 |
رواية الابواب الخمس الجزء الثاني الفصل الخامس بقلم ريام الهادي
وحگك يا حزن مليت
لا تكبر زهگت الناس والغربه
ولك متعوب
احس روحي زرع ما والم التربه
وكتله والدمعه وصوتي مبين مخنوكه
خالو عفيه محتاجتك
عمران : ناي شبيج بويه
ناي : بيبي تعبانه ومحد يعالجها وضعها كلش موزين اخاف يصير عليها شى حتى اكل كامت متاكل
عمران : تهدي ابنيتي وفهميني من الاول شبيهه ام عبيد بالاول سدي اني ادك اخاف رصيد يكلفج مال منو هذا الرقم
ناي : مال ابن عمي مرتضى
عمران : راح اسده واني ادك
ناي : غلقته وثانيه واتصل
عمران : جري نفس وكولي ياالله واحجي شصار من الاول
ناي : بديت احجي كلشي حتى حجي وسوالف جوحي وعبيد كلتها جان گلبي مليان منهم وكارهتهم كره العمه
عمران : لا اله الا الله خطيه بيبيتج لا تشيلين هم التردي يجرالج
ناي : مرايده بس عالج بيبي هي البقت عدنا وبلياها البيت هذا ينگلب على راسنا وشتصرغ والله بس يطلع يونس او اني اتخرج واشتغل انطيهم الك احسبهم دين
عمران : عيب هذا الكلام بنتي راح اعتبر نفسي ماسمعته روحي هسه لبيبيتج واني بعون الله باجر يمج الصبح اكدر ادك على هذا الرقم
ناي : ماادري باوعت على مرتضى فدوة بات اليوم هنا حتى اخاف خالو عمران يدك
مرتضى : لا مااكدر ابات هنا بس من الصبح اجيج ليضل بالج
ناي : رجعت حجيت ويه خالو عمران وهو على الخط يسمع كلامي كتله بيا ساعه تجون
عمران : حسبت الطريق ان شاء الله ساعه ٩ الصبح يمج حضري نفسج وبيبيتج حتى ناخذها لطبيب بس بالاول اخابر جماعه اصدقائي بغداد حتى يدلونا على اطباء زينين لان اني مااعرف طبيب يفيد ام عبيد شى على شى اني باجر جايج وتنحل بأذن الله
ناي : شكراً خالو الله يحفظك متعرف وكفتك هاي شكبرها عدنا
عمران : لتهمين بنتي وروحي ارتاحي
ناي : مع السلامة سديته منه وباوعت على مرتضى صافن عليه
هااااك شكراً وشبيك صافن
مرتضى :خلي بالج لو عندي مااقصر على بيبي تعرفين بيه احبها
ناي : اعرف بيك والله ليش انسى وكفتك ويه يونس مو حتى انحرمت من السياره لان فلوسك راحت على قضيته اني اعرف بيك طيب وايدك مو الك ولو عندك متبخل على بيبي
مرتضى : اني لو اندل فلوس ابويه يابه والله لا اخمطهن واعالج بيبي وعود خلي يكمز ويركص جوبي
ناي : هاي اذا ماكتلك خلاص
مرتضى : وداعتج ميلحك ينجلط ويوكع غير الفلوس اعز مني خليها سكته
ناي : اروح لبيبي
مرتضى : شوفي اني من انام نومي مثل اهل الكهف كوه اكعد واخاف الناس تجي باجر وماالحك اكعد الصبح واجيج خلي الموبايل يمج ومن ترحون للطبيب عوفي بغرفه بيبي بس ياناي اذا خلصتي الرصيد اعلكج بلشجرة ويه التمر ويوميه اضربج بحجاره اطلع حق ساهره وصالحه منج
ناي : هههههه زين تدري بيهن ميحبني
مرتضى : كافي اني احبج
ناي : بدينا مااريد التلفون
مرتضى : لج اشاقه وياج يابه احبج مثل اختي مو ماعندي اخت انتي اختي يله ارتاحي
ناي : هااا شعجب
مرتضى : لج شفت جماعه الاول الجايين هاي السنه مو بنات صاروخ انتي قرد بلنسبه الهن
ناي : هههههه مشكور المهم تفك مني
مرتضى : باع هاي على حورج
ناي : كفخني على راسي بلضحك هاي الفتره حسيت مرتضى هواي تغير مدري گبر وعقل
وهذا الشى كلش ريحني وخلاني حتى من احتاج شى مااتردد واطلب منه
رجعت للغرفه واني افكر شون اقنع بيبي بسالفه خال مهدي او اهله يساعدونا لازم تقنع واله تموت جانت نايمه من المسكنات كعدت بصفها اباوع على وجهه شلون ضعفان واصفر والشفه بيضه بهاي وكعتها عبالك كبرت ١٠ سنين فوك عمرها
بيبي عموشه بستها من راسها
اجت شرهب وكعدت بصفي
شرهب : ناي
ناي : هااا
شرهب : تتوقعين وكعت بيبي وراها صالحه
ناي : انداريت عليها ليش هيج تكولين
شرهب : مبينه عبالج منبهت على الزيت الجان بلكاع وشون ثاني يوم ممسوح وماله اثر وبيبي قويه مااعتقد لان رجلها بيها مي هيج تتزحلك هاي زحلكتها وراها شى قوي حتى انكسرت صالحه من يوم سالفه سما وهي ولا حجت ولا فتحت حلكها حتى اطب وتطلع عادي يعني هيج الهدوء نزل عليها جنت اذا اشيل حاجه لسما اغيرها بغيرمكان تعيط وتگلب البيت مو عاد هسه
