رواية جراح قلبي الفصل الخامس 5 بقلم جوهرة

ايمان بعصبية بسبب ايهم وتصرفاته اللامبالية

/ البنت ولادتها قربت اليوم باجر اقلها ارجع شوف ابنك شنو هاللامبالاة هاي صدك جذب الناس اكلت وجهنا يسألون شلون عايف مرته وكاعد بالاردن واحنا نتحجج بدراستها وبشغلك

ايهم بكل برود / عمة ترى كلما تخابرين تعيدين نفس الحجاية اني اتصلت اسال لو تورطت شلون يعني ؟!!!!

ايمان زكحت بي / اييي مسوي فضل على أساس .. بدل ماتسألني الي اتصل عليها خلها تفرح بأتصالك ولك البنت منطوية على روحها كامت متختلط بأحد وكله من وراك وين تروح من حوبتها بنت يتيمة انظلمت ، مو صوجك وحدك لا والله احنا كلنا السبب من عدنا نطيناها لواحد مثلك

ايهم / استغفر الله يلة راح اسده فيمالله

سديته من عمتي الجانت عصبية وذبيت موبايلي وطلعت بالبلكونه مال شقتي الي مأجرها الاشهر المضت هواي اتصلوا يحجون حتى ارجع وخاصة صعب كلما يخابرني يتعارك وياي ومرتين اجى للأردن بس ما قبلت بالراده مني يريدني اجيب لينا تعيش وياي هو اني عفت كولشي ويريدني ارجع لو اجيبها هنا

من عرفت بحملها بالبداية ضجت ماريد شي يربطني بيها بعدين بمرور الأيام تعودت على وضع اكون اب ولو كان متصل عليها 

اي اتصال ماعندي بيها من اريد اسال على اخبارها احجي وية عمتي ايمان رغم رزالتها الي اتقبل كلامها ومرات اسال صعب لو اياد اوصيهم عليها لأن بداخلي حتى لو جنت كاره هالزواج بس تبقى زوجتي وعرضي ، فدوم اسالهم عليها بس هي لا ممتصل بيها

الصراحه اني مطمن عليها حيل لأن بوسط اهلي يحبونها ويخافون عليها يعني ممحتاجتني واني ما احتاجها مرات قليلة الي حنيت بيها تكون قريبة علية وبحظني بس كدرت اقتل هالاحساس ماريد أضعف وارجع خليني هنا مستمر بشغلي وية عمي سامي وكدرت افتح مكتب مقاولات بمساعدته والحمدلله شغلي حلو

تنهدت واني اتنفس اكبر كمية من الهوا بهذا الليل وقررت اسافر للعراق وباجر اروح اشتري هداية لاهلي

بلغت عمي سامي بسفرتي الي مقرر تستمر اسبوع وارجع 

خلصت اليوم مابين حجز طيارة والفرة بالمحلات اشتريت شغلات للعائلة من جاي افتر لمحت ملابس اطفال اشتريت للجهال وحسبت حساب ايمن ابن حذيفة هسة عمره اشهر يمكن ستة لو سبعة أشهر حسبما سمعت من حذيفة 

اجى أبالي ابني الي بعده ما جاي للدنيا حبيت اشتريله ملابس حاجيت العاملة وفهمتها وهي ماقصرت جابت وحطت كدامي اختاريت كم قطعه بعدها دفعت الفلوس وأخذت الغراض وطلعت

ــــــــــــــــــــ

لينا / 

الحمدلله خلصت امتحاناتي جنت خايفة أولد وتروح علية الا دور ثاني وهسة انتظر النتيجة يارب انجح لأن درست بتعب والله وبيت عمو جانو ميخلوني اشتغل هواي جناين قايمات بكولشي صح اساعدهم بس بالاكدر عليه لأن الحمل متعبني وكم مرة اتخربط ويحيرون بية شكل عندي فقر دم

البارحه عمتي ام حذيفة اخذتني للقابلة ماقبلت اروح إلا على دكتورتي الي عمة ايمان وعلا يودوني عليها بس عمة كالت دخلتي بشهرج خل تفحصج القابلة

رحت وياريت ما سمعت كلامها موتتني بالفحص رجعت للبيت اون ، صعب وصلنا ورجع اخذنا ومن سمعني أتألم سال عمتي

صعب / يمة صدك جذب شوفيها خاف عدها ولادة خل اطلع للمستشفى

ام حذيفه / لا يمة ماكو شي إهن شاء الله ،، هاي لأن بچر ( بكرية) هيج صار وياها هسة بالبيت ترتاح

شكد استحيت من صعب هو هم خطية بعد ما سأل بقى ساكت ، اوف عمتي كولشي عدها عادي ما تكول البنت تستحي !!!!!

