رواية أرض الخناجر الفصل السادس والأربعون بقلم ايلول
هلي ..
صواب البروحي
الليله اضن چتال
دمي هناك ، دمي هناا
كلساع ويطگ من صوب ، نافوره !
هلي ضمولكم صوره
══━━━━✥◈✥━━━━══
ريـــمه :: كلنه مراقبين هاجر وهي تأشر على رگبتها ومخليه اصبعها مثّل السجينة ترجف ودموعها تجري، وسلطان روحه ممروده وعيونه حمر حطيت ايدي على حلگي اكتم صوتي وهو بصوت مخنوگ گالها
سلطان:: ذبحوه؟
شهگت هاجر شهگه من نص گلبها واديها ترجف هزت راسها السلطان أي، ووي هزت راسها، وبلحظتها سلطان گام تقيئ راح وراه ســليم ويصيح عليَّ
-اطيني مااااي.
مسحت عيوني وگمت متخرذله وأسمع امي تصييح وتلطم على رجليها
ميلاد:: راااح يموووت ابني.
ســليم:: بس وخررري يمه وخرري.
اطيت ماي السليم غسل لسلطان، والاء تخربطت يم الدرج حارت بيها فرح؟ وانخبص بيتنا مرتضى يسب ويغلط ويصيح على هاجر
-المسوووددنه بطلي سوالفج لا احط چيله. بكصتج
دفعه سجاد يتعارك وياه واصواتهم علت حيييل الاء صحت تبجي وتصيح على سلطان تريده يجي يمها، سجاد شبگ هاجر يسكت بيها بلحظة بيتنا گب. من الصياح كلمن يصيحله بصفحة.
كام سلطان گوه يمشي امي وسليم كاضينه دفعهم وطب للمطبخ دفع مرتضى من گدامه ورد كعد گبال هاجر ما مهتم لصياح الاء جر هاجر من أيد سجاد كعدها كدامه وبأديه اليرجفن لم وجها صوته مخنوك يريد يحاجيها ما يگدر الولد كلمن يحجيله بصفحة هوسه وصياااح وانه عيوني ما فارگت وجهه هاجر
رجفة شفايفها نفسها الثگيل عيونها المنفخة من البجي وداير ما دايرهم احمر ورموشها مچلبه بيهن. الدمعه.
صاح سلطان بصوت عااالي هزنه هز
سلطان:: اسكتووووا اسكتووووا.
سكتوا كلهم، ضل بالمطبخ بس صوت نشغات هاجر من بين الدموع، وصوت نفس سلطان العالي، يتوسطهن صوت بنكة المطبخ الثگيل، حتى الاء انكتم صوت صياحها الچان راج البيت اعاينلها ترجف بأيد فرح أصابع ايدها ترفعهن تريد تنزل ايد فرح من جتفها يرجفن حييل وما يثبتن، واكفين بالمطبخ كلنه وعيونه على سلطان وهاجر بصوت يرجف ومتردد يغص بالكلمة گالها.
سلطان:: ياهو ذبح غيث؟
بمجرد ذكر اسمه مالت براسها على صفحة عينها بعينه انعصر وجها تبچي بحرگه غمض عيونه يتنفس بقوة وحجه بغصة
سلطان:: امي ذبحته؟
ووي حچايته صرخت امي تلطم على رجليها شلون هيج يتهمها سدّ حلكها ســليم خازرها بغضب سكتتت تتراجف بعصبية وحرگه، ومرتضى صف وي امي ويصيح يريد يجر هاجر من ايد سلطان يكتلها وسليم وسجاد يدفعونه بعصبية عنها دار عليهم سلطان عيونه حمرر خازرهم ردوا سكتوا وامي عيونها على هاجر التبچي بأيد سلطان دار عليها يحرك ايديه على وجها اصابعه ترتجف يمسح دموعها من خدها گاللها وصوته منتهي
سلطان:: هجوره ياهو ذبح ابني؟
ودنك مختنك الغصه تصعد وتنزل ببلعومه، شال راسه لعيون هاجر همس بخنگه
سلطان::امي؟
حجاها ورجفن شفايفه خايف من رد هاجر لا جوابها يذبحه وره ابنه
شهگت هاجر بغصه تهز راسها لااا.
عله صوت امي چانت خايفه على سلطان وهسه تدعي عليه بحرگه لان اتهمها بذبحة غيث، وصوت مرتضى العالي يغلط ويسب ويتهم هاجر بالجنون بين كلمه وكلمه يصيح "المسودنه"
فزوا على صوت الكزاز التطشر من سلطان رگع الكلاص بالحايط سكتوا كلهم إلا الاء تبجي وتصرخ
الاء:: ااابني انذبح ااابني انذبح.
تصيح بكل صوتها وتتخربط كل لحظة تريد سلطان يگوملها وهو ما مهتم الاحد غير هاجر، عاين على الاء حط أيده على حلكه خازرها
-اشششش.
سدت حلكها فرح وهي تبجي وترجف اعاينلها من طرف رجليها الراسها تهتز مثل سعفه بنص عاصفه شلت عيوني منها جفني ثگلان ووشة تصير بأذني گـــلبي ممرود ينقبض بين لحظة ولحظة
رد سلطان عاين لهاجر عينه بعينها يمسح دموعها وهنه يجرن گالها
-ياهو ذبح غيث؟
بلعت ريگها تعاين لعيون سلطان بخوف، وانه گد ما اراقبها وكلبي يرجف حتى ما التفت احس على فرح من دفعتني تريد تاخذ ماي تغسل وجهه الاء، الگاعده بباب المطبخ الداخلي على اول بايه من الدرج ترجف وتعاين على سلطان وهاجر.
سلطان:: هاجر
دار وجهه يكح مختنك مسح وجهه روحه رايحه وگوه مركز وضال بوعيه، رد يعاينلها يحجي كلمة ويختنك يغص بالثانية
سلطان:: هاجر، ياهو الذبح غيث؟
شالت ايديها اليرجفن مسحت عيونها بقوه مو بس تحاول تمسح دموعها... اصابعها يحاولن يمسحن من عيونها منظر اقسى وابشع من كل تخيلاتنا، سكت كلشي وثگل الهوه بالمكان العيون تراقب هاجر وسلطان بين اللي يتمنى يعرف الحقيقة وبين الخايف وبين اللي كل نظراته غضب، دارت عيونها الي ترمش بثگل تريد تأمن تريد تعرف شلون تتصرف هزيتلها راسي اااي مأيده
التفت بجسمها من بين ايدين سلطان عاينت على
الاء وفرح وشالت ايدها ضمت اصابعها وأشرت على الآء بالسبابة.
لحظة احس بيها حتى النفس وگف لحظة محد بيها نطق ولا حتى رمش، أيد هاجر مرفوعه بأتجاه الاء، فرح بساع وخرت من يمها وهاجر ضلت مأشره على الاء، اللي فتحت عيونها على وسعهن بصدمة وحزن حركت عيونها من هاجر لسلطان تهز رأسهآ لااا، ودموعها تجري ردت هاجر عاينت لسلطان تبچي وبأدين يرجفن تأشرله على رگبتها بلا وعي وتردّ تأشر على الاء تبجي بحرگه ومحد من عدنا نطق حرف او تحرك من مچانه. كامت هاجر تركض جرت السجينة من الكاونتر كعدت كدام سلطان وحطتها على رگبتها تشرحله.
وسلطان بس فاتح عيونه على وسعهن ما مستوعب، صرررخت الاء بغضب
الاء:: جذاااااابه.
وبنفس اللحظة شالت كلاص الماي شمرته على هاجر اجه براسها، شهگت فازه ولحظة صحتنا كلنه من صدمتنا
صوت الصياح وعانه نستوعب، هاجر حطت ايدها على كصتها والدم ينفض منها غرك جفها وينزل على ساعدها، الاء تصرخ بغضب وحقد عيونها الچانت متروسه حزن انترسن شر، وسلطان على نفس الكعده ونفس الصدمة لمن شاف دم هاجر وبلحظتها گام على حيله بغضب جر السجينة من يم هاجر كضه سجاد وماگدرله طيح السجينة من ايده دفع سجاد وركض على الاء شالها من رگبتها وهي تصررخ بكل صوتها، وامي تصرخ وتلطم صياح وصريخ وهوسه الولد ركضوا وره سلطان طبب الاء الغرفة امي وسد الباب.
