رواية اغفري لي الفصل الثامن بقلم أوتار حزينة
صرت أخاف من المرايا
مو لأن شكلي تغير
بس لأن عيوني صارت غريبة
صارت ما تلمع
ما تحلم
ما تنتظر
اللي كان يملكني صار غريب
واللي كنت أعتبره وطن،،،،، طلع منفى
كلشي بدا يتكسر بداخلي بهدوء
مو بصوت،،،،، لا
الكسرة بصمت توجع أكثر
قائد
جانت بنيه منطيتنا ظهرها تحجي بجهازها
شعرها طويل،،،،، وخرته ليوره بحركة
حركة أعرفها،،،،،، مو بس شايفها
لا جنت عايشها
اندارت علينا منزله راسها رفعته چن واحد ضربني بقوه بگلبي تقدمت خطوة مو مصدك هي
جدام عيوني
العيون نفسها والخلقه هي والگلب كال
هي من كام يدك بجنون
شافتني هم انصدمت مثل صدمتي بيها
وكفت ووكف بيه الزمن كأن الهوا انحبس والدنيا
سكتت للحظه
السوته بيه مر جدام عيوني مثل شريط،،، سريع
كلشي رجع بثواني وعبالك صار البارحه
لميت قبضه ايدي بقوه دحگت عليها
بحقد والقسوة انرسمت
بملامحي
بس هي ماتحركت ولا نزلت راسها خلت
عيونها بعيوني تخزر بيه بنفس
النظرات
ليلى
ظليت اروح واجي وحدي لان غاده كامت ماادوام
من ورة الصار بيها هوايه سالوني عليها
لان عرفوا من موظف ساكن بمنطقتنا
ماانطي جواب واسد الموضوع
من يفتحوا وياي
وباسلوب عصبي مره مرتين وبعد محد فك حلكه
وياي
الظهر خابرت ماما حتى اشوفها شتريد دوة
طلعت لبره احجي بجهازي
كملت سديت الخط
انداريت منزله
راسي افكر بيها شلون راح تروح
لهذا الحيوان الي راد
يعتدي عليها
تنهدت رفعت راسي ،،،،گلبي فز من شفت قائد
واكف مسافه عني ويباوع عليه بذهول
انصدمت وجمدت بمكاني
حسيت كلشي توقف حتى النفس بصدري وگف
تمنيت عيوني تكون غلطانه والكدامي
طيف راح يروح مثل
كل مرة
بس القلب عرفه وجرحه انفلت من جديد
تقدم كم خطوه يباوع عليه
بنظرات واحد مصدوم
بعدين وكف تغيرت النظرات والملامح
صارت قاسيه هالنظرات خلتني اعرف هو
بعده ماعرف بالصار،،،،وتأكدت من مااتحرك
وظل يخزر بيه صوت تردد براسي
«،،،لاتضعفين وخلي عيونج بعيونه هو الغدرج
هو الباع مو انتي
مااعرف منين اجتني القوة وظليت واكفه
عيوني تخزر بي وهو هم،،، بس العين ،،،خانت
ودمعت مو لان شفته لا لان بيوم
جان كلشي بحياتي
تقدمت اريد اگله
«،،،ها عبالك ماعرفت
بس دار وجهه ومشى بسرعه الولد الويا
لحگه يصيح
«،،،قائد اوكف
عيوني ظلت علي الما اختفى منها
دموعي نزلت حركت رجلي بصعوبه
وطبيت للصيدليه اتنفس بقوه واحس
كل جسمي يرجف
مخنوكه اجر النفس بصعوبه مسحت دموعي
من طبت صديقه بالشغل سلمت عليه
واستلمت بمگاني
طلعت من الدوام
اريد اوصل بيتنا لان عرفت بروحي راح انهار
لان القوه الي وكفت بيها كدامه
راحت من شفت نفسي
اريد اصرخ وابجي
رحت للكراج منزله راسي ماردت ارفعه
خايفه ااشوفه ويشوف دموع
عيوني
ردته يظل يشوفني القويه الي مااانكسرت
عيونها من خله عيونه بعيونها
گلبي يدك سريع وجسمي يرجف كل ساع
اكول راح اشوفه كدامي بس
وصلت سيارتي وماشفته
من كعدت بيها وسديت الباب كمت ابجي
بشهكه طالعه من گلبي بس
كتمتها بأيدي من
حسيت بي هو واكف يباوع عليه مسحت
دموعي بقوه شغلت السياره
اريد اطلع
مااعرف شلون حركت ولا شلون وصلت للشارع
الدنيا ضباب صارت بعيوني وشهكاتي
علت اريد اسكت روحي
ماكدرت
طبيت بالافرع حتى مااسوي حادث لاحد
ماردت روحي لان خسرتها من زمان
خفت على الناس لاااذي
احد
وصلت لبيتنا نزلت امشي برجل بصعوبه تتحرك
طبيت اسحل بيهن بابا جان
يم سيارته شاف وضعي
فز وصاح
«،،،هاااي شبيج بنتي
وكعت من طولي بس مافقدت الوعي
لزمني وصاح
«،،،ندددى
ماما طلعت شافت وضعي صاحت بخوف
«،،،يمممه شبيها ليلى
اجت عليه تركض اني بحظن ابويه مفتحه
ماارمش اشوفه هو شسوه بيه بذاك
اليوم وشلون فضحني واني
جنت ضحيه
حسيت بمي بارد صار بوجهي ويم حلكي
اشوفهم مرعوبين من ورايه وصارو فد مره
تمالكت روحي وكلت
«،،،مابيه شي
بابا كومني هي ويا دخت ولزمتهم بقوه
«،،ندى البسي العبايه واامشي نوديها للمستشفى
«،،،مااريد
جاوبت بابا وكملت بصعوبه
«،،،عندي هبوط
«،،،اامشي خلي انطيج لبن وملح
ماما حجت كادتني هي ويا واخذوني لجوه
كعدوني ،،،،راحت بسرعه طلعت بطل
