب ابو نسوان اهله موزينين اشكال البنات واصغر من بتج شهر شهرين تتزوج وراها تطلك هم الغريب يخوف بعد اكثر
بديعه : لو جانت عندج بنيه مثلها جان حسيتي بيه وماتقبلين بمرتضى
خوله : عيب عليج تكولين لو جان عندج بنيه مثلها هي بتي وناي وشرهب بناتي اني عندي ٣ بنات وكلهن اريد مصلحتهن واريد حياتهن احسن من حياتي يتزوجن ويستقرن ويعيشن مدلالات ولو نفرض اني عندي بنيه جان شلتها وانطيتها لمرتضى لان رجال واعرف بتي راح تكون مرتاحه ويااه وتعااي يمه ليش تغالطين نفسج بتج تحبه وتريده وهااج شكبرها صارت دخلت بال٣٠ ومتزوجت ليش لان تحبه ومو بعينها احد زوجيها احسن ماتضل مكابلتج وكاعده وتتحصرين على رجال الها
بان : عمه عفيه شنو هذا الحجي ياحب هذا مرتضى مثل اخويه كلش استحيت لان الكل كاعد ويونس انصدم من سمع وضل يباوع عليه ويبتسم
خوله : مثل اخويه ام حلك الاعوج كومي سويلي جااي راسي صدع من سوالفكم التعبانه
بان : كمت للمطبخ بسرعه واني الخجل كاتلني
بديعه : هاي تاليها يخوله
خوله : حجايه ثانيه ورب الكعبه مااحجي وياج العمر كله خليني مرتاحه ورايه طاقه افرغها باجر مالي حيلج وانتي لج وينججج باااااان
بان : هااا عمه طلعت من المطبخ اركض
خوله : خلي يجي مرتضى واكعدي وياه احجي
بان : شأحجي صار وجهي نار
خوله :اتفاهمي ويااه اعرفي كليله شنو التردي منه واتفقو على كلشي حتى نعقد الكم وشوكت متفض سالفه البيت وتطلع السنه مال ابوج انزفكم بس كون اني موجوده مارايحه
بان : يعني صدك تحجون باوعت على امي الي عيونها براسها من الاعصاب
خوله : لا نتشاقه وياج ضايجين روحي امي سوي الجاي لتباوعين عليها ترضه بعدين وتحمدالله على نسيبها
كامت امي مخنوكه منهم كلت شويه واصعد وراها رجعت دخلت للمطبخ سويت جاي لعمه ولبيبي
يونس : بيبي شعجب اختاريتي عمران يروح وياج
عمشه : عبنه زلمه حوك وعنده معارف ومايرد واحد لون طلب منه شئ ابن اصول وركض بيها خلصها بساع وگلشي ماطلب مني
شرهب : بس ويايه صار ابن ااااخ يلساني
ناي : وليش مكال اليه ولا بيوم فتح موضوع كدامي
عمشه : انه حلفته بستره وشرفه مايكول لاحد وامنته هاي الامانه وهو كدها عبن گل هاي السنين ماجاب طاري لواحد منكم
ناي : سيف ماما تعال لتروح تلعب بره
شرهب عفيه كومي وراه
بقينا اليوم كله نتفاهم وشرهب صافنه اكيد تفكر شون تاخذ حقها من صالحه يونس اخذ بيبي وعمه بديعه وراحو للامام يزورون وبقينا اني وشرهب وعمه وبان
اجه مرتضى وكعد اكل والكل ساكت جان تعيط عمه على بان اجت اباوع عليها البنيه وجهه طماطه والله عمه اليوم مترتاح اله تزوجهم
خوله : اكعدي بصف خطيبج
جان يكح مرتضى بالاكل وغص كامت شرهب تضرب على ظهره وتنطي مي
شرهب : ولت ولت بعدوينك على كيفك وراك عرس لتموت بشهكه والعروس تترمل
مرتضى : ظهري كسرتي ايد لو هاون
شرهب : غير حتى تنزل اللكمه فوك مااسوي زين وانقذ حياتك
تعاي عيني بانه ميريدني اكيد يريد مريته
بان : ذوله شبيهم عفتهم وردت اصعد جاان عمه تكول
خوله : شكلت اني اكعدي
مرتضى : شكوو عمه
خوله : انت مو ردت بان
مرتضى : هاااا
خوله : شبيك شنو هااا مو حجيت ويايه وكلت عمه اني اريد بت عمي وخطبيها اليه
ضال صافن ميعرف شيكول
اخذ بت عمك واكعد وياها واتفاهمو حتى اذا الوضع زين نعقد الكم
