رواية اغفري لي الفصل السابع بقلم أوتار حزينة
أكان،،، الفراق سهلا لديك؟
أم أنك كنت تنتظر لحظة الانسحاب
گ جبان لا يملك شجاعة البقاء؟
كل كلماتك عن الحب تبخرت، كأنها لم تكن سوى أكاذيب مغلفة بالعسل
وأنا الغافله صدقت كل كذبه
قلتها لي
كنت أراك ملاذي،،،، ولم
أدر أنك العاصفة التي ستقتلع
جذوري من أمانها
،،،،،،،،،
غادة
گلبي هبط من السمعته وكام يدك
بسرعه مشيت للدرج بصعوبه نزلت كم بايه
اسمعه يصيح
«،،،،انتوو شلون رضيتو بهل شي وانتو تعرفون هو شسوه بيها
«،،،اااي ومن وره منو صار هالشي غير من وراك
انت يالفاهم يالدارس يلي رحت
اخذت بنتهم ومافكرت
بخواتك شراح
يصير بيهن
«،،،وولكم ااني ماااسويت شي الها ردت
بس احجي وياها وحميت عرضهم
من رادو يعتدون عليها
«،،،،وشلون صار هالشي مو انت رحت اخذتها من
بيتهم وراحت وياك هاااي شيسموها ااحجي
جاااوب ماهددت تاخذها غصب ماعليهم
وبيتهم
«،،،عمي صاح بي وكمل
«،،ولك ااسكت تره الموت كاعد يفتر عليك
وباي لحظه نتوقع يجون ويذبحوك
لان فضحتهم بين اهلهم
«،،،ااختي ماانطيها وشيريدون يسون خلي
يسون اموت طبني الف طوب
الموت اهون عندي ولا
اشوفها تروح لهذا
الي راد يعتدي
عليها
عمي اللخ صاح بي
«،،ااي ومافكرت بابوك بامك اذا متت شراح
يصير بيهم ولك شوفه شلون
صاير يريد يمشي مايكدر
كل ساع يكول ابني
راح يروح مني
معاذ سكت عمي الجبير گله
«،،،ااسمع ولك احنا ناس فقره كلشي مانكدر
نسوي الك اذا اجوي ورادو يقتلوك
ولا عدنا واحد جبير ونشد
ظهرنا بي ماعدنا غير
بس الله ،،،،،وهذا ابنهم دگ رجل بالكعده
وكالو هاي بهاي ناخد وننطي
واثنينهن يلبسن ثوب
الستر
ماما جاوبته تبجي
«،،خلي واحد من ولدكم ياخذها ليش
تروح اله وانتو تعرفون شسوه
بيها
الكل سكت كملت بتوسل
«،،والله بنتي مابيها شي مثل الورد مو جنتو
هناك بالمستشفى وسمعتو الدكتوره
كالت بعدها بنيه
«،،،مانكدر ام معاذ الولد هو بنفسه رادها
كال انطوني بنتكم واخذو بنتنا
غير هيج ماراح اجوز
منكم ولا اعوف
السواه ابنكم بينا
«،،،،هذااا يريد يكسر خشمي
معاذ صاح وكمل
«،،،يريد ينتقم مني ااني باختي
مريم شافتني اجت عليه بسرعه سالتها بنفس
مگطوع
«،،،شجاي اسمع اني
«،،،امشي لغرفتج
سحبت ايدي منها ورحت الهم جسمي
يرجف واحس باي لحظه
راح اوكع طبيت
كلت
«،،انتو شلون تريدون تنطوني لهذا الي تعرفو
شسوه بيه
«،،،ومن ورة منو اجه واخذج غير من ورة
اخوج وعملته السوده
عمي جاوبني صحت بي
«،،،وااااني شنو ذنبي بهل الشي ليش اادفع
الثمن من وراه
الكل سكت كملت بهستريا
«،،،انتو تعرفون هالحيوان شسوه بيه
معاذ انهار وكعد لازم راسه خواتي سحبني
هن وماما جريت روحي منهن
وكملت بخبال
«،،،رااد يعتدي عليه ااني شرفكم عرضكم
شبيكم ماكو بيكم واحد براسه
غيره ويروح يخلي طلقه
براسه
«،،،كااافي رووحي مناااا
بابا صاح بيه وكمل
«،،،اااخذوهااا منااا
صرخت من سحبوني
«،،،،باابا اانت شبيك بس معاذ ابنك مافكرت
بيه اني وشصار بيه لييش تريد
تشتري اله وتبعيني اليه
كام واجه يدفع بيه يردد
«،،،روحي منا ولج ولي من وجهي
دفعت ايده وصحت
بي
«،،،،طز بيه موووو طز بينا كلنا مادام ابنك
مابي شي وراح ياخذ الي
يريدها
شال ايده وضربني راجدي معاذ صاح
«،،،لااا يابه
عيوني جمدت علي انهار وراد
يوكع ليوره اخويه لزمه هو وعمامي كعدو
صاير فد مره خواتي اخذني للصاله فقدت وكمت
املخ بوجهي خواتي لزمني
«،،ولج كافي راح تموتين
«،،،خلوني اموووت
صرخت من گل گلبي وكملت
«،،،ولكم الموت ارحم من الجاي اسمعه من منهم
الف مرة انهاريت ووصلت مرحله فكرت انتحر
بيها بس ماكدرت لان خفت من
عذاب ربي
معاذ رفض هالشي رغم جان يريد زهره وكتل
نفسه عليها بس ماقبل ياخذها
وينطيني االه،،،، الموت كمنا
