رواية أرض الخناجر الفصل الواحد والأربعون بقلم ايلول
بِـ ڪِل ضَياع الروح أَريدَك ،
آنة ڪِل دروبي أَحِسها خِطوط إِيدَك ،
══━━━━✥◈✥━━━━══
رنـــه :: گـــلبي يدك بقوة وخوف اتلفتت ليوره صوت هاسكي سمعته ينبح بس بعيد، صوت الهوا وهوه يحرك السعف يرعب وصوت الطيور بالقفص يتطافرن بخوف جنح يصتدم بجنح
تقربت اكثر وعبالك اعرف هالوكفه المنو همست صوتي مختنك وبعدني ما شايفه وجها
-ريـــمه.
وبنفس اللحظة التفتتلي بفزه فزيت مخروعة وهي تعاينلي فاتحة عينها على وسعها ما مستوعبة لحظات اعاينلها ساكته خايفه منها ومن السجينة اللي بأيدها
رافعه ايدي على كيف مادتها الها واحجي بصوت يرجف
-ريـــمه.
وهيه حتى ماترمش بس فاتحة عيونها بعيني حيل وفجأة شهگت بفزة وشالت ايدها الكاضه بّيها السجينة رجفت ايدها بصدمة شمرت السجينة بالگاع وتعاينلها خايفه وترجف ترجع ليوره بخطوات ما ثابته وتمسح بأيدها مشيت بساع اريد اكضها
-ريـــمه.. ريـــمه.
طاحت بالگاع تستند على اديها وترجع للحايط ترجف وجن مو سجينة الگدامها، مرعوبه ركضتلها كعدت بصفها على اركبي كضيتها بس اريد احاجيها وهيه تشهك. بخرعة عبالك ما تتنفس وانه اكض بأيدها مخروعه واحجي وياها
-ريـــمه.. ريـــمه
وهيه تشهك بصوت عالي وعيونها فاتحتهن حيل، روحـــي فرفحت وانفتح باب الحوش صرنه وجهه بوجهه وي طــروادة صيحت ابجي وارجف وهي بأيدي مچلبه وخايفه ما تشوفني ماتشوف غيّر السجينة.
وطرواده مصدوم من منظرنه اجانه يركض بمجرد التفتت اريد احاجية طاحت ريـــمه بأيدي مغمي عليها لا تحرك ايد ولا رجل شهگت اريد اصرخ وطرواده سد حلكي خازرني
-اششش اششش صوتج.
وانه متسودنه ابجي بخوف جراها من ايدي حط راسها على رجله ويطك على خدها وانه زحفت مكابلتهم وابجي اشرحله شلون لكيتها وأكفه وهوه مستمر يطك بخدها ويحاجيها
-ريـــمه... ريـــمه .
وفجأة غمض عيونه حيل داير وجهه منها وشفايفه تتحرك
سديت حلكي بأيدي ابجي أريد اصرخ رد عاينلي وحط ايده على حلكه
-اششش، اركضي كعدي عــفراء.
حجاها وحط ايده جوه راسها وايده الثانية مسح وجها ركضت للبيت ما اشوفن دربي طبيت للغرفة هزيت عفراء من جتفها وصوتي مخنوك
-عفراء عفره.
فزت بخرعه رافعه اديها ومضيكه عيونها من ضوه الگلوب وبس لمحت وجهي ودموعي كعدت على حيلها خايفه
-كومي بساع ريـــمه طايحه بحوشنه.
شهكت وكامت وانه سبقتها فتحت باب الغرفه تلاكه وياي طــروادة شايل ريـــمه لطمت عفراء على صدرها وهوه يمشي الغرفته ويگله
طــروادة:: اششش اشش صوت ما اسمعلجن.
ركضنه وراه عفراء متسودنه وهوه حطاها على فراشه وصاح
-ماااي بارد رنـــه بساع.
عــفراء:: يمممه ريـــمه.
عفت عفراء تلطم وركضت مفرفحة ومن الرجفه والخوف ما اشوف شي وما اسيطر اكض الدولكه وتطيح من ايدي بساع كسرت ثلج حطيت عليه ماي وركضت للغرفة عفراء تقرأ على راسها وتبجي بخوف وهوه يگلها
-بس صوووتج صوتج.
اخذ الماي من عدي كعدت يم رجليها ساده حلكي بأيدي وابجي خنگ وهوه اخذ من الماي ونكث ايده على وجهه ما فزت شال هواي ماي غسل وجها ورد طكها على خدها
طــروادة:: ريـــمه.
عصرت عيونها قوي وحركت راسها على كيف وايد طــروادة بعدها على خدها رجع طكاها خفيف يحاجيها
-ريـــمه.. ريـــمه تسمعيني.
عصرت عيونها حيل ضايجة وتحاول تنگلب حتى تنام صفح، مدت ايدها لأيد طــروادة كضتها بين اصابعها توخرها من خدها ونگلبت نامت على صفحة وحاطه ايدها فوگ ايد طــروادة عاينتله يبلعم وشال راسه لعفراء أشرتله هيه
عــفراء:: عوفها عوفها خلّيها نايمه.
جر ايده منها بهدوء وداروا عليَّ اثنينهم وآنه بعدني دموعي تجري گال
طــروادة:: شجابها؟ شعدجن؟
مسحت عيوني بظهر ايدي وأتنقل بنظراتي بينه وبينّ عفراء شلون يعاينولي وعبالك يحققون وياي، وانه الشهگة خانگتني والخوفه ماجاي تروح من گـــلبي، اشرحلهم شلون لكيتها واكفه وابجي رجّعت عــفراء خلّت ايدها على راس ريـــمه وشفايفها يتحركن ما ادري شنو تقرأ.
اجه طــروادة يمي جر راسي الصدره يمسح عيوني ويگلي
-مابيها شي هسه ساعة ونگعدها كلشي مابيها.
وانه ابجي بحرگه ضامه وجهي بصدره ومن بين شهكاتي اكله
-عبالك جايه تكتل طيوري، واكفه گبالهن والسجينة بأيدها، والله لو واصلتهم بعد ريـــمه دوم ما احبنها.
طــروادة:: اشش لا ماجايه لطيورج يجوز نايمه واجت تمشي ماحاسه بروحها.
حجاها وجراني من ايدي طلعني للمطبخ فتح ماي السنك وكضني من راسي يدنيني على السنك حط ماي بأيده وغسل وجهي يحاجيني
-كافي عيــونج نمردن.
وخرت امسح بوجهي وهوه عيونه حمر من التعب والنعاس وكف يغسل وانه وراه احاجيه
-ريـــمه مريضه؟
تحسر يرفع اكتافه مايدري ودار عليَّ
-ما ادري مريضة لو تتظاهر بالمرض نمشي وياها ونشوف وين توصل، تعاي.
مشه گدامي للغرفة طبينه لكينه عفراء مغطيتها عدل وكاعده مكابلتها ايدها على خدها گالها طــروادة
-كعديها خل أوديها الاهلها.
شالت راسها عفراء تعاينله وتگله
عــفراء::لا، خابر سلطان گله ريـــمه اجت يم البنات ونامت هناه.
طــروادة:: سلطان مو هناه راح للمعامل، وسليم لو خابرته يتسودن هذا، كعديها عفراء هم خل افهم منها شعدها جايتنا نص الليل وبسجينة.
عــفراء:: انتَ ماجاي تشوف وجها شلون اصفر؟ خليها حتى لو ساعة ساعتين واكعدها ترد لبيتهم گبل لا أهلّها ينتبهون.
عصب طــروادة ضايج يعاين لعفراء وهي دارت وجها من عده عاينلي گال.
-روحـــي اكلي ونامي.
-شأكل حتى الچاي لكيته محترك، ما اريدن بعد خلوني يمكم.
عــفراء:: لا روحـــي نامي وراج مدرسه.
سكتت ضايجة طلعت من يمهم رديت باب الغرفة بدون ما اطبگه، طبيت الغرفتنا لگيت شمس كاعده بس ساكته تلعب ضليت يمها ابوسها واللعب وياها، الحد ما نعست كمت آصيح العفراء تجي يمها حتى انه انامن.
مشيت للغرفة ووگفت يم الباب بصف الحايط اثنينهم ساكتين كعدت بالگاع اعاين من فتحة الباب بتك عين
، متمدد على رجل عفراء همه بجهه وريمه بفراش طــروادة بالجهه المقابيلهم، حاط ايده على عيونه وعفراء تمسح على شعره وهو بصوت مخنوگ گاللها.
- لو ما حقارتها.
وماكمل حجايته زفر نفس بحسره وهي كالتله.
-والله ريـــمه مو حقيره .
يحجي بغصه وصوته مختنگ
طــروادة:: تدرين مرات اشوفنها ذيج ريـــمه الجاهل الضحكتها تفززني وتجبرني انسى كلشي واضحكلها.
بنتي النامت على صدري وبين أيديي .
ريـــمه الچانت تجيني تركض اشيلنها وتضم وجها برگبتي تشكيلي من سجاد لو طكها، الطفلة الطبيت بنص النار علمودها وتعلگت برگبتي خايفه تحترك.
اتمنى لو ضلت طول عمرها هذيج ريـــمه الطفله الاموتن عليها، يا ريت ما كبرت يا ريت ماتغيرت.
اعاين وحاطه ايدي على حلكي لان ادري بروحي على ساعة اشهك وينتبهولي.
عــفراء جرت ايده من عيونه وتعاينله مضيكه عينها گالتله
-هيه نفسها ريـــمه تربية امي وأبوي اهلها لطخوها بحقدهم وسمهم، بس بعدها ملاك.
هز راسه لا يحجي والغصه خانگته.
-الشيطان بعمره ما خلف ملاك، تطبعت بحقدهم وتوصخت بجيفتهم ريـــمتنا التكولين عليها ماتت، وهاي ريمتهم.
عــفراء مسحت على وجهه وبأصابعها تعدل حواجبه گالتله
-الله يحميها من شرهم وتخلص.
وهوه يتحسر بقهر رد حط ايده على عيونه جرتها عفراء وتعاين لعيونه گالتله
-انتَ عليمن حاير؟
صفن بعيونها ساكت غمض متحسر وحسرته تكزبر الجلد وهيه لو تمسح شعره توخره من كصته لو تعدل حواجبه، دنكت باسته بكصته وهي تگله
-سولفلي خويه حسرتك هدت حيلي.
مغمض عينه والغصة خانگته گالها
طــروادة:: حاير شني الاسويه! ريـــمه حيل بنفسي.
