رواية أرض الخناجر الفصل الخامس والأربعون بقلم ايلول
مرات الوجع ينشاف
ينكض ينلزم ينعاف
من تخاف وانت جبير
تحجي بكلبك
انت جبير ، انت جبير
ليش تخاف ؟
══━━━━✥◈✥━━━━══
وهـــب :: حجايته خلتنه واحد يعاين بوجهه الثاني، طــروادة راسم على وجهه ابتسامه وملامحه تحجي غير شي، دار عيونه الصيهد چنه يگله" تدخل انقذني طلعني من هالسالفه "
وصيهد يعاين لسيد عباس وهو يمدح بكهلان وي الوادم الگاعده لمن شيخ حيدر عاين لطرواده متاني رده وجدي خازره توه كهلان يريد يحجي وعمي شاكر حجه بصوت عالي
شاكر:: بويه يوم الهنه لو ناسبناك بس وحگك وروح ابوك من يوم الجانوا جهال شامل موصيني ازوج بتي الكهلان وهوه كهلان يدري وعده علم، جاا بويه ليش ما تحجي فشلتنه رد على ابو خالد.
وهـــب :: اتلفتت ما مستوعب شهالحجي والله لو كهلان يريد يموت وعيشته على بت شاكر ما يزوجونها اله، فاتح عينه بصدمة وسليم وسلطان خازرين ابوهم بغضب، والديوان گب كلمن يحجي شكل، وبس رادوا يكسرون بطرواده ويطلعونه مو زين گدامهم عله صوت جدي وخله الوادم كلها تنتبهله من حط ايده على ايد شيخ حيدر وهو يگله
شعلان:: هاي وصية شامل وانا عبالي كهلان مسولفلك بس إبن ابني يريد كون يطلعنه جدامك وجدام الوادم احنا مو زينين وياه
الزينات يضمهن ما يحجي بيهن والشينات يجيك يركض يحجيلك هاي نفس بيوم الحاصودة واكفه على گاعه بويه خلها تحصدلك ما رضى وراح خابرك تفزعله دوم مفشلنه ومطلعنه مو زينين وياه ومسود وجهنا جدامك، هل احنا منطينه مره ومن انتَ كتله ازوجنك ضل ساكت جا عليمن ساكت؟
زحمه ليمت تتعلم تصير ابن مضيف وتعارف الأصول؟
يحجون وكهلان ما مهتم احسنه ما يسمعهم عينه بعين شاكر وعلى نفس الابتسامة عله صوتهم ما راضين جدي يحجي على طــروادة هيج سيد عباس وصيهد يحجون لمن ابوي گالهم.
وليد:: ابو خالد هسه هوه هل يجي ويحجيلك يابه اهلي هيج سووا اعمامي هيج سووا وعود احنا وروح ابوك مداريه شلون الماي بواصني خلنه اليوم نحجيلك سويلفاته الغمات ودام هوه يسمع منك تنصحه تعلمه.
صــيهد:: ياااابه! كهلان سوالفه معدله
نتر صــيهد وشيخ حيدر ما راضي على حچاية ابوي يرده كلساع، وأبوي وجدي يحجون سوالف تفشل مو من ثوب كهلان وكل هالوكت هوه ساكت وما يعاين لبشر غير شاكر
وانا وبريا كاضين ســليم گوه لمن دار علينه ابوه خزره وهوه حط ايده بصف رجله ويأشر لسليم "لاا لاا". عود جذب ما ازوجها اله، عرفته من الاول مستحيل ينطي بته لكهلان بس راد يسد السالفة حتى لا يخليه ياخذ من شيخ حيدر
عله صوّت صياحهم تعارك صــيهد وي جدي وجدي يشهد بالوادم عليه شلون يعلي صوته وما يحترم جراه مــيثم يطلعه من الديوان صاح شيخ حيدر
-هده بويه هده، صــيهد اگعد.
كعد صــيهد يتراجف ويدخن كله غضب يريد يذبح كهلان لان ساكت وما يحجي صاح عليه شيخ حيدر
شيخ حيدر:: كهلان .
دار طــروادة عليه بهدوء حط ايده على رگبته مسحها وعاين لشيخ حيدر وهو گاله بغيض
شيخ حيدر:: نشدتك گبل ليش ما تاخذ مره من اعمامك گتلي ما نتناسب ليش بويه؟ وانا اعارفك سبع حچايتك سيف وما تجذب.
سكتت كلها وكهلان جنه بين نارين هسه غير يحجي غير يبرر ليش ساكت صــيهد راح يموته، حرك السبحة بأيده وشال راسه. ابتسم بهدوء يعاين لجدي گاله
طــروادة:: مو قصور بشيخ حيدر، بس انا تربات شامل حگي اخذه ما افزع وادم عليه والمضيف اندله واعارف محاچيه، المايله ما لايحتني والسوالف الغمه مو من ثوبي عمي!
دار يعاين الأبوي تعالت اصوات الوادم بين اليگله والنعم وبين اليترحم على عمي شامل بس شيخ حيدر ضل يعاينله لهسه ما ماخذ جوابه رد كهلان عاين لعمي شاكر ابتسمله ودار لشيخ حيدر گاله
طــروادة:: انا ما مچذب عليك، احچيلك السالفة ولو شفتني انا غلط والك حگ عدي تاخذه من رگبتي.
صيح جدي بغضب
شعلان:: غلطان انتَ غلطان ليش من گالك ازوجنك سكتت ما گتله عمامي منطيني مره لو تستنكف تحجي علينه حچاية زينننه؟
طــروادة:: سكتت لان انتَ الچبير وانتَ التحجي وتوضح مو انا، صح لو غلطان يابه؟
سيد عباس:: لا بالله ما غلطان.
شاكر:: شلون ما غلطان جا هوه يدري بوصية ابوه ومن ابو خالد ناشده ليش عمامك ما ينطونك من بناتهم گايله ما نتناسب؟
گبوا سلطان وسليم ويَ ابوهم كلها تحجي اصواتهم عالية وانا عيوني على كهلان ايده تنقبض بغضب وترد ترخى گوه على روحه ضال يحجي بلا صياح وهوسه، شيخ حيدر صيح ما راضي على هوستهم سكت الكل من گالهم
شيخ حيدر:: كل ما راد يحجي وصيحتوا چا شني هيه بالصوت العالي؟ لو تگلولنه كوموا احنا مو اهل مضيف وما نعارف الأصول لو تطون مجال وأحدّ يحجي.
شعلان:: افاااا انا ما اعرف الاصوول؟
شيخ حيدر:: محشوم بس هاي گدام عينك عاين ياهو الگام وصاح وعله صوته صــيهد اولهم.
حييل عاينت لصيهد شمتان وهوه مايخزر شيخ حيدر يخزر ابوي، كلها اعصاب وتصيح الا كهلان هادئ لمن سكتوا گاله
شيخ حيدر:: سولف يابه كهلان
رادوا يكسرونه ويقلوون من شانه كسرهم ومشه حچايته مثل السيف على ارگبهم، وهمه حرف ما گدروا يحجون من گال
طــروادة:: من نشدتني وكتلك انا وعمامي ما نتناسب لان عمي آبو مرتضى ماچان راضي ينفذ وصية ابوي.
گبل يومين يله رضى واذا الله راد واحد ثمانية المشية واتمنى ما يصير بخاطرك مني وتحضر مشيتي بمثابة ابوي انتَ وسيد عباس والوادم الخيره.
حچايته خلتهم ينطحنون بمچانهم سلطان وسليم خازرين طــروادة وهوه ما يعاينلهم داير وجهه لشيخ حيدر يحجي وياه، عمي شاكر وجهه انگلب احمر وكلساع يمسح حلكه بجفيته حار بزمانه ما يدري شيسوي، وطرواده حدد موعد العرس وره الخطبه بعشرة ايام.
ضلينه واحد يعاين بوجهه الثاني همه چذبوا وهوه مكمل الچذبه وياهم وگلبها ضدهم لا بيهم يگولون ما ننطي ولا بيهمّ يسكتون دار سيد عباس لعمي شاكر گاله
سيد عباس:: هاي وصية ميت اذا بنيتكم المحروسة ماعدها اعترض ليش ما نفذتها ابو مرتضى؟
وعمي شاكر مدنك يهز راسه اي بحيره ما يعاين لولده سليم ضل يفور وشيخ حيدر گاله
-شكد مهر كريمتكم من الالف للعشرين مليون انا حاضر، ولا تحسبونه ابن اخوكم احسبوه ابني ابن شيخ حيدر اطلبوا مهركم وحطوا شروطكم وانا حاضر بالتردونه.
