رواية بنت الكهوجي الفصل السابع بقلم احمد
ياقوت .. فتحت الباب بدون ما اطلع صوت جان قريب كلش من البيت ومبين دا يحجي بالتيلفون واسمعو گال شفتها ومتأكد مليون بالمية
هو گال هيج واني اريد اتحرك ماگدر ومن الخوف حتى ما اعرف شنو گال بعدها گوة انسحبت وسكرت باب الترك
صرت الطم على حظي وحتى بابا مو موجود علمود يتصرف هو اخير شي ركضت للمطبخ اخذت سجينة ورجعت للغرفة وقفلت الباب علي
بقيت بالغرفة وگلبي يدگ بقوة وماعرف شسوي باوعت شفت فراش بابا وتمددت بيه وغطيت نفسي حتى راسي غطيتو وماسكة السجين بايدي
جان كل الي بتفكيري انو راح يدخل علي قبل ما يجي بابا وقتها بس الله يعلم شحيصير بحالتي وشلون راح اخلص نفسي ماعرف
ولو سامعة حركة بزونة بالبيت جان ما بقى احد بميسان ما سمع صراخي بس الحمدلله بقى الوضع هادئ وماكو اي شي مو طبيعي
اخير شي اندگ باب الغرفة وسكرت حلگي بايديني علمود ما اصرخ وسمعت صوتو من گال بوية ياقوت افتحي الباب وگمت فورا فتحتو
زتيت نفسي بحضنو وانفجرت بالبجي وهو حضني وما يدري شكو ومستغرب من حالتي اخير شي رفع راسي گال شبيج احجيلي
ياقوت : بصوت متقطع .. مم معت معتصمم
ادم : شبيه معتصم احجي
- شششاا شاافني
- شلون ووين وشجابو عليج
- جججنت جنت......... قاطعني
- انتظريني هنا شوية
راح جاب گلاص ماي انطاني وگال اشربي واهدي وفهميني شصاير وياج علمود اعرف اتصرف وشربت الماي وهديت شوية
- جنت گاعدة هنا وسمعت صوتو خارج البيت يم الترك ورحت فتحت الباب واسمعو يحجي لواحد ويگلو شفتها ومتأكد مليون بالمية
- زين الي جان وياه گدرتي تسمعين صوتو
- لا يمكن جان يحجي بالتيلفون
- شنو حجى بعد
- ماعرف من الخوف دخلت داخل وقفلت الغرفة علي خفت انو يدخل للبيت وانت مو موجود
- خلص اهدي بوية ووين ما توصل خلي توصل اهم شي اهدي ولا تشغلين بالج بهيج امور اني اتصرف بيهن
- بس بابا خايفة يدخل للبيت بيوم انت مو موجود هنا
- تطمني حتى لو يشوفج واگفة گدامو واكون اني خارج العراق مو بس خارج البيت ما يگدر يسوي كلشي كل الي يگدر يسويه يحجي لابوه
وبالنسبة لابوه اذا سألني ابسط شي اگلو ما جنت مفكر اجيبها وياي وبعدها جبتها وما صارتلي فرصة احجيلك وهو راح يتفهم الموضوع
- تمام .. بس اكيد ما يسوي شي
- اي بوية اكيد تطمني وارتاحي
- اذا هيج لعد تمام
- يلا تعالي ندخل المسواگ علمود تسويلنا عشى ترا ميت جوع
- يخسى الجوع
رحت وياه دخلنا الغراض وراح هو يرتاح واني بلشت بالعشى وكلامو كلش ريحني وگلت اترك الموضوع وبابا هو يعرف يتصرف
قبل ما اكمل العشى اندگ الباب واجى بابا گال روحي لوحدة من الغرف وطفى الطباخ وطلع واني رحت للترك گلت احسن من الغرف
جنت اسمع صوت الشيخ وبابا يحجون بس صوتهم بعيد وما فهمت شنو يحجون بس مو مبين من صوتهم ان واحد زعلان من الثاني
بس الي شغل بالي انهم تأخرو وهم يحجون وصار صوت بالمطبخ كأنو صوت حديد ثگيل دا ينسحب عالگاع وصار عندي فضول اعرف شصاير
ورا 10 دقايق تقريبا صاحني بابا ودخلت للبيت گال هاي هي اجانا العشى باوعت عليه باستغراب گال تعالي للغرفة خلينا نتعشى