ناي : انتي لتحتكين بيها وشتكول كولي صار ولتجادليها ابد
شرهب : شطلعت هاي حتى اذا رادت تضربني
ناي : شرهب انتي كبرتي صف ثاني متوسط عمرج ١٤ سنه مو صغيره بعد واكول اخذها على كد عقلها وسالفتج من حرگتي سما وخليتي البيت يشتعل متسويها طفله كعدتي وفكرتي ومداومتي حتى تحجين كلشي لمهند وشفتي نتيجه تصرفج فتحتي باب جهنم علينا الباب الي مااعرف شلون راح ينسد
شرهب : واني شعليه انتي تعرفين صالحه وساهره وسوالفهن
ناي : شلون شعليج لو ساكته مجان صار كل هذا
شرهب : مشفتي شكامت تسوي سما بينا وشلون اذت بلال انتي ليش جبانه وتخافين منهن
ناي : عيب تكولين جبانه اني مو جبانه اني حريصه عليج وعلى نفسي لان مالنا احد اذا وكعنا وهاج هاي بيبي خلصت عمرها تتعب وتربي حتى من يصير شى عليها يوكفون الها وبعيونج شفتي شون شمروها واحدهم حار بنفسه وعافوها تون وتبجي ولا واحد كلف نفسه يعالجها زين احنا اذا صار علينا شى منو النه شو حتى الجانو بظهرنا واحد انسجن والثانيه سافرت واني وياج منكدر على سوالفهن والله يدوسنه بلقندره وميرفلهن جفن
شرهب : وهسه لازم شسوي
ناي : ابتعدي عنهن
شرهب : والله كاعده وساكته وحتى من اشوف عمه صالحه بمكان اطلع منه
ناي :اكعدي بلغرفه اقري ومن المدرسه للغرفه منا لحد منشوف بيبي وضعها للغرفه شرهب يعني لتفترين بلبيت
شرهب : هذا هو ماافتر
كعدت بيبي وانطيتها دوامها جانت تحجي بتعب
عمشه : عبيد وجوحي مانشدو علي ماكسر خاطرهم حالتي
ناي : الله ليعوزج عليهم شوفي بيبي بس لتصيرين عصبيه اني خابرت خال مهدي
عمشه : اخو وديد العوبه
ناي : اي اخوها ابو عبدالرحمن وحجيتله وكال هو يوديج للطبيب
عمشه : هيج يايمه تذلين حبوبتج تالي وكت وتجدين بيهه
ناي : شأجدي يابيبي شوفي حالتج
عمشه : چا موش هاي جدوه تالي عمري اخذ فليسات من وادم سحلت شيبتي وطردوني وارد ليهم ماده يدي عساني متت وسكنت الگبور ولا اشمت وداد وعمتهه بيه
ناي : مفهمت
بديت بيبي تحجيلي من راحت الهم بس كوه تحجي ودخلت عمه بدعه وجايبه شوربه بيدها وهي كملت كل الحجي لان بيبي حيل تعبت بقيت صافنه وجن لساني تربط هسه اني شسوي كلامهم خلاني اشب نار وبنفس الوقت وضع بيبي يخليني انجب وادوس كرامتي جوه رجلي خرب بلعوز اليذل صاحبه
بديعه : لتتصرفين بكيفج بنتي تره عمامج ميقبلون ليش تسويلج حجايه
ناي : وينهم عمامي الشفيه هاي امهم شوفي حالها تون واكل ماكو وضعها موزين لو بيهم خير يبيعون هدومهم ويشترون صحة امهم مو واحدهم ماكل شارب نايم مرتاح بفراشه وعايفيها هيج شيحجون خلي يحجون لتخافين ذوله ماعدهم ذره مستحه المهم ميدفعون فلوس
بديعه : طولان لسانج ناي
ناي : ياعمه مو طولان بس كعد اتكطع واني اشوفها هيج بربج ممتأذيه مثلي
بديعه : يشهد الله اموت قهر ونوم ماانام من التفكير بحالها
ناي : واني وانتي وعمو فلاح مابيدنا شى واذا نبقى على جوحي وعبيد ونسوانهم منحصل شى بينما اهل امي ذوله عدهم خير من الله ويكدرون يساعدون وعود نعتبرها دين اي شى نعتبرها عمه المهم تصحى بيبي
بديعه : مااتوقع ترضى بيبيتج عمه تسمعين كلامنا ترضين باجر ترحين للطبيب
ناي : هزت راسها بيبي متقبل وتأشر بيدها
مو بكيفج بيبي
عمشه : امده الوكت الخلاني بيد المزعطه
ناي : مقبوله منج شتكولين راضيه بس صيري زينه
بقيت الليل كله اراقب وضعها اني وشرهب صارت نومتنا يم بيبي علمود حالتها للساعه ٤ الفجر كمت اجيب مي هم عطشانه وهم اخاف بيبي تكعد تريد فتحت الباب على كيفي حتى لتكعد لكيت صالحه تفتر بلبيت وترشرش بيدها رشاش مال مي وتذب بكل مكان شكلها يخوف ومدري شتقرا خفت منها وسديت الباب على كيفي ورجعت لفراشي
هاي شترش بهذا الليل اختنكت واتذكرت حجي عمه خوله معقوله ذني رجعن لسوالف السحوره ولو هنه شوكت بطلنها
