رواية جراح قلبي الفصل السادس 6 بقلم جوهرة

من سمعت حجي معتصم بداخلي ضجت واستغربت معقولة امي تخلي لينا تشتغل وهي بعدها تعبانه ماحجيت شي دنكت على يوسف وشميته من ركبته

ام حذيفه / ياه على بختك يمه البنت توها بسم الله طلعت من جوة سجينة عزراييل واني اشغلها 

بس عدها شغيلة نسوان هسة انتم الا تعرفون

عافتهم وطلعت ومعتصم كام يضحك اشرلي

معتصم / جيبه خل أشوفه واندلعه شبيك ممصدك صاير ابو !!!!

ايهم بفرحه / هههه لا والله ممصدك

انطيته يوسف خلاه بحظنه وباس راسه / ماشاء الله تبارك الله يحفظه الله ويكون بار بيكم

طلع فلوس وخلاهن بصدر يوسف بين طيات حظينته

ايهم / يمعود شسويت جيتك تكفي وتوفي

معتصم / هاك ابنك هاك يستاهل

اخذته منه وبقينا نسولف شوي واجوي الولد وابوية  

صعب رأسا أخذ يوسف من حظني وشاله يفتر بي ويبوسه وانطاه لأياد ونفس الشي دخلت امي صاحت من أخذه حذيفة ..

ام حذيفه / يمممه مصيتو مونته خديداته ماعن موهيج بعده ابن نفاس !!!!!

شالته بحظنها من كام يصرخ / بززت خديداته بلحيتك عندك اموني بوسه خوش عنده خدود

حذيفه خرب ضحك عليها / ههههه والله هم خدوده مايعه كثر ما ابوس بيهن  

صاح ملااااك ملااااك 

دخلت تركض كاللها / روحي جيبي ايمن هنا لأن الحجية مسوية علينا حصار منتقرب لابن ايهم

راحت ملاك جابت اخوها وانطته لابوها وبقى يبوس بي

معتصم أخذ ايمن / تعال خالو تعال هذا ابوك متوحش ناقصه حنان ههههه

أخذه معتصم باس خده وخلاه بحظنه / والله اني كمت اغار شنو هالجهال الحلوين بس عدكم بيت عبدالله الناصر

حجي عبد الله / ها ابن اخوي كول اريد اثني هههه

معتصم / والله يا عمي يمكن أسويها وجهالكم السبب ههههه

ام حذيفه / صدك تحجي غير ام صهيب تتخبل

معتصم / لا عمة شقى هذا 

سكت معتصم من شاف الوجوه انكلبت صح ماحجو بس يعرفهم ما يكسرون ابنتهم 

التفت على عمة عبدالله الي كال / والله يا ابني هالشي الله محلله بس كون الرجال اليعدل

معتصم / صحيح كلامك عمي

صعب / هسة عوفونا من سالفة النسوان شنو رايكم نطلع للشمال هالاسبوع مادام ايهم موجود يجي ويانه

حذيفة / ها صعب كاضيها ونسات شكو عليك 

صعب / انت التهي بجهالك شوف ابنك كام يعضعض بالكوشه جوعان

ضحك معتصم وشال ايمن رجعه لابوه / هاك يمكن صدك هههههه

أخذ حذيفة ابنه وطلع يصيح على علا الي نزلت من فوك بسرعة

علا / خيرر حذيفة والله فززتني

حذيفة / هاج ابنج جوعان .. اكول وين جنتي 

علا / بغرفة لينا .. راح معتصم لو بعده

حذيفة / موجود ليش

علا / يلة لعد حتى اصب الغدا

حذيفة / اي والله لأن اني هم جعت

محد شجع صعب عالطلعه للشمال كلهم عدهم اشغال اخر شي كاللهم اني طالع وحدي لعد واحتمال أخذ أرشد وياي 

الحجي ما اعترض اصلا اي تصرف يسوي صعب مايعترض عليه يعرفه واعي وثكيل وصاحب مسؤلية

ــــــــــــــــ

لينا /

نزلت اخذت ابني وصعدت بعدما رتبت غرفتي بمساعده شهد وعلا ودخلت سبحت سبحه زينة الحمدلله صرت احسن 

عمتي كالت تغدي واصعدي كتلها بعدين اتغدى

ام حذيفه / ام سما دزت وية صعب من مر عليها خوش جدر دولمة تكول لينا جانت مشتهيته

ابتسمت فدوة لعمتي دومها تتفكدني

دك موبايلي جنت مخليته عالشحن بالصاله .. فتحت خط خالو عمر سلم علية وسألني إذا محتاجه شي من السليمانية حتى يجيبه لأن راح يجي يزورني هو وعائلته

