رواية ارحموني ولو رحمة مرة الفصل الخامس بقلم فراقد حسن علي
محمود/يمه اريد اسألج سؤال واستحي!!
فاطمة/بدل ملابسك بينما اصبلك الغده
بين متغسل وتبدل وشعندك كولي لا تستحي
اني امك واختك وصديقتك
محمود/رحت بدلت هدومي
وطلعت للحمام شمرت جواربي الوسخة بالطشت وغسلت رجليه وايديه وجهي ورجعت للغرفة
-امي جابتلي الغده مسويتلي كاسة تشريب
وشويه خضرة
-سميت بسم الله وبديت أتغده ،،
-ومااشوف الا فرح جايبه جنطتها
وطبت علينا وشعرها كفشة جنها مخبلة
فاطمه/هاي شبيج يمه منو مالش شعرج
فرح/كامت تبجي وتشهك بالنفس
هاي منى ملشت شعري تريد دفاتري والكتب
-وهي تتعاير وكامت تتبجبج واركان ضربني علمودها
محمود/واركان ليش يضربج
-يمه حاجي اركان لا يصف ويه منى
لو اكطعهم أثنينهم
فاطمه/ههههه هنيالج يا سهام
بناتج ماخذات كلوب وعقول ولدي
محمود/دخل اركان ومنى تمشي وراه جنها نحلة صفرة
عطت على منى //ليش تملشين شعر فرح
مروه/اني اريد ورقة اريد اكتب نفسها
وما قبلت تنطيني
واخذت من جنطتها
-وهي دفعتني وكالتلي كبر اليطمج
اركان/محمود حجي منى صحيح
واني ضربتها لان تكول لاختها كبر اليطمج
فاطمه/فريحة تعاي هنا
وجرت فرح من أذانها
منين سامعة هاي الكلمة !؟
-وتعرفين شنو معناها لو لا
فرح/رجعت تبجي وتباوع على محمود تريده ينقذها
-اااخ يمه عوفيني الله يخليج
ترى هن البنات هيجي يكولن بالمدرسة
وما اعرف شنو يعني
فاطمة/تعاي منى بوسي اختج واعتذري منها
وانتي فرح هم بوسي اختج واعتذري منها
محمود/منى وفرح وحده باوست الثانية
بس بالجذب يخافن من أمي
فاطمة/يمه أنتن خوات عيب وحده تغلط
وتجاوز على الثانية
-فرح يمه كلمة الكبر ياحافظ
يعني ادعين على اختج تموت
وبعد ماتشوفيها وتروح بعيد بالسماء
وتموت نفس جدو ناصر
وتبقين عايشه وحدج
فرح/لا يمه اني احبها هي اختي وبعد ما اكول هيجي
فاطمة /فدوة اروح للبنات
فروحة روحي رطبي شعرج حتى أمشطلج
-وانتي منى تعاي اخذي ورقة وقلم
من جنطة محمود وكعدي كتبي
-وانت اركان يمه ممنوع تدخل بسوالف
النسوان لا هسه ولا من تكبر ،،
-عيب مايصير الرجال يدخل بين النسوان
اركان/ليش يمه عيب قابل شمسوي
اني ضربت فرح لان غلطت على منى
فاطمه/يمه انت رجال لازم تصير عاقل
وهن خوات تعاركن بيناتهن
وفد شويه يتراضن
وانت تطلع بالوجه الأسود لان دافعت لمنى
وضربت فرح علمودها وهي راح تضوج منك
فلهذا ابد لا تدخل بين النسوان تراهن كلساع براي
فرح /يمه فاطمة زين هيجي لو ارطبه بعد
فاطمه/ياااا يمه كتلج رطبي ،،
ماكتلج غسلي راسج جوه البوري
-جيبي المنشفة والمشط من على الميز
وتعاي يمي أمشطلج
محمود/امي تعامل كل بنات عمامي بالتساوي
يعني تحب كل البنات وما تفرق بيناتهن
-وتحب حتى خالاتي هم تساعدهن
ومرات تشيل شغل البيت عنهن