نشوفه يفتر علي كلنا باي لحظه يجون
ويقتلوا
يوم ورة يوم اذبل وصحتي صارت باالنازل
عبالي معتصم راح يتندم ويجي يعتذر
مني ونرجع سوه
جنت اطلع اله اعذار واكول من الصدمه تسرع
وطلكني بس كلما تمر الايام عليه
تثبت اليه هو ماله عذر
والسواه عن قناعه
وره ايام اجت مريم طبت عليه اجتي كعدت يمي
الحزن تارس ملامحها سالت
وعندي امل هو غير
رأيه
«،،،مريم معتصم ماا
«،،،لااااا غاده وانسي طلع واحد گلب وحقير
دمعتي نزلت كملت
«،،اني ماردت احجي هالكلام بس لازم تسمعي
حتى اطلعي من گلبج
دمعتها نزلت كملت
«،،،توسلت بي كتله لاطلكها هي مابيها شي
بس هو گلي كلام عمري ماراح
انساه ولا راح اسامحه
عليه ولا على خذلانه
الج
جاوبت اشهك
«،،،شنو كال احجي
«،،،اخ ولج
جاوبتني بقهر وكملت
«،،،ولج گلي اني شمدريني شصار بيها هناك
ومنو يكول هي بعدها بنيه ومن رزلته
صاح بيه مو اني الي اشيل
فضلات غيري
عبالك هو بأيده ضربني بسجينه بگلبي
انفجرت شهكتي بصوت قوي والوجع
ترس گلبي والم
احتل روحي
ضربت گلبي بأيدي أكثر من مرة اريد اموت
اصحى من هالكابوس الاسود مو مصدگه
هو هيج حجه
لزمتني واخذتني لحظنها صراخات صارت
جوة روحي تردد مستحيل الكاعد يصير بيه
وين الحب الجان يحجي،بي
كل كلمة حلوة،،،،،كل وعد، كل لحظة جمعتنا
سوه طلعت جذب جنت احبه
وهو يمثل عليه
جنت اريده روح وهي يريدني جسد
والفرق جبير
السمعته دمرني وخلاني اكره الدنيا كلشي
طلع من عيني وصرت انسانه محطمه
فاقده للشعور تشوف وتسمع
بس ماتحجي
اخويه نفس حالتي وزاد همه من حملته
ذنبي جان يجي يمي
يعتذر مني ويحاول يطلعني من الجو
الي حبست روحي بي او فرضته
على نفسي
جنت اصفن علي صافي النص وعيونه طابت
لجوه من ورة قهري يحجي وياي
ساكته مااجاوبه
ورة كم يوم طلعت من الحمام الفوك
فتت من يم غرفته سمعته يحجي
««««انتي بس فكرتي بروحج
صاح وكمل
«،،،تماااام،،، بروحنا بس مافكرتي باختي الي تطلكت وانهجم بيتها من ورانا اعرف الصوج
مني وندمان ندم راح يظل
وياي طول عمري
صار هدؤ بعدين كال بصوت مخنوك
«،،،مو على حساب غاده اخذج اعرف راح اخسرج
وهالشي راح يكسر ظهرتين مرتين خلي يقتلوني الموت كمت اشوفه ارحم من الكاعد
اشوفه يصير بيها كل يوم
ثاني،، يوم اجت اختي صبا عليه لغرفه
وكالت بوجهه مخطوف
«،،،،غاده زهره اجت علينا
گلبي هبط كمت ردت اوكع لزمتني طلعت
وياها اسمع صياح بابا
«،،،انتي شتريدين يقتلون ابني من وراج
نزلت لازمه اختي وجسمي كله يرجف
اسمع معاذ يگله
«،،يابه على كيفك وياها
ماما انهدت بي
«،،،ولك راح يقتلوك من وراها اااني شاحصل
اذا صار هالشي
وكفت بالصاله اسمع الحجي خواتي يمي
سالن بخوف وهن يبجن
«،،راح يقتلون معاذ
«،،،خابر عمها مهدي ولك وين التليفون
طلع للصاله اخذه من الشحن معاذ اجه
من وراه واخذه منه يصيح
«،،ياابه عوفه
صاح بي
«،،،جيبه ولك ااانت تريد تموت وماتعرف شلون
معاذ ماانطاه ماما صاحت بزهره
«،،،ولج اامشي ارجعي لبيتكم شتريدين يجون
ويقتلون ابني كدامي ماكفاج الصار
بنتي
«،،،خاله مااكدر ارجع يوميا يهددون بيه
يريدون يقتلوني
معاذ صاح
«،،ماترجع وخلي شيريد يصير يصير
الباب اندك بقوه كلنا فزينا ماما عاطت
وكامت تملخ بوجهها تردد
«،،،اجوي وراح يقتلون ابني
معاذ راد يطلع بابا دفعه وگله
«،،اخذها وطبو لجوه
الباب اندك مرة اللخ بابا طلع ماما اخذتها
لغرفتها ظليت بالصاله سمعت
وره مشوار
«،،تفضل حجي
صبا اجت وراها دعاء وميار وكفن يمي ماما
وياهن سمعت نفس صوت الحجي الي رجعني
لاهلي
«،،البنيه يمك ابو معاذ
«،،اي بس والله مارضيت على جيتها
«،،،،اعرف وياريت تصيحها حتى نرجع لان
محد يعرف بيها هي يمكم وخاف
يوصل خبرها لولد عمها
وانت تعرفهم طايشين
ودمهم حامي
