رواية أرض الخناجر الفصل الثاني والأربعون بقلم ايلول
و يخلص الليل و يخضر ليل ثانِي
الليل شبَّعني سَفر و انه بمكانِي
══━━━━✥◈✥━━━━══
-الشرطة بالحوش.
مــاسه :: حجيتها والخوف يدبي بجسمي وهب طلع بساع وندى فتحت عينها بصدمة تهز راسها شكو بخوف وانه ابلعم همست متردده
-وياهم بنيه تشبهج!
شهكت وفتحت عينها بصدمة ركضت مثل المسودنه الغرفة امي شالت رضا من فراشه حطته على گلبها حاضنته حييل، انگلب بيتنا هوسه وبره صوتهم عالي كلها طلعت والتموا يم الشرطة بالحوش.
رغد وامي يحجن وي ندى بس يردنها تعوف رضا لان ضل يبجي بحضنها، وهيه كاعده بخوف وشابگته حيل دموعها تجري وتهز راسها لا.
جرته رغد من ايدها تحاجيها
رغد:: ندى مو هيج عوفيه راح تخبلينه.
وهيه ما ترضى تهده تبجي ومجلبه بيه حيل، كامت شايلته على گلبها طلعت من غرفة امي تريد تروح الغرفتها ووكفت من طبت اختها من باب المطبخ صارت وجهه بوجهه ويَّ ندى.
وكفت ندى بخوف رجعت على الحايط وبأثنين أديها لامه رضا الگلبها وهوه روحه فرفحت من البجي، واختها طبت تدرعم عبالك بيّتّ آبوها اجت راساً الندى وكفت گدامها خازرتها وبدون كلام مدّت أيدها تريد تجر رضا دفعناها انه ورغد وهيه تدفعنه مخنزره وتدنت يم ندى تحاجيها همس
-عوفي ابني.
ندى:: ااابنج؟ وخري.
-اسجنج ندى والله اسجنج كتلهم ابني مأمنته يمها تزوجت ومجاي الكاها لتخليني اكلهم خاطفته.
وندى تسودنت دفعتها حيل تصرخ
ندى:: كليييلهم وخل يشوفون منو بينا الجذاااابه منو الزورت واخذت طفل من حضن امه.
طب وهـــب يركض يسد بحلك ندى وهيه تصرخ وتبجي، وجده وسعاد يتلاطمن ويصيحن رغم ما فاهمات شي، سعاد من وره ما انطردت ورجعوها صارت بكلشي تحط روحها تريد تطلع نفسها زينه يمهم.
همه هوستهم بره وي الشرطة طب صــيهد لباب المطبخ يصيح بحرگه
صــيهد:: اطيهاا ابنها وخل تطلع يله.
صرخت ندى تهز راسها لا ووهب يجر رضا من أيدها تسودنت يدري بيه ابنها شلون يطيه جلبت بأيده احاجيه ورغد تحجي وياه وهوه ما مهتم جر رضا من ايد ندى انطاه الاختها وصاح بوجها
-اطلعي برررره.
صــيهد:: اخذي ابنج وولي مناااه.
كاضين ندى مصدومين بالولد اخت ندى شالت رضا ومشت تريد تطلع وندى تريد بس تفلت من ادينه وتركض وراها تصررخ بكل صوتها وهـــب وصيهد طلعوا وره اختها وعايفينه بحيرتنه ندى ماتت بين ادينه ملخت روحها ولطمت على وجها متسودنه تصيح بصوت مبحووح.
-ابني والله اااابني، رضااااا رضااا ماما رضا.
وانه ورغد مچلبات بيها مانخليها تطلع وراهم گـــلبي تگطع عليها، جده تصيح وتغلط تريدنه نطبب ندى الغرفتها كوه كومناها انه ورغد نتوسل بيها
-بس خل يجي وهـــب ونفهم من عده اوووكفي ندى بس اوكفي.
طببناها للغرفة سدينه الباب وكفت اعاينلها وابجي ممروده روحـــي وهي تلطم ورغد تكض بيها بس تريدها تسكت تسودنت، وخرت على صفحة من اندفع الباب طب وهـــب ولمحت صــيهد بالصاله يتعارك وي جدي وابوي،
مشه وهـــب لندى وهي بالگاع كاعده على أركبها تبجي بصريخ ورغد كاضتها، كعد كدامها جلبت بأيده تصيح
ندى:: رضا ابني رضا ابني والله ابني.
حاوط وجها بين أديه يگلها
وهـــب:: ندى عاينــي علي اشش كافي بچي انا ارده الحضنج بس اطيني صبر.
لطمت على وجها تصرخ
ندى:: ليششش خليتها تاخذه جريته من ايدددي وانطيته الها .
تصرخ حيل وتحجي بلا وعي، سد حلكها بأيده وهي مفرفحه روحها يحجي بغضب وجهه احمر
وهـــب:: رضيت تاخذه حتى ما تجرجرج للمحاكم بطه تنسجنين انتِ خاطفته وراجعه تهريب تنسجنين ويتصخم وجهي شلون ارضى مرتي توصل سجن غير اموتن.
ترجف بين اديه ودموعها تجري مسح عيونها وهو يگلها
وهب ::عاينــي عليَّ ندى وحك لوعة گـــلبي بفراگج اردلج رضا الحضنج بس لا تبجين اطيني مجال وانا اجيبنه الج وبعد محد يگدر يفك حلگه وياج.
وندى طاحت بحضنه تبجي بحرگه وتكله
- راح تاااخذه راح تسافر اتلوع اموت اموت وهـــب والله اموت .
جرها الصدره مختتگ
وهـــب:: وعيون امي ارده الحضنج.
التفتت للباب صــيهد مطينه ظهره بعد ما گلب الدنيا على جدي وابوي صاح على ندى
صــيهد:: أم رضا بسج بچي ابنج يردلج ما تگدر تسافر هسه اوكلها تبن، يله وهـــب .
كام وهـــب بدل وطلع وندى روحها رايحه بس تبجي، عفتها يم رغد وطلعت بمجرد الولد طلعوا جدي وابوي تعاركوا، طبيت للمطبخ اسويلهم الريوك گبل لا يضلون يصيحون عليَّ اجت جــويريه منثوله كلشي ما تدري
جــويريه:: شكو شصار؟
هزيتلها ايدي اتلفت لا يجونه
-بعد وكت خايبه الدنيا احتركت وانتِ غاطه.
شالت ايدها تغم الفراغ وتگلي
جــويريه:: غير هذا اخوج اريد اطلع وهوه يصيح اكسر رجلج.
اجت وياي نسوي الريوك واحجيلها بساع بساع بيومها محد من عدنا داومت، وندى للظهر ودمعتها ما نشفت، لا اكلت ولا شربت متمدده لامه رجليها الصدرها ودمعتها تجري، وبدور تفتر علينه كلساع وگالت خابرن صــيهد شوفنه شصار عاينتلها صفح
-حتى يطلع حرگة گلبه بينه.
بــدور:: والله خنيثات هسه لو انه عدي تلفون اخابره.
واثنينا انه وجويريه شمرنه تلفوناتنا بحضنها
-يله خابريه.
كشرت بسنونها تضحك
بــدور:: عمي انه الخنيثة خابرنه انتن شمالجن حتى نطمن ندى خطيه والله گـــلبي ينمرد من اطب للغرفة واشوفنها تبجي.
مــاسه :: سكتت محتاره جوري مغلسه، اجت رغد يمنه تحجي علينه
رغد:: صوتجن خلنهم منطمرين لا يفزون يسممونه بحجيهم.
جــويريه :: ندى ما اكلت؟
رغد:: لا والله ما رضت، اخذتها يم امي نامت على رجليها، بجاه الحسين كون يردون رضا اليوم تموت بدونه هاي.
بــدور:: يردونه والله، صــيهدنا گالها اردلج ابنج يعني يرده مالجن غرض.
ورغد عيبت عليها شلون تكول صيهدنا، راحت رغد وانه وجوري كاعدين وحده بصف الثانية مديت ايدي اكض اديها واحجي بتوسل
-جوري مو صــيهد زوجج؟
-لا.
-مو هوه ابو بيتج؟
-لا.
بــدور:: مو هوه ابو فروخج؟
-لااا.
مــاسه :: خابريه.
-يمه .
بــدور:: شمالج جوري خطيه ندى حتى نبرّد گلبها، واحنا ندري بيج سباعية واكثر وحده ما تخاف من صــيهد.
جــويريه:: لا اني خنيثة واخاف وارجف من عده خابريه انتِ لان أكثر وحده قوية وماتخاف من احد بعد بــدور انتِ وين اكو من عندج.
وبدور تعربنت إلا شويه النوب اثنينهن دارن علي هي وجويريه
بــدور:: مــاسه.
-ماعدي رصيد انه.
جــويريه:: خابريه من تلفوني.
-واشبع رزايل.
بــدور:: هوه بس انتِ يحبج وينقهر عليج ما يرزلج.
مــاسه:: سكتت اسمعلها رغم حجتها عادي بس مبين حازه بنفسها هزيت راسي لا
-ترى كلنه يحبنه نفس الشي.
ضحكت تهز راسها لا وتحجيها بضحك
بــدور:: والله انه يموت من عدي، هسه معلينه خابرنه.
عاينت لجويريه اتصلت عليه فاتحه السماعة وكلنه مركزين وياها بس اجه صوته بنتر اول مارد صاح
-الووو.
جــويريه شمرت التلفون بحضني خرذلتني كضيته شمرته عليها اخزر بيها احجي وهي تدفع التلفون علي وهو يصيح لمن گال
-اذا ما اطيح حظجن بس خل اجي
جــويريه :: صــيهد!
كضت التلفون تحاجيه وتغم بينه انه وبدور وهو سكت شويه وگاللها بهدوء
صــيهد:: ها يابه.
وانه اشجع بيها تحجي وهي تبلعم گالتله
-وين انتم؟ رضا شفتوه؟
-هسه جايين ساعتين ونوصلكم سوينله غدا.
-رضا وياكم.
-اي.
يابه قالب ثلج ونزل على گـــلبي بــدور ركضت لندى وانه ضليت مكابله جــويريه لان كاضتني من ايدي سدت التلفون ورحنا يم ندى ميكيفات وهي ما مصدكتنا صوتها من البجي رايح وكوه تحجي
ندى:: انتن سمعتن صوته يعني وياهم رضا.
