رواية بنت الكهوجي الفصل الخامس بقلم احمد
رجعنا للبيت وگلتلو عالغدا گال تغديت قبل ما اجي بس اگعدي گدامي اريد احجي وياج كلام مهم كلش وما اريد غيرنا يعرفوه
ياقوت : شنو هالكلام
ادم : اولا راح ننتقل من بغداد ومن اليوم انتي ما موجودة بهاي الدنيا
- بخوف واستغراب .. ليش بابا شنو صاير ترا خوفتني
- لا تخافين خلي اكمل الموضوع واذا كلامي بيه شي تگدرين تعترضين عليه
- طيب احجيلي
بلسان ادم
- اني اليوم رحت لشيخ بالجنوب بمحافظة ميسان (عنوان وهمي) اريد اشتغل عندو لان من خلال اتصالاتي ويا اصدقائي عرفت انو محتاج گهوجي
فبدون تساؤلات هواي قررت اروح واشوف الوضع اذا عجبني اروح اشتغل يمو واهم شي رزق حلال واذا ما عجبني اعتذر منو وارجع
طول الطريق تفكيري بياقوت الابوة بدون وجود الام اصعب من الموت وبالاخص مثل حالة ياقوت لا عدها خوات او اخوان يبقون وياها
صرت على مشارف محافظة ميسان وتوكلت على الله ومن الگراج اخذتلي سيارة تكسي لبيت الشيخ نزلت گدام المضيف ودخلت داخل
ادم : السلام عليكم
الشيخ : گام هو والي وياه .. عليكم السلام ورحمة الله حياك حياك تفضل
- زاد فضلك شيخنا .. اول ما گعدت قدمولي الگهوة
- الله بالخير
- الله بالخير والعافية .. شلونك شيخنا
- الحمدلله يالطيب شلونك انت
- الحمدلله شيخنا اني وراي طريق طويل وراح ادخل بالموضوع مباشرة اني سمعت انك محتاج گهوجي فاذا الكلام صحيح وتقبل تشغلني اكون ممنون واذا مو صحيح اعتذر منكم وارجع لبيتي
- الكلام الي سمعتو صحيح والي قدملك الگهوة ابني مو الگهوجي
- تمام
- عندك عائلة لو لحالك
- جنت اريد اگول عندي بنت وحدة بس ماعرف ليش گلت لحالي ما وياي احد
- تريد تعيش بالمضيف لو ببيت الگهوجي القبلك
- البيت فارغ واجار لو شلون وضعو
- البيت فارغ واحنا بنيناه للگهوجي يعني لا اجار ولا شي
ابن الشيخ : ليش يگعد ببيت لحالو هاي غرفة يم المضيف واكلو وشربو كلو هنا فليش البيت
- استغربت انو حجى بوجود ابوه وهاي الاشياء ما يسووها ولد الشيوخ بالاخص من يكون الكلام ويا شخص غريب مثلي
الشيخ : ما عليه ابني هو حر ويختار بكيفو
ادم : شيخنا اذا ما تحتاجون البيت فانا محتاجو لان وياي غراض وهم اخذ راحتي بيه من اخلص شغلي هنا
الشيخ : وشگد تريد احسبلك راتب
ادم : هالشي انت تقررو
الشيخ : لا تستحي مني الموجودين هنا مثل ما اخواني فهم اخوانك واني وياك دا نتحاور فگول الي ببالك واذا ما عجبني انطيك غير اختيار
ادم : اريد 450 بالشهر مثل شهريتي بشغل العمالة
ابن الشيخ : بضحكة استهزاء .. شدعوة ترا انت دا تصب گهوة احنا دافعين حگها مو انت علمود تطلب هالمبلغ
ادم : اني راح اگضي نهاري كلو هنا فالي دا اطلبو مقابل وقتي الي اگضيه هنا واذا ابوك مو عاجبو يگدر يرفض ما جبرتو اني
الشيخ : ابو منو انت
ادم : ابو باسم
الشيخ : عاشت الاسامي ايمتى تگدر تبلش يمنا
ادم : بس اجيب غراضي وانتقل يمكم فورا ابلش
الشيخ : هاي هي اتفقنا
ادم : انتبهت لابنو ضايج ومو عاجبو الاتفاق وكأنو راح يدفع الفلوس من جيبو ترخصت منهم وما خلوني اطلع علمود الغدا
نص ساعة اني احلف وهم يحلفون واخير شي انجبرت ابقى وحطولنا غدا اني والموجودين وبعد الغدا ترخصت منهم وگمت طلعت