فتح عينه بعين عفراء وهي صافنه تحجي بصوت ناصي
عــفراء:: رايدها؟
رد حط ايده على عيونه وهو يگلها
طــروادة :: اذا اكلج ما ادري تصدگيني؟ ساعات روحـــي تلوب عليها وساعات اكرها ما اشوفنها وودي اذبحها.
كرهتها حيل عفره بعد ما گدرت اشوفنها بريئة نوبات انقهر عليها بس ارد اضوجن منها من ساعة حرگت الگيعان وانا هالبنيه اشوفنها شيطان شكد ردت أنسى بس ولا گدرت.
وعفراء حاطه ايدها على حلكها بقهر گالتله
-لو نعلك العشرة شمع ما يطونها، ولو دروا بيك رايدها يزوجونها الياهو الچان حتى يحرگون گلبك.
طــروادة:: ما اريدنها انا لو رايدها اخذها محد يوكف بوجهي بس ترى انا ما رايدها شبيه تسودنت احط كتالي ببيتي أأمن على بيتي وعلى اخوتي يم شيطان؟
مندمجه وياهم وبجت شمس كمت بساع فتحت الباب عاينولي اثنينهم حجيت مرتبكه وعاينت لريمه الغاطه بالنوم صوت نفسها عالي عبالك صارلها سنة ما نايمه
-عفره اريدن انام وشمس تبجي تعاي يمها.
وخر طــروادة من رجلها وهي كامت تعرج لان رجلها خدرانه، وهوه سند ظهره على الحايط مسح وجهه بأثنين اديه ومن نزلهن عاين الريمه وبساع دنك وهو يگلي
-غطي شعرها رنـــه.
طبيت للغرفة عدلت الشال على راسها وعدلتلها الغطا وكفت عيني لطرواده كام اجه يمي گال
-روحـــي نامي.
حجاها وطلع للحوش عاينت لريمة نظرة اخيره ورحت للغرفة دفعت الباب عفراء تسوي ممه لشمس گتلها بنتر
-شني طــروادة يريد يتزوج ريـــمه ؟
فتحت عينها خازرتني وانه احجي بغضب واكلها
-ما ارضى ترى النوب تضل ميلاد يوميه جايتنه ولازم احترمها علمود ريـــمه والله ما ارضى يتزوجها.
حطت ايدها على حلكها خازرتي
عــفراء:: وروح امي لو طلعت هالسالفه يا رنـــه اچويچ ليش تتصنتين؟؟
كعدت بفراشي ضايجة وهي تحجي
عــفراء::هوه اصلاً ما رايدها ولو رايدها اهلها ما يطونها لا تضلين تنكزين من يمج.
تمددت اعاينلها وبعدني ضايجة وهيه هم كلساع تخزرني گالت
-رنـــه ديربالج تحجين يم ريـــمه بهالسالفة اموتج.
-ما احجي
-أحلفي
-اهوووه
غطيت راسي ودرت صاحت
-اصيح لطرواده؟ شو ما تنرردين. من عدي صايره رنـــه احلفي گتلج.
درت عليها انتر
-يابه ما احجيلهاا ما احجيي شني زعطوطه انه؟ ولعباس ما احجيلها.
وغطيت راسي اريد انامن وهيه ضلت تحجي وياي بهدوء غفيت بدون ما آردن عليها.
ريـــمه ::سكينة واطمئنان يحيطن جسمي وروحي، كأنما نايمه من بعد تعب وركض لأيام طوال دفئ يلملمني الداخله وينتزع من گـــلبي كل خوف، ذهن صافي وعقل متحرر من الاحلام والكوابيس اللي تلاحكني كل يوم
لاول مره ما احس بثگل على صدري ولا ظلّ يخنگني
اول مره احس حتى خيوط غطاي حنينة عليَّ اول مره تلملمني الراحة بهالطريقة بحيث مستخسرة افتح عيني وأضيع ثانية من راحتي.
تكورت على نفسي وانه مغمضه عيوني اضم الغطا عليَّ اكثر ومقربه رجليَّ الصدري، فتحت عينيّ براحة، رجعت غمضت وفتحت من جديد استوعب، شهكت وكعدت على حيلي مخروعة وانه اشوف طــروادة گدامي، مخلي باب الغرفه مفتوح مستند على الباب غافي وهو گاعد
تلفتت ما مستوعبة، بالجهة المقابيلي نايمه عــفراء. وبحضنها بتها على الزوليه بدون فراش وعليهن بطانية، وانه من صدمتي ضليت كلساع اغمض وافتح ما مستوعبة شجابني هنا، گمت متخرذله عثرت بالغطاء طحت على اديي فزوا أثنينهم ، طــروادة من فزته الباب طك بالحايط وشمس گمزت تبجي.
وكفت اجر بعبايتي البسها وروحي رايحه واحجي بصوت يرجف
-انه انه شسوي هناه؟
عــفراء :: اسم الله الزهره.
حجتها وشالت بتها الحضنها، وطرواده يمسح بوجهه وانه مثل المسودنه اتلفت بيّنهم خايفه واحاول بس افهم شعدي ببيتهم، وكف طــروادة يم الباب يعاينلي مضيك عيونه ويحجي بثگل
-اسألي روحج شعدج ببيتنا.
عــفراء:: طــروادة!
التفتت عليها خازرته وهوه تقدم خطوة وكف كدامي شلت راسي أعاين بوجهه
طــروادة:: شعدج بحوشنه نص الليل؟ عليمن مودينج شتذبحين؟
يحجي وانه عاكده حاجبي ما فاهمه شي درت عيني لعفراء تسكت ببتها حاجيتها صوتيّ يرجف
-عفراء والله ما جايتكم انه.
ضحك درت وجهي عليه گال
طــروادة:: ريـــمه ما تعبتي تجذبين وتغطين على اهلج؟ كليلي ودوني اسوي هيج وهيج وماگدرت بس لا تجذبين عليَّ.
مسحت عيوني يحركني حلكي ناشف وگلبي يدك حيل خانگتني العبره
-ما مجذبه والله العظيم ما مجذبه، عفراء والله انه ما جايتكم.
طــروادة:: بس بطلي جذب شني ما جايتنا شتشوفين روحج بفراشمن چنتي نايمه؟
درت عيني للفراش ورديت اعاينله وألتفت العفراء مصدومة ما ادري بشنو ابرر وشنو احجي ما فاهمه شي وعقلي مشوش گالت عفراء.
-ريـــمه البارحه لگيناج طايحة بحوشنه.
-لا والله العظيم ما جايتكم ما جاااايه ليش ما ما تصدگوني والله ما مجذبه.
وطرواده ضحك بأستهزاء داير وجهه وعفراء تعاينلي بحيره گال
طــروادة:: امشي اوديج لبيتكم گبل لا يصير الصبح يكعدون اخوتج وتبليني.
وكفت عفراء گدامي تعدل العبايه على راسي وتگلي
-ريـــمه يجوز نسيتي بس صح البارحة لكيناج بحوشنه، ما گدرنه نردج للبيت لان خاف ســليم ما يتفاهم وعباله شوف شعدج، هسه روحـــي دام بعدها الفجر ومحد گاعد، توضي وصلي وحاولي تتذكرين ليش اجيتي وعليمن.
هزيت راسي اي وطاحن دموعي مسحتهن وحطت ايدها على جتفي توديني وره طــروادة طلعت وراه گـــلبي معصور والنفس خانگني شلون اجيت وعليمن وليمت ما ادري.
طلعنه للحوش وعفراء ضلت واكفه بباب الهول تعاين علينه وهوه وصل لباب الحوش النوب رد مشه ليم الحديقة شال سجينة من الگاع واجه عليَّ مدها الي يأشر اخذيها،
مديت ايدي بتردد اصابعي ترجف اخذتها منه مشه ومشيت وراه اعاين للسجينة مو الدربي، عثرت بحجاره بس ما طحت وكف يعاينلي
-امشي.
مشيت يمه الدنيا بعدها توه خيط الصبح يخالط خيط الظلام ونسمات بروده طفيفه وهواء خفيف صوت العصافير بدأ يتغلغل لمسامعنا وهنه يتنقلن من شجرة لشجرة.
عاينت لوجه طــروادة وهو واكف ببداية سياج حوشنه، عيونه حمر وملامحه تارسهن التعب، وكفت كدامه ورفعت راسي اركز عيوني بعيونه احجي وصوتي احس ما يوصل الغيره
-ما مجذبه انه.
نزل عيونه لعيوني مضيگهن وصافن ساكت الشعر اللي نازل على جانب من كصته احسه وي كل نسمة هواء خفيفه يتحرك بتكاسل، بلع ريگه وشال ايده يمشيها بين خصل شعره ويبعد عينه عن عيني زفر نفس وهز راسه "أي"
رد يعاينلي ويحجي بهدوء
طــروادة:: اصدكج وأجذب عيوني؟
هزيت راسي اي آبتسم بزاوية شفته وعينه بعيني
-روحـــي ريـــمه لا تبليني.
-بعد ما اجيكم.
-ياريت.
-حتى الرنه ما اجي.
-تسوين فضل.
خزرته ومشيت وهو ضل واكف بمچانه رديت اعاينله شايله ايدي واحجي
-وانتَ هم لا تضل يوميه لافي على اخواني.
خزرني يأشر على حلكه
طــروادة:: اشش سدي حلكج وامشي لا احركج انتِ وابوج.
-لا تجيب طاري ابوي على لسانك اكصه.
اجاني يمشي بساع وعبالك وحش مو بشر يريد يعارك مشيت بخطوات سريعة اسبقة طبيت لحوشنه وسديت الباب گـــلبي يدك حيل نزعت عبايتي أتصنت يسب بأهلي يم باب حوشنه النوب راح، غسلت وجهي وكعدت بالحوش يم الحوض ايدي على گـــلبي وبس أحاول اتذكر شلون رحتلهم وليمت، ابد ما يجي ببالي غير اخر لحظة من جنت نايمه بغرفتنا يم هاجر، والباقي كأنما جنت نايمه بيه.
"""
رنـــه :: انه ما نايمه هواي وحسين وزهره من الصباحيات كعدوا ينكزون يسبحون ويبدلون للمدرسه، وانه ودي الطم راس براس واضل نايمه، طبت عفراء للغرفة تحجي
-شني رنـــه كومي يله تريكي وراج مدرسة.
غطيت راسي مغلسه جابت شمس وحطتها على صدري شبگتها وضحكت تجبرني اتخلى عن اي شي لخاطر ضحكتها بستها وكعدت عدل وهيه بحضني اعاين لعفراء تسفط الفراشات كتلها
-ريـــمه بعدها هنا؟
-لا راحت.