جــويريه::لا ما سمعته يمكن نايم بس والله صــيهد كال ويانه لا تخافين هسه يجون.
ايمان:: يله ندى يمه بسج بچي مو گتلج هيه الغلط وهيه التنسجن البمچانها كون بعد ما تتراوه مسويه جريمة هيه الخاطفه وهيه المزوره.
تحجي وياها وتمسح على راسها وندى غمضت عيونها كاضه بأيد امي تبوسها وتگلها
-عمه اني اموت بدون ابني بس ربي يدري شگد تعذبت حتى ارجعه الحضني وشنو تحملت وصبرت علموده.
"""
جــويريه:: اباوعلها بقهر مكسور گـــلبي عليها، طلعنه اني وماسه للمطبخ عفتها تسوي اكل واني رحت جبت كتابي واجيت يمها إقرأ وأحاجيها.
الحد ما اجوا نباوعلهم من شباك المطبخ دخلوا أثنينهم، وهـــب شايل رضا وبأيده حلويات ضحكت مكيفه بيه دخلوا للمطبخ وكفت على صفحة وصيهد باوع لماسه واكفه يم الطباخ وباوعلي اني كتابي بأيدي، عفته مشيت وره وهـــب اريد اشوف ندى.
دخّل للغرفة وهي نايمه يم خالتي ايمان، ووهب نزل رضا بالگاع گاله
-روح الماما.
ورضا عيونه مورمه من البچي، وجيس الچبس بأيده راح الندى، كعد يمها ودنك يبوسها بحلكها فتحت عينها فازه وشهگت تحضنه وتبجي من لكته بوجها تبوس بيه روحها رايحه ووهب وكف يباوعلها مبتسم ورضا حاضنها ساكت اجتني مــاسه بسرعة تسحل بيه
مــاسه:: امشي وره صــيهد راح للمشتمل اخذيله ماي بارد وروحي.
-لو رايد ماي يشرب شبيج.
غمت روحها ما قابله اخذت الماي ورحت فتحت باب الغرفة لكيته يطلعله ملابس يريد يسبح توه يحجي وسكت من شاف بأيدي كلاص ماي، مشيت يمه مديتله الكلاص باوع الايدي ورجع باوع الوجهي اخذ الكلاص من ايدي يسأل.
صــيهد:: سويتيلي غده؟
هزيت راسي اي ودنكت كال
-والله اتخبل من تجذبين عليَّ.
-ما مجذبه.
هز راسه خوش شرب الماي مديت ايدي اخذ الكلاص من عنده وحتى اسكته رجعت سألته
-اخت ندى انسجنت؟
-لا.
-ها؟
مشّه للميز واني افتر وراه واسأل احب اعرف شلون صار شلون جابوه وليش قبّلوا بالبداية تاخذه يجاوبني على گد السؤال قهرني كتله
-اشرحلي بالتفصيل ليش قبلتوا تاخذه وليش رجعتوا جبتوه منها وشلون قبلت تنطيه الكم والشرطه شكالتلكم.
دار عليَّ رافع حاجبه، ملابسه ومنشفته بأيده يريد يروح للحمام مد ايده يعدل زوايه حجابي ويحجي بهدوء
صــيهد:: لو موضوع يخص دراستج چا كلتي اختصر التفاصيل مو مهمه.
حط ايده على خدي يطبطب ويكمل كلامه
-بالليل عدج امتحان بالرياضيات خل اشوفن هم هيج تركزين بكلّ التفاصيل.
عافني ومشه واني اغم بروحي شعلي شحجاني،طلعت الرياضيات وكعدت اراجع لان لو اخربط بأشاره وحده يرزل وانتِ مو مال مدرسه مال اسرحج بمرعى شعلان واخر مره من حليت غلط يصيح ابطلج واوديج للمرعى تضلين وي الرعيان تسرحين بالخرفان.
كمت آدرس بتركيز.
طلع من الحمام باوعلي وكف يم المراية منطيني ظهره ويحجي
-لا تگلبين خلقتج.
شلت راسي اباوعله يمشط شعره وعينه عليَّ بالمراية
-شبيك صــيهد ؟
حجيتها مختنگه واهز براسي اكره من يدرسني هوه بسرعة يصير اعصاب، دار علي يهز راسه يحجي بهدوء
-شبيه؟
-ليش تصيح؟
ضحك يهز بأيده ويحجي
-ليمت مصيح ولج؟
كعد گدامي جر الدفتر من عندي يباوع بيه، واني اباوع لوجهه من منزل عينه رموشه هلطول الرمش وثخان منطيات منظر لعينه كأنما مخلي كحل، يگلب صفحات الدفتر ويحرك تعابير وجهه وي اللي يقراه مره يرفع حاجبه مره يهز راسه بتفهم، شال عينه يباوعلي لون عيونه من قريب يبين عسلي. سكت يباوع لوجهي دنكت اني بايدي قلم واشخبط على الكتاب گال.
-جيبيلي غدا.
شلت راسي اباوعله وسمعت باب المشتمل انفتح دقيقة واندك باب الغرفة وهو يباوعلي ساكت همس
-تعاي.
دخلت مــاسه بأيدها صينية الغدا خلّتها گدامه ووكفت
تعصر بأصابعها وهو تقرب ياكل ساكت گالتله بتردد
-احم صــيهد!
شال راسه عاف الخاشوكه يباوعلها وهي تتلفت بيني وبينه متوتره گالتله
مــاسه:: انه مو عندي تلفونات اثنين؟ الجابه الي الولد احم ابن عمي خليل، واللي انطتنياه خاله ما رضت ارجعه، ترضى اطيه البدور؟ تگول والله ما انزل برامج غير الوتساب وتعاين باليوتيوب اذا صــيهد يرضى.
هز راسه لا ودنك ياكل وهي طلعت من يمه ساكته، بعد حتى وياي ما حجه، من خلص اكل اخذت الصينية ورحت وديتها وجبتله چاي وجهه انگلب شرب الچاي گام غسل بدل وطلع، بعد احسن، كبل اروح للبيت يم البنات، ندى چانت حيل فرحانه برضا سحلت مــاسه اسألها شلون جابوه.
مــاسه :: ولج صــيهد داهيه، گايل الوهب اذا هسه نگلهم هيه الخاطفة الطفل ومزوره اوراقه، راح يجرون حتى ندى للتحقيق وينفتح على ندى باب لان هيه بأعتبار هم خطفته ورجعت تهريب اذا ما تتحاسب على الخطف تتحاسب على رجعتها للعراق بطرق مو قانونية، انطوها رضا، وراحوا وراها مطيحين حظها صــيهد گايللها خاف عبالج احنا مثل ذولاك عيالها تشترينهم بفلوسج، بالقندره ادوس عليج وعلى فلوسج واخيسج بالسجن بتهمة الخطف والتزوير انا ابن عشاير ادك اهل رضا دك وأشهدهم ضدج واحد واحد ولو تسدين باب افتحلج عشرة من السجن تحلمين تطلعين.
ولج هيه من اجت هناه عبالها راح يوكفون ضد ندى مكيفه ما تدري اخواني يحركونها فـــدوه اروحنلهم.
تحجي ودرنه وجهنا على صوت جدي يتعاركون وي وهـــب شكد غلطوا على ندى شكد طعنوا بيها وسبوها
وهو يدافعلها بحرگة گلب طلع من البيت ميت من القهر
اجتنه جده للمطبخ بأيدها شيلتها واعصاب شمرتها عليَّ
-اغسليها وشريها.
هزيت راسي خوش وهي طبت للمطبخ تغسل وجها محترك گلبها وتغلط دارت عليَّ گالت
-جيبي چاي الجدج.
راحت يم جدي مــاسه سوت الچاي واني رحت غسلت شيلتها، ورجعت الماسه لكيتها محضرتلي حتى استكاين اخذتهن ورحت وهم بغرفتهم بعدني بباب الغرفة واسمع جده تحجي وياه بحرگه وتكله
-لا تحط كلشي بأسمه، سويها بالعدل لا الدور يتكاتلون.
اسمعلهم بخوف واتلفت لا تطلع سعاد وتشوفني، وجدي يگلها
شعلان:: حسج ما اهيسه خلفتج كلها خايسه ما بيهم زلمه يستاهل يورثني.
سكتوا شويه وگالها
-وين سندات شامل اطينياهن
سعاد:: ياااا ياااا خييه عمه تتنصت عليكم
درت عليها فازه وهيه تصيح بصوت عالي رجف گـــلبي بخوف طلعوا جدي وجدتي واني صينية الچاي بأيدي بسرعة هزيت راسي لا
-جذابه بس جبتلكم الچاي.
سعاد:: صارلها ساعة واكفتلكم بالباب وحاطة أذنها.
درت الجدي اريد ادافع النفسي مالحكت ضرب الصينية گلب الچاي على بطني صرخت شمرت الصينية من ايدي وارفع الدشداشة من بطني اصرخ، وهو يجر بيه يضربني حيل، اجن رغد وماسه يركضن، وهو يغلط ويسب واني روحـــي من الحرك مفرفحة، ضرب رغد شلون جرتني من ايده ووكفت بيني وبينه
شعلان:: الا انعل والديجن الچلاب العدي مابيهم خير عرف يربيچن ارد اردود اربي واشوفن يا مره الترفع عينها بعيني منچن.
اشهك بلا دموع روحـــي رايحه جرتني مــاسه للحمام غطتني بالخاولي وشالت الدشداشة بطني أحمر كلها
هي ماتقبل اغسلها بماي واني من حلات روحـــي اريد بس تبرد غسلت ارجف وسمعنه صريخ سعاد ورغد طلعت مــاسه تركض واني قفلت الحمام وكعدت على حيلي ابجي امسح دموعي ويرجعن ينزلن ومكان الحرك كلشي يوجعني رغم ما طلع بيه طكاك، مسحت دموعي من اندك باب الحمام كمت فتحته وطبن رغد وماسه رغد اعصاب وترجف. تجر بدشداشتي تريد ترفع وماسه تغطي رجليَّ بالخاولي
شافت مكان الحرك وسبت جدها بحركه خلتلي عصاره وتحجي وياي بعصبيه
رغد:: ليش تجين هناه انتِ؟ مو عدج دراسه ما تضلين كاعده غاد تدرسين، لو مكيفه على الرزايل والكتل شبيييج؟
دنكت ساكته الخنگه ذابحتني وهي تحطلي عصارة وتغلط عليهم بحرگه وكفت غسلت وجها وباوعتلي مقهوره
رغد:: ليش تجين هناه جوري.
