رواية ارحموني ولو رحمة مرة الفصل السابع بقلم فراقد حسن علي
فاطمة/شكو شصاير ،،شبيكم شو وجوهكم مچفية
عادل/هسة اصعدي فوك واني أفهمج
محمود/صعدنا لغرفتنا صايرة هوسة
مكلوبة وصاير بيها أنقلاب هدوم وفراش
-امي صعدت وبقت متفأجاة من الهوسة
شمرت عبايتها وبدت تعزل وترتب
-أني رحت أتمددت على الجرباية
واركان هم تمدد وياية
-أني رحت أتمددت على الجرباية
واركان هم تمدد وياية
-شويه وصعد أبوي ،، وامي تقدمت عليه
وحظنته كبالنا وهم خطية أثنينهم كاموا يبجون
-احنا بقينا نباوع عليهم
لان اول مرة نشوف امي تحظن أبوي كبالنا ابد مامسويتها من قبل
-أبوي ما استحى من أمي ولا من عدنه
بجه بجى بس الله يعلم بالحسرة الجان خانكها بصدره عبالك جان منتظر جيت أمي حتى هيج يبجي بحظنها
-كعد بالكاع ولملم رجليه على صدره ورجع راسه على الحايط وغطى عيونه بيده
-أحس كل هذا الصار بابويه بسببي
عادل/فاطمة تعرفين شنو الذابحني والكاسرني ومهشم خاطري وهاد حيلي
-صح موت امي كسر ظهري وهد حيلي بس ما اعترض لااا هذا أمر الله
والموت حق كل أحنا نغمض وبس وجهه الكريم يدوم
-الكسرني فاطمة أهانة أخوي الصغير اليه هاني بين أخوتي وعمامي و اولادهم واني الجنت حاسب نفسي جبيرهم وكلت أظمهم تحت جنحي وماريد تفرقتهم بعد موت أبوي
-ترى أخويه هاني هواي
وكل أهانة أقوى من الثانية
-اول شي سحب أبني الزعطوط من حظني وتولاه كفخات كدام الجميع
-اتوسل بي واكله الولد مريض طلعته من حلك الموت عوفه اتركه من ايدك اني أربي وهو بي ما يدك عليه كفخ بالنعال
-ااااخ فاطمة كلها بجفة ومن دفعني وكومني بالكاع بجفة ثاينة
-تدرين حسيت روحي صرت بحجم العصفوراني عادل ابو محمود الزلم تحلف بأسمي وكلهم يحترموني
و يقدروني هيجي أخويه
يفشلني ويصغر قيمتي كبالهم
فاااطمة صرت ما اكدر ارفع عيني بوجه اصغر واحد بيهم
-وألهشم خاطري بالأكثر بموتت أمي واني أشوف تابوتبها بنص البيت وحركت كلبي عليها تسعر
-وأخوي عاف كل هل مصيبة و رجع تولاه ابني الزعطوط كفخات
الشل خاطري الولد وكع وفقد بين أيديه وهو بعده يدك بي بالشحاطة
-تعرفين شنو حسيت بهذيج اللحظة من حركت الولد وما تحرك
كلت راح ادفن بدل الواحد أثنين
تعرفين شنو معنى حسيت كلبي وكف بساعتها من الخوف
-ومن طلعنا للدفن وشيعنا أمي لدار حقها وبين الزلم أخوي الصغير