-بس شو اليوم ما ادري شبيها ابد مو طبيعية
-كملت الاكل وشلت الصينية نزلتها للمطبخ
غسلت وورجعت صعدت فوك
-امي كاعدة تمشط لفرح
-اركان ومنى كاعدين على جهه
يكتبون ما ادري يشخبطون
-اركان تعال هنا أكعد يمي
-منى انتي بعد لا تبقين لاطشه على أركان عيب صرتي جبيرة
-أتمددت شويه و اباوع على امي
شلون تمشط لفرح وتظفر كصايبها
-يادوب غفيت ،،وسمعت امي
تصحيني ،،
فاطمه/يمه مايصير هسه تنام
مايصلح الشمس سلمت شروقها
وغورب الوكت
محمود/كعدت على حيلي
ولفيت دشداشتي بين رجليه
وخربطت خارطة وجهي بيديه
واحد مزاجه برتقالي
-ماكو احد بالغرفة
اجتي امي فاطمة وكعدت كبالي
فاطمه/يمه محمود هسه سولفلي شعندك
محمود/يمه الصدك ما اعرف شكول
بس احس روحي مو متوازن
-يعني مره احس نفسي جبير
ومره احسن نفسي صغير
ليش هيجي يصير بيه
فاطمه/شوف يمه محمود ،،
البشر يكبر مو يصغر
وانت بسلامة جاي تكبر
وجسمك هسه يبدا يتغير
-يعني راح تطول بعد
وعضلاتك تكبر وتتغير
وكل شكل جسمك يتغير
-ومنا وهيج يبدي يطلعلك لحية وشوارب
يعني راح تصير رجال كامل والكمال لله
-وهذا كله التغير مو بسهولة
لان اكيد اكو اعصاب ولحم وشحم
وهرمونات وخلايا كلها تتغير
وهاي طبيعة الجسم وشي طبيعي
وكلشي يصير هو معجزة من معجزات خلق ربك العظيم
-فلحد ماتتعده مرحلة المراهقة
ويستقر جسمك وتصير رجال مشورب
نفس ابوك يلا تستقر وتعرف تتصرف
محمود/يمه شنو يعني مرحلة المراهقة
فاطمه/يمه مرحلة المراهقة
فترة متقلبة وصعبة تمر على الشخص
وتكون الامتحان الأول اله بحياته المستمرة
-ودائما البيئة والظروف المحيطة بالشخص
هي الي تتحكم بتصرفات الشخص
ومن خلالها راح يوصل الشخص
لسن الرشد لو ماشي بطريق الصح
لو ماشي بطريق الخطا أسم الله الحافظ
وهم تختلف هاي المرحلة من شخص لشخص ثاني ومن مجتمع لمجتمع ثاني
-يعني تختلف مراحل المراهقة عند الشباب عن البنات
وتختلف بين المجتمع القروي اهل القرى والارياف مثلنا ،، عن ألمجتمع المتمدن اهل المدن مثل اهل بغداد
-وبعد حسب كل شخص والعائلة اليعيش بيها
وشلون وعي الاهل وشلون يكدرون يحتون المراهق
-المراهقة ترى هي عمر وسنوات تمر بعمر الشخص وتختلف بدايتها ونهايتها
-ودائما البنية تبلغ قبل الولد
وتمر بمرحلة المراهقة قبله
وتنضج قبله
وتوصل لمرحلة الرشد أسرع من عنده
-متسمع دائما يكولون تحت سن ١٨ سنة غير بالغ و يكولون عليهم تحت سن الرشد
-يعني الدولة والقانون يعتبروهم جهال
لان الشخص البيهم ميعرف يتصرف
وما يعرف الصح من الخطأ
وميعرف مصلحة وين تكون
-بس المعروف بمجتمعنا مرحلة الشباب بكل مراحلها هي مرحلة مراهقة
لحد ما يبلغوا سن الرشد وهو سن الأربعين
-مرحلة المراهقة من تمر على الشخص
تعبر عمره من مرحلة الطفولة