رجفت شفتي گوه احجي
-اخاف ابقى وحدي، لو بغير مكان عادي بس بالقرية اخاف لا يجيني القرين.
مــاسه:: رغد هاي بــدور خبلتها بالقرين.
ورغد متحلفه ببدور وتحلف تكتلها، طلعت وياهن من الحمام سعاد تباوعلي وتضحك بشماته ولا چن رغد كاتلتها، وجده تخزر بيه وتسويلي بأيدها سهله، صعدت فوك الغرفة البنات وهن يروحن ويجن عليَّ، وره العشا اجت مــاسه وجها احمر ومختنگه گالت ابوي ضرب رغد لان دره بيها متعاركه وي سعاد.
كمت من يمهن اريد اروح للمشتمل بس مو بأيدي فعلاً اخاف احس القرية مسكونه وبيها هواي جن وقرين وطناطله، على اعصابي ابقى بيها، مشيت لغرفة خاله حاجيت رغد لان انضربت بسببي مسحت على ايدي مبتسمه وتگلي
رغد:: عادي والله معليج انتِ ما طگاني بسببج ترى بس همه مصدومين لان ارد بوجهم عبالهم بعدني رغد اللي تخاف تحط عينها بعينهم رغد اللي اذا جابوا يمها اسم صــيهد ترجف وتمشي وياهم مثل ما يردون.
تشبعت بتهديداتهم گمت ما اخافن من شي وهذا الغاثهم وكفتي بوجهم غاثتهم الموضوع مو يمج.
سكتت مختنگه گالت خاله ايمان
-جــويريه كون محتركه حيل ولج؟
-لا خاله شويه
-يوميه حطي عصاره لا يضل أثر.
هزيت راسي اي وهي تباوعلي حجت بقهر مدنكه عينها
ايمان:: لا تحجين الصيهد
رغد:: خليها تحجي يمممه.
باوعت الرغد مقهوره وعيونها مدمعه
ايمان:: گلبهم محمل عليه لا يودونه للمعامل وهوه ظهره يوجعه رغده لا يصير بيه شي واموتن.
-ما احجي خاله.
مسحت عيونها مقهوره كمت طلعت من يمهن رحت للمشتمل قفلت الباب من جوه ودخلت للغرفة، وكفت اريد ابدل واباوع الجسمي بالمراية، زنودي بيهن كدمات زرك من اصابع صــيهد، حتى لو ما چان عصبي بس لزمته مؤذيه ما يحجي بلا ما يلزمني، دائماً لازمني من زندي ياخذني ويجيبني تعاي هنا روحـــي هناك، تلمست بطني اثر الحرگ أحمر حيل ومن تطخه الدشداشة روحـــي تشيط. بدلت خليتله عصاره وكعدت بفراشي ادور بجنطتي وگد ما كاتمه بگلبي حسيت يحتاج اكتب
طلعت دفتر مذكراتي كتبت بيه عن وجع گـــلبي وخنگتي عن خوفي من ابقى بالمشتمل وحدي.
كمت من اندك باب المشتمل وبالوقت نفسه دكّ تلفوني عفته ورحت بسرعة فتحت الباب دخل عاگد حاجبه التلفون على اذنه يباوعلي واني الم بشعري اريد الفه كبايه، سديت الباب وراه وقفلته باوع لوجهي بشك يسأل
-شعجب قافله الباب اليوم.
سكتت اعصر بأصابعي مشه للغرفة واني وراه كعدت بفراشي الم كتبي اخليهم بالجنطة وهو يباوعلي دار فتح الجراره رجع السبحة المكانها، ونزع دشداشته، لبس تراك اسود وكعد على طرف الچرباية مقابيلي، مد ايده يريد ياخذ دفتر مذكراتي جريته بسرعة وخوف باوعلي مضيك عينه گتله
-بيه شغلات خاصه.
-اها؟
هزيت راسي اي ودنكت اضمه بالجنطه متوتره وهو بقى مگابلني ما حاجيته خليت يمي بس الادب وسديت الجنطه عفتها يم راسي. ودنگت اقرأ بدون ما اباوعله اقرأ سكته بدون صوت، وبالي مو يمه لان متوتره من وجوده
كام اباوع وراه خله تلفونه على الشحن واستند على الحايط يدخن.
بأيدي قلم أخطط على الكتاب، خليت ايدي على خدي مميله راسي على جهه اشخبط وسرحت بأفكاري.
مثل كلّ مره اغمض بيها عيني حتى انسى اليمي والعايشته أفكر باشياء ثانيه واتمنى أعيشها، غمضت عيوني اتخيل وجودي ببيت وحدي بعيد كل البعد عن القرية اطلع لشغلي ومن ارجع جايبه اكلي وياي اكل والعصر اطلع لمكان هادئ او امشي بشارع مليان مكاتب ويصادفني الشخص اللي اتمناه خلي يكون بأيده مجموعة كتب تتساقط نتيجة اصتدامنا، ننزل نجمعهم سوه وممكن تأسرني لمسة اطراف أصابعه لأيدي، ممكن يراقبني ويتقصد لقائي اكثر من مره.
وكل هاي السيناريوهات ماجانت تقنعني مثل سيناريو لقائي وي هذاك الشخص اللي اشوفه صدفة بجو ممطر وتحت اضاءة الشارع الصفره، ابتسمت وإني مغمضة عيوني وغرگانه بخيالي فززني من صاح
-هيي.
فزيت اباوعله مضيك عينه ضايج شلت ايدي ألم شعري
صــيهد:: عوفيه، عليمن چنتي تضحكين؟
-ما ضاحكه.
حجيتها ولفيت شعري وهو خازرني
-مو گلت عوفيه؟
عفته مدنكه عيّني للأدب اباوع للحروف وكلشي ما اقرأ گال بهدوء
-جاي اتخيل من نكبر وشعرج يصير لونه ابيض
باوعتله مستغربه وهو عينه لشعري باوع لعيوني مسحت على راسي وهمست
-أصبغة.
ابتسم بطرف شفته
-تصبغينه تعوفينه ابيض هوّ بكلهن حلو.
دنكت منحرجه اشخبط وخايفه من عنده نزل يمي لفراشي بلعت ريكي متوتره يحجي بخفوت رجفني
-عاينلي جــويريه .
بقّيت مدنكه مد ايده على حنجي يرفّع وجهي
صــيهد:: عاينــي لا اشيلج للميز ساعتها ما تگدرين تنزلين عينج.
باوعت لوجهه مرتبكه، جر الكتاب من عندي طبكه عافه على الجنطة ومسح وجهه بحيره يريد يحاجيني حط عينه بعيني گال
-لحد يا وكت اصبر عليج؟
هزيت راسي بخوف اسأل
-شنو؟
-اريدج يمي وياي بنفس الفراش. صارلي مده متحمل وساكت حتى ما تضوجين بس ما كافي؟
جريت ايدي من بين أديه ورجعت ليوره طك ظهري بالميز
-انتَ حلفت.
خزرني ورجع جر أيدي الايده
-لا تنترين ايدج من أيدي ماجابرج انا كاعد احجي وياج.
سكتت مرتبكه وهو لازم أيّدي بأيده، والثانيه لازم بيها جكاره اعصاب بس يجبر نفسه يحاجيني بهدوء حرك إبهامه على ظهر ايدي وعينه بعيني
صــيهد:: انا مو حيوان حتى اجبرج، اريد اوصل وياج الحل شني سبب رفضج لا انتِ بيج مجال اعودج عليَّ اذا كضيت ايدج بجيتي لو بست خدج وجهج يوم كامل گالبته عليَّ نامي يمي ما اسويلج شي الا صياح وعركه يله تجين ليا حد نضل هيج؟
دنكت اكل بشفايفي جسمي يرجف وگلبي يدك بقوة
-ما احب أحد يلزمني.
-بس انا زوجج مو أي احد
رفعت اكتافي ما ادري واني مدنكه بس اريد يعوفني جر اخر نفس من الجكاره زفره بيني وبينه وهو يگلي
-من اگرب صوبچ تغدين تراب ولو كضيت ثوبج وجهج ينگلب احمر بس انتِ تعاندين وانا صابر عليج ومتحمل كلشي جوري ما تنامين وحدج بعد تنامين يمي وما اسويلج شي لمن تتعودين عليَّ.
حركت راسي لا بخوف غمض عيونه وعصر ايدي بأيده
-حباب صــيهد
-خرب روح صــيهد انتِ ليش تحركين الگلب.
دفع ايدي ووگف بعصبية طلع من الغرفة ورگع الباب حيل هفيت على وجهي اتنفس بسرعة وامسح بعيوني كمت طفيت الضوه ورجعت لفراشي تمددت ظهري للچرباية اريد انام قبل لا يرجع، بس مالحكت دقايق ورجع شغل الضوه درت اباوعله، واكف يم النقطة يياوعلي عيونه حمر
صــيهد:: نامي لا اجرم بيج.
غمضت عيوني بسرعة طفه الضوه وهو يگول
-خبيثة مثل...
ماكمل كلامه فتحت عيوني الغرفة ظلمه حيل وما ادري بيه بيا جهه حجيت بخفوت متردده
-خبيثة مثلمن؟
اجاني صوته من جهة الشباك فتحها وصار ضوه الگمره بالغرفه
صــيهد:: ترديني اغلط؟
-لا.
-نامي.
يحجي بهدوء اباوعله ملامحه ما واضحه واكف يم الشباك درت وجهي من عنده غمضت عيني احاول انام هستوني اريد اغفى وسمعت صوت البومه فززيت وكفت على حيلي مخروعه اباوع صــيهد مو يم الشباك حجيت بصوت يرجف
-صــيهد صــيهد.
-ها.
لمحته متمدد على الچرباية مشيت اركض واتعثر حطيت ايديي على بطنه وصدره اجلب بيه واحجي بخوف
-اجت واني ما باچيه،راح يجي وراها.
-ياهو؟
بلعت ريكي اباوع للشباك خايفه ماجاي اشوفها وخر صــيهد يسويلي مكان يمه وسحبني من ايدي الحضنه واني عيوني للشباك الشي الوحيد اللي يخوفني اكثر من صــيهد، البومه والقرين ما جنت اتخيل يجي يوم واخاف من حيوان هلكد الرعب يدبي بجسمي وگلبي تتخربط دكاته ما تهمني لمسات صــيهد گد ما خايفه وتركيزي وي الشباك احجي بصوت ناصي حييل
-ليش فتحت الشباك ليش؟
-اختنگت.
