رواية حرب الارحام الفصل السادس بقلم جمانه السعيدي
زينب... تقريبا نص ساعه واني كاعده بنفس مكاني
بعدين اجت سياره طبكت يمي
باوعت روان فتحت الباب ونزلت
نزل ابوها من الجهه الثانيه
بس شفت روان كمت ابجي عبالك جنت ضايعه ولكيت اهلي
هي حضنتني واني كمت ابجي بلزايد
مهضومه من بيت عمي تكاثر عليه
ابو روان....لا تبجين عمو لا تبجين انشاء الله كلشي واله حل
شال جنطتي صعدنا بلسياره
روان تبجي عليه صعدنا بلسياره
اني وروان كعدنا ورا
روان...اسكتي خل افتهم انتي ليش بلشارع من البارحه
زينب...اهييي اهيي عمي طردني من البيت
ابو روان...هذا شبي تخبل اكو واحد يطرد بنيه بليل
ووين عقله
زينب...اهييي اهييي
روان...اسكتي صوتج راح اسكتي الله على الظالم
زينب...بقيت ابجي مجاي اكدر اسكت
حزينه الدرجه اريد ابقى ابجي ومااسكت
على لحظه جان ضاع شرفي هذا الحيوان راد يستغل الفرصه وبمكان ماعمي يدافع عني
طردني من البيت اااخ يابويه حسره بكلبي شكبرها
اريد ابوي
محتاجته يدافع عني ويجيبلي حقي من اخو وزوجته
وصلنا البيت ابو روان واني بعدني ابجي
نزلنا ودخلنا للبيت بيتهم حلو وجبير
جمانه السعيدي
ام روان....هلو حبيبتي شلونج
زينب...مسحت. موعي ورديت عليها بصوت مبحوح
صباح الخير خاله
ام روان...ياعيوني هاي شصاير بيج غسلي وجهج وتعاي نتريك كل مشكله والها حل
زينب...مااريد
ابو روان....لا ازعل عليج نتريك كلنا سوا
اخذتني روان غسلت وجهي ورجعت كعدت يمهم
رغم اني من امس مااكلت شي بس مااشتهي
روان تسوي لفات زغار وتخلي بحلكي اكلت شويه
شربت جاي
روان... اليوم ماكو دوام حتى اني مااروح للدوام
يله تعاي وياي نصعد الغرفتي
زينب...كمت من مكاني وكتلهم من رخصتكم
صعدت وياا روان
روان...اول شي ادخلي اخذي دوش دافي حتى يطلع هذا القهر من جسمج وترتاحي
زينب...مااكدر
روان...اني ادخل اسبحج
دفعتني روان للحمام الحمام بلطابق الثاني
دخلت سبحت فتحت الماي ووكفت جوه الدوش
احس الهموم تنزل على راسي مثل هذا الماي
بعد ماعندي مقدره على التحمل اكثر
الضاهر اتاخرت بلحمام دكت روان الباب عليه
روان...زينب زنوبه هااا حبيبتي خلصتي
زبنب. .اي طلعت
لبست تراكي وطلعت من الحمام
روان...اي هسه تعاي امشط شعرج
زينب...كعدت على الجربابه وكعدت روان تمشط شعري
زينب....تعرفين ابن عمي البارحه حاول يعتدي عليه
روان...لا تحجين صدك
زينب...من زمان وهو يتحرش بيه كل ليله كنت انام برعب
البارحه من رجعت من الدوام
لكيت زوجت عمي شاعله البيت شعل
بس وصلت عمي اتعارك وياي كال انتي موخوش بنيه
سمعتج مو زينه
روان....هاي انتي سمعتج مو زينه صدك يحجي انت اصلا ماكو منج
زينب... حبسني بلغرفه من الساعه ٣ العصر
لا اكل ولا شرب وفوكاها يكول بعد ماكو دوام
ولج مشتغله خدامه الهم