ركضت لهاجر حطيت الشال على راسها ولميتها الصدري ما مستوعبة شي، كب الصريخ ســليم بساع خابر على الشرطة وامي طلعت تركض تفزع تخاف لا سلطان يذبح الاء ويطب سجن .
والولد وصوت صياحهم باب غرفة امي قوي يردون بس يكسرونه ما يگدرون يطلعون للحوش يتراكضون ويردون يتراكضون ما يدرون شيسوون وصوت الاء هز البيت ، جريت هاجر لحضني يم الحايط خايفه لا ننداس اضغط على كصتها حيل وهيه مجلبه بيه كل حيلهااا ترجف وتشهك
طبت امي تركض وتصيح بصوت يرجف
-الحكووووه الحكوووه راح يذبحهاااا.
واعاين وراها طبوا يتراكضون صــيهد وطرواده ركضوا يم الغرفة يردون بس الباب ينكسر ويصيحون على سلطان بغضب ويسمعون صريخ الاء، جريت العباية اغطي بيها راسي من كلها التمت اجدادي وولد اعمامي، كسروا الباب وطلعوا سلطان ثلاثتهم مچلبين بيه يردون بس يطلعونه من البيت وهو نار ومشتعله بينهم ايديه غرگانات بالدم
جروه گوه عليه طلعوه للحوش وسليم يصيح بوجهه
ســليم:: تطببب سجن من وراهااا من وراهاا؟
وهو مفرفح بأديهم يجر روحه بغضب ما يشوف شي گدامه غمضت عيني ارجف واعصر هاجر بحضني حييل وصوت الصياح والصريخ يزرف الاذن ومن بين كل الاصوات اسمع الاء تصيح بكل صوتها من الغرفة
-يييمه غيوثي يمممه.
وامي تصررخ وتلطم
-كتلتيه كتلتيه واتهمتيناااا شحصليتيييي؟
والاء طلعت من الغرفة تروح مناه وتجي منااه غرگانه بدمهااا وعين من عيونها ما تفتحها والدم يصب منها، شافها سلطان وجر روحه من بين الولد يصيح بغضب يريد يطب للبيت وهمه كاضينه يصيحون عليه غمضت عيني اسد حلكي بأيدي وأكتم صوتي صياح سلطان ولوعته طحنت گـــلبي طحن، طاح بين اديهم متخربط امي وابوي الطول عمرهم ضده من شافوا حاله تسودنوا امي تصرخ وتلطم ابني راح يموت وابوي يوخر بالولد بس يريد يشوف سلطان.
ثواني والتلفونات دكت اهل الاء يخابرون محد يرد عليهم والولد تسودنوا صاحت عليهم امي بغضب
-صعدددت خابرتهم صعدددت.
صاح سليم ويتراجف
ســليم:: لو مو تخابر اهلها غير للسجن ما تطلللع.
اسمع صياحهم ارجف وخرت هاجر من صدري شلت الشال من الجرح بعده ينفض دم رديت ضغطت عليه وابجي بخوف وصدمه، الولد صياحهم عالي وسلطان بس صحّى شوية گام يريد يطبلها يحلف بحرگه وغضب يذبحها، لمن سمعوا سيارات اجن صاح طــروادة على سجاد
طــروادة ::اخذ اخواتك وعايلة مرتضى اخذهن لبيتنا لا ياخذونهن للتحقيق.
طب سجاد يركض يصيح علينه بچيت احاجي بصوت مخنوك
-هاجر شگ رأسها چبير.
كومني من ايدي وهو يكلي
-ضلي حاطه الحجاب عليه هسه هسه اخذها للمستشفى.
اجت فرح وبساع طلعنه من وسط صياحهم وهوستهم البيت عمي شامل تلكنه البنات، كعدت بالحوش على حيلي جسمي يرجف وعفراء بساع اخذت هاجر من أيدي وركضت بيها تغسللها وتحط شاش على جرحها،
وفرح تلطم على رجليها وتصيح
فرح:: وولج ذابحه ضنااها ولج ذابحه ابنها يييمه يييمه وتبچي عليه ولج تبچي عليه وهيه الذابحته.
وانه النفس گمت كوه اجره وجسمي يرجف گـــلبي احسه معصور عصر، فززتني رنـــه وهي تغسل وجهي بماي بارد عاينت لوجها خايفه علي غسلت وجهي وتحاجيني بخوف
رنـــه:: وجهج اصفر راح تتخربطين.
وانه بس فاتحه عيني عقلي مشوش، شوية وصارت هوسه وصياح وصوت رمي ركضت للباب اريدن اطلع خايفه على اهلي واخواني، جرني البنات ما مخلياتني.
اهل الاء اجوا وگلبوا الدنيا يردونها وولدنا يتعاركون وياهم لحظات وطبكن سيارات الشرطة نخمش گـــلبي نعاين من الباب بخوف، عرك وصياح وغلط اهل الاء ما يرضون ياخذون بتهم، والشرطة جرت الكل الاء واخواني وأمي وابوي حطوهم بالسيارات راحوا ضلت سيارة وحده وي سيارات اهل الاء وهمه يتهاددون على جدي والولد وصيهد وطرواده يتصايحون وياهم
هددوا وراحوا ووراهم راحت سيارة الشرطة، عــفراء بساع مدت راسها وصاحت على الولد
-طــروادة بساع شغل السيارة هاجر كضه دمها.
وأحس فجأة نبهتني على هاجر طبيت للبيت اركض لكيتها بالهول عفراء لافه راسها بشاش، وجها أصفر سانده راسها على الحايط ومغمضه عينها
-هجوره.
فتحت عيونها بس شافتني مالت براسها وبچت بخنگ تأشرلي على رگبتها كعدت يمها بخوف ولميتها الصدري ابوس بيها وارجف.
طبن البنات للبيت وعفراء صاحت على رنـــه مستعجله
عــفراء:: رنـــه بساع جيبي شال لريمه
وفرح كالتها
-انه راده للبيت
حجتها واخذت جهالها طلعت للبيت وخرت العباية من راسي اخذت الشال من ايد رنـــه لبسته ولبست العباية وگمت سانده هاجر طلعنه وي عفراء، طــروادة يسوق وصيهد بصفة
صعدنه ليوره اعاين لسيارة مــيثم اخذ جدي وعمي وليد ووهب راحوا للمركز وره اهلي، جريت هاجر لصدري وهيه مچلبه بعبايتي غمضت عيني مختنگه احس الحد هاللحظة ما مصدكه ما مستوعبة صعب اقتنع صعب اصدك أم تكتل طفلها وتبچي عليه انه الشفتها شلون تبجي وتتخربط كل شويه انه الحرت بيها طوّل هالمده انه الشفتها شلون تبجي وتفز من نومها تصيح اريدن ابني.
دنكت عيني لهاجر بست راسها ودموعي تجري اذا انه عقلي ما مستوعب ولا مقتنع بالصار انتِ شلون شفتيه، غمضت عيني اذكر كلشي، صار بيوم العرس من هيه ردت للبيت كبلي ومن لكيتها متخربطة وتمرضت وراها.
لمن وصلنه المستشفى نزلنه طبينه للطوارئ اخذتها عــفراء من ايدي وانه واكفه اعاين وراها مسلوبه روحـــي
طــروادة:: امشي.
دنكت مسحت عيوني وتبعت عفراء، خيطوا جرح هاجر وهي بس دموعها تجري ابد ما نظقت خلتني اشك جنت اتخيل من سمعت صوتها ذيج المره.