وگفت خارج المضيف طلعت الفلوس جنت جايب وياي 100 الف وباقي بس 30 وبس الكروة من بيت الشيخ للگراج 20 الف لان بعيد والنفر لبغداد 30 بالتكسي والتكسي للبيت 20
جنت واگف ومحتار شلون ادبرها وقطع صفنتي الشيخ والي وياه من طلعو گال الشيخ ها ابو باسم شو واگف گلتلو ماكو شي شيخنا
اخذني الواهس وجنت احجي والفلوس بايدي وهو انتبه اخذني على صفحة وبدون ما يدرون الموجودين انطاني 200 الف
ادم : لا شيخنا ما اقبلها
الشيخ : افه ليش يا ابو باسم
- اني لحد الان ما اشتغلت من اشتغل عود انطيني
- طيب اعتبرها من شهريتك ومن تكمل اول شهر انطيك 250 الف شرايك
- بقيت ساكت واني محتار
- خلص اخذها من اخوك وكمل شغلك .. بضحكة .. قابل تبقى صافن لحد ما يجي گهوجي غيرك
- هههههههه هاي هي شيخنا جزاك الله خير والله يرحم والديك
- والديك وامانة الله اي شي تحتاجو تنطيني خبر
- صار شيخنا .. وهسا اني استرخص
- مرخوص الله وياك
ومن بيت الشيخ رجعت فورا لهنا (هذا الكلام الي حجاه ادم لياقوت بس ما حجالها كلام ابن الشيخ علمود لا تنقهر)
ياقوت : بس بابا انت تشتغل گهوجي
ادم : وشبيها يا بوية اهم شي اللگمة الحلال والستر والعافية مو احسن ما ابقى بدون شغل او اتأذى بشغل العمالة لا قدر الله وتتورطين انتي
- ماعرف والله بس دائما تشتغل عمالة انت مو اول مرة
- انتي تعرفين شنو جنت اشتغل
- شنو جنت تشتغل
- جنا نصعد كاشي للسطوح من الطابق الاول للخامس نشيلهن شيل ما نوصل الا احنا مكسورة ضهورنا من التعب
واذا استعجلنا بشغلنا وخلصنا من وقت ما نرجع لا يخلونا نرجع نوزعو عالسطوح وما نرتاح قبل ما تصير الساعة 4 العصر
اما اذا اشتغلت گهوجي عالقليلة ارجع اتغدى وياج وشغلتها سهلة واهم شي انها رزق حلال والرزق الحلال مابيه عيب
- لعد بكيفك بابا ماطول انت هيج قرارك فمعناها صح بس اني وين راح اروح وشلون تتغدى وياي وانت تگول من اليوم اعتبر ما موجودة
انتي راح تجين وياي نسكن ببيت الگهوجي وتبقين بدون ما احد يدري بيج الى ان اشوفلي فرصة واحجي للشيخ عنج
- والله بابا دوختني ليش ما گلتلو بالبداية وليش بعدين تحجيلو عني وعلى فرض تمرضت مرة وردت تاخذني للمستشفى شلون تتصرف
- هسا عوفي كل هالمواضيع لوقتها المهم ان راح انتقل باجر اني والغراض وتبقين يم ام فائق وثاني يوم اجى اخذج ونروح سوا
راح اخذج بالليل علمود محد يدري بينا ومن تدخلين للبيت انتي اني انطي خبر للشيخ انو وصلت اني ومن نجهز امورنا اباشر بالشغل يمهم
- هاي هي بابا مثل ما تريد
- المهم راح انام اني ولا تگعديني عالعشى
- تمام نوم العافية
- الله يعافيج
ياقوت : راح بابا لغرفتو وصرت اتذكر كلامو عن شغلو الي جان يشتغلو وشغلو الي راح يشتغل دا يتحمل كل هذا علمودي
واني اصرف من فلوسو بدون وجع گلب وما فكرت شگد تعب وشگد تحمل بس علمود يحصل ذني الفلوس وييجيبهن النا
صارت دموعي تجري بدون توقف واني افكر بوضوع ورحت لغرفتي ركض علمود ما يسمع صوت بجيي ودفنت راسي بالمخدة وانفجرت بالبجي
بقيت ابجي الى ان اخذتني الغفوة على وضعي حتى عبايتي ما جنت منزلتها وگعدت نص الليل الساعة جانت 12 بالليل
راسي يوجعني ونفسيتي تعبانة لان نمت واني ابجي وجسمي متكسر لان جنت متضايقة بنومتي من العباية گمت نزعت العباية وطلعت من الغرفة
رحت شربت ماي وتذكرت اني ما صليت لا مغرب ولا عشاء استغفرت ربي وتوضيت وصليتهن ثنينهن وإن شاء الله ربي يسامحني على هالنسيان