-الزمني حيل راح يجي
شال راسه من المخده يباوع الوجهي
-محد يجيج جوري من انا يمج محد يجيج
مخلي ايده جوه راسد وايد على رگبتي واني اتلفت للشباك بخوف گال
-لا تعاينين للشباچ.
ووي حجايته حرك ايده يريد يحضني من بطني صررخت مفرفحه روحـــي وهو فز بخوف واني أتلوى موجوعه احس ايده فركت الحرك وروحي نمردت، كام بسرعة شغّل الضوه مستغرب
-شبيج؟
واني غمضت عيوني بوجع رافعه الدشداشة عن الحرك مد أيده لوجهي
-جوري شبيها بطنج.
فتحت عيوني مابيه حتى احجي گد ما انوجعت وهو عاگد حاجبه بعصبية هز راسه يسأل مسحت وجهي احجي وصوتي رايح
-مابيها شي.
-شلون مابيها شي؟
ومد ايده يريد يجر الدشادشة، صيحت ولازمه بأيده وهو خازرني بغضب
-وخررري ايدج
-مااابيه شي .
احجي وهو ما مهتم چلبت بالغطا كل حيلي اجر بيه عليَّ وهو يجر الدشداشة من جواي هو يكشف واني اغطي رفعها عن بطني تغطيت بالغطا بسرعة فاتحه عيني حيل وهو ما مهتم الشي كل همه يشوف شبيها بطني لزم ايديي بقوة يريد يوخر الغطه
-صــيهد لااا والله استحي والله حبااااب.
-بس وخرررري عن بطنج راح اسب اهلج واهل اهلج.
نزلت الغطا على كيف من على بطني طلعلتله جزء من الحرك وهو سحبه بقوة ينزله اكثر فتح عينه على وسعها وباوعلي بصدمة
-هاي بيش محترگه؟ هاااه ياهو الحارگج.
-محد محد اني احتركت بالهذا، بالماي الحار.
رجع يباوع للحرك بصدمة شهگت مقشعر بدني من مد ايده يتلمس داير ما داير الحرك باوع الوجهي جريت الغطاء اريد اغطي بطني ما قبل شال ايده يهدد
صــيهد:: اذا طلعتي جذابه وواحد من بيت نعلان حارگج اكتله وفوك كتلته اكتلج هم لان جذبتي.
هزيت راسي لا وعيني مو عليه عيّني للشباك جر وجهي عليه
صــيهد:: عاااينيلي
-بعدها.
-خرررب.
رأح بعصبية سد شباك الغرفة ورجع غطيت بطني وهو جاب لفاف وبلاستر جروح ابيض مد ايده هو يجر بالغطا يريد ينزله واني اجر بيه اتغطا شال عينه خازرني رخيت ايدي نزله حد وحد وي الجرح بقيت لازمه بالغطا خاف ينزله زايد ارفعه خله عليها لفاف ولزك اطرافه بالبلاستر بس وخر من يمي نزلت دشداشتي ودرت أريد انزل بعدني ما حاطه رجليَّ بالگاع صاح
-ارجعييي.
رجعت المكاني اباوعله ظم الاغراض طفه الضوه صارت ظلمة حيل ما اشوفه الحد ما حسيت بيه يمي بالچرباية جراني من ايدي خله ايده جوه راسي ولفاها يقربني الصدره واني بس فاتحة عيني واحسب الدكات گـــلبي المخربطة
-صــيهد.
-اششش نامي
حجاها ومد ايده يسدّ عيوني غمضت عيني لا اصابعه يفوتن بعيوني تلمس وجهي الحد ما وصل لشفايفي بعدني ما محضرتلي حجاية وحسيت شفايفه على طرف شفايفي تعالت انفاسي وتضاربت دگات گـــلبي بخوف من حس بيه ارجف بعد وجهه وقرب وجهي الرگبته يصمني الصدره اكثر ويحرك ايده على زندي متحسر.
ويرفعها الشعري يمسح عليه واحس بيه من يجر نفس من بين خصل شعري يقشعر بدني وجسمي يرجف، همست بصوت ناصي
-هيه ليش تجي يم غرفتك؟
بقى ساكت يمسح على ايدي شويه وگال
-ياهيه؟
-البومه.
-تحبني
-ليش تحبك؟
-ما ادري إسأليها.
سكتت احس راسي يصعد وينزل وي نفسه من يرتفع صدره ومن ينزل شويه وگال
-چان عمي شامل يربيهن، مره رادين انا وياه من الگيعان لگيناهن بالبستان طايحات من المطر افراخ صغار داراهن وعافهن الامهن بالحوش بس ما راحن امنن يمه هنه والام ، وانا يوميه اروحن عليه حتى اشوفنهن هوه يعرفهلن لان من گبل جان مربي بومه.
لمن كبرن شويه ضلن يفترن بالبستان مالنه ولو طلع عمي شامل يتبعنه، وليله من الليالي وحده منهن تبعتني انا.
للعلم يعني البومه مو من الحيوان التحب البشر
ولا تتبع احد مو مثل باقي الحيوانات بس الظاهر تعلقن بينه انا وعمي شامل لان من وهنه افراخ داريناهن، بس هيج.
يحجي بقهر ومن يلفط اسم خالي شامل يتحسر كتله
-وينهن البقيه شو بس وحده.
-لا اثنين مو وحده ومرات اشوفن بالبستان اكثر
-حتى لو تحبك شعرفها هاي غرفتك ليش تجي يم الشباك.
-انا اصيحلها حتى تخافين وتجين الحضني
شلت راسي من صدره بفزه
-صدك؟
-اي.
جريت ايدي من صدره اريد ابتعد محترك گـــلبي جراني حيل ينتر
-وووولج.
-عووفني حگرت گبلي
-عليمن حرگت گلبج لللج.
حجاها ودفع ايدي حييل ينتر نزلت من الچرباية رحت لفراشي وهو يحجي بحرگة
-زمالة تكلها هيج تكلك هيج.
ضميت روحـــي بالفراش ساكته صاح
-لوو تموتين بعد ما اكلج تعاي نامي يمي اذا ما اخذ عليج مره.
-اخذ.
شمر علي المخده ركعني براسي يصيح بحرگه
-سدددي حلگجج.
-لا تضرررب.
-راح أجيج جويريه ابچيچ دم يشهد الحسين.
ضميت راسي جوه الغطاء احجي بصوت ناصي نتر
صــيهد:: لا تدردمين!
طلعت راسي من الغطا احجي بحرگه
-حقك تجيبها ما تدري بيها من تجي شتجيب وياها، لو تدري حتى انتَ تخاف.
اباوعله بس جمرة الجكاره مبينه
صــيهد:: حجاية وحده بعد حجاية خل اسمع اذا انتِ بت امج سمعيني حسج.
غطيت راسي ما احجي كوه غفيت.
""""
رنـــه :: يفتر يفتر يدور فراشة لكاني مغيرته جابه واجاني للغرفة فتح الباب يحاجيني تعبان ونعسان
طــروادة:: رنـــه وين فراشي شني هذا الحاطتلياه.
-اشش صوتك عفراء نايمه.
كمت طلعت للهول يمه
-نام على هذا جديد.
وهو يحجي بضوجه
-ما اريدنه وين فراشي هذاك؟
-ذبيته لچلاب.
كفخني على راسي ودفعني الغرفة اهلي يطكطك رگبته بتعب
طــروادة:: جيبيه لا اكتلج ما اعرف انام على غيره.
درت عليه احركله حلكي مناه ومناه سريع عود اممم انهجم بيتك خزرني
-شني هاي الحركات ولج؟
مشيت الغرفة اهلي جبت فراشة ورجعت الغرفته اجه وراي فرشته اله بصف الحايط تمدد ظهره يطكطك حضن المخده وهو يگول بتعب
-اااخ يا يابه.
-هسه يجيك يمرغلك رجليك.
-ياهو؟
-ابوك.
-وعلي اذ كمتلج.
-هسه شبيه هذا الفراش وكاتل روحك عليه.
جر الغطا عليه يحضنه ويگلي
-يخبل
-ااي اي يخبل يله نام.
غمض عيونه تعبان طفيت الضوه وطلعت من يمه عفراء عفتها نايمه رجعت لكيتها تحجي مكالمه وي منذر، رد من بغداد وجاي يبنيلها بيت صغير على گد فلوسه يم اهله وهي ما راضيه بس سكتت، گالت انه احب اهله وماعدي مشكله وياهم حتى يطلعني منهم انه اعمامه المضوجيني.
لفيت رأسي ونمت ثاني يوم من داومت مــاسه حلفت تزعل لو ما جيت للحنه والعرس وحرت شلون اقنع طــروادة، كلت اشوفن بريا واكله يگل الميثم خل يزعل. من طــروادة اذا ما يخلينه نحضر عرسهم.
العصر طلعت الحمامه البيضه طيرتها وكعدت بالحوش نص ساعة وما اجه، جبت مشمش يلعب وي الارانب، من كبر شويه ودنفش صار يخبل، اجت زهره يمي تلعب وياهن وحسين اخذ طوبته وطلع يلعب بره بس اخاف عليه لا يجي واحد من الولد ويكتله كلساع اعاينله من الباب لمن طلعت عــفراء شافتني گالت
-دهر صابج سدوا كل الفتحات وبعدج تعاينين.
-حفرت جديدات والله هههههه.
غمتني تضحك وراحت تكنس الحوش مشيت يمها اساعدها وارش المچان المكنوس گالت
-لوره عرس مــيثم اروحن انا وي اعمامي زحمه هسه عبالهم زعلانه منهم.
-يمه تعودت عليج شلون ترحين.
-هيه هاي جا شنسوي.
كضينه الحوش هيه راحت الشمس وانه رديت يم باب الحوش اعاين لحسين حاطله بطل وجدر مخسف ومدري شنو يشوت الطوبه عليهن وكلشي ما طك من عدهن، شويه واجو الولد بريا وسليم ووهب، شاتلهم الطوبه وهمه ثلاثتهم يردون يشوتونها واحد كسر الثاني وحسين بنصهم يصيح
حسين:: اطونياها عمي اطووني لا تنشك.