صــيهد طلع جابلها عصير وكيكه وهيه ما ترضى تاكل الا يصير الفطور كالولها ما يصير ولا رضت حتى من حطولها مغذي، ردينه للبيت الولد يحجون بالسيارة وكلساع واحد يخابرهم
نزلت ونزلت هاجر عفراء چلبت بينا تريد نروح وياها البيتهم ما رضيت طبيت البيتنا، المطبخ كله دم، وعلى طول الدرج قطرات دم من الاء، حطيت هاجر بفراشها ونزلت وي فرح نظفت ورديت الهاجر بس فتحت الباب فزت سدت دفتر الرسم مالتها المضموم رجعت ضمته، طبيت للغرفة ورحت يمها وهي قفلت الخانه ودارت تعاينلي بعيونها الذبلانه الدمعه تتلولح برمشها.
وانه كاضه دموعي كوه على روحـــي وبلحظة بچينه اثنينا شبگتني حييل نبچي بغصه وقهر نبچي على غيوثي وعلى صدمتنا والصار .
وخرت من صدري تأشرلي وتشرح هزيت راسي لا وكضيت ايديها
-احجي هاجر لا تأشريلي.
حركت شفايفها تحاول تحجي وماتكدر هزت راسها ورفعت اجتافها بمعنى ما اگدر احجي، ورجعت تأشرلي ولأول مره ما افهم كل شي شرحته، كتلها اكتبي ما رضت دموعها تجري وفهمت بس اخر شي سألتها
-شمرته بالشط؟
نزلت ايدها ضايجة زفرت نفس بحسره وشالت ايدها تشرح تأشر على رگبتها اشارة الذبح وحطت أديها بالگاع تأشر شلون تمدد وتحرك اصابعه بطريقة غريبة ومشعوذه وبعدها أشرت على الماي كش جسمي كضيت ايدها
-ماا.. ماجاي افهمج!! ذبحته وذبته بالشط؟
لمت شفايفها تسويلي بأيدها شوي صح، سكتت ردت هيه تمددت، وانه حيره تجيبيني وحيّره توديني لمن ردوا أهلي للبيت
الاء وهمه بالسيارة گبل لا يوصلون للمركز ضاله تصرخ وتصيح عل سلطان وبينّ حجينا من الخوف ضاله تحجي بخربطه عرفوا فعلاً هيه الذابحه غيث ليش وشنو الغايه ماعرفوا الا بعد التحقيق. سولفلي ســليم
خسرت فلوسها وذهبها والشخص الرادت تشرد علموده خسّرت زوجها، وبأعترافها ذبحت طفلها ذبحت غيوثي حتى تقدمه قربان للشيطان وتسوي سحر لسلطان ضحت ببذرة من عدها ضحت بأعز شي على الام ضحت بضناها وذبحته بدم بارد وشمرت جثته بالشط بدل ما تدفنها.
ردوا الشرطه اجوا البيتنا وهم رحنه يم بيت عمي شامل
وآهل الاء يوميه يودون ناس علينه مره يهددون مره يصيحون احنا وياكم گوم وهوه احنا صاحبين الحگ، اصعب ايام مرت عليَّ، احير بمنو وابجي على يا صفحة.
سلطان عبارة عن جثة ممدده عيونها حمر ووجهه ذبلان اذا ياكل شويه يتخربط ويتقيئ ويصيح بوووجع يكض راسه ويگلب الدنيا بالصياح، اعاينله ابجي وهو بأثنين اديه يطك راسه
طب ســليم وسجاد يكضون اديه ويحاجونه تسودن
سلطان:: وخررررر وخرررر .
طك ســليم راشدي بكل حيله وانه واكفه بالباب اعاينلهم بخوف
سجاد:: كاااافي شييك تسودنت؟
دفع سجاد بكل حيله وطاح للگاع صرخت وسليم يصيح علي
-صوووتج صوتج جيبيلي مااي.
ركضت للمطبخ ارجف وابجي جبتله ماي وسلطان ممدد بالگاع عيونه مگلبات ليفوك ضال بس الابيض مبين، غسلوا وجهه وطبت امي شافته وتسودنت لطمت على صدرها تصرخ، جانت رايحه عد وحده تعارفها حتى تفك السحر من سلطان، تگابلوا عليه ســليم وسجاد شالوه وطلعوا للسيارة يركضون، اخذوه للمستشفى
كعدت بالحوش ابجي بخوف اخوي راح يموت انتهى ولهسه ما لاگين الحل، امي وابوي لحگوهم بالسيارة، وهاجر اجت يمي بالحوش اثنينا نبجي واندفع الباب اعاين رغد عيونها مورمه وكفت شبگتها تبجي بخنك
رغد:: وين اخذوه؟
-للمستشفى
مسحت عيونها مختنگه وانه اضم قهري وضعفي حتى اگدر أواسيها ضلت يمي شويه واجه عليها وهـــب راحت ودمعتها بخدها.
وسلطان شويه وجابوه معلكيله مغذي وكلشي ما يفيده حتى لو يصحى شويه ويرد يتخربط، من اجي يمه بالليل گبل السحور بلكن ياكله لگمه يعاينلي بقهر نام على رجليَّ مغمض عيونه وصوته مخنوك
سلطان:: تعبان انا ريـــمه.
-يا عيون ريـــمه يا دنيتها ريت التعب بيه يا بعد روحـــي سلطان خويه.
احجي والغصه خانگتني غمض عيونه امسح على راسه گوه كاضه دموعي يحجي بحسره
سلطان:: لو غمضت عيني اشوفنه اشوفن غيوثي ورگبته يسيل منها الدم اشوفنه بمچان كله شياطين.
حجاها وحط ايده فوگ عيونه يعصرهن، جريته من ايده اكعده،
-سلطان عاينلي لا تنام هنا تروح تروح لبيت عمي شامل، تنام غاد بلكن ترتاح؟
يعاينلي ساكت ما ادري اذا يسمعني ويفهمني لو لا اخوي الچان مثل الجبل طاح منحني بظرف ليلة ويوم صفه جلد وعظم، وكل هذا الصار بيه ويگولون الامي وره رمضان تسيئ حالته اكثر ،
تمدد على الچرباية لام رجليَّه الصدره ومطيني ظهره، تلفونه مشمور بصفه من يوم الصار وهو ينام بغرفة ســليم
اخذت تلفونه وطلعت اتلفت اهلي نايمين وسليم بالگيعان وسجاد يم عبود.
كعدت بالحوش ادور بالاسماء بتلفون سلطان اكتب طــروادة ما يطلعلي اكتب كهلان ما يطلعلي ضليت اكلب بيهن اسم اسم لمن لگيته مكتوب بيرغ عراضه.
دست اتصال وتلفتت خايفه بساع رد عليَّ
طــروادة:: الوو.. الو سلطان.
-الو.
نظقتها عاصره التلفون بأيدي حيل وهو سكت شوية وگال
-سلطان بيه شي؟
-احم لا بس اكلك انتَ وين؟
سكت فترة درت عيوني للبيت مرتبكه وخايفه يحجي بصوت ناصي
-چنت بالگيعان وهل راد للبيت بيچ شي؟
-لا بس انه اكولن لو تجي تاخذ سلطان لبيتكم ينام يمكم يجوز يرتاح احسن.
تنهد متحسر
-لا ما عليه البيت.
-ميخالف خل نجرب جا شخسرانين.
-خوش هذا انا گبال بيتكم خل يطلعلي.
گمت بساع فتحت باب الحوش شفته گبالنه واكف شال عيّنه لمحني نزل التلفون سديت الخط ورفعت أيدي أشرتله تعال، دار وجهه يعاين مناه ومناه نزل عينه واجاني
طــروادة:: السلام عليكم.
-عليكم السلام، تعال طب اخذه يمك بلكن يرتاح.
انطاني ظهره ويحاجيني
طــروادة:: صيحيله گليله طــروادة يريدك بالباب.
-تعال انتَ حاچية خاف ما يجي من اكله انه.
دار وجهه عليَّ ضوه البلوجكتر الاصفر صار بوجهه شعره النازل على كصته صاير على صفحة ومتجعد من ميل راسه على جهه وعينه بعيني تحرك شعره وي نسمات الهوه، حجه بصوت اشبهه بالهمس
طــروادة :: ما اطبن البيتكم ووگفتي يمج هنا غلط صيحيله بس كليله طــروادة يريدك يطلع.
