رواية الابواب الخمس الجزء الثاني الفصل الثانى والأربعون بقلم ريام الهادي
على أخبارك عشت و أرتـاح من ترتاح
و اذا گالو مريض لـ وحــدي أتمـــرض
شرهب : ركضت حافيه اشوف شصاير لان وداد صوتها لحد يمنا نزلت وطلعت بلشارع ودخلت للبيت مالتها جفتت عليها لان خفت حيل صوت عياطها ولطمها يجبر الواحد يطب ركض عليها شفت هاي المره التشتغل يمها تريد تسكتها وداد تملخ بشعرها
شكووو شبيها عفيه
ابن اخوها صلاح انكتل بعركه عشاير
نرجع للاشهر الفاتت
تحديداً شهر ١١ لسنه ٢٠١٦
استلمت القبول مالتي رغم مو الكليه الي ردتها بس فرحت لان صباحي وبدون اقساط وفلوس
يونس : شوكت اطلعين تشترين ملابس
شرهب : راح تشتريلي
يونس : وليش مااشتري مقصر عليج بشئ
شرهب : فديته لاخويه الحنين سيت عليك وسيت عليه
يونس : ليش متبطلين سالفه الاقساط والشغل
شرهب : شبيهه يجيني خوش مصرف منها وخاله ام حسن ينطيها العافيه شايله الشغل كله وهم متونسه ويه النسوان ولو يراد الهن گلب ممدشن بس مغيره جو ويطلع الها والي خوش فلوس بعد ليش ابطل
يونس : علمودج
شرهب : الله يسلم مودك من اضوج لو اشوف الشغله ماوراها غير الدوخه اعوفها ليضل بالك
ناي : واني سيت عليه هديتج
شرهب : هله بأخوتي الصرافه
ناي : ههههه شوكت بخلنا عليج
خوله : اني مااجيب ملابس
شرهب : هنا خربنا هااااا عمه انعديتي من اخوج ابو فليس شفتي تاليته طارن واني انمرد كل مااتذكرهن دير بالج ليطيرن فلوسج مثله
خوله : انجبي
شرهب : خلت وكامت يمعوده عمه هيج ادكين بيه الناقصه هاااي وين راحت جابت جنطتها الصغيره واجت كعدت كبالي
خوله : ماكو غيرج الناقصه هااااج
شرهب : انطتني علبه فتحتها بيها زنجيل ذهب ناعم ومداليه شمس وكلها زاركون ابيض واسود اني شفتها طرت بيها طير
هيج الهدايه شوو تعااي ابوووسج لزمت وجهه وبستها حييل
خوله : هيج بوسه هم متنراد
شرهب : هاكم هيج الشيوخ تجيب هدايه مو مثلكم
ناي : بسرعه باعتنا ولج انتي شنوو
شرهب : لبسوها اليه بشرفكم
لبستها عمه اليه الزنجيل مو طويل بيه قصر وكاعد على صدري يخبل
خوله : اذا بعتيها اشلع اذانج
شرهب : ابد ماابيعها والله
يونس : مثل الترجيه الجبتها الج تتذكرين مو بعتيها
شرهب : واشتريت وحده وره سنه تعتبر مالتك ولتنسى ترجيتك سوت خوش شغل
بقى مرتضى الجلف لازم اسلبه هذا ميطلع شى منه هسه بس تلزمه يكلك ورايه زواج يله اخسره جنطه ومرته حذاء
ناي :خطيه ماعدهم
شرهب : مالج دخل نايه اني وياهم واذا بان مقبلت تشتريلي اهددها اكلها الزم مرتضى واكله مرتك جانت تحبك من زمان وكاتله روحها عليك
ناي : يابه شكد حاروكه
شرهب : هوايتي حياتي
طب مهدي سلم ودخل للغرفه
خوله : يله ابني امشي انروح
ناي : بعد وكت عمه ابقو على العشا
خوله : غير مره نجيكم
طلعو واني دخلت لمهدي ديبدل ملابسه
حبيبي
مهدي : هاا عيني
ناي : بيك شى
مهدي : لا ليش
ناي : وضعك معاجبني صار مده على هذا الحال
مهدي : شغل واركض هنا وهنا ليضل بالج ماكو شى
ناي : گلبي يلعب مهدي ليش اجذب عليك حاسه عندك شى وضامه عليه
مهدي : مثل شنو
ناي : اخاف عندك وحده
مهدي : ههههههه والله تضحكين المهموم
ناي : لعد ليش ياساكت ياصافن ياطالع اني سويت شى ضوجتك
مهدي : شوو تعالي
جرني من ايدي وكعدني على الجربايه وباسني من خدي
مهدي : حطي شغله بالج الرجال اليصبر على مرته سنين وينتظرها ترجع ميخون
ناي : ومن تمرضت وتحمل لتنسى
مهدي : مرضج واجبي وغصب عني اتحمل بس زعلج وطلب طلاكج وانتظاري الج هذا مو واجب لان اكدر اطلكج واعيش حياتي واتزوج ومتحقيني بشئ بس اني احبج ورايدج انتي وماتحله مره بعيني لتفكرين وتوجعين راسج الحلوو مخاينج ولا عندي غيرج ابد
ناي : وضعك هذا
مهدي : شغل ياحبيبتي ودايخ بيه ليش ادوخين ويايه
ناي : بعد گلبي ممرتاح
مهدي : شوو وينه
ناي : شنو
مهدي : گلبج خلي ابوسه حتى يبطل يوسوس لراسج وتشطحين لبعيد
ناي : ابتسمت على كلامه وبسته
مهدي : اييي هيج بوسه حضنه مو جايتني عندك وحده غيري ماعدجن النسوان غير هاي السالفه اذا صفنا او انشغلنا مباشره عندك وحده غيري
ناي : غير من بلاويكم والي نسمعه ليش انتم كاعدين عقال واحنا منشك
مهدي : خلي اكوم اسبح ورايه طلعه
ناي : وين رايح
مهدي : عبد الرحمن شايفله مشتمل سعره زين ويريد يشتري ورايح اشوفه اني وصلاح
ناي : اكلك صدك دوم انسى اسألك عبد شيشتغل ومنين يصرف وهسه تكول يشتري مشتمل هو مطيرجي معقوله فلوس الطيور تسوي بيت
مهدي : ومنو گلج عبد عطال بطال ومخلصها طيور
ناي : من شافني وشفته هذا حاله
