رواية أرض الخناجر الفصل الثالث والأربعون بقلم ايلول
انا متعلم عليك هواي
يا سولة سكتي
يا طواريك.. من الظلمة تجيني
چانن ثيابي علي گبل جيتك
══━━━━✥◈✥━━━━══
رنـــه :: حيل انقهرت على بــدور كبل لا ياخذون مــاسه لبيت رجلها كعدت يمي مبتسمه وشفايفها يرجفن تگلي
بــدور:: هسه ضليت وحدي جوري اخذها صــيهد وماسه اخذها مــيثم.
-غير هاي رغد وياج.
دنكت ساكته الدموع تفتر بعيونها، ضليت يمها شويه وگمت ادور على عفراء لگيتها كاضه جــويريه بغرفة ام صــيهد تعلم بيها وجوري مدنكه كعدت يمهن اركز عليمن يحجن
عــفراء:: اعلمج مناه يرحن مناه جــويريه جا لمن ياخذ عليج مره عمي وعلي متعجبه انه صــيهد الخلگه بخشمه عايفج على مايج.
رنـــه :: عليمن عايفها على مايها ؟
دارن عليَّ اثنينهن ساكتات ويحجن الجملة مبتوره اخر كلمة ما يحجنها وحده تگل للثانيه
"فهمتيني"
ضوجني حاجيت عفراء وكمت وياها ردينه البيتنا، شويه والولد هم اجوا، ضليت بالغرفة انوم شمس، لمن نامت وكمت شفت طــروادة بالمطبخ يحمي الچاي ويگلب بالملزمة يريد يدرس شوية گبل لا يروح للگيعان ، وعبود وي سجاد بالدوانيه.
طبت عفراء عاينت الطرواده گالتله
-اكلك چا ماشفتوا بريا وين راح خطيه خاف مايريد يضل يم بيت عمي شاكر.
وطرواده يصب الچاي بالكوب ويگلها
-حاجيته بس ســليم چلب بيه يگول يضل يمي الليله اضــحك عليه.
ضحكت عفراء وطبت للهول تعزل بيه، طــروادة راح وانه رديت للغرفة درست لمن ناموا حسين وزهره، ضميت كتبي وفتحت تلفوني اعاين بيه متمدده بفراشي وشلت راسي للباب من طبت عفراء بأيدها تفاحتين
-هاچ.
ذبيت التلفون وفتحتلها ايديي شمرتلي التفاحه كعدت على حيلي اكل وهي كعدت بفراشها تعدل غطا شمس عاينتلي متردده تريد تحاجيني
عــفراء:: رنـــه اكضي تفاحتج وتعاي يمي خل احاجيج.
وانه اكل وعيني عليها ما ارتاحيت كمت غسلت ورجعت كعدت يمها متربعه عاينتلي بحسره
-رنـــه عليج بروح أبوي هذاك عزيز گلبج، طــروادة يستاهل تقهرينه؟
نلچم گـــلبي وي حچايتها هزيتلها راسي لا ودنكت عيني مدت ايدها تكض ايدي وتحجي بعتب
عــفراء:: خيبه تعبان علينه يركض النهار كله بهالگيعان لا عاش مراهقه ولا عاش شباب توه الدنيا تضحكله وطحنه برگبته خمستنا حاير بعيشتنا ليله ما ينامه بس كون ما يخلينه محتاجين شي، هذا يستاهل انقهره؟ رنـــه يستاهل تغثينه؟
مدنكه اكل بشفتي والدموع تارسه عيني الغصة خانگتني اهز راسي لا ما احط عيني بعينها
عــفراء:: جاي تقهرينه رنـــه والله گلبه يفرفح من وراج، يگلي تدوس ببطني واخافن احاجيها لا تتخربط، جا لان يخاف عليج وما يگدر يحاجيج تعلين گلبه؟
ياهو من الولد انتِ ما متعاركه وياه وغالطه عليه؟
شلت راسي مختنگه امسح بدموعي واگلها
-ترى بطلت اتعارك وياهم بس وي بريا نوبات.
-جا بريا وحد عنهم؟ ما يحجي على طــروادة هسه؟ ما يگول ما عرف يربي؟ ليش تجيبين الروحج الحجي؟ اكعد ببيتي واسكت شو الولد معاونينج حتى بالطبخ وتدرسين وأي حيوان الردتيه جابوه الج وزينين وياج غير تجازينهم وتحفظين سمعتهم؟
عبالج حلوه البنيه من تغلط ؟ تلعب الروح ترى
اللسان الوصخ ما يلوگ للبت خل حچاياتج حلّوه ونظيفة مثّل گلبج لا تشوهين روحج بهاي السوالف والغلط رنـــه، راح تخلين جدي وعمامي يعيرون طــروادة ولج ينجلط هذا لو واحد حجه عليج گدامه.
بچيت ميته من القهر لان كل حجيها صح مسحت دموعي اهزلها راسي
-بعد ما اغلط على احد هاي هيه.
-والله انه ما اريدنج تبجين بس هم بعد سنة سنتين تكبرين وتتذكرين هاي تصرفاتج تگولين شمالها عفراء ماكعدت وعلمتني نصحتني.
-هاي هيه بعد التوبه والله ما اقهر طــروادة .
- وهاي الحركه مال حلكج اليتلوه مناه ومناه يگول زحمه خل تبطلها.
-الله اكبر عليَّ زحمه وعلى ام زكي مو زحمه؟
هزيت ايدها ووخرت الغطا تمددت بفراشها گمت من يمها
رجعت لفراشي افكر بحجيها وابجي على طــروادة طلعت تلفوني من جوه المخده ووديتله رساله على الرصيد
"انه احبنك وآسفه على كل النوبات الغثيتك بيهن بعد ما تنعاد"
وديتها ورجعت التلفون ردت انامن ما گدرت طلعت افتر بالبيت طبيت الغرفة طــروادة فرشت فراشة ورحت للهول شغلت التلفزون وطفيت الضوه حطيتلي مخده وتمددت أعاين فيلم مناه لمن سمعت صوت طــروادة گمت بسرعة عاينت من الشباج طب للبيت وياه بريا ضايج وهو يضحك وكف يم طــروادة وهو يغسل رجليَّه بالحوض ويحجي وياه
بريا:: غثني.
-ههههه عليمن؟ جا هاي سوالفك انتم من تنطبگون تكضونها تحشيش هسه شفت شلون تغثونه؟
داروا اثنينهم على دفعة باب الحوش طبوا ســليم ووهب ميتين من الضحك يسحلون ببريا وبريا ما يرضى يروح وياهم جراه منهم طــروادة
طــروادة :: شتردون منه انتم؟
وهـــب :: نضحك عليه هدده.
ســليم:: تعال بريا انومك بين ضلوعي.
بريا:: والله ما اجي طــروادة لعبوا روحـــي يحششون عليَّ.
ضحك طــروادة واكف بينهم وهمه ميتين من الضحك وبريا من وره طروادة يإشرلهم اذبحكم
طــروادة:: يله كافي مو ضحكت وياكم أمشوا ولو مناه، وانتَ بريا طب جوه نام يم عبود وسجاد.
ســليم:: لااااا بريا چا وضلوعي الفتحتهن الك.
وهـــب :: تعوفنه واحنا العايفين اهلنه علمودك؟
وهوه يأشرلهم روحوا روحوا وطب للدوانيه وطرواده يطرد بيهم يريد يجي ينام وسليم ما يرضى جر وهـــب وياه وگال الطرواده
-ننام يم بريا
وهـــب:: لا ياابه احجي على روحك انا رايح.
وسليم سحل وهـــب حيل اخذه للدوانيه گوه عليه وكفت بالهول متخوصره لمن طب طــروادة شهك فاز من عدي وگبل عكد حاجبه
-شعدج گاعده؟
نزلت ايدي اعاينله واحجي مختنگه
-مو راسلتك ليش ما ترد عليَّ
-ما مكنك.
-على الرصيد وديتلك.
سد الباب يقفل بيه ويطلع بتلفونه من جيبه مدنك فتح الرسالة ضحك وشال راسه يعاينلي وانه كاضه دموعي گوه عيب عليَّ يقلد
طــروادة:: انا احبك اسسفه، تعااي.
فتح ايده مشيت بساع حط ايده على جتفي ولمني الحضنه يبوس راسي وانه الغي
-وعلي ما اغثنك بعد.
-فـــدوه اروحنلج
وخرني من حضنه وحاط ايد على راسي مبتسم
طــروادة::شأريد من عدج انا بس كون تحسبيلي حساب بتصرفاتج فكري بيه
-اي والله هاي هي،جيب ايدك ابوسنها.
ضحك وانه اسحول بأيده ابوسنها هواي واحطها على كصتي رد باسني براسي ووخر كتله
-جوعان اسويلك شي تاكله؟
-لا بس اطيني فراشات للولد.
-يا ينامون عدنا؟
هز راسه اي حجيت بهدوء
-خلهم يولون بدون فراشات تونه مسفطين النضده لا تخرب ياهو يسويها بعد.
-لايابه زحمه.