يكولي //هم الك عين وجاي ويانه تدفن أمي وهو أبنك سبب موتتها
-شترديني بهذيج الساعة لو ألزم وليدي وأدفنه بدال أمي مايرتاح كلبي
-حسيت كل الزلم الغريب والعرف
عيونهم تسأل شنو السالفة
ويردون يعرفون من أي حلك جايف شنو الموضوع
-من رجعنا من الدفن وبعد ما وكفنا بالعزاء وناس رايحين وناس جايين
بهذاك الليل رجعنا دخلنا للبيت نرتاح شويه من التعب البنوات خواتي خطية تلكنا يبجن ويلطمن
-عمي نوري كال// ما أريد سالفة زعلكم تطول وانتم هسه مكسورين
ومحتاجين وكفتكم لبعضكم
-أمر محمد وكاله//كوم أوكع على راس أخوك الجبير و اتسامح منه
-وأخوي الزين يرد عليه // هذا عشم بليس بالجنة
-فوك ما أبنه هد على مرتي ومعرينها
-ومن وراه أمي أنجلطت وماتت
تريدني اكوم وأطلب السماح من عنده وهو بالجذب ماكلف نفسه يضربه كدامنا ويكسر شر عيوني
اطلب غيرها عمي
-عمي نوري مارضى على كلامه
وكال/ لزم الصبي وكطعه بالحزام
وبالكوه أسحاق وحامد فكوه من جوه أيديه
-بس حضرتك ماتدري أخذت الحيه مرتك وصعدت فوك كرصت بمهجومتك
-هي مرتك لو أدمية ماتدخل بسوالف زعاطيط
-وبعدين تعال هنا عليش هي تكفخ الصبي على راسه !!لو هاي السالفة غمضت عيونك عنها
-وأخوي وكف بحيل صدر ويصرخ بعلو حسه صوته واصل لبيت المختار /
منوو هذا الصبي تررى محمود
مو صغير ومتعمد يمزق ثوب
مرتي حتى يتفرج عليها وهو
وسخ و عيونه نظراتها أوسخ
-تراه مو صغير لا يغركم وجهه الطفولي لو هسه أهده على فوج نسوان يحبلهن
-متخلوني ساكت مو ٢٤ ساعة كارص بنات باسم ويكمش بيهن
-فاطمة من وره خبال محمد صارت سالفة جديدة باسم تخبل ما رضاله هيجي يمخرط وتلازم وياه وانوب صارت عركة بيناتهم وبوكسات واحد يردم الثاني
-بدال العزه صار عدنه بالبيت عزاوين
-وهو باسم ومحمد خشومهم وحلوكهم تكت دم
-محمد يصيح بحقد وغيض //
لو أني لو عادل وولده بالبيت
-كبرت عقلي لان أعرفه من يتعصب يصير خبل كمت وتوجهت عليه بقصدي أراضي وألملم الموضوع لان السالفة طلعت بعد من ماعونها
-بس وصلت يمه وجان يدفعني من صدري بكل حيله ، و ربج سترني ماوكعت مره ثانية رجعت ليوره يمكن خطوتين ما اعرف ثلاثة
-يصرخ بهذاك الصوت العالي//
لا أنا أخوك ولا أعرفك ومتبري منك ليوم الدين
-تربيتك سكط ومن وره أبنك مرتي تكشفت وامي ماتت
كتله// اللي تريده يجرالك
بس خاطري ورحي هواي ملجومات منك