مرتضى : على كيفج عمه
خوله : اشش انتن كومن عندي شغله وياجن
كومتنا عمه كلنا ودخلنا لغرفه بيبي وضل مرتضى باهت يباوع بالوجوه وبيده خاشوكه الاكل لا هو ذابها ولا هو ماكل بيها
بان : كعدت كباله واني الدم ماكو بعروگي ومستحيه حيل كتله بصوت ناصي مبين متعرف بسالفه وهذا كله تخطيط عمه وبيبي عفيه لتجبر روحك واني هم تره ماادري حطوني مثلك كدام الامر الواقع وخلي نكوم نكول الهم متفقنا وننهي هاي المهزله كلها مدنكه وضايجه حيل صوت الخاشوكه ذبها بلماعون وسكت شويه حااسه ديباوع عليه ومكعد اكدر ارفع راسي واباوع وجان يكول
مرتضى : منو كال حاطيني كدام الامر الواقع اني طلبت من عمه تخطبج اليه
بان : رفعت عيووني مستغربه انت طلبت
مرتضى : اييي وماالكه مثلج وياريت تقبلين تعيشين ويايه ولو حياتي مخربطه ومليوصه كلش بس متاكد انتي راح تعدليها وترتبيها
بان : بقيت فاتحه عيوني اريد انطك بحجابه مكدرت
مرتضى : ادري تستاهلين واحد احسن مني حياته عدله اهله ناس زينين يجون يخطبوج ويرفعون راسج كدام الكل بس هااي كدامج الوضع اهلي كل واحد بمكان وامي المفروض اني اقرب الناس الها وطالع من گلبها غدرتني يعني اني واحد مجروح ومغدور ومتضرر ومابيه قطعه صاحيه يجوز اتعبين ويايه بس اوعدج يوم ماتترتب حياتي اخليج اسعد وحده لان اني عانيت ومااريد اسوي عائله تعاني مثلي اذا قبلتي بيه راح تصيرين اهلي كلهم اريد وياج اعيش الماعشته وياهم واعرفج حنينه وكدها اقبلي وان شاء الله مااخليج تتندمين
بان : گلبي اسمع دكاته ويه ميل الساعه ومرات يسبقه اريد اصدك الديصير كدامي وخايفه اغمض عيني ليطلع حلم واكعد على صوت بيبي لو امي
مرتضى : فگري بلموضوع ومالج دخل بأي احد اذا رفضتي حقج ماالومج ولا راح ازعل منج بلعكس يبقى الود والاحترام بينا وتبقين بت عمي بس اذا قبلتي راح تتفضلين عليه وراح اكون اسعد واحد لان الي مثلج هنياله تصير من نصيبه وتحمل اسمه وتصير ام اولاده
فكري وانطي خبر لعمتي اذا تستحين وراح انتظر ردج على نار
بان : كمت ماحجيت اي شى وصعدت ياربي اريد واحد يكرصني هذا الكاعد گبالي مرتضى اي مرتضى وديخطبني وبأسلوب يخبل
شرهب : هاااي شنو عمي الرومانسي هم طلع بيك بله واني اكول ميدبرها اني من يمي شويه واكول الك موافقه
مرتضى : وانتي ليش تسمعين كلامنا مو عيب
شرهب : ياكلام كول غزل شعر طلعت مو هين يبن العم
مرتضى : عمه وينها هي غير تنطي خبر راح تحجي فاجئتني
شرهب : على اساس انت قصرت
مرتضى : بربج شوشه حلوو حجيت
شرهب : ياحلوو يخبل وداعت ابوك اني من يمي كلت موافقه مبين رايدها وتبيع ثكل براسي وراس عمتك
مرتضى : من يوم ماحجت عمه بيها وهي خشت دماغي وفكرت بيها من كل الجهات بان بنيه مؤدبه وحلوة واعرف اخلاقها وبت عمي اني اوله بيها من الغريب
شرهب : تصير الك لتخاف
مرتضى : انتي هم احجي وياها اخاف ترفض
شرهب : اممممم ترفض خليني ساكته
مرتضى : شكوو
شرهب : سلامتك يبن العم كتلك تقبل بس عمه بديعه مراضيه حاول تحجي وياها رافضه واخاف تأثر على بان لان اكيد بان متقبل بيك اذا امها مقابله بيك راضي الام حتى تحط البتايه بلجيب
مرتضى : تجي واحجي وياها