مهدي : عبد عنده محل بديالى جبير ويشتغل بيه وعنده عمال اثنين مواد احتياطيه مال سيارات وشغله خير من الله وبال٢٠٠٨ تشارك ويه ولد بمحل بغداد بمنطقه زينه اخذه بتراب الفلوس لان جانت طائفيه وعالكه والمحلات رخاص ذبها هيج على الله ياتصيب ياتخيب وصابت والمحل صارو اثنين وطك واحد على الثاني كبرة وطلع الشريك وبقى المحل اله مال موبايلات وماشي شغله كلش زين
ناي : هاااي شنو ولا توقعت هيج عبد
مهدي : يونس يدري ليش مسألتي
ناي :تدري ولا يجي بالي اسأل لعد اذا هو هيج المن يطير طيور
مهدي : هوايه يحبها يموت على الطيور چان گبل بديالى عناد بأبوه لان يدري بيه يكره هاي السالفه وعليها سمعه وهو عناد بيه يشتري ويبيع وكل مشكله من وراها ذاك الحساب مرتاح على مغثه ابوه ولا عبالج ميربح من الطيور تره سالفتهن هم وراه فلوس اكو طيور بملايين تنباع نادره تكدرين تكولين من جهه وصوب عبد يشتغل مايكعد
ناي : الله يرزقه ولا مبين عليه عبالي اختصاص مطيرجي
مهدي : شكد حجينا اني وصلاح وياه ولا يفيد قافل على اثنين الطيور واختج
ناي : هاااا شرهب
مهدي : اكو غيرها
ناي : اني توقعت راح يتزوج وره سالفه الرفض
مهدي : امه وام صلاح كعد يدورن اله على مره لحد هسه شاف اثنين ويطلع ويكول مارف گلبي عليها يمعود شيرف هو انت شعرفت منهن وكاال عكب ذاك الزاجل مايحله طير بعيني وخله امه تكمز
ناي : الله يرزقه بنت الحلال الي تريح باله
مهدي : حاس بعبد ماخذهم على كد عقلهم لان لو يريد يتزوج ميجيب طاري اختج
ناي : شون يجيب طاريها
مهدي : ناي الاحجي ماينكال كدام شرهب
ناي : قابل اروح احجيلها هااي شبيك حبيبي
مهدي : مرات نفتر لو نروح كوفي وتطلع اغاني يسلطن عليها ويكعد يسب بيها ويرجع يكول اشتاقيت لوكاحتها تدرين حتى القبول مالتها جابه يمكن حتى قبل متعرف شرهب شطلع الها كليه اول مره اشوف ابن خالي هيج متعلق بوحده كبرنا سوه وهو زير نساء من وحده لوحده ومايصفه على راي يمكن بالاعداديه بلسادس حب مراهقه حب وحده جيرانه وتعلق بيها وعرف بيها مصادقه صاحبه يعني اثنينهم بنفس الوكت ومن ذاك اليوم لحد قبل ميحط شرهب بعقله وهو لا يأمن ببنيه ولا يحب ويكول كلهن يخونن واحنا اسبير الهن وكع بأختج وكعته جبيره حييل تصوري تعارك مرتين ويانه اني وصلاح لان نحاول انقنعه ينسى سالفتها ويتزوج ويرجع لابوه
ناي : مره اتذكر ضل مده طويله ميجي
مهدي : تردي يتخبل جيبي طاري الزواج كدامه وعوف شرهب متناسبك وارجع راضي ابوك وشوفي المخبل شيسوي وصلنا مرحله بطلنا نحجي وياه ملينا
ناي : هو كام ولا يجي
مهدي : مرات يجي يخابرني انزله افضل مااريده يشوفها بيتي تبقى امانه عندي وعيب من اخوج وهو هم يقنع روحه نسيتها وراح اتزوج واحب غيرها ومن تطلع اغنيه يدخن ويصفن ويستلمها مسبه مايبقي بعشيرتكم نفر كلها راح تدخل الجنه من وراه
ناي : تتوقع يقتنع بوحده ويتزوج
مهدي : محد يعرف عبد بكدي خصم الموضوع اختج عشعشت براسه واذا تزوج غيرها راح يكون عناد بيها لان ماوكفت وياه وبلعناد محد يلحكه
ناي : شون توكف وياه ضد اخوها وضد كرامتها
مهدي : الي علمج اني كبرت بعيني حيل يوم مارفضته وماانطت بيونس وحتى موقف يونس جان موقف رجال ويحترم عليه
ناي : اخويه من زمان رجال وكدها بس اكو ناس ظلموه وماانطوه مجال وكسرو گلبه
مهدي : اكوم اسبح واطلع لان اذا بقيت راح تعلك بينا تدرين بيه مااحب واحد يبسمر احجيها طك بطك وفضيها
ناي : لا احجي ولا اكول الله يعوض اخويه بت الحلال الي تستاهله
عافني وطلع من اتذكر يونس وجرح گلبه ينعصر گلبي عليه
طلع وراح ويه الولد واني طلعت لشرهب وحجيت كلشي الها مااكدر اضم عليها هيج سالفه
شرهب : يعني كعد يدور مره
ناي : قابل يضل ينتظر
شرهب : وخلي يدور ويتزوج اني شكوو
ناي : يعني ماتنقهرين اذا خطب
شرهب : اي انقهر واموت قهر ارتاحي
ناي : هههههه شون وجهج انگلب
شرهب : بربج ناي تشاقين لو صدك
ناي : والله هذا موضوع مو مال شقه يجوز هلمره ماعجبنه البنات غير مره يقبل اني كتلج مو حتى احرك گلبج كلت اخاف نسمع بيوم خاطب متنقهرين وتسمعين الخبر وتتقبلي بروح رياضية
شرهب : واشد وصله واركص للصبح موو
ناي : شبيدي عليج كدامج يونس ماقبل اله عمران يجي وشغلتج شبجت لحيه بلحيه
شرهب : خلي يتزوج عساه تزوج وحده تشبهه شرشبيل حتى شوارب عدها وزنها ٢٠٠ كيلو وخشمها اكبر من نصب الحريه واذنها اكبر من صحن الدش وعيونها اصبع النمله برجلها اليسره ومتسمع ولا تحجي وسنونها واكعه
ناي : هههههههه خرب شنو هذا الوصف عليج
شرهب : اضحكي شكوو عليج
ناي : عشت وشفت شرهب معقوله المشاعر تغار
شرهب : عشتوو اني اغار قحط عاد هو شونه
ناي : لا شوشه للامانه الولد مثل اخويه وحلوو حتى احلى من رجلي ليش نظلمه
شرهب : انهجم راسه وراس عشيرته غير كيك بلنوتيلا ليش تحجيني
ناي : ههههههه والله بطني كامت توجعني من الضحك على شگلج