دخلت وياه للغرفة جان الشيخ دازلو عشى كضيافة لبابا جانو مسوين لحم غنم وتمن من الي سموه عنبر ريحتو تخبل وزلاطات وطرشي
گلت لبابا اجى بوقتو وتعشينا اني وياه ومشاء الله الطبخ جان درجة اولى اكلت لحد ما شبعت گلت لبابا شوف بطونتي شكبرها صارت وصار يضحك علي
رحت غسلت ايدي وتذكرت الصوت الي سمعتو بالمطبخ ومن رحت شفتو طلعو جايبين النا كاونتر حديد منظرو كلش حلو
جان مستعمل بس مستعمل شي قليل كلش بحيث ما بيه خدش واحد ومنظفيتو زين وجايبينو النا رجعت على بابا گلتلو منين الكاونتر هذا
ادم : من الشيخ يگول ما محتاجو وجابو النا لان انتبه على المواعين من جان عندنا العصر
- عاشت ايدو وربي يخبل
- وانتي عايشة باجر عود نظفيه وسفطي مواعينج بيه
- اصلا هو نظيف بس لازم اغسل المواعين وبعدين اسفطهن بيه
- على راحتج هو گال نظيف بس ماعرف منظفينو زين لو لا
- اي منظفينو جزاهم الله خير
- خوش لعد
من خلص بابا اخذت المواعين غسلتهن وحطيتهن على صفحة علمود ياخذهن بابا باجر والاكل الزايد حطيتو بالثلاجة
ما جان عندنا نظام الاكل الزايد ينذب مثل بعض الناس بالعكس نعتبر هالشي هذا يطير بركة النعمة فنحاول گد ما نگدر نحافظ عليها
رجعت للغرفة بعد يوم متعب بشكل مو طبيعي تمددت بفراشي واحس كل عظمة بجسمي توجعني مجرد غمضت عيوني فورا نمت
گعدني بابا على صلاة الفجر گوة صليت ورجعت كملت نومتي وما گعدت لل 9 فتحت عيوني بابا مو موجود بفراشو وفراشو مسفط ومتعدل
گمت شلت فراشي ودورت بابا بالبيت ماكو وعرفتو رايح للمضيف بدون ريوگ وماخذ مواعين بيت الشيخ وياه وابد ما عجبني تصرفو لعد شنو فايدتي اذا ما اسويلو ريوگ الصبح
وعناد بيه حتى لنفسي ما سويت ريوگ ورحت للمطبخ علمود اسفط المواعين وبقى يرن باذني كلام بابا من يگول خاف مو منظفين الكاونتر زين
گلت خلي انظفو تنظيف خفيف علمود ما ابقى افكر بالموضوع وجلفتو جلفة من هاي التمام على اساس تنظيف خفيف بحيث ما بقى بيه ذرة تراب
بعدها جبت دبية ماي جبيرة ترستها وحطيتها عالسنگ وواحد من الجدور حطيت بيه نص ماي وزاهي وبلشت بغسل المواعين
بالنسبة للدبية الجبيرة جنت انظف رغوة الزاهي بيها علمود ما افتح الحنفية ويطلع ماي من المجاري وممكن احد ينتبه عليه
بلشت اغسل المواعين وسفطتهن على صفحة علمود ينشفن قبل ما احطهن بالكاونتر وبلشت بالغدا علمود من يجي بابا يكون جاهز
ورا اذان الضهر دخل بابا للمطبخ سلم علي باوعت عليه وما جاوبتو (اعرف عيب وغلط بس اريدو يحس بذنبو وما يكررو)
ادم : شبيج بوية ليش ضايجة
ياقوت : يعني على اساس معتبرني بنيتك انت
- افه ليش هالحجي
- تعرف نفسك شمسوي كلش زين
- والله يابوية ماعرف
- ليش ما گعدتني علمود اسويلك ريوگ قبل ما تروح
- وهسا انتي زعلانة علمود هالشي
- اي زعلانة علمود هالشي
- والله يا بوية شفتج نايمة وتعبانة من شغل البارحة وما جنت جوعان لان كثرت بالعشى يعني لو مگعدج مجرد اشرب جاي لا اقل ولا اكثر
- اي خوش
- بمزح .. ديلا عاد اضحكي ترا اخبث وياج
- ما اريد اضحك