من خوفي كمت اقرا ايات شكو ايه حافظتها اقرا اكثر من سبع مرات عيوني مااخذت النوم حتى من سمعت صوت الاذان خفت اكوم اتوضى واصلي اخاف بعدها موجوده من التعب عيوني واخيراً غمضت بس ماطولت النومه وكعدت على صوت شرهب وهي تكول الحلو الي يخبل النظيف خال ابن خالج بلباب
فركت عيني وباوعت على ساعه صخام بعيني اخذتني النومه شكد عيب شرهب رجعت لفراشها حتى تنام
شرهب : بعدني نعسانه حبابه لطلعين صوت
ناي : طفرت من مكاني وغسلت وطلعت اركض لكيته بسيارته فتحت الباب نزل
عمران : هاا بويه بعدج نايمه
ناي : العفو خالو والله نمت وجهه الصبح اعذرني
عمران : معذوره بويه كملي على راحتج باقي هنا بلسياره
ناي : تعاال ادخل
عمران : لا هنا احسن
ناي : دنكت اشوف منو يمه لمحت مهدي كاعد بصفه ضجت لان جاي حتى مكلف نفسه ينزل من السياره
شعجب مهدي جاي
عمران : لازم يجي غير ابن خالج
ناي : اختنكت حيل وكتله خالو روح مشكور منريد شى
عمران : ميصير بويه انتي شلج غرض بيه عوفي وليش تضوجين منه صاير شى بينكم مسويلج شى مضوجج بس كولي اطيح لج حظه
ناي : لا ممسوي بس
عمران : بليه مناهده وروحي كملي جديتج حتى ناخذها ماضل وكت
ناي : طبيت انفخ وضايجه صحت عمه تساعدني حتى نغسل لبيبي ونبدل الها شلناها كوه وهي تهز براسها ودمعتها بعينها اعرف مكعد تتحمل حالتها هيج
كملنا كلشي وطلعت عمه سلمت وكالت راح نجيبها
عمران : خيتي انطونا درب واحنا نشيلها
بديعه : اني ونايه هسه نجيبها
عمران : ياخيتي لانشلعين گلبي وگلب يله بويه مهدي تعال ساعدني
ناي : اشرت عمه نسوي طريق وطب مهدي وخاله وجانت صالحه تباوع من فوك الغريب ساكته ولا حجت شى
وشالو حبيبي ورحت اني وعمه وياها مهدي ماكلف نفسه يسلم وجان مبين ضايج ومعاجبه الوضع كل شويه اكول ابطل واتشكر منهم وارجع من اشوف بيبي تعيط اتراجع
صعدنا وطول الطريق محد يحجي لحد منزلنا بمستشفى اهلي وجابو كرسي متحرك وحطو بيبي واخذوها جانت عمه ويه خال مهدي خطوه بخطوه
عمران : اكعدي بتي هنا يم ابن خالج وبس نكمل نصيحكم
مشيت وره مهدي وكعدنا جان بصفي كاعد بس كرسي فارغ بينا عيوني تباوع على الناس الرايحه والجايه لحد مسمعت صوته يكول
مهدي : نكمل شغلت بيبيتج وراها مااريد بيوم تتصلين بخالي
ناي : انداريت عليه استغربت طريقة كلامه
اني اتصلت لان مجبوره ماعندي احد جان يقاطعني
مهدي : وخالي مامجبور لا بيج ولا بأهل ابوج احنا اليوم حتى نجي لهنا من وراج ومن وره جديتج صرنا مطاحن مامستعد يوميه عركه بسببكم ويتكاطع اهلي بينهم
ناي : عرفت امه مقابله جريت نفس وحاولت احجي بصوت ناصي ومااتعصب
اعرف تكرهني وتكرهه اهل ابويه الصار جبير واذا انت خسرت ابوك اني خسرت امي
مهدي : بله حجي زايد وحكم وهاي السوالف گلبي خلصان منها ولوما جنت مضطر ذيج المره رجلي مطخ عتبت بابكم كتلج نخلص هاي السالفه الطلعتي بيها وراها مااريد اسمع اي خبر عنكم
ناي : اكلك شى واحد جان يندار وصرنا عين بعين وكتله بهدوء وبقهره
امده الوكت الخلاني احتاج الك ولاهلك
كمت وكفت بعيد عنه جسمي كله يرجف من القهره افرك بيدي واكول لتبجين وتخلي يتشمت بيج جنت اريد بس يخلص الكابوس الاني بيه ساعتين بين تحاليل واشعه ويركضون هنا وهنا واني على وكفتي رجلي تعبت ومكعدت يمه هو طلع مرتين بره اعتقد يدخن ورجع يباوع علية ادري بيه بس اني اتجاهلت وجوده
وره ٣ ساعات انتظار اجوي وشرحت الي حالة بيبي ولازم عملية الكسر بلحوض قوي وفترة علاجه بعد العمليه اطول أيست من حالها بس فاجأني خال مهدي وكال عمليتها بعد ٥ ايام حجزت
دنكت ومشيت وياهم جان المفروض افرح بهاي الاخبار بس حجي مهدي حيل أذاني صعدنا للسياره وكفت خالو عمران يم محل مواد طبيه واجهزه واشتره كرسي متحرك وحطه ليوره جنت حيل مستحيه وافكر اكول هسه مهدي يكول غير انتهازين
رجعنا للبيت وخالو عمران اشتره العلاج
