 |
رواية الابواب الخمس الجزء الثاني الفصل الثالث والأربعون بقلم ريام الهادي
توها بردت ، وانتي مريتي رصاصة !
خايف تروحين ..
واذبل والعطش يترس مكاني
وخايف اشرب روحتچ وآخذلي ليل وما اتاني !
هاي الية سنين بارد ..
محد بملگاه چواني
وره يومين اجاني تلفون من بان ترجف شبيج
بان : خابرت مرتضى اطمن عليه لكيته يلهث ومستعجل وهو يتراكض يكول ابوه وعمو عبيد لازمين يونس ومتعاركين وياااه يم المحل ومكسرين الغراض وسده مفهمت يونس شصار بيه
ناي : شتكولين وهسه همه وين
بان : ماادري كلشي ناي خابرتج حتى ادزين رجلج اخاف يسون شى ليونس ومنتلاحك عليه
ناي :خلي اروح اخابر مهدي سديته واني قطره دم مابيه ذوله جلاب خاف يأذون اخويه خابرت على مهدي واني اختض من الخوف
هااا مهدي عفيه الحك
مهدي : شبيج ناي صار شى
ناي : هاي بان خابرت تكول عبيد وجوحي رايحين ليونس ومتعاركين وياه ومدري شصار فدوة اروحلك روح ليونس اخاف يأذوه
مهدي : رايح لتخافين
ناي : انت هم ديربالك
مهدي : هااي شبيج جبانه قابل شيسون تلكيهم محروك دمهم على البيت واجوي يهوسون ويرحون مابيدهم شى
ناي : طمني عفيه
مهدي : ان شاء الله
شرهب : شكوو صوتج عالي طلعت اركض من الحمام
ناي : عمامج الجلاب متعاركين ويه يونس
شرهب : اياا زباله وشصار
ناي : شمعرفني خابرت مهدي يروح ومرتضى هم رايح يارب سترك مابينا حيل هبطات
يونس : جنت بلمحل اشتغل ها الايام حركة زينه نعمه والسوك ماشي وضعي مستقر كاعد ابيع ساعه عصريه ومصطفى العامل ويايه يرتب وهم يبيع للجهال طب عبيد وجوحي وصالحه وياهم استغربت جيتهم وكفت بدون لا سلام ولا كلام عبيد لزمني من ملابسي وخنكني وبصوت عالي كدام الناس
عبيد : اسمع لك باجر من الصبح تروح تتنازل عن البيت لا ساعه وحده مااخليك تشتم الهوا
يونس : دفعت ايده وكتله عيب منا الناس امشي نروح للبيت نتفاهم هذا مكان رزق والرايح والجاي يباوع علينا
صالحه : هو انت تعرف العيب صاير خير براسنه ولك بكت بيت يسوه ٣٠٠ مليون وتحجي عن العيب
يونس : استغفر الله انتي شكو جايه وياهم لو هاي الحمايه مالتكم
جوحي : انجب كواد عبالك نسكتلك على البيت تقشمر امي مره جبيره وتخليها تتنازل اذا مترجع البيت
يونس : شسوي هاااا احجي شسوي عبالك بعدني يونس الصغير الي تلزموه الباب ويسكت ويطلع واخاف منكم
عبيد : اسمع يونس بله حجي زايد البيت يرجع النه لتصير حرامي وتاكل حق عمامك
يونس : مااكلت حق احد كتلكم ابيع البيت واطيكم حصتكم من البيت وانتم ماقبلتو
صالحه : هااي البقت تنطينا فتافيت الفلوس وتاخذ الهبره الجبيره لحلكك الجايف انت وخواتك العايقات الدايحات بلشوارع
يونس : حجايه ثانيه على خواتي انسه انتي مره لتخليني اطلع من طوري ونصي صوتج منا الناس والمحلات اذا انتي ماعندج مستحه وخجل ورجلج جاي متحامي بيج وجايه تعيطين حجايه ثانيه اسحلج منا وانسى انتي مرت عمي
عبيد : اي يله مد ايدك عليها حتى افصلك واخليك تجدي حتى تجيب الفصل
يونس : هيه وينها العشيره نسيت ماعدنا احد لو جاي تبيع سباعيات براسي روح عمي واخذ مرتك واخوك تردون تحجون مثل الاوادم بدون فضايح تعالو للبيت ونتفاهم وخلوني اكمل شغلي
عبيد : مجاي اتفاهم جاي اكلك باجر تروح تتنازل ويرجع البيت وانت بلذات مالك حق طابوكه بهذا البيت واذا امي اخرفت وتنازلت احنا بعدنا بعقلنا ومانرضى تعبنا وفلوسنا ورثنا يروح لواحد مثلك بتفله مااشتريك صاير رجال براسنا تالي وكت لك جنت توكف كدامي تريد تحجي متعرف هسه نافخ نفسك وتحجي وتوزع بكيفك مو هو ورث ابوك
يونس : استغفر الله لهسه ساكت ومااريد اطول لساني ومحترم كون انتم عمامي وكبار بلعمر مصختوها هوايه كتلكم تردون حقكم مستعد تنازل مااتنازل والبيدكم الكم ماامشي بتهديد وعياط وهوسه
صالحه : اي عيني صار بيدك شويه طحين وكمت تحجي بخشم الله يرحم وكت مجنت ادور بلزباله وريحتك تكتل حتى تلم الالف والالفين صار عندك محل وفلوس واكف بكل عين صلفه بوجهه عمامك هم بايكهم وهم مراضي ترجع حقهم
يونس : على اساس رجلج ورجل اختج جانو مدراء عامين متسكتين لخاطر ربج
رجع لزمني عبيد لك شو انت مو بعينك احد
يونس : اي مو بعيني احد واطلعو بره ورايه شغل
جوحي : هذا الشغل موو
لزم جوحي وجر قوطيه المعجون جانت على الرف اثنين وجان يشمرهن على الجام تفلش واني گلبي احترك كله ولا المحل
لزمته حييل وركعته بلحايط ردت افلش وجهه وهو منا مريض كوه سيطرت على روحي وكف بوجهي مرتضى زحمه اضرب ابوه دفعته حييل وكع على ظهره جان يضربني عبيد خطف على خشمي شاغت روحي ضربته حيل اذتني احس خشمي انكسر وهاي صالحه اهجمي على المحل وشكووو شى كدامها اكسري ومصطفى يجر بيها وعياطها خله اهل المحلات كلها تطلع متحملت بعد مابيها مجال صار عبيد كدامي لزمته ودك على وجهه نومته بلكاع ودك ملخته تملخ حتى نسيت هو عمي ميصير اضربه جوحي كام ويضرب بظهري ماادري شنو بيده ملخه الظهري واني ماعفت عبيد ولا كمت لحد ماوجهه انترس دم واهل المحلات كوموني سحل منه دفعتهم وركضت على صالحه جريتها من عبايتها ولوما الزلم لزمت ايدي جان ضربتها فقدت واني اشوف غراض المحل بلكاع شى مكسر شى واكع على شى وخابط على جام الواجهيه الي كسره جوحي