نزلت وعمتي وراية اجت سندتني لأن مابية ارفع ظهري انوب مدري خوف مدري مغص 

فتت مددت على فراش عمتي اجت علا شايله ابنها الصغير ذبته بالكاع بعده ميزحف بس يكعد ..

علا بقلق / لج عيني شبيج عمتي تكول من فحصتج القابلة كمتي تعيطين 

لينا بتعب / علا موتتني الله لا يوفقها

علا / هسة صيرين زينه هالشي لأن ما......

دنكت شاورتني واني استحيت خرب حظي حتى بهاي ايهم آلة دخل

طلعت علا وابنها وصار العصر واني بالغرفة عمو عبدالله من اجى تطمن علية وبقى يدعيلي الله يكومني بالسلامة ويهون علية

شكد حاولت أكرهه بس ماكدرت رغم هو سبب الاني جاي أعانيه ما اكدر أحقد عليه عنده حنية علية ومهتم بكل أموري ومصروفي كل اسبوع يوصلني صح ورث أبوية موجود بيتين ماجرينهم ومحلات سوبر ماركت تشتغل وفلوسهم بالبنك فتحلي حساب 

بس المصروف من عنده اني هم شنو اصرف اصلا يفوت الشهر ماصارفه شي

جهاز الطفل عماتي جهزنه وحظرن كولشي ،،

دحكت الساعة خمسة العصر رجعت بطني مغصتني دعيت عالقابلة ورجعت استغفرت

سمعت صوت بالبيت والجهال تتصايح فرحانين اجت ملاك للغرفة /؛عمو ايهم اجى

طلعت تركض فرحانه ،،،

فكيت عيني ونسيت الالم والمغص الجان كاضبني قبل شوي ، حظنت بطني بيدي ونزلت من الجرباية للحظات حسيت بفرحة لأن رجع ، بس بعدما اتذكرت شلون عافني اشهر انمحت فرحتي وگلبي عصرني

عكدت حاجبي وعضيت على شفتي الجوة بقوة من حسيت بمغص ، طلعت وصار ايهم بوجهي والعائلة كلها وياه يمكن اجى يريد يسلم علية !!!!!!!!!!! بقى صافن علية فاتح عينه الي تجولت بكل تفاصيلي

جنت لابسة دشداشة حمل عريضة نص ردن ولونها احمر وشعري رافعته كبوبة وخصل نازله على وجهي

دنكت حانية ظهري وايدية محاوطة بطني المنفوخة من غزاني وجع الطلوكة عطت متأذية وكمت ابجي ابجي الوجع وشوفتي لأيهم بنفس الوقت وكأنوو ابنه جان رافض يجي للدنيا الا بمجيء أبوه

ما وعيت من الالم والوجع منو الي حظني جنت عاصرة عيوني ماشوف شي وايدية على بطني والم دفع الطفل من جوا شلني شل 

بعد ما اكدر عالوكفة ،، صرخة ايهم خلتني افتح عيني ونفسي يلهث بقوة هو الجان حاظني وعاط عليهن يذبن علية عباية 

شهد اخذتني من بين ايدين ايهم لبستني حجاب أميرة وذبت عباية علية

صعب حجى بسرعة /؛شيلها ايهم راح اطلع اشغل السيارة

طلع صعب بسيارته بعدما اتصل على عمته ايمان تتحضر يمر عليها وفعلا جانت واكفة بالباب صعدت ورأسا لمستشفى الولادة ايهم بالصدر وعمتي ايمان وعمة ام حذيفة وياي واني ابجي واعض اصابعي من الالم

ايهم بهلع من شاف حالة لينا هالشكل / سوق اسرع راح تموت هاي

صعب / يمعود والله سريع انوب اروح اسوي حادث

ام حذيفة / يمه استعجل البنت بعد ما تتحمل

ايهم / 

من دخلت البيت والكل فرحان بية حتى محد عاتبني ليش هيج سويت لأن حجو هواي بوكتها الموبايلات ما توقفت صار كم شهر شبعت ملامة ورزالة بسبب لينا

انطيت الجنطه للبنات وبقيت اتلفت اريد اشوف لينا 

امي حست بية شاورتني وما فشلتها من كالت روحلها بالغرفة 

صارت بوجهي وعيني راحت تتجول على كل شبر من جسمها هواي متغيرة أحسها كبرت مدري الحمل ماثر ، بطنها المنفوخة وجسمها المليان مالحكت احجي شي ولا لحكت اسلم عليها لان علامات الولادة بينت عليها تبجي من الوجع بدون وعي مني حظنتها وكمت أصيح عليهم يسترونها حتى اخذها للمستشفى 

وطول الطريق اني احجي على صعب يسرع لأن صوتها وبجيها يدك براسي حسيت اني سبب هالوجع هذا

ساعتين بالممر واكفين اني وصعب بعدما كملنا إجراءات الدخول امي وعمتي دخلو بعدما طلعن

صعب / كول يا الله ما عرفتك هيج حنين !!!!!