شرهب : هذا المستفاده بيه منج كومي وكت علاجج كون اروح للسيد وياج واكول اله اريدك طكه بسحر تخلي يمشي بلشارع ويعيط شرهب لو انتي لو مااريد ويشوف كل النسوان قروده
ناي : صرتي مثل نسوان عمومج ادورين سحوره ياستار منج
شرهب : حرگتي گلبي نوايه
ناي : سلامتج گلبج يحلووة
شرهب : ضلت حلووة اكوم اقري ابنج صرت تالي وكت معلمه اله هو هذا حظي مارحت تربيه حتى ماادرس وتالي انجبرت ادرس ابنج
ناي : هي فتره واني استلمه لتظلميها كامت واباوع عليها شعرها طولان وصاير يخبل تشيل بيه وادردم
شرهب : اعترف اگلتني الغيره وضجت حييل مو بيدي مجرد فكرة يباوع على غيري ويريد يتزوج خبلتني رغم مالي حق لان ماكو شى بينا بس مرات مشاعرنا تتحكم بينا واني مشاعري هيه معوقه ومامستقره ومنا حجتلي ناي صارت ناس تركع بناس بداخلي جماعه يردون يلزموه يشبعوه كتل ودفرات وجلاليق وجماعه مشتاقين اله ولكلامه وعيونه الكلها حب اختنكت وكوه كملت قرايه سيف وكلت شراح ينومني من التفكير تالي اول محطيت راسي على المخده الشخير وصل لموزمبيق غير اسهر مثل البنات وانقهر واحصر نفسي وابجي ابد گبل غفيت
مرت الايام وبديت احظر للكليه بهاي الفتره خاصه وكت الامتحانات والمحاظرات هوايه بنات جانو يحجون على الفيس بوك وحبيت اجرب اسوي صفحه وطلبت من يونس يسويلي بلبدايه مقبل واكيد ماطول ردت شى لازم ادك رجل اله اخذه واقتنع بعد ما موعت اذنه ولعبت روحه واجه مرتضى وسوالي صفحه وحتى ناي قنعت مهدي وقبل ومكيفات اني وناي ننشر وحده تنطي للثانيه لايك ماكو بس اني وياها بلصفحه وفوكاها وحده كاعده گبال الثانيه المن بعد ننشر ماادري
مرت الايام والبيت على حطته منباع وعرضه يونس عند اكثر من دلال ونفس الحال
بيبي ماقبلت ترجع لبغداد اله ينباع البيت وضلو بكربلا وبان بقت اداوم بنفس مدرستها
بان : كاعده اصلح دفاتر الجهال واندكت الباب كمت حطيت شال على راسي وصحت منوو سمعت صوت عمو عبيد اهووو هذا شجابه فتحت الباب اله واشوفه هو وجوحي طبو بدون اي سلام عمو جوحي حلكه شوي بيه عواج وايده مبين مو عدله بس زينه صحته ويمشي بطئ بس كلشي مابيه
عبيد : وين امي
بان : اشرت بيدي جوه وين تروح
مبين شكلهم جايين بعركه دخلت اركض
فتحو الباب على بيبي وهي متمدده
عمشه : خيركم يولد فرج توكم تذكرتو امكم
جوحي : شون تسوين هيج بينا وتسجلين البيت بأسم يونس
عمشه : بمزاجي چابيتي وانه حره بيه عسى مااحركه واشوي عليه سمجات شلگم دخل
عبيد : مو بيتج هذا بيتنا والنه حصه بيه لو نسيتي كاع ابويه ورثنا بيها
عمشه : انه ماانسى شئ يبن بطني مانسيت يوم وحيدكم شال ايده منه ومن لكمتي وحطاها براس وليد صغير يجر العربانه ونطلع انه وياه من صباحيات الله نكرف بلعتيج وانتم واحدكم يصك الفلوس على افاده وافاد مرته وماگال يمه اگعدي وانه اصرف على عيشتج شنهي هيه لكمه نتعاجز منها
نسيتو شگد تعبت وراحت عافيتي وشبابي واحدكم صار ظهره هلعرضه عبنه من تعبي وچدي وماجازاني من اكبرت شلتوني وشمرتوني براس المكرود يونس حاير بخواته وبيه
عبيد: مو وكته هذا الحجي احنه اجينه على البيت
عمشه : چاشوكت وكته يايمه من اموتن وتوكفون على گبري اطيحون چم دمعه جذابيه وراها ترحون لبيوتكم وتنسوني واحدكم جاي هداد ويريد حگه مني وانه حگي منكم وينه يوم ماطحت وضليتو تتعازمون على علاجي واون جدامكم وتالي الزلمه الغريب عالج امكم وانت يلجبير يلعكازتي من اكبر عزيت فليساتك على امك واشتريت بيت لمرتك ولبنتك وطار
وانت يلميت على الدنيا جمعتهن وتحطهن على گلبك وماگلفت رويحتك تشيل شوي منهن وتعالج امك التعب وكبرت وتالي مريتك خذتهن وشردت هاااي ايدي يامه تجرحت وضلت تخر دمايه عبن اشيل بلعتيج وابيعن بيه وتالي اليوم احطهن الفلوس بكرشكم وانتم يوم ماطحت واحدكم مااندار وكال اسم الله يمه تعاي نجازيج والحين رادين عليه تراعدون وجوهكم طك نار منها عبن انطيت البيت لابن ابني
عبيد : هاي السوالف كلها متهمني البيت يايرجع بأسمج ياتنطينا نصه واله
عمشه : واله شنهي تذبحوني
جوحي : نذبحلج يونس
عمشه : انعل ابوك لابو الرضعك چا تهددني بيونس انته زلمه وكضه لا اذبحنك بيدي وحك الحسين بيك زود روحن وره مريتك ويامن شردت وخذت فليساتك وتشطر عليهه واكف جدامي بكل عين صلفه وتحاسبني انت وهذا البعير اسمعوني عدل الي يكظ بيكم يونس ويندك بثيابه انعل ابو اصله وابلغ عليكم وتكضون الباقي من عمركم بلحبوس ونسيتو شغيله البيت موش كله بأسم يونس نصه بأسم اخته ولون صار عليه شى خواته تورثه وماتحصلون شى وتعرفون اخيته ناي منهي زلمتها وخواله يشكوكم شك لا تلعبون بلنار عبن مايلوحكم طشارها
عبيد : انسي عندج ولد بعد هاي دكتج بينا
عمشه : چاانه شمحصله منكم كرت عيني خلفت خمس زلام اتجه بيكم للزمن وتالي ولا واحد بيكم وكف جاري المات والهج ضلت عليكم ولو مني عساني لا شفتكم