المرحلة الرشد
وبهاي الفترة لازم يعرف الواحد يتصرف صح
وتصرفاته تكون حلوة بالمجتمع
علمود تنعكس بصورة حلوة لنفسه ولاهله بالمستقبل
-يعني الواحد صار يكبر بالجسم والعقل
وعبر من مرحلة الطفولة وتصرفات الصغار
الى تصرفات الكبار فلازم يعرف يتصرف
صح ليدخل بمرحلة الرشد ويخلص من هوسة المراهقة
-وكل هل الحجي سمعته من التلفزيون
الواحد لازم يتعلم اذا عن طريق السمع او عن طريق القراية
محمود /يمه شلون يعني الواحد
يكبر من ناحية الجسم والعقل
فاطمه/يمه انتوا الولد مثل ماكتلك قبل شويه
من يكبر جسمكم
تطلعلكم عضلات حلوه وتكبر
شوف هنا ايدك شلون متغيره
-وصدرك يبده يعرض
وتتوسع وتكبر ضلوعك
-ويبدي طولك يزيد
-وتطلعلك لحية وشوارب
-وصوتك يتغير ويصير خشن
-واكو بعد شغلات انت كل ماتكبر
تكتشفها بنفسك
-ومن ناحية العقل
أول شي تصير تصرفاتك مو موزونة
-اول شي تحس تتغير نفسيتك
وهذا شي مو بيدك لان
تغيرت هرموناتك وكبر جسمك
-وتتغير مشاعرك يا تصير مشاعر سلبية
وتبدا تكره ناس معينين
يا تصير مشاعر ايجابية وتبدا تحب ناس معينين
ومتعرف ليش وشنو السبب
ومتكدر تتحكم بنفسك ولا تصرفاتك
وهاي المشاعر راح تسببلك أزعاج وخوف
محمود/يمه علمني شلون أتصرف بطريقة صحيحة
فاطمه/اول شي يا يمه ،،
لا ترفع صوتك
لا عليه ولا على أبوك
لان عيب وحرام
وهذا التصرف يعكس تربيتي الك
ويعكس شلون أنت هذبت نفسك بنفسك
-وثاني شي أحترم الاكبر منك
وأعطف وأستخطي ألاصغر منك
-واهم كلشي أبتعد عن أصدقاء السوء
يمه ترىً الصاحب ساحب
-يعني اذا تصادق ولد حبابين وشاطرين
راح تصير مثلهم خوش ولد زين وشاطر
وبسلامه بالاخير تصير خوش زلمه
-واذا صادقت مو خوش ولد
مثلا اللي يشربون جكاير بدون علم أهلهم
لو يصيحون على أهلهم وميحترمون واحد
حتسحب من عدهم التصرفات المو زينة
وتصير مثلهم زلمه فاشل
-واحسن شي يا يمه الك بهل عمر لو تتعلم سباحة
لو تروح للساحة تلعب طوبة
يعني يصير عندك شي تلتهي بي
-وكل ماتضوج وتختنك أقره قران
كتاب الله هو أحسن معلم وأحسن مدرس
يعلمك هواي حكم مفيدة وزينة
-يمه من باجر بسلامة ابده صلي
الصلاة هي اللي تنهى عن الفحشاء والمنكر
وتخلي الشخص يكون انسان مستقيم
محمود/يمه اريد أكول شي واستحي
فاطمه/يمه مثل ماكتلك من قبل شويه
اني أمك وأختك وصديقتك
العندك كوله لا تستحي مني
-واذا متكدر تسولفلي وتستحي من عندي
احجي ويه ابوك أثنينكم زلم واحد يفتهم على الثاني
محمود/لا يمه اسولفلج أني أستحي من أبويه
-يمه بالمدرسة سمعت سالفة من ولد ويانه بالصف...وسولفتلها كل السالفة الصارت بيني وبين فرح علساس هي سالفة صديقي،،
اريد أسمع وافتهم شنو راح تكول
فاطمة/دكت على صدرها وبقت تباوع بوجه محمود
يمه أسم الله ،، ربي يستر على بناتنه