«،،ابو حسين شلون بهاي السالفه ماتفض
عاد على خير
«،،،كتلك ابو معاذ ننطي وناخذ ونسد الحلوك
بابا سكت كمل
«،،،غير هالحل ماكو حتى لايطيح الدم
بينا
معاذ طب وكال
«،،،عم انطوني زهره بدون ماانطي اختي
«،،،اااسمع
صاح بي وكمل بعصبيه
«،،،انت غلطت بحگنا من خذيت بنتنا من ورانا
وغلطت بحگ اختك من مافكرت بيها
هي وخواتك شراح يصير
بيهن من ورة هالسالفه
«،،اني مااجنت اريد اخطفها
جاوبه رده
«،،،ومنو يكول هالكلام
معاذ سكت هو كمل
«،،اخر الكلام الكم وحتى نفض هالسالفه على
خير ننطي وناخذ غير هالشي
ماعدنا وهسه جيبو البنت
لاتصير عليكم سالفه اللخ
ماراح تكدرون
تطلعون منها
ماما طبت علي وكالت
«،،بنتكم هي اجت علينا
جاوبها
«،،اعرف وحسابها يمي وهسه روحي جيبيها خلينا
نولي لايعرف حمزة وولدنا وذيج الساع
لا اني ولا انتو راح نكدر نوكف
بوجههم
ماما اجت وصاحت بيها
«،،،كوومي روحي لعمج
كامت تبجي وخايفه من طبت للاستقبال
عمها صاح بيها
«،،،امشي سود الله وجهج اكثر ماهو اسود
طلع هي وراه بذيج الليله محد نام كلنا
راح يهجمون علينا ويقتلون اخويه
بس محد اجه وره ايام
هم كعدو ونفس الشي سمعت ننطي
حتى انستر اني وياها ومايوكع احد من الطرفين
حمزة
ماجنت اريدن اخذ هالبنت لان جنت كارهها
من وره سالفه اخوها الرديه بس
ردت اكسر خشومهم بيها مثل ماكسرو
خشومنا ردت انتقم منه باخته واشوفه شلون
العرض غالي
عرفته راح يتخبل من الطلب الي ردته ويرفض
بس كلت راح يوافق او اهله يخلوه
يوافق حتى يسلم من الموت
وهم،،،،جنت اريدن
زهره تولي من جدامي خفت من روحي لا اذبحها
لان اكثر من مرة ردت اسويها ويگضوني
منها خوفا من الفضيحه
دگيت رجل يم الشيوخ وكلت
«،،،لو هيج لو نذبحه
واجت الموافقه منهم بس ابوها طلب نجيب مشايه جبيرة وتطلع بزفه جبيرة وماتبطل من وظيفتها قبلت وكلت تجي يمي
وابطلها من الوظيفه
نفس الشي طلبت من عدهم يجون بمشايه
جبيره ويعقدون على زهره وقبلها
انه اعقد على بنتهم
غاده
بابا قبل بحكم الشيوخ واشترى اخويه
وباعني لهذا الي دمرني
وحطم حياتي
ماظلت دمعه بعيوني ولا فاد توسل بي
هو وعمامي رادو يسدون حلوگ الناس شلون
مجان ماما يمي هي وخواتي
تردد
«،،،،،شلون ياربي انطي بنته اله وشراح يصير
بيها يمهم
«،،شفتي ماما شسوه بينا معاذ وهاي راح ياخذ
الي رادها ومحد دفع الثمن غير
غاده
هيفاء حجت تبجي كملت
«،،،شنو ذنبها هي تروح لهذا الحيوان وشراح
يسوي بيها بعد الصار منه
شفت السواه بيه مر مو بس بعقلي لا بجسمي
وروحي مثل منشار يذبح بيه بقوة
وكلما يمر بيه يخلي بيه ندبه
اعمق من الثانيه
غطيت وجهي بايدي وانهاريت بالبجي ماجان
عدهن غير الدموع شيريدن يحجن
واني رايحه لواحد كشف
ستري وفضحني
بالمنطقه
واعرفه طلب هالشي حتى يكسر خشم
اهلي وخصوصا معاذ عرفته يريد ينتقم من عدنا
واني جنت الضحيه
صار الاتفاق هم يجون يعقدون عليه يله
معاذ يعقد اجه هاليوم وجان
يوم اسود اليه ماجان
يوم عقد لا فقد
لكلشي بيه
اردد بوجع
«،،،هسه اذا قتلت روحي الله هم راح يحاسبني
ليلى حست بيه لزمت ايدي باوعت
عليها كلت بدموع
«،،،اريد اموت
هي مانشفت دموعها عليه ومن سمعت هالكلام
انهارت وحظتني رددت
«،،،ليلى اريد اموت حتى مااشوفه
«،،،لااا
ردت وخرت مني وكملت
«،،،الله يزعل عليج
«،،،الوجع جبير وگلبي بعد مايتحمله
مسحت دموعي بايدها وردت
«،،صيري قويه باوعي عليه
دارت وجهي عليها صفنت عليها بعيون
جامده كملت
«،،غاده صيري قويه وانتي اخذي حقج منه
جاوبت
«،،،شلون علميني اني تايهه وخايفه شفته شسوه
بيه بذاك اليوم وراح يسويها مرة ثانيه
«،،،،لاتخلي غاده ارفضي سمعي كلام يوجع هو
الي اذاج وحطم الج حياتج انتي مسويتي
شي
«،،،اخويه سوه
«،،،انتي كلتيها اخوج مو انتي