-وطرواده ؟
-نايم هسه شويه واكعده يروّح للكليه.
عفت شمس وگمت فتحت باب غرفة طــروادة اعاينله نايم بفراشة، لام رجليَّه الصدره، عفّته ورحت صليت وبدلت مشطت لزهره وعفراء تسويلنه بالريوگ؟ راح حسين كعد عبود نايم بالدوانيه هوه وسجاد، وانه بس كضيت زهره رحت لعفراء للمطبخ انشدها.
-اكعد طــروادة؟
-اي هم يله يلحك يبدّل ويتريك.
مشيت للغرفة كعدت كدامه على اركبي ومديت ايدي الزنده ادغه واحجي
-طــروادة.
تحرك ينگلب على ظهره دغيته بصدره احجي
-گوم يله مسنح ليش نمت على هذا الفراش مو حرام ريـــمه نامت عليه.
حط ايده فوگ عيونه جريتها
-اكعددد.
جراني من ايدي لفراشه خانگني ويعصر بوجهي
-شتردددين شتردددين.
وطب عبود يصيح
-حيل حيل موتها فكنها منها.
وطرواده يلفني بالبطانيه ويخنگ بيه طب حسين يركض طفر على طــروادة يحميني من عده ويفرغني ضحكوا أثنينهم.
طــروادة:: تفزعلها جا هيه شابعتك كتل؟
حسين:: عادي غير اختي خل تشبعني كتل مالكم غرض.
كعدت على حيلي وجريت حسين عصرت وجهه وبسته حيل خليته يصيح التوبه لمن هديته كالهم
-لو كاتلتني ولا هالبوسه.
ضحكنه وطلعنه من ضلت عفراء تصيح معصبه علينه ركضت يمها وطرواده رأح يسبح لمن طلع تريكنه سوه وطلعنه على اساس يوصلنه لمدراسنا والنوب يروّح للكليه بعدنا بباب الحوش واجاه بريا بأيده ملازمه وسجلاته من شافنه يم طــروادة فر راسه يريد يرجع صاح عليه
طــروادة::تعاال وين رايح؟
وكف بمچانه وانه اعاينله وي طــروادة دار علينه گاله
بريا:: ردت اروحن وياك للدوام لان مــيثم يتأخر للتسعه ونص يله يجي.
طــروادة:: تعال.
-لا روح هسه اجي بسيارة وهـــب.
-تعااال كتلك.
اجه مدنك ومايعاينلي شنو هذا زعلان، گلبت خلقتي اعاينله دار طــروادة علي ويحجي بيني وبينه
-نزلي عيــونج لا افگسهن.
-المن جبته انه اريدن اصعد گدام
خزرني ودفعني ليوره يم حسين وزهره وبريا صعد گدام يمه گاله
طــروادة:: بس نوصل اخوانك واختك لمدارسهم ونروح.
كح بريا مدنك وانه احجي وي طــروادة بعصبية
-انه اخته؟ امداني لو آنّه آخته
عاينلي طرواده بالمرايه خازرني وبريا ساكت وصلنه حسين وزهره ومشينا حتى يوصلوني لمدرستي هم رد گاله.
طــروادة:: عدك اول محاضره مهمه؟
بريا::اي والله هذا الدكتور حقنه
طــروادة:: بعد وكت نلحك بس نوصل اختك لمدرستها.
تنرفزت معصبه وبريا شال راسه عاين لطرواده وهو يسوق وعينه للشارع ما مهتم گاله
بريا:: انزل اتمدد بالشارع وتدوس عليَّ بالسيارة تبرد گلبك؟
وطرواده يحجي بهدوء ويگله
-ليش شكو؟
-اندري جايبني وياك تعاقب بيه چلبت اختك واختك.
وبس افتهمت هوه ضايج شلون يكله اختك نترت
رنـــه :: خاب ترى انه الما ارضى اصيرن اختك، وانتَ ضايج شنو تلكه مثلي احن وحده على اخوانها انه
طــروادة:: رنـــه!!
خزرني بغضب وانه محترك گـــلبي
-جا ما تشوفه
بريا:: يله عيني الحنينه ما گلنه شي
طــروادة:: سد حلگك لا تحجي وياها
رنـــه :: لا لا خلّه يحجي.
ما عاجبك شو استاذ بريا چا شبيه مو حنينه، لو ما حنينيه جا ما اطيتك لفات النهار كله الف واطيك.
بس انتم احفاد شعلان شلع كلكم چلاب ما يغزر بعينكم.
طــروادة:: وووولج رنـــه رررنه.
رجعت ليوره خانسه ووجهي ما يكصه السيف لامه اديه الصدري بغضب وبريا هم يصيح
بريا:: نززلني، يااابه نزلني لو رايح مشي اشرفلي.
طكاه طــروادة خازره ويگله
-سد حلكك.
وصلوني لباب المدرسه نزلت وسديت الباب بكل حيلي حسيت السيارة اهتزت وما التفتت ليوره مشيت بساع طبيت للمدرسة.
هوسه نص الصفوف ما يدرسون بعدهم بس احنه يحمسونه حمس النوب انطونه النتائج شفت درجاتي وردت انجلط جنت متخيلتهن كلهن تسعينات تالي حتى تسعين وحده ما عندي واعلى درجة ثمانية وثمانين واقل درجة سبعين گـــلبي راد يوكف من القهر، ضميتها ورحت للحمامات ابجي، النوب تذكرت البنات غسلت وجهي وطلعت ادور عليهن لگيت مــاسه سألتها گالت
مــاسه:: انه ليمت ما تجيني تلكيني طايحه لو انگليزي لو رياضيات تعودت كمت ما اهتم بس ضجت على جوري، درجاتها ستينات وماتت من القهر.
-خطيه شبيها هيه حتى امس شفتها ضايجه.
تحسرت مــاسه تعاينلي
مــاسه:: من رحنه للزيارة وزارت گبر امها الهسه البنيه مدري شبيها، حتى البارحة صــيهد گالها نامي يم البنات ما تحجي بس تتصفن والكاها خاتله لو بالحمام لو جوه الغطا وتبجي.
-ياا، اكلج خاف هذا اخوج يطكها ترى ولحسين طــروادة گال افصم ظهره لو طك جــويريه .
-لا ولعباس اصلاً مقهور عليها امس يگلي إسأليها خاف ببالها شي خاف تريد شي.
سكتت ضايجة على جوري باجر همه معزومين يمنه على الغده كلت من ارد للبيت آكول العفراء حتى باجر تحجي وياها.
بالطلعه ادور على عبود مالكيته دكلي هورن طــروادة مشيت صعدت ليگدام يمه واحاجيه
-ليمت رجعت عبالي عبود يجيني؟
وهوه ما يحاجيني زعلان من سالفة الصبح، اخذنا حسين وزهره وردينا للقرية، اول ما وصلنه عاينت لعبود وسجاد واكفين گدام باب الحوش ويمهم مازن شايل شمس يسولفون ويضحكون، طــروادة دكلهم هورن سلم وفات گبل ينزلني بالباب القديم من جهة بيت عمي شاكر.
طبيت للبيت عــفراء تحجي مكالمة وي منذر تضحك اسمعها، ضليت خانسه وخاتله لا يسألوني على درجاتي لحد ما عفراء صبت الغده وطلعت كاعدين على الصينية وگال طــروادة
-ها ست رنـــه بشري؟
دنكت اكل وانه اكله
-ناجحه.
-ناجحه وهاي هيه؟
ضليت اكل ساكته ما اطاني گـــلبي اتنازل واكلهم درجاتي مو ذيج الدرجات كلت خل اداعيهم بهدية حتى محد يگدر يكلي درجاتج ناصيه عاينت الطرواده كتله
-هسه اشوفك الدرجات شتطيني هدية هالمره؟
عبود:: انتِ لو درجاتج عاليه جا كلبتي البيت بالصياح والتطلب مادام خانسه مصخمتها.
هزيت ايدي ودنكت اكل سكته لوره الغده اخذت النتيجة ورحت لطرواده اطيتها اله وگبل كتله
-هالمره اريدن هديتي حصان.
وهوه يعاين بالدرجات ويهز بأيده
طــروادة:: على هالدرجات جلب هواي عليج.
-شبيهن شني السالفة حتى ستين ماعدي
عبود:: امداج لو انا ضال بالمدرسة هسه الشهاده متروسه ميه
عــفراء:: ناجحه ودرجاتها زينه جا شتردون غير بيت وطبخ وحسين وزهره وتنظيف مو زين تلحك تدرس.
طــروادة::رنـــه اريدن معدل انا اريد تنجحين اخر السنة كون معدلج يرفع الراس.
-اي والله.
مدلي النتيجة اخذتها منه گال
-عفيه حتى لو درجاتج مو كلش قوية بس انتِ سباعية وتگدرين بعد تجيبين درجات كامله.
ضحكت فرحانه
-هسه راح تجيبلي حصان؟
تمدد بالهول وحط راسه على المخده وي شموسه غمض عيونه وهمه يضحكون عليَّ عفتهم وطبيت للغرفة عاينت شويه بالتلفون ونمت.
"""
جــويريه :: واكفه بالحمام يم الغساله منتظرة ملابس جدي وجده يكملن، واجت هيه تباوعلي بحقد دفعتني ودخلت للحمام سدت الباب ودارت عليَّ اباوعلها ساكته ما فاهمه مدت ايدها جرتني من زندي بقوة شهكت موجوعه وهي تحجي من بين أسنانها
-فراشج ليش معزول على فراش رجلج؟ يمصخمه يمعزااايه فراشج وحدج شمسويه؟ كضج مو بت ووولج؟
تحجي وانه مچلبه بأيدها وگلبي يدك بخوف مو منها من صــيهد الهددني محد يعرف هالشي
-ما مسويه شي والله ما مسويه شي.
ضربتني على حلكي بأيدها الثانية وتفرك بحلكي
-معناها صدك صــيهد ما ماخذج والمره ما مجذبه
وبأثنين اديها ضربتني حيل تصيح
-لو انتِ مو بت لو صــيهد مو زلمه
ارجف بأيدها خايفه واحجي بخنك
-لا لا جده حبابه صووتج اسمعيني اسمعيني بسّ أسمعيني.
جريت اديها الزم بيهن اتوسل تنصي صوتها وهيه سكتت تباوعلي بغضب واني احجي بصوت يرجف
-اني اني.. اني احب انام بالگاع وهوه صــيهد يجي يمي.
