رواية الابواب الخمس الجزء الثاني الفصل الرابع بقلم ريام الهادي
أشّفنة من عمرنة .. شفتهمنة
وهمنة كبال عينك .. شفتة همنة
ذبحنة وفوك ذبحة .. شوف تهمنة
يكلهم بالذبح تعبولي ادية
شرهب : وبديت اسولف كلشي لمهند الي انصدم لدرجه لوه ايدي عباله اكذب
والله مداكذب وروح اسأل ابوك وامك اختك مصادقه حماها وكشفوها وجانت حامل منه
مهند : شرهب اذا تكذبين اعلكج بلبنگه
شرهب : والله مااكذب ااااخ ايدي عوفني البيت كله يدري حتى عمو جوحي ومرتضى بس انت ضمو عليك وحتى ذاك رجل سما هو وابوه اخذو بيتكم حتى بس لتنفضحون
عوف ايدي راح اطك
دفعني حيل وطلع يركض اني بقيت افرك بيها ومشيت وراها لكيته فاتح غرفه سما وجرها من شعرها من عزت نومها كعدت مخروعه
سما : شبيك شبيك
مهند : جاوبيني ليش اطلكتي
سما : عووف شعري ماما ماما لحكيني شبيك تخبلت
مهند : انت شايفه بعد خبال احجي
شرهب : واكفه واباوع عليه شديسوي وبدا يضرب على وجهه دك راشديات على صوت عياطها تكول وحده محروكه كل عيطه واني افرك بيدي واكول وكرص شلون صوت حييل
اجت صالحه تركض وعمه بديعه جانت جوه صعدت تركض هي وبان ودخلو ركض عليه وهذا انگلب وحش تكول نار ويذبون بانزين عليها لازمها من شعرها وهي شعرها طويل وثخيل لافه على ايده ودك راشديات ويعيط احجي ليش اطلكتي
صالحه : لك يمه راح تموت بيدك عوفها قابل هي اول وحده اطلكت وشذكرك هسه من الصباحيات
مهند : اذا محجيتو هسه كلشي احركها الج
صالحه : لك شحجي عوفها صيحولي ابوه هذا تخبل
بديعه :مهند احبيب انت العاقل الرزن شجاك عوف اختك شوفها انمردت بيدك مرد
مهند : اله تكول ليش اطلكت وشصار من اني ما موجود
صالحه : من صخام بوجهي وجهه الخلفوني لك ماصار شى موخوش رجال واطلكت جرمت بس فهمني شجاك من الصبح هايج على اختك ومتخبل احد حجه شى وياااك لك كاافي تضرب بيها راح تموت جواك
شرهب : سحلها وكعها بلكاع ودك على بطنها فقد كام ميشوف كدامه حتى دفع بان وعمه حيل انركعت بان بلكنتور اندارت صالحه باوعت عليه مدري شون حست اني وراها لان بان وعمه جانو يساعدون صالحه توخر سما من ايد مهند وبس اني واكفه اتفرج ركضت عمه بدعه وطلعت اتوقع راح تروح للسوك اتصيح ابوه وعمه لان مكعد يكدرون اله وهو طويل ويبقى رجال اقوى من المره محصلن منه بس الدفع والضرب
صالحه: شتريد هسه بس عوفها
مهند : بتج حبلت من حماها مووو
سما : تبجي وتعيط لا والله من رجلي بس اخوه الجلب تعده عليه ولكم والله تعده عليه
مهند : شون تعده عليج وسكتي معناها راضيه بلسواه ليش مااجيتي وحجيتي وخليتيها صنطه الشريفه مترضى وتسكت اليوم احرك اهلج لج تعااال
شرهب : سحلها حيييل يريد ينزلها وايدها يمكن انخلعت كل عيطه منها تزرف الاذن لعب بيها طوبه يريدن يلزمنه ماكو ثور وهاج تالي بان وامها دفعوه حيل وفكوها من ايده هو نزل يركض جان مهند ميشوف كدامه بسبب بجيها وصياحه وضربه لسما كلت تستاهل اخذت حق بلال منها لان جوته بس من شفته نزل يركض كلت هذا وين راح ورجع وبيده سجينه اللحم الحاده الطويله الي دوم اخاف منها لان يكسرون الباچه بيها اني هنا نشف دمي كلت شسويت وكمت الطم على وجهي من الخوف واعيط راح يگتلها
صارت امه كدامه وادفع بيه وهو يعيط
مهند : وخرو اليوم اذبحها هاي عار وحده ساقطه متستاهل تعيش ولكم شلون خاليها لهسه هيج ماعدنا شرف لكم هاي طمست راسنا
شرهب : امه تدفع وتتوسل وتبجي