«،،،ماكو فرق
«،،،لا اكو احجي ويا كولي اله اني شنو ذنبي
ادفع ثمن غلطته هو وزهره
جاوبت بشهكه
«،،،ليلى هذا مو بشر ويفهم الكلام هذا حيوان
انتي ماشفتي شلون تعامل وياي
ضربني واذاني وراد يغتصبني
«،،،اعرف بس انتي قويه اقوه مني مو جنتي ادكولين اني محد يكسرني ولا اخاف من اي احد
سمعي كلام يوجع خلي يندم
سوه بيج هيج
سكتت لان ماجان عندي كلام احجي جنت
متأكد هو ماراح يعوفني بهل المره
راح ينتقم مني بذنب اخويه
واجه هاليوم اجوي بمشايه جبيرة ترست
الفرع مالتنا وطلعت سيارتهم للشارع الرئيسي
لا نزلت ولا لبست ابيض ولا شفت
اي وحده من نسوانهم
ليلى يمي ماعافتني ولا لحظه سمعت الهلاهل
صارت باذني مثل صراخ موت
كلت
«،،اني وياج مامكتوب النا ناخذ الي نحبهم
ماردت العيون مغوركه والملامح
حزينة كملت
«،،،شفتي حظي مثل حظج هم قصتي انتهت
قبل لاتبدي
ليلى
رجعت من يم غاده بوقت متاخر وياي ماما
مقهورة وصايره فد مرة من وراها طبينا
كالت بقهر
«،،ياربي الك بيها اراده ولا شلون هاي الملاك
تروح لهيج واحد
سالتها
«،،شفتي ماما
«،،،اي استغفر الله ياربي مااريد اعترض على
خلقه ربي بس الولد نص وجهه
بي وحمه سوده ويخوف
والسواه بيها ماخلاني
اشوفه بوجه طيب
«،،بابا اجه ورانا هم نفس حالتنا يردد
«،،،شنو ذنب هالبنيه حتى تروح بذنب السواه
اخوها والله هالشي ماايرضي
حتى الظالم
كعد وكمل
«،،،الله يكون بعونها مااعرف شلون راح تكدر
تعيش وي هذا ووي اهله
ماما ردت
«،،،اسكت فاروق سوسن مابطلت بجي وشكد
دعت علي هو ومعتصم
«،،،الله يكون بعونها السواه مو شويه
عاف غاده بشدتها وطلگها
قائد اجه بين عيوني شهكتي طلعت
كال
«،،،اسكتي بابا كافي تقهرين بروحج
كمت وكلت
«،،،اروح لغرفتي
صعدت القهر تارس گلبي
طبيت ورحت كعدت الصار بيها ذكرني
بروحي شلون هم انغدرت منه
وعافني تذكرت شلون
صارت قصه حبنا
جنت اعرف وسامعه من ماما اهله يريدون
اله سرى ومن الصغر مخطوبين
بس هو جان يريد يهاجر
وهالشي سمعته منه
اكثر من مرة
بس رغم السمعته حبيته لان حبه تسلل
لگلبي بدون ماادري وجنت من اكعد ويا حتى
يدرسني اصفن علي وادرس كل
تفاصيله
والغيره تسللت لگلبي من كمت اشوف تجي
رسايل يفتحهن ويبتسم مره
سالته
«،،،هاي منو
باوع عليه ورفع حواجبه سال
«،،،ليش تسألين
«،،،لا هيج شفتك تضحك
«،،،بطلي فضول وخليج بالدرس
سكتت رجع يشرح جهازه كل ساع يدك
باشعار كلت بعصبيه
«،،،،شوف هاااي اللزكه
صفن عليه ضحك وجاوب
«،،،،قصدج هذا اللزكه
سكتت كمل
«،،،مادام بالج يم جهازي خلي اشوفج
الكاعد يدزه اليه حسين صاحبي
فتح جهازه وقربه مني مديت راسي
من كل عقلي وباوعت للدازه
جانت مقاطع تضحك
لميت شفتي بفشله رفعت راسي
عيوني صارت بعيونه الوجه
يضحك بس بعدين
تغيرت الملامح والنظرات
سحبت روحي بسرعه ولهيت روحي بالدفتر
كال
«،،،ارتاحيتي هسه
جاوبته بجذب
«،،،تره اني حجيت لان ضجت من صوت الاشعارات
الي شوشت عليه
«،،،حقج هو هم لزك يله نرجع لموضوعنا وين
جنا هااا يم هاي المعادله
رجع يشرح بس جان مبتسم بس بيوم
فضحت روحي كدامه وعرفت
الشعور الي جنت ضامته
بگلبي جان هو هم
ضامه بگلبه
عم كاظم رجل خاله غزوة عزمنا كلنا بگاعه
عنده بيت هناك وجان زارع بيها
اشكال والوان الزرع
تغدينا يمهم ،،،والعصر قبل الغروب طلعنا
وكفت وي بابا نباوع للمنظر الحلو
عم كاظم صاحه كلت
«،،،بابا راح اتمشى بالزرع
«،،،اي بنتي بس ديربالج على روحج
هزيت راسي شفت بنات خاله غزوه
وبنات خالي يمشن مسافه عني
بس ماحبيت اروح يمهن لان اعرفهن مايحبني
مهند طلع شافني اجه باتجاهي مشيت بسرعه
مااريد اوكف ويا
احمد صار بصفي شهكت وصحت
«،،،يمه هاي منين اجيت
«،،،من القمر نزلت بحبل
ضحكت،،،،، مهند وكف يباوع علينا