يتشكرون من شيخ حيدر ويردون بس الكعده تكضي وشيخ حيدر كالهم المشيه تجيكم من بيتي، گام سليم طلع بره لحگه بريا
صارت سالفتهم كلها بعرس كهلان مناه لمن ترخصوا يرحون گمنه وياهم واجه سليم يدخن وهمه طلعوا مشينه وياهم يم شارع القرية بصف بيت عمي شاكر، لمن صعدوا السياراتهم بس تحركن السيارت وي اخر سيارة راحت ، سليم جر طــروادة بغضب يصيح ويطكه وطرواده طكه حيل ودفعه يغلط هدوا هوه وسلطان وآبوهم ومرتضى متسودنين
وإحنا بينهم صياح وهوسه وكلمن يجرله بصفحة ولد عمي شاكر متسودنين وهوه جنه خبل عايفهم ويتعارك وي عمي شاكر
طــروادة:: بيييك خير جا حجيت بالديوان وگتلهم ما انطي بتي.
جراه سلطان طكاه يتراجف
سلطان:: اختييي ياهي مالتها وحطيتها بالنص ياااهي مالتها.
طــروادة:: وخرررر احجي وي ابوك هالحجي هو الحطها بالنص.
ســليم:: تكضي الكعده واحنا نحاجييييه احنا نحجي ونآخذ حگك بكيفككك تحجي وتحدد يا قندره يا عقد يا عرس والله ما توصلهاااا والله، هسسسه هسه تخابره وتگله ما اريدن بت عمي.
ودار على ابوه وجدي يصيح بوجهم
ســليم:: ليششش تجذبون ليش تحجووون من يمكم ياهي مالتكم بيه واذا اطوه مرره نعااال على عقليتكم
وجدي جره طكه راشدي يغلط ويسب وعمي شاكر صاير بينهم واحنا كاضين طــروادة وهوه يتعارك وي سلطان، ما گدرنه الطرواده يريد يطك عمي شاكر لان يغلط عليه، اعاين الصيهد كاعد على بلوكه يعاين علينه ويدخن ما يتدخل، واحنا بهوستنا متذابحين وادم تطك بوادم وصياحنا يجيب التايهه
وجدي وتهديده وصياحه محد فك الثاني لمن گب صريخ من بيت عمي شاكر ونسوان طلعت تتلاطم وتصرخ.
"""
ريـــمه:: اعاين على الاء وهيه عيونها من البچي مورمه بس مو بحالها گـــلبي وروحي يم هاجر اللي طبت للغرفة وسدتها هزيت راسي وحجيت بصوت يرجف
-ما ادري ما ادري انزلي شوفيه جوه.
نزلت. تركض وانه ادك الباب بأيد ترجف اسمع بچي هاجر مكتوم خانگه روحها وتبچي روحـــي راحت
-هاااجر هاجر بس افتحيلي الباب هجوره هجوررره.
فز گـــلبي على صريخ الاء نزلت أركض واتعثر واسمع صياح وعركه بره ما فاهمه شي والاء كاضه امي من جتافها تهززها بقوة وتصرررخ
-ااااابني وووين ابنيييي ووووين
دفعتها امي تصيح وتلطم متسودنه
ميلاد:: وووووين راح الولد ووين وديتيه من دهر الدهرررج
لطمت على صدرها امي تصرخ
ميلاد:: كارصه بغرررفتج ومتيهته يمممه الفرخ راح للشط يمممه.
والاء تسودنت طلعت تصرخ وتركض وانه أركض وراها بس اريدن اكضها، ما الحك بيها روحها فرفحت صريخها هزنا هز، صاروا الولد بوجهنه سلطان اجاها يركض وسليم اجانه كضها سلطان متسودن وهي روحها مفرححة تريد بس تفلت من ايده وتركض للشط يصيحون عليَّ يردون يفهمون ارجف صحت بوجهم
-غيث غيث ما ادري وووين.
الاء:: ااابني غرررررك هدددددني.
بهت سلطان مصدوم وهي فلتت من أيده وركضت للشط گمت احس الهوسه والصياح يدكّ براسي، ركض وراها سلطان وانه اريد اركض وراها دفعني ســليم بغضب يصيح
-جيبيلها عباية.
ركضت للبيت وامي طلعت تتلاطم وتصرخ اخذت عباية وطلعت اركض وهمه طشوا نص على الشط ونص يفتر بالبستان كلها تدور وغيث فص ملح وذاب.
حطيت العباية على اجتاف الاء ولميتها على صدري وهي كاعده على جرف الشط وتصرخ بروح محروگه حرك
-ييييمه غيث يييييمه.
طاح سلطان على اركبه مهدود حيله جرّاه كهلان يوكفه ويصيح بوجهه
-گووووم هسه نلكاه ما يجي للشط شيجيبه .
وسلطان روحه ممروده حرف ما ينطق انحنى ظهره بساع يعاين الامي بنظرات عجزت افسرها من اجت على الشط تبجي، طاحت الاء بين ايديي مغمي عليها، صرخت روحـــي رايحه وسلطان مسح وجهه اديه يرجفن شالها گوه على روحه يمشي للبيت وانه اركض وراه بخوف واعاين للــبستان بكل صفحة ضوه كلها تدور
حط الاء بالهول ركضت جبت ماي ارش على وجها وهوه بس عافها وطلع روحـــي فرفحت اريد اصعد الهاجر واريد اكعد الاء وهي تون.
تدور بوجهه منا ومناه وتهمس بصوت مبحوح
-غيث ماما غيوثي.
-الاء، الاااء.
شهكت وفزت ترجف جلبت بأيدي
-ريـــمه ريـــمه ابني ابني وين.
-اشش اسم الله هسه نلكاه هسه نلكاه على كيفج.
گامت على حيلها تمشي وتنود اريد اكضها تدفعني طلعت من البيت وانه صعدت اركض دكيت باب الغرفة على هاجر
-هاااجر افتحيلي الباب هاااجر.
وهيه ما الها اي صوت، رديت نزلت ركض الاء دايخة گوه تمشي وتبجي، كضيتها ساندتها، وطلعت عفراء ورنه وياهن حسين صحت على رنـــة
-رنـــه روحـــي البيتنا هاجر مدري شبيها.
عــفراء:: روحيلها انتِ ريـــمه
حجتها وكضت الاء ساندتها وهي بچي بحضنها تگلها
الاء:: ابني ررراح ابني رراح.
اخذتها عفراء وراحن للشط وانه رديت للبيت ورنه وياي تسألني
رنـــه:: من ليمت غيث ماكو؟
-ما ادرري والله ما ادري.
بچيت ميته من الخوف عليه، صعدنه فوگ وهاجر ما ترضى تفتحلنه الباب مليت وآنه أتوسل بيها، نزلنه انه ورنه من صارت هوسه جوه.
امي تصرخ وتلطم تدعي على عمتي ايمان وبناتها وسلطان يتعارك وياها هوه وصيهد جريت ســليم ارجف وهوه اعصاب
-هاجر هاجر ما ادري شبيهااا.
بس هوه ما منتبهلي ملتهي يتعارك وي صــيهد لان صــيهد يغلط على امي وسليم يتسودن،جريت رنه عفتهم بهوستهم وركضنه للشط آلولد بعدهم يدوّرون وعفراء والاء على الشط ما ترضى ترد للبييت تبجي
الاء:: هنااااه هناه ابني هنااااه.
الساعات تمر مثل الحلم صريخ ولطم وبكل ساعة تفوت گـــلبي ينلچم، اعاين لحال الاء وروحي تنمرد وجها يصب دم من گد ما لطمت عليه وزلغته، تنود بحضن عفراء تشهگ، على فد كعده يم الجرف ما ترضى ترد للبيت،
وانه ساعه اركض للبيت اشوفن بلكن هاجر تحاجيني وساعة ارد يمهن، للفجر والولد محد منهم كف كلها تدور وتفتر للفجر وغيث ما اله اثر.
حاجوا سلطان الولد وهوه گاعد على صفحة عيونه حمر ويعاين للشط كوموه واجه گوه على روحه حتى ياخذ الاء من يم الشط كعد كدامها ضمت روحها بحضنه تبجي وتصيح
-كله مننننك راح ابنييي سلطان راح ابني.