اجى شالني وگال تضحكين لو احطج بدبية الماي (مالت المواعين) وما گدرت ابقى ضايجة عليه وضحكت وبستو من گصتو
نزلني وباسني من راسي وراح علمود يصلي الضهر واني كملت الغدا ولحگتو عالغرفة گعدنا تغدينا ومن خلصنا غسلت المواعين ورجعتلو
ياقوت : شعجب الگهوجي ما اخذ السبلت وياه وشو الكهرباء هنا من تنقطع فورا ترجع مو مثلنا ببغداد
ادم : اولا السبلت للشيخ مو للگهوجي ثانيا الكهرباء مالتنا من بيت الشيخ عندو مولدة وساحب خط لهذا البيت
- من وين ساحب شو ماكو لا بواري ولا شي
- ساحب دفن ويا الگاع علمود ما تأثر بيه الشمس والحرارة القوية
- وشنو من مولدة هاي الي عندو علمود تتحمل بيتين
- هاي مولدة مالت ابراج من تطفي الكهرباء تشتغل لحالها ومابيها صوت مثل باقي المولدات صوتها ضعيف كلش الا تكونين يمها يلا تسمعيها
- وشلون گدرو يحصلوها اذا هي مالت ابراج
- الي عندو فلوس يحصل كلشي مو بس مولدة وهم الله رازقهم من فضلو ويگدرون يشترون 10 منها مو بس وحدة
- يلا بس اصير معلمة اشتريلك وحدة هههههههه
- اتفقنا
- صدگ شلون شغلك
- زين وهو اصلا ما يعتبر شغل بس من يصير عندهم گعدات تختلف لان هواي ناس راح يجون
- وايمتى ترجع للمضيف
- بايام الصيف من اجي الضهر ما ارجع لان الناس كلها تنام للعصر يلا يجون بس بالشتاء ارجع لان نهار قصير واذا احتاجوني بايام الصيف يخابروني
- بشنو يحتاجونك
- مرات يجونهم ناس على غفلة فلازم اروحلهم
- تمام المهم اذا تريد تنام نام قبل ما يروح عليك الوقت
- مو جايني نوم
- صدگ بابا جيبلنا مكرافة وسفرة
- وين مكرافتنا
- ذبيتها
- ليش
- حطيت بيها وسخ البزازين وذبيتها هي وياه
- والسفرة شنسوي بيها
- اريد اگصگصها وافرشها بالكاونتر علمود اذا المواعين بيهن رطوبة او ماي ما يأثرن عالكاونتر
- شگد تحتاجين
- ماعرف والله جيبلنا مترين بالوقت الحالي
- صار
بقينا نحجي اني وبابا ومبين عليه مرتاح بشغلو الحالي وكلش يمدح من الشيخ ويگول انو كلش محترم ويحترم بابا هواي
اني فرحت من داخلي لبابا لان صدگ هو كبر وما يگدر يبقى يشتغل عامل لان شغل العامل يهد الشباب فما بالك بالجبير
وشغل الگهوجي صحيح البعض يشوفها ان مثل شغل الخدم بس يبقى اسمو شغل ويبقى رزقو حلال وتعبو قليل
والحلو بيه ان حاليا بابا يعتبر محسوب عالشيخ فاي شي يصير ويا بابا راح يوگف وياه الشيخ علمود ما يضيع حقو بين الناس الي ما تخاف الله
تمددت وحطيت راسي بحضن بابا وصار يمسح على شعري واصابعو تتغلغل بفروة راسي وتنطيني شعور بالسكينة والراحة كلش قوي
ما جنت اريد انام جنت اريد استمتع بكل لحظة اگضيها وياه بس غلبني التعب والنعاس واخذتني النومة وجانت احلى نومة بحياتي
گعدني العصر علمود الصلاة وبعد الصلاة راح للمضيف واني شفت نفسي ماعندي شي فتحت القران وبلشت اقراه
اخذني الواهس وما حسيت الا ظل گدامي رفعت راسي وابتسملي گال ها بوية شو ماكو عشى اليوم
ياقوت : شگد الساعة
ادم : اذن المغرب قبل شوية
- بتعجب .. گول والله
- اتكئ عالباب .. والي خلق عيونج
- يااااا اخذني الواهس
- عفية بوية
- ههههههه الله يعافيك هسا اسويلك اطيب عشى