هو هم باوع اله بعدين
دار راسه وكال
«،،،امشي اشوفج البير
«،،،اكو بير هنا
«،،،اي هسه اذبج بي واخلي السمج ياكلج
«،،،يمه صدك تحجي
«،،،،هههه صدكت الخبله وج انتي شنو فلم هندي
الواحد بسهوله ينصب عليج
«،،،لا بله نصبه اني
«،،،لا اني
ابتسمت ومشيت ويا
«،،،شوفي وحش الطاوه اويلي من يتگله
وي طماطه وخبز حار عندي احسن واطيب من
اللحم
«،،،،وويا بتيته فنگر وكلاص لبن
«،،،اويلي جعت
«،،،ههه وين صار الغده
«،،،،هالمنظر يخلي الواحد يجوع
«،،،اي والله شوف لوبيا الله اموت عليها
جهازه دك من شاف الاسم ابتسم كال
«،،،من رخصتج بس اجاوب هالاتصال
«،،،وين البير
«،،،ذاك شوفي بس لاتنزلين جوه خاف ياكلج
السمج
ضحكت جاوبته
«،،،،لاا اني اكله
«،،،بطله وربي
عافني وراح يحجي بجهازه كملت
مشي اباوع للخضره الحلوه وصلت يم غرفه بنص
الگاع وكفت من سمعت صوت ناديه
بنت خالتي غزوة ادكول
«،،،شفتيها لسرى ماشالت عينها من قائد
«،،،،اي شفتها مابقى شي وتاخذه وتصير
بيته
مااعرف شصار بگلبي
من سمعت هالكلام ناديه كملت
«،،،،،حظهن كاعد بنات خالج مقداد اخذ سهام
وقائد سرى والدور جاي على
احمد هم راح ياخذ اسماء
«،،،،بس هو مو كال راح اهاجر
«،،،،ياهجرة ولج ومنو يخلي غير عمو صالح يتبره
منه اذا سواها وبعدين لو يريد يهاجر
جان هاجر من زمان شكاعد
ينتضر
«،،،،هم صدك
«،،،هذا مثل مقداد ظل يجر بظهره وبعدين
قبل خالتج سعاد مو شويه الي تريده
تسوي ومنو يكول الها لاا
غير اطيح حظه
«،،،،اي والله هي مو شويه
«،،،،،تعرفين سمعت من سهام راح يجي
يخطبها لاختها بس تطلع السنه مال جدها
ابو امها
نار گبت بيه وحسيت بوجع بگلبي وحزن
صيطر عليه بعد ماجنت فرحانه
من تحركن ختلت بصف الحايط ماشافني
من راحن طلعت صفنت عليهن
رافضه اصدك السمعته
دمعتي نزلت وكعدت يم الغرفه ابجي جهازي
دك باوعت اله جان بابا بصعوبه
تمالكت نفسي فتحت
الخط جاوبت
«،،،،ها بابا
«،،،وين انتي بنتي خما رحتي بعيد
«،،،لا مو بعيد هسه جايه
«،،،اي تعالي لان راح نرجع
«،،،،تمام
كمت امسح بموعي مشيت اتعثر بخطواتي شفت
قائد واكف مسافه عني ويدخن شافني
ابتسم واشرلي مادرت بال اله رحت
لوره الغرفه من الجهه الثانيه
سمعت حركه وصوته
«،،،،،ليلى
ماجاوبته
«،،،هاي شنو لازم تريدينا نلعب ليلى والذئب
طلعت من وراها وخزرته تفاجأ
وكال
«،،،هاي شبيج يابه كاتل واحد من اهلج
وماادري
مارديت مشيت وكف كدامي كلت
بعصبيه
«،،،،ووخر خلي اولي
«،،،،ليلى شبيج سويتلج شي
«،،،وانت تكدر تسويلي شي
صفن عليه بعدين رد
«،،،،خير يولي صاير شي
درت وجهي منه ومارديت
«،،،،احجي شبيج ساكته
مشيت هم وكف كدامي صحت بي
بعصبيه
«،،،ووخر لاااا اسوي بيك شي مو صاير
«،،،بابا شبيج منو وياج
دموعي نزلت درت روحي منه مااريده
يشوفني ابجي صاحني
«،،،،ليلى
«،،،،لااادكول اسمي
جاوبته ومشيت من يمه ماحاول يلحكني من رجعنا
بليل فجأه ارتفعت درجه حرارتي
بابا وماما اخذوني للمستشفى ضربوني
ابره خافضه للحراره ورجعت
للبيت الدكتور الخفر كايل الهم ودوها
اخصائي يمكن عدها بدايه
تيفو
ثاني يوم ودوني حللت طلع صدك بدايه
تيفو وهم عندي التهاب مجاري قوي
نمت بالفراش بالغرفه الجوه لان ماكدرت اصعد لفوك مصخنه ومقهورة من
الي عرفته ومن الي حسيت
بي تجاهه
حبيت واحد مو الي لغيري واحد جنت
اشوفه اخ بس گلبي ماشافه
هيج وحبه بدون مااحس
اني نايمه ماما طبت كالت
«،،،قائد اجه يشوفج
«،،،مااكدر ماما ااا
سكتت من شفته طب نزلت راسي
كال
«،،،،الحمد لله على السلامه
كلشي يريد يگله اني احبك بس
ماحجيت شي دست على روحي وگلبي
جاوبت بصعوبه
«،،الله يسلمك
«،،،اكعد ماما ليش واكف
كعد على كرسي مسافه عني،،،، الجرس
اندك كالت
«،،اروح اشوف منو