عگدت حاجبي رديت ليوره اعاينله وكاضه باب الحوش بأيدي وهو دار وجهه ضايج
-ذاك اليوم طبيت لبيتنا؟
-وهسه ما اريدن اطب
-ليش عيني شني نعضك؟
-يجوز كلشي يصير.
خزرته بغضب وهو عاينلي بطرف عينه ودار مسح وجهه وحجه بحسره
-صيحيله ريـــمه انا مهدود حيلي عليه ما ادري وين اخذه وين اوديه ويصحى.
عفته وطبيت للبيت فتحت غرفة ســليم لگيت سلطان گاعد بالگاع لام رجليَّه الصدره وحاط راسه عليه واديه فوك راسه فز من طبيت مسح وجهه حجيت بخوف
-طــروادة بالباب يريدك.
حرك راسه لا ورد دنك يعصر راسه بين أديه
-حباب گوم مدري شبيه بس تعال شوفه.
مسح وجهه وگام گوه يمشي ولا چنه ذاك سلطان الچان يهز الگاع بممشاه.
طلعت وراه بس فتح باب الحوش . طــروادة اخذه وراح البيتهم
"""
رنـــه :: كل الوادم بصفحه وسالفة عفراء بصفحة لا بيها ولا عليها وتجيها المصايب اعمام منذر كايليله لو تطلكها لو تنطرد، وابوه واخوانه كايليلهم ما يطلگها واحنا نطلع وياه حتى من العشيره مسكتينهم ومنلصمين، بس عفراء ضلت يمنه يخاف عليها لا تروح ويجن يمها اخوات الاء يقهرنها بحجيهن.
من جهه افكر بالنتائج ومن جهه بالي بالمصيبة الصارت انه اذا ذبحولي دجاجه اموتن عليها من القهر هاي شلون ذبحت ابنها بأيدها انسجنت والله اليدري شكد راح تنحكم تمنيتها تنعدم من كل گـــلبي كل يوم بالفطور ينحجي بموضوعهم على طول ايام رمضان كل يوم ينعاد الموضوع وكل يوم تصير مشكله وسلطان يكسر الگلب وطرواده مكسور عليه مايعرف شيسوي هو وصيهد وميثم ساعة ياخذونه لدكتور مر ساعة لسادة ومحد گدر يغير شي من حالة سلطان.
كاعده بالحوش فاتحه نت على بيت جدي واراسل بماسه ساطرتها تحجيلي العدها واحجيلها العدي سألتها على رغد گالت
-مو زينه بس تبجي على سلطان وهوه ما يشوفها يتسودن منها هيه بالاول كرهته لنوب من عرفت سحر ضلت تبجي عليه.
-سوده عليَّ والله مليت من القهر يوميه انقهر على واحد انه.
-شنسوي رنـــه حال سلطان يكسر الگلب امس بريا وميثم يسولفون ماخذينه لشيخ قاري عليه يكلهم سحره مربوط لو بدم لو بشعر من نسله، ولج يعني بجثة غيوثي .
-عزه بعينج يا الاء وانه جنت اكولن بس ميلاد سحاره طلعت ميلاد هينه والمصيبة الاء ام القرابين والشياطين موت الكرفها.
-امين امين، يله اجه رجلي خل اروحن اشوفنه.
-الله وياج.
سديت التلفون وگمت اريدن اطب للبيت وانفتح باب الحوش بس لمحته طروادة ووياه سلطان مشيت بساع طبيت للبيت واعاينله اخذ سلطان للدوانيه يم سجاد وعبود، ضليت بالهول لمن اجه طــروادة
طــروادة:: شعدج گاعده؟
حجاها ومشه الغرفته تبعته احجي
-مانعسانه نمت العصر وافكر بالنتائج يكولون ماضل شي الهن.
طلع القران باسه وانه وراه اعاين شيسوي دار علي
-اطيني ماي بدولكه.
-كزاز لو ستيل؟
-اي شي.
هزيت راسي خوش ورحت اركض طلعت من الثلاجة دولكة فافون واعاينله طلع وراي رأح يتوضى، مشيت للغرفة خليت الدولكه يم القرآن وضليت واكفه لمن اجه طــروادة رافع ردانه متوضي وجهه مبلل وشعره من يم كصته هم متبلل، كعد بمچانه وعاينلي گال
طــروادة:: روحـــي نامي
-ما نعسانه.
-ميخالف روحـــي غاد رنـــه.
عاينتله بزعل طلعت وسديت الباب وراي ضليت واكفه يم الباب اسمعه يقرأ ايات من القرآن، طبيت للغرفة يم عفراء غطيت حسين وزهره عاينت لشمس عيونها يلعبن جنها تريد تكعد ضليت اعاين لوجها لمن فتحت عيونها شافتني گدامها ضحكت، مديتلها ايدي. چلبت بيه مكيفه وتضحك بستها واشمها من رگبتها تخبل، اخذتها وطلعت من الغرفة لمحت طــروادة هم طلع دولكة المآي بأيده طب للدوانيه، سويت حليب لشمس وشلتها اريدن ارد للغرفة وطلع طــروادة گال
-سلطان راح يبات هنا البسي حجاب من تطلعين للحوش چم مره گتلج؟
هزيت راسي خوش عاينلي زعلان ودار عيونه لشمس ضحكلها وفتح ايديه وهو يگلها
-ها خالي شعدج گاعده.
شمرت روحها عليه تضحك حط وجهه برگبتها جر نفس وصاح
-افيششش يا يابه
وباس خدودها وأيّدها گالها
-يله روحـــي الرنه.
وهيه تجلب برگبته وتضحك ما ترضى تجيني ضحكلها يگلها
-يابعد روحـــي يا خالي وعلي ما اهدنج لو ما تعبان واريدن اناملي ساعة
اخذتها منه وهو طب الغرفته ينام رديت للفراش حطيتها يمي وتمددت نعسانه كل ما اغمض توني اغفى تطكني على وجهيّ تصحيني
-هيي امشي وليّ الامج
برطمت تريد تبجي جريتها ابوس بيها
-يله يله ضلي يمي ضلي يمي من امداني لو صيحت عليج بعد
سكتت تلعب وياي لو تجر الغطا لو تشيل ايدي تعضعض بأصبعي عفتها وغمضت عيني غفيت وفززتني حاطه حلكها بخدي وتسوي بببه بببه ، وخرتها من عدي
-ايعع خاب شني، عفررره كعدي لبتج.
درت وجهي لفراش عفرء مالكيتها واسمع صوت گلي بالمطبخ شلت شمس وگمت لكيتها تسوي سحور ووتثاوب
-جا وخرتيها من عدي لعبت روحـــي مسويه خدي مُلهي
عــفراء:: والله مشكلتج تسويج مُلهي تسويج ممه تسويج حجله بكيفها خالتها وتدلل عليج.
تحجي وتضحك اخذت شمس ومشيت كعدت حسين وزهره ورحت لطرواده نايم متلفلف بالچرچف المكيف معلينه والغرفه صايره بارده بردان وماكايم جايبله غطه، حطيت شمس بصفه وهيه تمد ايدها بأصابعها الصغار تلعب بشاربه ولحيته تريد تكضهن وماتعارف شلون، دغيته بچتفه
-خالي اكعد هاي شمس كاعد تحاجيك بس انه انقل صوتها.
ولا فتح عينه ولا تحرك
-طــروادة اكعد اتسحر.
وهوه بسابع نومه ادغه احجي اريد ماكو شلت شمس ووگفت كتله
-سوده عليَّ تعبان ضل نايم ضل هسه انه احط السحور بحلكك وانتَ نايم.
بساع فتح عينه وكعد على حيله يتمغط
-حتى اموتنج.
-چا اكعد بساع لا تشلع گـــلبي
كام كوه فاتح عينه طلع فتح باب الدوانيه مالگه سلطان كعد سجاد وعبود ووده سجاد البيتهم گاله شوف سلطان وتعال، من سجاد راح بعد مارد خابره كاله سلطان نايم وانه راح اتسحر وي اهلي.