التمت الناس واني اعيط عوفوني مجموعه لازمتني ومجموعه تكوم بعبيد الوجهه انترس دم ويجرون بصالحه الي ماسكتت وهي تسب وتغلط
صالحه : لدافعون عليه متعرفون هذا واحد حرامي قشمر بيبيته واخذ بيت منها يسوه ٣٠٠ مليون وحرم عمامه من الورث ميخاف الله اكل مال يتامه
مرتضى : ذوله منو اليتامه
صالحه : الله جابك تعال شوف العايف ابوك علموده وعايش بسده ويقشمر بيك ضرب ابوك ودمه عمك
مرتضى : انتي شجابج وياهم
صالحه : هذا الحارك حمامك شجابني وياهم مكان متضربه وتربي لان مد ايده على ابوك
مرتضى : صوتج منا الزلم
يونس : طلعهم منا مرتضى لا وروح الغالية اذبحهم بيدي وصلت وياهم لاخرها وبعد مااتحملهم حجايه زايده انسى الدم البينا واكتلهم بيدي وطز بكلشي انسجن عادي قابل جديده عليه
مرتضى : امشوو روحو للبيت شسويتو لخاطر الكعبه متكعدون راحه اكص ايدي اذا مو انتي دافعتهم
صالحه : من اكلك كديش تزعل ادافع لهذا وابوك وعمك واني خالتك تنطي بينا مع الاسف انت ابن اختي
مرتضى : تقرب منها حتى لحد يسمع
هي وينها اختج مو هيه العافتج وراحت لو نسيتي انطيني شى عدل شفته منها ومنكم اخذي عمامي مثل ماسحلتيهم وجبتيهم وسويتي مشكلة شكبرها
صالحه : مانتحرك منا اله ناخذ حقنا
مرتضى : روحي اخذي حقج من رجل سما من اخذ بيتكم ومن اشواق ضرتج ومن اختج من فلتت بلملايين يله تجين ادورين حقوق من يونس روحو احسن مااحرك يونس عليكم واخلي يشتكي ويذبلج رجلج بلسجن وتضلين تركضين وراه
طب مهدي يركض
مهدي : خير شصاير هنا
صالحه : خوش والله صايرين عصابه بعد روح جيب عشيرتك خلي ادافع لهذا السگط
جوحي : عقل ابن عمتك وخلي يرجع البيت
يونس : اباوع اهل المحلات البصفي كلها واكفه وتتفرج كتلهم رحمه الله والديكم كلمن يروح لمحله مشكورين كال واحد منهم رجال جبير
عمي اخاف ترجعون تتعاركون
يونس : منتعارك رحمه الله والديكم كوه فضيتهم اريدهم يرجعون لمحلاتهم صرت فرجه الهم اباوع عبيد بعده يخر دم وكاعد بلكاع ميكدر يكوم وصالحه ولا دايره بال اله تعيط وتغلط وحايره بيه
مهدي : يابيت
صالحه : مبين متدري عيني متدري مرتك واخوك قشمرو بيبيتهم واخذو البيت
مهدي : محد مقشمرها الحجيه من وحدها تنازلت وليش جاين ليونس عدكم حق روحو عاتبوها هيه
صالحه : مره جبيره مخرفه راسها من رجلها ماتندلها تريد نروح نعاتبها على شنو وهذا الحرامي اخذ ورثنا
مهدي : يونس مااخذ اي شى منكم واذا عدكم حق ذيج المحاكم وداعو تدرون جيتكم هسه اذا يونس يشتكي عليكم يبيتكم اليوم بلحبس حتى انتي لا عبالج تفلتين وبشهاده الناس انتم تهجمتو على محله ويخليكم تزوعون كل خساره صارت بسببكم عدكم حلين ياتبقون تعيطون وتتعاركون ونخابر على الشرطه ونحلها يمهم ياتاخذين ذوله العطلات اليمج واطلعين
جوحي : وانت شكوو شدخلك رجال غريب شعليك بينا
مهدي : نسيت نص البيت بأسم مرتي وهااا مرتي راح تتنازلي عن النص وراح يصير بأسمي اذا تحبون تتعاركون هله بيكم حتى احظر نفسي وعشيرتي واعرف شون ارجعكم تلمون عتيك
يونس : عوفوهم خلي يرحون يله بره وهلمره خربت وجهك مره ثانيه تصير صدك موزينه شيلوني من راسكم وتذكرو يونس الصغير گبر وميخاف والشافه منكم ومن غيركم موت گلبه وماعنده شئ يخسره لتندكون بيه
صالحه : اذا انباع البيت تعال اتفل بوجهي اله اخليك تروح وتجي تباوع عليه وميت حسره اني اخلي ولد ذكرى يتهنون بيه اله اني جوه التراب
يونس : ذاك حايط واركعي راسج بيه سوي التردي وخلي بالكم بعد دكتكم هاي حصه بعد مني مالكم وبيكم زود اشتكو تعاركو اغلطو بلي يعجبكم واذا على المحل اخاف يلعب الشيطان براسكم وتحركوه او ادكون دكه دونيه عادي تردون هسه اشعله واحركه بيدي يطبه طوب عندي البيت بفلوسه افتح سوبر ماركت مو محل صغير
مرتضى : يله يابه وانتي خاله ساعديني نكوم رجلج مبين الضرب خلاه يخرس وشوفي ينكث دم امشي اخذك لمستوصف
عبيد : وخر لتلزمني انت انكس منه شوف شواعدك وطابك وياه حرامات هذا ابنك
جوحي : ماعندي ابن هذا على امه ناقص وحرامات الربى والتعب بيه
مرتضى : ماكدرتو على يونس فريتوها عليه كوم شووو يله
عبيد : كتلك عوفني
مهدي : يله اطلعوو واياكم اشوف واحد منكم يوصل لهنا اني روحي واصله لخشمي واريد اذب حرگتي بواحد لتصيرون كدامي حتى لتاكلوها
صالحه : خوش محامي حطتك جوه اباطها بت ذكرى منو امها جانت حاطه اثنين زلم واخوه خلت واحدهم يريد يذبح الثاني
مهدي : عمتي تاج راسج وراس عشيرتج وعشيرة رجلج وخري من وجهي لا ابتلي بيج
مرتضى : يمعودين كاافي شوو امشوو
طلعهم مرتضى وصالحه ماسكتت هلمره بلباب كامت تعيط هذا حرامي الله لا يوفقك عساها الفلوس نار تاكل بيك وبخواتك مال حرام ركضت عليها ولزمني مهدي
مهدي : عوفها هاي وحده لسانها زفر ومتستحي شتحجي وياها راح ترد الكلمة بعشره لو رجال هسه اخلي وصلتين بس مره واذا أذيتها راح يحطون الحق عليك
يونس : كعدت بلكاع اباوع على الجام والغراض المطشره بلكاع حطيت ايدي على راسي الراح يطك من الوجع من وره الضربه
مهدي : فدوة الك اني اساعدك ونرجع المحل وحتى اذا تريد انظفه وياك
يونس : مشكور انت منو گلك
مهدي : ناي خابرت ترجف وخايفه عليك بت عمك مخابرتها