لبن خلت بي ملح وجابته اليه
ردت الزمه ماكدرت كل
جسمي يرجف حجت
بخوف ودموع
«،،،،فاروق بنتي ماادري شبيها
«،،،مابيها شي لاتخافين هسه تشرب اللبن
وتصير زينه
بابا شربه اليه ماما حجت
«،،،شلون ااجيتي بالسياره وانتي حالتج
هيج لو صاير بيج شي اني شاحصل
«،،،مابيه شي صرت زينة
جاوبتهم جذب واني احس الدنيا غدرتني
من خلته كدامي
مرة ثانيه
تماسكت كدام أهلي
ودست على روحي
وبينت كدامهم إني صرت زينه
بس الحقيقة؟
داخلي كاعد احترك بصمت
كلشي بيه جان يصرخ وأنا ساكته
لان
الالم ماراح من گلبي بعده عايش وياي بكل
نفس وبكل لحظه تمر عليه اشوفه
واعيش ذكرياتي ويا
اضحك وامثل اني سعيده حتى هم يرتاحون
ومايظلون شايلين همي
اردد بكسره
همزين محد يشوف وجعي وكسره گلبي
همزين كدرت امثل عليهم
بس بداخلي جانت طفلة تبجي لان فقدته
وامرأه تحاول تكون قويه ماتنهزم
بس والله تعبت
تعبت من التمثيل
تعبت اگول اني زينه واني مكسورة من جوه
قائد
طلعت امشي بسرعه اسمع حسين يصيح
ورايه
«،،،قاائد اوكف
وصلت السياره وكفت يمها الغضب
تارس صدري وصل ليمي
گضبني من جتفي
سحبته منه بقوه
درت روحي ادحك على البنايه بنظرات نار
فتحت الباب صعدت هو بسرعه
اجه وصعد يمي حركت كل
جسمي ينفض من الغضب
«،،،هي مو
«،،،اااسكت مااريد اسمع كلمه
سكت ماحجه شي حرگت وطلعت مااعرف شلون وصلنا بيتنا نزلت ركعت الباب ورايه طبيت امشي
سريع وكفت بنص الاستقبال
جسمي كله مشنج من
الاعصاب
رفعت راسي لفوك ولميت قبضه ايدي
بقوه طب كال
«،،،هاااي منين طلعت الك
«،،اااخ ولج اااخ
صحت بخبال وشلت الطبله رگعتها بالحايط
گضبني وصاح
«،،قااائد مو هيج
دفعته انهد من غضبي صحت بخبال
«،،شفتتتها ولك شفت شلون خلت عيونها بعيوني
وتخزر بيه
«،،،بس اهدأ وعلى كيفك هو مو كلشي انتهي
وصار ماضي ليش تقهر بروحك
من وراها
«،،وولك جرحي منها ماااطاب انت مو تعرف هالشي مووو تعرفه البيه
صحت بجنون وكملت
«،،كتلك ماارجع ولك كتلك هنا راح اموت وهااك
شوفني شلون صرت بس شفتها
احتركت ولك جاااي
احترك من گوايه عيونها ونظراتها اليه
«،،ولك كاافي لاتسوي بروحك هيج
من ورة بشر مايسوه
كعدت مهدود حيلي گضبت راسي اجه كعد
يمي كمل
«،،،انت ماغلطت بحقها هي الغلطت والمفروض هذا
كله ماتسوي ماشفتها شلون ظلت
واكفه وادحك عليك بعيون
گويه ولا عبالك
مسويه شي
«،،ولك ليش عجل حسيت اني الغلطت بحگها
فهمني شلون كدرت توكف جدامي
وهي سوت بيه السوته
«،،،اكو هيج نسوان عيونهم گويه تغلط
وتغدر ولا يهمها هالشي
رجعت ليوره صافن للسكف بجمود اردد
«،،جنت احلف هي مو مثل غيرها بس
طلعت حالها حالهن وحدة رادت تگضي وكت
براسي ومن ملت مني راحت لغيري
ليلى
بغرفتي الباب انفتح مسحت دموعي بسرعه
وسويت نفسي نايمه ماما كالت
من اجت ليمي
«،،نايمه
«،،،خليها ترتاح وتعالي
طلعو من يمي وسدو وراهم كعدت سندت
روحي على الجربايه وصفنت
على الشباج دموعي
نزلت
علاقتي بي جانت مثل المد والجزر نتعارك
ونزعل وبعدين نتراضى هو جان
صعب وعصبي كلش
مايحب اجادل لازم كله اي واسكت
وهالشي زاد من مشاكلنا
اني ويا
هو ماانتظر ثاني يوم كعد ويا ماما بالاستقبال
جنت واكفه يم الباب اصنط عليهم
من سمعت كلامه جاوبت بغضب
«،،اانت شكاعد تحجي قائد مو تعرف اختي تريدلك سرى وحاجيه بيها وي اخويه شلون هسه تجي وتريد بنتي
«،،ومنو كلج اني راح اخذها لبنت اخوج
«،،،قائد هالشي كلها تعرفه والگرايب يعرفون
انت لسرى وهي الك
«،،،واني اكلج مااراح اخذها لان محد اخذ رأي
بهل الشي اختج حجت من يمها من
زمان واخوج ماصدك لزك
بينا
«،،،ابني اني مااعندي اعتراض عليك انت خوش
ولد واي وحده تتمناك تصير رجل
بنتها بس
قاطعها
«،،،خاله اسمعيها مني ومن الاخير اني غير
ليلى ماراح اخذ هي وبس الي
راح تصير اليه مرة غيرها
لو يصوغها من فوك لجوه ذهب وينطوها
بلاش ماراح اخذها
«،،،يعني شتريد قائد تسويلنا مشاكل وي
سعاد انت مو تعرف امك وتعرف ماراح تسكت
اذا سمعت بيك رايد بنتي ولا اني
راح اخلص من الحجي
«،،محد يكدر يمسج بكلمه ،،،،لان يعرفون