صالحه : ابوس رجلك يمه عوفها والله ابوك وعمك عدمو العافيه بيها اسابيع حسره عليها الاكله زوركوها وطرحوها وخلو دمها بطولها لك حتى الايد انكسرت ارحمو بحالها متخافون الله انتم كل يوميه واحد جاي وصاير رجال براسها كااافي طايحين الحظ عوفو البنيه بحالها
مهند : واني هسه اشوفج الرجال شيسوي
شرهب : ثواني مو هواي ومنحس غير السجينه طابه بخاصرة سما وعياطنا اخذ الدنيا وامه وكعت فوكاها ومهند ولا دار بال ولا جن ضرب اخته بلعكس هلمره تفل عليها وعافها وطلع
خفت من منظر الدم وعياط صالحه وبجي بان والدم الي ديجري كمت اطك سن بسن من الخوف اي خفت حسيت راح تموت واني السبب بموتتها اني ردت بس يضربها يعاقبها يحبسها متوقعت يضربها سجينه ويخلي دمها يجري
كعد على الدرج وصالحه تعيط عليه تكله ولك جيب تكسي نودي اختك تعال شيلها يلمصخم الله لا ينطيك الله ياخذك وهو حتى مندار عليها
وبقى على كعدته جان اطب عمه بدعه ومرتضى وعبيد وركضو على صياح صالحه واني واكفه اباوع عيوني تتنقل على غرفه سما وعلى مهند
مرتضى : لك شسويت تخبلت
مجاوبه وعافه ونزل كعد بلهول
صعد مرتضى وشالها ويه عمو عبيد وصالحه شمرت عبايه عليها اباوع شايليها والدم يجري كدامها ترس المكان والدرج تكول ذبيحه
طلعو ومهند طب شرب مي ولبس نعاله وطلع ومحجه ويه اي احد
بديعه : شرهب تعاالي
شرهب : هااا عمه مسحت دموعي اني نادراً ابجي بس الموقف مرعب والدم والعياط والضرب جنت ابجي بلا مااحس بروحي من الخوف
بديعه : احجي يمه الصدك انتي كلتي لابن عمج على سما
شرهب : بقيت ساكته واباوع بوجهه
بديعه : عزه العزاني لج شجاج تخبلتي
شرهب : هو اني شكلت ياعمه
بديعه : وعمه العماج لج اندكيتي بصالحه تخبلتي اني امشي واوصي ابعدن عنها وعن بتها ولجن جفنا شرها هاي وحده متخاف الله وبليه ذمه وضمير اااااخ وتعض بأصابيعها
وين اضمج ادعي ميصير شى لبتها لا والقران تگتلج خلاص
ربي وين انطي وجهي وين مااديره مصيبه تعالي يخوله وشوفي حالي كعدت بلكاع الطم على رجلي خايفه على شرهب هاي صالحه متتفاهم شون اكلها اني كتله اي اذا سألت اكول اني كتله قابل شتريد تسويلي تذبحني هي عركه وصياح وتعدي بس اذا عرفت بشرهب تخلي حياتها جحيم
ربي انت القادر المقتدر ابعدهن عني وعن بنياتي ذني يتامه وانت اليتيم عندك عظيم
شرهب : عفيه عمه لتلطمين على رجلج تصير حمره وتزرك
بديعه : من ضيمي وقهرتي شجاج متكوليلي تخبلتي شنو هاي الوكاحه الانتي بيها ليش عكس اختج مو ذيج ساكته وشحلاها تكولين الها يمنه تروح يمنه روحي يسره تروح يسره انتي شبيج مخالفه اكلج هذا لتسوي تجين تسوي عناد وهاج هاي نتيجتها وكعت على روسنا بعدج شكدوتج ويوميه طلابه هاي وكاحه امج بطليها من خرب غيرتها الطلعتي عليها
شرهب : كعدت ساكته اعرف السويته شى جبير بس اني هذا طبعي مااعرف اسكت وشوفه بلال وهو يبجي وايده محروكه حيل أذتني وبنفس الوقت تندمت لان حجيت غير اسكت جان حركت گلبها بغير شى شجاني وحجيت والله متنلام عمه بيه
نزل بلال كل هاي الهوسه والعركه وهو ولا كعد نزل شاف الدم اخترع وبقى يعيط
صعدت ركض اله وسحبته من ايده ورحت للغرفه مالتنه عااط نسيت الحرك مالته من شفت ايده شلون مشوهه والخاشوكه طابعه عليه بلحظتها اختفى الندم كلت حيل بيها وبقلبي تكول يارب لتموت حتى ماارجع اتندم
ابقى هنا اجيبلك ريوك واجي
بلال : دم اوااا
شرهب : بقى يباوع لايدي ورفع البجامه من رجلي عباله اني مجروحه ولك مو اني اكعد هنا وهاااك جبت سيارته والدب مالتي وانطيته اله فتحت الباب لكيت بان تمسح بلدم وتبجي
شرهب : ليش تبجين
بان : خايفه لتموت
شرهب : هيج تحبيها