رحت گعدت بابا علمود يصلي بس بدون ما يفتح عيونو گلي صليت ورجع كمل نومتو واني عفتو ورجعت لفراشي تمددت وبقيت افكر
اخذتني الافكار من طفولتي ويا ماما وباسم وبابا للواقع العايشتو هسا لوضع بابا المريب هواي افكار اجتني قبل ما انعس مرة ثانية وارجع انام
گعدني بابا الساعة 7 الصبح گمت صليت الفجر وسويت الريوگ وگعدنا تريگنا گلتلو بابا لعد ايمتى ننتقل للبيت الجديد
ادم : باجر
- يعني مو اليوم
- لا اليوم نعزل الغراض الي ما نحتاجهن بغرفة ونقفل عليهن وباجر اخذ الي نحتاجهن وبعدين ارجع اخذج علمود نوصل هناك بالليل
- تمام
- انتي من تخلصين ريوگج حطي ملابسج بجنطة وحطيها بصفحة
- صدگ بابا شلون ما تريد احد يعرف بي واني راح ارجع اداوم
- منا لوقتها فرج ورحمة
- تمام لعد
خلصت ريوگ وگمت غسلت المواعين ورحت للغرفة حطيت ملابسي والاغراض الخاصة بي بجنطة وحطيت وياهن صور الي اني وباسم وماما
ورجعت للمطبخ حطيت المواعين الي نحتاجهن وبابا گال اخذي بس الضروري بعدين من هناك نشتري النقص گلتلو تمام
اخذت صينيتين صغار والكبار عفتهن وكم صحن على كم خاشوگة وجدور وگلاصات وطاوات وسجينتين وستكانات مع خواشيگهن وقوري واحد
الاكل والخظراوات طلعناهن كلهن بصفحة علمود ننطيهن لام فائق وفرغنا الثلاجة من كلشي وحطيناها هي والمبردة بغرفتي
ورجعنا حطينا الكاونتر وياهن وشكو غرض ما نحتاجو نحطو بالغرفة بحيث الغرفة ما بقى بيها مكان فارغ نهائيا من الارض للسگف مليانة غراض
جانت الدنيا عصر تمددت بالگاع واني تعبانة اجى بابا وگف يم راسي وباوعلي گل ها بوية شو تعبتي گلتلو لعد شنو تريدني حديد
ادم : هاي عود انتي شباب المفروض اني اتعب قبلج
ياقوت : انت متعود عالشغل مو مثلي
- المهم فوتي اخذيلج دوش علمود تطلعين تسويلنا العشى بين ما اني اخذلي دوش
- تمام بس خلي اخذ نفس متت من التعب
- سلامتج
- الله يسلمك
من ارتاحيت شوية رحت اخذتلي دوش وطلعت مشطت شعري وبلشت بالعشى وورا اذان المغرب صلينا وتعشينا بس كتلنا الحر لان شلنا المبردة
وانجبرت ذاك اليوم افرش فوگ السطح ومن صلينا العشاء صعدنا فوگ عن الحر بس نفس الظيم هم حارة تكتل كتل وفوگ بعد احر من البيت
بقينا نتگلب ومحترين لل 10 تقريبا وبدا شوية يغير الجو وصارت الساعة 11 وطفت الكهرباء واجى بعيني منظر السماء من فوگ بغداد
جان منظرها تحفة من صدگ ما تنوصف من جمالها بقيت مبهورة بخلق الله واندمجت ويا منظر النجوم وبعض الشهب الي اگدر اللاحظها
ولاحظت بعض الاضواء تتحرك وعرفتها انها اقمار اصطناعية وصرت احاول احسب النجوم وكل شوية اتخربط بالحساب وارجع من جديد
الى ان غفيت وگعدت ويا اذان الفجر لان نايمين فوگ السطح وصوت الجامع قوي فگعدت من النوم جانت جاية الكهرباء
گعدت بابا ونزلت صليت وسويت الريوگ علمود نلحگ وبعد الريوگ راح بابا يجيب سيارة حمل يصعد بيها الاغراض واني غسلت المواعين وجهزت نفسي
ورا نص ساعة تقريبا جاب سيارة وعمال وبدا هو والعمال يتساعدون بالاغراض ومن خلص انطى للعمال فلوسهم واجى علي عالمطبخ
ادم : يلا بوية خلي اوصلج لام فائق علمود اروح
ياقوت : تمام بابا
- تعالي اخذي وياي المواد ذني والخظراوات خلي نوصلهن لام فائق
- ذني هواي ما نگدر نشيلهن اني وياك