بديعه : مشكور خويه شكد منشكرك ونشكر فضلك منوفيك
عمشه : الله يستر عليك وعلى دربك ويحفظلك وليداتك يمه انه مكسورة عين چا گل السويته ماعندي انطيك حگه
عمران : هاي دعوتج كافيه تسوه الدنيا لا اريد حق ولا شى طيبي وصيري زينه ولتهمين اهم شى ناي متبجي ولا تنقهر اجيكم بيوم العمليه وان شاء الله خير
ناي : ابتسمت بضوجه وخلو بيبي بلكرسي ودفعناها كلش فرق عدنا وسهل حركتنا جنا نشيلها حيلنا يروح
دخلنا للبيت
صالحه : هاااا اجيتو
بديعه : لا بعدنا مو كدامج
صالحه : هاااا عمه شو بيت فوزي لا تتقربون منهم مااريد اشوفهم واياكم واحد منكم ينطيهم وجهه بس وكعتي ذبيتي نفسج عليهم طلعتي بس لسان
عمشه :دخلني غرفتي مااريدن اشوفن جهرتها الزفره عبن معدتي تگلب مااحبن الزفر
صالحه : روحن دخلنهه تره لا عبالج انتي بعدج الكويه ام صوت عالي وتعد وتصف لا عيني شوفي حالج وضعج الحاجتين بعد مده تصير جواج اكو احقر من هيج شى دوم ترعدين وتدعين وتسبين بينا وبأمنا شوفي حالج اليوم هههههه اذا اطلع اجدي بيج الم كومه فلوس
بديعه : عيب صالحه شلج بهذا الحجي متستحين مو هاي قبل متكون عمتج ام رجلج هي خالتج شنو هذا لسانج
صالحه : اسكتي لج انتي الثانيه لتدخلين وحيري بنفسج وبتج واياج يابدعه بعد اسمعلج حس وحدتجن سكتت الها هوايه واني الجن
ناي : دفعت الكرسي وكلت بصوت ناصي بس سمعتني صالحه امشي بيبي مالج دخل بيها لهاي جان احس واحد جر شعري حيييل عطت
صالحه : لج منو هاي مو اطيح حظج هسه واسحلج بلبيت كله واشوفج منو هاي
بديعه : عوفيها صالحه وجريت كصيبة ناي من ايدها والله اذا مااجه عبيد واكله
صالحه : سمعني لجن المتجر عدل بهذا البيت اشك حلكها واخليها وصله مسح نافخات نفسجن على شنو وانتي بت ذكرى اذا سمعت حجايه ثانيه منج اخليج تفلين سنون وعود كولن لعبيد
عمشه : مادام البصل مايصير مربى
صعبه الساقط يتربى امشن دخلني انه سوالف البرابيك ماتخش راسي
ناي : دخلت بيبي للغرفه واجت عمه هاي شجاها
بديعه : نتحمل شنسوي شافت عمتي تمرضت تقوت وتفرعنت
ناي : كولي لعمو عليها وخاصه هي تتجاوز على بيبي اكيد ميقبل
بديعه : على اساس شلونه راح يسحلها ويشمرها من الدرج
عمشه : چا الزلمه صالحه ولدي مخنث بعير واطورد بيه چا انه غاسله موش يدي منه رجولي عبنه اغم وماحن على امه چا يحن الحين ويكص لسانهه موش بعيد يبوس راسهه عبن حجت على امه انه لوما مرضعته وبعيني اشوفنه يرضع حليبي هو وصغير چان گلت رضعته حليب مطايه
شيلني نعست اريدن انام
ناي : صعدنا بيبي للفراش وغطيتها دورت على شرهب هااي وينها اليوم مداومت مثلي كالت ماطول مداومين اني هم مااروح وطلعنا وعفتها نايمه بفراشها طلعت من الغرفه صعدت فوك دخلت للغرفه كلت اخاف يم بلال لكيت بان ترتب بلملابس وبلال وياها
شرهب وين
بان : ليش هيه مو وياكم
ناي : لج لتخبليني وين ويانه اختي وين بان
بان : كمت وشمرت الملابس مخترعه والله ماادري كعدت من النوم سألت عليها كالت عمه صالحه ماشفتها يمكن راحت وياهم لان هي من البارحه كالت ماعندي امتحان ودروس قليله لان الشفهي مال نص السنه راح يبدي مااداوم حتى اراجع دورت بلبيت كلت اكيد وياكم وبديت اشتغل وسويت اكل حتى وكلت بلال وهي ماكو
ناي : شوكت كعدتي من النوم
بان : وره ال١١ ونص يمكن ١٢ الا ربع حتى استغربت محد كعدني خلف الله على بلال كتله الجوع وكعدني
ناي : لطمت على وجهي اختي وين راحت فتحت كل الغرف الفوك ماكو صعدت للسطح ادور مثل المخبله هم ماكو
نزلت اركض عثرت بحافه الدرج اضفري مال رجلي طار انكسر كسرة قويه والدم يجري حتى منزلت ومسحت الدم من خوفي عليها عمه عمه
بديعه : هااا شبيج
ناي : شرهب ماكو
بديعه : شنو ماكو اخاف فوك نايمه
ناي : دورت كل الغرف حتى السطح
صعدت مره ثانيه لغرفه عمه صالحه فتحت بدون حتى ماادك الباب وين شرهب
صالحه : وجع شمدريني شوفي اختج وين دايحه قابل طفله وتضيع
