رواية بنت الكهوجي الفصل السادس بقلم احمد
ياقوت : من وصلنا البيوت صار يوجهو بابا للبيت الي راح نسكن بيه ووگف گدام البيت ونزل بابا فتح الباب وفتحلي الباب گال يلا بوية انزلي
وراح ينزل الجنطة شلون نزلت اني من السيارة قطع السكوت صوت شاب گال ها ابو باسم على اساس باجر تجي
اني مجرد سمعت الصوت تجمدت بمكاني جان واگف مقابيل السيارة بمسافة 5 امتار تقريبا ولابس زي عربي وشايل سلاح بايدو
بابا اجى علمود يحجي وياه من صار گدامي بابا دخلت للبيت بس كل ذرة بجسمي ترجف من الخوف واسمع صوت كلامهم من ورا الحايط
ادم : هلا معتصم اي والله على اساس باجر بس شفت نفسي ماعندي شي هناك گلت اجي هنا ارتب وضعي باجر علمود بعد باجر ابلش شغلي
معتصم : يعني مو باجر تبلش
- لا والله تعرف الاغراض بعدهن مو مكملهن تعرف نزلناهن بالحوش فلازم ارتبهن واجيب مسواگ
- بيها الخير
- عن اذنك بس انطي صاحب السيارة فلوسو
- اذنك وياك
- انطى الفلوس لصاحب السيارة ورجع عليه
- شنو هاي الجنطة الي وياك
- هاي جنطة الملابس مالتي جنت ناسيها بالبيت وهمزين شفتها من رحت
- المهم اعوفك ترتاح تصبح على خير
- وانت بالف خير
ياقوت : استغربت انو ما جاب طاريي ولا سأل بابا منو هاي شوية ودخل بابا ورحت عليه قبل ما احجي حط اصبعو على حلگو بمعنى اسكتي
واخذني للغرفة نزل الجنطة ورجع خارج تأكد ان معتصم رجع للبيت واجى علي بس جان وجهو اصفر من خوفو علي مو على نفسو
ياقوت : منو هذا بابا وليش شايل سلاح
ادم : هذا ابن الشيخ
- هسا شراح يصير بعد ما شافني
- ما شافج
- شلون ما شافني واني واگفة گدامو
- ضو السيارة جان عليه ولان الدنيا ليل وانتي لابسة اسود ما شافج ولو شايفج مستحيل يبقى ساكت
- معقولة خاف يحجي گدامك وراح يگول لاهلو ويجون سوا
- لا تطمني الله سترنا ولا جان شافنا وما گدرنا نسوي كلشي لهذا جبتج بالليل
- اووووف والله حتى گلبي صار يوجعني من الخوف
- ههههههههه المفروض اني اخاف مو انتي لان اني الي جذبت عليهم
- الا اگلك اني جبانة
- هههههههههههه يلا بوية افرشيلنا فراش خلي ننام ونرتاح ورانا يوم طويل باجر
- تمام
نزعت عبايتي وصرت اتمايل بجسمي يمين ويسار وبابا يباوع علي ومستغرب گال شبيج گلتلو دا اسوي رياضة علمود اصير قوية
وعفتو ورحت اريد اجيب فرشة احطها تحت الدواشك عن الوسخ الي بالگاع حاولت اشيلها شو هاي شثگلها ما تتحرك
رجعت على بابا گلتلو تعال ساعدني بالفرشة ثگيلة من گلتلو هيج الا دموعو طلعن من الضحك لان قبل شوية اسوي تمارين وفورا اثبتت انو مابيهن فايدة
جان يضحك وكاتم صوتو علمود لا احد يسمع صوتو ويگول شعندو هذا يضحك لحالو بالبيت واني صرت اضحك على ضحكتو
بعدها تساعدنا اني وياه فرشنا الفرشة وحطيت لكل واحد فراش وحطينا العشى الي جابو من المطعم تعشينا وشبعنا وجان عندي كلينكس مرطب بجنطتي
اخذتو وانطيت لبابا واحد والي واحد مسحنا ايدينا وحلوگنا بيه لان مانعرف الماي الي بالبيت شگد صارلو وممكن صاير بيه وسخ او شي
بعدها جنا تعبانين وگعدنا من الفجر هم فاخذتنا النومة فورا بس الشغلة الوحدة الزينة انو البيت جان بيه سبلت وبابا شغلو
گعدنا ثاني يوم من الصبح اول شي سويناه صعد بابا تأكد من توانكي الماي (خزانات الماي) جانن مليانات ومابيه اي وسخ او ريحة