اني ماراح اسكت الهم
«،،،اي يعني تبشرني بالمشاكل موو راح يگولون
حركته علينا وهم ماراح اخلص من
لسانهم
«،،شوفي خاله هسه ماراح احجي شي لا اني
ولا انتي خليها بينا الما ارتب وضعي
وهم ليلى تخلص السادس ومن
تدخل كليه اني احجي
يعني طريقنا بعده طويل ليش من هسه
اندوخ راسنا بالقال والقلت
ماما سكتت بس مبين عليها مو راضيه هو
كمل مبتسم
«،،،اني مااريد منج غير وكفتج وياي يم عم
فاروق من اجي واخطبها
«،،،قائد الكاعد يصير غلط وعيب بحقنا وعمك
مستحيل راح يقبل بهل الشي
گلبي فز من الخوف من سمعتها هيج ردت
تحركت خطوه حسو بيه وشافوني
ماما خزرتني وكالت
«،،،روحي منا وبعدين اني اعرف شغلي وياج
«،،،،خاله ليش هالحجي يعني شنو ذنبنا
اني وياها اذا واحد حب اللخ هالشي
لا بأيدي ولا بأيدها
ماما كامت من يمه وانهدت بيه
«،،وولج مافكرتي شراح يكلون عليج اجت لهنا واخذت الولد من البنيه واحنا مو غربه هذا
ابن اختي وذيج بنت اخويه
هو كام وردها بعصبيه
«،،،اني ماجنت لسرى حتي تجي ليلى وتاخذني
منها
«،،اابني انتو واحد للخ من زمان تكدر ادكلي
ليش مارفضتها طول هالسنين
«،،،منو كلج اني مارفضتها الف مره كلت مااريد
بس لا اخوج يحس ولا اختج
ولا هي نفسها سرى
ماما سكتت وكعدت باوعت اله بخوف
هز راسه يطمني كمل من كعد
يمها
«،،،خاله اني رجال امشي بشور راسي مو شور
النسوان واولهم اختج واكلج للمره
الثانيه اني غير ليلى ماراح
اخذ لو اعرف بتبرون مني
«،،،،ولك ماما ماراح ترتاح لا انت ولا احنا
«،،،هسه محد راح يعرف كتلج خليها بينا منا
لوكتها اني اتصرف
«،،،وهالشي صار محد عرف بينا واحد يحب
اللخ غير ماما
جنت كاعده يمه يشرح واني هايمه بي
«،،،عينج هنا خاتون
«،،،،ههه تدري ماافتهمت شي
«،،،،ادري لان صافنه بخلقتي الحلوه
«،،،،تره انت مو حلو فلا تصير مغرور
دار وجهه عليه وخله عيونه بعيوني گلبي
كام يدك بجنون نزلت راسي
ولهيت روحي اشخبط
بالقلم
«،،،،يكولون عليه سمنان صدك هالشي
رجعت باوعت علي مبتسم والعيون تضحك
صدك هو من عاف شغل العماله
سمن وكشف لونه
«،،اي غير من الكيك الي اسوي الك والحلويات
سمنت
«،،،ههه بهاي صدك دلالج اليه خلاني
اسمن
ابتسمت وجاوبته بخجل
«،،،بس تدري لايك الك السمن
سكت والنظرات خلتني اعض بالقلم صفن
على شفايفي وخلاني ادير وجهي
منه كال بصوت متغير
«،،،،انتي خطر
درت وجهي علي وسالت
«،،،،ها ليش،خطر
سكت وطول بعدين كال
«،،،خلي ندرس
بده يشرح ماما كل مشوار جانت تجي
تباوع علينا وتروح
كال مبتسم
«،،،خالتي مسويه دوريه علينا
«،،،يعني شنو
«،،،يعني خايفه عليج لاا
سكت سالت
«،،،اليوم شبيك كلامك كله الغاز
ضحك وجاوب
«،،،بعدج صغيره ماراح تفهمين الكلام
«،،،تره عمري راح يصير 18 بهل الشهر
«،،،بله صدك
«،،،اي
«،،،تسوين عيد ميلاد
«،،،اي كل سنه بابا وماما يسون اليه
«،،،من هسه اكلج عيد ميلاد سعيد وان شاء
الله تحققين كل احلامج الصغيره
والجبيرة
«،،،هي امنيه وحده اريدها
«،،كليه الصيدله مو
هزيت راسي اله بلااا وجاوبته
«،،،لا انت
دار وجهه عليه النظرات مختلفه والملامح
متأثره ردد
«،،،ظلي هيج وياي لاتتغيرين انتي ماجاي
تعرفين شكاعد يسوي بيه كلامج
سكتت وضعت بنظرات عيونه كال
«،،،من تحجين كلام حلو اضيع
سكت وركز على شفايفي
كمت بفزه كلت
«،،،اروح اشوف الجاي
ويا بديت اكتشف مشاعر اول مره اعرفها
دكه گلبي اختلفت والفرح انزرع
بي وعالمي صار هو
والشوگ خلاني اني ويا ننسى نفسنا من
مره اجه ليمنا جنت وحدي لان
ماما راحت لراس
الشارع تجيب كم شغله وتجي
ماجان وقته بس بابا دزه يجيب فلوس
من عدها،،، دك الجرس عبالي هي
رحت فتحت الباب جان هو ابتسم
وكال
«،،،شلونج حب
«،،،هلا حبي
طب مشى كم خطوة كال
«،،،عم فاروق دزني على فلوس خالتي وين
«،،،راحت للسوك
وكف يم باب المطبخ ورد
«،،،عجل ليش ماكلتي جان ماطبيت
«،،هسه تجي راحت من زمان
«،،،راح اكعد بالحديقه
جان شتا وبارده جاوبته
«،،،بارده عليك اكعد بالمطبخ وراح اخلي
الباب مفتوح
تردد لحيت علي وطب كعد بس مبين
مو مرتاح
«،،،راح اسويلك كابتشينو
«،،،سوي