يونس : حتى مرتضى شمدري
مصطفى : اني كتله من شفتها انلاصت
يونس : شوف شنو الخرب ذبه بلزباله والمابي شئ رجعه واكتب بلورقه شنو الذبيته هاي المله بس الاذيه استغفر الله العظيم
مهدي : كوم ارجع للبيت وارتاح واني ابقى ويه مصطفى
يونس : مشكور مقصرت ماعندي شى زين طمن ناي اكيد راح تضل خايفه لتروح تتخربط
مهدي : راح اخابرها تره من كلت كدامهم ناي تسجل حصتها بأسمي حتى اسكتهم مو شى ثاني
يونس : اعرف
مهدي : كوم غير جوو مبين وضعك مو تمام واخابر عبد ونطلع
يونس : مااكدر اطلع واعوف المحل
مرتضى : هااا ابن العم مسوي الجماعه تشريب شجاك
يونس : اني ماضربت ابوك لخاطرك تره صالحه جذابه
مرتضى : لتهتم كلمن يحير بروحه وهمه جابو الاهانه لنفسهم الله يصلح حالهم ولو اشك بس يله ماعدنا غير هذا الحجي نقنع بيه روحنا منو كسر الجام ودمر المحل هيج
يونس : ابوك بداها كسر الجام وخالتك نهتها
مرتضى : شكد صرفيات الجام عليه واني اساعدك بتركيبهم لتجيب احد اعرف اركبهم
يونس : انت شعليك تصرف اني راح اشتري وانت ركبهم
مرتضى : ماطول ابويه الكسرهم اني اشتري
يونس : كتلك مااخليك اني اشتري واذا تريد تساعدني رگبهم اليه
مرتضى : ميصير والله
مهدي : يمعودين اني اشتري بس فضونا
يونس : مشكورين وكفتكم حلوة وماانساها
مهدي : امشي ويايه نغير جو اني هم مختنك صار مده طويله مطالع
مرتضى : روح وياه واني ابقى يم مصطفى انظف ونكمل كلشي
يونس : وشغلك
مرتضى : اجلته على باجر وماعندي شى يله اتوكل
يونس : طلعت ويه مهدي لان منظر المحل قهرني وكل مااباوع اثور واريد اروح ادميهم صعدت ويه مهدي وخابر على عبد تواعدو بمنطقه ولكيناه واكف صعد ويانه
عبدالرحمن: شعجب سوه
مهدي : ضايجين وكلنه نطلع
عبدالرحمن: وين تودينا
مهدي : على مكانه
عبدالرحمن: لا مااريد اروح اله ودينا لابو نؤاس على النهر
مهدي : ليش
عبدالرحمن: اذا اروح هناك اختنك واتخبل مكان صلاح وتدري من يطبكن براسي اسويلك مصيبه بهاي المغربيه
مهدي : هذا هو نروح لابو نؤاس
يونس : خابرنا ناي وطمناها وصلنا وكعدنا بكازينو ونزلو الولد نراكيل وعصاير واني وياهم واحدنا صافن وزهكان منعرف بشنو نحجي
عبدالرحمن: مهدي نضل هيج
مهدي : خير
عبدالرحمن: اني الليل ماانامه لهاي اللحظه الكاتل مسلموه
مهدي : لتتهور بروح صلاح منريد نرجع للمربع الاول
عبدالرحمن: نار وشابه بيه ذاك يسرح ويمرح واخويه جوه التراب
يونس : ولو الشغله متعنيني اسمحلي ادخل من راح تگتله وبعدين
عبدالرحمن: ارتاح احس اخويه دمه ماضاع
يونس : والي راح ينكتل وراك دمه بركبت منو
عبدالرحمن: منو ينكتل مفهمت
يونس : اكيد اهل الراح تكتله ميسكت مثلك
وراح يندك بعشيرتكم مره ثانيه حتى ياخذ ثاره الراح يموت برگبت منو اكيد برگبتك ويجوز البعده مهدي حتى يحرك گلبك او ابوك شحصلت بذاك الوكت انت يااما ميت او مسجون وراح يصير گبرين صلاح وعزيز ثاني على گلبك وياه يعني خسارتين سالفه العشاير متخلص وتجر وماطول ادخلت عشيره ثانيه وتحاول تسلم الگاتل اصبر حتى لتضيع روحك ولا تضيع روح ثانيه وراك
عبدالرحمن: متعرف صلاح شنو بلنسبه اليه
يونس : اعرف كلش زين اكثر من اخوه وگلبك محروك عليه بس تصرفك ميجيب غير الخراب وانت بعدك شاب وراك عمر لتضيعه وتأذي غيرك لتزيد الخسائر على عشيرتك او على ابوك
عبدالرحمن: انت هم بعدك تحب ابويه بعد كل السواه
يونس : ابوك صاحب فضل عليه وبس ابن الحرام ينسى فضل الناس عليه وكفاته حلووة
عبدالرحمن: ودكاته احلى
يونس : كلمن وقناعته وهو رجال وحر برأيه اختلفنا صحيح بس مو معناها اقلل من احترامي اله يبقى اله هيبته ومكانته
مهدي : اسمع كلامه وانت ابوك ويوميه عركه وياه
عبدالرحمن:اذا فلت الساني اخرب الكعده كلها انت تعرف على شنو عركتي وياه
مهدي : من انت وصغير ومشاكلك تجر انطيني مره اتصافيت وياه
عبدالرحمن: هو يدوس بطني ويريد يمشيني على مزاجه يشوفني متلوع ولا يدير بال واخرها دكته بسالفه
يونس : سكت عبد عرفت سالفه شرهب
من رخصتكم شباب اكوم اشوف شغلي
مهدي : بعد وكت وين رايح
يونس : ورايه شغل
مهدي : خلي اوصلك
يونس : لا ميحتاج اني ارجع طلعت فلوس حتى ادفع حسابي مقبلو وضلوو يحجون ومالي مزاج انطي واخذ وياهم تشكرت منهم واخذت تكسي ورجعت للبيت وحدي
مهدي : لسانك دوم متبري منك
عبدالرحمن: ماحجيت شى شگلت ليش تغشمون روحكم ردت شرهب وابويه معاند
مهدي : مو خلصت سالفتها
عبدالرحمن: بت الگلب بعدها معشعشه براسي كل الديصير بيه وهي مراحت من بالي اريد الزمها هيج من كفشتها واشبعها كتل ودك بلحاييط اركع راسها وحلكها افركه بيدي اكسر سنونها بحلكها ولسانها اطلعه واكصه هذا المنشار الي كل متشوفني تغثني كون اطلع حرگتي منها وراها اكول الها يله ولج روحي مااريدج
مهدي : متأكد تكول
عبدالرحمن: بوخه بعرضي ولا ادبرها هاي اذا ماحضنتها انعل ابوها لابوها عشيرتها شكد سايحه بروحي
مهدي : واني كلت خلصت وكعد ادور على مره
عبدالرحمن: تدري انت هم ناقص هاي العائله ولا واحد بيها خير
مهدي : شبيك ارعن
عبدالرحمن: كتلك الزم خالك واحجي وياه
مهدي : جم مره حجيت حتى صلاح الله يرحمه حجه وياه
عبدالرحمن: مهدي كوم
مهدي : وين
