رواية جراح قلبي الفصل السابع بقلم جوهرة
ايهم /
نزلنا يم بيت اهلي وحاسبت السابق الي وصلنا من المطار نزلت الجنط سحبتهم للداخل بالكراج تفاجأت بالسيارات طابكه بالشارع اكيد اكو شي بس جان خبروني اجى ولد يركض يمكن ابن اياد لأن شايفه من يفتحون كام واحجي وياهم ..
ايهم / تعال عمو انت اسد
هو بقى صافن بوجهي وهز رأسه ..
سألته / شكو ليش سيارات بالباب
/ جدو مسوي عزيمة
التفتت على مروة / انتظري هناك هسة الحكج
اشرتلها عالطرمة ورحت دخلت المضيف اسلم عليهم
من زمان ماهيج ملتقي بيهم صح عاتبوني لأن كطعت سنوات بس الوصل بيناتنا موجود الكل فرحو بوصولي والجهال التمو علية محاوطيني يسلمون وصلاح واياد يضحكون وهمة يعرفوني عالاطفال تلفتت عيني ادور على ابني اريد أشوفه والله مشتاقلة ويمكن اكثر شي خلاني ارجع لهفتي عليه خاصة من احجي وياه وافتح كام يخليك غصبا على اهلك وعشيرتك تحبه
اشرلي صعب عليه خاتل ورى صعب وحاضن رجلين عمه
تقربت عليه والعيون علينا سحبته ورفعته بحظني وودفنت راسي بركبته شميته بلهفة رفعت راسي وعيني بعينه فدوة شلون خلقة
حلوة بوسته بخدوده ..
ايهم بحب ولهفة واضحه على وجهه / ها بابا حبيبي عرفتني
صفن بوجهي شوي وابتسم وأيديه الصغار حضنت رگبتي تنهدت واني اطبطب على ظهره بخفة
وعيت لصوت أبوية / يلة يابه تعال اكعد ارتاح ابنك بحظنك ماطاير الله يحفظه
تذكرت مروة عفتها برا
نزلت يوسف وتعذرت منهم على هسة ارجع
طلعت مستعجل من المضيف
واتجهت للبيت بسرعه
الوجوه متتفسر كالبات خلقهن حتى خواتي بس امي تلكتني تهلي وترحب بية بوستها واني حاظنها بلهفة كامت تبجي وتعتب لأن طولت هواي عنهم بست راسها وحظنتها لصدري
اجن خواتي سلمن علية ونسوان اخوتي ، رحت على عماتي سلمت على عمتي ام غزوان
والتفت على صوت لينا الي جانت كاعدة وعمتي ايمان حاضنتها
تقربت عليها فتحت عيني متفاجىء بيها شو هاي غير شكل اي الله وين لينا الناعمه ودومها خانسة هاي الجدامي مرة انثى بمعنى الكلمه
زايدة حلا على حلاها
نترت وهي تكز سنونها وعيونها مليانه حقد
لينا / جايب مرتك تتباهى بيها جايبها حتى تهيني الله لا يوفقك عالسويته بية
ايمان / كاافي لينا امشي اصعدي لغرفتج
صاحت بيها عمة ايمان ، واني ضجت من كلامها زمخت بيها لأن كولش ضجت من تصرفها وياي ..