بان :ضلو يعيطون على بيبي متخبلين ويتعاركون وياها اني اخاف احجي وماما طالعه وضاله بيبي وحدها تجاوبهم لحد ماطردتهم وطلعو متخبلين منها
جبت كلاص مي لبيبي هااج شربي شفتج بيضت من الحجي
عمشه : حرامات التعب والشگه ماغزر بيهم حليبي وكسرت ظهري
بان : لتنقهرين منهم خلي يولون
عمشه : كضيني اكومن اتوضى واصلي عبن رويحتي جمرت واريدن اشگي حالي للخلقني عبنه هو ارحم من خلفتي عليه
بان : لزمت ايدها وكومتها تتوضى انقهرت عليها يعيطون عليها على ساعه كلت راح يضربوها شكد مكروهين من زمان ولا احبهم
خابرت يونس وبلغته خفت لا يسون شى بيه وهو كال بوخه بس تهديد لتخافين وخابرت مرتضى اني استحي اخابره رغم عقدنا بس التواصل بينا قليل دك عليه وگلبي يدك ويه الرنه جان يجاوب
مرتضى : هاااي منو يدك عليه ممصدك مرتي شذكرج بيه
بان : شلونك مرتضى
مرتضى : زين انتي شلونج
بان : الْحٍمَدٍ للـّہ
مرتضى : شعجب خابرتي
بان : بديت اسولف اله على كلشي الصار
مرتضى : لتخافين ماكو شى همه هيج خلصو عمرهم يهددون عبالي خابرتي مشتاقه
بان : ابتسمت وجهي صار احمر ومكدرت اجاوبه
مرتضى : شوو سگتي اذا عليه اني مشتاق وهوايه
بان : ليش لعد متتصل
مرتضى : اخاف مشغوله او اكول ممشتاقه اليه ليش احرجها
بان : خابر عادي شوكت متحب
مرتضى : اخابر بشرط
بان : وهو
مرتضى : تجاوبيني بصراحه مشتاقتلي
بان : متت خجل شجاوبه بقيت ساكته
مرتضى : معناها ممشتاقه يله وصل جوابج
بان : لا لا مشتاقه والله
مرتضى : ههههه فدوة للخجلان كون اشوف وجهج هسه لا خدودج اشلعهن من التكرص
بان : اروح اني
مرتضى : وين فلتي
بان : اعوفك تشتغل
مرتضى : اليوم بليل اخابرج لتنامين
بان : انتظرك
مرتضى : بان
بان : هاااا جان اسمع صوت بوسه ورجع بوسه ثانيه وكاال
مرتضى : هاي لخدودج اليمنى واليسره اما الشفايف ذني من اشوفج اراضيهن لان ميفيد بلتلفون مطيبه
بان : باي مرتضى وسديته عزه راد گلبي يوكف لزمت وجهي ناار ياربي لعد لو بلحقيقه شيصير بيه يمكن اخرب بيده لو تعرف شكد احبك وشكد عشت ايام وليالي اتمنى نظره منك وهسه اسمع غزلك وبوساتك اليه ممصدكه لهاي اللحظه ممصدكه الف الْحٍمَدٍ للـّہ تحقق حلمي
جيتها نسمه هوا ترف علينا كلشي من تجي ينحل انحس بالامان حتى بعز مشاكلنا وهيه موجوده گلبنا يبرد لو صاير بركان هاي عمتي خوله المره الحديديه الي من توكف بوجهه الناس الاذونه تاخذلنا حقنا وزياده
واكفين بلباب نودعها راح تسافر وعدتنا كم شهر وترجع بس متعرف هيه من تروح تاخذ احساسنا بلقوه
خوله : عينج على اختج
ناي : ليش متبقين بعد
خوله : اروح وكم شهر وارجع ارتب اموري
شرهب : مو تتأخرين علينا
خوله : ان شاء الله ما اتأخر
شرهب : قبل متودعنا ودعت بيبي وقبلها بيوم راحت للكوفه ودعت السيد جانت عمه تكول اخاف اسافر ومااشوفه بعد واشكره لان هذا الانسان مرتين نقذني مره يوم ماصحيت على ايده ويوم ماقبل يعالج ناي وكامت بفضل الله وبفضله
يونس : يله عمه تأخرنا
خوله : اياج تهملين علاجج
ناي : ابد والله وانتي عمه ديري بالج على نفسج حضناها وبيدي دولكه مي ذبيناها وراها متأكده مده بسيطه وترجع
ورجعنا اني وناي وحدنا بدون صوتها ورزالتها وقوتها على امل نشوفها بأقرب فرصه
داومت وفرحانه بلي وصلت اله ومرت الايام وماشفت ولا سمعت اي شى عن عبد جنت اكول هسه تجيني ناي وتكول خطب
وبدخولنا ٢٠١٧ اني اداوم وناي هم بس اليوم من رجعت للبيت صوت وداد هز الدنيا ونزلت وعرفت بصلاح انكتل صدمه
جفلت شنوو انكتل باوعت على وداد تملخ بروحها مكدرت اعوفها واطلع لزمتها ويه المره التشغل عدها نريد نهديها تخربطت وكعت واني اعرف گلبها تعبان
جيبي مي بسرعه اضرب على وجهه اريد اصحيها خاله وداد اكعدي يمعوده استعجلي
اخذت كلاص المي غسلت وجهه واذب عليه بلكي تصحى
ماعدها حبوب شى تنطي الها
ماادري علاجها هيه تاخذه
شرهب : لعد شتعرفين لخاطر الله المره راح تموت
جان تصير فوكايه ناي
شنزلج اباوع هاي الثانيه وجهه اصفر من الهبطه
ناي : شصاير عفيه مهدي بيه شى
شرهب : مابيه لتخافين شو اكعدي انتي الثانيه لتوكعين بصف عمتج
ناي : شصاير احجييي
شرهب : صلاح انطاج عمره
ناي : شنووو
شرهب : تكول انگتل بعركة عشاير شنو الصار مندري
ناي : لطمت على وجهي من القهر وابجي واعيط
شرهب : على كيفج ناي
ناي : هذا صلاح ابو گلب الذهب ابو الوكفات الحلووة شموته جيبيلي موبايلي ومهدي ييييمه مهدي شراح يصير بيه
شرهب : استري علينا هسه توكعين نحير بيج لو بعمتج
انداريت على العمه وحاولت اكعدها بدت توعى وعين على وداد وعين على ناي التناشغ من البجي وين رايحه
ناي : اجيب تلفوني لازم اخابر مهدي