ووي اخر كلمة جرت ايدها وضربتني على وجهي بقوه شهگت لازمه خدي وفاتحه عيّني بصدمة وهيه طلعت تصيح بغضب
-وينك شعلان، وليد.
نزلت من بايات الحمام ارجف كلها التمت بالهول وهيه تطك على رجليها وتكلهم
- تصخم وجهنه وشتهرنه.
واني واكفه اباوعلها بباب الحمام وندى وماسه وبدور كلهن واكفات على صفحة وسعاد بباب غرفتها وجده كعدت بالهول متربعه وتلطم على رجليها تنود وجدي وخالي وليد واكفين فوك راسها يردونها تحجي شصاير قطرة دم ما بقت بيه وهي تكلهم
- گالت سعاد وجذبتها گالت البت عايبه وهوه بس ساتر عليها ما صدكتها.
ووي حجايتها كلهم عاينولي وجدي بساع صاح
-الليله أذبحها
صــيهد:: تذبحمن؟
مجلبه بملابسي روحـــي احسها مفرفحة وهمه كلهم باوعوا لباب الهول من دخلوا صــيهد ووهب وجده هدت تغلط وتحجي وهوه مافاهم شي وكف يتلفت لمحني بباب الحمام وحالتي حاله رجع باوع الجده يگلها
صــيهد::خير
-ها يالسبع هااا يا چبير وليددد؟ وين العله بيك لو بيهاا دلينه وخلنه نندل دربنه لو هي مو بت وانتَ ما رايدها وخل جدها يغسل عارها لو يمه انتَ مو زلمه وتصخم وجهنه.
ووي حجايتها انفجر بغضب متخبل يشمر اي شي گدامه حطيت ايدي على حلكي گوه اتنفس مرعوبه وخايفه جدي يحجي بصفحة وخالي وليد بصفحة وهي من وحدها تحجي وسعاد تكلهم
سعاد:: انه بعيني شفتها جويريه فراشها وحدها وما يگرب صوبها، من الاول كتلكم مو بت.
دار عليها صيهد يصيح بغضب
صــيهد:: بالقندره افرك حلگج من تجيبين اسمها على لسانچ النگس.
ضربه ابوه راشدي وهوه ما مهتم من بينهم شايل راسه ويهدد ويغلط على سعاد ويأشرلها على رگبته بالذبح
-انحررج جوه رجلها وانعل اهلج واحد واحد.
شعلان:: بسسسسك ولك صــيهد تنوعلي، ليش مرتك مو صوبك؟
وگبل ما صــيهد يحاجيه حجيت اني والخنگه بصوتي اليرجف
-جذابه جذابه ننام سوّه بالگاع
صيح صيهد خازرني وجده تلطم وتكله
-توها تگلي ما ينام يمي.
-جذب والله ما كتلج والله ما گلت.
وصيهد مثل النار يتعارك وي هذا ووي هذا وكلهم يحجون ووهب يكلهم
وهـــب:: ياهي مالتكم بكيفهم وين ما ينامون ينامون شلكم غرض.
وهمه ما صدكوا داروا على وهـــب غلط وصياح وعلى ندى وجدي يگله
شعلان:: بت ماينعرف اصلها من فصلها مخزيني بين الوادم، باجر اخذلك من بنات غانم.
وهـــب:: هواي مناه لباجر ليش ماتروح هسه.
حجاها وهز أيده مستهزئ وهمه بعدهم واحد يجر طول واحد عرض وجدي يصيح على صــيهد، وهوه دار على خالي وليد گاله.
صــيهد :: لا تتيه مرتك معوزه الظاهر من انتَ مو يمها تضل تفتر، رجليها بالگبر وگلبها محترك من جوري تحير بيش تتهمها.
وسعاد هدت تغلط وخالي وليد ضرب صــيهد راشدي من جديد وهو ولا مهتم يتعارك وي سعاد ويگلها
-بگد الزمال صرتي وبعدج تدورين سوالف منّ طاحظج.
دفعه وهـــب يريده يطلع من الهول ويروح للمشتمل مارضى گلبت البيت بالغلط والصياح يتراجف كعدت على حيلي خايفه من منظرة وهو يتعارك وياهم يخوف
جراه وهب دخل يم امه للغرفه وجده من بعيد خازرتني بغضب وجدي يحجي وياها همس ووكف يعاينلي ويگلها
-وعود ذيج الساعة انا اكحل عيــونج بدمها.
وسعاد من يمها تگله
-عمي انه ما اجذب.
-يصير خير ونشوف ياهو اليجذب.
حجاها ودخل الغرفته جرتني رغد للمطبخ شهكت من كل گـــلبي وكوه اجر النفس، وهنه حايرات بيه يغسلن وجهي ويحجن وياي واني احس بروحي بس اريد اشرد من يمهم ما اريد آي احد، باوعت لماسه احاجيها مختنگه.
-ملابسهم بس نشفيهم راح أروح انام.
هزت راسها اي ولازمي ايدي سحبت روحـــي من عدهن وطلعت أروّح للمشتمل بس دخلت وسديت الباب نزلن دموعي ليش تتمناني انذبح واني ما مأذيتها بشي مو لازم هي احن بشر عليَّ ليش تكرهني هيج.
مشيت حانية ظهري دخلت للغرفة ودموعي تتناثر على خدي بلا صوت، اخذتلي ملابس وطلعت للحمام. فتحت الماي وكعدت جوه الدوش بملابسي لميت رجليَّ الصدري وساده حلكي بأيدي ابجي بحرگه ابجي وما ادري يا سبب منهن البچاني هلكد كلهن التمن بصدري.
فزيت من اندك باب الحمام سديت الماي وحجيت بصوت مبحوح من البجي
-ها؟
واجاني صوته بعصبيه
صــيهد:: اذا كاعده تبچين امووتج.
-لا ما ابجي، جاي اسبح.
سكت ورجعت فتحت الماي اسبح، وامسح بعيوني طلعت من الحمام باوعت للمرايه عيوني حمر ومنفخات مبينات باجيه مسحتهن ومشيت للغرفة فتحت الباب اباوعله قفل تلفونه وعافه بصفه متمدد على الچربايه وجهه من الغضب احمر حاط ايده وره راسه.
دنكت ودخلت كعدت بالگاع منطيته ظهري انشف شعري
ورفعت نفسي على اركبي واني كاعده فتحت الجراره اخذت منها مرطب الشعر والمشط ورجعت لمكاني امشط شعري وبالي مو يمه ضفرته كصيبه وگمت طلعت بره شريت المنشفة ورجعت للغرفة ما ارفع عيني اله اخاف لا يحاجيني شي لو يشوف عيوني منفخة، مشيت جبت فراشي هستوني امده وگال بهدوء
-عوفيه.
باوعتله الفراش بأيدي كعد عدل يباوعلي بقهر
صــيهد:: عوفيه تعاي نامي يمي.
ميلت راسي اريد ابجي ومچلبه بالفراش اهمس وصوتي مختنك
-صــيهد حباب!
دنك حاط ايده على عيونه وكصته ورجع باوعلي هز راسه خوش فرشت وتمددت متكوره على روحـــي ومنطيته ظهري، دقايق وسمعت صوت جدحة وريحة الجكاير ترست الغرفة وراها دك تلفونه وطول يله رد
-الو...ياهو عاتب عليك؟ امم افكر ..هههه شتسويلي اذا انتَ التطبخلي اجي...يله روح
سد التلفون وبقى بالغرفة بس ريحة الجكاير وصوته من يجر نفس ويزفره كام طفى الضوه وخله الخفيف حسيت بيه كاعد وره ظهري بصف الچرباية غمضت عيني گـــلبي يدك حيل حسيت ايده الخشنة مسحت على راسي وصوته تردد بهدوء
-اكعدي خل احجي وياج.
درت وجهي عليه الجكاره بحلكه اخذ منها نفس ولزمها بين اصابعه.
كاعد ساند ظهره على الچرباية وثاني رجله مخلي أيده عليها، باوع لعيوني ساكت واني منتظرته يحجي گال
صــيهد:: شبيج؟ صارلج چم يوم ما عاجبتني من رحنا للزيارة الهسه.
-لا مابيه شي
رفعت ايدي امسح وجهي واجر بالغطاء اوصله الصدري طفه الجكاره بالنفاضه ورجع يباوعلي
صــيهد::لا بيج سولفيلي منين مغثوثة؟
نزلت عيني اهز راسي لا ما اريد احجي اختنگت بعد مره وحده اذا رجع سألني ابجي وهو سكت شويه ورجع گال
-موجاي احجي وياج بهدوء اكعدي سولفيلي هيج وهيج بيه حتى انا اعارف شسوي.
حجاها ومد ايده يوخر الغطا من عدي وجر ايدي حتى اكعد، كعدت مقابيله الغطا على رجليَّ ومدنگه عيني شفايفي ترجف
صــيهد:: لا تخلّيني آصيح احجي.
شلت عيني بعينه
-انتَ شوكت ما مصيح؟
سكت واني دموعي تجري رفعت ايدي أمسح عيوني وهو ضغط عليَّ واني اساساً ما اعرف شنو السبب الخانگني هلكد
-اني بس تمنيت تمنيييت امي موجوده وتسمع احد محاجيني انتَ او جده والله تكسر ظهركم.
ضحك مستهزئ دفعت ايده حيل ابجي
-لا تضحك .
-نصي صوتج.
-عوفني اريد انام.
درت وجهي اريد اتمدد جراني من ايدي حيل يحجي بغضب
صــيهد:: ما تنامين تحجين عليمن صارلي چم يوم گالبه خلقتج لو اگلب هالليله عليج جحيم.
لميت رجليَّ الصدري ودموعي مغرگه خدي نتر
-لا تبچيين.
مسحت عيوني مدنگه والخنگه ذابحتني مد ايده يرفع وجهي باوعت لعيونه غمض يهدي بروحه يحاول يحاجيني بهدوء
صــيهد:: احجي حتى لو انا الغلطان وياج بشي احجيلي ولا تخافين.
-احجي حتى تضربني؟
سكت يباوع لعيوني هز راسه لا
-ما اطكج بس لا تنعثلين ترحين مناه وتجين مناه احجي بوضوح ولا تخافين من شي.
مسحت دموعي عيني بعينه جر باكيت الجكاير يدخن بعصبيه واني احير منين ابدي هو اني بنفسي ما اعرف شنو القاهرني اكثر حجيت وصوتي من الخنك ما ينفهم
-كسر گـــلبي گبر امي.