حجاها وراح لغرفته يطلعله هدوم حتى يسبح طبيت الغرفة اهلي ادردم نزلت من المخاد العايفتهن عــفراء على صفحة رادت تغير الوجوه مالتهن وحده ورديه بيها مثل الكركش مرسوم عليها ورد ومكتوب صباح الخير الثانية سمائية ومكتوب عليها تصبح على خير ووحده بيضه، جريت جودليات من المسفطات على كيف حتى ما اخربط البقيه ومن فراشاتنا مال النوم طلعت بطاطين فتحت منهن الجنط انكث بيهن وطب طــروادة عاين للبطاطين وحده مكتوب عليها احبك وحده عمــري ووحده مرسوم عليها ورد.
طــروادة::شني هذن؟ نزلي من هذن المسفطات
-لا فـــدوه والله هذن مابيهن شي غسلناهن وبخرناهن وجنه حاطينهن بالجنط شم ريحتهم شلون حلوه.
شم البطانيه وهز ايده حطهن على المخاد شالهن للدوانيه شمرهن الهم شمر واسمعه يگلهم
-انخمدوا ما اريدن صوت واكعدكم من الفجر تولون لاهلكم لا يلگفكم شعلان يمي يطيح حظكم.
وهـــب:: عمي انا اريدن اروح الاهلي طــروادة حاجيهم
طــروادة::انخمد يله انخمد ما اسمعلكم صوت.
حجاها وطلع شلت الجنط ضميتهن وره البوفيه ومشيت وراه اعاينله اخذ هدومه وراح للحمام يسبح سمعت صوت الولد عالي.
مشيت واتلفت خاف طــروادة يطلع سمعت ماي الحمام انفتح امنت كعدت يم باب الدوانية ثانية تكّ ركبه مغمضة عين ومفتحه عين اتحرك على كيف اريدن اشوفنهم ليش يضحكون، عبود وسجاد كل واحد نايم بصفحة وهذول يسحلون الغطا منهم، شگگو باكيت الجكاير واخذوا من عده ورقة يحطونها بخشم سجاد وسجاد كلساع راكع روحه راشدي لمن فز شافهم گدامه تفل عليهم ولف راسه داير وجهه منهم.
داروا على عبود دغدغوا رجليَّه جروا خشمه رادوه بس يكعد ولا فتح عينه يجر الغطا ويغطي حتى راسه، وسليم قفل على وهـــب ما يخليه يروح للبيت، كام بريا مدّ فراشة وشال المخدات يختار اخذ المكتوب عليها تصبح على خير جراها من عده وهـــب شمرها وانطاه وحده من امخاد الدوانيه وهوه ما يرضى يريد ألا هذيج، هزيت ايدي ووخرت رديت للغرفة ماگدرت انامن بالي يم بدور راسلت جويرية بلكن كاعده خمس دقايق وردت. كاتبتلي زينه لا يضل بالج طردتني ونامت يم رغد .
جــويريه :: ردت انام يم بــدور أواسيها طردتي الماتستحي تخاف لا صــيهد يجي يدور عليَّ ويحاجيها عفتها ورحت للمشتمل ادرس امتحاني لان اليوم مالحكت افتح الكتاب، صارت بالوحده واني كاعده وصيهد ما ادري بيه وين للوحده ونص يله دخل فتح باب الغرفة لكاني كاعده بفراشي وكتابي بأيدي باوعلي عاكد حاجبه يسأل
-بعدج گاعده!
-عدي امتحان باجر! ومالحكت ادرس عدل اليوم.
دخل حط سبحته وي السبح ويفرغ جيبه من التلفون والجكاير يباوعلي بالمرايا ويحجي.
-وهسه كضيتي لو بعدج.
-خلصت بس اراجع اخر شي انام واكعد بالسته الصبح اراجع.
هز راسه خوش بدل وراح للچرباية باوعتله مدنك يگلب بتلفونه دنكت ادرس شويه وتذكرت مــاسه رفعت راسي اريد احاجيه لگيته يباوعلي وتفاجأ من رفعت رأسي راساً دنك يباوع للتلفون حجيت بهدوء
-صــيهد.
باوعلي مضيك عيونه
-هم ضايج؟
-عليمن؟
-علمود لان زوجت مــاسه؟
تغيرت ملامحه ما عاجبه سؤالي واني احجي بس حتى افتح موضوع وياه واگله كم وحده تحب غير نجمة خايفه لا يتزوج اربعه ويطيح حظي يسون حزب عليَّ ويخلنه حتى يبطلني، گال
-لا زوجتها الأنسان يحترمها ويقدرها ماخايف عليها حتى اضوجن.
هزيت راسي أي صح رجع نزل عينه للتلفون گمت من مكاني وكفت كدامه وسانده ظهري للحايط ساكته شال راسه أشر على الفراش وهو يگول
صــيهد:: اكعدي اكعدي واحجي العدج
لمّ رجليه يسويلي مكان گدامه واني بلحظتها تندمت وخفت فريت راسي اريد اشرد كام وراي بسرعة لزمني من زندي وجراني خازرني نتر
-اكعدددي.
حجاها ودفعني على الچربايه فرغت ايدي من عنده وكعدت ساكته والوم بروحي شلي علاقة وليش اجيب الحجي النفسي عايفني ادرس واني الاجيته برجليَّ استاهل انقهر هسه، عاف تلفونه على الشحن ورجع كعد على الچرباية گدامي يباوعلي مضيك عيونه زفر نفس مقهور مسح وجهه وحجه بهدوء
صــيهد :: مو اجيتي حتى تحجين ليش رحتي ما احبن هيج انا لو من تجين توكفين گدامي تحجين العدج لو من الاساس لا تجين.
مدنكه ساكته مقهوره من روحـــي مد ايده على حنجي يرفع وجهي
-جوري.
باوعت بوجهه ساكته وخر شعري من وجهي يخليه وره اذني بأصابعه الخشنه شال كصيبتي من جتفي رجعها الظهري وعيونه على رگبتي وبنفس الايد تحسس حافة الدشداشة من يم رگبتي مديت ايدي جريت دشداشتي المها على رگبتي لا يبين الدك نزل ايده متحسر يباوع لوجهي وجر باكيت الجكاير يدخن ويحجي مضيگ عينه
-سولفي.
-هيج ماكو شي .
هز راسه خوش عينه بعيني زفر الدخان بوجهي وقرب وجهه الي خله الجكاره بين اصابعه ومداها يم شفايفي بلعت ريگي گـــلبي يدك حيل وهو يباوعلي بحيله أشرلي بعيونه على الجكاره حركت راسي لا ما اريد ما اهتم قربها لشفايفي اكثر
-اذا ما جريتي نفس هسه تحلمين بعد تشمّين ريحتها.
باوعت بعينه مرتبكه بيني وبينه خمس اصابع باوعت للجكاره باعدت بين شفايفي وهو خلّاها بحلكي جريت منها نفس گـــلبي يدك بقوة وعبالك روحـــي رادتلي سحبت نفس طوويل جراها من حلكي مبتسم بمكر
صــيهد:: ازفري.
ضليت حابسه الدخان واباوع لوجهه وهو عيونه لشفايفي ومقرب وجهه الوجهي مد ايده لحنجي يلزمه بين اصابعه حرك وجهي بهدوء وهو يگلي
-يلله.
واني كاطعه حتى النفس اريد يبتعد حتى ازفر الدخان براحتي بس هو حاط وجهه بوجهي وعيونه لشفايفي انگطع نفسي قوست شفايفي ازفر الدخان وهو عبالك چان منتظر بسرعة مد ايده وره راسي يقربني اله ولم شفايفي بين شفايفه شهگت مصدومة بيه وهو يسحب الدخان من عندي ويبوسني دفعته مختنگه اريد ابتعد وخر نزلت رجلي من الچرباية اريد اروح جراني من ايدي خازرني
-اكسر ايدج النوبه اذا تدفعيني.
فاتحه عيني بغضب خازرته وهو تسودن مد ايده على زندي لازمني بقوة والجكاره بين اصابعه ما ادري شلون مسيطر ماتطيح من عنده نتر
-شو خازرتني ووولج؟
هزاني من ايدي يريد انزل عيوني واني مدري شبيه ما متنازله احجي بغضب
-ليش تبوسني؟
-أحجي عدل ونزلي عيــونج لا اعميهن.
ماتنازلت بقيت خازرته وهو ايده تضغط اكثر على ايدي وخازرني شال ايده طفه الجكاره ودار علي لزمني من فكي ويحجي من بين أسنانه
صــيهد:: اخر مرررره احجي نزلي عينج لا اخليج للم وت بعد ما تخزريني.
بقيت خازرته رغم گـــلبي من الخوف يرجف واحس الراشدي بأيد لحظة يجيني بس ما ادري شلون گدرت ما اتنازل، هز راسه خوش متحلف ومد اديه اثنينهن يلزمني من أيديي بقوة وبنفس اللحظة فراني حجيت الزم بأيده وهو ما منطيني مجال بسرعة فرني خله ظهري عليه ونزل راسي على رجليَّه نومني بحضنه وانه بس اريد اكوم
مد ايده يلزم فكي شهگت لزمت ايده بأثنين ايديي صوتي يرجف ونفسي عالي نزل وجهه الوجهي واني اردد بخوف
-صــيهد صــيهد .