بديعه : رجعنا من الزياره وحمل على گلبي خايفه على بتي وخوله وعمتي مسوين حزب ضدي واني مااريد انطيها صعدت لغرفتي حتى مااريد اكعد وياهم ويحرگون گلبي اندكت الباب كلت ادخل طب مرتضى
مرتضى : اكدر ادخل
بديعه : تعاال
مرتضى : شونج عمه
بديعه : الْحٍمَدٍ للـّہ يمه انت شونك
مرتضى : موزين
بديعه : ليش ياستار
مرتضى : كالو ضايجه لان ردت بان
بديعه : يايمه محد مفتهمني خلي افهمك
مرتضى : اني خلي افهمج سالفه وبعدين احجي التردي
اعرف بيج تردين مصلحة بتج وحقج وحده مثلها الف رجال احسن مني يتمناها بس محد راح يقدرها بكدي لان اني فاقد كلشي ياعمه الاهل والعزوه والمحنه واريد اعوضه بيها ادري امي وابويه سولكم عقده والكل يكرهم بس يبقون امي وابويه واذا انتم تأذيتو منهم اني هم تأذيت وانكسرت اتصوري شنو شعوري من عرفت امي انهزمت شون كسره عيني مااكدر ارفعها بلمنطقه حتى كمت مااوصل كله يم يونس انكسرت حيييل فوك متتصورين ولمن عرفت ابويه يملك ٥٠٠ مليون وعز عليه ٥ مليون ورادت ايدي تنتهي
هبده وره الثانيه منطوني مجال اتنفس اني خلصت حياتي على الهامش عشت ويه ناس كلمن يدور مصلحته وناس تنهش بناس اريد ارتاح اريد اعيش ولو مره عيشه نظيفه مرتبه ارجع للبيت الكه مره تستقبلني بضحكه ولهفه وتحسسني بحب واهتمام واني كلشي بحياتها واذب كل الحنان الي احسه بيها وادللها وماشفت وحده تستاهل مشاعري غير بتج
بان جوهره ثمينه والماعنده فلس بجيبه من يلكه هيج جوهره يحطها بروحه واني اريد احطها بروحي انتي ربيتيني على ايدج من جنا كلنا بيت واحد وجنت مااكل اله من ايدج وحتى من يتوصخ قميصي واخاف انضرب اجي لو عليج لو على عمه ذكرى الله يرحمها جنت اتمنى وحده منكم امي من كثر ماشفت حنان منكم واليوم اريدج تصيرين امي وام مرتي وبيبيه جهالي لتحرميني من هاي النعمه احلفج بعزاز گلبج انطيني بان من گلب راضي واذا بيوم أذيتها كولي انت مو رجال وشسوين اني قابل وممنون ومااخليج بيوم تتندمين وراح اتعب واشتغل لحد مااوفر الها العيشه التستاهلها بس كولي راضيه وشوفي شون راح اداريها
بديعه : استغفر الله شحجي هسه
مرتضى : ارضي عمه ولتخلين بنتج بيد غريب اني مثل ابنج وكدام عينج والتردي يصير بأذن الله
بديعه : واذا أذيتها بيوم
مرتضى : على كص رگبتي ماأذيها بعيوني وحق الله وكتبه ورسله لميني عمه ابنج ضايع ومحتاجج ومحتاج بان فوك متتصورين
بديعه : هذا هو يمه هيه الك وان شاء الله تشوف الخير عليها وهي هم تعيش بخير بجاهك
دنك باس ايدي وراسي وطلع فرحان شسوي بتي تحبه اقلها اريح گلبها ومااكسر بيه مااريد بعدين تلومني وتكول من وراج مااخذت الاحبه ماحجيت ويه بان ولا كعدت وياها خلي هي تنطي قرارها
شرهب : طلعنا وره الظهر جنت ممصدكه راح اروح لصالحه وهلمره مسيطره يونس يدخن ومحتار ومبين اتورط من اخذنا واني وعمه كاعدات ليوره وحدتنا تفكر شون تتصرف مرتضى كاعد بصف عمه وصافن مدري يفكر بان لو يفكر شراح نسوي يونس طلب من مرتضى يخابر على عبيد لازم يكون موجود ومابلغه على شنوو بس كال عدنا شغله مهمه اول ماوصلنا للبيت
يونس : مثل ما وصيتكم بليه عياط وصياح
شرهب : انعم من صوت الكناري بس يله خلصونه
دك الباب مرتضى
مرتضى : اكبر غلطه اجيتن ويانه
خوله : شخبصوتنا قابل لازمات سجاجين
فتحت الباب سما