طلعت وعافت الباب مفتوح سال
«،،،احد غاثج
رفعت راسي من صارت عيوني بعيونه
درت وجهي منه خايفه
لاتفضحني نظراتي
«،،،ليلى كاعد اسالج احد غاثج
«،،،اني محد يكدر يغثني
جاوبته باعصاب ترجف سكت
بعدين كال
«،،،،دحكي عليه من احجي وياج
ماباوعت علي ولا رديت كمل
«،،،يولي ليش محسستني اني الي ايد
بالصار بيج
صرخه رادت تطلع من جوه روحي
ااي انت السبب
«،،،،ليلى
كال اسمي باوعت عليه الغضب تارس
صدري وجاوبته
«،،،،لادكول اسمي
صفن عليه والحيرة بعيونه سأل
«،،،اي غير اعرف شمسويلج
«،،،،مامسوي شي والله يخليك روح وبعد
لاتجي ادرسني
فك عيونه مذهول من كلامي كملت
«،،،،ماريد اخذ من وقتك كافي السويته
اليه وراح اخلي بابا ينطيك
تعبك
كام لحيله بفزه وملامحه تغيرت للغضب
جاوب
«،،،ومنو كلج ااني جنت ادرسج حتى اخذ
فلوس
«،،،هذا حقك
«،،،طززز بي اني مو بحاله
رد باعصاب ماما طبت شافت الوضع
سألت
«،،،هاي شبيكم
«،،،،ماما اني بعد مااريد قائد يجي
لهنا ويدرسني
«،،،هاي شنو هالحجي وليش
جاوبتني هو كمل برودة
«،،،،هاهي بعد لا اجي ولا ادرسج
طلع من يمنا ماما لحكته رجعت وره مشوار
سالتني
«،،،شبيج وي الولد مسويلج شي
«،،لاا
«،،،لعد ليش هيج تعاملتي ويا
سكتت ودمعتي نزلت كعدت يمي وكالت
«،،،لج احجي مسويلج شي غاثج
بكلمه
من لحت جذبت وكتلها رزلني كدام بنات خالي
من جنا طالعين لبيت عمو كاظم لان
كلت علي معقد
«،،،عيب ماما شلون ادكولين علي هيج
وبعدين هو اجه عليج يعني
نسى السالفه
«،،،لا مو ناسي حجاها بزعل
رديت بشهكه جاوبت
«،،،هسه اسكتي وكافي بجي اني افهمه
انتي جنتي تشاقين ويا يجوز شافها صعبه
تحجين هيج ويا كدام سرى
وهو يريدها
جنت اكول ياربي طلعه من گلبي مثل ماخليته
بس مو كلشي نريده يصير
ثاني يوم وضعي انتكس
وهم رجعوني للدكتور كتبلي دوره ابر خليت كانولوه وماما كامت تضربهن اليه اني
متمدده جهازي دك باوعت
اله جان هو مارديت
كلت خلي ابتعد مااسمع صوته ولا اشوفه
بلكي الله يطلعه من گلبي
فصل وبعدين اجت
رساله على الواتس مافتحتها اجت
اللخ وراها اللخ حاولت ماافتحها
لان ماردت اقره كلامه خفت اضعف واحجي
الي مضموم بگلبي بس
ماكدرت ردت اشوف
كلامه وشنو كاتب اليه قريت
«،،،،شلون صرتي
«،،،جاوبي تره لا ليلي ليل ولا نهاري نهار
دموعي نزلت واختنگت قريت
«،،،يولي جاوبي وريح گلبي بس خليني
اسمع صوتج حتى اطمن عليج
كتب
«،،،اذا سويت شي الج كولي حتى ارتاح
ليش كاعد هسه احش جگاير
ومااعرف اني ليش
سمعت منج هذا الكلام واني ادري بروحي
مامسوي شي
ذبيت جهازي وكمت ابجي بشهكه اتصل
ماجاوبت رجع اتصل فتحت
الخط وكلت
«،،،عوفني قااائد وخليني بحالي
«،،،ولج غير اعرف شمسوي
«،،،مااسويت شي ارتاحيت هسه
«،،،لااا ماارتحيت وانتي هيج حالج كولي
احجي فهميني شصاير
«،،،ماصار شي والله يخليك بعد لااتتصل
ولا تراسل
«،،،اااي ليييش غير ااافهم
صاح بيه زدت بالبجي سكت بعدين
كال
«،،،،هالبجي لييش بس فهميني وج والله
اخذلج حگج حتى ان جانت روحي
العايله
مارديت كمل بتوسل
«،،،احجي وريحي گلبي
«،،،ليش يهمك امري
سالت بدموع سكت
«،،،جاوبني
«،،،كتلج انتي غاليه عليه
«،،،،مثل اختك موو
مارد طول گلبي كام يدك سريع ولزمت
جهازي بايد ترجف جاوب
بصوت متغير
«،،،،لااا
كمل
«،،،ااني
سكت سالت بلهفه
«،،،انت شنو
«،،،يولي اانتي شسويتي بيه
جاوب بحسره وكمل
«،،،،قلبتي عالمي وخليتني امشي واحجي
وي روحي من وراج جنت بلا روح
كاره الحياه والدنيا يومي
يمر عليه ثكيل ومابي
اي طعم
مارديت ردت اسمع كلامه كمل
«،،،بس هسه كلشي تغير عالمي الجنت اشوفه
ابيض واسود صار ملون من دخلتي
اله كمت احب اطلع الصبح
وانتظر النهار يخلص
حتى اجي بليل
و اشوفج اكعد وياج اسمع سوالفج
الحلوه واضحك وياج