والمصرف تفاليس وصابر ومتحمله حتى البيت اخذو مني
ساكته وصابره وهذا ابنهم خنزير يريد ينهش لحمي
تالي تعاي اكعدي بلبيت ماكو دوام
روان...خل يولون ما يستاهلونج
بس انتي صوجج ولله مااتنازل عن البيت الهم
زينب....اول ٣ سنوات عشت بيتهم كانو يعاملوني احسن معامله
بس من ابنهم رسب وترك المدرسه زوجت عمي كامت تكرهني
اني من تنازلت عن البيت كنت كلشي ماافتهم
كلت هو عمي وصار ست سنوآت عايشه بيته واكل من خيره شلون اكوله لا
ماانطيك البيت ماافتهم اني بهاي الأمور هواي
كل تركيزي على الدوام
مايهمني كلشي اريد اخذ،شهاده وبس
لمن سمعته خيرني بين دراستي والبيت
مااكنت اشوف غير دراستي وبس اني مو ماديه لو طماعه
البيت كان بوقتها مهجور صار ست سنوات
اني اصلا ناسيته بعدين هذا عمي
شلون اكعد اكله لا اني كنت احس هو صاحب فضل عليه
والبيت يروح يجي بيت بمكانه
جمانه السعيدي
ابد ماكنت متوقعه ياخذون البيت ويشمروني بلشارع
اني لو تفكيري مادي جان عفتهم ورحت كعدت بيت ابوي
او على الاقل بعت الغراض الي بلبيت
ودفعتهم مقدم ايجار مشتمل واجرت البيت اعيش من ايجاره
او على الاقل اجرت البيت وانطيت الاجار العمي
بس ولله ماعندي تفكير موزين
اني معتبره ذوله اهلي الي بقولي من هاي الدنيا
امي وابوي ماتو
خوالي تخلو عني
اجي اني اترك بيت عمي اعيش وحدي شلون
اني بعدني زغيره ومااعرف شي عن هاي الحياة
واخاف اعيش وحدي
روان....شكد حقير هذا عمج اذا انتي هيج تفكيرين ويااا
وهو وزوجته وابنه يحاولون يستغلونج
لا تخافين رب العالمين مراح ينساج ابد
شكد طيبه انتي وعلى نياتج وين اكو هيج طيبه بعد بهاي الدنيا
زينب....اني اريد ادور شغل واشتغل واذا لكيت سكن مناسب اسكن خوما اكعد هنا للابد
روان....الشغل بسيط بس سكن لا ممنوع تعوفيني
اني تعودت عليج واحبج
همزين بيت عمج طردوج حتى تجين ونعيش سوا اني وياج
زينب....اريد شغل روان
روان...اي بسيطه اني راح احجي وياا خالو
تلزمين الصيدليه من ترجعين من الدوام بعد شتريدين
زينب...يقبل يشغلني
روان....اي طبعا ليش لا ليش ما يقبل
يله نامي وارتاحي وانسي كلشي
زينب....شكرا
روان....ليش تشكريني ولله ازعل عليج
زينب....شكرا لان بس سمعتي اني محتاجتج اجيتي
شكرا لان فتحتيلي بيتج وانتي تعرفين ضروفي صعبه
شكرا لان انتي موجوده بحياتي
روان...الله كل هذا الغزل عليه
زينب....انتي اختي الي ما جابتها امي
روان....اني ماسويت شي انتي تستاهلين كل خير
يله نامي اكعدج وقت الغدا
طلعت روان وطبكت الباب وطفت الضوه
حسيت نفسي احسن شويه
فكرت بعمي معقوله هسه ضميره مرتاح شلون كدر ينام
وهو طردني بليل
ولا حاول يطمن عليه
وين صلة الرحم ووين المحنه
غفيت هلكد ماتعبانه
كعدتني روان
روان...يله ياكسلانه اكعدي وقت غدا امي شلون طابخه