سما : هااا هلووو شونكم
شرهب : زينين شوو وخري دفعتها وطبيت
شفت صالحه كاعده وعبيد الله شكد احبكم ذوله الثنائي عشقي
كعدت وحطيت رجل على رجل
صالحه : خيير جااين وهازين طولكم وانت المفروض ادور على امك مو لافي عدهم
مرتضى : وينها امي مو كدامج صار اشهر مابقيت مكان مادورت عليها
صالحه : ارجع دور بعد وبعد لو خوله نستك امك
خوله : على اساس شون ام مو هيه طلعت للسوك وضاعت ولازم يدور عليها هااي وحده باكت رجلها وفلتت بملاييين حلوه تلكيها كاعده على البحر ومتونسه لو بلديسكو تگيت بفلوس رجلها وتركص وانتي كاتلج الهبري مكابله عبيد وكاعده
عبيد : شرايده خوله شجابكم
شرهب : بربكم خلوني اني احجي
يونس : شرهب مو وكتها
شرهب : لا يبن ابويه وكتها عيني صلوحه وانتي سماوي حضرن غراضجن مالجن مكان هنا بررررره
عبيد : هااي شتحجي شنو بره
صالحه : هههههه تخبلت من الكتل الجانت تاكله
خوله : مكالت شى غلط انريد البيت
عبيد : يابيت شبيكم انتوو
خوله : بيت امك صار بأسم يونس وناي وانتم مالكم مكان بعد بيه لهذا بليه صياح وفضايح فرغونا البيت
صالحه : صخام الصخمكم لك عبيد هاي شتحجي
شرهب : لو اعرف انكليزي جان كتلك او اوكفي كيت اوت ذه هووس جان تكوم صالحه وتعيط طلعت العرامه مالتها
صالحه : البيت بيتنا ومنطلع منه لو تنگلب الدنيا وانتم اذا اجيتو بعد اكسر رجلكم احجي عبيد شبيك ساكت وصافن بوجهم ولد الگلب جايين مثل العصابه هداده وتردون نطلع من بيتنا
خوله : مو بيتكم انتم هنا نزل كلها ايام واطلعون بره ورجلج ميكدر يحجي لان مبين استوعب السالفه
الاحسن الكم تلكون مكان ثاني هذا البيت راح ينباع وانت مكان ماتشتري بيوت وتضيعها لفي مرتك وبنتك واشتري اكيد عندك لو هم انطيتهن لاشواق
عبيد : اروح لامي افتهم منها
يونس : ميحتاج تفتهم هاي نسخه من التنازل تكدر تقراه واذا تريد روح لمحامي وتأكد منه
صالحه : كله من وراج اعرفج حقيره وتردين اطلع منا لو تطلع نخله براسكم مااعوف هذا البيت واذا عفته اهدمه عليكم مو اني الاعوف بيتي
شرهب :جم مره عفتي مرتين بيتين مابقى على هذا شكد حاولتي وأذيتي وسحرتي وتاليها صفه لاخوتي حيييل هو مكانج الشارع
سما اخذي امج وروحن لمن ملابسجن وهاااا منريد اي قطعه تضل بلبيت لان تلعب نفسنا من ريحتكم جان تنزع النعال وجيتت عليه لزمها يونس ومرتضى
صالحه : اني يم الوصخ تربيه الشوارع بت جليله الكحبه اطرديني اني عمشه ماكدرت ولا تجرأت تطردني تجين انتي بكد زري تتأمرين وبخشم عالي نسيتي شون كسرت خشمج وشمرته مااجه بيه وخرت واحجي بثقه وشماته وياها
شرهب : لا مانسيت وهاي كعد اردها يله لج اخذي بتج وبره مالكم طابوكه بهذا المكان
يونس : كااافي شرهب
خوله : خليها البيت بيت اخوتها وبراحتها
عبيد : اذبحكم اذا اندكيتو بيه وطلعتوني هذا بيتي وبيه ورثي
خوله : مالك ورث اعتبره انطيته لاشواق وكول لاخوك هو هم ماله ورث يعتبره اخذته ساهره وطفرت وسالفه التهديد ميفيد عتك اكدر اجيب قرار محكمه يطردكم مثل الجلب من البيت بس راح ننطيكم مجال ونصير افضل منكم خلال اسبوعين تشوفلك مكان وتطلع واذا ماطلعت يعبيد راح تطلع بفضيحه بنص المنطقه اخذ بتك ومرتك الحيه وجفينا شرك