عبدالرحمن: اريد اروح لصلاح مشتاقله
مهدي : خالي ميرضه نوصل لديالى لحد متفض
عبدالرحمن: واني ماانتظر خالك تجي لو لا
مهدي : اجي امري لله اخابر ناي وابلغها حتى لتنتظر
ناي : طمنوني على يونس جان گلبي نار عليه وكال مهدي راح اخذه ويايه
شرهب : بشري
ناي : فضت
شرهب : غير ينباع البيت ونخلص
ناي : كدامج مفتره حيه بيه ولا دينباع
شرهب : قصدج مفتره صالحه بيه شوفي شسوت وخلت ولا شراي يجي عليه
ناي : طول عمرها مؤذيه خلي اخابر يونس اطمن عليه
ادك عليه ميجاوب
شرهب : عوفي براحته اكلج اني داخله اقرا
ناي : اني هم عندي امتحان قريتي سيف
شرهب : اي عيني قريت ابنج المصون وركعته راشدي لان وكح ويريد يلعب
ناي : على كيفج وياه
شرهب : تردين تعاي انتي قري تعرفين بيه مستعده امسح البيت الفوك والجوه واخبز ١٠ مرات بليوم ولو مااعرف اخبز ولا اقري ابنج ورغم هذا كعد ادوس على نفسيتي المجعوصه واقري لاتتشرطين عليه
ناي : هذا هو سكتت ابتليت حجيت خلف الله عليج ادرسي واضربي براحتج
شرهب : اي هيج جري عدل
ناي : جريت عمي جريت
رحت اقرا وخابرني مهدي وكال ابات يم عبد لان اخاف يسوي شى اقفلو الباب عليكم وصيته على نفسه وكلت لشرهب حتى تاخذ حريتها بلبيت لان مهدي ميجي يبات بره
اندكت الباب ساعه ٩ بليل صحت منوو
حوراء : اني
ناي: مشيت مكيفه لان حوراء صعدت وفتحت الباب شفتها حضنتها حيييل كامت تبجي
حوراء : مشتاقتلج هوايه
ناي : مو بكدي تعاي طبي
يمه هلا بجنتي شنو هذا الحسن ولج تخبل اللهم صل على محمد وآل محمد لا عيني هاي اخذها لابني
حوراء : اخذيها من هسه
ناي : كعدنا وصحت شرهب
شرهب : خير المن ادرس بعد هاااي منوو
حوراء : الهاربه عبر القارات
شرهب :كلت وديد متخليج تصعدين رابطتج جوه
حوراء : كوه اقتنعت اصعد اكلت راسها صار جم يوم وخابرت مهدي حتى يخليني اصعد وصعدت غصب عنها وراح ابات يمكم لان عرفت مهدي ماكو
ناي : اي ياريت هله بيج
شرهب : كمت حضرت العشا وتعشينا
شلت الصينيه وهذا الوكت كله نضحك وكال الجهال وحجت الامومه طكت روحي اريد اعرف شصار بحوراء طفرت جبت ماعون فاكهه وكعدت تربعت كبالها وكتلها حوراء
حوراء : هااا عيني
شرهب : شلونج ويه عبدالله وشرجعج طفت ضحكتها واختفت
ناي : عوفيها على راحتها
شرهب : اوكفي خلي نفهم
حوراء : منين تردين ابدي
شرهب : من المكان الي تحبي
حوراء : من يوم الدخله من وكفت امي وكالت اله انت مو رجال اذا متجيبلي بياضها
ناي : عزة امج هيج كالت
حوراء : جانت حاسه مراح يصير شى بيني وبينه او هو نفسه انسدت من عندي من عرف بعلاقتي بيونس
شرهب : ماشاء الله شون عاد هو حسيس اكيد ولا اهتم
حوراء : اجذب عليج اذا كتلج مدار بال بلعكس اجت مرات احسه يكرهني
المهم اخذني غصب بعلاقه اقل مااكول عنها حيوانيه حتى يرضي رجولته ويرضي امي الي ماسكتت وهيجته عليه تكول عبالك مو امي ضرتي عمتي الشهاده لله عمتي ام عبد ماسوت سوايتها المره بقت ساكته وضلت تكله براحتكم امي الضلت ترجف وتريدها بنفس اليوم
شرهب : خافت ليعوفج رادت تثبتج كوه
حوراء : وهو هذا الصار ومرتاحت اله شافت بياضي وحتى بلخير ماكالت ولا طبت شافتني ميته سابحه بدمي شافت بياضي ودارت وجهه وراحت تكفلت سدره وامها الله ينطيهم العافيه وبقو ويايه لحد ماسافرت وره يومين لان معاملتي كامله وصلت هناك
اول متوصلين جمال المكان ونظافته وطبيعته تسحرج غصب عنج بس بمرور الوقت من تتعودين ويوميه نفس المنظر تشوفي راح تملين كمت انتبهه على شغلات جنت غافله عنها عبد الله يتعامل برود ويايه
ناي : مثل مهدي اول ايام زواجنا
حوراء : هنا الحال يختلف مهدي مجان يكرهج متقبلج كزوجه بس بارد هذا حتى ميباوع بوجهي وينام بغرفه وحده ويعوفني بلساعات وحدي بلشقه يفتح الثلاجه ويفتر بلشقه النواقص يأمنهن ويطلع حتى ميسألني شتردين
شرهب : وشون بقيتي وياه
حوراء : وين اروح واني بلد غريب مااعرف احد بيه ولا اعرف حتى لغه واذا نزلت باب العماره اتيهه
ناي : وتالي
حوراء : بقيت بلشهرين ميطخ شعره مني الكرسي يستفاد منه تصوري اكل مياكل من ايدي
شرهب : المن بعد مبقيج يمه
حوراء : لخاطر خالي عبد الله حيل يحب ابوه وميكسر كلامه عكس تماما عبدالرحمن ذاك طكه ونص ابوه شيكول يسوي العكس
شرهب : يمه فديته
حوراء : هههههه هااا وكعتي
شرهب : احد گلج جنت اركض عوفج مني وحيري بمصيبتج كملي
حوراء : عشت وياه ايام اتعس من التعاسه يطب ويطلع ميحجي ويايه واذا حجه على كد السؤال والجواب
ناي : اخاف عنده وحده
حوراء : عنده اصدقاء وصديقات هوايه وضايعه متعرف رجلها من حماها لحد ما مره زهكت وكمت ابجي واعيط رجعني للعراق ماابقى وتعاركنه عركه معدله واول شى كاله اليه من تعصب موزين رضيت بيج وانتي مصادقه وتحبين غيري
شرهب : وسكتي
حوراء : اني كتله عفت وحده سنين تلفون متشيل عليها وتسرح وتمرح هنا شتريد منها تحط ايدها على خدها وتنتظر حضرتك واني ماسويت شى حرام حبيت وراد يخطبني وانت شفت شون ذب روحه للموت علمودي وحجابه مني على منه ضربني
شرهب : انكسرت ايده
حوراء : مثل الحيوان المحبووس ينتظر شوكت واحد يطلق سراحه حتى يهجم على كل واحد أذاه هيج صار لزمني ملخني خلاني اصيح التوبه اذا افتح حلكي