ناي : عمه ابوس ايدج وين اختي جان عندي احساس صالحه وراها بليه وتعرف وين اختي
سمعت صوت مرتضى يصيح يااهل الدار وينكم
عفتها ونزلت عفيه مرتضى
مرتضى : شبيج شكوو بيبي بيها شى
ناي : شرهب ماكو
مرتضى : بلمدرسه غير
ناي : يامدرسه شوف الوقت عبرت ساعه ٢ الظهر وهي مداومت اليوم اصلاً
مرتضى : اخاف طلعت تشتري شى شياتين
ناي : اكلهم اختي ضاعت وكعدت بلكاع ادك على راسي اجت عمه بدعه تركض
بديعه : اششش فدوة اذا سمعت بيبيتج تموت هسه صوتج هسه راح افتر عليها بلشوارع جريت عباتي
وطلعت
مرتضى : واني هم راح ادور عليها وين تلفوني اجيت عليه
ناي : رحت للبوفيه وطلعته وانطيته اله واني اشهك طلع مرتضى وبان تحاول تسكتني وبلال يبجي وكاعد على الدرج وحاضن سيارته
نزلت صالحه لابسه عبايتها
صالحه : لا عيني هيج سالفه مينسكت عليها البنيه مراهقه وصغيره اخاف شافت الها واحد قشمرها وطفرت وياه خوش يوميه وحده منجن مسويه هوسه بلمنطقه ذيج المره بان وهلمره الفصعونه بت جليله يمعزايات كل البلة بيجن وتحجن على بتي
ولو منو امها غير جليله ام الزلم اكيد تطلع عليها
ناي : كمت وعفتها وطلعت بلباب اباوع وعيوني تتوسل بلرايح والجاي وساعه اباوع على السما وادعي وارجع اعض اصابيعي وامردهن من القلق حتى لحم بأطراف اضافيري شلعتهن من القلق
طلعت صالحه مدري وين ولت دفعتني من الباب وطلعت ولا عمه ولا مرتضى بينو
ساعة ونص واشوف صالحه تهف بعباتها وياها ساهره وجوحي وعبيد ذوله من ينجمعون وراهم كارثه ياربي دخيلك
جان يلزمني عمو عبيد من ايدي طبي
جرني حيل وطببني
ساهره : اي عيني كمتن تشردن ويه الزلم مو اني كتلكم ذني مينسكت عليهن يامدرسه يابطيخ حطهه براس رجال واطلع منها وحده امها ذكرى والثانيه جليله شيطلعن علويات اكيد على امهاتهن
جوحي : وين اختج ولتكولين ماادري
ناي : انتم كولو وينها اسألو نسوانكم اختي متندل غير طريق المدرسه ومايوم طلعت وحدها اكيد صار بيها شى
صالحه : وليش متكولين اعرف سوالف اختي المكسره واطمطم الها
ناي : شرهب صغيره شعدها سوالف خافو الله
ساهره : من شالج الله يمه شون كلاوجيه تسوي نفسها فقيرة وهي واختها كله البله بيهن
عبيد : اذا مرجعت اختج اطيح حظج انتي كدامي
ناي : واني شعليه هاي فوك مطلعون ادورون عليها صاير خطف بلبنات وهاي بت اخوكم المفروض هسه تگلبون الشوارع عليها مو جايين تتعاركون ويايه
سمعت صوت بيبي عفتهم وطبيت
عمشه : شنهي يمه حسگم ذاك الصوب شجرى
جان يطبون اربعتهم
جوحي : ارتاحيتي يمه جنتي دوم ادافعين لبنات صمد وهاج ماحصلنه منهن بس المصايب والفضايح كله منج ومن ذيج الحيوانه السافرت ودارت وجهه وراحت
ساهره : عساها لا ردت
عبيد : بت صمد الصغيره شردت والله اعلم ويه ياكواد
عمشه : دهر الياخذكم ويجفيني شركم چا مامش محنه البت يجوزن تاهت وماتندل دربها چا انتم دمه عمامه عرضكم ياماعدكم عرض وشرف چا موش تحركون بغداد وبكل دربونه تنشدون عليها وماتردون اله وهيه بيدكم چا اجت لنسوانكم مگشره وحدتهن بخت سمهه براسكم يامناعيل الوالدين وجااين هداده على البت
عبيد : خلي ترجع اله اذبحها
عمشه : زلمه وجيسهه وحك علي داح الباب لااگتلك خلاص انه ميته ميته عبن اخذ رويحتك واولي لاتشوفني مكوسحه وتكول طاحت امي ماتكدر تسوي شى بعدك ماتعرف امك لون حطت براسهه شى شنهي كوتهه انتم يلمابيكم زلمه وشوارب نسوان خاطه على وجوهكم البت ترد لحضني واريدن نفس منكم يجيسها
صالحه : خلي ترجع وعود بذاك الوكت عود هددي وسوي تره نفخه مابيج
ناي : بيبي رادت تكوم عليها نست حالتها ورادت توكع وتضرب بيدها على الفراش عدلت كعدتها اني وجوحي دفعت ايد جوحي حيييل
عمشه : عساكم لاتهنيتو يابزرت بطني اريدن شربت يلمخانيث
ناي : كمت ابجي على شرهب الي اختفت وعلى حال بيبي تخربطت وكوه تتنفس حرت بيش احير بنفسي لو بيها وبان ويايه نفرك بصدرها ونفتح بلشبابيك حتى الهوا يجيها
رجعت عمه وعيونها دم مبين جانت تبجي