يمه هاي سالفة جبيرة
وكل السالفة تخص الكبار
محمود/يعني شنو مافهمت؟؟
فاطمة/يمه يعني سالفة شرف
واذا صديقك ما بلغ أهله ولملموا الموضوع ويزوجونهم اول مايبلغون
تصير فضيحة وكسران ظهور
محمود /ترى كلشي مافهمت
-شنو يعني يبلغون؟،
فاطمة /يعني اول مايكبرون
-يعني البنية اذا تزوجت زلمه
غير هذا صديقك الفاشل
راح يذب حوها أهلها وتم وت
-اكثر من هيجي بعد ما اكدر أشرحلك
وبعد لا توصل ولا تكرب صوب هذا الولد تراه مو خوش صديق
محمود/يمه بعد عندي سوال
-شوكت يصير أني أتزوج فرح
ويصير عدنه غرفة لوحدنه
نفسكم انتي وأبوي
فاطمه/ان شاء الله يايمه بخير وسلامة وهذا يوم الفرح والعيد
-بس تخلص سادس اعدادي أزوجكم
محمود/كامت أمي تسوي عشى
واني فكرة أخذتني للسماء
وفكرة شمرتني للكاع
-بقت ترن براسي كلمة يذب حوها وتم وت وهذا مو خوش ولد
-كل ماتنعاد براسي هاي الكلمة
أحس جسمي كله يختض
ويذبحني الرجيف
-من كثر ما تخيلت الموقف
فرح يذب حوها أهلنا وتم وت
حسيت الد م نشف بعروكي
-رجعت راسي ونمت على مخدتي
وغمضت عيوني
-أسمع صوت يروح ويرجع
بس مو واضح
وما اكدر أفتح عيوني
-احس نفسي أنرفعت من الكاع
واحد يركض ويصرخ
بس كلشي عندي حلم ....
أركان/أمي صاحت عليه
جنت كاعد جوه يم أبوي وعمامي
وجديتي بالهول
فاطمة/يمه أركان كوم أصعد صيح على أخوك كله أنزل تعشى
حتى تقرا دروسك وتنام
أركان/صعدت وشفت محمود نايم
تقربت عليه أصحيه
-وأشوف خشمه طاك دم
ومليانه مخدته دم
-تقربت عليه أحركه ،هزيته من جتفه
محمود ،،محمود أمي تكول انزل تعشى
-ما يرد عليه وجسمه صاير نار
من وره الدشداشة ومبينة حرارته صاعدة
-نزلت ركض جوه ،،ما أشوف بايات الدرج
-يابه الحك محمود مات
-أبجي واعيط بصوت عالي
هواي خفت عليه من صحيته وما كعد
-والكاعدين بالهول كلهم طفروا يم الدرج
متفاجئين من صوت الصريخ
-امي طلعت من المطبخ تركض
وخالاتي وراها
-عمتي شمس تصيح //يمفجوع شكوو
-يااابه محمود مااات
-كمت اصيح واكمز مااعرف شسوي
-دفعني أبوي وعمامي وركضوا على الدرج
وصعدت وراهم أمي وخالاتي
-صعدت ركض وراهم
وأشوف أبوي شايل محمود ويركض
لاكاني باب غرفتنا
محمد/عادل بس صبر يخوي اني أشيله عنك
باسم/سهام جيبلي سويج السيارة
عادل/ياااخويه الولد فاقد
ووول يمه راح أوليدي من أيدي
فاطمة/يمه محمود سودة بوجهي يا يمه
-وينج يالزهره ياأم الحسن
ندبتج وأريد أوليدي منج
لا تتعذريني وتكولين ماادري
ماعندي بس هل أثنين
واباوع لرحمه الله وطولهم
اركان/البيت أنخبص
ابوي وامي يعيطون ويبجون
-عمي احمد صار أشجع الكل
ركض جاب مي بارد وغسل وجه محمود
بس هو ولا كعد صايرة ايديه ورجليه خيوط
وجسمه يروح منا ويرجع لهنا
بيد عمي محمد
-يمه مات يمه محمود مات
يعني بعد ماعندي اخو
بقيت اصرخ واكمز واعيط