فرحت من سمعته ماطلبت شي لان ممحتاجه بس لشوفته هو الوحيد البقالي من ريحة امي 

خطية دوم يخابر يسأل علية

ورى يومين اجى خالو عمر وممخلي ما جايبلي ملابس وعطور ومكياج طبعا هاي زوجته كولش ذواقه وتنطي رأيها وهو يشتري 

باتو يمنا وحيل جنت مرتاحه بجيتهم ومن مشو صعب طلع هو وصاحبه وياهم بس بسيارته لأن يريد يتونس والعرفته محد قبل يروح من الولد وياه

علاقتي بأيهم على حطتها ماكو أي تغيير ينام بالغرفة من يجي تالي الليل لأن يكضيها سهرانين هو والولد يلكاني نايمه وحتى لو جنت صاحية اغمض عيني متحججه بالنوم 

اراقبه بسكوت بدون ميحس ، شلون يتقرب على يوسف ويبقى صافن عليه

انتبهت عليه منطيني ظهره جاي يبدل وجنطته يم الكنتور ادري بي راح يسافر وهالشي ضيك خلكي صح ما بينا كلام مثل أي اثنين متزوجين بس هم اشوف طلباته احضرله ملابس والأكل

مسحت وجهي وعدلت شعري نزلت من الفراش من بجى يوسف يريد يرضع التفت علية .. يوسف بحظني كعدت عالفراش ارضعه وايديه طالعه من الحظينه دنكت بوست ايده شكدودتها 

تقرب علينا وعطره سطرني يربي مدري شيحس ينكع روحه عطر دنك واني حبست نفسي من سحب خاولي صغير ذابته على صدري من ارضعه ليوسف

شمره عالفراش وكعد مقابيلي مد أيده ومسح على خدي بخفة ونزل على رگبتي بلعت ريك وفتحت عيني ممصدكة الجاي يسوي شيحس هذا وليش من يريد يسافر كاعد يسوي هالحركات

ارتبكت أكثر من نزلت اصابيعه تتلمس صدري الجان متنك حليب عضيت شفتي بقوة مانعة اي احساس يخليني اتوهم بشي مراح يصير 

لثواني حسيته راح يبوسني عينه بعيني ودنك على صدري باس يوسف بخده وبقى ثواني شفايفه بخد يوسف وانفاسه تضرب بصدري 

رفع راسه ..

ايهم / خليتلج فلوس بالكنتور من تحتاجين أخذي

ماحجيت شي رد كال / والهدية وياهم 

رفعت تك حاجب / مسوي فضل علية ؟!!

ايهم / ادري تكرهيني ومتحبين شي مني همزين تحبين ابني !!!!

فكيت حلكي شيكول هذا كل عقله أكرهه 

لينا / ما اكرهك هذا انت الي ما اطيقني والدليل اسبوعين والثالث هذا واي كلام مابيناتنا الا شي بسيط

ايهم / اشوفج مجنبتني تعامليني مثل مرض معدي

لينا بكل برود / مشكور إذا هذا احساسك

ايهم جر نفس / اهتمي بابني وحبي 

لينا / لو تريده ماتعوفه وتسافر

ايهم / شغلي هذا مو انتي الي تفرضين علية شي

وكف وعينه علية خزرته بنظرة عتب 

عافني وأخذ جنطته وطلع بالباب التفت .. فيمالله

ماحجيت شي طلع واني بقيت عيني عالفراغ الي تركه انتبهت لصرخه يوسف يحرك رأسه يريد يأخذ صدري 

رجعت خليته على صدري واني داخلي قهر قهر

ايهم / 

كمية الحقد بعيونها خلتني ابتعد عنها تتجنب الكلام وياي ومن ادخل الغرفة تحاول تكون نايمه لو مشغولة بيوسف اي تواصل ماكو بيناتنا 

اعترف اني السبب اني الي زرعت الحقد بگلبها لأن نظراتها هيج افسرها ماكو غير تفسير عيونها من ادحك علية تعادل الف كلمة

لثواني حبيت منظرها من ترضع يوسف تقربت عليها بحجة ابوس ابني بس جمودها وبرودها وياي خلاني ابتعد 

يمكن حذيفة جان متوهم من قنعني وهو يكول تقرب من مرتك خل تحس انت مهتم بيها  

جربت هالشي وما نفع ومراح ينفع لأن اثنينه منتوالم واليربطنا هو يوسف

ـــــــــــــــــــــــ

لينا /

مرت الايام وتعلمت شلون اهتم بابني ، ايهم يتصل دوم بأهله واكيد يسأل على ابنه اني ما اهتم أو احاول ما ابين هالشي ماريد نظرة شفقه منهم