كالي//ماتظل بالبيت لا أنت ولا ولدك ولا مرتك الحية تلدغ وتضم راسها وتتمسكن للجميع حتى تحصلون الحصة الجبيرة من
الورث عاد هنا تخبلت من جاب طاريج بالباطل رجعت تلازمت
وياه وصارتلج هذيج العركة وفازعونه عمامي
-كتلهم//هاي هيه بس تعدي
السبعة مال أمي أطلع من البيت
-وانت محمد ياخوي يابن أمي وأبوي تذكر كلامي زين اذا أنت تخليت عني ،،
أني ما أتخلى عنك وتبقى أخوي وأبني وصديقي وشوكت ماترد لعقلك تلاكني موجود
-ترخصت من الجميع وصعدت لغرفتنا فاطمة هلكثر بجيت بس أحس بعده صدري مخنوك
-((راسي من الهامه وجعني
أخوي أبن أمي وأبوي الما نفعني
حط أيده بصدري ودفعني ويكولي ما أني أخوك وأنت بلايني)
-وثالث يوم الفاتحة اااخ يا يمه
كفينه الجادر ،، وكعدنه نتحاسب
ربج الفاتحة صارت سد بسد
لا جزرت وصار بيها نقص ينشال على الروس ولا واجبها طلع زايد منه شي
-محمد كال /مادام الكل مجموع أسمعوني يا خوتي ويا عمامي ويا خوالي
-باجر الصبح يجي الدلال أبو سامي
وكلكم تعرفوا خوش زلمه وحكاني
-يجي ويقيم البيت والبستان والكياعين. لو هو يشتري لو يجيب شراي ويدفع نقد. ويتقسم الورث على الجميع
-وأخوتي وخواتي ينطوني حصتي واطلع أشتري بغير مكان ،،
-بعد ما أبقى كاعد ويه عادل ولده
ولا أريد أكون قريب عليهم
أني عندي بنات وأخاف عليهن
ولده فاسدين ومو راحة
الا اكول فاطمة ما عرفت تربيتهم
شترديني من كال هيج غير تكولين دار عليه بانزين وشعلني
-بدون وعي صرخت بيه وكتله//
لا انتم أنطوني حصتي واني اطلع من البيت وحتى ما اظل يمكم اشيل لبغداد أخاف على بنواتك
لا يصير عليهن شي لان هذوله ولدي ما عرفت أربيهم واشتد النقاش مثل كل مرة بدون فايدة
-البنوات كمرة تنازلت بحصتها اليه
ونجمة تنازلت بحصتها لباسم
وشمس تنازلت بحصتها لأحمد
-و محمد تخبل ركبه جن
شبخ رجل هنا ورجل هناك
ويصرخ/ كلكم متفقين عليه
-عاد البنوات كالن/ احنا من ابونا موجود بالحياة هيجي أتفقنا
-وامي الله يرحمها كالت// لا ما نظلم محمد انطوا ربع من مساحة الكياعين الزراعية
-وشمس اذا أجتها قسمة زينة هي بعد بذمة رجلها واذا ماجتها قسمة تبقى كاعدة ويه احمد لان هي وياه توم وروح وحده ومرته خوش أدمية
-صدك يا فاطمة من الغبشة بس طر الفجر ولن محمد جايب أبو سامي الدلال
ودخله شاف البيت ، وأفتربالبستان وراح شاف الكياعين وقيم جميع املاك اهلنا