صالحه : لا عيني اذا عبيد يطلع اني مااطلع وايدكم الكم خلي واحدكم يجي بعد هنا لا اعزي واصخمه لا تشوفني ساكته احتاريت بساهره وانتم لعبتوها من ورانه اله ابجيكم دم وانتي يلوصخه اخاف خليتج متشمين ريحه الراحه والخلفه هلمره لا اخليج تمشين بشارع وتهلسين بشعرج واتفلي بوجهي اذا ماسويتها
شرهب : شون بله كوه يطلعوني من طوري مو اني انطيت كلمة مااعلي حسي
ام السحوره شوايه العكارب خناكه البزازين اذا تقربتي مني وطخيتي خصله من شعري كتلتج على ايدي عبالج اني بت ال١٤ السحلتيها من كصيبتها لا حياتي اني اليوم بت ٢٣ سنه بلعمر و٧٠ سنه بلعقل يعني مااسكت ولا اخاف ولا احسب حساب لاي شى لمي وصاختج واطلعن بره البيت مو الكم وشايفين هاي الحياطين الزموها واركعو راسكم بيها وكولو امدانا افترت علينا
عبيد هجم على يونس ولزمه من هدومه
عبيد :تروح وتتنازل وترجع البيت انت مالك حق بيه
يونس : مااتنازل
مرتضى : عمو على كيفك هي بيبي سجلته
عبيد : الله ياخذها ما ماتت وخلصنا منها هيج تسوي بينا تحطنا بيد الزعاطيط تلعب بينا امشي لكم اطلعو بره
لا اجيب السلاح وادفنكم هنا
يونس : مستعد انطيكم حصتكم واطلعون
خوله : ياحصه ياخذون سم بگلبهم
صالحه : بگلبج لج خوله الزمج هسه اخليج شون من طلعتي تملخين بروحج بلشوارع
خوله : هذا الدرب بأذن الله متحصنه منه يعني اذا ترحين واتجربين مراح تحصلين شى
عبيد : اي حصه مااريد تتنازل عن البيت وتولي
يونس : وعلى اي اساس اتنازل البيت وصار بأسمي واسم اختي واكبر واحد ميكدر ياخذه من عدنا كتلك انطيك حصتك واطلع
عبيد : احركه للبيت ومااسلمه الك يلسكط قشمرت امي مره كبرت واخرفت واكلت بعقلها وخليتها تتنازل خلي اروح لجوحي واحنا نعوف شون نتصرف
مرتضى : هو ابويه حاير بفلوسه ويفتر ومداري بروحه مراح يساعدك بشى
صالحه : لك انت وياهم تخبلت اخذو حقك وحقنا وطابك وياهم
يونس : عرضي بعده اطلعو من البيت نبيعه واطيكم حصتكم وكافي مشاكل
شرهب : عياط صالحه ولطمها وغلطها خلاها تفقد السيطره على نفسها جنت اتفرج على حركات اعصابها ومستمتعه مو بيدي ردت تعيش ولو شويه من العذاب الشفناه على ايدها متحملت وكعت وسما حارت بيها
شرهب : انتي هيييي سما وره ماتصحه امج خلي تلم غريضاتها وسحورتها اذا مصارت زحمه مابينا اندور وراجن
خوله : يله يمه نرجع للبيت نرتاح عبيد ايااك تأذي واحد منهم اعرفك غدار وروح ابويه الجمعني بيك بأسمه اذا اذيت واحد بيهم اخليك العمر كله متشوف الشارع فرغ البيت بالحسنى واطلع منه بكرامتك افضل ماتطلع كدام الناس بأمر محكمه وتصير مضحكه للكل
يله يمه امشوو
شرهب : طلعنا من البيت بعد ماعفنا صالحه مدده وفاقده وسما حايره بأمها
وين نروح هسه
يونس : ارتاحيتي
شرهب : لا
يونس : ليش بله
شرهب : تمنيت اجرها من دشداشتها واشبعها طن جلاليق واطلعها بطرك ملابسها هي وبتها جان صدك مي بارد ونزل على گلبي
يونس : على اساس انتي قصرتي
شرهب : والله ماسويت شى احجي بكل هدوء ونزاكه لو بس منطيني الضوا الاخضر جان بدعت كله من وراك متشجع المواهب المدفونه
رجعت لبيت يونس نظفت البيت وبقينا كلنا سوه جنا ننتظر شراح يصير لان اكيد مراح يسكتون
ثاني يوم راح مهدي جاب ناي وابنه واجوي اخذوني لان ناي بعدها مطايبه وتتعب
ناي : حجيت لمهدي على سالفه البيت وهو ساكت بعدين كال