غمض عيونه متروسه دموع مختنگ وما يگدر يحجي گومها وهي تبجي بحرگه مشيت وياهم للبيت لكينه امي وابوي يتعاركون وسكتوا من طبينه سلطان صعد لغرفته اخذ الاء وانه ركضت الغرفتنا ادك الباب على هاجر، ما تحاجيني، طلع سلطان من غرفته حاني ظهره
-سلطان سلطان، هاجر.. هاجر ما ادري شبيها؟
مسح وجهه واجه يمي اخوي روحه رايحه يريد يحجي ما يگدر كح مختنك اعاين الاديه يرجفن گالي
-شبيها؟
مسحت دموعي مختنگه
-ما ادري ما تفتحلي الباب.
دك الباب حجه بصوته المخنوگ ماردت عليه، راد يكسره ما گدر مهدود حيله طلع تلفونه يخابر على سجاد.
-تعال للبيت.
سد تلفونه وراح ضليت كاعده يم باب الغرفة اسمع بچي الاء وابچي وياها، لمن اجه سجاد مسحت عيوني وگفت كسر باب الغرفة طبينه اثنينا ركضتلها وهي بفراشها وجها احمر وفاتحه عيونها على كيف ذبلانه، كضيتها تچوي من الصخونه حطيت راسها بحضني
-هجوووره هاجر.
وهي تجر روحها من عدي توخر ما راضيه، عفتها ونزلت اركض خليت سجاد يمها، اخذت خافض حرارة ركمادات صعدت كوه سجاد كعدها شربتها وسويتلها كمادات كتله.
-ياهو الاجه هسه؟
تحسر بقهر يعاين الهاجر
سجاد:: الشرطة وجابوا غواصين
عاين لوجهي وحجه بغصه
سجاد:: الماي جاري قوي نضحك على رواحنه من ندور.
غطيت وجهي بأيدي ابجي بشهگه روحـــي رايحه جراني الصدره مختنگ وصوت الاء يهز الگلب گال
-گومي روحيلها انا اضلن يم هاجر.
هزيت راسي خوش وكمت امسح وجهي حتى اگدر اصبرها وما ابچي يمها فتحت الباب اعاينلها گاعده يم الچرباية عيونها من البچي گوه تفتحن طبيت يمها بحيره ضمت وجها بصدري تبجي
-امجج ريـــمه امجج موتت ابني.
ووي حجايتها اندفع الباب وطبت امي تغلط وتريد تطكها تصيح بحرگه
ميلاد:: لوووو ما انتِ كارصه بغرفتج ما رررراح لو ما متيهته ما ررررراح .
وكفت الاء بحرگة گلب اريد اكضها ما اگدرلها تتعارك وي امي وتغلط
الاء:: ارتاااااحي ارتاحي هسه ارتاحي دعيتي عليييه دعيتي على ابني.
كضيت امي اريد اطلعها من الغرفه طكتني على وجهي تدفعني بعصبية تصيح على الاء وتمد ايدها تريد تطكها
ميلاد:: خيييبه لا زلمه فلحتي بيييه لا فرررخ درتي بالج عليييه.
والاء طاحت على اركبها تصرخ وامي ما مهتمه تحجي وتغلط بحرگه طلع سجاد صاح عليها يله عافتنه ونزلت، والاء مثل المسودنه تهز راسها لا وتكض وجهي
-ما مااات ابني ما مااات.
وكامت تركض جريت عبايتها وركضت وراها كضاها ابوي وهيه تصرررخ بروح مفرفحه تريد تروح للشط حطيت العبايه على راسها گالها ابوي
-تعااي انا اخذج لا تركضين.
مشيت وياهم متلفله بالعباية ابجي، كاضه الاء من ايدها وهيه تتعثر وتردد بصوت مخنوك
-غيوثي يمه غيوثي.
يم الشط وادم هووواي ناس غربة وشرطة وغواصين، جاري الماي قوي وكل ما اتخيل شلون طاح بالشط واختنك والماي اخذه بعيد امووت وگلبي يفرفح بحرگه، ودموعي تچوي خدي غيوثي عمه غيوثي يا روحـــي .
كعدت الاء على الجرف دموعها تجري وتصيح بلوعه
الاء:: يييمه الولد يمه، يممه غيوثي حبيبي يييمه.
دقايق واجن امها وخالاتها يصبرن بيها يردنها ترد للبيت وهي تبچي وتتوسل بيهن
الاء:: هددوني عوووفني هنا ابوس ايدج يممه ابووس ايدج ابني والله ما اگدر گـــلبي نمررد يمه گـــلبي نمرررد.
وجرت ايد امها تبوسها فاقده ما تدري بروحها شتسوي تتلفت بيهن وتتوسل
الاء:: خااله خاله ابني ابني غرك خاله ما اگدر حاجيهم والله اموووتن اموووتن ما اگدر بدونه.
-صلي على يمه حبيبه صلي على محمدوالله يصبر گلبج، گومي نرد للبيت.
جرنها من ايدها دفعتنهن تصرررخ بكل صوتها مثل المسودنه
-عوووووفني وووخرن عني وووخرن ، غيييييث غيييييييث يييييميه غييييث.
وبأثنين اديها لطمت على وجها وعل راسها ركضتلها وياهن بس اريدن اكض اديها ما اگدرلها بحرگة تلطم ذبت الحجاب وكطعت شعرها متسودنه اجه سلطان يركض غطاها ولماها على صدره صرررخت مچلبه بيه وتگله
الاء:: اريدد ابني اريد غيييث
وهوه يغطي راسها بأديه الترجف وخالاتها وامها يحجن عليه ويذمنه
-حووبة غيث برگبتك حرگت گلبها من اخذت عليها مررره وهل ربك حرگ گلبك على ابنك.
دفعت خالتها گـــلبي خلصان
-كاااافي كااافي هو بيا حاال.
صاحت بوجهي تريد تطكني
-وخرري عني وخرري بتنا راح تموووت.
حطيت العباية على راس الاء گومها سلطان لامها الصدره وهي مچلبه بيه بخوف واديها ترجف يمشيها خطوه خطوه وهي تهمس بصوت مخنوك
-اريد ابني سلطان أريد ابني
اخذها للبيت ساكت طببها لغرفتها يريد ينزل ما تعوف ايده تتوسل
-رجعلي ابني سلطان ابوس ايدك رجعلي ابني
جرت ايده لوجها تبوسها ودموعها تجري على ايده، اعاين عليه عيونه متروسه دموع والغصه ببلعومه تصعد وتنزل دنك سند راسه على راسها متحسر وصوته گوه يطلع
-وين عفتيه الاء؟
-ما عفته والله ما عفته راح الهااجر راح الهاجر.
جر ايده منها طلع وامها وخالاتها اجن للبيت صعدن يمها وامي كلساع تتعارك وياهن، عفتهن بهوستهن رحت الهاجر بعدها مصخنه وما تفتّح عينها.
-هجوره هجوره
گوه فتحت عيونها شافتني وردت غمضت شفايفها بيض ووجها من الصخونه احمر.
عفتها وطلعت طبيت للحمام بس سديت الباب كعدت على حيلي ساده حلگي بأيدي وابجي كلشي يتراوالي وجهه ضحكته ريحته من اشمه برگبته يا روح عمتك غيث يا روحـــي يا ررروحي انتَ.
مسحت دموعي ونزلت بساع من امي ضلّت تصيح وي نزلتي طلعت فرح من غرفتها وامي استلمتها تعاركن بيناتهن.
احس رجليَّ صارت خيوط گد ما اركض للظهر واي اثر الغيث ماكو الشرطة والغواصين راحوا مدري على يا اساس يرحون وللعصر حتى الوادم الغربه كلمن راح لاهله واهل الاء هم راحوا ، ضلوا ولدنا مگابلين الشط والاء، اذا نامت ربع ساعة تفز تصرخ.
وتركض للشط وهاجر للعصر وما صحت حاولت اوكلها تدفع ايدي واحس اسمع صوتها واتوسل بيها
-هاجر هجوره يبعد روحـــي بس احجي امس صرختي وهسه احس اسمع صوتج هجوره.
تغمض وتهز راسها لاا، اندفع الباب وطبت الاء عيونها دددم وترجف عاينت الهاجر وصاحت
الاء:: انتِ الغرگتي ابنييي، انتِ الوديتيه للشطط.