-عاد باسم ومحمد وأحمد كلهم أشتركوا
وأشتروا حصتي وحصة كمرة( يعني هي حصة وحدة )
وكالوا //امهلنا لحد وره السبعة ندبرلك الفلوس..يبعون ذهب نسوانهم ويجملون الباقي دين او شوف شلون يرهمون وضعهم
-واني من البارحة واليوم حابس روحي بهل غرفة فاطمة هواي مخنوك شكد ماتصورين مخنوك
محمود/أمي سحبت أبوي عليها
وباسته من راسه ،،وباست جف أيده
-وكامت جابت الدخل ،، وصندوگ ذهبها وخلتهن كدام أبوي
فاطمه/عادل أني وياك وين
متروح راسي يتوسد راسك انتي ظلي وفياي ،،وستري وغطاي
واني هم أريد أوصل ولدي وأخليهم يحصلون أحسن شهايد واذا يبقون هنا بالقرية حتى
شهادة متوسطة مايحصلون
-وهذا ذهبي فداك ويرخصلك
والله يرزقك وتجبلي الاحسن من عنده وهذا الدخل صار هواي وأني أجمع بي
-وخوش سويت لا تقهر بروحك ومن كل هاي الهوسة ربك جعل بيها النا صالح
محمود/بعد ماصبرت كمت من مكاني ورحت نطيت وشمرت روحي بحظن أبوي
//يابه أني أحبك ،، ومو قصدي أضوجك ولا قصدي أتجاوز على خالة رجاء بس ضجت لان ضربتني كدام النسوان لو بس وحدنه ما اضوج منها والصدك أنهضمت من مدت أيدها عليها كدام اليسوه والمايسوه
عادل/لا بويه ماضايج منك ولا زعلان عليك والحمد لله والشكر
لله من رديت من المستشفى تمشي على رجليك وأشوف طولك كبال عيوني
-تعال أنت اركان بويه يمي ،،
-أجى أركان يركض وهم كعد بصف أبوي أبوي سحبنا عليه وبقى يبوس بينا
-شوفي اريد أحاجيكم ،،هذا الصار اني متاكد ربي العباد اله حكمه بي،،ومتاكد ضاملي الزين
-واريد منكم توعدوني وعد زلم حوك ممنوع تمدون أيدكم على حرمه لا هسه ولا من تكبرون
-لان عيب الزلمه يتقاوه بعضلاته على حرمة ضعيفة لا حول لها ولا قوة وهاي مو مراجل بالعكس تقلل من شأن رجولته
-واريدكم توعدوني توصلون بالدراسة وتحصلون شهادة زينة
هيجي اريد افتخر و أزامط بيكم
واول ما ازامط اخواني واكلهم هذوله ولدي اللي تكولون عليهم
ما عرفت أربيهم .
-صارت عزيمة يوم السابع وأهل الديرة حضروا على العشه ثواب على روح اجدادي
-وبهذاك الليل عمامي نطوا لأبوي فلوس حصته من الورث
-وعماتي وخالة سهام وخالة هناء
ساعدن أمي وشددن وجمعن غراضناخطية يشتغلن ويبجن
-واني اااخ يا ضيم روحي
رحت على عمي باسم كتله/
اريد أسلم على البنات وابوسهن والله هن خواتي
-وهو خطية حظني وكام يبجي
يكول/ انتم ولدي الماخلفتهم
-ودخلني لغرفتهم اني واركان