-سحبتني خالتي هناء تريد تسكتني
وجلبت بيه حتى ما اروح وياهم
-اخذوه ابوي وعمامي وركضوا بي للمستشفى
-وامي وخالاتي كعدن يبجن
-امي خلتني بحظنها وبقت تبجي
وجديتي وخالاتي يصبرن عليها
ويدعين يرجع محمود سالم
عادل /يارب لا أسالك رد القضاء لكن اسالك اللطف فيه
-محمد شو الولد غده عصره من العرك
-خليت أذاني على صدره دگات كلبه طبل
وتنفسه سريع
-باسم عليك بروح ابونا أستعجل
ياخوتي وليدي راح يروح من أيدي
باسم /كول يالله عادل شبيك
هاي عود انت العاقل والمتدين واحسن
واحد بينه كووول يا الله
عادل/بين ماوصلنا للمستشفى الا اني زايع العافية
-دخلنا نركض للطورئ
أخذوه الاطباء من أيدينا
وبدوا يفحصون بي
الطبيب/وين والد الطفل
عادل /نعم دكتور اني أبوه
-الدكتور كلش جبير بالعمر
والاطباء الباقين مجموعين حواليه
الطبيب/أخي أبنك متعرض لصدمة نفسية
أو عاطفية أو متعرض لحالة خوف قوية
لان عمره صغير وعقله ترى عقل طفل لا تشوفه طويل
ما كدر يتحمل المشهد او المنظر الي مر بي
فصار عنده انخفاض حاد بضغط الدم
هو السبب الرئيسي بعدم انتظام دكات الكلب
وهذا العرك القوي
وعنده انخفاض بالسكر
-الحمد لله من لحكتوا عليه بالوقت المناسب
-اخي حافظ على أبنك من افلام الرعب
او مشاهد العرك او الضرب اللي تحدث بين العوائل
عادل /ان شاء الله دكتور
-اباوع عليهم عالجوا واهتموا بي
وما قصروا وياه
الممرضة/عمو لا تخاف ان شاء الله
هسه يصير أحسن
شغلته بسيطة وما تخوف
-لان هابط عنده السكر والضغط
ونازف خشمه ،،فقد الوعي
-ترى هو واعي ويسمع بس ما عنده قوة يفتح عيونه كول يا الله ولا تخاف
-شغلة نص ساعة بس يشمي العلاج بجسمه
يرجع يتحسن ويقوى
محمود/اسمع بس جسمي بايد
نحلان ومتفلش ما اكدر أشيل أيدي
لو احرك رجلي
-شكد وجعتني جكت الكانونة
بس وجع كلبي على فرح اكبر
هسه شلون اتصرف خاف يذبحوها أهلنا وتموت
-بديت اصحى بس معدتي موتتني
لعبان نفس ذبحني
وبالكوه فتحت عيوني
-وابوي يبوس بيه واكف فوك راسي
هو وعمامي
-يادوب مديت راسي من الجرباية
وأستفرغت ورجعت كل معدتي
-انوب لطش بيه الصداع
وأحس كل جسمي يوجعني
وألم حادة بالمعدة
-يمكن بقيت ٥ ساعات بالمستشفى
كالوا الاطباء نراقب سكرك والضغط
اذا كلشي مستقر انخرجك
-الحمد لله اوضاعي صارت زينة وخرجوني
-وابوي بس يباوع بوجهي يرجع يبجي
وعمامي يحجون عليه
-دخلنا للبيت وابوي ساندني ومتجيلي
مابيه حيل أنكل رجلي وأمشي
-وامي نطت عليه وحظنتني وتبجي
//يمه مابيه شي شوفني مو هاي اني كدامج امشي بس راسي يوجعني
-ما احس الا فرح مجلبه بيه وحاظنتني
توصل لحد صدري
فرح/بعد ممنوع تلعب هيجي لعبة وتسوي نفسك ميت
باسم/فريحة شووو تعاي هنا
شو ماتستحين فرد نوب
تحظنين الولد كدامي
فرح/هذا مو ولد