ايهم / انجبي لج شنو هالصلافة هاي
لينا بنظرة حاقدة / هسة اني صلفة ايهم اني الي جاية استعرض جسمي وشعراتي الحمر شووف شووف هاي مرتك الي جايبها حتى تهيني بيها
بقيت عيني بعينه واني متفاجئه أكثر من شكله صاير أكثر خشونه جان قبل أضعف متغير هواي وكبران هه هو ياهو البقى على حاله كلها تتغير
ايهم /
يعني عرفو منو مروة التفتت على مروة الجانت واكفه صافنه / شكلتي وخليتها هايجه
تقربت علية تحجي بدلع / حبيبي خبرتهم اني زوجتك
رفعت تك حاجب وخزرتها / منو كالج هيج تحجين اني مو نبهتج
سكتت ماردت
التفتت على لينا اللي صرخت علية / والله لا اخليك تندم على كل السويته بية والله
عافتنا وطلعت لغرفتها واني بقيت أواجه كل هالوجوه المليانه ملامة وعتب
تقربت على عمتي ايمان / عمة ايمان خليني عاد اسلم عليج
رفعت أيدها زعلانه وجهها ثكيل / لهنا وخلص اكتفيت منكم بيت عبدالله الناصر
عافتنا وطلعت زعلانة والبنات يركضن وراها يحاولن يرجعنها
ايهم / يمه رحمه لاهلج أخذي مروة لغرفتج خل ترتاح
ام حذيفة بعدها مصدومة ممصدكة ايهم متزوج / يمة شو لاحجيت لا كلت على بختك ليش هيج تسوي شوف الصار هسة وهذا بعد ابوك واخوتك ما عدهم علم إذا عرفوا شلون متكلي منين جبتها علينا هاي
ايهم / هاي بنت صاحب الشركه دخلت شريك وياه قبل شهر
اخذتها امي لغرفتها واني طلعت للمضيف
ــــــــــــــــــ
لينا /
ركعت الباب بقوة وقفلته بقيت ابجي بحرقة ابجي المذلة الذلنياها جايب جلبته فرحان بيها ياريت حلوة ، جايبها يذلني بيها
تلفتت والحرگة بگلبي جريت موبايلي واتصلت على خالي عمر ..
لينا / خالو الحكني فدوة اروحلك
عمر / ياستار شبيج بابا
لينا / ايهم ايهم رجع وجايب زوجته وياه فدوة خالو تعال اخذني بعدما اتحمل دقيقة ما ابقى وياه
عمر / بابا اهدي لا تتصرفين بتهور انتبهي علية ، اني بتركيا مو تدرين بية بس لخاطرج راح ارجع السليمانية تكدرين تجين وحدج لو مادبرينها تعاي بكروبات
لينا / خالو ماريد ابقى هنا وإذا احجز خاف اطول الفترة
من سمعني ابجي رد علية / زين انتظري مخابرتي واتحضري راح ادزلج ولد اعرفه ثقه سايق بين أربيل وبغداد اذا موجود بعده ابغداد خل يمرلج لديالى يجيبج تنزلين بفندق ...... لما اوصل من تركيا اجي اخذج
لينا / اييي قابله فدوة خالو انتظرك
عمر / بنيتي انتي بس اهدي راح اطكين من البجي
سلم علية وسده
رحت سحبت جنطه حجمها وسط وفرغت بيها الملابس الاحتاجهم اني ويوسف
وطلعت شكو فلوس وذهب عندي ومستمساكتي اني وابني سديت الجنطه ودفعتها بصف الكنتور من الجهة الثانية
بقيت بغرفتي انتظر مكالمه من خالو اندكت الباب وصوت علا ورانيا مارديت عليهن عافني وراحن
دك موبايلي / هااا خالو
عمر / ساعه عشرة عنده جماعه مأجرينه من بغداد راح يوصلج انتظري اني انطيته العنوان مال بيتكم ورقمج من يوصل يرمشلج اطلعي عليه
لينا / تمام مشكور خالو
عمر / صيري سباعية لا تخلين أحد يخوفج انتي مو صغيرة ولا ضعيفة حتى تقبلين بهيج معاملة ، وبس ارجع اعرف شلون اخذلج حقج منه هالحقير هذا
سديته منه وبقيت ادعي ربي يطلعني من هالدوامة هاي
دحكت ساعه سبعه ونص گلبي على وليدي ماشفته من العصر
رحت بدلت لبست كلابية حلوة مرتبه لون جويتي ورتبت وجهي مكياج خفيف ذبيت شال على راسي ونزلت جريت اكبر كميه من الهوى احاول اقوي نفسي تلكتني عمتي
تعاتبني انوب قهرتني بالزايد
ام حذيفه / يمه على بختج ليش هيج كبيتي برجلج اقلها اسلم عليه
صدوك عصبتني يعني حبها لابنها عامي عيونها لا واتبرر هم وادور اعذار لابنها
لينا / خافو الله بية لا تشوفوني ساكته على ساعة اتخبل عليكم وأخذ ابني واهج
ام حذيفه نترت بيها / انجبي ولج والله اخلي عمج يطيح حظج
لينا / ههه لا والله على أساس ماطاح حظي من يوم التزوجت ابنكم ، طاح حظي ميحتاج يطيحه
ام حذيفه / هيج طلع لسانج لينا واني اكول عليج هادية وعاقلة
لينا / بالحق ماكلت حجاية باطله لينا القديمة ماتت وشبعت موووت
عفتها ورحت ادور على ابني لكيته بالهول هو وأبوه ابو البلاوي وعمامه دخلت بدون ما احجي جريته من أيده وطلعت رافعه راسي اليشوفني يكول ما مهتمه بس والله العظيم داخلي صاير طشار
لاكتني جلبته الجابها وياه لا وانوب تفتر بالبيت مأخذه راحتها لعد شكد عينها صلفة
مدت بوزها من شافتني ودحكت على يوسف
مروة / ابنج مبين وكيح ردت أبوسه ماقبل
خزرتها / يتنكس
نترت بية / شنو قصدج ؟!!!
