رواية ازهار والوحش الفصل السادس بقلم جمانه السعيدي
ازهار...الولد الي جنا نحسب يوم يوم يمتى يجي
ونفرح بي
وسام لاحضر ولادته ولا شافه
رحت اجيب بلمستشفى اتصلت علي وحجينا اني ويااا
عاتبته لان وصلت للولاده وهو ماكو
رغم احنا متفقين بيوم الولاده يكون وياي
وهو اول واحد يشيل ابنه
بس بيومها عدهم انذار وماكدر ينزل
سديت التليفون ودخلت غرفة الولاده وياي بس عمتي
زوجت اخوي الجبير اتصلت عليها كالت اي جايه
بس مااجت
كانت ولادتي صعبه وصلت للموت يله جبت
طلعت من غرفة الولاده تعبانه
تعبانه كلش بس الممرضه انطتني علاج وشويه صرت احسن
اتصلت على وسام حتى افرحه
بس مايرد اكثر من مره اتصل علي بس مايرد
اذكرت عدهم انذار
اكيد ماشايل التليفون من حسيت نفسي صرت احسن
طلعنا من المستشفى
اني وعمتي بناتي خليتهن يم الجيران
جيرانه بنيه كلش حبابه عدها ثنيين بنات بناتي يرحن يلعبن وياهن
مرات ذنيج البنات يجن يمنا
رجعت للبيت وعمتي راحت جابت بناتي
رجعت اتصلت على وسام هم ما بجاوب
هسه وكت الانذار اليوم يعني اله بيوم ولادتي
اني تعبانه حيل تعشيت ونمت
كعدت ابني يبجي الساعه بلوحده رضعته وغيرت ملابسه
اتصلت على وسام مايرد
عفت التليفون ونمت
الصبح اتصلت علي هم مايرد شلون ياربي اريد اسمع صوته
ما متعوده هلكد مااحجي ويااا
للضهر اتصلت علي رد عليه واحد
ازهار...وسام وينك من امس اتصل عليك
...العفو اختي اني مو وسام بس اريد أبلغكم خبر
وسام استشهد البقيه بحياتكم
ازهار...سكتت لان اتوقعت اني سمعت غلط
ازهار...دقيقه عيوني من رخصتك انت ايجوز مشتبه
...لا اختي ما مشتبه البارحه العصر وسام وكع شهيد
وسام سالم عبد مو هذا اسمه
ازهار...كلبي تكول واحد وعصره حسيت اختنكت
سديت التليفون
كلت لا هذا اكيد مشتبه وسام ما يموت ويعوفني اني وبناته
لا ما يسويها مستحيل
رجعت دكيت مره ثانيه محد رد عليه
كلت اي محد. يرد اكيد هذا الولد موقصده وسام
رجعت دكيت مره ثالثه
...نعم اختي تفضلي
ازهار...اريد وسام طبعا احجي وكلبي يدك على السريع
البقيه بحياتكم اختي وسام استشهد
ازهار...وكع التليفون من ايدي عطت بصوت عالي
كمت اعيط بجنون شنو وسام مات
دخلت عليه عمتي ....هااا شكووو
ازهار...عمه وسام وسام استشهد
عمتي...يمه اسم الله تحجين صدك
ازهار.. هاج اتصلي اتصلت مرتين يكول استشهد
كامت عمتي تعيط واني اعيط البنات حاضناتني ثنيبنهن
خاف من الصوت
الطفل طفر من النوم يبجي
ازهار....ولجن يمه ابوجن مات علاوي يمه لا شفته ولا شافك كمت اعيط بصوت عالي ادك على روحي
ولك يمه علاوي
يمه بناتي بدون اب يمه اليتيم منو اله
امداني وامده حضي الاغبر
وسام مات ليش مات ليش عافني حتى ماعندي اهل
ووين اروح
منو اليه منو يسئل عني وعن بناتي
وسام عيوني انت ليش عفتنا هذا ابنك
انت مو كلت اني احضر ولادته
مو كلت اجي اي تعال شوف ابنك بس لا تجي
بتابوت الله عليك
التابوت يخمش الكلب
انت حلو وكشخه شلون تتمدد بتابوت
وسام على بختك شلون عفتني اني وجهالك منو النا
فدوه تعال وكول جذب اي جذب
مجرد تشابه بلاسماء
انتم اتصدكون اني اكدر اعوفكم
وسام....وسام تعال فدوه الطولك تعال
شلون تعوفني منو الي وصيته عليه ليش ماكتلي
ليش ماكتلي هاي اخر مره احجي وياج
بعدني ما شبعت منك
جمانه السعيدي
عبالك البارحه ازوجت ليش مستعجل عيوني انت
الموت ليش اخذك
بعدني اليه نفس بيك يااا وسام بناتك يصيحولهن
يتيمات
ينكسر خاطرهن شلون من دون البنات هنا يتيمات
ارجع فدوه اروح الطولك
مااكدر اعيش من دونك انت اهلي وكل ناسي
ولله ماحسيت نفسي يتيمه بيوم
لان انت ساندني لوميته اني ولا انت
بقيت ابجي مااكدر اوكف على حيلي
ما مصدكه وسام مات
كل شويه اكول هسه يدخل علينا اكيد هذا تشابه بلاسماء
وسام مايعوفنا اني وبناته
وهذا ابنه حتى مالحك يشوفه
من يكبر ويسئلني عنه شكووول