شرهب : طلعت ناي لبيتها واني حاولت اكوم وداد والمره تساعدني كوه كومناها من الكاع وحطيناها على القنفه فتحت صدر الدشداشه مالتها وافرك بصدرها بله هاي الطلابه دخيلك يارب
ناي : اريد رجلي تعيني شكد كرهت نفسي وضعف صحتي اسحل بروحي والدوخه موتتني كوه صعدت وادور على تلفوني لكيته وادك على مهدي ميجاوب جاااوب ابوس ايدك مو دمي نشف
انرفع الخط مهدي كوه يحجي
ناي : بيك شى عفيه
مهدي : انكسر ظهري ياناي راح اخويه راح الجان ضامه عزوه وسند
ناي : سوده عليه فدوة انت وين اجيك هسه
مهدي : طالع اني وخالي لديالى سدي بابج عليج ولطلعين لاي مكان
ناي : كمت اكمز من الخوف شعندك بديالى
مهدي : اجيب اخويه المات واني مو يمه خلي اروح
ناي : سده وراح ومفهمت شون مات حقه هو بيا حال صوته مال واحد طاك من البجي اتذكر صلاح وابجي هذا الولد شكد جان طيب واخلاق ياربي ليش الزين هيج يموت
شرهب : بقيت حايره بوداد لحد ماصحت وضلت تبجي بس واعيه
انتبهي عليها والافضل تخابرين عليهم خلي واحد يجي ياخذها لذاك البيت لتموت هنا ومحد يمها
ومبين انتي لتحلين ولا تربطين
اي هسه اخابر عليهم
شرهب : اذا صار شى صيحينا الله يصبرهم
عفتهم وطلعت من البيت اكول بطني وجعتني لان حافيه والجو بارد واني اصعد اجه بالي عبد ياترى شنو ردت فعله وشديفكر اكيد تعبان ومنتهي على صلاح حقه هو ومهدي اكثر من الاخوه يارب هون عليهم هاي المصيبه
دخلت للبيت شفت شرهب تبجي فدوة جيبيلي مي اغسل رجلي شون اطب رجلي توصخت مااريد الفراش يتوصخ
كامت ناي تسحل بروحها وجابت طاسه مي غسلت رجلي وطبيت
دخلت للغرفه مااكدر اكول الها لتبجين لان صلاح انسان حرامات يموت هيج اني ميته قهر عليه رغم ماجامعتني بيه غير صدف ومتت قهر شون همه دوم يكعد وياهم واهله الله يساعد اخته وامه مات ابوهم قتل وهسه اخوهم هم لو متزوج وعنده جهال على الاقل يكول الواحد من ريحته باقين الله يعينهم
سيف : ماما شبيهه تبجي
شرهب : مابيها شى حبيبي لتخاف انطوك واجب
سيف : المس انطتنا كومه واجبات وعدنا املاء
شرهب : اني اقريك حبيبي تعال نتغدا وراها نكعد نقرا بدلت وصبيت الاكل توسلت بناي تاكل مقبلت كعدت اني وسيف اكلت لكمه وسحبت ايدي مكدرت بس وكت سيف
ناي : راح اخابر يونس لازم نروح الهم
شرهب : وين رايحه وانتي تعبانه
ناي : كلشي مابيه زينه لازم نروح عيب من مهدي ومن سدره وامها مصيبتهم جبيره ولازم اكون وياهم
شرهب : اجي وياج مااعوفج شوفي حالج لترحين توكعين هناك والناس مناقصه تحير بيج لو بمصيبتهم
ناي : اني ابقى هناك ماارجع لحد متخلص الفاتحه
شرهب : واني هم ابقى كتلج مااكدر اعوفج
ناي : ودوامج
شرهب : مااروح هذا الاسبوع محاظرات عاديه عود من اداوم اخذها من الطلاب
ناي : عندج اسود
شرهب : لا شوون
ناي : نخلي يونس ياخذنا للسوك نشتري ونطلع مناك
شرهب : ماشي ودوام سيف
ناي : اخابر المعلمه مالته وابلغها يله كملي شغلاتج بين مااخابر يونس
شرهب : رحنا للسوك اشتريت دشداشتين سود وجنت لابسه بنطرون اسود اخذت بلوز اسود فوكاه واشتريت شال اسود وناي هم اخذت لان ملابسها السوده كلهن ذبتهن
ورحنا لبيتهم جانت المنطقه مگلوبه سيارات ورياجيل كوه دخلنا يونس للبيت وطلع هو بره ويه الزلم
صوت النسوان وعياطهم يسمع المنطقه كلها دخلنا واباوع سدره تملخ بروحها والام شبهه فاقده والكل تلطم شاب مثل الورد ينكتل هيج
لكينا وداد هم جايه كل واحد بيهم ميعرف شون يعبر عن فاجعته الي تلطم والي تملخ بشعرها والي فاقده حالهم يبجي الصخر
ناي: حضنت سدره وابجي وياها وهي متخبله على اخوها حقها هو بس هذا عدها وشكد تحبه نعم الاخ جان
سدره : راح اخويه ناي راح الحنين عافوني هو وابويه وحدي اتلطم بلدنيا منو اليه بعد المن جهالي يكولون خالو حتى مالحكنا نشوف عرسه
ناي : حضنتها مكدرت اواسيها شون اواسيها وشحجي بهيج موقف
اذا اني مجرد زوجة ابن خاله وابجي بلا وعي عليه شون وهيه اخته
شرهب : مر اليوم وماجابو التابوت كالو طلعو للمقبره مباشره والتشييع صار بديالى وهذا الشى قبل سدره وامها بلزايد لان مشافو
وثاني يوم وجهه الصبح رجعوو طلعت سدره مثل المخبله بلشارع مفرعه والشعر مكطع ناي مكدرت تركض وراها اشرتلي وطلعت ركض وراها وتعيط وين اخووويه جيبولي اخويه
جرها من نص الزلم واحد منتبهت هو منو ودخلها للكراج جاان تحضنه حييييل وتبجي
سدره : ليش رجعتو وعفتوه وحده انطاكم گلبكم ادفنوه وتعوفو مو جنتو دوم سوه شرجعكم بلياااه ذبيتو التراب على وجهه الحلوو
شرهب : جان يبجي حييييل ويااه ويعيط وحاضنها لابس غتره على راسه سوده ودشداشه سوده رفع راسه واشوفه عبد فتحت عيني على حاله هو بقى يريد يسكت سدره
عبدالرحمن: طبي جوه عيب منا الزلم صلاح ميقبل اخته يطلع صوتها بلشارع مو عاد شعرها