مهدي : وانتي حصتج راح تسوين بيها
ناي : مالي حصه بهذا البيت يبيعون ويشترون بيت جديد وبيبي كالت نسجله بأسم يونس رغم يونس يكول اذا عمامي مااخذو حصتهم اسجله بأسم بيبي
مهدي : ورأي منو راح يمشي
ناي : رأي بيبي وراح يتسجل البيت بأسم يونس
مهدي : وانتي
ناي : الي بأسم اخويه معناه بأسمي احنا واحد سواء اني او شرهب او هو جيبنا واحد وماكو فرق بينا
مهدي : مرات احسج تحبيهم اكثر مني
ناي : كلكم نفس المعزه بس تختلفون بالادوار همه اخوتي وانت زوجي
مهدي : وبس
ناي : وحبيبي وحياتي وكلشي وكلاشي
مهدي : كلاوجيه
ناي : ههههه تعبت خلي انام
مهدي : نامي بين منوصل
شرهب : اخذوني وياهم دخلنا لبيتها واخذت سيف بعد ما تأكدت وضع ناي زين
مر شهر كامل واي صوت منهم ماكو حتى محد تقرب او تعارك او سوه حركة وهذا الشى قلقنا يونس كال عبيد يفتح ويشتغل وضعه كلش زين مبين ضربو كلامنا عرض الحايط ومهتمو
خوله : كتلك مو اوادم روح اشتكي عليهم وطلعهم
يونس : ماردت هيج تگبر
خوله : هي جبيره الشغله من كاعها روح اشتكي وخلصنا راح يضيعون الوكت علينا والله اعلم ام السحوره شمخططه
يونس : باجر اسأل شنو الاجراءات وابلش بيها
شرهب : اجاني تلفون من عمه تكول بيه وصوت ضحكتها عالي
هااا عمتوو خير
اليوم طلعت مفرزه بأمر من القاضي بأخلاء البيت وعمج صار دجاجه كدامهم
شرهب : لا بربج صدك
خوله : خليت يونس يشتكي صار ايام يركض بيها راح يطلعون من البيت وهمه مسحولين
شرهب : ايييي الله يفرح گلبج
خوله : ناي وين
ناي : اخذها مهدي وراحو للكوفه
خوله : شعجب ماكالت راح تروح
شرهب : رادت تبلغج ومهدي كال الها نروح وحدنا
خوله : خفت عابتله ميته على شوفته غير لوما ناي اني اروح ويااه شوكت طلعو
شرهب : من الصبح وهسه على چييه
ناي : من رحنا للسيد دخلنا استقبلتنا العلويه زوجته وكالت تفضلو دخلنا بغرفته وهاي اول مره ندخل اباوع عليه حييل تعبان وجهه منتهي ويكح سلمنه علينا ومصدومين من حالته
خيرك عمو
السيد احمد : خير يابنتي
مهدي : سلامتك
السيد احمد : الله يسلمك بشريني شون صرتي
ناي : فضل الله وفضلك احسن بس مشيتي بعدها ثكيله ومرات اتعب ومااكدر اكوم
السيد : العافيه درجات
ناي : عمو حاسه وضعك مو طبيعي
السيد ؛ يوم مااجت عمتج كتلها الحيل راح ومن حجت سالفتج استخطيتج لانج يتيمه وانيال الي يفرح يتيم مو عاد يشافي بأذن الله انتي اخر حاله اعالجها وردتها شفاعه تشفعلي
ويارب تشفعلي وتكون سبب بتخفيف ذنوبي
ناي : كمت اخاف عموو شصاير بيك
السيد : بيه المرض الصالح
مهدي : شنو هذا المرض
السيد : السرطان
ناي : لزمت گلبي خوف عليه وعلى نفسي هيج رجال شون يتمرض دمعت عيوني من القهر
مهدي : وشون صالح ياستار اكو اتعس من هيج مرض الله يشافيك
السيد : لتكول لاي مرض تعيس او موزين كلشي يجي من الله هو خير وهذا المرض بلذات ابتلاء عظيم من رب العزه لعباده الضعفاء ليختبر صدق ايمانهم وقوه صبرهم
وحسن ضنهم بالله قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ
مهدي : مااعرف سيد شأكول الك يمكن الشى الوحيد الاكدر اكوله بلعافيه عليك على ايمانك
السيد : ام سيف بنتي شبيج
ناي : شون اذا صار عليك شى