رجفن شفايفي ونزلن دموعي بحسره وهو ساكت يستمعلي
-تمنيت روحـــي بحضنها تمنيت اندفن يمها واخلص رغم اني خوافه واخاف من الموت بس وصلت المرحلة اتمناه.
كل يوم اضــحك وي البنات واسولف وأحاول انسى اي شي يقهر بس من اخلي راسي على المخده كلشي يرجع العقلي.
كلها مأذيتني حتى انتَ !
انتَ اكثر بشّر مأذيني غيرتني والله غيرتني جنت لو اموت ما ابجي يم احد ما انزل دموعي گدام احد حتى لو انضرب، بس انت جبرتني ابجي گدامك ومن بعدها صرت ابجي گدام اي شخص
تصيح عليَّ وتغلط وتهدد خليتني لو مر اسمك يمي اشهك بخوف، اشرد من عندك للنوم وتلحكني الاحلامي.
ضميت وجهي بين اديه ابجي واكمل حچيي بخربطه
-وشوف جده تفتر عليَّ بس تريدهم يذبحوني
حتى من قبلت بيك ما خلصت منهم.
سكتت بس ابجي مغطيه وجهي بين أيديي وهوه ما يحجي الحد ما حسيت مد ايده رفع راسي صارت عيني بعينه
صــيهد:: انا مو وحش حتى تخافين من عدي، ولو تمشين وياي عدل وما تدوسين بنكص گـــلبي ما اصيح ولا انتر بوجهج
-اني عوجه شسوي يعني ما اعرف امشي عدل.
-لا تحبين تعانديني انتِ
هزيت راسي لا أمسح بعيوني
-ما معانده والله بس انتَ عبالك اني أعاندك.
هز راسه اي ومد ايده لوجهي يمسح دموعي ونزل ايده الأيدي لزمها وحجه بهدوء
-خل احجي وياج حتى تعرفين طبعي وتعرفين شنو المطلوب منج وساعاتها نشوف منو من عدنه يعاند.
هزيت راسي اي واباوعله بتركيز گال
-انتِ ابد ما تهتمين ولا چني زوجج هدومي مــاسه بعدها مهتمه بيهن، اذا ردت شي مــاسه تگوملي اذا اطب للبيت جوعان واكول جوعان اسمعج اريدج تتحركين ماكو ما تگومين مــاسه تركض، اخذج للزيارة اغير نفسيتج تعانديني وتطاولين گدام امي والبنات تغلطين.
-لا اوكف اوكف عليك الله هنا منو البدء اني لو انتَ؟ مو انتَ راساً غلطت عليَّ وعلى امي؟
باوعت الايديي لازمه بأديه اثنينهن واحجي وياه رفع حاجبه يگلي
صــيهد:: ياهو العاند وحط مكياج وفوكاها يسوي روحه غشيم ما يفهمني كناله تخبل ما تحتاج المكياج لا تحط بس هوه يكبر راسه ألا يعاندني.
يحجي ومبتسم دنكت اريد اسحب ايديي منه لزمهم همست واني مدنكه
-كل المتزوجات يخلن مكياج واني اصلاً مسحته وكلت قبل لا نوصل للزيارة أغسل وجهي.
-انتِ متزوجة ؟
باوعت لوجهه مضيك عينه ومبتسم بطرف شفته بلعت ريگي وهزيت راسي اي مد ايده كرص خشمي ويحجي
-ليش الجذب؟ من نتزوج صدك ذيج الساعة گولي انتِ متزوجة!
تحمحمت اعض بشفتي واحجي مرتبكه
-مو تزوجنه صدك.
-شوفي شلون تسوين روحج غشيمة وتخلين بليس يتربع براسي تجبريني اصيح.
-جاي نحجي هسه احنا بهدوء.
هز راسه اي وجرله جكاره يدخن واني عبالك لكيتها فرصه
-لا تصيح عليَّ بعد
هز راسه خوش يدخن واني مكمله
-ولا تضربني.
صاح بغضب
صــيهد:: لللج انا ليمت طااكج؟
-صيحت!
-ليمت طاگج؟
-بعدك تصيح.
مسح وجهه واني حطيت ايديي على خدودي احميهن غمض يكتم غضبه ورجع فتح يباوعلي.
صــيهد:: انتِ تلعبين بأعصابي مرات احسج ترديني بس اطكج حتى تلگيلج حجه عليَّ عبالج اذا امد ايدي عليج تطّلعين سالمة؟
حجاها وكام ضايج باب الغرفه جان مفتوح على كيف دفره برجله حيل سداه وقفله راح للچرباية واني رجعت تمددت وكل شويه ارفع راسي اباوعله بعده يدخن طفه الجكاره باوعلي رجعت راسي للمخده گال
صــيهد:: نامي لا اجيج.
غطيت حتى راسي سمعته نزل من الچرباية بسرعة وخرت البطانيه من عندي اباوعله بخوف راح لباب الغرفة فتح القفل وعافه دار يباوعلي ويسأل
-انام يمج؟
فتحت عيني كلها هزيت راسي لا باوعلي بغضب
-جا انحمدي لا تضلين تحوسين.
غطيت راسي مغمضه عيوني وشردت الاحلامي اتخيل اشياء حلوه الحد ما انام وكل الاتخيله بعيد عن صــيهد.
غفيت وحسيت بيه يحط اديه جوه راسي وجوه رجليَّ يريد يشيلني چلبت بأيده فازه بخرعه
-هااا صــيهد.
-اششش صوتج ما اسمعه.
واني بس اريد افلت روحـــي من عده اخذني للچربايه ويتلفت اريد احجي وانزل دفعني بغضب
-ارگدي لا ارتكب بيج جريمه.
ودار عينه لباب الغرفة خنست خايفه من عده اباوعله مرعوبه، نزع الفانيله دنكت من ضل بس بالسروال، وراح شال فراشي ضماه وطفه الضوه خله الغرفة ظلمة كلش افتر للجهة الثانية تمدد واني كاعده جراني من ايدي الحضنه شهكت مقشعر بدني واريد بس اوخر من حضنه
-صــيهد حلفت انتَ حلفت.
سد حلكي بأيده ويحجي يم أذني بغضب
-اششش غمضي عينج ونامي ما اسويلج شي.
سكتت گـــلبي يدك بقوة وهو غصب عني خلاني على صدره ولفاني بأديه محتضني واني بس فاتحه عيني وحاطه ايديي على گلبي جر ايدي يخليها على صدره قشعر جسمي من ملمس جسمه ارجف
وسمعت صوت حركة بالمشتمل وهو بساع گال
-غمضي خل أطيح حظهم.
غمضت عيني گـــلبي صوت دكته عاليه واسمع باب الغرفة انفتح على كيف، ثواني وتشغل الضوه واول ما اشتغل ، صــيهد كعد على حيله مثل الفاز واني هم كعدت وياه واشوفهم گدامي سعاد وجده وهوه متخبل شعدجن تطبن الغرفتي وجده دارت على سعاد تطك بيها وتكلها
-انتِ الدوهنتيني.
وهوه نزل يلبس بالتشيرت ويغلط وجده تحجي وياه بهدوء تريده يسكت وسعاد تتعذر، بقيت كاعده بس اباوعلهم وهوه گلب الدنيا صياح بصوت عالي وطلعهن من الغرفة دار علي يصيح بغضب ويغمزلي
-انتِ ضلي هنااااه.
طلع وياهن وصوت صياحه يرج بساع كمت طلعت يم باب المشتمل اسمعلهم اسمع غلطه وصياحه وشلون جدي گال الوليد هسه تودي سعاد الاهلها تتهم بناتنا باطل.
وخالي وليد يتوسل بأبوه يخليها للصبح ما قبل گلب الدنيا هوه وصيهد اثنينهم يصيحون ما تبقى النوب جدي دار على جده تعارك وياها خلاهم واحد يلوم الثاني واجه، ركضت قبله دخّلت للغرفة فتح الباب ودخل نزع التشيرت بغضب يغلط على سعاد ويسب بيها اباوعله راح تمدد بمكانه واني بعدني واكفه يم الميز شال راسه شافني نتر
-تعاااي.
فزيت ومشيت يمه بسرعة جراني من ايدي للچربايه واني مصتكه اريد احجي وخفت من شفت عصبيته،متمدده ولامه ايديي الصدري بخوف وهوه قرب روحه خله وجهه برگبتي وايده على بطني يحضني همست بخوف
-صــيهد.
وخر ايده داره وجهه منطيني ظهره نزلت بسرعة اخذت بس غطا وتمددت بالگاع
ثاني يوم جانت جده رايحه الاختها زعلانه وسعاد عد اهلها، بيتنا هدوء وگالوا طــروادة عازمنا اني وصيهد ووهب وندى.
همه گايلين الصيهد جيب حتى امك والبنات بس لا البنات قبلن ولا هو قبل.
رحنالهم مكيفه علمود عفراء، كعدت يمها بالمطبخ تثرم زلاطه واني احجيلها وهي تضحك
عــفراء:: تقنعيني صــيهد ابو الحلوات انتِ يمه
بغرفته وحلاله وعايفج.
-بس ابد لا تحجين يم أحّد يموتني البارحة صارت مشكله.
سولفتلها جده شسويت وشلون صــيهد تصرف بقت تلوم بيه
عــفراء:: اهتمي بيه بأكله بهدومه لا تعاندينه ولو ردتي شي كليله وسولفي وياه شنو تحتاجين وشنو تردين وحتى من عندج موضوع صعب كليله يدرسج ويفهمج جوري صــيهد خوش صــيهد لا تخسرينه.
سكتت مدري خفت اكلها اني اريد اخسره بس اخلص دراسة رجعت يم رنـــه، نسولف ونضحك وخابرت مــاسه تحرك بگلبها، صبينالهم همه وحدهم واحنا وحد لوره الغدا من ردنا نروح طب حسين كال يله واسمع صوت طــروادة يگول الصيهد
-خل اسلم على اخواتي واشوفن خاف واحد منكم يحاجيهن.
وكفنه بالحوش وهمه طلعوا سلم علينا والنوب گال الندى
-شلونج خويه ام رضا؟
-الحمدلله خويه الله يخليك.
باوع لصيهد كوه لازم ضحكته وصيهد واكف يدخن گالي
-شلونج خويه خوما صــيهد يضوجج؟
باوعت الصيهد وهو عينه بعيني گتله
-الحمدلله.
طــروادة:: خاف ابو نجمة السلف يضوجج ترى انا اخوج تعاي يمي وانا اكسرلج ظهره.
