رواية ارحموني ولو رحمة مرة الفصل السادس 6 بقلم فراقد حسن علي

-((ومن هنا بدأ منحى أخر للقصة ))

محمود/سمعت هالة صرخت بصوت عالي 

صرخة وحده مفجوعة 

-رحت اركض على الصوت 

واشوف رافد أبن عمة نجمة 

شالها وشمرها بساجية المي

-تخبلت عليها هاي اختي الصغيرة 

-واني من الله ما اطيق رافد

احسه شيطان وسوالفه خبيثة 

وهي خطية كامت ترجف المي بارد 

وهم خايفة المسكينة 

-طلعت بالكوة رجليه غرزت بالطين 

والزمت رافد عجنته عجنة من هاي التمام

طلعت حليب امه من خشمه

الصدك طلعت بي حركة كلبي

-هو سمين وضخم بكد العجل 

-عمره ٦ سنوات بكبر فرح 

بس ماسجل مدرسة ماقبلوه لان ما مولود بشهر الواحد

-وهالة طفلة صغيرة عمرها يمكن هسه ٤ سنوات

-شلت هالة ورجعت للبيت

وباقي الجهال يركضون ورايه

شلون القطيع مال غنم نفس الشي

دخلت للهول وانطيتها لخالتي سهام

//شوفي خالة تلمين بناتج خير على خير 

ماكو أخلي ابوي يسويلهن غرفة بالسطح واحبسهن بيها

محمود/عمه شمر هالة بساجية المي همزين ماغرزت بالطين

وزين ربج اني موجود وطلعتها 

جان ماتت من وره سوالفه الخبيث

-ما قصرت عمتي كامت عليه وخبزته خبزة من هاي المعدلة خبز مال تنور طين معدل 

عاطت خالتي رجاء/محمود يالخبيث 

هسه ارتاحيت من كتلت ابن أخوي

-ورجعت عمتك ام عقلين دكته 

-ولخاطر من شبع كتل لخاطر الدايحات بنات سهام اللي ٢٤ ساعة مصلخات وماعليهن ثوب يسترهن

-اذا هذن من هسه هيجي أحلف عليهن من يكبرن يلزمن الشوارع

هي كالت هيجي ومتعرف منين تجيها الرزايل 

-خالتي رجاء ماتركتني بحالي 

فاتت من يمي وكفختني من وره على راسي بقوة ،، لان شبعت رزايل  

-والصدك أني تخبلت وما سكتت 

نطيت عليها وخرمشتها من وجهها 

وجريت دشداشتها من يم زيجها

اجتي بيدي وتمزقت

-وامي تجر بيه تريدني اوخر عنها 

واني ماكو فقدت تخبلت لان ضربتني

-عمة شمس كامت عليه وصلختني براشدي محمدي عدلت بي عقلي

-وخالتي رجاء تكول بلوعة سيان وانفتح غلگها 

-هلكد طلعت حقودة وكلبها اسود 

-كامت تجيب وتخرط حجي ماصخ

حارت شتكول وشتحجي

خبطت الجميع بالحجي الموزين

-وعمي احمد بس سامع من اركان جديتي متخربطة،،بوجه طالع للمضمد أبو سلمان يجيبه بس مالكاه موجود 

أجه وياه ابنه سلمان هو هم مضمد 

بس هو من يحجي يكول //اني مساعد دكتور والصدك هو خوش شاب واشطر من ابوه بشغلات الطبابة 