اعاينلها بصدمة وهاجر حطت اديها على أذانها سدت اذنها ومغمضة بقوة والاء هدت تريد تطكها دفعتها اصيح بوجها
-الاء شبيييج تسودنتي؟؟؟
ادفعها حييل وهي تصرررخ
-هييييه الغرگته هيييه الودته للشط.
دفعتها ما اخليها توصل الهاجر، وهاجر ساده اذانها نايمه بفراشها وتون، صعدوا الولد وامي على صياحها، وهي عبالك فاقده مو بوعيها تلزم بأيد سلطان وتگله
الاء:: وديته الهاجر وديته لهاجر اسألها غيوثي وين اسألها سلطان اسألها غيوووثي وين.
ميلاد:: لو حاطه عينج عليه وما ملتهيه تخابرين امج واخواتج جا ماغرك الفرخ ياهي مالتها هاجر خيبه الخوووثة الخااايسه.
وسلطان يرد بصوت مبحوح
-كافي يمه كافي اسكتي يمه اسكتي.
تعارك وياها ســليم تسودنت تغلط وتدعي فزيت على صياح سلطان كض امي من جتافها بغضب هزها حييل يصيح بوجها بحرگه وامي تصررخ بأيده موجوعه جراها منه ســليم، وهوه كعد بباب الغرفة گوه يتنفس وامي تبچي وتصيح
ميلاد:: تمددد ايدك عليَّ سلطاااان تمد ايدككك عليَّ.
وهوه حاط ايده على راسه مدنك صوت نفسه يخرش، ســليم نزل امي جوه والاء تبجي وتتوسل
الاء:: ما ميت غيوثي ندور بعد ندور بعد نلكاه سلطان نلگاه.
وتهز راسها اي اي نزلت بساع تريد تدور عليه عاينت الهاجر بعدها ترجف وتون سلطان يحجي بتعب
-روحـــي وراحها روحـــي ريـــمه.
حجاها وگام هوه هم ينزل على صياح اهلي ومن شفنه ابوي يكتل بأمي وسليم وسجاد بينهم وفرح واكفه على صفحة بشماته، ركضنا اثنينا أنه وسلطان امي تصرررخ وتغلط وابوي يطك بيها بالعگال گوه طلعناها من ايدها وسليم من حرگه گلبه صاح بوجهه ابوي.
ســليم:: كاااافي عمرك كله ما عرفت تتصرف يوميه حاطنه بمصيبة
وامي من وره ســليم تصيح
الاء:: اكصصها اكصصها واذبنها لچلاب وما اطيها البيت شاااامل
وابوي شال العگال يطك ســليم حيل وسليم ما يتنازل ما يدافع الروحه بس ما يسكت محترگ گلبه من ابوي بهوستنا وصياحنا ونريد بس نكض ابوي من بين كل الاصوات والصياح اجانه صوت انسان مفجوع وگلبه مكسور فززينه علي
الاء:: سلطاااان.
درنه كلنه نعاينلها واكفه بباب الهول الخارجي ترجف شلون السعفه من راسها الأطراف رجليها فاتحه عينها على وسعها ودموعها مثل المطر تجري على خدها شفايفها يرجفن تريد تحجي ما تگدر وباديها اليهتزن المح قميص غيوثي الابيض يابس عليه الدم مادته بأتجاهنا ، وأيدها الثانية.
بيها خنجر الشمس تصگع عليه ويلمع مثّل المراية ما ينشاف عدل لمن مالت على صفحة تريد تطيح وبين الخنجر بوضوح
خنجر ابوي وعلى حافته الحاده يابس الد م
طاحت الاء على اركبها بباب الهول واحنا من صدمتنا محد تدنى يمها، حطتهن يم وجها تعاينلهن ترجف وصرررخت صرخت من كل گلبهاا احس عيوني غوشن چلبت بالحايط وسلطان ركضلها وسليم اخذ الخنجر والقميص من ايدها يصيح بوجهه
ســليم:: وووووين لگيتيهن ووووين لگيتيهن؟
ضليت كوه اجر النفس جهال مرتضى يبچون وسلطان وسليم بس يردون الاء تحجي وابوي بصفحة يصيح ويريد ياخذ الخنجر من ســليم گالتلهم بصوت يرجف
الاء:: وررره وررره الدوانيه.
وركضوا كلهم وهي طاحت بالگاع ترجف راحتلها فرح وانه احس عيوني مغوشة امشي وخطواتي ترجف افتروا يم الدوانيه ماكو اي اثر لا دم ولا شي كعدت بالگاع ابجي وهمه يتراجفون ابوي يصيح شجاب خنجري على قميص غيث، وسلطان يعاينله بنظرات تكسر الگلب،
طبيت للبيت من اجوا الولد وجدي وعمي، صياح وهوسه بالحوش، غسلت وجهي بالمطبخ واسمع صوتهم العالي ومن جهه صوت الاء اللي يكزبر الجلد، عفتهم بهوستهم وصعدت فوگ طبيت للغرفه عقلي يودي ويجيب، اعاين الهاجر، بفراشها مطيتني ظهرها، سديت أذني من أصواتهم لامه رجليَّ الصدري غيث غرگ لو انكتل؟
"""""
رنـــه :: اخر امتحانين ما گدرت اقراهن زين لان بالي يم المصيبة الصارت، غيث اختفى جدي وعمامي يردون يسوون استخلاف وسلطان ما يرضى يگلهم ابني مات مكتول ما غرگان، وهمه يصيحون غرگ وهاي الخنجر والقميص امه سوتهن لان صارت مو بعقلها.
ويوميه يگب صياحهم وعركهم، يومين مرن كلها متمرمره وحالهم حال، من اكعد الفجريات اراجع اسمع سلطان كاعد بره الحوش وطرواده يحجي وياه يصيره وهو بس ساكت
الحد اخير امتحان رحت صايمة حلكي ناشف وتعبانه من مرلي طــروادة سألته
-ها ماعرفتوا شي جديد؟
عاينلي ممروده روحه من الحر هز راسه لا
طــروادة::بيت شاكر يضيع بينهم حتى دم النبي تردين ما يضيعون كتال إبن سلطان
رنـــه :: تلكاها هاي ميلاد السحاره هيه كتلته.
احجي محترك گـــلبي وهو يسوق عاينلي متحسر
-اسكتي يابه ماضل من صيامنه شي.
سكتت ودك تلفونه عاينت وياه مكتوب بريا خلاه على رجله وفتح السماعه اجاه صوت بريا تعبان
بريا:: الو.
-ها بريا.
-شني وينك صار ساعة كاعد بالكافتيريا.
اعاين لكهلان بساع حط ايده على راسه وگاله
-نسيتك طلعت، خل اوصل اختي للبيت واردلك.
بريا:: لا لا يابه لا تجي راح اضل اتاني مــيثم يكضي
-اعذرني بريا بس اختك لو بطت بالمدرسة تتخربط وخفت عليها اجيت بساع ونسيتك.
وبريا بدون ما يرد سد التلفون بوجهه عاينتله
-مو متعاركين شني صاحبته؟
-اي
-خيولي لا تصاحبه.
-انچبي.
-هاا ها غلطت عليَّ فطرت.
سكت ماله خلك روحه وصلنه للقرية اول ماطبيت للبيت چانت عفراء تريد تروح تشوف رغد چلبت وياها،بدلت وطلعت وياها مشينا المشتمل سلطان، لگينه البنات يمها ندى وماسه وبدور، وهي تبجي .
سلمت عليها عفراء تواسيها ورغد شالت راسها عيونها مورمه مسحت دموعها صوتها مختنگ گالتلها
-طفل طفللل مات لوعة گلب امه برگبتي.
والبنات وعفراء يحجن وياها يردنها تسكت، درنه على صوت الاء دفعت الباب وطفت، وجها متغير كله جروح وعيونها مورمه وحمر وريمه وراها تريد بس تكضها، وهي تدور بالوجوه تريد رغد وبس شافتها صاحت بصوتها المبحوح من البچي
الاء:: ارتاااحيتي؟ ارتاحيتي هجمتي بيتي وموووتي ابني ارتاحيتيييي؟
ورغد بس دموعها تجري، وريمه تسد بحلكها وهيه تدفعها، تلطم على وجها وتصرخ حاجتها عفراء وهي ما تحس بروحها تلوم رغد وتصيح بوجها
-كتلوااا ابني كتلواا غيووثي من وراج كتلووو
طب سلطان بساع چلبت بيه تريد تطيح تبچي وتصيح
الاء::كله منكممم غيوثي كتلوه اااهلك كتلوا ابني من ورراك انت وياها.