سدره : وديني اله ابوس رجلك
عبدالرحمن: اوديج والله بس طبي
سدره : راح تعوفوه انتم مو اخوته
عبدالرحمن: مااعوفه راح اروح هسه ابات يمه
شرهب : باوع عليه واشرلي
عبدالرحمن: اخذيها جوه
شرهب : هزيت راسي وانبلع لساني حتى مكدرت اكول اله البقاء بحياتك لان شكلهم وبجيهم وحالهم خرسني
اخذت سدره وطبيت
ناي : ايام الفاتحه ثكيله حييل البجي واللطم ما وكف والبيت انترس معارفهم كلش هوايه الي عرفته من كلام النسوان عالكه بين عشيره خوال مهدي وعشيره ثانيه وهاي الفتره كلها كعدات وفصول حتى ينهون العداوه ومافادت حتى رادو يبيعون البيوت بديالى خافو ليحركوها ومرهمت وروحت صلاح جانت حتى يبيع محله ومحل مهدي ويستقر هنا بغداد جاي شراي عليهن وبلطريق لاكفي هو وياه صديقه يصير هم كرابتهم وخارطين السياره وكاتليهم يعني نفس العشيره اثنين انكتلو ورغم صلاح وذاك الولد مالهم دخل غير بس يحملون اسم نفس العشيره راحو بلرجلين ظلم كافر شنو ذنبهم شاب ممتزوج والثاني عاف جهال اثنين ينكتلون بهاي الطريقه
اليوم يله عرفت سبب توتر مهدي وغيابه عن البيت بهاي الاشهر الفاتت الكل جان خايف ليصير شى وتالي صلاح صار الضحيه
شرهب : حاولت اكون بمكان ناي بلفاتحه واساعد رغم بنات عدهم هوايه بس سدره طلبت مني اساعدهن جنت طول الوكت اتهزم من ام عبد وابد مااحتك بيها رغم عيونها ترافقني وين مااروح
خلصت الفاتحه يومين وكالو ثالث يوم هم نسوي غدا ولازم نبقى عبد ومهدي مادخلو ابد للبيت رغم ناي متزوهره عليه وتخابر عليه حتى بس تشوفه ومادخل لحد ثالث يوم بليل شفت ناي تعبت وجهه اصفر وكوه واكفه على رجلها
وداد : هاااا خيرج راح توكعين علينا الله يساعد ابني شون متحمل وحده عطلانه مابيها نفع وبس تطوطح مثل السكران ضال يركض بيج اطباء وساده وبعدج خاويه الي بعمرج تشيل هاي الفاتحه شيل خرب حظك ياابني ماحضيت بمره بيها خير
شرهب : اكو هواي نسوان كرايب وهاي تحجي بصوت عالي الكل انتبهه عليها
شرهب : متحملت اسكت وكلت
غير من سحوره الميخافن الله وكعنها وخاله انتي بيا حال ومركزه على جنتج تره بعده ابن اخوج ترابه منشف لو الميت مو عزيز عندج وحايره بناي
ناي : على كيفج شرهب امشي ندخل جوه ولتجاوبيها
وداد : وانتي منو حجه وياج وطلعتي لسانج ولو عليمن اطلعين وهزت ايدها
ناي : حطيت ايدي على حلك شرهب فدوة بداعتي اسكتي
ام عبدالرحمن: وداد اسكتي مو وكتها
وداد : عيني الله يحبج مااخذتيها لابنج جان خزتج هذني مو مال بيوت مال شوارع
شرهب : دفعت ايد ناي عيني اني الرفضته مو امه الما اخذتني اذكرج من جبيركم اجه بنفسه وخطبني يعني جبيركم يخطب بنات شوارع هاي اهانه اله واذا سمعها منج خوش يردج رده و اريد افهم انتي من ياطينه مصنوعه اكو وحده مصار ٣ ايام ميت الها ابن اخو وشاب وكاعده تتعارك شنو من گلب عندج لعد من عرفتي بيه شو تمددتي بلكاع وسويتي روحج ميته لو هذا تمثيل وعياره
ناي : كااافي شرهب عفيه
شرهب : هاي عمتج لا مرض يهدها لا موت يهدها من يامله لخاطر الكعبه
ناي : شووو تعالي سحبتها واني كوه احرك روحي جان تعيط سدره بعمتها
سدره : احنا بيا حال وتتعاركين
وداد : لتعيطين عليه لا اكوم افرك حلكج نسيتي اني عمتج
سدره : وانتي لتنسين كاعده بعزه اخويه شويه احترام وحرمه للميت لو حتى هاي نسيتيها
ام عبدالرحمن: كافي يمعودات انفضحنا
اخذتني ناي للمطبخ واكو اثنين بنات كرابتهم صافنات خيرر اكو شى
لا عيني ماكو طب مهدي وشافنه
مهدي : اكو شى ليش صوتكم عالي
ناي : الله يساعدك ويقويك والبقاء بحياتك
مهدي : حياتج الباقيه صاير شى صوتجن للشارع والزلم كلها بره
شرهب : امك تحجي على ناي وخجلتها كدام النسوان كلها
ناي : عفيه شرهب سدي الموضوع ماكو شى حبيبي
مهدي : ارجعي للبيت كافي صار ايام انتي هنا وحالج معاجبني
شرهب : اي تره حيل متخربطه
خلي اشوف وين يونس يرجعكم
ناي : ليش يونس هنا
مهدي : معافنه هاي الايام كلها موجود
شرهب : شوفه عفيه خلي يودينا
طلع مهدي ورجع مالكاه مدري وين رايح اندك عليه ميجاوب
راح يوديكم عبد
ناي : لتوازي نفسك انتظر يونس
مهدي : اذا بقيتي راح تتعاركون من جديد واريدج هم ترتاحين
ناي : انت زين
شرهب : وخرت على صفحه منهم
مهدي : مهدود حيلي
ناي : سوده عليه
مهدي : بليل ارجع
ناي : راح انتظرك
مهدي : اذا تعبانه نامي واني من اجي اكعدج
ناي : ماشي حبيبي اباوع لحيته عاليه وجهه اسود وعيونه منتهيه
يله امشوو
اخذنا غراضنا واخذنا من خاطر سدره وامها وطلعنا نمشي وره مهدي ولازمه سيف بيدي
ناي : دايخه حييل خلي اكعد ليوره استحيت اكعد ليكدام وامدد راسي كدام عبد اخذت سيف وكعدت ليوره
شرهب : بقيت واكفه واني
ناي : اصعدي ليكدام