السيد : اذا على حالتج فأنتي متحصنه بأذن الله مو اني صاحب العلاج بنتي الله سبحانه وتعالى هو صاحب العلاج والله حي لا يموت عندج القران هو اعظم علاج استعيني بيه واتذكري اني مجرد سبب لا اكثر وعلاجج موجود ولاخر العمر شيصير وشتحسين الزم القران واقرا والتزمي بصلاتج وبلصدقه والتسبيح بأذن الله محد يمسج بهاي الاعمال القذره
ناي : وانت عمو صحتك
السيد : اريد منج الدعاء الاقي وجهه الكريم بأحسن صوره انتي يتيمه ودعوه اليتيم عند الله عظيمه كومي اقرا شويه عليج
ناي : وين بيك حيل
السيد : كل الحيل من اقرا كلامه عزوجل ينطيني القوه والراحه تعالي تقربي وسمي بأسم الله
ناي : جان يقرا وابجي مو على وضعي لا على وضعه وصحته مجرد هذا الانسان اتخيله يموت حيييل اتأذه طلعت منه واني كاتلني القهر حتى مرتاحيت هاي المره مو مثل كل مره حتى مهدي حسيته متأثر عليه
رجعنا والدنيا طافيه بعيني
شرهب : دخلت نايه ضايجه شبيج عفيه صار شى عيونج حمره اكو شى
ناي : السيد تمرض وديموت
شرهب : خرب حظج ناي وعلاجج
ناي : ياعلاج اني همي هو لو شايفته شون رجال خير ونور النبي كله بوجهه من تشوفي تحسين صدك الدنيا بعدها بخير
شرهب : الله يشافي ويعافي هسه عمه تموت قهر لان حيل تعزه
ناي : اريد انام تعبت من الطريق
شرهب : تعالي طبي ابدلج ونامي
من سمعت عمه شفت بعينها الزعل صار سنين مااشوف عمه تنقهر على احد بكد قهرتها على السيد اني مشايفته وانقهرت عليه من كثر ميسولفون بيه
ناي : وضع مهدي مو طبيعي صار يومين يكول شغل ويروح بلساعات وتالي الليل يرجع
شرهب : شبيج مامرتاحه
ناي : تلاحظين شى
شرهب : شنو
ناي : مهدي مكعد يتواجد بلبيت ودوم طالع
شرهب : مصادق عليج ويعرف وحده
ناي : شنوو
شرهب : اكو غير هذا التفكير الطايح حظه نفكر بيه اول ما الرجال يتغير
ناي : يجوز صدك
شرهب : اتقي الله الرجال كل الوكت ياشغله يا مكابلج وكاعد واذا يطلع ويه عبد وصلاح ويخابر كل شويه اخاف محتاجه شى بعد وين يلحك يتمعشك
ناي : لازم اطيب وارجع مثل الاول
شرهب : ان شاء الله تعوذي من الشيطان وشيلي هاي السوالف من راسج
بان : عرفت امي رضت على الزواج ودزيت خبر لعمه بلموافقه جنت ممصدكه ومنتظره يوم يوم البس حلقه تكون بأسمه من يوم ماكعدنا ومصار لا اتصال ولا بعد اجه وهذا الشى ضوجني
شهر التاسع ٢٠١٦
يونس : دكيت القطعه وعرضت البيت للبيع
خوله : واخيراً طلعو منه
يونس : وراهم سالفه مااتوقع هيج يطلعون
خوله : لوما قرار المحكمه ولا يطلعون
يونس : هم گلبي لاعب منهم
خوله : شون لعد
يونس : انتي ديري بالج على نفسج ولطلعين وحدج اخاف يصير شى بلشارع
خوله : تخاف على عمتك
يونس : هيه الخير والبركه
شرهب : البيت مدينباع وياهو اليجي يطب اله ينقبض روحه ويطلع يركض منه
خوله : وتاالي صار شهر على هذا المنوال
مرتضى : خلي اكلكم شى اليوم سمعته
يونس : خير
مرتضى : طاش بلمنطقه البيت مسكون وكله اشباح وكلها كامت تخاف منه
خوله : من صخم الله لوجهه لخالتك الادبسسز متكعد راحه
يونس : منو گلك
مرتضى : ولد صاحبي شفته اليوم بلسوك وكالي شنو سالفه بيت جدك المسكون واشكال الافلام عنه
خوله : حتى لاينباع
يونس : واني اكول شون طلعو هيج
خوله : هسه حتى اذا تبيعه مراح يجيب سعر بتراب الفلوس كسروه الله يكسر عمرهم