اشتغل واحجي ويا
«،،،اليوم بارده كلش
«،،،اي
باوعت اله كل ساع يباوع للباب ضحكت
وكتله
«،،،ها شبيك عبالك اني خاطفتك
كام لحيله وجاوبني
«،،،ليلى غلط طبتي عليج وانتي وحدج
خلي اروح
مشى يريد يطلع سال
«،،،ماتكدرين انتي تنطيني فلوس
«،،،لاا هن بالخزنه مااعرف رقمها
«،،،عجل خلي اروح
من ديطلع ضرب باب المطبخ براسه
صاح
«،،،،اااخ خرب بيك
رحت بسرعه علي وسالته بخوف
«،،،تاذيت
فرك گصته وصار احمر دم رفعت روحي
كمت انفخ بوجهه كلت
«،،،تعال غسل وجهك صار دم
انتبهت نظراته تغيرت والملامح هم
خفت منه رجعت بسرعه ليوره
بلحظه لزمني من خصري وجرني علي
فگيت عيوني دفعته من
صدره وصحت بي
«،،،قااائد شكااعد تسوي عوفني
مارد ولا عافني وحظني بقوه لصدره
رددت بخوف ادفع بي
«،،،عوفني الله يخليك
بس هو ماعافني شمني من رگبتي بنفس طويل
دخت ومااعرف شصار بيه ضعت بهل الشي السواه بعدين باسني منها
ردت اوخر ابتعد عنه لان شفت نفسي
ضعفت ويا بس رجلي ماتحركت
ولساني بطل يحجي
وخر مني بس ظل لازمني رفعت راسي جان
صافن عليه بوجه صاير دم
النظرات صارت على شفتي تحركت
بس بسرعه نزل راسه وباسني
لمني لصدره بقوه ورفعني لفوك
ضعت ودخت ايدي لاراديا
حظنته ونسيت نفسي ويا فز وره
لحظه ووخر
مني يردد
«،،،ااطلع قاائد ولك ااطلع
طلع من يمي وخلاني ضايعه بهل اللحظه
الجمعتنا سوه
عرفته ضعيف تجاهي من سوه السواه
خابرني بليل وكال
بصوت متغير
«،،،بعد لااتخليني اتقرب منج
مارديت كمل
«،،،يولي اني ضعيف تجاهج وخايف لا من اگضبج
ماارحمج
عضيت شفتي من افتهمت شيقصد
وحسيت خدودي اشتعلت نار
ردد
«،،،گوة وخرت ولج گوة صيطرت على روحي
شعلتي صفحتي وصفحه اهلي
بهل البوسه والحظن
ومااعرف شلون طلعت ولا
شلون وصلت لابوج
ومن سالني على الفلوس كتله التهيت
وي صاحبي بشغله ونسيتهن
ماجان عندي كلام احجي اله خجلانه منه ومن
نفسي لان نسيت روحي ويا
كمل
«،،،،اخ ولج شوكت ننجمع بيت واحد حتى
«،،،بس كافي
جاوبته بخجل سكت ذب حسره سمعتها
واضحه رد
«،،،تعبت ليلى واني اريدج
كمت اسمع منه كلام اول مرة اسمعه وزاد
خجلي بعد اكثر رديت
«،،،قائد تره اا
«،،،اعرف تخجلين من هالكلام وراح اسكت
سمعت طكه الجكاره ونفسه من ذب الدخان
حجه
«،،،ماراح اجي بعد ادرسج
«،،،،ليش قائد
«،،،ليلى اني جاي اخجل من عم فاروق يعني مو مرتاح من ااكاعد اسوي طبعي مو هيج ولا اخلاقي
كاعد احس بروحي اني جاي اخونه
اخذ نفس وذبه بحسرة كمل
«،،،،تفهمين عليه مو
«،،،،اي بس شلون اني مااكدر الا اشوفك
فتح كام واني هم رد
«،،،هنا شوفيني واشوفج وهم من اجي بشغله
لعم فاروق نكدر نتشاوف
ماحجيت شي كمل
«،،،اوف شكثر مشتاگ الج يانور العين
كمل
«،،،اانتي من مااشوفج تسلبين راحتي وعافيتي
وبس الله يعرف شلون محتله گلبي
وروحي وماخذه عقلي
ابتسمت وهالشي خلاه يصفن بعيوني
ويردد
«،،بذمتج هالشوگ ومامبريه الذمه الما تصيرين
اليه وعود ذيج الساعه ابريج منه
سكت وظل يباوع عليه بنظراته الي جانت تلعب
بحالي لعب وتخلي گلبي يكوم يدك
بجنون كمل
«،،،عبالك الله خلاج بگلبي حتى يخليني
اشوف الدنيا شكد حلوه
لزمت شفتي دمعتي تنزل ماامسحها اردد
بوجع احتل روحي ودمرني بهل الخمس سنين
جنت اول واحد حببته واول واحد باسني
واخذني لحظنه وجنت اعرف هالشي
حرام وعيب بس اني جنت
اشوفك حبيب وزوج اليه
وهالشي دمرني وخلاني مااكدر اقبل
باي احد لان عشت وياك مشاعر ماراح اكدر اعيشها وي غيرك لان راح تكون مزيفه
واعرف بروحي راح امثل
الحب علي وهاي خيانة ومو اني الي
اسوي هيج
غاده
كلشي صار بسرعه عقدت وجهزت باقل من
اسبوع وعبالك اني عار ويريدون
بس يتخلصون مني
جنت اسال نفسي بابا شلون خله ايده
بايد هذا الي كسرني وخلاني
ابجي دم
شلون انطاه گلبه يسوي بيه هيج اني مو بنته
بس معاذ ابنه مافكر بيه
شلون راح اكدر اواجهه
لهذا الحيوان وهو
سوه بيه السواه
بس من عقد لاخويه عرفت هو مايفكر غير
بي اشتراه من الموت وباعني لجلاده
معتصم بين عيوني احجي ويا
جان المفروض اني هسه عروس والبس
ابيض وكل العيون تضحك اليه وفرحانه بيه