بان : رغم سوالفها العوجه ومايوم حبتنا بس اني مااريدها تموت هيج موته وهم خطيه مهند اذا ماتت سما راح يسجنوه وجنه بواحد صرنا بأثنين مكافي يونس بلسجن هلمره مهند وهاي مو سنه وسنتين اذا ماتت اسم الله يجوز يعدموه اسكتي شرهب نار بصدري هااج شوفي لشتي كلها ترجف
شرهب : نزلت وعفتها تمسح بلدم وسويت ريوك لبلال اني مااكدر احط لكمه بحلكي طبت بيبي بيدها علاليك مسواك مال المحل ذبتهم بلهول وكعدت وفتحت فطوتها وتباوع بلوجوه المصوفره
عمشه : أكلجن يلمدهربات منهي منجن مسودنه وذابه دمايه بلباب شنهي ذابحين دچاچه وترافست بيدجن
بديعه : ياعمه يادجاجه هاي سما
عمشه : شنهي يمكموعه بت الصالحه المسمومه تذبين دمج كون لويش موصخه الحوش
بديعه : عمه هو انتي شفتهمتي وكمتي تعيطين هذا دم سما مهند ضربها بسجينه
عمشه : لطمت على صدرها احترك ابو اصله چا تسودن اخيته هااي شعامله بت صالحه والوليد طكن فيوزاته
بديعه : عرف بسالفه طلاكها بسبب حماها الهوسه الصارت قبل جم شهر عرف بيها
عمشه : ومنهي تدوهن وكتهن گلهن ليه
بديعه : شرهب ياعمه والله اعلم شراح تسوي صالحه
عمشه : شربت وينج
شرهب : جنت وراها واسمع كلامهم وكفت گبالها هياتني بيبي
عمشه : ياحبوبه ماتكضين لسانج عبن يجيبن المصايب چا ماتندكين اله بصالحه وبنيتها شرالج ياحبوبه جلدج يحگج
شرهب : بيبي انقهرت لان ضربت بلال شفتي البارحه شسوو بيه وشوفي ايده
عمشه : چا صالحه موش تجوي يدج تشوي راسچ عبن بنيتها تصوبت ومهند وين وله
بديعه : منعرف طلع ومرجع وحتى محد اجه منهم راحو للمستشفى ولهسه صنطه
واني خايفه عمه لتموت وهم مهند يروح مستقبله وهم صالحه تحركنا حرك والله
عمشه : لا تخافين اول دچه بجرية
بديعه : شنو يعني عمه
عمشه : مهند طك اخيته وضربته بلريش
هاااي كويه ماتموت عبنهه لو خيره چا من زمان من طيحتها الاوليه سلمتها ردت جنهه شاذي تطورد هنا وهنا وهاي ضربتها صواب وترد
بديعه : الله يسمع منج عمه وتفوت على خير
عمشه : چا هيه تفوت خير شر تفوت مايضل شى على حاله اكومن ارتب غريضات الدكان واكومن على رزگي عبن مايفيدوني لون كتلني الجوع
بديعه : كامت عمه ولا دارت بال شربت مي وصت شرهب تسويلها جاي وتودي للمحل
واني اكل بروحي اكل من الخوف
لا ساهره ولا جوحي بينو ولا احد من الي راح للمستشفى هم بين واني وبان نروح ونجي وساعه اريد الزم شرهب الزكها بلحايط وساعه اتعوذ واكول صغيره متفهم واخذتها القهره على بلال وسوت هيج المشكله اني اعرف شرهب وكحه مو مثل اختها ودوم اكول كون متطلع على امها لو على عمتها خوله لان هاي مالها سند اريدها تعيش بليه مشاكل وتكمل دراستها حتى ايدي من التفكير مااخذت شغل وصارت ساعه ١٢ وطبت ناي
ناي : رجعت للبيت جان يوم دراسي عادي كملت دروسي ورجعت اتمشى متوقعت البيت هيج مگلوب بس دخلت اجت بان تركض ذبيت الجنطه بلهول وكعدت يمها وهي تسولف واني مااعرف شنو شعوري كل الي حسيته ضربات گلبي اسمعها ومعدتي تلوني وكل خوفي لا شرهب وره كل الصار كمت وعفت بان تحجي وركضت ليفوك على شرهب وادعي مو هي الفتنت
طبيت للغرفه شفتها كاعده ويه بلال هو يلعب ويخربط وهي ساكته
حجايه وحده بردي گلبي بيها مو انتي الي حجيتي لمهند مووو
شرهب : دنكت ومجاوبت ياهو الي يسألني اسكت لان مااكدر اكذب مبينه اني
ناي : لا شرهب اروحلج فدوة كولي مو اني
شرهب : لتعيطين فدوة اليوم سمعت عياط يكفيني سنه ليكدام
ناي : كعدت على الجربايه واضرب على خدودي اتخيل صالحه شسوي بشرهب ليش هيج شسوينا الج حتى تخليها تأذينا
شرهب : تستاهل حقيره ولو ساكتين جان أذتنا اكثر