دحكت عليها بنظرة محتقرتها ومحتقرة لبسها
لينا بزكحة / ممتعود يشوف هيج زبااالة
جانت لابسة تراك ضيك ربع ردن لخاطر الله مدري شتحس هاي لا والبيت مليان زلم ولا تستحي
طلعو على صياحنا وهي من شافت ايهم راحت وكفت بسده تتشكى وتتبكبك
ما اهتميت الهم لأن كل البالي اطلع منا وبطريقه ميحسون بيها
عمو عبدالله من سمعها نتر بيها / وانتي ماعندج لبس تفترين هيج ترى الستر حلو شنو هالعين الصلفة اول يوم تدخلين هيج تسوين طلايب
مروة بصلافة / اووي شكد متخلف
عيطه ايهم خلتها تجمد بمكانها لأن هانت الحجي وهالشي بعرفهم يعتبر جبير محد يقبله
ايهم / احترمي نفسج ولج واعتذري من أبوية تاج راسج هذا
خزرته ماقابله / ايهم نسيت اني منوو
ايهم بصلافه / يطبج ستين مرض مو ايهم التلوي ذراعه مرة كتلج اعتذري احسلج
عاطت بأيهم / مااا اعتذررر
ايهم / حدج هاي الليلة تباتين اليوم وباجر بأول تكسي ترجعين لكرايبج البغداد وهالشراكه وية ابوج لابوها لابو اليريدها
تدخل اياد / صلي عالنبي ايهم اليوم جبتنله مرتك شبسرعه تعاركتو
زمخ ايهم بعصبية / مووو صخام مو مرتي مجرد خطبة وبس حجي والظاهر جنت حيل غلطان
عافهم وطلع للمضيف وبقو صافنين عالقنبله الفجرها
التفتو على ضحك صعب وهو يصفك ايد بيد
وطلع ورى اخو
ومروة راحت بغرفه الحجي على أساس زعلانة
لينا /
سحبت ابني بحظني شبكته وكعدت عالباية مال الدرج مصدومة من السمعته طلع مامزوجها !!!! بس لو حتى هالشي مراح يشفعله عندي البيت صار صنطه وعلا راحت تحضر العشا استغليت انشغالهم ورحت نزلت جنطتي وعبايه اسلاميه حتى ألبسها فوك كلبيتي سالني يوسف / ماما اسوين
لينا / اشش حبيبي لا تحجي ابد بعدين افهمك
يوسف بفرحه / لوح باي
لينا / يا الله يا يوسف انت راح تفضحني طلعتله من ثلاجة المطبخ عصير ابو القصبه وبقى يشرب بي
اني افتريت من الباب الخارجي خليت الجنطه بسد الممر اليطلع عالكراج
رجعت للبيت موبايلي بيدي ساعه صارت عشرة الا خمسة طبعا ماتعشيت مالي نفس بس وكلت يوسف الي ادحك عليه كام يغفي طلعت من الهول شايلته بحظني دك موبايلي مخليته عالصامت رمش وانقطع
طلعت بسكته همزين كلهم بالمضيف وعلا والجهال بغرفتها دحكت باب غرفة عمتي مسدودة اكيد انخمدت صاحبته لأيهم النذل