باميه تلوك الهل حلك
وتمن ابيض وطرشي يله كومي اني جوعانه مااكدر انتضر اكثر
كمت غسلت وجهي ونزلنا اني وياها
لكيت امها محضره الاكل وابوها منتضرنا
روان....مساء الخير
...مساء الخير
زينب....اني اجيت خربطت حياتكم بس الكه مكان انتقل
ابو روان... شنو القصه عمو
اصلا اليوم بيتنا نور احنا عائله زغيره والبيت وحش علينا
نفرح اذا اجانا احد يزورنا هلا وكل الهله بيج
احنا ننتضر احمد يجينا بيوم الجمعه هو وجهاله حتى
البيت يصير بي حس
كعدنا ناكل
روان...بابا اني وزينب نطلع شويه نغير جو
ابو روان...بس قبل المغرب انتن هنا مفهوم
روان.. اي مفهوم
زينب...طلعنا اني وروان
رغم نفسيتي تعبانه بس احس بتحسن
دخلنا محل ملابس
روان تعاي اني اريد اشتري سيت للدوام
شنو رائيج هذا لو هذا
زينب.. هذا احلى
روان. هاي الجنطه جايه ويااا
زينب...اي حلوه
اشترت روان ملابس وعطر وجنطه وكعدنا شربنا عصير
رجعنا للبيت قبل المغرب
روان...ذني الملابس اللج
زينب...لا شنو اليه مااخذهن
روان.. ولله تاخذيهن مو بكيفج
زينب.. اذا تبقين هيج اعوف البيت فدوه لا تحرجيني
الله يخليج بس اريدج تستعجلين حتى اشتغل
جمانه السعيدي
هسه اتصل بخالي واحجي ويااا
روان...هلو خالو شلونك
خالي...هلو رونه انتي شلونج
روان...وينك ما تبين
خالي... ولله مجاي الحك من المذخر ارجع للبيت اتغدا
اسبح وابدل اطلع للصيدليه
بس عماد بيها ومايكدر وحده
روان.. واذا اكو وحده تساعدك
خالي....ولله ياريت على الاقل انام ساعتين العصر
وبليل اروح للصيدليه
صرت عبالك زومبي من قلة النوم
روان باجر تجيك دكتوره صيدلانية بس بعدها ما متخرجه
بس شاطره
على مسؤليتي
خالي...بس اجرب شغلها بلاول اذا ما تعجبني
ماكو شغل
روان...اصلا انت الي راح تتمسك بيها
الاولى على الدفعه خالو
خالي....تمام تشتغل اسبوع واجرب شغلها
روان...باجر انشاء الله
زينب...هااا
روان...باجر تستلمين الشغل مبروك
زينب....الله يحفظج ويحفظ اهلج ويبارك الكم برزقكم
مثل ما استقبلتوني بيتكم
روان....يمعوده محسستني عبالك مسويه انجاز
عليمن هذا الشكر
زينب....الحمد لله والشكر
ثاني يوم ابو روان أخذنا للجامعه اني وروان
من دخلت للجامعه عبالك اول مره ادخل بيها
لان البارحه عمي كال بعد ماكو دوام
الحمد لله والشكر الي فتحلي باب
صدك البشر يسد باب وربك يفتح الف باب
فتحت جنطتي لكيت مبلغ ٢٥ الف
زينب....شنو هذا
روان.. مصرف
زينب.... معقوله انتي ملابس وسكن واكل وتوصيل للجامعه
وفوكاها فلوس
ابد ماأخذ هاي الفلوس
روان...ولله بابا يزعل عليج هو انطاني وكال هذا مصرف زينب
زينب....هواي ولله هواي عليه
روان....يمعوده عود اذا اشتغلتي وصارتي مليونيره
اذكرينا بدربج
زينب...لا هسه اذكركم بدعوه ربي يفتح أبواب الرزق والستر والعافيه ولامان عليكم