كعدنه احنا نتسحر عبود وحسين مغمضين عيونهم وياكلون گوه وزهره عاينت الطرواده گالته
-ليمت يكضي
طــروادة:: تعبـــت تعبـــت بعد مابيها حيل تصوم
عــفراء:: كاتلتها البيضه من تكعد الصبح تضل تلوب تعاين للبيض بحسره.
ضحكنه عليها وهيه ضايجة من كل عقلها، ماصدكت صليت صلاة الصبح ونمت ثاني يوم فزيت على صوت بچي عفراء طلعت خايفه اعاينلها تبجي وطرواده وعبود يحجون وياها
طــروادة:: يابه يطبهم مرض دام منذر وياج واعمامج ما هدوج عليمن تبجين.
وهي مدنكه دموعها تجري فهمت من عبود اعمام منذر متعاركين وياه ووي اهله يردونه يطلك عفراء بس هوه واهله واكفين بوجهم وابوه كايل الاخوته انتهت وياكم وباني بينه وبينهم سياج يفصل بيوتهم عن بيت اهل منذر ومشتمل عفراء، بس هيه مقهوره حييل گالها عبود
عبود:: ترا مردتي گـــلبي كافي لا تبچين.
طــروادة:: عفراء يابه بروح اهلي كافي عليمن هسه كليلي عليمن تبجين.
مسحت عيونها، كاعده بالهول شمس بحضنها تهز بيها كالت لطرواده
عــفراء:: انتَ ما تعارف عمي ابو منذر شلون يحب اخوته ويوميه العصر يروح عليهم والله مريض هسه يصير بيه شي
طــروادة:: صلي على محمد والله كريم تنحل.
مسحت دموعها وضلت كاعده ايدها على خدها،مقهوره الولد طلعوا وهيه ضلت للعصر ضايجة ومقهوره، سوينه الفطور سوه ووره الفطور الولد اخذوا سلطان الغير سيد يقرأ عليه عود بلكن يتحسن ونفس الوضع، ردوا عافوه بالبيت وراحوا للگيعان، عفراء راحت تشوف رغد وضليت وحدي ضايجة اطلع من اليوتيوب للوتساب مليت.
طبيت للمتجر اختاريت لعبة نزلتها على نت بيت جدي اليجلط شويه بعد واطب بالسياج، لعبت بيها شويه. ضجت مسحتها صار بوجهي الفيسبوك، نزلته وطبيت عليه شيگلي اسوي حطيت اسمي رنـــه شامل كال اسم العائلة كتبت شعلان المشعول حطيت مواليدي ورقمي والحساب، شيطلب اطي معلومات راد صورة دخلت اختار لكيت صوره انه وزهره والصخله انه مبين مني بس خدي وزهره نص وجها والصخله بنصنا مبينه كلها حطيتها هيه.
واجاني رمز واروح مناه واجي مناه سويته طلعلي قائمة بأضافة صديق اول واحد طــروادة وراه عبود دزيتلهم طلبات النوب طلعولي الولد كلهم دزيت لصيهد ولوهب ولميثم والبريا وسلطان وسليم وسجاد لحد ماضلوا يطلعولي ولد الجوارين يله بطلت ادزن طلبات، طبيت لحساب طرواده عبالي من اعلق بس انه وياه نشوف التعليق كتبتله على صورته
ها حفيد شعلان الگرميده
گلبت بحسابه شويه اكثريته صور حزينه وعن فقد الاب والام طلعت من البرنامج وكمت وطبيت جوه اظن ربع ساعة مرت وسمعت صوت باب الحوش يندك
طلعت اركض
-ياهو.
بريا:: اناااا انا رنـــه ووولج شمسويه.
صفنت افكر شمسويه وهوه يحجي بحرگه لحظات وسمعت وراه صوت وهـــب يصيح
وهـــب:: ووولك هاي رنـــه بت عمي مسويه فيسبوك وتغلط على شعلان وحاطه صورررتها شهرتنه
بريا:: لللللج رنـــه
خفت منهم بس ما تنازلت
-عمي مالكم غرض بيه شني اخوتي انتم.
وهـــب:: خرب روح اخوووتج اطيني الصخام التلفون.
بريا:: رنـــه احاجيج انا جيبي تلفونج.
ســليم:: هااااي ياهي الگالها تسوي فيسبوك.
خنست ساكته وهمه التموا يم الباب كلها تتصايح جريت التلفون طكيت الفيسبوك حذف كتلهم
-ما مسوويه.
صــيهد:: صووووج الخايس الحط بأيدج تلفون جيبييييه.
-انت اسكتلك الخاطر طــروادة لا تصيح حتى انا هم ما اصيح.
واكفه بالحوش واحجي وياهم وهمه بره يم الباب هد صــيهد يريد يطب والولد كاضينه واي واحد يغلط عليَّ بريا يرده ويتعارك وياه رفعت راسي بيه طلع يستاهل اللفات
وهـــب:: بس جيبي التلفون نمسح الحساب وهاي هيه لا تسويلنه مصيبة كاتبه المشعول ومعلقه الطرواده ووووولج رنـــه خرب روحج.
-انتَ اسكتلك الخاطر بطتك.
وهـــب:: خرررب روحج خررررب.
ويتعاركون بيناتهم وصيهد كلساع يدفر الباب ويسحلونه اسمع مــيثم يگله
مــيثم:: والله بس تطب لبيتهم يگلب الدنيا، خل انا احاجيها بهدوء تسمع من عدي
ســليم:: وخررر وخر خل اطفر الا انحررها.
بريا:: انچب وخرر مناه
مــيثم :: رنـــه غلط السويتيه حتى لو تسوين فيسبوك ما نرضى تحطين اسمج الكامل وهم غالطه على شعلان لا واحد يوصلها اله وتصيرلنه سالفة.
بلعت ريك بخوف اكل بأظافري بس خاف اكلهم مسحته خاف يضلون كاضينها علي العمر كله ويكولون خوفناها كتله
-عاين مــيثم انتَ ساكتلك الخاطر مرتك سمسم.
كح مــيثم بصوت عالي ومن بين عركهم اسمع ضحك سليم منتهي من الضحك وهمه ضلوا واحد يغلط على الثاني
بريا::عاينــي اطيني التلفون اعدل الاسم وامسح الغلط وارده الج.
-مالك غرض
-ررررنه.
-ترا ساكتتلك الخاطر مــيثم.
ضحك سليم بصوت يرج وبريا يطك بيه وصيهد يتهدد گاله وهـــب
وهـــب:: بس تحجي بعد تطلع ساكتتلك الخاطر مرتك اسكت احسلك.
شهكت مخروعه من سمعت صوت طــروادة من بعيد صاح عليهم
طــروادة:: خيررر ملتمين وانا مو هنااااه.
ســليم:: شوووف بلوتك شمسويه
ركضت اعاين من الفتحات وكف يمهم وهمه يراوونه الحساب والغلط اعاين الايده سداها بقوة ودار بينهم يتلفت وحجه بهدوء
-
طــروادة:: خابروني وانا آجي احاجيها شكو ملتمين تردون تطكونها ان شاءالله؟
صــيهد:: خل تمسح الزززفت ولا تمسلت زايد.
طــروادة:: عود نعدل الاسم مو مشكله من رخصتكم.
ركضت گبله طبيت للبيت جريتلي غطا وتمددت على الحصيره واسمعه من طب للبيت بعصبية صاح
-ررررنه.
دفع باي الغرفه وخرت الغطا من عدي مو مال اجذب بس عاينتله حجيت بساع
-والله ما ادري يطلع عدهم كلهم عبالي بس انه وياك نشوف الغلط
جرني من اذني محترك گلبه صاح
-ووووين التلفون؟
طلعته من جوه المخده حطيته بأيده فتح نت عليه نزل الفيسبوك وفتح الحساب راد يعدل الاسم لو يحذف الحساب ماصار ما ادري ليش احترك گلبه اعاينله ساكته ومقهوره حلفتله
-وعلي ما ادري يطلع يمها كلها .
دار عيونه علي ورد عاين للتلفون مقهور من عدي حيل خابر على بريا فاتح السماعة
-وين انتَ؟
-بالبيت
-حاسبتك تشتغل مو؟
-اي
-جايك.