باوع لوجهي ونزل راسه يمشي شفايفه على خدي اتنفس بقوة لازمه بأيده وهو مثبتني على رجليَّه بقوة وأيده لازمه فكي بتحكم وغضب نفسه يمشي من خدي الخط فكي الطرف أذني باسني غمضت عيني نفسي يرجف وهو يهمس
-لا تعانديني تخسرين.
شال وجهه يباوع لوجهي فتحت عيني حييل خازرته وجريت ايده من فكي بقوة ونتر اريد اگوم من رجليَّه رفع حاجبه مصدوم لزمته اللي الجنت احسها قوية بالنسبه اله عادية ومن شافني عاندات اكثر وردت اگوم شد اديه عليَّ بقوة شهگت مصدومة ومتقيده بحضنه وهو بلا ما ينطيني مجال اتنفس رفع وجهي من فكي وبدون اي استأذان تملك شفايفي بجبروت وقوة لحظات هادئة ومن اسحب ايده يقسى يسحب رفضي وكرهي لحظات تتغلب بيها عاطفتي على عقلي ولحظات لمساته القوية تذكرني اني بين ادين منو، حسيته يبوسني عوض عن كل لحظة بعدته بيها عني يبوسني واحس بيه نفسه يرجف
رجعت اقاومه وبلا اي فايدة بنية جسمة ما تتقاوم وما اگدر احرك حتى ايده اختنگت كارهته وكارهه شعوري والخوف اكل جسمي اكل أرجف وبس اريد افك نفسي من عنذه وبس ابتعد بجيت اردد
-اسسفه اسفه ما أعيدها عووفني.
شهگت ابجي بس اريد اگوم من رجليَّه عافني بعصبيّة كعدت على حيلي نزلنه من الچرباية سوه ابجي بصوت وامشي لفراشي
وهو طلع من الغرفة ورگع الباب وراه حييل تمددت بفراشي متغطيه
لامه رجليَّ الصدري وروحي رايحه اختنك من يوصل يمي اختنك تلعب روحـــي واعيش بتناقض
مره استسلم ومره اشوف الموت واحس روحـــي مثل الطير المذبوح بين أديه
نص ساعة مرت مسحت دموعي طفيت الضوه ورجعت لفراشي منطيه ظهري للچرباية وهو ما ادري بيه وين راح، شويه وفتح باب الغرفة غمضت عيوني بس مبينه كاعده من المناشغ، حسيت بيه كعد وراي مد أيده لشعري وزفر نفس بحسره يحجي
-جوري.
انگلبت دايره وجهي عليه مختنگه مد ايده يتلمس جف ايدي مسح عليه وحجه بصوت ناصي
صــيهد:: اعتذر.
رجعت ابجي وأردد بغصه
-بعد لا تعيدها صــيهد حباب لا تعيدها.
مد اديه اثنينهن لوجهي متحسر
صــيهد:: هاي هيه وانتِ هم لا تعانديني جوري بالله العظيم انقهر لو غثيتج بس انتِ هم مدري شمالج تدوسين بنص گـــلبي.
مسحت وجهي ولزمت اديه انزلهن بقيت لازمه بأيد وحده ومخليتها على الفراش بصفي احجي وصوتي من البچي مختنك
-بعد ما أعاندك
عصر ايدي بين اصابعه عود يگلي هاي هي متفقين واني بس اريد اسحب ايدي من عنده موجوعه عافها خليتها على بطني وهو بقى كاعد بصفي شوية وگال
-ما حجيتي ليش اجيتي يمي مساع.
-هيج شي يخليك تعصب
-احجي وما اعصب.
-لاا.
سكت ملامحه مو كلش واضحه الضوه خفيف ما ادري اذا خازرني لو لا، دار وجهه ورجع باوعلي يحجي بهدوء
صــيهد:: احجيلج شي انا النوب انتِ تحجين.
-اي
احجي مرتبكه خليت ايدي جوه خدي ونمت على جهه وحده اباوعله گال
صــيهد:: اكو واحد اليوم طالع يخبل!
-منو مــيثم ؟
نتر بعصبية
-انچبيي.
وكام من يمي راح للچرباية يغلط
-مال رزايل مو مال حچي حلو.
درت وجهي للجهة الثانية اريد انام شويه وگال
-بيش الساعة تگعدين؟
-بالسته.
-كعديني وياج راح اعتمد عليج.
-خوش اني اكعدك.
سكت واني حتى اگدر انام اروح الخيالي والافكاري اللي ما تمد للواقع بأي صله، ابقى ارسم احلام الحد ما أغفى، للصبح حسيت بيه يكعدني
-جــويريه .
فتحت عيني اباوعله وجهه متروس غضب بس ما يحجي بعصبيّة
-اكعدي راجعي بالستة ونص چا مو معتمد عليج.
اخذ ملابسه وطلع من الغرفة واني گمت توضيت صليت وبدلت باب الغرفة مفتوح طلع من الحمآم وراساً راح لباب المشتمل فاتحه على كيف ويباوع لبيت اهله ما ادري مراقب منو منهم. دنكت أشرت على مسئلة حالتها بس اريد اتأكد من حلها صح لو خطأ
رجع للغرفة مشط شعره ومشه للباب بسرعة قلقني وخلاني اركز وياه سمعت صوتهم ابوه وجده وعمه شاكر اجه للغرفة بسرعة اخذ سبحته وتلفونه يريد يطلع حجيت بأرتباك
-صــيهد
دار علي رفعتله الدفتر اسأل
-الحل صح.
دار عيونه لباب المشتمل مدري شنو حجه واخذ الدفتر والقلم من عندي يأشر. ودنك وياي يأشرلي
-هناه غلط عدج وين القانون؟
-هاا هاا تذكرت لازم بالاول أكتب القانون والنوب اكمل الحل عرفت عرفت
-عفيييه هاج مستعجل انا.
عاف الدفتر بحضني ومشه بسرعة.
"""
مــاسه ::شهكت روحـــي رايحه وشلت راسي بفزه من اندك الباب حيل وصوت جدي وأبوي وي صدى دگة محابسهم لحديد الباب، چلبت بأيد مــيثم ارجف بخوف
-يذب حوووني يذب حووني.
لماني على صدره حيييل
مــيثم :: اششش مــاسه اشش يا روحـــي ياهو يذبحج؟ ياهو يوصلج عاينيلي لا تسوين هيج لا تهدين حيلي مــاسه .
ابجي بخوف مرعوبه مو بأيدي، وخرني من صدره لم وجهي بين اديه يمسح دموعي ويحجي بس يريدني اهدئ
مــيثم:: عاينــي عليَّ هالشي بيني وبينج محد اله حگ يعرفه، انتِ ما مسويه ذنب حتى تخافين
ارجف واردد وي صوت دكاتهم للباب كاضه ايده بأصابعي اليرجفن اتلفت بخوف ودموعي تجري
-ما تگللهم ما تگللهم؟
رجع جرني الصدره وعبر اديه يلمني على گلبه بقوة يبوس راسي ويردد
مــيثم:: وولج شلون اگلهم هاا شلون؟ انا اخلي واحد يجيب اسمج بالموزين مــاسة ياروحـــي
لا تسوين هيج لا تخلينهم يحسون بشي تصرفي طبيعي هسه يتباركولنه ويرحون خوش؟ ولو طلبوا شي انا أردهم مالج غرض انتِ.
وخرني من صدره هزيت راسي اي وجسمي غصب عني يرجف مسح دموعي يبوسني بين عيوني
مــيثم :: بدلي وانا راح اروحن افتحلهم الباب.
لبس دشداشته وطلع واني من الخوف ما اگدر اكض دموعي ولا اخفي رجفة جسمي خوافة واخاف من الموت اخاف من الذب ح.
كمت بخطوات ترجف قفلت باب الغرفة اريد ابدل ايديي يرجفن اسمع صوتهم بالهول يتباركوله وجدي يگله
-بشر؟
وره حجايته راساً شهكت من سمعت صوت صــيهد وهو يگلهم
صــيهد:: ما گدرتوا تفارگون چاي مــاسه مو؟
هو يحجي وانه احس روحـــي راحت مدري شلون گدرت البس واديه يرجفن دك الباب مــيثم فتحته اله دخل سد الباب ومسح عيوني خازرني
مــيثم :: ليش هيج ليشش؟ ما كافي بچي انتِ ما مسويه شي حتى تلومين روحج وتبجين مــاسه والله شليتي گـــلبي كافيي فدووه اروحن لعيونج كافي.
-صــيهد اجه صــيهد.
-اششش امسحي دموعي يله حتى تطلعين تسلمين عليهم، راح اسوي چاي وانتِ تصبيلهم خوش؟ مــاسه ما اريد دموع تصرفي طبيعي.
هزيت راسي اي من بين دموعي طلع مسحت عيوني المورمات من البچي ما اگدر اسيطر عليهن، لفيت حجابي وطلعت بخطوات ترجف لمحت صــيهد واكف على جهه وابوي وجدي كاعدين على القنفة وعمي شاكر مــيثم حاطله كرسي همست صوتي يرجف
-صباح الخير
وتقربت يم جدي مد ايده الي لزمتها ايدي تهتز كلها سلمت عليه وهو يگلي
-مبارك مبارك جدي
سلمت على ابوي وعلى عمي شاكر ووگفت على صفحة ما اعاين لجهة صــيهد مدنكه اسمعلهم بخوف اجه مــيثم حسيته خله ايده على جتفي گدامهم وجدي يگله
شعلان:: شلونها بت عمك ولك بت بيوت يو لا؟
صيح صــيهد بغضب وانه چلبت بدشداشة مــيثم ارجف والدموع تارسه عيني اريد ابجي وصيهد متسودن وابوي يسكت بجدي ويگله
وليد:: يابه بناتي ما ينسأل عنهن اسكت.