بس كل هذا ماصار فرحتي
صارت حزن والابيض
صار اسود
لا قصتي وياك انتهت عاشو عيشه سعيده
ولا انت جنت كد كلمتك صرت اليه
مثل نجم طفى من طلع الفجر
وكلشي تمنيته وياك انكسر
من فتحت عيوني
على غدرك
كمت رحت للكنتور فتحته صفنت على بدلتي
مديت ايدي الها وكلت بشهكه
جنتي ثوب عرس وصرتي اليه جفن موت
من طلگني معتصم وعافني لهذا
العار
تعرفين هو مااتصل بيه رغم شكد دكيت
علي لا وحضرني وماقبل حتى احجي ويا من
جهاز مريم اني ماجنت اريد منه شي
بس ردت اساله سؤال واحد
هو حبني من صدك لو جان
يمثل عليه
ردت اكله اني شنو ذنبي بالصار قابل
رحت اله برجلي هو اخذني غصب بس
رجعت بنيه ااي مابيه شي زين
ليش ماصدك بيه ليش انهزم من اول محنه
النا وين كلامه وعده اليه يظل
يحبني طول العمر مايفرگنا
غير الموت طلع كله جذب
بجذب
تهسترت وجريتها بقوة كمت املخ بيها
اصرخ
«،،،،،كله جذب كلااامه نظراته كلها طلعت
جذب
مريم اختي طبت عليه شافت وضعي
اجت بسرعه عليه صاحت
«،،،،ولج هاي شمسويه
لزمتني املخ بالبدله وابجي بشهكه حظتني
تردد
«،،،كافي كاافي راح تموتين من القهر
«،،،،خليني اموت حتى ارتاح
جاوبتها بشهكه صبا اجت فزت من الخوف
صاحت بيها
«،،،روحي جيبي مي بسرعه
صبا طلعت وسدت الباب هي كومتني
وكعدت على الجربايه تردد وهي
تبجي
«،،،،،حسبي الله عليج زهره سويتيها واخذتي
لاخويه ومحد وكع بيها غير اختي
ليلى
هيفاء خابرتني وكال
«،،،،غاده صايره فد مرة تعالي عليها
رحت بسرعه عليها كعدت يمها بغرفتها
صافنه عليها،،،،،،،واشوف نفسي
بيها من انغدرت من الي حبه گلبي
وردته اليه طول العمر
ماجان عندي كلام اوسيها بي لان اي كلام
ماراح يطيب الجرح الي
انفتح بگلبها كالت
«،،،،مابقى شي واروح لهذا
سكتت وكملت بنظرات تايهه
«،،،،ومعتصم عرف وماسوه شي
«،،،،مااعرف شاحجي
جاوبتها رد
«،،،ماجان يحبني جان يمثل عليه
صفنت بعيوني وكملت
«،،،،،ماكو حب بهل الدنيا طلع كله جذب
بجذب
دمعتي نزلت هي هم كالت
«،،،جنتي ادكولين اليه هالكلام واكلج لاا اكو
وطلعت كلشي مااعرف
كملت من لزمت گلبها
«،،،هذا يوجعني بقوه وسبب وجعه مو هذا
الي راح اروح اله لاا سببه معتصم
والسواه بيه
شهكت وكملت
«،،،حسبي الله علي كسر گلبي وخله بيه
جرح راح يظل بيه طول العمر
جنت اكول هالكلام وبعدني احجي وي روحي
وجنت اريد عداله ربي بالي ظلمني وشفتها
بيهم واحد واحد
بس قائد ماعرفت شصار بي عرفنا
سافر لاوربا واختفت اخباره وشفته
بعد خمس سنوات وجان
غير وااحد ومبين علي عايش
ومرتاح
ورة ساعات
طلعت من يمها،،، ورجعت للبيت طبيت
ماما كاعده تباوع اخبار سالت
«،،،شلون غاده
«،،،ميته لا روح ولا شعور
ذبت حسرة وجاوبت
«،،،،هالبنيه انظلمت هوايه
كعدت يمها اريد احجي اكول الها شفت
قائد بس كلت لاا راح تشيل همي وتظل تفكر بيه
كلت
«،،،ماما هالاسبوع ياخذوها ومااعرف شراح يصير
بيها يم هذا الحيوان الي راد يعتدي
عليها
«،،،،ماادري بنتي اني هم شايله همها ومقهورة
عليها كلش يعني والله ماجاي اصدك
هي تطلكت من معتصم وراح
تروح لهذا
«،،خايفه عليها كلش لاتسوي شي بروحها
سالت بخوف
«،،،سمعتي منها شي
صفنت على ايدي هي حست وصاحت
«،،،عزه ولج بس لاا
قاطعتها
«،،ماما كولي لخاله سوسن لايعوفها وحدها
خايفه اخسرها والله اموت اذا
صارلها شي
«،،هسه ااخابرها ااي وين جهازي ااني شفت
الصار بيج وبينا ومااريد اي احد
يشوف الشفنا
كامت اخذت جهازها رادت تتصل لزمتها
وكلت
«،،،روحي عليها احسن فهميها بينج وبينها
وخلي وحده من خواتها تظل يمها
«،،،اي هم صدك
بسرعه طلعت من يمي وراحت الهم ظليت
وحدي
شوفته خلت الذكريات تهاجمني بقوه واللحظات
الجمعتنا سوه كامت ادك براسي
اساس البله والي خله قصتنا تنتهي هو مهند
والي سواه بعدين
بيوم العصر الخميس
جنت بالمطبخ واكفه اسوي كيك
وخاله رباب يمنا هي وجهالها جرس الباب دك ماما راحت تشوف منو ورة مشوار سمعت صوتها
«،،،،تفضل مهند
تفاجأت من شفته طب لان صارله فترة مايجي
علينا طب شافني ابتسم سلم
«،،،شلونج ليلى
«،،،هلاا مهند
«،،،شلونج رباب
ماجان يكول الها عمه ردت السلام هو كمل