بديعه : ولجن فص ملح وذابت ااااخ يمه يشرهب وينج
شرهب : كعدت الصبح للحمام واندكت الباب طلعت بكفشتي وافرك بعيوني فتحت الباب واشوف الهيبه خال عمران من اشوفه اغم نفسي واتفل على حظي هسه غير اني قانعه بلمساكيط الي عدنا ليش الصدف تخليني اشوفه واتفل على حظي وعلى عمامي هلمره يصطج من اشوفه اكول هذا بيش يسبح بقاصر ليش هيج نظيف هو نفس المي ونفس الصابون ليش العدنا مجولحين وصخين وهذا يبرج برچ
ابتسمت وخرت شعري شكد عيب جني قنفذ
عمران : صبحج الله بلخير بنتي
شرهب : صباح النور خالو
عمران : دكيت على ناي ماكو
شرهب : بعدها نايمه
عمران : كعديها ورانه طريق والوقت قليل
شرهب : صار رحت ركض باوعت على شكلي بلمرايه مال المغسله ايييع هااي شنو زين الرجال مخترع من فتحت الباب ومكال سلام قولاً من رب رحيم هو هذا هم شگل واحد يصبح بيه خلف الله عليه مكسر خاطري بس يجوز كال الله يستر يجوز اليوم ميفوت عدل من وره شكلي ههههه اضحك على شكلي وطبيت كعدت ناي وكلت خلي ارجع انام بعد وكت
جنت نايمه سمعت صوت ناي وعمه من شالو بيبي وطلعوها وعم الهدوء رجعت غفيت حسيت على ايد تكعدني فتحت عيني لكيت صالحه فوكايه فزيت بگلبي گلت عوذه من وجهج هااا عمه رايده شى
صالحه : كومي ويايه
شرهب : وين
صالحه : عندي شغله بمنطقه قريبه اجيب قطع قماش وديتهن للخياطه وهم وصيتها على عبي عبالي اخذ سما ويايه لان مااكدر اشيل وحدي كالت نعسانه ومتقبل تروح
شرهب : قابل هنه كونيه ياعمه اكيد علاكه صعبه تشيليها
صالحه : لج كومه مااكدر اشيلهن وحدي اكو قطع اريد ابيعهن استفاد منهن تعاي وياي ساعه زمان ونرجع اكرب عليج خلي مره استفاد منج ولو مابيج لا دفع ولا نفع
شرهب :اروح وياج بس ما كلت لا لبيبي ولا عمه ولا ناي
صالحه : وين ماخذتج عيني قابل للبصره هي هنا حسبة نص ساعه ونرجع هو اني سما كطعت بيه واله اخذج
شرهب : هسه جانت ساعه شو صارت نص
صالحه : من خفت لهلجهره العوجه كومي يله لا اكومج سحل
شرهب : اي اي كايمه غسلت وبدلت لبست تنوره وبلوز وگاله مال ناي نتلابس اني وياها لبستها ومشطت شعري وشلته
لكيتها منتظره طلعت وياها كلت يله هم اغير جو اول مره اطلع مكان غير الاماكن الي اعرفها والمدرسه مجنت اتوقع راح يصير هيج
وصلنا للكراج وصعدنا كيه يصيحون سلمان باك سلمان باك اول مره اسمع عنها توقعت قريبه انتظرنا الكيه تقبط ومكيفه صعدت وراح اشوف طرق جديده وانطلقت السياره مااعرف شكد بقت يمكن نص ساعه او اكثر وصلنا ونزلنا ومشينا مسافه وصعدنا مره ثانيه عبريه وبدت تمشي السياره واني ساكته وكل مااندار على عمه صالحه تخزرني ومتخليني اسأل احنا وين عود عيب ناس كاعده وصلنا مكان بيه بيوت قديمه وزرع وحيوانات مطشره
صالحه : اكعدي هنا هسه اجي
شرهب : وين اكعد عمه شوفي المنطقه شكد تخوف
صالحه : رعنه دقيقه اجيب الغراض واجي
شرهب : اي اجي وياج عفيه لتعوفيني وحدي
صالحه : المره بيتها صغير ومتقبل جهال يجون
شرهب : ليش اني جاهله
صالحه : هي حقنه ومتقبل جان هسه رحت واجيت شكد تلغين دكعدي اياج تتحركين من مكانج
شرهب : دفعتني وكعدت على حجاره جبيره وراحت مدري يابيت طبت منتبهت بقيت اباوع على الطليان والبط يفترون والجو بيه بروده همزين لبست قمصلتي جان كتلني البرد بس رجلي بردت حيل لان منطقه مفتوحه الهوا بيها قوي وبارد حيل لو لابسه البوتين مالتي وطاكه جواريبين مو جان دفيت هي مال گاله بهذا البرد لميت رجلي وانفخ بيدي حتى ادفيها احس الهوا يدخل من جوه التنوره يكصني ويطلع بديت اجوع وابرد حتى منطتني مجال اتريك الله ياخذج ياصالحه
بقيت انتظر وماكو بديت اخاف هاي وين راحت كمت من مكاني اتمشى وعيني على الحجاره الكاعده جنت عليها بلكت ترجع بقيت افتر بين البيوت عدا وكت طويل وهاي مابينت حسيت بخوف هاي وينها بديت ادك باب باب واسأل عمتي يمكم ومحد يعرفها زين اكو خياطه هنا كالو بعد شارعين رجعت كعدت بمكاني كلت هسه تجي اقنع بروحي هسه تجي اي متعوفني لحد مصاح الله اكبر اذن يعني ساعه ١٢ صارت احنا من ١٠ طلعنا واتذكرت شفت ساعه الولد الجان كدامنا قبل لننزل جانت ١١ الا ربع يعني صار ساعه وربع عايفتني