تبجي بصريخ وضامه وجها بصدر سلطات حط ايده على ظهرها يصبرها ورغد على صفحة تبجي بحسره مركزه عيوني على الاء مكسور گـــلبي على حالها ترجف وگوه تتنفس، من لمها سلطان على صدره ومشه بيها يريد يطلعها وياخذها لبيتهم حطت عينها بعين رغد عبالك متشمته هزيت ايدي هسه انتِ بيا حال ابنج ميت عوفي هاي السوالف.
طلعوا من البيت ريـــمه وياهم، ورغد كعدت بالگاع تبجي بحرگه والبنات يصبرن بيها ضلينه يمهن ساعة وردينا للبيت
جدي وعمامي ما رضوا يبلغون الشرطة بخصوص القميص والخنجر يخافون لا ينسجن عمي شاكر وعمي من شايف سلطان شاك بيه حط القران وحلف وهمه يشهدوله لان جان وياهم بالعروس وجار ميلاد حالفه بالقران مالها غرض وما مسويه شي لغيث، بس الاء تاهمتهم وكلساع تكلهم ابلغ الشرطة، تكسر الگلب وحالها يقهر العدو، ثالث يوم سووا استخلاف وگالوا غرگ اجت الوادم تسلم عليهم، رغم سلطان معترض بس محد اهتمله وهوه اساساً تمرض، صــيهد وطرواده گوه عليه اخذوه للدكتور.
وعفراء ضلت يمنه مده لان منذر كالها خاف لا من تجين يجنج يغثنج ضلي غاد چم يوم، وهوه يوميه العصر يجيها وگبل الفطور يروح،وبرمضان صادف الزرع شصار بحال طــروادة يجي للبيت حلكه يابس وروحه ممروده يسبح وينام گبل الفطور بربع ساعة صاحت عفراء
-رنـــه كعدي طــروادة.
-كعديه انتِ خل اضم الطيور.
هزّت ايدها وراحت، وانه فاتحه القفص مطيره الحمام وخايفه لا الطيور البگتهن من بريا يرجعله، شايله راسي ليفوك اعاينلهن وهنه بالسماء يتگلبن، واعاين لطيوره هم طيرهن ويصوفرهن كضيت گـــلبي بأيدي خفت لا طيوري يرحن وياه ركضت لحسين جاي يعاين فلم كارتون سحلته للحوش
-صوفرلهن صوفرلهن خل يردن
وهوه خازرني ماله خلك طكيته على راسه
-ترا بعد ما اكعدنك للسحور.
خله اصابعه بحلكه وصوفر بصوت عالي اعلى من بريا، وهنه ضلن بالسماء ما ينزلن لمن طب عبود امنت حطيت العصا الشادين بيها علاليك بأيده هوه ينزلن وركضت للبيت كبل ما يحجي عليَّ، اريد اشوف طــروادة وعفراء وين سمعت صوتهم بغرفة اهلي. تلفتت زهره تعاين للتلفزون وشمس يمها وحسين وعبود بالحوش، مشيت على اطراف اصابعي وكفت بالباب عيني على الهول بس اسمعهم ما افهم بشنو يحجون الحد ما گالتله
عــفراء:: وانتَ اجتك من الله فرصة وچلبت بيها هاا؟
طــروادة :: لا والله لا عفره بسّ حركوا گـــلبي رادوا يطلعوني گدام الوادم جاهل وما افهم ومستغل شيخ حيدر، شترديني اسوي لو اكله چذابين وهمه هم يجذبوني وعدهم استعداد يحلفون واذا شيخ حيدر يصدگني الوادم الگاعده ما تصدك، لو امشي بجذبتهم.
عــفراء:: يمممه منك يمه احلف عليك مكيف.
طــروادة:: صدك تحجين؟ ووولج .
عــفراء:: هههه وهيه شلون؟ لو ما رضت بيك؟
طــروادة:: ما ادري مشكلة ابوها خل يخابر شيخ حيدر ويگله بطلنه ما ازوج بتي الكهلان.
فتحت عيني على وسعها، وفتحت الباب التفتوا عليَّ اثنينهم وانه عيوني على طــروادة
-تتزوجمن؟
طــروادة:: ريـــمه .
حجاها وعينه بعيني وانه اتلفت بينه وبين عفراء صحت بوجهه
-لااا والله ما تتزوجهاا ماااا معليه والله اسوي فلك، تضل ميلاد تجينه! ولازم نحترمها علمود ريـــمه.
احجي بحرگه وعفراء تخزر بيه بس انه ميته من القهر احبن ريـــمه واموتن عليها بس من اتخيل امها تضل تجينه حتى تشوفه وانه احترمها واطيها ماي وچاي اموتن وافرفح وكف طــروادة مقهور جرني من ايدي الصدره يشرحلي شلون اعمامي فشلوه وچذبوا وأنجبر يحجي هيج حتى يفشلهم ويجبرهم
طــروادة:: انا ما رايد اتزوج ولا مفكر بالزواج وكل اليهمني بهالدنيا انتم تعيشون مرتاحين
مسحت عيوني وانه على صدره
-جذب انتَ تحبها الريمه.
-انچبي استغفر .
وخرت من صدره أمسح بعيوني وهوه يعاين لعفراء بخزر وهي بساع گالتله
عــفراء:: عبالها تحبها.
سكت طلع من يمنه وعفراء بساع گامت جرتني من أذني
-انتِ ليش ما تبطلبن تنبصين بكل سالفة.
چلبت بأيدها احجي
-لو مو ريـــمه ما احترم ميلاد السحاره الكتاله .
عافتني محترك گلبها من عدي وطلعت من اذن، مشيت وراها غسلنا وهي محضره لبن وتمر تفطرنا الولد راحوا يصلون وانه وياها بالمطبخ الحد ما طــروادة كضه فرض صاح
طــروادة:: عووفنه امشن صلن
مشينا نصلي ومن كضيت صلاة ردت الم السجاده وعاينت العفراء رفعت ايديي ادعي
-اللهم ابعد عنا ميلاد وشر ميلاد الچلبه الحقيره.
هزت راسها محتاره وياي لفيت السجاده وطلعنه للمطبخ، وبس كضينه فطور صــيهد اجه على طــروادة اخذوا سلطان للمستشفى متخربط، وانه كل افكاري بريمه وطرواده وادعي كون هيه ما ترضى بطرواده حتى شاكر يتفشل.
ضليت كاعده للسحور كوه على روحـــي وثاني يوم بالعشرة كعدت راسي مسطور حلفت بعد ما اسهر، الظهر سمعنه هوسه ببيت عمي شاكر، وطرواده باله يم سلطان خايف عليه، خابر صــيهد گاله
-ما تروح تشوفه هذا تعبان لا يصير بيه شي.
وصيهد ما ادري شحاجاه سده منه ضايج تلثم يريد يروح للگيعان وحسين هم لبس ولف چفية عبود على راسه
حسين:: اجي اعاونك تتعب بوحدك
ضحك طــروادة وهوه يگله
-لا يابه صايم هنا تطيح.
حسين:: لا ولحسين اروحن وياك خلني أتعلم حتى اعاونك.
ضحك اخذه وياه صعدت على گن الدجاج اعاينلهم تسابقوا وي هاسكي طــروادة سبق حسين وسبق هاسكي وحسين ضحكته عاليه يركض وراهم وانه من يمي اضــحك
بريا:: حقيره حارمتني من هالضحكة ولا ابريج الذمة.
فزيت اعاينله ضحكت وتذكرت عركتنا خزرته وهوه يعاين وره طــروادة لمن شافه ضاع بالنخل يله تقرب وكف گدامي رافع راسه يعاينلي على راسه چفية مفتوحه ومقربها ليگدام صاير خيال على وجهه ابتسم وزفر نفس بحسره عينه بعيني
بريا:: شلونج؟
-معليك مو تعاركنا بعد ليش تحجي وياي؟
دنك متحسر ورد عاينلي گوه فاتح عيونه
بريا:: انا غلطان وياج بس رنـــه حگي انا توني راد للبيت ومن دريت بيج بعدج بالمدرسة اجيتج تالي احاجيج عفتيني ورحتي وي هذاك الحيوان.
مضيگه عيوني من الشمس واخزر بيه
-غير وي عفراء اروحن!