ناي : اني من سكتي البارحه گلبي لعب كمت اروح واجي رديت كعدت رديت وكفت اريد استوعب الصار مااكدر
رحت لزمت ايدها حيل اسمعيني عدل اذا سألوج اياااج تعرفين شنو اياج تفتحين حلكج وتكولين انت الحجيتي لمهند كولي مو اني
شرهب : اكذب
ناي : انجبي اي اكذبي وحتى احلفي كذب هاي اذا حطتج بالها ادوسج بلقندره شفتي بان شسوت بيها وبان عدها ام واب ويدافعون الها وراحت سنه من عمرها احنه منو النا يلثوله افتهمتي كلامي مو انتي انكري حتى كدام مهند كولي مو اني واذا سمعتج حجيتي وكلتي اني تعرفين شسوي بيج العمر كله مااحجي وياج ولا اباوع بوجهج واعوف صالحه تسوي بيج الي متسوه
شرهب : ماشي لتعيطين افتهمت والله
ناي : كمت بدلت ونزلت انتظر حالي حال عمه وللعصر محد بين وصار ممنوع تجوال وكمنا انلوب وحتى مهند ماكو ضلينه دايخين المن نسأل
حتى اكل محد اكل بس بيبي حطت صينيه صغيره وصبت تشريب لوبيه حمره واكلت وكامت ولا يمها وتعيط تريد جاي واني من القلق والتفكير حتى المي اريد اذبه من معدتي
للساعه ١٠ بليل اجه مرتضى همزين معبري من السيطره لان وياه امه وكايل الهم جنه بلمستشفى اول مدخلو ركضنا عليهم هااا بشرو
مرتضى : ميت جوع بعرضي صبولي دورت على لفه ماكو حتى لو لفه لحم جلاب هم راضي ولكم من الصبح مماكل
بديعه : اسويلك عمه التريده بس احجي البنيه صار بيها شى احجي ساهره شبيج انتي الثانيه ساكته
ساهره : اسكت من ضيمي جان راحت البنيه من عدنا
عمشه : انه موش كتلهم هاي البت
عتوي تضربه بلنعال يرد ليك سبع ترواح
ساهره : شبيج ياعمه بيش طالبتها بله هاي لو بنات ذكرى لو بت بدعه جان حجيتي هيج
عمشه : خايبه اسگتي عود شوفني انه الحنينه على بت اختي واتراجف عليها عياره لو بيج محنه وبخت چا خذتي البت لابنج وحابيتي عليهه موش تذبوهه عد وادم موخوش لعبو فلك بيهه
انه گله بكوم وعياره النسوان بگوم هييييج اتراجف كون اشك زيچها وازينهه وانشد شكو صخيل بلدرب ينطح بيهه ويفوخ گلبي وانتي اولهم يعياره يلحنينه وعوجت حلكهه
ساهره : اني مو كتلك وديني للبيت ارتاحيت هسه المن جايبني هنا هاك بيبيتك تكول فرحانه بكتلت سما
مرتضى : يمه مو كدامج كوه وصلنا واعرف من نروح للبيت تنامين ومحد يسويلي عشا اقلها هنا ضامن يسون جوعان من الصبح مماكل
بديعه : هسه غير نعرف البنيه شصار منها
مرتضى : وصلنا للطوارئ اخذوها من عدنا جيب بطالت دم جيب علاج دخلوها عمليه تالي كالو الضربه مأذيه جزء من الكليه اليمنى
بديعه : لا عفيه وتالي
مرتضى : اضطرو يشيلوها لان اذا بقت راح تسبب مشاكل الها
بان : وهذا الشى ميأذيها
مرتضى : عادي هواي ناس عايشه بتك كليه واليسرى عدها زينه مابيها شى وقفو النزيف وهي بعدها مصاحيه للصبح يبين وضعها
بديعه : دخيلك ياابا الحسن تلطف بحالها صغيره بعدها شافت من عمرها
عمشه : اكوم اذكر الله مامش خير منكم
ناي : صبت عمه العشا وكعدنا كلنا ناكل محد حاط لكمه بحلكه اكلنا والكل ساكت محد بعد فتح الموضوع ومهند طب وصعد لغرفته بدون حتى منسمع صوته وصعد وراها مرتضى منعرف شراح يصير بس المهم سما ما ماتت وهذا مهند شيفكر بعد مااخته خسرت كليتها بسبب ضربته
مر ٤ ايام عدت سما مرحله الخطر بس باقيه بلمستشفى لان وضعها بعده وبنفس الوقت يراقبون عمل الكليه وتقبل الجسم كليه وحده
البيت هادئ كلش وصالحه اجت مرتين بلمرتين سبحت واخذت ملابس وراحت وحتى من تسألها عمه غير زينه سما وهذا هو حتى على مهند مسألت اما مهند كامت عمه تصعد الاكل اله بغرفته ومحد تجرأ يفتح الموضوع وياااه لحد خامس يوم اجه مرتضى طب يركض ويلهث ويصيح وين مهند جنت كاعده بلهول اباوع تلفزيون اني وبان وشرهب كاعده بلكاع تكتب فزينا من دخلته