صــيهد:: امشي مــاسه جيبيلهم چاي ما يگدرون يفارگون چايچ.
مشيت للمطبخ بس درت ظهري الهم جرن دموعي امشي حانية ظهري چلبت بالسنگ ساده حلگي بأيدي وابجي بخنگ.
صــيهد:: شبيج؟
درت عليه فازه بلعت ريگي بخوف وهو يتقدم خطوة خطوة عاگد حاجبه وكف گدامي دموعي غصب عني تجري ونفسي عالي اشهك وجسمي يرتجف بخوف
مد اديه اثنينهن على اجتافي
-مــاسه
يعاين لعيوني بشك عاكد حاجبه ومضيك عيونه النفس ضاك بريتي ومن خوفي والرعب الرسمه الي عقلي همست بصوت يرجف من بين دموعي وشهگاتي
-ل.. لا تذب حني.
ابجي مرعوبه وهو فتح عينه على وسعها مصدوم وبنفس اللحظة جرني الصدره بقوة. بچيت حييل صوتي مكتوم بصدره وهو لامني على گلبه بأثنين أديه رددت بصوت مخنوگ
-محد لازمني والله محد لازمني
وخرني من صدره عيونه مفتوحات بقوة مد ايده لوجهي يمسح دموعي خازرني حط ايده على حلكه يسويلي
-اششش
بجيت مخنوگه شفايفي يرجفن ما أشوف گدامي غير الم وت
-ابوس ايدك لا تذب حني.
دار وجهه للباب دنگت مهدود حيلي ومچلبه بأيده ارجف
-صــيهد ابوس ايدكك
دنك بساع شالني من الگاع سد حلكي بأيده
صــيهد:: اششش اششش صوتج صوتج
جريت ايده اتوسل
-محد محدد والله محد لازمني والله.
رجعني الصدره ولأول مره بكل عمــري صــيهد يحضني هيج وبهالقوه ولأول مره يحجي وياي بهالاسلوب
صــيهد:: مــاسه يابه روحـــي انتِ اششش انا اذب حج؟ انا لو طكيتج اموتن شو عاينيلي.
وخرني من صدره عيونه صارت حمر حط ايده على حلكي يكتم صوتي ويحجي بغضب من بين اسنانه
صــيهد:: تصبرين عليَّ شهر واحد شهر تضلين هناه واخذج ولو طلعت حجايه وحده عليج انا كتال مــيثم.
ووي حجايته انفتح باب المطبخ طب مــيثم وبساع خزرني وصيهد عافني وراح على مــيثم بغضب سديت حلكي بأثنين ايديي وهو بس سد باب المطبخ جر مــيثم خانگه من ركبته وصفاه وي الحايط وميثم منزل اديه ما يدافع لنفسه مشيت بخطوات ترجف مجلبه بأيد صــيهد اريد احجي ما اگدر الغصه خانگتني وصيهد من بين اسنانه يحجي وي مــيثم
صــيهد:: اختي محد واصل اظفرها سمعتنييي؟ والله اذب حنك لو طلعت عليها حچاايه حچايه وحده امووتك شهر واحد شهر تضل يمك واخذها.
وميثم جر ايد صــيهد من رگبته خازره يحجون ويتلفتون للباب
مــيثم :: انتَ أشايفني؟ صــيهد ولك لو انتَ توكف ضدها انا اوكف بوجهك واكلك مــاسه عفيفه مرتي ولو الدنيا كلها تحجي شي عكس حچيها اجذب الدنيا واصدكها، وانا مو غشيم حتى ما احس واعارف السبب وهالأمور تصير وي الف بنيه غيرها.
شهر وتاخذها ؟ وين تاخذها والله لو تم وووت يوم يمك ما تضل تحلم .
ووخر من يم صــيهد اجه يمي جراني الصدره يهمس بأذني
-مو كتلج لا تحجين مــاسه شكتلج انا يابه؟
جراني صــيهد من ايده بنتر يمسح دموعي
صــيهد:: ما اريدن اشوف دموعج لا تخلين هالچلاب البره تتشمت بيه اخت صــيهد انتِ مثل ما انا رافع راسي بيجن انتِ ارفعي راسج وامشي بزودج لا تدنگين وانتِ مالج ذنب وما مسويه شي! خيط من ثوبج اشرف من عگلهم
-مصدگني؟
هز راسه اي وجرني يبوسني من بين عيوني متحسر
صــيهد:: اسكتي كافي بچي.
وخرني ودار على مــيثم من جدي ضل يصيح على الچاي
صــيهد:: صبلهم زقنبوت.
اجه مــيثم يصب الچاي وصيهد جرني من ايدي للسنك صوته اختنك كوه يحاجيني
-غسلي وجهج اذا شفتج تبجين حظج اطيحه.
مــيثم :: هيوو.
دار الميثم خازره وميثم هم خازره فتحت ماي السنك اغسل وجهي بعدها الرهبة والخوفة بيه بس من صــيهد صدكني شي بيه اطمئن، مــيثم اخذلهم الچاي وصيهد يعاين لوجهي گال
-مالج غرض بيهم روحـــي الغرفتج.
هزيت راسي اي مشيت وهو وراي حاجاهم گبل لا يحجون وياي طبيت للغرفة سديت الباب وغمضت عيني عقلي مخربط وروحي بهتانه شوي شوي رجفت جسمي تقل.
ماطولوا بس شربوا الچاي صــيهد گالهم يله امشوا اخذهم وراح
انفتح باب الغرفة وطب مــيثم مسحت عيوني اعاينله عيونه متروسه عتب وصل يمي ومد اديه لوجهي يحاجيني بهدوء
مــيثم :: ليش حجيتي يم صــيهد
-خ.. خفت.. خفت.
مسح دموعي يحاجيني بحسره
مــيثم :: غير أنّا مصدگج شعلينه بالوادم.
دنكت ساكته وهو مقهور اساساً بس يحاول يطمني ومن شافني حاسه بيه مقهور گال.
مــيثم:: چنت شايل هم اخافن لا بيوم عرسنه تبچين وكضيتها اخطط أضحكها ما اخليها تخاف من يمي نلعب بلي أساسيها ولو ما رادت قربي من اول ليله اعوفنها على راحتها اهم شي ما اشوفن دموعها ما اريدن افرح على حسابها
تالي ماستي ما نشّفت دمعتها كرهت روحـــي وانا اشوفن دموعج تحفر خدج.
يحجي ولامني على صدره غمضت عيني هادئة وهو يمسح على شعري متحسر، ربع ساعة واندك باب الهول گام مــيثم بساع وانه وكفت بخوف فتح باب الغرفة والمح رغد بالباب حاطه على الطبله صينية ريوگ وتعاين بخوف ميلت راسي بس شفتها اريدن أحد مثل حضن إمي يلمني وهي عبالك تدري بيه طلع مــيثم للهول سلم عليها گالها
-تفضلي خوية تفضلي.
اجت يمي للغرفة سدّت الباب بجيت اضم روحـــي الحضنها وهي تحجي بخوف
-مــاسه شبيج؟ ما رضى يگلي شبيج بس ضل يصيح عليَّ.
وخرت من حضنها أمسح دموعي
-ياهو؟
رغد:: صــيهد اجاني ينتر گال تعاي امشي يم مــاسه أحجي وياها.
كعدت احجيلها وابجي
رغد:: والله عادي وتصير وي هواي بنات بس ما الومج على خوفج لان احنا بمجتمع عقله رابط شرف البنيه بقطرة دم.
اهدي واحمدي ربج واشكريه ألف مره انتِ طحتي برجال شريف ويخاف الله.
-البارحة كضيت الليل اتخيل ياهو من اخوتي يذبحني صــيهد لو وهـــب ردت اموت والله ردت اموت.
مدت ايدها تمسح عيوني وتحجي وياي بهدوء
رغد:: اسم الله عليج، عاينــي اسمعيني زين لا تمنعين مــيثم منج خل يرجع يتقربلج ولا تضلين خايفة ومتوتره، اهدي وعسى ولعل بأكثر من تقارب ترهم ما نريد دكتورة مــاسه سمعتيني لا تمنعينه من عدج، ولا تخافين عدت وبعد محد يسأل الموضوع انسد راح يضل بينج وبين مــيثم وعين الله على مــيثم متفهم والحمدلله.
هزيت راسي اي ضلت شويه يمي تحاجيني وطلعنه سوه صــيهد متانيها بره، وميثم ما رضى يتريك الا انه اتريك گوه على روحـــي آكلت شويه.
ورحنا البيت آهلي علمود الغدا، مخبوصين لان سيد عباس يمهم هوه وولده واخوته.
ضليت يم أمي بالغرفة ما گدرت احجيلها وأقهرها كتلها كلشي تمام وهي تعاينلي بقهر، جويريه وبدور بالمدرسة وندى ورغد بالمطبخ ملتهيات بالغدا انفتح باب الغرفة عاينتله صــيهد گال
صــيهد:: مــاسه تعاي انتِ سوي اللبن.