-صح حگج بس لا تعيدينها النوبة لو بيت شامل كلهم بسيارة اخو منذر ما ترحين وياه.
-شلك غرض؟
-الي
-لا مالك ياهي مالتك.
دار وجهه ورد عاينلي
-رنـــه بروح ابوج كافي سدي السالفة احسبيها ما صايره ترا جاي تدوسين بگلبي من تصيحين مالك غرض.
-مالك غرض.
دار وجهه يريد يمشي صحت وراه
-تعال الك غرض.
عاينلي بطرف عينه ورد اجه يمي شال راسه يسأل
-ليش تحبين تقهريني؟
حطيت ايدي على كصتي احمي وجهي من الشمس گال
بريا:: انزلي راح يطكك وجهج، روحـــي غاد يم النخلات وحاجيني من وره السياج.
نزلت ومشيت يم الحديقة بصف النخلات گال
-ها رنـــه اجيتي
-اي
-شوكت تهدين طيوري.
-يا طيور؟
ضحك وانه اعاين للطيور
بريا:: صايره نگريه يا طير الاوديه الج تبوكينه
-حتى تتوب بعد ما تقهرني بريا والله اخر مره احاجيك لنوب لو قهرتني ارد أعاديك واول شغّله اسويها اهد عليّك هاسكي
-ما اقهرج بعد التوبه.
-عفيه
سكت شويه ورد گال بصوت يكسر الگلب مال يتيم
بريا:: ليش گمتي ما تحجين وياي لا تسويلي لفات لا تطيني چاي.
-رمضااان رمضان
ضحك اسمعه يكح شويه وهم حجه بصوت اليتيم
بريا:: گبل رمضان متت من الجوع.
-شكد جذاب مو عدك مرت أخو بالبيت مــاسه اصلاً طبخها حلو تحب تطبخ حتى وجوهكم راح الصفار منه وسمنتوا صارلكم مده اعاين عليك وعلى اخوك مستعدلين وجوهكم مورده على الاكل.
يضحك وكاتم صوته رد گال بصوت يفلش الگلب عبالك يريد يبجي
بريا:: تطبخ بس الرجلها،
-احلف.
-ما اجذب انا.
-ايا ادبسز يا مــاسه الا أطيح حظها
-اي جا شعبالج والنوب ياكلون گدامي هيه وميثم يقهرون بيه.
-يمه سوده عليَّ، تعال عيش عدنا.
بريا:: گتلهم ما يخلوني كتله مــيثم خل اروحن لبيت عمي شامل اعيشن وياهم گالي انطم واكعد يريدني اخدمه.
-يااا عود صدك؟
-اي رنـــه ااي اوووف لو تدرين النوب هاي مــاسه حتى الثلاجة تقفلها عليَّ.
ما اصدكه بس من سمعت صوته صدكته يكسر الگلب واظنه بچه
-جاي تبچي بريا.
-لا
-صوتك مال واحد يتيم ويبجي.
واسمع صوته مختنك يبجي نمرد گـــلبي عليه
-يا بريا تبجي؟ عمت عيني.
واحجي وما يحاجيني
-بريا كافي عليّك العباس
وهوه ميت من البچي انفطر گـــلبي عليه وصدكته تحلفت بماسه اطيح حظها واگل الطرواده على مــيثم واخليه يموته، مشيت للحوض غسلت الطاسه اليمه حطيت بيها ماي ومشيت اصعد على الدرام اطيه اله يغسل وجهه رديت يم السياج واسمعنه بعده يبجي
-لا تبجي والله انه اليوم اطيح حظهم اثنينهم مــاسه وميثم .
ودنيت الدرام يم السياج كضيت الطاسه بأيدي وصعدت حتى اطيها اله مديت راسي واشوفنه كاعد على بلوكه يم السياج يضحك وكاتم صوته مسوي روحه يبجي وماشايل راسه ما يدري بيه جاي اعاينله
وهوه مدنك يتحمحم يسوي صوت اليتيم وگال
بريا::كلها البالقرية ما يحبوني بس انتِ.
عدلت طاسة الماي البأيدي ورشگتها فوگ راسه شهك وفز التلفون بأيده متنگع رافع اديه من الماي شال راسه يعاينلي وجهه ينكط خزرته
-تجذب عليَّ؟
-هاي عليمن شمرتي الماي؟
-على جددك والحسين النوب لو جذبت عليَّ الا افشخك.
شال عينه خازرني
بريا:: حيووانه اذا ما غطيتج بالساگيه معتب.
-يمه خووفني يمه هاااك هاك غطني بالساگيه.
احجي بحرگه ومادتله ايدي
بريا:: وخرري ايدج لا اكسرها.
-امشييي مناه يله امشي لو ما طــروادة مربيني خوش تربيه چا هسه غلطت عليك غلط ماكو منه.
وهو وخر الچفيه من راسه ومسح الماي من وجهه عاينلي يخزر وانه اخزر
بريا:: اغلطي خل اشگ حلگج.
-والله انا الاشك حلگك وحلگ اليطلع وراااك.
احجي وحاطه ايدي على صفاحي متخوصره بحرگه وهوه فتح عيونه على وسعهن تقدم بغضب يصيح
-ووولج
وصعد على البلوكه يريد يلوحني فزيت اريد ارد ليوره نگلب بيه الدرام وطحت للگاع صرخت
-اااااخ
بريا:: اسم الله رررنه تعورتي.
وانه مهروسه بالگاع دشداشتي مرفوعه من رجليَّ والوب من وجع ظهري وراسي وهوه يصيح سطرني
-رنـــه بس حاجيني رنـــه تعورتي ولج رنـــه حاجيني.
اريد اگومن ما اگدر الوجع بكل مجان بجسمي والحجار الصغار جوه ظهري اريدن بس الوجع يخف واكعد وهوه خبصني وينج صخمه حاجيني
وانه احجي وي روحـــي والله ولا احاجيك الا يردلي حيلي حتى اعوفن تربية طــروادة على صفحة واطلعلك رنـــه تربية روحها توني اكعد عدل واشوفنه مچلب بالسياج ويعاينلي ويحجي
بريا:: تعوررتي رنـــه تعوررتي؟
صرخت بوجهه ومديت ايدي على دشداشتي انزلها على رجليَّ وهوه من صرختي فز ونزل بساع يصيح
-ما شفت ما شفت.
-والله اموووتنك والله
-ما شفتت.
-خلي يجي طــروادة الا اگله.
-شتگليييله تسودنتي؟
-اكله شاف رجليَّ يا ما تستحي يا ماعدك اخلاق كون تطلع بميثم .
-كااافي سدي حلكج، تعورتي؟
-امششي ولي مناه.
حجيتها وگمت ايديي على ظهري وكوه امشي طبيت للبيت عــفراء مركبه الفطور وغافيه يم شمس، طبيت سبحت اريدن الوجع يخف ومن طلعت لكيتها كاعده طبت للمطبخ وانه ضليت يم شمس.
""""
رغد:: ما گدرت ما الوم روحي أربعة ايام انه ما شايفته إلا بالصدفة باليوم الخامس طبّ للبيت وجهه ذبلان وگوه فاتح عيونه، وبدون ما يعاينلي مشه للغرفة فتح الكنتور يريد ياخذ دشداشة تقربت يمه حطيت ايدي على جتفه احاجي
-سلطان.
حجيتها وصرت بصفه زفر نفس بحسره ايده على الهدوم المعلگه نزل راسه على جتفي سنده واحس ثگله كله صار علي مديت أيديي اسنده ونزلت للگاع ضم روحه الحضني واسمع بس شهگته المردت گـــلبي وصوته المخنوگ من يردد
-مات ابني.
جرن دموعي وي دموعه يحجي والغصه خانگته
سلطان:: نهد حيلي والله نهد حيلي.
مسحت دموعي بحيره ما عندي حچايه تصبره وتواسيه، ساكته اسمعله وهوه روحه ممروده يشهگ من يگلي
-امي ما تكتل ابني ما تسويها ما تحرك گـــلبي هيج غيث ماله ذنب بشي ما تكتله رغده ما تكتله مو حاجيني كليلي ما تكتله.
-لاا لا.
