رواية ليتنا نلتقي الفصل السابع بقلم جمانه السعيدي
دخل علي الغرفته واني صعدت بدلت لبست ثوب طويل وردن وادردم اكول اكيد هسه يكول شني هاي خبله
نزلت لاكاني علي طالع من غرفته
.....هاج هذا تليفونج
وكلشي تمام
وهذا رام جديد جبتلج ذاك البي صور ضمي وهذا خلي
بفونج
وبعد لاتقبلين صداقة اي احد متعرفي
ابتسمت وشكرته الود ودي احضنه لان خلصني من هاي المشكله بس عيب
رجعت كملت شغل المطبخ ورجعت الغراض
شويه وخابرت ماما
....هلو زينب حبيبتي شلونج
...هلو ماما الحمد لله على السلامه وزياره مقبوله ها نجي اني وبابا ناخذج
جمانه السعيدي
...لا اوكفي شويه صايره سوده من الشمس خل ارتاح واريد اروح للصالون اغير لون شعري واكص كصه جديده
واجيب ملابسي من الخياطه واخابرج تجوني
...هله هله اي ماما وبعد تردين تخبلين بابا
...اريد ارجعله غير شكل
...هم تشوفين مرت ابوج الجديده
....لا وين شايفتها هي ابيتها واني يم باجي امل
ولله لوتعرف اني عايشه وياها وانضف واطبخ اله تذبحني
خليه سكته احسن
....هااا خوش اكلج جبتلج شغلات كلش حلوه
....شكرا يا احلى ماما ولله اني عندي احلى هديه رجعتج اليه
فرحت كلش لان ماما راح ترجع
وقررت قبل لاتجي بيوم اروح انضف بيتنا وارتبه
ثاني يوم رجعت من الدوام
ونتضرنا بابا اجا وتغدينا كلنا سوا حتى علي ويانا
صحيح هو كام يطلع ويخالطنا ويكعد ويانه
بس كلامه قليل وتحسينا حيل ضايج
صححيح هو مرت علي اشياء صعب كلش
وصدمتين بوقت واحد
وفات ابو وزواج حبيبته
طلع العصر يشتري ملابس لان راح يشتغل ويا بابا وهو ملابسه باقيه ابيتهم
ماتقبل فاطمه يروح يجيب ملابسه من بيتهم خاف يضوج وهي تريد حالته تتحسن
جمانه السعيدي
اني طلعت اغسل الطرمه لكيت الماي مكطوع
اخذت سطل ترسته من الحمام البره حتى اغسل الطرمه ترست السطل وشمرته واذا بيه اشمره على علي
هو دخل واجا الماي من فوك ليجوه وهو واكف ولازم علاليك الملابس الجديده الي طلع اشتراهن
واني بقيت واكفه وفاتحه عيوني والسطل بيدي ما اعرف شسوي من الفشله
هو مسح وجها من الماي وباوعلى
.....اسفه ولله اسفه ماشفتك
.هو دنك وكام يضحك
اني شفته يضحك طكيته ضحكه
صارله شكد عدنا ابد ماشايفته يضحك
بس ضحكته شي مامعقول مثل السحر
اني كتله واني اضحك
اسفه انطيني ملابسك اغسلهن
....رد عليه بضحك ملابسي الي لابسهن لو الجدد الما لابسهن
رجعت كتله اسفه ابد ماشفتك..
....عليمن تتاسفين ماصار شي
كعدنا على العشه واني كلما ارفع راسي اذكر الموقف وابتسم
ثاني يوم العصر اندكت الباب هو موجود
اني كلت منو صاح السيد موجود
اني رجعت صحت علي
....علي رجال بلباب اي هسه اجيت طلع
......السلام عليكم السيد موجود
....عليكم السلام لاطلع للمحل
.....منو موجود هنا
....منو حضرتك
....حضرتي اخو ابو حسين
..اهلا وسهلا تفضل
....لاماكو داعي منو موجود هنا
....بس بنته وزوجته ام حمودي
....وانت منو بعد عمك
اني علي بعدا مامكمل
ها عرفت عرفت من رخصتك
دخل علي واني سئلته منو هذا
....هذا عمج اسمه ابو حسين شعجب ماتعرفينا
...هو وين بلسنه حسنه يجينا مره
وراح ابو حسين للمحل وتعارك ويه ابو زينب
جمانه السعيدي
شنو هذا الزلمه الغريب ابيتك
احنا فاتحينها مكوده
زينب ويا بلبيت هم تستحي هم تخجل
هاي زينب تحضره ازفه لحسين اذا انت ترضا بهاي السوالف احنا مانرضا بيها
حاول ابو زينب يفهمه انو ضرف طارء
الولد صارله حادث ومحد اله غير امه
بس ماانطا مجال ابد
اخذه بلحجي والتهديد
ضاج ابو زينب حيل من موقف اخو
كلساع يكول هو شنو مايعرف اخلاق زينب ليش هيج يكول
بعدين هذا موقف انساني الولد ماله احد وين يروح
ضلت القهر بكلبه
وصل للبيت كلش ضايج ومبين علي القهر بس ماكدر يحجي اي شي
اكل شويه وكاللهم تعبان اريد انام
اتمدد وكام يحجي ويه نفسه
شنو يريد زينب هي زينب تعيش عدهم وياكل بروحه
نام ضايج حيل
ابد ماعجبه تصرف اخو ويااا
لمن كعد الصلات الصبح وكع من طوله وكامت ام حمودي اتصرخ
زينب فزيت على عياط ام حمودي
ونزلت اركض
انريد انحركه مايكدر يتحرك ولايحجي
اجر علي سياره واخذه هو وفاطمه
واني بقيت بلبيت ويه حمودي
جمانه السعيدي
خفت كلش علي بس اقرا ايات ودموعي ماتوكف ابد ما ادري ليش خايفه هاي اول مره اشوف بابا هيج
خفت لايروح مني
ما اكدر اسكت على فد بجيه وللعصر محد اجاني بس اني كلساع اتصل
ووو باجي امل لحكتهم
واني خابرت ماما ومناك لحكتهم للمستشفى
اعيوني ورمت من البجي ولا اكل ولا شرب
كلهم يما بس اني جنت حيل خايفه لا افقده
ابد ما اتخيل حياتي بدون وجود بابا
للعصر رجعت فاطمه
موصله للباب علي وراجع بدون مايدخل
كمت اصيح وابجي ليش ما دخل حتى ياخذني ويا
اريد اشوف بابا واطمن علي
زينب فدوووه فاطمه بابا شلونه ليش وكع
فاطمه جلطه ضربته جلطه
لازم تمر ٧٢ ساعه يله يعبر مرحلة الخطر
خابر على حضرو ملابس وشوربه خفيفه
واني راح اجي اخذهن
شويه واجا علي ركضت على ولزمته من ادي
....فدوه علي ابوي زين طمني الله يخليك
...ولله بعد لمن تعدي ٧٢ ساعه يله نعرف بس هسه وضعه مستقر
....فدوه علي ابوس ايدك اخذني اشوفه
...يله بدلي بس اشويه وارجعج انتي وامج وام ليلى
اني ابات يمه اليله
وفعلا بدلت بسرعه
ولبست عبايتي والبوشيه واجرنا تكسي وطلعنا
بس مشت السياره حسيت نفسي تعبانه وراسي يوجعني