يونس : والحل ماضل وكت ايام وبان اداوم وهاي السنه هم مااجيبهم
مرتضى : كله ولا بان اريدها تجي مو لعبت روحي
خوله : لهاي اللحظه مخصمنا سالفتكم
مرتضى : خلي نروح نهايه الشهر نعقد
خوله : هااا ولك شو عقد گبل
مرتضى : اريد اروح اشوفها احجي وياها اخاف حتى اخابرها لتسمع امها وتخرب الشغله
خوله : مو هو بكيفها يله شد حيلك وحلقاتكم عليه
مرتضى : تسلمين عمه شايل فلوس الحلقات وحتى النيشان منا لحد ماتفرج اذا مرهمت سالفه المشتمل لبعد السنه اكوم واجر شقه واتزوج بيها
خوله : انت اخطب ولبس الحلقه والزواج بعد الله كريم
بان : واكفه كدام القاضي ويسألني راضيه عن الزواج وبگلبي اكول شون مراضيه وهو حلمي الخلصت كل ايامي اتمناه بأذني اسمع موافقته وصرت مرته
بنفس اليوم كطعت مهر سيد وقاضي جنت فرحانه لدرجه مااكدر اعبر عن احساسي
اخذتني عمه ويونس ورحنا عقدنا تمنيت ماما ويايه ماقبلت تجي لان متكدر تعوف بيبي وبلال واعرف بالاصل متتحمل تشوفي اتزوج وقبلها بيوم نزعتني الاسود ماقبلت اعقد بالاسود كالت فال موزين
مرتضى : مبروك
بان : الله يبارك بيك
يونس : مبروك اخويه واخيراً خلصنا منك
مرتضى : يوم الك
يونس : تسلم يله نتوكل ناي وشرهب منتظرينا
شرهب : اول مدخلو ركعتهم بهلاهل والجكليت ردت بان تفرح لان اكيد بكربلا بسبب الحزن محد راح يهلهل الها
ناي : بلخيرعليكم تستاهلون
شرهب : لا تكولون وحيد كل احنا اخوته واكمز واهلهل كلللووووووش
مرتضى : والله وكفو بنت العم
ناي : تفضلوو مسوين غدا للعرسان
مرتضى : بس لا شرهب مسويته بعدني عريس حرام عليكم مالحكت افرح
ناي : هههههه جاهز لا اني بيه حيل اطب ولا شرهب قبلت تطبخ
شرهب : مراعاه لظروفك
خوله : ورجلج وين
ناي : وصل الاكل وطلع عنده شغل
كعدنا ناكل كلنا واباوع على بان شون فرحانه ياترى مرتضى من يعرف هيه تحبه كل هذا الحب ومن سنين شراح يصير بيه
بعد اشهر :
امشي فرحانه واخيراً تحقق حلمي وهاي اني صار شهر اداوم دخلت كلية آداب الجامعه المستنصريه مردت ادخل مسائي واثقل على يونس
٢٠١٧ سنه حلووة بعمري لان اني وناي خطوات بسيطه على تحقيق حلمنا
ناي السنه الاخيره وتتخرج
واني السنه الاولى لهاي اللحظه ممصدكه اني طالبه كليه وابدل الصبح واخذ اوراقي وجنطتي واروح للكليه حالي حال كل الطلاب
بس نفس السنه مجانت حلووه على غير جانت جحيم
مكدرت ارجع لبيتنا لان لهاي اللحظه ناي مرات تتعب وتتخربط مرات استحي لان حيل تأخرت يمهم رغم مهدي الشهاده لله ابد مامحسسني اني غريبه ويتعامل ويايه وكأني وحده من البيت وجم مره اريد اروح وتتوسل ناي حتى ابقى
راجعه من الدوام هلكانه وانزع بحذائي متملخه رجلي ناي اليوم مداومت لان مداوم كل الاسبوع تتعب
كاعده
ناي : اي قبل شويه كعدت
شرهب : شونج اليوم
ناي : دايخه اصب حتى ناكل
شرهب : وين بيج حيل اني اصب سمعنا عيطه قويه صوت وداد
ناي : شكوو عفيه
شرهب : ركضت حافيه اشوف شصاير لان وداد صوتها لحد يمنا نزلت وطلعت بلشارع ودخلت للبيت مالتها جفتت عليها لان خفت حيل صوت عياطها ولطمها يجبر الواحد يطب ركض عليها شفت هاي المره التشتغل يمها تريد تسكتها وداد تملخ بشعرها
شكووو شبيها عفيه
ابن اخوها صلاح انكتل بعركه عشاير
شكرا لزيارتكم عالم روايات سكيرهوم