جرجروه يدفعون بيه
ســليم:: وخر حسين وخر اليوم اجيسهم.
حسين:: عمي طوبتي جيبوها.
بريا:: تعال حسين انا وياك عليهم.
حسين:: اهوووه شبون طلابه هاي.
يصيح عليهم ووهب ركض حط حجارات سواله هدف ومحد بالگول كلهم يركضون وره الطوبه يردون يگولون بريا طك ســليم برجله طيحه بالگاع خلاه يتلوى ويصيح
ســليم:: خرررررب امك ابن الروسيه.
وهـــب:: گوووم گوم كبل بجه.
كام ســليم يعرج حسين يحب خناگه راح لسليم گاله
-انا وياك فريق
بريا:: الخايس ردتك وياي
ووهب يضحك عاين السليم يگله
وهـــب:: يريده وياه بيه ريحتهم.
وسليم شات الطوبه حيل اجت بوجهه وهـــب خلاه يسب شعلان الف سبه النوب ما يوكفون ويشوفنه شبيه يضلون يلعبون هوه وبريا وحسين تحمس وياهم ومن ما يگدر ياخذ الطوبه منهم يصيح عليهم
حسين:: طووبتي هيه.
ســليم:: انچب والعب يله لا اشگها.
طلعوا سجاد وعبود من بيت عمي شاكر صاحوا عليهم
وهـــب:: تعالوا صيروا كولجيه.
حسين:: لااا عبود ما يلعب تطكونه على گلبه وطرواده يگلب القرية على راسي وراسكم
اجوا عبود وسجاد يمهم عبود وكف على صفحة كالهم
عبود:: انا أشجعكم ومرات اصير حكم
زهره طلعت تركض كعدت يم عبود تكلهم
زهره :: هبهب يفوز
وهو يتخيل يجي يبوسها حييل، خابروا على الولد جابوهم وسوولهم گواله وكلمن فريقه
طــروادة فريقه مــيثم وبريا وسلطان وحسين
وصيهد فريقه وهب وسليم وسجاد.
خلوا حسين الحارس وصيهد يگلهم
صــيهد:: انتم خمسه واحنا اربعه
طــروادة:: حسين صغير ما ينحسب وانتَ اخذت الفويق الأقوى اسكت بعد
بدوا يلعبون وحسين يعوف الگول ويهجم وياهم وهمه يتسودنون
طــروادة:: ارررجع بالعباس اذا طلعت من الگول.
صــيهد ووهب اثنينهم لابسين دشاديش وشادينهن على بطنهم وملثمين بالجفافي والولد كلمن هدومه لون هجموا طــروادة وميثم يردون يگولون وصيهد طك مــيثم برجله كسره خلاه يتلوى بالگاع وهو يصيح
مــيثم:: خرب وولك عريس انا ما يصير تكسرني.
عبود:: بطااقة حمره على صــيهد.
وشال نعال زهره الاحمر يأشرله بيه صاح عليه
صــيهد:: ارررميك مو بكيفك بطااقة حمره شنيي.
طــروادة:: اطلععع مطرود اطلع
وصيهد شات الطوبه ويركض وراها يصيح
-ما اطلع.
وصاح على حسين
-وخرررر ولك وخر لا اموووتنك.
حسين وخر من الگول وصيهد شات الطوبه گول وراح وي الولد فريقة يهوسون وسجاد عاف الگول اجه يهوس وياهم وطرواده وميثم وبريا اخذوا الطوبه وراحوا گولوا عليهم وصيهد وسليم تسودنوا
ســليم:: ما ينحسب والله ما ينحسب بعدنه نهوس.
بريا:: والله ينحسببب مو بكيفكم.
صــيهد:: تعاال بريا خل انعل والديك شني الينحسب.
حسين:: عمي والله ترى اخذ الطوبه وابطل العبوا عدل.
وهمه هدوا عليه شلون المسودنين حتى طــروادة وياهم والفرخ اختلس شرد يم عبود وعبود شايل نعال زهره ويأشر عليهم واحد واحد ويگلهم
عبود:: بطاقة حمره بطاقة حمره بطاقة حمره.
طردهم كلهم صــيهد گاله
صــيهد :: جا ياهو الضل بالملعب خالتك؟
طــروادة:: انچب، العب يله.
ردوا يلعبون من جديد مدافع حتى نفسه الفريق بينهم واحد يدفع الثاني كلهم يردون يگولون، واليحجي وي صــيهد يجيبه براشدي، وطرواده بس واحد يحاجيه يگلهم
طــروادة:: طوبتنا هيه ترى نبطل.
مــيثم گول على فريق صــيهد وصيهد صاح
صــيهد:: خاب روح شوفلك واحد يطيك مره انا بعد ما انطيك لغيت العرس.
مــيثم :: اجي بفريقك؟
طــروادة:: يا خايس
سلطان:: خله يروح طــروادة ما نحتاجه هوه كلساع يطيهم الطوبه متقصد.
وصيهد مد راسه يعاين السلطان رافع حاجبه سلطان گبل گاله
سلطان:: اجي بفريقك؟
طــروادة:: هيج صارت خوش، تعال صــيهد انا وياك ووهب وحسين بفريق وخلهم همه فريق وحدهم.
بريا:: انا وياكم ما اريدنهم
اجه وياهم اتحدوا صــيهد وطرواده وبچوهم همه اطول واخشن شي بالولد كلساع يكسرونهم شبعوهم گواله وزهره بس من يگول وهـــب تصفگله وهوه يموت من الضحك ويركض يبوسها
رادوا يبطلون وصيهد جر تفكة طــروادة
صــيهد:: الزلمه بيكم يبطل الا هسه اكتله.
سلطان:: تعبـــت يمعود.
-انچب اللعب.
مــيثم :: رجلي ورمت وراي عرس وكلساع واحد كاسرني.
صــيهد:: انچب يلله انچب درينه وراك صخام العب محد يبطل ارميكم مناه لمن اگول عشرين گول عليكم، اذا گولتوا علينه يصيرن ثلاثين.
وضلوا يلعبون غصباً عليهم بس يركضون يوصلون الصيهد يردون ياخذون الطوبه من عده يحط بيهم راشدي ويدفعهم، يرحون على طــروادة يطكهم برجله جنها كرك يكسرهم ويخليهم يتبرغثون بالگاع.
وعبود شال النعال على طــروادة گاله
عبود:: بطاقة حمررره بره
طــروادة:: ووولك انا اخوك الچبير ما يصير تطردني
ســليم:: والله غش والله العظيم غش الا اشك الطوبه.
حسين:: طووووبتي طوووبتي.
وركض للطوبه شالها واجه للبيت يركض وسليم يركض وراه طب حسين بساع وسدّ الباب وسليم من بره يگله
ســليم :: اكضك ابو الجكاير
اعاينلهم ضلوا شويه واكفين يسولفون النوب كلمن راح لبيتهم وخرت من يم السياج مشيت للحديقة خفت لا بريا يلكه الحمامه ويجي، فتحت القفص وطيرت الحمامات كلهن طب طــروادة عاينلي گال
-ها خاف ما يرجعن.
-يرجعن.
هز راسه خوش غسل رجليَّه وطب للبيت يسبح احب هالطبع بيه من يجي للبيت يغسل رجليَّه يله يطب خاف يوصخ الفراش واحنا تونه منظفين.
ضليت بالحوش خايفه حيل خاف يجي بريا واتورط شويه وشفت الحمامات البيض اثنينهن وي حماماتي
ضليت اروح واجي بصف السياج واطكطك بأصابعي بخوف دقايق وسمعته يهمس
-غزاله.
-بريا.
-يمج.
-روح روح بسرعه لا يلكفك طــروادة يموتك.
احجي واتلفت للبيت بخوف لا يطلع طــروادة گال
-خل يموتني، شبيج انتِ محتاجه شي تردين شي؟
-لااا كلشي ما اريد بس روح بعدين اكلك.
- طــروادة شويه ويطلع وي مــيثم يجيبون الغرفة واجيج.
-خوش بس ووولي هسه شبيك جلبت.
- وجع رايح اسمعي اريدن چاي من ايدج.
-اشتغل عدددك انه؟
ضحك وانه من گد ما خفت متنرفزه گال
-غير ابن عمج غصباً عليج.
-غصباً عليَّ؟؟
-اي
-خوش سهله.
وخرت من يم السياج طبيت للبيت طــروادة بغرفته جاي يمشط توه طالع من الحمام، وعفراء كاعده بباب الغرفة بحضنها شمس وتحجي وياه وكفت يمها اركز اريد افهم
طــروادة:: گتله والله انا لو عدي اجيبها وحدي بس الظروف ما تساعد، گال هاي هيه نص منك ونص من عدي والحد هسه مــيثم ما يدري.
-شنوه؟ كلولي عليمن جاي تحجون؟
ضحك طــروادة وعفراء عاينتلي گالت
عــفراء:: على غرفة مــيثم اذكر گبل ابوي گال الميثم من تتزوج غرفتك عليَّ طــروادة خابر سلطان واتفقوا يدفعون فلوس الغرفة هوه وياه بالنص.
-هاه خوش فكرة
دنك آخذ الشحاطة وراح يمسحها مشينه وراه انه وعفراء ، لبسها ووكف گدامنه يسأل على لون الدشداشة يلوگ اله لو لا، لونها رصاصي وحلوه عليه
عــفراء:: اذا عليك مو حلوه عليمن تطلع حلوه يا بعد اهلنه.
ضحك وباسها من راسها
طــروادة:: فـــدوه اروحنلج أم شمس بعد روحـــي .
باس شمس يكرص بخدودها وهو مدنك على شمس مد ايده جراني جوه جتفه
طروادة::شبيج ضايجه.
-انه لا وعلي ولا ضايجه.
-شجيبلج وياي؟
-حلويات طك گـــلبي
-ها رنـــه؟
باوعتله بنظرات اتوسل، تالي بدل ما يجيبلي حلويات اكتشف شرايح جهاز السكر مخلصات گال اجيب وياي، اخذ مــيثم وسلطان وراح.
ضليت افتر وره عــفراء اريدها تكعد بمچان حتى أأمن اطلع، مناه لمن شفتها طفت للمطبخ تريد تسوي كبه، وكفت يمها احمي الچاي كتلها الي ماشربت بالغدا، سكتت صبيتلي بكوب تعاينلي حطيت شكر شويه
-شو تحطين شكر؟
-ما اگدر اشربه مر.