بان : شكوو شبيك
مرتضى : وين مهند يمعودات
ناي : فوك
صعد يركض وشويه وسمعنا صوت عياط قوي الهم صعدت اني وبان لان صوتهم قوي كلنا تعاركو
الباب جان مفتوح ومهند متمدد بلغرفه ومرتضى يعيط فوك راسه
مهند : كتلك شيسون خلي يسوون هاي اني وخلي يجون ياخذوني
مرتضى : لك ابوك وامك يتراجفون اذا شالوك منو يطلعك بهذا الزلك مشفت يونس شصار بيه تره هي مو سباعيه وادك صدرك هذا سجن والله اعلم شراح يصير بيك بس تعال ويايه اليوم بلكت باجر نطلب منها تتنازل
بان : شصار
مرتضى : هاي الگلبه سما اشتكت على اخوها كالت هو الضربني واكيد كلها وكت قليل ويجون يشيلون هذا النافخ روحه عود هو رامبو
ناي : وعمه وعمو شلون قبلو
مرتضى : مقبلو عليها بس هي عاندت كدام المحقق وكالت اله اعفنه بلسجن ماطول صحتي ادمرت من وراه امها تريد تعيد بس تحاول تقنعها ماكو قفلت
مهند : ذاك حايط وتركع راسها بيه وخلي تطلع واشوفها اله اكتلها خلاص وخلي الشكوه مالتها عود تفيدها
مرتضى : عود اكتلها اذبحها بس امشي هسه
ناي : كوم مهند الله عليك
مهند : شنو كدامج طفل وصغير وافلت من سوايتي تره مامهتم الها وغلطتي ماذبحتها مو بس ادچها
ناي : الله عليك بداعة عزيز گلبك كوم وبليه مشاكل اكيد عمه صالحه متقبل الها وكلها يومين وترجع لتخليها تفرح وتتشمت بيك كوم تقربت منه جنت اريد يطلع من البيت مااريده ينسجن مثل يونس جانت توسلاتي بحكم العشره البينا وهو افتهمها غير شى
اطلعو بره اريد احجي ويه ناي
مرتضى : هو هذا وكته ولك والله فايخ انت
مهند : دقيقه ما اتأخر
ناي : طلعت بان ومرتضى وبقيت اني ويااه كام من فراشه وكاال
مهند : خايفه عليه
ناي : شلون مااخاف غير ابن عمي
مهند : البيه كافيني نايه لتزيدين أذيتي من تحلفيني بعزاز گلبي تعرفين انتي اعزهم واحبهم لگلبي
ناي : اذا هيج بداعتي روح ويه مرتضى لحد ميصفه الوضع مااريد تنعاد مأساة يونس ويركضون بلمحاكم وتاليها تنحكم بس اريد شى منك
مهند : شنو
ناي : لتكول شرهب هي الكالت الك والله امك تعلكها من شعرها
مهند : شون اگول ماعندي عقل واحجي
ناي : يله بدل واخذ كم شغله تحتاجها وتوكل
مهند : لعيونج والله طالع
ناي : الله يحميك
عفته وطلعت لكيتهم ينتظرون باب الغرفه
طلع مهند ويه مرتضى وبيبي تعد وتصف على سما كل شويه فاتحه الفوطه وصاحت يابو خيمه الزركه الفرج منك اريده چاانه مااخلص منهن بزرتهن عليهن سگط لا والحظ وتضرب كصتها
كوه سكتناها
عمو فلاح بقى يشتغل ويطلع من الفجر ماحجه على سالفه سما بس كال رجال عاشت ايده كأنه قبل على تصرف مهند تالي توسلت بيه عمه حتى يرحون يشوفوها راحو هو وعمه للمستشفى واجت عمه تصفن نسألها شبيج تسكت
بديعه : وضع صالحه خوفني تحس بعوينها الشر تقربت منها ردت بس انهي سالفه شرهب كتلها تره اني حجيت لمهند شمدريني طلعت من لساني الغريب ماعلقت بس كالت يصير خير اني هاي الحجايه تكول صاروخ وكع على راسي لان اعرف ماكو خير وراهن
حتى ساهره تروح وتجي هواي بعد ما كطعت ذيج الفتره وهو هذا الوترني اكثر
وبعدها بيوم اجوي شرطه للبيت يدورون على مهند وعليه القاء قبض فتشو وطلعو
ناي : مر اسبوع واليوم كاعدين ننتظر سما طبت هي وامها وخالتها وابوها وجوحي بسبب سالفه سما رجع جوحي وعبيد يتحاجون تقربنا منا حتى نسلم عليها ونبوسها ونتحمد الها بلسلامه دارت وجهه ودفعتني على كيف كلنا من شفناها هيج وخرنا من طريقها