هذا محمود صديقي واخويه
محمد/انت بس أستلم اللسان وخلص نفسك منها
احمد/باسم شكو تحاسبها
حقها خايفة على رجلها
الجميع/ههههههه
خاجية/محمود جده من عسنك سالم
ومابيك غير العافية يبعد طوايف جدتك
ان شاء الله أجر وعافية
-جده اني اوصيك صير قوي لا تبقى بس تبجي وكلساع مجطول البت تخاف عليك
الجميع/هههههههه
عادل/باسم انت جنك ماتسمع
محمود/الحمد لله الأجواء العائلية تغيرت
والنفوس شويه هدأت
-صعدتني أمي فوك لغرفتنا
أتمددت بمكاني
بعد ما خلتلي فراش جديد
-جابتلي كلاص حليب دافي شربته
وتمددت
-أجى اركان نام بصفي على نفس المخدة
خطية يبوس براسي ويبجي خايف عليه
-امي نزلت بردة الغرفة علينا
وخلت ضوه الفانوس عالي
-لهناك وسمعت ابوي يسولف لامي شصار بالطريق وشنو كاله الطبيب عليه
-وهي سولفتله عن كل الحديث الدار بيني وبينها،،وحجتله عن قصه صديقي الوهمي
-ابويه يكولها/ يجوز بقى يفكر بالموقف
ومن هاي خاف ،،
-لو متعارك بالمدرسة ومضروب على راسه
-كعدت الصبح شو ما بيه حيل أشيل روحي وعندي داوم ،، دوامنا ٣ أيام صباحي
و ٣ أيام ظهري
-امي كالت// أبقى نايم اليوم لا تروح للدوام أخاف عليك لا تتخربط بالمدرسة
-بقيت متمدد بفراشي
اجتي فرح تبوس بيه على كصتي
عبالها نايم لان مغمض عيوني
فرح/أكعد محمود ترى اني أحبك
اني ماعندي أخ أنت أخويه
امي تكول //محمود واركان أخوانجن
وخالة فاطمة أمجن
وعمي عادل أبوجن
انتن عدجن أثنين أمهات وأثنين اباء
محمود/فتحت عيوني وحجيت وياها بهدوء
// هااا شلونج فروحة
يكولون تبجين البارحة وخايفة عليه
فرح/ااي وحتى امي سهام وامي فاطمة
وكل النسوان يبجن عليك
-بس خالة رجاء مابجت
امي تكول عليها //هاي وحدة حقودة
-ترى هي البارحة تعاركت ويه امي فاطمة
من أنت جنت بالمدرسة
وجديتي وعمه شمس هدن عليها
-وامي فاطمة كامت تبجي
لان خالة رجاء تكوللها/ لو بيج خير تزوجين
رجلج مو تخلي بحسرة الجهال
-ومن رجع عمي محمد من الشغل الظهر
جده خرطتله كل سالفة
وهو شحطها لخالة رجاء للغرفة وضربها
محمود/واني اكول امي شبيها مو طبيعية البارحة
صفنت شويه بوجهها وانعاد براسي هذاك اليوم الاكشر
-فروحه بعد يطلع من عندج دم؟؟
فرح/لا ماكو بس من هذيج المره
من جنه نلعب اني وياك
-محمود انت هم لعبت هاي اللعبة ويه منى وهالة ؟؟
محمود/لا لا بس وياج
-فرح شوفي ممنوع ولا تخلين اي واحد يلعب وياج هاي اللعبة
-ترى موزين يخلص دمج وتموتين
ويصير بيج نفسي حالتي البارحة
مو خلص دمي ومتت
ورجع الطبيب عيشني
-ولا تخلين اي واحد يلزمج ويمد ايده عليج
حرام رب العالمين يجويج بالنار
فرح/حت انت بعد ميصير تلزمني
محمود/اي حتى اني لان كبرت وصرت طالب بالمتوسطة وانتي صرتي طالبة بالمدرسة
فرح/اي عرفت ولا أخلي واحد يوصل يمي
-تعال شوف شنو رسمت