كمت مرتبكه من عنده حط ايده بظهري يمشيني للمطبخ
رد ما يحجي وي رغد الصبح محاجيها علمودي جابني للمطبخ حتى يحاجيني ويسمعها شنو يريد بالطبخ، طلع من المطبخ ساعدت البنات وهن تعبن يركضن مناه ومناه، جاي نصب بالغده واجن البنات بــدور گبل ضحكت تهزّ ايدها
بــدور:: عروس عود انتِ
رغد:: امشي بدلي وتعاي لملمي المطبخ.
ضحكت بــدور شارده وجويريه تعاينلي بقلق، مشت تبدل وتصلي، الولد اخذوا الغده للدوانيه اجو ولّد عمامي كلهم بس ولد بيت عمي شامل ما يجون، طبينه للغرفة يم امي وهيه تسأل سيد عباس شعده هناه
رغد:: يمه والله ما ادري.
ندى:: عمه اني اعرف عنده مشكله هناه ودزوا عليه حتى يتدخل ويحلها وهم جان مشتري بيت بالمدينة رايح شايفه شنو يحتاج گال للولد حتى همه يكملون الكهرباء والارضيه، وهـــب سولفلي.
رغد:: استلمي هاي واسطتها قوية تجيبلنه خوش اخبار.
ضحكت ندى وكعدن يم الصينية طبت جده للغرفة وبس شافتني گالت
-ها ولج العروس شعدج هناه.
-اجيت وي مــيثم جده.
هزت ايدها ما راضيه وطلعت، للعصر الولد كلهم طلعوا حتى مــيثم، وامي ما رضت اضل يمهم گالت امشي البيتج، مشيت وعقلي مشغول بس بالوكت نفسه مطمئنه حسيت عبرت مرحلة وما راح ام وت.
لملمت الهول وطبيت للمطبخ اشوف شنو اسوي للعشا وكل ما اصفن واتذكر حجي مــيثم وحجي صــيهد احمد ربي واشكره على وجودهم، ومن اتذكر حجاية صيهد وشلون لمني الصدره اتمنى ابوسن ايده وجهه وكفه، واصفن بميثم واگول ربي شگد يحبني بعدني عن اختياري لان هو مختاري الاحسن.
كصصت لحم حتى اسويه حميسه وحسيت سمعت باب الحوش انفتح مشيت اعاين لمحته بريا ضل يفترّ بالحوش مستحي يطب للبيت فتحت باب الهول عاينلي ودنك
بريا:: السلام عليكم مبروك خويه.
-الله يبارك بيك خويه.
ضل واكف بالحوش هو مستحي يطب للبيت وانه مستحيه اگله تفضل خاف يحس هذا مو بيته گتله.
-مسويه چاي اصبلك؟
ابتسم وهوه مدنك هز راسه اي، مشيت للمطبخ وهو طب ورأي گال
-خويه مــاسه لا تصبيلي انا راح اسبح من اطلع اصب الروحي
-على راحتك.
راح الغرفته ياخذ هدوم وانه بساع سويت الچاي ومشيت للغرفة من دك تلفوني جاوبته متوتره
-الو
مــيثم :: الو ها حبيبتي شلونج؟
-الحمدلله
-بعدج يم اهلج؟
-لا اجيت للبيت سويت عشه وهسه بريا اجه لكيته ضال بالحوش يستحي يطب للبيت.
-هههه اخوي اخلاق
-اي كتله راح اصبلك چاي وطب للبيت
-خوش حچي عاينــي مو تضوجين انا ما اجي على العشا.
-ليش؟
-مو والله عزمونا هاي من وره اخوتج.
-براحتك، يله مع السلامة.
سديت التلفون ورجعت للمطبخ لمن طلع بريا صبيتله چاي اخذه وطلع للحديقة كعد على البايات يشرب چاي ويعاين بتلفونه وبس كضه طب للمطبخ غسل كوبه وراح.
ضليت وحدي للعشرة بالليل حضرت كتبي وهدومي حتى باجر اداوم، عاينت لهدوم النوم گـــلبي يدك بخوف وتردد رحت توضيت وصليت ادعّي وابجي حتى لو همه صدكوني بس انه بقيت احس بروحي شي غلط وما مرتاحه والقلق ماكل عقلي، لميت السجاد وگمت سبحت ولبست واحد منهن اعاين لروحي بالمرايه دك تلفوني صوّت رسالة فتحتها كاتب اجيبلج شي وياي
-لا بس لا تتأخر نعست انه.
-جايج گـــلبي.
عفت التلفون طفيت اضوية الغرفة خليت بس الباجورات ورحت للچرباية تمددت بفراشي متغطيه واقرأ كل ايه حافظتها وكل دعاء اجه ببالي، سمعته من فتح باي الهول بالمفتاح دك باب الغرفة ومن ما حجيت فتحه وطب الغرفة بارده واضويتها خافته معطرتها ومشغله المكيف رغم بالليل الجو مو ذيج الحروره خله اغراض على الميز ويحجي بصوت ناصي
-مــاسه حبيبي نمتي؟
بقيت ساكته متغطيه ومطلعه بس طرف عيني اشوفنه ما شغل الضوه وكف يبدل ويغلط على روحه
-عريس عريس انتَ مولي وياهم المن.
يحجي على روحه بدل وطلع بره غسل ورجع اجه للچرباية تمدد وقرب روحه يبوس راسي يحجي همس
-يابعد عيوني.
حجاها وخايف يحضني لا افزن، ضليت مغمضه عيني ومسويه روحـــي نايمه وهو يبوس وجهي ويبوس أيديي ورد خله راسه على المخده مالته، شلت راسي خليته على صدره لماني بحضنه حييل
-كاعده.
-اممم.
-طلعتي مو بس بالبلي تغشين.
يحجي بأبتسامه حطيت ايدي على صدره گلبه يدك حييل وانه نفسي مخربط، رفع أيدي من صدره لشفايفه يبوس اصابعي متحسر وايده تمسح على ظهري بهدوء
-مــاسه
رفعت راسي الوجهه مد ايده لخصل شعري يضمهم وره اذني ونفسها ايده تحسس خدي وطرف شفايفي رجعني للمخده وتقرب متردد خاف ارفضه، سند راسه
على راسي صوت نفسه عالي ميل راسه على جهه حسيت رمشه تشابك وي رمشي رفعت أيدي اتلمس خده رفع راسه يعاين لوجهي وحس بيه راضيه بقربه قرب شفايفه الدافيه يبوسني
بلمسات حنونه وهادئة لمني الحضنه خايف عليَّ حتى من لمسة أيّده الخشنه لحيته مره احسها على خدي مره على رگبتي حبه ولهفته هن الچانن يتحكمن بيه حسيت روحـــي بأيده انسانه بمشاعر مختلفة مطمئنه للمساته وقربه يعتذر قبل اي أذيه يسببها الي وارد عليه بدون كلام ارد بحضن وصوت مكتوم، عقده بطريقنا جانت وانحلت رغم الاذيه بس گـــلبي ارتاح واطمن غطيت وجهي بين أديه ابجي
وهو ابتعد بخوف يجر ايدي من وجهي
-اعتذر مــاسه اعتذر والله اعتذر عاينيلي مــاسه .
درت وجهي عليه مبتسمه من بين دموعي
-ماضايجه منك جنت خايفه يصير نفس البارحه.
زفر نفس براحه ودنك يبوس أديه اثنينهن .
وبهاليوم دعيت من كل گـــلبي ماتمر اي عروس بالمريت بيه، طبيت للحمام اسبح ومن ردت اطلع سمعت صوت بريا طب للبيت وميثم يحجي وياه يعاتبه لان مخابره وما راد عليه استحيت اطلع. ضليت بالحمام واسمعلهم بريا يگله
بريا:: بعد راح اروحن اعيش وي بيت عمي شامل استحي من مرتك.
مــيثم:: حتى طــروادة يوديك الي جنازه، امشي امشي سويلنه شاميه، خل نلعب بلي
بريا:: خاب روح عني.
مشه يطب الغرفته وميثم يصيح وراه طلعت من الحمام عاينلي مبتسم كتله
-ترى انه اريدن العب.
ضحك گال.
-خوش راح اروحن اسبح جايب وياي شاميه سويها بين ما اطلع.
هزيت راسي خوش هو راح يسبح وانه طبيت للغرفة بين ما نشفت شعري ومشطت الساعة ب١٢:٣٠ المفروض انامن بس شيقنعني، توني لفيت الحجاب على راسي وسمعت تفرگع الشاميه طلعت للمطبخ لگيت بريا مسويها عاينلي ودار للجدر وهو يگلي
-هذا رجلج يأمر عليَّ ما يستحي.
-هههه غير اخوك الچبير.
ضحك عفته يكمل الشاميه ورحت اشوف العلاليك العافهن بالغرفه جبت من عدهن حب وببسي سويت صينية وي الشاميه السواها بريا خليانها بالهول بريا شغل البلي بساع كضيت اليده الزينه عاينلي مضيك عينه
بريا:: شوف هاي من هسه تحجز الرجلها اليده الزينه.
مــاسه:: ههههه لا هاي حجزتها الروحي.