سما : صعديني يوم فوك
صالحه : اي يمه تعالي ساهره ويايه
عمشه : هااا خايبه امخمخم وطابت ريحته
صالحه : عمه رحمه لموتاج جوزي من بتي
تعالي يمه اصعدج
شرهب : تقربت من بيبي وكتلها شنو يعني امخمخ
عمشه : امخمخم ويلعوبه هاي جنهه ملابس كاتلها الجيف مااطيب ريحتها عبنهه دفعت البنيات ماترضى ترد السلام كضو وكصو جلوتها وماركدت تنكط سم بت صالحه
شرهب : بيبي ليش متحبين سما
عمشه : انه كلاتكم احبنكم عبن وليدات ولدي وگطعه من روحي انه سما جزت نفسي منهه من غدرت اخيج وديحته والوليد عبنه رچيچ ضاع برچليهه وماركدت تسير وتذب بلاها هااج اخيها وطيحت الطلابه براسه چا هيج وحيده يصفى گلبي ليها عرمه يمه وهذا وليدي البعير مرته تسوك بيه چا غير الزمها وافصم رگبتها واحش رجولهه ضال فاچ حلكهه ويتصفن على مريته العوبه وحيدي يطورد بلشوارع
شرهب : اي خطيه مهند بلكت تتنازل عنه
جان تلزم اذني بيبي
عمشه : يم عفشه مااريدن تفترين جدامهن لا يكضنج ويطحن بيج وحك الحسين مايضل بيج عضمات
شرهب : مااشي مااحجي وياهن والله
يمه نايه نزليلي غريضات اخيتج تنام يمي
ناي : ليش بيبي
عمشه : شنهي لويش چا بگيفي انه اريدنهه جاري
ناي : حسيت بيبي خايفه على شرهب مو بس هيه اني وعمه بدعه ومنتظرين شراح تسوي صالحه
رجعنا لدوامنا ورجع كلشي لطبيعته والهدوء رجع للبيت ومخلصيها نقرا مهند مرجع للبيت وسما ابد متنازلت بلعكس بقت معنده وحسيت صالحه واكفه وياها واله مستحيل سما الها الجرأه تعاند هيج
شهر فات كلمن حاير بروحه ومااكول نسينا سالفه سما بس على الاقل تناسيناها وهي جانت من تطلع متحجي ويه احد مرات تكعد بلطرمه لو بلهول على كد التلفزيون وتصعد وصحتي صارت احسن هاي السنه الدروس صعبه ونقرا ومنلحك الشى الجان مأذيني بان وقهرتها من ضاعت السنه عليها
رجعت من المدرسه شفت سياره بيكب واكفه بلباب
شرهب : هاي السياره مال منو مشايفتها
ناي : ركزت على الرجال الواكف باب المحل وبيبي كباله تسولف وياه واتفاجأ خال مهدي
عمران
تقربت وكلت السلام عليكم
اندار عليه
عمران : وعليكم السلام هله ببنيتي كواچ الله
ناي : هلو خالو شلونك
عمران : تحت رحمه الكريم انتي شون كيفج بدراستج عساج بخير
ناي : الْحٍمَدٍ للـّہ
عمشه : يمه ابوعبد الرحمن چاي وجايب امانه وانه مارضيت اخذها ترديهه
ناي : امانة شنو
عمران : شوفي بنيتي اني لوما الشغله بيها مصلحتج ماامشي بيها
ناي : شنو هيه
عمران : الحجيه ام فوزي حطت راتب بأسمج كل شهر يجيج لباب بيتج مصرف الج ولاخيج من يطلع
ناي : لا شكراً مااريد
عمران : لا تعاندين بنيتي وراج مصرف وام عبيد ينطيها العافيه مامقصره بس المره هم مريضة وهي شايله مصرفكم ولازم تخففون عليها الحمل
عمشه : حملهم مسچ اتعطر بيه انه مارديتك عبنك ابن اصول واعرفن طينتك الوادم تحلف براسك لجن انتظرت البت وهي تسولف وياك وتعرف رايها
ناي : شكراً خالو مااريد اي شى منهم
بقى يحجي ويضرب امثال فوك الساعه يحاول يقنعني اني وبيبي واثنينا قافلين اخر شى شال وانطاني ورقه بيها رقمه اخاف بيوم احتاج شى ونزل سلال الفواكه من سيارته ترس المحل
عمران : هاي ماتردوها ازعل هاي مني
عمشه : وانه مااردك مقبوله منك ياابن الاجاويد
عمران : هاي اختج
شرهب : ابتسمت وسنوني طلعت من شفته بس طوله يسوه عمامي كلهم اني ليش لا خال عندي ولا عم بيه خير عندي صفنت وكلت بگلبي من خرب عمامي كلهم وحظي وياهم من ماخلاك عم الي لو خاال
وخله جوحي الكحف وعبيد الطلي عمامي
عمران : الله يحفظها