«،،،اليوم امي وزعت ثواب لجدي ودزت الكم
«،،،تسلم وان شاء الله واصل
ماما جاوبته واخذت منه العلاكه كملت
«،،تفضل ليش واكف
اني جنت يم الكاونتر سال
«،،،كاعده تسوين كيك
«،،،اي
جاوبت مختصر رغم جنت دايرة روحي عنه
بس حسيت بنظراته عليه ماما انطته
مي كعدت وسالت
«،،،شلون ابوك وامك
«،،،بخير ويسلمون عليج وكالو صاير ماتبين
علينا ولا تجي
«،،،اني اجيت كم مرة عليهم خليهم هم يجون
ليش بس اني اروح الهم
«،،حقج بس تعرفين ابويه مايحب الطلعه
وامي ملتهيه بالبيت ودوخه البنات
وجوده يمنا سببلي توتر لان ماجنت ارتاح
اله سالني
«،،،شلون السادس وياج مصيطره
«،،اي
جاوبت وخليت الكيكه بالفرن جرس الباب
اندك ماما كامت وكالت
«،،،اروح اشوف منو اجه
طلعت من يمنا توترت من ورة نظراته
لان ابد ماشال عينه مني خالتي
حست بي وجانت تعرف بينا
اني وقائد وهم تعرف
هو حجه وياي بسالفه
الزواج كال
«،،طلعي معدل عالي حتى تنقبلين صيدله
«،،،اي
رجع ليوره يباوع عليه بنظرات ضوجتني
ابتسم وكمل
«،،،كلامج وياي مختصر عبالك بعدج ضاايجه
من ذيج ال
سكت من سمع صوت ماما
«،،،تفضل قائد
من سمع اسمه
دار وجهه بسرعه على الباب قائد
طب مبتسم بس من شافه وكف وعكد حواجبه نظراته تحولت اليه درت روحي ولهيت
روحي ارتب بالغراض هو
مااسلم وحسيت الجو توتر حتى ماما
حست هي وخاله وكالت
«،،،اليوم بيت خالك وزعو ثواب ومهند جاب النا
منه
مارد عليها حسيت بي صار ورايه سحب
كرسي بقوه وكعد مهند كام وكال
«،،،اني اترخص
بعد وكت ماشربت شي
«،،،الله وياك
من رد هيج ماما سكتت مهند ماحجه شي طلع
هي ويا درت وجهي علي فزيت
من شفته،،يباوع عليه والغضب تارس ملامحه
مادار بال لخالتي رباب وصاح
«،،ااني مو كايلج هذا من يجي تولين لجوه
فشلت من خالتي ونترت بي
«،،لااتغلط واحترم نفسك
كام بفزه الا وكع الكرسي وانهد بيه
«،،،منو ولج الي يحترم نفسه
«،،اانت
صحت بي خالتي صارت بينا وكالت
«،،،يمعودين صلو على النبي
ماما طبت شافتنا سالت
«،،خير شبيكم
«،،تعاركو من ورة مهند
خالتي جاوبتها هي ردت
«،،،اي خاف ماتأكد ذاك اليوم لا هسه اكلك تاكد
وراح يفضحنا يم اهله واهلك
«،،،خلي يعرفون اني مايهمني اي احد
جاوبها بغضب مشيت من يمهم وكف
بوجهي صاح
«،،،وين موووليه
خليت عيوني بعيونه وجاوبته بنتره
«،،،موووليه لجوة عندك ااعتراض
گلنا مهند راح يحجي ويفضحنا لان قائد
بين اله كلشي بس مرت ايام ماسمعنا اي
كلام لا من اهله ولا من بيت خالي
زعلت علي وحضرته وخابر من ماما اعتذر
وتراضينا لان جنا واحد مايكدر
على زعل اللخ
الظهر رجعت من الدوام
طبيت بيتنا ورحت للمطبخ فتت سمعت
صوت ماما تحجي بعصبيه
«،،،،سعااد بنتي مو بايره ولا ذابتها على
ابنج هو الي اجه وكال اريدها
مااجاي اجذب اني
هو يمج واسالي
سكتت كملت وره لحظه
«،،،هاا يعني اكو فرق بين بنتي وبنت جاسم
وعلى شنو اسال بشري واعرفه
واعرف انتي ماتحبين بنتي
ولا تحبيني
مشيت للجوه وكفت اسمع الحجي
«،،،لاااتغلطين واحترمي نفسج بنتي اشرف
من الشرف ولو ما ابني يعرف
هالشي مايجي ويكول
اريدها
«،،،عيب عليج هالحجي واعرف احجي
بنتي الف واحد يتمناها مو محتاجه تاخذ قائد
من سرى اابنج هو الي كال مااريدها
شبيج اانتي روحي ااسالي
اله ها اني ام السحور
خلفه الله عليج بس اكلج شي اااسمعي مو
كل الحجي الج ااي اصيح
عليج صارلج ساعه تغلطين عليه وعلى
بنتي واني ساكته واكول اختي
الجبيره بس لااا بعد هالكلام
الكلتي لااا انتي
اختي ولا اعرفج
طبيت شفتها سدت الخط وصاحت
«،،حسبي الله عليج حرگتي دمي
«،،،ماما
سمعتني اندارت وكامت كلت
«،،،اجيتي
«،،عرفت مو
سكتت كملت بقهر
«،،،شنو طعنت بشرفي اني وياج
«،،لاا ماما ماحجت هيج
«،،،لا سمعتج شحجيتي وياها
«،،،روحي بدلي هسه يجي ابوج
صفنت عليها بعيون مغوركه سالت
«،،هي ليش،ماتحبني شنو فرقي عن سرى
بنت خالي هاي بنت اخوها واني
بنت اختها
«،،،ليلى عوفي هذا الحجي لايجي ابوج
ويسمع
بذاك اليوم صرت نار وخابرته جاوب
«،،هلو حب
«،،،،قائد اني مو شريفه اني اخذتك
من سرى وخليتك تعوفها