-دخل للهول سلمان وعمي أحمد بخبصة 

وجديتي متكومات عليها عماتي وامي

وخالاتي سهام وهناء

-وخالتي رجاء صعدت لغرفتها وبعدها 

تصهل بصوتها يا الله شكد برعة وكحة

-سلمان بس قاس ضغط جديتي 

كال لعمي //بسرعة اخذها للمستشفى 

معلك عدها الضغط لا تنجلط مرة ثانية 

-ركضن عمتي كمرة وامي لبسن عبيهن

وراحن ويه جديتي أخذهن عمي احمد 

بالبيكم وطلعوا للمستشفى

-واني ادري واعرف كلش زين

بليل يصلخني ابويه بالحزام حي على الصلاة 

-ومن كثر ماجرتني امي 

ونامت بخوانيكي عمة شمس 

دشداشتي أتمزقت كمت الملم بيها شلون ماجان 

-باوعت من جامة السيارة شو جديتي معوج حلكها ،، انوب انعوجت أيديها 

-وعمتي كمرة وكعت نجوم السماء 

بالصياح والعياط

-وامي تبجي وتعدل بوجه جديتي

وتعدل بيديها بس ماكو فايده

-وعمي احمد يسوق ويتلفت 

ليوره يباوع على جديتي ويبجي

-وصلنا للمستشفى وعمي احمد شال جديتي مثل مايشل الجهال بحضنه

-أجتي علينا الدكتورة وكالت/العلينا سويناه والباقي بيد الله

الحجية ضربتها جلطة كولش قوية 

وبعد هي و رحمة ربها 

ننتظر فد ساعتين ونشوف حالتها

-ورة شوية ويجفت علينا أبوي وعمامي 

وعمامهم واولاد عمامهم المستشفى صارت تروج بيهم 

-بقينا ننتظر الدكتورة شدكول على حالة جديتي

-لليل وطردوا الكل من المستشفى

كالوا// ماكو فايدة من وجودكم 

روحوا لبيوتكم وتعالوا باجر عليها

-طلعنا كعدنا بحديقة المستشفى

واشوف هذا اليشرب جكاير يسحكها سحك بحلكه 

وهذا اليفر السبحة بسرعة بيده يسبح بيها

-عم أبوي الجبير أسمه ( نوري )

كاللهم// يلا الكل يرجع للبيت

خلوا بس الحريم يم الحجية 

وباسم وعامر ابن عمه يظلون هنا بايتين 

خاف يحتاجون شي الحريم

-الجميع سمع كلامه ورجعوا لبيت جدي

من دخلنا عمتي شمس تلكتنا ادك وتلطم على جديتي 

-ابوي جمع كل أهل البيت 

بوجود عمامه واولاد عمامه

يريد يفتهم شنو صار وشنو الموضوع

-عماتي شمس ونجمة سولفن كل السالفة 

بالحقيقة والصدك مازيدن ولا نقصن شي

-من وصلن اني خرمشت خاله رجاء وجريت 

دشداشتها وتمزقت بيدي

-عمي محمد أطفر من بين عمامه

وشحطني من يم أبوي 

وكطع عليه شحاطته

-ابوي يريد يفكني من ايده مايكدر  

يصيح عليه //أترررركه عووووفه أني أرجع اربي من جديد ،، يول مووو مريض البارحة جبته من المستشفى ،، ما يسمع من عنده 

ما يفيد بي لا الصياح ولا المفازع 

لزمني كطعني تكطع شلون الواحد المتحمل على واحد هيجي جرم بحوالي 

-هو بدون كلشي من يصير أعصاب تكب بي نار تكول يتلبسه جني و يصير غير شخص

-خله أيده بصدر أبوي ودفعة بقوة 

ابوي اختل توازنه وأتكوم بالكاع 

وكع على ظهره وراسه اندك بالكاع

خطية تفلش والصدك وكعته محرجة كبال الاهل ،، المسكين كتله المستحى والخجل من اخوانه وعمامه واولادهم