اخذ تلفوني وطلع راح لبريا لان اكثر واحد يعارف للتلفونات والحسابات، اجت عفراء حجيتلها مقهوره وهيه ساكته تريد تلومني بس كلبها ما ينطيها نص ساعة واجه طــروادة شمر التلفون بحضني ومشه الغرفته بدون ما يحاجيني گلبت بالتلفون قصص وروايات عراقية كرار صلاح ماسح الفيسبوك عفراء بساع گالت
-بساااع كومي اعتذر منه
-خاف يطكني؟
-لو رايد يطكج جا اول ما طب طكج گومي خيبه لا تخلينه يزعل.
مسحت وجهي وگمت فتحت باب غرفته توه متمدد بفراشه طبيت للغرفه ساكته وهوه ما يعاينلي كعدت يمه على اركبي
-عاين وعلي يكون ادري يطلع يم الوادم كلها عبالي اسم العائلة بس انه اشوفنه والتعليق بس انتَ تشوفه مو كلها.
عاينلي بحيره
طــروادة:: رنـــه ليش تسوين اي شي يجي ببالج ليش ما تفكرين هذا الشي شني نتيجته راح يسبب مشكله المن ليش تتصرفين بأستعجال وبدون تفكير.
دنكت ساكته مقهوره ماعدي مبرر تحسر
-لا تعيدينها.
-آبد والله انه لان مليت سويت فيسبوك
-لو كايلتلي انا اسويلج بس ما دام تصرفتي من وحدج بعدّ آنتهت ما ينزل الفيسبوك بتلفونج متفقين ؟
هزيت راسي اي
-بس لا تضل زعلان عليَّ. وشوف والله حتى الولد شكد حچوا وصيحوا ولا غلطت على واحد منهم علمودك
هز راسه بحيره ابتسم
-هاي هيه، يله روحـــي خل انامن شويه.
عفته وطلعت كلّت العفراء مازعل من عدي ضلت تحذرني لا تسوين هيج وبطلي تسوين هيج حلفتلها ما تنعاد سكتت من عدي ما مقتنعه.
ثاني يوم وي الفطور اجوا آهل منذر ومنذر ومازن يردون عفراء رغم هيه ما زعلانه، لملمنه الهول بساع وجلبت بشمس كلساع ابوسنها تعودت عليها ما ودي تروح
،ام منذر اجت يمنه للهول كعدت هيه وعفراء يسولفن واعاينلها من باب المطبخ تبوس بشمس وتحجي وياها
-ها جده ها يبعد رويحتي.
وعفراء تضحكلها وتكلها
عــفراء:: سودنت اخوالها بس يحاجونها تجلب برگبتهم.
منذر:: ههههه جدها البارحه يگلي چن سلف شايل من عدنه وحلف عليج بعد من تجين الاهلج حدج ثلث ليالي
عــفراء:: والله حگج بس عمه شسوي شتشوفين المصايب تصير واطيحن بيها انا.
ضلن يسولفن على الاء وانه اسوي چاي واركز بسوالفهن
أهلّ الاء موكلين محامي وعلى اساس بتهم صارت مو بعقلها بسبب سلطان لان جريمتها مو هينه وماتطلع منّها بسهوله قتل نفس واعمال السحر والشعوذه اذا مو اعدام مؤبد، بس اذا اهلها ثبتوا هيه مريضة نفسيه يحولونها لمصح مآل مسودنين الله يسودنها.
اجه حسين اخذلهم چاي للدوانيه ةانه صبيت العفراء والام منذر اطيتهن گالت
ام منذر:: فـــدوه لايدج حبوبه.
-بالعآفيه.
ماضليت كاعده يمهن كمت لميت هدوم عــفراء بالجنط ضلوا ساعتين وگاموا همه طلعوا وي مازن ومنذر ضل متاني عفراء طبت للغرفة انه ابدل الشمش وهيه صاحلها طــروادة طلعت وراه بساع بدلت الشمس ومشيت اريدن احاجيها سمعت صوتها بغرفة اهلي توني افتح الباب ووگفت من سمعت السالفة بيها اسمي
طــروادة:: بكل الاحوال انتِ لا تجيبين طاري رنـــه يمهم واذا يحاچونچ عليها مره الثانية كليلهم لا صغيرة وما يطيها.
عــفراء:: والله من ذيج النوبه عمتي حاجتني وكتلها صغيره وطرواده ما يطيها ومازن اعصاب واختي لسان ما يتوالمون.
طــروادة:: يابه هذا منذر اذا اكضه الا افصم ظهره يحرجني گدام ابوه الخايس انا اله.
عــفراء:: عليمن يمه تفصم ظهره اختك الك ورجلي الي هههههه.
-والله فد خايس غير كتلهم لا يابه اختي صغيره يكلي لا فكر فكر ونرد نجيك وره ما تكضي الثالث، والله لو ما رجلج الا اشك حلكه
ضحكت عفراء وانه مدري ليش ضحكت من فهمت جانوا جايين خطابه مو بس حتى يردون عفراء، اول مره عالم يخطبوني واول مره احس بروحي صرت چبيرة ،مشيت للغرفة بساع اجت عــفراء لبست عباتيها گتلها
-ترى سمعت ادري بيهم إجوا يخطبوني.
شالت عينها الي ضحكت تغمني
عــفراء:: والله بعدج بعيني هذيج الزعطوطه ولا اصدك الوادم تتخطبج.
ركصتلها حاجبي
-انه ارضى اذا مازن اعتذر من عدي ومن بريا وها شرط توعديني نصير انه وياج فد بيت وانتِ تطبخين وتنظفين وانه بس افتر وراج وأسولف عليج.
عــفراء:: ههههه انجبي طــروادة رفضهم ألتهي بدراستج.
ضحكت وشلت شمس ابوسنها وهيه اخذت غراضها سلمت عليها وراحت، وهاي بكل مره تجي تضل يمنه هواي وتروح اشبع بچي عليها.
""""
جــويريه :: كضيت امتحانات لو عبالك طلعت من الجحيم، الدنيا تنگلب ومشاكل تجر واني بس نايمه، وعلى ابو مشاكل وهوسه بقيت انام يم بــدور ما رجعت للمشتمل وندى يوميه تحاجيني وترزلني گتلها
-رغد مو زينه شوفي حالها شصاير بيه وبس تبجي شلون اعوفها؟
هزيت ايدها ودارت وجها من عدي ساعدتها بالمطبخ لمن اجت سعاد بأيدها ورق وماي كالت
سعاد:: قريت عليه اروحن اشربه السلطان بلكن يصحه.
لبست نعالها يچرك وراها طلعت راحت لبيت خالي شاكر درت الندى احاجيها
-تصدكين بعدني ما مستوعبة شلون الاء ذبحت غيث يمه گـــلبي ينمرد مت أفكر بالموضوع شلون گدرت .
دارت عينها الرضا يلعب يمها دنكت باسته
ندى:: اسكتي اريد اموت من التفكير امس حتى وهـــب زعل من عندي عيني ما اگدر اغمضها كل شويه متخيله شلون خلت الخنجر على رگبته وذبحته .
افتريت وياها بالمطبخ نكمل الفطور وهمه كل شويه يصيحون على شي ويردون كلشي على السفره حتى لو ما ياكلونه المهم نسويه.
اجت بــدور من المشتمل. رحت تودي دشاديش صــيهد گالت
بــدور :: يگول صــيهد خل ترد بكرامتها لا اجي اسحلها سحل هالحيوانه مو اطيتها عين.
تحجي وتقلد صوته وهوه وراها حط ايده على علباها من وره وهيه چانت نافخة روحها ومن لزمها بسرعة رخت ولمت روحها وهوه ياخذها ويجيبها گالت
بــدور:: انتم ما سامعين بيه أنه بالمدرسة لقبي بــدور الچذابة، بدور الحاروگه، جذابة انه حيل چذابة.