رفع حاجبه متفاجئ
بريا:: تعارفين تلعبين
وگبل ما ارد عليه طلع مــيثم من الحمام وهو يگله
مــيثم:: تعارف وغلبتني.
عاف اليده على الطبله
بريا:: بطلت ما اللعب.
ضحك مــيثم وكعد بصفي على القنفة وبريا مشه يريد يطب الغرفته مــيثم ما خلاه صاح عليه
مــيثم:: انچب وتعال شجعني.
رد كعد بالگاع گاله
بريا:: انا اشجع مرت اخوي
مــاسه:: عفيه هههههه.
ضحكوا أثنينهم من بداية اللعبه گولت على مــيثم وبريا حجه وي مــيثم يالروسي
بريا:: Она сильная и мастер игры, явно не в первый раз играет!»
وميثم ضحك وهم رد عليه بالروسي
مــيثم :: Да, она может нас обоих обыграть. Она играла больше, чем мы.
دار عليَّ مــيثم وكفت اللعبه عاكده حاجبي حسيت روحـــي غبيه بينهم وهو مبتسم گال
مــيثم:: والله ماحجينا عليج كالي خوش تلعب ومبين تعرفلها ولاعبتها هواي كتله اي لاعبتها اكثر مني ومنك وتخسرنه إحنا الاثنين.
-جا احجوا عراقي ليش تحجون روسي.
بريا:: حتى ما ننسى لغة امي.
حجاها بقهر ورد عاين للشاشه لعبنه شوية من ضليت افكر بأمهم ماركزت خسرت واثنينهم يضحكون عليَّ لملمت الهول بريا راح نام وميثم ضل بباب المطبخ متانيني لمن كملت ورحنا الغرفتنا، بساع غفيت .
وثاني يوم من كعدت مــيثم ما موجود كمت صليت ولبست هدوم المدرسه سمعت باب الحوش اندك ضحكت بس شفته صيهد فتحتله باب الحوش شبگته وهو حط ايده على راسي مبتسم ويسأل
-رجلج وين؟
-ما ادري كعدت مالكيته تعال تفضل.
جريته من أيّده للبيت گال
-مسويه چاي؟
-اي.
-صبيلي يله حتى ترحين راح يجي الحجي.
ضل واكف مشيت للمطبخ بساع صبيتله چاي شربه وهو واكف لبست عبايتي وطلعت وياه وصلنه انه والبنات للسيارة وراح، بس نزلنا بالمدرسة گالت جــويريه
-صــيهد وصاني اسألج على شغله گال بس اسأليها اخذها للدكتوره لو ما يحتاج.
ماحاجيتها بالفرصه سولفتلها ووصيتها تگول الصيهد لا ما يحتاج، اسبوع مر عشته وي مــيثم بحب وهو وبريا مكيفين بوجودي بريا شوي شوي تعود وصار يتشاقى وياي مره لعبت بلي ضده وخسرته وحلف بعد ما يلعب وياي، ومن شافوني اضوج من من يحجون روسي گاموا ما يحجون يمي ومن يردون يطلعون اثنينهم يسألون شتردين نجيبيلج ويانه، بريا من يطب للبيت يعوف علاكه الحلويات على الطبله البالهول ويصيحلي
-مــاسه خويه هذن حلوياتج.
وافرح حيل بتعاملهم وياي وصيهد كل يوم الصبح يجي يشرّب چاي من ايدي يله يطلع
"""
ريـــمه :: اعاين الامي ساكته سجاد نايم على رجليها وهيه تمسح على راسه وتسولف وياه وبس جابت طاري عبود وگالتله
-خيولي شني مرافگه اربعه وعشرين ساعة.
وخر من رجليها يحجي وياها بهدوء وصوت ناصي بس انه الاعرف شكد انغث من حجايتها
سجاد:: انا عايش لأجل عبود بطلي تحاولين تخربين بيناتنا
ميلاد:: على زينيتهم؟ على صحبتهم النص ردن عليمن كاتلين رواحكم عليهم؟
وسجاد ما رد عليها شال تلفونه وطلع من البيت وامي تغلط وتدعي سكتت مشيت للمطبخ يم فرح تضحك وتعاين للباب گالت
-عمتي لو ما تخاف على ولدها لا يصير بيهم شي جا لزكتهم بسحر تخليهم ما يشوفون بيت شامل.
-شسالفه فرح شلج بهالحجي؟
-غير يكمل المهجوم واطلع مناااه مليت من شكولكم ريـــمه ملللليت.
تحجي وتنكث بأيدها، سكتت
منها صعدت فوك هاجر تبجي، لان
غيث مشكك دفاتر رسمها اخذت غيث ودّيته الامه وهي التلفون اربعه وعشرين ساعة بأيدها، رجعت
يم هاجر للغرفة احجي وياها
-ميخالف ترسمين جديدات لا تضوجين اصلاً هذن قديمات ما مفهومات.
تمسح عيونها وتهز راسها لا تأشر وتشرح بأديها
(احبهن حتى لو قديمات)
سكتت محتاره لميتهن ونزلت اشوفها وين لكيتها بالهول يم سلطان ومرتضى سلمت عليهم سلطان رد ومرتضى ما يرد
وكفت على صفحة اعاين لسلطان مبتسمه حاط هجوره يمه يسولف وياها ويبوس بأيدها گالها
سلطان:: من رحت للگيعان سمعت طكطكه بالسيارة گلت بس لا هاجر رجعت لسوالفها، نزلت فتحت الصندوك لگيتها دبه.
تحسرت هاجر صافنه وأشرتله بأديها تشرح عاينلي سلطان مبتسم گتله
-تكلك لا كبرت صار عمرها ١٣
مرتضى:: منيلج كبرتي اكير زعطوطه عاينــي ولج لو لكيتك طاكه فطم النوب امووتج.
سلطان:: خوماكو شي شني تموتها؟ ليمته طاكتها، تعاي عمي فطومه تعاي هاجر طاكتج؟
وفطوم هزت راسها اي ومرتضى اذاعه وانفتحت شيسكته بعد غلط وصياح وتعارك وي سلطان
سلطان:: يييله يله لا تخبصنه هسه يكمل بيتك اخذ فروخك وروح ساعتها محد يطكهم.
مرتضى:: تاكل تبن وتنجب لا گطع النعال على راسك، ياهو انتَ وتحجي وياي هيج بكيفي ليمت ما اطلع اطلع
وسلطان هز راسه موافق
سلطان:: رحم الله والديك.
كام سلطان يريد يطلع حتى ما تزيد العركه ومرتضى يصيح وراه
مرتضى:: روح اركض روح لولد عمك حرمصلهم خايس مدمغين جوه اديهم.
وسلطان مارد عليه، صحت الهاجر وصعدنه فوگ هاجر مختنگه وعيونها متروسه دموع وحتى انسيها الموضوع گتلها
-تعاي نعزل دفاتر الرسم مالاتج الما تحتاجينهن نشمرهن.
كعدنا سوه گلبنه رسماتها نضحك فتحت عيني كلها وجريت الرسمه منها
-عززا بعيني هاجر شهالرسمه.
حطت ايدها على حلكها تضحك كضيتها من اذنها ما راضيه ودرت الرسمه عليها
-ليش حاطتني وي طرواده .
راسمتني وراسمه طرواده وبنصنا هاسكي أشرت على شكل طــروادة وسوتلي بأيدها شعرفج عود شلون عرفتيه هوه بما انُ رسمها مو كلش واضح
-عرفته من هاسكي.
ضحكت بحيله رافعه حاجبها جعصت الرسمه بأيدي
-عيب لا تعيدينها.
ضلت تضحك نعزل باقي الرسمات من ضمنهم جان جسم مره بوجهه شيطان باوعتلها مستغربه درت عليها الرسمه تقشعر البدن احس روحـــي شايفتها بس وين ما ادري ما يجي بعقلي
-هاجر هاي ياهي؟
جرت قلم واخذت الرسمه من ايدي تكتب فوكاها بخط متعرج "امي"
بلعت ريكي بغصه گـــلبي يدك حيل هزيت راسي لا
-عيب هجوره ما يصير هيج تگولين امنا تحبنه.
تحسرت تهز راسها لا تأشر عليَّ وعليها بمعنى لا تحبني ولا تحبج، ورجعت تدور بالرسومات وتعزل الماتريدهم على جهه ودفتر واحد ضامته على صفحة ماخلتني أفتحه عفتها على راحتها صفينه الموجود وضمينه البقيه نزلت من صاحت علي امي وهي بغرفتها
-ها يمه .
-تعاي.
طبيت يمها للغرفه وسديت الباب كعدت بصفها گالت
-اريدنج ترحين لبيت شامل اسألي رنـــه هالسنه يحصدون بنفس الحاصوده مال السلف لو شيخ حيدر هم يوديلهم حاصوده؟
-يمه شعلينه؟
طكتني على ايدي حيل خازرتني
ميلاد:: ليش ترادديني؟ سوي مثل ما كتلج
هزيت راسي اي اسألها
-اروحن هسه لو بعيدن؟
نترت بوجهي
-هسسسه هسه.
كمت من يمها صعدت فوك بدلت ولبست عبايتي نزل احاجيها طلعت يمي للحوش
ميلاد:: اسألي رنـــه وتعاي.