دموعي تحولت لدموع فرح من سمعت
هذا الكلام ردد
«،،،ااني ماجنت اعرف بروحي حبيتج الا من غبتي
عن عيوني تذكرين
من زعلتي عليه من وره سالفه
مهند وكمت مااجي بهاي
اني عرفت بروحي
حبيتج
من جاب طاري مهند كلت
«،،بس اني سمعت انت راح تزوج سرى
«،،،اني غيرج ماراح اخذ
جاوبني وخله گلبي يفز من الفرح كلت
«،،،،والهجره
«،،،اهاجر الج انتي راح تصيرين وطني
حسيت بعد شويه راح اطير بالسما من فرحتي
بالكاعد اسمعه كمل
«،،،بس ياريت ماتصيرلي،،،،،منفى
جاوبته بخجل
«،،،لااا
سال بلهفه
«،،،لا شنو
«،،،وطن قائد
غطيت وجهي بايدي ابجي واشهك اردد
بگلب محروگ وماطاب ابد بهل السنين المرت
ياريتني ماحبيتك ولا خليت گلبي يحبك
ياريت اكدر ارجع بالزمن ليوره حتى اكلك
انت منفى
بس كلت احبك وقصتي ويا بدت جنت اخلص
دروسي من وكت حتى اسهر ويا
بيوم فتحت انستا شفته
نشط سالت
«،،،هاي شوكت فتحت انستا
«،،،اذا اكلج قبل شويه تصدگين
«،،،لاا
«،،،عجل بلشي المشاگل ياشريان گلبي
ابتسمت وجاوبته
«،،،الله يبعدنا عن المشاكل
ضحك ورد
«،،،ليش وين تريدين تروحين
«،،،قااائد
«،،،عيونه ودگات گلبه
«،،،اني ام مشاكل
«لا يبوووو اني
«،،،ناصب عليه انت
«،،«واني اكدر غير انشحط ويجيني بلوك
ابتسمت ردد
«،،،شلون فلافل تخبل
«،،الله اموت عليها هي والمشكل
«،،بله صدك تحبيها
«،،،اي لو يوميه اكل منها ماامل
«،،باجر اجيب الج
«،،،اي عفيه وخلي يكثر عمبه
«،،،،ادللي
اسمعه ياكل سأل
«،،اكلج عندج فكرة ابوج شكد يريد مهر الج
«،،،،ههههه 100 مليون
«،،،خاطفج ااني يابه هاي فديه مو مهر
«،،،ههههه
خربت ضحك كمل
«،،بس والله تستاهلين
«،،هاا صدك ذكرت شي
«،،،خير اللهم اجعله خير
«،،،حلمت بيك مزوج عليه ليش قائد
شلون اهون عليك تسويه بيه هيج
«،،يا صدك اسف يابه تزوجت عليج بالحلم
ارجعي نامي حتى اطلگها
«،،،ههههه
هم ضحكت ردد
«،،،عاد حلوة الي ازوجتها بالحلم لو جگمه
«،،،قاائد
«،،راح انحضر موو
«،،اي
ضحك وجاوب
«،،مو صاحيه انتي اكيد واكعه على راسج
من جنتي صغيره
«،،ااو ذكرتني بسالفه من جنت صغيره صارت
راح اختصرلها الك
«،،،لاتختصرين الغي اني احب لغوتج
«،،،ههههه فديت الي يسمعني
ومايضوج
سمعت الاذان اذن كمت رحت للشباج وكفت
يم الجامه وصفنت للسما كلت
«،،،خمس سنين مانسيت شي من العشته وياك
كلشي صار بينا بعده بعقلي وگلبي
الي رافضين ينسون شي
منه حاولت انسى
حاولت شكد مااروح لذيج الايام والماضي
الجمعنا بس كلما اتقدم خطوة لكدام
ارجع خطوات الهن
قائد
حسين بعد ماحجه وياي بسالفه
اهلي عافني بعد ثوره الغضب الشافها مني
عقد وجنت ويا بكل خطوه فرحت اله لان
اخذ الي يريدها من بعد ثلاث سنوات حب صافن
علي فرحان كلش بمرته
اجت هي بال كلت
وي نفسي
هاي مو اكو بنات تعرف الوفى وماتعرف تخون
ليش بس انتي خنتني وخليتني اصير
واحد ثاني
«،،،،يالمدكك
صاحني ابتسمت لان مرات يصيحني هيج
من ورة الوشوم جاوبت
«،،،هااا
اجه حظن جتفي وكال
«،،،راح اكول لمهى تشوفلك وحده من صديقاتها الحلوات حتى نخطبها الك
«،،،لاااا مااريد
«،،،امداك اي والله
غمني وخله اوس يضحك هو وكم واحد كمل
«،،،،ولك لحك ازوج قبل لايفوتك القطار
«،،،خلي يفوتني اني راضي
«،،،راح يجلطني هالمدكك واموت بحسرة
اشوفه عريس
«،،،دفض روحك انت وعود فكر بيه
«،،ههه فضيت روحي شووف عقدت ولبست
الحلقه
اشر بايده بوجهي ماجاوبت ظليت مبتسم
فضينا الحفله ورجعت وحدي للبيت
هو راح وي بيت عمته مااجه
لنص الليل
طب مبتسم وبعالم ثاني حتى ماشافني متمدد
بالاستقبال شفت روحي بي
هم جنت هيج من اروح
اشوفها ارجع مبتسم
واتذكر شصار بينا
كعدت ورثت جگاره الكاعد اشوفه بي
تمنيته اليه ردت هالفرحه
وياها ردت اخلي الحلقه
بايدها واحس من