-عمام ابوي ما يقبلون بالعوجة 

وخوش زلم طبعهم نفس طبع جدي الله يرحمه كل أهل الديرة يحبوهم ويحترموهم

-عماتي شمس ونجمة وخالتي سهام

يفكن بخالتي رجاء من أيد أبوها وهو قفل عليها شطب جلدها اشطب 

-كلشي بكوم من العياط والصياح والهوسة والمشاكل وهضيمة ابوي أبكوم 

كعد على اول باية من الدرج

وكام يبجي ويصرخ بدون وعي 

-اجت عمه شمس وشمرت نفسها عليه 

وتبجي وياه وتهدي بي 

وهو يصرخ //يا يابه ياناصر أطلع من كبرك وتعال شوف اخوي الصغير الربيته بيدي 

يضربني ويهيني علمود مرته 

ياابه يصغر قيمتي جدام اخوتي وعمامي 

بويه ترضها ابنك العود توكع هيبته بالكاع لخاطر مراه

-يحجي ويبجي ويصرخ بصوت عالي

وعمهم نوري وحامد وأسحاق 

يردون بس يهدئوه 

بس ماكدروا بعد فقد يحجي ويصرخ ويبجي

-والجهال كلها تصرخ وتبجي خايفين 

البيت أنكلب عزه بهذاك اليوم 

-خالتي سهام أخذتني وضمتني بغرفة عمتي شمس بعد مافكني عمهم نوري من ايد عمي محمد 

-ابوي شلون تصرف عمي محمد جرحه

وهان كرامته كدام الكل

-اجى سحبني من ايدي من غرفة عمتي شمس وبلش بيه بالحزام جلد وكتل كبالهم 

ويصح/مو هذا ابني الجاهل 

مو مريض والبارحة طلع من حلك الموت

اليوم اذبحه جوه رجلين اخوي 

لان تجاوز على مرته

-عمه أسحاق سحب من ايده الحزام 

وحظنه بقوه وأثنينهم كاموا يبجون

-واني اخذني عمهم حامد وكعدني بالهول

-بهذاك اليوم أنشبعت كتل 

كتلتي صارت عمل شعبي 

منو الجاي والرايح ضاربني 

-وره شوية وره ما هدأت الاوضاع 

بقوا عمامي يسولفون ويه عمامهم واولادهم

بس ابوي ساكت كلشي ما يحجي 

بس مدنك راسه ويحركه بمعنى اي

-من راحوا عمام ابوي لبيوتهم 

كل واحد من عمامي راح لغرفته

عمتي شمس نومتني اني واركان يمها

-وابوي فرشتله خاله سهام فراش بالهول

-وخاله رجاء وعمي محمد من وكت العركه

صعدوا لغرفتهم وبعد ماطلعوا منها

-نمت من كثر التعب 

هلكد ما انكتلت اليوم جسمي كله يوجعني

والبارحة تخربطت وما اعرف شصار بيه

شو بليل غديت خردة  

-ما اعرف شكد نمت واسمع صوت عمتي شمس تصرخ بصوت عالي 

// يبووووووووووو يمه ألمن تركتيني

-فزيت وكمت من فراشي 

هي ركضة وهي جبحة

فزيت مخروع وخايف من صوت الصريخ

-واركان كام يبجي عباله رجعت العركة والهوسة 

-دخلت للهول واشوف النعش بنص الهول

وعماتي نايمات فوك الجنازة 

-وابوي وعمامي كل واحد يصرخ بجهة 

-وعمامهم واولاد عمامهم والجيران والاقرباء بدوا يجفتون علينا 

-وصوت صريخ النسوان هز الديرة بكفة

وصوت صريخ الجهال الخايفين بجفة ثاينة

-ماأحس الا ضربات مال شحاطه على راسي

عمي محمد رجع أدروش عليه

اركان/نايم وفزيت مخروع على صوت 

الصياح والعياط ،،عبالي رجعت العركة من جديد

-طلعت وره محمود ابجي وخايف

شفت النعش بالهول عرفت جديتي جابوها من المستشفى متوفية 

-النسوان تعيط وتصرخ وتبجي 

والزلم يصيحون

لا اله الا الله ،،انا لله وانا اليه راجعون

-ما نشوف الا عمي محمد هجم على محمود

وتولاه بالشحاطة تكفخ على راسه

-محمود حتى مابجى ولا دافع عن نفسه

بسرعه ماعت روحه وكع بالكاع 

-ابوي من شاف محمود وكع أجه يركض عليه 

خطية هجع بركضته وسند نفسه على الحايط ما وكع للكاع 

دفعني وكال//امشي روح ويه خالك 

ودي اخوك للمستشفى

-أخذنه خالي بسيارته 

وامي تبجي وتصرخ

ومحمود فاقد بحظنها وبدا خشمه ينزف

-واني ابجي خايف على اخويه يمكن هم مات

-وصافن بحال ابوي 

شو جان يصرخ ويعيط لان جديتي ماتت

بس من شاف عمي محمد يضرب محمود وهو وكع جوه ايده وما رحم بحاله وبقى يدك عليه ،، أنصك ونشفت دموعه !!!

-وصلنا للمستشفى ومن فحصوا الاطباء كالوا //تحويل فوري لمستشفى الطفل المركزي بغداد

-ماعرفوا محمود شنو موضوعه وليش هيج يفقد ويتخربط 

-دخلنا اني وامي وخالي عمر للبيت 

لكيناهم مشييعين جديتي وماخذيها

للدفن

-وامي سلمت على عماتي وبقت تبجي وياهن

-كالتلهن /اعذرني وليدي موات وحولونا لمستشفى بغداد مايعرفون شنو علته 

-وترى مصابجن هو مصابي

وهاي أمي وغالية عليه

ربتني من عمري ١٤ سنة 

مايوم غثتني بكلمة لو حاسبتني على شي

-عمتي شمس كامت ويه أمي وأنطتها فلوس 

لان ابوي رايح للدفن وقافل باب غرفتنا

-رجعنا للسيارة اباوع على محمود مغمض عيونه وبس دموعه تنزل على وجهه 

-طلعنا لبغداد لمستشفى الطفل

وخالي يسوق بسرعة 

وامي تبجي ومخليه محمود بحظنها 

وتقره عليه قران

-من وصلنا للمستشفى اخذوه الاطباء بالطوارئ من عدنه ،، فحصوا وشبعوا تجكك كلساع مسويلة تحليل 