ومن نزل تساعدنا ورجعنا شلنا فرش النوم والفرشة الي تحتهن وبلشت بشطف البيت وبلشت بالغرفة الي جنا نايمين بيها اني وبابا
جنت كل غرفة ادخل عليها اجلفها هي والحايط علمود اذا بيه وسخ ما يوگع بعدين على الفرش ويدمرهن النا
جان البيت صغير غرفتين ومطبخ وحمام وتواليت خارجي واستقبال صغيرة نسبيا 4×4 والصالة مالتو صايرة مجرد فراغ بين الغرف والمطبخ حتى ما تتسمى صالة
من خلصت الغرف نقلنا الفرش اني وبابا بوحدة والاجهزة الكهربائية وباقي الاغراض بالثانية والي خفف علي انو الاغراض نظيفة ما يحتاجن مسح
بقينا بس الفرشة الي نمنا عليها خارج لان توسخت وبدا بابا يرتب بالاغراض واني رجعت اشطف البيت وكل هالشغل والتعب بدون ما ناكل شي
ولان البيت صغير قبل اذان الضهر بشوية جان باقيلي بس الاستقبال والحوش والتواليت الخارج واجى بابا گال كملت الاغراض
ياقوت : عاشت ايدك
- ادخلي انتي ارتاحي شوية بين ما اجيب غدا وارجع
- خليني اخلصهن وارتاح ما بقى بس ذني
- لا عوفيهن بعدين خاف احد يشوف الماي الي يجري ويعرف اكو احد بالبيت
- مو اريد اخلصهن علمود ادخل اسبح
سكت شوية واخذ مني الصوندة وصار يرشلي واني اشطف ومن خلصت الاستقبال بقى الحوش وجان كلش صغير عالسريع خلصناه اني وبابا
واخير شي التواليت خلصتو وگال بابا روحي اسبحي واني اجيب غدا وارجع گلتلو تمام بدل ملابسو لان الي لابسهن توسخن وصارن كلهن ماي
اني اخذت ملابس وفورا للحمام وگفت تحت الماي واحس ضهري مكسور من التعب بس اهم شي خلصنا البيت حتى لو ما نعزل الاغراض اليوم عادي
بس همزين حسبنا حسابنا وجبنا المنظفات مالت بيتنا ويانا جان تورطنا والا يروح بابا للسوگ يجيبلنا ويرجع بس الحمدلله موجودات
طلعت من الحمام ريحة البيت تسوي واهس للواحد يگعد بيه كلو ريحة منظفات الورد ولان بيه سبلت وبانكات انترس هوا وصار منعش
مشطت شعري وبلشت انقل المواعين للمطبخ وما جان بيه بس السنگ حطت المواعين بصفحة ورجعت للغرفة الي بيه الاغراض
باوعت للاغراض الي مسفطهن بابا وشبعت ضحك مسوي الاغراض مربع بالغرفة بحيث حتى البريج حاطو بنص الاغراض بمكان خاص بيه
رجعت سفطت الاغراض ورتبتهن ورجعت للغرفة الي نمنا بيها جان عندنا فرشة ثانية غير الي توسخت فرشتها بالغرفة ورتبتها
بلشت اسفط ملابس بابا بالكنتور (جنا جايبين بس الكنتور مالو هو وماما) ومن خلصتهن احتاريت بملابسي اذا اسفطهن لو لا
انتظرتو لحد ما اجى هو انطاني الغدا وگال اخذلي دوش بعدين نتغدى گلتلو روح اخذ دوش اني ما انتظر احد عند بطني وصار يضحك
راح اخذ دوش ومن رجع حطيت الاكل بصحون وگعدنا اني وياه تغدينا بس جنا جوعانين جوع مو صاير واكلنا لحد ما انتفخنا
بعد الغدا بقينا گاعدين نرناح بعد هالجولة الى گضيناها گلت لبابا صدگ بابا ملابسي اسفطهن بالكنتور لو لا
ادم : وليش ما تسفطيهن
- خاف احد يشوفهن
- ومنو يشوفهن قابل الي يجي يفتح الكنتور يباوع شبيه
- ماعرف گلت اخذ رايك قبل ما اسفطهن
- اي سفطيهن بوية
- تمام
- صدگ شفتي الترك شبيه ما بيه (الترك هو الممر الي يصير خارج البيت نسميه ترك)
- لا ما شافتو
- الباب الي تحت الدرج الو مو
- اي ماكو غير باب
- خلي اشوفو وارجعلج
- جاية وياك
گمنا رحنا عليه فتحنا الباب مجرد باوعت للگاع مالتو خرب واهسي من كمية التراب الي بيها جان الترك عاليمين ومن انداريت عاليسار انصدمت