صــيهد:: تقلدين عليَّ؟
وهيه حطت اديها بصدرها تگلها
بدور:: اااانه ااااانه اقلد عليك؟ شني شمالني تسودنيت ماعدي عقل اقلد على صيهدنا؟ سبع عشيرتنا گمر قريتنه هلال عايلتنه اسد اخواته ذيب امه
تحجي تحجي وهوه يوديها ويجيبها يوديها ويجيبها من علباها لازمها عاينتلي وكملت كلامها
بــدور:: سبع السبعبع رجل مرته ورجل من رجل مو كل رجل رجل انتَ رجل صدك رجل
سد حلكها بأيده
صــيهد :: كافي تمسلت
ندى:: خويه عوفهل اخذت روحها وتريدها ما تمسلت.
عاف بــدور وهي بقى وراها بس التراب ركضت طايره عاينلي مبتسم بطرف شفته بيني وبينه مسافه عينه بعيني وگال الندى
-شلونج خويه ام رضا؟
ندى ::الله يخليك خويه بخير.
يحجي وعينه علي گتله بتردد
-صدك انتَ حجيت هيج عليَّ؟
رفع حاجبه يسأل
-اذا حجيت شتسويلي تطگيني؟
هزيت راسي لا
-ازعل
-ماحاجي بدر يچذب
سكتت وهو اجه يتقدم بخطوات هادئه وصل يمي شال ايده رجعت راسي ليوره مداها ضم شعري جوه الحجاب وحجه بهمس بيني وبينه وعيونه خازرتني
صــيهد:: الليله اذا ارد وما الگاج بالمشتمل اجي اسحلج سحل گدامهم.
حجاها وطبطب على خدي على كيف ، عافني ومشه الغرفة امه مسحت وجهي وندى تضحك عليَّ كضينه الفطور وقبل الاذان نسمعهم يسولفون بالهول على سلطان اجت رغد يمنه عيونها مورمه البنيه انتهت من البچي عليه عيونها راح تعمى حاطه ايدها على خدها ومن باب المطبخ تعاين للحوش
الغروب وي بداية الظلام صوت القرآن من الحسينية يوصّل لبيتهم واحنا مخبوصات نحضر الفطور ونصب وممروده روحنه من حر المطبخ، غسلت وجهي وكعدت بباب المطبخ الداخلي توصلني بروده واسمع سوالفهم خالي شاكر يمهم يگول الجدي
شاكر:: والله يا بويه حرت وياه ابني راح يروح من ايدي تفرهد سلطان ماظل بيه شي كون تطوني رغد تجي يمه بلكن تردله صحته.
صــيهد:: شو مدري شلون حجيك هنه مسودناته من رغد وبس يشوفها يگلب الدنيا على اي اساس تجي يمه طكها وموتها شني اعوفنه عدل؟ هسه لو مو مسحور يشهد الحسين بساعتها اكتله وراها.
شاكر:: انتَ مالك غرررض سلطان يريد يموووت سلطان تسودن صحّته انتهت.
وكب صياحهم ويَّ الآذآن كلها تتصايح وصيهد مشتعل نار بينهم يحلف رغد ما توصل بيتهم وخالي شاكر گالهم
شاكر:: كالولي اخذه للمغيسل يغسله غسل ميت بووويه احطن سلطان على دچة المغيسل، غير اموووتن
صــيهد:: انا اخذذه باجر.
خالي شاكر طلع زعلان لان ماقبلوا رغد تروح لبيتهم، ودينالهم اللبن والتمر يفطرون وفرشنه السفره، جده كلشي ما يعجبها لازم تطلع شي نقص وتغلط عليَّ وعلى ندي
-غمات كل خير ما بيچة امده هيچ چناين.
ونسكت من يمها صبينه صينية النه اخذنه رغد ورحنا يم خالة ايمان كوه تاكل مالها خلك ومقهوره على رغد وسلطان اول ايام خلصتهن بچي على غيث تحبه من چانت ميلاد تجي وجايبته وياها هي تبوسه وتشاقيه.
لملمنه هوسة الفطور بقيت شويه وياهم ورجعت انتقلت للمشتمل مو مال عناد اخذت ملابسي وكتبي رحت للمشتمل رتبت الملابس وخليت كتبي بوحده من خانات الميز لكيته جان مخلي بيها چفافي مسفطات شلتهن خليتهن بالكنتور واخذتها الكتبي، فرشت فراشي وتمددت أعاين بتلفوني راسلتني مــاسه كاتبه
-مو تكولين، بس مــيثم گالي اظن طــروادة راح يخابر شيخ حيدر يأجل العقد علمود سلطان
-حقه اكلج مو تگولين رنـــه گالتلي مازن اخو منذر خاطبها بس عليج القران لا تكولين.
ماسه ط:: كالتلي گبل لا تگلج
-كتلها لا تقبلين بعدج صغيره تگلي اذا طــروادة يقبل اني اقبل حتى اعيش وي عفراء بنفس البيت.
-جوري بذمتج مو تحجين راح اكلج شي
-خوفتيني احجي.
-بريا يموووت عليها ويحلف محد غيّره يآخذهآ وهسه محتاره احجيله اكله خاطبينها لو اسكت ولج من امس لليوم ما مخليه عيني بعينه والولد عباله زعلانه من عده ما يدري مستحيه احجي وياه وانه ضامه عليه هيّج سالفة.
-برأيي لا تحجين راح تصير مشكله ترا كهلان رافض يعنّي الموضوع انسد بريا متسرع منتبهتله على اقل شي يفقد ويسوي مشكله الافضل تسكتين.
-محتاره والله ردت احجي لرنه اكلها يحبج ويموت عليج اخاف لبنيه تتخيل عليَّ وتكعد تنعل بيه وتفضحني.
-والله هي رنـــه خيط وخيط جنها صــيهد احسن شي غلسي لا تحجين.
ضحكت حجينه شويه سولفتلها على رغد لان صارلها يومين ما جايتنا بدت تدرس امتحانها وتدرس للسادس هم، گالت
-جوري اهتمي بصيهد اخوي يحب احد يهتم بيه والله ينطيج روحه بس يشوف من عدج شوي اهتمام.
-شسوي يعني الوليله من يريد ينام؟
-اي مابيها شي انه احطن ميثمي على گـــلبي ابوسنه والعب بشعره لحد ما ينام سوي مثلي.
-روحـــي عنّي مــاسه قشرعتي بدني
-چا شني انتِ حتى بالكتابة تسحكين روحـــي يله.
سويت لمحادثتها حذف وكمت للكنتور كلت اذا الكه شي ما مكوي اكويله، لكيتهن كلهن مكويات ومعلكات وكنتوره ارتب من كنتوري انه تسفيط ملابسي اجيب واخلي وهو مرتبهن حسب تدرجات الالوان وكلشي وحده.
ضجت من عنده ماخذ الخانات الاكثر اله والجرارت ماخذهن كلشي ما مخليلي، فتحت الجرارات سبحه مرتبات خليت ايدي بيهن خربطتهن وانفتح الباب جريت ايدي من الجراره فازه
باوعلي وباوع للجراره درت خليتها بظهري وسديتها مرتبكه وهو يبارعلي مضيك عيونه سد الباب عاف السبحه على الميز
صــيهد:: هيج هوه اليطيج مجال ويكلج روحـــي اخذي راحتج ادرسي تتمادين وياه؟
هزيت راسي لا وهوه يتقدم خطوه خطوه لحد ما وكف گدامي خلّه أديه على الميز من الجهتين وآني بنصهن يباوع لوجهي ونظرته ما تتفسر لا هي شر لا هي غضب يحير
صــيهد:: ردتج تردين من وحدج بس انتِ بشر بلا احساس.
-مو عدنا مصيبة.
-وانتِ ضاله غاد يمهم تحلينها شيخة مو؟
دنكت ساكته شهكت ورفعت راسي اباوع لوجهه من مد ايده وره ظهري وجرني الصدره
-ها صــيهد هاا.
احجي يصوت يرجف وخليت أيديي اثنينهم على صدره ابعده عني
-اشبگج؟
-رضمان مايصير
-حتى لو رضمان على گولتج يصير لا تسوين روحج لوتيه اكبر شيطانة انتِ كلشي تعارفين.