برا ذبيت يوسف بالكاع بهدوء سودة علية نايم لبست عالسريع عباتي ولفيت شالي شلت يوسف بحظني وعيني تفتر بالمكان اخاف أحد يلكفني شلت الجنطه بجتفي وطلعت بسرعة اركض ركض فتحت الباب الجبيرة بهدوء وصرت بالشارع تلفتت اريد اشوف السيارة رمشن لايتات سياره واكفه قريب من قربت عليها سيارة ستايركس بيها نسوان اثنين أعمارهم وسط وشباب تلاثه المرة اخذت يوسف خلته بحظنها بينما اصعد اني والجنطه الي خليتها يم رجليه تنفست بهدوء واني اسلم عليهم وأخذت ابني بحظني
حرك السايق يله ارتاحيت
دك موبايلي خالو اتصل يتطمن طمنته وسديته
ـــــــــــــــــــ
صعب /
ترى السويته فلم هندي خليت العائلة طشار هههه والله ضحكتني
ايهم / صعب والقرآن مسطور لا تحجي فدوة خل تولي جنت غلطان من كلتلها راح اخطبج وهي ماصدكت على أساس تنزل ابغداد يم اقربائهم وأبوها عنده علم شو من نزلنا من الطيارة لزكت الا تجي وياي
صعب / والله ياخوي اهم شي طلعت مامتزوج لأن خطية بنت عمنا متستاهل الجاي تسوي بيها
صفنت من حجى صعب وتذكرت شلون لاكتني بشراسة تحجي وعيونها تريد تاكلني صايرة خطيرة ام يوسف صدك اشتاكيت لابني كمت اريد اروحله
صعب / هااا وين ؟؟
ايهم / اروح اسبح وهم اشوف ابني اشتاكيتله
جر صعب النركيله / اكعد نركل بعد وكت
اشرتله بيدي وطلعت واسمع أبويه يكله / خله يروح لوليده لاتمنعه
البيت صنطه صعدت راسا لغرفتي فتحت الباب بلهفة الغرفة فارغه وين راحو طلعت ادور بالغرف الفوك احتمال بغرفة علا دكيت الباب طلع حذيفه
ايهم / يوسف يمكم ؟
حذيفة / لااا احتمال يم امي
نزلت على امي جانت نايمه وعلى صفحه مروة نايمه ، كعدت امي ندهتها بصوت ناصي
ايهم / يمه يمه يوسف وأمه ماكو !!!!
ام حذيفه فزت / ياه وين يرحون قابل شوفوهم يم بيت حذيفة
ايهم / لا لا توني سالته
طلعت ادور بالبيت وبرى ماكو رحت للمضيف
دخلت وعيوني بكصتي ..
ايهم / لينا ويوسف ماكو
صعب اول ما سمع ذب النركيلة من أيده وكمز
صعب / صدك تحجي وين راحو خاف يم البنات
ايهم بتوتر وقلف / ماكو ماكووو
صعب / زين دك عليها شوفها وين
مسحت وجهي بيدية / ماعندي رقمها
طلع صعب موبايله واتصل على رقمها / الوو
ام يوسف انتي وين
عكد صعب حاجبه وسده التفت علية سحبت الموبايل اتصل عليها طلع مغلق اكيد قفلته
صعب / دكول لحد يسأل علينا
ايهم / شنوو يعني ؟!!!
حجي عبدالله/ يابه صعب شكالت بنت عمك
صعب بتأكيد / يابة البنت انهزمت
رمشت بعيوني واني اسمع هاي الكلمة الي أحسها اهانه الي ، زوجتي مهزومة وماخذة ابني وياها
أبوية خلة أيده على راسه له له ولكم هاي جبيرة السالفه ماريد أحد يدري العالم تاكل وجهنا
صعب / يابه ياعالم هاي خلينا بالمصيبة البنت وين تروح بهالليل هذا ؟!!!!