ناي : وليش مبلغتي مهدي
حوراء : خابرت امي عود اشكيلها اسم الله هلمره تكلي حيل بيج خلي يربيج تلكين متجاوزه عليه وخريط هوايه لبستني الغلط كله وكالت اذا تخابرين اخوج اكوله لزمها تخابر يونس واخلي يطيح حظج بلزايد
شرهب : هااي شنو امج متخاف الله مو مره ابليس ياخذ دورات تقويه يمها اخويه شعليه شصار وذبتها براسه
حوراء : وبقينا بحرب اني وعبد الي فرق كام يتقرب مني ويمارس حقوقه الشرعيه ويعوفني يعني لمزاجه ومتعته وبس
ناي : وشون كدرتي تتحملين
حوراء : تحملت وجرعت المر وكلت ميخالف هاي قسمتي السوده لحد ماعرفت حامل ردت اسقطها من حركت گلبي بعدين كلت هاي هديه من الله يجوز من تجي للدنيا يتغير حالي وضعي هو يتغير
ناي : معرفتي عنده حبيبة او على علاقه ويه وحده وهيج يسوي
حوراء : كتلج مااعرف شئ عنه ومن يطلع مااعرف وين يروح ودراسه وطلعات ونسات واني بلشقه معلكه
شرهب : طير محبوس بقفص من ذهب
حوراء : وكله شوك من يطخ حياطين القفص ينزف دم
شرهب : وشون قبل ترجعين للعراق
حوراء : ردت ارجع من زمان بوفاة صلاح وهو مقبل توسلت ردت قفل بحجه الصغيره يتغير الجو عليها وتتمرض الشى الوحيد الي حسيت بتغيير هي ماسه كلش يحبها روحه معلكه بيها مرات مينام اله يحطها بصفه وينام لهذا رفض ارجع لحد مايدفه الجو
وبس دفه حجزلي واكد عليه ١٠ ايام وارجع لان ميكدر بدون ماسه
ناي : وشراح تسوين
حوراء : ماارجع لو يموت معودت عفته
شرهب : العب راح تصير ركع بلمواعين
حوراء : تعبت منه ومن عيشته ومن أذيته اني والماكو سوه اشوف الكره بعيونه ومتحمله ماسمعت كلمة طيبه منه ولا يوم شفت منه حنان حتى من اتمرض ولا يدير بال خلاني اكره كل ساعه شفته واتزوجته بيها
ناي : امج تقبل تضلين هنا
حوراء : متعرف عبالها زياره ورايحه خلي تخلص ال١٠ ايام وخلي تتفاچئ
شرهب : وداد مراح تخليج تبقين
حوراء : اقنع مهدي لازم اطلك مااريد ارجعله هو العمر مره وحده اذا ارجع معناها حكمت على نفسي بلموت
شرهب : تتوقعين يجي من السفر حتى ياخذج
حوراء : لخاطر ماسه كلشي يسوي كتلج روحه بيها يعني ورايه حرب عظيمه شنو نتائجها مااعرف
ناي : بقينا الليل كله نسولف على وضع حوراء لحد مصاح الله اكبر صلاه الفجر توضينا وصلينا وكل وحده من عدنا نامت ساعتين وكامت لان ورانه دوام وبقينا حوري فوك كالت ترجعون تلكون الغدا جاهز راح ابقى يمكم
شرهب : رحت للكليه واخذت المحاظرات اني مماخذه خط اروح نفرات للدوام لان الخطوط اكثرها مقبطه اخذت واحد بدايه السنه وماالتزم وبطلت منه وبعد مالكيت خط وعايفه اعلان اذا اكو مجال بخط يوصل لمنطقتنا لهذا اروح واجي متبهذله بلنفرات ومااصعد تكسي وحدي
وماشي الحال
واليوم نزلت من الكيه براس الشارع مسافه مشي للبيت والشارع هادئ ودنيا ظهر ولازمه كتبي وجنطتي واسحل بروحي وداكني الجوع اريد بس اوصل فاتت سياره من يمي عاليه بيها اثنين ولد شباب ذبو حجي مهتميت اعرف هواي بلشارع هيج نماذج تعبانه
كامو يرحون ويجون من يمي واني عيني على الطريق ومااجاوب وهذا يكول اروح فدوة للكيرلي والثاني يكول مريام فارس تروحلج فدوة انتي جسمج احلى منها انياله ... وبدو يطوخون بلحجي لعبت نفسي حييل وانداريت انتم متستحون ماعدكم عرض خوات وكفو السياره والجام نازل واحد مطلع راسه جنهه قرد
كال لا ماعندي ولو عندي هيج اخت حلوة اله اكلها خلاني اريد الزمه انعل اهله عطت بيه طبكت سياره سريع اباوع عبد الرحمن بسرعه جمدت
نزل من سيارته وتوجهه عليهم
عبدالرحمن: صاير شى خيير شبيهم ذوله
وانت شكوو
عبدالرحمن: هاي خطيبتي
هاي الافلام قديمه مال خطيبتي
عبدالرحمن: اصعدي
شرهب : اشرت براسي مااريد اصعد خزرني وعااااط اصعدي
تحركت مثل الحبابه وفتحت باب سيارته وصعدت ذاك شكال بيا شقه راح تتونس وياها حتى نجي نساعد لو عبد تخبل فتح باب سياره الولد وسحب سلاح من ظهره وحطه براسه اني صرت مثل النعامه اريد اطم راسي وين وبنفس الوقت خفت لا يكتله هذا عصبي ذاك كام يمتمت
عبدالرحمن: اونسك زين بلگبور
كام وضربه براسه بطرف السلاح ذاك عاط ونزل صاحبه خايف ويكول اله عوفه رايحيين
عبدالرحمن: اذا شفتكم بهذا الشارع ارجعكم لامهاتكم مكمطين بلجفن
صعدو وشخطو سيارتهم وراحو من وجع بگلبهم مسوين نفسهم رياجيل ويتحارشون ومن شافو السلاح خافو صارو فار وبس يردون يرحون
هم تحركو اني فتحت الباب اريد انزل جان يدفره برجله ورجع سده
عبدالرحمن: ويييييين
شرهب : لتعيط
عبدالرحمن: اعيط واكسر راسج المن طالعه بهاي الظهريه وحدج
شرهب : جنت على الكورنيش اتونس غير بلدوام
عبد: والخط مالتج وينه
شرهب : بطلت من زمان من عنده اريد انزل مبقى شى للبيت خطوتين
عبدالرحمن: واني اوصلج
شرهب : ماله داعي البيت قريب
عبدالرحمن: هاي يوميه هيج الرايح والجاي يتحارش وحضرتج واكفه تتعاركين
شرهب : لتعيط رجاءاً ومتصير هيج حالات حظي خلاني بهيج موقف
انت شنو هذا حالك اباوع مترب
عبدالرحمن: جنت بلكبور
شرهب : لا والله وين جنت
عبدالرحمن: متشاقي قبل وياج جنت يم صلاح
شرهب : الله يرحمه لعد مهدي وين مو كال بايت يمك
عبدالرحمن: اثنينا جنه يمه ورجعنا قبل ساعه ومهدي راح للشغل
شرهب : وهذا مو طريق بيتك المن جاي