هزت ايدها ما راضيه
-راح اطلع يم الطيور.
مشت بدون ما أسمع ردها متحلفه ببريا انه يگلي غصباً عليج تسويلي چاي سهله اعلمك ياهي الغصباً عليها، صعدت على گن الدجاج حطيت كوب الچاي على الحايط ونزلت نكثت اديه ووكفت اعاين لكوب الچاي الشمس برتقاليه والحمامات بالسماء طايرات يرحن ويجن، وانه عيوني وي كوب الچاي ليمت يأخذه فجأة انمدت ايد اخذت الكوب وهمس
-غزالي.
-وحمس.
-هاي عليمن؟
-عليك احترم نفسك شني غزالي شو صاير ماتعررف تحجي.
-راح اسكتلج الخاطر الچاي
سكتت مركزه وي صوته ليمت يشرب الچاي شويه وسمعته يگول
بريا:: اموتن على چايچ.
-شربت؟
-اي عاشت ايدج
حجاها وشرب من جديد لا اشوفه ولا يشوفني وانه تدك بگلبي من گال غصباً عليج تسويلي گتله
-والله تعبنه اليوم
-ليش؟
حجاها بخوف وانه امثل گال
بريا:: شبيج رنـــه منين تعبتي تعاي بله اصعدي خل اشوفنج منين تعبانه؟
ما صعدت ضليت من وره السياج احاجيه
-كضينه ماي أرو وماي الشط ما يسحب ضالين كلش بلا ماي لا ماي شرب ولا ماي سبح وانشلع گلبنه بعدهم الهسه ما تارسين.
بريا:: على هاي سهله عبالي بيج شي، حتى الچاي راد يطيح من ايدي.
-لا لا مابيه شي اشرب اشرب.
وسمعته من سفت الچاي گتله
-تدري لان ما عدنا ماي حتى چاي اليوم ما مسويين هسه علمودك لان انتَ ردت چاي خليت حسين بال بالقوري وسويتلك
ووي حجايتي اسمعه ضل يستفرغ مختنك وانه گـــلبي ارتاح واكله
-لا تخاف هيه من فارت تعقمت صارت ماي بعد.
ضل يكح مختنك وگوه يحجي
بريا:: اموووتج رنـــه .
-فوك ما اسويلك چاي.
كح مختنك خفت لا يصير بيه شي وابتلي گبل گتله
-اجذب عليك والله لان گتلي غصباً عليج جذبت عليك.
وهوه ما يحجي وياي الولد مدري شصار بيه كتلني الخوف ركضت للبيت اخذت ماي وعفراء تعاينلي مضيكه عينه امشي يمها بهدوء بس اوصل الباب الهول اطلع اركض صعدت على گن الدجاج لكيته مستند على الحايط رايحه روحه وعيونه حمر مديتله الكلاص وهو خازرني
-اجذب عليك والله.
اخذ الكلاص غسل بيه وأشرلي افتري من الجهه الثانية، نزلت ورحت بساع صعدت على الدرام من جهة بيتهم وكف گدامي مضيك عيونه
بريا:: ليش هيج؟
-ردت اضوجك!
-تلعب روحـــي لا تشاقيني هيج بعد.
-اشوفن افكر
-رنـــه .
حجاها ضايج كوه فاتح عيونه، احس دوم وي غروب الشمس بشرته تصير برتقاليه ولون عيونه يتغير، رموشه يصيرن جوزيات وعيونه ما يگدر يفتحهن عدل دوم فاتحهن على النص، دنكت ساكته حسيت خطيه حيل ضوجته رديت اعاينله
-يله ما اعيدها بعد
ابتسم وزفر نفس براحه.
بريا:: البارحة اجيت هنا ردت اشوفنج ما طلعتي خفت اطير الحمامه لا ياكلها هاسكي.
-ليش شنو ردت؟
دنك بأيده سبحه لونها فيروزي شفاف احسها بلون عيونه مرات اشوفن لونهن هيج، حرك خرزها بين اصابعه ورد شال راسه عاينلي مركز عينه بعيني
بريا::ماردت شي جبت لفات من المطعم وجبتلج وياي تالي من ما طلعتي اطيتها السليم.
-اكل سم.
-هههههههههه ليش ولج؟
- غير جايبها الي لو منطيها الهاسكي ولا السليم.
-لسانج رنـــه لسانج انتِ مصيبة.
-مالك غرص مصيبة على اخواني مو عليك.
ابتسم رافع راسه
بريا:: يوم التصيرين مصيبة عليَّ.
-اهوووه رجع يحجي مو خوش حجي
درت وجهي اهز بأيدي وهو يضحك رديت اعاينله
-بريا لا تحجي وياي هيج
هز راسه خوش
بريا:: تأمرين.
-شنو ردت اكلك گبل لا انسى، طــروادة ما يخلينه نروح العرس اخوك مــيثم، انتَ شتسوي گل الميثم عليه وخل مــيثم يگول الطرواده لو رنـــه ما حضرت عرسي ابطل وما اسوي عرس .
بريا:: صار اذا ما انتِ تحضرين اخرب العرس كله.
-گول والله؟
-وعيونج الحلوه.
-انچب.
فتح عينه حيل خازرني ومد ايده يريد يطكني نزلت بساع وهو بغضب ومن بين اسنانه يحجي
بريا:: هذا السانج اذا ما اكصه.
-يا والله تايهتلك وتكصه.
-خررررب رنـــه رنـــه خرب روح طــروادة على هل تربيه الخايسه.
-خايب تروح فدووه لتربيتي جا شني انتم المتربايين؟
واكفه بالحوش متخوصره واحجي بحرگه وهوه من وره السياج يتمنى بس يكضني يفور ويغلط محترك گلبه
بريا:: حيوانه
-انتَ الحيوان احترمني احترمك.
وهو تسودن ضل يصيح بصوت عالي وافتر للباب يدفر بيه بغضب طلعت عفراء تركض وانه ساده الباب بظهري وهو يصيح
بريا:: الا اشك حلگج.
-امشي منااااه ولي يله ووولي.
عــفراء:: دهرررر الدهرررج كون دهر الدهرج.
واجت تركض جرتني من الباب طكتني وفتحته وخرت على صفحة اعاينله بغضب وهو من صارت عفراء بوجهه دنك يتراجف عبالي عفراء راح تعتذر منه بس هيه رزلته
عــفراء:: انتَ عاقل وعين الله عليك شني حاط دوبك من دوب رنـــه؟
بريا :: خويه بس احاجيها
عــفراء:: شني تحاجيها؟ بريا مــيثم يرضى بهاي سوالفك؟
شال راسه يعاينلي بغضب وانه أأشرله على رگبتي الا اذبحك، مسح وجهه بقهر يتعذر من عفراء گالتله
-ما اريدن تتعذر اريدك تكبر عقلك وتعوف هالزعطوطه بوحدها لا تحط رأسك براسها.
هز راسه خوش متحلف بيه ويخزر وانه كل ما يباوعلي أأشرله على رگبته الا اذبحك، راح وبس عفراء سدت الباب تحضرت اريد احجيلها مالحكت نزعت نعالها وكضتني من ايدي تحمس بيه على ظهري
اجوني يركضون حسين وزهره يفروغني منها كتلتهم وياي محترك گلبه تكتلنه وتضل تبجي وتلطم وتحجي وي امي
عــفراء:: امددداني وأمدّه تربيتي هاااي هااي تربيتي لسانها يلوط آذانها ومحد سالم من شرهاا.
كاعده بالمطبخ تكمل الكبه وتحجي بحرگه ودموعها تجري، وانه وحسين وزهره بغرفة اهلي كلمن كاعدله بصفحة يبجي، خفت لا من يجي طرواده يشوفنه نبجي ويعرف السالفة النوب شيخلصني منه كمت غسلت واقنع بحسين وزهره ما يحجون يم طــروادة كتلهم بس تحجون يتعارك وي عفراء وتروح لبيت رجلها زعلانه، غسلوا وراحوا العفراء كعدوا يمها وانه اخذت شمس العب وياها اتلوك العفراء حتى ماتحجي الطرواده. وهيه هم سكتت ما گالتله.
ثاني يوم گالها بضوجه
-روحن للعرس عفراء، هذا مــيثم ارعن ضل يلح والله فشله هسه صــيهد يصير بخاطره.
عــفراء:: ميخالف حاجي صــيهد يقتنع.
همه يحجون وانه ركضت احضرلي هدوم، حنه ما يسوون لان عمتي امي صــيهد تعبانه وماسه مارضت تسوي حنه مقهوره على امها، بس الولد سووا حنه ضليت كاعده بالحوش اسمع لهوساتهم.
""""
مــاسه :: مقهوره حيل على امي فجأة تعبـــت كامت كوه نكعدها تدوخ ما تگدر تضل كاعده، بيوم العرس نزلت الصبح يمها رغد كاعده تريكها ومن شافتني ضحكت وفتحت ايدها
ايمان:: هلا بعروستنا هلاا يمه هلاا.
شبگتها ابجي وهي تبوس بيه
-يمه صيري زينه فـــدوه اروحنلج يمه انه بدونج اموتن.
باستني حييل ووخرتني من صدرها تمسح بعيوني
ايمان:: مابيه شي يبعد امج ما اريدن تبجين گومي يله اسبحي حتى ترحين للصالون حضرتي غراضج؟
هزيت راسي اي وكمت من يمها، البنات مخبوصات يركضن مناه ومناه، سبحت ونزلت ندى ماگدرت تروح وياي علمود ابنها، اخذنه وهـــب انه وجوري، طبينه للصالون وخابرني مــيثم جاوبته بتعب
مــيثم:: ما مرتاح الصوتج منّ البارحة شبيج؟
اختنگت ما اگدر احجي بلعت الغصه
-خايفه على امي حيل تعبانه.
مــيثم :: گولي يا الله حبيبتي مابيها شي لا توهوسين.
-الله كريم، وين انتَ؟
-وي كهلان رايحين للمرعى نجيب ثور.
-كتله علمود رنـــه وعفراء يجن.
-اي يجن يجن .
-ماشي يله راح اروح يصيحولي
سديته من عنده ورحت يم جــويريه تختارلي مسكه گتلها
-اكلج مكيجي انتِ هم.
-حتى اخوج يسويلي محكمه ويعاقبني كأنما مرتكبه جريمه .