طلعت النتائج والحمدلله نجحت وانتقلت لمرحله جديدة من حياتي هي الجامعه 

بدت التسجيلات للكليات بعدما طلعن القبولات وانقبلت كلية التربية جان القسم مالتي جغرافية اني ما حبيته وحاولت اغيره مارهمت

يوسف عمره اشهر وبينت مدارتي وتعبي عليه فدوه يجنن مربرب ابيض وشعره لونه بندقي يشابه شعري بس سبحان الله دمه ونظرات عيونه على ابوه حتى عصبيته واذا زعل ميرضع الا بطلعان الروح

قدمت اوراقي وسجلت وياي صفا وصلنا صلاح ابن عمو صالح كملنا كولشي ورجعنا 

والدوام بعد اسبوعين

تسوكت لروحي ملابس الكلية وياي عمة ايمان وصلنا صعب للسوك وكال من تكملون خابروني 

اشتريت شنو بنفسي وراها عمة كالت أخذي للجهال فدشي لا ترجعين ايدج فارغه وفعلا اشتريتلهم شغلات يحبوها واكيد مانسيت وليدي حبيبي اخذتله ملابس هو وأيمن ابن حذيفه

ثاني يوم نزلت ويوسف بحظني جان وكت مغربية سمعت صياح بالهول صوت صعب 

من دخلت جان لازم موبايله ويحجي عرفت علية السالفة ، ايهم اكيد لأن جنابه ميريدني ادرس كلية

بهالاثناء دخلو عمو عبدالله وعمتي جانو طالعين خطار ومن افتهمو السالفة من شهد وعلا الي جانن موجودات 

اشر عمو لصعب ينطي موبايله 

تناوش عمو الموبايل وبقى يغرد على ايهم 

مدري شنو الي كاله ايهم لدرجة خلة عمو يشتمه ويسد الجهاز

أخذ صعب موبايله / والله لو يمي ايهم الا ابتلي بي

حجي عبدالله / رفع ضغطي ابن الكلب يكول تردونها اداوم خوش كوادة حتى تصادق هناك

شهكت وحظنت ابني التفتو علية وعمو عيونه حمرا من العصبية / خل يولي هذا يحجي من حرته يريد يمشي كلمته علية بابا انتي تربية بيت الناصر شحده اليجيب اسمج

دمعت عيوني كثر ما انقهرت عزا بعينه شلون هيج يحجي علية هذا لأن اريد اكمل واسوي لنفسي مستقبل يريدني خادمة لجنابة

عفتهم ورجعت صعدت لغرفتي مانزلت بعد بالليل صعدت ملاك بنت حذيفة دزوها تصيحني عالعشا كتلها ماريد

تالي الليل حسيت بالجوع ويوسف لأن يرضع سودة علية لازم اكل حتى صدري يدرله حليب اني معلمته عالممة لأن حسبت حساب الدوام شلون اعوفه نص نهار بدون رضاعه بس هو إلا يرضع صدري يلة

فتحت الثلاجة بغرفتي عندي حلويات بيها ما اخليها تفرغ ومرات الولد من يتسوكون يحسبون حسابي

والله العظيم احن من اخوهم علية وعلى ابني 

الي ميوكع من أيديهم يحبونه كولش وخاصة صعب حيل متعلق بي

بديت اداوم وماعوف ابني مرات يم عمتي ام حذيفه بس اخر شي كمت اعوفه يم عمة ايمان هي الي كالت خاصة بعدما بيت اياد طلعو بيت وحدهم اشترى البيت البصف بيتنا 

عمو شجعه حتى يستقر يكول الحنين مو بعيد بس عمتي ماقبلت بقت كالبة وجهها عليهم وبالاخص على شهد تكللها انتي تردين بيت وحد هاي مو علا وياج شو ما طلعو 

اخر شي رضت بالأمر وكامت حتى تروح عليهم

بس فعلا عبالك شالو البيت وياهم الهم خلوة همة وجهالهم الصغار وشهد حبابة وخدومة جانت دوم تساعدني

خلصت السنه الاولى الي بالكلية ونجحت مرحلة ثانية والأمور على حطتها ايهم مارجع بعد باقي بالأردن مرات من يتصل يفتحوله اخوته كاميرا حتى يشوف يوسف الي كبر وكام يمشي

عمي موهلكد يحجي وياه من يتصل لأن يريده يرجع ومايقبل

الي عرفته شغله توسع وداخل شراكه وية غير شركات هو وعمو سامي اييي الله يزيدهم شعلية هو بالاسم محسوب رجلي 