امسح على ظهره ابجي تمدد على رجليَّ ومغطي عيونه بأيده ضل بالنصّ ساعة وخرت شعره من وجهه
-سلطان تگوم تسبح؟
كعد على حيله يهز راسه اي وانه ايدي على ظهره دار وجهه عليَّ يريد يحاجيني ودار وجهه مني حط ايده على عيونه مسح وجهه ودار من جديد يريد يحاجيني هم ما گدر مدري شبيه دفع أيدي من ظهره
سلطان:: وخري عني.
ابتعدت مستغربه وهوه وكف يعاينلي ويدير وجهه من عدي صاح
- خرب بالساعة العررفتج بيهاا.
فتحت عيني على وسعها مصدومه، طلع من الغرفة يرگع البيبان وراه حيل مخليني بصدمتي ما مستوعبة درت عيني على دگة الباب مسحت دموعي بساع ومشيت فتحته صارت بوجهي مــاسه وبس شفتها شهگت ابجي واشكيلها
-مــاسه يگلي يگلي خرب الساعة العرفتج بيها.
مــاسه :: كعدت على أركبها تبجي سديت حلكها بأيدي واهمس بأذنها
-صــيهد صــيهد بالباب.
بس شالفايده بساع نتر
صــيهد:: لمي هدومج وتعااي لنعل ابووه لا ابو اليطيه مره.
وكفت رغد تمسح دموعها مصدومه گالتله
-ما اجي هوه مقهور ما يدري بروحه شيحجي.
طبّ خازرها مارضت تجي خليته يشتعل وينطفي من آلقهر ولا خلّاني يمها من شافها عاندت
-امشي.
طلعت وياه على اساس يوديني لبيت اهلي رجعني لبيتنا ومن شفته اعصاب سكتت ما كتله ترى چنه رايحين لبيتنا
سد باب الحوش عليَّ وراح .
مشيت ذبيت عبايتي وطبيت للمطبخ رديت شعلت الطباخ ورجعت الجدوره على النار طلعت ارش الحديقة وكلبي يم رغد ،گبل الفطور بنص ساعة أجوا بريا وميثم، عاينلي وانه أحضر اللبن دنك ما يحط عينه بعيني گال
-الله يساعدج.
-ويساعدك.
مشه للغرفة اخذ هدوم وطب يسبح اعاين ورّاه بقهر يحجي وياي بس بعيد وبأسلوب بارد اخاف لا اگله حچيي الحجيته الك كبل من وره السحر اخاف ما يصدگني ويفشلني ضليت محتاره طب بريا للمطبخ يسأل
بريا:: ليش بعدكم متزاعلين شنّي السالفة
عاينتله بقهر
-احجي وياه وهوه زعلان من عدي.
يعاينلي ضايج ساعدني يصب الزلاطه بصحونه ويعلم بيه
-شبيج اخوي ينضحك عليه بحچايه حلوه صالحيه نمونه احجي وياه حچي حلو وهوه يرضى
يحجي مبتسم درت عليه وعاينت للحمام مــيثم بعده يسبح كتله
-احجي وياه روسي؟
عاينلي بطرف عينه وهز ايده
بريا:: تضحكين علينه انتِ ؟ تتسودنين من نحجي يمج روسي تالي هسه تردين تحاجينه؟ اكعددي
-علمني حباب.
ضحك ودار علي مكتف اديه ورافع حاجبه گتله
-علمني ترى احرض رنـــه ضدك اكلها يخلص الليل يحجي وي بنات بالتلفون.
-كليلي شني التردين تتعلمينه؟ اعلمج وانا الممنون.
ضحكت وعيني للحمام كتله
-علمني اكله احبك بالروسي
مديتله تلفوني
-اكتبلي لفظها بالعربي
هز راسه خوش كتبلي كلام روسي بس بأحرف عربيه اخذت التلفون منه اقرأ كاتب
-تي طُلكا موي أسيول
-شو طويله
-هو الحچي الروسي طويل
احفظيها .
هزيت راسي خوش قفلت التلفون وعفته على صفحة من طلع مــيثم من الحمام صلوا وصبينه الفطور ياكل ساكت حتى وي بريا ما يحجي، وره آلفطور بشويه طلع، وبريا اجه عليه وهـــب وراح، ضليت كاعده ل١٢ متانيه ليمت يرد للبيت گطع گـــلبي بديت اغفي يله اجه، ضميت روحـــي بالفراش وهوه راح سبح يله اجه حط تلفونه على الشحن، واجه للچربايه، تمدد بجهته متحسر وانه مسويه روحـــي نايم
وشوي شوي أتقرب عليه الحد ما حطيت راسي على صدره وقربت وجهي الرگبته زفر نفس بحسره بسته فوك لحيته واحجي بهمس
-مــيثم.
عبر ايده يلفها عليَّ وقربني الصدره اكثر رفعت وجهي ومديت ايديي اثنينهن أحاوط وجهه
-مــيثم أسفه
-على ياهي منهن.
نزلت نفسي ابوسنه واحجي مختنگه
-على كلشي والله مو بأيدي من ضوجتك وحجيت حچي مو زين.
تلمس شفايفي بطرف اصابعه يحجي ذبلان
-بأيدمن؟ حچيي خناجر نايمه بگلبي!
-احجيلك وتصدكني؟
مد ايده وره راسي ينزلني آله يبوسني ويبتعد
-أحجي.
-والله ما اجذب عليك بس لكيت سحر بحديقتنا اسأل امي اذا تريد والله من وره السحر حجيت وياك حجي مو زين.
وخرني من صدره مصدوم
-يا سحر؟
-سحر يخليني اكرهك والله مــيثم والله انه احجي الصدك.
كعد على حيله وانه احجيله كلّ السالفة
مــيثم:: ليش ما حجيتي اول ما دريتي؟
-خفت لا ما تصدگني.
-اصدگج اصدگج
سكتت اعاينله بقهر جراني الصدري شبگته انه هم واحس بيه يبوس راسي ووخر الهدوم من جتفي يبوسني ويردد
-لا تعيدينها سمسم لا تعيدينها متت بحچايتتج.
ضميت وجّهي برگبته
-ابد واذا تكررت كول هاي مسحوره
ضحك يلمني بين أديه بلهفه وشوگ وانه بكل لحظة ادعي كون ربي يبعد عني السحر وشره واضل وي مــيثم بحياتي الهادئه.
متمدده على صدره وايده تتلاعب بخصل شعري گال
-تحبيني؟
شلت راسي من صدره لامه الغطا عليَّ كتله
-انطيني تلفوني وهسه انه اكلك.
مد ايده بصفه على الميز جابلي تلفوني فتحته اقرأ الكلام الروسي اللي كتبه الي بريا، قفلت التلفون وتلمست خد مــيثم برومانسية حجيت كلمة كلمه وبصوت ذايب كتله
-تي طُلكا موي أسيول
صفن بوجهي وهز راسه يسأل
-شگلتي؟
سكتت خفت لا انه لفظتها غلط وما فهمني كتله
-انه احبنك بالروسي.
ضحك وعبر ايده على ظهري يحضني ويضحك من كل گلبه
مــيثم:: جاي تگليلي انتَ حماري الصغير.
شهكت وبساع كتله
-بريا علمني والله.
-واحد طايح حظ هذا اسأليني انا اعلمج خيولي الخايس
-سهله انا آله بسيطه
ضحك اخذ تلفوني يعلمني كلمات بالروسي، بالسحور ما گدرت احاجي بريا شفته كوه فاتح عينه ثاني حاجيته گالي
بريا:: حتى بعد ما تهدديني تخربين بيني وبين رناتي
-رناااتك؟
-بدويتي غزالتي رنتي ليرة
الاحبنها.
ضحكت اهز ايدي وهو من يجيب طاريها عيونه تضحك وملامحه كلها تنتعش، وصلني الاهلي وراح، لگيت رغد يمهم عيونها مورمه من البچي گـــلبي راح سألتها بخوف
رغد:: اخر شي توقعته من سلطان هذا الروحي بيه، وي السحور اكلت شويه شربت چاي كضيت صلاة وتمددت اريدن انام توني اغفه وحسيت بيه يمي
-سلطان.
جرني جواه ويجر بملابسي دفعته
-صاايمه، سلطان سلطان
وهوه ما مهتم ايده لمستها قاسيه مد أيده على رگبتي يخنگني دفعته بكل حيلي ونزلت من الچرباية متسودنه واصيح
-انتَ شبيييك؟
شعلت الضوه عيونه حمر وبس لمح وجهي صيح يغلط ويشمر عليَّ الفراشات
سلطان:: وخرررررري وخرررري امشي منااااه.