«،،،،هاي شنو هالحجي ليلى ومنو كاله
«،،،امك خابرت ماما ونزلت عليها ذيج النزله
وسمعتها كلام مو حلو
«،،،اامي
«،،،اي
«،،،شحجت ااحجي
نترت بي
«،،،روح اسالها الها ليش تسألني
«،،،اانتي احجي
صاح بيه
انهديت
«،،،لااتصيح كتلك روح ااسالها وكول الها اني اشرف من بنات اخوها الي راكضات وراك ومو ااني الي اذب روحي على واحد ااني غاليه
والف واحد يتمناني
«،،،هاااا كمنا نجفص بالكلام ومانعرف نحجي
«،،،هاااي اني موو وامك الي نزلت عليه وعلى
ماما ماجفصت مووو ماااطعنت بشرفي
اني وياها وسوتنا ام سحور لييش
يمه شبيه اني بااايره مو حلوة
حتى اروح اسويلك سحور
«،،،بسيطه ااني اعرف اتصرف وياها
الخط انسد بذاك اليوم علگت بينه وبينها
وجهاز ماما ماسكت خاله رباب
خابرتها وعرفت هو متعارك
وياها
ومن ذاك اليوم واني ماشفت راحه
وبدت المشاكل
الي انتهت من صار الصار
قائد
چنت أعرف بروحي
اذا شفتها راح أحترگ
راح أتعب بعد أكثر،،،، لأن العشته وياها ما جان شويه كل تفصيل صغير بيها مربوط بنبض بگلبي
ضحكتها،،،، سوالفها،،،،،حتى زعلها،،،،
جانوا جزء من يومي،،،، من روحي
هي ما جانت حب عابر،،،،،
جانت وطن احتواني بكل شي بيه
كاعد بسيارتي صافن للمستشفى الي
شفتها بيها اردد
مانسيتج يولي ولا كدرت انسى
العشته وياج وهاج شوفيني
اجيت حتى اشوفج
بس،شلون اجيت ماادري
گلبي جابني واخ منه ماشايف گلب يعذب
صاحبه ماشفت عقل مايقبل
ينسى الي متعبه
اريد انساج
بس شلون انسى
شلون مااتأذى وكل ذكرى وياج
مو بس تمر بروحي لا
تمر وتكطع بيها بسجين عميه
جنت من اشوف طيفج يهزني
وهسه من شفتج جدامي جسد وروح
گلبتي عالمي وخليتني
احترگ مرتين
مرة على حب راح
ومرة على روحي الي بعدها يمج
الماضي دك براسي وگلبي وتذكرت شلون بدت
مشاكلنا اني وياها والبرودة زحفت
لعلاقتنا من ورة اهلي
والگرايب
الدنيا احتركت عليه لان عرفو بيه اريدها
وبدت المعارك بيني وبينهم
امي واكفه تصيح عليه
«،،،ااسمع ولك بنت فاروق شيلها من راسك
اني غير بنت اخويه ماراح اخذ الك
«،،،واني مااريدها
جاوبتها بأعصاب وكملت
«،،،وبعدين انتي باي حق تخابرين خالتي
وتحجين وياها كلام مايلبس علي ثوب
«،،،اانجب ولك مابقى غير انت تعلمني شلون
احجي
ردت عليه وكملت
«،،،خاابرنك يول نقلن الك الحجي وحشن
راسك عليه واجيت تريد تاخذ حگهن من امك
الي ربتك وتعبت عليك بس من امداها
لبطني الي جابت واحد عار
مثلك
غمتني ابويه صاح من قرب مني
«،،،،ولك اانت شلون تسوي هيج واني حاجي
من زمان وي خالك وماخذ بنااته الكم
شراح اكله هسه وشلون راح
اواجه واخلي عيوني
بعيونه
«،،،ياابه من الاخير حتى ترتاحون كلكم
اني ماراح ازوج غير بنت خالتي ندى لو هي
لو ماازوج طول العمر
سهام الجانت واكفه ادخلت
«،،،واختي الي رفضت جثير ناس من وراك شنو
ذنبها بله ليش خليتها مثل البيت
الواكف وگطعت نصيبها
وهسه عفتتها من
ورة ليلى
«،،،لييش ااني جنتي طرشه مااجنتي تسمعيني
اكول مااريدها مارحتي كلتي الها
هالكلام حتى تروح تشوف
غيري
«،،،،ااحترم نفسك ولا دكول طرشه واختي مو ميته
عليك الف واحد يتمناها
«،،،بركه والله عجل خلي تاخذ واحد من هالالف وتفك ياخه مني
امي انهدت بيه
«،،،اانجب ولك وسد حلكك وغير سرى ماراح
ااخذ لو اعرف اتبره منك
سهام كملت
«،،،عرفت والله انت خاله عيونك عليها من
ضربت اخويه من وراها
امي وابويه تفاجأو وسالو
«،،،شنوو هاي شوكت صار هذا الحجي
من رحنا للبستان قبل كم شهر متعارك ويا
من وراها وضاربه
«،،،،واانتي ليييش ماگلتي ماحجيت شي
امي سالتها جاوبتها
«،،،مهند ماقبل احجي شي كال مااريد عمتي
تنغث هي وعم صالح
احمد صاح بيها
«،،،كاافي سهام لاتعليكها فوك مااهي معلوكه
ابويه اجه ليمي يخزر بيه سال
«،،،وولك صدك هالحجي
ماتراجعت وخليت عيني بعيونه وجاوبته
بروده
«،،،اي
دفعني بقوه من جتفي احمد وكف يمي
صاح بيه
«،،ووولك شلون تضرب ااابن خالك ومن ورة
منو من ورة بنت فاروق
««،،واااقتله اذا فكر يحجي بيها بعد
«،،،سمعت عمووو سمعتي عمه يريد يقتل اخويه
من وره وحده ضاحكه علي وتريد