ناي : سلم وراح لكيت بيبي تبوس بيه لان حسيتها خايفه لا اكسرها واوافق اخذ الفلوس رغم شكد محتاجين الها وحال العوز كاسرنا بس كل مااذكر وداد وحقارتها ومهدي وشمخرته امنع نفسي الف مره اخذ شى منهم
عدا اليوم حاله حال اي يوم ودخل الشتا علينا وبيوم اترس الصوبه نفط وانفتحت الباب وطب مهند استغربت جيته باوع عليه بلهفه وبقهره معرفت شفسر عيونه عفت الي بيدي وتوجهت عليه
الْحٍمَدٍ للـّہ على سلامتك شجابك الشغله انسدت
جر نفس قوي وحسيت بيه خنكه الدنيا كلها
مهند : اني راح اسافر
ناي : وين
مهند : الوضع تأزم هنا والشكوى أذتني والقهرني ابويه طابك ويه سما واني اذا دخلت السجن بلميت انحكم ١٠ سنين واضيع كل شبابي سألت صاحبي الي كرايبه ركض بسالفه يونس وحجالي شراح يصير بيه اذا انحبست وتالي من اجيت على ابويه اشكيله حتى يضغط على سما تسحب الشكوى لكيتهم وياها اثنينهم خيروني لو اسافر اعيش واشتغل لو اخلصها بلسجن حتى جواز خلوني اطلع حتى اسافر وانطوني فلوس حتى استعجل
ناي : معقوله هيج رادو منك
مهند : اني بس اريد سما تحسب الدعوه ثاني يوم اني هنا واطيح حظها بس طول ما الدعوه مستمره راح ابقى هيج متهجول شوفي حالي من بيت لبيت حيل تبهذلت ناي
ناي : حقك سافر احسن الك وان شاء الله تفض على خير
مهند : توقعت راح تبجين او على الاقل تنقهرين تمنعيني
ناي : روح شوف مصلحتك واني مااوكف بطريقك بلعكس اريدلك الخير شون امنعك وادخلك سجن
مهند : ناي اريد تنتظريني
ناي : شون يعني
مهند : احلفي مايوم گلبج يدك لغيري ولا تتزوجين غيري كلها اشهر وارجع واذا لكيت شغل هناك واستقريت اسحبج يمي
ناي : وين راح تروح
مهند : لتركيا كالو رخيصه
ناي : ليش مو سوريا كلها تسافر الها
مهند : تركيا احلى وحتى اكدر ارتب حياتي اكثر
ناي : الله يوفقك
مهند : احلفي وطمني گلبي وخليني اروح مرتاح
ناي : بقيت ساكته
مهند : اذا ماحلفتي مااروح وخلي ادخل سجن ويطبني طوب وشيصير برگبتج
ناي : عفيه لتسوي هيج لزم ايدي وبقى يتوسل ردت بس يروح
مهند : والله والخلقج مااروح
ناي : مااشي انتظرك بس روح كمل شغلاتك وسافر
مهند : ديري بالج تكذبين عليه
ناي : مااكذب مااكذب لتروح تجي امك وتسويلنا عرس هنا
مهند : تنتظريني
ناي : انتظر
تقرب راد يبوسني ابتعدت وسمعنا صوت صالحه رجعت طفرت يم الصوبه وهو دخل
بقيت بره الوم بروحي شلون كتله انتظرك وارجع اكول هي كلمة قابل حلفت بس خلي يروح مكافي من وره شرهب صارت المشكله شكبرها
بقيت بره بعز البرد وشغلت الصوبه وكعدت كبالها بلطرمه طلعت شرهب تضحك
شرهب : هااا ادفين الجو
ناي : الصوبه دخنت واريد يروح الدخان واطببها
شرهب : كتلنا البرد جوه واريد اكمل قرايه
ناي : مااشي راح اطببها
دخلت لغرفه بيبي وراها دك الباب مهند اجه ودعها وباس راسها وسلم على الكل وعيونه عليه ساعه ادنك وساعه اسوي نفسي اقرا انقهرت عليه وهاي صالحه مكيفه ابني راح يسافر زين وسما مو فوك شلون تقبل اخوها هيج يصير بيه
طلعت بيبي وعمه والكل وراه عداي اني وذبو مي على امل يرجع بلسلامه اني حسيت بقهره اي اكيد احس مهما كان جان بيوم الي مشاعر اتجاهه
عدا شهر ١٢ ودخلنا ٢٠٠٦ اول ايامه الجو بارد وبيبي تركض على العيشه وهنا بدينا نطمن الوضع استقر وكلشي ماكو وحتى صالحه وساهره طبعي يتعاملون ماكو اي شى جديد واني اريد ارتب ملابس باجر نزلت البلوزات مالتنا من السطح الجو بارد اخاف تندي عليهن ويبقن رطبات بيش نروح للمدرسه نزلت واريد ادخل للغرفه واسمع طبه وعيطه هااي بيبي
نزلت اركض وشمرت البلوزات والكه بيبي متزحلكه ورجلها جواها وتعيط وحالتها حاله