-سلطااان.
دار وجهه من عدي حاط اديه اثنينهن على راسه ويصيح بخبال مسحت دموعي مرعوبه ورحت يمه بس اريدن آشوفه شبيه عاينلي ودفعني بغضب.
طحت بالگاع ارجف عيونه حمر دم غمضهن بقوه يصيح ويدك على راسه
-وخرررري عني وووخري.
وكام حاني ظهره يردد بنفس الحچايه طلع من البيت، بچيت بچيت بقهر روحـــي مفرفحه وگمت خلصان حيلي خابرت وهـــب ورحت الاهلي عاضه اصابعي ندم على الساعة الرضيت بيها اتزوجه
""""""
ريـــمه :: مسحت دموعي اخذت الصينية وصعدت الغرفة الاء فتحت الباب نايمه بچربايتها وجها اصفر ومزلغ، كلساع تطيح وماخلوها تصوم، اعاين سلطان كاعد بصفها على الكرسي مرجع راسه ليوره وغافي وهيه كاضه أيده تحمحت وفز وهي على سحبت ايده فزت بخرعه
-سلطان سلطان.
رد كض ايدها
-يمج.
وغمض عيوونه حييل ساد ايده ويدك بيها على راسه تقربت يم الاء
-الاء تاكلين شويه حتى ما تتخربطين؟
حركت راسها گوه تهزه لا
-حبابه والله مو زين عليج.
مسحت عيونها كعدها سلطان عدل واخذ الصينيه من عدي هوه يوكلها عفتهم وطلعت الهاجر من يوم مالكيتها طايحه هي كاضيها بچي توسلت بيها تحاول تحجي ما ترضى الحد ما بيوم بالليل توني كاضيه مواعين السحور وصعدت فوك غمضت عيوني اريدن انام وأسمعها تبجي، وكزبر جسمي فاتحه عيني على وسعها من حجت بصوت متلعثم ومو واضح
هاجر:: غ.. غي.. غيو..ثي.
كعدت على حيلي اشهك جريتها من ايدها اكعدها ما مصدكه لامه وجها بين ايدييي
-تحجيين هاجر هاجر تحجين سمعت صوووتج سمعت صوووتج.
جريتها الگلبي لامتها حييل ما مصدكه روحـــي وخرتها ابوس بوجها ابجي
-حجيتي هااجر حجيتي؟
درت وجهي على فتحة الباب امي واكفه وخازرتني صاحت
-تعااااي
وهاجر بس شافتها ردت للفراش غطت حتى راسها، توني اريد اكلها يمه هاجر حجت بس من شفت غضبها وايدها الترجف بعصبية گمت ساكته طلعت وراها نزلت جوه صار بوجهنا ابوي خزرها وگالي
شاكر:: ريـــمه وره العيد ياخذج هالچلب طــروادة يعقد عليج.
يحجي وامي تحلف تذبحني وما تزوجني وانه اتلفت بينهم ما فاهمه جراها ابوي وهو يكلها
-سدددي حلگج سدي حلگج مده واطلگها منه.
صافنه بيهم واحسها جرتني حيل طكتني راشدي ودفعتني صار وجهي على حديدة الدرج صرخت موجوعة وهمه حايرين يتعاركون بيناتهم شاطت روحـــي من الوجع طلع ســليم من غرفته يصيح عليهم وجرني من ايدي يشوف خدي وامي تلطم وتصيح
ميلاد:: انه اطي بتي الابن شاامل ييييمه ييمه لو يذبحووووني .
جراها ابوي لغرفتهم ويسد بحلكها وسليم أخذني للمطبخ يغلط ويسب بأهلي، حط ثلج على خدي مسحت دموعي
-شكاعد يحجون؟ ما اتزوج انه ما أرضى.
وهوه ساكت ما يحط عينه بعيني جريت ايده من وجهي ابچي
-سليم عاينلي ما اتزوووج ما اتزوج طــروادة يكرهني يعدمني والله.
ابچي واحجي بحركه ارجف يعاينلي بحسره هز راسه اي
ســليم :: بس خل شوي سلطان يتحسن وضعه ونروح نحاجي طــروادة يخابر شيخ حيدر يگله بطلت، لان ابووووج ما يرضى يخابر ما يرضى يگله جذذبت عليك حتى اكسر بطرواده وافشلنه گدامك، من انعل ابووهم لا ابو شعلااان.
صاح بعصبية وكام من يمي طب الغرفته وانه احس الحد هاللحظة ما مستوعبة اريدن احاچي سلطان اريد اسولفله وهوه يطلعني من هالسالفة كلها بس ليمت احاجيه وهوه مو بحالي.
من ردت ارد للغرفة ما گدرت هاجر قافله الباب نزلت نمت بالهول وكعدتني امي من الصبح على دفره عاينتلها وكاضه بطني
-ها يمه؟
أشرت براسها كومي كمت وياها دايخه ما اتذكر حجيها ما اتذكر بيش طكتني كل الاتذكره جسمي اليوجعني وانه ممدده بغرفتها، گمت گوه على روحـــي من كالت
-كومي سوي الفطور.
گمت للمطبخ ايديي يرجفن وانه ما اركز بشي اجت فرح وياي عاينت لوجهي ساكته گتلها بصوت مبحوح
-الولد وين؟
- سلطان طاح مغمي عليه أخذوه للمستشفى.
حطيت ايدي على گـــلبي مصدومه وهي تتلفت گالت
فرح:: تسودن ضل يصيح ويطك براسه الولد لو مصدوم بموت ابنه لو مسحور.
درت وجهي منها دموعي تجري عقليّ متشتت وافكاري احسها خاويه، اشتغل بروح تعبانه، التفتت على صوت خطوات وراي شفتها هاجر، وجها ذبلان مو نفسها الچانت چنها ورده مفتحه، جوه عيونها سواد وشفايفها بيض مكشرات.
جريتها من ايدها غسلتلها ابوس بيها واحضنها عبالك ما شايفتها من سنينين كعدت يمي بالمطبخ عيونها للباب والدموع تلمع بيهن رديت يم المطبخ وكلساع اعاينلها ، لمن اجوا الولد جايبين سلطان بأيده كانونه رادوا يروح الغرفته گالهم
-لا عوفوني هنا.
كعد يم هاجر وهيه شبگته تبجي لمها الصدره يبوس راسها، واجت امي باست سلطان وتكله
-شلون صرت يمه؟
ســليم:: زين بعده ما ميت.
عاينتله امي بخزر وسلطان ساكت هاجر ضامه وجها بصدره ودموعها تجري وخرت امي من يمنه وسلطان وخر هاجر من صدره مسح دموعها يحاجيها بصوته المتعوب
-مابيه شي لا تبچين.
وهيه ترجف وتبچي بقهر، درت وجهي للباب الداخلي نزلت الاء عيونها مورمه دايخه ومچلبه بالمحجر ضلت واكفه يم الدرج مغمضه عيونها .
نزلت عيوني لسلطان وهاجر من ســليم گالها
-تبچين على سلطان؟
هزت راسها لا
ركزت بيها صدرها يصعد وينزل تنفسها ثگيل دار وجهه سلطان عليها مستغرب لم وجها بين أديه شالت ايديها سوتهن مثل الطفل ودموعها تجري حرّكت ايديها كأنما بحضنها طفل.
گالها بصوت مبحوح وعينه بعينها
سلطان:: غيث!
غمضت عيونها تبجي بشهگه وتهز راسها ااي وسلطان گمت اسمع صوت جرت نفسه احس حتى صوت دگات گلوبنه العاليه اسمعها، يعاين لوجها ساكت وهي شفايفها يرجفن ودموعها تجري اعاين لبلعومه بلع ريگه بغصه گالها
-مات؟
ضمت وجها بين ايديها تبچي حييل وتهز راسها اي، تلفتّ سلطان بيناتنا ورد عاين لهاجر يريد يسألها وخايف من ردها، جر ايديها من وجها متحسر صوته يرجف
سلطان:: شفتيه شلون م ات؟
شهگت بغصة روحها ممروده كعدت على حيلي روحـــي رايحه واذني تون، ثگل النفس بريتي وعيوني ما فارگتهم.
هاجر شالت راسها ليفوك وخلت رگبتها واضحه گدام سلطان حطت أصبعها على طرف رگبتها وجرته من الوريد للوريد.
شكرا لزيارتكم عالم روايات سكيرهوم