شرهب : شون تعال سيف اكعد ليكدام جريت سيف وكعدته واني كعدت ليوره يم ناي اجه عبد من بعيد كلشي مكال غير السلام عليكم وصعد شغل السياره
ناي : البقيه بحياتك
عبدالرحمن: وحياتج الباقيه
شرهب : ساكته واباوع عليه شون حاله مگلوب
وصلنا للبيت نزلت ناي وسيف وياها وصعدو واني فتحت الصندوك حتى اخذ الغراض اجه هو يفتحه صرت وجهه بوجهه وياه
عبد رفع عيونه وباوعلي
البقيه بحياتك
عبدالرحمن: مشكوره
شرهب : اعرف وضعك تعبان ومتأذي ادعيله بلرحمه كلنا لهذا الطريق اذا تبقى هيج تأذي وتأذي نفسك
عبدالرحمن: دفنت اخويه شرهب واعز من اخويه اني كبرت واشوف مهدي وصلاح اخوتي وحتى من يصير شى مااروح لا لابويه ولا لاخويه عبدالله اروح لصلاح ومهدي احنا تلاثتنا ٣ اجساد بروح وحده سرنا سوه ضحكتنا سوه حتى الحزن نتقاسمه سوه متوقعت بيوم ادفن واحد منهم واشوف شون يذبون التراب عليه وابقى ساكن بمكاني بس وروحه الدفنتها بيدي لا اخذ بثاره واحرك اهلهم واهل كلمن يطلع وياهم
شرهب : گلبي لزمني ومباشره كتله بدون حتى مااحسب احساب لكلامي واذا صار شى عليك اني منو اليه هو ضل يباوع مثل الي استغرب كلامي
عبدالرحمن: مفهمت
شرهب : فهمتني كلش زين لتحرك گلبي عليك عبد اني الشفته بعمري هوايه لتجي انت وتختمها وتنهيني
عبدالرحمن: اجه كلامج حييل متأخر
شرهب : لا مو متأخر انت تعرف اني احبك لتغشم نفسك
عبدالرحمن: شرهب اني بحال هيج حجي
شرهب : اي بحاله صحيح گلبك محروك على اخوك ومتأذي بس مو معناها تروح تسوي مثلهم وتكتل ناس مالها ذنب شنو فرقك عنهم واذا كتلت واحد او اثنين او شكد متكتل راح يرجع صلاح انت الراح تسوي ترمل نسوان وتيتم اطفال واذا مامتزوج راح تضرب گلب والده وتعيد نفس مآساه سدره وامها
اترجاك بليه عصبيه وقله تفكير مو كلشي ينحل بلگتل ولو صلاح هنا جان كال الك نفس الحجي هو جان اعقل واحد بيكم ودوم دربه التفاهم والكلمة الطيبه هواي تحجيلي ناي عنه ولو يسمعك مراح يرضه عنك
كام يضرب برجله بلسياره
ناااار بيه متعرفين شحس
شرهب : اعرف وحاسه بيك بليه تهور عبد واتذكر الراح تسوي لا الله يرضالك ولا صلاح
ومراح يرجع الراح مسويها لعبه همه يكتلون ترجعون انتم تردون ولا واحد عنده عقل وفكر هاي الناس الي تموت شنو ذنبها
عبدالرحمن: اخذي غراضج وصعدي
شرهب : مديت ايدي واخذتهم وكتله يجوز ماصرت من نصيبك او القدر ماجمعني بيك
بس متاكده الي محبه بگلبك جبيره احلفك بتراب صلاح المانشف وبحبي بگلبك لتأذيني بيك وتنهي الباقي من گلبي مو حمل أذيه والي خلقك باقي شعره وانتهي لتصير انت هاي الشعره عافني وصعد سيارته وشخطها وراح
صعدت واني افكر بكلامه شراح يسوي
ناي : رجع مهدي للبيت بليل تعاال حبيبي تمدد بحضني وبقى يبجي بلحظتها حسيته سيف ويبجي من كثر مادموعه قويه ومن گل گلبه حضنته حييل وابجي ويااه وكل شويه يكول ضاع اخويه انكسر ضلع من ضلوعي
جنت اشوف بيهم احلى اخوه وصداقه وموت صلاح دمر كلشي حلوو جان يجمعهم ومن يومها واني ايدي على گلبي والنوم بدا يهجرني وخايفه شراح يصير وخاصه كبرت العداوه وصارت فصول وعشاير ثانيه دخلت واني كل فكري شون راح تنحل هاي السالفه
شرهب : رجعت للدوام بس بنفس مكسوره لان حتى يم ناي البيت مغيم مهدي وضعه مخربط وكل شويه خطار بذاك البيت وشيوخ وهو يروح وهاي ناي صحتها بلنازل
وخابرنا على السيد لان محد ياخذنا للكوفه مهدي ملتهي ويونس حاير بشغله ومرتضى يركض على العيشه وسألنه السيد وانطانه شغلات تقويها اضافه طلب نروح لطبيب حتى يوصف الها مجموعه فيتامينات لان متاكل
واخذتها ورحنا طلع عدها نقص فيتامينات وفقر دم وكتب الها على مقويات وابر منا علاج الطبيب ومنا علاج السيد كدرت شويه توكف على رجلها جان خوفها لا هاي السنه هم تروح منها
طلعت اربعين صلاح حسب كلام مهدي كوه لازم عبد ليسوي مصيبه ومره كاعدين دخل مهدي وعبد فجأه ومهدي يعيط
مهدي : تخبلت بله لو كاتلهم
عبدالرحمن: لعد المن رحت اني غير حتى اكتلهم
مهدي : اكو شيوخ كعدت وقدرت فصل وطلبو الضربه يسلموه شلك بعد بهذا الخبال
عبدالرحمن: اذا مااكتله ماارتاح
مهدي : هذا خالي يخابر اي خالي هياته يمي لا لتخاف تلاحكت اله ايي راح ابقي يمي
عبدالرحمن: شنو جاهل وتحبسوني
مهدي : انكس من الجاهل اقلها ذاك من تحجي وياه تعيط بيه يسمع الكلام
عبدالرحمن: عوفني اطلع مهدي تره تصير موزينه وياك
مهدي : ماكو طلعه تبقى هنا
عبدالرحمن: اروح لبيتي مااسوي شى
مهدي : اليوم تبقى هنا ومتتحرك شرهب اذا مصارت زحمه عليج جاي وحبابه وجع راس هذا صعد ضغطي
شرهب : تحركت خطوه جان يكوول
عبد الرحمن : واني هم مو بس مهدي
رحت سويت جاي وجبته الهم قدمت لمهدي وراها تقربت قدمت لعبد اخذه ومباوع بوجهي انداريت مهدي يحجي ويه ناي جان اكول اله