- اخذي السكر وعوفي الباقي
- تمام
اخذت السكر مثل ما گال وطلعت وياه جان شايل قسم من الاغراض نزلهن عند باب بيت ام فائق واني دگيت الباب وهو رجع للبيت يجيب باقي الاغراض
ام فائق بهذا اليوم ما تدري بالموضوع وكلش استغربت من شافتني واگفة ووياي المواد گلتلها هسا داخل احجيلج
ودخلنا الاغراض اني وياها ومن خلص بابا گال ابقي عند ام فائق بين ما ارجعلج گلتلو تمام وركب بالسيارة وراح واني وام فائق دخلنا للمطبخ
ام فائق : احجيلي شكو شصاير وياج انتي وابوج
ياقوت : راح ننتقل لغير بيت
- باستغراب .. غير بيت ليش شبيه بيتكم
- بابا لگى شغل بغير محافظة وراح نروح هناك قريب من شغلو
- وبيتكم هذا ومدرستج وجيرانكم وحياتكم
- والله يا خالة ماعرف وتدرين اني ماطول بابا يقرر ما الي قرار من بعدو
- زين بيتكم تبيعونو تأجرونو
- ماعرف حاليا كلشي كل الي اعرفو انو راح ننتقل لغير بيت علمود شغل بابا وبسبب ضيق الوقت حتى ما لحگت افهم هالاشياء من بابا
( ما حجيتلها عن وضع بابا باخر كم يوم )
- وشنو هذا الشغل الي يجبر ابوج ينتقل لغير محافظة
- بضحكة .. ماعرف
- ولج شتعرفين لعد
- ههههههههههههه ماعرف
- وليش جبتو هاي المواد
- بابا يگول ماراح ناخذهن فاعتبروهن هدية مننا
بقيت احجي وياها وكتلها القهر بسببي لان اكثر اسألتها اجاوبها ماعرف حتى شغل بابا تعمدت ما احجي عنو احسن الي ولبابا
مر الوقت وبناتها رجعن كررن علي نفس الاسئلة وكررت عليهن نفس الجواب وامهن تگول عفية على واهسها ما اجاها فضول تعرف كلشي
مر الوقت واني انتظر بابا الى ان صارت الدنيا عصر واندگ الباب وطلعت ام فائق واسمعها تحجي من گالت ليش عفتو بيتكم ومنطقتكم عرفتو بابا
سلمت عالبنات ولبست النقاب واخذت جنطتي ورحت سلمت على ام فائق وصعدنا بالسيارة اني وبابا وودعناها وتوكلنا على الله
جنت اباوع لشوارع منطقتنا الي ممكن ما اشوفهن مرة ثانية او اشوفهن بعد مدة ما يعلم بيها بس الله لان اكيد راح تكون طويلة
وكل ما اشوف مكان ببغداد احاول احفظو علمود يبقى عندي شوية ذكريات من المنطقة الي جنت عايشة بيها وگضيت بيها طفولتي
جانت السيارة تمشي وبابا والسايق يحجون ويا بعض واني صافنة على الشوارع والعمارات والناس الى اشوفهم من خلال جام السيارة
اخير شي طلعنا من بغداد وشفت لافتة مكتوب عليها بغداد تودعكم گلت بگلبي وداعا بغداد وداعا ماما وداعا باسم وداعا بيتنا وداعا ذكرياتي
بذيج اللحظة احس كل كلمة وداع سجين بگلبي من صعوبتها صارت تجري دموعي بهدوء بس لان لابسة النقاب مو مبين علي
مر. الوقت والسيارة تمشي وصارت الدنيا مغرب واحنا بعدنا بالطريق ويا اذان العشاء وصلنا مدينة جبيرة وجانت العمارة (مركز محافظة ميسان)
گال بابا للسايق يوگف عند مطعم وراح جاب اكل سفري النا وللسايق واعتذر من السايق انو ما نزلنا لان مستعجلين والسايق تفهم الموضوع
كملنا طريقنا ومشى بالسيارة تقريبا نص ساعة ودخل بشارع شبه مقطوع واكو اضواء بيوت بس شوية بعيدة وجان متجه عالبيوت
من وصلنا البيوت صار يوجهو بابا للبيت الي راح نسكن بيه ووگف گدام البيت ونزل بابا فتح الباب وفتحلي الباب گال يلا بوية انزلي
وراح ينزل الجنطة شلون نزلت اني من السيارة قطع السكوت صوت شاب گال ها ابو باسم على اساس باجر تجي
شكرا لزيارتكم عالم روايات سكيرهوم