حكيت خدي واني ارتجي بطولي عالحايط لأن تعبان من السفر أيدية بجيب بنطروني / مو وكتها قشمرياتك والله لأن تعبان ومالي خلك ارد عليك

طلعت امي وجها مغيم / يمة لساتها تطلك والدكتورة تكول إذا تأخرت راح يديرولها دم 

لأن عدها فقر دم

ايهم بقلق مجان متوقع هلكثر يقلق عليها / وشلون إذا ما ولدت هسة خاف الطفل يصير بي شي

ام حذيفه / ان شاء الله مابي غير الخير هسة احنا بحال الام لو الجاهل

/ اي والله يمه شلونها هي ... حجى صعب وعينه على ايهم

ام حذيفه / الله يسهللها بشفاعة النبي 

ورى فترة ،،

طلعت عمتهم الضحكه على وجهها وشايلة بحظنها الولد ملفوف بملحف ابيض باركتلهم وانطته لأم حذيفة الي اخذته جوة عباتها وهي تصلي عالرسول

ام حذيفه / يممه صلاوات على محمد وآل محمد فدوة فدوة لوليدي گمر گمر

دنكت باست راسه الملفوف بعصبة بيضة واشرت لولدها وهي تفتح عباتها تعال إذن بأذنه

صعب تقرب باس رأسه وهو يضحك ويبارك لأخو الي صافن فاتح عينه عالطفل .. سبحانك ربي شلون خلقه حلوة ..ايهم ماتشوف ابنك وتأذن بأذنه

حجاها صعب وعينه على ايهم الي تقرب ودنك للطفل 

رفعته أمه حتى يأذن بأذنه 

بعدما أذن باس كصته وبقى عينه عليه انتبه لصوت عمته تحجي وية صعب لأن سألها على لينا 

سال عمته / شلونها هسة تكدر نطلعها للبيت

ايمان / الحمدلله رغم تعبت خطيه اهم شي ما احتاجت دم اروح يمها حتى اساعدها

طلعتها ايمان تدفع بكرسي ولينا كاعده لأن تعبانه متكدر تمشي تحمدولها بالسلامه عمتها وصعب الي راح يجيب سيارته يقربها

ايهم وكف كبالها .. حمدالله على سلامتج

لينا / 

مارديت عليه لأن المرارة والألم البداخلي اكبر من ارد بكلمه حجيت بصوت ضعيف تعبان .. عمة فدوة طلعيني منا

حسيته ارتبك من تجاهلته ما اهتميت كافي اني مو حجر

الحمدلله الي سهلي ولادتي بعد الالم والوجع الي شفته لحد الان ماشفت ابني الي خبصني بي الدكتورة والممرضات يكولن حلو يخبل 

عمة ايمان بقت تسمي وتقرا ادعيه تكول راح يحسدونه 

بالسيارة كعدت صفح وعمتي اخذتني بحظنها

لينا بتعب وإرهاق / عمة خل أشوفه

قربته علية سميت وبقيت اقرا ايات دنكت شميته بلهفه وبجيت التفتو علية كلهم جريت حسرة وذبيتها رجعت بوسته بخده وهو هادىء حبيبي اروحلك فدوة 

اخذته عمتي وعمة ايمان حاوطتني بحظنها .. ليش تبجين بنيتي الحمدلله گرت عينج بوليدج

أيهم عيني اجت بعينه الي بيها كلام ماحبيت افسره ما اهتميت رغم جنت خلال الأشهر المضت اشتاقله

صعب / 

ساعة بالعشرة بالليل يلة دخلنا البيت فاتو جوا واني صحت اياد ينطيني السلاح ارمي بي 

أيهم مدري شبي ساكت مسطور وتعبان يمكن لان سفر ومارتاح 

اياد / كافي يمعود خلصت الشاجور

صعب / هههه خايف على طلقاتك اشتريلك بدالهن

اياد / فدوة الك والله

شمرتها للرشاشه لأياد ودخلت البيت فتت من غرفة اهلي ماشاء الله كلها ملتمين على كاروك الطفل دخلت لغرفتي مالي خلك هوسة وانوب جوعان وهن ملتهيات بالطفل الي يصرخ