متوقعت هيج اني رخيصه عندك مع الاسف حبيتك عفته وطبيت جان اسمع صوت الاستكان انشمر بلكاع
مهدي : شبيك تخبلت
عبدالرحمن: خلي تسويلي واحد غيره
ناي : اني اسويلك
عبدالرحمن: لا هيه
مهدي : شبيك ولك
عبدالرحمن: اذا شرهب متطلع وتسويلي اطلع من البيت
مهدي : شرهب وينج
شرهب : طلعت واني مورثه منه هاا ابو سيف
مهدي : ولو تعبناج استكان جاي ثاني هذا الغبي وكعه
شرهب : عفتهم وطبيت للمطبخ وصبيت واحد ثاني وجبت مكرافه ومكناسه حتى الم الكزاز قدمت الجااي جان يكوول
عبدالرحمن:اذا عدتي حجايه قبل شويه ياشرهب لا ابتلي بيج واخليج تبجين دم اياج تستفزيني
مهدي : شبيك وياها
شرهب : مابيه ابن خالك تعبان وديه طبيب خلي يعالج نفسه عباله تايهه وبكيفه يهدد
ناي : طبي شوشه واخذي سيف وياج
عبدالرحمن: اني اذا ابقى هنا أذيها محد جتف ايدي غيرها انتي مو مترديني ليش تذبين حجي تفورين دمي
ناي : شحجيتي
شرهب : مكلت شى
عبدالرحمن: اذا مااخذج واكص لسانج لا اخليج تخافين من خيالج وكولي تايهه الك
شرهب : هاي اذا عايش وما متت
عبدالرحمن: هاكم استلمو
ناي : طبي واشرت الها
مهدي : لتذب حرگتك بيها
عبدالرحمن: هاااي بت
وسكت مبين راد يسبني يله كمل
مهدي : ناي سولنا عشا ما متعشين
عبدالرحمن: مااريد شى من ايدها
شرهب : على اساس راح اذبح روحي واسويلك عفته وطبيت
ناي : اشيل الكزاز واطب نظفت المكان وطبيت وره شرهب
اثنينكم مخابيل والله انتي شگلتي اله وخبلتي
شرهب : هو مخبل من كاعد يتعارك ويه ذبان وجهه عوفي
ناي : تعاي نسوي عشاا
شرهب : بيومها مكعدت وياهم وبقيت بلغرفه حتى سويت لفه وتعشيت
وثاني يوم ماكو احد
اذا اجه اروح لبيتنا
ناي : لا ميجي البارحه حاله استثنائيه
شرهب : انتي صرتي افضل خلص نهايه الاسبوع ارجع للبيت
ناي : لا عفيه وين رايحه
شرهب : صار اشهر ناي عفت بيتي واخويه ولازم ارجع الى متى ابقى
ناي : اخلص السنه الدراسيه وروحي
شرهب : هوايه والله
ناي : اعرف تعبتج ويايه بس ماعندي غيرج لتعوفيني
شرهب : ماشي لخاطرج عمتج رجعت
ناي : اي اجت شعلينا بيها
شرهب : مات الزين وعاف هاي الخايسه
ناي : كلمن ويومه عوفيها
نهايه الشهر الرابع ٢٠١٧
رجعت من الكليه الجو نار ومايعه روحي نزلت براس الشارع اتمشى فاتت سياره مهدي من يمي وطبكت باب اهله وجان تنزل وحده من الصدر وبيدها طفله ركزت هااي منوو فتحت عيووني ممصدكه هاااي حوراء
مشيت سريع وشفتها
حوراء : شوشه وحضنتها هااي شنو صايره تخبلين وين جنتي
شرهب : بلدوام شجابج
مهدي : طبو جوه وتسالمو مو بلشارع
شرهب : ولو اني ماادخل بس علمود حوري دخلنا للكراج هااي بتج
حوراء : اي بتي ماسه
شرهب : تخبل فدووة الله يحفظها الج
حوراء : امين
شرهب : شفت مهدي ملتهي بلنجط تقربت منها وكلت شرجعج
حوراء : رجعت اسوي حل لروحي
شرهب : شون يعني
حوراء : اجيت بشى وراح اسوي شئ ثاني تجيج الاخبار
شرهب : طلعت وداد ومفهمت عفتها وكتلها بعدين اجيج طلعت من بيتهم وركض لناي نوايه نوايه ودخلت
ناي : خير ياستار
شرهب : حوراء رجعت
ناي : شوكت
شرهب : رجلج جابها شنو متدرين
ناي : لا والله قبل شويه دخلت وحتى مخابرته من رجعت
شرهب : جيتها مو خاليه
ناي : يجوز زياره عاديه هيه حتى بوفاة صلاح مكدرت تجي
شرهب : وداعتج حوراء راجعه وبالها حسبه ومبين مراح ترتاح اله تگضيها
ناي : لتجيبين طاريها كدام اخوج
شرهب : لا مااحجي
انتي لتنزلين تسلمين هيه اذا تريد تصعد حتى لتنغثين من وداد
ناي : هو هم هيج وخلي اسأل مهدي ليش رجعت دكيت عليه وكتله كال زياره عاديه وشرهب تكول مو عاديه اني هم گلبي لعب شراح تسوي حوراء
يومين وماصعدت لحد مندكت الباب يونس دخل جايب سياره لسيف
هااا حبيبي شونك
يونس : الْحٍمَدٍ للـّہ وين ابنج الشلايتي
ناي : جوه هو شاف الصغيره وجلب بيها ميقبل يصعد
يونس : ياصغيره
ناي : باوعت على شرهب وعضيت شفتي
شرهب : هم كولي اني حجيت
يونس : شبيكم
شرهب : حوراء رجعت وجوه بيت اهلها والصغيره بتها ماسه مكابلها سيف هذا ملخص الحدث كله
يونس : من يمر طاريها تاخذ الهوا كله يعني بينها وبيني امتار ومااكدر اشوفها كمت وكفت هااج هاي السياره انطيها لابنج اني رايح
ناي : وين هستوك اجيت
يونس : تصدكين اذا اكلج شميت ريحتها من كلتي جوه خليني اروح رحمه لامج
طلع من البيت واني الوم بروحي شحجاني شون فلت لساني
وره يومين اجاني تلفون من بان ترجف شبيج
بان : خابرت مرتضى اطمن عليه لكيته يلهث ومستعجل وهو يتراكض يكول ابوه وعمو عبيد لازمين يونس ومتعاركين وياااه يم المحل ومكسرين الغراض وسده مفهمت يونس شصار بيه
بعد مده :
حوراء : واكفه واعيط ومهدي وعبد وخالو وامي داير مدايري كتلكم ماارجع واذا جبرتوني احرك روحي