وبقينا نبوس بالبنات هن يبجن لان يعرفن راح نشيل لبغداد
-واحنا نبجي من خنكة الفراك
اللي من هسة بدت تخنكنا
فرح/محمود تعال أشاورك
محمود /دنكت عليها وبدت تشاورني
فرح /اني أحبك وانت صديقي
وراح تبقى صديقي
وراح احفظ سر لعبتنه لحد مااكبر
-وهاك هذا الرسم اليوم رسمته
اريدك تبقي عندك وتذكرني بي
محمود/اختنكت طلعت روحي
منا دموع الفراك والوداع
ومنا هاي الحسرة الغريبة اللي صارت بالبيت بعد وفاة جديتي وكسرة فراكها
ومنا ظروف شيلتنا اللي مالها داعي وتشتيت الاخوه حسبي الله ونعم الوكيل على كيد النساء ومنا الخوف من المستقبل مانعرف شضاملنا الوكت
-عمامي باسم و احمد ساعدوا ابوي وحلموا البيكم بغراضنا سفطوهن تسفط عبالك بناء وهن غراضنا مو هواي ،، يعني البيكم كفتهن
-بس طلع علينا الفجر وبعد ما أبوي وامي خلصوا صلاتهم
-نزلنا جوه وعماتي ثلاثتهن موجودات ومجهزات الريوك
-كعدنه تريكنا بس بدون نفس واحدنه يقشمر على روحه
-والنسوان ياكلن ودموعهن توكع ويه اللكمة
-وصارت ساعة الوداع ابوي بوس عماتي وسلم على عمي احمد و باسم وبوس كل الجهال
حتى بنات عمي محمد بوسهن
-وامي هم بوست النسوان
وسلمت على عمامي من بعيد
-واني واركان سلمنا على الكل
بس اني ما أستحيت حظنت فرح وأثنينه نشهك ونبجي
احنا وامي طلعنا وصعدنا بالسيارة وكل أهل البيت يبجون ورانه
-بس عمي محمد وخاله رجاء ماشفناهم
-ابويه وكف باب الحوش وصاح بكل صوته ودموعه تصب على وجهه عبالك يسمع جدران البيت وكاعه بووووووويه ناااااااصر
يماااااا خاااااجيه بروني الذمه ودعولي طاااالع بالغصب
بوووووويه
-((ﻣﺎﺑﻴﻨﻪ ﺍﻧﺘﻔﺎﺭﻙ ﻭﺍﻟﻌﻤﺮ ﻣﺤﺴﻮﺏ
ﺍﺷﻤﺎ ﻳﻔﺘﺮ ﺍﻟﻤﻴﻞ ﺍﺳﻨﻴﻨﻪ ﺍﺗﻌﺪﻱ
-ﺑﻌﺪﻙ ﻭﺍﻟﺸﻤﺎﺗﻪ ﺍﺭﻣﺎﺡ ﻣﺴﻤﻮﻣﺎﺕ
ﺭﻣﺢ ﻭﺣﺸﻲ ﺍﻭﺣﻴﺎﺗﻚ ﻣﺎﺧﻄﻦ ﺟﺒﺪﻱ
-ﺍﺗﺤﺪﻯ ﺍﻟﻴﻜﻮﻝ ﺍﻋﻴﻮﻧﻲ ﺑﻴﻬﻦ ﻣﺎﻱ
ﺩﻣﻊ ﺍﺟﻔﺎﻙ ﺑﺮﻛﺖ ﻧﺎﻛﺘﻪ ﺍﺑﺨﺪﻱ
-ﺑﻄﺮﺍﻥ ﺍﻟﻴﻜﻮﻝ ﺍﺭﺗﺎﺡ ﻛﻮﻥ ﺍﻧﺴﺎﻙ
ﺷﺮﻳﺪ ﺍﻧﺴﻪ ﺍﻭﺷﺒﻜﺘﻚ ﺿﺎﻟﻪ ﺍﺑﺰﻧﺪﻱ
-ﺫﻟﺘﻨﻲ ﺍﻟخوه ﻭﺩﻡ ﺑﺠﻴﺖ ﺍﻟﻨﻮﺏ
ﻛﺮﻫﺖ ﺍﻟﺪﻧﻴﻪ ﻛﻠﻬا ﺷﻠﻮﻥ ﺫﻟﺘﻨﻲ
-ﺑﺠﺘﻨﻲ ﺍﻋﻠﻪ خوتنه ﺳﻬﺮﺗﻨﻲ ﺍﻟﻠﻴﻞ
ﻭﻋﻴﻨﻚ ﻫﺎﻱ ﺍﻧﺖ ﺑﻐﻴﺾ ﺑﺠﺘﻨﻲ
-ﺍﺑﺪ ﻣﺎ ﺍﻧﺴﻪ ﺟﺮﺣﻚ ﻭﺍﻧﻪ ﺍﻟﻚ ﻣﻤﻨﻮﻥ
ﻭﺍﻃﺒﺎﻋﻚ ﺗﺠﺎﺭﺏ ﻛﻮﻣﻪ ﻋﻠﻤﺘﻨﻲ
-ﺑﺲ ﺍﺻﺒﺮ ﻋﻠيه ﻻﺯﻡ ﻳﺠﻴﻠﻚ ﻳﻮﻡ
ﻭﺗﻀﻞ ﺗﺼﺮﺥ ﻳﻨﺎﺱ ﺍﻟﻨﺎﺭ ﺟﻮﺗﻨﻲ))
ودعنا بيت الاجداد وهذيج الديرة
و توجهنا لبغداد
-ومن هذاك اليوم من سنه ٩٦ بعد لا شفت فرح
ولا دخلت للمحموديه
-الى ان صارت الفاجعة ................