جان بيه تواليت داخلي بس الله لا يشوفكم وضعو شگد ما اگول عليه وسخ قليل بحقو حتى المزيلة انظف منو
(اسف عالي راح اذكرو بس علمود تعرفون ليش ياقوت گالت هيج)
جانو مگضين حاجتهم بيه اكثر من مرة وعايفينو بدون ما يغسلوه ومتكومة بيه الاوساخ على كبر المقعد وبعض وسخ طالع خارج المقعد
والترك على طولو تراب ووسخ بزازين باوعت لبابا ونزلن دموعي من القهر وريحة الترك صايرة ما تنطاق بس لان خارج البيت ما شمينها قبل ما نطلع
بابا باوع علي وگوة كاتم ضحكتو سحبني لحظنو گل لج شگد انتي ام دميعة عوفيه واذا احد سأل اگلو ما احتاجيتو وعفتو على وضعو
ياقوت : لا ما اعوفو باوع شگد وسخ واذا الهوا يصير باتجاه البيت يدمرنا بريحتو شگد لعد وسخين ذول
- يا بوية عبالج كل الناس تهتم لنظافة بيوتها مثلنا لعد ما شفتي الحياطين الي داخل شصاير بيها
- هسا هذا شينظفو الا تكتلنا ريحتو كتل
- انتظريني يمج
- وين رايح
- هسا تعرفين
- تمام
راح شوية ورجع وياه سطلة ماي ومن يم الباب طشها بالتواليت ونزل الماي ويا المقعد لان فتحة البوري مو صاير فوگها وسخ
- هاي هي ماطول مفتوح البوري شغلتو سهلة
- شلون
- جيبي الصوندة وشكليها على حنفية الحمام
- تمام
رحت جبت الصوندة وشكلتها على حنفية الحمام وحطها گدام باب التواليت وعافها وصار الماي يدرج باتجاه المقعد وينزل ويا البوري
- شنو الفايدة هسا
- هسا الماي يبقى يجري ويسحب وياه الوسخ شوية شوية لحد ما ياخذو كلو
- تمام
- يلا تعالي خلينا ننام وعوفي الماي مفتوح
- تمام
دخلنا للبيت وسكرت الباب خليتو شوية مفتوح واحس حتى ريحة البيت صارت مو حلوة بسببو رحنا نمنا اني وبابا وما گعدنا للعصر
رحت للحمام اريد اتوضى علمود اصلي الماي مخلص باوعت بالتواليت الي بالترك الماي ماخذ وياه نص الوسخ وباقي نص
رجعت گعدت بابا گلتلو گوم الماي خلص بسبب خطتك وماعندنا ماي نتوضى بيه لصلاة العصر گال شيلي الفرش بين ما اتأكد منين يسحبون ماي
سفطت الفرش وشلتهن وبقى بس فراش بابا گلت ما يحتاج اشيلو بس فراشي لازم اشيلو خاف احد يجي على غفلة وانساه
ادم : دا يصعد الماي
- بهالسرعة هاي
- اي اكو بير يم البيت والواير مسحوب عالبيت شغلتو واشتغل ودا يصعد الماي
- تمام لعد
من صار ينزل الماي توضيت وبابا غير مكان الصوندة عالتواليت الخارجي علمود الماي يسحب الوسخ الباقي ورجعنا للغرفة
صليت العصر وكملت وبابا گال بس يبرد الجو شوية يروح يجيب مسواگ خظراوات ومونة گلتلو براحتك وبعدها رجعت للترك
سحبت الصوندة لاخر الترك بس خلي اوصفلكم البيت علمود تتخيلوه اول ما تدخلون من باب الحوش يصير مقابيلكم المطبخ وعاليسار الاستقبال وگدامو التواليت الخارجي
من المطبخ تدخلون عالصالة الي صايرة يمينكم والحمام والدرج عاليسار ورا الاستقبال وگدام الدرج والصالة الغرفتين
الترك بابو تحت الدرج ومن تدخلون من الباب يصير التواليت عاليسار ومن اليمين يبدا الترك ويفتر من ورا الغرف لحد ما يصير مقابيل الصالة والو شباك عالصالة
بلشت بالترك من شباك الصالة شطفتو ونظفتو كلو لحد ما وصلت التواليت بس كلش تعبني لان ماكو منهولة ولازم اسحب الماي من الاخير للتواليت ومرات يرجع اذا الصبة بيها نزول وما ادفعو الا اني مقطوع نفسي