-ميخالف ابقى يمهم لليل؟
شهكت موجوعه من كرصتني بزندي صاكه على اسنانها وتحجي بغضب
ميلاد:: موديتج تتونسين وتضلين لليل؟
وخرت ايدها من طب ســليم عگد حاجبه وهز راسه يسأل
ســليم:: خيرر وين ؟
ميلاد:: ضايجة تريد تروح يم رنـــه.
ســليم:: شسوين؟ جا شني رنـــه عدهم مسرحيه نفس الحياطين ونفس الاجواء آلمن رايحه.
نترت امي بوجهه
ميلاد:: مختنگه طاكه روحها لا ترد تنت حر وتجيبلنه مصيبة.
فتح عينه بغضب أشرلي اطلعي مشيت وراه مدنكه گـــلبي يوجعني وهوه يمشي سريع وكف بباب بيت عمي شامل لمن وصلت يمه دك الباب مرتين فتحته النه زهره بس شافته گدامها رفعت ايدها تسلم عليه وتتموع گالتله
زهره:: هلا سلومي.
ســليم:: احترمي نفسج شني سلومي.
لوت حلكها وهزّت ايدها ضحكت وهوه مبتسم گالها
ســليم:: طالبتها من الرعنه الچبيره حبه ومفشوگه.
يحجي مايدري رنـــه وره الباب وهي بساع صاحت
رنـــه:: عمي لو ما طــروادة مربيني خوش تربيه جا هسه عرفت شكلك.
ســليم:: وانا الخاطر المطي ساكت عنج.
درت السليم اتوسل يروح راح ضايج طبيت للبيت شبگت على رنـــه ابوسها وهي حتى ما تسلم بس تغلط على ســليم طبينه للبيت لكيتها فارشه الكتب تدرس وتدرسهم ملتهيه حييل كعدت يمها اخذت حسين منها اقريه انه وهي من كتاب لكتاب تريد تبجي لحد العشا كمنه للمطبخ سوه كعدت يمها وهيه تحجيلي على بنات غانم اضــحك وياها وانفتح باب الهول طب يريد يحاجي رنـــه ومن شافني انصدم عاين لرنه گال
-السلام عليكم.
رنـــه :: عليكم السلام.
مشه الغرفته ساكت دارت عليَّ رنـــه گالت
-تعشي يمنه يله ترحين.
هزيت راسي لا
-هاجر تضوج.
-والله ما تضوج شبيج ريـــمه صار هواي ماجايتنا.
دنكت ساكته سويتلها الزلاطه سدت باب المطبخ حتى اخذ راحتي، وطرواده كلساع يصيحلها تروحله وترجع يمي تركض واكفه هيه اگلي ودك ياب المطبخ طــروادة فتحته اله گالتله
رنـــه :: راح اكضي والله لا تروح.
طروادة :: والله ما الحك بعد روحـــي اطيني لفه كافي والله.
دارت ضايجة تريد تسويله لفة مديتلها ماعون الزلاطه وهيه حطتله كباب عروك وخضره شالت من الزلاطه تريد تخلي گاللها
طــروادة :: لا لا تخلين.
باوعتله بصدمة وهي لفتها اله عافتها على صفحة وسوت وحده ثانيه حتى ياخذها وياه، باوعلي دنكت مختنگة زلاطتكم وبس كصصتها ما حاطه بيها سم، رنـــه كملت اللفه الثانية خلتها اله بعلاكه وانه الخنگه ذبحتني ردت بس ارجع للبيت، اخذهن وطلع درت الرنه. أمسح عيوني وكوه احاجيها
-رنـــه انه راح اروحن والله اصلاً شبعانه ما اكل خليها غير مره اجي ونتعشه سوه.
-جا اسويلج لفة فـــدوه والله سويت الكباب عروك علمودج!
سكتت وهي بسرعة سوت اللفه حطتها بأيدي وشبگتني توصي
رنـــه :: ديربالج على روحج واكلي زين ضعفانه وعيونج صايرات بنگره.
هزيت راسي اي اخذت عبايتي وطلعت وصلتني لباب الحوش
طــروادة:: وين؟
درنه عليه اثنينا اجه من يم الحديقة التفكه بجتفه ياكل مكمل لفة واللفه الثانيه بالعلاكه كاضها بأيدها گالتله رنـــه
-تريد تروح لبيتهم ضاجت.
-ليش ريـــمه ضلي وي رنـــه ياهو عدنا انا هل رايح للگيعان ضلي وياها لبعد شوي من يجون سحاد وعبود رديّ لبيتكم.
يحجي بهدوء هزيت راسي لا ورنه گالتله
رنـــه :: خليها تروح هيه ضلت تفكر بهاجر.
هز راسه خوش فتح سلسلة هاسكي وكضاه من الطوك البرگبته حتى ما يجيني گال
طــروادة:: يله على راحتج تعاي اوصلج.
رنـــه باستني بساع وركضت للمطبخ تكمل گلي، طلعت گدامه امشي سريع وهوه وهاسكي وراي بس وصلنه لسياج حوشنه درت عليه بعصبيه
-وخر هاسكي اريدن احاجيك.
عگد حاجبه مستغرب، خله هاسكي كاعد بمكانه واجه وكف گدامي ظهره على سياج حوشنه عاينت لوجهه بغضب الظلام شويه شويه يزيد الجو يخنگ بوكت الغروب الوادم كلها تطب لبيوتها تصلي، ريحة دخان توصلنه من بعيد مسوين مداخن حتى تطرد البگ، ماكو اي صوت غير صوت القارئ من ختم الاذان وصوت خفگة جناح الطيور وهي تچل على اغصان الشجر
شلّت اللفه حطيتها على صدره حيل مد ايده يكضها وطخن اصابعه بأصابعي مستغرب وعاكد حاجبه جرن دموعي واحجي بخنگه
-ترى انه مو سحاااره ولا جايه حتى اسممكم الزلاطه من ثلاجتكم وانه بس ثرمتها اساعد رنـــه على شنو ما تاخذ منهاا شحاطتلك بيها
احجي بحرگه وأدفع بصدره محترك گـــلبي حيل وهو ساكت صافن بيه ومصدوم شال ايده يمسح وجهه
طــروادة:: وخري ايددج.
جريت ايدي من صدره ودنكت امسح دموعي واحجي بغضب
-اي شي واصل ايدي صحت مسمم مسحور اشااايفني انتَ اشايفني.
همس
-ريمتنا.
شلت راسي اعاينله عيوني متروسه دموعي
طــروادة:: شايفج ريمتنا ريمة أمي وابويه.
-انتَ ما شايفني غير بت ميلاد.
هز راسه لا ووكف عدل شال ايده الشعره يرفعه من كصته
-انا ماحاجي شي عليمن عصبية انتِ.
-عليمن؟ مو عبالك انه سحاااره عبالك من ثرمت الزلاطه خليتلك بيها سحررر.
-ما چنت ادري بيج انتِ ثارمتها.
خزرته مختنگه
-تدررري تدري عاينتلي وگتلها لا تحطيلي زلاطه.
-يابه ولله ما ادري هسه أردن اخذ.
-لا تاخذ حاطتلك بيها سحر.
طــروادة:: ما استبعدها بعد انتِ بت ميلاد.
عاينت لوجهه شفايفي ترجف بچيت بخنگه
-انتَ شبييييك وياي؟ واذا بت ميلاد ذنبييييي؟
احجي وامسح بدموعي ما ادري شبيه وليش وعلى شنو ابجي ولي هلكد الغصه خانگتني اعاينله دار وجهه لهاسكي مسح وجهه ورد عاينلي گال بصوت ناصي وحسره
-تجين يمنه وبعد ما اگلج بت ميلاد؟
مسحت وجهي بعبايتي گبل بلحظة مقهوره لان ما اخذ من الزلاطة الثرمتها وهسه احس گـــلبي انترس حقد عليه وحتى حجيي تغير وياه عاينت لوجهه
-ومنو انتم حتى اجي يمكم؟ ماعندي اهل مثلاً.
-عدج بس مو اوادم.
-انتَ المو ادمي تروحلهم فـــدوه .
شال أيده يحطها على حلكه خازرني
طــروادة:: اششش ولي مناه يله.
مشيت خطوه ورجعت وكفت گدامه رافعه راسي واحاجيه بغضب وحقد
-اتمنى گيعانك گبل الحصاد بيوم تحترك.
ووي حجايتي شهگت موجوعة كضني من زندي بغضب يدفعني لجهة بابنه ويحجي بحرگه وعصبية
طــروادة:: وروح ابوي يا ريـــمه لو وصلتي للگيعان لا اخليج تعضين اصابعج ندم.
-ما اتندم على شي انه
-مو وياي انا اندمج وروح امي اندمج ابچيچ دم.
-هذا انتَ الراح يبجي دم
حجيتها وطبيت للحوش سديت الباب غسلت وجهي نشفته وطبيت للبيت امي بالمطبخ خازرتني يمها الاء وفرح.
أشرتلي امشي للغرفه مشيت واجت وراي سدت الباب وجرتني من أيدي كارصتني بغضب غمضت عيني كاضه بأيدها موجوعة
-انه مو كتلج لا تبطين؟
-مابطيت اجيت اجيت.
عافت ايدي خازرتي وانه امسح على مكان الكرصه هزت راسها تسأل
-شگالتلج؟
بلعت ريكي ساكته هزيت راسي لا احجي بخنگه وخوف
-نسيت أسألها.