ابوي كال//نروح لبيت جدة صفية نبقى يمها
كم يوم بين مندبر امورنا
-وامي الطريق كله تبجي
وابوي يباوع عليها ويستغفر ربه
ويرجع يباوع للطريق
-وصلنا لبيت جديتي صفية خطية رحبت بينا وطارت بشوفتنا
وجدي سليم زوجها وابو خالاتي هم ما قصر الرجال
-بعد ماتريكنا وكعدنا نسولف وبدا ابوي يسولف السالفة الصارت لجدي سليم
بس مو كلشي وما كال تعاركت ويه أخوي بس وضح أنهم قسموا الورث
ونريد نشتري بيت هنا بغداد
-جدي كال لأبوي //لا تشيل هم عندي هواي
اصدقاء و معارف ان شاء الله بهاي الأيام
ادبرلك بيت مرتب وعلى كد فلوسك
الحمد لله بفضل الله ومساعدة جدي سليم حصلنا بيت بمنطقة الاسكان
خوش منطقة و موقعها حلو بنص بغداد
-ابوي خلال هاي الايام ركض بمعاملة
نقلنا من المدارس اني واركان
ولان بداية سنة الامور شويه اسهل
-اخذنا أبوي العصر نشوف البيت
الحمد لله مرتب ومساحته حلوة
-ثاني يوم شلنا غراضنا اللي بعدهن على شدتهن من بيت جديتي صفية
وأنتقلنا لبيتنا الجديد
-هو صح البيت يرادله شوية تعديلات
بس العافية درجات شويه شويه نعدل بي
-بدينا نرتب غراضنا
وامي وخالاتي ما قصرن عدلن كلشي
-للعصر طلعن للسوك وتسوكن شغلات كومة نقص عند امي
-وجديتي صفية شكد شالت غراض مال مطبخ وبعد هواي شغلات البيت
وأنطت لامي
-تكول//هاي كلها خيرات اسواق العدل
-جدي سليم شار على ابوي وكاله //اترك سالفة الزراعة والمخضر والعلوةواني اساعدك وعلى جم فلس الضلن جوة ايدك وأفتحلك سكلة مواد بناء
-عاد امي راحت وباعت ذهبها
وكسرت الدخل ماشاء الله طلع بي خير من الله وحطت كل الفلوس كدام ابوي
-الحمد لله جدي وابوي تشاركوا
وبدوا بمشروع سكلة مواد البناء
واكيد بمساعدة اصدقاء جدي ما قصروا بشي
-الحمد لله مشت ايامنا حلوة
وحالتنا المادية متوسطة
الرزق موجود من شغل السكلة
وامي معدلة ومدبرة تعرف ترتب امورها
-جانت بس شغلة وحده تضوجني
وهواي تغثني بالمدرسة
الطلاب يصحولي العربي
لو عرب جول لو يصيحون محافظات
-ارجع للبيت وابقى اسولف ويه امي
واشكيلها شكد اضوج من هاي الكلمة
ولاحظت اركان هم ضايج من هذا التهجم
-امي هواي ايجابية وتحول الامور لشي حافز وزين وتكول/ وشبيهم العرب شو هم اهل الغيرة والنخوة والحمية ،، واحدهم اخو خيته بس تنخاه يمد روحه للموت وما يهاب ،،
وبعد اصحاب كرم وجود
-اذا تحسون هاي الكلمة تغثكم طورا من نفسكم وشوفوا شنو الزين والحلو بشباب بغداد أكتسبوه
-ولا تنسون انتم أشطر منهم لان معتمدين على نفسكم بالدراسة
واجسامكم اصح منهم لان ولد عرب ونظامكم الغذائي صحي ومتاكلون من بره
ونظام حياتكم احسن منهم لان تنامون من وكت وتصحون من وكت
-وهيج بكلام امي وتشجيعها أستمرت حياتنا
وهاي اني بعد ما مشت بينا السنوات
الحمد لله بالمدرسة من المتفوقين
ودخلت للفرع العلمي ومسيطر على كل المواد وحاليا بصف سادس علمي بكالوريا وشادلي حزامين