هاي امي وابوي
وهذا ابوي عادل وامي فاطمة
وانت واركان واني
محمود/هاي رسمتيش شو بس خطوط مابيها اصباغ
فرح /غير بعدني صغيرة وما اعرف
بس ميخالف أبقى أتعلم ويصير رسمي حلو واسويها حلوة
-علمني اكتب املاء انت مو شاطر
وتاخذ عشره بالدفتر احسن مني
محمود/يلا طلعلي دفتر المسودة
حتى أعلمج
-بقيت أعلمها واكتبها املاء
وامي كلساع صاعدة ونازلة تراقبنا
يمكن بقت سالفة صديقي الوهمي براسها
-راحت فرح للمدرسة دوامها اليوم ظهري
يعني دوامها عكس دوامي
-طلعت من الغرفة ونزلت جوه
امي يم خالة سهام تساعدها بالخياط
وجديتي متمددة بالفي بالحديقة
وعمة شمس كاعدة يمها تغزل صوف
-ردت أفوت للمطبخ أسوي لفه طماطة
جوعان وبعد وكت للغده مصاير
-وسمعت خالة هناء تكول//رجاء صيري أدمية وجري عدل لو أروح واشتكي لابوي منج
-يولي شو البنوات خيرات
والحجية طيبة ومن اهل الله
بعد عليش ادورين عزال ومشاكل
وعليش مخلية نكرج ويه فاطمة
تراها طيبة وشايل الجميع على راسها
وخالة رجاء ترد عليها //وانتي عليش حامي حمامج عليها هي أختج لو اني
-وبعدين خليها تولي هاي تتملق لجميع الموجودين بالبيت
علمود تاخذ الحصة الاكبر من الورث
-اني باذاني سمعت الحجية تكول لنجمة ولگمرة //عليش ماتتنازلن بحصتجن
من ورث أبوجن لخوانجن
وانتن بذمة زلم خيريين ومامحتاجات
لهل كم دينار التجيجن من الورث
خوانجن حالتهم على كد عيشتهم
-وهاي فطيمة عربيد تبن لا تشوفيها
هيجي ناعم واسلوبها زين ويه الجميع
تراها تريد تاخذ وتكوش على كل الورث
ونطلع اني وانتي من الجدر بدون حمص
-اني صفنت يالله هاي شبيها خالة رجاء
وليش هيجي تحجي على أمي
-حتى للمطبخ مادخلت رجعت للهول
تمددت بمكان جديتي
هي وره شوية جابتها عمة شمس من الحديقة
كمت ساعدت عمتي مددناها بفراشها
ورجعت تمددت بحضنها
وهي خطية تمسد بشعري وتقره قران على راسي
-للعصر اجني عماتي گمرة ،، ونجمة
وجهالهن وياهن
-وكل النسوان أجمعن بالهول يم جديتي
وبدن يكرش بالرايحة والجاية
جيب كونية وتعال حمل ذنوب
ومن تحاجيهن يكولون//ترى ما جايبن سيرة وحده بالباطل
-ضجت وكمت أريد اطلع للحديقة الورة البيت شويه اغير جو احس روحي مخنوك
وهواي افكار تفتر براسي
منا سالفة فرح
ومنا سوالف خالة رجاء
ومنا سوالف روحي الما اعرف شبيها
-وكل الجهال لطشوا ويايه
نروح وياك نشوف الحواوين والدجاج
يلا امشوا خلصوني
-طلعنا من باب البيت الخلفية
والكل طش بين الحديقة والزرع
وصريفة الحلال يلعبون هنا وهناك
-اني بقيت افتر من مكان لمكان
أحس منظر الزرع الاخضر
وريحة الكاع
ورطوبة التراب تهدي روحي
-شويه واسمع صرخة هالة
صرخة وحده مفجوعة
-رحت اركض على الصوت
واشوف رافد
ابن عمه نجمه ..........
شكرا لزيارتكم عالم روايات سكيرهوم