بس داخلي ميتقبل البصير وياي مرات احس محتاجته اااخ يانار الگلب

بالفترة هذه خالو عمر اتصل وبلغني سافر لتركيا حيل انقهرت اقلها جان بالعراق قريب علية 

بس نتواصل اني وياه دوم ، وخطية هواي يشجعني

كملت كلية ويوسف دخل السنه الرابعه من عمره واني بهاي السنوات هواي تغيرت شكلي وشخصيتي صرت انضج واوعى واقوى

وأيهم خلال الأربع سنوات ولامرة اجى 

مرات اسال نفسي شنو هالقسوة ما صار الوكت الي گلبك يلين ، ابنك مافكرت بي متحجج بالشغل والسفر عباله ما ادري غشيمه عنه اكيد رجال مثله وحداني هسة مونس نفسه وية النسوان

شبعانه قهر بالحياة من اشوف ابني يركض على عمامه وجده يحظن بيهم ويصيحهم بابا يقلد ولد عمامه

أيدي على خدي صافنة عالجهال يلعبون بالحديقة ماشاء الله البيت مليان بالي راح بعيد بعيد حيل ما احس إلا على صياحهم يتراكضون يم الباب الجبيرة استقبلوهم كلمن ركض يحظن أبوه وشالو العلاليك ودخلو البيت من بيناتهم يوسف ابو الأربع سنوات يكمز وحظن رجل عمه الجبير حذيفة شاله باسه وانطاه علاكه صغيرة نزله وراح يركض وية جهال عمامه 

عضيت شفتي بقهر ودخلت البيت بدون ما اسلم عليهم

  اجى يركض علية فرحان مثل كل مرة من يذكرونه بشي وية جهالهم / ماما شوفي بابا 

بلعت ريك وغصة بداخلي ..

لينا / ايي حبيبي شكرت عمو

يوسف بطفولية / اثممممه بابااا بابااا

هزيت راسي مثل كل مرة يعترض بكل طفولية ميريدني اكول عمو لأن يصيحه بابا 

اخذته من أيده ودخلت البيت سلمت عليهم جان ابو اسد حماية اياد يمنا باقين عالعشا 

هو وزوجته وجهالة

فتت للمطبخ اساعد علا بالعشا يوسف فلت أيدي وراح يركض على عمه صعب الي صاحه 

اخذت علاكة الحلويات وضميتها فوك بملحق الكاونتر

بقينا نحضر بالعشا واجت شهد ويانة وكضيناها سوالف وضحك اني صح اسولف بس مو هلكد بالضحك احس روحي محبوسة ميسعدها اي ضحكة

دخلت ملاك تسولف وية امها ماشاء الله عمرها تسع سنوات بس كولش تعجبني هادئة ومبينه من صغيرة تصير شخصية 

سمعتها تكللها صعب فاتح كاميرا هو وأيهم وكاعد يحجي وية يوسف

عضيت شفتي و شعور بالخباثة استوطني

غسلت أيدي وطلعت جانو كاعدين بالاستقبال يوسف بحظن صعب وبيده موبايل كاعدين يضحكون

فتت سحبت يوسف من حظنه وتعمدت احجي بصوت مسموع / تعال ماما لا تتعلق بشي متستفاد منه لأن هالشي ميفيد

صعب بقى فاك عينه علية ممتوقع اسوي هالحركه لأن نهائي ما اتقرب عليهم على كد السلام بيناتنا ومن موجود يوسف عنده ادز ملاك لو جنات يجيبونه

اعترض يوسف وصاح / بابااا احجي وية بابااا

نترت بي بصوت / اوصصص ولا كلمة

دحكت على صعب معتذرة لصوت ناصي / اعتذر منك صعب

عفته وطلعت ويوسف بيدي لاكاني عمو بالصاله جان توا جاي من برا ..

حجي عبدالله / يابه يابه وليدي شبي يبجي

لينا / عمو اريد أبدله ملابسه

حجي عبدالله / بنيتي الوليد ينكط نظافه شو جيبي خل أبوسه

ماصدك ختل بحظن جده اني هم عفتهم ورجعت للمطبخ وتكفيني الخباثه السويتها اهم شي وصلت رسالتي وكدرت استفز ايهم 