بدلت بكلبية ارتاحلها وطلعت للمطبخ اشوف شي اكله لكيت زوجة اياد تحضر صينية

صعب / هاي المن

شهد / راح اوديها بالهول لأن كلكم مامتعشين واكيد جوعانين

صعب / اي والله يا خيتي عاشت ايدج

رحت بالهول كاعدين الحجي والولد سالت على ايهم كالو راح يسبح

اجت ملاك فرشت السفرة وأبوها عدلها قدمن العشا وطلعن

ايهم دخل / اي والله خوش عشا خربان من الجوع

الحجي / اكعد يأبه تعشى 

كعد بصف الحجي وكامو يأكلون

يم لينا الي سبحت بمساعدة علا وام سما والطفل هم سبحنه 

ام حذيفة طردت الجهال لأن ملتمين عالطفل 

وصاحت بشهد وعلا كلمن تأخذ جهالها

غافية حسيت على صوت عمتي / اكعدي حبيبتي اكلي لكمه

ساعدتني اكعد وذبت مخدة ورى ظهري سندتني 

فارشيلي دوشك وجرجف بالكاع بغرفة عمي وكريكوت الطفل بصفي راقبته من ورى الغطوة البيضا نايم حبيبي من رضعته غفه

اكلت قليل مامشتهية اجت علا اخذت الصينية رجعت مددت وأيدي على بطني سبحان الله رجعت مثل قبل جنت منفوخه عبالك طوبة

بجى وليدي ينوص بصوت ناعم ويحرك براسه 

طلعته عمتي وانطتنياه حتى ارضعه هاي ثاني رضعه اول مرة ماعرفت وكوة يلة أخذ صدري 

وهسة هم

/ خلي يلزم الحلمة ادفعيها باصابعج على كيفج

هاي عمة ام حذيفة مددة كبالي عالدوشك وتحجي تنطي تعليمات

اخيرا كام يرضع فدوة شلون جوعان دنكت بست راسه افيش ريحته تجنن

انفتحت الباب ودخل ايهم اني ارتبكت بقيت اتلفت اريد شي اغطي صدري عمتي ايمان حسن علية بسرعة شمرتلي شال ذبيته على صدري انوب احتاريت بي وبأبني ساعدتني عمة ورتبته

كعد بصف عمتي من شافته عدلت كعدتها /ها يمه ماكلت شراح تسمي وليدك

عينه علية / يوسف

ام حذيفه / خوش اسم يتربى بعزك يمه

ايهم / الله يسلمج ويعزج بعد روحي يمه

لينا / 

جريت صدري ضميته ودكمت صدر ثوبي ورفعته لابني على متني طبطبتله خفيف مثلما عمتي علمتني 

ثنى رجله وتقرب علية ومد أيديه يريد الطفل الي سماه حتى ما سالوني إذا عاجبني أو لا مجرد وجوده خلال ساعات يخلي يتحكم وهو المسيطر واني حملته تسع شهور وشفت وعشت المرارة والاهمال مايحقلي بابني غمضت ورجعت شميت ابني واني أخذ اكبر قدر من ريحته اريدها تهديني وتريحني

انتبهت لعمتي ايمان سحبته من حظني وخلته بحظن ايهم ابتسم وهو يراقبه دنك بأسه بخده اعترضت عمتي / يمة شواربك بززنه خده ترف

ايهم / ههه اي والله يمه خده ترف حيل

رفع راسه يحاجيهم / جبتله ملابس شوفوهم بالجنط

ام حذيفه / فدوة زين تذكرت واشتريتله وعرفت تختار لا

ايهم / والله عجبني واشتريتهن

ام حذيفه / بعدهن الغراض بالجنط محد شافهن التهينا

رجع يوسف يبجي وأيهم احتار بي شالته عمتي وانطتنياه بحظني / رضعي ما اخذ كفايته خطية

لينا /؛عمة ساعديني

رضعته ونام اخذته عمه ايمان بفراشه واني مددت حتى انام

أيهم طلع ماحجى شي اصلا كلامه بس وية أمه وعمتي بقن يسألون بي على شغله وعلى بيت عمو سامي وهو منطلق بالحجي

ايهم / 

صعدت لغرفتي واني تعبان حيل اريد انام من البارحه منايم وانوب صارت ولادة لينا شغلتني أكثر 