عبدالرحمن: اجيت حتى يحترك دمي اكثر ما هو محروك
شرهب : انت ليش شايل سلاح
عبدالرحمن: العب بيه بلي
شرهب : اهووو ما اسأل بعد سكتت ثانيه وحده وكتله شون اطلع المسدس وتحطه براسه لو كاتله
عبدالرحمن: جلب ومات عادي وانتي مو كلتي ما اسأل
شرهب : غير شفت سلاح وخفت
عبدالرحمن : هاي منو تخاف انتي لا مستحيل شرهب : اني اخاف من الاقدار وانتم الولد من تتعاركون متحسون بروحكم ايدكم والگتل مجاوبتني ليش شايل سلاح وياك
عبد : غير عدنه عداوه وكلشي يصير بلشارع ونص العراق شايل سلاح لو من يمي وخربت
شرهب : ليش تمشي بطئ يمعود لو امشي برجلي اسرع
عبدالرحمن: انتي ليش تجيبين الحجي لروحج كوه
شرهب : اني
عبدالرحمن: ليش متلبسين ربطه شكبرج صرتي ومامحجبه
شرهب : وهي بلحجاب قابل الحجاب يمنع التحرش تره الولد حتى التلبس نقاب يتحارشون بيها مايعتقون مره بحجاب او بدون
واني لبسي محتشم وماشيه بطريقي يعني مو الحجاب راح يمنع هيج نماذج مني
عبدالرحمن: البسي حجاب شگلج مغري وجذاب وهذا الشى حيل موترني
شرهب : وانت شعليك
عبدالرحمن: شعاله بعينج اسمعي لج اني تحملت هوايه منج ومن لسانج ورفضج حجاب تلبسين لتصير موزينه وياج
شرهب : حجيت برود ماالبس ومو من حقك تأمرني كاام يضرب على ستيرن السياره
عبدالرحمن: بس لو اعرف شطيح حظي وخلاني احبج هاي النسوان الضاله اشكال والوان مااوكع اله بيج
شرهب : ماضربتك على ايدك وتوسلت بيك انت سحلت روحك شعليه اني وتره وصلنا اوكف
عبدالرحمن: هسه اذا اخذج وانهزم بيج محد يعرف
شرهب : متسويها وكف السياره عبد
عبدالرحمن: من اشتعلت عشيرة عبد من جبيرها لصغيرها
شرهب : عبر شارعنا ورجع فر السياره وانت شبيك تعيط بابا كدامك طفله وتعيط عليها
عبدالرحمن: كدامي حب عمري ومااكدر اخذها بحضني شايفه هيج عذاب
شرهب : نزلني وروح لدربك هذا موطريقك
عبدالرحمن: هذا الطريق كطعته من وراج وهو وذاك الطريق وياريت غزر
شرهب : على اساس شون مغزر بيك انت مو كعد ادور على عروس شرايد مني مباشره تغير وجهه ابتسم وكاال
عبدالرحمن: وصلج الخبر غرتي اكيد
شرهب : ياااا فدوة اني اخر وحده ممكن اغار اغسل ايدك ورجلك مني اني مااغار مشاعري متجمده تكدر تكول معوقه لا اغار ولا اهتم
عبدالرحمن: جذابه عيونج تكول غير شى
خلي بالج كل وحده اروح اشوفها تجي صورتج كبالي تخليني انفر منها لو ملكه جمال متهز بيه شعرن شمسويه بيه انتي اني ااااااخ
وضرب على رجله اوكع هيج وكعه
شرهب : وكف السياره بلباب ونزلت وكتله وكعتهم تستاهل وركعت باب السياره حيييل
عبدالرحمن: البسي حجاب مره ثاني السلاح براسج تره
صعدت اضحك وعفته يدردم فتحت الباب صارت بوجهي حوراء يمه فزيت نسيت انتي هنا
حوراء : جايه والضحكه شاكه وجهج خير
شرهب : اضحك على ابن خالج العاقل
حوراء : منو
شرهب : عبدالرحمن
حوراء : وين شفتي
شرهب : سولفت الها واني ابدل
حوراء : تحبي
شرهب : لا
حوراء : احجي الصدك
شرهب : واذا احبه شراح يقدم وله يأخر خالج رافضني ورفض نهائي وميقبل اكون جنه عنده وكالها كدام الكل تردين انزل نفسي واقبل بعبد واني انهانيت كدام عائلتكم وكرابتكم
حوراء : عبدالرحمن يحبج
شرهب : واني هم احبه بس احب كرامتي وكرامه اخويه اكثر منه
حوراء : يونس
شرهب : اي عفيه يويو هذا روحي واعز من الدنيا كلها واذا مايرضه على زواجي من عبد لو يصير روحي بيه مااتزوج
حوراء : شكد احب خوتكم واتمنى هيج اصير ويه مهدي
شرهب : احنا غير شكل القهر والضيم واليتم خلانه مثل متقوقعين على نفسنا واحدنا ميحس بالامانه اله ويه اخوه اني وناي ويونس واحد يكمل الثاني لهذا تشوفين خوتنا غير شكل
حوراء : الله يحفظكم
شرهب : شسويتي اكل ميته جوع
حوراء : تجي ناي واصب
ناي : رجعت للبيت والبنات موجودات خابرت مهدي وطمني عليه وحجتلي شرهب كلشي وقررت اطلب من يونس يرجع يدور الها على خط مااريد يتكرر الموقف وياها واكيد عبد من عرف ماعدها خط راح يضل يروح ويجي عليها مراح يعوفها
نزلت حوري جنت حيل مكيفه بيها بينا
وكامت تصعد بين يوم ويوم كم ساعه وتنزل ويه كل صعده امها لازم تتعارك وياها
شرهب : عبد يوميه اشوفه من بعيد مثل الحرس يراقب لحد ماادخل للبيت ضليت ٤ ايام هيج وتالي يونس لكالي خط ويه بنيه انطه زايد في سبيل مااروح واجي بعد وحدي
وكمت مااشوفه بس فگري دوم ويااه
حوراء : رحت لسدره واخذت من خاطرها ومن خاله جانت حالتهم حيل تعبانه واعتذرت منها وحجيت الها ظروفي وقدرت عدم جيتي للفاتحه وتأخرت خلصت ال١٠ الايام وبدت اتصالات عبدالله حتى ارجع جان ردي ماارجع وهو تخبل يعيط ويغلط مجاوبته سديت التلفون بوجهه
وداد : بتج نامت
حوراء : خليها نايمه باوعت تلفون امي دك جاوبته وجهه كام ينطي الوان
وداد : شبيج ويه عبد وشنو يكول على اساس انتي مخابرته وكايله ماارجع
حوراء : اي سمعتي ماارجع
وداد : ترجعين ومن باجر تحجزين مالج ضله هنا
حوراء : كتلج ماارجع لو مو انتي واذا خابرج خلي يطلكني احسله
وداد : من صخم الله وجهج شنو يطلكج وبتج
حوراء : شكوو عليها تتربى عندي
جان تلزمني من ايدي لوتها حييل
وداد : لا عبالج اخليج تتطلكين وترجعين هنا لابن العتاكه تحلمين اخابر اخوج وخالج يشوفلي حل وياج