لأن صعب ورى العشا حجى وية عمتي عالصار 

طبعا متقصد حتى اسمع فعرفت ايهم ضايج لأن هيج حجيت

عمتي التفتت علية وخزرتني / ترى اليحقد مايحصل شي

ماحجيت بقيت ساكته والله حلوة فوك شينه كواة عينه هذا ويدرون ابنهم ظلمني وياه 

ميكسرون بي

ثاني يوم اسمع صعب يخابر عصبي واكيد السبب ايهم صرت

ـــــــــــــــــــــ اعرف هالشي 

يريده يرجع وذاك جنابه ميقبل

صعب / تالي وياك انت ليش هيج متتفاهم ارجع احسلك

ايهم / شنو القضية ترى محد يكدر يلوي ذراعي أبوية بشخصة ماكدر لاتخليني اغلط

صعب / والله انت راح تندم

ايهم / اني اعرف شوكت ارجع

سده بوجه اخو وجر حسرة وذبها

اني بسرعه فتت للمطبخ استحيت إذا شافني يكول تجسس على مكالماتي

صعب / 

خابرت ايهم حتى يرجع لأن سوايته ابد مو حلوة هو بقى يلغي ويحجي اخر شي سديته

دك موبايلي ابو صهيب / هلا والله بضلعي وينك يمعود صار شهر ما نازل

معتصم / هلا صعب شلونك

صعب / الحمدلله شو صوتك ميعجب خوما مريض

معتصم / لا بس مثلما تعرف احتاريت هالايام هاي

+

صعب / الله لا يحير عبده أن شاء الله تنحل

معتصم / ان شاء الله صعب ما أنزل هالاسبوع احتمال الاسبوع الوراه

صعب / خير خوما اكو شي

معتصم / لا بس خل أرتب أموري

صعب / الله كريم

معتصم / اختك اتصلت دوختني والله عدها قابلية عجيبة عاللغوة

صعب / هسة انت تحملها يخوي شسوي مرتك وتعرف خبالاتها

معتصم / هههه اي والله ،، شكو ماكو شخبار ايهم

صعب / ماكو شي وأيهم توني تعاركت وياه مصخها يخوي اكله ارجع مايقبل

معتصم / عمي سامي يكول ماشاء الله شغله ماشي خوش بنى سمعه بالتجارة

صعب / اي ايهم من يومه شاطر بس أريده يرجع لخاطر مرته وابنه

معتصم / والله ياصعب عمي ظلمهم اثنينهم بالزواج

صعب / اييي بعد صارت

معتصم / الله يهدي يارب والله ماكو احلى من الاستقرار

كملت مكالمتي وسديته وطلعت يم اهلي كاعدين بالهول يتفرجون على مسلسل بدوي 

كعدت عالقنفه وانتجيت عالتجوة وبالي راح يم معتصم الي خلة روحه بموقف راح يسببله مشاكل

ـــــــــــــــــــ

لينا / 

هالاسبوع عمو عبدالله مسوي عزيمة عالغدا والكل موجودين العمام والعمات أو ولدهم 

من الصبح نحضر ماخلينا شي ماسوينا همزين رانيا استلمت طبخ اللحم والتمن بجدر جبير واحنا طبخنا الدولمة والمرك

تغدو والحمدلله جان الغدا طيب وخيرات الله 

كملنا كولشي تنظيف وغسل مواعين وكاعدين بالمطبخ نسولف ونشرب جاي دخلت رنا بنت عمو عبدالله جانت موجودة لأن عمو عزمهم هي وزوجها طبعا ساكنين بلدروز حبابة كولش 

راحت ودت صينية الجاي للمضيف ورجعت وجهها ميتفسر عينها علية صافنه بوجهي 

وكفت كبالي جنت كاعدة عالقنفة وبيدي كوب جاي ..

رنا / لينا الزمي اعصابج فدوة لا تنقهرين 

فكيت عيني وأيدي رجفت وأجاني احساس شايفين من واحد يحس بخطر شي راح يصير وميعرف مصدره هالشي حسيته گلبي ناغزني

رنا / ايهم رجع وو وياه زوجته

أيدي رجفت بالكوب سحبته من أيدي والكل كمز صارن محاوطاتني ويحجن وية رنا ماقابلات بالحجته وهي واكفة تفهمهن عمتي ايمان حظنتي ..

ايمان / اششش لا تحجين شي خليج قوية

صابتني رجفه واني احس داخلي محطم اخر ذرة من الود قضى ايهم عليها

فصلت بغير عالم رحت ، فجأة انتبهت الهدوء سيد الموقف شبيهن ذني توهن مهوسات رفعت راسي اشوفهن عينهن على الباب التفتت بنية شابة لبسها مغري جينز مشكك من جهة ركبتها ولابسة تي شيرت بارز معالم جسمها وشعراتها حمر شكلها عادي 

بس ملطخته بالمكياج

/ هلو اني زوجة ايهم ابنكم