عيني على صعب الي حجى بحرگة فعلا كلامه وين تروح بهذا الليل هي وابني
ــــــــــــــــــــ
للصبح الوب مانايم اجت مروة .. راح اروح التكسي بالباب
اشرتلها بيدي بدون ما احجي بمعنى روحي
مالي خلك احجي وية أحد بقيت افتر بالكراج الساعه سبعة الصبح ودماغي يودي ويجيب بهالاثناء انفتحت الباب وعمة ايمان الي طلعت البارحه زعلانه دخلت ومن شافتني اجت صوبي اكيد صعب خابرها اكو غيره
ايمان بغضب / هسة ارتاحيت بالسويته البنت وين راحت ايهم ولك ماتعرف أحد هاي اسالني اني عليها تربات أيدي هذه
ايهم / لخاطر الله ترى من البارحة مانايم لا تزيدينها علية
صفكت ايديها بعصبية / وين تروح ماتعرف أحد غيرنا خالها مو بالعراق صارله ثلث سنين بتركيا اووف لينا ولج ليش ما اجيتي لبيتي ليش ما اجيتي لعمتج
طلعت امي سلمت عليها واخذتها للبيت واني احس روحي راح تطلع اااخ لو بس الزمج لينا الا أصلخ جلدج
ـــــــــــــــــ
حاسبت السايق ونزلت يم الفندق الكال عليه خالو ، يوسف كعد من نومته وبقى يتلفت دخلت حجزت غرفة ووصيت على ريوك
لأن يوسف جوعان
تنهدت واني احس روحي مو اني اول مرة هيج اجازف فكرت هسة شنو السوو من عرفو اني ماكو تذكرت عمة ايمان خطية حيل تحبني اكيد راح تقلق علية لازم اطمنها بس مو هسة خليني ارتاح ويصفى دماغي
عيني على يوسف يفتر بالغرفة شوي واجى يكمز .. ماما ماما
عرفته محصور اخذته عالسريع للحمام بداخل الغرفة كمل غسلتله ورحت طلعتله ملابس بدلتله واني هم غسلت وبدلت ، شوي واندكت الباب جابو طلبي شكرته وسديت الباب قفلته
أشرت ليوسف واني اتربع بالكاع ..
/ تعال حبيبي ناكل همية
تريكنا اني ويوسف ورحنا مددنا عالفراش خليته بحظني وغفينا
ماكعدت إلا على صوت رنة موبايلي لأن رجعت فتحته ، دحكت ساعه بالثنتين الظهر يوسف نايم سودة علية تعبان لأن الطريق كله جان كاعد بس غفى شويه
هذا خالو عمر رديت عليه بسرعه/ الووو هلو خالو
عمر / هلة بنيتي انتي وين السايق كال ذبيتها بالفندق
لينا / اي حجزت غرفة
عمر تطمن / خوش لعد اني وصلت قبل ساعة وراح اجي عليج
لينا بحب / الحمدلله على سلامتك خالو حبيبي اسفه إذا اشغلتك وياي
عمر / اسكتي ولج اني جم لينا عندي
سديته ورحت اتوضى اصلي الي فاتني
بقيت انتظر خالو عمر وتفكيري كله يم بيت عمو عبدالله شيكولون وشيسوون انتبهت موبايلي يرن وبعدها انقطع ورسائل وصلتني
فتحته عمة ايمان وعلا مارديت عليهن اكيد عمة تريد تطمن علية إذا ارد عليها راح أضعف واكللها بمكاني لااا خليها لاتعرف احسن
جريت حسرة وذبيتها وعيني راحت ليوسف يربي والله اموت قهر عليه شنو ذنبه يجي لدنيا يربى بدون ابو سنين عايفه وهسة اجى وجايبله سربوته مدري منين يريد يتزوجها
اااخ اني هم مدري الصارلي من شفتها حسيتها اخذت شي عزيز من عندي رغم اعرف ايهم مامهتم آلي لو يريدني جان اجى قبل هسة بس اني گلبي سكط مرات أريده اريد احس بأهتمامه مثل أي زوجة بس للأسف فاقده هالشي هذا
جنت اتمنى يجي ويكول بعد ما اسافر باقي يمكم انتي وابني اتمنى يمنحني شوية اهتمام وحب لكن الاشوفه قسوة وإهمال
لعد شوكت تلين شوكت تحس عندك زوجة محتاجتك وابن يريد يربى بحظن أبوه
اتصل خالو علية كال وصلت الفندق وراح اجيج
دقائق والباب تندك فتحته خالو فتح أيديه وحظني اني من شفته دموعي نزلت بجيت بحظنه دخل وسد الباب / اششش باباتي لاتبجين كعدنا واني مسحت دموعي ..