- المهم جبتلج سفرة موجودة بالمطبخ .. رفع ايدو جان بيها علاگة .. وهاي العلاگة نفتحها بعد العشى
- شنو بيها
- نتعشى وبعدها تعرفين
- تمام
گمت شلت القران وصليت ورحت للمطبخ حطيت قوري الجاي عالنار وانتبهت ان اكو علاگة بيها رغيفين خبز حار ورجعت علمود اسأل بابا
ياقوت : بابا منين الخبز هذا
ادم : من بيت الشيخ عدهم مرة تخبزلهم والشيخ حلفني انو يوميا اخذ منها لان تخبزلهم يوميا خبز حار
- همزين جنت شايلة هم للخبز
- وهسا ارتاحيتي منو
- اي والله
رجعت للمطبخ طگيتلي بيضتين ومن استوى الجاي حطيت جبن وقشطة من الي جابهن بابا ورجعت للغرفة حطيت العشى وتعشينا سوا
بعد ما تعشينا وغسلت المواعين اجيت على بابا گلتلو يلا شوفني شبيها العلاگة گال خلي نصلي العشاء علمود ما ننساها گلتلو تمام
بس الفضول عندي صار الف صلينا العشاء وگعدنا مقابيل بعض اول شي طلعو خاتم فضي وعليه نقشات صفر بس منظرو يخبل
وبعدها طلعلي لعابة گال هاي للطفلة مالتي واخذتها واني اضحك وبعدها طلعلي گلادة شكلها قريب من الخاتم وهم جانت كلش حلوة
وقبل الاخير طلعلي لعبة تركيب الصور جايب نسختين واخير شي طلعلي كتاب مال قصص خيالية بيه هواي قصص
حطيت الكتاب بصفحة وفتحنا وحدة من لعبة تركيب الصورة فلشناها وصرنا اني وياه نركب بيها بس لان اول مرة وما ركزنا هواي بالصورة جانت صعبة
مرت ساعتين واحنا نركب بيها يلا كملناها گلتلو خلي نكمل الثانية هم گال لا عوفيها لغير يوم علمود نتونس بيها وعافني وراح لفراشو
اني شلت الاغراض كلهن وفتحت الكتاب وجانت اول قصة لمملكة بيها احداث رومنسية ونهايتها لقاء الاميرة المفقودة والملك المستقبلي
من خلصت القصة باوعت لبابا جان نايم گمت طفيت الضو ونمت اني هم وثاني يوم گعدني بابا علمود اسويلو ريوگ
گمت صليت الفجر وگلت بمزح اكو بعض ناس ما يجون الا بالعين الحمرة وطلعت من الغرفة گال شبيج يولي مخبلة ورجعت عليه
........
قبل ما نبدي بالبارت اريد اخذ شوية من وقتكم لان ما اگدر اسكت بعد
الي متابعني من قبل يعرف انو اني دائما احط نصائح دينية ضمن القصص علمود تكون القصص بيها فائدة مو بس ضياع وقت للقارئ
بالنسبة الي ما افرق بين الشيعي او السني او غيرهم الفتوى احطها حسب المذهب الحنبلي الي انتمي اله والقارئ مو مجبور يتقبلها
الي يتقبلها اهلا وسهلا والي من غير مذهب او غير طائفة يتبع مذهبو او طائفتو ما اله داعي تحجون او تسبوني علمود فتوى اتبعها
تخيلو لدرجة جنت اراجع تعليقات وحدة من القصص اكو وحدة تگول الكاتب داعشي بس لان النصائح ذني ما عجبنها قسم بالله كرهت حتى القصص ومالي واهس اكتب بسبب هالكلام الي اتعرضلو يوميا
يا ناس ترا الي يكتب بشر مثلكم ومو كل كلام الواحد يتقبلو يعني طلعتوني من الاسلام بس لان كلامي ما يعجبكم والفتوى ما اجت على عقليتكم
وارجع واكرر كلامي الفتوى الي احطها تكون حسب المذهب الحنبلي (من المذاهب السنية الاربعة) سواء كنتو من غير مذهب او من غير طائفة فمو ملزومين تتبعون كلامي ارجعو للفتوى حسب مذهبكم او طائفتكم وهاي هي