حوراء : وليش انتي تخابرين اني اخابر
لزمت تلفوني وخابرت خالو ومهدي وحتى عبدالرحمن كتلهم تعالو
وداد : شوفي لويت الايد ماتمشي ويايه ترجعين لعبد واياج تسوين مشاكل
حوراء : اريد افهم انتي امي لو عدوتي اكلها مامرتاحه وياه مأذيني ميحبني يكرهني
وداد : ماعسى يكومج بنعال ويكعدج بنعال تنجبين وتسكتين موزين منه اخذج بعد فضيحتج
حوراء : يافضيحه قابل شفتوو واحد ويايه بغرفتي انتم السبب محد كال اله يتزوجني جبرتوه وجبرتوني
وداد : ماالفيج يمي
حوراء : اصعد فوك يم مهدي وماابقى
وداد : اي خوش حتى ناي تخابر على اخوها وتسوي بيت عشاق بت فوزي اثكلي وصيري ادميه ورجعي لرجلج ورب الخلقج ماارحمج
حوراء : ماارجع كمت اعيط وهي گلبت الامه لحد مااجوي كلهم وكعدو
وداد : تعال شوف حظي تريد الخاتون تطلك من ابنك كتلك هاي متمرده ومتسمع الكلام
عمران : خلي نفهم ليش مترجع عبدالله خابرني متخبل احجي بتي شسوالج وهيج قررتي
حوراء : كولي شنو الماسواه وشون بقيت هذا الوكت عنده وبديت اسولف كلشي اله
عمران : هذا مو حل عدكم بنيه شنو ذنبها
حوراء : واني هم مالي ذنب اعيش ويه رجال حتى ميطيق يباوع بوجهي
وداد : وحده جذابه الولد شايلها بلصلوات بس بنتي عينها فارغه ومتأمله على شى ميصير لو تموت
عمران : على شنو متأمله
حوراء : والله ما متأمله على شنو حرام عليج هيج تهميني اكلها موزين ويايه مأذيني وهي اطلع حجج واعذار واتذب تهم براسي
مهدي : خلي نخابر عبدالله ونفهم منه واذا كلام حوراء صحيح اطلكها خالي اعذرني مااكدر اشوفها هيج متعذبه وابقيها
وداد : ابني من كل عقلك صدكتها انت اخوها وهذا خالها وابن خالها هاي راسمه ترجع ليونس تكلك اطلك واني مطلقه يرضون حتى يخلصون مني الله اعلم يجوز حتى بعدها على تواصل ويااه
حوراء : كمت على حيلي حرام عليج والقران الولد ممتواصله وياه من يوم زواجي حتى صوته مسامعته ولا اعرف شى عنه ليش تتحملين ذنبي وذنبه
عمران : لعد امج منين جابت هذا الكلام
وداد : اني شگالي عبدالله جم مره منها تصده وتكوله بوجهه اكرهه طلكني مااريدك اريد ارجع للعراق وجم مره تغلط بأسمه وتسمي يونس يارجال يتحمل هيج يااخويه بنتي ادبسسز ومعرفت اربيها اني اعترف واذا اطلكت راح تخلينا علج بحلك الناس كلها
مهدي : يوم شلج بهذا الحجي هو اكو افقر من حوراء
وداد : لو فقيره مجان صادقت سنين واحنا منعرف بيها لو نسيت سوايتها بيك خلتك هلكدوتك كدام ولد كرابتنا
عمران : احجي ويه عبد يغير اسلوبه وياج وارجعي لبيتج
حوراء : واكفه واعيط ومهدي وعبد وخالو وامي داير مدايري كتلكم ماارجع واذا جبرتوني احرك روحي
وداد : هاكم استلمو تعلموني بيها تهدد حتى تسمعون كلامها وتالي تصير مطلكه ويجي ذاك يتقدم الها واطمس راسنا بلوحل وتاليها غصب على شواربكم تقبلون
حوراء : شكد شايفه امهات ظالمات مثلج مشفت
مهدي : عيب هذا الحجي حوراء
حوراء : متشوفها شتحجي تتهم بيها وتطعن بشرفي حتى مااطلك شووو عناد بيج اطلك وماارجع واذا جبرتوني اسويلكم مصيبه واحرك روحي وخلي بذاك الوكت يفيدج عنادج وطعنج بيه
عمران : وبنتج مافكرتي بيها
حوراء : فكرت بيها شكوو عليها اني مو عشت يتيمه وانتم موجودين تربوها محد يموت وره واحد هاي اذا مو ابوها ركص الها بجفيه وتزوج من ثاني يوم
مهدي : ارتاحي هسه ونخابر عبد ونفهم منه
عبدالرحمن: البنيه تكول الكم مأذيني المن بعد تردون تلزكوها السالفه
عمران : انت لتدخل لو ترديها تطلك من اخوك حتى تاخذ ذاك ويوافقلك على زواجه من اخته
عبدالرحمن: خوش فكرة مااجت بالي شبيك يابه هواي متأثر بزي افلام لتابع بعد افلام هنديه انتم كلكم تغالطون روحكم مبينه حوراء تعبانه من ابنك بس شوون اطبع عبدالله غلطان اله تقوم القيامه ابنك المدلل المطيع يطلع نذل ويه مرته مامعقول
عمران : لتتفلسف واطلع محد دز عليك
حوراء : اني دزيت عليه ردته شاهد
عمران : واني مااريده وهاي المهزله كلها تنتهي راح تبقين جم يوم هنا وراها تحجزين وترحين لرجلج وان عود احجي وياه يغير تعامله وياج
حوراء : مهدي بروح ابوين اني مو اختك الوحيده لتسمع كلامهم طلكني منه وعد مني مااتزوج ولا افكر بيوم زواج واحبسوني هنا راضيه بس اهم شى ماارجع اله
من كافي لتبجين وخلي هلكم يوم تعدي ونشوف شون
عمران : شتشوف مهدي تريدها تطلك
مهدي : اذا حياتها مثل مكالت شتريد خالي اجبرها وتالي تأذي روحها انت هم مترضاها
خلي تبرد الوضعيه وان شاء الله خير
حوراء : طلعو ورحت للغرفه امي طبت ورايه متخبله اشكال حجت حارت شكالت واني انطيتها الاذن الطرشه
ومجاوبتها ردت بكل الطرق اطلك واخلص
ناي : سمعت بسالفه حوراء واباوع مهدي محتار بشغلتها ومبين امه عرفت شون تزرع الشك براسه بسالفه يونس
خابرت يونس وطلبت مني ميجي لهنا حتى ليأكد كلام وداد ومن عرف بسالفه حوراء سكت
يونس : مااريد يتجدد الامل بداخلي اني صاير رمل من كثر الحفر بيه ماضل مكان ينحفر بيه وينترك بيه جروح اقنع نفسي الموضوع ماهامني بس الواقع غير هامني وشاغل عقلي وحتى الشغل كوه تاخذ ايدي
حاولت ادبر بيعه للبيت ومفاد ردت اعدل امورنه وخاصه مرتضى طلعت السنه مال عمي فلاح ويريد يتزوج وضال ينتظر