اكله بيوم ولادتك مات ابوك
بليل الساعه بلوحده وصل التابوت
اول مره وسام يجينا نايم اول مره يجي داخل تابوت
اول مره مايفتح الباب بس يشوفنا يضحك
نمت على التابوت وملخت نفسي
بس وسام هلمره متغير سمعني ابجي وما كال اسكتي
ولا كال لا تبجين اني يمج
كل مره بس تنزل دمعتي يمسحها كبل
هلمره دموعي نزلن علي بس ماكال اسكتي
ليش هيج كلهم يتخلون عني ميخالف بس انت لا
انت عندي الدنيا كلها
ومن بعدك الدنيا ما تسوه شي
شالوني بلكوه من فوك التابوت
واخذو وسام مني ردت احضنه الاخر مره اشم ريحته
واضمها بكلبي
بس ماقبلو اول مره تدخل ناس غريبه بينا
وتمنعني أقرب علي
رحت وياا للنجف الحد مانزلو بلكبر واني مناضرته يكعد
الكبر مو الوسام بعده زغير وحلو
رجعت الطريق كله ابجي
اذكرت اول مره من اجا يقنعني نزوج
كاعده بلسياره
واتخيل ضحكته الي اخذت كلبي
مو كتله كتله مااريد عسكري خاف يموت ويعوفني
شوف شلون اني طلع حجي صدك
وسام عافني رغم هو حلف الف مره مراح يعوفني
بس بلاخير عافني
اذكرت يوم عرسنا شلون جان طاير من الفرح
لو من خلصت الاجازه وراد يلتحق وكمت ابجي علي
شلون كعد بلكاع يم رجليه
ومسح دموعي وبقا منا لمن وصل للوحده مالته يحجي وياي ويحاول يضحكني
جمانه السعيدي
لو اول حمل اليه شلون من ينزل يداريني
حتى يوكلني بايده
ليش اني ماعندي حظ
ليش الناس الزينه بحياتي تعوفني
اني شلون راح اكمل بدون وسام
راح اكدر اعيش وهو ما موجود بتفاصيل يومي
بعد ويامن احجي مرات هلكد مانحجي سوا
اكوله شبكة الاتصالات عرفت كل أسرارنا اني وياك
يكول خليه تعرف حبيب يحجي وياا حبيبه
همه شكو يغارون من عدنا
ويامن بعد احجي وافضفض منو يسمعني منو يحس بيه
عبالي نكبر سوا ونصير شايب وعجوز
واحفادنا حوالينا
الدنيا شكد قاسيه وياي ابد ما انطتني مجال افرح
ضربتني ضربه كسرت ضهري
اني اليوم يله صرت يتيمه
من مات ابوي وسام ابد ماخلاني احس بليتم
بس هسه منو الي راح يسندني
اني اليوم اتيتمت
اني وجهالي كلنا صرنا يتامه
وصلنا للبيت بيتنا اضلم اشوفه
رغم الدنيا نهار الساعه تقريبا سته الفجر
بس بيتنا اضلم
جبت جهالي من الجواربن كعدت بلكاع ابني بحضني
وبناتي وحده منا وحده منا
دموعي ينزلن منا ومنا وبناتي يبجن وياي
حتى ابني صايره بي خوفه هلكد مايسمع عياط وهو بعده زغير
وسام راح وعافنا على غفله
اذا اكلكم بجيت علي اكثر من امه تصدكوني
كمت مااشوف بعيوني هلكد مابجيت علي
كل يوم يعدي اكول هسه يجي وسام
هسه يدخل علينا ويكول وين علاوي ماشفته
كلشي بلدنيا اتغير طعمه
لا احس نفسي جوعانه ولا شبعانه ولا اشوف اي شي حلو
كلشي اشوفه اسود
كل ليله اطلع التليفون وادزله رساله
...هااا حبيبي نمت لو بعد
....تعرف اني مشتاقتلك
...هلمره طولت عليه هواي
...عيوني يوجعني من البجي
...يمتى ترجع دزيتلك صورة علاوي شفتها لوبعدك
...نور كل يوم تسئلني عنك
....سراب تكول هلمره بابا من يجي اريد لعابه من هاي الجبيره
...كل يوم اطلع ملابسك اشم عطرك وارجعهن المكانهن
...اخوي اسعد يكول ملابسه انطوهن الواحد فقير بثواب روحه مايصير يبقن بلكنتور
بس اني مااكدر انطي ملابسك بيهن ريحتك
...كلما يرن تليفون اكول وسام اتصل عليه
بس اجي للتليفون لا الكه مكالمه ولا انت تتصل
ليش ما تتصل عليه مو من عوايدك
جنت اكثر من عشر مرات تتصل بليوم
اني خايفه من الايام الجايه لان راح اعيش من دونك
اول مره اجرب اعيش من دونك
ابد مااكدر اتخيل اخر لحظه الك قبل لا تموت
منو اجا كدام عينك قبل لا تموت اني لو بناتك لو امك
منو اخر واحد فكرت بي
ردت احضنك قبل لا يدفنوك بس ماقبلو ليش مااعرف
ماخلوني اشبع منك
بخاطري اضمك على كلبي
راح ابقى احجي عنك كلام حلو البناتك والعلاوي
اخليهم يحبونك الاخر لحظه بعمرهم
كل يوم ادزلك رساله بلكت تقرأها وترد عليه
شكرا لزيارتكم عالم روايات سكيرهوم