عمر / شلونج هسة
لينا / خالو مو زينه خالو ليش هيج حظي
عمر / بنيتي شبي حظج شوفي شلون عندج ولد حلو الله يحفظه فكري بي فكري عندج شهادة فكري بروحج شكد انتي شابة وحلوة
لينا / بس هالاشياء ماجابتلي سعاده اني انظلمت خالو
عمر / حقج بابا .. بس والله فاجئتيني بقرارج ماتوقعت تنهزمين
لينا / طكت روحي واني أشوفه جايب مرته الصخله وياه ،، صدوك طلع خاطبها مدري مصاحبها يعني ممزوجها
عمر / لينا احجي الصراحه عندج احساس بزوجج لو لأن ابو ابنج
دنكت من سألني خالو استحيت منه هو عرف جوابي بسكوتي ، بس مقررة ما اطخ راس بعد وادوس گلبي مهما كان
عمر اشر ليوسف / هاا جدو كعدت هلة هلة بيوسف البطل
راح خالو شال يوسف وباسه بعد راسه وعينه عن خالو عمر يركز بوجهه حتى يعرفه لأن مرات نفتح كاميرا ونحجي وياهم يمكن ما عرفه
لينا بحب / حبيبي جدو عمر هذا
مد أيده الي / ماما
اخذته من خالو / يمكن ماعرفك
عمر / عوفي براحته هسة بدلو ملابسكم حتى نطلع نتغدى
لينا / خالو شنو ماتعبان من السفر
عمر / اني وصلت الصبح وجنت أبيت عمتي الحجية وحجيتلها عليج وراح تبقين عدها ما اخليج وحدج بالفندق
لينا / خالو استحي اني ماشايفتها يمكن من جنت صغيرة شفتها
عمر / مرة طيبه حيل وهي عايشة وية بنتها الأرملة
لينا / اخاف اسوي زحمة عليهن
عمر / لا بابا زحمتيش بيتهم جبير وجهال ماعدهم بس وليدات اثنين بعمر العشر سنين واصغر
لينا / ها زين لعد خل أبدل ليوسف
عمر / راح انزل جوا احاسب الفندق وانتي أخذي راحتج ولاتنسين جنطتج
عالسريع بعدما نزل خالو اخذت يوسف سبحته وبدلتله واني هم بدلت بنفنوف مرتب ولبست حجابي واخذت يوسف وجنطتي ونزلنا
مابطل أسئلة يوسف لأن شاف المكان متغير عليه وبقى يسأل على جهال عمامه وعلى جده عبدالله اخر شي كلتله ..
لينا / يوسف هسة نروح العاب تتونس هناك
كام يصفك بايديه فرحان ، خالو جان منتظرنا اخذنا تكسي ودانا لمطعم تغدينا وبعدها اخذني لبيت عمته ام زوجته بيتها بنفس مركز السليمانية استقبلتنا خطيه تهلي وترحب نسابة خالو أكراد ناس طيبين حتى زوجة خالو كولش حبابة
اني جنت مستحية منهن بس من شفت ملكاهن الحلو هي وبنتها ارتاحيت
خالو بقى كال راح ابقى هالفترة علمودج يريد يرتب وضعي خوما ابقى هيج
الحجية ابد ماسألتني لأن خالو حاجيلها
يوسف انطلق وية الجهال همه بس اثنين عشر سنوات وسبعة ابوهم توفى بحادث سيارة هذا كل الاعرفه
انطتني الحجية غرفه فوك بيها قريوله نفر وكنتور بقيت يومين استحي انزل الا خالو يصيحني عالاكل يلة
الحجية بلهجة مكسرة تحجي عربي عاتبتني لأن ما انزل واكعد يمهم بعدها كمت انزل وحتى بالشغل اخلي أيدي وية بنتها ام دلير
صاحني خالو بالاستقبال جان جاي من برا طلع من الصبح سلمت عليه وكعدت بصفه
عمر / شوفي بنتي رحت استشاريت محامي علمود الورث مالتج حتى تاخذينه وافتهمت منه إذا كولشي باسم الوالد الله يرحمه راح يرجع الج بس لازم الشغلات هاي تكمليها بمحكمه ديالى مو هنا
لينا / يعني ارجع خالو شلون
عمر / بنيتي خوما تبقين شاردة ،، اي لا هيج ادحكين علية هسة انتي بنظر عمامج مهزومة وإذا يحبونج ما يذبون براسج تهمة باطله
ضربت صدري / عزااا العزاني صدك تحجي خالو ترى بديت اخاف
عمر / بابا هذا مجتمعنا قابل متعرفينه فلازم تواجهينهم تأخذين حقج منهم واذا تردين تطلكين حتى نرفع دعوى بالمحكمه
لينا / خالو ترى دخت والله اني مجنت حاسبة حساب لهاي السوالف
عمر / هسة انتي اثبتي على كلمة تردين الطلاك
بدون ما افكر رديت / لااا عمري مافكرت بهالشي
عينه علية صفن بوجهي وهز رأسه / لعد تأخذين الورث هو علي ( ابو لينا ) الله يرحمه جان عنده بيتين ومحلات هذا كل الإدري بي
لينا / اي وعندي حساب بالمصرف .، بس خالو المستندات كلهن يم عمو عبدالله بس دفتر المصرف عندي
عمر / لينا سالفتج حيرتني طلاك ماتردين لعد شلون راح رجلج يقبل يعوفج وحدج كاعدة
اني متأكد هسة كالبين الدنيا عليكم
لينا / خالو اخاف يأخذ ابني إذا اطلكت
عمر / والله بنيتي اتوقع أكثر خافي لا يحرمج من شوفته عناد بالسويتي
خوفني كلامه يربي شلون لعد / خالو رقمك يعرفونه ليش ما اتصلوا عليك
والله بنيتي اتوقع بين لحظه والثانيه يتصلون وما اكدر اجذب عليهم فخليت سيم كارت ثاني هذا المرات تتصلين علية
لينا انتي عناد بالسواه وياج انهزمتي لو جاي وحده من السفر ماجان هذا الصار
لينا / اي صحيح لأن ماكدرت اتحمل واني اشوف وحدة ثانية اخذته
عمر / يعني تحبينه؟!!!