وبالنسبة لقصصي ترا جان بيها شيعة من ضمن الابطال وبيناتنا صداقة كلش قوية بس اني تعمدت ما اذكر امور الزيارة وغيرها
والسبب ما اريد اذكر شي اني اجهلو وممكن انطي حكم او اذكر كلام مو زين بحق طائفة اخرى فاحاول گد ما اگدر ما اسيئ لاي طرف اخر
الي تعجبو قصصي ويتابعني اتشرف بيه والي يسب او يطعن بي مرة ثانية راح اطلع عن طوري من صدگ واجاوبو بكلام ما يرضيه اللهم قد بلغت اللهم فاشهد
البارت هذا قصير لان گوة كملتو
********* نرجع للبارت *********
ياقوت : باستغراب .. شكو بابا فهمني شصاير
- مو صاير شي بس هالعجي هذا معتصم فلا تصرلو جارة ولا ينعدل ويتصرف مثل الزلم
- شبيه صخيم
دا احجي وياه واندگ الباب گال روحي لغير مكان ورحت للترك وسمعت بابا گال تفضل شيخنا ورحت لشباك الغرفة مثل ذيج المرة
رغم ذيج المرة ما جانت بنيتي انو اسمع شيحجون بس هالمرة تعمدت اريد اعرف شصاير دخلو للغرفة هو والشيخ وجان بابا كلش ضايج بوقتها
الشيخ : صحيح الي سمعتو يا ابو باسم
ادم : شنو سمعت شيخنا
- انو خجلت معتصم گدام الضيوف وما ضيفتهم
- اي نعم شيخنا هالشي صار
- افه يا ابو باسم مو هاي المرجية منك ليش شنو الي يخليك تسوي هيج قصرنا وياك بشي بدون قصد
- مع احترامي الك شيخنا بس ابنك معتصم وضيوفو ما يستاهلون الاحترام والتقدير
- افه طيب احجيلي شسوو وضوجوك هيج اني من حجالي معتصم ما صدگتو واجيت علمود استفسر منك واعرف للموضوع
للامانة بالكم يوم الي راحن ما شفنا منك الا كل طيب اصل واحترام لذلك استغربت من الموضوع
- شيخنا ترضاها اني بگد ابوه يگلي گدام الشباب الي وياه صب الگهوة يا ولد والي وياه يتضاحكون مثل النسوان
- بتعجب .. معتصم هيج حجى وياك
- اي شيخنا وما اگلك اسأل الموجودين لان اكيد الي يتصرف تصرف نسوان ماراح يحجي الحق
- خوش اني اعرف شلون اتصرف وياه وامسحها بوجهي هاي ابو باسم
- وجهك ابيض شيخنا اني ما اريد شي مجرد يحترم نفسو علمود ابقى اني هم محترمو
- صار الي تامر بيه يتنفذ
- ما يأمر عليك ظالم
- هسا اعوفك ترتاح وباجر الصبح اريدك يمي واذا خابرك معتصم مرة ثانية حتى رد لا ترد عليه
- تمام شيخنا
- واعتذر منك مرة ثانية
- معذور شيخنا ما صار شي سهلة
- يلا مع السلامة
- مع السلامة
ياقوت : جنت اسمع كلام بابا وهو يحجي بحرگة ومبين مقهور واني من يمي فار دمي من الغضب ومن راح الشيخ دخلت داخل
- شنو قصدو صخيم يحجي وياك هيج
- مجرد دايح شتتوقعين منو مثلا
- شنو الي صار بالضبط
ادم : من خابرني رحت لگيت جايينو جماعتو يتعللون عندو وابوه عايفهم شباب بينهم يتونسون بالمضيف ورايح للبيت
اني ما اهتميت للموضوع سويت الجاي والگهوة وهستوهن استون وگدام الموجودين معتصم گلي صب الگهوة يا ولد
وجانت هاي اول مرة يحجي وياي هيج وجماعتو صارو يتضاحكون بينهم واني ما تحملت خبطت الگهوة ويا الجاي وطفيت الطباخ
گلتلهم الي يريد گهوة يصب لنفسو مو يضحك مثل النسوان وعفتهم واجيت وهاي شفتي اكيد حجى لابوه علمود يعاقبني
- زين ابوه شيگولك من يريد گهوة
- ابوه كلش محترم ما فد يوم گلي صبلنا گوة دائما يگول ابو باسم تضوگنا گهوتك او تضيفنا گهوة وحتى من يگولها يگولها بضحكة علمود ما استثگلها