ضحكت، كعدت يسحبن شعري وراسلت صــيهد بس كتبتله
-الو
رد
-ها جبار.
-شلونك اخوي؟
-مو زين والله راح ياخذون جبار من عدي ياهو يسويلي چاي بعد.
وديتله ضحك مصدومه بيه ماجان يحجي وياي هيج شقى وهاي ردلي
-الله يسعدج ويهنيج مــاسه.
-بعد روحـــي .
شافها ومارد كتبتله
-اريد اسألك على شي
-استعجلي لا تنعثلين عدي شغل.
-عادي جــويريه تخلي مكياج صالون؟
شافها ومارد سكتت مرت نص ساعة وهوه ماراد ولا طاب للوتساب، عفته والتهيت وياهن ساعتين وودالي صوتيه، تعبان ويمه هوسه يحجي همس
-خوش بس من تطلع من الصالون خل تغطي وجها كله حتى عيونها تتبوش بشي.
-هاي هيه.
گلت لجويريه ودفعنه فلوس غصباً عليها لان هيه ما راضيه، كملني وهي كلساع تعوف مكياجها وتجيني تركض لو تعدلي البدله لو تلبسني الحذاء وكفت يم المرايا اصور روحـــي مبتسمه كلشي عاجبني اكره اللوان المكياج القوية واساساً ما تلوگلي كلشي ناعم ومثل ما اريد، البنيه نفسها المكيجت جــويريه بعرسها رجعت مكيجتها وتسألها
-كون هالمره يعجبج.
عاينت لجوري حيل حلوه ومن تحط مكياج ولون عيونها يبرز اكثر تصير تخبل گالتلها
جــويريه:: والله اني اعتذر منج على حجايتي قبل مكياجج يخبل بس اني جنت ضايجة جنت ما رايده زوجي.
نحجي وي البنيه ونضحك ماندري اكو نسوان من السلف گبل كاللها
-ياا انتِ مو مرت صــيهد شني ما رايدته؟
وجوري روحها راحت تعاينلي بخوف وهنه يحجن يااا ويا وعبالك سمعلهم فد قصص وروايات عراقية كرار صلاح جريمة سكتنا كعدنا متانين الزفة جــويريه غلست منهن وضلت تصور بيه وهنّ يتهامسن بيناتهن وحده منهن گالتلها
- رجلج گبل خطب من عدنا بس ماصارت، ذاك الحسين عدي بت تكتل العيون هااي مفشوگات فشگ وخضرررر جنهن حشيش والخدود طماطه
هوه گبل رادها وماصارت هسه بتي تزوجت وعدها اربع فروخ.
جــويريه :: حرامات زين ليش ماصارت لو صايره يتعدل النسل وتتلون عيونهم.
عاينن لجوري محنزرات وهي تربعت كدامهن تسأل شلون تزوجت ومنين واني اكرص بيها اريد بس تسكت وتجي يمي كامت من خابرونه اجت الزفه دك گـــلبي بخوف وعبالك حس بيه خابرني جاوبته صوتي يرجف
-الو
مــيثم :: ها عمــري جاهزه
-اي بس خايفه
-تخافين وانتِ مرت مــيثم ؟
ابتسمت وجسمي يرجف سديت الخط وجوري لبستني الكبوس هسه اني عروس وارجف هي شبيها ترجف كلها تريد تسيطر تشدلي الكبوس ما تگدر ارتبكت حييل. لبستنياه وكفت على جهه وهي غطت وجها بشالي سوته مثل البوشيه، ولبست عبايتها طلعنه للساحه ونسمع هوستهم بالشارع يهوسون الميثم.
مشت جوري فتحت الباب وطب مــيثم مجلبه بالكبوس وشايله راسي اعاينلهم، وياه وهـــب ولمحت بالشارع يم الباب ولد عمي خليل وطرواده وبريا بس صــيهد ماكو
عاينت الميثم مبتسمه لابس بدلة لون نيلي زفرت نفس عيني بعينه ووهب يگله
-تف عليك اختي هاي من امددداك
ضحك مــيثم وتقرب يبوسني براسي ويعدل الكبوس عليَّ، وهـــب فتح بشت اسود رجالي وحوافه ذهبي گال
وهـــب:: صــيهد وصاني اغطيج بيه.
هزيت راسي اي دفع مــيثم يگله
-وخر من اختي وخر
غطاني وياسني براسي عيونه مدمعه، وكف مــيثم بصفي حطيت ايدي بأيده ووهب يگلي الجوري
وهـــب:: تعاي وياي گال إذا مرتي نلمح اظفرها اعدمك غطي روحج وتعاي ما اريدن انعدم.
وهي گوه تشوف دربها شايلتلي البدله طلعت مرتبكه وخايفه لا اعثر، صعدنا بالسيارة جدي شعلان بالصدر وبصفه ســليم يسوق، بس شلت راسي صاح جدي بنتر
-نزززلي راسج تغطي تريد تعاين للشارع.
مــيثم :: شني السالفة يابه على كيفك.
دنكت مختنكه وميثم كاض ايدي ويمسح عليها، وصلنه للقرية ودخلونه للهول خالاتي كلهن موجودات ومخليات امي يمهن بالعربانة يهوسن ويهلهن
-طبت يالزهره تلگيهااا طبت يالزهره.
ويهوسن بعبيهن.
كعدت ورغد فتحت الكبوس وخرت من عدي وخالاتي يحجن وي مــيثم وهو يحاجيهن منزل عينه لان هواي نسوان من السلف موجوده، سلم على امي وطلع، فريت عيوني ادور وهي من بعيد شالتلي ايدها أشرتلها تعاي اجت مكيفه باوستها
-عبالي ما تجين.
رنـــه:: شلون ما اجي ههههه طالعه تخبلين وهاي جــويريه خرب ان شلون طالعه عبالك عروس ضلن يحجن عليها ميلاد واخواتها هههههه.
ضحكت نتهامس
-احترك گلبهن هههههه
لمحت ريـــمه من بعيد كاعده يم امها وامها كاضتها من ايدها عيونها حمر درت الرنه
-روحـــي جيبي ريـــمه.
-لا ما اروحن هيه ميلاد كاضتها خاف تجي يمي وتحاجيني.
سكتت ضلت عيني وياها، بس امها تيهت ايدها كامت بساع اجت يمنه شيگت رنـــه حييل اعاينلها مغمضه عيونها وحتى رنـــه مستغربه منها النسوان يعاينن عليهن ويحجن ماعاجبهن
رنـــه :: ريـــمه شبيج يا روحـــي ؟
وخرت ريـــمه هزت راسها ماكو شي ودنكت تباوسني
ريـــمه :: الف مبروك مــاسه يگلبي الله يسعدج ويهنيج.
-بعد روحـــي خيه بس شو مدري شبيج ليش باچيه.
هزت راسها ماكو شي تحاول تبتسم وأشرت على راسها تسوي بح
ريـــمه :: شويه وانسى عليمن بچيت هههههه.
مدت ايدها الرنه كضتها ورنه تعاينلها بخوف راحن كعدن على الدرج، عاينت الخالتي عبير صافنه عليَّ مقهوره دنكت، وكلساع تجي مرّه تبوسني وارد كأنما اعرفهن من سنين وانه حتى اساميهن ما اعارفها، صبلهن عشا وانحبرت اضلن كاعده اعاينلهن شلون ياكلن لوره العشا لمن خفت الهوسه وبدت الناس تطش النسوان راحن ضلن بس خالاتي ونسوان اعمامي دخل مــيثم ووياه اخواني عيوني دمعن بس لمحت صــيهد وهوه ابتسم وكفت واجه يمي شهكت ابجي
صــيهد:: اشش ههه شني مسافره هاي انتِ.
وخرني من حضنه باس راسي متحسر يهمس بيني وبينه
-الله يسعدج ويهنيج خويه.
وطب جدي يصيح
-يله كفونه ودوهم البيتهم.
شبگت امي ابوس بوجها واديها ارجف وهي عيونها مدمعه وتدعيلي
غطوني من جديد وطلعت وياهم للسيارة اخذوني البيت مــيثم، اجن ورانه رغد وميلاد وخالاتي وجده وسعاد، عيوني بس على رغد وهي تدليني على اغراضي لان هي الاجت رتبتهم الي وهنه يفترن بالبيت الحد ماصاح عليهن صــيهد وطلعن من يمي جلبت بأيد رغد
-خفتتتت.
-حتى أنه خفت كولي يالله وهيه تسهل.
-يمه.
-انجبي صيري سباعيه تعشي مو يكتلج الجوع.
باستني وطلعت وانه كضتني الرجفه. شويه واندك باب الغرفة وصوته يهمس
مــيثم :: عمــري ادخل؟
-احم تفضل.
وكفت مرتبكه وهوه فتح الباب عاينت وراه رغد وبأيدها كامره هز ايده يضحك
-يردون يعوفونه بدون صور.
ضحكت على حركات رغد من وراه وكف يمي حاط ايده على جتفي گال
مــيثم :: وديت على اخوانج ونسوانهم يجن يصورن وياج جا يردون تضلين بدون صور،
يحجي ويلمني على صدره رغد استغلت الوقت صورتنا انه وياه هواي لمن اجوا الولد جايبين البنات وصيهد جايب حتى امي طببوها للبيت دنكت عليها أبوسها، صورنه هواي تونست بالصور اكثر من العرس كله گد ما ضحكت، طردوا مــيثم من الغرفه قفلوها وكعدنه نصور دفعت جوري على صــيهد واخذت الكامره من رغد أصورهم وصيهد يضحك ويكلي
-انا اول مره اشوفن عروس تصور بالوادم.
-ههههههه غير انتم الطالعين عرسان اليوم
ضحك حط ايده على جتف جــويريه هي لابسه فستان چويتي وهو لابس دشداشة بيضة صايرين يجيبون العين وجوري مدري شعجب تضحك ما ضايجه.
صحت الوهب وندى وهـــب مو مثل صــيهد هذا يحضن ندى حيل يبوسها من خدها مره يشيل رضا ومره يطرده
ومره يجر بــدور بنصهم وصوروا وي رغد بس صــيهد ما صور وي رغد وحتى الصوره الجماعيه البيها رغد ما وكف وياهم.
اخذوا الكاميره وطلعوا طلعت وراهم للهول وميثم وصلهم الباب الحوش ضليت بالهول الحد مارجع جابلي وياه ورده من الحديقة ضحكت
مــيثم:: لازم نداريها حتى يطلع ورد جديد.