وهـــب يضحك خنگ وصيهد يباوعلي درت عيني من عنده لطرواده گتله
-اذا ضربني شتسويله؟
طــروادة:: اكسر ظهره لو طكج.
رجعت اباوع الصيهد ومدري شبيه اريد اشوف احد اقوه من عنده يگدرله عينه بعيني همست
-البارحة ضربني.
سكتوا كلهم وهوه على نفّس النظرة كح طــروادة وهو يگول
طــروادة:: گولي غيرها! لا ما يطكج متأكد منه اخوي سبع
وغير الموضوع بسرعة گال
-شلونج بالمدرسة.
-زينه الحمدلله
طــروادة:: شدي حيلج حتى السنة التجي تداومون سوه صــيهد حلينه سالفة ترقين قيده وما رضى يرجع يريد تداومون سويه انتِ وياه
دارله صــيهد خازره وهوه دنك مبتسم طلعنه منهم مشينا للبيت صــيهد راح الامه وحجه وياي همس
-هسه اجيج.
ركضت للمشتمل واعض بأصابعي شحجاني ليش اجذب ليششش، هسه يجيني
ذبيت حجابي والعباية وافتر مثل المخبله خايفه منه وين اشرد فتحت باب الكنتور ودخلت ادري بيه يلگاني بس مدري شبيه كل مره اختل هناه، دقايق ودخل للغرفة ورأساً فتح باب الكنتور يباوعلي شلون كاعده ببطنه بسرعة كتله
-بعد ما اعيدها
جراني من ايدي ضايج من عدي گال
-روحـــي يم البنات، ضلي غاد انا الليله ما ارد.
سكتت مكيفه لان ما حاجاني، وره هالليلة رجعت مثل قبل احاول انام قبل لا يرجع واكعد قبله.
"""
طــروادة :: لفيت الچفيه على راسي مسطور
-شتردين سطرتيني بالحسين؟
- اريد حصان شبيك.
-اخذوها مني لا اموتها.
رنـــه:: هسه انه شطالبه هوه حصان.
عــفراء:: آم حصان كومي نظفي قفص الطيور لا اموتج.
طــروادة:: اخذت هاسكي ورحت للگيعان اخطط وره الحصاد شني الازرعه عبرت للگيعان البره القرية لمحت سيارة الاخوالي بس ما ادري ياهو منهم من بعيد شفته سهيل واكف يم شاكر يسولفون، من اشوفنهم سوه جن هسه جايبلي خير وفاة ابوي، مشيت عبرت من يمهم يعاينولي صاح شاكر وراي
-السلام ببلاش.
ما رديت عليه مشيت الگيعاني وكلساه اعاينلهم خالي سهيل عينه الي لو بس اكضن راس خيط واگدر اثبت ياهو منكم كتال ابوي اكتله لو اخر يوم بعمري.
كعدت يم المكاين اعاينلهم واستذكر كلشي يخص ذاك اليوم ابوي ما يحجي وياهم شلون رافگهم للصيد ليش راح وياهم وهوه زعلان منهم.
دنكت بحيره وچن كلشي ينعاد گدامي ذيج العصرية الرديت بيها للبيت وگلبي لاچمني لاكتني آختي بالحوش تعاين للسياج وولنخل داير ما داير بيتنا بومات ابوي ينعبن بصوت يشبهه النحيب، ايدها على گلبها وتردد بخوف
-ابوي مو هناه شعدهن ملتمات علينه.
ووي حجايتها عج بالسلف الصريخ "شامل أنتل ومات"
ومحد يدري انتل عن قصد لو بدون قصد بس المتأكد من عده ابوي مات مغدور وكتاله بعده يشم الهوه، وهمه واحد يشهد للثاني زور وواحد يحلف على الثاني بريء.
صــيهد:: صارلي ساعة اصيح عليك.
شلت راسي اعاينله كعد يمي يسأل
-عبالي غافي شبيك؟
-مابيه شي شفت سهيل يم شاكر وذكّرت ابوي.
صــيهد:: بعدك شاك بيهم؟ كهلان انا وياك وانتَ تدري اعز عمي شامل اكثر من ابوي وعدي اسمه يعادل مضيف، بس خويه اخوته لو شما صار محد يكتل اخوه.
هزيت راسي اي ما اريدن احجي على أهلهم يمهم لو شما جانوا وشما سووا يضلون اهلهم، كمنه انا وياه نفتر بالگاع واسأله
-طك گـــلبي على لماتنا گبل ما ناوي تتصالحون؟
هز راسه لا
صــيهد:: خيولون هالچلاب، انتهت وياهم للموت بعد.
طــروادة:: ماكو انتهت وياهم وهالسوالف بطلهن لا انتَ تتنازل لا همه يتنازلون شطلعت هاي؟
احجي وهوه يحجي بغير موضوع ولا چنه يسمعني، الغروب ردينه للقرية وي رجعتنه تلاكه ويانه وهـــب بالسيارة طاير صاح علينه
-يم الحلاق عبد المجيد ســليم وسلطان مكتلين.
حجاها وطار واحنا ما فاهمين بس اخذنا سلاحنه ورحنا وراهم هدداه بلا ما ندري من يا نوّع الكتله، لمن وصلناهم لكين ســليم وسلطان على الرصيف مفشخين ووهب يلف بروسهم والحلاق وبعد اثنين واكفين يمه نزلنه عليهم، مسلحين وهمه مكتولين بتوثية.
وهـــب :: غير لو يوكف الدم حتى اضــحك اختنكت صــيهد متسودن يهد على الحلاق جا الحلاق ياهي مالته وهوه يگله
-ما اعارفهم والله اول مره يجون يحلقون يمي تعاندوا وي الولد وتعاركوا.
دار على سلطان وسليم يصيح عليهم بغضب
صــيهد:: شلووون تخلونهم يطكونكم؟
سلطان:: همّه ستة وشايلين سجاجين وتواثيهم بسيارتهم وانا بطرك ســليم بيش اعاركهم تفلات؟
طكيتهم كله فشخوني.
وهـــب :: جر الحلاق يطلع حركة گلبه بيه يريد يعارفهم منين حتى يدكهم بفصل بس الحلاق ماحجه ولا گال منين رغم شكيت بيه يعارفهم من شكله خايف، عاينت لطرواده جاب ماي واجه غسللهم وكلساع يتحمحم عرفته هم كاض ضحكته مثلي .
هستونه كومناهم ناخذهم يخيطون روسهم وطبكت سيارة مــيثم نزلوا هوّه وبريا، وهذا بس لمحهم مدمايين ضحك
بريا:: ها المكتولين.
ســليم:: بريا خلني ساكت وسد حلكك.
اجه يمه يتلمس راسه
بريا:: مفشوخ يا بعد روحـــي .
اخذناهم لعيادة يخطونهم بدون تخدير نعذب بيهم جاي يخيطون براس سلطان وهوه يتلوه كاتله الوجع صــيهد گال للمضمد
صــيهد :: ارجع عليه بالخياط دربين حتى لا ينفتك.
سلطان:: رحمه الله والديك درب واحد كافي راس هذا مو شليف مال خضره وتخيطيه دربين.
وهـــب :: أشرت البريا يسكت وهوه چلب السليم لمن ســليم گاله بصوت ناصي بيني وبينهم
ســليم:: توخر من عدي لو احطك بحلك طــروادة هناه يمدك ويدوس ببطنك.
خله بريا بس يتنفس بدون صوت، اخذناهم ومشينا بنص الدرب دكلنه هورن صــيهد گال
صــيهد:: دمهم گضه خل نشوفلنه مطعم نوكلهم معلاك.
طبكنه على صفحة كعدنا على الرصيف وهوه راح للمطعم جاب لفات معلاك وحده لسليم وحده لسلطان، واحنا جايبلنه ببسي، كعدوا ســليم وسلطان على الرصيف ياكلون واحنا واكفين يمهم نشرب ببسي وصيهد گال الطرواده
صــيهد:: من رحت اجيبن ببسي شفت وره اكو جاخور مال مطايه.هاي شيسوون بيه؟
اللگمه بعدها بحلكهم وكاموا اثنينهم يتفلون متسودنين
وهوه يكلهم
صــيهد:: اكلوا اكلوا دمكم كضه.
شمروا اللفات بالحاويه
سلطان:: مو انا استغربت انتَ تطلع منك زينه؟
صــيهد:: لا كلهن شينات وغدرات.
طــروادة:: امشونا امشوا نرد للقرية نتعشه ببيوتنا.
وهـــب :: ردينه للقريةكلمن راح لبيتهم لوره العشا خابرنه طــروادة تعالوا ومشتاقلكم صــيهد عرفها سالفة صلح گاله ما اجي اخذته گوه عليه، مو مال نضل بزعلنه اكثر حتى اهلنه متشمتين بينه.
كعدنه بالدوانيه ملتمين وي ولد عمي خليل شويه وطبوا ســليم وسلطان روسهم ملفلفه سلموا وردينه بس صــيهد يدخن ساكت سلطان حاجاه معتذر وسلم عليه، وسليم هم سلم عليه بس لازم يشمرله حجايه
ســليم:: اسلم عليك مو لان انا غلطان بس لان انتَ چبيرنه شنسوي بعد الحمدلله على كل فـــدوه اروحله يعارف شلون يعاقب ما يطك بحديدة.
طكاه صــيهد بالسبحة
صــيهد:: وخر مني هذا السانك كون تطلعه بالعركات مو جايني مفشوخ.
ســليم :: يابه لو كاتليني موت احسن ولا هالشماته هاي.
وهـــب :: ضحكنه بس صــيهد كلساع خازر سلطان قلقه خلاه حتى ما يعارف يسولف، وطرواده مكيف ساعة جايبلنه چاي ساعة نومي بصرة
وصيهد چلبلهم غثهم كلساع يذكرهم بفشختهم لمن ســليم تربع وگالهم
ســليم:: اكلك طــروادة شني ذاك الزلمه بعد اخذ بت عمته وعاف نجمة السلف؟
طــروادة:: شني يعني نجمة السلف.
ضحك ســليم وطرواده يعاين لصيهد عود انا وياك مو وياهم گاله مــيثم
مــيثم :: خو انتَ تبيعها كلها وتشتري خاطر صــيهد .
طــروادة:: انا مالي مصلحه يمه وشاري خاطره انتَ مصلحتك يمه فكرلها واوكف وياه لا تصير قشمر.