مددت بالفراش وغمضت وصورة ابني على بالي

ثاني يوم ساعة 11يلة كعدت رحت توضيت وصليت ونزلت جوة حضرتلي علا ريوك وكلتلها عالهدايا تفرغ الجنط وتوزعهن 

كملت ريوك وصاحتني دزت جنات بنتها 

لاكتني يم باب المطبخ / أكلك سويت الكلت عليه بس لينا ماكو هديتها

ابتسمت / وية غراضي بجنطتي فوك جبتلها سوار ذهب

علا / اي بألف عافية

ذكرتني بالهدية صعدت اجيبها

دخلت لغرفة اهلي جان أبوية وعمي صالح وزوجته ورانيا اختي سلمت عليهم وباركولي

ماحبيت انطيها هديتها كدامهم من طلعو مابقو عالغدا بقينا وحدنا بالغرفة انطيتها العلاكه ما اخذتها / هاي هديتج

لينا بكل برود عكس دواخلها / ميحتاج تهديني لأن مراح أخذ اي شي منك

اجيت ارد عليها دخلت عمة ايمان عضيت شفتي بقوة وعفتها والعلاكه شمرتها بحظنها وطلعت

على أساس تعاقبني لأن عفتها لو شنو قصدها 

يطبها طب اني لينت اسلوبي وياها لأن حالتها متسمح والدة جديد وما حبيت اغثها

طلعت برى لاكتني صفا دخلت البيت سلمت علية وباركتلي

هاي الثانية هم مستوية تتربص بصعب وهو مطنشها اففف مدري شتحس

واكف برى بفي الشجرة بسد الباب نخله وأيدي بجيوب دشداشتي ياهو اليفوت يباركلي الكل عرف ماشاء الله صعب ماقصر بالرمي خله العالم تفهم ماكو شي ابنا رجع من السفر وجنتنا ولدت ولد .. ياحبيبي

طبكت سيارة صعب نزل منها ونزل علاليك مسواك باقي على طبعه مايرجع وأيده فارغه 

ابتسمت واني اذكره / لازم عندك علم بخطارنا

صعب / هههه لا والله منو ، هلة بالخطار

ايهم غمزله / بنت عمنا صفا خاتون

عكد حاجبه ودخل ودخلت وراه واني شايل نص المسواك

صعب / 

ورى الغدا مددت بغرفتي وما احس إلا الباب انفتحت ودخلت صفا ..

صفا / عفية صعب موبايلي علك مدري شبي شوفه آلي

نزلت من الفراش وسحبت تي شيرت لبسته عالبرمودا

نترت بيها / شبيج داخله جفت شنو هالتصرفات

نترت بيها بصوت عالي

صفا / اوي هاي شبيك خوفتني والله

صعب بغضب / الله ياخذج اطلعي برى

دخلت امي وعينها علينا اثنينا / شبيك يمة ليش عصبي ؟!!!!

صعب بغضب اكبر / شنو الواحد ماياخذ راحته بهذا البيت ؟!!!!

شلون صلفة تدخل غرفتي بدون ما تستأذن

ام حذيفه / صلي عالنبي يمه قابل البنية شنو السوته

فكيت عيني هاي شبيها امي حقها متدري بيها شكد حيالة

صفا مقهورة / عمة والله بس ردت يشوف موبايلي عطل

زمخت بيها / والله العطل بدماغج هذا امشي اطلعي برى

اخذتها امي وطلعن قفلت الباب ورجعت مددت عالفراش حقيرة رفعت ضغطي

ايهم / 

جنت مقرر ابقى اسبوع بالعراق وارجع لان عندي شغل وما اكدر اعوفه بس مددت الفترة وبقيت اسبوع ثاني اول اسبوع طار مابين عزيمة الحجي ذبح ذبيحتين وعزم بمناسبة ولادة ابني ومابين اصدقائي واقربائنة زاروني من سمعو برجعتي

لينا من وكت انطيتها الهدية ورجعتها بيد ملاك بنت حذيفة ما تقربت عليها ومن اريد ابني امي اجيبه الي أشوفه ، شكله يجنن ابيض ثلج وعيونه بيهم لون صح بعض ملامحه علية بس مأخذ شبه أمه أكثر

جابته امي وخلته بحظني جنت كاعد بالاستقبال اني وأبو صهيب الي جان نازل مجاز 

_ام حذيفة / خله بحظنك أمه عدها شغل

معتصم يمزح / والله عمتي حاكمة الجناين خوش حكم البنت بعدها ما صارلها جم يوم ولدت ومشغلتها

ايهم / 

شكرا لزيارتكم عالم روايات سكيرهوم