وصل يمي شبگني ورفعني من خصري چلبت بيه اضــحك وهو يفرني
-نززلني مــيثم اصررخ.
ضحك نزلني حاضن وجهي بين اديه ويبوس بخدودي
-امووتن عليج ماستي حوريتي.
دنكت رغم خوفتي الابتسامه شاكه حلگي، مشينا للغرفة ارتاحيت من شفته يتصرف طبيعي صورنه بتلفوني هواي صور النوب گال
-خل نبدل ونصلي حتى نسويلنه عشا ونروح نلعب بلي شتگولين.
-ههههه هاي هيه متفقين واذا خسرتك اروحن البيتنا.
-لا يابه بطلت ما العب
ضحكت طلعت روّب العرس شوي گـــلبي مرتاح يمكن گد ما دعيت نزلت علي طمأنينة خلتني اتصرف براحة، وهوه هم عايفني على راحتي
-اساعدج عمــري؟
هزيت راسي اي وكف گدامي غمض عيونه مبتسم ومد ايده لوره ظهري يفتحلي السحاب
-مغمض اناا
-شلت ايدي غطيت عيونه اضــحك
-عيونك حلوه ما اثق بيها.
-هههههههههه فـــدوه يرحلج.
فتحلي السحاب ودار وجهه وهوه مغمض
-جا اني اريد اسبح شلون؟
-روحـــي انتِ وبدلتج عوفيها بباب الحمام وانا اجي اخذها من تطبين للحمام.
مشيت انه والبدله وهوه منطيني ظهره نزعتها بباب الحمام وطبيت سبحت لبست الروب وطلعت لگيته معلك البدله ومرتبها لابس دشداشة وانه مچلبه بالروب كل حيلي خجلامه گال
-امسحي عيــونج متدمرت كحل.
وكفت گدام المرايا انظف وجهي من المكياج، وهوه مطلع حرام الصلاة والسجادات، اخذته من عنده توضيت ورجعت يمه، صلينه سوه وبس خلصنه صلاة گال
-تعاي نحمي عشانه برد هسه.
مشيت وياه للمطبخ تصرفاته كافيه تحسسني براحه وأمان، وفعلاً وره العشا كعدنا نلعب بلي وهوه مركز كل حيله يخاف لا اغلبه من شافني راح اخسر گال
-اليخسر يجي الحضني.
-اليخسر اعوفنه واروحن البيت اهلي.
ضحك جراني الحضنه عبر ايده عليَّ وكاض بيها اليده وبس خسرت شمر اليده وشالني بين أديه يضحك يبوسني بوجهي ورگبتي وهو يردد
-منوو الخسر هسه منووو.
-غشيييت انتَ غشيييت.
-گولي والعباس.
ضحكت متدغدغه من وجهه إللي برگبتي
اضــحك الحد ما نزلني على الچربايه بگت طنّ هوه عاينلي مبتسم خله ايده على وجهي
مــيثم :: اتمنى ما اشوفن بوجهج خوف من عدي اموتن.
ورغم خايفه ومتوتره ابتسمت وحطيت ايدي على ايده، راح طفه الضوه وشغل الباجورات بلعت ريكي بخوف اقرأ سورة الفاتحة وادعي ربي يسهل عليَّ، اتصرف بكلشي مثل ما آميّ وصتني، شفته نزع دشداشته واجه يمي.
شكل نفسه بالفراش وبهدوء سحبني الحضنه گـــلبي بكل خطوه يدكّ اقوة رغم لمساته هادئه يسولف وياي ويتشاقه حتى ما اتوتر، تقرّب يبوسني ويلمني الحضنه
-احبنج مــاسه اموتن عليج انا.
وانه صوتي انبلع مستسلمه اللمساته الهادئة يحاول بكل هدوئه يسحب توتري ومايخليني اخاف يعاملني مثل الكزازه الخايف عليها تنكسر بين لحظة وثانية نفسه الدافي احسه يم اذني يهمسلي بحب ولهفه صوّت انفاسنا يتعالى وي حركاته وصوت دگات گـــلبي يتسابق وياها ايده تمر على جسمي كأنما يتحسس أندر وأثمن شي موجود، بلهفة ودفو انصاغ جسدي لجسده
احتضني ونزلت دمعه من عيني مسحها وابتعد
جريت الغطا عليَّّ وهو نزل من الچربايه وراح شغل الضوه اباوعله وجهه أحمر رجع عليَّ سحبني من ايدي يحجي بصوت مخنوك كاتم عصبيته
-وخري بله تعاي.
نزلت ملابسي ونزلت من الچربايه وخر الغطا عن مكاني يعاينله نظيف شهگت وفتحت عيني بصدمة گـــلبي راد يوكف الخوف مثل الدود يدبي بجسمي ما مستوعبه درت وجهي عليه ارجف واشهك اريد احجي ما اگدر بس اهز راسي لااا
وهو كاض ايدي وعينه للفراش شهكت بلا دموع ما اگدر اتنفس دار عليَّ بچيت. ارجف واحجي بخوف
-والله محد محددد والله والله محد كاضني .
لم وجهي بين اديه وانه احس هاي هيه راح انذبح
-اششش تعاي، تعاي.
ايده تتراجف بعصبيه وصوته مخنوگ اخذني للحمام وانه رجليَّ يرجفن وروحي رايحه ابچي بخبال دخلني للحمام
-مــاسه اششش عاينلي اسبحي راح اجيبلج هدوم.
سد باب الحمام وطلع وانه كعدت على حيلي حاطه ايديي فوگ راسي ابچي بخوف هسه يخابر اخواني هسه جدي يكلهم اذبحوووها هسسسه هسه يذبحوني هسه يذبحوني.
روحـــي راحت فززني من دك الباب وفتح يمدلي الهدوم
-كومي اسبحي مــاسه مو احاجيج.
عاينتله اتوسل
-والله محد واصلني والله مــيثم ابوس ايدك صدكني والله العظيم جيب القران احلفلك محد كاض ايدددي.
هز راسه اي عيونه دم وطب للحمام علك هدومي وكومني من أيدي
مــيثم :: مصدگج مصدگج اسبحي يله بباب الحمام انا.
طلع وانه ابجي بحرگة بأيد ترجف نزعت هدومي وسبحت لبست اشهك فتحت الباب لگيته كاعد بباب الحمام وايده على راسه عاينت الايده الثانية ارجف خاف بيها خنجر بس شفت بيها جكاره طفاها ووكف من شافني ومد ايده يمشيني للغرفه جلبت بأيده اتوسل وابجي
-مــيثم احلفلك بالعباس احلفلك بالقران حتى محد كاض ايدي.
وهوه يمشيني للغرفة وخر الغطا ومددني بالچربايه غطاني
-يذبحوني مــيثم يذبحوني.
غمض عيونه يهز راسه لا متحسر وايده على راسي
-والله العظيم محد واصلني محد كاضني.
مــيثم:؛انتِ جاي تبرريلي شنو ؟ ما اعارفج انا؟ اشش كافي بچي نامي.
جريت ايده وبأيدي الثانية امسح بدموعي وصوتي يرجف
-مصددكني مصدكني انتًَ؟
غمض عيونه ودنك بحسره باس راسي وخر
مــيثم :: تربية صــيهد انتَ ما تغلطين نامي ولا تخافين انا يمج.
يمسح على راسي بس شلون انام شلون انام وانه الموت ضل يتراوالي كعد يمي بالگاع وانه دموعي تجري وهو يدخنّ بحيره وكلساع اتخيل جدي يدري بالسالفة ويجينا بأيده خنجره يخير اخواني منو منهم يذبحني ومحد منهم يصدك انه مابيه شي .
قربت راسي الحافة الچرباية اعاين الميثم الكاعد بالگاع كدامي صوتي مبحوح من گد ما بجيت وعيني ورمن گتله
-مصدگني انتَ؟
شال ايده يمسح على وجهي
مــيثم :: مصدگج.
-والله هاي ايدي محد كاضها
هز راسه اي
-جا ليش ماصار مثل كل عروس؟
حجيتها وغصيت من البجي مسح عيوني وهو يگلي
-حظنا ونصيبنه هيج، جسمج يختلف عن جسم غيرج اكو غشاء سهل ويعدي كلشي طبيعي واكو لازم فحص وهاي الآمور واكو باكثر من تقارب يله ينحل، انتِ لا تخافين دام انا مصدگج ليش خايفه منهم انا زوجج ومصدكج اعارفج واعارف تربيتج يطلي بچي ويله نامي موزين عليج.
يحجي وايده تمسح على خدي غمضت اشهك وهو طلع من الغرفة للصبح عيني ماغفت شبعت بچي وره صلاة الفجر فتحت الباب الغرفه شفته نايم بالهول بلا فراش جوه راسه بس مخده رجعت للغرفة كعدت بالگاع بصف الچربايه ابجي بحرگة، محد راح يگول غشاء بكارتها يختلف ولا عدهم بنيه توصل دكتوره وتنفحص اللي ما الها بياض بصباح عرسها تنذبح.
ياما وياما بنات سمعنا عندهم انذبحن بمصباح عرسهن والله اليعلم چم بريئة بينهن . ضميت وجهي بين اديه ابجي هسه يجون هسه يعرفون وهسه يعيدون بذبحي منو من اخواني يذبحني منو من اعزاز گـــلبي يلطخ أديه بدمي
شلت راسي من انفتح باب الغرفة عاينلي ميثم واجه يمي ومن خوفي افكر هاي يجوز هسه قرر يحجيلهم يجوز تانه يصير الصبح ويخابرهم
مد ايده يگومني ارجف ما اگدر اوكف على رجليَّ ايدي بايده تهتز كلها ومن البچي عيوني ورمت، امشي خطوه خطوه احس برجلي ما تثبت على الگاع واهمس بصوت مخنوك
-يذبحوني والله يذبحوني، اذا عرفوا يذبحوني
وهو لازمني من ايدي ومعبر ايده على جتفي يمشيني ويحجي وياي بصوت مخنوگ
-محد يعرف ومحد يگدر يذبحج وانتِ يمي.
شهكت روحـــي رايحه وشلت راسي بفزه من اندك الباب حيل وصوت جدي وأبوي وي صدى دگة محابسهم لحديد
شكرا لزيارتكم عالم روايات سكيرهوم