مــيثم :: طبعاً انا مثلك ما اعارف شني يعني نجمة السلف، ســليم تقصد هاي النجمة البالسما مو؟
ســليم:: الزلم صارت طليان، وانتَ سلطان هم ماتعارف شني نجمة السلف.
وسلطان مدنك يشرب چاي هذا حتى ما رد سوه روحه ما يسمع ، ضل بس ســليم ويحجي براحته لان صــيهد ساكت مناه لمن كضه استكان الچاي حطاه بالصينية ورفع طرف الزوليه طلع من جواها خيزرانه. طفر سليم خاتل بظهري وظهر بريا على اساس يهابنه وما يطكنه تالي كتلنه ثلاثتنا، درت عليه ايدي مصخنه من الطكه
-يعني انتَ تلغي واحنا ننكتل شعلينه؟
ســليم :: طكه بيكم وطكه بيه هيه هاي الخوه جا المن اريدنكم.
دفعته من عدي رديت متمدد ورجليَّ على سلطان عبالك كاضينه من ايده التوجعه متحملنه ساكت وانا كلساع احرك رجليَّ اغم بيه گال بريا
بريا:: رجليك بوجهه سلطان.
-يطبه مرض يتحمل وهوه الممنون.
-خاف انا هم تالي انذل يم طــروادة هيج.
-اي چا شعبالك يطيحون حظك اطفر بريشاتك شبيك انتَ هيه مال عشگ وطياح حظ اطفر والله طــروادة يشبعك اهاين.
صفن يعاين لطرواده كعدتله عدل من شفته بيه مجال توني اريد اكمل حجي وهز راسه لا متحسر
بريا:: ميخالف اصبر الخاطرها.
-انتَ لو قيس أبن الملوح يجي ويكلك عوفها العشك ما يفيدك هم ماتعوفها غسلت ايدي منك.
عاينلي بضياع هاي النظرات اعارفهم وهاي التنهيده والغصه قصص وروايات عراقية كرار صلاح والحيره انا كلهن مار بيهن
بريا:: ما اعوفنها لو اعارف موتي على ايدها عاشگها انا.
-مجنــون رنـــه
طكني بخاصرتي بأيده الچنها توثية خلاني أتلوى وهمه يعاينون علينه هسه هذا مو مال تفضحه وتخلي ما يندل دربه منين ضل يمسح على خاصرتي يتوسل اسكت
-عيدها النوب وطكني بالعباس اكول الطرواده عليك.
-اسكت واجيبلك ورده من حديقتنا.
وبس جاب الورد ذكرني بوردات ميثم اليفترن عليَّ جبته براشدي رج صوته بالدوانيه كلها
سلطان:: جيبه! هاي ليش؟
ســليم:: مشاكل عائليه مالكم غرض.
وهـــب:: مسحت على خد بريا وهوه يعاينلي بغضب
-ترى طكيتك بس انا قصدي اطك مــيثم وانتم اخوه يعني ماكو فرق انتَ وميثم واحد.
ســليم:: كملوا سوالفكم تونس جاي اكتشف اسرار چلاب طلعتوا ضامين عليَّ اذا ما عفتكم إثنينكم.
ضحكت وبريا متحلف الا يجيبلي ورده، ضلينه ل١٢ يم طــروادة لمن كام يغفي من النعاس تندم لان لمانه يمه، طلعنه، سلطان وصيهد وميثم راحوا للگاع وانه وسليم رحنا وي بريا لعبنه بلي من كضينه جلب يطيني ورده وانا اريد اوكلها اله اخذتها ورحت للبيت.
مــاسه :: نايمه العصر وبالليل ما گدرت انام بالوحده ونص وانه كاعده ومن جهه برود ميثم وتصرفاته المحيرتني شاغله تفكيري، نزلت للمطبخ مشغله قصائد حسينية بصوت ناصي ووكفت اسويلي لفة طماطة وملح هستوني اعض منها وانفتح باب المطبخ طب وهب وبأيده ورده بسرعة گتله
-جنت ببيت عمي خليل؟
گلب وجهه يعيب عليَّ غماني وشمر الورده عليَّ لكفتها وباوعتلها مبتسمه گال
-شني بس بيت عمج خليل عدهم ورد.
-لا مو هاي وردتهم انه اعارفهم.
طكاني على راسي وجر اللفه من أيدي اكلها ويسوي حركات يعيب عليَّ وانه مدري شبيه يم وهـــب استهتر اشم الورده مبتسمه صاح
وهـــب:: لا تشمين يمي مــاسه راح احطج واكتلج.
ضحكت عفتها يم التلفون وشغلت الطباخ احميله الچاي عاينلي عاكد حاجبه كضه اللفه غسل ودار علي يسأل
وهـــب: شبيج ليش سهرانه .
-نايمه العصر.
-هممم.
هزيت راسي اي متحسره حضرتله كوب صبيتله چاي اخذه من عدي وسأل
-مــيثم مضوجج بشي؟
-لا.
-جا شبيج؟ خاف متندمه مــاسه اذا تحسين روحج تورطتي لو اسلوبه ما عجبج گولي احنا بظهرج مثل ما عقدنا. تطلكون وكفت راحت.
-لا والله العظيم مو هيج بالعكس الولد مؤدب وحباب بس.
وهـــب:: بس شنو؟ احجيلي لا تستحين.
دنكت منحرجه ما ادري احجي لو لا بس اعرفه يتفهمني عاينتله اسولفله
-عاين ما يسأل، عبالك ما مهتملي من اجينا من الزيارة الهسه هوه ما مخابرني ولا مراسلني احس يعني عبالك مو مهمه عده، موالمفروض يسأل عليَّ من استلمت النتيجة يسأل مو صح؟
هز راسه اي وانه احجي بقهر گال
وهـــب:: حقج بس يجوز يستحي من عدنا يستحي يخابرج، مــيثم بساع ينحرج وخل اكلج شغله جاي يشتغل شفتين يرجع من دوام الجامعة يروح يشتغل ساعتين بالمعامل وبالليل لو يوديه جدج للمرعى لو للگيعان، هم اعذريه انتِ، وعادي جا الا يراسلج شو احس بروحي ضجت واحد خايس يراسل اختي وانا اضل ساكت.
حجاها وجراني جوه جتفه يعض براسي ضحكت
-غير زوجي.
خنگني ساد حلكي
-زووجها هيه زوجها الوصخه شو يم صــيهد تتبرين منه.
جريت ايده من حلكي اضــحك واكله
-اي وعليي تدري حتى اسوي روحـــي ما اعارف مــيثم ولا اعاين عليه هيج هيج أتبرى من عده دنيا واخره هههههه.
وهـــب:: وانا تدلعينه يمي وتحرگين بگلبي الك الله يلفقير.
وخرت من حضنه اغمزله
-تتذكر من چنت ضام بطه بالمشتمل وانه اغطيلك.
ضحك يمسح على شاربه، طكاني ومشه يريد يروح للدوانيه رغد قافلة البيبان وشايله المفاتيح غصباً عليه راح الغرفتهم. ضحكت عليه سويتلي لفة جديدة اعاين من شباج المطبخ بالثنتين صــيهد رد للبيت.
صعدت اركض شفت مــيثم طب الحوشهم، التلفون بأيدي محتاره اكتب لو لا شفته واكف يم الوردات مدري شيسوي، فتحت الكامره قربتها عليه صارت مغوشه بس مبين مصورته، وديت الصوره اله وضليت بمچاني اعاينله بس صارت الصوره خطين شفت تلفونه بأيده فتح الرساله وهو يمشي يريد يطب للبيت وفچاة وكف وشال راسه باوع علينه رد نزل البايات الصعدهن ووصلتني رساله من عده كاتب.
-تجين؟
-لا.
وديتها واعاينله كعد بالحوش على البايات رد كتبلي
-ليش؟
-ليش اجي؟
-مشتاقلج
-واضح بحيث صارلك چم يوم رسالة ما داز.
وديتها وواكفه يم الشباج اعاين عليه فتحها ومارد كام غسل وجهه ورد كض تلفونه يكتبلي
-بعدين اكلج ليش ما اراسلج ومتأكد تعذريني، بس هسه اتمنى تجين حتى لو عشر دقايق اشوفج وترحين.
-اخاف من صــيهد.
-اجي انا؟ اخابره عادي اكله اشوفن مرتي.
-لاا لا، تمام هسه راح اجيك.
كتبتها بخوف متوتره ضل كاعد بالحوش منزل راسه على رجليَّه، بدلت بساع حطيت عطر وحمره واكرص بخدودي حتى يصيرن ورديات على اساس هنه هيج، اخذت السبحة الجبتها اله من الزيارة وعبايتي بأيدي مطبكه نزلت بخوف طلعت من حوشنه لبست العبايه ومشيت بسرعة مرتبكه وكلساع اغم روحـــي شجابني" ومستمره امشي.
اول ما فتحت باب الحوش جراني من ايدي الصدره شبگني حيل وانه بوسط صدمة گـــلبي يدك كل حيله
منزل راسه لكتفي، ومن العبايه راسي راجع ليوره همست بخفوت ارجف
-مــيثم، العبايه مــيثم .
عافني بساع كاض ايديي ويعاين لوجهي، عيونه حمر ووجهه تعبان ابتسم دنكت مستحيه
-تعاي.
طب للبيت وراح على غرفة بريا طلع المفتاح وقفل الغرفة من برا يضحك.
-نايم هوه بس خاف انتِ تستحين.
سكتت اطكطك بأصابعي جاب صحن فواكه واجه كعد بصفي ردت انسى الزعله بس كوه كدرت لروحي وضليت مسويه روحـــي ضايجه ، مد ايده يتحسس وجهي وخدودي دفعتها دايره وجهي من عده تحسر
مــيثم :: زعلانه حوريتي؟
عاينتله ساكته رجع ايده لوجهي يتحسس بشرتي بحسره، دنكت احاجيه بتردد
-انه ما ازعل على اي شي بس هالمره حقي لو لا؟ رحت للزياره ورجعت ما سألت عليَّ استلمت النتيجة ما سألت من يوم الاجيت لبيتنا وانه ضوجتك انتَ متغير.
ضحك وجر ايدي لوجهه يبوسها بلعت ريكي مقشعر جسمي من ملمس شاربه يدغدغ باطن ايدي تحسر ورد عاينلي
مــيثم:: اضوجن منج انا؟ شبيه!
-جا ليش ضليت ما تسأل.