انتظر وانتظر وماكو وكل ميفوت احد يباوع عليه من فوك ليجوه اموت خوف حصرتني الدمعه وكمت اغلط على صالحه واصيح وينج ناي وينج
ناي : صالحه وساهره كعدن تغدن ولا يمهن السالفه واني وبيبي نبجي وندعي برجعتها
رجعت عمه طلعت ادور وتسأل بيت بيت وصارت ساعه ٥ وشرهب ماكو وبديت افقد صبري وامشي واعيط بلبيت شرهب وينج طلعت للشارع جان تعيط بيه ساهره
ساهره : وكرص عايقه تعاي طبي لا بلنعال على حلكج شبيج تعيطين ماتت اختج عساها نخلص من وحده
ناي : عفتها وطلعت مجاوبتها كعدت بلشارع وابجي وكلها تباوع عليه جهال وكبار والي يسألني مااجاوبه اتخيل حالها صار المغرب وهيه ماكو هسه بردت جاعت
فكرت اخابر خال مهدي بس خفت هذا الحقير يحجي او يطعن بشرف اختي اذا عمامها طعنو بيها هذا الغريب وهو مبين يكرهه حتى اكثر مني مراح يطعن
الكل رجع وماكو اي شى يدل على وجودها
شرهب : أذن العصر واني زركيت من البرد وكمت ابجي اريد ارجع اكيد صالحه تقصدت تعوفني هنا وحده بعمري مطالعه غير ويه اهلها كل عمري ١٤ سنه انترك بمكان بعيد وحدي ومااعرف احد بيه شعور مخيف قاتل احس حتى الحيوانات تريد تنهش بلحمي حتى الهوا ما رحمني يجرحني ويضرب بيه
كامت عيوني تغوش لحد مااجت مره لابسه عبايه
بنتي انتي ويامن من الظهر شفتج كاعده واجيتي وسألتي على مره ورجعتي كعدتي وين بيتكم
شرهب : عيوني مدمعه وانشلت من الهوا البارد مسحت خشمي وكتلها خاله اني بيتنا بتل محمد
جان تكولي
الي بغداد الجديده
شرهب : هزيت راسي اي اي هو
يابنتي وشجابج هنا وحدج متخافين بنيه صغيره وحدج هنا اجه واحد باكج واعتده عليج مو تتصخمين
شرهب : والله مااجيت وحدي ويه مرت عمي وكالت اجيب غراض يم خياطه هنا ونرجع
المره : ياخياطه داده من الظهر هاي كعدتج وأذن العصر وانتي نفس الكعده تعالي نروح للخياطه بعد شارعين يجوز يمها هاي مرت عمج تستاهل الذبح اكو وحده تعوف بنيه شابه بعمرج بهيج مكان هنا الوادم تاكل بيج ومحد يطلعلج والله نلكاج بلزبل الله يستر على بناتنا
شرهب : اخذتني المره على خياطتين ومحد يعرف صالحه هنا عرفت صالحه انتقمت مني وشمرتني خفت خوفه ماانساها بعمري
هااا شرهب شفتي هاي الدنيا الي فاتحه صدرج الها ومتخافين منها هاي صالحه الي تكولين شسوي خلي تسوي بلحظه حطتج بلشارع وحدج حتى تاكلج الجلاب
اذا ماتحارش بيه واحد ونهى حياتي وذبحني وذبني بلزبل مثل مكالت المره
لزمت ايدها خاله ابوس ايدج رجعيني لبيتنا
المره : بنتي شوفي الساعه صار ممنوع تجوال وين اخذج واني رجلي منتسب وملتحق وبعد يومين يله ينزل تعالي لبيتي اكعدي يمي بين ميرجع ابو بيتي وهو يرجعج
شرهب : كمت ابجي لا عفيه هسه اختي تموت بدوني عبالها صار بيه شى
المره : وداعت جهالي لو اكدر جان وديتج بس ميقبل رجلي هنه يومين ضلي يمي اني ماعندي احد جهال اثنين ولد وبنبه وعمتي وهي شافتج ودزتني عليج
شرهب : بقيت اتوسل بيها كتلها وصليني للكراج وانطيني فلوس واني اسأل واوصل هم مقبلت كالت منو يكول متوكعين بيد واحد ميخاف الله ويأذيج كل الطرق اجيتها ومقبلت استسلمت ماعندي حل وين اروح والمغرب اجه طبيت لبيتهم جان دافي ومفروش واني البرد كسر عظامي
الحجيه صاحتني باوعت عليها جنهه بيبي عمشه اختنكت واني اتخيلها شون محروك گلبها عليه
لعبت بشعري
الحجيه : يمه شنو هذا الحسن والشعر الحلو ليش بيبي تايهه وعايفه اهلج
شرهب : رجعت شرحت كلشي وانقهرن عليه
وانطتني ملابس ادفه بيها رغم گبار بس احسن من ملابسي ثلجت بيهن