سكتت ماحجيت شاكول لعد لو شايفه منه معامله حلوة جان شسويت !!!!!
عمر / والله انتن النسوان ماتنحزرن .. لاتحجين بابا ابقي ساكته
بقيت افكر بحل إلى أن توصلت لواحد / خالو
أخذ واحد من البيوت واكعد بي واعيش من وارد المحلات
عمر / ومنو من عمامج لو ولدهم يعوفج بكيفج بابا ، اهلج وتعرفينهم ميقبلون
لينا / لعد راح اسافر لتركيا وياك
عمر / ماعندي مانع بس جواز عندج انتي وابنج
لينا بضيق / لااا
عمر / مشكلة لازم اطلعلكم جوازات يعني نرجع لديالى
لينا / شلون نرجع واني انهزمت خاف احد يشوفني
عمر / ماكو غير حل إذا تردين جواز
لينا / مدري والله خل افكر وارجعلك خبر
ــــــــــــــــــ
ام حذيفه/
شلون يعني هالمكسورة الركبة كالت راح أخذ ابني واهج بس عبالي لأن عصبية ما اخذت حجايتها ، شنحجي للعالم شنكول
صعب / لجهنم محد عنده شي يمنا
تم حذيفه / ولك صعب البنت انهزمت وين راحت هي والوليد ابو ملاك يخابر خالها جهازه مقفول يكول مغير رقمه ماعدها أحد واني گلبي ماكلني عليهم وخصوص على يوسف
صعب / يمه لخاطر النبي لاتبقين تحجين ترى ايهم أعصابه مفولة ماناقص يسمع هالكلام
دخل ايهم وركع سويج السيارة عالميز طلع صوت قوي وبعصبية / ماكو الها اي أثر حتى البنات الي تعرفهن من جانت بالكلية رحنا اني ورانيا عليهن ميعرفن شي عنها اصلا مابيناتهن تواصل من وكت التخرج
كعد عالكرسي وسند كصته بيده
ام حذيفه / ابوكم مايقبل أحد يدري انت شلون تروح تسأل بالعالم
ركع الميز بيده / ترى ما اتحمل بعد اترجاج يمه
طلعت امهم من المطبخ وبقى صعب وأيهم
صعب / خل نطلع لسليمانية
التفت ايهم على صعب / شنسوي واحنا مانعرف وين اندور
صعب / معتصم من شوفناه الكاميرات ساعه الطلعت من البيت وصعدت السيارة كدر يكشف الرقم ولاتنسى هاي شغلته هو بالداخلية ويعرف اني ماحجيت جدامهم ماريد أحد يعرف ، السايق لاكينه جماعة معتصم ومحقق وياه البارحه
كمز ايهم تقرب على صعب / احجي وبعدين
صعب / نازلة يم فندق ..... وهذا بالسليمانية
للعلم السايق خالها مخابرة ومتفق وياه
أيهم فاك عينه وحجى باستعجال / امشي هسة نطلع لاتاخرنا صعب
الساعة جانت الستة المغرب من دخلو
حدود محافظة السليمانية
وطول الطريق ايهم يتوعد لينا وصعب يهدي بي
ــــــــــــــــــــ
شكرا لزيارتكم عالم روايات سكيرهوم