حضن ايدي بين اديه يمسح عليها بحيره شال راسه عاين لعيوني بتركيز
مــيثم :: من اخابرج لو اراسلج اضل الوب اريدنج يمي، ولا انتِ ولا اخوانج ترضون استعجل بالعرس، لا عبالج ماجاي اتعذب من ما اخابر وأسأل والله اموتن الف مره، بس اصبر روحـــي حتى لا احجي وياج واتمادى مثل ذيج النوبه حجيت وياج وطلع من عدي حجي سخيف ما المفروض الرجال يحجيه وي خطيبته.
دنكت اعض على شفتي متوتره وهو يحجي بصوت ناصي وذبلان يعصر اصابعي بين اصابعه همست مرتبكه
-عادي ما حجيت شي انتَ امي كالت خطيبج ميخالف.
-سولفتي الامججج؟
باوعتله فازه وهوه مصدوم هزيت راسي اي حط ايده على كصته
مــيثم:: ليش ولج؟ شكد فشله منها هسه شتگول عليَّ.
ارتبكت لان ضاج واريد ابرر موقفي مديت ايدي اكض ايده واحجي
-گالت عادي خطيبج والله ولا ضاجت انه حجيتلها لان احب اسولف الامي الشغلات الحلوه.
شال راسه يعاينلي وانه اريد ابجي من احاجيه ضب ايده على ايدي
-شغلات حلوه؟
سكتت اعاينله كعد عدل مقابيلي عصر ايدي بأيده
-انا كاتلني القهر لا مضوجج بحچيي وانتِ عاجباتج.
دنكت منحرجه
-لا ماعاجبني
-حچيي يضوجج؟
-لا.
ضحك واحس بيه جر راسي الصدره وبأثنين اديه لامني الصدره يبوس راسي ويردد
-فـــدوه اروحلج.
-شوف شنو جبتلك من الزياره.
وخرت من صدره ومديتله السبحه اخذها من ايدي يضحك وانه اعاينله مبتسمه فرحانه لان عجبته گال
-ما تطيح من ايدي بعد
ابتسمت ساكته رد جرني الصدره
غمضت عيني أشتم عطره واستشعر دفوا صدره وهوه يمسح بايده على ظهري احس بانفاسه يم اذني همس بصوت ذبلان
-اشبگيني .
ارتبكت انفاسي ثگلت وگلبي يرفس بصدري حركت أيديي بتردد عبرتهن على ظهره ا زفر نفس براحه كأنما اخذت كل تعب روحه ، كعد عدل سند ظهره على القنفة سحبت ايديي اريد ابتعد ما رضى خله راسي على صدره
-خليج بحضني.
-مو، لازم اروحن.
عافني وجهه گبال وجهي وايده ترسم ملامحي تقرب انفاسه تطخ بوجهي وانه ضل النفس يصعد وينزل متوتره تلمس شفايفي بطرف اصابعه ملت على صفحة اريد ابتعد مرتبكه وخايفه مدري شبيه كضاني من أيدي يردد
-بس ضلي هيج مــاسه بس ضلي هيج.
وجعت لمچاني التجوه مال القنفه بظهري قرب روحه اكثر اصابعه تروح وتجي على شفايفي، ونفسه ثگل روحـــي راحت بس اريد اشرد، همست بخفوت وخوف
-اريد اروح.
هز راسه اي وعاين لعيوني
-هسّه ترحين.
خله ايده على عيوني يهمس
-غمضي عيــونج حتى ما تتوترين اريدن احس بدفو شفايفج وابوسنهن حد التعب.
غمضت ريگي ناشف ايده فوك عيوني وأيده الثانية على خدي وبابهامه يتحسس شفايفي أحسّ بأنفاسه على وجهي وصوت دگات گـــلبي بعلو صوت الساعة حسيت بشواربه ولحيته مشن على خدي شهگت اتنفس بقوة ومچلبه بأيده ارجف
-مـ مــيثم .
-اشش
احس بدفوا شفايفه لحظة يوصل يم شفتي ويبتعد
عبالك يسألني "اگدر"لو ابتعد ؟
يشوف رد فعلي اذا رافضه او قابله بقربه
دفو شفايفه اللي تحسست كل بشرتي ورسمت شفايفي حبّس انفاسي حسيت الهوه البيني وبينه خلص
لحظات وبديت احس شفايفه تحتضن شفايفي بدفو ولهفه وأيده تحركني بشوگ يحاول يقربني آله اكثر
انفاسي تلهث حطيت ايدي بصدره ارجف وابعده عاف شفايفي وضل سادّ عيوني سند كصته على كصتي
، اتنفس بقوة والهث جسمي يرجف ونفسي يصعد وينزل
ايدي على صدره دگات گلبه سريعه وقوية مثل دگات گـــلبي حجه بصوت ذبلان ومتعوب بالگوه يوصل لمسامعي
-يا اترف من الورد واحن من نسمة آلفجر.
ابتعد وخر ايده من عيوني وانه لو يذبحوني بعد ما احط عيني بعينه على السويته اريد بس اشرد من يمه ميته من المستحه، وهو فهم ابد ما حاجني خلّه العباية على راسي وطلعنه وصلني لحوش اهلي وگبل لا اطب حجيت وانه مدنكه
-مــيثم بكيفك سوي العرس ليمت ماتريد.
-ما تضوجين؟
هزيت راسي لا وركضت للبيت گـــلبي يخفك وميته من التوتر، متمدده بفراشي كلساع احط ايدي على شفايفي ويرجع گـــلبي يدك حيييل اضــحك واغطي وجهي ميته من المستحه اتگلب وادفر بفراشي خجلانه حتى من روحـــي .
وره يومين حددوا العرس بعد اسبوعين، ورغد وندى يوميه رايحات للسوك وانه من ماعدي امتحان اروحن وياهن
ومره توسلت بصيهد لمن مليت يله رضى نروح وجوري ويانه لوتي ما يريدها تروح بس يكلي
-لا سادس تضيّع وكتها.
بس الله هداه وخلانه نروح . وهيه صايره مثّل المخبله من وره السادس سوت عدي خوفه خلتني اخافن انجح.
"""
ندى:: يا صبر، مال اخلي وهـــب ورضا بغرفة واحركهم، بالعشا رجعوا فتحوا موضوع زواجه واليقهرني ما يرفض يبقى ساكت سهله وهـــب نشوف شلون تاليها.
بس كملت شغلي دخلت الغرفتي لعبت وي رضا تعبته واخذته لغرفة عمتي نومته يم رغد وهيه تشجعني
رغد:: عادي حتى لو تخنگينه بس لا تخلينه يتزوج عليج.
-للصبح لو نطلع متصالحين لو اطلع الكم جنازه.
رغد:: لا يمه ندى اخوي امانة الله ورسوله.
ضحكت وامها تگلي
-امشي يله الغرفتج لو ما صالحتي وهـــب الليله بعد لا تلفين يمي.
ضحكت طلعت من يمها سبحت ودخلت للغرفة هالمره اني الاسوي روحـــي نايمه اليوم، لبست الروب اللي جابوه بالعرس رتبت شعري ورحت للچرباية تمددت متغطايه ومطفيه الاضويه مخليه بس الضوه الخافت.
ساعة مرت واجه فتح باب الغرفة وسمعته من قفلها بدل ملابسه واجه يم الچربايه حسيت بيه رفع الغطاء يغطيني زين وبظهر ايده تلمس وجهي فتحت عيني بعينه سألني بخفوت.
-رضا وين؟
-يم رغد.
هز راسه خوش وافتر تمدد بمكانه درت عيوني اله ساكته وهو يگلب بتلفونه وخرت الغطا من عندي اريد انزل لزمني من أيدي جريتها منّه مختنگه
-عوفني وهـــب .
جراني عليه حييل رجعني للچربايه
-صوتج، بطه.
-انتَ شتريد عبالك اقبل تتزوج عليَّ والله اقتلك.
-تقتليني؟
-اي
-اكتلنك يابه اكتلنك هيج احجي حجايات مملوحه مثلنه
كعد عدل مقابيلي واني امسح بدموعي واحجي بحرگه
-ما اقبل تتزوج عليَّ.
-ليش؟
-شنو ليش غير زوجي شنوو ليشش؟
-صوتج.
شهكت ابجي وهوه لازم ايدي ويحجي بهدوء
-ليمت انا زوجج؟ أريد زوجه تشاركني كلشي لو طاحت بمصيبه تحجيلي ما تضم عليَّ ما تجذب وعينها بعيني ما تألف آلف قصة حتى تضمّ الحقيقة.
غطيت وجهي بين اديه ابچي بحرگه
-والله مجبوره مجبوره ليش ما تفهمني متندمه لان ما حجيتلك بس جنت خايفه وهـــب والله العظيم خايفه اني الغدرتني اقرب بشر الي غدرتني اختي شلون تريدني اثق بعد؟
ليش تلومني والله راح تموووتني، شتريد شسوي اعتذر؟ اسفه واعتذر لان ضميت عليك اسفه لان جذبت وما حجيتلك الحقيقه اسفه على الايام اللي تعذبت بيهن بدوني اسفه.
ابجي بصوت واحجي جراني من ايدي الصدره حاضني حيييل ضميت وجهي اشهك
-انا الآسف يابعد روحـــي بطاتي اشش اشش فـــدوه اروحن لدموعج.
حضنته خانگه صوت بچيي بصدره واحجي بحرگه
-ما تتزوج والله ما أخليك اموتنك.
اهتز صدره يضحك ودنك يبوسني برگبتي
وهـــب:: يا حلاة الاموتنك بحلگج.
دفعته رافعه اصبعي بوجهه ودموعي تجري
-ما تتزوج! گول ما اتزوج.
ضحك يباوع لوجهي ودنك بسرعة يبوس شفايفي ويردد
-للموت غيرج ماتصيرلي مره.
حجاها ورجع يبوسني ومد ايده توه يجر ملابسي وفزينا على صوت رضا يبجي ابتعد واني ميته بدمي وحس بيه متفشله گال
وهـــب:: روحيله عمــري سكتيه وتعاي.
لبست دشداشة وطلعت لكيت رغد حايره بيه مايرضى يسكت ضليت يمه بالساعة لمن رجع نام مشيت للغرفة لكيت وهـــب غاط بالنوم ضحكت وتمددت بحضنه ضامه وجهي برگبته وزفرت نفس براحة نمت بين اديه
للصبح فزينه مخروعين على دگة باب الغرفة اريد بس انزل من الچرباية عثرت ووهب سبقني فتح الباب صارت بوجهه مــاسه وجها اصفر وترجف گالت
مــاسه:: الشرطة بالحوش..
شكرا لزيارتكم عالم روايات سكيرهوم