بس تگضي وكت براسه
«،،،اااانجبي ادبسسز
غلطت عليها مااشوف غير ابويه يگفخني
على عيوني لميت ايدي بقوه ورجعت ليوره
مااريد اتصرف تصرف بعدين
اندم علي احمد وكف
بوجهه ولزمه من راد يضربني مره اللخ
صحت واني جاز على سنوني
«،،،،،شتريد تسوي سوي تضربني اضرب برد
گلبك بيه انت وامي ولو خليت السچين بافادي
اني غير ليلى ماراح اخذ
تفل عليه وصاح
«،،،وولي منا ااطلع لك لا انت ابني ولا اعرفك
مشيت امي تصيح
«،،«والله ياقائد اذا ماجزت من
هاااي ام الولد الا اتبره
منك الى يوم
الدين
المشاگل علكت بيتنا وصار
جحيم اليه منا امي تتعارك وياي
وسهام وياها تذب حجي
وتعلك بينها وبين مقداد اخوتي ورة فتره
من علكت مشكله جبيره بيني وبينهم
اخويه كال من اجه لغرفتي
«،،،،قائد عوف ليلى وواقبل
بسرى لان ابويه
وامي مستحيل راح يقبلون بنت عم فاروق
تصير الك
«،،،هاي انت التحجي هيج مو كلت بلسانك
قبل اشهر ما أغلط غلطتك واروح
اخذ من بنات خالي
سكت كملت
«،،،مقداد اسالك سؤال انت مرتاح وياها
مارد كلت
«،،،عدم جوابك هو رد اليه
«،،يول ماراح ترتاح انت ماجاي تشوف شكاعد
يسون بيك
«،،،،مو هامني اي شي من الكاعد يسوه ولا
راح اتاثر بي لان الي اريده
اسوي
اخوتي صح مااذوني بس ماكفو وياي من ردتها
لان ملو من المشاكل الي جانت تصير
يوميا
امي واخ منها ماجانت ام حنينه علينا
جنت احسها تكرهنا هي وابويه ومايحبونا
حمل ثگيل جنا عليهم
وهمها بس ترضى اخوها ولو على
حساب سعادتنا
شفت روحي كاعد بالهول بيت اهلي خالي
يمنا وصاير نار هي وابويه يدحكون
عليه بغضب صاح بيه
«،،،ولك اانت باي حق تمد ايدك على مهند
ومن ورة منو من ورة بنت فاروق
الي تعرف ابوها شسوه بينا
مارديت علي كمل بغضب
«،،،وبعدين شلون تهدد بي اذا رادها تذبحه
وانت تروح من ورة ظهر الكل وتحجي
بيها
«،،،مااياخذها اتبره منه والله اذا ظل
بهل السالفه
امي ردت جاوبت بروده
«،،،اتبري من هسه لان اني ماراح اخذ غيرها
ابويه كام وصاح بيه
«،،اانجب ولك لا اكوم اكسر راسك
خالي كمل يخزر بيه
«،،،اعرفك يول بيش تفكر
«،،، بله گلي بيش افكر
جاوبته رد
«،،،،انت مو شويه واعرفك ليش ماخليت ابني ياخذها تريدها الك هي وفلوس ابوها
ابتسمت وجاوبته باستهزاء
«،،،اي عفيه عليك عرفت شاريد كلت
ليش يروح هالخير مال عم فاروق الك
اني اولى بي
فز من مكانه وصاح
«،،،،سمعتي سعاااد سمعته صالح ابنك
طلع طامع بفلوسهم ويريد بنته حتى ياخذ
خير ابويه الي ضحك علي
ذاك واخذهن منه بسالفه ماتخش العقل
كمت من مكاني بهدؤ وجاوبته
«،،ياطلابه فلوس جدي الماراح تخلص
امي اجت عليه تكفخ بيه مقداد واحمد
وكف بوجهها تصيح
«،،،ولك انت شنو غضب الله دزك عليه
مقداد صاح بيها
«،،،كافي ماامليتي من هالسالفه
«،،،،اسمعووااااا كلكم
صحت وكملت
«،،،وانت بالذات
اشرت لخالي
«،،،بنتك مااريدها لو صغتها من فوك لجوة
ذهب لو بلااااش ماااخذها وابنك
هذا العار لو شفته بعد يمهم
اخلي طلقه براسه
واسلمه الك
جنازه
«،،،ااانجب ساقط دايح
امي انهدت بيه ومااشوفها غير تضربني
بالنفاضه اجت بگصتي وجرحتني
حسيت شي حار نزل
على عيوني
مقداد تخبل هو واحمد وكامو يصيحون
عليها ابويه يصيح
«،،،حيل بي وابو زايد
هي صاحت بيه
«،،،تروح فدوه لمهند انت واخوتك
دگيت راسي بالگشن اريد انسى الشفته
منها ماكدرت ولا راح اكدر انسى
اي شي من الشفته منهم
فتحت عيوني ورجعت للمستقبل من من شفتها طلعت بسيارتها العيون عليها
وهالشي جنت اشوفه بالماضي
والغيره ،،، لعبت بروحي
لعب وخلتني اكثر من مرة
اتعارك وياها
حركت لاراديا وراها مشيت مسافه
عنها وعيوني عليها اسأل بروحي
«،،،،ليش امشي وراها هو مو كلشي انتهى
مو كلشي مات بينا وانكسرت
واكيد هسه ازوجته الجانت
تلعب ويا من ورة ظهري
سكتت اون من قهري كملت
«،،،ارجع قائد وانساها ،،،،شوفها شلون عايشه
حياتها ووكفت ادحك
عليك بعيون گويه وعبالك
مو مسويه شي
وكفنا يم اشاره ضوئيه سياره وكفت بصفها
بيها شباب اثنين ماشالو عيونهم
منها من صارت خضره
مشت هم وراها
كم خطوة وكسرو
عليها
شكرا لزيارتكم عالم روايات سكيرهوم