فتحت عينها بغضب وبنفس اللحظة احس خدي اشتعل من الراشدي شهگت مصدومه چلبت بشعري تريد تطيحني للگاع وگدرت وانه حتى صوتي ما يطلع ساده حلكي بأيدها وبرجلها تدوس علي تنتر بغضب
ميلاد:: بت الچلاب عليمن وددديتج انه هاه عليمن وديتج.
فركت حلگي حييل ودفعتني من ايدها ضليت ممدده بالگاع اتنفس بقوة وهي تمسح ايدها بغضب دفرتني ببطني تغلط وطلعت من الغرفة غمضت عيني صوت نفسي ثگيل بالنص ساعة ضليت متمدده بمچاني الحد ما گدرت اوكف على رجليَّ وكمت صعدت فوگ.
"""
رغد:: التهيت وي امي انه ووهب نسويلها تمارين بالبيت بلكن ترجع توكف على رجليها بس هيه يوم عن يوم تتعب اكثر، مــاسه اول اسبوع بعرسها شحلاتها وثاني اسبوع تغيرت مالها خلك ما ترضى تحجي شبيها.
سلطان چم مره ودالي رساله بأيد هاجر علمود اروحله لشجرة التين ومارحت حسيت صــيهد شاك بيه ما ردت اروحن ويكضني.
وبأيد هاجر كتبتله ما اگدر اجي وهذا السبب يومين وودالي سهله ماضل شي، سكتت ما ادري لشنو مخطط
صــيهد وده على سيد عباس اخذه هوه والولد وراح حتى يصالح شيخ حيدر وشيخ حيدر گايل انا ما ارضى بالصلح الا تحدد عرس سلطان سيد عباس گايله
يمي خله عرسهم على شهر السابع وصيهد راضي، صــيهد بالعها وساكت بس من ردوا للبيت تعارك وي سلطان وسلطان سكت ماحجه حرف.
جدي وابوي من دروا تسودنوا يسبون بشيخ حيدر وبسيد عباس ما راضين وصيهد يطلع منهم ساكت حاير وما يدري شيسوي.
جــويريه من رادوا يعطلون علمود المراجعه صــيهد عافها على راحتها اكثر وكتها فوك بغرفة البنات امي كالتله دوم لا تحاجيها لا تشغل بالها خلها تركز وصدك عافها على مايها گام يأمر على بــدور وهيه تريد تبچي من وراه.
وتتوسل بيه اروحن اعتذر اصالحه بلكن يكفّ منها اضــحك عليها واغلس.
ندى ووهب كلساع الكفهم بمچان جنهم طيور الحب بس انه ورضا نگطع لحظاتهم الرومانسيه.
""
رنـــه :: اكره الوزاري واكره كلشي يخص الوزاري، مده مرت عفراء صارت ببيت وحدها وضلت بالشهر ونص ماجايتنا، وبريا من يوم الغلطت عليه بعد ما تراوه ولا انه طيرتله الحمامه كل ما اريدن اطيرها اذكر حجي عفراء وابطل.
طــروادة تعب حيل ما ضل شي لموسم الحصاد وهو عده محاضرات مهمه يركض بين الگاع والكليه، عطلنه علمود المراجعه وهوه مسويلي جدول اكعد من الخمسه الصبح ويكعد وياي حاره وتفرفح الروح اسبح واكعد ادرس، گبل الحصاد عفراء اجت، وشيخ حيدر هم خابر طــروادة گاله مالك غرض بحاصودة السلف انا اوديلك حاصوده
حتى نحصد گبل جدادي، وگبل لا نحصد بيوم واحد خابروا طــروادة بيت حمود توه گاعد يتعشى گالوله الحك كاعك جاي تحترك
ركض غاص باللگمه ارواحنا فرفحت عــفراء بصفحة تدعي وانه بصفحة مخلوبه روحـــي عليه نعاين للگيعان نشوف نار بس مو قوية چنها جمرية ، شويه وخابر عفراء يحجي بغصه
طــروادة:: ها عفره خويه
-وين صرت راحت روحـــي شني؟
-سلطان وسليم ملحكين عليها وصله محتركه لا يضل بالج .
سدت التلفون عفراء ول١٢ يله اجه واول ما طب للبيت گالها بحرگه
-ريـــمه اذا ما طبحت حظها شاربي مو عليَّ.
عــفراء:: ريـــمه يا هي مالتهاا؟
وهوه يتراجف من الحرگه ماحاجه عفراء طب بدل وخابر شيخ حيدر وداله الحاصوده وبدأ يحصد وطول ايام الحصاد عفراء ضلت عدنا تسوي اكل لاهل الحاصوده لان انه ما اگدر، وكل ما تفتح موضوع ريـــمه وتسأله يعصّب ويصيح
طــروادة:: بس اسكتي اسكتي لا تگليلي بريئه
ويعوف عفراء ويطلع من البيت محترك گلبه، وهيه ما راحت لمن كضه الحصاد وامتحنوا حسين وزهره يله مشت لبيتها، ضلينه بس انه وطرواده ما ممتحنين
""""
ريـــمه :: يختنك صدري وابجي بحرگه احلف لروحي والله مارحت لگيعانه وماحركتها وارد اسأل هاجر
-من گالوا احتركت وصله من گيعان طــروادة انه وين جنت؟
تأشرلي نايمه وانه ما ادري اذا رحت لو فعلاً نايمه.
من مشاكل بيتنا التخنگ عركات امي وي الاء ووي سلطان وكل دعاويها على ابنهم والاء تتسودن لا تدعين على ابني وامي تگابلها هي وسلطان وتگلها
ميلاد:: رررربي كون يحرك گلبك عليه يا سلطان لو اخذت رغد.
سلطان:: ادعي للصبح بشهر السابع عرسي شتسوين سوي.
ميلاد:: خوووش خوووش.
متحلفه بيهم والاء من جهه تجر فلوس من سلطان وترد ليوره يومين احس مالي نفس اتدخل بشي ووراها رحتلها الغرفتها اسمعها تحجي بالتلفون وتبجي ما فهمت شي دكيت الباب وفتحته سدت التلفون مسحت وجها ووكفت بغضب. سديت الباب مستنده عليه
الاء:: خيرررر؟
-باجر ترحين الاهلج لو احجي السلطان وعود سوي التردينه ما يهمني كليلهم شفتها وي كهلان شفتها وي غريب احجي التردينه أكيف يكضون عليَّ شي ويذبحوني والقرآن.
فتحت عينها مصدومه وانه احجي من كل عقلي دنكت تبجي وتحجي تتوسل
الاء:: ما اريدن اتطلك خاايفه على ابني خايفه لا يصير بيه شي من دعاوي امج، عفته الاحمد واريدن اضل وي سلطان ساعديني ريـــمه حاجيه لا تخلينه يتزوج.
تبجي بحرگة ومشت يم غيث مريض وهيه عبالها من دعاوي امي مصخن لان يزحف يروح للحوض وكلساع يتبلل ومره ماتدري بيه وراح للدرج يزحف بس طاح من اخر بايات گامت تخاف تحس دعاوي امي هيه السبب.
سكتت بحيره عفتها وطلعت.
""""
رنـــه ::بأول امتحان كلساع اتخربط واثنينهم مگابليني طــروادة وعبود حايرين بيه الكهرباء طافيه طــروادة يهفيلي بكارتون وعبود يقطلي الاقلام ويحضرلي البطاقة، ونطلع انه وطرواده سوه وصلني للمركز الامتحاني نزل وياي خايف عليَّ. حاطلي بالمحفظة جكليته ويوصي
طــروادة :: على كيفج ولا تخافين اقري سورة الفاتحة آلام البنين واقري الاسئلة بهدوء خوش.
هزيت راسي اي هو راح للكليه وانه دخلت للأمتحان ومو بأيدي هوه اول يوم اكضيها خوف لمن انطوه الاسئلة قريتها كله مره وحده وشفت روحـــي اعرف كل الاجوبة ماعده فرح ونقطتين كيفت حليت بس تعبانه گـــلبي يدك حيل وكهرباء ماكو الحر اخذ روحـــي.
سلمت الدفتر وطلعت لباب المُدرسة لا عبود ولا طــروادة لگيتهم، وانه روحـــي رايحه مو مال اضل واكفه، واندل الطريق لبيتنا مشيت والشمس تصگع بيه گـــلبي ضل يدك حيييل من الحر
امشي مدنكه واسمع وراي هورن ماشلت راسي ابد والسيارة شويه شوية تصير يمي لحد ما سمعت صوت عفراء درت وجهي اعاينلها حماها يسوق وهيه كاعده ليوره شمس بحضنها ومنزله الجامه
عــفراء:: تعااي رنـــه
عاينتلها ايدي على گـــلبي عاينت لمازن أشر براسه اصعدي درت وجهي على صوت هورن ثاني واشوفنه بريا جاي بسيارة ســليم هوه جاي ومازن رايح صاروا وجهه بوجهه بريا خفف يمنه نزل الجامه وصاح
بريا:: تعاي.
ومازن دك هورن من جديد عاينتله خازرني ويأشر بعيونه اصعدي
شكرا لزيارتكم عالم روايات سكيرهوم