كمت اعيط بلبيت كله الحكو بيبي وكعت
عمشه : يايمه ياحبيبة يابويه الحكوني
كوه تحجي وتتنفس نزل عمو فلاح وعبيد يركضون يردون يكوموها تعيط
وكفنا اني وشرهب نبجي عليها اول مره نشوف بيبي هيج اول مرة احس عمشه الي تهز البيت بلسانها وعياطها تبجي وتصرخ من الالم وتتوسل يخفوو الها ركضو على الجيران وجابو سياره لان ماكو تكسي ليل وممنوع تجوال واخذوها للمستشفى وياهم عمه بدعه الي انثولت من شافت بيبي هيج
شرهب : عفيه بيبي بيها شى
ناي : ان شاء الله مابيها
اباوع على صالحه واكفه على الدرج وايدها على خصرها هاي وكفتها من تخبث اعرف وراها شى مدري شون باوعت على كاع الحمام بدايته رغم كل الهوسه لكيته مرشوش زيت وزيت مدري شونه حتى ريحته مطيبه مو زيت طبخ
كوومي شرهب
شرهب : شبيج ناي خلي ننتظر بيبي
ناي : امشي نصعد اخذتها وصعدت خفت لتسوي شى وماكو احد يحمينا لا بيبي ولا عمه ولا حتى عمامي رغم ميعتمد عليهم بس على الاقل ميسكتون اذا أذتنا
اول مره اقفل الغرفه حتى بان من كثر مشافتني ارجف خافت مثلي
الليل منمناه للصبح ننتظر احد يجي
واجوي وكالو بيبي عمشه حوضها انكسر وعلى الاكثر راح تبقى سكط بلفراش طول عمرها
هنا حسيت رجعت للمربع الاول اليتم وقله الحيله صافنه واكول شون وعيشتنا وحالنا شراح يصير بينا
بقينا ايام حتى دوام مداومنا ننتظر سندنا اي هي سندنا هي مانعه بنات غنيه عنا واجت بيبي وحالتها تبجي الصخر شايليها متت قهر من واكفه وتعيط وتبجي من الالم
فلاح : هسه شلون كلولي تبقى امنا هيج
جوحي : اني ماعندي كتلكم داخل بشغل وكل فلوسي بيه
عبيد : واني انطيت اخر ماجمعته لمهند وسافر كدامكم عدا علاج سما كومه كلفني
فلاح : ولكم الله واكبر تضل المره هيج كدامنا متأذيه لازم عمليه اني لو عندي مااطلب منكم
عبيد : شو انت متعرف تحجي قابل لو عدنا نعزه عليها هاي ملايين بابا ملايين منين انجيب
طبت صالحه وعيوونها كلها شماته
صالحه : الْحٍمَدٍ للـّہ على سلامتج عمه
عمشه : الله لا يسلمج ولكم وخروها مني لا انعل شيب ابوها
صالحه : مكسره وراسج كوي والله زين
بديعه : على كيفج وياها ياصالحه شجاج
ناي : اباوع شلون ناس تذبها على ناس بقيت اني وشرهب يمها اجت ايام عيونه متاخذ نوم من كثر منشوفها تعبانه ومر اسبوع وبقى الحال كما هو وحاله بيبي تسوء حتى الاكل كطعته وحجي متحجي
اتذكرت يونس سوده عليه هم هيج عزو عليه وسگطو بقيت اكل بروحي وكلت انعل ابو الكرامه الي تضيع بيبي مني اسبوع انتظر واحد منهم يحس ويودي امه ويسوي عمليه الها ويسمعون المها وعياطها والجو بارد تتأذه اكثر وهمه ولا يمهم اما جوحي حتى كاام ميجي
متحملت الوضع بيبي راح تضيع منا حتى صخونه كامت تصخن والعلاج ميجيب نتيجه ركضت ادور بين الكتب واوراقي على رقم خال مهدي عمران حتى لو اعرف اداين منهم بس اطيب بيبي هاي عمشه الي صوتها يهز البيت من العد والغلط هسه يهز البيت بلبجي والالم
لكيت الرقم بقيت حايره شون اخابر تذكرت مرتضى انتظرته يجي هو مشتري جهاز جديد
يوم عدا وثاني يوم اجه الصبح ركضت عليه
اريد تلفونك
مرتضى : فزيت عبالي بيج شى
ناي : عفيه انطيني هذا الجهاز الي اشتريته اخابر منه
مرتضى : المن تخابرين ولج
وكتله على البالي سكت مرتضى لان هو هم مقهور على بيبي وماعنده حتى يساعد وخاصه علاجها وعمليتها غاليه
انطيته الرقم
دك دك وجان يجيني صوته مدري ليش حسيته مثل الاب واستنجد بيه بعد ماضاق كلشي كدامي
وكتله والدمعه وصوتي مبين مخنوكه
خالو عفيه محتاجتك