وكلساع جاي طبيب يشوفه

محمود/صحيت بالمستشفى 

وكل جسمي يوجعني 

وكلساع تفرفح روحي من جك ألابر والتحاليل والكانونات 

-الطبيب صاح على خالي عمر عباله هو ابوي

//اخي وين جنت ضام هذا الطفل 

شنو جنت مخلله وتنتظره يتحول طرشي مدبس مثلا 

عمر /دكتور اني خاله ابوه عنده حالة وفاة

الطبيب/الطفل متعرض لصدمة نفسية وخوف شديد وجسمه كله كدمات زركة ومتخثر الدم تحت الجلد 

يعني الطفل معنف جسديا ونفسياً

-بالاضافه عنده تكسر بالدم شوكت ماكل باقلاء

عمر/دكتور اني ما عايش وياهم وكلشي 

ما اعرف عنهم 

هسه أصيحلك أمه ودت أخوه للحمام

محمود /راح خالي عمر يركض يصيح امي

اني جاوبت الدكتور //عمو اول بارحة أكلت من الرجال ابو العربانة كاسة حمص وكاسة باجلة من حليت من المدرسة 

يعني هسه راح أموت 

الطبيب/لا بابا لا تخاف هسه أنعالجك 

-منو هلشكل ضربك وهشكل سوه بيك

محمود/هذا عمي محمد ضربني بالشحاطة على راسي ،، وابوي ضربني بالحزام 

لان تجاوزت على مرت عمي

-والطبيب لعب باأمي طوبة من هذا اللعب المعدل بمرحلة ضربات الجزاء

وبقى يصيح ويعيط عليها 

-وهي خطية بقت بس تبجي 

وتكله//اني ما بيدي شي 

غير بس أدعيله الله يكومه اليه سالم

-دمي فصيلته (O+)

-خالي عمر وامي دمهم فصيلته (A+)

-طبيب كاللهم//اريد دم دبرولي متبرعين من جوه الكاع ميتحمل يبقى لباجر بسبب التكسر صار عنده فقر دم حاد 

-خالي راح وذاع بالجوامع 

في سبيل الله منو يكدر يجي يتبرع وينقذ نفس من الموت

وامي تمشي وتسأل الناس اللي بالمستشفى 

منو يكدر يتبرعلي دم

-خطيه أتبرعلي شاب جندي من أهل الموصل سامع بالجامع

وثنين شباب من بغداد موجودين بالمستشفى ويه أهلهم

وشاب من الانبار من أهل الفلوجه سامع من الجامع

-بس خالي عمر 

وخوالي الباقين أثنين محسن وحيدر 

يروحن ويرجعون على امي للمستشفى

-امي أخوها من امها وابوها بس خالي عمر

يعني بعدهم صغار وجدي مطلك جده صفية 

-اخوانها من ابوها ((حيدر ومحسن وبشيرة وفائزة ))

ومن أمها جدة صفية خالاتي ثلاثة ((أمنة وبشرى وخديجة ))

-امي أتصلت على بيت جديتي صفية

من التلفون الموجود باستعلامات المستشفى

-واجتي هي جديتي وخالاتي شافوني 

واخذوا اركان وياهم للبيت

ويومية العصر يمرن علينا للمستشفى 

-بيت جديتي صفية بحي العدل 

تكول قريب بيتهم على المستشفى

-ليش من يرحون الكبار يخرب كولشي حلو وطيب وراهم ؟؟

-طلعت عمتي شمس من غرفتها ولابسه اسود

تحاظنت هي وامي وكامن يبجن

-وانوب اجني خالاتي سهام وهناء

وعماتي نجمة وكمرة طلعن من الغرفة 

كلهن كعدن بالهول وكامن ينعن ويبجن

موت اجدادي خرب كلشي حلو بحياتنا 

-ابوي وعمامي ماطالعين للشغل 

لان جديتي صارلها أسبوع من توفت 

-ابويه حظني وكام يبجي بصوت عالي

حسيت شوفتي بعيونه حجه 

-حتى ما ستحى من النسوان يبجي كدامهن

اكيد المر عليه مو شويه

-هم وفاة اجدادي ( أمه وابوه )

وهم ابتعاد امي عنه بهيج محنة قوية وفاة جديتي لان هي الوحيدة تسنده وتجي بهيج مواقف صعبة 

-اجتي فرح تركض تبوس باأمي فاطمة 

ومن وصلت يمي تريد تحظني 

ابوي دفعها على كيفه 

وكاللها// روحي يابه يم امج!!!

-استغربت ليش هيجي سوه!!

عادل/يلا يابه اصعد فوك أنجطل وارتاح

وانتي فاطمة اخذي ولدج وصعدي فوك لغرفتج

فاطمة/شكو شصاير .......

شكرا لزيارتكم عالم روايات سكيرهوم