ووي اخر حجايه جرني الصدره حييل حاضني شهكت مقشعر بدني وجسمي متكهرب من خله وجهه برگبتي واحس بيه منزل دشداشتي من كتفي لحيته وشاربه دغدغن رگبتي واني بين أديه ارجف مميله راسي على صفحة مغمضه عيني بضياع وجهه افتر على رگبتي كلها الحد جتفي وحسيت شفايفه استقرن على دك النجمة باسها بحسره شال شفايفه عنها وبدون ما يرفع راسه همس
صــيهد:: مسويتها تعذبيني بيها لا تخليني اوصلها ولا انتِ مغطيتها.
ورجع شفايفه الها ثگل صوت أنفاسي لزمت بأديه بدون شعور اضغط عليهن كل ما زادت لمساته الي ولأول مره احس بضياع يحتويني ما دفعته ما صيحت ما بچيت وكأن جسمي قابل بلمساته وانفاسه إللي تدغدغني
وهو يتنقل بين رگبتي وكتفي بلمسات طريه وهادئة تسحبني من قمم الغضب لوسط الضياع
فتحت عيني بلحظة فازه
من حسيته احتوى شفايفي بشفايفه
وبتك ايد يرفعني من الگاع لحظات حسيته بيهن مو صــيهد مو الشخص العصبي اللي على ابسط شي يصيح، صوته يختلف نفسه ثگيل وعيونه تتوسل ما ارفض
يعليني على صدره يرسم شفايفي بشفايفه وكأني لوحه وهو فرشاة رسم، غاب كل ماضيي عن عيني وعايشه اللحظة بكل حذافيرها بحنيه ودفو.
الحد ما حسيته يمشي بيه للچربايه سحبت نفسي منه ارجف
-عوووفني عوووفني
بسرعة نزلني للگاع وحضني الصدره
-عفتج عفتتتج.
ارجف فاتحه عيني حيل ما مصدكه نفسي وهو لامني الصدره گلبه يدك بقوة وصوت نفسه عالي، وخرني من حضنه دنكت وهو حضن وجهي بين أديه وبأبهامه مسح شفايفي
-عفتچ بس لا ترحين لا تحسييني تخافين مني جاي تموتيني.
شلت راسي اعاين لوجهه عيوني متروسه دموع منحرجه حييل بس حجايته رجفت گـــلبي
-ما اخاف بس لا تجبرني.
هز راسه اي ودنك يبوسني براسي متحسر ابتعد عافني وراح للكنتور يبدل، رجعت لفراشي تمددت وانطيته ظهري وتذكرت سوالفه خفت يجيب البومه بسرعة درت عليه اريد اگله صــيهد لا تجيبها، ووي فرت راسي لگيته بعده مالابس تشيرت وبدل ما أغطي عيوني غطّيت حلكي واحجي وحچيي ما مفهوم لان خانگه روحـــي بايدي وهو يباوعلي يضحك لبس التشيريت
صــيهد:: عيــونج اليشوفن وحلگج اليحجي
شلت ايدي من حلكي لعيوني
صــيهد:: كضت العركه وهيه بعدها تتحزم كضيت كضيت جوري.
نزلت ايدي اباوعله طفه الضوه وراح للچرباية سكتت من شفته صدك راح ينام تغطيت بدون ما انطيه ظهري بقيت اباوع بأتجاه الچرباية الحد ما غفيت.
ثاني يوم التهيت بالفطور بس اني وتساعدني بــدور لان ندى راحت للدكتوره تحلل شاكه بنفسها حامل، والولد منتظرين وهـــب يرجع حتى ياخذون سلطان للمغيسل حلفهم ينتظرونه يروح وياهم، شويه واجوا ندى عيونها مورمه من البچي شهكت بخوف
-يممه شبيج؟
طبت للمطبخ تبجي ووراها اجه وهـــب شايل رضا وبأيده علاج وتحاليل واحنا ملتمات على ندى بخوف وحتى رغد اللي مالها خلك روحها خافت عليها وتسألها شبيج گال وهـــب
وهـــب:: يابه ندى صدك تحجين والله مو خطر عليمن هالبجي
رغد:: شبيها ؟؟؟
-عدها كيس على المبيض ينشال بعملية بسيطة عليمن خايفه ما ادري.
يباوعلها بقهر صاحوا عليه الولد طلع وياهم وعينه عليها
وهـــب:: صعبه من تشوفلك بشر جان بحيله وفجأة ذبل وانتهى صفه جلد وعظم لا خلينه سيد لا خلينه شيخ وين ما نوديه يقرون عليه وماكو حل هذا اخر شي كالواا سووه اله اخذنا ورحنه للمغيسل.
تمدد على الدچه مال الغسل وطرواده دار وجهه طلع ما گدر يعاينله بدوا يغسلونه وسليم اختنك اعاينله السبع اللي ولا مره بچه الدمعه مچلبه برمشه، طلع وره طــروادة عفت الولد ومشيت وراهم كلمن كاعدله بصفحه
طــروادة كاعد على صبه وحاط اديه فوك راسه وسليم واكف يم الشارع يدخن رحت يمه احاجيه واصبره يهز راسه لا ويحجي بخنگه
ســليم:: اخوي مو زين على ساعة يموت وين اطي وجهي وين اخذنه؟
-لا تحجي هيج ان شاءالله مابيه شي بلكن من هاي ويصحى
-يصحى يصحى يفرح گـــلبي ويرد يتخربط اكثر من گبل كل ما شفته صاحي وافرح واضحك ارد انلچم بوضعه .
سكتت محتار ماعدي شي يواسيه، اخذناه وردينا للقرية نزل ساندينه صــيهد وطرواده ياخذونه بأتجاه بيتهم ما رضى حجه بصوت مخنوك ومتعوب
سلطان:: غاد غاد لبيت جدي اشوفن نمرشه.
تلفت صــيهد يعاين لوجهي وللولد أشرتله اسكت طــروادة وخر وميثم سند سلطان اخذناه ورحنه لبيتنا.
كوه يمشي شبگته جده تبجي وتنوعيله وجدي صاح عليه
-وخري عنه وخري تعال جدي تعال.
رغد:: اعاينله من باب المطبخ روحـــي تحترك حرك شصاير بحالك يا روحـــي يا عمــري انتَ، مسحت دموعي بأطراف اصابعي الترجف من صاحلي وهـــب مشيت وراه للهول سلطان واكف محني ظهره وصيهد سانده، عيونه بالگاع ما يشيلهن ويعاينلي بس مد ايده بأتجاهي تقربت يمه شبگني الصدره حيل بچينا اثنينا بصوت عالي روحـــي رايحه انطحن طحن من اسمع صوت بچيه يضمني الصدره حييل باديه الترجف،
شعلان:: تردلك تردلك صحتك واسويلك عرس من جديد يله بويه يله.
عافني جرني وهـــب لحضنه وصيهد أخذ سلطان بأيده يريده يكعد يم جدي بس هوه ما رضى يضل كاعد كالهم اريدن انام وأخذوه لبيتهم، طلعت للمطبخ مختنگه اجر النفس وما يجي وياي اجاني وهـــب
وهـــب:: رغده اشش شني السالفة.
دگيت على گـــلبي ابجي مفرفحه
-ررراح يموووت.
-اششش كلشي مابيه هسه يصير زين.
مد اديه يمسح عيوني
-اوديج لماسه اختنگتي وخاف جده تسمعج حجايه.
صاح على بــدور جابتله عباية ومشيت وياه دموعي تجري ما ادري وين اروحن وين اطي وجهي ويخف وجع گـــلبي، عافني يم مــاسه وراح، والولد يحيرون شيجيبون وشيخلون مــيثم وبريا، وره الفطور طلعوا اثنينهم بچيت بحضن مــاسه بچيت اشكيلها واحجيلها وجع گـــلبي للساعة بالعشرة وهي حايره بيه تريد بس تغير نفسيتي كومتني وياها للمطبخ گالت اسويلج حلويات وكفت يمها بلا واهس وهي تسولفلي وتريدني بس اضــحك گالت
مــاسه:: ماكتلج غير مازن اخو منذر جاي خاطب رنـــه .
ووي حچايتها التفتنا اثنينا بفزه على صوت بريا من صاح
بريا::
شكرا لزيارتكم عالم روايات سكيرهوم