- لعد شبيه ابو صماخ ما صار محترم وزين مثل ابوه
- شعرفني خيولي لا تضوجين نفسج بيه
- بس ليش خبطت الجاي والگهوة قبل ما تجي
- ههههههه علمود ما يصبونها ويسوون من جديد
- طلعت هم مو سهل ههههههههه
- شعبالج لعد
- هسا ما فهمت علمود هاي نرحل منا
- لا ماراح نرحل بس لو ابوه واگف وياه ويريد يطلعني غلطان ما ابقى يمهم يوم واحد
- اي احسن المهم هسا اجى وقت لعبة تركيب الصور ولا تگلي بعدين
- تمام جيبيها خلي نحلها
- جبتها وبلشنا نركبها ونحجي .. صدگ بابا الملابس الي اغسلهن وين اشرهن
- بكيفج وين ما تريدين شريهن
- ملابسي ماگدر اشرهن عالسطح اولا ماگدر اصعد ثانيا احتمال احد يشوفهن من بيت الشيخ
- والحل
- جيبلي حبل علمود اشرهن
- والله يا بوية ما بقى عندي فلوس نهائيا
- مو مشكلة اني ادبر نفسي بس ليش صرفت فلوسك على ذني الالعاب
- احسن علمود تتونسين بيهن بغيابي
- قبانو انييييييي
- ههههههههه شو صرتي مصلاوية
- ههههههه ماعرف وين سامعتها وعجبتني
- شنو معناها
- ماعرف هههههههه
- شلون تحجين كلام ما تعرفين معناه يجوز مسبة
- لا مو مسبة بس ماعرف معناها
- مثل كلمة فديتو مثلا قبانج يعني فديتج قبانك فديتك وهيج شي
- ايواااا يعني گلتلك فديتو اني
- بالضبط
ياقوت : كملنا اللعبة وخلصناها وبعدها نمنا الصبح بعد ما راح بابا صفنت ويا نفسي وافكر بحل للملابس وتذكرت عندي دشداشة ما اريدها
رحت گصيتها وسويتها خيوط وصعدت للبيتونة (غرفة الدرج) ما جان اكو فد شي مقابيل الشباك اشد الحبل بيه
شديتو بالشباك والصفحة الثانية عفتها لحد ما يجي بابا ونزلت شفت الساعة جانت 9 رحت فتحت قراني وبلشت اقرا
بعدهاخلصت قراءة وبلشت بالغدا وجنت انتظر بابا وخايفة يجي مثل البارحة عصبي بسبب مصخم (معتصم) الا اخليه يعوف الشغل
بين ما صار وقت الاذان كملت الغدا ورحت صليت وعلى نص الصلاة سمعت صوت بابا داخل البيت ومن خلصت صلاة حطيت الغدا
ياقوت : ها شلون مصخم وياك اليوم
ادم : باستغراب .. شنو من مصخم
- ابن الشيخ
- ههههههههه معتصم قصدج
- اسمو مصخم
- هههههههههه هاي هي على مونتج(رايج) مصخم مصخم
- اي شلونو وياك
- ضايج مني ومرات احسو يحاول يضوجني بس ما يلگي فرصة لان ابوه موجود وماكو سبب يتحجج بيه
- بابا ليش ما تعوف الشغل هذا والله مو عاجبني
- حتى لو اريد اعوفو ماگدر بالاخص هاي الفترة
- ليش
- اولا لان مو باقي هواي لرمضان فيصير شغلي بس بالليل ثانيا اني مديون حاليا ولازم اشتغل لحد ما اوفي ديني
- شنو من دين هذا
- الشيخ يطلبني 450 الف
- حييييل شدعوة هالگد .. جان هالمبلغ بالنسبة لوضعنا المادي كلش هواي
- احتاجيتهن من انتقلنا لهنا وانطاني اول شهر مقدما علمود اگدر انتقل هنا
- يعني حسب كلامك منا لشهرين يلا ينطيك دفعة ثانية
- اي
- ادري هسا اذا لا قدر الله واحتاجيت فلوس منين تجيب
- إن شاء الله ما احتاج وبالنسبة لرمضان فما نحتاج مسواگ عندنا كلشي ونحاول ندبر لحد ما يخلص
- تمام .. صدگ بابا اريدك تشدلي الحبل بالبيتونة
شكرا لزيارتكم عالم روايات سكيرهوم