ناي : ثاني يوم عدا واختي ماكو حالي وحال بيبي يصعب على الكافر حتى الاكل كطعنا وغير البجي والصلاه ماعدنا عدا سوالف صالحه وساهره وكلامهن الي يسم الگلب متحملت وراها بيوم دكيت على خال مهدي رغم غلط اسوي هيج بس اني غركانه ياناس ذوله الجلاب عمامي كعدو وسكتو بس فلاح ومرتض
يدورون وذوله من تحجي وياهم يكولون شردت ويه صاحبها وهذا الشى جان يذبحني من خابرت اجاني خالو عمران ومهدي وهلمره مهدي يريد يشرب من دمي وكفت بلباب طلع الهم عبيد
عبيد : خير شكوو جايين
عمران : اجيت لخاطر بت اخوك ناي مجاي عليك دكت عليه
عبيد : ولج انتي منو كلج تخابريهم
ناي : من قهري اذا انت كاعد وساكت وماادور على اختي
عبيد : حسابج بعدين
ناي : ضربني على جتفي حيل دنكت خجلانه
عمران : ليش تضربها واحنا واكفين مو عيب تريد تحاسبها و اختها ضايعه فوك مااطيب خاطرها اني مبقيت جماعه اعرفهم اله نخيتهم حتى يدورون عليها لخاطرها تالي انت عمهم هيج تسوي ياحيف عليك
عبيد : اطلع منها مالكم دخل بنات اخويه وبكيفي عسى مااحركهن
مهدي : لا النا دخل
عبيد : وانت شكوو
مهدي : اني ابن خالها وهي اختها وماطول نختنا منردها وانت اذا تريد متشوفنه ولا ندخل اطلع هسه دور على بت اخوك مو واكف وتصيح وصاير زلمه براسنا
ناي : عاط عبيد وتلازم ويه مهدي ومهدي دفعه حييل وانركع بلباب
مهدي : ايااك تمد ايدك وروح ابويه ادفنك هنا
عمران : كاااافي عيب بكد ابوك شون تمد ايدك
مهدي :خالي لتقارن ابويه بهذا الوصخ هذا يرادله كتله اعلمه الرجوله شلونها
عمران : مهدي اصعد للسياره يله
ناي : مقبل مهدي يصعد تالي خاله اشر اله وهو صعد وركع الباب
عمران : اني رايح بس مو لديالى لهنا بيت كرابتي قريب اذا مرجعت البنيه اليوم من باجر نتضل السالفه يمنه واياك نسمع حس منك
ناي : همه راحو لو هذا عبيد جرني من دشداشتي ودك ضرب شبعني كتل طلع حرگته بيه مكدر عليهم كدر عليه لوما عمه بدعه وبان جان ملخني
شكد تأذيت من ضربه بس الضرب الي بگلبي اكبر على اختي
شرهب : يومين بقيت بيت هاي المره جانت حبابه ورده مال الله والحجيه هم طيبه عاملوني احسن معامله بس اني متزوهره على ناي وبيبي شصار بيهم هسه النوم مااعرفه من التفكير اريد ارجع ونزل زوج هاي المره وتفاجأ بجيتي ورجعت حجيت قصتي ورغم تعبان مرتاح خطيه وقرر ياخذني بس خاف لا اهلي يذبوه بتهمه ويكولون خاطفني
اتفقت وياه بس يوصلني الفرع وهذا هو
بدلت وسلمت عليهم واتشكرت منهم وحمدت الله وكعت بيد ناس طيبه ما تأذيت ورجعت ويه هذا الرجال جان كلش مؤدب وخاف عليه واخذني بتكسي لبغداد وصلنا تل محمد اني اندل منطقتنا ودليته فرعنا وبس وصلنا راس الفرع نزلني شكرته كلش ودعيتله الله يحفظة مثل محافظت زوجته وهو عليه
رجعت امشي سريع مكيفه واخيراً اشوف ناي وعمه وبيبي ودموع الفرح بعيوني ومقرره بس اشوف صالحه اتفل بوجهه واخلي بيبي تطردها بس جانت صالحه اذكى منى وكدرت تنتقم مني وخلتني العمر كله اندم على طلعتي وياها بذاك اليوم
دخلت للبيت فرحانه الكل عاااط
ناي : كاعده وشاده راسي من قله النوم والاكل انهاريت ماضل حيل بيه وبيبي تتخربط كل شويه
واسمع صوتها ركضت بلا وعي واحضن وابوس بيها وعمه تبجي وتبوس وتحضن وبيبي جانت على الكرسي تبجي وتعيط رايه الله بيضه ردت البت
منحس اله عبيد يسحل شرهب من شعرها
ناي : عوفها
شرهب : ااااااخ شعري
عبيد : بت الگلب ساقطه وين جنتي
شرهب : كله من وره مرتك هي ذبتني وعافتني بعدني اريد احجي ضربني على حلكي عضيت لساني شاغت روحي
صالحه : لج عاااار بت جليله الكحبه تذبين بلاج براسي اله اخلي عبيد يربيج من جديد
شرهب : انطوني مجال احجي واكمز بيده وجوحي طب يركض تكول اكله ويتسابقون عليها
صالحه : اي بعد ايدي ربوها بت جليله خلي رس امها يطلع من راسها هاي صارلها ٣ ايام بره البيت الله اعلم شسوت عيني عبيد لازم ناخذها للطبيب يجوز مو بنيه وجانت بحضن واحد حتى اذا مو بنيه اذبحها وذبها حالها حال چلب الفطايس واذا طلعت بنيه نزوجها
وانطم عارها
شكرا لزيارتكم عالم روايات سكيرهوم