واركان ثالث متوسط هم بكالوريا
-وامي وابوي يلوبون ويانه
تكول همه اللي راح يمتحنون مو احنا
-بفضل الله وفضلهم احنا وصلنا لهنا
كلشي موفرين النا وهواي مرتاحين بجالهم
-واهم شي أبوي ترك ألبيكم بالسكلة يستخدمها بالشغل وبيها رزق خير من الله
واشترالنا سيارة برازيلي نظيفة وزينة
بس اني بكل هاي السنوات
وكل ما أتعده مرحلة دراسية أعرف وأفتهم من خلال الدراسة ،، ومن ألأسمعه من الشباب الوياية بالمدرسة ،، واصدقائي بالمنطقة
شنو العلاقه الخاصة اللي تكون بين الشاب والبنية
-اااااخ ياضيم روحي من أتذكر هذاك اليوم من جرمت بحال فرح
-قررت بس أخلص امتحانات السادس أفاتح ابوي بموضوع الزواج ويخطبها اليه
-لان اذا تزوجت رجل غيري راح يكتشفها هي مو بنية ويذبحها
-ابوي الله يسلمه هم راسه يابس
من هذاك اليوم الطلعنه بي من الديرة بعد ما وصل لهناك كطع رجله فد كطعة
-بس نعرف اخبار عمامي من خلال خالي عمر يمكن ٣ مرات أجه زار جديتي صفية
-بدت الامتحانات وألله يساعد الطلاب على القلق والخوف من الامتحان
-وشنو الاسئله؟
ونكدر نجاوب او لا ؟؟
والمراقبين زينن لو يخرعون حتى الميت بتشددهم؟؟
بس هذا الجانب يخاذ كل الحيل
ويومية الصبح بالامتحانات امي تركض ورانه وبيدها كلاص الحليب واللفة و لازم تقرالنا ايه الكرسي والمعوذات وتنفخ بوجهنا وتسمي علينا يلا ونطلع للامتحان
-الحمد لله من خلصت الامتحانات بخير وسلامة وكاعدين ننتظر النتائج
-والله الانتظار يشل الحال
-اركان استلم النتيجة قبلي الحمد لله ناجح وبمعدل محترم وتحول للاعدادية
-اجه يوم أستلام نتيجتي
وكلبي يدك طبول احسه يريد يطلع من بين ضلوعي شنو سحلته ورايه بخيط مال كونية جنفاص ينهزم من عندي وارجع أجلب بي
-أستلمت نتيجة ياااااااااااالله
الف الحمد لله والشكر لله
فرحتي كلش جبيرة
-رجعت للبيت ركض
جني واحد خبل وباكو خبزته
وهو ميت جوع وادروش على الناس
-يييييمه ياااااابه ناااااااجح
-يييييمه معدلي عالي تعاي شوفي شهادتي
فاطمه/كللللللللووووووووش
عادل/الف الصلاة والسلام على رسول الله
-تعال يبعد أبوك وكل هله وناسه
بوست أبوي وامي وحتى اركان بوسته
-شنو فرحتي بهذاك اليوم
ماانطيها لواحد
-بس الطالب الي يستلم نتيجه بيده وناجح بعد تعب وجهد وقلق وخوف يحس بالي جاي احسه بي هسه
-الحمد لله قدمت أنسيابية
وطلع قبولي وبختياري طب أسنان
اني رتبت الانسيايبة وردت طب الأسنان
-الصراحة ما اتحمل منظر العمليات الجراحية
والدماية والعظام ولعبان النفس
-طب الاسنان شي راقي ومحترم
أبوي أشترالي هدية النجاح
وفرحة كلية الطب سيارة مرسيدس دب نظيفة ومرتبة لونها رصاصي
اروح وارجع بيها للجامعة
واركان بلش دوام بالرابع عام
-والحمد لله بلشت بمرحلة جديدة
وتعرفت على اصدقاء وزميلات جدد
من خلال الدوام الجامعي ......
شكرا لزيارتكم عالم روايات سكيرهوم