من وصلت مقابيل التواليت جبت المكرافة وحطيت بيها الوسخ مال البزازين وذبيتها خارج البيت والتراب دفعتو للتواليت
شفت التواليت بقى بيه وسخ قليل لان الماي جان هواي فنظفو وشطفتو ويا الترك ونظفتو وحطيت عليه منظفات هواي علمود الريحة
من خلصتو صارت ريحتو كلش حلوة وما بقى بيه اي وسخ والمقعد صار ابيض يلمع باوعت عليه وگلت عاشت ايدج ياقوت على هالتنظيف
ادم : اي والله عاشت ايدج
- يمة گلبي فززتني
- هههههههه سلامة گلبج يلا دخلي اخذي دوش علمود من تخلصين اروح للسوگ
- تمام
شلون گلت تمام اندگ الباب وبابا گال ابقي هنا بين ما اشوف منو وارجعلج وراح فتح الباب شوية واسمعو گال تفضل شيخنا حياك الله
من سمعتو گال هيج عرفتو يسمعني علمود انتبه ورجعت ركض للترك وصرت ورا الغرفة الي جنا نايمين بيها وگعدو بيها ابوي والشيخ
ادم : حياك الله زارتني البركة
- الله يبارك بيك ابو باسم البارحة انطاني خبر معتصم انك وصلت فگلت اعوفك ترتاح وترتب وضعك بعدين امرك
- حياك الله شيخنا ايمتى ما تحب تشرفني بزيارتك
- الله يزيدك شرف مشاء الله كملت البيت ونظفتو
- اي والله الحمدلله
- بمزح .. همزين ما شافنك النسوان جان تكاتلن عليك ههههههههه
- ههههههههههه لا شيخنا ما بقى بالعمر شي يسوا للزواج
- بعدك شباب واذا علمود التكلفة فالعرس وتكاليفو كلها علي واعتبرها هدية من اخوك
- الله يعزك شيخنا ويبارك برزقك ما مفكر بالزواج والله
- خير إن شاء الله
- اكو شغلة حيرتني
- گول ابو باسم
- الترك لاحظت بيه وسخ بزازين رغم انتو بعيدين عن المدينة
- هاي بزازين بيتنا الولد والبنات ما يقبلون يطردوهن
- اها لا بقوهن يمكم تخلصكم من الفار
- اي والله اني هم اگول هيج المهم اني اترخص بس جيت اشوف وضعك
- گاعدين شيخنا
- ازورك غير مرة إن شاء الله
- هلا بيك ايمتى ما تجي واعذرني ما ضيفتك شي بس تعرف ما جبت مسواگ وحتى جاي ماعندي
- ايمتى تتسوگ
- بعد شوية إن شاء الله
- عود مرني اني الي روحة للسوك نروح بسيارتي
- خاف اتأخر عليك بالمسواگ
- ما وراي شي بس جيك غراضك وشوف شتحتاج واني تلگيني انتظرك بالمضيف
- مشكور شيخنا الله يكثر من امثالك
- العفو يلا مع السلامة
- مع السلامة الله وياك
ياقوت : شگد عجبني احترامو لبابا وتقديرو من صدگ كلامو يخلي الي يسمعو غصب عنو يحترمو ومن طلع رجعت دخلت داخل
ذكرت بابا يجيب الاغراض المهمة وگلتلو يروح واني ما علي شي مجرد اخذ دوش وابقى انتظرو ومن راح هو دخلت اني للحمام
جنت احس نفسي وسخة رغم ما طخني ماي التواليت وجلفت نفسي جلفة من هاي التمام بحيث ايديني صارن حمر من گد ما فركتهن
طلعت من الحمام احس نفسي ريشة ورغم التعب بس احس صار عندي نشاط اخذت المشط مشطت شعري وبقيت اضرب صفنات وانتظر بابا يجي
الساعة جانت تقريبا 6 العصر سمعت صوت قريب من صفحة البيت من جهة باب الترك تقربت من الباب جان مثل صوت الشاب الي حجى ويا بابا البارحة
فتحت الباب بدون ما اطلع صوت جان قريب كلش من البيت ومبين دا يحجي بالتيلفون واسمعو گال شفتها ومتأكد مليون بالمية
هو گال هيج واني اريد اتحرك ماگدر ومن الخوف حتى ما اعرف شنو گال بعدها گوة انسحبت وسكرت باب الترك
صرت الطم على حظي وحتى بابا مو موجود علمود يتصرف هو اخير شي ركضت للمطبخ اخذت سجينة ورجعت للغرفة وقفلت الباب علي
شكرا لزيارتكم عالم روايات سكيرهوم