حوراء : مر اسبوع على نقاشنا مو اسبوع جحيم صار عليه امي سممتني حتى لناي كامت متقبل اصعد ومهدي دوم يحاول يصير لجانبي وهي ماعدها غير سالفه يونس حتى تخلي يشيل ايده مني
خالي ومرته مرتين اجوي حجو ويايه واني رافضه ومااقبل ارجع وزاد اصراري وعنادي بأن اطلك منه واخلص من عذابي
لحد ماكملت ٢٠ يوم واني بلعراق اشوف امي متوتره تروح وتجي وهي سمعت صوت سياره وكامت تركض واني كاعده ارضع بماسه مااشوف غير عبدالله يطب عليه حتى كطعت رضاعتها من الهبطه
عبدالله : عبالج مااجي وماخذه راحتج
وداد : هله حبيبي الْحٍمَدٍ للـّہ على سلامتك
حوراء : جنتي تدرين بجيته
وداد : ابن اخويه وجاي على مرته وبنته
حوراء : واني مو بتج بعد كل الكلته الج وراضيه اعيش وياه
عبدالله : اني مستعد اطلكج بشرط
حوراء : قابله بس طلك
عبدالله : اخذ ماسه وتتنازلين عن حضانتها وتنسيها تماماً وروحي وين مترحين متهميني
حوراء : انت من كل عقلك انطيك بنتي
عبدالله : وانت تتوقعين اعوفلج ياها اني مره مثلج صلفه مااريد واذا مبقيج لخاطر هاي الطفله تردين تولين واديحين وتصيرين مطلقه ميهمني بعد احسن اخلص منج بس بنتي مااعوفها لوحده مثلج تربيها
وداد : ابني على كيفك مو هيج الحجي
عبدالله : لعد اكو مره شريفه تكول لرجلها انزل اشوف اهلي وتكذب عليه وتالي مترجع بتج جذبت عليه وخلتني انزلها حتى تبقى هنا ولو هي متعلمه على الكذب
حوراء : طلاك واطلك وبنتي ماانطيها الك لو تطلع نخله براسك
عبدالله : ماطول هيج صار الحجي وبنتي متنطينياها اريد اشوف اخوج راح يوكف وياج
حوراء : اي يوكف وراح يطلكني ويخلصني منك
عبدالله : واذا كتله اختك بعدها تتواصل ويه يونس ولزمتها مرتين وكوه سامحتها شنو ردت فعله
حوراء : لطمت على صدري انت جذاب واكيد انتي كلتيله هيج يكول
عبدالله : اسوي بيج المتتوقعي ولا وحده مثلج تلوي ايدي وتصير ام الراهي عليه اله اخلي الكل تصير ضدج وهمه بيدهم يجبروج ترجعين ويايه وحسابج هناك ياحوراء
بيبان انغلقت بوجهي هوسه وكلام وحساب واتهام ومثل كل مره نقطه ضعفي يونس لزموني منها عبالك حبيته حتى بس أذي واجيب المشاكل اله لو هو انخلق حتى يتأذه من اقرب الناس ماردت اخربط حياته كافي العاشه مني بس عبدالله وامي لعبوها صّـْْ(☑)ـْْحّ وكلبو الاوراق كلها عليه وانجبر يونس وللمره الثانيه يوكف بموقف كلش محلوو بسببي
ناي : الكل كاعد عمران ومهدي وعبدالله وعبدالرحمن مثل القضاة وبنفس الوقت جلاديين ينتظرون كلمة من اخويه
ويونس وحده كاعد مستغرب الوضع الي حطه بيه عبدالله
عبدالله طلب حظور يونس حتى يحلف هو ماعنده شى وياها طول فتره زواجها وخاصه حوراء حلفت الهم الف مره عبدالله جذاب واتفاق بينه وبين وداد وكعو بحيره يصدكوها لو يصدكون عبدالله وداد
مهدي : اني خجلان منك ومن هذا الوضع كله بس عبدالله ماخلانه حل شرط على طلاكها تحلف انت ماعندك شى وياها هي تحلف وهو يحلف ضاعت علينا واليوم من جبتك صعبه عليه كلش مهما كان هيه اختي وانت ابن عمتي والسالفه المفروض انسدت
يونس : اليوم اجيت لان هي عرضي بت خالي يعني مجاي لوحده غريبه اختك ماشفت منها غير العفه والشرف ومن يوم ماطلبتها ورفضتو ماصار اي تواصل بينا رغم هي بت خالي يعني حتى اذا خابرت وسلمت عليها مو غلط بس لان وضعنا حساس ابتعدت ومااعرف اي شى عنها اني اعتب عليكم لان المفروض هي تربيتكم وعلى ايدكم انت خال عمران مو تكول حوراء بنتي وربيتها على ايدي تتوقع تربيتك تخون رجلها وانت مهدي بت ابوك تنزل راسك وادنس شرفها وشرفك وتصادق
عبدالله : ماكلت مصادقه كلت على تواصل
يونس : انت بلذات تسكت لان العيب عليك عيبين هاي بت عمتك ومرتك وام بنتك المفروض تكعد وياها وتفتهم منها مو تفضحها هاي اذا عدها شى اني مستعد احلف على كلام الله وانتم تتحملون ذنب الحلفان بأن اني لا تقربت منها ولا تواصلت وياها ولا صار شى بينا من يوم زواجها لهاي اللحظه واذا عدكم شك بيها فلخلل منكم مو منها ومو اني الي ادك باب غيري وادنس شرفه اني رجال وعندي خوات واخاف ربي والدنيا دواره واني اكثر واحد ضاك اللوعه منها وماتقربت من الحرام مو تالي عمري اخطأ هيج خطأ
بتكم عدكم واذا بيوم ردتها فأني ردتها بلحلال اما هسه حتى وان اطلكت لا هي تناسبني ولا اني اناسبها حوراء بت خالي وبس لتفتحون بدفاتر قديمه احتركت وتقللون من قيمه شرفكم وتربيتكم
جبو القران واني اتوضى واحلف
عمران : هذا هو ابني اخذ راحتك ونعتذر لان حطيناك بهيج موقف
يونس : اني منحطيت بأي موقف العيب مو عليه العيب عليكم لان شكيتو بيها وجبتوني ابريها المفروض الي يجيب طاريها ميتنفس مو كاعد وحاط رجل على رجل ومستمتع طاري مرته ينجاب بلكعدات
من رخصتكم
طلعت واني ممرود كون الزمه ادفنه بمكانه اني انام واكعد اتمنى اسمع صوتها وهو الچلب يطعن بيها يانذل
ناي : طلعت اركض وره يونس مقبل احجي اي شى كال رايح للنجف ليضل بالكم عرفت ضاكت الدنيا بيه ورايح لامي يشكيلها مثل كل مره من يتعب حييل يروح يشمر نفسه عدها
شرهب : مواقف بسيطه تغير مصير ناس
رجوع حوراء غريب والصار بيها كدرت تستغله وبطريقه ذكيه برجوع حوراء غير مصيرين
مصيري ومصيرها
شكرا لزيارتكم عالم روايات سكيرهوم