صدك هي صارت اليه ردت اصير
وحدي وياها حتى اشوفها شوگها شمسوي بيه
بس حبها ظل بگلبي وصارلي مرض ماله
دوه كلشي سويت حتى انساها
بدلت المكان والناس
وبعدني عايش
وياها،،، صاحي نايم
شفت جثير نسوان ودورت بيهن عليج
بس ابدا ماااحسيت بلي جنت احس
بي وياج
اذكر كلشي صار بينا وعبالك البارحه جنتي
يمي تضحكين اليه واني ادحك
للشفه دايخ بيهن
ودايخ بعيونج الحلوه وكلشي بيج
عرفت شنو معنى واحد يعشگ وحده
من دخلتي گلبي عرفت يولي
من حبيتج اني ماراح اطيب
من هالحب للابد
وهاي اني العيون كلها نايمه واني كاعد
احجي بيج وي روحي واشوف
طيفج يمر من جدامي
كل لحظه
كمت طلعت بره كعدت بهل الليل وصمته
بس بداخلي هوسه ماجاي تفض
ابد
قاائد
غمضت عيوني من سمعت صوتها براسي
شكد تحبني
صعب هالسؤال لان مااعرف وصف
يكدر يوصف حبي الج بس
اكلج شي واحد
انتي اذا ماكو بحياتي اني انسان
ميت
هسه اني عايش هالشعور ميت بس عايش
اشم الهوه مااحسه يترس صدري
مخنوك وعبالك واحد گاضب
گلبي وخانگني
الفجر طلع واني مو نايم كمت رجعت لجوه
تمددت التعب والسهر هدو حيلي
نمت كعدت وره كم ساعه جان
ماعدنا شي كلت خلي اروح للجم لان سجلت
يم واحد بالمنطقه
طلعت اني وحسين هو راح لاهل مرته لان
جان معزوم على الغده واني
رحت للصاله اتمرن
من طبيت ماانتبهت ضربت ولد بجتفه
كلت
اسف ماشفتك
حجيت بدون ماادحك اله جاوب
مااصار شي
ردت اكمل مشي كال
«،،،،قائد
درت روحي شفته ملامحه مو غريبه عليه
تذكرته من شفت الرصعه
«،،،،مهيب
«،،،لك هااي شلون صاير
جاوب واجه حظني وخر يتفرس بملامحي
كمل
«،،،متغير كلش بس عرفتك من الجرح
الي بگصتك
«،،،انت هم متغير بس عرفتك من الرصعه الوحده
«،،،،ههه خوش علامه مو
«،،،اي
سكت واني هم سال
«،،،انت تتمرن هنا
«،،،اي
«،،اني هم
«،،ليش بيتك قريب منا
«،،،اي بذاك الفرع
اشر علي وكمل
«،،،قبل فتره كعدنا بي
شلون مقداد واحمد ازوجو لا
مهيب جان صديقي من الصغر بالخامس
الاعدادي اهله شالو وكعدو بغداد وانگطعت اخباره عنا
جاوبته
«،،،اي
«،،وانت
«،،بعدني ماازوجت وانت
«،،،خاطب
جاوب بضوجه بعدين سال
«،،،صرت مهندس يول مثل ماجنت تريد
«،،،،اي وانت
اشرلي لجتفه جان لابس مدني كمل
«،،،صرت ضابط بالشرطه
«،،،هم مثل ماردت
«،،اي
سكت واني هم سال
«،،شخبار حسين هم صار مهندس موو
«،،،اي
«،،،انت جاي خطار لو ساكن هنا
ابتسمت وجاوبت
«،،،عبالك كاعد تحقق ويايه
«،،هههه لا واالله بس ردت اعرف اذا خطار
حتى اضيفك بيتي
«،،لااا مو خطار سكنت هنا وحسين ويايه
فرح ورد
«،،،حلو يعني اكدر اشوفكم كل فتره
لان بنفس المنطقه كاعدين
هزيت راسي بأي كمل
«،،،،راح انطيك رقمي خلي يمك خلي نتواصل
مثل قبل ونرجع ايام الشقاوة
انطاني رقمه وراح
تمرنت افكر بي مهيب جان اقرب صديق اليه
من بعد حسين وافترقنا وسبحان
الله شفته هسه
ثاني يوم
الصبح طلعنا اني وحسين للموقع افترينا بي عمال
يشتغلون وهوسه صايره هو ديمشي
زلك ووكع على حديده تلكه
بالگاع،،، بأيده ونفسها
ضربته بيها وجرحته جرح غميج
اخذته لمستشفى قريب من عدنا طبينا
ومضمد خيط الجرح طلعنا
من يمه يضحك وكال
«،،،كالت عمتي راح ننصاب بالعين وماراح تمر بسلامه
الحفله السويتها وهاك شوف ايدي تعوقت
«،،لاتبالغ تره سمعت المضمد شحجه
جرح بسيط وسطحي
«،،،بس والله نزفت بطل دم
جاوبته مبتسم
«،،خاف تنگر مال نفط
«،،يرادلي اعوضه اعزمني ولك على مشاوي
«،،،ههه ادلل هسه اغديك بارقى مطعم
واطيب مشاوي راح تاكل
درت وجهي شفت بنيه طلعت من
غرفه ظهرها علينا وكفت
تحجي بجهازها
خطواتي ثگلت والابتسامه اختفت
من شفت الشعر اسود وطويل
وخرته ليوره بحركه شايفها واعرفها اندارت وشفتها للي صارت اليه منفى
شكرا لزيارتكم عالم روايات سكيرهوم
